CNI International News

ဘန်ကောက်၊ သြဂုတ် ၂၉

ထိုင်းနိုင်ငံတွင် ဝန်ကြီးချုပ်ဟောင်း သက်ဆင် ရှင်နာဝပ် (Thaksin Shinawatra) သည် ထိုင်းဘုရင်၏ တော်ဝင် လွတ်ငြိမ်းချမ်းသာခွင့်ရရှိရန် ကြိုးပမ်းနေသည့် အခြေအနေကို ဆန့်ကျင်ကန့်ကွက်ကြောင်း Thai Pakdee ပါတီ က အမှားပြုပြင်ရေးဌာန၏ ညွှန်ကြားရေးမှူးချုပ်ထံသို့ အသနားခံစာ တင်သွင်းခဲ့သည်။

ထောင်ဒဏ် ၈ နှစ် ချမှတ်ခံထားရပြီး လက်ရှိတွင် ရဲတပ်ဖွဲ့ အကျဉ်းထောင်၌ ဆေးကုသမှု ခံယူနေသည့် သက်ဆင် သည် တော်ဝင်မိသားစု၏ လွတ်ငြိမ်းချမ်းသာခွင့်ကို ရရှိရန် ကြိုးပမ်းနေသည်ဆိုသည့် သတင်းများ ကျယ်ကျယ် ပြန့်ပြန့် ထွက်ပေါ်နေသဖြင့် Thai Pakdee ပါတီက ယခုကဲ့သို့ အသနားခံစာ တင်သွင်းခဲ့ခြင်း ဖြစ်သည်။

Thai Pakdee ပါတီ၏ အကြီးအကဲတစ်ဦးဖြစ်သူ အာနန် ဆာကွန်ချာရွန် (Anand Sakorncharoen) က သက်ဆင် သည် နိုင်ငံ့အုပ်ချုပ်ရေးနှင့် နိုင်ငံ့ဂုဏ်သိက္ခာကို ထိခိုက်စေသည့် အကျင့်ပျက်ခြစားမှု စွဲချက်လေးခုဖြင့် စီရင်ချက် ချမှတ်ခံထားရသဖြင့် ယခုကဲ့သို့ အသနားခံစာ တင်သွင်းခဲ့ခြင်းဖြစ်သည်ဟု ပြောကြားခဲ့သည်။

Thai Pakdee ပါတီကိုတွေ့ရစဉ်

"သက်ဆင်ဟာ ပြည်ပမှာ ကာလအကြာကြီး ထွက်ပြေးတိမ်းရှောင်ခဲ့ပြီး ပြစ်ဒဏ်ကို ရှောင်တိမ်းခဲ့ပါတယ်။ အဲဒါက ဘာကို ပြသလဲဆိုရင် သူဟာ ထိုင်းနိုင်ငံရဲ့ တရားရေးစနစ်ကို လေးစားမှုမရှိတာကို ပြသနေပါတယ်။ ဒါကြောင့် သက်ဆင်ရဲ့ တော်ဝင်လွတ်ငြိမ်းချမ်းသာခွင့် ရရှိဖို့ လျှောက်ထားချက်ဟာ ထိုင်းဘုရင်ကို စိတ်အနှောင့်အယှက် ဖြစ်စေပါတယ်"ဟု အာနန်က ပြောကြားခဲ့သည်။

သက်ဆင်အနေနှင့် တော်ဝင် လွတ်ငြိမ်းချမ်းသာခွင့် ရရှိမည်ဆိုပါက တရားမျှတမှု ရှိမည်မဟုတ်ဘဲ နိုင်ငံအတွင်း တရားရေးနှင့် လူမှုရေး သာတူညီမျှမှုမရှိသည့် အခြေအနေကို ဖော်ပြရာ ရောက်လိမ့်မည်ဖြစ်ပြီး အကျဉ်းထောင် စနစ်၏ အားနည်းမှုကို ပြသရာ ရောက်လိမ့်မည်ဟုလည်း ၎င်းက ပြောသည်။

ထိုင်း၏ တရားရေးဝန်ကြီးဖြစ်သည့် ဗိုလ်ချုပ်ကြီး ပိုင်ဘွန် ကွမ်ချာယာ (Paiboon Koomchaya) ကမူ သူသည် အကျင့်ပျက်ခြစားမှု စွဲချက်ဖြင့် စီရင်ချက် ချခံခဲ့ရသူများအတွက် တော်ဝင်လွတ်ငြိမ်းချမ်းသာခွင့်ကို အလွယ်တကူ ရရှိစေလိမ့်မည် မဟုတ်ကြောင်း ပြောကြားခဲ့သည်။ 

သက်ဆင် ထိုင်းဘုရင်ကို ဂါဝရပြုနေစဉ်

အာနန်ကမူ သက်ဆင်၏ ကျန်းမာရေး အခြေအနေသည် သတင်းများတွင် ဖော်ပြနေသကဲ့သို့ အလွန်အမင်း ဆိုးရွားနေသည်ဟု မယုံကြည်ကြောင်းနှင့် သက်ဆင်၏ ဆေးကုသမှုခံယူနေရသည့် အခြေအနေသည် အခြား အကျဉ်းသားများနှင့်မတူဘဲ အခွင့်ထူးခံ ဖြစ်နေသည်ဟု ပြောကြားခဲ့သည်။

Thai Pakdee ပါတီ၏ လက်ထောက် ခေါင်းဆောင် သွတ်ဆာဖွန် ပရွမ်ကက် (Thoksaphon Promket) ကလည်း သက်ဆင်ကို စွဲဆိုထားသည့် ကျန်ရှိနေသော စွဲချက်များကို တရားရေးအရ ဆက်လက် လုပ်ဆောင်ရန် အစိုးရ ရှေ့နေချုပ်ရုံး (OAG) ကို အသနားခံစာ တင်သွင်းခဲ့သည်။ 

ထိုင်းစစ်တပ်ကလည်း ၎င်းကို နိုင်ငံတော် ငြိမ်ဝပ်ပိပြားရေး ကောင်စီ (NCPO) အား အသရေဖျက်မှုဖြင့် တရားစွဲ ဆိုခဲ့သည်ဟု သက်ဆင်က ၂၀၁၅ ခုနှစ်တွင် တောင်ကိုရီးယားမီဒီယာတစ်ခုနှင့် ပြုလုပ်သည့် အင်တာဗျူးတစ်ခု၌ ပြောကြားခဲ့သည်။

