CNI International News

ဂျိုဟန်နက်စဘတ်ချ်၊ သြဂုတ် ၂၃

တောင်အာဖရိကနိုင်ငံ ဂျိုဟန်နက်စဘတ်ချ်မြို့တွင် ပြုလုပ်သည့် BRICS ညီလာခံကို အဖွဲ့ဝင်နိုင်ငံများမှ ခေါင်းဆောင်များ တက်ရောက်ခဲ့ကြသော်လည်း ရုရှားသမ္မတ ဗလာဒီမာပူတင် (Vladimir Putin) သည် တက်ရောက်လာခဲ့ခြင်း မရှိကြောင်း အေပီမှ ဖော်ပြခဲ့သည်။

ဘရာဇီးလ်၊ ရုရှား၊ အိန္ဒိယ၊ တရုတ်နှင့် တောင်အာဖရိက တို့ပါဝင်သည့်  BRICS ညီလာခံသည် Covid-19 ကပ်ရောဂါ ကာလနောက်ပိုင်း ပထမဆုံးအကြိမ်အဖြစ် လူကိုယ်တိုင် တက်ရောက်သည့် အစည်းအဝေးကို ပြုလုပ်ခဲ့ခြင်းဖြစ်ပြီး သြဂုတ် ၂၂ ရက်မှစတင်ကာ သုံးရက်ကြာ ပြုလုပ်မည်ဖြစ်သည်။

ထိုညီလာခံကို တရုတ်သမ္မတ ရှီကျင့်ဖျင် (Xi Jinping) ၊ ဘရာဇီးလ်သမ္မတ လူလာ ဒါဆေးလ်ဗား (Luiz Inacio Lula da Silva) ၊အိန္ဒိယဝန်ကြီးချုပ် မိုဒီ (Modi) နှင့် အိမ်ရှင်အဖြစ် လက်ခံကျင်းပသည့် တောင်အာဖရိကသမ္မတ ဆိုင်ရေး ရာမာဖိုဆာ (Cyril Ramaphosa) တို့ တက်ရောက်မည် ဖြစ်သော်လည်း ရုရှားသမ္မတ ပူတင်သည် တက်ရောက်ခဲ့ခြင်း မရှိပေ။

ရှီကျင့်ဖျင်နဲ့ တောင်အာဖရိကသမ္မတ တွေ့ဆုံစဉ်

အဘယ်ကြောင့်ဆိုသော် ယူကရိန်းစစ်ပွဲအတွင်း ယူကရိန်း ကလေးငယ်များကို နယ်နှင်မှုစွဲချက်ဖြင့် နိုင်ငံတကာ ရာဇဝတ်မှု ခုံရုံး (ICC) က ပူတင်ကို ဖမ်းဝရမ်း ထုတ်ခဲ့သောကြောင့် ပူတင်၏ တောင်အာဖရိက ခရီးစဉ်သည် အခြေအနေကို ရှုတ်ထွေးစေနိုင်သဖြင့် ညီလာခံကို မတက်ရောက်ခဲ့ခြင်း ဖြစ်သည်။

သြဂုတ် ၂၃ ရက်တွင် BRICS ခေါင်းဆောင်များသည် အဓိကဦးစားပေး အကြောင်းအရာများကို ဆွေးနွေးသွား မည်ဖြစ်ပြီး ဆော်ဒီအာရေဗျ၊ အီရန်နှင့် ယူအေအီး အပါအဝင် နိုင်ငံပေါင်း ၂၀ ကျော်က BRICS အဖွဲ့အတွင်း ဝင်ရောက်ရန် လျှောက်ထားခဲ့ကြပြီးဖြစ်သည်ဟု တောင်အာဖရိက အရာရှိများက ပြောသည်။

BRICS အဖွဲ့ဝင်နိုင်ငံများသည် အဖွဲ့ဝင်ဖြစ်လိုသည့် နိုင်ငံများအတွက် လိုအပ်သည့် စံသတ်မှတ်ချက်များကို ဆွေးနွေးမည်ဖြစ်ပြီး အနောက်အုပ်စုနှင့် ဆက်ဆံရေး တင်းမာနေသည့် ရုရှားနှင့် တရုတ်ကမူ BRICS အဖွဲ့ကို အင်အားတိုးချဲ့ရန် အဖွဲ့ဝင်နိုင်ငံသစ်များကို ပါဝင်စေရန် ဆန္ဒရှိနေကြသည်။

BRICS ညီလာခံအတွက် ပြင်ဆင်ထားစဉ်

တောင်အာဖရိက ကုန်သွယ်ရေးနှင့် စက်မှုဝန်ကြီး အီဘရာဟင် ပက်တယ် (Ebrahim Patel) က တရားဝင် ဖွင့်လှည့်ခဲ့သည့် BRICS ညီလာခံဖွင့်ပွဲတွင် အဖွဲ့ဝင်နိုင်ငံများမှ ကိုယ်စားလှယ် ၁၂၀၀ နှင့် အခြား ဖွံ့ဖြိုးဆဲ နိုင်ငံများမှ ကိုယ်စားလှယ်များကို ကြိုဆိုကြောင်း ကြေညာခဲ့သည်။ 

သုံးရက်ကြာပြုလုပ်မည့် BRICS ညီလာခံတွင် နိုင်ငံ့ ခေါင်းဆောင်ပေါင်း ၄၀ ကျော် တက်ရောက်လိမ့်မည်ဟု မျှော်လင့်ကြောင်း တောင်အာဖရိကသမ္မတ ရာမာဖိုဆာက ပြောကြားခဲ့သည်။

