CNI International News

အစ္စလာမ်မာဘက်၊ ဖေဖော်ဝါရီ ၉

ပါကစ္စတန်နိုင်ငံတွင် အထွေထွေရွေးကောက်ပွဲ ကျင်းပခဲ့သည့် ဖေဖော်ဝါရီ ၈ ရက်နေ့မှာ စစ်သွေးကြွများ၏ တိုက်ခိုက်မှုများကြောင့် လူ ၅ ဦးထက်မနည်း သေဆုံးခဲ့သည်ဟု ရိုက်တာမှ ဖော်ပြခဲ့သည်။

ထို့နောက် အာဏာပိုင်များက နိုင်ငံတစ်ဝန်းတွင် ဖုန်းလိုင်းများကို ယာယီဖြတ်တောက်ခဲ့ပြီး ကုန်းကြောင်းနယ်စပ် အချို့ကို ပိတ်ခဲ့ရသည်။

ဖေဖော်ဝါရီ ၇ ရက်က နိုင်ငံအနောက်တောင်ပိုင်း ဘာလိုချီစတန် (Balochistan) ပြည်နယ်တွင် ရွေးကောက်ပွဲဝင် ကိုယ်စားလှယ်လောင်းများ၏ ရုံးခန်းများအနီး၌ ပေါက်ကွဲမှု နှစ်ခုဖြစ်ပွားခဲ့ပြီး လူ ၂၆ ဦးထက်မနည်း သေဆုံးခဲ့ သည်။

ထို့နောက် ဖေဖော်ဝါရီ ၈ ရက်တွင် တိုက်ခိုက်မှုများ ဖြစ်ပွားခဲ့သည်ဟု ပါကစ္စတန်ပြည်ထဲရေးဝန်ကြီးက ပြောကြား ခဲ့သည်။

အိုင်အက်စ်(IS)အဖွဲ့ကမူ ထိုတိုက်ခိုက်မှုများကို ၎င်းတို့ လုပ်ဆောင်ကြောင်း ကြေညာခဲ့သည်။ 

 ပါကစ္စတန်လုံခြုံရေးတပ်ဖွဲ့ကိုတွေ့ရစဉ်

"မကြာသေးခင်က နိုင်ငံအတွင်း ဖြစ်ပွားခဲ့တဲ့ အကြမ်းဖက်မှုတွေကြောင့် တန်ဖိုးရှိတဲ့ လူ့အသက်တွေ ဆုံးရှုံးခဲ့ရပါ တယ်။ တရားဥပဒေစိုးမိုးရေးကို ထိန်းသိမ်းဖို့နဲ့ ဖြစ်လာနိုင်ခြေရှိတဲ့ ခြိမ်းခြောက်မှုတွေကို ဖြေရှင်းဖို့ လုံခြုံရေး အစီအစဉ်တွေဟာ မရှိမဖြစ် အရေးကြီးပါတယ်" ဟု ပါကစ္စတန် ပြည်ထဲရေးဝန်ကြီးဌာနက X လူမှုမီဒီယာတွင် ဖော်ပြခဲ့သည်။

ထို့ပြင် လမ်းများပေါ်နှင့် နိုင်ငံတစ်ဝန်းရှိ မဲရုံများတွင် စစ်သားများကို ဖြန့်ကြက်ချထားခဲ့ပြီး အီရန်၊ အာဖဂန်နစ္စတန် နိုင်ငံတို့နှင့် ထိစပ်နေသည့် နယ်စပ်များကို ယာယီပိတ်ခဲ့သည်။

ဖေဖော်ဝါရီ ၈ ရက်က နိုင်ငံအနောက်မြောက်ပိုင်း ဒီရာ အစ္စမေးလ် ခန်း (Dera Ismail Khan) ခရိုင်၏ ကူလာချီ (Kulachi) ဒေသတွင် ကင်းလှည့်နေသည့် ရဲတပ်ဖွဲ့ကို စစ်သွေးကြွများက ဗုံးခွဲတိုက်ခိုက်ခြင်း ပစ်ခတ်တိုက်ခိုက် ခြင်းတို့ ပြုလုပ်ခဲ့သဖြင့် ရဲအရာရှိ ၄ ဦး သေဆုံးခဲ့သည်ဟု ဒေသခံရဲတပ်ဖွဲ့ အကြီးအကဲ ရာအူဖ် ကာအီဆရာနီ (Rauf Waisrani) က ပြောကြားခဲ့သည်။

ထို့ပြင် ကူလာချီဒေသ၏ မြောက်ဘက် ကီလိုမီတာ ၄၀ အကွာရှိ တန့်ခ် (Tank) မြို့တွင် သေနတ်သမားများက လုံခြုံရေးတပ်ဖွဲ့၏ ကားတစ်စီးကို ပစ်ခတ်တိုက်ခိုက်ခဲ့သဖြင့် လူတစ်ဦး သေဆုံးခဲ့သည်ဟု ဆိုသည်။ 

အလားတူ ဘာလိုချီစတန်ပြည်နယ်၏ နေရာဒေသအချို့တွင်လည်း လက်ပစ်ဗုံးများဖြင့် ပစ်ခတ်တိုက်ခိုက်မှုများ ဖြစ်ပွားခဲ့သော်လည်း မဲရုံများနှင့် လူများကို ထိခိုက်ခဲ့ခြင်း မရှိကြောင်း မာကရန် (Makran) ဒေသအကြီးအကဲ ဆာအိဒ် အာမက် အူမရာနီက ပြောကြားခဲ့သည်။

Source: ရိုက်တာ

CNI International News

ပေကျင်း၊ ဖေဖော်ဝါရီ ၉

တရုတ်သည် ထိုင်ဝမ်အရေးနှင့်ပတ်သက်ပြီး အမေရိကန်နှင့်ပဋိပက္ခ ဖြစ်လာနိုင်ခြေရှိသည့် အခြေအနေ အပါအဝင် အနာဂါတ်စစ်ပွဲများ၏ စိတ်မှန်းဖြစ်နိုင်ခြေများတွင် ဒရုန်းများဦးဆောင်သည့် အထူးစစ်ဆင်ရေးကို မဟာဗျူဟာ မြောက် ပြောင်းလဲသည့် ရည်မှန်းချက်ကြီးမားသော အစီအစဉ်ကို ထုတ်ဖော်ခဲ့သည်ဟု Asia Times မှ ဖော်ပြခဲ့ သည်။

