- By CNI
- Category: နိုင်ငံရေး
- Hits: 682
CNI International News
ပြုံယမ်း၊ စက်တင်ဘာ ၂၂
ယူကရိန်းစစ်ပွဲအတွင်း ရုရှားနိုင်ငံသို့ မည်သည့်လက်နက်မျှ မိမိတို့ မတင်ပို့ခဲ့ကြောင်း၊ ယင်းသို့ လုပ်ဆောင်ရန် လည် အစီအစဉ်မရှိကြောင်း မြောက်ကိုရီးယားက ပြောကြားခဲ့သည်ဟု အေပီသတင်းဌာနက ရေးသားဖော်ပြသည်။
ထို့နောက် လက်နက်လွှဲပြောင်းရေးဆိုင်ရာ အမေရိကန် ထောက်လှမ်းရေး အစီရင်ခံစာများသည် မိမိတို့ ဂုဏ်သိက္ခာ ကျဆင်းအောင် ကြိုးပမ်းနေခြင်းသာဖြစ်ကြောင်း မြောက်ကိုရီးယားက ဆက်လက် ပြောကြားခဲ့သည်။
စက်တင်ဘာ ၂၂ ရက် (ယနေ့) မြောက်ကိုရီးယား မီဒီယာတစ်ခု၏ သတင်းဖော်ပြချက်ထဲတွင် အမည်မဖော်လိုသူ မြောက်ကိုရီးယား ကာကွယ်ရေး အရာရှိတစ်ဦးက “မဆင်မခြင် ပြောဆိုမှုများ ရပ်တန့်ရန်နှင့် ပါးစပ်ပိတ်ထားကြရန်” အမေရိကန်သို့ တုံ့ပြန် ပြောကြားခဲ့သည်။
ရုရှားသည် မြောက်ကိုရီးယားထံမှ သန်းနှင့်ချီသော အမြောက်ကျည်များနှင့် ဒုံးကျည်များ အပါအဝင် စစ်လက်နက် များ ဝယ်ယူနေကြောင်း အမေရိကန် ထောက်လှမ်းရေး၏ အကဲဖြတ်ချက်ကို ယခုလ အစောပိုင်းတွင် ဘိုင်ဒန် အစိုးရတာဝန်ရှိသူများက အတည်ပြုခဲ့ကြသည်။
မြောက်ကိုရီးယားခေါင်းဆောင်နဲ့ စစ်ဘက်ခေါင်းဆောင်များ(KCNA)
မော်စကိုအစိုးရသည် ယူကရိန်းမြေပေါ်တွင် စစ်ဘက်ထောက်ပံ့ ပို့ဆောင်ရေး အကျပ်ရိုက်ခြင်းမှ ရုန်းထွက်နိုင်အောင် ကြိုးပမ်းနေရချိန်၌ အမေရိကန် ဦးဆောင်သော အနောက်အုပ်စု၏ ရုရှားပို့ကုန်ထိန်းချုပ်မှုနှင့် ပိတ်ဆို့ ဒဏ်ခတ်မှုများကြောင့် အခြေအနေ ပိုဆိုးလာခဲ့သည်။
အမေရိကန် ထောက်လှမ်းရေး အစီရင်ခံစာအရ တွေ့ရှိချက်များသည် သတင်း အတုအယောင်သာဖြစ်ကြောင်း မော်စကိုက ချေပပြီး သီတင်းပတ် အတန်ကြာပြီးနောက် မြောက်ကိုရီးယား၏ ယခုငြင်းဆိုချက် ထွက်ပေါ်လာခဲ့ သည်။
အကယ်၍ ရုရှားထံသို့ မြောက်ကိုရီးယား လက်နက်တင်ပို့သည်ဆိုလျှင် ပြုံယမ်းအစိုးရအပေါ် လက်နက် အရောင်း အဝယ်ကိစ္စ တားမြစ်ထားသည့် ကုလသမဂ္ဂ ဆုံးဖြတ်ချက်ကို ချိုးဖောက်ရာ ရောက်မည်ဖြစ်သည်။
ထိုသို့ ကုလသမဂ္ဂလုံခြုံရေးကောင်စီ (UNSC) ၏ ပိတ်ဆို့ဒဏ်ခတ်မှုကို ပြုံယမ်းအနေဖြင့် တရားမဝင်ဟု မှတ်ယူပြီး အသိအမှတ်မပြုကြောင်း မြောက်ကိုရီးယား အစိုးရအရာရှိတစ်ဦးက ဆက်လက် ပြောကြားခဲ့သည်။
ပိတ်ဆို့ဒဏ်ခတ်ရန် UNSC ၏ ဆုံးဖြတ်ချက်မှာ အမေရိကန်နှင့် ၎င်း၏ဩဇာခံ နိုင်ငံများ ခြယ်လှယ်မှုဖြစ်၍ ဆန့်ကျင်ကြောင်း ၎င်းက ထပ်လောင်း ပြောကြားခဲ့သည်။
စစ်လက်နက်များ တင်ပို့ခြင်းသည် အချုပ်အခြာအာဏာပိုင် နိုင်ငံတစ်နိုင်ငံအတွက် ဥပဒေနှင့်ညီသော အခွင့်အရေး တစ်ခုဖြစ်ကြောင်း မြောက်ကိုရီးယား၏ တရားဝင် ကိုရီးယားဗဟိုသတင်းဌာန (KCNA) ၏ ထုတ်လွှင့်ချက်အရ သိရသည်။
Source: AP
- By CNI
- Category: နိုင်ငံရေး
- Hits: 567
CNI International News
ဘရပ်ဆဲလ်၊ စက်တင်ဘာ ၂၂