ထို့ပြင် BRICS ညီလာခံကို ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ် (Antonio Guterres) လည်း တက်ရောက်ဖွယ်ရှိသည်။

ရုရှားနိုင်ငံသည် BRICS ညီလာခံသို့ နိုင်ငံခြားရေးဝန်ကြီး ဆာဂျေ လက်ဗရော့ဗ် (Sergey Lavrov) ကို ရုရှား ကိုယ်စားလှယ်အဖြစ် စေလွှတ်ခဲ့ပြီး သမ္မတ ပူတင်သည်လည်း ထိုညီလာခံတွင် ဗွီဒီယိုဆက်သွယ်မှုမှ တစ်ဆင့် မိန့်ခွန်း ပြောကြားသွားမည်ဟု ကရင်မလင်နန်းတော်က ထုတ်ပြန်ခဲ့သည်။

Source: အေပီ

CNI International News

ဖနွန်ပင်၊ သြဂုတ် ၂၃

ကမ္ဘောဒီးယားလွှတ်တော်သည် သြဂုတ် ၂၂ ရက်က ဝန်ကြီးချုပ် ဟွန်ဆန် (Hun Sen) ၏ သားအကြီးဆုံးဖြစ်သည့် ဟွန်မာနက် (Hun Manet) ကို ဝန်ကြီးချုပ်သစ်အဖြစ် ရွေးကောက်တင်မြောက်ခဲ့သည်ဟု ဘန်ကောက်ပို့စ်မှ ဖော်ပြခဲ့သည်။ 

ဟွန်ဆန်၏ ကမ္ဘောဒီးယား ပြည်သူ့ပါတီ (CPP)သည် ဇူလိုင်လက ပြုလုပ်ခဲ့သည့် ရွေးကောက်ပွဲတွင် အောက်လွှတ်တော် နေရာ ၅ နေရာမှလွဲပြီး ကျန်သည့်နေရာ အားလုံးကို အနိုင်ရရှိခဲ့သည်။ 

အဆိုပါ ရွေးကောက်ပွဲတွင် အဓိက အတိုက်အခံပါတီကို ဝင်ရောက်ယှဉ်ပြိုင်ခွင့် ပိတ်ပင်ခဲ့သဖြင့် နိုင်ငံတကာ၏ ဝေဖန်မှုကို ခံခဲ့ရသည်။

လွှတ်တော်အမတ် တစ်ဦးဖြစ်သူ အသက် ၄၅ နှစ်အရွယ် ဟွန်မာနက်သည် ဖနွန်ပင်မြို့တော်ရှိ အမျိုးသား လွှတ်တော်တွင် ဝန်ကြီးချုပ်အဖြစ် တစ်ညီတစ်ညွတ်တည်း မဲပေး ရွေးကောက်တင်မြှောက် ခံခဲ့ရသည်။

ကမ္ဘောဒီးယား လွှတ်တော်မှာ ဟွန်မာနက် မိန့်ခွန်းပြောနေစဉ်

မဲခွဲဆုံးဖြတ်မှုအပြီးတွင် ဟွန်မာနက်က "ဒီနေ့ဟာ ကမ္ဘောဒီးယားအတွက် သမိုင်းဝင်နေ့ ဖြစ်ပါတယ်"ဟု လွှတ်တော်အမတ်များကို ပြောကြားခဲ့သည်။

ဇူလိုင်လ ကျင်းပခဲ့သော ရွေးကောက်ပွဲအပြီး ရက်အနည်းငယ် အကြာတွင် ကမ္ဘာ့သက်တမ်း အရှည်ဆုံး ခေါင်းဆောင်တစ်ဦးဖြစ်သည့် ဟွန်ဆန်က သူသည် ရာထူးမှ နုတ်ထွက်ကြောင်းနှင့် သားဖြစ်သူ ဟွန်မာနက်ကို အာဏာလွှဲပြောင်းပေးမည်ဖြစ်ကြောင်း ကြေညာခဲ့သည်။

ကမ္ဘောဒီးယားဘုရင်သည် သြဂုတ် ၂၁ ရက်တွင် လွှတ်တော်ကို အခမ်းအနားဖြင့် ဖွင့်လှစ်ခဲ့ပြီးနောက် သြဂုတ် ၂၂ ရက်တွင် လွှတ်တော်အမတ်များက ကြယ်လေးပွင့်အဆင့်ရှိ ဗိုလ်ချုပ်ကြီး ဟွန်မာနက်ကို နိုင်ငံ့ခေါင်းဆောင်သစ် အဖြစ် တင်မြှောက်ခဲ့ခြင်း ဖြစ်သည်။

ဟွန်မာနက်က ၎င်း၏ အစိုးရသည် နိုင်ငံ့စီးပွားရေးကို မြှင့်တင်ပြီး ချမ်းသာကြွယ်ဝသည့်် နိုင်ငံအဖြစ် ထူထောင်ကာ လူနေမှု အဆင့်အတန်းများကို တိုးမြှင့်ပြီး သဘာဝပတ်ဝန်းကျင်အရေးကို လုပ်ဆောင်သွားမည်ဟု ပြောကြားခဲ့ သည်။

ဘုရင်က ဟွန်မာနက်ကို အသိအမှတ်ပြုစဉ်

ဟွန်မာနက်၏ အစိုးရအဖွဲ့ထဲတွင် ၎င်း၏ ဆွေမျိုးများ ပါဝင်နေပြီး ဟွန်ဆန်နှင့် ရင်းနှီးသည့် မဟာမိတ်များ၏ သား၊သမီးများသည်လည်း အစိုးရအဖွဲ့၏ ထိပ်သီးနေရာများကို ရရှိခဲ့သည်။