တရုတ်စစ်တပ်၏ အစီအစဉ်သည် အန္တရာယ်ကြီးမားပြီး စွန့်စားရသည့် ပြည်ပ အထူးစစ်ဆင်ရေးများတွင် ထိခိုက်မှု များကို လျှော့ချရန် လူသားများအစား စက်ကိရိယာများဖြင့် အစားထိုး အသုံးပြုရန် စီစဉ်ထားကြောင်း ယခုလ အတွင်း တရုတ်၏ SCMP သတင်းစာက ဖော်ပြခဲ့သည်။ 

သိပ္ပံပညာရှင်များသည် တာဝေးပျံသန်းနိုင်သည့် မောင်းသူမဲ့လေယာဉ်များ၊ ရေအောက်အနက်တွင် အချိန်ကြာမြင့် စွာနေနိုင်ပြီး လှုပ်ရှားသွားလာနိုင်သည့် မောင်းသူမဲ့ယာဉ်များကို ထုတ်လုပ်ရန် တရုတ်ပြည်သူ့လွတ်မြောက်ရေး တပ်မတော် (PLA) နှင့် လက်တွဲ လုပ်ဆောင်နေသည်ဟု SCMP က ဖော်ပြခဲ့သည်။

 တရုတ်စစ်တပ်သုံး ဒရုန်းကို တွေ့ရစဉ်

PLA ၏ အမှတ် ၇၈၀၉၂ တပ်ဖွဲ့က အနာဂါတ်တွင် ဖြစ်နိုင်ခြေရှိသည့် ပြည်ပအထူးစစ်ဆင်ရေးအစီအစဉ်များ၏ အသေးစိတ် အချက်အလက်များကို Fire Control & Command Control ဂျာနယ်တွင် ရေးသားဖော်ပြခဲ့သည်။

ထိုအစီအစဉ်သည် တရုတ်ကုမ္ပဏီများ၊ အင်ဂျင်နီယာများနှင့် သိပ္ပံပညာရှင်များအား စစ်တပ်၏ လိုအပ်ချက်များနှင့် မဟာဗျူဟာမြောက် ရည်မှန်းချက်များကို သိရှိနားလည်စေရန်ရည်ရွယ်သည်ဟု ပြောသည်။ 

PLA ၏ အစီအစဉ်အရ ၂၀၃၅ ခုနှစ်တွင် တရုတ်နှင့် အခြား အမည်ဖော်ပြထားခြင်း မရှိသည့် အိမ်နီးချင်းနိုင်ငံ အကြား အသေးစား ပဋိပက္ခဖြစ်ပွားမှု အခြေအနေကို စိတ်ကူးဖြင့် ပုံဖော်ထားပြီး နှစ်ဖက်စလုံးသည် အသေးစား သင်္ဘောများ၊ ဒရုန်းများနှင့် လေယာဉ်ပစ် သေနတ်များ အပါအဝင် လက်နက်ငယ်များ တပ်ဆင်ထားသည့် ကန့်သတ်တိုက်ပွဲဖြင့် တိုက်ခိုက်ရန် သဘောတူထားသည့် ပုံစံမျိုး ဖော်ပြခဲ့သည်။

၂၀၃၅ ခုနှစ် စိတ်မှန်းဖြစ်နိုင်ခြေတွင် PLA သည် ရန်သူ့နယ်မြေအတွင်းရှိ နက်ရှိုင်းသည့် နေရာများတွင်ရှိသော ထိန်းချုပ်ရေးနှင့် ထောက်ပံ့ရေး နေရာများ အပါအဝင် ရန်သူများ၏ အဓိက စခန်းများကို လျင်မြန်စွာနှင့် တိတ်ဆိတ်စွာ တိုက်ခိုက်ရန် တာဝန်ယူရမည် ဖြစ်သည်။ 

တရုတ်စစ်တပ်သုံး စစ်ဘက်လက်နက်ကိုတွေ့ရစဉ်

မောင်းသူမဲ့ လေယာဉ်များကို သီးခြား စစ်ဆင်ရေးနှင့် ပူးတွဲစစ်ဆင်ရေးများတွင်ပါ အသုံးပြုနိုင်ရန် ရည်ရွယ် တည်ဆောက်ခဲ့ပြီး အမြင့်ပေ နိမ့်သည့်နေရာတွင် ပျံသန်းခြင်း၊ လမ်းကြောင်းပြ အတားအဆီးများကို ရှာဖွေခြင်း၊ ရန်သူတပ်ဖွဲ့များကို ထိတွေ့တိုက်ပွဲဝင်ပြီး ချေမှုန်းခြင်းတို့အတွက် ရည်ရွယ်ထားကြောင်း SCMP က ဖော်ပြခဲ့ သည်။ 

ထို့ပြင် ခေတ်မီ ထောက်လှမ်းရေး၊ စောင့်ကြည့်ရေးနှင့် ကင်းထောက်စနစ်များကိုလည်း တိုက်ခိုက်မှု၏ ကနဦး အဆင့်တွင် အသုံးပြုသွားမည်ဖြစ်ပြီး နောက်ထပ် တိုက်ခိုက်မှုများ ဆက်လက် လုပ်ဆောင်ရန် သင့်/မသင့်နှင့် ထိခိုက်ပျက်စီးမှုများ လေ့လာသုံးသပ်သွားမည်ဟု ဆိုသည်။ 

PLA သည် ထိုနည်းဗျူဟာကို အမေရိကန်စစ်တပ်၏ နည်းဗျူဟာများအပေါ် အခြေခံပြီး ဉာဏ်ကွန့်မြူးကာ အစီအစဉ်ရေးဆွဲခဲ့ခြင်းဖြစ်သည်ဟု SCMP က ဖော်ပြခဲ့သည်။

