CNI International News

ဘန်ကောက်၊ ဒီဇင်ဘာ ၇

အနည်းဆုံးလုပ်ခလစာနှင့် ကောက်ပဲသီးနှံဈေးနှုန်းကို မြှင့်တင်ပေးသွားမည်ဟု ထိုင်းနိုင်ငံ၏ ပင်မအတိုက်အခံ ပါတီတစ်ခုဖြစ်သော ဖြူးထိုင်းပါတီက အင်္ဂါနေ့တွင် ကတိပြုခဲ့သည်ဟု Bangkok Post သတင်းတွင်ဖော်ပြသည်။

လာမည့်နှစ်အစောပိုင်းတွင် ကျင်းပရန်ရည်ရွယ်ထားသည့် ရွေးကောက်ပွဲများတွင် စစ်တပ်နှင့်ဆက်နွယ်နေသည့် ဆယ်စုနှစ် တစ်ခုကြာအုပ်ချုပ်မှုကို အဆုံးသတ်ရေးမဲဆွယ်မှုများ စတင်ချိန်တွင် ထိုသို့ ပြောဆိုခဲ့ခြင်းဖြစ်သည်။

သူတို့ကိုသာ မဲပေးရွေးချယ်ခဲ့မည်ဆိုလျှင် စီးပွားရေးဖွံ့ဖြိုးမှုကို နှစ်စဉ်ပျမ်းမျှ ၅ ရာခိုင်နှုန်းမြှင့်တင်ရန်၊ ကျန်းမာရေး စောင့်ရှောက်ပေးနိုင်မှုကို တိုးချဲ့ရန်နှင့် ပြည်သူများဝင်ငွေပိုမိုရရှိစေရေးတီထွင်မှုအရည်အသွေးနှင့် ဒစ်ဂျစ်တယ် စီပွားရေးတို့အား လုပ်ဆောင်ပေးသွားမည်ဟုလည်း ဖြူးထိုင်းပါတီက ကတိပေးသည်။

ပြူထိုင်းပါတီ၏ မဲဆွယ်မှုကို ဝန်ကြီးချုပ်ဟောင်း သက်ဆင်ရှင်နာဝပ်ထရာ(Thaksin Shinawatra)၏ သမီးဖြစ်သူ ပေတုန်တန်း(Paetongtarn) က အင်္ဂါနေ့တွင်စတင်ခဲ့ကာ ၎င်းမှာ အမတ်နေရာ ၅၀၀ ရှိသော လွှတ်တော်အတွက် ရွေးကောက်ပွဲများတွင် သောင်ပြိုကမ်းပြိုအနိုင်ရရှိရေး ကြိုးပမ်းမှု၏ အစိတ်အပိုင်းတစ်ခုလည်းဖြစ်သည်။ ရွေး ကောက်ပွဲများကို လာမည့်မတ်လတွင် ကျင်းပရန် စီစဉ်ထားသည်။

ထိုင်းဝန်ကြီးချုပ်ဟောင်း သက်ဆင်ရှင်နာဝပ်၏ သမီးဖြစ်သူ ပေတုန်တန်း

အဆိုပါ ရွေးကောက်ပွဲတွင် ဖြူးထိုင်းပါတီက အနိုင်ရရှိမည်ဟု သတင်းကြီးနေသော်လည်း အစိုးရဖွဲ့ရန် လိုအပ် သော လွှတ်တော်အတွင်း နေရာ ၂၅၀ အတွက် တခြားသောပါတီများ၏ ထောက်ခံမှုများမှာ လိုအပ်နေဆဲ ဖြစ်သည်။ ထိုမှတစ်ဆင့် ဝန်ကြီးချုပ်ကို ဆက်လက်ရွေးချယ်မည် ဖြစ်သည်။

အတိုက်အခံပါတီသည် လက်ရှိဝန်ကြီးချုပ် ပရာယွတ် (Prayut) ၏ အုပ်ချုပ်မှုကို အဆုံးသတ်ရေးအတွက် စီးပွားရေးနာလန်ထူရန် ရုန်းကန်နေရမှု၊ လူနေမှုစရိတ်ကြီးမြင့်လာမှုတို့အပေါ် ပြည်သူများ၏ အလိုမကျမှုကို အခြေခံကာ မဲဆွယ်မှု လုပ်ဆောင်နေသည်။

ငွေကြေးဖောင်းပွမှုမြင့်တက်နေခြင်းနှင့် ကူးစက်ရောဂါအလွန် ကာလအတွင်း စီးပွားရေးရုန်းကန်နေရသည့် အခြေအနေများကြောင့် မကြာသေးခင်ကပြုလုပ်ခဲ့သော လူထုစစ်တမ်းအတွင်း ပရာယွတ်သည် ပေတုန်တန်း၏ နောက်တွင်သာရှိနေသည်။

“ကျနော်တို့ ယခုရွေးကောက်ပွဲကို ရှုံးလို့မဖြစ်ပါဘူး။ ကျနော်တို့အနေနဲ့ ပြည်သူများအတွက် အခွင့်အရေးများနဲ့ မျှော်လင့်ချက်များကို ပြန်လည်ယူဆောင်ပေးရပါမည်” ဟုလည်း ဖြူးထိုင်းပါတီခေါင်းဆောင် ချိုနန်ဆရီကော က ပြောသည်။

