CNI International News

ဂျကာတာ၊ မေလ ၈

ပိုမိုဆိုးရွားလာသည့် မြန်မာနိုင်ငံရေးပဋိပက္ခသည် ယခုသီတင်းပတ် အင်ဒိုနီးရှားတွင် ကျင်းပမည့် အာဆီယံ ခေါင်းဆောင်များ အစည်းအဝေးကို လွှမ်းမိုးထားမည်ဟု ယူဆရကြောင်း Bangkok Post က ဖော်ပြထားသည်။
မြင့်တက်လာသော သွေးထုတ်သံယိုမှုများကို အဆုံးသတ်ရန် တောင်းဆိုမှုများ အသစ်တစ်ဖန် ပြန်လည် ပေါ်ပေါက်လာချိန်တွင် ဖြစ်သည်။

မြန်မာနိုင်ငံတွင် ၂၀၂၁ ခုနှစ်၊ ဖေဖော်ဝါရီလမှ စတင်ကာ နိုင်ငံရေးပဋိပက္ခတစ်ခု ပေါ်ပေါက်ခဲ့သည်။

ထိရောက် အသုံးဝင်မှုမရှိဟု ဝေဖန်ခံနေရသော အာဆီယံအဖွဲ့သည် သွေးထွက်သံယိုမှုများ ရပ်တန့်ရေး စေ့စပ်ဆွေးနွေးမှုဆိုင်ရာ ကြိုးပမ်းမှုများ အဆင်မပြေဖြစ်ခဲ့ပြီးနောက် ပြီးခဲ့သည့် နှစ်နှစ်တွင် မြန်မာအစိုးရနှင့် အချက် ၅ ချက်ပါ စီမံကိန်းကို အကောင်အထည်ဖော်ရန် ကြိုးပမ်းလျက်ရှိသည်။

၂၀၂၁ ခုနှစ်၊ ဧပြီ ၂၄ ရက်က ကျင်းပသည့် အာဆီယံထိပ်သီး ခေါင်းဆောင်များ အစည်းအဝေး ကျင်းပနေစဉ်

သို့သော် နစကဘက်က နိုင်ငံတကာ၏ ဝေဖန်မှုကို လျစ်လျူရှုခြင်း၊ အတိုက်အခံများနှင့် ဆွေးနွေးရန် ငြင်းဆို ထားခြင်းတို့ကြောင့် ထိုသို့သော ကြိုးစားမှုများမှာ နှောင့်နှေးလျက်ရှိသည်။

အင်ဒိုနီရှား၏ ဖလောရက်စ် (Flores) ကျွန်းတွင် မေလ ၉-၁၁ ရက်တွင် ကျင်းပမည့် အာဆီယံ ခေါင်းဆောင်များ ညီလာခံ၌ မြန်မာအရေးကိစ္စသည် အဓိကအကြောင်းအရာ ဖြစ်လာလိမ့်မည်ဟု သံတမန်များက ပြောသည်။

အာဆီယံအဖွဲ့သည် ညီလာခံကျင်းပပြီးနောက် ထုတ်ပြန်မည့် ကြေညာချက်တွင် လေကြောင်း တိုက်ခိုက်မှုများနှင့် ပတ်သက်၍ ထပ်မံပစ်တင် ရှုတ်ချခဲ့ကာ၊ သွေးထွက်သံယိုမှုများကို ချက်ချင်းရပ်တန့်ရန် တောင်းဆိုထားသည်ဟု AFP သတင်းမှ မြင်တွေ့ခဲ့ရသည့် မူကြမ်းတစ်စောင်တွင် ဖော်ပြထားသည်။

ယင်းက မြန်မာနိုင်ငံအတွက် သင့်တော်သော ငြိမ်းချမ်းရေး အဖြေရှာဖွေရေး အားလုံး ပါဝင်သော အမျိုးသား ဆွေးနွေးပွဲ တစ်ခုအတွက် ပတ်ဝန်းကျင်ကောင်း တစ်ခုကို ပေါ်ပေါက်စေမည့် တစ်ခုတည်းသော နည်းလမ်း ဖြစ်သည်ဟုလည်း ထုတ်ပြန်ချက် မူကြမ်းတွင် ရေးသားထားသည်ဟု သိရသည်။

အာဆီယံ ဥက္ကဋ္ဌ ဖြစ်သည့် အင်ဒိုကိုတွေ့ရစဉ် 

လက်ရှိ အချိန်တွင် မြန်မာနိုင်ငံသည် အာဆီယံအဖွဲ့ဝင်အဖြစ် ဆက်ရှိနေဆဲ ဖြစ်သော်လည်း နစက၏ ငြိမ်းချမ်းရေး စီမံကိန်းကို အကောင်အထည်ဖော်ရန် ပျက်ကွက်မှုကြောင့် ထိပ်သီး အစည်းအဝေးများမှ ကန့်သတ်ခံထားရသည်။

မြန်မာအရေးနှင့် ပတ်သက်၍ အင်ဒိုနီးရှားနိုင်ငံသည် ပဋိပက္ခတွင် ပါဝင်သော ဘက်ပေါင်းစုံနှင့် ဆွေးနွေးရန်၊ ငြိမ်းချမ်းရေး ကြိုးပမ်းမှုအသစ်များ ဖြစ်ပေါ်လာစေရန် တိတ်တဆိတ် သံတမန်ရေးကို အသုံးပြုနေသည်ဟု အင်ဒိုနီးရှားနိုင်ငံခြားရေးဝန်ကြီး ရတ်နို မာဆူဒီ (Retno Marsudi)က သောကြာနေ့တွင် ပြောခဲ့သည်။

သို့သော် ပိုမိုဆိုးရွားလာသော အခြေအနေများသည် အာဆီယံအဖွဲ့အတွက် ဖြစ်တည်မှုဆိုင်ရာ ခြိမ်းခြောက်မှုကို ဖြစ်စေသည်ဟုလည်း အင်ဒိုနီးရှား နိုင်ငံခြားရေးဝန်ကြီးဟောင်းဖြစ်သူ မာမတီ နာတာလီဂါဝါ (Marty Natalegawa) က ပြောသည်။

Source: ဘန်ကောက်ပို့စ်

CNI International News

ကိယတ်ဗ်၊ မေလ ၆

ယူကရိန်းအရှေ့ပိုင်း ဘတ်မု (Bakhmut) မြို့ တိုက်ပွဲမှ ၎င်း၏တပ်ဖွဲ့များကို လာမယ့် သီတင်းပတ်တွင် ဆုတ်ခွာစေတော့မည်ဟု ရုရှား၏ဝဂ်နာ (Wagner) ကြေးစားတပ်ဖွဲ့ပိုင်ရှင်က သောကြာနေ့တွင် ပြောကြောင်း AP သတင်းတွင် ဖော်ပြသည်။

ရုရှားစစ်တပ် အနေဖြင့် မိမိတို့တပ်ဖွဲ့ဝင်များကို ခဲယမ်းများထောက်ပံ့ရန် ပျက်ကွက်ခဲ့သည်ဟုလည်း ၎င်းက စွပ်စွဲသည်။

ရုရှားသမ္မတ ပူတင် (Putin)နှင့် နီးကပ်သော ဆက်ဆံရေးရှိသူ ယက်ဗ်ဂျီနီ ပရီဂေါ့ဟင် (Yevgeny Prigozhin) က ဝဂ်နာများသည် လာမည့် မေလ ၉ ရက်တွင် ဘတ်မုကို သိမ်းပိုက်ရန် ပြင်ဆင်ထားသည်ဟု ပြောခဲ့သည်။

သို့သော် အထောက်အပံ့ ကောင်းစွာမရရှိမှု၊ အကျအဆုံးများမှုတို့ကြောင့် ထိုစစ်ဆင်ရေးကို မေလ ၁၀ ရက်တွင် ရုရှားစစ်တပ်သို့ လွှဲပြောင်းပေးမည်ဟု ၎င်းက ပြောသည်။