Source: Asia Times

CNI International News

ကိယက်ဗ်၊ ဖေဖော်ဝါရီ ၉

ရုရှားနှင့်ဖြစ်ပွားနေသည့် စစ်ပွဲ ၂ နှစ်နီးပါး ကြာမြင့်လာချိန်တွင် ယူကရိန်းစစ်သားအင်အား လျော့နည်းလာသဖြင့် ယူကရိန်းသည် ကမ္ဘာ့သက်တမ်းအရှည်ဆုံး ပြည်တွင်းစစ်များထဲ၌ တစ်ခု အပါအဝင်ဖြစ်သော ကိုလံဘီယာနိုင်ငံမှ အတွေ့အကြုံရင့် စစ်သားများ၏ အကူအညီကို ရယူနေရသည်ဟု အေပီမှ ဖော်ပြခဲ့သည်။ 

ရုရှားကို တိုက်ခိုက်နေရသည့် ယူကရိန်း၏ စစ်ပွဲတွင် ပြည်ပနိုင်ငံများမှ တိုက်ခိုက်ရေးသမားများကို ယူကရိန်း ဘက်ကနေ ပူးပေါင်းပါဝင်ရန် ယူကရိန်းသမ္မတ ဇာလန်းစကီး (Volodymyr Zelenskyy)က ပြည်ပနိုင်ငံများကို အကူအညီ တောင်းခံခဲ့သည်။

ထို့နောက် စစ်ရေးကျွမ်းကျင်သည့် ကိုလံဘီယာစစ်သားများသည် ယူကရိန်းနိုင်ငံကို လုပ်အားပေးအနေဖြင့် လာရောက်ခဲ့ကြသည်။

အဆိုပါ ကိုလံဘီယာ စစ်သားများထဲတွင် မက်ဒလင်း (Medellin) မြို့မှ အသက် ၃၂ နှစ်အရွယ် ချီချို (Checho) အမည်ရှိ စစ်သားတစ်ဦးလည်း ပါဝင်ခဲ့ပြီး သူသည် ရုရှားတပ်ဖွဲ့များနှင့် ၃ ရက်ကြာ ဖြစ်ပွားခဲ့သည့် တိုက်ပွဲ တစ်ခု၌ ဒဏ်ရာရရှိခဲ့သော ရဲဘော်ရဲဘက်များကို ကယ်တင်ရန် ကြိုးပမ်းခဲ့သည်။ 

ယူကရိန်းစစ်ဦးစီးချုပ်နဲ့ ကိုလံဘီယာစစ်သားတွေကို တွေ့ရစဉ်

ထိုအချိန်တွင် ၎င်းတို့တပ်ဖွဲ့သည် ရုရှား၏ ဒရုန်းတိုက်ခိုက်မှုများကြောင့် ချီချို၏ မေးရိုး၌ ဗုံးစထိမှန်ခဲ့သည်။ 

"ကျနော်ကတော့ ကိုယ့််ကိုယ်ကို သေပြီလို့ ထင်ခဲ့ပါတယ်" ဟုလုံခြုံရေးကြောင့် ချီချိုဟူသည့် အမည်လွှဲကို အသုံးပြုနေသော ကိုလံဘီယာစစ်သားက ပြောသည်။

"အဲဒီအချိန်က ကျနော်တို့ တိုက်ခိုက်ခံရပြီးတဲ့နောက် ကိုယ့်အသက် မသေစေဖို့ တပ်စွဲထားတဲ့နေရာက ထွက်ပြေး ခဲ့ရပါတယ်။ ပုန်းစရာနေရာ မရှိခဲ့ပါဘူး" ဟု ၎င်းက ဆက်ပြောသည်။

ကိုလံဘီယာစစ်တပ်သည် မူးယစ်ဆေးဝါး မှောင်ခိုကူးသည့် ဂိုဏ်းများနှင့်  သူပုန်အဖွဲ့များကို ဆယ်စုနှစ်များစွာကြာ တိုက်ခိုက်ခဲ့သဖြင့် ကိုလံဘီယာစစ်သားများသည် ကမ္ဘာပေါ်တွင် တိုက်ပွဲအတွေ့အကြုံ အရင့်ကျက်ဆုံး စစ်သား များထဲတွင် ပါဝင်နေသည်။ 

ထို့ပြင် ကိုလံဘီယာစစ်တပ်သည် လက်တင်အမေရိကတွင် ဘရာဇီးလ်နိုင်ငံပြီးလျှင် ဒုတိယ စစ်အင်အား အကြီးဆုံးဖြစ်ပြီး စစ်သားအင်အား ၂၅၀,၀၀၀ ခန့်ရှိသည်။ 

ကိုလံဘီယာစစ်သားတွေကိုတွေ့ရစဉ်

ထို့ပြင် ကိုလံဘီယာ စစ်တပ်တွင် တစ်နှစ်လျှင် အငြိမ်းစားယူသည့် စစ်သားပေါင်း ၁၀၀၀၀ ကျော်ရှိသည်။ 

၂၀၂၂ ခုနှစ် အစောပိုင်းက ယူကရိန်းနိုင်ငံတွင် ပြည်ပနိုင်ငံ ၅၂ နိုင်ငံမှ လုပ်အားပေး တိုက်ခိုက်ရေးသမားပေါင်း ၂၀,၀၀၀ ခန့်ရှိခဲ့ကြောင်း အာဏာပိုင်များက ပြောကြားခဲ့သည်။ 

လက်ရှိတွင် ယူကရိန်းဘက်မှ ပါဝင်တိုက်ခိုက်ပေးနေသည့် ပြည်ပစစ်သား အရေအတွက်ကို လျှို့ဝှက်ထားပြီး စစ်မြေပြင်သို့ စေလွှတ်ထားသော ပြည်ပစစ်သား အရေအတွက်အား ထုတ်ပြန်ခဲ့ခြင်း မရှိသော်လည်း ပြည်ပ စစ်သားများ၏ အမည်များကို ပြောင်းလဲထားကြောင်း ယူကရိန်းအာဏာပိုင်များက ပြောကြားခဲ့သည်။

Source: အေပီ

CNI International News

ကိုင်ရိုင်၊ ဖေဖော်ဝါရီ ၈

၁၉၆၇ ခုနှစ်က အရှေ့ဂျေရုဆလင် (East Jerusalem) နှင့် ထိစပ်နေသည့် နယ်စပ်များကို အခြေခံပြီး အသိအမှတ် ပြုခံခဲ့ရသည့် လွတ်လပ်သည့် ပါလက်စတိုင်းနိုင်ငံ ပေါ်ပေါက်လာခြင်းမရှိပါက အစ္စရေးနှင့် သံတမန် ဆက်ဆံရေး များ ရှိလာလိမ့်မည် မဟုတ်ကြောင်း ဆော်ဒီအာရေဗျနိုင်ငံက ပြောကြားခဲ့သည်ဟု ရိုက်တာမှ ဖော်ပြခဲ့သည်။

