CNI International News

ဝါဆော၊ နိုဝင်ဘာ ၁၆

ရုရှားလုပ် ဒုံးကျည်တစ်စင်း မိမိတို့နိုင်ငံ၏အရှေ့ပိုင်းသို့ ကျရောက်ပေါက်ကွဲခဲ့သဖြင့် လူ ၂ ဦး သေဆုံးကြောင်း ပိုလန်အစိုးရက နိုဝင်ဘာ ၁၆ ရက် အစောပိုင်းတွင် သတင်းထုတ်ပြန်ခဲ့သည်။

အဆိုပါ ဒုံးကျည်မှာ ရုရှားဘက်မှ ပစ်လွှတ်ခဲ့ခြင်း မဖြစ်နိုင်ကြောင်း အမေရိကန်သမ္မတ ဂျိုးဘိုင်ဒန်က ပြောကြားခဲ့ သော်လည်း ပိုလန်အစိုးရကတော့ အထက်ပါအတိုင်း သတင်းထုတ်ပြန်ခဲ့ခြင်း ဖြစ်သည်။

ထိုဖြစ်စဉ်အပေါ် အလွန်သိသာ ထင်ရှားသည့် တိုးမြှင့်လုပ်ဆောင်မှု တစ်ရပ်အဖြစ် ယူကရိန်းသမ္မတ ဗိုလိုဒီမီယာ ဇာလန်းစကီးက မှတ်ချက်ချခဲ့ပြီး စက်မှုထိပ်သီး (G-7) နိုင်ငံများနှင့် မြောက်အတ္တလန္တိတ် စစ်စာချုပ်အဖွဲ့ (နေတိုး) ခေါင်းဆောင်များ အရေးပေါ် အစည်းအဝေး ခေါ်ယူရန် ဘိုင်ဒန်ကို တိုက်တွန်းခဲ့သည်။

အကယ်၍ နေတိုးအဖွဲ့ဝင် ပိုလန်ကို တမင်တကာ ရန်လိုသည့် တိုက်ခိုက်မှုဖြစ်ခဲ့လျှင် နေတိုးမဟာမိတ်အဖွဲ့၏ စုပေါင်းစစ်ရေး တုံ့ပြန်မှု ဖြစ်ပေါ်လာနိုင်သည်ဟု အေပီသတင်းဌာနက ရေးသားသည်။

ပိုလန်နိုင်ငံထဲ ဒုံးကျည်ကျရောက် ပေါက်ကွဲလို့ ပိုလန် ရဲများ စစ်ဆေးနေစဉ် (AP)

သို့သော် ပိုလန်နှင့်ယူကရိန်း နယ်စပ်အနီးတွင် ရုရှားလေကြောင်း တိုက်ခိုက်မှုများ ဆက်တိုက် ရှိနေခြင်းကြောင့် ဒုံးကျည်ပစ်လွှတ်မှု အခြေအနေများနှင့်ပတ်သက်၍ အဓိကကျသည့် မေးခွန်းထုတ်စရာများ ကျန်ရှိနေဆဲဖြစ်သည်။

ပိုလန်နယ်နိမိတ်အတွင်း အဆိုပါဒုံးကျည် ကျရောက် ပေါက်ကွဲခြင်းမှာ ရုရှား ပါဝင်ပတ်သက်ခြင်း မရှိကြောင်း မော်စကိုက ငြင်းဆိုထားသည်။

နိုဝင်ဘာ ၁၅ ရက်၌ ယူကရိန်းလျှပ်စစ် အခြေခံ အဆောက်အအုံများ တိုက်ခိုက်ခံနေရစဉ်အတွင်း အဆိုပါဒုံးကျည် ကျရောက်ပေါက်ကွဲမှုလည်း ဖြစ်ပွားခဲ့ကြောင်း အမေရိကန်အစိုးရ တာဝန်ရှိသူ ၃ ဦးက အကဲဖြတ် ပြောကြားခဲ့ သည်။

၎င်းတို့ ၃ ဦး၏ အမည်ကိုတော့ အေပီက ထုတ်ဖော်ရေးသားခြင်း မရှိပါ။

ထိုဖြစ်စဉ်အပေါ် ပိုလန်အစိုးရက စုံစမ်းစစ်ဆေးနေပြီး မိမိတို့၏စစ်ရေး ပြင်ဆင်မှုအဆင့်ကို မြှင့်တင်ထားကြောင်း သတင်းထုတ်ပြန်ခဲ့ပြီး ယင်းကဲ့သို့ ပြင်ဆင်မှုကို ဘိုင်ဒန်က ထောက်ခံကြောင်း ပြောကြားခဲ့သည်။

အဆိုပါ လက်နက်ကြီးကို ရုရှားနိုင်ငံတွင် ထုတ်လုပ်ခြင်းဖြစ်ကြောင်း ပိုလန်နိုင်ငံခြားရေးဝန်ကြီးဌာန၏ ထုတ်ပြန် ချက်ထဲတွင် ရေးသားထားသည်။ ဒုံးကျည်သည် ရုရှားနိုင်ငံထုတ် ဖြစ်နိုင်ခြေအရှိဆုံးဟု ပိုလန်သမ္မတ အန်ဇညက်ဒူ ဘာ (Andrzej Duda) က ပြောကြားခဲ့သော်လည်း ဒုံးကျည်၏ မူလဇစ်မြစ်ကို အတည်ပြုနေဆဲ ဖြစ်သည်။

 G-7 နဲ့ နေတိုးအဖွဲ့၀င်များ အစည်းအဝေးလုပ်နေစဉ်

“ကျနော်တို့ ခေါင်းအေးအေးထားပြီး လုပ်နေပါတယ်။ ဒါဟာ ခက်ခဲတဲ့ အခြေအနေတစ်ရပ်ပါ” ဟု ဒူဘာက ဆက်လက် ပြောကြားခဲ့သည်။

အရေးပေါ် အစည်းအဝေးတစ်ရပ် ခေါ်ယူရန် ဘိုင်ဒန်၏ ဆုံးဖြတ်ချက် ထွက်ပေါ်လာ၍ အင်ဒိုနီးရှားနိုင်ငံတွင် ကျင်းပနေဆဲဖြစ်သည့် G-20 ထိပ်သီး အစည်းအဝေး နောက်ဆုံးနေ့အတွက် အချိန်ဇယား အပြောင်းအလဲ ဖြစ်စေခဲ့သည်။

အဆိုပါ ထိပ်သီးအစည်းအဝေး တက်ရောက်နေစဉ် ဒုံးကျည် သတင်းကြောင့် ညတွင်းချင်း ၎င်း၏ဝန်ထမ်းများက အသိပေးခဲ့သဖြင့် ၎င်း၏ဝမ်းနည်းကြောင်း ပြောကြားရန် ဘိုင်ဒန်သည် ပိုလန်သမ္မတ အန်ဇညက်ဒူဘာထံသို့ တယ်လီဖုန်းခေါ်ဆိုခဲ့သည်။