Source:Bangkok Post

CNI International News

ဂူဝါဟာတီ၊ ဒီဇင်ဘာ ၇

ကူကီးလက်နက်ကိုင်တပ်ဖွဲ့ ၂ ဖွဲ့နှင့် အိန္ဒိယအစိုးရကြား သုံးပွင့်ဆိုင် အပစ်အခတ်ရပ်စဲရေး သဘောတူညီချက်ကို အစိုးရမှ ချက်ချင်းရုပ်သိမ်းရန် မဏိပူရ ငြိမ်းချမ်းရေးနှင့် တိုးတက်ရေး ပြည်သူ့ပူးပေါင်းအဖွဲ့ (PAPPM)က တောင်း ဆိုလိုက်ကြောင်း Northeast Now သတင်းဌာနက ရေးသားဖော်ပြထားသည်။

PAPPM သည် အရှေ့မြောက်ပိုင်း ပြည်နယ်ရှိ အရပ်ဘက် အဖွဲ့အစည်း တစ်ခုဖြစ်သည်။

၂၀၀၈ ခုနှစ်၊ သြဂုတ် ၂၂ ရက်တွင် မဏိပူရ ပြည်နယ်အစိုးရနှင့် ဗဟိုအစိုးရ(အိန္ဒိယ)တို့က ညီညွှတ်သော ပြည်သူ့ တပ်ဦး(UPF)၊ ကူကီးအမျိုးသားအစည်းအရုံး(KNO)တို့နှင့် သုံးပွင့်ဆိုင် အပစ်အခတ်ရပ်စဲရေး သဘောတူညီချက် တွင် လက်မှတ် ရေးထိုးခဲ့သည်။

အဆိုပါ သဘေတူညီချက် သက်တမ်းကုန်ဆုံးချိန်တွင် အစိုးရဘက်မှ သက်တမ်းတိုးမှု လုပ်ဆောင်ခဲ့သည်။ ၂၀၀၈ ခုနှစ်ထဲမှာပင် ဇိုမီလွတ်မြောက်ရေးအဖွဲ့(ZRO) နှင့်လည်း အလားတူ သဘောတူညီချက်မျိုး ရယူခဲ့သည်။

ထိုသဘောတူညီချက်ကို ဆက်လက် လုပ်ဆောင်နေခြင်းက မဏိပူရပြည်နယ်ရှိ ပြည်သူများ၏ သင့်မြတ်စွာ အတူ ယှဉ်တွဲ နေထိုင်မှုကို ထိခိုက်စေရုံမက အိန္ဒိယနိုင်ငံ၏ အမျိုးသားလုံခြုံရေးအတွက်ပါ ခြိမ်းခြောက်မှုတစ်ခု ဖြစ်လာ လိမ့်မည်ဟု PAPPM က ပြောသည်။

ထို့ကြောင့် သဘောတူညီချက်မှ နုတ်ထွက်ရန် တောင်းဆိုခဲ့ခြင်းဖြစ်သည်။

 မဏိပူရပြည်နယ် အင်ဖာမြို့မှာ အာသံရိုင်ဖယ်တပ်က လုံခြုံရေးယူထားစဉ် (CNI)

ယခု တောင်းဆိုမှုကို PAPPM ဘက်မှ အိန္ဒိယဝန်ကြီးချုပ် မိုဒီ (Narendra Modi)၊ အိန္ဒိယပြည်ထဲရေးဝန်ကြီး အာမစ်ရှား (Amit Shah)နှင့် မဏိပူရပြည်နယ် ဝန်ကြီးချုပ် အန်ဘီရန်ဆင်း (N Biren Singh)တို့ထံလည်း စာရေးသား တောင်းဆိုခဲ့သည်။

အဆိုပါ လက်နက်ကိုင် တပ်ဖွဲ့များသည် သဘောတူညီချက်ကို ခုတုံးလုပ်ကာ မဏိပူရပြည်နယ်တွင်းရှိ တောင်တန်းများတွင် ဘိန်းစိုက်ပျိုးမှုကို လုပ်ဆောင်နေကြောင်း၊ သဘောတူညီချက် စတင်ချိန်မှစ၍ ပြည်နယ်အတွင်း မူးယစ်ဆေးဝါး ကုန်သွယ်မှုမှာ မြင့်တက်လာကြောင်း PAPPM ဘက်က စွပ်စွဲထားသည်။

ထို့အပြင် အပစ်အခတ်ရပ်စဲရေး သဘောတူညီချက်ကို အသုံးချပြီး ကူကီးလက်နက်ကိုင်များသည် မြန်မာနိုင်ငံ ဘက်မှ လူများကို ခေါ်ဆောင်၍ တောင်တန်းများပေါ်တွင် အခြေကျ နေထိုင်စေကြောင်း PAPPM ၏ အိန္ဒိယ ဗဟိုအစိုးရသို့ ပေးပို့သည့် စာထဲမှာ ဖော်ပြထားသည်။

ထို့နောက် တောင်ကုန်းဒေသများတွင် ခြိမ်းခြောက်ငွေညှစ်မှုများ ရှိလာသည့်အပြင် KNA/KNO ၊ ZRA/ZRO တို့နှင့် သဘောတူညီချက်သည့် ပြည်နယ်အတွင်း နှစ်ပေါင်းများစွာ အတူယှဉ်တွဲ နေထိုင်လာသော ဒေသခံများ၏ အကျိုး စီးပွားအပြင် မဏိပူရပြည်နယ်၊ အိန္ဒိယနိုင်ငံတို့၏ ငြိမ်းချမ်းမှုနှင့် တိုးတက်မှုတို့ကို ထိခိုက်စေသည်ဟု PAPPM အဖွဲ့က စွပ်စွဲပြောဆိုထားသည်။