ထို့ပြင် ဂါဇာကမ်းမြောင်ဒေသတွင် အစ္စရေး၏ တိုက်ခိုက်မှုများ မရပ်တန့်မချင်း သံတမန်ဆက်ဆံရေး ထူထောင် မည်မဟုတ်ကြောင်းလည်း ဆော်ဒီအစိုးရက အမေရိကန်ကို ပြောကြားခဲ့သည်ဟု ဆော်ဒီနိုင်ငံခြားရေးဝန်ကြီးဌာန က ဖေဖော်ဝါရီ ၇ ရက်တွင် ထုတ်ပြန်ခဲ့သည်။

ဆော်ဒီအာရေဗျနှင့် အစ္စရေးအကြား သံတမန်ဆက်ဆံရေး ပုံမှန်ပြန်လည် ထူထောင်ရန် ဆွေးနွေးမှုများ ဆက်လက်လုပ်ဆောင်ရန် ဆန္ဒရှိနေသည့် အပြုသဘောဆောင်သော တုန့်ပြန်ချက်ကို အမေရိကန်သမ္မတ ဂျိုးဘိုင်ဒန် (Joe Biden) အစိုးရအဖွဲ့က လက်ခံရရှိခဲ့ကြောင်း ဖေဖော်ဝါရီ ၆ ရက်က အိမ်ဖြူတော် အမျိုးသား လုံခြုံရေး ပြောရေးဆိုခွင့်ရှိသူ ဂျွန်ကာဘီ (John Kirby) က ပြောကြားခဲ့ပြီးနောက် ဆော်ဒီ၏  ထုတ်ပြန်ချက် ထွက်ပေါ်ခဲ့ခြင်းဖြစ်သည်။ 

အရှေ့ဂျေရုဆလင်ကို တွေ့ရစဉ်

ကာဘီ၏ မှတ်ချက်စကားနှင့််ပတ်သက်ပြီး ဆော်ဒီအာရေဗျသည် ပါလက်စတိုင်း အရေးနှင့်ပတ်သက်ပြီး မိမိတို့၏ ခိုင်မာသည့် သဘောထားကို အမေရိကန်အား ထပ်လောင်း ပြောကြားခဲ့သည်ဟု ထုတ်ပြန်ချက်မှာ ဖော်ပြခဲ့သည်။

၂၀၂၀ ပြည့်နှစ်က ဆော်ဒီ၏ အိမ်နီးချင်းများဖြစ်သည့် ယူအေအီးနှင့် ဘာရိန်းနိုင်ငံတို့သည် အစ္စရေးနှင့် ဆက်ဆံရေး များ ပြန်လည်ထူထောင်ခဲ့ပြီးကတည်းက ဆော်ဒီနှင့် အစ္စရေးအကြား ဆက်ဆံရေးများ ပြန်လည်ထူထောင်ရန် ဆွေးနွေးမှုများ ပြုလုပ်ခဲ့ခြင်းဖြစ်သည်။ 

သို့သော် အစ္စရေးနှင့် ဟားမာ့စ် စစ်ပွဲဖြစ်ပွားလာချိန်တွင် အမေရိကန်က ထောက်ခံထားသည့် ထိုအစီအစဉ်ကို ဆော်ဒီအာရေဗျက ဆိုင်းငံ့ခဲ့သည်ဟု ဆော်ဒီအစိုးရနှင့် နီးစပ်သော သတင်းရင်းမြစ်တစ်ခုက ရိုက်တာ သတင်းဌာန သို့  ၂၀၂၃ ခုနှစ်၊ အောက်တိုဘာလအတွင်းက ပြောကြားခဲ့သည်။

အောက်တိုဘာ ၇ ရက်က ဟားမာ့စ်အဖွဲ့သည် အစ္စရေးနိုင်ငံကို ဝင်ရောက်တိုက်ခိုက်ခဲ့ပြီး လူပေါင်း ၁၂၀၀ ကို သတ်ဖြတ်ခဲ့ကာ လူပေါင်း ၂၅၀ ကျော်ကို ဓားစာခံအဖြစ် ဖမ်းဆီးခေါ်ဆောင် သွားခဲ့ပြီးနောက် အစ္စရေးက ဂါဇာ ကမ်းမြောင်ဒေသကို ပြင်းထန်စွာ တိုက်ခိုက်ခဲ့သဖြင့် ပါလက်စတိုင်း ၂၇,၀၀၀ ကျော် သေဆုံးခဲ့သည်။

Source: ရိုက်တာ

CNI International News

မော်စကို၊ ဖေဖော်ဝါရီ ၈

အရှေ့ဖျားဒေသတွင် အမေရိကန်သည် နောင်တရနိုင်လောက်သည့် စစ်ရေးအရ အရဲစွန့်လှုပ်ရှားမှုကို ပြုလုပ်ဖွယ် ရှိပြီး ကိုရီးယားကျွန်းဆွယ်၏ အခြေအနေကို စိုးရိမ်မှုများ ဖြစ်ပွားစေနိုင်သည်ဟု မြောက်ကိုရီးယားဆိုင်ရာ ရုရှား သံအမတ် အလက်ဇန္ဒား မတ်ဆက်ဂိုရာ (Alexander Matsegora) က ပြောကြားခဲ့ကြောင်း တာ့စ်သတင်းဌာနမှ ဖော်ပြခဲ့သည်။