သောကြာနေ့ ပြောဆိုမှုသည် ပရီဂေါ့ဟင်၏ ပထမဆုံး ခြိမ်းခြောက်မှုတော့ မဟုတ်ပေ။

ဝဂ်နာပိုင်ရှင်သည် ရုရှားစစ်တပ်နှင့် ကာလကြာရှည် အဆင်မပြေမှုများရှိကာ ခဲယမ်းရှားပါးမှုနှင့် ပတ်သက်၍ ရုရှား စစ်တပ်အား မကြာခဏဆိုသလို အပြစ်တင်ခဲ့သူ ဖြစ်သည်။

ဝဂ်နာအဖွဲ့၀င်များ သေဆုံးနေသည်ကို ပြ၍ ရုရှားကိုအပြစ်တင်နေသော ပရီဂေါ့ဟင်ကို တွေ့ရစဉ်

ပရီဂေါ့ဟင်၏ ပြောခွင့်ရပုဂ္ဂိုလ်သည်လည်း သောကြာနေ့တွင် ဗွီဒီယိုတစ်ခု တင်ခဲ့ကာ ယင်းတွင် ဝဂ်နာပိုင်ရှင်အား ယူနီဖောင်းဝတ် အလောင်းများဘေး၌ ရပ်နေသည်ကို တွေ့ရပြီး ထိုအလောင်းများသည် ကြာသပတေးနေ့ တစ်နေ့ ထဲတွင် ကျဆုံးခဲ့သည့် ဝဂ်နာစစ်သားများ ဖြစ်သည်ဟု ပြောသည်။

ထို့အပြင် ဗွီဒီယို၌ ပရီဂေါ့ဟင်သည် ခဲယမ်းများ ထောက်ပံ့ရန်လည်း ရုရှားကာကွယ်ရေးဝန်ကြီးနှင့် စစ်ဦးစီးချုပ်တို့ အား ဒေါသတကြီး တောင်းဆိုခဲ့သည်။

သေဆုံးသူများတွင် မိသားစုများရှိသည်ဟု ၎င်းကပြောခဲ့ကာ မိမိတို့အား ခဲယမ်းများမပေးသည့် လူဖျင်းများ ငရဲ၌ အူများ အစားခံရပါစေဟုလည်း ကျိမ်ဆိုခဲ့သည်။

ဝဂ်နာတပ်ဖွဲ့သည် ဘတ်မုမြို့သိမ်း တိုက်ပွဲကို ဦးဆောင်လျက်ရှိသည်။ ယင်းကို ယူကရိန်းစစ်ပွဲ၏ အရှည်ကြာဆုံး နှင့် သေဆုံးမှု အများဆုံးတိုက်ပွဲဟု သတ်မှတ်နိုင်သည်။

ရှစ်လကြာ တိုက်ပွဲတွင် လူထောင်ချီ သေဆုံးခဲ့ပြီဟု ယူဆရပြီး ထိုတိုက်ပွဲမှ ဝဂ်နာများ ထွက်ခွာသွားခြင်းက ရုရှား စစ်တပ်အတွက် ကြီးမားသည့် ထိုးနှက်ချက်လည်း ဖြစ်လာပေလိမ့်မည်။

ယူကရိန်းအတွက်တင်မူ ဘတ်မုတိုက်ပွဲသည် ရုရှားကျူးကျော်စစ်ကို ခုခံမှု၏ အရေးပါသော ပြယုဂ်တစ်ခုဖြစ် သည်။ ထိုမြို့ကို လက်လွှတ်ရလျှင် ယူကရိန်းအနေဖြင့် လက်ခံနိုင်စရာ မရှိသော သတ်မှတ်ချက်များကို ခေါင်း ညှိတ်ရမည့် အခြေအနေသို့ ရောက်ရှိသွားလိမ့်မည်ဟုလည်း ယူကရိန်းသမ္မတက ပြောသည်။

ပြီးခဲ့သည့် နှစ်ကုန်ပိုင်းတွင် ယူကရိန်းစစ်မြေပြင်၌ ဝဂ်နာတပ်ဖွဲ့ဝင် ၅၀၀၀၀ ခန့် တိုက်ပွဲဝင်နေသည်ဟု အမေရိကန်က ခန့်မှန်းထားသည်။

ရှေ့တန်း စစ်မြေပြင်တစ်ခုကိုတွေ့ရစဉ်

ဒီဇင်ဘာလ နောက်ပိုင်း ယူကရိန်း စစ်မြေပြင်တွင် သေဆုံးခဲ့သည့် ရုရှား တပ်ဖွဲ့ဝင် ၂၀၀၀၀ ခန့်မှ တစ်ဝက်မှာ ဘတ်မုတွင် သေဆုံးခဲ့သည့် ဝဂ်နာများဖြစ်သည်ဟု အမေရိကန်အမျိုးသား လုံခြုံရေးကောင်စီ၏ ပြောခွင့်ရပုဂ္ဂိုလ် က ပြောသည်။

ပရီဂေါ့ဟင်သည် ဝဂ်နာအဖွဲ့ကို စတင်ထူထောင်ခဲ့သည့် ပြီးခဲ့သည့် ၁၀ နှစ်တာ ကာလကတည်းက ရုရှားစစ်တပ် ခေါင်းဆောင်ပိုင်းနှင့် အငြင်းပွားမှုများ ရှိခဲ့သည်။

ယူကရိန်းစစ်ပွဲ ကာလတွင်လည်း ၎င်းသည် ရုရှားစစ်တပ် အရာရှိများကို ပြင်းထန်စွာ ဝေဖန်ခဲ့သည်။ ၎င်းတို့သည် ညံ့ဖျင်းကြောင်းလည်း လူသိရှင်ကြား စွပ်စွဲပြောဆိုခဲ့သည်။

ယင်းက တင်းကြပ်စွာ ထိန်းချုပ်ထားသည့် ရုရှားနိုင်ငံရေး စနစ်အတွင်းမှ ကြုံတောင်ကြုံခဲ အခြေအနေလည်း ဖြစ်သည်။

Source: AP

CNI International News

ပါနာဂျီ၊ မေလ ၆

အမေရိကန်သည် အာဖဂန်အရေးတွင် ဝင်ရောက်စွက်ဖက်ရန် ထပ်မံကြိုးပမ်းနေကြောင်း၊ ယင်းနှင့်ပတ်သတ်၍ ခိုင်မာသည့် သက်သေအထောက်အထားရှိကြောင်း ရုရှားနိုင်ငံခြားရေးဝန်ကြီး ဆာဂျေ လာဗရော့ဗ်(Sergey Lavrov) က သောကြာနေ့တွင် ပြောသည်ဟု တာ့စ်သတင်းတွင် ဖော်ပြသည်။

ရှန်ဟိုင်းပူးပေါင်းဆောင်ရွက်မှုအဖွဲ့ (Shanghai Cooperation Organization)၏ အဖွဲ့ဝင်နိုင်ငံများနှင့် တွေ့ဆုံပြီး နောက်တွင် ထိုသို့ ပြောကြားခဲ့ခြင်းဖြစ်သည်။

SCO-အာဖဂန်အဖွဲ့ကို စတင်အသက်သွင်းရန် ဆုံးဖြတ်ချက်ကို အကောင်အထည်ဖော်နိုင်လိမ့်မည်ဟု မျှော်လင့် ကြောင်းလည်း ၎င်းကပြောသည်။ လက်ရှိအခြေအနေအရ မြန်ဆန်သော လုပ်ဆောင်ချက်များ ချမှတ်ဆောင်ရွက် ရန် လိုအပ်သည်ဟုလည်း ၎င်းက အခိုင်အမာပြောသည်။