Source: Thai PBS World

CNI International News

တိုင်ပေ၊ သြဂုတ် ၂၉

လာမည့်နှစ်(၂၀၂၄ ခုနှစ်) ဇန်နဝါရီလတွင် ပြုလုပ်မည့် ထိုင်ဝမ်သမ္မတ ရွေးကောက်ပွဲကို ဝင်ရောက်ယှဉ်ပြိုင်မည်ဟု Foxconn ကုမ္ပဏီ တည်ထောင်သူ တယ်ရီ ဂူး (Terry Gou) က သြဂုတ် ၂၈ ရက်တွင် ကြေညာခဲ့သည်ဟု ရိုက်တာ မှ ဖော်ပြခဲ့သည်။ 

ထို့ပြင် ထိုင်ဝမ်သည် နောက်ထပ် ယူကရိန်းဖြစ်လာမည် မဟုတ်ကြောင်းလည်း ဂူးက ပြောသည်။ 

၎င်း တည်ထောင်ခဲ့သည့် Foxconn ကုမ္ပဏီသည် Apple ကုမ္ပဏီအတွက် လိုအပ်သည့် လျှပ်စစ်ပစ္စည်းများ ထောက်ပံ့ပေးနေသည့် ကုမ္ပဏီဖြစ်သည်။

ဘီလျံနာတစ်ဦးဖြစ်သည့် ဂူးသည် ရွေးကောက်ပွဲဝင်မည်ဟု ကြေညာခဲ့သည့် စတုတ္ထမြောက် နိုင်ငံရေးသမား ဖြစ်သော်လည်း လူထုသဘောဆန္ဒ စစ်တမ်းကောက်ယူမှုများတွင် လက်ရှိ ထိုင်ဝမ်ဒုတိယသမ္မတအဖြစ် တာဝန် ထမ်းဆောင်နေသည့် ဝီလျံလိုင် (William Lai) နှင့် နှိုင်းယှဉ်ပါက လူကြိုက်နည်းနေသည်။

ထိုင်ဝမ်ဒုတိယသမ္မတ ဝီလျံလိုင်ကို တွေ့ရစဉ်

အာဏာရ ဒီမိုကရက်တစ် တိုးတက်ရေး(DPP)ပါတီ၏ ကိုယ်စားလှယ်လောင်း လိုင်သည် ရွေးကောက်ပွဲတွင် အနိုင်ရရန် ရေပန်းစားနေသူ ဖြစ်သည်။

အသက် ၇၂ နှစ်အရွယ် ဂူးသည် ၂၀၁၉ ခုနှစ်က Foxconn ကုမ္ပဏီ အကြီးအကဲရာထူးမှ နုတ်ထွက်ခဲ့ပြီး ထိုအချိန် ကတည်းက သမ္မတရွေးကောက်ပွဲဝင်ရန် ကြိုးပမ်းခဲ့သည်။

သို့သော် ဂူးသည် ထိုင်ဝမ်၏ အဓိက အတိုက်အခံ ပါတီဖြစ်သည့် ကူမင်တန်ပါတီ (KMT) ၏ ကိုယ်စားလှယ်အဖြစ် အမည်စာရင်း တင်သွင်းခံခဲ့ရခြင်း မရှိပေ။

ထိုင်ဝမ်ရွေးကောက်ပွဲ အနိုင်ရသူများကို ကြေညာနေစဉ်

ကူမင်တန်ပါတီသည် အစဉ်အလာအရ တရုတ်အစိုးရနှင့် နီးစပ်သည့် ဆက်ဆံရေးကို ထိန်းသိမ်းထားပြီး တရုတ် သည် ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ပြောကြားခဲ့သည်။

ယခုနှစ် အစောပိုင်းကလည်း ဂူးသည် လာမည့်နှစ် သမ္မတရွေးကောက်ပွဲအတွက် ကူမင်တန်ပါတီ ကိုယ်စားပြု ဝင်ရောက်ယှဉ်ပြိုင်ရန် ကြိုးပမ်းခဲ့သော်လည်း ကူမင်တန်ပါတီကမူ နယူးတိုင်ပေမြို့တော်ဝန် ဟိုယုအင် (Hou Yu-ih) ကို ပါတီကိုယ်စားလှယ်လောင်းအဖြစ် ရွေးချယ်ခဲ့သည်။ 

ဂူးသည် ပြီးခဲ့သည့် သီတင်းပတ် အနည်းငယ်က ထိုင်ဝမ်နိုင်ငံတစ်ဝန်း လှည့်လည်ပြီး မဲဆွယ်စည်းရုံးမှုကဲ့သို့ လူထုတွေ့ဆုံပွဲများ ပြုလုပ်ခဲ့သဖြင့် သူသည် တစ်သီးပုဂ္ဂလ ကိုယ်စားလှယ်လောင်းအဖြစ် ဝင်ရောက် ယှဉ်ပြိုင် ဖွယ်ရှိသည်ဟု ထင်ကြေးပေးမှုများ ထွက်ပေါ်ခဲ့သည်။

"ပြီးခဲ့တဲ့ ခုနစ်နှစ်အတွင်း DPP ပါတီရဲ့ အုပ်ချုပ်မှုအောက်မှာ ထိုင်ဝမ်ဟာ စစ်ပွဲဖြစ်ပွားမယ့် အန္တရာယ်နဲ့ ရင်ဆိုင်ခဲ့ ရပါတယ်။ ပြည်တွင်းမှာလည်း သူတို့ချမှတ်ခဲ့တဲ့ မူဝါဒတွေဟာ အမှားတွေနဲ့ ပြည့်နေပါတယ်။ စီးပွားရေး လုပ်ငန်း ရှင်ရဲ့ အုပ်ချုပ်မှုခေတ် စတင်ပါပြီ"ဟု ဂူးက ပြောကြားခဲ့သည်။