"ကိုရီးယားကျွန်းဆွယ်ပေါ်က အခြေအနေဟာ အရမ်းစိုးရိမ်ရပါတယ်။ ဘာလို့လဲဆိုတော့ အမေရိကန်ရဲ့ စွန့်စားတဲ့ မူဝါဒတွေကြောင့် ဖြစ်ပါတယ်။ အရှေ့အလယ်ပိုင်းမှာ အမေရိကန်ရဲ့ လုပ်ဆောင်မှုတွေကို ကြည့်ခြင်းအားဖြင့် အမေရိကန်ဟာ အရှေ့ဖျားဒေသမှာလည်း အလားတူ တိုက်ခိုက်မှုတွေ မလုပ်ဆောင်ဘူးလို့ ဘယ်သူကမှ အာမမခံ နိုင်ပါဘူး" ဟု မတ်ဆက်ဂိုရာက တာ့စ်သတင်းဌာနနှင့် ပြုလုပ်သည့် အင်တာဗျူးတွင် ပြောကြားခဲ့သည်။

မြောက်ကိုရီးယားဆိုင်ရာ ရုရှား သံအမတ် အလက်ဇန္ဒား မတ်ဆက်ဂိုရာကို တွေ့ရစဉ်

အမေရိကန်သမ္မတ ရွေးကောက်ပွဲအတွက် ဒီမိုကရက်တစ်ပါတီ ကိုယ်စားပြု ယှဉ်ပြိုင်ခွင့်ရန် ကြိုးပမ်းနေသည့် နစ်ကီ ဟာလေး (Nikki Haley)သည် သမ္မတဟောင်း ဒေါ်နယ်ထရမ့် (Donald Trump) လက်ထက်က အီရန် ဗိုလ်ချုပ်ကြီး ကက်ဆမ် ဆိုလေမာနီ(Qassem Soleimani) လုပ်ကြံသတ်ဖြတ် ခံရချိန်တွင် အီရန်ခေါင်းဆောင် များကို လုပ်ကြံရန် တိုက်တွန်းခဲ့ဖူးကြောင်း မတ်ဆက်ဂိုရာက ပြန်ပြောင်း ပြောကြားခဲ့သည်။

"အမေရိကန်ဟာ အလားတူ ရည်ရွယ်ချက်တွေနဲ့ မြောက်ကိုရီးယား ဆန့်ကျင်မှာ မဟုတ်ဘူးလို့ ကျနော်တို့ သေချာ မပြောနိုင်ပါဘူး" ဟု ၎င်းက ပြောကြားခဲ့သည်။

Source: တာ့စ်

CNI International News

နယူးဒေလီ၊ ဖေဖော်ဝါရီ ၈

အိန္ဒိယဝန်ကြီးချုပ် မိုဒီ (Narendra Modi) ဦးဆောင်သည့် BJP ပါတီ အစိုးရအဖွဲ့သည် အိန္ဒိယနှင့် မြန်မာနယ်စပ် ကို ခြံစည်းရိုး တည်ဆောက်သွားရန် ကတိပြုခဲ့ကြောင်း အိန္ဒိယပြည်ထဲရေးဝန်ကြီး အမစ်ရှား (Amit Shah) က ဖေဖော်ဝါရီ ၆ ရက်တွင် ပြောကြားခဲ့သည်ဟု Northeast Now မှ ဖော်ပြခဲ့သည်။

ဖက်ဒရယ်အစိုးရသည် နိုင်ငံအရှေ့မြောက်ဘက် ၁၆၄၃ ကီလိုမီတာရှည်လျားသည့် အိန္ဒိယ-မြန်မာ နယ်စပ် တစ်လျှောက် ခြံစည်းရိုး တည်ဆောက်ရန် ဆုံးဖြတ်ခဲ့သည်ဟုလည်း အိန္ဒိယပြည်ထဲရေးဝန်ကြီး အမစ်ရှားက ပြောသည်။

ထို့ပြင် နယ်စပ်ဒေသတစ်လျှောက် ထောက်လှမ်းရေးနှင့် ကင်းလှည့် လမ်းကြောင်းများကိုလည်း ပိုမို ကောင်းမွန် စေရန် လုပ်ဆောင်သွားမည်ဟု ၎င်းက ပြောသည်။

 တမူး(မြန်မာ)နဲ့ မိုရေး(အိန္ဒိယ)ကြား နယ်စပ်ခြံစည်းရိုးကာထားစဉ်

လက်ရှိတွင် မဏိပူရ်(Manipur) ပြည်နယ်၊ တန်ဂနျူပယ် (Tengnoupal)ခရိုင်၊ မိုရေး( Moreh) မြို့တွင် ၁၀ ကီလိုမီတာ ရှည်လျားသည့် နယ်စပ်စည်းရိုးကို တည်ဆောက်ထားပြီး ဖြစ်ကြောင်း ရှားက ပြောကြားခဲ့သည်။

ထို့ပြင် နယ်စပ်ဒေသတစ်လျှောက် နှစ်မျိုးစပ် ကင်းထောက်လှမ်းရေးစနစ်(HSS) မှတစ်ဆင့် နယ်စပ်စည်းရိုး တည်ဆောက်သည့် ရှေ့ပြေးစီမံကိန်းနှစ်ခုကို လုပ်ဆောင်နေကြောင်း၊ ထိုရှေ့ပြေး စီမံကိန်းနှစ်ခုအရ အာရုနာချယ် ပရာဒေ့ရှ် ( Arunachal Pradesh) နှင့် မဏိပူရ်ပြည်နယ်တို့တွင် နယ်စပ်ခြံစည်းရိုးများကို ၁ ကီလိုမီတာစီ ချဲ့ထွင် တည်ဆောက်သွားမည်ဖြစ်ကြောင်း ရှားက ပြောသည်။

မဏိပူရ်ပြည်နယ်တွင် နောက်ထပ် ခန့်မှန်းခြေ ၂၀ ကီလိုမီတာရှိသည့် ခြံစည်းရိုး တည်ဆောက်ရေး အစီအစဉ် များကိုလည်း အတည်ပြုထားပြီဖြစ်သည်။

ထို့ကြောင့် မကြာမီအချိန်အတွင်း စတင်လုပ်ဆောင် သွားတော့မည်ဟု အိန္ဒိယပြည်ထဲရေးဝန်ကြီးက ပြောကြားခဲ့ သည်။

