CNI International News

နီယာမေ၊ သြဂုတ် ၁၀ 

နိုက်ဂျာတွင် သူပုန်ခေါင်းဆောင်ဟောင်းတစ်ဦးက ဇူလိုင် ၂၆ ရက်၌ အာဏာသိမ်းခဲ့သည့် စစ်ခေါင်းဆောင်များကို ဆန့်ကျင်သည့် လှုပ်ရှားမှုအား စတင်လုပ်ဆောင်ခဲ့သည်ဟု ရိုက်တာမှ ဖော်ပြခဲ့သည်။

ထိုလှုပ်ရှားမှုသည် ဆာဟယ် (Sahel) ဒေသ၏ မဟာဗျူဟာအရ အရေးကြီးသည့် နိုက်ဂျာတွင် စစ်တပ်၏ အုပ်ချုပ်မှုကို ပြည်တွင်းက ဆန့်ကျင်တော်လှန်သည့် လက္ခဏာတစ်ခု ဖြစ်လာခဲ့သည်။

သူပုန်ခေါင်းဆောင်ဟောင်း နိုင်ငံရေးသမား ရစ်ဆာအဂ်ဘူလာ (Rhissa Ag Boula) က နေအိမ်အကျယ်ချုပ်ဖြင့် ထိန်းသိမ်းခံထားရသည့် သမ္မတ မိုဟာမက် ဘာဇုမ်း (Mohamed Bazoum) ကို အာဏာပြန်လည် အပ်နှင်းရန် ရည်ရွယ်ပြီး တော်လှန်ရေး သမ္မတ ကောင်စီ (CRR) ကို ဖွဲ့စည်းခဲ့ကြောင်း ပြောကြားခဲ့သည်။

"နိုက်ဂျာကို ကာကွယ်ရမယ့်သူတွေရဲ့ လုပ်ဆောင်ချက်တွေကြောင့် နိုက်ဂျာဟာ ဝမ်းနည်းဖွယ် ဖြစ်ရပ်ဆိုးမှာ နစ်နာခဲ့ရပါတယ်" ဟု ရစ်ဆာက အစီရင်ခံစာ ထုတ်ပြန်ခဲ့သည်။

အနောက်အာဖရိကနိုင်ငံများ စီးပွားရေးအဖွဲ့ (ECOWAS)ကို တွေ့ရစဉ်

CRR သည် နိုက်ဂျာတွင် ဖွဲ့စည်းပုံအခြေခံဥပဒေဆိုင်ရာ တည်ငြိမ်ရေးကို ပြန်လည်ရရှိစေရန် ကြိုးပမ်းနေသည့် အနောက်အာဖရိကနိုင်ငံများ စီးပွားရေးအဖွဲ့ (ECOWAS) နှင့် နိုင်ငံတကာအသိုင်းအဝိုင်း၏ လုပ်ဆောင်မှုများကို ထောက်ခံကြောင်းလည်း အစီရင်ခံစာတွင် ဖော်ပြခဲ့သည်။

နိုက်ဂျာတွင် တည်ငြိမ်အေးချမ်းမှုကို ပြန်လည်ရရှိစေရန် သံတမန်ရေးရာ လုပ်ဆောင်မှုများ ရပ်တန့်နေချိန်တွင် ရစ်ဆာ၏ အာဏာသိမ်းမှုဆန့်ကျင်သည့် လှုပ်ရှားမှု ပေါ်ပေါက်လာခဲ့ခြင်း ဖြစ်သည်။

နိုက်ဂျာ စစ်ခေါင်းဆောင်များသည် သံတမန်ရေး လှုပ်ရှားမှုများကို ငြင်းပယ်ခဲ့ပြီး စစ်အစိုးရများ အုပ်ချုပ်နေသည့် အိမ်နီးချင်း မာလီနှင့် ဘာကီနာဖာဆို နိုင်ငံများကလည်း နိုက်ဂျာကို စစ်ရေးအရ ကြားဝင်စွက်ဖက်ခြင်းကို ဟန့်တားပေးရန် ကုလသမဂ္ဂထံ မေတ္တာရပ်ခံခဲ့သည်။

သမ္မတ မိုဟာမက် ဘာဇုမ်းနဲ့ နိုက်ဂျာစစ်တပ် အရာရှိများကိုတွေ့ရစဉ်

နိုက်ဂျာအာဏာသိမ်း ခေါင်းဆောင်များသည် အာဖရိကနှင့် ကုလသမဂ္ဂ သံတမန်များကို သြဂုတ် ၈ ရက်တွင် ပြည်ဝင်ခွင့် ငြင်းပယ်ခဲ့ပြီး ဆွေးနွေးညှိနှိုင်းမှုများ ပြုလုပ်ရန် တောင်းဆိုချက်များကို ဖီဆန်ခဲ့သည်။

အနောက်အာဖရိက နိုင်ငံများမှ ခေါင်းဆောင်များသည် သြဂုတ် ၁၀ ရက်တွင် နိုက်ဂျီးရီးယားနိုင်ငံ၏ မြို့တော် အဘူဂျာ (Abuja) တွင် တွေ့ဆုံမည်ဖြစ်ပြီး နိုက်ဂျာအရေးကို ဆွေးနွေးကြမည် ဖြစ်သည်။ 

CRR အနေနှင့်လည်း အနောက်အာဖရိက ခေါင်းဆောင်များ၏ မည်သည့် ရည်ရွယ်ချက်ကိုမဆို ထောက်ခံ သွားမည်ဟု ရစ်ဆာက ပြောကြားခဲ့သည်။

Source: ရိုက်တာ

CNI International News

ဘန်ကောက်၊ သြဂုတ် ၁၀

ထိုင်းတွင် အစိုးရဖွဲ့ရန်ကြိုးပမ်းနေသည့် ဖြူးထိုင်းပါတီသည် သြဂုတ် ၉ ရက်နေ့က အခြားပါတီခြောက်ခုနှင့် ညွန့်ပေါင်းအသစ် ဖွဲ့စည်းခဲ့သည်ဟု The Nation မှ ဖော်ပြခဲ့သည်။

ဖြူးထိုင်းပါတီသည် ဆန္ဒပြသူများနှင့် ထိပ်တိုက်တွေ့မည့်အရေးမှ ရှောင်လွှဲရန် ညွန့်ပေါင်းမဟာမိတ်များနှင့် ဆွေးနွေးမှုကို လွှတ်တော်တွင် ပြုလုပ်ခဲ့သည်။