ပိုလန်၏ စုံစမ်းစစ်ဆေးနေမှုကို အမေရိကန် အပြည့်အဝ ထောက်ခံကြောင်းနှင့် ကူညီပံ့ပိုးသွားမည်ဖြစ်ကြောင်း ဖုန်းခေါ်ဆိုမှုအတွင်း ဘိုင်ဒန်က ကတိပြုခဲ့ပြီး နေတိုးအုပ်စုဝင် နိုင်ငံတစ်နိုင်ငံအတွက် အကာအကွယ်ပေးမည့် အစီအစဉ်ကို ထပ်လောင်း အတည်ပြုခဲ့သည်။

Source: AP

CNI International News

ဆိုးလ်၊ နိုဝင်ဘာ ၁၆

မြောက်ကိုရီးယား၏ နျူကလီးယားခြိမ်းခြောက်မှုကို ထိန်းချုပ်ရာတွင် ပိုမိုတက်ကြွပြီး အပြုသဘောဆောင် သည့်အခန်းကဏ္ဍမှ ပါဝင်ရန် တရုတ်နိုင်ငံအား တောင်ကိုရီးယားသမ္မတ ယွန်ဆော့ရွဲက တိုက်တွန်းခဲ့ကြောင်း အေပီသတင်းအရ သိရသည်။

အင်ဒိုနီးရှားနိုင်ငံတွင် ကျင်းပသည့် ထိပ်သီးအစည်းအဝေး၌ တရုတ်သမ္မတ ရှီကျင့်ဖျင်နှင့် နိုဝင်ဘာ ၁၅ ရက်၌ တွေ့ဆုံစဉ် ယွန်ဆော့ရွဲက အထက်ပါအတိုင်း တိုက်တွန်းခဲ့ကြောင်း တောင်ကိုရီးယားတာဝန်ရှိသူများက ပြောကြားခဲ့သည်။

တောင်ကိုရီးယားအနေဖြင့် ပြိုင်ဘက်မြောက်ကိုရီးယားနှင့် ဆက်ဆံရေးမြှင့်တင်ရန် မိမိမျှော်လင့်ကြောင်း ရှီကျင့်ဖျင်က ယွန်ဆော့ရွဲကို ပြန်လည်ပြောကြားခဲ့သည်ဟု တောင်ကိုရီးယားသမ္မတရုံးက သတင်းထုတ်ပြန် ခဲ့သည်။ ၎င်းတို့နှစ်ဦးသည် မြောက်ကိုရီးယားအပေါ် ကွဲပြားခြားနားသည့်အမြင်များရှိနေကြောင်း အဆိုပါ တွေ့ဆုံမှုက ထင်ဟပ်စေခဲ့သည်။

မြောက်ကိုရီးယားသည် မကြာသေးမီရက်သတ္တပတ်များအတွင်း နျူကလီးယားစွမ်းရည်အပါအဝင် ဒုံးကျည် အများအပြား ဆက်တိုက်ပစ်လွှတ်ခဲ့ပြီးနောက် ရှီနှင့်ယွန်တို့ တွေ့ဆုံခဲ့ကြခြင်းဖြစ်သည်။

G-20 ထိပ်သီးအစည်းအဝေးပွဲသို့ တက်ရောက်လာသည့် တရုတ်သမ္မတ ရှီကျင့်ဖျင်(ဓါတ်ပုံ-အေပီ)

၎င်းတို့တွေ့ဆုံမှုသည် ၂၀၁၉ ခုနှစ်၊ ဒီဇင်ဘာလနောက်ပိုင်း နှစ်နိုင်ငံခေါင်းဆောင်ချင်း ပထမဆုံးတွေ့ဆုံမှုလည်း ဖြစ်ပြီး G-20 ထိပ်သီးအစည်းအဝေး၏ပြင်ပတွင် သီးခြားဆွေးနွေးခဲ့ကြသည်။

မြောက်ကိုရီးယားအပေါ် ဒဏ်ခတ်ပိတ်ဆို့မှုအသစ်များ ချမှတ်ရန် အမေရိကန်နှင့်မဟာမိတ်များ ကြိုးပမ်းခြင်းကို တရုတ်နှင့်ရုရှားတို့က ဆန့်ကျင်ကန့်ကွက်ကြသဖြင့် မြောက်ကိုရီးယားသည် ၎င်း၏ဒုံးကျည်စမ်းသပ်မှုကို ဆက်လက်လုပ်ဆောင်နိုင်ကြောင်း စစ်ရေးကျွမ်းကျင်သူများက သုံးသပ်ကြသည်။

ဝါရှင်တန်သည် ဘေဂျင်းနှင့် မဟာဗျူဟာမြောက် ပြိုင်ဆိုင်မှုတွင် ဘတစ်ပြန် ကျားတစ်ပြန်ဖြစ်နေသလို ယူကရိန်းသို့ ကျူးကျော်စစ်ကြောင့်လည်း မော်စကိုနှင့် ထိပ်တိုက်တွေ့နေသည်။

မြောက်ကိုရီးယားကို အကြီးမားဆုံးအကူအညီပေးအပ်နေပြီး ၎င်းအတွက် စီးပွားရေးအသက်သွေးကြောဖြစ်သော တရုတ်သည် မြောက်ကိုရီးယားအပေါ် ဩဇာအလွှမ်းဆုံးဖြစ်ကြောင်း ယုံကြည်ရသည်။

သို့သော် ကုလသမဂ္ဂ၏ဒဏ်ခတ်ပိတ်ဆို့မှုများကို မြောက်ကိုရီးယား အပြည့်အဝ လိုက်နာမှုမရှိခြင်းနှင့် ဆင်းရဲ နွမ်းပါးသည့် ဆိုရှယ်လစ်မဟာမိတ်ဖြစ်သူ မြောက်ကိုရီးယားကို တရုတ် လျှို့ဝှက်ကူညီနေခြင်းတို့မှာ သံသယ ဖြစ်စရာများ ရှိနေခဲ့သည်။ ထိုသို့လုပ်ဆောင်မှုသည် ကိုရီးယားကျွန်းဆွယ်တွင် အမေရိကန်ဩဇာလွှမ်းမိုးခြင်းကို ဆန့်ကျင်သည့် အဟန့်အတားတစ်ခုအဖြစ် ရှုမြင်ကြသည်။

Source: AP

CNI International News

ဝါရှင်တန်၊ နိုဝင်ဘာ ၁၆

အမေရိကန်သမ္မတဟောင်း ဒေါ်နယ်ထရမ့်သည် နိုဝင်ဘာ ၁၅ ရက်တွင် အလားအလာကောင်းသော ရီပက်ဘလစ်ကန်ပါတီအတွင်း ပြိုင်ဘက်များကို ဖယ်ထုတ်ရန် ရည်ရွယ်၍ ၂၀၂၄ ခုနှစ်၌ သမ္မတရာထူးပြန်ရဖို့ ခြေလှမ်းများ စတင်နေပြီဟု သိရသည်။