Source: Northeast Now

CNI International News

ဘန်ကောက်၊ ဖေဖော်ဝါရီ ၇

ထိုင်းနိုင်ငံက ဦးဆောင်သည့် လူသားချင်းစာနာ ထောက်ထားမှုဆိုင်ရာ အကူအညီပေးရေး အစီအစဉ်များသည် မြန်မာနိုင်ငံတွင် စစ်ပွဲဖြစ်ပွားနေသော လက်နက်ကိုင်များနှင့် မြန်မာ့တပ်မတော်အကြား ဆွေးနွေးညှိနှိုင်းမှုများ ဆီသို့ ဦးတည်ရောက်ရှိစေရန် လမ်းခင်းပေးနိုင်လိမ့်မည်ဟု ယုံကြည်ကြောင်း ထိုင်းဒုတိယနိုင်ငံခြားရေးဝန်ကြီး သီဟဆက်ခ် ဖူအန်ကတ်ကူး (Sihasak Phuangketkeow)က ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့ သည်။

ထိုင်းနိုင်ငံသည် မြန်မာနိုင်ငံတွင် ဖြစ်ပွားနေသည့် တိုက်ပွဲများကြောင့် စစ်ဘေးရှောင် ၂၀,၀၀၀ နှင့် ဒေသခံ အဖွဲ့အစည်းများကို အစားအစာနှင့် ဆေးဝါးများပေးပို့ရန် ယခုလကုန်ပိုင်း၌ မဲဆောက်-မြဝတီ နယ်စပ်အနီးရှိ ထိုင်း-မြန်မာနယ်စပ်မှာ လူသားချင်း စာနာထောက်ထားမှုဆိုင်ရာ ဘေးကင်းလုံခြုံရေး ဇုန်တစ်ခု ထူထောင်ရန် စီစဉ်ထားကြောင်း မစ္စတာ သီဟဆက်ခ်က ပြောသည်။

ထိုအစီအစဉ်သည် မြန်မာနိုင်ငံတွင် မြန်မာ့တပ်မတော်နှင့်  တိုင်းရင်းသား လက်နက်ကိုင်တပ်ဖွဲ့များအကြား ငြိမ်းချမ်းရေးလမ်းစဉ်ကို ဖော်ဆောင်ရန် မစွမ်းဆောင်နိုင်ခဲ့သည့် အာဆီယံ၏ အားထုတ်ကြိုးပမ်းမှုများကို ပိုမိုမြင့်တက်စေလိမ့်မည်ဖြစ်ကြောင်း သီဟဆက်ခ်က ပြောသည်။

ထိုင်းဘက်ကို ကူးပြီး စစ်ရှောင်နေတဲ့ မြန်မာနိုင်ငံသားတွေကို တွေ့ရစဉ်

အဆိုပါ အစီအစဉ်၏ နောက်ဆုံးရည်မှန်းချက်မှာ ပဋိပက္ခကို ထိန်းချုပ်ရန်နှင့် ဆွေးနွေးပွဲများ ပေါ်ပေါက်လာစေရန် ဖြစ်သည်ဟု ဆိုသည်။

"မြန်မာနိုင်ငံမှာ ဒီထက်ပိုပြီး တည်ငြိမ်မှု ပျက်ယွင်းလာမယ့် အခြေအနေမျိုးကို ကျနော်တို့ မမြင်ချင်ပါဘူး" ဟု သီဟဆက်ခ်က ပြောကြားခဲ့ပြီး ထိုအစီအစဉ်သည် ထိရောက်မှု၊  ယုံကြည်အားထားနိုင်မှု၊ ပွင့်လင်းမြင်သာမှု ရှိရမည်ဖြစ်သည်ဟုလည်း ၎င်းက ထပ်လောင်း ပြောကြားခဲ့သည်။

ပြီးခဲ့သည့် သီတင်းပတ်က အာဆီယံ နိုင်ငံခြားရေးဝန်ကြီးများနှင့် မြန်မာ၏ ကိုယ်စားလှယ်တစ်ဦးအကြား ပြဋ္ဌာန်းခဲ့သည့် အစီအစဉ်အရ ထိုင်းနှင့် မြန်မာ ကြက်ခြေနီအဖွဲ့များသည် အာဆီယံ၏ လူသားချင်း စာနာထောက် ထားမှုဆိုင်ရာ အကူအညီပေးရေးအဖွဲ့၏ လေ့လာစောင့်ကြည့်မှုအောက်တွင် ကူညီထောက်ပံ့မှုများကို ပေးပို့ရမည် ဖြစ်သည်။

မြန်မာနိုင်ငံတွင် ၂၀၂၁ ခုနှစ်က မြန်မာ့တပ်မတော်က နိုင်ငံတော်အာဏာကို ရယူခဲ့ပြီးနောက်ပိုင်း ပဋိပက္ခများ ဖြစ်ပွားလာခဲ့သည်။ 

KIA စစ်ဦးစီးချုပ် ခေါင်လွမ်းနဲ့ NUG ကာကွယ်ရေး၀န်ကြီး ဦးရည်မွန်ကိုတွေ့ရစဉ်

ထို့ပြင် မြန်မာနိုင်ငံအတွင်း တိုက်ပွဲများ ဖြစ်ပွားမှုကြောင့် အိမ်ပစ်ရာပစ် ထွက်ပြေးတိမ်းရှောင်ခဲ့ရသူပေါင်း ၂ ဒသမ ၆ သန်း ထက်မနည်းရှိခဲ့ပြီး လူ ၁၈ သန်းကျော်သည် ကူညီထောက်ပံ့မှုများ လိုအပ်နေသည်ဟု ကုလသမဂ္ဂက ပြောကြားခဲ့သည်။

၂၀၂၁ ခုနှစ်၊ ဧပြီလက မြန်မာ့တပ်မတော် ခေါင်းဆောင်များ သဘောတူခဲ့သည့် အာဆီယံ၏ ငြိမ်းချမ်းရေး အစီအစဉ်မှာလည်း တိုးတက်မှုမရှိခဲ့ဘဲ ထိုငြိမ်းချမ်းရေးအစီအစဉ်၏ အဓိကရည်ရွယ်ချက်သည် မြန်မာ့တပ်မတော် နှင့်လက်ကိုင်အဖွဲ့များအကြား ဆွေးနွေးမှုများ ပြုလုပ်ရန်ဖြစ်သည်။