ဖြူးထိုင်းပါတီက ဦးဆောင်သည့် ညွန့်ပေါင်းအဖွဲ့ထဲတွင် ပါဝင်သည့် ပါတီများမှာ Prachachat ၊ Seri Ruam Thai ၊ Pheu Thai Ruam Palang ၊ Palang Sangkhom Mai ၊ The Party of Thai Counties နှင့် Chart Pattana Kla ပါတီတို့ ဖြစ်သည်။ 

အဆိုပါ ပါတီများအနက် Prachachat ၊ Seri Ruam Thai ၊ Pheu Thai Ruam Palang နှင့် Palang Sangkhom Mai ပါတီတို့သည် ယခင် Move Forward ပါတီက ဖွဲ့စည်းခဲ့သည့် (၈) ပါတီ ညွန့်ပေါင်းအဖွဲ့တွင် ပါဝင်ခဲ့သည့် ပါတီများ ဖြစ်သည်။

Move Forward ပါတီ ဦးဆောင်သည့် ညွန့်ပေါင်းအဖွဲ့ကို တွေ့ရစဉ်

ယခင် (၈) ပါတီ ညွန့်ပေါင်းအဖွဲ့သည် နေရာ ၅၀၀ ရှိသည့် အောက်လွှတ်တော်တွင် ၂၂၈ နေရာကိုသာ ရရှိခဲ့သော် လည်း ဖြူးထိုင်းပါတီခေါင်းဆောင် ချိုနန် သီရိကော (Cholnan Srikaew)က ယခုဖွဲ့စည်းသည့် ညွန့်ပေါင်းအသစ် သည် နေရာ ၂၅၁ နေရာအတွက် ထောက်ခံမှုကို ရရှိခဲ့ကြောင်း အတည်ပြု ပြောကြားခဲ့သည်။

ထို့ပြင် ဖြူးထိုင်းပါတီက ညွန့်ပေါင်းအဖွဲ့သစ်တွင် ပါဝင်လာမည့် နောက်ထပ်ပါတီများကို မကြာမီအချိန်အတွင်း ကြေညာသွားမည်ဖြစ်ကြောင်းနှင့် ရွေးကောက်ပွဲတွင် နေရာ ၁၀ နေရာ ရရှိခဲ့သည့် Chart Thai Pattana ပါတီနှင့် ယနေ့(သြဂုတ် ၁၀ ရက်)တွင် တွေ့ဆုံဆွေးနွေးရန် စီစဉ်ထားကြောင်း ပြောကြားခဲ့သည်။

ဖြူးထိုင်းပါတီ ဦးဆောင်သည့် ညွန့်ပေါင်းအဖွဲ့၏ အဓိကရည်မှန်းချက်မှာ ထိုင်းနိုင်ငံကို လက်ရှိဖြစ်ပွားနေသည့် နိုင်ငံရေး အကျပ်အတည်းအတွင်းမှ ဆွဲထုတ်ရန်ဖြစ်ကြောင်း၊ ဖွဲ့စည်းပုံအခြေခံဥပဒေ၊ စီးပွားရေးနှင့် လူ့အဖွဲ့ အစည်း အတွင်း နိုင်ငံရေး သဘောထားကွဲလွဲမှုများကို ဖြေရှင်းရန်ဖြစ်သည်ဟု ချိုနန်က ပြောကြားခဲ့သည်။

ထိုအချက် သုံးချက်နှင့်ပတ်သက်သည့် အကျပ်အတည်းကို အဆုံးသတ်စေရန် ဖွဲ့စည်းပုံ အခြေခံဥပဒေသစ်ကို မူကြမ်းရေးဆွဲသွားမည်ဟုလည်း ဖြူးထိုင်းပါတီက ကတိပြုခဲ့သည်။

ဖြူးထိုင်းပါတီ၏ လက်ထောက်ခေါင်းဆောင် ဖွမ်သမ် ဝီချာယာချိုင်း (Phumtham Wechayachai) ကလည်း အစိုးရအဖွဲ့သစ်ကို မမျှော်မှန်းနိုင်သည့် အခြေအနေမျိုးတွင် ဖွဲ့စည်းသွားမည်ဟု ပြောကြားခဲ့သည်။ 

Source: The Nation

CNI International News

ကရင်မလင်၊ သြဂုတ် ၁၀

ရုရှားသည် ၂၀၂၂ ခုနှစ်၊ မတ်လအစောပိုင်းက ယူကရိန်းထံမှ သိမ်းပိုက်ခဲ့သည့် ဇာပိုရီရှား နျူကလီးယားစက်ရုံ တည်ရှိသည့် ဇာပိုရီရှား (Zaporizhzhia) မြို့တွင် ချေချင်းညာတပ်ဖွဲ့ကို ဖြန့်ကြက်ချထားခဲ့သည်ဟု အယ်လ်ဂျာဇီး ယားမှ ဖော်ပြခဲ့သည်။

ဇာပိုရီရှားမြို့ရှိ ဇာပိုရီရှားနျူကလီးယား ဓာတ်အားပေးစက်ရုံ တည်ရှိသည့် အန်နာဟိုဒါ (Enerhodar) မြို့နယ်တွင် ချေချင်းညာတပ်ဖွဲ့ဝင်များ ကင်းလှည့်နေသည်ကို မြင်တွေ့ခဲ့ရသည်ဟု ထိုမြို့နယ်မှ ထွက်ပြေးတိမ်းရှောင်လာသူ များက ပြောသည်။

ချေချင်းညာတပ်ဖွဲ့များသည် ဒွန်းနက်စ် (Donetsk) နှင့် လူဟန့်စ် (Luhansk) ဒေသတို့မှ ရုရှားလိုလားသည့် ခွဲထွက်ရေး လက်နက်ကိုင်များနှင့် မတူဘဲ စစ်ယူနီဖောင်းများကို သပ်သပ်ရပ်ရပ် ဝတ်ဆင်လေ့ရှိပြီး လက်နက် အကောင်းများကို ကိုင်ဆောင်ထားကြသည်ဟု အမည်မဖော်လိုသည့် မြို့ခံများက ပြောကြားခဲ့သည်။

ချေချင်းညာခေါင်းဆောင် ရမ်ဇမ် ကာဒီရော့ဗ် (Ramzan Kadyrov) သည် ရုရှားသမ္မတ ဗလာဒီမာ ပူတင် (Vladimir Putin) ၏ လက်ရုံးတစ်ဦးဖြစ်သည်။