၎င်းသည် အမေရိကန် ၂၀၂၀ ပြည့်နှစ် ရွေးကောက်ပွဲတွင် အရှုံးနှင့်ရင်ဆိုင်ခဲ့ရသည့် နောက်ပိုင်း မဲပေးမှုဆိုင်ရာ နိုင်ငံရေး ဂုဏ်သိက္ခာအပေါ် ရှုတ်ချခံခဲ့ရသည်။

ယခုကြားဖြတ်ရွေးကောက်ပွဲအပြီး ရီပက်ဘလစ်ကန်များသည် ကွန်ဂရက်(လွှတ်တော်)ထဲ အမတ်နေရာ အများ အပြား အနိုင်ရရန် မျှော်လင့်ချက်များ ကုန်ဆုံးပြီးနောက် ထရမ့်သည် ဖလော်ရီဒါပြည်နယ်ရှိ ၎င်း၏ မာရာလာဂို နေအိမ်ဝန်းကျင်၌ ကြေညာချက် တစ်စောင် ထုတ်ခဲ့သည်။

ထရမ့်နဲ့ ဘိုင်ဒန် စကားစစ်ထိုးပွဲလုပ်နေစဉ် (GETTY IMAGES)

တစ်ချိန်တည်းမှာပင် ဒီမိုကရက်တစ်ပါတီမှ လက်ရှိသမ္မတ ဂျိုးဘိုင်ဒန်နှင့် မသင့်မြတ် ဖြစ်နိုင်သည့် အခြေအနေတ စ်ရပ်ကိုလည်း ထရမ့် ကြိုးပမ်းနေသည်ဟု ရိုက်တာသတင်းကို ကိုးကား၍ CNA ဝက်ဘ်ဆိုက်တွင် ဖော်ပြထား သည်။

အမေရိကန် ရုပ်သံလိုင်း တစ်လိုင်းမှ တစ်နာရီကျော် ကြာမြင့်အောင် ထုတ်လွှင့်ခဲ့သည့် မိန့်ခွန်းတွင် ထရမ့်သည် ရာနှင့်ချီသော ထောက်ခံသူများ ဝန်းရံလျက် နေအိမ်ဝန်းကျင်ကို မီးပုံးများ၊ ဆယ်ဂဏန်းမျှရှိသော အမေရိကန် အလံများဖြင့် ဝေဝေဆာဆာ အလှဆင်ထားခဲ့သည်။

ထရမ့်က “အမေရိကန် တဖန်ပြန်ကောင်းလာစေဖို့အတွက် ဒီကနေ့ညမှာ အမေရိကန်သမ္မတလောင်းအဖြစ် ကျနော် ဝင်ပြိုင် ဖို့ ကြေညာသွားမှာပါ” ဟု ၎င်းမိသားစုဝင်များ၊ ပံ့ပိုးသူများနှင့် ဝန်ထမ်းဟောင်းများ ပါဝင်သော လူအုပ်ကြီးကို လက်ဝှေ့ယမ်း နှုတ်ဆက်ရင်း ပြောကြားခဲ့သည်။

ထိုနေ့ အစောပိုင်းတွင် ၎င်း၏လက်ထောက်များက ဒေါ်နယ်ထရမ့် ၂၀၂၄ သမ္မတဖြစ်ရေးဟု ခေါ်သည့် ကော်မတီ တစ်ရပ်ကို ဖွဲ့စည်းတည်ထောင်သွားရန် အမေရိကန် ရွေးကောက်ပွဲကော်မရှင်ထံသို့ အဆိုပြုလွှာ တင်သွင်းခဲ့သည်။

ထရမ့်သည် ဘိုင်ဒန်၏ သမ္မတရာထူးကာလကို ဝေဖန်ထောက်ပြခဲ့ပြီး ၎င်းအာဏာရချိန် မူဝါဒအောင်မြင်မှုများ သုံးသပ်ချပြခဲ့သည်။

ထရမ့်ရဲ့ စံအိမ်ကြီးကိုတွေ့ရစဉ် (GETTY IMAGES)

“လွန်ခဲ့တဲ့ နှစ်နှစ်တုန်းက ကျနော်တို့ လူမျိုးကြီး ဖြစ်ခဲ့ဖူးပါတယ်။ မကြာခင်မှာလည်း ကျနော်တို့လည်း လူမျိုးကြီး တဖန်ဖြစ်လာတော့မှာပါ” ဟု ၎င်းက ပြောကြားခဲ့သည်။

၎င်းသည် နိုင်ငံရေး ကစားကွက်အတွင်းမှ လူကြိုက်များစေမည့် အကြောင်းအရာများကို ထရမ့်က ထုတ်ဖော် ပြသ ခဲ့ပြီး ရွှေ့ပြောင်း အခြေချ နေထိုင်သူများကို သွေးစွန်းနေသော ရာဇဝတ်မှု လှိုင်းတစ်ခုအား အမေရိကန်မြို့များဆီ သို့ ဆောင်ကြဉ်းလာဟန် ပုံဖော်ခဲ့သည်။

မူးယစ်ဆေးဝါး ရောင်းဝယ် ဖောက်ကားသူများကို သေဒဏ်ပေးရေးနှင့် လွှတ်တော်အမတ်များ သက်တမ်း ကန့်သတ်ချက်များကို ဖြေလျော့ပေးပြီး Covid-19 ကာကွယ်ဆေးထိုးရန် ငြင်းဆန်သဖြင့် အလုပ်ထုတ်ခံခဲ့ရသော စစ်မှုထမ်းကို ပြန်လည်ခန့်အပ်ပေးမည်ဟု ထရမ့်က ကတိပြုခဲ့သည်။

Source: Reuters, Channel News Asia

CNI International News

ဘန်ကောက်၊ နိုဝင်ဘာ ၁၅

မှုခင်းကိစ္စဖြင့် သံသယရှိသူကို သေသည်အထိ ညှင်းပန်းနှိပ်စက်ခဲ့သဖြင့် ထောင်သွင်းအကျဉ်းချခံထားရသည့် ခရိုင်အဆင့် ရဲချုပ်ဟောင်း တစ်ဦးသည် သမားရိုးကျမဟုတ်ဘဲ ချမ်းသာကြွယ်ဝနေသူဖြစ်ကြောင်း တွေ့ရှိရပြီး နောက် ၎င်း၏ ဘတ်ငွေ ၁ ဒသမ ၃၅ ဘီလီယံ တန်ဖိုးရှိ ပိုင်ဆိုင်မှုများကို ထိုင်းအစိုးရက သိမ်းယူခဲ့ကြောင်း ဘန်ကောက်ပို့စ်တွင် ဖော်ပြထားသည်။

ပြောင်လက်တောက်ပသည့် ဇိမ်ခံကားများကို အရသာခံ စီးနင်းတတ်သဖြင့် ဂျိုးဖာရာရီဟု နာမည်ပြောင်ဖြင့် အခေါ်ခံရသူ ရဲချုပ်ဟောင်း သီတီဆန်အက်သန်နာဖွန်သည် ပြီးခဲ့သည့် ဇွန်လတွင် ထောင်ဒဏ်တစ်သက်တစ်ကျွန်း ချမှတ်ခံခဲ့ရသည်။

