CNI International News

ဘေဂျင်း၊ နိုဝင်ဘာ ၁၀

ကမ္ဘာ့ကြီး တည်ငြိမ်အေးချမ်းမှု ပျက်စီးလာခြင်းနှင့်အတူ စစ်ပွဲအတွက် ပြင်ဆင်ထားရန် တရုတ်သမ္မတ ရှီကျင့်ဖျင် က တရုတ်ပြည်သူ့လွတ်မြောက်ရေးတပ်မတော်(PLA)ကို မှာကြားခဲ့ကြောင်း ဂါးဒီးယန်းသတင်းစာက ရေးသား ဖော်ပြသည်။

ရှီကျင့်ဖျင်သည် စစ်ပွဲအတွက် ပြင်ဆင်ရာ၌ မိမိတို့စွမ်းရည်အားလုံးကို အာရုံစိုက်ထားရန် တရုတ်ပြည်သူ့လွတ် မြောက်ရေး တပ်မတော် (PLA) ကို မှာကြားခဲ့သည်ဟု တရုတ်ကွန်မြူနစ်ပါတီ၏ အာဘော်တစ်ခုကို ကိုးကား၍ ဂါးဒီးယန်းသတင်းစာက ရေးသားဖော်ပြသည်။

မကြာသေးမီက ပါတီ၏ ထိပ်ဆုံးခေါင်းဆောင် တတိယသက်တမ်းကို ရယူခဲ့သော ရှီ၏ ဓာတ်ပုံများကို နိုဝင်ဘာ ၉ ရက်ထုတ် People Daily သတင်းစာ၏ ရှေ့မျက်နှာဖုံးတွင် ဖော်ပြထားသည်။ အဆိုပါ ပုံထဲတွင် စစ်ဘက် ကွပ်ကဲ ရေးဌာနတစ်ခုသို့ ရှီရောက်ရှိစဉ် PLA တပ်မတော် ယူနီဖောင်းကို ဝတ်ဆင်ထားသည်။

စစ်ပွဲအတွက် ပြင်ဆင်သည့်အခါ စစ်ရေးလေ့ကျင့်မှုကို အားကောင်းစေရမည်ဖြစ်ကြောင်း၊ မိုးကုပ်စက်ဝိုင်းပေါ်ရှိ အန္တရာယ်များသော မုန်တိုင်းများကို ဂရုစိုက်ကြရမည်ဖြစ်ကြောင်း ရှီသည် မကြာသေးမီက ပါတီညီလာခံ (ကွန်ဂရက်)တွင် သတိပေးခဲ့သည်။

“တိုက်ခိုက်ခြင်းအတွက် ရဲဘော်တို့ရဲ့ စွမ်းရည်အားလုံးကို အာရုံစိုက်ကြစေလိုတယ်။ တိုက်ပွဲဝင်ဖို့ အားသွန်ခွန်စိုက် လုပ်ဆောင်ပြီး အနိုင်ယူဖို့ ရဲဘော်တို့ရဲ့ စွမ်းရည်တွေကို မြှင့်တင်ကြရမယ်” ဟု ၎င်းက တိုက်တွန်း မှာကြားခဲ့သည်။

Tai Wan ခေါင်းဆောင်ကိုတွေ့ရစဉ် (Reuters)

တရုတ်သည် တည်ငြိမ်သော်လည်း မသေချာ မရေရာသော လုံခြုံရေး အခြေအနေအောက်တွင် ရှိနေသဖြင့် PLA အနေဖြင့် တိုင်းပြည် အချုပ်အခြာအာဏာနှင့် အမျိုးသားလုံခြုံရေးကို ပြတ်သားစွာ ကာကွယ်သွားရမည်ဟု ၎င်းက ဆက်လက် မှာကြားခဲ့သည်။

၂၀၁၃ ခုနှစ်တွင်လည်း အလားတူ စစ်ရေးပြင်ဆင်ဖို့ အာရုံစိုက်ကြရန် PLA တပ်ကို ရှီက အမိန့်ပေးခဲ့ဖူးသည်။

သို့သော် ရှီသည် ၂၀၁၇ ခုနှစ်နှင့် မကြာသေးမီက ပြောကြားခဲ့သည့် မိန့်ခွန်းများတွင် ပိုမိုသိသာစွာ တိုက်တွန်း မှာကြားခဲ့ကြောင်း နိုင်ငံရေးလေ့လာသုံးသပ်သူများက ပြောကြားသည်။

၂၀၁၆ ခုနှစ်တွင် PLA စစ်ဘက်ကွပ်ကဲရေးဌာနသို့ သွားရောက် စစ်ဆေးစဉ်ကလည်း တိုက်ခိုက်ရေး စွမ်းရည်တွင် သစ္စာရှိရှိ၊ သတ္တိရှိရှိဖြင့် ရဲဝံ့စွန့်စားစွာဖြင့် အနိုင်ယူစွမ်း ရှိကြရန် PLA တပ်အရာရှိများကို ရှီက မှာကြားခဲ့ဖူးသည်။

“သူက အမေရိကန်နဲ့ ထိုင်ဝမ်ကို သတင်းအချက်အလက် ပေးပို့နေတာဖြစ်တယ်။ တရုတ်စစ်အင်အားဟာ အမေရိကန်နဲ့ တန်းတူမဟုတ်သေးပေမယ့် ရှီရဲ့ဆုံးဖြတ်ချက်ဟာ ဆင်ခြင်တုံတရား တွက်ချက်အပေါ်မှာ အမြဲတမ်း အခြေခံထားတာ မဟုတ်ဘူး” ဟု ဝါရှင်တန်အခြေစိုက် ဂျိမ်းစ်တောင်းဖောင်ဒေးရှင်း (Jamestown Foundation) မှ ဝါရင့်ပညာရှင်တစ်ဦးဖြစ်သူ ဝီလီလမ် (Willy Lam) က သုံးသပ်ပြခဲ့သည်။

Source: The Guardian

CNI International News

ဘန်ကောက်၊ နိုဝင်ဘာ ၉

ထိုင်းနိုင်ငံတွင် ပြီးခဲ့သည့် အောက်တိုဘာ ၁၀ ရက်မှ နိုဝင်ဘာ ၈ ရက်အထိ တနိုင်ငံလုံး အတိုင်းအတာဖြင့် စီးနင်းဖမ်းဆီးမှုများအတွင်း မူးယစ်ဆေးဝါးနှင့် တရားမဝင် လက်နက်အမှုများဖြင့် သံသယရှိသူ ၆၀,၀၀၀ ကို ဖမ်းဆီးခဲ့ကြောင်း ဘန်ကောက်ပို့စ် သတင်းအရ သိရသည်။

အဆိုပါ လုံခြုံရေးဆိုင်ရာ စစ်ဆင်ရေးကို ဘန်ကောက်မြို့တွင် ပြုလုပ်ခဲ့ခြင်းမှာ ၂၉ ကြိမ်မြောက် အာရှ-ပစိဖိတ် စီးပွားရေး ပူးပေါင်းဆောင်ရွက်ခြင်း (APEC) ထိပ်သီးအစည်းအဝေးကို တက်ရောက်လာကြမည့် နိုင်ငံတကာ ခေါင်းဆောင်များအကြား ယုံကြည်မှု တိုးမြှင့်လာစေရန် အဓိကရည်ရွယ်ကြောင်း ဘန်ကောက်ပို့စ်က ဆက်လက် ရေးသားသည်။

ထိုင်းနိုင်ငံမှာ ကျင်းပမည့် APEC ဖိုရမ်ပြင်ဆင်မှုကိုတွေ့ရစဉ်(Reuter)