ဟွန်ဆန်၏ သားအငယ်ဆုံးဖြစ်သူ ဟွန် မန်နီ (Hun Many) သည် လူမှုဖူလုံရေးဝန်ကြီး ဖြစ်လာခဲ့ပြီး၊ ဟွန်ဆန်၏ တူဖြစ်သည့် လက်ရှိ သြဇာကြီးမားသည့် ရဲတပ်ဖွဲ့ အကြီးအကဲဖြစ်သူ နက် ဆာဗိုအွန် (Neth Savoeun) သည် ဒုတိယဝန်ကြီးချုပ် ဖြစ်လာမည်ဖြစ်သည်။

လက်ရှိ ပြည်ထဲရေးနှင့် ကာကွယ်ရေးဝန်ကြီးများ၏ သားများသည်လည်း ၎င်းတို့ ဖခင်များ၏ ရာထူးနေရာများကို ရရှိမည်ဟု အေအက်ဖ်ပီ သတင်းဌာနက မြင်တွေ့ခဲ့ရသည့် အစိုးရအဖွဲ့ဝင် မူကြမ်းစာရင်းအရ သိရသည်။

၁၉၈၅ ခုနှစ်ကတည်းက အာဏာရရှိခဲ့သည့် ဟွန်ဆန်သည် ပြည်တွင်းစစ်ကြောင့် မွဲတေခဲ့သည့် ကမ္ဘောဒီးယား နိုင်ငံကို တိုးတက်စေရန် အဆင့်မြှင့်တင် မွန်းမံမှုများ ပြုလုပ်ခဲ့သော်လည်း အဂတိလိုက်စားမှုများ၊ နိုင်ငံရေး ပြိုင်ဘက်များအပေါ် ဖိနှိပ်မှုများကြောင့် နိုင်ငံတကာ၏ ဝေဖန်ရှုတ်ချမှုများကို ရင်ဆိုင်ခဲ့ရသည်။

Source: ဘန်ကောက်ပို့စ်

CNI International News

ဘန်ကောက်၊ သြဂုတ် ၂၃

ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) ကို တရားရုံးချုပ်က သြဂုတ် ၂၂ ရက်တွင် ထောင်ဒဏ် ၈ နှစ် ချမှတ်ခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

သက်ဆင်သည် ပြည်ပြေးဘဝဖြင့် ပြည်ပတွင် ၁၅ နှစ်ကြာ နေထိုင်ခဲ့ပြီးနောက် သြဂုတ် ၂၂ ရက်တွင် ထိုင်းသို့ ပြန်လည် ရောက်ရှိချိန်တွင် တရားရုံးသို့ ဆင့်ခေါ်ဆောင်ခံခဲ့ရသည်။ ထို့နောက် တရားရုံးက ထောင်ဒဏ်ချမှတ် ခဲ့ခြင်း ဖြစ်သည်။

အသက် ၇၄ နှစ်အရွယ် သက်ဆင်သည် Bangkok Remand အကျဉ်းထောင်သို့ ရောက်ရှိခဲ့ပြီး အသက်အရွယ် ကြီးရင့်မှုနှင့် ကျန်းမာရေး အခြေအနေကြောင့် ထောင်တွင်းဆေးရုံတွင် ဆေးဝါးကုသမှု ခံယူခဲ့ရသည်ဟု တာဝန် ရှိသူများက အတည်ပြုခဲ့သည်။

သက်ဆင်ကို ထောက်ခံသူများ နှုတ်ဆက်နေကြစဉ်

သက်ဆင်သည် အမှုနှစ်ခုအတွက် ထောင်ဒဏ် ၃ နှစ်နှင့် ၂ နှစ်စီ ချမှတ်ခံခဲ့ရပြီး ယင်းထောင်ဒဏ်များကို တစ်ပြိုင် တည်း ကျခံရမည်ဖြစ်ကာ နောက်ထပ်အမှုအတွက် သီးခြားထောင်ဒဏ် ၅ နှစ် ချမှတ်ခံခဲ့ရခြင်း ဖြစ်သည်။

သက်ဆင်သည် ဒွန်မောင်းလေဆိပ်သို့ နံနက် ၁၀ နာရီတွင် ရောက်ရှိပြီးနောက် မကြာမီ အချိန်အတွင်းမှာပင် တရားရုံးချုပ်သို့ ခေါ်ဆောင်ခြင်းခံခဲ့ရသည်။

သက်ဆင်ကို ထောက်ခံသည့် ရှပ်နီများက တရားရုံးသို့သွားမည့် လမ်းတစ်လျှောက်တွင် စုရုံးကြိုဆိုခဲ့ကြသည်။

သက်ဆင် ရင်ဆိုင်ရသည့် ပထမအမှုမှာ ထိုင်း၏ ပို့ကုန်-သွင်းကုန် ဘဏ် (Exim) မှ ချေးငွေကိစ္စတွင် ကိုယ်ကျိုးစီး ပွား ရယူမှုဖြစ်ပြီး ထိုအမှုဖြင့် ထောင်ဒဏ် ၃ နှစ် ချမှတ်ခံခဲ့ရသည်။