လျှပ်စစ်ဓာတ်အား၊ သဘာဝဓာတ်ငွေ့နှင့် အစားအသောက်ဈေးနှုန်းများ တဟုန်ထိုး တက်နေခြင်းကြောင့် လူနေမှု စရိတ်များ သိသိသာသာ တိုးလာမှုအပေါ် ဆန့်ကျင်ကန့်ကွက်သည့်အနေဖြင့် ဘယ်လ်ဂျီယံနိုင်ငံ၏ မြို့တော် ဘရပ်ဆဲလ်တွင် စက်တင်ဘာ ၂၁ ရက်၌ လူထောင်နှင့်ချီ၍ စုဝေးဆန္ဒပြခဲ့ကြကြောင်း အေပီသတင်းဌာနက ရေးသားဖော်ပြသည်။
နိုင်ငံတဝန်းမှ လူအများအပြား စုဝေးခဲ့ကြရာတွင် ခန့်မှန်းခြေ ၁ သောင်းဝန်းကျင်ရှိကြောင်း အလုပ်သမားများ သမဂ္ဂနှင့် ဘရပ်ဆဲလ်မြို့တော် ရဲတပ်ဖွဲ့တို့က ပြောကြားခဲ့သည်။
“ဘဝတွေက အင်မတန်ဈေးကြီးပါတယ်။ အခု ဖြေရှင်းချက် လိုချင်တယ်”
“ကျွန်ုပ်တို့လုပ်ခလစာမှအပ အရာအားလုံး ဈေးတက်ကုန်ပြီ” စသည့် စာတန်းများ ကိုင်ဆောင်လျက် ချီတက် လှည့်လည်ကြရာ မြို့တွင်းယာဉ်ကြောပိတ်ဆို့မှုနှင့် အများပြည်သူသွားလာရေး အတန်ကြာ ခက်ခဲသွားခဲ့သည်။
ဘယ်လ်ဂျီယံနိုင်ငံ ဘရပ်ဆဲလ်မြို့လယ်ခေါင် ဆန္ဒပြပွဲမြင်ကွင်း(ဓါတ်ပုံ-အေပီ)
ယခုသီတင်းပတ်အတွင်း ဘယ်လ်ဂျီယံမီဒီယာတစ်ခုမှ ကောက်ခံခဲ့သော စစ်တမ်းတစ်ခုသို့ ဝင်ရောက်ဖြေဆိုသူ ၆၄ ရာခိုင်နှုန်းတို့က ၎င်းတို့နေ့စဉ်သုံးစွဲနေရသည့် လျှပ်စစ်ဓာတ်အားနှင့် သဘာဝဓာတ်ငွေ့အတွက် ငွေတောင်းခံလွှာ များ မပေးချေနိုင်တော့မည်ကို စိုးရိမ်နေကြကြောင်း ထုတ်ဖော်ခဲ့ကြသည်။ ထို့ပြင် စစ်တမ်းဖြေဆိုသူ ၈၀ ရာခိုင် နှုန်းတို့က ယခင်နှစ်ထက် နှစ်ဆကျော်တက်လာသည့် ဓာတ်အားခနှင့်ဓာတ်ငွေ့ခများ မတတ်နိုင်တော့မည်ကို ပူပန်နေကြသည်။
“ကျနော်တို့ စားဖို့သောက်ဖို့ အခြောက်အခြမ်းလေးတွေ သွားဝယ်တဲ့အခါ တွန်းလှည်းနဲ့လိုက်ရောင်းတဲ့ ဈေးသည် ဆိုရင် အရင် ယူရို ၂၀ (ဒေါ်လာ ၃၀) လောက်ပဲရှိတဲ့ပစ္စည်းက အခု ဈေးပိုတက်လာပြီ။ ခင်ဗျား သွားဝယ်တဲ့ဆိုင်က ပိုသန့်ရင် ဒီထက်ပိုပြီး ကျသင့်လိမ့်မယ်။ ကျနော်တို့ ပိုက်ဆံအိတ်တွေ လိုက်မမီတာ ဖြစ်ကုန်ပြီဗျ” ဟု ဘရပ်ဆဲ မြို့ခံတစ်ဦးဖြစ်သူ ဆန္ဒပြပွဲပူးပေါင်းပါဝင်ခဲ့သည့် ပါစကယ်ခရာဇိုက ပြောကြားခဲ့သည်။
ယူကရိန်းတွင် ရုရှားကျူးကျော်စစ်ရှိနေ၍ လျှပ်စစ်နှင့်ဓာတ်ငွေ့ဈေးနှုန်းတက်သဖြင့် ဘယ်လ်ဂျီယံဝန်ကြီးချုပ် အလက်ဇန္ဒားဒီခရိုး (Alexander de Croo) က လာမည့်ဆောင်းရာသီသည် ပြီးခဲ့သည့် ၅ နှစ်မှ ၁၀ နှစ်အတွင်း အခက်ခဲဆုံးကာလအဖြစ် ဖြတ်သန်းရလိမ့်မည်ဟု သတိပေးခဲ့သည်။
ဥရောပသမဂ္ဂ (EU) အဖွဲ့ဝင် ၂၇ နိုင်ငံသည် ယခုဆောင်းရာသီတွင် သဘာဝဓာတ်ငွေ့သုံးစွဲမှု ပျမ်းမျှ ၁၅ ရာခိုင်နှုန်း လျှော့ချရန် သဘောတူလက်ခံထားကြသည်။
အထူးသဖြင့် အလိုအပ်ဆုံးဖြစ်သည့်အခါမျိုးတွင် ဝယ်လိုအားကို လျှော့ချနိုင်ရန် တိုင်ပင်ညှိနှိုင်းထားကြသည်။
EU နိုင်ငံများမှ စွမ်းအင်ဝန်ကြီးများသည် လက်ရှိအကျပ်အတည်းကို ဆွေးနွေးအဖြေရှာနိုင်ရန် လာမည့် သီတင်းပတ်၌ တွေ့ဆုံကြရန် စီစဉ်ထားသည်။
Source: AP
- By CNI
- Category: နိုင်ငံရေး
- Hits: 878
CNI International News
မော်စကို စက်တင်ဘာ ၂၂