Source: ရိုက်တာ

CNI International News

ဘန်ကောက်၊ သြဂုတ် ၂၉ 

ဖြူးထိုင်းပါတီ ဦးဆောင်သည့် ထိုင်းအစိုးရအဖွဲ့သစ်၏ လုပ်ငန်းများကို လာမည့် စက်တင်ဘာလ လလယ်တွင် စတင်မည်ဖြစ်သည်။

ထိုင်းနိုင်ငံတွင် ဝန်ကြီးချုပ်အဖြစ် ခန့်အပ်ခံခဲ့ရသည့် ဆရီသာ သာဗင်စင် (Srettha Thavisin)က အစိုးရအဖွဲ့တွင် ပါဝင်မည့် ရာထူးနေရာစာရင်းကို အပြီးသတ်ရေးဆွဲခဲ့ပြီး အစိုးရအဖွဲ့အတွင်းဝန်များရုံးထံသို့ လွှဲပြောင်းပေးအပ် ခဲ့သည်ဟု The Nation မှ ဖော်ပြခဲ့သည်။

ဆရီသာသည် ၎င်းအား ဂုဏ်ပြုရန် လာရောက်ခဲ့သည့် ကြံစိုက်ပျိုးသည့် တောင်သူများကို ကိုယ်စားပြုသည့် ကိုယ်စားလှယ်များနှင့် တွေ့ဆုံခဲ့ပြီးနောက် သြဂုတ် ၂၈ ရက် နံနက်ပိုင်းတွင် ဖြူးထိုင်းပါတီ ဌာနချုပ်၌ သတင်းထောက်များနှင့် တွေ့ဆုံခဲ့သည်။

ဖြူးထိုင်းပါတီ ဦးဆောင်သည့် ထိုင်းအစိုးရအဖွဲ့ကိုတွေ့ရစဉ်

ဆရီသာက ညွန့်ပေါင်းအစိုးရအဖွဲ့တွင် ပါဝင်သည့် ပါတီ ၁၁ ခုနှင့်  တွေ့ဆုံဆွေးနွေးမှုများ ပြုလုပ်ခဲ့ပြီးနောက် အစိုးရအဖွဲ့၌ ပါဝင်မည့် ရာထူးနေရာများအတွက် သြဂုတ် ၂၇ ရက် ညပိုင်းမှာ အပြီးသတ်စာရင်း ရေးဆွဲခဲ့ကြောင်း သတင်းထောက်များကို ပြောကြားခဲ့သည်။

"ဒီနေ့မှာတော့ အစိုးရအဖွဲ့ အတွင်းဝန်ချုပ်ဟာ ကျနော်တင်သွင်းခဲ့တဲ့ အစိုးရအဖွဲ့ဝင် ရာထူးစာရင်းကို စစ်ဆေးမှာ ဖြစ်ပါတယ်။ ကျေးဇူးပြုပြီး အချိန်နည်းနည်းလောက် စောင့်ဆိုင်းကြပါ။ လာမယ့် လလယ်လောက်မှာ အစိုးရအဖွဲ့ သစ်ဟာ မူဝါဒအသစ်တွေကို လွှတ်တော်မှာ ချပြသွားမှာဖြစ်ပါတယ်" ဟု ဆရီသာက ပြောကြားခဲ့သည်။

မည်သို့ပင်ဆိုစေ ကာကွယ်ရေးဝန်ကြီး ရာထူးနေရာအတွက် ဖြူးထိုင်းပါတီ၏ လွှတ်တော်အမတ် ဆူတင် ကလန် ဆန်း (Sutin Klungsang) သို့မဟုတ် အမျိုးသားလုံခြုံရေးကောင်စီ အတွင်းရေးမှူးချုပ်ဟောင်း ဗိုလ်ချုပ်ကြီး နက်တာပိုလ် နက်ဖန်နစ် (Nattapol Nakphanit) ကို ရွေးချယ်မည် ဟုတ်/မဟုတ် သတင်းထောက်များ၏ မေးမြန်းချက်ကို ဆရီသာက ဖြေကြားခဲ့ခြင်းမရှိပေ။

 Move Forward ပါတီခေါင်းဆောင် ပီတာ လင်ဂျာရိုရတ်ကို တွေ့ရစဉ်

"အစိုးရအဖွဲ့ဝင် ဝန်ကြီးနေရာတွေ ခန့်အပ်တဲ့ စာရင်းအတွက် အချိန် အနည်းငယ်လောက်ပဲ စောင့်ဆိုင်းပေးကြပါ" ဟု ဆရီသာက ပြောကြားခဲ့သည်။

ထို့ပြင် အသစ်ခန့်အပ်မည့် ကာကွယ်ရေးဝန်ကြီးသည် ပြည်သူများကို စိတ်ပျက်စေလိမ့်မည် မဟုတ်ကြောင်းလည်း ၎င်းက ပြောသည်။ 

စစ်တပ်ကို ပြုပြင်ပြောင်းလဲရန် အစိုးရအဖွဲ့သစ်အား တောင်းဆိုထားသည့် Move Forward ပါတီခေါင်းဆောင် ပီတာ လင်ဂျာရိုရတ် (Pita Limjaroenrat) ၏ တောင်းဆိုချက်နှင့် ပတ်သက်ပြီး သတင်းထောက်များက မေးမြန်း ခဲ့ရာတွင် ဆရီသာက "ကျနော်ကတော့ ပြုပြင်ပြောင်းလဲမှုထက် ပူးပေါင်းဆောင်ရွက်မှုကို ပိုပြီး အားပေးချင်ပါ တယ်"ဟု ဖြေကြားခဲ့သည်။

Source: The Nation

CNI International News

ဟာရီရာ၊ သြဂုတ် ၂၈

ဇင်ဘာဘွေသမ္မတ အီမာဆန်မန်ဂါဝါ(Mnangagwa)သည် သမ္မတဒုတိယသက်တမ်းနှင့် နောက်ဆုံး သက်တမ်း အတွက် အနိုင်ရရှိခဲ့သည်။

သို့သော် ထိုရလဒ်ကို အတိုက်အခံများက ပယ်ချခဲ့ကာ လေ့လာစောင့်ကြည့်သူများက မေးခွန်းထုတ်ခဲ့ကြသည်ဟု အယ်ဂျားဇီးယား သတင်းတွင် ဖော်ပြထားသည်။