ထိုင်းဘုရင်နဲ့မိဖုရားကို အရိုအသေပေးနေတဲ့သက်ဆင်

ထိုအမှုတွင် သက်ဆင်သည် ၂၀၀၄ ခုနှစ်က မြန်မာအစိုးရအား ၎င်း၏ မိသားစုပိုင်ဆိုင်သည့် Shin Satellite Plc ကုမ္ပဏီ၏ ထုတ်ကုန်များကို ဝယ်ယူနိုင်ရန် ဘတ်ငွေ ၄ ဘီလျံအား သတ်မှတ်ထားသည့် အတိုးနှုန်းအောက် လျှော့ချကာ ချေးငွေထုတ်ပေးရန် နိုင်ငံပိုင်ဘဏ်ကို အမိန့်ပေးခဲ့မှုလည်း ပါဝင်သည်ဟု တရားရုံးက ထုတ်ပြန်ခဲ့ သည်။

သက်ဆင်သည် ထိုအမှုအတွက် မျက်ကွယ်ပြစ်ဒဏ်အဖြစ် ထောင်ဒဏ် ၃ နှစ် ချမှတ်ခံခဲ့ရခြင်း ဖြစ်သည်။ 

ဒုတိယအမှုမှာ တရားမဝင် နှစ်လုံးထီ၊ သုံးလုံးထီ လုပ်ငန်းများကို ၂၀၀၃ ခုနှစ်မှ ၂၀၀၆ ခုနှစ်အကြား ပြုလုပ်ခဲ့မှုဖြင့် ထောင်ဒဏ် ၂ နှစ် ချမှတ်ခံခဲ့ရခြင်း ဖြစ်သည်။ 

တရားရုံးကမူ ပထမအမှုနှင့် ဒုတိယအမှုအတွက် ထောင်ဒဏ်များကို သီးခြားစီ မဟုတ်ဘဲ တစ်ပြိုင်နက်တည်း ကျခံရန် အမိန့် ထုတ်ပြန်ခဲ့ခြင်းဖြစ်သဖြင့် သက်ဆင်သည် အမှုနှစ်ခုအတွက် ထောင်ဒဏ် ၅ နှစ်မဟုတ်ဘဲ ၃ နှစ် သာ ကျခံရမည်ဖြစ်သည်။

တတိယအမှုမှာ ဝန်ကြီးချုပ်အဖြစ် တာဝန်ထမ်းဆောင်ခဲ့သည့် ၂၀၀၁ ခုနှစ်မှ ၂၀၀၆ ခုနှစ်အတွင်း တယ်လီဖုန်း ဆက်သွယ်ရေးဆိုင်ရာ လိုက်လျော အလျှော့ပေးမှုဖြင့် ကိုယ်ကျိုးစီးပွားရယူမှုကြောင့် သီးခြားထောင်ဒဏ် ၅ နှစ်ကို ချမှတ်ခံခဲ့ခြင်း ဖြစ်သည်။

Source: ဘန်ကောက်ပို့စ်

CNI International News

၂၀၂၃ ခုနှစ်၊ သြဂုတ် ၂၂

ထိုင်းနိုင်ငံ၏ ၃၀ ဦးမြောက် ဝန်ကြီးချုပ်အဖြစ် ဖြူးထိုင်းပါတီ၏ ကိုယ်စားလှယ် မစ္စတာ ဆရီသာ သာဗင်စင်ကို ထိုင်းလွှတ်တော်မှာ ရွေးချယ် တင်မြောက်ခဲ့ပါသည်။

၂၀၂၃ ခုနှစ်၊ သြဂုတ် ၂၂ ရက်တွင် ထိုင်းနိုင်ငံ၏ အထက်နှင့်အောက် လွှတ်တော် ၂ ရပ်ပေါင်း၍ ဝန်ကြီးချုပ် ရွေးချယ် တင်မြောက်ခြင်းကို ကျင်းပခဲ့ရာ လိုအပ်သည့် ထောက်ခံမဲ ၃၇၅ ဦး ရရှိခဲ့ခြင်းကြောင့် ဝန်ကြီးချုပ် အဖြစ် အတည်ပြုခဲ့ခြင်း ဖြစ်သည်။

CNI International News

မော်စကို၊ သြဂုတ် ၂၂

ဘရာဇီးလ်၊ ရုရှား၊ အိန္ဒိယ၊ တရုတ်နှင့် တောင်အာဖရိကနိုင်ငံတို့ ဖွဲ့စည်းထားသည့် (BRICS) အဖွဲ့သည် နိုင်ငံပေါင်း စုံ ပူးပေါင်းပါဝင်သည့် ကမ္ဘာ့အခင်းအကျင်းထက်ပိုသည့် အခင်းအကျင်းအသစ်တစ်ခု ဖြစ်လာစေရန် လုပ်ငန်းစဉ်ကို ချဲ့ထွင်နေသည်ဟု ရုရှားနိုင်ငံခြားရေးဝန်ကြီး ဆာဂျေ လက်ဗရော့ဗ်က (Sergey Lavrov) က ပြောကြားခဲ့သည်ဟု တာ့စ်သတင်းဌာနက ဖော်ပြခဲ့သည်။ 

"ကျနော်တို့ဟာ BRICS အဖွဲ့နဲ့ ကမ္ဘာ့နိုင်ငံအများစုကို ကိုယ်စားပြုတဲ့ နိုင်ငံတွေအကြား ထိတွေ့ဆက်ဆံမှုတွေကို ပိုမိုတိုးတက်စေဖို့အတွက် စဉ်ဆက်မပြတ် ဆောင်ရွက်နေပါတယ်။ အထူးသဖြင့် တောင်အာဖရိကက BIRCS အလှည့်ကျ ဥက္ကဋ္ဌ နေရာကို ရယူထားချိန်မှာ အာဖရိကနိုင်ငံတွေနဲ့ ပူးပေါင်းဆောင်ရွက်မှုတွေကို မြှင့်တင်ဖို့ဟာ ကျနော်တို့ရဲ့ ဦးစားပေးလုပ်ဆောင်မယ့် အရာတွေထဲမှာ တစ်ခု အပါအဝင် ဖြစ်ပါတယ်"ဟု လက်ဗရော့ဗ်က တောင်အာဖရိက၏ Ubuntu မဂ္ဂဇင်းမှ ဖော်ပြခဲ့သော ဆောင်းပါးတစ်ပုဒ်တွင် ပြောကြားခဲ့သည်။