ဖမ်းဆီးရမိသော စာရင်းတွင် လက်နက်၊ ပေါက်ကွဲစေတတ်သော ပစ္စည်းများနှင့် ခဲယမ်းမီးကျောက်များ အပါအဝင် မှုခင်း ၁၁,၈၁၁ မှုတွင် သံသယရှိသူ ၁၀,၄၅၀ ဦးကို ဖမ်းဆီးခဲ့ကြောင်း၊ စစ်သုံးလက်နက်ကြီး ၃၆ လက်၊ မှတ်ပုံ မတင်ထားသော သေနတ် ၅,၃၄၅ လက်၊ မှတ်ပုံတင်ထားသောသေနတ် ၉၃၆ လက်၊ ဖောက်ခွဲရေးပစ္စည်း ၄,၃၄၂ ခုနှင့် ကျည်ဆန် ၃၇ တောင့်တို့ သိမ်းဆည်းရမိကြောင်း ထိုင်းအမျိုးသားရဲချုပ် ဒမ်ရောင်ဆက်ကစ်ကီပရာပက်က နိုဝင်ဘာ ၈ ရက်တွင် ထုတ်ဖော် ပြောကြားခဲ့သည်။

ပထမဆုံး ဖမ်းဆီးရမိသည့် သံသယ တရားခံများကိုတော့ ခွင့်ပြုချက်မရှိဘဲ တရားမဝင် လက်နက် ထုတ်လုပ် ဖြန့်ဖြူးမှုဖြင့် တရားစွဲဆိုထားကြောင်း ၎င်းက ဆက်လက် ပြောကြားခဲ့သည်။

မူးယစ်အမှုပေါင်း ၄၁,၈၀၃ မှုတွင် သံသယရှိသူ ၄၃,၀၂၇ ဦးကို ဖမ်းဆီးခဲ့ပြီး စိတ်ကြွဆေးပြား ၄၉ ဒသမ ၅၈ သန်း ကို သိမ်းဆည်း ရမိကြောင်း ၎င်းက ရှင်းပြသည်။

ထို့ပြင် ရဲတပ်ဖွဲ့ အလိုရှိသည့် ရာဇဝတ်မှုဖြင့် သံသယရှိသူ ၁၀,၀၀၀ အနက် ၄,၀၀၀ ခန့်ကို နောက်ဆုံး ဖမ်းဆီးမှု တွင် ထိန်းသိမ်းနိုင်ခဲ့ကြောင်း ထိုင်း ဒုတိယရဲချုပ် ဆူရာချက်ဟက်ပန်က ပြောကြားခဲ့သည်။

ထိုင်းအာဏာပိုင်များ ဖမ်းဆီးရမိထားတဲ့ လက်နက်များနဲ့ မူးယစ်ဆေးများကိုတွေ့ရစဉ် (Thai PBS)

သံသယရှိသူ အားလုံးအတွက် မှုခင်းဆေးပညာဆိုင်ရာ သက်သေအဖြစ် တင်ပြနိုင်ရန် ၎င်းတို့၏ DNA နမူနာများ ကိုလည်း စုဆောင်းထားပြီး ဖြစ်သည်ဟု ၎င်းက ထပ်လောင်း ပြောကြားခဲ့သည်။

ထိုင်းရဲ၊ ထိုင်းစစ်တပ်နှင့် အခြားလုံခြုံရေး၊ ထောက်လှမ်းရေးဌာနများသည် ယခုနောက်ဆုံး ဒုစရိုက်နှိမ်နင်းမှု စစ်ဆင်ရေးအတွက် အမေရိကန်မှ CIA နှင့် FBI တို့ဖြင့် လက်တွဲ ဆောင်ရွက်ခဲ့ကြောင်း ထိုင်းရဲတပ်ဖွဲ့က အတည်ပြု သတင်းထုတ်ပြန်ခဲ့သည်။

အကြမ်းဖက်မှု ဆန့်ကျင်ရေး လေ့ကျင့်မှုကို နိုဝင်ဘာ ၁၁ ရက်၌ မိဖုရားကြီး သီရိခေတ် အမျိုးသားကွန်ဗင်းရှင်း စင်တာတွင် ပြုလုပ်ရန် စီစဉ်ထားခဲ့သလို APEC (အေပက်) ဖိုရမ်မတိုင်မီ လုံခြုံရေး တိုးမြှင့်ရန်အတွက် အထူး ကင်းလှည့် စောင့်ကြည့်မှုများကို ထိုင်းနိုင်ငံတဝန်း နိုဝင်ဘာ ၇ ရက်တွင် စတင်ခဲ့ကြောင်း သိရသည်။

Source: Bangkok Post

 
CNI International News

ဖနွမ်ပင်၊ နိုဝင်ဘာ ၉

ကမ္ဘောဒီးယားနိုင်ငံ၊ ဖနွမ်ပင်မြို့တော်၌ နိုဝင်ဘာ ၁၀ ရက် (မနက်ဖြန်)နေ့ စတင်ကျင်းပမည့် အာဆီယံ ခေါင်းဆောင်များ၏ ထိပ်သီးအစည်းအဝေးတွင် မြန်မာ့အရေးသည် ဦးစားပေး ဆွေးနွေးစရာဖြစ်နေကြောင်း အေပီ က ရေးသားဖော်ပြထားသည်။

မြန်မာ့တပ်မတော် အုပ်ချုပ်မှုအောက် ရောက်ရှိနေရသည့် မြန်မာနိုင်ငံသည် အာဆီယံ၏ ငြိမ်းချမ်းရေး အစီအစဉ် ကို လိုက်နာမည့် အရိပ်အယောင် မပြသခြင်းနှင့်အတူ အာဆီယံ ထိပ်သီး အစည်းအဝေးသည် မြန်မာပြည်တွင်း အကြမ်းဖက်မှု အရှိန်မြှင့်လာခြင်းအား တားဆီးပေးဖို့ စိန်ခေါ်ချက်များဖြင့် ရင်ဆိုင်ရမည်ဖြစ်ကြောင်း အေပီက ဆက်လက် ရေးသားခဲ့သည်။

ဝါရှင်တန်နှင့်ဘေဂျင်းတို့က အာရှ-ပစိဖိတ်ဒေသတွင် ဩဇာလွှမ်းမိုးရေး ပြိုင်ဆိုင်နေကြချိန်၌ အမေရိကန်သမ္မတ ဂျိုးဘိုင်ဒန်သည် ဖနွမ်ပင်မြို့၌ ကျင်းပမည့် အာဆီယံထိပ်သီး အစည်းအဝေးသို့ တက်ရောက်မည်ဖြစ်သည်။

၂၀၂၁ ခုနှစ်၊ ဧပြီ ၂၄ ရက်က ကျင်းပခဲ့သော အာဆီယံ ထိပ်သီး အစည်းအဝေးကိုတွေ့ရစဉ် 

အခြားတဖက်တွင်လည်း အင်ဒိုနီးရှားနိုင်ငံ၊ ဘာလီကျွန်းတွင် ကျင်းပမည့် စက်မှုထိပ်သီး G-20 အစည်းအဝေးကို လည်း တရုတ်သမ္မတ ရှီကျင့်ဖျင်နှင့် ရုရှားသမ္မတ ဗလာဒီမာပူတင်တို့ ပါဝင်ကြမည်ဖြစ်သည်။

ထို့နောက် ဆက်လက်ကျင်းပမည့် ထိုင်းနိုင်ငံ၊ ဘန်ကောက်မြို့၌ စီစဉ်ထားသော အာရှ-ပစိဖိတ် စီးပွားရေးဖိုရမ် (APEC) သို့လည်း ၎င်းတို့ တက်ရောက်မည်ဟု မျှော်လင့်ရသည်။