နိုင်ငံ၏ စီးပွားရေး အကျပ်အတည်း ဆက်လက် ကြုံတွေ့နေရသော်လည်း ၂၀၁၇ ခုနှစ်တွင် စစ်တပ်အာဏာသိမ်း ခဲ့ပြီးနောက် ကာလကြာရှည် အုပ်ချုပ်ခဲ့သည့် ခေါင်းဆောင် ရောဘတ်မူဂါဘီကို ဖြုတ်ချခဲ့သည့် မန်ဂါဝါသည် ကြားဖြတ်ရွေးကောက်ပွဲကို အနိုင်ရရှိရန် သေချာသည်ဟု ကျယ်ကျယ်ပြန့်ပြန့် မျှော်မှန်းထားကြသည်။

ထိုရွေးကောက်ပွဲသည် လွတ်လပ်ရေးရရှိပြီး ၁၉၈၀ ပြည့်နှစ်တွင် လူဖြူလူနည်းစု အုပ်ချုပ်မှုကို အဆုံးသတ်ပြီး နောက်ပိုင်း နိုင်ငံအား အုပ်ချုပ်ခဲ့သည့် ZANU-PF ပါတီ၏ ထောက်ခံမှုနဲ့ပတ်သက်ပြီး ကြီးမားသော လွဲချော်မှု ဖြစ်သည်ဟု ကျွမ်းကျင်သူများက သုံးသပ်ခဲ့ကြသည်။

ZEC ဥက္ကဋ္ဌ ဂျက်စတစ်ချီဂမ်ဘာကို တွေ့ရစဉ်

မန်ဂါဝါသည် မဲအရေအတွက် ၅၂.၆ ရာခိုင်နှုန်းကို ရရှိခဲ့ပြီး ၎င်း၏ အဓိကပြိုင်ဘက် နယ်လ်ဆန်ချာမီဆာက မဲအရေအတွက် ၄၄ ရာခိုင်နှုန်း ရရှိခဲ့သည်ဟု ဇင်ဘာဘွေ ရွေးကောက်ပွဲကော်မရှင်က သြဂုတ် ၂၆ ရက်တွင် ထုတ်ပြန်သော တရားဝင် ရလဒ်၌ ဖော်ပြထားသည်။

“ZANU-PF ပါတီရဲ့ မန်ဂါဝါအီမာဆန်ဒမ်ဘတ်ဇိုကို ဇင်ဘာဘွေ ရွေးကောက်ခံ သမ္မတအဖြစ် တရားဝင် ထုတ်ပြန် ကြေညာလိုက်ပါတယ်”ဟု ZEC ဥက္ကဋ္ဌ ဂျက်စတစ်ချီဂမ်ဘာက(Justice Chigumba)က သတင်းထောက်များကို ပြောကြားခဲ့သည်။

ရွေးကောက်ပွဲ နှောင့်နှေးမှုများကြောင့် အတိုက်အခံများက အကွက်ဆင်ခြင်းနှင့် မဲဆန္ဒရှင်များကို ဖိနှိပ်ခြင်းဟု စွပ်စွဲမှုများ ထွက်ပေါ်လာခဲ့သော်လည်း အာဏာရပါတီ ထောက်ခံသူ လူနည်းစုကမူ သြဂုတ် ၂၆ ရက်က ရလဒ် အပေါ် အောင်ပွဲခံခဲ့ ကြသည်။

သို့သော် ချာမီဆာ၏ Citizens Coalition for Change(CCC)ပါတီမှ ပြောရေးဆိုခွင့်ရှိသူ ပရောမစ် မက်ဝမ်နန်ဇီ (Promise Mkwananzi)က ပါတီအနေဖြင့် အဆုံးသတ်စာရင်းကို သဘောတူ လက်မှတ် ရေးထိုးခဲ့ခြင်း မရှိကြောင်း ပြောကြားခဲ့သည်။

“ကျနော်တို့ ဒီရလဒ်တွေကို လက်မခံနိုင်ပါဘူး”ဟု ၎င်းက ပြောကြားခဲ့သည်။

သို့သော် ပါတီအနေဖြင့် ၎င်း၏ ရှေ့ဆက် လှုပ်ရှားမှုများကို မကြာမီ ထုတ်ပြန်ကြေညာ သွားမည်ဟု ပရောမစ် မက်ဝမ်နန်ဇီက ပြောကြားခဲ့သည်။

Source: အယ်ဂျားဇီးယား

CNI International News

တီဟီရန်၊ သြဂုတ် ၂၈

၁၉၈၀ ပြည့်နှစ် အီရန်အစ္စလာမ်မစ်သမ္မတနိုင်ငံသစ် ထူထောင်မှုကို ဆန့်ကျင်သည့် အာဏာသိမ်းဖို့စီစဉ်မှုဖြင့် အမေရိကန်အစိုးရအား နစ်နာကြေးအဖြစ် ဒေါ်လာ သန်း ၃၃၀ ပေးဆောင်ရန် အီရန်တရားရုံးက အမိန့်ချမှတ်ခဲ့ သည်ဟု သြဂုတ် ၂၆ ရက်တွင် အီရန်အရာရှိတစ်ဦးက ပြောကြောင်း ဘန်ကောက်ပို့စ်မှ ဖော်ပြခဲ့သည်။

အမေရိကန်က ထောက်ပံ့ပေးထားသည့် ရှားဘုရင်ကို ဖြုတ်ချခဲ့သော ၁၉၇၉ ခုနှစ် အစ္စလာမ်မစ် တော်လှန်ရေး အပြီး တစ်နှစ်အကြာတွင် စစ်တပ်မှ အရာရှိအများစုသည် အစိုးရသစ်ကို ဖြုတ်ချရန် ကြိုးပမ်းခဲ့သည်။ 

အီရန်နိုင်ငံပိုင် IRNA သတင်းအေဂျင်စီက ထုတ်ပြန်ချက်အရ အာဏာသိမ်းရန် ကြံစည်မှုကို အီရန် လေတပ် တပ်မှူးဟောင်း ဆာအိဒ် မာဒီယွန် (Saeed Mehdiyoun) က ဦးဆောင်ခဲ့ပြီး ဟာမီဒန် (Hamedan) ပြည်နယ်ရှိ လေတပ်စခန်းဖြစ်သည့် နိုဂျာ (Nojeh) ဌာနချုပ်တွင် ပြုလုပ်ခဲ့ခြင်း ဖြစ်သည်ဟု ဖော်ပြခဲ့သည်။