၎င်းသည် ရဲတပ်ဖွဲ့၏ ရက်စက်ကြမ်းကြုတ်မှုနှင့် အကျင့်ပျက်ခြစားမှုအပေါ် ရှားရှားပါးပါး ဖော်ထုတ်တွေ့ရှိရသည့် ဖြစ်စဉ်တစ်ခု စစ်ဆေးပေါ်ပေါက်ပြီးနောက် ထိုကဲ့သို့ ထောင်ဒဏ်ချမှတ်ခံခဲ့ရခြင်း ဖြစ်သည်။

ထိုင်းအစိုးရကိုတွေ့ရစဉ်(Reuters)

“အစိုးရအရာရှိ တစ်ဦးအဖြစ် တာဝန်ထမ်းဆောင်ခြင်းမှ ရရှိသည့် ၎င်း၏ဝင်ငွေသည် ၎င်းပိုင်ဆိုင်မှုနှင့် ကိုက်ညီမှု မရှိကြောင်း” ထိုင်းအမျိုးသား အဂတိလိုက်စားမှု တိုက်ဖျက်ရေးကော်မရှင်ရုံးမှ ပြောရေးဆိုခွင့်ရှိသူ နီဝက်ချိုင်ဂေ့ မင်ကောလ်က သတင်းထောက်များကို ပြောကြားခဲ့သည်။

သူ(ခရိုင်အဆင့် ရဲချုပ်ဟောင်း)သည် သမားရိုးကျ ချမ်းသာလာသည်ခြင်း မဟုတ်၍ ဘတ်ငွေ ၁ ဒသမ ၃၅ ဘီလီယံ တန်ဖိုးရှိ ၎င်း၏ ပိုင်ဆိုင်မှုများကို အစိုးရမှ သိမ်းယူသင့်ကြောင်း နီဝက်ချိုင်ဂေ့မင်ကောလ်က ဆက်လက် ပြော ကြားခဲ့သည်။

ရဲချုပ်ဟောင်း သီတီဆန်၏ ချမ်းသာစွာ နေထိုင်မှုပုံစံနှင့် ထင်ပေါ်ကျော်ကြားသူများ၏ ထုတ်ဖော်ပြောကြား ချက်များမှာ ၎င်း အဖမ်းခံရပြီး နောက်ပိုင်း သတင်းစာ ခေါင်းကြီးပိုင်း သတင်းများ ဖြစ်လာခဲ့သည်။

တစ်လစာ လစာမှာ ဘတ်ငွေ ၄၇,၀၀၀ ဝန်းကျင်ရှိသည့် ရဲအရာရှိတစ်ဦးသည် ဘန်ကောက်မြို့တော်တွင် ဇိမ်ခံ အိမ်ကြီးနှင့် ဘတ်ငွေ ၅၄ သန်းတန် Lamborghini Aventador အပါအဝင် ကမ္ဘာ့ထိပ်တန်း ဇိမ်ခံကား ၄၂ စီးအထိ ပိုင်ဆိုင်ထားကြောင်း ထိုင်းစုံစမ်းစစ်ရေးမှူးများက ပြောကြားခဲ့ကြသည်။

 ထိုင်းရဲတပ်ဖွဲ့ကိုတွေ့ရစဉ် (GETTY IMAGES)

အသက် ၂၄ နှစ်အရွယ်ရှိ ဂျီရာပေါင်သာနာပက်ဆိုသူ သေဆုံးခဲ့မှုကို ကနဦးတွင် ရဲတပ်ဖွဲ့က နှုတ်ဆိတ်နေခဲ့ပြီး ရှေ့နေတစ်ဦးက သေဆုံးရခြင်း ဖြစ်ရပ်မှန်ကို ဖေ့စ်ဘွတ်ခ်ပေါ်သို့ ပို့စ်မတင်မချင်း အဖက်တမင်း မူးယစ်ဆေး လွန်ကဲစွာ သုံးစွဲမိခြင်းဟုသာ ရဲတပ်ဖွဲ့၏ မှတ်တမ်းတွင် တွေ့ခဲ့ရသည်။

ပေါက်ကြားလာသည့် ဗွီဒီယိုဖိုင် တစ်ဖိုင်တွင် ရဲချုပ် သီတီဆန်နှင့် အခြားရဲအရာရှိ ၆ ဦးတို့က သေဆုံးသူ ဂျီရာပေါင် သာနာပက်၏ ဦးခေါင်းကို ပလတ်စတစ်အိတ် ၇ လုံးဖြင့် ရစ်ပတ်ညှင်းပန်း၍ စစ်ကြော မေးမြန်းခဲ့ကြကြောင်း တွေ့ ရှိ ရသည်။

ထို့ပြင် ၎င်းတို့သည် ဘတ်ငွေ ၂ သိန်းကျော် အပေးအယူလုပ်ရန် သေဆုံးသူကို ခြိမ်းခြောက်ခဲ့ပြီး နောက်ဆုံးတွင် အသက်ဆုံးရှုံးစေသည်အထိ ဖြစ်‌ပေါ်စေခဲ့ကြောင်း ပေါ်ပေါက်လာခဲ့သည်။

Source: Bangkok Post

CNI International News

နာဆာဒူအာ(အင်ဒို)၊ နိုဝင်ဘာ ၁၅

တင်းမာနေသော အမေရိကန်-တရုတ်ဆက်ဆံရေးကြောင့် စစ်အေးခေတ်သစ်သို့ ဦးတည်လာခြင်းမှ တားဆီးရန် ရည်ရွယ်လျက် အမေရိကန်သမ္မတ ဂျိုးဘိုင်ဒန်နှင့် တရုတ်သမ္မတ ရှီကျင့်ဖျင်တို့သည် ထိုင်ဝမ်နှင့်မြောက်ကိုရီးယား အရေးတို့ကို နိုဝင်ဘာ ၁၄ ရက်တွင် ၃ နာရီကြာ ပြတ်ပြတ်သားသား ဆွေးနွေးခဲ့ကြသည်။

လူ့အခွင့်အရေးဆိုင်ရာ သဘောထားကွဲလွဲမှုများ ဆူညံနေချိန်၌ ယူကရိန်းသို့ ရုရှားကျူးကျော်စစ်နှင့် ၎င်းတို့နိုင်ငံ အသီးသီးရှိ စက်မှုလုပ်ငန်းများကို ပံ့ပိုးနိုင်ရန် သမ္မတနှစ်ဦးတို့ မကြာခဏ ပိုမိုထိတွေ့ဆက်ဆံရန်လည်း ကတိကဝတ်ပြုခဲ့ကြသည်။
နှစ်နိုင်ငံ နောက်ဆက်တွဲဆွေးနွေးပွဲ ကျင်းပနိုင်ရန်အတွက် အမေရိကန်နိုင်ငံခြားရေးဝန်ကြီး အန်တိုနီဘလင်ကင် သည် ဘေဂျင်းမြို့တော်သို့ သွားရောက်ရန်လည်း စီစဉ်ခဲ့သည်။