၄ ရက်ကြာ ဆွေးနွေးကြမည့် အာဆီယံထိပ်သီး အစည်းအဝေးတွင် မြန်မာ့အရေးအပြင် တောင်တရုတ် ပင်လယ် ပြင်၌ အငြင်းပွားမှုများ၊ ကပ်ရောဂါမှ ပြန်လည်ထူထောင်ရေး၊ ဒေသတွင်း ကုန်သွယ်ရေးနှင့် ရာသီဥတု ပြောင်းလဲမှု တို့ကို ဦးစားပေး ဆွေးနွေးကြမည်ဟု မှန်းဆရသည်။

အဆိုပါ အာဆီယံ ထိပ်သီးအစည်းအဝေးသို့ တရုတ်နှင့်ရုရှား နှစ်နိုင်ငံစလုံးမှ ဝန်ကြီးချုပ် လီခဲ့ချန်နှင့် နိုင်ငံခြားရေး ဝန်ကြီး ဆာဂျေလာဗရော့တို့ ဦးဆောင်သော အဆင့်မြင့် ကိုယ်စားလှယ်အဖွဲ့များ အသီးသီး စေလွှတ်ကြမည်ဟု ယူဆရသော်လည်း ရှီကျင့်ဖျင်ရော ပူတင်ပါ တက်ရောက်မည့် အလားအလာ နည်းပါးသည်။

အာဆီယံထိပ်သီး ခေါင်းဆောင်များနဲ့ အမေရိကန်သမ္မတ ဂျိုးဘိုင်ဒန်ကိုတွေ့ရစဉ်

အာဆီယံနိုင်ငံများ၌ ကြီးမားကျယ်ပြန့်စွာ ကျင်းပမည့် G-20 အစည်းအဝေးနှင့် APEC ဖိုရမ်တို့သည် ယူကရိန်းသို့ ရုရှားကျူးကျော်စစ် နောက်ပိုင်း ရုရှား၏ စွမ်းအင်ဈေးကွက် တိုးချဲ့ရှာဖွေရေး၊ ထောက်ပံ့ ပို့ဆောင်ရေး ကွင်းဆက် နှင့် စားနပ်ရိက္ခာ ဖူလုံရေးတို့နှင့်လည်း ဆက်စပ်နေသည်။

ထို့ပြင် ထိုင်ဝမ်ကျွန်း အရေးကိစ္စနှင့် ပတ်သက်၍ တရုတ်အပေါ် ပြင်းထန်စွာ ထိုးနှက်ချက်နှင့် ကိုရီးယားကျွန်း ဆွယ် တင်းမာမှုလည်း မြင့်တက်လာခြင်းတို့နှင့်လည်း ဆက်စပ်နေသည်။

အာဆီယံ အစည်းအဝေးသို့ ဘိုင်ဒန် ကိုယ်တိုင် တက်ရောက်ခြင်းအားဖြင့် အမေရိကန်၏ အကျိုးစီးပွားများကို တွန်းအားပေး လာနိုင်ဖွယ်ရှိနေပြီး ဒေသတွင်း၌ ဝါရှင်တန်၏ အသစ်တဖန် ပေးအပ်လာမည့် ကတိကဝတ်များကို ထင်ရှားစွာ ပြသနိုင်လိမ့်မည်ဟု မလေးရှားမဟာဗျူဟာနှင့်နိုင်ငံတကာလေ့လာရေးသိပ္ပံမှ ကျွမ်းကျင်ပညာရှင် သောမတ်ဒန်နီယယ် (Thomas Daniel) က ပြောကြားခဲ့သည်။

Source: AP

CNI International News

နယူးဒေလီ၊ နိုဝင်ဘာ ၉

ယူကရိန်းသို့ ရုရှားကျူးကျော်ပြီးနောက် အိန္ဒိယအနေဖြင့် ရုရှားရေနံကို ဆက်လက်ဝယ်ယူတင်သွင်းသွားမည် ဖြစ်ကြောင်း အိန္ဒိယနိုင်ငံခြားရေးဝန်ကြီး၏ ပထမဆုံးမော်စကိုခရီးစဉ်အတွင်း ပြောကြားခဲ့သည်ဟု အယ်ဂျာဇီးယားသတင်းဌာနက ရေးသားဖော်ပြသည်။

ရုရှားကို စီးပွားရေးအရ ပိတ်ဆို့ဒဏ်ခတ်ရန် အနောက်အုပ်စုကြိုးပမ်းနေခြင်းကို တန်ပြန်သည့် လုပ်ရပ်လည်း ဖြစ်ကြောင်း သိရသည်။

မော်စကိုမြို့သို့ ရောက်ရှိနေသော အိန္ဒိယနိုင်ငံခြားရေးဝန်ကြီး ဂျိုင်ရှန်ကာသည် ရုရှားအစိုးရဘက်မှ စိုက်ပျိုးရေး၊ ရေနံနှင့်သဘာဝဓာတ်ငွေ့၊ ဆိပ်ကမ်းများနှင့်ရေကြောင်းပို့ဆောင်ရေး၊ ဘဏ္ဍာရေး၊ ဓာတုပစ္စည်း၊ ဓာတ်မြေဩဇာ နှင့် ကုန်သွယ်ရေးတာဝန်ခံ အကြီးတန်းအရာရှိများနှင့် နိုဝင်ဘာ ၈ ရက်တွင် တွေ့ဆုံခဲ့သည်။

ရုရှားနှင့် ဆက်ဆံရေးသည် အိန္ဒိယအတွက် အရေးကြီးကြောင်း ၎င်းက ယခုခရီးစဉ်အတွင်း ထုတ်ဖော် ပြောကြား ခဲ့သည်။

“ရုရှားဟာ တည်ငြိမ်ပြီး အချိန်နဲ့တပြေးညီ အစမ်းသပ်ခံနိုင်တဲ့ မိတ်ဖက်ဖြစ်ပါတယ်။ ဆယ်စုနှစ်များစွာကြာအောင် ကျနော်တို့ ဆက်ဆံရေးအပေါ်မှာ ရည်မှန်းချက်အကဲဖြတ်မှုတွေနဲ့အတူ ကျနော်တို့နှစ်နိုင်ငံစလုံးဟာ အမှန် တကယ်ပဲ ကောင်းကောင်းမွန်မွန် အကျိုးပြုတဲ့အကြောင်း အတည်ပြုနိုင်ပါလိမ့်မယ်” ဟု ဂျိုင်ရှန်ကာက ပူးတွဲ သတင်းစာရှင်းလင်းပွဲတွင် ပြောကြားခဲ့သည်။

ရုရှားရေနံကန်တစ်ခုကို တွေ့ရစဉ်(ဓါတ်ပုံ-Shutterstock)

“ကမ္ဘာပေါ်မှာ တတိယအကြီးဆုံး ရေနံနဲ့သဘာဝဓာတ်ငွေ့သုံးစွဲသူအနေနဲ့ ဝင်ငွေအဆင့်လည်း သိပ်မမြင့်သေးတဲ့ ကျနော်တို့ အိန္ဒိယစားသုံးသူတွေဟာ နိုင်ငံတကာဈေးကွက်ထဲက အမြင့်ဆုံးစည်းကမ်းချက်တွေနဲ့ အနီးစပ်ဆုံး ရနိုင်ဖို့က ကျနော်တို့ရဲ့အခြေခံတာဝန်ဝတ္တရားပဲ ဖြစ်ပါတယ်” ဟု ၎င်းက ဆက်လက်ပြောကြားခဲ့သည်။