 BRICS ခေါင်းဆောင်များကို တွေ့ရစဉ်

"ကျနော်တို့ အဖွဲ့ထဲမှာ ကမ္ဘာတစ်ဝန်းက စိတ်သဘောထားခြင်း တူညီတဲ့ နိုင်ငံတွေ အများကြီးရှိပါတယ်။ BRICS ဟာ နိုင်ငံပေါင်းစုံပါဝင်တဲ့ ကမ္ဘာ့အခင်းအကျင်း တစ်ခုထက်ပိုတဲ့ ဒေါက်တိုင်အသစ်တစ်ခု ဖြစ်လာစေဖို့နဲ့ ကမ္ဘာ့ တောင်ခြမ်း၊ ကမ္ဘာ့အရှေ့ခြမ်း စည်းလုံးညီညွတ်မှုကို ပိုမိုခိုင်မာစေနိုင်တဲ့ အဖွဲ့တစ်ခုအဖြစ် ရှုမြင်ခံထားရပါတယ်။ အဖွဲ့ဝင် ၅ နိုင်ငံစလုံးဟာ ဒီအခြေအနေကို တုံ့ပြန်လုပ်ဆောင်ဖို့ အဆင်သင့်ပါပဲ။ အဲဒါကြောင့် အဖွဲ့ကို တိုးချဲ့ဖို့ လုပ်ငန်းစဉ်ကို စတင်ခဲ့တာ ဖြစ်ပါတယ်"ဟု လက်ဗရော့ဗ်က ပြောသည်။

ထို့ပြင် တောင်အာဖရိကနိုင်ငံက BRICS ဥက္ကဋ္ဌ နေရာကို ရယူထားချိန်တွင် မိမိတို့၏ လုပ်ငန်းစဉ်သည် အရှိန် အဟုန် ရလာခဲ့ပြီး ယခုကျင်းပမည့် ၁၅ ကြိမ်မြောက် BRICS ညီလာခံသည် မဟာဗျူဟာမြောက် မိတ်ဖက် ဆက်ဆံရေးအတွက် နောက်ထပ် သမိုင်းမှတ်ကျောက် တစ်ခုဖြစ်ပြီး လာမည့်နှစ်များအတွက် အဓိက လုပ်ဆောင် ရမည့် ဦးစားပေးကိစ္စများကို စဉ်းစားဆုံးဖြတ် နိုင်လိမ့်မည်ဟု ၎င်းက ပြောသည်

BRICS ခေါင်းဆောင်များကို တွေ့ရစဉ်

ရုရှားအနေဖြင့် အလှည့်ကျ ဥက္ကဋ္ဌနေရာကို ရယူထားသည့် တောင်အာဖရိကနိုင်ငံ၏ အားထုတ်ကြိုးပမ်းမှုများကို အလွန် ကျေးဇူးတင်ကြောင်းနှင့် တောင်အာဖရိကသည် BRICS အဖွဲ့နှင့် အခြားနိုင်ငံများအကြား ထိတွေ့ ဆက်ဆံ မှုများကို ပိုမိုတိုးမြှင့်ရန် ကြိုးပမ်း လုပ်ဆောင်နေကြောင်းလည်း ရုရှားနိုင်ငံခြားရေးဝန်ကြီးက ပြောသည်။

BRICS ညီလာခံကို တောင်အာဖရိကနိုင်ငံ ဂျိုဟန်နက်စဘတ်ချ်မြို့တွင် သြဂုတ် ၂၂ ရက်မှ ၂၄ ရက်အထိ ကျင်းပ သွားမည်ဖြစ်သည်။

တောင်အာဖရိက၏ နိုင်ငံတကာဆက်ဆံရေးနှင့် ပူးပေါင်းဆောင်ရွက်ရေးဝန်ကြီး နာလီဒီ ပန်ဒေါ (Naledi Pandor) ကမူ BRICS ခေါင်းဆောင်များသည် အဖွဲ့ဝင်အင်အား ချဲ့ထွင်ရေးကို ဆွေးနွေးသွားမည်ဟု ပြောကြား ခဲ့သည်။ 

ထို့ပြင် တောင်အာဖရိကသည် BRICS ညီလာခံကို တက်ရောက်ရန် နိုင်ငံပေါင်း ၆၀ ကျော်ကို ဖိတ်ကြား ထားခဲ့သည်ဟုလည်း သံတမန် သတင်းရင်းမြစ်တစ်ခုက တာ့စ်သတင်းဌာနသို့ ပြောကြားခဲ့သည်။ 

အစောပိုင်း ထွက်ပေါ်ခဲ့သည့် သတင်းများတွင်လည်း နိုင်ငံပေါင်း ၆၀ ကျော်သည် BRICS အဖွဲ့သို့ဝင်ရန် တရားဝင် လျှောက်ထားလွှာများ တင်သွင်းခဲ့ကြောင်း ဖော်ပြခဲ့သည်။