ရုရှားပိုင်နက်ကို ကာကွယ်ရန်အတွက် နျူကလီးယားလက်နက်များ ထုတ်သုံးရန် တွန့်ဆုတ်နေမည် မဟုတ်ကြောင်း ရုရှားသမ္မတ ဗလာဒီမာပူတင်က ပြင်းထန်စွာ သတိပေးလိုက်ကြောင်း အေပီသတင်းတစ်ပုဒ်တွင် တွေ့ရသည်။
ယခုရက်ပိုင်းများအတွင်း ရုရှားထိန်းချုပ်ထားသည့် ယူကရိန်းနယ်မြေအချို့၌ လူထုဆန္ဒခံယူပွဲများ အဆောတလျင် ကျင်းပရန် စီစဉ်ခဲ့ပြီးနောက် ယူကရိန်းအပေါ် မော်စကိုက ယခုကဲ့သို့ နောက်ထပ် သတိပေး ခြိမ်းခြောက်လိုက် ခြင်းလည်း ဖြစ်သည်။
အနောက်နိုင်ငံများအနေဖြင့် ထိုကဲ့သို့ ပူတင်၏ လေသံမျိုးကို ယခင်က ကြားခဲ့ဖူးသော်လည်း ယခု အခြေအနေများ က သိသိသာသာ ကွဲပြားခြားနားနေပြီ ဖြစ်သည်။
ပူတင်ကို ရုရှားနိုင်ငံသားတချို့ ကန့်ကွက် (Reuters)
စက်တင်ဘာ ၂၃ ရက် (မနက်ဖြန်) စတင်ရန် စီစဉ်ထားသော ယူကရိန်းထံမှ ရုရှားသိမ်းပိုက်ထားသည့် နယ်မြေများ အလိုက် လူထုဆန္ဒခံယူပွဲများကို ကရင်မလင် သမ္မတနန်းတော်က ကြိုးကိုင်ရန် အသင့်ပြင်ဆင်ထားသည်။
ထိုလူထုဆန္ဒခံယူပွဲများ ကျင်းပစေခြင်းဖြင့် ဒေသခံပြည်သူလူထုက ရုရှားနိုင်ငံ၏ အစိတ်အပိုင်းဖြစ်လိုခြင်း ရှိ/မရှိ ဆန္ဒထုတ်ဖော်၍ မဲထည့်ကြရမည်ဖြစ်သည်။ ဆိုလိုသည့် သဘောမှာ ထောက်ခံမဲ အများစုသည် ရုရှားအလိုလိုက် အကြိုက်ဆောင် စေရမည်ဖြစ်ပြီး နောက်ထပ် ရက်သတ္တပတ်များတွင် ထိုနယ်မြေများကို ရုရှားက အပြီးအပိုင် ချုပ်ကိုင်ရန် ဟန်ပြင်နေသည်။
သို့ဖြစ်၍ ယူကရိန်းနယ်မြေ အစိတ်အပိုင်းများကို စည်းရုံးသိမ်းသွင်းရန် ကြေညာခြင်းဖြင့် ပူတင်သည် ရသမျှ နည်းလမ်းကို အသုံးချသွားမည်ဟု အတိအလင်း ပြောကြားထားသည်။ ယင်းနည်းလမ်းများတွင် အားလုံး တုန်လှုပ် ခြောက်ခြားစေမည့် နျူကလီယားလက်နက်ကို ယခုအခါ နောက်ထပ်တဖန် ရည်ညွှန်းပြောကြားလာခဲ့သည်။
ဒွန်နက်စ်နဲ့လူ့ဟန်စ်ဒေသက ရုရှားလိုလာသူများကိုတွေ့ရစဉ်
ယခုလ အစောပိုင်း၌ ယူကရိန်း၏ တန်ပြန်ထိုးစစ် အောင်မြင်ပြီးနောက် လက်ရှိအနေအထားကို လက်ခံနိုင်ရန် နောက်ဆုံး ထွက်ပေါက်အဖြစ် နျူကလီးယား ခြိမ်းခြောက်မှုအသစ်ကို ပူတင်လုပ်ဆောင်လာကြောင်း လေ့လာ သုံးသပ်သူများက ရှုမြင်နေကြသည်။
လူထုဆန္ဒခံယူပွဲကို အလျင်စလို ပူတင် အကောင်အထည်ဖော်စေခြင်းသည် ကရင်မလင်သမ္မတနန်းတော်၏ ဆုံးဖြတ်ချက်ကို လိုက်နာစေဖို့ အကြောင်းပြချက်တစ်ခု ရှာကြံခြင်းဖြစ်ကြောင်း လွတ်လပ်သော နိုင်ငံရေးလေ့လာ သုံးသပ်သူ တာတီယာနာစတန်နိုဗာယာ (Tatiana Stanovaya) က ပြောကြားခဲ့သည်။
Source: AP
- By CNI
- Category: နိုင်ငံရေး
- Hits: 756
CNI International News
ဘေဂျင်း၊ စက်တင်ဘာ ၂၂
စစ်ရေးအရှိန်မြှင့် လုပ်ဆောင်ဖို့ တရုတ်စစ်တပ်ကို သမ္မတ ရှီကျင့်ဖျင် တိုက်တွန်းလိုက်ကြောင်း တာ့စ်သတင်းဌာန က ရေးသားဖော်ပြသည်။
“ပြုပြင်ပြောင်းလဲရေးတွေမှာ အောင်မြင်တဲ့ အတွေ့အကြုံတွေကို အသိတရားရှိရှိ အနှစ်ချုပ် အသုံးချကြဖို့၊ အခြေအနေသစ်တွေကို ကျွမ်းကျင်ဖို့နဲ့ လုပ်ငန်းဆောင်တာတွေရဲ့ လိုအပ်ချက်တွေကို နားလည်ဖို့၊ စစ်ပွဲတွေ အတွက် ပြင်ဆင်ဖို့၊ စူးစမ်းလေ့လာပြီး ဆန်းသစ်တီထွင်ရဲတဲ့ သတ္တိရှိကြဖို့ အရေးကြီးတယ်” ဟု ရှီကျင့်ဖျင်က အလေးအနက် တိုက်တွန်းခဲ့ကြောင်း ဆင်ဟွာသတင်းကို ကိုးကား၍ ရုရှားမီဒီယာ တာ့စ်သတင်းဌာနက ရေးသား ဖော်ပြသည်။