စစ်ပွဲအလိုမရှိကြောင်း အမျိုးသမီးပြသနေစဉ်

အာဏာသိမ်းရန် ကြံစည်သူများနှင့် အစိုးရတပ်ဖွဲ့များအကြား တိုက်ခိုက်မှုဖြစ်ပွားခဲ့ပြီး လူအချို့ သေဆုံးခဲ့ကာ လူပေါင်းများစွာကို ဖမ်းဆီးရမိခဲ့သည်။ 

"သူတို့ရဲ့ ရည်ရွယ်ချက်က နိုင်ငံတစ်ဝန်းမှာရှိတဲ့ စစ်စခန်းတွေကို စီးနင်းထိန်းချုပ်ဖို့ဖြစ်ပြီး မဟာဗျူဟာကျတဲ့ စင်တာတွေ၊ တော်လှန်ရေး ခေါင်းဆောင်တွေရဲ့ အိမ်တွေကို ပစ်မှတ်ထား တိုက်ခိုက်ဖို့ ဖြစ်ပါတယ်။ ဒါပေမယ့် လည်း သူတို့ရဲ့ အားထုတ်ကြိုးပမ်းမှုတွေဟာ မအောင်မြင်ခဲ့ပါဘူး" ဟု IRNA က ဖော်ပြခဲ့သည်။ 

အမေရိကန်နဲ့ အီရန်ကို ညွန်ပြနေစဉ်

အာဏာသိမ်းရန် ကြံစည်မှုအတွင်း သေဆုံးသွားသူများ၏ ကျန်ရစ်သူ မိသားစုဝင်များနှင့် ဆွေမျိုးများအတွက် နစ်နာကြေး တောင်းဆိုရန် အီရန်သည် နိုင်ငံတကာ တရားရုံးကို လျှောက်ထားခဲ့သည်ဟု တရားရေးဌာန၏ Mizan Online ဝက်ဘ်ဆိုက်တွင် ဖော်ပြခဲ့သည်။

အထူးသဖြင့် အမေရိကန်သည် အဆိုပါ အာဏာသိမ်းရန် ကြံစည်မှုကို ပြုလုပ်ခဲ့ကြောင်း Mizan ဝက်ဘ်ဆိုက်တွင် ဖော်ပြခဲ့သည်။

တီဟီရန်မြို့တော်ရှိ တရားရုံးကလည်း အမေရိကန် အစိုးရအနေနှင့် ရုပ်ပိုင်းဆိုင်ရာနှင့် စိတ်ပိုင်းဆိုင်ရာ ထိခိုက် နစ်နာမှုများအတွက် တရားလိုများကို ဒေါ်လာ သန်း ၃၀ ပေးရန်နှင့် ဆိုးရွားသည့် ထိခိုက်နစ်နာမှုများကိုတော့  ဒေါ်လာ သန်း ၃၀၀ ပေးဆောင်ရန် အမိန့်ချခဲ့သည်။

၁၉၇၉ ခုနှစ် အစ္စလာမ်မစ် တော်လှန်ရေးအပြီးတွင် အမေရိကန်နှင့် အီရန်အကြား သံတမန်ဆက်ဆံရေး ပြတ်တောက်ခဲ့သည်။ 

Source: ဘန်ကောက်ပို့စ်

CNI International News

လန်ဒန်၊ သြဂုတ် ၂၈

ကမ္ဘာတစ်ဝန်းရှိ အကြီးစား လက်နက်ကန်ထရိုက်တာများသည် ၎င်းတို့၏ လုပ်ငန်းများကို ဂျပန်အား ဗဟိုပြုပြီး ပြောင်းလဲလုပ်ဆောင်နေသည်ဟု Nikkei Asia မှ ဖော်ပြခဲ့သည်။ 

အရှေ့အာရှတွင် လုံခြုံရေး အခြေအနေ ယိုယွင်းလာသည့် အခြေအနေနှင့် ရင်ဆိုင်နေရသော ဂျပန်သည် ကာကွယ် ရေး အသုံးစရိတ်ကို တိုးမြှင့်ရန် ပြင်ဆင်နေချိန်၌ အနောက်နိုင်ငံများမှ လက်နက်ရောင်းချသည့် ကုမ္ပဏီများသည် ဂျပန်ကို အဓိက အာရုံစိုက်လာခဲ့ခြင်း ဖြစ်သည်။ 

ယခုနှစ်အတွင်း ဗြိတိန်၏ လေကြောင်း၊ အာကာသနှင့် လက်နက်ကုမ္ပဏီဖြစ်သည့်  BAE Systems သည် ၎င်း၏ အာရှလုပ်ငန်းများအတွက် ကြီးကြပ်ရေး လုပ်ငန်းများကို မလေးရှားမှ ဂျပန်သို့ ပြောင်းရွှေ့ခဲ့သည်။

မော်စကိုမြို့က လက်နက်ပြပွဲကိုတွေ့ရစဉ်

အမေရိကန်၏ Lockheed Martin ကုမ္ပဏီသည်လည်း မကြာသေးမီကပင် ၎င်း၏ လုပ်ငန်းများကို ဂျပန်သို့ ပြောင်းရွှေ့ လုပ်ဆောင်ခဲ့သည်။

BAE ကုမ္ပဏီသည် ၂၀၂၂ ခုနှစ်၊ ဇန်နဝါရီလက ဂျပန်တွင် ကုမ္ပဏီခွဲတစ်ခု တည်ထောင်ခဲ့ပြီး အာရှဒေသတစ်ခုလုံး အတွက် စီးပွားရေး မဟာဗျူဟာများကို ကြီးကြပ်ရန်အတွက် မန်နေးဂျင်း ဒါရိုက်တာတစ်ဦး ခန့်အပ်ခဲ့သည်။