“အိန္ဒိယ-ရုရှားဆက်ဆံရေးကို အားသာချက်တစ်ခုဖြစ်အောင် လုပ်ဆောင်နိုင်ခဲ့တာကို ကျနော်တို့ အခု မြင်တွေ့ ရပါပြီ။ အဲဒီအတွက် ကျနော်တို့အကျိုးရှိတယ်ဆိုရင် ဒီအတိုင်းပဲ ဆက်သွားချင်ပါတယ်” ဟု အိန္ဒိယနိုင်ငံခြားရေး ဝန်ကြီး ဂျိုင်ရှန်ကာက ထပ်လောင်းပြောကြားခဲ့သည်။

ယူကရိန်းသို့ ကျူးကျော်ထိုးစစ်ကို ရုရှားအနေဖြင့် အထူးစစ်ဆင်ရေးဟု ကင်ပွန်းတပ်ခြင်းအား ပြတ်သားစွာ ရှုတ်ချခြင်းမရှိခဲ့သည့် အိန္ဒိယသည် အနောက်နိုင်ငံများမှ ဝယ်လက်များ ရုရှားရေနံကို မဝယ်ယူရေး လုပ်ဆောင်ချိန် ၌ တရုတ်ပြီးလျှင် ရုရှား၏အကြီးဆုံး ရေနံဖောက်သည် ဖြစ်လာခဲ့သည်။

အထက်ပါအတိုင်း ဂျိုင်ရှန်ကာ၏ကြေညာချက်သည် ယခုသီတင်းပတ်နှောင်းပိုင်း အမေရိကန်ဘဏ္ဍာရေးဝန်ကြီး ဂျာနက်ယဲလန် (Janet Yellne) ၏ ခရီးစဉ်မတိုင်မီ ပေါ်ထွက်လာခဲ့သည်။ လက်ရှိအခြေအနေတွင် အိန္ဒိယအစိုးရ တာဝန်ရှိသူများနှင့် စက်မှုထိပ်သီး (G-7) နိုင်ငံများသည် ရုရှားရေနံဈေးကို ကန့်သတ်မည့်အစီအမံ ၇ ချက်ကို ဆွေးနွေးရန် မျှော်မှန်းထားကြသည်။

Source: Aljazeera

CNI International News

ဘေဂျင်း၊ နိုဝင်ဘာ ၈

တိုင်ပေ(ထိုင်ဝမ်)အစိုးရနှင့် တရားဝင် အဆက်အသွယ်ဖြတ်ရန် ဗြိတိန်ကို ဘေဂျင်းအနေဖြင့် တိုက်တွန်းခဲ့သည်ဟု တရုတ်နိုင်ငံခြားရေးဝန်ကြီးဌာန ပြောခွင့်ရသူ ကျောက်လီကျန်း (Zhao Lijian) က နိုဝင်ဘာ ၇ ရက်တွင် ကျင်းပ သည့် သတင်းစာရှင်းလင်းတွင် ပြောကြားခဲ့သည်။

ဗြိတိန်နိုင်ငံခြားရေးဝန်ကြီး ဂရက်ဟမ်းစ် (Greg Hands) ၏ ထိုင်ဝမ်ခရီးစဉ်နှင့်ပတ်သက်၍ သဘောထား မှတ် ချက်ပေးစဉ် ၎င်းက အထက်ပါအတိုင်း တိုက်တွန်းခဲ့ခြင်းဖြစ်သည်။

“တရုတ်နိုင်ငံရဲ့ အချုပ်အခြာအာဏာကို လေးစားလိုက်နာဖို့၊ ‘တရုတ်တစ်ပြည်ထောင်တည်း’မူဝါဒကို တိတိကျကျ လိုက်နာပြီး ထိုင်ဝမ်နဲ့ တရားဝင် အဆက်အသွယ်အားလုံး ဖြတ်တောက်ဖို့ ဗြိတိန်ကို တိုက်တွန်းခဲ့ပါတယ်” ကျောက်လီကျန်းက ပြောကြားခဲ့သည်။

ထိုင်ဝမ်၏ လွတ်လပ်ရေးကို ထောက်ခံအားပေးသည့် အပြုအမူမျိုးကို လန်ဒန်(ဗြိတိန်)အနေဖြင့် မလုပ်ဆောင်သင့် ကြောင်း ၎င်းက ဆက်လက် ပြောကြားခဲ့သည်။

ဗြိတိန်နိုင်ငံခြားရေးဝန်ကြီး ဂရက်ဟမ်းစ်သည် ထိုင်ဝမ်ကျွန်းသို့ နှစ်ရက်ကြာ သွားရောက်ခဲ့ပြီး ထိုင်ဝမ်သမ္မတ ဆိုင်အင်ဝမ်နှင့် တွေ့ဆုံရန် စီစဉ်ထားကြောင်း လန်ဒန်က နိုဝင်ဘာ ၇ ရက်တွင် သတင်းထုတ်ပြန်ခဲ့သည်။

ဗြိတိန်နိုင်ငံခြားရေးဝန်ကြီး ဂရက်ဟမ်းစ်နဲ့ ထိုင်ဝမ်သမ္မတ ဆိုင်အင်ဝမ်ကို တွေ့ရစဉ် (GETTY IMAGES)

၎င်း၏ခရီးစဉ်အတွင်း ဟမ်းစ်သည် ထိုင်ဝမ်ရှိ ဗြိတိန်ကုမ္ပဏီများ၏ ပို့ကုန်နှင့်ရင်းနှီးမြှုပ်နှံမှုများ မြှင့်တင်ရန်၊ ဘဏ္ဍာရေး၊ ဆေးဝါး၊ စားနပ်ရိက္ခာ ကဏ္ဍများ၌ ကုန်သွယ်မှု အဟန့်အတားများကို ဖြေရှင်းရန် ရည်ရွယ်ထားသည်။

ထို့ပြင် ဟိုက်ဒရိုဂျင် စွမ်းအင်နှင့် တပိုင်းလျှပ်ကူးပစ္စည်း (semi-conductors) ဆိုင်ရာ ပူးပေါင်းဆောင်ရွက်မှုကို လည်း ဆွေးနွေးကြမည် ဖြစ်သည်။

ထိုင်ဝမ်အစိုးရ၏ ကိုယ်စားလှယ်များနှင့် အခြားနိုင်ငံများမှ တာဝန်ရှိသူများ အဆက်အသွယ် ပြုလုပ်တိုင်း ဘေဂျင်း က ဆန့်ကျင်နေကျ ဖြစ်သည်။

ယခုကဲ့သို့ ဟမ်းစ်၏ ထိုင်ဝမ် ခရီးစဉ်သည်လည်း ၎င်းတို့ပြည်တွင်းရေးကို ဝင်ရောက် စွက်ဖက်ခြင်းနှင့် နှောင့်ယှက် ခြင်း အဖြစ် တရုတ်က ယူဆထားသည်။

ချန်ကေရှိတ် (၁၈၈၇-၁၉၇၅) ဦးဆောင်သည့် ကူမင်တန်တပ် အကြွင်းအကျန်များသည် တရုတ်ပြည်တွင်းစစ်တွင် ရှုံးနိမ့်ပြီးနောက် ထိုင်ဝမ်ကျွန်းကို ကိုယ်ပိုင်အုပ်ချုပ်ရေးဖြင့် အစိုးရတစ်ရပ် ထူထောင်ခဲ့သည်။

တရားဝင် ရပ်တည်နေသော ဘေဂျင်းအစိုးရကတော့ ထိုင်ဝမ်ကျွန်းကို တရုတ်ပြည်သူ့သမ္မတနိုင်ငံ၏ ပြည်နယ် အစိတ်အပိုင်း တစ်ခုအဖြစ်သာ မှတ်ယူထားသည်။ ထိုသို့ မှတ်ယူခြင်းအပေါ် ရုရှား အပါအဝင် နိုင်ငံအများအပြား က ထောက်ခံခဲ့သည်။