ရုရှားနိုင်ငံခြားရေးဝန်ကြီး ဆာဂျေ လာဗရော့ဗ်(ဓါတ်ပုံ-တာ့စ်သတင်းဌာန)

ထိုသို့ဖြစ်ရခြင်းမှာ အမေရိကန်အနေဖြင့် အာဖဂန်အရေးကိစ္စများတွင် နောက်ထပ်ထပ်မံစွက်ဖက်ရန် ကြိုးစား နေခြင်းကြောင့်ဖြစ်သည်ဟု ရုရှားဝန်ကြီးက ပြောသည်။ အာဖဂန်မြေပေါ်တွင် ရှိနေဆဲဖြစ်သည့် အကြမ်းဖက်အဖွဲ့ များကို အမေရိကန်က ထောက်ပံ့နေသည်ဆိုသည်နှင့် တာလီဘန်များကို ဆန့်ကျင်နေသည်ဆိုသည့် ခိုင်မာသော သက်သေလည်းရှိသည်ဟု ၎င်းကပြောသည်။

၂၀၁၉ ခုနှစ်က အာဖဂန်နစ္စတန်နိုင်ငံ၊ Herat တွင် အာဖဂန်စစ်တပ်အတွက် လေ့ကျင့်ရေးသင်တန်း တက်ရောက်နေသည့် အမေရိကန်စစ်သားများကို တွေ့ရစဉ်(ဓါတ်ပုံ-EPA)

အမေရိကန်တို့သည် အာဖဂန်အနီးနှင့် ဗဟိုအာရှဒေသတို့ရှိ ၎င်းတို့၏ စစ်ဘက်ဆိုင်ရာ အခြေခံ အဆောက်အဦ များကို ထပ်မံဖြည့်တင်းရန် ကြိုးပမ်းမှုကို မစွန့်လွှတ်သေးဟုလည်း ၎င်း၏ပြောဆိုမှုတွင် ပါဝင်သည်။

ထို လုပ်ဆောင်ချက်များကြောင့် ဖြစ်ပေါ်လာမည့် ပြင်းထန်သောအန္တရာယ်ကို အားလုံးက သတိပြုမိထားသည်ဟု လာဗရော့ဗ်က ပြောကာ ရုရှားအနေဖြင့် ယင်းတို့ကို ပြင်းထန်စွာ ဆန့်ကျင်သွားမည်ဟု ဆိုသည်။

Source:တာ့စ်သတင်းဌာန

CNI International News

ပန်နာဂျီ၊ မေလ ၆

တရုတ်နှင့် ရုရှားတို့ ဦးဆောင်သည့် နိုင်ငံများအဖွဲ့တစ်ခုမှ နိုင်ငံခြားရေးဝန်ကြီးများသည် အိန္ဒိယနိုင်ငံ ဂိုအာ (Goa) ပြည်နယ်တွင် သောကြာနေ့က တွေ့ဆုံခဲ့သည်ဟု AP သတင်းတွင် ဖော်ပြထားသည်။

ထိုတွေ့ဆုံမှုတွင် နိုင်ငံခြားရေးဝန်ကြီးများသည် ဒေသတွင်း လုံခြုံရေး၊ အကြမ်းဖက်ဝါဒ တိုက်ဖြတ်ရေးနှင့် စီးပွားရေး၊ ယဉ်ကျေးမှုဆိုင်ရာ ဆက်သွယ်မှုများ ခိုင်မာစေရေးတို့ကို ဆွေးနွေးမည်ဟု ယူဆရသည်။

ရှန်ဟိုင်း ပူးပေါင်းဆောင်ရွက်မှုအဖွဲ့ (SCO) ၏ အဖွင့် အခမ်းအနားတွင် အိန္ဒိယနိုင်ငံခြားရေးဝန်ကြီး ဆပ်ရာမန် ယမ် ဂျိုင်ရှန်ကာ (Subhramanyam Jaishankar)က ကမ္ဘာလုံးဆိုင်ရာ အဖွဲ့အစည်းများ၏ ကိုဗစ်ရောဂါ ပျံ့နှံ့မှု အပေါ် တုန့်ပြန်မှု၊ ပထဝီ နိုင်ငံရေး ဆိုင်ရာ မကျေလည်မှုများအပေါ် ဖြေရှင်းမှု စွမ်းရည်တို့ကို ဝေဖန်ခဲ့သည်။

ထို့နောက် SCO ကဲ့သို့ ဖိုရမ်များသည် ထိုကဲ့သို့သော စိန်ခေါ်မှုများကို ဖြေရှင်းရေး အထောက်အကူ ဖြစ်မည့် အခွင့်အရေးကို ဖြစ်စေသည်ဟု ၎င်းက ပြောသည်။

SCO အဖွဲ့တွင် တရုတ်၊ ရုရှားတို့အပြင် တခြားသော အာရှနိုင်ငံများ ပါဝင်သည်။

အိန္ဒိယမှာ ကျင်းပနေသည့် SCO ဖိုရမ် တက်ရောက်လာသည့် သံတမန်များကိုတွေ့ရစဉ်

ထိုကဲ့သို့သော အခြေအနေများသည် စွမ်းအင်၊ အစားအစာ၊ မြေသြဇာတို့ ပါဝင်သော ကမ္ဘာလုံးဆိုင်ရာ ထောက်ပံ့ ရေး လမ်းကြောင်းများကို ထိခိုက်စေကာ ဖွံ့ဖြိုးဆဲနိုင်ငံများက ယင်းဒဏ်ကို ပိုခံရသည်ဟု အိန္ဒိယနိုင်ငံခြားရေး ဝန်ကြီးက ပြောသည်။

ဖော်ပြပါ ပဋိပက္ခများသည် ကမ္ဘာလုံးဆိုင်ရာ အဖွဲ့အစည်းများ၏ စိန်ခေါ်မှုများကို အချိနှင့်တပြေးညီ ထိရောက်စွာ ကိုင်တွယ် ဖြေရှင်းနိုင်မှု စွမ်းရည်အပေါ် ယုံကြည်မှု ကျဆင်းစေသည်ဟု ၎င်းက ပြောသည်။

ကမ္ဘာ့လူဦးရေ၏ ၄၀ ရာခိုင်နှုန်းကျော်သည် SCO အဖွဲ့ဝင် နိုင်ငံများတွင်ရှိကာ အဖွဲ့၏ စုပေါင်း ဆုံးဖြတ်ချက်များ သည် ကမ္ဘာကြီးအပေါ် သေချာပေါက် သက်ရောက်မှု ရှိစေမည်ဟုလည်း ဂျိုင်ရှန်ကာက ပြောသည်။

ဖွင့်ပွဲမှတ်ချက်စကားတွင် ဂျိုင်ရှန်ကာသည် ရုရှား၏ ယူကရိန်းစစ်ပွဲနှင့် ပတ်သက်၍ ထုတ်ပြန် ပြောဆိုခဲ့ခြင်း မရှိသကဲ့သို့ ရုရှားသည် အဖွဲ့အတွင်း ဝေဖန်မှုများနှင့် ကြုံတွေ့ရနိုင်ခြေ မရှိဘဲ ယခုတွေ့ဆုံပွဲကို ၎င်းတို့၏ ဒေသတွင်း သြဇာသက်ရောက်မှုအတွက် အသုံးချသွားဖွယ် ရှိသည်ဟု လေ့လာသူများက ပြောသည်။

SCO အဖွဲ့ကို ၂၀၀၁ ခုနှစ်တွင် တရုတ်နှင့်ရုရှားတို့က ဖွဲ့စည်းခဲ့ခြင်းဖြစ်ကာ ယင်းတွင် ဗဟိုအာရှနိုင်ငံများဖြစ်သော ကာဇတ်စတန်၊ ကာဂျစ်စတန်၊ တာဂျစ်ကစ္စတန်၊ ဥဇဘတ်ကစ္စတန်တို့ ပါဝင်ခဲ့သည်။