ထို့ပြင် လန်ဒန်အခြေစိုက် BAE သည် မျိုးဆက်သစ် တိုက်လေယာဉ်များ ပူးပေါင်းတည်ဆောက်ရေးအတွက် ဂျပန်၊ ဗြိတိန်နှင့် အီတလီတို့ ပူးပေါင်းဖွဲ့စည်းထားသည့် ကမ္ဘာလုံးဆိုင်ရာ တိုက်ခိုက်ရေး လေကြောင်း ပရိုဂရမ် (GCAP) ၏ အဓိကကျသည့် အခန်းကဏ္ဍမှ ပါဝင်လျက်ရှိသည်။

Lockheed Martin ကုမ္ပဏီကလည်း စင်္ကာပူရှိ ၎င်း၏ အာရှရေးရာ မဟာဗျူဟာ ဌာနချုပ်ကို ဂျပန်သို့ ရွှေ့ပြောင်းခဲ့ သည်။ 

ဒရုန်းတစ်စင်းကိုတွေ့ရစဉ်

ထိုဌာနချုပ်သည် ယခင်က အရှေ့တောင်အာရှနိုင်ငံများ၏ စီးပွားရေး လုပ်ငန်းများကို ကြီးကြပ်သည့် ဌာနဖြစ် သည်။

မြောက်ကိုရီးယား၏ ဒုံးကျည် ပစ်လွှတ် ခြိမ်းခြောက်နေမှု အပြင် တရုတ်က ထိုင်ဝမ်အား စစ်ရေးအရ ကျူးကျော် လာနိုင်သော စစ်ပွဲဖြစ်ပွားဖွယ်ရှိသည့် စိုးရိမ်မှုများ မြင့်တက်နေချိန်တွင် Lockheed Martin ကုမ္ပဏီသည်  ဒေသ တွင်း အခြေအနေများအရ ၎င်း၏ အာရှရေးရာမဟာဗျူဟာ ဌာနချုပ်ကို နေရာပြောင်းရွှေ့ခဲ့ခြင်း ဖြစ်သည်။

Lockheed Martin ကုမ္ပဏီသည် ဂျပန်နှင့် နီးစပ်သည့် ဆက်ဆံရေးကို ထိန်းသိမ်းထားပြီး မြေပြင်မှ ဝေဟင်ပစ် လေကြောင်းကာကွယ်ရေးစနစ် Patriot Advanced Capability-3 (PAC) နှင့် F-35 ကိုယ်ပျောက် တိုက်လေယာဉ် များ ဖြန့်ချိမှုကဲ့သို့ လက်နက်ရောင်းဝယ်ရေး စာချုပ်များကို ချုပ်ဆိုခဲ့သည်။

၂၀၂၂ ခုနှစ်က ဂျပန်၏ ကာကွယ်ရေး အသုံးစရိတ်သည် ကမ္ဘာပေါ်တွင် ကာကွယ်ရေး အသုံးစရိတ် အများဆုံးနိုင်ငံ စာရင်းတွင် နံပါတ် ၁၀ နေရာ၌ရှိခဲ့ပြီး ကမ္ဘာလုံးဆိုင်ရာ စစ်အသုံးစရိတ်၏ ၂ ရာခိုင်နှုန်း ရှိခဲ့သည်ဟု စတော့ဟုမ်း နိုင်ငံတကာ ငြိမ်းချမ်းရေး သုတေသန အင်စတီကျု (Stockholm International Reace Reasearch Institute) က ထုတ်ပြန်ခဲ့သည်။

Source: Nikkei Asia

CNI International News

ဝါရှင်တန်၊ သြဂုတ် ၂၈ 

အမေရိကန် သမ္မတဟောင်း ထရမ့်သည် အတ္တလန္တာအကျဉ်းထောင်တွင် ယာယီဖမ်းဆီး ထိန်းသိမ်းခံခဲ့ရပြီးနောက် ၎င်း၏ မဲဆွယ်စည်းရုံးရေးအဖွဲ့သည် ရန်ပုံငွေ ဒေါ်လာ ၇ ဒသမ ၁ သန်း တိုးမြှင့်ရရှိခဲ့သည်ဟု ရိုက်တာမှ ဖော်ပြခဲ့ သည်။

ထရမ့်သည် ၂၀၂၀ ပြည့်နှစ် သမ္မတ ရွေးကောက်ပွဲနှင့် ပတ်သက်ပြီး ဖက်ဒရယ်နှင့် ပြည်နယ်အဆင့် တရားရေး စွဲချက်များဖြင့် ရင်ဆိုင်ခဲ့ရသော လွန်ခဲ့သည့် သီတင်းသုံးပတ်အတွင်း ရန်ပုံငွေ ဒေါ်လာ သန်း ၂၀ အထိ ရရှိခဲ့ သည်ဟု ၎င်း၏ မဲဆွယ်စည်းရုံးရေးအဖွဲ့၏ ပြောရေးဆိုခွင့်ရှိသူက ပြောကြားခဲ့သည်။ 

 အမေရိကန် သမ္မတဟောင်း ထရမ့်ကို တွေ့ရစဉ်

ပြီးခဲ့သည့် ရက်ပိုင်းက ထရမ့်သည် အတ္တလန္တာအကျဉ်းထောင်တွင် ဖမ်းဆီးခံခဲ့ပြီး ၎င်း၏ ရဲမှတ်တမ်းဓာတ်ပုံ ထွက်ပေါ်လာခဲ့သည်။

ထရမ့်၏ အဖွဲ့က ထိုဓာတ်ပုံကို တီရှပ်တွင် တံဆိပ်ရိုက်ပြီး ရောင်းချခဲ့သည်။ 

သြဂုတ် ၂၅ ရက် တစ်ရက်တည်းမှာပင် ထရမ့်သည် ဒေါ်လာ ၄ ဒသမ ၁၈ သန်းအထိ ရန်ပုံငွေ ရှာဖွေနိုင်ခဲ့ပြီး ၎င်း၏ မဲဆွယ်စည်းရုံးမှု သမိုင်းတွင် တစ်ရက်အတွင်း ရန်ပုံငွေ အများဆုံး ရရှိသည့်နေ့အဖြစ် မှတ်တမ်းဝင်ခဲ့သည်။