ရှီကျင့်ဖျင်နဲ့ တရုတ်ဗဟိုစစ်ကော်မရှင်ကိုတွေ့ရစဉ်
ဘေဂျင်းမြို့တော်တွင် စက်တင်ဘာ ၂၁ ရက်၌ ကျင်းပသည့် အမျိုးသားကာကွယ်ရေးနှင့်စစ်ရေး ပြုပြင်ပြောင်းလဲမှု ဆိုင်ရာ ညီလာခံတွင် ရှီက အထက်ပါအတိုင်း တိုက်တွန်းခဲ့ခြင်း ဖြစ်သည်။
အဆိုပါ ညီလာခံသို့ တရုတ်ဗဟိုစစ်ကော်မရှင် (CMC)၊ ပြည်သူ့ရဲတပ်ဖွဲ့နှင့် စစ်သင်တန်းကျောင်းများမှ ထိပ်တန်း အရာရှိများ၊ ကိုယ်စားလှယ်များ တက်ရောက်ခဲ့ကြသည်။
တရုတ်သမ္မတ ရှီကျင့်ဖျင်သည် ဗဟိုစစ်ကော်မရှင်၏ ဥက္ကဋ္ဌအဖြစ် ၂၀၁၄ ခုနှစ်ကတည်းက တာဝန်ယူခဲ့သည်။
လက်ရှိတွင် တရုတ်သည် ထိုင်ဝမ်သို့ အမေရိကန်၏ တတိယအကြီးအကဲဖြစ်သော အောက်လွှတ်တော်ဥက္ကဋ္ဌ နန်စီပလိုစီ အပြင် လွှတ်တော်အမတ်များ သွားရောက်ခဲ့ခြင်းကြောင့် အမေရိကန်နှင့်သံတမန်ဆက်ဆံရေး တင်းမာလျက်ရှိသလို ထိုင်ဝမ်ကျွန်းပတ်ပတ်လည်မှာ စစ်ရေးအရှိန်မြှင့် လေ့ကျင့်မှုများလည်း ပြုလုပ်ခဲ့သေးသည်။
Source: တာ့စ်သတင်းဌာန
- By CNI
- Category: နိုင်ငံရေး
- Hits: 902
CNI International News
၂၀၂၂ ခုနှစ်၊ စက်တင်ဘာ ၂၂
ရုရှားသမ္မတ ဗလာဒီမာပူတင်က အရန်တပ်ဖွဲ့ကိုိုနိုင်ငံသားများ စစ်မှုထမ်းရန်အတွက် ရုရှားတပ်တော်ထဲသို့ ထည့်သွင်းရန် အမိန့်ထုတ်ပြန် ကြေညာခဲ့ခြင်းအပေါ် ရုရှားနိုင်ငံသားတချို့က ဆန္ဒပြကန့်ကွက်ခဲ့ကြသည်။
အဆိုပါ ဆန္ဒပြကန့်ကွက်သူများထဲမှ လူပေါင်း ၁၃၀၀ ကျော် ဖမ်းဆီးခံခဲ့ရကြောင်း အယ်ဂျာဇီးယားသတင်းဌာနက ရေးသားဖော်ပြထားသည်။
- By CNI
- Category: နိုင်ငံရေး
- Hits: 610
CNI International News
နယူးဒေလီ၊ စက်တင်ဘာ ၂၁
အိန္ဒိယနိုင်ငံ၊ မီဇိုရမ်ပြည်နယ်ဝန်ကြီးချုပ် ဇိုရမ်သန်ဂါနှင့် အာသံပြည်နယ်ဝန်ကြီးချုပ် ဟီမန်တာဘီစဝါဆာမာတို့သည် ပြည်နယ်နှစ်ခုကြား နယ်နိမိတ်အငြင်းပွားမှု ဖြေရှင်းရန်အတွက် စက်တင်ဘာ ၂၁ ရက် (ယနေ့) နယူးဒေလီ မြို့တော်၌ တွေ့ဆုံဆွေးနွေးခဲ့ကြကြောင်း ဟိန္ဒူစတန်တိုင်းမ်က ရေးသားဖော်ပြသည်။
အဆိုပါ တွေ့ဆုံမှုကို အစောပိုင်းက စက်တင်ဘာ ၂၆ ရက်နေ့က စီစဉ်ခဲ့သော်လည်း ဘီစဝါဆာမာသည် အာသံ ပြည်နယ်သို့ ပြန်သွားရန် ရှိနေသဖြင့် ယနေ့ တွေ့ဆုံဖို့ အစီအစဉ် ပြောင်းလဲခဲ့ရသည်။
ပြည်နယ်ဝန်ကြီးချုပ် နှစ်ဦးတို့သည် ယမန်နှစ် နိုဝင်ဘာလတွင် နယူးဒေလီသို့ ရောက်ရှိခဲ့ပြီး ပြည်ထဲရေးဝန်ကြီး ဌာန ပြည်ထောင်စုဝန်ကြီး အေမစ်ရှားကို သွားရောက်တွေ့ဆုံ၍ အငြင်းပွားမှုများ ဖြေရှင်းရန်အတွက် သက်ဆိုင်သူ များ ပါဝင်သော အစုအဖွဲ့များ ဖွဲ့စည်းလျက် ဝန်ကြီးချုပ်အဆင့် ဆွေးနွေးသွားရန် သဘောတူလက်ခံခဲ့ကြသည်။
အာသံနဲ့မီဇိုရမ် ပြည်နယ်ဝန်ကြီးချုပ်နှစ်ဦး ဆွေးနွေးနေစဉ်
လာမည့်လ၌ ဂူဝါဟတီမြို့တွင် ကျင်းပရန်ရှိသည့် ပြည်နယ်နှစ်ခုကြား ဝန်ကြီးအဆင့် ဆွေးနွေးပွဲကို အဆုံးမသတ် သေးကြောင်း မီဇိုရမ်ပြည်နယ်အစိုးရ ပြည်ထဲရေးဌာန တာဝန်ရှိသူတစ်ဦးက ပြောကြားခဲ့သည်။