Source: Northeast Now

CNI International News

အူလန်ဘာတာ၊ ဒီဇင်ဘာ ၇

လွှတ်တော်တွင်းသို့ ဝင်ရောက်ရန်ကြိုးပမ်းခဲ့သည့် မွန်ဂိုလီးယား ဆန္ဒပြသူများနှင့် ရဲတပ်ဖွဲ့တို့အကြား ပဋိပက္ခ များဖြစ်ပွားခဲ့သည်ဟု ရိုက်တာသတင်းတွင်ဖော်ပြသည်။

ငွေကြေးဖောင်းပွမှုမြင့်မားလာခြင်းနှင့် အစိုးရ၏အကျင့်ပျက်ခြစားခြင်းများကြောင့် အေးခဲနေသော အခြေအနေ အတွင်း လူထောင်ပေါင်းများစွာက စုဝေးဆန္ဒပြခဲ့ကြခြင်းဖြစ်သည်။

မြို့တော် အူလန်ဘာတာတွင် ဆန္ဒပြသူများသည် တနင်္ဂနွေနေ့မှ စတင်ခဲ့ခြင်းဖြစ်သည်ဟု လွတ်လပ်သော ရုပ်သံဌာန TenGer က ပြောသည်။ အစိုးရအရာရှိများသည် တရုတ်နိုင်ငံသို့ ကျောက်မီးသွေးရောင်းချခြင်းမှ အကျိုးအမြတ်ရရှိနေသည်ဟု ပေါ်ထွက်လာသော စွပ်စွဲချက်များကြောင့် ဆန္ဒပြပွဲများ အရှိန်ပြင်းထန်လာခြင်း ဖြစ်သည်။

ဆန္ဒပြသူများကို အစိုးရလွှတ်တော်တည်ရှိရာ နန်းတော်အပြင်ဘက်မှ ရဲများက စောင့်ကြပ်ကြည့်ရှုနေစဉ် (ဓါတ်ပုံ-ရိုက်တာ)

တနင်္လာနေ့တွင်လည်း ဆန္ဒပြပွဲများဆက်လက်ဖြစ်ပွားခဲ့ကာ လွှတ်တော်တည်ရှိရာ အစိုးရနန်းတော်ရှေ့တွင် ဆန္ဒပြသူများနှင့် ရဲတပ်ဖွဲ့ဝင်တို့ကြား ပဋိပက္ခဖြစ်ပွားခဲ့သည်။ လွှတ်တော်အဆောက်အဦကို ဝင်စီးရန် ကြိုးပမ်းခဲ့ သူများက နောက်ပိုင်းတွင် ရဲများနှင့် ကြမ်းကြမ်းတမ်းတမ်းထိပ်တိုက်တွေ့ဆုံမှုများလည်း ပြုလုပ်ခဲ့သည်။

အစိုးရအဖွဲ့များချမ်းသာသည်ထက် ချမ်းသာလျက်ရှိပြီး ပြည်သူတွေထက်ပို၍ ဇိမ်ကျကျနေနိုင်လျက်ရှိကြောင်း၊ ပြည်သူများအနေဖြင့် ပေါင်မုန့်ကိုပင်အချပ်လိုက် ဝယ်စားနေရသည့်အခြေအနေတွင် ယင်းတို့ အဘယ့်ကြောင့် တည်တည်ငြိမ်ငြိမ်ဖြစ်နေနိုင်သလဲဆိုတာမသိကြောင်းနှင့် ယနေ့ဆန္ဒပြပွဲကို ပြည်သူများအတွက် ပါဝင်ခဲ့ရခြင်း ဖြစ်ကြောင်း ဆန္ဒပြသူတစ်ဦးက TenGer TV သို့ ပြောသည်။

ဆန္ဒပြပွဲများကြောင့် လက်ရှိအာဏာရပါတီမှ အမှုဆောင်ကော်မတီက အရေးပေါ်အစည်းအဝေးတစ်ရပ်ကို အင်္ဂါနေ့တွင်ပြုလုပ်ခဲ့သည်ဟုသိရပြီး အဆိုပါအစည်းအဝေးနှင့်ပတ်သက်သည့် အသေးစိတ် အချက်အလက် များကိုမူ မသိရသေးကြောင်း ရုပ်သံဌာနက ပြောသည်။

Source:usnews.com

CNI International News

ဆိုးလ်၊ ဒီဇင်ဘာ ၆

မြောက်ကိုရီးယားနိုင်ငံက ဒီဇင်ဘာ ၅ ရက်နေ့က နှစ်နိုင်ငံ၏ အနောက်နှင့်အရှေ့ဘက် ပင်လယ်နယ်စပ် ရေပြင် အနီးသို့ အမြောက်ပစ်ခတ်မှု အကြိမ်ရေ ၁၃၀ နီးပါး ပြုလုပ်ခဲ့သည်ဟု AP သတင်းတွင် ဖော်ပြထားသည်။

အဆိုပါ စစ်ရေးလှုပ်ရှားမှုက အိမ်နီးချင်း နှစ်နိုင်ငံကြား ဆက်ဆံရေးကို ပိုမို ဆိုးရွားလာစေခဲ့သည်။