အိန္ဒိယနှင့် ပါကစ္စတန်တို့သည် ၂၀၁၇ ခုနှစ်တွင် အဖွဲ့ဝင်အဖြစ် ပူးပေါင်းခဲ့ကာ အီရန်သည် ယခုနှစ် နှောင်းပိုင်းတွင် ပူးပေါင်းမည်ဟု ယူဆရသည်။

CSO ဖိုရမ်ကျင်းပနေစဉ်

အကြမ်းဖက်မှုအား တိုက်ဖြတ်ရန် လိုအပ်မှုကိုလည်း ဂျိုင်ရှန်ကာက အလေးအနက်ထား ပြောဆိုခဲ့ကာ နယ်စပ် ဖြတ်ကျော် အကြမ်းဖက်မှုများကို တားဆီးရမည်ဟု ဆိုသည်။

ယင်းက အစဉ်အလာ ပြိုင်ဘက် ပါကစ္စတန်ကို ရည်ညွှန်း ပြောဆိုသည့်သဘော ဖြစ်သည်။

သောကြာနေ့ အစည်းအဝေးကို ပါကစ္စတန်နိုင်ငံခြားရေးဝန်ကြီးလည်း တက်ရောက်ခဲ့ပြီး ယင်းက ဆယ်စုနှစ် တစ်ခု နီးပါးတာကာလအတွင်း အိန္ဒိယသို့ ပါကစ္စတန်၏ ထိပ်တန်းအရာရှိ တစ်ဦး ပထမဆုံး ရောက်ရှိ လာမှုလည်း ဖြစ်သည်။

ပါကစ္စတန်သည် အိန္ဒိယထိန်းချုပ်ရာ ကတ်ရှ်မီးယား (Kashmir) ဒေသရှိ သောင်းကျန်းသူ အဖွဲ့များကို လက်နက် ထောက်ပံ့ခြင်း၊ လေ့ကျင့်ပေးခြင်းတို့ လုပ်ဆောင်နေသည်ဟု အိန္ဒိယဘက်က စွပ်စွဲထားသော်လည်း ပါကစ္စတန် ဘက်က ယင်းကို ငြင်းဆိုသည်။

သောကြာနေ့ အစည်းအဝေး မတိုင်ခင် အိန္ဒိယဝန်ကြီးသည် တရုတ်နှင့် ရုရှားတို့မှ နိုင်ငံခြားရေးဝန်ကြီးများနှင့် ကြာသပတေးနေ့တွင် တွေ့ဆုံခဲ့သည်။

ထိုတွေ့ဆုံမှုသည် အိန္ဒိယနှင့်တရုတ်တို့အကြား မတည်မငြိမ်ဖြစ်နေသော နယ်စပ်အရေးနှင့် ပတ်သက်၍ တင်းမာမှုများ ရှိနေချိန်တွင် ပေါ်ပေါက်လာခြင်း ဖြစ်သည်။

Source: AP

CNI International News

ဂျကာတာ၊ မေလ ၆

အကြမ်းဖက်မှုများ မြင့်တက်လာချိန်တွင် ငြိမ်းချမ်းရေးလုပ်ငန်းစဉ်အား စတင်နိုင်ရေး ကြိုးပမ်းမှုတစ်ခု အနေဖြင့် အင်ဒိုနီးရှားသည် မြန်မာ့နိုင်ငံရေး ပဋိပက္ခတွင် အဓိကနေရာမှ ပါဝင်နေသူများအပြင် အိန္ဒိယ၊ ထိုင်းနှင့် တရုတ်တို့ ကဲ့သို့ အိမ်နီးချင်းနိုင်ငံများနှင့် လအတန်ကြာ တိတ်တဆိတ် တွေ့ဆုံမှုများ လုပ်ဆောင်လျက်ရှိသည်ဟု အင်ဒိုနီး ရှား နိုင်ငံခြားရေးဝန်ကြီး ရတ်နိုမာဆူဒီက ပြောကြောင်း Reuters သတင်းတွင် ဖော်ပြသည်။

Reuters သတင်းနှင့် တွေ့ဆုံရာတွင် ရတ်နိုမာဆူဒီ (Retno Marsudi) က အင်ဒိုနီးရှားသည် အာဆီယံ အဖွဲ့၏ ဥက္ကဋ္ဌ နိုင်ငံအဖြစ် မြန်မာပဋိပက္ခကို ကျော်လွှားဖောက်ထွက်နိုင်ရန် တိတ်တဆိတ် ကြိုးပမ်းလျက် ရှိသည်ဟု ပြောသည်။

ထိုသို့ ကြိုးပမ်းရာတွင် အင်ဒိုနီးရှားသံတမန်များသည် ပဋိပက္ခအတွင်း ပါဝင်နေသူများနှင့် အကြိမ်ပေါင်း ၆၀ ကျော် ဆွေးနွေးခဲ့ပြီး ဖြစ်သည်ဟု ပြောခဲ့သည်။

တွေ့ဆုံခဲ့သည့် အဖွဲ့အစည်းများတွင် နစက၊ တိုင်းရင်းသား လက်နက်ကိုင် အဖွဲ့နှစ်ဖွဲ့နှင့် ဒီမိုကရေစီလိုလားသော NUG အစိုးရတို့ ပါဝင်သည်။

ပါဝင်နေသူ အားလုံး၏ ယုံကြည်မှုကို ရရှိရန်မှာ မဖြစ်မနေ အရေးပါသည်ဟု ရတ်နိုက ပြောသည်။

၂၀၂၁ ခုနှစ်က အင်ဒိုနီးရှား၊ ထိုင်းနဲ့ နစက နိုင်ငံခြားရေးဝန်ကြီးတို့ တွေ့ဆုံစဉ်

အင်ဒိုနီးရှားသည် အသံမထွက်သော သံတမန်ရေး နည်းလမ်းကို အသုံးပြုနေကြောင်း၊ ယင်းသည် ပါဝင်နေ သူများ ၏ ယုံကြည်မှုကို တည်ဆောက်ရန် ရည်ရွယ်သည်။

ထိုမှသာလျှင် ၎င်းတို့အနေဖြင့် အင်ဒိုနီးရှားနှင့် ပြောဆို ဆက်ဆံလိုမည်ဖြစ်ကြောင်း ရတ်နိုက ပြောသည်။

တိတ်ဆိတ်သော သံတမန်ရေး နည်းလမ်းသည် ဘာမှ လုပ်ဆောင်ခြင်း မရှိဆိုသည့် အဓိပ္ပာယ် မသက်ရောက် ကြောင်း၊ ပြီးခဲ့သည့် လေးလတာ ကာလအတွင်း အင်ဒိုနီးရှားသည် လုပ်ငန်းဆောင်တာများစွာကို ဆောင်ရွက် နိုင်ခဲ့ကြောင်းလည်း သူမက ပြောသည်။

အင်ဒိုနီးရှား၏ လုပ်ဆောင်ချက်သည် မြန်မာပဋိပက္ခတွင် ပါဝင်နေသည့် အဓိက အဖွဲ့အစည်းများ အားလုံးကို ဆွေး နွေးပွဲဆီသို့ ခေါ်ဆောင်နိုင်ရန် ပထမဆုံးသော အရေးပါသည့် ကြိုးစားမှုဖြစ်သည်။

အာဆီယံအဖွဲ့နှင့် နစက ခေါင်းဆောင်တို့ လွန်ခဲ့သော နှစ်နှစ်တွင် သဘောတူခဲ့သည့် ငြိမ်းချမ်းရေးဆိုင်ရာ ဘုံ သဘောတူညီချက်ကို အကောင်အထည်ဖော်ရေး တွန်းအားပေးရန် ရည်ရွယ်သည်။