အင်ဒိုနီးရှားနိုင်ငံတွင် ကျင်းပသည့် G-20 ထိပ်သီးအစည်းအဝေး၏ပြင်ပတွင် ရှီကျင့်ဖျင်နှင့် တွေ့ဆုံပြီးနောက် ဘိုင်ဒန်က “ကျနော်တို့ ပြင်းပြင်းထန်ထန် ယှဉ်ပြိုင်ရမှာ။ ဒါပေမယ့် ကျနော်က ပဋိပက္ခကို မရှာဘူး။ ဒီလို ယှဉ်ပြိုင်မှုကို တာဝန်သိသိနဲ့ စီမံခန့်ခွဲဖို့ ကျနော် ရှာကြံနေပါတယ်” ဟု ပြောကြားခဲ့သည်။

တရုတ်၏ထိန်းချုပ်မှုအောက်မှ ခွဲထွက်၍မရသော အစိတ်အပိုင်းအဖြစ် ရှုမြင်ထားသည့် ကိုယ်ပိုင်အုပ်ချုပ်ခွင့်ရ ထိုင်ဝမ်ကျွန်းကို ၎င်းလက်အောက်သို့ ဆွဲခေါ်ရန် ဘေဂျင်းအစိုးရပြောကြားခဲ့သည်မှာ ကာလကြာမြင့်လှပြီ ဖြစ်သော်လည်း ထိုသို့ဆွဲခေါ်ရာ၌ အင်အားသုံးရန်မရှိဟု ငြင်းဆိုထားသည်။

ထိုင်ဝမ်နိုင်ငံ တိုင်ပေတွင် အမျိုးသားနေ့ အခမ်းအနား ကျင်းပနေစဉ် Chinook ရဟတ်ယာဉ်တစ်စင်းသည် ထိုင်ဝမ်အလံကို ကိုင်ဆောင်ကာ မြို့ပေါ်တွင် ပျံသန်းခဲ့စဉ်(ဓါတ်ပုံ-ရိုက်တာ)

မကြာသေးမီနှစ်များအတွင်းကလည်း ထိုင်ဝမ်လွတ်လပ်ရေးနှင့်ပတ်သက်၍ အမေရိကန်က ရံဖန်ရံခါ ပြောကြားခဲ့သည်။

၎င်းတို့နှစ်ဦး တွေ့ဆုံမှုအပြီး ထိုင်ဝမ်ကို အမေရိကန်-တရုတ်ဆက်ဆံရေးတွင် ဖြတ်ကျော်ခြင်းမပြုရမည့် ပထမဆုံးအနီရောင်မျဉ်းဟု ရှီကျင့်ဖျင်က ပြောကြားခဲ့ကြောင်း တရုတ်အစိုးရပိုင်မီဒီယာ၏ ထုတ်လွှင့်ချက်အရ သိရသည်။
ဘေဂျင်း၏ တရုတ်တစ်ပြည်ထောင်တည်း ရပ်တည်ချက်နှင့် ထိုင်ဝမ်အပေါ် စစ်ရေးပံ့ပိုးရန် ဆယ်စုနှစ်များစွာကြာ ရပ်တည်ခဲ့သော ထိုင်ဝမ်ဆိုင်ရာ အမေရိကန်မူဝါဒမှာ အပြောင်းအလဲမရှိကြောင်း ရှီကျင့်ဖျင်ကို အာမခံဖို့ကြိုးစားခဲ့ ကြောင်း ဘိုင်ဒန်က ပြောကြားခဲ့သည်။

စစ်အေးခေတ်သစ် မလိုအပ်ကြောင်းနှင့် တရုတ်ကလည်း အပူတပြင်း စစ်ပွဲပြင်ဆင်နေသည်ဟု မထင်မိကြောင်း ဘိုင်ဒန်က ဆက်လက်ပြောကြားခဲ့သည်။

“ထိုင်ဝမ်ကို ကျူးကျော်ဖို့ တရုတ်က နီးနီးကပ်ကပ် ကြိုးပမ်းတာမျိုးတော့ ရှိမယ်လို့ မထင်မိဘူး” ဟု ၎င်းက သတင်းထောက်များကို ရှင်းပြခဲ့သည်။

သို့ရာတွင် မြောက်ကိုရီးယားနှင့်ပတ်သက်၍ ပြုံယမ်းအစိုးရ၏ လက်နက်စမ်းသပ်မှုအပေါ် ဘေဂျင်း၏ ဩဇာ လွှမ်းမိုးခြင်း ရှိ/မရှိ သိရန်ခက်ခဲကြောင်း ဘိုင်ဒန်က ဆက်လက်ပြောကြားခဲ့သည်။

“ပထမဆုံးအနေနဲ့ တရုတ်က မြောက်ကိုရီးယားကို ထိန်းချုပ်နိုင်တယ်ဆိုတာ သေချာပေါက် ပြောဖို့ ခက်ပါတယ်” ဟု ၎င်းက ထပ်လောင်းပြောကြားခဲ့သည်။

Source: Reuters, Channel News Asia

CNI International News

ဖနွမ်ပင်၊ နိုဝင်ဘာ ၁၅

ပြီးခဲ့သည့် ရက်ပိုင်းက ကျင်းပ ပြီးစီးခဲ့သော အာဆီယံထိပ်သီး ခေါင်းဆောင်များ အစည်းအဝေးတွင် မြန်မာနိုင်ငံကို အာဆီယံအဖွဲ့ဝင် အဖြစ်ကနေ ထုတ်ပယ်ပစ်ဖို့ နိုင်ငံတချို့က အဆိုပြု၍ အငြင်းပွားစရာ ဆွေးနွေးမှုများ ရှိခဲ့သည် ဟု ဖိလစ်ပိုင်သမ္မတ ဖာဒီနန်မားကို့စ်ဂျူနီယာက ပြောသည်။

ကမ္ဘောဒီးယားနိုင်ငံတွင် ကျင်းပခဲ့သည့် အကြိမ် ၄၀ နှင့် ၄၁ ကြိမမြောက် အာဆီယံထိပ်သီးအစည်းအဝေးများ၌ အာဆီယံအနေဖြင့် မြန်မာနိုင်ငံနှင့် မည်သို့ဆက်ဆံသင့်ကြောင်း ဆွေးနွေးမှုများအနက် အနည်းငယ် အငြင်းပွား စရာ ဖြစ်လာကြောင်း ဖိလစ်ပိုင်သမ္မတ ဖာဒီနန်မားကို့စ်ဂျူနီယာက နိုဝင်ဘာ ၁၃ ရက်တွင် ပြောကြားခဲ့သည်။

၂၀၂၁ ခုနှစ်၊ ဖေဖော်ဝါရီလတွင် ဒေါ်အောင်ဆန်းစုကြည်၏ အရပ်သားအစိုးရကို စစ်တပ်က ဖြုတ်ချပြီး ကတည်းက မြန်မာပြည်တွင်း နိုင်ငံရေးအကျပ်အတည်းနှင့် ရင်ဆိုင်ခဲ့ရသလို တိုက်ပွဲများ ဖြစ်ပွားခဲ့ခြင်းကြောင့်လည်း လူထောင် ပေါင်းများစွာ သေကြေပျက်စီးခဲ့ရသည်။