အဆိုပါ ကာဒီရော့ဗ်သည် တစ်ခါတစ်ရံတွင် ရုရှား အရာရှိများကိုပင် ကြိမ်းမောင်းလေ့ရှိသည်ဟု သတင်းများ ထွက်ပေါ်ခဲ့သည်။

 ရမ်ဇမ်နဲ့ ချေချင်းညာတပ်ဖွဲ့ကိုတွေ့ရစဉ်

ထို့ပြင် ချေချင်းညာတပ်ဖွဲ့များသည် အန်နာဟိုဒါမြို့တွင် ရုရှားစစ်သားများနှင့်လည်း အရောတဝင်မနေဘဲ သီးသန့် လှုပ်ရှားကြသူများဖြစ်သည်ဟု ထိုမြို့မှ ထွက်ပြေးတိမ်းရှောင်လာသည့် အင်ဂျင်နီယာတစ်ဦးက ပြောသည်။

အန်နာဟိုဒါမြို့၏ လမ်းများပေါ်တွင် ကင်းလှည့်နေသည့် ချေချင်းညာတပ်ဖွဲ့ဝင်များကို မြင်တွေ့ရမည်ဖြစ်ပြီး မြို့ခံများ၏ မှတ်ပုံတင်များကို စစ်ဆေးခြင်း၊ နေအိမ်များအတွင်းသို့ ဝင်ရောက်ရှာဖွေခြင်းတို့ ပြုလုပ်လေ့ရှိသည်ဟု လုံခြုံရေးအန္တရာယ်ကြောင့် အမည်မဖော်လိုသည့် မြို့ခံတစ်ဦးက ပြောသည်။

"ချေချင်းညာ တပ်ဖွဲ့တွေဟာ မြို့ခံတွေရဲ့ ပတ်စ်ပို့တွေကို စစ်ဆေးပြီး မေးမြန်းတာတွေ ပြုလုပ်လေ့ရှိပါတယ်။ တကယ်လို့ ပတ်စ်ပို့ဟာ ရုရှားပတ်စ်ပို့ဆိုရင် ဘာပြဿနာမှ မရှိပါဘူး။ ဒါပေမယ့် ယူကရိန်းပတ်စ်ပို့သာ ဆိုရင် တော့ အရစ်ခံရတာ၊ ပြဿနာရှာခံရတာတွေနဲ့ ရင်ဆိုင်ရနိုင်ပါတယ်"ဟု အဆိုပါ မြို့ခံတစ်ဦးက ပြောကြားခဲ့သည်။

ထို့ပြင် ချေချင်းညာတပ်ဖွဲ့များသည် နေအိမ်များအတွင်းသို့လည်း ဝင်ရောက် ရှာဖွေလေ့ရှိပြီး အိမ်ရှင်များကို ယူကရိန်းစစ်တပ်နှင့် အဆက်အသွယ် ရှိ၊မရှိ မေးမြန်းလေ့ရှိသည်။

"လူတွေမနေတဲ့ အိမ်တွေဆိုရင်လည်း သူတို့သဘောနဲ့သူတို့ ချိတ်ပိတ်ပစ်ပါတယ်။ ဒေသခံတွေက သူတို့ကို ကြောက်နေရပါတယ်"ဟု အန်နာဟိုဒါမြို့မှ ထွက်ပြေးတိမ်းရှောင်လာသည့် ယူကရိန်းတက်ကြွ လှုပ်ရှားသူ တစ်ဦးက ပြောသည်။

Source: အယ်လ်ဂျာဇီးယား

CNI International News

ဝါရှင်တန်၊ သြဂုတ် ၉

အမေရိကန်နိုင်ငံ အရှေ့ပိုင်းဒေသ အများအပြားတွင် အင်အားပြင်းမုန်တိုင်းများ တိုက်ခတ်ခဲ့သဖြင့် လူ ၂ ဦးသေဆုံး ကာ အဆောက်အအုံ ၇၀၀,၀၀၀ ကျော်သည် လျှပ်စစ်ဓာတ်အား ပြတ်တောက်မှုဒဏ်ကို ခံနေရကြောင်း အယ်လ်ဂျာဇီးယားမှ ဖော်ပြခဲ့သည်။

ထို့နောက် ထောင်နှင့်ချီသည့် လေကြောင်းခရီးစဉ်များကို ဖျက်သိမ်း၊ ရွှေ့ဆိုင်းခဲ့ရသည်။ 

အလာဘားမား (Alabama) မှ နယူးယောက်ခ် (New York) ပြည်နယ်အထိ အမေရိကန်အရှေ့ပိုင်း ပင်လယ် ကမ်းခြေ ဒေသများတွင် လေပြင်းများ တိုက်ခတ်ခြင်း၊ မိုးသီးများကြွေခြင်း၊ မိုးသည်းထန်စွာ ရွာသွန်းခြင်းတို့နှင့် အတူ တော်နယ်ဒို (Tornado) မုန်တိုင်း သတိပေးချက် အပါအဝင် ပြင်းထန်သော မိုးလေဝသ အန္တရာယ် သတိပေး နှိုးဆော်ချက်များ ထုတ်ပြန်ခဲ့သည်။

အမေရိကန်မှာ မုန်တိုင်းတိုက်ခတ်မှုကြောင့် ဒေသခံများ အကာအကွယ်ရှာနေကြစဉ်

အမျိုးသား မိုးလေဝသဌာန (NWS) ကမူ လေတိုက်နှုန်း တစ်နာရီ မိုင် ၈၀ (ကီလိုမီတာ ၁၃၀) ရှိသည့် လေပြင်းများ နှင့်အတူ အန္တရာယ် အသင့်အတင့်ရှိသည့် ကြောက်မက်ဖွယ် မုန်တိုင်းများ တိုက်ခတ်နိုင်သည်ဟု ခန့်မှန်းချက် ထုတ်ပြန်ခဲ့သည်။ 

"မိုးလေဝသ အခြေအနေကို သတိထားဖို့နဲ့ သက်ဆိုင်ရာရဲ့ သတိပေးချက်တွေကို အမြဲမပြတ် သိရှိနိုင်မယ့် နည်းလမ်းတွေ ရှာဖွေထားကြပါ"ဟု NWS က ဘယ်လ်တီမိုး (Baltimore) ၊ ဝါရှင်တန် (Washington) တို့တွင် သတိပေးချက် ထုတ်ပြန်ခဲ့သည်။

မုန်တိုင်းများ၏ ပျံ့နှံ့မှုသည် အလွန်ကြီးမားပြီး တော်နယ်ဒို သတိပေးချက်များကို တန်နက်ဆီ (Tennessee) မှ နယူးယောက်ခ် (New York) အထိ ပြည်နယ်ပေါင်း ၁၀ ခုတွင် ထုတ်ပြန်ခဲ့သည်။