တတ်နိုင်သမျှ ပါဝင်ဆောင်ရွက်ခွင့်ရရန် ကြိုးပမ်းနေကြောင်း ရတ်နိုက ပြောသည်။

အာဆီယံအဖွဲ့၀င်များကိုတွေ့ရစဉ် 

အင်ဒိုနီးရှားသည် ပဋိပက္ခတွင် ပါဝင်နေသည့် အဖွဲ့အစည်းများအကြားရှိ ကွာဟချက်များကို လျှော့ချနိုင်ရေး ပေါင်းကူးတံတားအဖြစ် ဆက်လက် ဆောင်ရွက်နိုင်ရန် ကြိုးပမ်းသွားမည်ဟုလည်း သူမက ပြောသည်။

ထိုကိစ္စနှင့် ပတ်သက်၍ နစကနှင့် တိုင်းရင်းသား လက်နက်ကိုင် အဖွဲ့အစည်းများအား ဆက်သွယ် မေးမြန်းခဲ့ ရာတွင် ပြန်လည် ဖြေကြားခဲ့ခြင်း မရှိခဲ့ပေ။

ငြိမ်းချမ်းရေး ဆွေးနွေးပွဲအတွက် ကြိုးပမ်းနေခြင်းကြောင့် အာဆီယံဥက္ကဋ္ဌ နိုင်ငံနှင့် ပူးပေါင်း ဆောင်ရွက်လျက် ရှိသည်ဟု NUG ၏ ပြောခွင့်ရပုဂ္ဂိုလ် တစ်ဦးက ပြောသည်။

ပဋိပက္ခတွင် ပါဝင်နေသူများနှင့် တွေ့ဆုံဆွေးနွေးသည့် ကိစ္စကို အာဆီယံအဖွဲ့နိုင်ငံများကလည်း ထောက်ခံသည် ဟု အင်ဒိုနိုင်ငံခြားရေးဌာန ပြောခွင့်ရပုဂ္ဂိုလ်က ပြောသည်။

Source: Reuters

CNI International News

ဘန်ကောက်၊ မေလ ၅

မေလ ၁၄ ရက်နေ့၌ ကျင်းပမည့် ရွေးကောက်ပွဲအပြီးတွင် နိုင်ငံရေးအရ ဖြစ်ပေါ်လာနိုင်ခြေရှိသည့် ကိစ္စရပ်များကို ထိုင်းဒုတိယဝန်ကြီးချုပ် ဝစ်စနူ ကရီယာနမ် (Wisaanu Krea-ngam)က ပြောပြခဲ့သည်။

ရွေးကောက်ပွဲအပြီးတွင် နိုင်ငံရေးအရ လစ်ဟာမှု သို့မဟုတ် အငြင်းပွားမှု အခြေအနေများ ပေါ်ပေါက်လာနိုင်ဖွယ် ရှိသည်ဆိုခြင်းကိုတော့ ၎င်းက ပယ်ချခဲ့သည်။

သို့သော် အစိုးရအသစ် ဖွဲ့စည်းခြင်းသည် သာမာန်ထက် ပိုကြာမြင့်နိုင်သည်ကိုတော့ စိုးရိမ်မိသည်ဟု ထိုင်း ဒုတိယ ဝန်ကြီးချုပ် ဝစ်စနူ ပြောသည်။

လွှတ်တော်နေရာ အများစုကို အနိုင်ရရှိသည့် ပါတီအနေဖြင့် အစိုးရသစ်ကို ဖွဲ့စည်းနိုင်မည်ဟု ယုံကြည်နေသော် လည်း အနိုင်ရရှိသော ပါတီအနေဖြင့် လွှတ်တော်နေရာ အနည်းငယ်သာရရှိကာ ညွှန့်ပေါင်းအစိုးရ ဖွဲ့စည်းရနိုင် သည့် မသေချာမရေရာမှု တချို့ ရှိနေသည်ဟုလည်း ဝစ်စနူက ပြောသည်။

ရွေးကောက်ပွဲ အကြိုကာလ နိုင်ငံရေးအခြေအနေများ မြင့်တက်နေခြင်းနှင့် ပတ်သက်၍ မေးမြန်းခဲ့ရာတွင် ဒုတိယ ဝန်ကြီးချုပ်က ယခုကဲ့သို့ ပြင်းပြင်းထန်ထန် ယှဉ်ပြိုင်မှုမျိုးသည် ပုံမှန်မဟုတ်ကြောင်း ပါတီအသီးသီးက အနိုင်ရရှိရေးအတွက် ဘက်ပေါင်းစုံကနေ ဆောင်ရွက်နေကြောင်း ပြန်လည်ဖြေကြားခဲ့သည်။

ထိုင်းဒုတိယဝန်ကြီးချုပ်ဝစ်စနူကရီယာနမ် ကိုတွေ့ရစဉ်

ရွေးကောက်ပွဲရလဒ် မတိုင်ခင် ပါတီများအနေဖြင့် မဟာမိတ်ဖွဲ့စည်းရန် ပြောဆို ဆွေးနွေးခဲ့ပြီး ဖြစ်သည်ဆိုသည့် ကောလာဟလများနှင့် ပတ်သက်၍လည်း မစ္စတာ ဝစ်စနူက ၎င်း၏ အတွေ့အကြုံများအရ ထိုကဲ့သို့ အခြေအနေ မျိုးသည် တရားဝင် မဟုတ်သော ရွေးကောက်ပွဲရလဒ် မပေါ်ထွက်လာမခြင်း ဖြစ်လေ့မရှိဟု ဖြေခဲ့သည်။

ထိုကဲ့သို့ အစောပိုင်း နိုင်ငံရေး သဘေတူညီချက်များသည် အဆုံးသတ် ရလဒ်အတွက် အာမခံချက် ဖြစ်စေမည် မဟုတ်ဟု ဝစ်စနူက ပြောသည်။

၂၀၁၉ အထွေထွေ ရွေးကောက်ပွဲကို ကြည့်မည်ဆိုလျှင်လည်း ရွေးကောက်ပွဲအပြီး နှစ်လအကြာ တရားဝင် မဲရလဒ် များ ထွက်ပေါ်လာပြီးချိန် တရားဝင်မဟုတ်သော မဲရလဒ်များ အကြီးအကျယ် ပြောင်းလဲသွားသည်နှင့် တစ်ပြိုင် တည်း နိုင်ငံရေးမဟာမိတ်ဖွဲ့မှုများ ပေါ်ပေါက်လာသည်ကိုလည်း တွေ့ရမည်ဟု ၎င်းက ပြောသည်။

ပါတီနှစ်ခု အနေဖြင့် လွှတ်တော် နေရာများကို ထပ်တူနီးပါးရရှိကာ အစိုးရအဖွဲ့ ဖွဲ့စည်းရန်နှင့် ဝန်ကြီးချုပ်အသစ် ရွေးချယ်ရန် သဘောတူညီချက် မရနိုင်သည့် အခြေအနေမျိုးတွင် မည်သို့ လုပ်ဆောင်မည်လဲဟု မေးမြန်းခဲ့ရာ၌ ဖွဲ့စည်းပုံအခြေခံဥပဒေ၏ ပုဒ်မ ၂၇၀ အရ ထိုကဲ့သို့ အခြေအနေမျိုးတွင် မည်သို့ လုပ်ဆောင်ရမည်ကို ရှင်းရှင်း လင်းလင်း ဖော်ပြထားသည်ဟု ဝစ်စနူက ပြောသည်။

၀န်ကြီးချုပ်ဖြစ်လာမယ့်သူအဖြစ် ရေပန်းစားနေတဲ့ ဖြူးထိုင်းပါတီက ပေတုန်တန်ကိုတွေ့ရစဉ်