Source: တာ့စ်သတင်းဌာန

CNI International News

ဝါရှင်တန်၊ နိုဝင်ဘာ ၈

နိုဝင်ဘာ ၇ ရက်၌ ကောက်ယူခဲ့သော ရိုက်တာ/Ipsos စစ်တမ်းတွင် အမေရိကန်သမ္မတ ဂျိုးဘိုင်ဒန်အပေါ် လူထုထောက်ခံမှုနှုန်းသည် ၃၉ ရာခိုင်နှုန်းသို့ ကျဆင်းသွားခဲ့ကြောင်း ရိုက်တာသတင်းအရ သိရသည်။

ဘိုင်ဒန်၏ ဒီမိုကရက်တစ်ပါတီသည် နိုဝင်ဘာ ၈ ရက် (ယနေ့) တွင် စတင်ကျင်းပမည့် ကြားဖြတ် ရွေးကောက်ပွဲ တွင် မဲအရနည်းလိမ့်မည်ဟု ရွေးကောက်ပွဲအကြိုခန့်မှန်းသူများ၏မျှော်လင့်ချက်ကို အဆိုပါစစ်တမ်းက အားဖြည့် ပေးခဲ့သည်။

ဘိုင်ဒန်၏ လုပ်ကိုင်ဆောင်ရွက်မှု စွမ်းဆောင်ရည်အပေါ် အမေရိကန်လူထု၏ထောက်ခံမှုမှာ သိသာစွာ ကျဆင်း သွားခဲ့ပြီး ၎င်း၏သမ္မတသက်တမ်းအတွင်း အနိမ့်ဆုံးအမှတ်သို့ ရောက်သွားသည်ဟု နှစ်ရက်ကြာ ပြည်လုံးကျွတ် ကောက်ယူခဲ့သော စစ်တမ်းက ပြသခဲ့သည်။

ဘိုင်ဒန်အပေါ် လူထုနှစ်သက်လိုလားမှုအနေအထား ကျဆင်းနေသောကြောင့် ရီပက်ဘလစ်ကန်အမတ်များ အနေဖြင့် အမေရိကန်အောက်လွှတ်တော်နှင့် အထက်လွှတ်တော်တို့တွင် နိုဝင်ဘာ ၈ ရက် ထွက်ပေါ်လာမည့် မဲရလဒ်များအရ အသာစီးရလာနိုင်ကြောင်း ရိုက်တာက ဆက်လက်ရေးသားသည်။

ရီပက်ဘလစ်ကန်များသည် အောက်လွှတ်တော်တွင် အမတ်နေရာ ၂၄ နေရာအထိ အသားတင် ရရှိနိုင်ပြီး အများစု အနိုင်ရမည်ဟု ဗာဂျီးနီးယားတက္ကသိုလ်၊ နိုင်ငံရေးဗဟိုဌာနက ခန့်မှန်းထားကြောင်း နိုဝင်ဘာ ၇ ရက်တွင် သတင်း ထုတ်ပြန်ခဲ့သည်။

ကွန်ကရက်ပူးတွဲ အစည်းအဝေးတစ်ခုတွင် သမ္မတဂျိုးဘိုင်ဒန်ကို တွေ့ရစဉ်(ဓါတ်ပုံ-အေပီ)

ရီပက်ဘလစ်ကန်များသည် အထက်လွှတ်တော်တွင်လည်း ယခင်က ၎င်းတို့လျော့နည်းစွာ ရရှိခဲ့သောနေရာများကို အစားထိုးနိုင်မည်ဟု ၎င်းတက္ကသိုလ်က ခန့်မှန်းသည်။

အမေရိကန်(ကွန်ဂရက်)လွှတ်တော်တစ်ခုတည်းကို ထိန်းချုပ်နိုင်ခဲ့လျှင် ဘိုင်ဒန်၏ ဥပဒေပြုရေးအစီအစဉ်ကို အဟန့်အတားပြုနိုင်ဖို့ ရီပက်ဘလစ်ကန်အမတ်များထံတွင် အခွင့်အာဏာရလာမည်ဖြစ်သည်။

Covid-19 ဖြစ်ပွားနေသည့်ကာလအတွင်း ၂၀၂၁ ခုနှစ်၊ ဇန်နဝါရီလ၌ သမ္မတ တာဝန်ယူခဲ့သည့် ဘိုင်ဒန်၏ ရာထူး သက်တမ်းတလျှောက် ငွေကြေးဖောင်းပွမှုနှုန်း တိုးလာခြင်းအပါအဝင် ကမ္ဘာ့ကျန်းမာရေးအကျပ်အတည်းကြောင့် အမေရိကန်စီးပွားရေးမှာ ဒဏ်ရာဒဏ်ချက်များဖြင့် ပြည့်နှက်နေခဲ့သည်။

ယခုနှစ်တွင်လည်း ဘိုင်ဒန်အပေါ် လူထုထောက်ခံနှုန်းမှာ ပြီးခဲ့သည့် မေလနှင့် ဇွန်လတို့၌ ၃၆ ရာခိုင်နှုန်းအထိ နိမ့်ဆင်းသွားခဲ့သည်။

ယခုသီတင်းပတ်အတွင်း ရိုက်တာ/Ipsos စစ်တမ်းတွင် ပါဝင်ဖြေဆိုသူ သုံးပုံတစ်ပုံခန့်သည် စီးပွားရေးကဏ္ဍကို နိုင်ငံ၏အကြီးမားဆုံးပြဿနာအဖြစ် ရွေးချယ်ဖြေဆိုခဲ့ကြသည်။

အမေရိကန်ပြည်တွင်း၌ ကိုယ်ဝန်ဖျက်ချခွင့်နှင့်ပတ်သက်၍ တရားရုံးချုပ်၏ ပြီးခဲ့သည့်ဇွန်လ ဆုံးဖြတ်ချက် အပြီးတွင်တော့ အဆိုပါအခွင့်အရေးကို အကြီးမားဆုံးပြဿနာအဖြစ် စစ်တမ်းဖြေဆိုသူ ၁၅ ဦးတွင် တစ်ဦးနှုန်း ဖြေဆိုခဲ့ကြောင်း တွေ့ရှိရသည်။

အဆိုပါစစ်တမ်းကို အမေရိကန်ပြည်ထောင်စုတစ်ခုလုံး၌ အွန်လိုင်းမှနေ၍ အင်္ဂလိပ်ဘာသာဖြင့် ကောက်ယူခဲ့ခြင်း ဖြစ်ပြီး ဖြေဆိုသူများထဲတွင် ဒီမိုကရက်တစ်ပါတီဝင် ၄၂၄ ဦးနှင့် ရီပက်လစ်ကန်ပါတီဝင် ၃၉၀ ဦးပါဝင်ခဲ့ကာ အရွယ်ရောက်ပြီးသူ ၁,၀၀၄(တစ်ထောင့်လေး)ဦး၏ သဘောထားများကို စုစည်းထားခြင်းဖြစ်သည်။

Source: Reuters

CNI International News

ပြုံယမ်း၊ နိုဝင်ဘာ ၈

ယူကရိန်းစစ်ပွဲအတွက် ရုရှားနိုင်ငံသို့ လက်နက်များ လျှို့ဝှက်တင်ပို့နေကြောင်း အမေရိကန်၏ ပြောကြားချက်ကို မြောက်ကိုရီးယားက ငြင်းပယ်ခဲ့ပြီး “မော်စကိုထံသို့ မည်သည့်အခါမျှ လက်နက် မရောင်းဖူးသလို ရောင်းချရန် အစီအစဉ်လည်း မရှိကြောင်း” တုံ့ပြန်ခဲ့သည်။