အာဆီယံ ထိပ်သီး ခေါင်းဆောင်များ အစည်းအဝေးတွင် ထိုင်ခုံအလွတ်ဖြစ်နေသော မြန်မာ(Reusters)

မြန်မာ့အကျပ်အတည်းသည် အာဆီယံထိပ်သီး အစည်းအဝေးသို့ တက်ရောက်လာသည့် အာဆီယံ ခေါင်းဆောင် များအတွက် အဓိကစိုးရိမ်ပူပန်စရာ ဖြစ်ခဲ့ရသည်ဟု မားကို့စ်က ဆက်လက် ပြောကြားခဲ့သည်။

“အဲဒီနေရာမှာ နည်းနည်းတော့ ငြင်းစရာဖြစ်ပါတယ်။ ဘာဖြစ်လို့လဲဆိုတော့ အာဆီယံထဲမှာ မြန်မာနိုင်ငံကို ဖယ်ချန်ထားချင်တဲ့ နိုင်ငံတွေ (ဒါမှမဟုတ်) အစည်းအဝေး မဖိတ်ချင်တဲ့နိုင်ငံတွေ ရှိနေပါတယ်။ တချို့နိုင်ငံတွေ ကလည်း မြန်မာကို ထုတ်ပစ်သင့်တယ်လို့ ပြောကြတယ်။ တချို့ကလည်း မြန်မာစစ်တပ် ထိပ်ပိုင်းကို တင်မကဘဲ အောက်ခြေတပ်သားတွေအထိပါ ပြောသင့်တယ်လို့ ဆွေးနွေးကြတယ်” ဟု အစည်းအဝေးအတွင်း အတွေ့အကြုံ ကို ၎င်းက ရှင်းပြသည်။
“ကျနော်တို့အားလုံး အမြင်ချင်း မတူကြပါဘူး။ အာဆီယံကနေ မြန်မာကို လုံးဝထုတ်ပစ်ဖို့ အဆိုလည်း ရှိပါတယ်။ အပြည့်အဝ ထိတွေ့ဆက်ဆံမယ်ဆိုရင်လည်း အနည်းငယ် ကွဲပြားတဲ့ ရပ်တည်ချက်တွေ ရှိပါတယ်” ဖိလစ်ပိုင် သမ္မတ မားကို့စ်က ထပ်လောင်း ပြောကြားခဲ့သည်။

၎င်း၏ ရပ်တည်ချက် အပိုင်းနှင့်ပတ်သက်၍ မားကို့စ်က “စစ်တပ်အုပ်ချုပ်သူများနှင့် အတိုက်အခံ လှုပ်ရှားသူများ အပါအဝင် သက်ဆိုင်သူ အားလုံးနှင့် အာဆီယံ တိုက်ရိုက် ထိတွေ့ဆက်ဆံခြင်းအားဖြင့် မြန်မာပြည်တွင်း အကြမ်း ဖက်မှုများ အဆုံးသတ်ပေးဖို့ အရေးကြီးကြောင်း” ထုတ်ဖော်ပြောကြားခဲ့သည်။

အာဆီယံ ထိပ်သီး ခေါင်းဆောင်များ အစည်းအဝေး ကျင်းပနေသည်ကိုတွေ့ရစဉ်

“သူတို့ဆီက အားလုံးနဲ့ စကားပြောသင့်တယ်လို့ ကျနော် ချပြခဲ့ပါတယ်။ ပါဝင်ပတ်သက်သူတိုင်းနဲ့ စိတ်ပါဝင်စားသူ တိုင်းနဲ့ ဆွေးနွေးကြပါစို့လို့ ကျနော် ပြောခဲ့ပါတယ်။ အခုဖြစ်နေတာက ဘယ်သူကမှ စစ်ဗိုလ်ချုပ်တွေကို မဆက်ဆံ ချင်ကြဘူး။

ဘယ်သူကမှ အစိုးရအဆင့်မြင့် တာဝန်ရှိသူတွေနဲ့ မဆက်ဆံချင်ကြပါဘူး။ ဒါပေမယ့် သေချာတာက တော့ ကွဲပြားခြားနားတဲ့ ထိတွေ့ဆက်ဆံမှု အဆင့်တွေကို အဆိုပြု ထားတယ်ဆိုတာပါ” ဟု မားကို့စ် ပြောသည်။

နိုဝင်ဘာ ၁၂ ရက်တွင် အာဆီယံခေါင်းဆောင်များသည် ၎င်းတို့ အစုအဖွဲ့နှင့် မြန်မာနိုင်ငံတို့ သဘောတူ လက်ခံ ထားသည့် အချက် ၅ ချက်ကို အလုံးစုံ အကောင်အထည် ဖော်သင့်ကြောင်း ကြေညာချက်တစ်စောင် ထုတ်ပြန်ခဲ့ သည်။

အဆိုပါ အချက် ၅ ချက်တွင် မြန်မာနိုင်ငံ၌ အကြမ်းဖက်မှုများ ရပ်တန့်ရန်နှင့် သက်ဆိုင်ရာ အဖွဲ့အစည်း အားလုံး အကြား အပြုသဘောဆောင် ဆွေးနွေးကြဖို့ တောင်းဆိုထားသည်။

Source: ABS/CBN News

CNI International News

မော်စကို၊ နိုဝင်ဘာ ၁၅

ယူကရိန်းအရေးနှင့်ပတ်သက်၍ ရုရှားလျော်ကြေးပေးရန် ကုလသမဂ္ဂ (UN) ဆုံးဖြတ်ချက်ကို အတည်ပြု လိုက်ပြီးနောက် UN အထွေထွေညီလာခံအနေဖြင့် ကိုရီးယား၊ ဗီယက်နမ်၊ အီရတ်၊ ယူဂိုဆလားဗီးယားနှင့် အခြားနိုင်ငံတို့၏ ပျက်စီးဆုံးရှုံးမှုများအတွက်လည်း အမေရိကန်လျော်ကြေးပေးဖို့ ဆက်လက်ဆုံးဖြတ်ပေးရန် ရုရှားလုံခြုံရေးကောင်စီ ဒုတိယဥက္ကဋ္ဌ ဒီမီထရီမက်ဗီဒက်က နိုဝင်ဘာ ၁၄ ရက်တွင် တောင်းဆိုခဲ့သည်။

“ကိုရီးယား၊ ဗီယက်နမ်၊ အီရတ်၊ ယူဂိုဆလားဗီးယားနဲ့ အမေရိကန်၊ နေတိုးတို့ကြောင့် ထိခိုက်နစ်နာခဲ့ရတဲ့ တခြားနိုင်ငံတွေအပေါ် အမေရိကန်ရဲ့ စုစုပေါင်းလျော်ကြေးကို နစ်နာမှုနဲ့ထပ်တူ ဆုံးဖြတ်ချက်ချသင့်ပါတယ်” ဟု မက်ဗီဒက်က ၎င်း၏တယ်လီဂရမ်ချန်နယ်ပေါ်တွင် ရေးသားလွှင့်တင်ခဲ့သည်။