ဝန်ကြီးချုပ် အသစ်ကို ရွေးချယ်ရမည့် အချိန်ကို အတိအကျ သတ်မှတ်ထားခြင်း မရှိကြောင်းလည်း ၎င်းက ဆက်လက် ပြောသည်။

ဒုတိယဝန်ကြီးချုပ်က ထိုကဲ့သို့သော ချောင်ပိတ် နေမှုများအတွက် ထွက်ပေါက်ကို ရှာဖွေနိုင်ကြောင်း၊ ထို့ကြောင့် အများသူငှာ စိုးရိမ်နေသကဲ့သို့ နိုင်ငံရေးဆိုင်ရာ လစ်ဟာမှု ပေါ်ပေါက်လိမ့်မည် မဟုတ်ကြောင်း ပြောသော်လည်း ဝန်ကြီးချုပ်သစ် ရွေးချယ်ရန် လုပ်ငန်းစဉ်မှာ အနည်းငယ် ကျန့်ကြာမှုရှိနိုင်သည်ဟု ဝန်ခံသည်။

ထိုင်းဥပဒေအရ ရွေးကောက်ပွဲကော်မရှင်သည် တရားဝင် မဲရလဒ်ကို ရွေးကောက်ပွဲအပြီး ရက် ၆၀ အတွင်း ကြေညာရမည် ဖြစ်သည်။

သို့သော် ရလဒ်ကို ၄၅ ရက်အတွင်း ကြေညာမှုမျိုးလည်း ရှိသည်။

အခြေခံဥပဒေအရ ကျန့်ကြာမှုမျိုး ရှိလာခဲ့လျှင် ဝန်ကြီးချုပ်သစ် ရွေးချယ်မှုကို အောင်မြင်သည်အထိ ထပ်ခါထပ်ခါ ဆောင်ရွက်နိုင်ခြင်းကြောင့် လက်ရှိအချိန်တွင် ထိုင်းနိုင်ငံအတွက် ဝန်ကြီးချုပ်သစ် ရွေးချယ်မှုနှင့် အစိုးရအသစ် ဖွဲ့စည်းမှုကို မည်သည့်အချိန်တွင် အပြီးသတ် ဆောင်ရွက်နိုင်မည်လဲဆိုသည်ကို အတိအကျ သိရှိနိုင်ဦးမည် မဟုတ်ပေ။

CNI International News

ဘေဂျင်း၊ မေလ ၅

အာရှ-ပစိဖိတ် ဒေသဆီသို့ နေတိုးအဖွဲ့ တိုးချဲ့လာခြင်းက ဒေသတွင်း တည်ငြိမ်မှုကို ဆိုးရွားလာစေနိုင်သည်ဟု တရုတ်နိုင်ငံခြားရေးဌာန ပြောခွင့်ရပုဂ္ဂိုလ် မောင်းနင် (Mao Ning) က ကြာသပတေးနေ့တွင် ပြောခဲ့သည်ဟု တာ့စ် သတင်းမှ ဖော်ပြခဲ့သည်။

နေတိုးအဖွဲ့သည် အာရှ-ပစိဖိတ်ဒေသသို့ တိုးချဲ့လာကြောင်း၊ ဒေသတွင်း ကိစ္စများတွင် နေတိုးအဖွဲ့၏ ကြားဝင် စွက်ဖက်မှုများက ငြိမ်းချမ်းရေးနှင့် တည်ငြိမ်ရေးတို့ကို ထိခိုက်စေမည်ဖြစ်ကြောင်း၊ နေတိုးအဖွဲ့ ဂျပန်တွင် ရုံး တစ်ခု ဖွင့်လှစ်မည့် အစီအစဉ်နှင့်ပတ်သက်၍ တာ့စ်သတင်းဌာနမှ မေးမြန်းမှုကို မောင်းနင်က ပြန်လည် ဖြေကြားခဲ့ခြင်း ဖြစ်သည်။

အာရှဒေသသည် ပထဝီနိုင်ငံရေးဆိုင်ရာ အားပြိုင်မှု၏ မြေဇာပင် မဖြစ်သင့်ဟုလည်း သူမက အလေးအနက်ထား ပြောကြားသည်။

အာရှဒေသသို့ နေတိုးအဖွဲ့၏ တိုးချဲ့မှုက အဖွဲ့လိုက် ထိပ်တိုက် တွေ့ဆုံမှု ဖြစ်စေသည်ဟု မောင်းနင်က ပြောသည်။

နေတိုး အကြီးအကဲနဲ့ ဂျပန်ဝန်ကြီးချုပ်ကို တွေ့ရစဉ်

ထိုအခြေအနေက ဒေသတွင်း နိုင်ငံများအတွက် စိုးရိမ်စရာ ဖြစ်သည်ဟုလည်း သူမက ထောက်ပြသည်။

နေတိုးအဖွဲ့သည် လာမည့်နှစ်တွင် ဂျပန်နိုင်ငံ၌ ဆက်ဆံရေးရုံးတစ်ခု ဖွင့်လှစ်ရန် စီစဉ်ထားသည်ဟု Nikkei Asia သတင်းက မေလ ၃ ရက်နေ့တွင် ဖော်ပြခဲ့သည်။

သတင်းအရ အသစ်ဖွင့်လှစ်မည့် ရုံးသည် နေတိုးအဖွဲ့နှင့် ဂျပန် အပါအဝင် တောင်ကိုရီးယား၊ သြစတြေးလျနှင့် နယူးဇီလန်တို့ကဲ့သို့ အရေးပါသော မိတ်ဖက်နိုင်ငံများအကြား ညှိနှိုင်းဆွေးနွေးမှုများကို ပုံမှန် လုပ်ဆောင်ခွင့်ရစေ လိမ့်မည်ဟု သိရသည်။

ရုံးဖွင့်လှစ်ခြင်းနှင့် ပတ်သက်သည့် တရားဝင် ဆုံးဖြတ်ချက်ကို အဖွဲ့၏ ဇူလိုင် ၁၁ ရက်မှ ၁၂ ရက်အထိ ကျင်းပမည့် ညီလာခံမတိုင်ခင် ချမှတ်သွားမည်ဟုလည်း Nikkei Asia သတင်းတွင် ရေးသားထားသည်။

Source: တာ့စ်/ Nikkei Asia

CNI International News

နေပြည်တော်၊ မေလ ၅

နှစ်နိုင်ငံကြားရှိ ကျယ်ပြန့်သော မဟာဗျူဟာမြောက် ပူးပေါင်းဆောင်ရွက်မှုကို ပိုမိုမြှင့်တင်ရန် တရုတ်နှင့် မြန်မာ တို့ တရုတ်နိုင်ငံတော်ကောင်စီဝင်နှင့် နိုင်ငံခြားရေးဝန်ကြီး မစ္စတာကျင်ဂန်း၏ မေလ ၂ ရက်မှ ၄ ရက်နေ့အထိ မြန်မာပြည်ခရီးစဉ်အတွင်း သဘောတူခဲ့ကြောင်း CGTN သတင်းတွင် ဖော်ပြထားသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် နေပြည်တော်တွင် တွေ့ဆုံခဲ့ရာစဉ် တရုတ်နိုင်ငံတော် ကောင်စီဝင် နှင့် နိုင်ငံခြားရေးဝန်ကြီးဖြစ်သူ မစ္စတာကျင်ဂန်း (Qin Gang)က အိမ်နီးချင်း နှစ်နိုင်ငံကြားတွင် ပေါက်ဖော် ဆက်ဆံရေးကို ပိုင်ဆိုင်ထားခြင်းကြောင့် တရုတ်သည် မြန်မာနှင့်ဆက်ဆံရေးအား အလေးအနက်ထားသည်ဟု ပြောသည်။