ယခု ပစ်ခတ်မှုများသည် တောင်ကိုရီးယား၏ ချော်ဝန် (Cheorwon)ကုန်းတွင်း နယ်စပ်မြို့အနီး အမြောက် လေ့ကျင့်ရေး လုပ်ဆောင်နေမှုအပေါ် သတိပေးခြင်း ဖြစ်ကြောင်း၊ တောင်ကိုရီးယာားနိုင်ငံသည် တင်းမာမှုများကို ပိုများလာအောင် လုပ်ဆောင်နေသည်ဟုလည်း မြောက်ကိုရီးယားစစ်တပ်က စွပ်စွဲသည်။

မြောက်ကိုရီးယားသည် ဒုံးကျည်များ ပစ်လွှတ်ခြင်းကို တနင်္လာနေ့ မွန်းလွဲပိုင်းတွင် နိုင်ငံ၏ အရှေ့နှင့်အနောက် ဘက် ကမ်းရိုးတန်းဒေသများမှ ပစ်ခတ်ခဲ့ခြင်းဖြစ်သည်ဟု တောင်ကိုရီးယား ပူးတွဲစစ်ဦးစီးချုပ်က ပြောသည်။

ထိုပစ်ခတ်မှုများသည် စစ်မဲ့ဇုန်၏ မြောက်ဘက်အတွင်းသို့ ကျရောက်ခဲ့သည်ဟု သိရသော်လည်း တောင်ကိုရီးယား ပိုင်နက်တွင်းသို့ ကျရောက်ခဲ့ခြင်း ရှိ/မရှိကိုတော့ မသိရသေးပေ။

တောင်ကိုရီးယား ပူးတွဲစစ်ဦးစီးချုပ်ကိုတွေ့ရစဉ် (GETTY IMAGES)

တောင်ကိုရီးယားစစ်ဘက်က ယခုပစ်ခတ်မှုများနှင့်ပတ်သတ်၍ မြောက်ကိုရီးယားကို နှုတ်အားဖြင့် သတိပေးမှု ပြုလုပ်ထားကာ သဘောတူညီချက်များကို လိုက်နာရန် တိုက်တွန်းထားသည်။

တောင်ကိုရီးယားနှင့် အမေရိကန်တို့က မြောက်ကိုရီးယား၏ စစ်ရေးလှုပ်ရှားမှုများကို အနီးကပ် စောင့်ကြည့် လျက်ရှိပြီး ပေါ်ပေါက် လာနိုင်သည့် အရေးပေါ် အခြေအနေများအတွက် အဆင်သင့် ပြင်ထားသည်ဟုလည်း တောင်ကိုရီးယားစစ်ဦးစီးချုပ်က ကြေညာချက် တစ်စောင် ထုတ်ပြန်ကြေညာထားသည်။

တောင်ကိုရီးယား စစ်တပ်သည် ဒုံးကျည်မျိုးစုံ ပစ်ခတ်ခြင်းစနစ်များနှင့် ဟောင်ဝစ်ဇာ (howitzer) များ အပါအဝင် အမှန်တကယ် ပစ်ခတ်လေ့ကျင့်မှုများကို တနင်္လာနေ့မှ ဗုဒ္ဓဟူးနေ့အထိ ချော်ဝန်ဒေသရှိ မတူညီသော နေရာနှစ်ခု တွင် ပြုလုပ်လျက်ရှိသည်။

မြောက်ကိုရီးယားဘက်မှ ပစ်ခတ်တုန့်ပြန်မှုများ မတိုင်ခင် ရက်ပိုင်းအတွင်း အမေရိကန်၊ တောင်ကိုရီးယားနှင့် ဂျပန်တို့က မြောက်ကိုရီးယားရှိ လူပုဂ္ဂိုလ်များနှင့် အဖွဲ့အစည်းတချို့ကို ပစ်မှတ်ထားသည့် အရေးယူ ဒဏ်ခတ်မှုများ ချမှတ်ကြောင်း ကြေညာခဲ့သည်။

Source: AP

CNI International News

ခါတွန်၊ ဒီဇင်ဘာ - ၆

ဆူဒန်အာဏာသိမ်း စစ်တပ်နှင့် နိုင်ငံရေးပါတီများက ရွေးကောက်ပွဲ ကျင်းပရေးဆိုသော အချက် ပါဝင်သည့် အသွင်ကူးပြောင်းရေးဆိုင်ရာ မူဘောင်တစ်ခုကို သဘောတူ လက်မှတ်ရေးထိုးခဲ့ကြကြောင်း  အယ်ဂျာဇီးယား သတင်းတွင် ဖော်ပြထားသည်။

အဆိုပါ သဘောတူညီချက်သည် ၂၀၂၁ အာဏာသိမ်းမှုကြောင့် ပေါ်ပေါက်လာသော မတင်မကျ အခြေအနေကို အဆုံးသတ် ပေးမည်လည်း ဖြစ်သည်။

သို့သော် တနင်္လာနေ့တွင် ရေးထိုးခဲ့သော သဘောတူညီချက်ကို စစ်တပ်ဆန့်ကျင့်ရေး ဆန္ဒပြ အဖွဲ့အစည်းများနှင့် ခေါင်းဆောင်ဟောင်း အိုမာအယ်လ် ဘာရှား(Omar al-Bashir) ကိုထောက်ခံသည့် အဖွဲ့အစည်းများ အပါအဝင် ပင်မနိုင်ငံရေး အင်အားစုများက ကန့်ကွက်သည်။