အမေရိကန် သမ္မတဟောင်း ထရမ့်ကို တွေ့ရစဉ်

၂၀၁၆ ခုနှစ်က သမ္မတအဖြစ် ရွေးကောက်ခံခဲ့ရပြီး ၂၀၂၀ ရွေးကောက်ပွဲတွင် ဒီမိုကရက်တစ်ဖြစ်သည့် ဂျိုးဘိုင်ဒန် ကို ရှုံးနိမ့်ခဲ့သည်။ ထို့နောက် ထရမ့်သည် ရီပတ်ဘလင်ကန်ပါတီ၏ ကိုယ်စားလှယ်လောင်းအဖြစ် နောက်ထပ် တစ်ကြိမ် ရွေးကောက်ပွဲ ဝင်ရောက်ယှဉ်ပြိုင်ရန် ကြိုးပမ်းလျက်ရှိသည်။

လက်ရှိတွင် ထရမ့်သည် ရွေးကောက်ပွဲနှင့်ပတ်သက်သည့် အမှုနှစ်ခု အပါအဝင် စွဲချက်ပြစ်တင်ချက် လေးခုနှင့် ရင်ဆိုင်နေရသည်။ 

ထရမ့်ကမူ ၎င်းအပေါ် စွဲချက်တင်ထားသည့် အမှုများနှင့်ပတ်သက်ပြီး အမှားအယွင်း ပြုလုပ်ခဲ့ခြင်း မရှိကြောင်း ငြင်းဆိုခဲ့သည်။

Source: ရိုက်တာ

CNI International News

တိုင်ပေ၊ သြဂုတ် ၂၆

ထိုင်ဝမ်တွင် စစ်ပွဲအတွက် သတိရှိစေရန် တပ်လှန့်နှိုးဆော်သည့် လှုပ်ရှားမှုတစ်ခု အနေဖြင့် စစ်သားဟောင်း တစ်ဦးသည် စစ်ယူနီဖောင်း အပြည့်အစုံ ဝတ်ဆင်ပြီး ပလတ်စတစ် သေနတ်တစ်လက်ကို ကိုင်ဆောင်ကာ ထိုင်ဝမ်နိုင်ငံတစ်ဝန်း တစ်လကျော်ကြာ ခြေလျင်လှည့်လည် သွားလာခဲ့သည်ဟု ရိုက်တာမှ ဖော်ပြခဲ့သည်။

ဇူလိုင်လက ထိုင်ဝမ်စစ်တပ်မှ ထုတ်ပယ်ခံခဲ့ရသည့် အသက် ၂၂ နှစ်အရွယ် စစ်သားဟောင်း တစ်ဦးဖြစ်သူ ဆိုင် (Tsai) အမည်ရှိ အမျိုးသားက သူ၏ ခြေလျင်လှည့်လည်သည့် ခရီးစဉ်သည် ပြည်သူ့ကာကွယ်ရေးအတွက် အများ ပြည်သူက သတိထားမိစေရန်နှင့် ထိုင်ဝမ်လူထုအကြား စည်းလုံးညီညွတ်မှုရှိစေရန် ရည်ရွယ်ကြောင်း ပြောကြား ခဲ့သည်။

တရုတ်သည် ထိုင်ဝမ်ကို ၎င်း၏ နယ်နိမိတ်တစ်ခုအဖြစ် ကြေညာထားပြီး လိုအပ်လာပါက အင်အားသုံးပြီး သိမ်းယူ သွားမည်ဟု ခြိမ်းခြောက်ခဲ့ကာ ထိုင်ဝမ်အပေါ် စစ်ရေးဖိအားများ တိုးမြှင့်ခဲ့သည်။ပြီးခဲ့သည့် သီတင်းပတ်ကလည်း တရုတ်သည် ထိုင်ဝမ် ဒုတိယသမ္မတ ဝီလျံလိုင်၏ ပါရာဂွေး ခရီးစဉ်အတွင်း အမေရိကန်သို့ ဝင်ရောက်ခဲ့မှုကို တုံ့ပြန်သည့် အနေဖြင့် ထိုင်ဝမ်ကျွန်းအနီးတွင် စစ်ရေးလေ့ကျင့်မှုများကို ပြုလုပ်ခဲ့သည်။ 

ထိုင်ဝမ်ပြည်သူများကို စစ်ပွဲအတွက် သတိထားရန် ဆိုင် လမ်းလျှောက်နှိုးဆော်နေစဉ်

ဆိုင်က "တရုတ်အနေနဲ့ အခုလို စစ်ရေးခြိမ်းခြောက်မှုတွေကို ဆက်တိုက် လုပ်ဆောင်နေမယ်ဆိုရင် အခြေအနေ မကောင်းနိုင်ဘူးဆိုတာကို ကျနော်တို့ သိပါတယ်။ လူထုအနေနဲ့ ပြင်ဆင်ထားစေချင်ပါတယ်။ လူထုအနေနဲ့ ရည်မှန်းချက်တစ်ခုနဲ့အတူ စစ်ပွဲအတွက် ကြိုတင်ပြင်ဆင်ထား စေချင်ပါတယ်"ဟု ထိုင်ဝမ်ကျွန်းတစ်ဝန်း ကီလိုမီတာ ၉၀၀ (မိုင် ၅၆၀) လမ်းလျှောက် လှည့်လည်ပြီးနောက် ကီးလန် (Keelung) ဆိပ်ကမ်းမြို့သို့ ရောက်ရှိလာချိန်တွင် ရိုက်တာသတင်းဌာနသို့ ပြောကြားခဲ့သည်။

"ရန်သူက ဘယ်သူလဲဆိုတာကို လူတိုင်းက သိပါတယ်"ဟုလည်း ၎င်းကထပ်လောင်း ပြောကြားခဲ့သည်။ 

ထိုင်ဝမ်၏ လူမှုမီဒီယာတွင် follower အများကြီးရှိသည့် ဆိုင်က သူ လှည့်လည် သွားရောက်ခဲ့သည့် နေရာတိုင်း တွင် သူ့ကို နွေးထွေးစွာ ကြိုဆိုခဲ့ကြပြီး အစားအသောက်များ ကျွေးမွေးခဲ့ကြောင်း၊ တချို့နေရာ ဒေသများတွင် တရုတ်နှင့် တင်းမာမှုများ မြင့်တက်နေသည့် အခြေအနေကို ဒေသခံများနှင့် ဆွေးနွေးခဲ့သည်ဟု ဆိုသည်။