ဝါရှင်တန်-ဘယ်လ်တီမိုး ဒေသသည် အစိုးရိမ်ရဆုံး ဒေသဖြစ်သည်ဟုလည်း NWS က ပြောသည်။

အမေရိကန်မှာ မုန်တိုင်းကြောင့် သစ်ပင်များ ချိုးချနေစဉ်

အချို့နေရာဒေသများတွင် မိုးသည်းထန်စွာ ရွာသွန်းမှုကြောင့် ရေလွှမ်းမိုးမှုများနှင့်အတူ ဗာဂျီးနီးယား (Virginia) ပြည်နယ်တွင် လုံးပတ် ၄ ဒသမ ၅ လက်မရှိသည့် မိုးသီးများကြွေခဲ့သည်ဟု NWS က ထုတ်ပြန်ခဲ့သည်။

သြဂုတ် ၇ ရက်နေ့ နှောင်းပိုင်းတွင် အမေရိကန်အရှေ့ဘက် ကမ်းရိုးတန်းရှိ အဆောက်အအုံပေါင်း ၇၀၀,၀၀၀ တွင် လျှပ်စစ်ဓာတ်အားများ ပြတ်တောက်ခဲ့ပြီး ထိုနေ့မှာပင် အမေရိကန်လေကြောင်းခရီးစဉ် ၁၇၀၀ ကျော်ကို ဖျက် သိမ်းခဲ့ရကာ လေကြောင်းခရီးစဉ် ၈၀၀၀ ကို ရက်ရွှေ့ဆိုင်းခဲ့ရသည်ဟု FlightAware ဝက်ဘ်ဆိုက်တွင် ဖော်ပြထား သည်။

ဝါရှင်တန်တွင်လည်း မိုးလေဝသ အခြေအနေကြောင့် အစိုးရဝန်ထမ်းများကို မိမိတို့ နေအိမ်များသို့ လျင်မြန်စွာ ပြန်နိုင်စေရန် ရုံးဆင်းချိန်ကို ညနေ ၃ နာရီ သတ်မှတ်ခဲ့သည်။
တက္ကဆက် (Texas)၊ လူဝီစီယားနား (Louisiana) နှင့် ဖလော်ရီဒါတို့ အပါအဝင် အမေရိကန်တောင်ပိုင်း ပြည်နယ် များတွင် အပူချိန် ၄၂ ဒီဂရီ ဆဲလ်စီးယပ်စ်အထိ မြင့်တက်မည်ဟု ခန့်မှန်းထားချိန်တွင် အမေရိကန် အရှေ့ပိုင်း၌  မုန်တိုင်းများ တိုက်ခတ်ခဲ့ခြင်း ဖြစ်သည်။

ကမ္ဘာကြီး ပူနွေးလာမှုနှင့်အတူ ရာသီဥတု ဖောက်ပြန်ပြောင်းလဲမှုကြောင့် ယခုကဲ့သို့ ဆိုးရွားပြင်းထန်သည့် မိုးလေဝသ အခြေအနေများ မကြာခဏ ဖြစ်ပွားလာခဲ့ခြင်း ဖြစ်သည်ဟု သိပ္ပံပညာရှင်များက ပြောကြားခဲ့သည်။

Source: အယ်လ်ဂျာဇီးယား

CNI International News

ဝါရှင်တန်၊ သြဂုတ် ၉

အမေရိကန်နိုင်ငံ မွန်တားနားပြည်နယ်ရှိ နျူကလီးယား ဒုံးကျည်စခန်း၏ ဒုံးကျည်ပစ်လွှတ်မှု ထိန်းချုပ်ရေး မြေအောက်စခန်းများတွင် ကင်ဆာဖြစ်စေနိုင်သည့် ကာစီနိုဂျင် (Carcinogen) ဓာတ်ပစ္စည်းကို အမေရိကန် လေတပ်က ထောက်လှမ်း တွေ့ရှိခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

အဆိုပါ တွေ့ရှိမှုသည် ဒုံးကျည်စခန်းများ၏ ဝန်ထမ်းများအကြား စိုးရိမ်မှုများ မြင့်တက်နေသည့် အခြေအနေကို ဖြေရှင်းရန် ကြိုးပမ်းနေသည်။

ထို့နောက် အမေရိကန်၏ တိုက်ချင်းပစ် ပဲ့ထိန်းဒုံးကျည် စခန်းများထံမှ စုဆောင်းရရှိသော ပထမဆုံး နမူနာ ပုံစံများကို တွေ့ရှိခဲ့ကြောင်း အမေရိကန်လေတပ်၏ ကမ္ဘာလုံးဆိုင်ရာ တိုက်ခိုက်ရေး ဌာနချုပ် (US Air Force Global Strike Command)က သြဂုတ် ၇ ရက်တွင် အစီရင်ခံစာ ထုတ်ပြန်ခဲ့သည်။

ပုံ - အမေရိကန်လေတပ်၏ ကမ္ဘာလုံး ဆိုင်ရာ တိုက်ခိုက်ရေး ဌာနချုပ်မှ တပ်မှူးဖြစ်သူ ဗိုလ်ချုပ်ကြီး သောမတ် ဘတ်စီယာကို တွေ့ရစဉ်

မွန်တားနားပြည်နယ် Malmstrom လေတပ်စခန်း၏ အဆောက်အအုံနှစ်ခုမှ စုဆောင်းရရှိခဲ့သည့် နမူနာများတွင် လူလုပ် သဘာဝဓာတုပစ္စည်းများဖြစ်သည့် PCB အဆင့်သည် သဘာဝပတ်ဝန်းကျင် ကာကွယ်ရေး အေဂျင်စီ (EPA) က အကြံပြုထောက်ခံထားသော အဆင့်ထက် ပိုမိုမြင့်မားနေသည်ကို တွေ့ရှိခဲ့သည်။

PCB များသည် ဆီ သို့မဟုတ် အရည်ပျော်လွယ်သည့် ဖယောင်းကဲ့သို့ ဓာတ်ပစ္စည်းများဖြစ်ပြီး ထိုအရာများသည် ကာစီနိုဂျင်များ ဖြစ်နိုင်သည်ဟု EPA က သတ်မှတ်ထားသည်။