မစ္စတာ သီဟာဆက်ခ်ကမူ ထိုင်းနိုင်ငံ၏ လူသားချင်းစာနာ ထောက်ထားမှုဆိုင်ရာ အစီအစဉ်သည် ထိုဆွေးနွေး မှုများကို ဖြစ်ပေါ်စေနိုင်လိမ့်မည်ဟု ပြောကြားခဲ့သော်လည်း မြန်မာ့တပ်မတော်သည် ဆွေးနွေးမှုများကို သဘောတူမည် ဟုတ်၊ မဟုတ်ကို ၎င်းက ပြောကြားခဲ့ခြင်း မရှိပေ။

Source: ဘန်ကောက်ပို့စ်

CNI International News

ဒီမာပူရ၊ ဖေဖော်ဝါရီ ၇

အိန္ဒိယ-မြန်မာ နယ်စပ်စည်းရိုး တည်ဆောက်မှုနှင့် နှစ်နိုင်ငံအကြား လွတ်လပ်စွာသွားလာခွင့် အစီအစဉ် (FMR) ကို ပယ်ဖျက်မှုသည် မည်သည့်ကောင်းကျိုးမှ ရှိလာလိမ့်မည်မဟုတ်ဘဲ နာဂပြဿနာကို ပိုမိုရှုပ်ထွေးစေရုံသာ ရှိလိမ့်မည်ဟု နာဂအမျိုးသားဆိုရှယ်လစ်ကောင်စီ-ကပ္ပလန်/ယုံးအောင် NSCN-K/YA  အုပ်စုက သတိပေးခဲ့ ကြောင်း Northeast Now မှ ဖော်ပြခဲ့သည်။

မကြာသေးမီက အိန္ဒိယဗဟိုအစိုးရ၏ နယ်စပ်စည်းရိုးထူထောင်မည့် အစီအစဉ်ကို NSCN-K/YA က ရှုတ်ချခဲ့ပြီး ထိုအစီအစဉ်သည် အိန္ဒိယအစိုးရက နာဂနိုင်ငံကို သိမ်းပိုက်ထားမှုအား တရားဝင်မှုရှိစေသည့် အားထုတ်ကြိုးပမ်း မှုဖြစ်ကြောင်း ပြောကြားခဲ့သည်။

နာဂလူမျိုးများသည် ရှေးခေတ်ကတည်းက လွတ်လပ်သည့် လူမျိုးများဖြစ်ပြီး မည်သူ့ကိုမှ ဦးညွှတ်ခြင်း၊ မိမိတို့ နိုင်ငံအတွင်း လာရောက်မှုအတွက် ခွင့်ပြုချက် တောင်းခံခြင်းတို့ မရှိခဲ့ကြောင်း NSCN-K/YA ၏ ဖေဖော်ဝါရီ ၃ ရက်က ထုတ်ပြန်ခဲ့သည်။

 အိန္ဒိယ-မြန်မာနယ်စပ် ခြံစည်းရိုးကို တွေ့ရစဉ်

လုံခြုံရေးနှင့် မူးယစ်ဆေးဝါး ထိန်းချုပ်ရေး ခေါင်းစဉ်အောက်တွင် အစိုးရ၏ အစီအစဉ်သည် နာဂအသိုင်းအဝိုင်းကို နှစ်ခြမ်းကွဲစေနိုင်ပြီး အချုပ်အခြာ အာဏာပိုင်ခွင့်ရရှိရန် ကြိုးပမ်းခြင်းဖြစ်ကြောင်း၊ နာဂလူမျိုးများ၏ ရုန်းကန်နေ ရမှုကို လျော့ပါးစေခြင်းကြောင့် လက်ခံနိုင်စရာမရှိကြောင်း ထုတ်ပြန်ချက်တွင် ဖော်ပြခဲ့သည်။

ပြည်ထဲရေးဝန်ကြီး အမစ် ရှား (Amit Shah) ၏ သေချာမှုမရှိသည့် ခန့်မှန်းချက်များ ထွက်ပေါ်နေသည့်တိုင် အိန္ဒိယနှင့် မြန်မာ နှစ်နိုင်ငံစလုံးတွင် နေထိုင်သည့် နာဂလူမျိုးများသည် မိမိတို့၏ အခွင့်အရေးများကို ချိုးဖောက် ပြီး၊ မိမိတို့၏ အနာဂတ်နှင့် နေထိုင်မှု ဘဝပုံစံကို ခြိမ်းခြောက်ရာရောက်သည့် နယ်စပ်စည်းရိုးခတ်မှုကို ခွင့်ပြုမည် မဟုတ်ကြောင်း ထုတ်ပြန်ချက်တွင် ဖော်ပြခဲ့သည်။

နာဂလူမျိုးများအနေဖြင့် FMR ကို ဦးစားပေးကိစ္စအဖြစ် မည်သည့်အခါမျှ တောင်းဆိုခဲ့ခြင်း မရှိကြောင်း၊ ထိုကဲ့သို့ သော ဥပဒေများကို လွယ်လွယ်ပြဋ္ဌာန်းပြီး လွယ်လွယ် ဖျက်သိမ်းမှုများသည် ယုတ္တိမရှိကြောင်း NSCN-K/YA အဖွဲ့ က ပြောကြားခဲ့သည်။

အိန္ဒိယ-မြန်မာနယ်စပ် ခြံစည်းရိုးကို တွေ့ရစဉ်

"အချုပ်အခြာ အာဏာပိုင်ခွင့်ရှိတဲ့ ကျနော်တို့ လူမျိုးတွေဟာ လွတ်လပ်စွာ သွားလာနိုင်ခွင့်အပေါ် အဆုံးအဖြတ် ပေးတာကို ခွင့်ပြုမှာ မဟုတ်ပါဘူး။ ဒီနေ့မှာ ကျနော်တို့ရဲ့ လွတ်လပ်စွာ သွားလာလှုပ်ရှားခွင့်ဟာ နာဂနိုင်ငံတော် အနှံ့မှာ စစ်ဆေးရေးဂိတ်တွေ၊ အတားအဆီးတွေနဲ့ ကန့်သတ်ခံခဲ့ရပါတယ်။ အခုလို ဖိနှိပ်မှုဟာ ပြီးခဲ့တဲ့ ရာစုနှစ် အများကြီးတုန်းက ကျနော်တို့ လူမျိုးတွေကြားထဲမှာ ရရှိခဲ့တဲ့ စိတ်ဒဏ်ရာတွေနဲ့ မလုံခြုံမှုတွေကို ပိုမိုနက်ရှိုင်းစေ ခဲ့ပါတယ်" ဟုထုတ်ပြန်ချက်တွင် ဖော်ပြခဲ့သည်။