တရုတ်နိုင်ငံသည် တရုတ်-မြန်မာ အသိုက်အဝိုင်းကို တည်ဆောက်ရန်၊ ကမ္ဘာလုံးဆိုင်ရာ ဖွံ့ဖြိုးတိုးတက်မှု ခြေလှမ်း၊ ကမ္ဘာလုံးဆိုင်ရာ လုံခြုံရေး ခြေလှမ်းနှင့် ကမ္ဘာလုံးဆိုင်ရာ ယဉ်ကျေးမှု ခြေလှမ်းများကို ဦးဆောင်ရန် အတွက် မြန်မာနှင့်ပူးပေါင်းသွားရန် အဆင်သင့်ရှိသည်ဟု ကျင်က ပြောသည်။

မြန်မာနိုင်ငံတွင် တည်ငြိမ်မှုနှင့် အမျိုးသားဖွံ့ဖြိုးတိုးတက်မှုရရှိရန် တရုတ်နိုင်ငံဘက်က ရိုးသားစွာ မျှော်လင့်ထား ကြောင်း ကျင်က ပြောသည်။

 ၂၀၂၃ ခုနှစ်၊ မေလ ၂ ရက်က တရုတ်နိုင်ငံခြားရေးဝန်ကြီးဖြစ်သူ မစ္စတာကျင်ဂန်းနဲ့ နစက၏ နိုင်ငံခြားရေး ဝန်ကြီး ဦးသန်းဆွေတို့ တွေ့ဆုံစဉ်

၎င်းက “မြန်မာ့ အခြေအနေများနှင့် ကိုက်ညီမှုရှိသော မြန်မာ့စရိုက် လက္ခဏာများနှင့် တိုးတက်မှု လမ်းကြောင်း တစ်ခုကို ဖော်ဆောင်ရေး တရုတ်နိုင်ငံအနေဖြင့် ကူညီပေးသွားမည်”ဟု ပြောသည်။

တရုတ်သည် မြန်မာနိုင်ငံ၏ နိုင်ငံရေး ပြုပြင်ပြောင်းလဲမှု လုပ်ငန်းစဉ်အား ထောက်ပံ့ ကူညီလျက်ရှိကြောင်း၊ ဖွဲ့စည်းပုံ အခြေခံဥပဒေနှင့် ဥပဒေမူဘောင်အတွင်း အမျိုးသား ပြန်လည် ရင်ကြားစေ့ရေးနှင့် ကွဲပြားမှုများကို ဖြေရှင်းရေး သက်ဆိုင်ရာ အဖွဲ့အစည်းများကို ထောက်ခံလျက်ရှိကြောင်း ကျင်က ဆက်ပြောသည်။

နိုင်ငံတကာ အသိုင်းအဝိုင်းအနေဖြင့် မြန်မာနိုင်ငံ၏ အချုပ်အခြာအာဏာကို လေးစားရန်၊ မြန်မာနိုင်ငံ၏ ငြိမ်းချမ်း ရေးနှင့် ရင်ကြားစေ့ရေးတို့တွင် အပြုသဘော ဆောင်သည့်ဘက်မှ ပါဝင်ကူညီရန်လည်း ကျင်က တိုက်တွန်းသည်။

၎င်းက “တရုတ်နိုင်ငံသည် မြန်မာနိုင်ငံ၏ ဖွံ့ဖြိုးတိုးတက်ရေး ကြိုးပမ်းမှုများအပြင် တရုတ်-မြန်မာ စီးပွားရေး စင်္ကြံန်ရှိ စီမံကိန်းများတွင် အဓိကကျသော ပူးပေါင်းဆောင်ရွက်မှုများကို မြှင့်တင်ရန်၊ မြန်မာနိုင်ငံသားများအတွက် အကျိုး ဖြစ်ထွန်းစေမည့် စိုက်ပျိုးရေး၊ ပညာရေး၊ ကျန်းမာရေး စောင့်ရှောက်မှုနှင့် တခြားသော အကြောင်းအရာ များဆိုင်ရာ စီမံကိန်းများကို ပြည့်မှီအောင် ဆောင်ရွက်ရေးတို့၌ ဆက်လက် ကူညီသွားမည်”ဟု ပြောခဲ့သည်။

တရုတ်အနေဖြင့် မြန်မာနှင့် ဘင်္ဂလားဒေ့ရှ်နိုင်ငံတို့၏ ဆက်ဆံရေးများ မြှင့်တင်ရန် ဆက်လက် ထောက်ပံ့သွားမည် ဖြစ်ကြောင်း၊ တရုတ်-မြန်မာ- ဘင်္ဂလားဒေ့ရှ် သုံးနိုင်ငံ လက်တွေ့ဆန်သော ပူးပေါင်းဆောင်ရွက်မှုများကို တိုးချဲ့ရေး အတွက် နှစ်နိုင်ငံလုံးနှင့် လုပ်ဆောင်သွားလိုသည်ဟုလည်း တရုတ်နိုင်ငံခြားရေးဝန်ကြီးက ပြောသည်။

၂၀၂၃ ခုနှစ်၊ မေလ ၂ ရက်က တရုတ်နိုင်ငံခြားရေးဝန်ကြီးဖြစ်သူ မစ္စတာကျင်ဂန်းနဲ့ ဗိုလ်ချုပ်မှူးကြီးမင်းအောင်လှိုင် တွေ့ဆုံစဉ်

နှစ် ၇၀ နီးပါးကြာ သံတမန် ဆက်ဆံရေး စတင်ခဲ့သည့် ကာလတစ်လျှောက်လုံးတွင် နှစ်နိုင်ငံကြား ဖွံ့ဖြိုးတိုးတက်မှု အရှိန်ကို အစဉ်အမြဲ ထိန်းသိမ်းကာ ကောင်းမွန်သော ရလဒ်များ ရရှိခဲ့သည်ဟု မြန်မာခေါင်းဆောင် ဗိုလ်ချုပ်မှူး ကြီး မင်းအောင်လှိုင်က ပြောသည်။

CGTN ၏ ဖော်ပြချက်တွင် ဗိုလ်ချုပ်မှူးကြီးမင်းအောင်လှိုင်အား မြန်မာခေါင်းဆောင်ဟု ရည်ညွန်းထားသည်ကိုလည်း တွေ့ရသည်။

ဗိုလ်ချုပ်မှူးကြီးမင်းအောင်လှိုင်က “မြန်မာနိုင်ငံအနေဖြင့် နှစ်နိုင်ငံကြား မိတ်ဖက် ဆက်ဆံရေးနှင့် ပူးပေါင်း ဆောင်ရွက်မှုတို့ကို မြှင့်တင်ရန်နှင့် အနာဂတ်ကို မျှဝေပိုင်ဆိုင်ထားသည့် မြန်မာ-တရုတ် အသိုက်အဝန်းကို တည်ထောင်သွားလိုသည်”ဟု ပြောသည်။

မြန်မာနိုင်ငံနှင့် ပတ်သက်သည့် ကိစ္စများတွင် တရုတ်နိုင်ငံ၏ မျှတ၍ ဘက်မလိုက်သော ရပ်တည်ချက်အတွက် ကျေးဇူးတင်ကြောင်းလည်း ၎င်းက ပြောခဲ့သည်။

Source: CGTN

CNI International News

ဘရာစီးလီးယား၊ မေလ ၄

ကိုဗစ် ၁၉ ရောဂါ ကာကွယ်ဆေး ထိုးခြင်းဆိုင်ရာ စာရွက်စာတမ်းများ အတုပြုလုပ်မှုအတွက် စုံစမ်းစစ်ဆေးမှု အစိတ်အပိုင်း တစ်ခုအဖြစ် ဘရာဇီးလ်ရဲတပ်ဖွဲ့က သမ္မတဟောင်း ဂျဲလ်ဘော်ဆိုနာရို၏ နေအိမ်ကို စီးနင်း ရှာဖွေ ခဲ့သည်ဟု Al Jazeera သတင်းတွင် ဖော်ပြသည်။