မြောက်ကိုရီးယားသည် ရုရှားကို သိသာထင်ရှားစွာဖြင့် လက်နက်အမြောက်အမြား တင်ပို့နေကြောင်း အိမ်ဖြူ တော် အမျိုးသားလုံခြုံရေးမှ ပြောရေးဆိုခွင့်ရှိသူ ဂျွန်ကာဘီက ယခင်သီတင်းပတ်တွင် ပြောကြားခဲ့သည်။

ထို့နောက် နိုဝင်ဘာ ၈ ရက် (ယနေ့)၌ ပြုံယမ်းအစိုးရပိုင် ကိုရီးယားဗဟိုသတင်းဌာန (KCNA) ၏ ငြင်းပယ်ချက် ပေါ်ထွက်လာခဲ့သည်။

မြောက်ကိုရီးယားသည် အရှေ့အလယ်ပိုင်းနှင့် မြောက်အာဖရိကဒေသများရှိ နိုင်ငံများမှတဆင့် လက်နက် တင်ပို့မှု များကို ဖုံးကွယ်ရန် ကြိုးစားနေကြောင်း၊ လက်နက်တင်ပို့ခြင်းကို ရုရှား လက်ခံရယူမှု ရှိ/မရှိ ဝါရှင်တန်က စောင့် ကြည့်နေကြောင်း ဂျွန်ကာဘီက ဆက်လက်ပြောကြားခဲ့သည်။

မြောက်ကိုရီးယားနဲ့ရုရှား ခေါင်းဆောင် နှစ်ဦးကိုတွေ့ရစဉ် (GETTY IMAGES)

၎င်း၏ ပြောကြားချက်များသည် ကောလာဟလများသာ ဖြစ်သည်ဟု မြောက်ကိုရီးယား ကာကွယ်ရေးဝန်ကြီးဌာန မှ အရာရှိတစ်ဦးက တုံ့ပြန်ခဲ့ပြီး ပြုံယမ်းသည် ရုရှားနှင့် မည်သည့် လက်နက်အမျိုးအစားမျှ ထိတွေ့ဆက်ဆံခြင်း မရှိကြောင်း၊ အနာဂတ်တွင်လည် ထိုသို့ဆက်ဆံရန် အစီအစဉ်မရှိကြောင်း ပြန်လည် ရှင်းလင်းခဲ့သည်။

“အမေရိကန်ရဲ့ ဒီလိုပြောကြားချက်ဟာ နိုင်ငံတကာနယ်ပယ်မှာ မြောက်ကိုရီးယားပုံရိပ်ကို ထိခိုက်စေဖို့အတွက် ရန်လိုတဲ့ ကြိုးပမ်းမှု တစိတ်တပိုင်းအနေနဲ့ တရားမဝင် ပိတ်ဆို့ အရေးယူမှု ဆုံးဖြတ်ချက်ကို ဖော်ညွှန်းတယ်” ဟု အထက်ပါ မြောက်ကိုရီးယား အစိုးရအရာရှိက ပြောကြားခဲ့သည်။

မြောက်ကိုရီးယား၏ တရားဝင် နာမည် အတိုကောက်ဖြစ်သည့် DPRK ဟု ရည်ညွှန်းပြီး KCNA မီဒီယာက ထုတ် လွှင့်ခဲ့သည်။

အိမ်ဖြူ တော် အမျိုးသားလုံခြုံရေးမှ ပြောရေးဆိုခွင့်ရှိသူ ဂျွန်ကာဘီ ကိုတွေ့ရစဉ် (AP)

အမေရိကန်နှင့် တောင်ကိုရီးယားတို့သည် ၎င်းတို့၏ အကြီးဆုံး လေတပ်ချင်း ပူးတွဲစစ်ရေး လေ့ကျင့်နေစဉ် မြောက်ကိုရီးယားကလည်း တိုက်ချင်းပစ် ပဲ့ထိန်းဒုံးကျည် (ICBM) အပါအဝင် လက်နက်စမ်းသပ်မှုများ ဆက်တိုက် ပြုလုပ်ခဲ့သည်။

ထိုကဲ့သို့ ကိုရီးယားကျွန်းဆွယ်များ ပိုမိုတင်းမာလာချိန်၌ အပြန်အလှန် အပြစ်တင် ဝေဖန်မှုများလည်း ပေါ်ပေါက် လာခဲ့သည်။

၂၀၁၇ ခုနှစ်နောက်ပိုင်း ၎င်း၏ ပထမဆုံး နျူကလီးယား စမ်းသပ်မှုအတွက် မြောက်ကိုရီးယား ပြင်ဆင်ကောင်း ပြင်ဆင်နေနိုင်ကြောင်း အမေရိကန်နှင့် တောင်ကိုရီးယားတို့က သတိပေးထားကြသည်။

ပြုံယမ်းအစိုးရ ပေးပို့သည့် သိသာထင်ရှားသော လက်နက်အရေအတွက်သည် ရုရှားကို ၈ လကြာစစ်ပွဲ ဆက်တိုက် နိုင်အောင် အထောက်အကူပြုရန် လုံလောက်သည်ဟု အမေရိကန်အနေဖြင့် ယုံကြည်ကြောင်း ဂျွန်ကာဘီက ဆက်လက်ပြောကြားခဲ့သည်။

Source: Aljazeera

CNI International Article

၂၀၂၂ ခုနှစ်၊ နိုဝင်ဘာ ၆

ယခုရက်ပိုင်းအတွင်း မြောက်ကိုရီးယား အစိုးရအရာရှိများသည် အမေရိကန်-တောင်ကိုရီးယား စစ်ရေးလေ့ကျင့်မှု အပေါ် ပြင်းထန်စွာ တုံ့ပြန်မည်ဟု အခိုင်အမာ ပြောခဲ့ကြသည်။

တောင်ကိုးရီးယား ပင်လယ်ပြင်၏ နှစ်နိုင်ငံနယ်စပ်အနီးတွင် ကျရောက်ခဲ့သော တာတိုပစ် လက်နက် အပါအဝင် ဒုံးကျည်အစင်း ၃၀ နီးပါးကို မြောက်ကိုရီးယားက ယခုသီတင်းပတ်အတွင်း ဆက်တိုက် ပစ်လွှတ်ခဲ့ရာ တောင်ကိုရီးယားဘက်မှ တုံ့ပြန်မှု ထွက်ပေါ်လာခဲ့သည်။

ယခုတစ်ခေါက် မြောက်ကိုရီးယား၏ ဒုံးကျည်စမ်းသပ် ပစ်လွှတ်မှု အများဆုံးအကြိမ် ဖြစ်ခဲ့သဖြင့် တစ်နှစ်တာ အတွင်း သိသာထင်ရှားသော တင်းမာလာမှု တစ်ခုအဖြစ် အရေးတကြီး မေးခွန်းထုတ်စရာ ပေါ်ပေါက်လာခဲ့သည်။

ထိုသို့ လုပ်ဆောင်မှုကို နောက်ထပ် မည်မျှကြာကြာ ဆက်လက် လုပ်ဆောင်မှာလဲဆိုတာ အဓိကဖြစ်သည်။

မြောက်ကိုရီးယား ဒုံးကျည် ပစ်လွှတ်နေသည့် သတင်းကို ကြည့်ရှုနေကြစဉ်(AP)

မြောက်ကိုရီးယား၏ ဖတ်စာအုပ်(ပြဋ္ဌာန်းစာအုပ်)မှာ အစဉ်အလာအားဖြင့် အမေရိကန်၏ အာရုံစိုက်မှုကို မရမချင်း ရန်စမှုများအား အဆက်မပြတ် ထုတ်ပြရန် ဖြစ်နေသည်။