အိန္ဒိယအစိုးရ၏ လုပ်ဆောင်မှု မှန်သမျှသည် ဘောင်ကျော်နေပြီး ထိုလုပ်ဆောင်မှုများသည် စိန်ခေါ်မှုမရှိဘဲ ပြီးဆုံးသွားလိမ့်မည် မဟုတ်ကြောင်း၊ မိမိတို့ နိုင်ငံအတွင်းရှိ နေရာဒေသ ပေါင်းစုံတွင် နေထိုင်သည့် နာဂလူမျိုး အားလုံးသည် ယခုကဲ့သို့ တရားမဝင် မူဝါဒကို ဆန့်ကျင်ကြောင်း ညီညွတ်စွာ ထုတ်ဖော်ခဲ့မှုအတွက် ကျေးဇူးတင်ကြောင်း NSCN-K/YA က ထုတ်ပြန်ခဲ့သည်။

Source: Northeast Now

CNI International News

ဆန် ဆာဗေးဒိုး၊ ဖေဖော်ဝါရီ ၆

အယ်လ်ဆာဗေးဒိုးနိုင်ငံတွင် ဖေဖော်ဝါရီ ၄ ရက်က ကျင်းပခဲ့သည့် သမ္မတရွေးကောက်ပွဲ၌ လက်ရှိသမ္မတ နာယစ် ဘူကီလီ (Nayib Bukele) က သောင်ပြိုကမ်းပြို အနိုင်ရရှိသွားခဲ့သည်ဟု ရိုက်တာမှ ဖော်ပြခဲ့သည်။

မဲဆန္ဒရှင်များသည် ဒီမိုကရေစီစနစ် ယုတ်လျော့လာစေမည့် စိုးရိမ်မှုများကို ဘေးချိတ်ပြီး နိုင်ငံအတွင်း ကြောက် မက်ဖွယ် လူဆိုးဂိုဏ်းများကို ပြတ်ပြတ်သားသား ချေမှုန်းနေသည့် ဘူကီလီကို ထောက်ခံသည့်အနေဖြင့် မဲများ ပေးခဲ့ကြခြင်းဖြစ်သည်။

ဆယ်ဆာဗေးဒိုး၏ မြို့တော် ဆန်ဆာဗေးဒိုး၏ ပြည်သူ့ရင်ပြင်တွင် ဘူကီလီကို ထောက်ခံသူများသည် ၎င်း ထပ်မံ ရွေးကောက်ခံခဲ့ရမှုကို ဂုဏ်ပြုသည့်အနေဖြင့် အောင်ပွဲခံခဲ့ကြသည်။

အသက် ၄၂ နှစ်အရွယ် ဘူကီလီကမူ ယခုရွေးကောက်ပွဲသည် ၎င်း၏ အစိုးရအဖွဲ့အတွက် လူထုဆန္ဒခံယူပွဲကဲ့သို့ ဖြစ်သည်ဟု ပြောကြားခဲ့သည်။

ဘူကီလီသည် တရားဝင်မဲရလဒ်များ မထုတ်ပြန်ခင်ကတည်းက ရွေးကောက်ပွဲတွင် ၎င်းအနိုင်ရရှိကြောင်း ကြေညာခဲ့ပြီး မဲရလဒ် ၈၅ ရာခိုင်နှုန်း ရရှိခဲ့သည်ဟု ပြောကြားခဲ့သည်။

ဘူကီလီကို ထောက်ခံကြသူများကို တွေ့ရစဉ်

ဘူကီလီ၏ New Ideas ပါတီသည်လည်း နေရာ ၆၀ ရှိသည့် လွှတ်တော်တွင် နေရာအားလုံးနီးပါးကို အနိုင် ရရှိဖွယ်ရှိနေပြီး အယ်လ်ဆာဗေးဒိုး၏ ခေတ်သစ်သမိုင်းတွင် ဘူကီလီသည် သြဇာအကြီးဆုံး ခေါင်းဆောင်တစ်ဦး ဖြစ်လာခဲ့သည်။ 

"ကျနော်တို့အားလုံးဟာ အတိုက်အခံတွေကို အပြတ်အသတ် အနိုင်ရခဲ့တာ ဖြစ်ပါတယ်။ အယ်လ်ဆာဗေးဒိုးဟာ ဘေးကင်းလုံခြုံမှုမရှိဆုံး နိုင်ငံအဖြစ်ကနေ ဘေးကင်းလုံခြုံမှုအရှိဆုံး နိုင်ငံဖြစ်လာခဲ့ပါတယ်။ အခုကစပြီး နောက်ထပ် သက်တမ်း ၅ နှစ်မှာ ကျွန်တော်တို့ ဘာတွေ ဆက်လုပ်သွားမလဲဆိုတာ စောင့်ကြည့်ကြပါ" ဟု ဘူကီလီက အယ်လ်ဆာဗေးဒိုး အမျိုးသားနန်းတော်၏ လသာဆောင်တွင် ၎င်း၏ ဇနီးသည်နှင့်အတူ မတ်တပ် ရပ်ပြီး ထောက်ခံသူများကို ပြောကြားခဲ့သည်။

New Ideas ပါတီ၏ အနိုင်ရရှိမှုကြောင့် ဘူကီလီသည် မကြုံစဖူး ကြီးမားသည့် လုပ်ပိုင်ခွင့်ကို ရရှိလာနိုင်မည် ဖြစ်ကာ အယ်လ်ဆာဗေးဒိုး၏ ဖွဲ့စည်းပုံအခြေခံဥပဒေကိုပါ ပြုပြင်ပြောင်းလဲခွင့် ရရှိဖွယ်ရှိသည်။ 

အတိုက်အခံများကမူ ဘူကီလီသည် ဖွဲ့စည်းပုံအခြေခံဥပဒေတွင် သမ္မတသက်တမ်း ကန့်သတ်ချက်များကို ဖယ်ရှားမည့်အရေးကို စိုးရိမ်လျက်ရှိသည်။

Source: ရိုက်တာ