Source: တာ့စ်

CNI International News

ဘန်ကောက်၊ သြဂုတ် ၂၂

ဖြူးထိုင်းပါတီသည် ၎င်းတို့ ဦးဆောင်ဖွဲ့စည်းမည့် ညွန့်ပေါင်းအစိုးရတွင် ပါဝင်မည့် နိုင်ငံရေးပါတီ ၁၁ ပါတီကို သြဂုတ် ၂၁ ရက်မွန်းလွဲပိုင်းက ကြေညာခဲ့ပြီး စစ်တပ်နှင့် ဆက်နွှယ်သည့် ပါတီ ၂ ခု ပါဝင်ခဲ့သည်ဟု ဘန်ကောက်ပို့စ်မှ ဖော်ပြခဲ့သည်။ 

ဖြူးထိုင်းပါတီ ဦးဆောင်သည့် ၁၁ ပါတီ ညွန့်ပေါင်းအဖွဲ့သည် အောက်လွှတ်တော်၏ နေရာ ၃၁၄ နေရာကို ရရှိထားပြီး ဝန်ကြီးချုပ် ကိုယ်စားလှယ်လောင်းအဖြစ် ဆရီသာ သာဗင်စင်(Sretha Thavisin) ကို အဆိုပြု ကြောင်းလည်း ကြေညာခဲ့သည်။

 ဖြူးထိုင်းပါတီရဲ့ ၀န်ကြီးချုပ်လောင်း Sretha Thavisin ကိုတွေ့ရစဉ်

၂၀၂၃ ခုနှစ်၊ မေလ ၁၄ ရက်က ရွေးကောက်ပွဲတွင် အမတ်နေရာ ၁၄၁ နေရာဖြင့် ဒုတိယနေရာ အများဆုံးအနိုင် ရရှိခဲ့သည့် ဖြူးထိုင်းပါတီသည် ၁၁ ပါတီ ညွန့်ပေါင်းအဖွဲ့တွင် နေရာအများဆုံး ရရှိထားသည့် ပါတီဖြစ်သည်။

ညွန့်ပေါင်းအဖွဲ့အတွင်း ပါဝင်မည့် ပါတီများအနက် နေရာ ၇၁ နေရာရရှိခဲ့သည့် Bhumjaithai ပါတီ၊ နေရာ ၄၀ ရရှိခဲ့သည့် Palang Pracharath (PPRP) နှင့် နေရာ ၃၆ နေရာ ရရှိခဲ့သည့် United Thai Nation (UTN) ပါတီတို့ ပါဝင်သည်။

ထို့ပြင် နေရာ ၁၀ နေရာ ရရှိခဲ့သည့် Chartthaipattana ပါတီ၊ နေရာ ၉ နေရာရရှိခဲ့သည့် Prachachat ပါတီ၊ နေရာ ၂ နေရာစီရရှိခဲ့သည့် Pure Thai Rumphlang ပါတီနှင့် Chart Pattana Kla ပါတီ၊ နေရာ ၁ နေရာစီ ရရှိခဲ့သည့် Seri Ruam Thai ပါတီ၊ Plunge Sungkom Mai ပါတီ နှင့် Thai Counties ပါတီတို့ ပါဝင်ခဲ့သည်။

ဖြူးထိုင်းပါတီအနေနှင့် ဝန်ကြီးချုပ် ရာထူးနေရာ အပါအဝင် ညွန့်ပေါင်းအစိုးရအတွင်း ဝန်ကြီးနေရာ ၈ နေရာနှင့် ဒုတိယဝန်ကြီးနေရာ ၉ နေရာကို ရရှိလိမ့်မည်ဟု ဖြူးထိုင်းပါတီခေါင်းဆောင် ချိုနန် သီရိကော (Cholnan Srikaew)က လွှတ်တော်တွင် ပြုလုပ်ခဲ့သည့် သတင်းစာ ရှင်းလင်းပွဲတွင် ပြောကြားခဲ့သည်။

ထိုင်းအိမ်စောင့်အစိုးရရဲ့ ဒုတိယဝန်ကြီးချုပ် ပရာဝစ် ဝေါင်ဆူဝမ်နဲ့ ဝန်ကြီးချုပ် ပရာယွတ် ချန်အိုချာကို တွေ့ရစဉ်

Bhumjaithai ပါတီသည် ဝန်ကြီးနေရာ ၄ နေရာနှင့် ဒုတိယဝန်ကြီးနေရာ ၄ နေရာ၊ PPRP ပါတီနှင့် UTN ပါတီတို့က ဝန်ကြီးနေရာနှင့် ဒုတိယဝန်ကြီးနေရာ ၂ နေရာစီ ရရှိမည်ဖြစ်ပြီး Chartthaipattana ပါတီနှင့် Prachachat ပါတီတို့က ဝန်ကြီးနေရာ ၁ နေရာစီ ရရှိလိမ့်မည်ဟု ချိုနန်က ပြောသည်။

PPRP ပါတီ၏ ခေါင်းဆောင်သည် အိမ်စောင့်အစိုးရအဖွဲ့၏ ဒုတိယဝန်ကြီးချုပ် ပရာဝစ် ဝေါင်ဆူဝမ် (Prawit Wongsuwon) ဖြစ်ပြီး UTN ပါတီသည် ဝန်ကြီးချုပ် ပရာယွတ် ချန်အိုချာ (Prayut Chan-o-cha) ၏ ပါတီ ဖြစ်သည်။