ဆူဒန်စစ်တပ် ခေါင်းဆောင် အဘ်ဒဲလ်-ဖာတတ် ဘာဟန်ကိုတွေ့ရစဉ် (AFP)

ကနဦး သဘောတူညီချက်တွင် ဝန်ကြီးချုပ်တစ်ဦးမှ ဦးဆောင်မည့် လုံခြုံရေးနှင့်ကာကွယ်ရေးကောင်စီတွင် စစ်တပ်၏ ပါဝင်မှုကို ကန့်သတ်ထားမည် ဖြစ်သည်။

သို့သော်လည်း အသွင်ကူးပြောင်းရေးဆိုင်ရာ တရားရေးနှင့် လုံခြုံရေးကဏ္ဍပြောင်းလဲမှု အပါအဝင် ထိလွယ်ရှ လွယ်သော အကြောင်းအရာများနှင့်ပတ်သတ်၍ ဆက်လက် ဆွေးနွေးရဦးမည် ဖြစ်သည်။

ယခု သဘောတူညီချက်တွင် စစ်တပ်အနေဖြင့် ဝန်ကြီးချုပ်သစ် လက်အောက်တွင် ပေါ်ပေါက်လာမည့် လုံခြုံရေး နှင့်ကာကွယ်ရေးကောင်စီ အသစ်၏ အစိတ်အပိုင်း တစ်ခုအဖြစ် ရှိနေပေးရန်လည်း တောင်းဆိုထားသည်။

ဆူဒန် လက်နက်ကိုင် တပ်ဖွဲ့များကို စုစည်းရန်နှင့် စစ်တပ်ပိုင်ကုမ္ပဏီများအပေါ် ထိန်းချုပ်မှုများ လုပ်ဆောင်ရန် လည်း သဘောတူညီချက်တွင် တိုက်တွန်းထားသည်။

ဆူဒန်စစ်တပ် အာဏာသိမ်းမှု ဆန့်ကျင်နေကြစဉ်(GETTY IMAGES)

အဆိုပါ သဘောတူညီချက်အား ဆူဒန်နိုင်ငံကို အုပ်ချုပ်နေသည့် ဗိုလ်ချုပ်နှစ်ဦးဖြစ်သော အဘ်ဒဲလ်-ဖာတတ် ဘာဟန် (Abdel-Fattah Burhan)၊ မိုဟာမက် ဟမ်ဒန် ဒါဂါလို (Mohammed Mamdan Dagalo) တို့နှင့် နိုင်ငံ၏ အကြီးမားဆုံး ဒီမိုကရေစီ လိုလားသည့်အဖွဲ့ (Forces of Freedom and Change)မှ ခေါင်းဆောင်များက ခါတွန်ရှိ ရီပတ်ပလီကန် နန်းတော်တွင် လက်မှတ်ရေးထိုးခဲ့သည်။

သို့သော် အထက်ပါ သဘောတူညီချက်ကို ဒီမိုကရေစီလိုလားသည့် Resistance Committee မှ ခေါင်းဆောင်များ က ဆန့်ကျင်ရန် တောင်းဆိုထားသည်။

အသွင်ကူးပြောင်းမှုဆိုင်ရာ တရားရေးနှင့်လုံခြုံရေးကဏ္ဍ ပြုပြင်ပြောင်းလဲမှုများသည် မည်သည့် သဘောတူညီမှု မျိုးတွင်မဆို အစပိုင်းကတည်းက ပါဝင်ရမည်ဟုလည်း ၎င်းတို့က ယုံကြည်ထားသည်။

သမ္မတနန်းတော်တွင် အသွင်ကူးပြောင်းရေး သဘောတူညီချက် လက်မှတ်ရေးထိုးမှု မတိုင်ခင် ဆန္ဒပြသူများက ခါတွန်မြို့ရှိ ဧရိယာအနည်းဆုံး ၂ ခုခန့်၌ ဆန္ဒပြမှုများ ပြုလုပ်ခဲ့သည်။

သို့သော် ယခုသဘောတူညီချက်ကို ကုလသမဂ္ဂ အပါအဝင် တခြားသော နိုင်ငံများက ကြိုဆိုခဲ့ကြသည်။ ဆူဒန် စစ်တပ်သည် အာဏာသိမ်းယူပြီးနောက် ဝန်ကြီးချုပ်သစ်ကို ခန့်အပ်ခဲ့ခြင်း မရှိခဲ့သောကြောင့် စစ်တပ်နှင့် Forces of Freedom and Change အဖွဲ့တို့အကြား အာဏာခွဲဝေရေး သဘောတူညီချက် ရရှိရန် ခက်ခဲခဲ့ရခြင်း ဖြစ်သည်။

Source: Al Jazeera

CNI International News

၂၀၂၂ ခုနှစ်၊ ဒီဇင်ဘာ ၅

အယ်လ်ဆာဗေးဒေါတွင် စစ်သားများသည် တစ်ချိန်က မူးယစ်နှင့် လူဆိုးဂိုဏ်းများအုပ်ချုပ်ခဲ့သည့် နေရာကို ယနေ့ (ဒီဇင်ဘာ ၅ ရက်)တွင် ကင်းလှည့်ကြသည်။

အယ်လ်ဆာဗေးဒေါစစ်သားများက လူတစ်ဦးကို ဖမ်းဆီးလာစဉ် (AFP)