ကျန်းမာရေး အခြေအနေအရ ခေတ္တအနားယူထားသော မီဇိုရမ်ပြည်ထဲရေးဝန်ကြီး လဲချမ်လီယာနာ တာဝန် ပြန်လည် ထမ်းဆောင်သည့်အခါ အဆိုပါဆွေးနွေးပွဲ ဆက်လက်ပြုလုပ်မည်ဟု ၎င်းက ဆက်လက် ပြောကြားခဲ့ သည်။
လဲချမ်လီယာနာနှင့် အာသံဝန်ကြီး အက်တူဘိုရာတို့သည် အငြင်းပွားမှုများ ဖြေရှင်းရန်အတွက် ယမန်နှစ် ဩဂုတ် လ၌ ပထမအကြိမ် တွေ့ဆုံခဲ့ကြပြီးနောက် တစ်နှစ်အကြာ ၂၀၂၁ ခုနှစ်၊ ဩဂုတ်လ ၉ ရက်၌ အိုင်ဇောလ်မြို့တွင် ထပ်မံတွေ့ဆုံခဲ့ကြသည်။
ပြည်နယ်နှစ်ခု နယ်နိမိတ်မျဉ်းတလျှောက် ငြိမ်းချမ်းရေး ထိန်းသိမ်းရန် သဘောတူခဲ့ကြပြီး လာမည့် အောက်တိုဘာလတွင် ဂူဝါဟတီမြို့တွင် ထပ်မံတွေ့ဆုံကြရန် ရှိသည်။
ထို့အပြင် အွန်လိုင်းအစည်းအဝေး ၃ ကြိမ် ခေါ်ယူ၍လည်း နှစ်ဘက်စလုံးက စေ့စပ်ညှိနှိုင်းခဲ့ကြပြီးဖြစ်သည်။
Source: The Hindustan Times
- By CNI
- Category: နိုင်ငံရေး
- Hits: 554
CNI International News
နယူးယောက်၊ စက်တင်ဘာ ၂၁
ဆီးရီးယားမှ ယူကရိန်းအထိ ဖြစ်ပွားနေသည့် နိုင်ငံအချင်းချင်း ပဋိပက္ခများကို ဖြေရှင်းပေးသူအဖြစ် ရပ်တည်ရန် ဆောင်ရွက်မည့် တူရကီ၏ မဟာဗျူဟာများကို တူရကီသမ္မတအာဒိုဂန်က စက်တင်ဘာ ၂၀ ရက်တွင် ကုလသမဂ္ဂ အထွေထွေ ညီလာခံ မိန့်ခွန်း၌ ချပြကာ ကြိုးပမ်းနေကြောင်း သိရသည်။
တူရကီသမ္မတသည် ဒေသတွင်း အငြင်းပွားမှုများ ပတ်ပတ်လည်တွင် ဝိုင်းနေသည့် နိုင်ငံတစ်နိုင်ငံကို ဦးဆောင်နေ ရသူ ဖြစ်သည်။
တူရကီနိုင်ငံ၏ လက်ရှိ ငွေကြေးဖောင်းပွမှုနှုန်းမှာ တရားဝင် ၈၀ ရာခိုင်နှုန်းဖြစ်သော်လည်း ယင်းပမာဏထက် နှစ်ဆပိုများကြောင်း လေ့လာသူများက ထောက်ပြနေချိန်၌ အထက်ပါအတိုင်း သမ္မတအာဒိုဂန်၏ မိန့်ခွန်း ထွက် ပေါ်လာခဲ့ခြင်း ဖြစ်သည်။
အာဒိုဂန်သည် သူ့အစိုးရ၏ စီးပွားရေးမူဝါဒများထက် တကမ္ဘာလုံး အတိုင်းအတာဖြင့် အစားအသောက်နှင့် စွမ်းအင်ဈေးနှုန်း မြင့်မားလာခြင်း၊ ငွေကြေးဖောင်းပွမှုနှုန်း အဆမတန် ဖြစ်နေခြင်းတို့အပေါ် အပြစ်တင်ခဲ့သည်။
တူရကီသည် ကမ္ဘာ့နိုင်ငံအချင်းချင်း ပဋိပက္ခများ၌ ဖြေရှင်းချက်တိုင်း၏ တစိတ်တပိုင်း ဖြစ်စေရန် ကြိုးစားနေ ကြောင်း ၎င်းက ဆက်လက် ပြောကြားခဲ့သည်။
ကုလ ညီလာခံ (GETTY IMAGES)
အာဒိုဂန်၏ မိန့်ခွန်းထဲတွင် ကမ္ဘာ့ပြဿနာများကို ထိထိမိမိ ချပြသွားခဲ့ရာ အီရတ်တွင် တည်ငြိမ်ရေး လိုအပ်ချက်၊ လစ်ဗျားတွင် တရားမျှတသော ရွေးကောက်ပွဲနှင့် အာဖရိကဦးချိုဒေသ စားနပ်ရိက္ခာဖူလုံရေး၊ ပါလက်စတိုင်း နိုင်ငံတော်အတွက် လိုအပ်ချက်၊ မြန်မာနိုင်ငံမှ ဘင်္ဂါလီ(မူရင်း-ရို)ကိစ္စနှင့် တရုတ်နိုင်ငံမှ ဝီဂါမွတ်ဆလင်ကိစ္စ၊ ကမ္ဘာ တဝန်း မွတ်ဆလင်ဆန့်ကျင်ရေး စိတ်ဓာတ်များ စသည်တို့လည်း ပါဝင်ခဲ့သည်။
၎င်းမှတ်ချက်များတွင် ပဋိပက္ခ အများအပြား၌ တူရကီ၏ အခန်းကဏ္ဍကို တိုက်ရိုက်ဖြစ်စေ၊ သွယ်ဝိုက်၍ဖြစ်စေ မီးမောင်းထိုးပြခဲ့သည်။