ညွန့်ပေါင်းအစိုးရအဖွဲ့အတွင်း စစ်တပ်နှင့် ဆက်နွှယ်သည့် ပါတီ ၂ ခု ပါဝင်နေခြင်းကြောင့် ဝေဖန်မှုများနှင့် ရင်ဆိုင်နေရသည်ဟု ဖြူးထိုင်းပါတီ ခေါင်းဆောင် ချိုနန်က ဝန်ခံခဲ့သော်လည်း ဖြူးထိုင်းအနေနှင့် ပါတီ အင်အားစုများကို ပူးပေါင်းကာ ထိရောက်မှုရှိသည့် လုပ်ငန်းစဉ်များကို လုပ်ဆောင်သွားမည်ဟု ပြောကြားခဲ့သည်။

Source: ဘန်ကောက်ပို့စ်

CNI International News

၂၀၂၃ ခုနှစ်၊ သြဂုတ် ၂၂

ပြည်ပြေး ဝန်ကြီးချုပ်ဟောင်း သက်ဆင်သည် သြဂုတ် ၂၂ ရက်နေ့ နံနက်ကိုင်းက ထိုင်းနိုင်ငံ၊ ဘန်ကောက်မြို့ရှိ ဒွန်မွေနက် လေဆိပ်သို့ ရောက်ရှိလာခဲ့သည်။
ထို့နောက် လေဆိပ်ဂိတ်တွင် ရှိသည့် ထိုင်းဘုရင်နှင့်မိဖုရား၏ တော်ဝင်ပုံတူကို အလေးပြုခဲ့သည်။

သက်ဆင်သည် ၂၀၀၆ ခုနှစ်က ထိုင်းစစ်တပ်၏ အာဏာသိမ်းခြင်းကို ခံခဲ့ရပြီးနောက် ပြည်ပသို့ ထွက်ပြေး တိမ်းရှောင်နေသည်မှာ ၁၇ နှစ်ကြာခဲ့ပြီဖြစ်သည်။

ထို့နောက် သမီးဖြစ်သူ ပါဝင်သည့် ဖြူးထိုင်းပါတီက ၂၀၂၃ ခုနှစ်၊ မေလ ၁၄ ရက်နေ့တွင် ကျင်းပခဲ့သော ထိုင်းရွေးကောက်ပွဲ အနိုင်ရပြီး အစိုးရသစ်ကို ဦးဆောင်ဖွဲ့စည်းမည့် အခြေအနေ ဖြစ်လာပြီးနောက် ဒူဘိုင်းက နေ ထိုင်းကို ပြန်လည် လာရောက်ခဲ့ခြင်း ဖြစ်သည်။

CNI International News

ဒူဘိုင်း၊ သြဂုတ် ၂၂ 

ဆော်ဒီအာရေဗျနိုင်ငံ၏ နယ်ခြားစောင့်တပ်ဖွဲ့များသည် ယီမင်နိုင်ငံမှတစ်ဆင့် ဆော်ဒီသို့ ဝင်ရောက်ရန် ကြိုးပမ်းနေသည့် အီသီယိုးပီးယား ရွှေ့ပြောင်းနေထိုင်သူများကို စက်သေနတ်များ၊ မော်တာကျည်များဖြင့် ပစ်ခတ်ခဲ့သဖြင့် ရာနှင့်ချီသည့် ရွှေ့ပြောင်းများ သေဆုံးဆုံးခဲ့ဖွယ်ရှိသည်ဟု လူ့အခွင့်အရေးစော့င့်ကြည့်ရေးအဖွဲ့ (Human Rights Watch- HRW) က သြဂုတ် ၂၁ ရက်တွင် အစီရင်ခံစာ ထုတ်ပြန်ခဲ့သည်။

ရွှေ့ပြောင်းများ ဝင်ရောက်သည့် လမ်းကြောင်းများတွင် ဆော်ဒီစစ်သားများ၏ တိုက်ခိုက်မှု မျက်မြင်သတင်းများနှင့် လူသေအလောင်းများ၊ လူသေများကို မြှုပ်နှံသည့် သင်္ချိုင်းနေရာများ ရိုက်ကူးထားသည့် ဓာတ်ပုံများကို ကိုးကားပြီး HRW က ပြောကြားခဲ့ခြင်း ဖြစ်သည်ဟု အေပီမှ ဖော်ပြခဲ့သည်။

ကုလသမဂ္ဂကလည်း ရွှေ့ပြောင်းများအပေါ် တိုက်ခိုက်သည့် ဖြစ်စဉ်နှင့်ပတ်သက်ပြီး ဆော်ဒီအာရေဗျကို ယခင်ကတည်းက မေးမြန်းခဲ့သလို ဆော်ဒီနှင့် ယီမင်နယ်စပ်တွင် တိုက်ခိုက်မှုများ မြင့်တက်နေမှုအပေါ်ကိုလည်း မေးခွန်း ထုတ်ခဲ့သည်။

အီသီယိုပီးယား ရွှေ့ပြောင်းများကို ဆော်ဒီက ပစ်သတ်တဲ့နေရာကို ပြသထားစဉ်

ဆော်ဒီအစိုးရ၏ အမည်မဖော်လိုသည့် ပြောရေးဆိုခွင့်ရှိသူကမူ HRW ၏ ထုတ်ပြန်ချက်သည် ယုံကြည်စိတ်ချရသည့် သတင်းရင်းမြစ်များအပေါ် အခြေခံခြင်းမရှိဘဲ အခြေအမြစ်မရှိကြောင်း ပြောကြားခဲ့သည်။

ရွှေ့ပြောင်းများကို နယ်စပ်မှဖြတ်သန်းပြီး မှောင်ခိုကူးခြင်းဖြင့် သီတင်းတစ်ပတ်လျှင် ဒေါ်လာ သောင်းချီရနေသည့် ယီမင်၏ ဟူရ်သီ (Houthi) လက်နက်ကိုင် သူပုန်များကလည်း ထိုအကြောင်းအရာနှင့်ပတ်သက်ပြီး မှတ်ချက်ပေးခဲ့ခြင်း မရှိပေ။