ထိုအကြောင်းအရာနှင့် ပတ်သက်ပြီး ထိခိုက်ခဲ့ရသည့် အဆောက်အအုံများကို ရှင်းလင်းရန် အပြင်  ဘေးအန္တရာယ် နှင့်ထိတွေ့ခဲ့ဖွယ်ရှိသည့် လေတပ်ဝန်ထမ်းများ၊ ကြီးကြပ်သူများ၏ ကျန်းမာရေးအန္တရာယ်ကို အတတ်နိုင်ဆုံး လျှော့ချရန် လုပ်ဆောင်ရမည့် စီမံကိန်းများကို ချက်ချင်းညွှန်ကြားခဲ့သည်ဟု အမေရိကန်လေတပ်၏ ကမ္ဘာလုံး ဆိုင်ရာ တိုက်ခိုက်ရေး ဌာနချုပ်မှ တပ်မှူးဖြစ်သူ ဗိုလ်ချုပ်ကြီး သောမတ် ဘတ်စီယာ (Thomas Bussiere) က ပြောကြောင်း အေပီ သတင်းဌာနမှ ဖော်ပြခဲ့သည်။

ဇန်နဝါရီလအတွင်း အေပီသတင်းဌာနက ရရှိခဲ့သည့်် စစ်ရေးမှတ်တမ်းများအရ Malmstrom လေတပ်စခန်းတွင် လက်ရှိ တာဝန်ထမ်းဆောင်ဆဲ ဝန်ထမ်းများနှင့် တာဝန်မှ အနားယူသွားသည့် ဝန်ထမ်းဟောင်း ၉ ဦးသည် ရှားပါး သွေးကင်ဆာတစ်မျိုးဖြစ်သည့် non-Hodgkin lymphoma ကင်ဆာကို ခံစားခဲ့ရကြောင်း တွေ့ရှိရသည်။

ပုံ - Malmstrom လေတပ်စခန်းက ဒုံးကျည်များတပ်ဆင်နေစဉ်

non-Hodgkin lymphoma ရောဂါသည် သွေးကင်ဆာတစ်မျိုးဖြစ်ပြီး လူ့ခန္ဓာကိုယ်အတွင်းရှိ ရောဂါများကို တိုက်ဖျက်သည့် သွေးဖြူဆဲလ်များ ပါရှိသည့် ကိုယ်တွင်းထွက် အရည်ကြည်စနစ်ကို အသုံးချပြီး ကင်ဆာဆဲလ်များ ပျံ့နှံ့သည့် ရောဂါတစ်မျိုး ဖြစ်သည်။

NGO အဖွဲ့တစ်ခုဖြစ်သည့် Torchlight Initiative ၏ အဆိုအရ နျူကလီးယား ဒုံးကျည်စခန်းများတွင် တာဝန် ထမ်းဆောင်ခဲ့သည့် စစ်သား ၂၆၈ ဦး သို့မဟုတ် ၎င်းတို့၏ အသက်ရှင် ကျန်ရစ်သည့် မိသားစုဝင်များသည် ပြီးခဲ့သည့် ဆယ်စုနှစ်များအတွင်း ကင်ဆာရောဂါ၊ သွေးရောဂါ သို့မဟုတ် အခြားရောဂါများကို ခံစားခဲ့ရသည်ဟု ဖော်ပြခဲ့သည်။

ထိုစစ်သားများအနက် ၂၁၇ ဦးသည် ကင်ဆာရောဂါများ ခံစားခဲ့ရပြီး ၎င်းတို့ထဲမှ ၃၃ ဦးသည် non-Hodgkin lymphoma ကင်ဆာရောဂါကို ခံစားခဲ့ရသည်ဟု Torchlight Initiative အဖွဲ့က ထုတ်ပြန်ခဲ့သည်။

Source: အယ်လ် ဂျာဇီးယား

CNI International News

နယူးဒေလီ၊ သြဂုတ် ၉

အိန္ဒိယနိုင်ငံသည် စစ်ဘက်သုံး ဒရုန်းများထုတ်လုပ်သည့် ပြည်တွင်းကုမ္ပဏီများအား တရုတ်လုပ် ပစ္စည်းများကို အသုံးမပြုရန် မကြာသေးမီ လများအတွင်းက တားမြစ်ပိတ်ပင်ခဲ့သည်ဟု ရိုက်တာမှ ဖော်ပြခဲ့သည်။ 

ထောက်လှမ်းရေး အချက်အလက်များ ကျိုးပေါက်မည့် အန္တရာယ်ကို စိုးရိမ်ခြင်းကြောင့် ထိုကဲ့သို့ ပိတ်ပင်ခဲ့ခြင်း ဖြစ်သည်ဟု အမည်မဖော်လိုသည့် ကာကွယ်ရေးနှင့် စက်မှုအရာရှိ လေးဦးက ပြောကြားခဲ့သည်။

အိန္ဒိယသည် quadcopter ကဲ့သို့ မောင်းသူမဲ့ယာဉ်များအား ပိုမိုကောင်းမွန်စွာ အသုံးပြုနိုင်ရန် စစ်တပ်ကို အဆင့် မြှင့်တင်နေချိန်နှင့် နျူကလီးယား လက်နက်ပိုင်ဆိုင်သည့် တရုတ်နှင့် တင်းမာမှုများ မြင့်တက်နေချိန်တွင် တရုတ် ပစ္စည်းများကို ပိတ်ပင်ခဲ့ခြင်း ဖြစ်သည်။

သို့သော် အိန္ဒိယ၏ အခြေတည်စ စက်မှုကဏ္ဍသည် စစ်တပ်၏ လိုအပ်ချက်ကို ပြည့်မီစေရန် ကြိုးပမ်းနေရချိန်တွင် ဒရုန်းများ၌ အသုံးပြုသည့် တရုတ်နိုင်ငံလုပ် ဆက်သွယ်ရေးပစ္စည်းများ၊ ကင်မရာများ၊ ရေဒီယို ထုတ်လွှင့်မှု စနစ် များနှင့် ဆော့ဖ်ဝဲများကြောင့် ထောက်လှမ်းရေးသတင်း ကျိုးပေါက်မည့်အရေးအား အိန္ဒိယ၏ ကာကွယ်ရေးနှင့် စက်မှုကဏ္ဍမှ အရာရှိများက စိုးရိမ်နေသည်။

အိန္ဒိယစစ်တပ်က ဒရုန်းအသုံးပြုနေစဉ်

အိန္ဒိယအစိုးရနှင့် စက်မှုလုပ်ငန်းကဏ္ဍမှ အမည်မဖော်လိုသည့် အရာရှိအချို့သည် ရိုက်တာသတင်းဌာနနှင့် အင်တာဗျူး ပြုလုပ်ခဲ့ချိန်တွင် ထိုအကြောင်းအရာသည် သိမ်မွေ့နက်နဲသဖြင့် မီဒီယာများသို့ ထုတ်ဖော် ပြောဆိုခွင့် မရှိကြောင်း ဖြေကြားခဲ့သည်။