ဆီးရီးယားမြောက်ပိုင်း၌ အမေရိကန် ကျောထောက်နောက်ခံပြု ကာ့ဒ်သူပုန်များကို တိုက်ရိုက်ချေမှုန်းခြင်း၊ ယူကရိန်း၌ အဆင့်မြင့် သံတမန်ဆက်ဆံရေး၊ ထရီပိုလီ အခြေစိုက် အစိုးရကို ထောက်ခံသည့် လက်နက်ကိုင်တွင် လစ်ဗျားတပ်စွဲထားခြင်း၊ ဆိုက်ပရက်စ်နှင့်ဂရိတို့ ကာလအတန်ကြာ တင်းမာနေမှု၊ အဇာဘိုင်ဂျန်နှင့်အာမေးနီးယား ပဋိပက္ခတို့ကိုလည်း အာဒိုဂန်က သုံးသပ်ပြောကြားခဲ့သည်။
“လူသန်းပေါင်းများစွာကို ထိခိုက်စေတဲ့ အဲဒီကပ်ဘေးတွေအားလုံးအတွက် ကုလသမဂ္ဂက ပိုထိရောက်ရမယ်၊ ဩဇာပိုရှိရမယ်” ဟု အာဒိုဂန်က မှတ်ချက်ချခဲ့သည်။
Source: AP
- By CNI
- Category: နိုင်ငံရေး
- Hits: 626
CNI International News
လန်ဒန်၊ စက်တင်ဘာ ၂၀
ဂျိုးဘိုင်ဒန်သည် ကမ္ဘာပေါ်တွင် ဩဇာအာဏာ အရှိဆုံးပုဂ္ဂိုလ်အဖြစ် နေရာအတော်များများ၌ နိုင်ငံတကာ ခေါင်းဆောင်များ စုဝေးမိသည့်အခါတိုင်း ရှေ့ဆုံးနှင့် အလယ်ဗဟိုတွင် နေရာယူစမြဲ ဖြစ်သော်လည်း ဗြိတိန် ထီးသုံးနန်းသုံး တော်ဝင်ဓလေ့ထုံးစံနှင့် နှိုင်းယှဉ်လာသည့်အခါ အနောက်သို့ ရောက်သွားခဲ့ကြောင်း The Telegraph မီဒီယာက ရေးသားဖော်ပြသည်။
ဗြိတိန်ဘုရင်မကြီး အဲလိဇဘက် (၂) ၏ ဈာပနအခမ်းအနားကို စက်တင်ဘာ ၁၉ ရက်၌ ဝက်စမင်စတာ အက်ဗေး ဘုရားကျောင်းမှာ ကျင်းပခဲ့ရာ အမေရိကန်သမ္မတ ဂျိုးဘိုင်ဒန်နှင့် သမ္မတကတော်တို့သည် ခန်းမ၏ တောင်ဘက် ခြမ်း၊ ၇ တန်းတွဲ ထိုင်ခုံ၏ အနောက်ဘက်တွင် အစီအစဉ် နေရာချထားပေးမှုအတိုင်း ထိုင်ခဲ့ကြရသည်။
မစ္စတာဘိုင်ဒန်၏ ရှေ့တန်းတွင် ကနေဒါဝန်ကြီးချုပ် ဂျက်စတင်ထရူဒျူး ထိုင်ခွင့်ရသည်။ ကနေဒါသည် သာမန် အချိန်များတွင် အမေရိကန်၏ ချိုးနှိမ်ခြင်းကို မကြာခဏ ခံရလေ့ရှိသည့် အိမ်နီးချင်းဖြစ်သည်။
ထို့ပြင် ဈာပနအခမ်းအနား ထိုင်ခုံအစီအစဉ်အရ အသက် ၇၉ နှစ်အရွယ်ရှိ ဘိုင်ဒန်သည် ပိုလန်ခေါင်းဆောင် အန်ဒရေးဒူဒါ၏ အနောက်တည့်တည့်သို့ ရောက်သွားခဲ့ပြီး ချက်သမ္မတနိုင်ငံ၏ ဝန်ကြီးချုပ် ပက်သလစ် ဖီယာလာ က ဘိုင်ဒန်၏ အနောက်ဘက်တန်းတွင် ထိုင်နေခဲ့သည်။
ဗြိတိန်ဘုရင်မကြီး ရုပ်ကလာပ်ကို သယ်ဆောင်နေစဉ်
အမေရိကန်သမ္မတ ဘိုင်ဒန်ကတော့ သူနှင့် ဘေးကပ်လျက် နေရာရသူ ဆွစ်ဇာလန်သမ္မတ အစ်နာဇီယိုကက်ဆစ် နှင့် စကားလက်ဆုံ ကျနေခဲ့သည်။
ဘုရားကျောင်းအတွင်း ခုံတန်းနှင့်နံရံအကြား မင်းလမ်းနှင့်အပြိုင် တစ်ဖက်တချက်တွင် ဘိုင်ဒန်နှင့် ယှဉ်လျက် ထိုင်နေသူ တစ်ဦးကတော့ တောင်ကိုရီးယားသမ္မတ ယွန်ဆော့ရွဲ ဖြစ်သည်။ ထိုခုံတန်း၏ နှစ်တန်းမြောက်တွင် ပြင်သစ်သမ္မတ အီမန်နွယ်မက်ခရွန်ကို အစီအစဉ်အတိုင်း နေရာချထားပေးသည်။
ဈာပနသို့ တက်ရောက်လာသည့် ကနေဒါ ကိုယ်စားလှယ်အဖွဲ့တွင် ဘီဘီစီ၏ Killing Eve အစီအစဉ် တင်ဆက်သူ မင်းသမီး စန္ဒရာအိုးလည်း ပါဝင်ခဲ့ပြီး ၎င်းသည် ပြီးခဲ့သည့် ဇွန်လ၌ အနုပညာ အောင်မြင်မှုများအတွက် Order of Canada အဆင့်အတန်း ပေးအပ်ခြင်းခံရသူဖြစ်သည်။