ပြည်သူ့ကျန်းမာရေး စနစ်တွင်းသို့ ကာကွယ်ဆေးဆိုင်ရာ အချက်အလက် အမှားများ ထည့်သွင်းခဲ့သည်ဟု ယူဆ ရသည့် ရာဇဝတ်မှု အဖွဲ့တစ်ခုကို ပစ်မှတ်ထားကာ မြို့တော် ဘရာစီးလီးယား (Brasillia)နှင့် ရီယိုဒီဂျနေ ရိုး (Rio de Janeiro) မြို့တို့တွင် စီးနင်းရှာဖွေမှု ၁၆ ခု ပြုလုပ်ခဲ့သည်ဟု ဖက်ဒရယ်ရဲတပ်ဖွဲ့က ဗုဒ္ဓဟူးနေ့မှာ ထုတ်ပြန် သည့် ကြေညာချက် တစ်စောင်တွင် ဖော်ပြထားသည်။

ယင်းတွင် ဘော်ဆိုနာရို၏ အမည်အား သီးသန့် ဖော်ပြထာခြင်းတော့ မရှိပေ။

ကာကွယ်ဆေး လက်မှတ်အတုများသည် ၂၀၂၁ ခုနှစ်၊ နိုဝင်ဘာလနှင့် ပြီးခဲ့သည့်နှစ် ဒီဇင်ဘာလအတွင်း ပေါ်ပေါက် လာခဲ့ကာ တစ်ဦးချင်းစီ၏ ကာကွယ်ဆေးထိုးမှု၊ မထိုးမှုဆိုင်ရာ အမှန်တကယ် အခြေအနေ တစ်ရပ်လုံးကို မေးခွန်း ထုတ်စရာ ဖြစ်စေခဲ့သည်ဟု ရဲတပ်ဖွဲ့က ပြောသည်။

သမ္မတဟောင်း ဂျဲလ်ဘော်ဆိုနာရိုနဲ့ သမ္မတသစ် လူလာဒါဆေးဗားကိုတွေ့ရစဉ်

ရလဒ်အနေဖြင့် ဘရာဇီးလ်၊ အမေရိကန် အာဏာပိုင်များက ချမှတ်ထားသော ကျန်းမာရေးဆိုင်ရာ ကန့်သတ်ချက် များကို ရှောင်လွဲနိုင်ရန်အတွက် ကာကွယ်ဆေး လက်မှတ်များ ထုတ်လုပ်မှုကို ဖြစ်စေခဲ့သည်ဟု ကြေညာချက်တွင် ပါဝင်သည်။
ကာကွယ်ဆေး လက်မှတ်ဆိုင်ရာ စုံစမ်းစစ်ဆေးမှုသည် လက်ယာစွန်း ခေါင်းဆောင်ဟောင်း ရင်ဆိုင်နေရသည့် စုံစမ်းစစ် ဆေးမှုများမှ တစ်ခုဖြစ်သည်။

ဘော်ဆိုနာရိုသည် ကိုဗစ် ၁၉ နှင့် ပတ်သက်သည့် သတင်းများကို လက်မခံသူဖြစ်ကာ သမ္မတအဖြစ် ဆောင်ရွက် စဉ်အချိန်ကလည်း ဗိုင်းရပ်စ်၏ အန္တရာယ်နှင့် ပတ်သက်၍ မကြာခဏ ဆိုသလို လျှော့ပေါ့ ပြောဆိုခဲ့ပြီး ပြည်သူ့ ကျန်းမာရေးဆိုင်ရာ ကန့်သတ်ချက်များကိုလည်း လိုက်နာရန် ငြင်းဆန်ခဲ့သည်။

ယခု စုံစမ်းစစ်ဆေးမှုက ရောဂါ ကာကွယ်ဆေး မထိုးဟု ကတိပြုထားသည့် ဘော်ဆိုနာရို တစ်ယောက် ဖေဖော်ဝါရီလတွင် လူသိရှင်ကြား ထုတ်ပြန်ခဲ့သည့် ကျန်းမာရေးမှတ်တမ်း၌ မည်ကဲ့သို့ ကာကွယ်ဆေး ထိုးပြီး ကြောင်း သတ်မှတ် ခံထားရသလဲဆိုသည့် မေးခွန်းကိုလည်း ဖြေရှင်းပေးနိုင်မည်ဟု ယူဆရသည်။

ဂျွန်ဟော့ကင်းစ် တက္ကသိုလ်မှ အချက်အလက်များအရ ဘရာဇီးလ်တွင် ကိုရိုနာဗိုင်းရပ်စ်ကြောင့် လူ ၇၀၀,၀၀၀ ခန့် သေဆုံးခဲ့ကာ အမေရိကန်ပြီးနောက် ဒုတိယအများဆုံး ဖြစ်သည်။

သတင်းထောက်များနဲ့ တွေ့ဆုံနေတဲ့ ဘော်ဆိုနာရို

ဘော်ဆိုနာရို အစိုးရသည်လည်း ကူးစက်ရောဂါ ပျံ့နှံ့မှုကို ကိုင်တွယ်ပုံနှင့် ပတ်သက်၍ ဝေဖန်မှုများ၊ အကြီး အကျယ် ဆန္ဒပြမှုများဖြင့် ရင်ဆိုင်ခဲ့ရသည်။

ဗုဒ္ဓဟူးနေ့က နေအိမ်အပြင်ဘက်တွင် သတင်းထောက်များနှင့် စကားပြောရာ၌ ဘော်ဆိုနာရိုက ရှာဖွေမှုကြောင့် အံ့သြခဲ့ရကြောင်း၊ ၎င်းအနေဖြင့် ကာကွယ်ဆေး လုံးဝ ထိုးခဲ့ခြင်း မရှိကြောင်း ပြောခဲ့သည်။

၎င်းအနေဖြင့် အတုမလုပ်ခဲ့ကြောင်း၊ ကာကွယ်ဆေးလည်း မထိုးခဲ့ကြောင်း ပြော၍ ရဲများသည် ဖုန်းအား သိမ်းယူသွားသည်ဟုလည်း သမ္မတဟောင်းက ပြောသည်။

ဘရာဆီးလီးယားရှိ ဘော်ဆိုနာရို၏ ကွန်ဒိုအား ရဲများက ဝင်ရောက် ရှာဖွေနေခြင်းကို ဘရာဇီးလ် ရုပ်သံတွင် ဖော်ပြခဲ့ကာ ဘော်ဆိုနာရို၏ လက်ထောက်နှစ်ဦးကို ရဲတပ်ဖွဲ့က ဖမ်းဆီးခဲ့သည်ဟု ယခု စီးနင်းမှုနှင့် နီးစပ်သူများ က ပြောသည်။
ဘော်ဆိုနာရိုသည် ဒီဇင်ဘာလ နှောင်းပိုင်းတွင် အမေရိကန်သို့ ထွက်ခွာခဲ့ကာ မတ်လ၌ ဘရာဇီးလ်သို့ ပြန်မလာ ခင် အမေရိကန်တွင် သုံးလကြာ နေထိုင်ခဲ့သည်။

ဘရာဇီးလ် သမ္မတဟောင်းသည် နိုင်ငံ၏ ရွေးကောက်ပွဲစနစ်အား တိုက်ခိုက်မှု၊ နိုင်ငံခြား လက်ဆောင်ပစ္စည်းများ ကို ကိုယ်ကျိုးအတွက် သုံးစွဲမှု စသည့် စွပ်စွဲချက်များနှင့်လည်း ရင်ဆိုင်နေရသူ ဖြစ်သည်။

Source: Aljazeera