အိန္ဒိယကာကွယ်ရေးဝန်ကြီးဌာနကလည်း ထိုအကြောင်းအရာနှင့် ပတ်သက်ပြီး ရိုက်တာသတင်းဌာန၏ မှတ်ချက် ပေးရန် တောင်းဆိုမှုကို တုံ့ပြန်ခဲ့ခြင်းမရှိပေ။

အမည်မဖော်လိုသည့် အိန္ဒိယကာကွယ်ရေးဝန်ကြီးဌာနမှ ထိပ်သီးအရာရှိ တစ်ဦးကမူ အိန္ဒိယစက်မှု လုပ်ငန်းကဏ္ဍ သည် ဆိုက်ဘာတိုက်ခိုက်မှုများကို စိုးရိမ်နေရသည့်တိုင် ကမ္ဘာ့ဒုတိယ စီးပွားရေး အင်အားကြီး တရုတ်၏ စက်ပစ္စည်း အစိတ်အပိုင်းများအပေါ် မှီခိုနေရကြောင်း ရိုက်တာကို ပြောကြားခဲ့သည်။

တရုတ်ကမူ ဆိုက်ဘာတိုက်ခိုက်မှုများတွင် ပါဝင်ပတ်သက်ခြင်း မရှိကြောင်း ငြင်းဆိုထားသည်။

အိန္ဒိယစစ်တပ်က ဒရုန်းအသုံးပြုနေစဉ်

တရုတ်ကုန်သွယ်ရေး ဝန်ကြီးဌာနကလည်း ဒရုန်းများနှင့် ဆက်စပ်ပစ္စည်း ကိရိယာအချို့ကို ပို့ကုန် ထိန်းချုပ်မှု ပြုလုပ်ကြောင်း ပြီးခဲ့သည့် သီတင်းပတ်က ကြေညာခဲ့သည်။
၂၀၁၉ ခုနှစ်တွင် အမေရိကန် လွှတ်တော်က တရုတ်နိုင်ငံ၌ ပြုလုပ်သည့် ဒရုန်းများနှင့် ဆက်စပ်ပစ္စည်းများကို ဝယ်ယူခြင်း သို့မဟုတ် အသုံးပြုခြင်းကို ပင်တဂွန်အား ပိတ်ပင်ခဲ့သည်။

Source: ရိုက်တာ

CNI International News 

မနီလာ၊ သြဂုတ် ၈

ပိုင်ဆိုင်မှု အငြင်းပွားနေသည့် တောင်တရုတ်ပင်လယ်တွင် တရုတ်ကမ်းခြေစောင့်တပ်ဖွဲ့မှ သင်္ဘောတစ်စင်းက ဖိလစ်ပိုင်သင်္ဘောများကို ပိတ်ဆို့ပြီး ရေအမြောက် (water cannon)ဖြင့် ပစ်ခတ်ခဲ့သည့် ဖြစ်စဉ်အတွက် ဖိလစ်ပိုင် အစိုးရက တရုတ်သံအမတ်ကို ဆင့်ခေါ်ခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။ 

"ကျနော်တို့ရဲ့ နိုင်ငံခြားရေးဝန်ကြီးဟာ တရုတ်သံအမတ် ဟွမ် (Huang) ကို ဒီနေ့မှာ ဆင့်ခေါ်ခဲ့ပြီး ဖြစ်ပျက်ခဲ့တဲ့ အရာတွေအတွက် ဓာတ်ပုံတွေ၊ ဗီဒီယိုတွေ အပါအဝင် အသိပေး ပြောကြားမှုတွေ ပြုလုပ်ခဲ့ပါတယ်" ဟု ဖိလစ်ပိုင် သမ္မတ ဖာဒီနန် မားကို့စ် ဂျူနီယာ (Ferdinand Marcos Jr.) က သြဂုတ် ၇ ရက်တွင် သတင်းထောက်များအား ပြောကြားခဲ့သည်။

သြဂုတ် ၅ ရက်က တရုတ်၏ ကမ်းခြေစောင့်တပ်ဖွဲ့သည် စပရက်တလေ (Spratly) ကျွန်းစု၏ Second Thomas Shoal သောင်အနီးတွင် ဖိလစ်ပိုင် စစ်တပ်၏ အစားအစာ၊ သောက်သုံးရေ၊ လောင်စာနှင့် အခြားလိုအပ်သည့် ပစ္စည်းများကို ထောက်ပံ့ပေးသည့်် ထောက်ပို့သင်္ဘောများကို ပိတ်ဆို့ခဲ့ကြောင်း ဖိလစ်ပိုင်က စွပ်စွဲခဲ့သည်။

အဆိုပါ လုပ်ရပ်များသည် လွန်လွန်ကျူးကျူးဖြစ်ပြီး အန္တရာယ်များသည့် တရားမဝင် လုပ်ရပ်များဟု ဖိလစ်ပိုင်က ရှုတ်ချခဲ့သည်။

 ဖိလစ်ပိုင် ကာကွယ်ရေး၀န်ကြီးကို တွေ့ရစဉ်

ဖိလစ်ပိုင်အနေနှင့် မိမိတို့၏ ပါလာဝမ် (Palawan) ကျွန်းနှင့် ကီလိုမီတာ ၂၀၀ ( ၁၂၄ မိုင်) အကွာအဝေးရှိ Second Thomas သောင်ကို မည်သည့်အခါမျှ စွန့်လွှတ်မည် မဟုတ်ကြောင်း ဖိလစ်ပိုင် ထိပ်သီးအရာရှိ တစ်ဦးက သြဂုတ် ၇ ရက်တွင် ပြောကြားခဲ့သည်။

တရုတ်သည် နှစ်စဉ် ကုန်သွယ်မှုတန်ဖိုး ဒေါ်လာ ထရီလျံချီရှိသည့် သင်္ဘောလမ်းကြောင်းများ ဖြတ်သန်းသွားလာ လေ့ရှိသည့် တောင်တရုတ် ပင်လယ်အတွင်းရှိ ရေပြင်နယ်နိမိတ် အားလုံးနီးပါးကို ပိုင်ဆိုင်ကြောင်း ကြေညာထား ပြီး ၎င်း၏ ကြေညာချက်ကို တရားမဝင်ကြောင်း ဆုံးဖြတ်ခဲ့သည့် နိုင်ငံတကာ ခုံရုံး၏ စီရင်ချက်ကို မျက်ကွယ်ပြုခဲ့သည်။