ယူကရိန်းနိုင်ငံ၏ပျက်စီးဆုံးရှုံးမှုများအတွက် ရုရှားလျော်ကြေးပေးဖို့ ယန္တရားတစ်ခုထူထောင်ရန် လိုအပ်ကြောင်း အသိအမှတ်ပြုသည့်ဆုံးဖြတ်ချက်အပေါ် ကုလသမဂ္ဂတွင် မဲခွဲဆုံးဖြတ်ခဲ့ရာ၌ မက်ဗီဒက်က အထက်ပါအတိုင်း သဘောထားမှတ်ချက်ပေးခဲ့ခြင်းဖြစ်သည်။

“အဲဒီလိုမှမဟုတ်ရင် ပြန်လည်သင့်မြတ်ရေးအတွက် အဓိကနိုင်ငံတကာအဖွဲ့အစည်းတစ်ခုအနေနဲ့ UN ဟာ နာကျင်စရာတစ်ခု အစပျိုးလိုက်ပုံရပါတယ်” ဟု ၎င်းက အလေးအနက် ပြောကြားခဲ့သည်။

ရုရှားလုံခြုံရေးကောင်စီ ဒုတိယဥက္ကဋ္ဌ ဒီမီထရီမက်ဗီဒက် (ဓါတ်ပုံ-TASS)

“အဆုံးသတ်အကျိုးအနေနဲ့ နိုင်ငံတကာအသိုင်းအဝိုင်းတစ်ခုလုံးကို နာကျင်စေပါလိမ့်မယ်” ဟု ၎င်းက ဆက်လက်ပြောကြားခဲ့သည်။

အဆိုပါ UN ဆုံးဖြတ်ချက်သည် သိမ်းဆည်းခံထားရသော ရုရှား၏ပိုင်ဆိုင်မှုများကို အနောက်အုပ်စုများက အသုံးချဖို့ အစီအစဉ်များကို တရားဝင်ဖြစ်စေဖို့ ရည်ရွယ်သည်ဟု မက်ဗီဒက်၏အဆိုအရ သိရသည်။

“သူတို့တတွေဟာ တရားမဝင် ချုပ်ကိုင်သိမ်းဆည်းထားတဲ့ ရုရှားပိုင်ဆိုင်မှုတွေကို ခိုးထုတ်ဖို့ တရားဝင် အခြေခံတစ်ရပ် ကြိုးပမ်းနေတယ်ဆိုတာ ထင်ရှားပါတယ်” ဟု ၎င်းက ထပ်လောင်းပြောကြားခဲ့သည်။

နိုဝင်ဘာ ၁၄ ရက်၌ UN အထွေထွေညီလာခံ၏ အရေးပေါ်အစည်းအဝေးတွင် ယူကရိန်းအပေါ် ရုရှား ထိခိုက် နစ်နာစေခဲ့သည်ဟူ၍ စွပ်စွဲထားသည့် နိုင်ငံတကာအဆိုပြုချက်တစ်ရပ်နှင့်အတူ ပြန်လည်ထူထောင်ရေး နှင့်ဆုံးရှုံးမှုလျော်ကြေးပေးရေး ယန္တရားလိုအပ်ချက် အသိအမှတ်ပြုကြောင်း အတည်ပြုခဲ့သည်။

အဆိုပါဆုံးဖြတ်ချက်အတွက် နိုင်ငံပေါင်း ၉၄ နိုင်ငံက မဲပေးခဲ့ကြပြီး ၁၄ နိုင်ငံက ကန့်ကွက်မဲ၊ ကြားနေ ၇၃ မဲရရှိခဲ့သည်။

Source: တာ့စ်သတင်းဌာန

CNI International News

ဘန်ကောက်၊ နိုဝင်ဘာ ၁၄

ထိုင်းလူဝင်မှုကြီးကြပ်ရေးဗျူရို (IB) သည် ယခုသီတင်းပတ် နှောင်းပိုင်း ကျင်းပမည့် အာရှ-ပစိဖိတ် စီးပွားရေး ပူးပေါင်း ဆောင်ရွက်မှု (APEC-အေပက်) ထိပ်သီး အစည်းအဝေး(ဖိုရမ်)ကြောင့် ပြည်တွင်းရှိ နိုင်ငံတကာ လေဆိပ် အားလုံး၌ လုံခြုံရေးတင်းကျပ်ထားကြောင်း ဘန်ကောက်ပို့စ်က ရေးသားဖော်ပြသည်။

IB ဗျူရိုအကြီးအကဲ ဒုတိယရဲချုပ် ပက်ဖန်ပီပက်ဆာဂျာပန်က “အာဏာပိုင်များ အနေဖြင့် အဆိုပါ ထိပ်သီး အစည်းအဝေးအတွက် လုံခြုံရေးခြိမ်းခြောက်လာ၍ ပြည်ပမှ ဝင်ရောက်လာသူများကို အနီးကပ် စောင့်ကြည့်နေ ကြောင်း” နိုဝင်ဘာ ၁၃ ရက်တွင် ပြောကြားခဲ့သည်။

ပြီးခဲ့သည့် အောက်တိုဘာလ ကတည်းက ထိုင်းအာဏာပိုင်များသည် လူဝင်မှုကြီးကြပ်ရေး အမည်ပျက် စာရင်း တွင် ပါရှိသူ ၂ သောင်းကျော် ပြည်တွင်းသို့ ဝင်ရောက်ခွင့် ပိတ်ပင်ထားကြောင်း ၎င်းက ဆက်လက် ပြောကြားခဲ့ သည်။

နိုင်ငံခြားသားများကို ထိုင်းလေဆိပ်တွင် စစ်ဆေးနေစဉ် (GETTY IMAGES)

“သံသယဖြစ်စရာ လှုပ်ရှားမှုတွေမှာ ပါဝင်ပတ်သက်သူတွေကို စစ်ဆေးမေးမြန်းပြီး ပြည်နှင်ဒဏ် ပေးသွားမယ်” ဟု ပက်ဖန်ပီပက်က ရှင်းပြသည်။  

IB ဗျူရိုသည် ပြည်တွင်းသို့ ဝင်ရောက်ရန် ကြိုးစားလာနိုင်လာသည့် သံသယရှိသူ (သို့မဟုတ်) သက်ဆိုင်ရာမှ အလို ရှိ နေသည့် ဒုစရိုက်သမားများ၏ နောက်ဆုံး သတင်းအချက်အလက်များ ရရှိနိုင်ဖို့ ထိုင်းနိုင်ငံခြားရေးဝန်ကြီးဌာန ဝန်ထမ်းများနှင့်လည်း ညှိနှိုင်းဆောင်ရွက်နေကြောင်း ၎င်းက ထပ်လောင်း ပြောကြား ခဲ့သည်။