ထို့နောက် ပိတ်ဆို့အရေးယူမှုမှ သက်သာရာ သက်သာကြောင်း (သို့မဟုတ်) အာဏာ၏ ရပ်တည်ချက်အဖြစ် ရှုမြင်သည့် အခြားလိုက်လျောမှုများကို လာရောက်ညှိနှိုင်းနိုင်သည်။

အမေရိကန်သည် လာမည့် ရွေးကောက်ပွဲများကို အာရုံစိုက်နေပြီး ယူကရိန်းစစ်ပွဲကြောင့် ရုရှားနှင့် အနောက်နိုင်ငံ များ၏ ဆုံးရှုံးမှုများကို လတ်တလော အာရုံစိုက်နေရသည်။

ဆိုလိုသည်မှာ မြောက်ကိုရီးယားသည် ၎င်းလိုလားသည့် တုံ့ပြန်မှုကို ရရှိရန် ပိုမိုလုပ်ဆောင်ရမည်ဟု တွက်ဆထား သော်လည်း ပြုံယမ်း၏ တကယ်လုပ်ရပ်များက တောင်ကိုရီးယားနှင့် ဝေးကွာလွန်းအောင် တွန်းပို့နိုင်သည့် အလားအလာကိုလည်း တိုးမြင့်စေသည်။

ပြောရမည်ဆိုလျှင် မြို့တော်ဆိုးလ်တွင် တောင်ကိုရီးယား ပြည်တွင်းဖြစ် နျူကလီးယား အစီအစဉ် ဖန်တီးခြင်းနှင့် ပတ်သက်၍ ဆွေးနွေးမှုများ ကြီးထွားလာနေပြီ ဖြစ်သည်။

အမေရိကန်နဲ့ တောင်ကိုရီးယား ပူးတွဲ စစ်ရေးလေ့ကျင့်နေစဉ် (AP)

မြောက်ကိုရီးယား စစ်ရေးသုံးသပ်သူများက ကင်မ်ဂျုံအန်း၏ ဒေါသကို ဖော်ပြရန်အတွက် ပြုံယမ်း အသုံးပြုသည့် လက်နက်အဆင့်ဆင့်ကို ကာလအတန်ကြာ ပုံကြမ်းဆွဲပြခဲ့ ကြသည်။

အဆိုပါ လက်နက်များ၏ စာရင်းအောက်ခြေအား ကိုးကား၍ မြောက်ကိုရီးယား အစိုးရ ထိန်းချုပ်ထားသော မီဒီယာများတွင် ပြင်းထန်သော စကားလုံးများရှိသည်။

ထို့နောက် နိုဝင်ဘာ ၂ ရက်တွင် မြောက်ကိုရီးယားသည် နိုင်ငံတကာ သတင်းစာ မျက်နှာများတွင် မြင်တွေ့ရသည့် အတိုင်း တာတိုပစ်ဒုံးကျည် အမျိုးအစားကို လွှတ်တင်ပြခဲ့သည်။

နိုဝင်ဘာ ၃ ရက်တွင် ပြုံယမ်းမြို့တော်မှ ပစ်ခတ်သည့် ဒုံးကျည်များ အပါအဝင် တာဝေးပစ် ဒုံးကျည်စမ်းသပ်မှုများ သို့မဟုတ် မြောက်ကိုရီးယားက ယခင်က ဂျပန်ကျွန်းစုကို အပြင်းအထန် ပစ်လွှတ်ခဲ့သော တာလတ်ပစ် ဒုံးကျည် စမ်းသပ်မှုများ ရှိလာခဲ့သည်။

တောင်ကိုရီးယား သမ္မတကို တွေ့ရစဉ် (AP)

ပစိဖတ်သမုဒ္ဒရာထဲ ဖောက်ခွဲပစ်လွှတ်သည့် စာရင်း၏ ထိပ်တွင် မြောက်ကိုရီးယား၏ နျူကလီးယား ကိရိယာများ ထဲမှ တစ်ခုကို စမ်းသပ် ဖောက်ခွဲခြင်း ဖြစ်သည်ဟု အေပီသတင်းက ရေးသားဖော်ပြသည်။

မြောက်ကိုရီးယား၏ လက်နက်စမ်းသပ်မှု အဆင့်သစ် တစ်ခုစီတိုင်းကြောင့် ကမ္ဘာပေါ်တွင် လက်နက် အထူထပ် ဆုံး နယ်စပ်တစ်လျှောက် ကိုရီးယားကျွန်းဆွယ်တွင် တောင်ကိုရီးယား တပ်များနှင့် အမေရိကန်တို့၏ သောင်းနှင့် ချီသော နှစ်ဖက်စလုံးမှ တပ်ဖွဲ့ဝင် ထောင်ပေါင်းများစွာရှိသော တင်းမာမှုများ တိုးလာနေပြီ ဖြစ်သည်။

၎င်းတပ်ဖွဲ့ဝင် အရေအတွက်သည် အကန့်အသတ်ရှိသော ကျွန်းဆွယ် ပထဝီဝင် ဧရိယာတွင် ပြင်းထန်သော လက်နက် အမျိုးအစားများဖြင့် အသုံးချမိသည့်အခါ တွက်ချက်မှု မှားယွင်းပြီး ခိုက်ရန် ဖြစ်ပွားနိုင်ခြေကို တိုးမြင့် စေသည်။

မကြာသေးမီက ရုရှားသည် ဆုတ်ယုတ်မှုများ ဆက်တိုက် ကြုံတွေ့ခဲ့ရသည့် ယူကရိန်းစစ်ပွဲလည်း နမူနာ ရှိနေ သည်။

မြောက်ကိုရီးယားနှင့် ၎င်း၏ စစ်တပ်ကို ဆယ်စုနှစ်များစွာ ထောက်ခံအားပေးခဲ့သည့် မော်စကိုသည် ဝါရှင်တန် အတွက် ဖန်တီးထားသည့် ဒုံးကျည်စမ်းသပ်မှုမှ အာရုံပြောင်း သွားနိုင်သည်ကို မြောက်ကိုရီးယားက သဘော ပေါက်သင့်သည်။

မြောက်ကိုရီးယား ဒုံးကျည်ပစ်လွှတ်နေစဉ် (KCNA)

Hallowen ပျော်ပွဲရွှင်ပွဲများ တဟုန်ထိုး တိုးလာသည့် တောင်ကိုရီးယားတွင် လူပေါင်း ၁၅၀ ကျော် သေဆုံးမှု အတွက် ဝမ်းနည်းပူဆွေးနေခဲ့ရာ အဆိုပါ စစ်ရေး အတားအဆီးသည် မကြုံချင်ဘဲ ကြုံလာရသည်။

သို့သော် မြောက်ကိုရီးယား၏ နောက်ထပ် နျူကလီးယား စမ်းသပ်မှုသည် သူ့အတွက် အန္တရာယ် ဖြစ်စေနိုင်သည် ဟု ယွန်ဆီးတက္ကသိုလ်မှ သံတမန်လေ့လာရေးဆိုင်ရာ တွဲဖက်ပါမောက္ခ ဂျက်ဖရီရောဘတ်ဆင်က မကြာသေးမီက ရေးသားခဲ့သည်။

“ပြီးခဲ့တဲ့ အနှစ် ၃၀ အတွင်းမှာ တောင်ကိုရီးယားရဲ့ သာလွန်တဲ့ စစ်ရေးစွမ်းရည် (အမေရိကန်နဲ့ မဟာမိတ်ဖွဲ့မှု) နဲ့ မြောက်ကိုရီးယားရဲ့ အခြေတည်တဲ့ နျူကလီးယား လက်နက် စွမ်းရည်တို့ကြား ခပ်ကြမ်းကြမ်း ချိန်ညှိမယ့် ချိန်ခွင် လျှာ တစ်ခုကို ထူထောင်ခဲ့ပါတယ်” ဟု ၎င်းက ပြောကြားခဲ့သည်။