ထို့ပြင် ဖိလစ်ပိုင်သင်္ဘောများသည် တရုတ်၏ ရေပိုင်နက်အတွင်းသို့ တရားမဝင် ဝင်ရောက်ခဲ့သဖြင့် လိုအပ်သည့် ထိန်းချုပ်ရေး အစီအစဉ်များကို လုပ်ဆောင်ခဲ့ရခြင်း ဖြစ်သည်ဟု တရုတ်အစိုးရက တုံ့ပြန်ခဲ့သည်။

အမေရိကန်နိုင်ငံခြားရေးဝန်ကြီးဌာနကမူ ထိုဖြစ်စဉ်နှင့်ပတ်သက်ပြီး တရုတ်၏ လုပ်ရပ်ကို သြဂုတ် ၇ ရက်တွင် ရှုတ်ချခဲ့သည်။ အမေရိကန်နည်းတူ ဗြိတိန်၊ သြစတြေးလျ၊ ကနေဒါနှင့် ဥရောပသမဂ္ဂတို့ကလည်း တရုတ်၏ လုပ်ရပ်များကို ဝေဖန်ရှုတ်ချခဲ့သည်။

ဖိလစ်ပိုင်နှင့် တရုတ်သည် တောင်တရုတ်ပင်လယ်တွင် ရေပြင်နယ်နိမိတ် ပိုင်ဆိုင်မှုနှင့်ပတ်သက်ပြီး ကာလ ကြာရှည် အငြင်းပွားခဲ့သည့် သမိုင်းကြောင်းရှိခဲ့သည်။

Source: အယ်လ်ဂျာဇီးယား

CNI Interntaional News

နယူးဒေလီ၊ သြဂုတ် ၈

အိန္ဒိယဝန်ကြီးချုပ် မိုဒီ (Narendra Modi)သည် မဏိပူရပြည်နယ်တွင် ဖြစ်ပွားခဲ့သော အကြမ်းဖက်မှုများနှင့် ပတ်သက်ပြီး လွှတ်တော်၌ အယုံအကြည် မရှိအဆို မဲခွဲဆုံးဖြတ်မှုနှင့် ရင်ဆိုင်ရမည်ဟု အေပီမှ ဖော်ပြခဲ့သည်။ 

အိန္ဒိယ၏ ဝေးလံခေါင်သီသည့် အရှေ့မြောက်ပိုင်း မဏိပူရပြည်နယ်တွင် ပြည်တွင်းစစ် ဖြစ်ပွားမည့် အခြေအနေသို့ ရောက်ရှိနေချိန်၌ မိုဒီ၏ နှုတ်ဆိတ်နေမှုအပေါ် အတိုက်အခံများက ဝေဖန်ခဲ့ကြပြီး မိုဒီအား အယုံအကြည်မရှိအဆို ကို မဲခွဲရန် စီစဉ်ခဲ့ကြခြင်း ဖြစ်သည်။

သြဂုတ် ၈ ရက်မှစပြီး အိန္ဒိယ၏ အောက်လွှတ်တော်တွင် မိုဒီအစိုးရအား ဆန့်ကျင်သည့် အယုံအကြည်မရှိအဆို မဲခွဲရေးအတွက် အချေအတင် ဆွေးနွေးမှုများ ပြုလုပ်မည်ဖြစ်သလို သြဂုတ် ၁၀ ရက်နေ့၌ မိုဒီသည် လွှတ်တော်မှာ ဖြေရှင်းရမည် ဖြစ်သည်။

မိုဒီ၏ ဟိန္ဒူမျိုးချစ်ပါတီဖြစ်သည့် BJP ပါတီ လွှမ်းမိုးထားသော မဏိပူရပြည်နယ်တွင် လူမျိုးစု အကြမ်းဖက်မှုများ အဆိုးရွားဆုံး အခြေအနေအထိ ရောက်ရှိခဲ့သည်မှာ သုံးလခန့် ကြာမြင့်လာခဲ့သော်လည်း မိုဒီသည် ထိုအကြောင်း အရာနှင့် ပတ်သက်ပြီး မှတ်ချက်ပေးခဲ့ခြင်း မရှိပေ။

 မဏိပူရပြည်နယ်အတွင်းကို နေရပ်စွန့်ခွာ တိမ်းရှောင်နေကြစဉ်

ထို့ကြောင့် ၎င်း၏ ပျက်ကွက်မှုနှင့်ပတ်သက်ပြီး လွှတ်တော်တွင် အယုံအကြည်မရှိအဆိုကို တင်သွင်းရသည့် အခြေအနေသို့ ရောက်ရှိစေခဲ့သည်။

BJP ပါတီက နေရာအများစု ချုပ်ကိုင်ထားသည့် လွှတ်တော်တွင် အယုံအကြည်မရှိအဆို မဲခွဲမှုကို မိုဒီသည် သေချာပေါက် ကျော်လွှားနိုင်မည် ဖြစ်သော်လည်း ယခုဖြစ်ပျက်နေသည့် နိုင်ငံရေး အခင်းအကျင်းကြောင့် မိုဒီ သည် လွှတ်တော်ရှေ့မှောက်တွင် မဏိပူရ အကျပ်အတည်းကို ဖြေရှင်းရဖွယ် ရှိနေသည်။

မဏိပူရပြည်နယ်အတွင်းက လူမျိုးစု အဓိကရုန်းကြောင့် ပျက်စီးမှုများကိုတွေ့ရစဉ်

မေလ အစောပိုင်းကတည်းက မဏိပူရပြည်နယ်တွင် ဖြစ်ပွားခဲ့သည့် လူမျိုးစု ပဋိပက္ခများကြောင့် လူပေါင်း ၁၅၀ ကျော် သေဆုံးခဲ့ကာ လူပေါင်း ၅၀,၀၀၀ ကျော်ခန့် အိုးမဲ့အိမ်မဲ့ ဖြစ်ခဲ့ရသည်။