ထိပ်သီးအစည်းအဝေး ကျင်းပမည့်ရက် နီးကပ်လာသည်နှင့်အမျှ လေဆိပ်အသီးသီးရှိ အဝင်အထွက်၌ တိုးပွားလာ သော ခရီးသည်ဦးရေကို စိစစ်နေပြီး သုဝဏ္ဏဘူမိလေဆိပ်ရှိ လူဝင်ကြီးကြပ်ရေး ဂိတ်များတွင် တာဝန်ချထားမည့် လုံခြုံရေးအရာရှိများကို ထပ်မံစေလွှတ်မည်ဟု သိရသည်။

အောက်တိုဘာ ၁၀ ရက်မှ ယခုနိုဝင်ဘာ ၁၂ ရက်အထိ ဗီဇာသက်တမ်း ကျော်လွန်နေထိုင်မှုဖြင့် နိုင်ငံခြားသား ၇၈၅ ဦးကို ထိုင်းအာဏာပိုင်များက ဖမ်းဆီးခဲ့ကြောင်း၊ ထို့အပြင် ပြည်ပမှ တရားမဝင် ဝင်ရောက်လာမှုဖြင့် ဖမ်းဆီး ထားသူ ၁၂၄၉ ဦးအနက် လာအို ၇၇၀ ဦး၊ မြန်မာမှ ၃၄၉ ဦး၊ ကမ္ဘောဒီးယားမှ ၁၀၈ ဦးနှင့် အခြားနိုင်ငံများမှ ၂၂ ဦး တို့ ဖြစ်ကြောင်း ဘန်ကောက်ပို့စ်က ဆက်လက် ရေးသားထားသည်။

Source: Bangkok Post

CNI International News

နူဆာဒူအာ (အင်ဒို)၊ နိုဝင်ဘာ ၁၄

ဂျိုးဘိုင်ဒန်နှင့် ဗလာဒီမာပူတင်တို့အကြား ထိပ်တိုက်ရင်ဆိုင်မှု ဖြစ်မလာခဲ့သော်လည်း ယူကရိန်းသို့ ရုရှား ကျူး ကျော်စစ်၊ တရုတ်နှင့်အနောက်အုပ်စုအကြား တင်းမာမှုများသည် ကမ္ဘာ့စီးပွားရေးအင်အားအကြီးဆုံး နိုင်ငံ့ ခေါင်းဆောင်များ တွေ့ဆုံကြသော အင်ဒိုနီးရှားနိုင်ငံ၊ ဘာလီကျွန်း G-20 ထိပ်သီး အစည်းအဝေး၌ ဦးစားပေး ဆွေးနွေးကြသည့် ရေပန်းအစားဆုံး ကိစ္စရပ်များဖြစ်နေကြောင်း အေပီသတင်းအရ သိရသည်။

G-20 အုပ်စုဝင် နိုင်ငံ့ခေါင်းဆောင်များသည် အင်ဒိုနီးရှား၏ အပန်းဖြေ ကျွန်းပေါ်သို့ စုဝေးရောက်ရှိလာကြပြီး နိုဝင်ဘာ ၁၅ ရက်တွင် အတူတကွ အသစ်တဖန် တည်ဆောက်ကြဖို့၊ ပြန်လည် အင်အားတောင့်တင်းလာစေဖို့ စသည့် ဦးတည်ချက်များဖြင့် အစည်းအဝေး စတင်ရန် မျှော်လင့်ထားသည်။

ဘာလီကျွန်းနှင့် ဝေးရာတွင် ပူတင်ရှိနေစဉ် ဘိုင်ဒန်သည် တရုတ်သမ္မတ ရှီကျင့်ဖျင်နှင့် လူချင်းတွေ့ဆုံမည်ဖြစ်ပြီး ဗြိတိန်ဝန်ကြီးချုပ်သစ် ရီရှီဆန်းနက်၊ အီတလီဝန်ကြီးချုပ် ဂျော်ဂျီယာမယ်လိုနီ (Giorgia Meloni) တို့နှင့်လည်း ဆွေးနွေးရန် စီစဉ်ထားသည်။

G-20 အစည်းအဝေး တက်ဖို့ရောက်လာတဲ့ ဘိုင်ဒန်ကို ကြိုဆိုနေစဉ် (AP)

အဆိုပါ ထိပ်သီး အစည်းအဝေး၏ တရားဝင် ဦးစာပေးကဏ္ဍများမှာ ကျန်းမာရေး၊ ရေရှည်တည်တံ့ ခိုင်မြဲသော စွမ်းအင်ကိစ္စနှင့် ဒစ်ဂျစ်တယ် အသွင်ကူးပြောင်းမှုတို့ဖြစ်ကြပြီး ယူကရိန်းစစ်ကို ဗဟိုပြုနေသည့် ကမ္ဘာ့စီးပွားရေး နှင့် ပထဝီဝင်နိုင်ငံရေး တင်းမာမှုများက ဖုံးလွှမ်းသွားနိုင်သည့် အလားအလာလည်း မြင်နေရသည်။

ထိုစစ်ပွဲဂယက်ကြောင့် ရေနံ၊ သဘာဝဓာတ်ငွေ့နှင့် ကောက်ပဲသီးနှံ ကုန်သွယ်ရေး ထိခိုက်နစ်နာခဲ့ရသဖြင့် ယခု ထိပ်သီး အစည်းအဝေး၌ ဦးစားပေး ဆွေးနွေးစရာမှာ စားနပ်ရိက္ခာနှင့် စွမ်းအင်ဖူလုံရေးတို့အဖြစ် အသွင်ပြောင်း လာစေခဲ့သည်။

တစ်ချိန်တည်းမှာပင် ဥရောပနှင့်အာရှတို့ရှိ အမေရိကန်နှင့်၎င်း၏ မဟာမိတ်များသည် တန်ခိုးဩဇာကြီးထွားလာ သော တရုတ်ကို ပိုမိုဆန့်ကျင်ရန် ဖြစ်လာခဲ့သည်။ ထွန်းသစ်စ G-20 စီးပွားရေး နိုင်ငံများဖြစ်ကြသည့် အိန္ဒိယ၊ ဘရာဇီးနှင့် အိမ်ရှင်အင်ဒိုနီးရှားတို့မှာ အင်အားကြီး နိုင်ငံအချင်းချင်း အားပြိုင်မှုအကြား ကျပ်တည်းကျဉ်းမြောင်း သော လမ်းကြောင်းကို လျှောက်လှမ်းနေရသည်။

အင်ဒိုနီးရှားသမ္မတ ဂျိုကိုဝီဒိုဒိုက ယူကရိန်းစစ်ပွဲနှင့်ပတ်သက်၍ G-20 အုပ်စုဝင် အချင်းချင်း သဘောထား ကွဲလွဲ နေမှုများကို စေ့စပ်ပေါင်းကူးပေးရန် ကြိုးစားခဲ့သဖြင့် ၎င်းကို ပြီးခဲ့သည့် နွေရာသီ၌ ယူကရိန်းသို့ ရုရှားကျူးကျော် ပြီးနောက် ကမ္ဘာ့အရေး ဝင်ရောက်စေ့စပ်ဖျန်ဖြေရန် ကြိုးစားသည့် ပထမဆုံး အာရှခေါင်းဆောင်အဖြစ် သတ်မှတ် ကြသည်။

Source: AP