ဆိုင်က သူ့အနေနှင့် လမ်းမများပေါ်တွင် မည်သည့်အချိန်အထိ လမ်းလျှောက် နေရမည်ဆိုခြင်းကို မသိကြောင်းနှင့် သူ့လှုပ်ရှားမှုကို ထိုင်ဝမ်ဒေသခံများအားလုံး မသိမချင်း လမ်းဆက်လျှောက် နေဦးမည်ဟု ပြောကြားခဲ့သည်။ 

"ဒါက အားလပ်ရက် အပန်းဖြေခရီး ထွက်နေတာ မဟုတ်ပါဘူး။ ကိုယ့်ကိုယ်ကို နှိပ်စက်ညှင်းပန်း နေသလိုပါပဲ။ အရမ်းလည်း ပင်ပန်းပါတယ်"ဟု ဆိုင်က ပြောကြားခဲ့သည်။

Source: ရိုက်တာ

  CNI International News       

ဝါရှင်တန်၊ သြဂုတ် ၂၆

အမေရိကန်သမ္မတဟောင်း ဒေါ်နယ်ထရမ့်(Donald Trump)သည် ဂျော်ဂျီယာပြည်နယ်တွင် ရွေးကောက်ပွဲရလဒ် များကို ပယ်ဖျက်ရန် ကြံစည်မှုဖြင့် ဆက်နွှယ်သည့် စွဲချက် ၁၃ ခုနှင့်ပတ်သက်ပြီး  သြဂုတ် ၂၄ ရက်က ဖူလ်တန် (Fulton) ကောင်တီ အကျဉ်းထောင်သို့ သွားရောက်၍ ဖမ်းဆီးခံခဲ့သည်ဟု CBS News မှ ဖော်ပြခဲ့သည်။

အဆိုပါ ဖမ်းဆီးခံမှုသည် ထရမ့်အတွက် ယခုနှစ်အတွင်း စတုတ္ထအကြိမ်မြောက် ဖြစ်သော်လည်း ထရမ့်အား ပထမဆုံးအကြိမ်အဖြစ် ရဲမှတ်တမ်းဓာတ်ပုံ ရိုက်ကူးကာ ထိုဓာတ်ပုံကို လူသိရှင်ကြား ထုတ်ပြန်ခဲ့ခြင်း ဖြစ်သည်။

ထရမ့်သည် ဖမ်းဆီးခံရပြီး တစ်နာရီ မပြည့်မီ အချိန်အတွင်းမှာပင် ပြန်လည်လွတ်မြောက်ခဲ့သည်။ ထို့နောက် ၎င်း၏ ကိုယ်ပိုင်လေယာဉ်ဖြင့် အတ္တလန္တာမြို့သို့ ပြန်လည် ထွက်ခွာသွားခဲ့သည်။ 

ထရမ့်၏ Save America PAC ရန်ပုံငွေ ရှာဖွေရေးအဖွဲ့ကမူ ထရမ့်အား ရိုက်ကူးခဲ့သည့် ရဲမှတ်တမ်းဓာတ်ပုံပါ တီရှပ်များကိုရိုက်ကူးပြီး CBS News သို့ အီးမေးလ်ဖြင့် ပေးပို့ခဲ့သည်။

ထရမ့် ကိုယ်တိုင်ကလည်း ၎င်း၏ ရဲမှတ်တမ်း ဓာတ်ပုံကို ယခင်က Twitter ဟု လူသိများခဲ့သည့် X လူမှုမီဒီယာနှင့် ၎င်း၏ကိုယ်ပိုင် Truth Social လူမှုမီဒီယာများတွင် ဖော်ပြခဲ့သည်။

ဖူလ်တန်ကောင်စီ အကျဉ်းထောင်ရှေ့မှာ လုံခြုံရေးများကိုတွေ့ရစဉ်

ထို့ပြင် ထရမ့်သည် သူ၏ ရဲမှတ်တမ်း ဓာတ်ပုံနှင့်တစ်ကွ "ရွေးကောက်ပွဲ ကြားဝင်စွက်ဖက်မှု" ၊ "ဘယ်တော့မှ အရှုံး မပေး" ဆိုသည့် စာသားများကိုပါ ရေးသားဖော်ပြခဲ့သည်။

ထရမ့်သည် လွှတ်တော်အဆောက်အအုံ စီးနင်းမှုအပြီး နှစ်ရက်အကြာဖြစ်သည့် ၂၀၂၁ ခုနှစ်၊ ဇန်နဝါရီ ၆ ရက်နေ့ နောက်ပိုင်း Twitter တွင် ပထမဆုံးအကြိမ်အဖြစ် ပို့စ်တင်ခဲ့ခြင်းလည်း ဖြစ်သည်။

ထရမ့်သည် မိနစ် ၃၀ ကြာ ဖမ်းဆီးခံခဲ့ရပြီးနောက် ဒေါ်လာ ၂၀၀,၀၀၀ အာမခံဖြင့် ခံဝန်ကတိ လက်မှတ်ရေးထိုး ကာ ပြန်လည်လွတ်မြောက် လာခဲ့ခြင်း ဖြစ်သည်။

ခံဝန်ကတိ လက်မှတ်ရေးထိုးမှုအရ ထရမ့်သည် တရားလိုများ၊ အမှုတွဲများ၊ မျက်မြင်သက်သေများနှင့် ၎င်းအား စွပ်စွဲသူများကို ခြိမ်းခြောက်ခွင့် တားမြစ်ပိတ်ပင် ခံခဲ့ရသည်။

ထရမ့်သည် ပြန်လည် လွတ်မြောက် လာခဲ့ပြီးနောက် လေယာဉ်ပေါ်သို့ မတက်မီ သူနှင့် သူ့အမှုတွဲတွင် ပါဝင် သူများသည် မမှန်မကန် လုပ်ခဲ့ခြင်း မရှိကြောင်း၊ ယခုဖြစ်စဉ်သည် အမေရိကန်နိုင်ငံအတွက် ဝမ်းနည်းစရာ ကောင်းသည့် နေ့ရက်ဖြစ်ကြောင်း သတင်းထောက်များကို ပြောကြားခဲ့သည်။

Source: CBS News