သို့သော် တောင်ကိုရီးယားသည် ၎င်း၏ကိုယ်ပိုင် နျူကလီးယား လက်နက်စွမ်းရည်ကို ယုံကြည်မိပြီး လိုက်လျှောက် ပါလျှင် တစ်မျိုးတစ်ဖုံ ပြောင်းလဲသွားနိုင်စရာ ရှိနေသည်။

ပြုံယမ်းသည် ယုံတမ်းစကားတော့ မပြောတတ်ပေ။ ၎င်း၏အလိုဆန္ဒရရှိရန် ၎င်း၏လက်နက် အပြည့်အစုံအား ဖြည့်ပြီး လက်တွေ့အသုံးပြုရန် ကြိုးပမ်းနေသောကြောင့် ရေတိုအတွင်း မြောက်ကိုရီးယား ခွန်အားကို ရပ်တန့်ရန် မျှော်လင့်၍ မရပါကြောင်း။

Source: AP

CNI International News

ဂျကာတာ၊ နိုဝင်ဘာ ၄

အာဆီယံနှင့် သဘောတူခဲ့သည့် ငြိမ်းချမ်းရေးအစီအစဉ် တိုးတက်မှုမရှိသည့်အတွက် နစကတွင် တာဝန်ရှိကြောင်း အင်ဒိုနီးရှား နိုင်ငံခြားရေးဝန်ကြီးက နိုဝင်ဘာ ၃ ရက်တွင် ပြောကြားခဲ့သည်ဟု ရိုက်တာမှ ရေးသား ဖော်ပြထားသည်။

ဒေသတွင်း အစုအဖွဲ့ဖြစ်သော အာဆီယံသည် ပဋိပက္ခဖြစ်ပွားနေသော မြန်မာနိုင်ငံတွင် ရန်လိုမှုများ အဆုံးသတ် နိုင်ရေးအတွက် အဆိုပါ ငြိမ်းချမ်းရေး အစီအစဉ်တွင် အခန်းကဏ္ဍတစ်ခုအဖြစ် ပါဝင်ခဲ့သည်။

၂၀၂၁ ခုနှစ်၊ ဖေဖော်ဝါရီလတွင် ရွေးကောက်ခံအစိုးရ ဖြုတ်ချခံရပြီးနောက် အကြမ်းဖက်မှုများ ရပ်တန့်စေရေး အတွက် ငြိမ်းချမ်းရေးအစီအစဉ်အား အကောင်အထည်ဖော်ဖို့ မြန်မာကို အာဆီယံက တိုက်တွန်းခဲ့သည်။

ပြီးခဲ့သည့် ၁၈ လခန့်က သဘောတူခဲ့သော ယင်းအစီအစဉ်တွင် အပြုသဘောဆောင်သည့် ဆွေးနွေးရေး၊ လူသားချင်း စာနာထောက်ထားမှုဆိုင်ရာ အကူအညီ ရရှိရေးနှင့် အာဆီယံ အထူးသံတမန်တစ်ဦး စေလွှတ်ရေးတို့ ပါဝင်ခဲ့သည်။

အာဆီယံအထူးကိုယ်စားလှယ် ပရတ်ဆိုခွန်နဲ့ ဗိုလ်ချုပ်မှူးကြီးမင်းအောင်လှိုင်ကို တွေ့ရစဉ်

လာမည့်နှစ်တွင် အာဆီယံဥက္ကဋ္ဌ တာဝန်ကို အင်ဒိုနီးရှားက ရယူမည်ဖြစ်သည်။

အင်ဒိုနီးရှား နိုင်ငံခြားရေးဝန်ကြီး ရက်နိုမာစူဒီက အဆိုပါအစီအစဉ် တိုးတက်မှု မရှိခြင်းအတွက် နစကကိုသာ အပြစ်တင်ရမည်ဖြစ်ကြောင်း ရိုက်တာသို့ ပြောကြားခဲ့သည်။

“ဝေဖန်မှုတွေက အာဆီယံကို ရည်ရွယ်တာ မဟုတ်ဘူး။ နစကကိုပဲ ဦးတည်သင့်တယ်” ဟု အင်တာဗျူး တစ်ခု တွင် ၎င်းက ပြောကြားခဲ့သည်။

“ဘယ်သူ့ကို အပြစ်တင် ရမှာလဲ၊ ဘယ်သူက မအောင်မြင်အောင် လုပ်တာလဲဆိုရင် ကျမတို့လည်း မဟုတ်ဘူး။ အာဆီယံလည်း မဟုတ်ဘူး။ ကျမတို့က တခန်းတကဏ္ဍ အနေနဲ့ပဲ လုပ်ပေးခဲ့တာ” ဟု ၎င်းက ဆက်လက် ပြော ကြားခဲ့သည်။

အဆိုပါ သတင်းနှင့်ပတ်သက်၍ ရိုက်တာက သဘောထား မှတ်ချက် တောင်းခံခဲ့သော်လည်း မြန်မာဘက်မှ တုံ့ပြန်ခြင်း မရှိပါ။

၂၀၂၂ ခုနှစ်၊ အောက်တိုဘာ ၂၇ ရက်က အင်ဒိုမှာ အာဆီယံ နိုင်ငံခြားရေးဝန်ကြီးများ အစည်းအဝေး ကျင်းပနေစဉ်

အာဆီယံနှင့် သဘောတူခဲ့သည့် အစီအစဉ် တိုးတက်မှု မရှိခြင်းမှာ ပြည်တွင်း မတည်ငြိမ်မှုများနှင့် ကပ်ရောဂါ ကြောင့်ဟု နစကမှ ယခင်က အကြောင်းပြခဲ့သည်။

လာမည့် သီတင်းပတ် အာဆီယံခေါင်းဆောင်များ ထိပ်သီး အစည်းအဝေး မတိုင်ခင် မြန်မာနိုင်ငံ၏ ငြိမ်းချမ်းရေး အစီအစဉ်အတွက် အကြံပြုချက် အသစ်များ ထွက်ပေါ်လာမည်ဟု ရက်နိုမာစူဒီက ဆက်လက် ပြောကြားခဲ့သည်။

“မြန်မာနိုင်ငံကို နိုင်ငံရေး အကျပ်အတည်းကနေ ရုန်းထွက်နိုင်အောင် ဆွေးနွေးပွဲတွေ အဆင်ပြေချောမွေ့ဖို့ ကျမ တို့ ဆောင်ရွက်ပေးခဲ့ပါတယ်။ နောက်ပြီးတော့ မြန်မာ့ပြဿနာကို ဘယ်သူက ဖြေရှင်းပေးနိုင်မှာလဲဆိုရင် အပြင် လူတွေက မဟုတ်ဘဲ မြန်မာပြည်သူတွေပါပဲ” ဟု သူမက ထပ်လောင်း ပြောကြားခဲ့သည်။

အဖွဲ့ဝင် ၁၀ နိုင်ငံ ပါဝင်သော အာဆီယံသည် နိုင်ငံအချင်းချင်း၏ ပြည်တွင်းရေး ဝင်ရောက် မစွက်ဖက်သည့် မူဝါဒကို ကာလရှည်ကြာ ချမှတ်ခဲ့သော်လည်း တပ်မတော်အပေါ် ဖိအားပေးရန် တက်ကြွလှုပ်ရှားသူများ၏ တောင်းဆိုမှုများနှင့် ရင်ဆိုင်နေရသည်။

Source: Reuters