"အရင်က၊ ဘုရားသခင်တောင်မှ ငါတို့ကို လူဆိုးတွေလက်ကနေ မကယ်နိုင်ခဲ့ဘူး၊ ဒီနေ့က မတူဘူး"ဟု ပြည်သူတစ်ဦးက ပြောသည်။

CNI International News

အန်မန်၊ ဒီဇင်ဘာ ၅

ဆီးရီးယားနိုင်ငံ၏ စီးပွားရေးအခြေအနေဆိုးရွားနေမှုအပေါ် ဒေါသထွက်နေကြသော ဆန္ဒပြသူပေါင်းများစွာက တနင်္ဂနွေနေ့တွင် အစိုးရရုံးတစ်ခုကို ဝင်ရောက်စီးနင်းမွှေနှောက်ခဲ့ကြသည်ဟု ရိုက်တာသတင်းတွင် ဖော်ပြသည်။

နိုင်ငံတောင်ပိုင်း ဆွိုင်ဒါမြို့တွင် အဆိုပါဖြစ်ရပ်ဖြစ်ပွားခဲ့ကာ ရဲများနှင့်ဆန္ဒပြသူများအကြား အပြန်အလှန် ပစ်ခတ်မှုများ ပေါ်ပေါက်ခဲ့သည်ဟုလည်း အာဏာပိုင်များနှင့် မျက်မြင်တွေ့ရှိသူများက ပြောသည်။

တနင်္ဂနွေနေ့အစောပိုင်းတွင် ဆန္ဒပြသူ ၂၀၀ ကျော်က မြို့လယ်ရှိ အဆောက်အဦတစ်ခုကိုဝိုင်းရံကာ ကုန်ဈေးနှုန်း ကြီးမြင့်ခြင်းနှင့် စီးပွားရေးဆိုင်ရာ ခက်ခဲခြင်းများကြောင်း သမ္မတ ဘာရှားအာဆတ်(Bashar Assad) ကို ဖြုတ်ချ ရေး ကြွေးကြော်ခဲ့သည်။

အစိုးရထိန်းချုပ်ထားသောဒေသတွင် မကြာခဏဆိုသလို အစိုးရဆန့်ကျင်ရေးဆန္ဒပြပွဲများ ပေါ်ပေါက်လေ့ရှိပြီး အာဏာပိုင်များဘက်ကလည် ပြန်လည်တုန့်ပြန်လေ့ရှိသည်။ ဆန္ဒပြသူများက ပြည်နယ်အုပ်ချုပ်ရေးမှူးရုံးကို ဝင်စီးကာ ဖိုင်များနှင့် စာရွက်စာတမ်းများကို မီးရှို့ခဲ့သည်ဟု ဆီးရီးယားနိုင်ငံပိုင် သတင်းတွင်ဖော်ပြသည်။

မီးရှို့ဖျက်ဆီးခြင်းခံလိုက်ရသည့် အဆောက်အဦရှေ့တွင် ဆန္ဒပြသူများအား တွေ့ရစဉ်

ဆန္ဒပြသူများသည် မြို့၏ရဲတပ်ဖွဲ့ရုံးချုပ်ကို ဝင်စီးရန်ကြိုးစားခဲ့ပြီး ပဋိပက္ခများအတွင်း ရဲတပ်ဖွဲ့ဝင်တစ်ဦး သေဆုံးခဲ့ရသည်ဟု ပြည်ထဲရေးဌာနက ပြောသည်။ အခင်းဖြစ်ပွားချိန်တွင် အုပ်ချုပ်ရေးမှူးသည် ရုံးအတွင်း ရှိမနေဘဲ စီးနင်းမှုမဖြစ်ခင်ကတည်းက တိမ်းရှောင်သွားခဲ့သည်ဟု မျက်မြင်တွေ့ရှိသူများက ပြောသည်။

ဆန္ဒပြသူများကြောင့် အုပ်ချုပ်ရေးမှူးရုံးသည် အတွင်းပိုင်းလုံးဝပျက်စီးခဲ့ကာ အပြန်အလှန်ပစ်ခတ်မှုများအတွင်း လူတစ်ချို့ဒဏ်ရာရရှိခဲ့သည်ဟု တက်ကြွလှုပ်ရှားသူတစ်ဦးက ပြောသည်။ ပြင်းပြင်းထန်ထန်ပစ်ခတ်မှုများ ရှိခဲ့ပြီး မည်သည့်နေရာမှ ပစ်သည်ဆိုသည်ကို ရှင်းရှင်းလင်းလင်းမသိရကြောင်းလည်း ယင်းက ဆက်ပြောသည်။

သေနတ်မှန်ဒဏ်ရာကြောင့် အရပ်သားတစ်ဦးသေဆုံးခဲ့ကာ အခြားတစ်ဦးမှာလည်း ဆေးရုံတက်ကုသနေရသည် ဟု ဆေးဘက်ဆိုင်ရာ သတင်းအရင်းအမြစ်တစ်ခုက ပြောသည်။ ဆီးရီးယားနိုင်ငံတွင် ဒီမိုကရေစီလိုလားသည့် ဆန္ဒပြသူများက အာဆန်ပြုတ်ကျရေးအတွက် ဆယ်စုနှစ်တစ်ခုကျော်ကြာ ဆန္ဒပြပွဲများ လုပ်ဆောင်နေကြခြင်း ဖြစ်ပြီး ယင်းတို့ကိုလုံခြုံရေးတပ်ဖွဲ့များက ပြင်းပြင်းထန်ထန် ဖြိုခွဲလျက်ရှိသည်။ တခြားသော ဆီးရီးယားမြို့များ နည်းတူ ဆွိုင်ဒါပြည်နယ်သို့ အကြမ်းဖက်မှုများ ကူးစက်လာခြင်းလည်း ဖြစ်သည်။