ထို့ပြင် နိုင်ငံတကာ အနုပညာသည် တစ်ဦးဖြစ်သည့် အော်ပရာအဆိုတော် ဒိန်းကီရီတီကာနာဝါသည် နယူးဇီလန် နိုင်ငံမှ ကိုယ်စားလှယ် အဖွဲ့နှင့်အတူ ဘုရင်မကြီး၏ ဈာပနသို့ တက်ရောက်လာခဲ့ကြောင်း တွေ့ရသည်။
အမေရိကန်သမ္မတ ဂျိုးဘိုင်ဒန်၏ အနောက်ဘက် ခုံတန်းတွင် ဗြိတိန်ဝန်ကြီးချုပ် ဖြစ်ခဲ့ဖူးသူ ၇ ဦးစလုံး စုံညီစွာ တက်ရောက်ခဲ့ကြပြီး သူ့ခုံနှင့်သူ ခန့်ညားစွာ ထိုင်ခဲ့ကြသည်။
ဈာပနအခမ်းအနားသို့ တက်ရောက်လာတဲ့ နိုင်ငံတကာခေါင်းဆောင်များ
၎င်းတို့နှင့်အတူ ဘုရင်မကြီး အဲလိဇဘက် (၂) လက်ထက်တွင် ဝန်ကြီးချုပ် ၁၅ ဦး တိတိရှိခဲ့ရာ ပထမဆုံး ဝန်ကြီး ချုပ်မှာ ဝင်စတန်ချာချီဖြစ်ပြီး နောက်ဆုံး ဝန်ကြီးချုပ်မှာ လက်ရှိတာဝန် ထမ်းဆောင်နေဆဲ လစ်ဇ်ထရက်စ်တို့ ဖြစ် သည်။
လစ်ဇ်ထရက်စ်သည် ဘုရင်မကြီး မကွယ်လွန်မီ ရက်ပိုင်းအလိုမှာပင် ဗြိတိန်ဝန်ကြီးချုပ်အဖြစ် အတည်ပြုပေးခဲ့သည်။
နိုင်ငံတော်အဆင့် ဈာပန အခမ်းအနားဖြစ်၍ ကမ္ဘာအရပ်ရပ်မှ ခေါင်းဆောင်များအကြား တခါတရံ အဖုအထစ် ဖြစ်လေ့ရှိသော သံခန်းတမန်ခင်းရေးရာ ပြဿနာများကို နော့ဖလော့မြို့စား အားလ်မာရှယ်က တာဝန်ယူ ကြီးကြပ်၍ စီစဉ်ပေးခဲ့သည်။
ဘုရင်မကြီး မကွယ်လွန်မှီ နောက်ဆုံး အသိအမှတ်ပြုပေးခဲ့တဲ့ ဗြိတိန်ဝန်ကြီးချုပ် လစ်ဇ်ထရက်စ်
ယခု ဈာပနအခမ်းအနား ထိုင်ခုံအစီအစဉ်ကို မည်ကဲ့သို့ ရေးဆွဲထားကြောင်း ဗြိတိန်နိုင်ငံခြားရေးရုံးသို့ The Telegraph မီဒီယာက ဆက်သွယ်မေးမြန်းခဲ့ရာ တယ်လီဖုန်းခေါ်ဆိုမှု အားလုံးကို ဘာကင်ဟမ်နန်းတော်သို့သာ လွှဲပြောင်းပေးခဲ့သည်။
ဝက်စမင်စတာအက်ဗေးတွင် ကျင်းပသော အဆိုပါ အခမ်းအနားသို့ တက်ရောက်ကြသည့် နိုင်ငံတကာ ဧည့်သည် တော်များ ၂,၂၀၀ ရှိသည်။ ဖိတ်ကြားခံရသူ လေးပုံတစ်ပုံ (သို့မဟုတ်) လူ ၅၀၀ ခန့်မှာ နိုင်ငံအသီးသီးမှ ခေါင်းဆောင် အကြီးအကဲများ (သို့မဟုတ်) နိုင်ငံတကာ ဂုဏ်သရေရှိပုဂ္ဂိုလ်များ ဖြစ်ကြသည်။
မည်သို့ပင်ဆိုစေကာမူ အမေရိကန်သမ္မတ ဘိုင်ဒန်သည် လက်ရှိဗြိတိန်ဘုရင်သစ် ချားလ်စ်၏ ခပ်လှမ်းလှမ်းတွင် ထိုင်ခဲ့ရသည်။ ဘိုင်ဒန်၏ ခုံတန်းနှင့်အတူတူ အခြားတဖက်တွင် တရုတ် ဒုတိယသမ္မတ ဝမ်ကျူရှန် ထိုင်နေခဲ့ ကြောင်း The Telegraph က ရေးသားဖော်ပြထားသည်။
Source: The Telegraph
- By CNI
- Category: နိုင်ငံရေး
- Hits: 1018
CNI International News
နယူးယောက်၊ စက်တင်ဘာ ၂၀
ရှေးရိုးစွဲ(ကွန်ဆာဗေးတစ်)တစ်ဦးဖြစ်သည့် တောင်ကိုရီးယားသမ္မတ ယွန်ဆော့ရွဲသည် စက်တင်ဘာ ၂၀ ရက် (ယနေ့)၌ ကုလသမဂ္ဂ (UN) အထွေထွေညီလာခံသို့ တက်ရောက်၍ မိန့်ခွန်းပြောကြားခဲ့ကြောင်း South China Morning Post သတင်းစာ၏ အွန်လိုင်းစာမျက်နှာ၌ ဖော်ပြထားသည်။
၎င်းသည် သိမ်မွေ့နက်နဲသော သံတမန်ရေးရာ စမ်းသပ်မှုနှင့် ရင်ဆိုင်ရလျက်ရှိကြောင်း၊ တရုတ်-အမေရိကန် ပြိုင် ဆိုင်မှုတိုးလာနေချိန်၌ တောင်ကိုရီးယားသည် စူပါပါဝါနိုင်ငံများအကြား ဟန်ချက်ညီညီ လုပ်ဆောင်ရန် ပိုမိုခက်ခဲ လာကြောင်း လေ့လာသုံးသပ်သူများက ဝေဖန်ခဲ့ကြသည်။