"ဝန်ကြီးချုပ်ကတော့ ဒီအရေးကိစ္စမှာ နှုတ်ဆိတ်နေတာဟာ သူ့ကို ထိခိုက်စေမှာ မဟုတ်ဘူးလို့ ယူဆထား ပါလိမ့်မယ်။ သူ့အစိုးရအဖွဲ့ လုပ်နေတဲ့ အလုပ်တွေကနေတစ်ဆင့် အိန္ဒိယပြည်သူတွေနဲ့ အဆက်အသွယ် မပြတ် ဘူးလို့ ထင်ချင်လည်း ထင်နေပါလိမ့်မယ်"ဟု လွတ်လပ်သည့် ဂျာနယ်လစ် တစ်ဦးဖြစ်သည့် အာရာတီ အာရ် ဂျာရက်သ် (Arati R. Jerath) က ပြောကြားခဲ့သည်။

မိုဒီသည် သူ၏အာဏာရပါတီ BJP ထက် ပိုမိုကျော်ကြားနေသဖြင့် လာမည့်နှစ်တွင် ကျင်းပမည့် အထွေထွေ ရွေးကောက်ပွဲမတိုင်မီ မဏိပူရအရေးတွင် နှုတ်ဆိတ်နေခြင်းသည်။
 
သူ၏ နိုင်ငံရေးပုံရိပ်ကို အကာကွယ်ယူခြင်း ဖြစ်နိုင်သည်ဟုလည်း လေ့လာစောင့်ကြည့်သူများက ပြောကြားခဲ့သည်။

Source: အေပီ

CNI International News

နီယာမေ၊ သြဂုတ် ၈

နိုက်ဂျာ၏ အာဏာသိမ်းခေါင်းဆောင်များသည် လေပိုင်နက်ကို ပိတ်ခဲ့ပြီး ဒေသတွင်း နိုင်ငံများသည် နိုက်ဂျာအား ကျူးကျော်ဝင်ရောက်ရန် စီစဉ်နေသည်ဟု စွပ်စွဲခဲ့ကြောင်း အေပီမှ ဖော်ပြခဲ့သည်။

နိုက်ဂျာတွင် သြဂုတ် ၆ ရက်နေ့ နောက်ဆုံးထားပြီး သမ္မတကို အာဏာပြန်အပ်ရန် တောင်းဆိုချက်ကို နိုက်ဂျာ စစ်ခေါင်းဆောင်များက ဖီဆန်ခဲ့ပြီးနောက် နိုက်ဂျာလေပိုင်နက်အပေါ်မှ လေယာဉ်များ ပျံသန်းမည့် ကြိုးပမ်းမှု များကို ချက်ချင်းတုံ့ပြန်သွားမည်ဟု သတိပေးခဲ့သည်။ 

ဒီမိုကရေစီနည်းကျ ရွေးကောက်ခံထားရသည့် သမ္မတ မိုဟာမက် ဘာဇုမ်း (Mohamed Bazoum) ကို သြဂုတ် ၆ ရက် နောက်ဆုံးထားပြီး အာဏာပြန်မအပ်ပါက စစ်အင်အား အသုံးပြုပြီး ဝင်ရောက်မည်ဟု အနောက်အာဖရိက နိုင်ငံများ စီးပွားရေး အဖွဲ့အစည်း (ECOWAS) က သတိပေးခဲ့သည်။ 

ECOWAS မှ ခေါင်းဆောင်များကို တွေ့ရစဉ်

ထိုသတိပေးချက်အရ အာဏာပြန်အပ်ရန် နောက်ဆုံးအချိန် သတ်မှတ်ထားသည့် သြဂုတ် ၆ ရက် ည သန်းခေါင် အချိန်မတိုင်မီ နာရီပိုင်းအလိုတွင် နိုက်ဂျာစစ်ခေါင်းဆောင်များက နိုင်ငံပိုင်ရုပ်သံမှ ကြေညာခဲ့ခြင်း ဖြစ်သည်။

အာဏာသိမ်း ခေါင်းဆောင်များ၏ ပြောရေးဆိုခွင့်ရှိသူ ဒု ဗိုလ်မှူးကြီး အာမန်ဒူ အဗ္ဗဒရာမာနီ (Amadou Abdramane) က အိမ်နီးချင်းနိုင်ငံ တစ်နိုင်ငံသည် နိုက်ဂျာအား ကျူးကျော်ရန် ပြင်ဆင်နေကြောင်းနှင့် နောက်ထပ် သတင်း မထုတ်ပြန်မီ အချိန်အထိ နိုက်ဂျာလေပိုက်နက်ကို ပိတ်ထားမည်ဖြစ်ကြောင်း ပြောကြားခဲ့သည်။

ဗဟိုအာဖရိကမှ နိုင်ငံနှစ်နိုင်ငံသည် နိုက်ဂျာကို ကျူးကျော်ရန် ပြင်ဆင်နေကြောင်း နိုက်ဂျာ စစ်ခေါင်းဆောင်များ က ပြောကြားခဲ့သော်လည်း မည်သည့် နိုင်ငံများဖြစ်သည်ကိုတော့ အသေးစိတ် ထုတ်ပြန်ခဲ့ခြင်း မရှိဘဲ ပြည်သူများ အနေနှင့် နိုင်ငံကို ကာကွယ်ရန် တိုက်တွန်းခဲ့သည်။

လတ်တလောတွင် နိုက်ဂျာ လေပိုင်နက်အနီး တစ်ဝိုက်တွင် ပြေးဆွဲရန် ပြင်ဆင်ထားသည့် နိုင်ငံတကာ လေကြောင်းလိုင်းများသည် ပျံသန်းမည့် လမ်းကြောင်းများကို ပြောင်းလဲခဲ့ရပြီး နိုက်ဂျာတွင်ရှိနေသော အမေရိကန် စစ်မှုထမ်း ၁၁၀၀ ၏ အနာဂတ်ကိုလည်း ရှင်းလင်းစွာ မသိရသေးပေ။

မာလီနဲ့ ဘာကီနာဖာဆို အာဏာသိမ်းခေါင်းဆောင် ၂ ဦးကိုတွေ့ရစဉ်

နိုက်ဂျာ၏ အိမ်နီးချင်း မာလီနှင့် ဘာကီနာဖာဆို စစ်အစိုးရများကမူ နိုက်ဂျာအား ထောက်ခံကြောင်း ပြသရန် နိုက်ဂျာသို့ ကိုယ်စားလှယ်အဖွဲ့များ စေလွှတ်ကြောင်း ကြေညာခဲ့သည်။

ထို့ပြင် နိုက်ဂျာအား ကျူးကျော်ဝင်ရောက်ခြင်းသည် မိမိတို့အား စစ်ကြေညာခြင်း ဖြစ်သည်ဟုလည်း မာလီနှင့် ဘာကီနာဖာဆို စစ်ခေါင်းဆောင်များက သတိပေးခဲ့သည်။

Source: အေပီ