Source:Reuters

တီဟီရန်၊ ဒီဇင်ဘာ - ၅

အီရန်နိုင်ငံ၏ ကျင့်ဝတ်ထိန်သိမ်းရေးဆိုင်ရာ ရဲတပ်ဖွဲ့ကို ဖျက်သိမ်းလိုက်ပြီဟု အီရန်နိုင်ငံရှေ့နေချုပ်က ပြော ကြောင်း BBC သတင်းတွင် ဖော်ပြသည်။

အဆိုပါ ရဲတပ်ဖွဲ့သည် နိုင်ငံတွင်းရှိ အစ္စလာမ္မစ် ဝတ်စားဆင်ယင်မှုနှင့် ပတ်သတ်သည့် ဥပဒေကို ထိန်းသိမ်းရေး ဆောင်ရွက်သော အဖွဲ့ဖြစ်သည်။

ဖျက်သိမ်းရေးနှင့် ပတ်သတ်သည့် ပြောစကားကို ရှေ့နေချုပ် မိုဟာမက် ဂျာဗာ မွန်တာဇာရီ (Mohammad Jafar Montazeri) က တနင်္ဂနွေနေ့ ဘာသာရေး အခမ်းအနားတစ်ခုတွင် ပြောခဲ့ခြင်း ဖြစ်သော်လည်း တခြား သော သတင်းဌာနများတွင် ဖော်ပြလာ ခြင်းမရှိသေးပေ။

ဖမ်းဆီးထိန်းသိမ်းခံ အမျိုးသမီးငယ်တစ်ဦး သေဆုံးခဲ့ရမှုနှင့်ပတ်သတ်၍ အီရန်နိုင်ငံအတွင်း ဆန္ဒပြမှုများ ဖြစ်ပေါ်လျက်ရှိသည်။

အီရန် ရှေ့နေချုပ် မိုဟာမက် ဂျာဗာ မွန်တာဇာရီ (GETTY IMAGES)

သေဆုံးခဲ့သူ မာရှာ အေမီနီ (Mahsa Amini) ကို ခေါင်းဆောင်း ဆောင်းခြင်းနှင့်ပတ်သတ်သည့် တင်းကြပ်သော ဥပဒေများကို ချိုးဖောက်ခဲ့မှုအတွက် ကျင့်ဝတ်ထိန်းသိမ်းရေး ရဲတပ်ဖွဲ့က ဖမ်းဆီးထိန်းသိမ်းခဲ့ခြင်းဖြစ်သည်။

တနင်္ဂနွေနေ့ အခမ်းအနားတွင် ကျင့်ဝတ် ထိန်းသိမ်းရေး ရဲတပ်ဖွဲ့ကို ဖျက်သိမ်းနိုင်ခြေ ရှိ/မရှိနှင့်ပတ်သတ်၍ သတင်းထောက်များက မေးမြန်းခဲ့ရာ “ ကျင့်ဝတ်ထိန်းသိမ်းရေး ရဲတပ်ဖွဲ့နှင့် တရားစီရင်ရေးတို့အကြား ပတ်သတ်စရာ မရှိကြောင်းနှင့် ထိုအဖွဲ့ကို ဖျက်သိမ်းလိုက်ပြီဖြစ်ကြောင်း”ရှေ့နေချုပ်က ပြောခဲ့သည်။

အဆိုပါ အဖွဲ့သည် နိုင်ငံ၏ပြည်ထဲရေးဌာန အောက်တွင် တည်ရှိနေပြီး ၎င်းအဖွဲ့သည် တရားစီရင်ရေးနှင့် မသက်ဆိုင်ကြောင်း သိရသည်။

ကျင့်ဝတ်ထိန်သိမ်းရေးဆိုင်ရာ ရဲတပ်ဖွဲ့ကြောင့် သေဆုံးခဲ့တဲ့ အေမီနီ(GETTY IMAGES)

ရှေ့နေချုပ် မွန်တာဇာရီသည် အမျိုးသမီးများ ဟီဂျက် (Hijab) ခေါင်းဆောင်း ဆောင်းခြင်းနှင့် ပတ်သတ်သည့် ဥပဒေကို သုံးသပ်ရန်အတွက် စနေနေ့က လွှတ်တော်တွင် ပြောခဲ့သည်။ သို့သော် ကျင့်ဝတ်ထိန်းသိမ်းရေး ရဲတပ်ဖွဲ့ကို ဖျက်သိမ်းသည့်တိုင် ဆယ်စုနှစ်ချီ သက်တမ်းကြာနေပြီဖြစ်သော အဆိုပါ ဥပဒေကို ပြောင်းလဲရန်မှာ ဖြစ်လာနိုင်စရာ မရှိပါ။

အီရန်နိုင်ငံတွင် လက်ရှိ ဖြစ်ပွားနေသော ဆန္ဒပြပွဲအများစုကို အမျိုးသမီးများက ဦးဆောင်လျက်ရှိပြီး အာဏာပိုင်များက ထိုဆန္ဒပြပွဲများကို “ ဆူပူမှု” ဟု ခေါင်းစဉ်တပ်သည်။