သမ္မတယွန်၏ ကုလသမဂ္ဂခရီးစဉ်သည် လူမျိုးရေးခွဲခြားမှု စွပ်စွဲချက်များကြောင့် ပြည်တွင်းရတက်မအေးစရာများ နှင့် ၎င်း၏ဇနီး ကင်မ်ကန်ဟီးနှင့်ပတ်သက်၍ အငြင်းပွားမှုများမှ သက်သာရာ ရစေမည်ဟု သိရသည်။
တစ်ချိန်တည်းမှာပင် ၎င်း၏ရှေ့မှ လစ်ဘရယ်ဝါဒီ သမ္မတဟောင်း မွန်းဂျေအင်းသည် မြောက်ကိုရီးယားအလိုကျ အောင် တရုတ်ကို အလျှော့ပေး၍ ဒူးထောက်ဆက်ဆံခဲ့ကြောင်း လက်ရှိသမ္မတ ယွန်က အပြစ်တင်ဝေဖန်ခဲ့သည်။ မွန်းဂျေအင်းလုပ်ပုံလုပ်နည်းအစား မိမိသည် အမေရိကန်နှင့်ဂျပန်တို့ကိုသာ မဟာမိတ်ဖွဲ့သွားမည်ဟု ယွန်က ကတိပြုခဲ့သည်။
လွတ်လပ်မှုကို ချဲ့ထွင်ဖို့ မိမိအစိုးရသည် အခြားစိတ်တူကိုယ်တူနိုင်ငံများနှင့် ပူးပေါင်းဆောင်ရွက်သွားမည် ဖြစ် ကြောင်း၊ လူ့အခွင့်အရေးနှင့် စည်းစနစ်အခြေခံသောအမိန့်၊ တရုတ်နှင့်ရုရှားတို့ကို ရင်ဆိုင်ရန် ကမ္ဘာက မည်သို့ လုပ်ဆောင်သင့်ပုံတို့ကို ဝါရှင်တန် ရွေးချယ်ပေးသည့်အတိုင်း ဆက်လက်လျှောက်လှမ်းသွားရန် ရည်ရွယ်ထား ကြောင်း ၎င်းက ဆက်လက်ပြောကြားခဲ့သည်။
အမေရိကန် သမ္မတ ဂျိုးဘိုင်ဒန်နှင့် တောင်ကိုရီးယားသမ္မတ ယွန်ဆော့ရွဲတို့ ပြီးခဲ့သည့် မေလက ဆိုးမြို့လ်ရှိ သမ္မတ အိမ်တော်တွင် သတင်းစာရှင်းလင်းပွဲပြုလုပ်နေစဉ်(ဓါတ်ပုံ - အေအက်ဖ်ပီ)
သို့သော် တောင်ကိုရီးယားသည် တရုတ်နှင့်ရုရှားတို့ကဲ့သို့ သီးခြားနိုင်ငံများကို ဆန့်ကျင်သွားမည်ဟု ဆိုလိုခြင်း မဟုတ်ကြောင်း ဆိုးလ်အစိုးရတာဝန်ရှိသူတစ်ဦးက ရှင်းပြခဲ့သည်။
“ကုလသမဂ္ဂမှာ ပြောကြားမယ့် သမ္မတရဲ့မိန့်ခွန်းဟာ လွတ်လပ်မှုကို ချစ်မြတ်နိုးတဲ့နိုင်ငံတွေနဲ့ ကမ္ဘာလုံးဆိုင်ရာ မဟာမိတ်ဖွဲ့မှု ချဲ့ထွင်ဖို့၊ လွတ်လပ်မှုကို ချဲ့ထွင်ဖို့ စံနှုန်းတွေ ပါဝင်လိမ့်မယ်လို့ မျှော်လင့်ရပါတယ်” ဟု တောင်ကိုရီးယားသမ္မတရုံးမှ အကြီးတန်းအရာရှိတစ်ဦးက သတင်းထောက်များကို ယခင်သီတင်းပတ်၊ စက်တင်ဘာ ၁၅ ရက်တွင် ပြောကြားခဲ့သည်။
“လွတ်လပ်မှု၊ လူ့အခွင့်အရေးနဲ့ စည်းစနစ်အခြေခံတဲ့အမိန့်ကို မြှင့်တင်ဖို့ အယူအဆနဲ့ပတ်သက်လို့ လုံးဝသဘောမတူတဲ့ နိုင်ငံတချို့ ရှိမှာပါ။ အဲဒီလိုသဘောမတူတဲ့နိုင်ငံတွေနဲ့လည်း အပြန်အလှန်လေးစားပြီး အကျိုးရှိစေမယ့် အစီအစဉ်တွေ ဖော်ဆောင်သွားဖို့ နည်းလမ်းတွေ ကျနော်တို့ ရှာဖွေသွားမယ်” ဟု သမ္မတယွန်က UN တွင် ထပ်လောင်းပြောကြားခဲ့သည်။
ယခင်သမ္မတမွန်းဂျေအင်းလက်ထက်က တရုတ်နှင့်အမေရိကန်တို့အပေါ် တောင်ကိုရီးယား၏ မရေရာသော မူဝါဒကို ယွန်ဆော့ရွဲ အပြစ်တင်ဝေဖန်ခဲ့ကြောင်း စက်တင်ဘာ ၁၉ ရက်တွင် ထုတ်ဝေသည့် နယူးယောက်တိုင်းမ် သတင်းစာပါ အင်တာဗျူးတွင် ဖော်ပြထားသည်။
“ကြိုတင်ခန့်မှန်းထားတဲ့အတိုင်း ကျနော် ဆက်လုပ်သွားမှာဖြစ်ပါတယ်။ တောင်ကိုရီးယားက အမေရိကန်နဲ့ တရုတ်နဲ့ ဆက်ဆံရေးကို ပိုပြီး ရှင်းရှင်းလင်းလင်း ရပ်တည်သွားမှာပါ” ဟု ယွန်ဆော့ရွဲ၏ပြောကြားချက်ကို ကိုးကား၍ နယူးယောက်တိုင်းမ်က ဆက်လက်ရေးသားထားသည်။
Source: South China Morning Post