ဆော်ဒီတွင် အီသီယိုးပီးယား ရွှေ့ပြောင်းများ ၇၅၀,၀၀၀ ခန့်ရှိနေပြီး ၎င်းတို့အနက် ၄၅,၀၀၀ ခန့်သည် ဆော်ဒီသို့ တရားမဝင် ဝင်ရောက်ခဲ့သူများ ဖြစ်သည်ဟု နိုင်ငံတကာ ရွှေ့ပြောင်းနေထိုင်သူများဆိုင်ရာအဖွဲ့ (International Organization for Migration) ၏ ၂၀၂၂ ခုနှစ် အချက်အလက်များတွင် ဖော်ပြခဲ့သည်။

ဆော်ဒီနယ်ခြားစောင့်တပ်ကို တွေ့ရစဉ်

အီသီယိုးပီးယားနိုင်ငံမြောက်ပိုင်း တီဂရေး (Tigray) ဒေသတွင် နှစ်နှစ်ကြာ ပြည်တွင်းစစ် ဖြစ်ပွားခဲ့သဖြင့် လူပေါင်းသောင်းချီ အိုးမဲ့အိမ်မဲ့ ဖြစ်ခဲ့ရသည်။

လူငယ်အလုပ်လက်မဲ့နှုန်း မြင့်တက်နေသည့် အခြေအနေနှင့် ရင်ဆိုင်နေရသည့် ဆော်ဒီသည် အစိုးရ၏ အစီအစဉ်ဖြင့် ထောင်နှင့်ချီသည့် အီသီယိုးပီးယားရွှေ့ပြောင်းများကို နေရပ်သို့ ပြန်လည်ပို့ဆောင်ခဲ့သည်။

၂၀၂၂ ခုနှစ်၊ မတ်လမှ ၂၀၂၃ ခုနှစ်၊ ဇွန်လအကြား ဆော်ဒီနယ်စပ်ကို ဖြတ်ပြီး နိုင်ငံအတွင်း ဝင်ရောက်ရန် ကြိုးပမ်းခဲ့ သည့် အီသီယိုးပီးယားရွှေ့ပြောင်း ၃၈ ဦးနှင့် ၎င်းတို့၏ ဆွေမျိုး လေးဦး၏ ပြောကြားချက်အရ ဆော်ဒီ နယ်ခြားစောင့်တပ်ဖွဲ့များသည် ရွှေ့ပြောင်းများကို သေနတ်ဖြင့်ပစ်ခတ်ခြင်း၊ လက်နက်ကြီးများဖြင့် ပစ်ခတ်ခြင်းတို့ ပြုလုပ်ခဲ့သည်ဟု သိရကြောင်း HRW က ထုတ်ပြန်ခဲ့သည်။

Source: အေပီ

 CNI International News

၂၀၂၃ ခုနှစ်၊ သြဂုတ် ၂၂

၂၀၀၆ ခုနှစ်က ထိုင်းစစ်တပ် အာဏာသိမ်းမှုကြောင့် ထိုင်းနိုင်ငံကနေ ထွက်ပြေးတိမ်းရှောင်သွားသည့် ဝန်ကြီးချုပ်ဟောင်း သက်ဆင် ရှင်နာဝပ်သည် ၁၇ နှစ်ကြာ ပြည်ပြေးဘဝကနေ သြဂုတ် ၂၂ ရက်မှာတော့ ဒူဘိုင်းကနေ ထိုင်းကို ပြန်လာနေပြီဖြစ်ကြောင်း ညီမဖြစ်သူ ယင်လပ် ရှင်နာဝပ်က သူ၏ လူမှုကွန်ရက်မှာ ပုံနှင့်တကွ ရေးသား ဖော်ပြခဲ့သည်။

ယင်လပ် ရှင်နာဝပ်သည်လည်း လက်ရှိ ထိုင်းအိမ်စောင့်အစိုးရ၏ ဝန်ကြီးချုပ် ပရာယွတ် ချန်အိုချာ၏ ၂၀၁၄ ခုနှစ် အာဏာသိမ်းမှုကြောင့် ပြည်ပသို့ ထွက်ပြေးတိမ်းရှောင်နေရသူဖြစ်သည်။

ဒူဘိုင်းကနေ ထိုင်းကို ပြည်တော်ပြန်ရန် လေယာဉ်ပေါ်မှာ တွေ့ရသည့် သက်ဆင်

လက်ရှိ ထိုင်းနိုင်ငံတွင် ၂၀၂၃ ခုနှစ်၊ မေလ ၁၄ ရက်က ကျင်းပသည့် ရွေးကောက်ပွဲ၌ ဒုတိယ မဲအများဆုံး အနိုင်ရရှိထားသော ဖြူးထိုင်းပါတီက အစိုးရသစ်ကို ဦးဆောင်ဖွဲ့စည်းသွားမည့် အခြေအနေဖြစ်တည်လာပြီး နောက် သက်ဆင် ပြည်တော်ပြန်ရန် ခရီးစဉ် ဖြစ်လာခြင်း ဖြစ်သည်။

ဖြူးထိုင်းပါတီသည် သက်ဆင်၏ ထောက်ပံ့မှုများ ရှိနေသလို သမီးဖြစ်သူ ပေတုန်တန်လည်း ပါတီအတွင်း လူငယ် ခေါင်းဆောင် တစ်ဦးအဖြစ် ပါဝင်လျက်ရှိသည်။