အသက် ၂၂ နှစ်အရွယ် အာမီနီသည် ဒီဇင်ဘာ ၁၆ ရက်နေ့က ရဲဘက်ထိန်းသိမ်းမှုတွင် သေဆုံးခဲ့ရခြင်းဖြစ် သည်။ အဆိုပါ နေ့မတိုင်ခင် ၃ ရက်အလိုမှ သူမကို ကျင့်ဝတ်ထိန်းသိမ်းရေး ရဲတပ်ဖွဲ့က တီဟီရန်မြို့တွင် ဖမ်းဆီးခဲ့ခြင်းဖြစ်သည်။

သူမ သေဆုံးခဲ့သည့် ကိစ္စကြောင့် ဆန္ဒပြပွဲများ စတင်လာခဲ့ခြင်းဖြစ်သော်ငြား နိုင်ငံ၏ဆင်းရဲမွဲတေမှု၊ အလုပ် လက်မဲ့မှု၊ တရားမမျှတမှုနှင့် အကျင့်ပျက် ခြစားမှုများကလည်း ဆန္ဒပြပွဲများကို ပိုပြီးအရှိန် ကောင်းမွန်လာ စေလျက်ရှိသည်။

Source: BBC

CNI International News

ဂျေရုဆလင်၊ ဒီဇင်ဘာ ၅

တနင်္ဂနွေနေ့မနက်အစောပိုင်းတွင် အစ္စရေးလေတပ်က ဂါဇာကမ်းမြှောင်ဒေသကို လေကြောင်းတိုက်ခိုက်မှု ပြုလုပ်ခဲ့သည်ဟု Xinhua သတင်းတွင်ဖော်ပြသည်။

အစောပိုင်းအတွင်း အစ္စရေးမြေပေါ်သို့ ဂါဇာဘက်မှ ဒုံးကျည်ဖြင့်ပစ်ခတ်မှုကို ယခုကဲ့သို့ တုန့်ပြန်တိုက်ခိုက်ခြင်း လည်းဖြစ်သည်။ အစ္စရေးကာကွယ်ရေးတပ်ဖွဲ့ Israeli Defense Forces (IDF) က ယခုတိုက်ခိုက်မှုများသည် ဂါဇာဒေသရှိ ဟားမတ်ဇ်အဖွဲ့ပိုင် လက်နက်ထုတ်လုပ်ရေးစက်ရုံတစ်ခုကို ပစ်မှတ်ထားကြောင်းနှင့် အဆိုပါ စက်ရုံသည် ဂါဇာရှိ ဒုံးကျည်အများစုကို ထုတ်လုပ်ပေးရာနေရာဖြစ်သည်ဟုလည်း ပြောသည်။

တိုက်ခိုက်မှုများတွင် ဟားမတ်ဇ်တို့၏ နယ်စပ်ဖြတ်ကျော် ဥမင်များကိုလည်း ပစ်မှတ်ထားခဲ့သည်ဟု သိရသည်။ အစ္စရေးဘက်မှ တုန့်ပြန်လေကြောင်းတိုက်ခိုက်မှုမတိုင်ခင် နာရီအနည်းငယ်၌ ဂါဇာကမ်းမြှောင်ဒေသမှ ဒုံးကျည် တစ်ခု အစ္စရေးတောင်ပိုင်းသို့ကျရောက်ခဲ့သည်။

အစ္စရေးဘက်မှ လေကြောင်းဖြင့် ပြန်လည်တုံ့ပြန်တိုက်ခိုက်မှု(ဓါတ်ပုံ-credit)

အဆိုပါတိုက်ခိုက်မှုကြောင့် ထိခိုက်ဒဏ်ရာရမှု၊ ပျက်စီးမှု တစ်စုံတစ်ရာမရှိခဲ့သလို ယခုတိုက်ခိုက်မှုအတွက်လည်း မည်သည့်အဖွဲ့အစည်းကမှ တာဝန်ယူခဲ့ခြင်း မရှိသေးပေ။ ညတွင်းချင်းတိုက်ခိုက်ရခြင်းမှာ ဟားမက်ဇ်အဖွဲ့၏ စစ်ပြင်ဆင်မှုကို တားဆီးရန်ဖြစ်သည်ဟုလည်း IDF ၏ ကြေညာချက်တွင်ဖော်ပြထားသည်။ ဟားမတ်ဇ်အဖွဲ့သည် ဂါဇာကမ်းမြှောင်ဒေသကို ၂၀၀၇ ခုနှစ်တွင် ထိန်းချုပ်နိုင်ခဲ့သည်။ ထိုအချိန်မှစကာ အစ္စရေးဘက်မှ ဂါဇာကို အင်အားများစွာဖြင့်တင်းတင်းကြပ်ကြပ်ပိတ်ဆို့ထားခဲ့သည်။

ပြီးခဲ့သည့်သီတင်းပတ်အစောပိုင်းတွင်လည်း အစ္စရေးစစ်တပ်က အနောက်ဘက်ကမ်း ဂျီနင်မြို့ရှိ ပါလက်စတိုင်း အစ္စလာမ္မစ်ဂျီဟတ်အဖွဲ့(PIJ)၏ ထင်ရှားသောအဖွဲ့ဝင်နှစ်ဦးကို သတ်ခဲ့သည်ဖြစ်ရပ်အတွက်လည်း ပြန်လည် လက်စားချေသွားမည်ဟု PIJ ဘက်မှ ကြုံးဝါးထားသည်။

Source:English.News