CNI International News

တာ့ယွင်၊ မတ်လ ၃၀

ပြင်ပဖိအားများက ထိုင်ဝမ်၏ ကမ္ဘာကြီးနှင့် ကူးလူးဆက်ဆံမှုကို တားဆီးနိုင်မည် မဟုတ်ဟု သမ္မတ ဆိုင်အင်ဝမ် (Tsai Ing-wen) က အမေရိကန်သို့ သွားမည့် ဗုဒ္ဓဟူးနေ့တွင် ပြောကြားခဲ့သည်ဟု CNA သတင်းတွင် ဖော်ပြသည်။

ယင်းက သူမအနေဖြင့် အမေရိကန်တွင် လွှတ်တော်ဥက္ကဋ္ဌ ကီဗင်မက္ကာသီ (Kevin McCarhty) နှင့် တွေ့ဆုံလျှင် လက်တုန့်ပြန်မှု လုပ်ဆောင်မည်ဆိုသည့် တရုတ်၏ ခြိမ်းခြောက်မှုကို အာခံပြောဆိုခြင်းလည်း ဖြစ်သည်။

တရုတ်အစိုးရသည် ထိုင်ဝမ်အား ၎င်းတို့ပိုင်အဖြစ် သတ်မှတ်ထားပြီး ဆိုင်အင်ဝမ်နှင့် မတွေ့ဆုံရန် အမေရိကန် အရာရှိများကို ကြိမ်ဖန်များစွာ သတိပေးခဲ့သည်။

ထိုသို့ တွေ့ဆုံခြင်းက ထိုင်ဝမ်၏ သီးသန့် နိုင်ငံတစ်ခုအဖြစ် ခွဲထွက်ရန် အမြင်ကို ထောက်ခံသည့် သဘောဟု ရှုမြင်ထားခြင်းကြောင့် ဖြစ်သည်။

တရုတ်သည် ပြီးခဲ့သည့် သြဂုတ်လတွင် ထိုင်ဝမ်အား ထိုစဉ်က လွှတ်တော်ဥက္ကဋ္ဌ နန်စီ ပလိုစီ (Nancy Pelosi) ရောက်ရှိလာသည့် အချိန်တွင်လည်း ထိုင်ဝမ်အနီးတွင် စစ်ရေးလေ့ကျင့်မှုများ လုပ်ဆောင်ခဲ့သည်။

သမ္မတ မရှိချိန်တွင် တရုတ်၏ လှုပ်ရှားမှုများကို ဆက်လက် စောင့်ကြည့်သွားမည်ဟု ထိုင်ဝမ်စစ်တပ်က ပြောသည်။ ဆိုင်သည် ဂွာတီမာလာ ( Guatemala ) နိုင်ငံနှင့် ဘဲလ်လစ်ဇ် (Belize) နိုင်ငံများသို့ သွားရောက်မည် ဖြစ်ကာ အသွားတွင် နယူးယောက်၊ အပြန်တွင် လော့စ်အိန်ဂျလိစ်တို့မှ တစ်ဆင့်အကူးအပြောင်း ပြုလုပ်မည် ဖြစ်သည်။

တရားဝင် အတည်ပြုမှု မရှိသော်လည်း သူမသည် ခရီးအဆုံးသတ်ချိန် ကယ်လီဖိုးနီးယားတွင် မက္ကာသီနှင့် တွေ့ဆုံမည်ဟုလည်း ယူဆရသည်။

ထိုင်ဝမ်သမ္မတ ဆိုင်အင်ဝမ်ကိုတွေ့ရစဉ်

တွေ့ဆုံ ဖြစ်လျှင် ယင်းက အမေရိကန်မြေပေါ်တွင် လွှတ်တော်ဥက္ကဋ္ဌနှင့် ထိုင်ဝမ်ခေါင်းဆောင် တစ်ဦး၏ ပထမဆုံး တွေ့ဆုံမှုဖြစ်ကာ ထိုတွေ့ဆုံမှုက တရုတ်အစိုးရကို ဒေါသဖြစ်စေသည်။

ပြင်ပဖိအားများက ထိုင်ဝမ်အား မရပ်တန့်နိုင်ကြောင်း၊ ထိုင်ဝမ်သည် လွတ်လပ်သော၊ ဒီမိုကရေစီ လမ်းကြောင်း ပေါ်မှ တစ်ဆင့် ကမ္ဘာကြီးနှင့် ပေါင်းစည်းရေး လျှောက်လှမ်းသွားမည်ဖြစ်ကြောင်း၊ ထိုလမ်းသည် ကြမ်းသော်လည်း ထိုင်ဝမ်တွင် အပေါင်းအဖော်များရှိကြောင်း ထိုင်ဝမ်၏ တာ့ယွင် (Taoyuan) လေဆိပ်တွင် ဆိုင်က ပြောခဲ့သည်။

ဆိုင်၏ အမေရိကန်မှ တစ်ဆင့် အကူးအပြောင်း ပြုလုပ်ခြင်းသည် လေဆိပ် သို့မဟုတ် ဟိုတယ်တွင် စောင့်ဆိုင်း ရန်အတွက် မဟုတ်ဘဲ အမေရိကန် အရာရှိများ၊ လွှတ်တော်အမတ်များနှင့် တွေ့ဆုံရန်အတွက် ဖြစ်သည်ဟု တရုတ်၏ ထိုင်ဝမ်ရေးရာရုံးမှ ပြောခွင့်ရပုဂ္ဂိုလ် ဇူးဖန်းလိုင် (Zhu Fenglian)က ပြောသည်။

အမေရိကန်တွင် လွှတ်တော်ဥက္ကဋ္ဌနှင့် တွေ့ဆုံပါက ယင်းသည် တရုတ်တစ်နိုင်ငံတည်း မူဝါဒ (One China) ကို ပြင်းထန်စွာ ချိုးဖောက်ရုံမက တရုတ်၏ အချုပ်အခြာအာဏာကိုပါ ထိခိုက်စေကာ ထိုင်ဝမ်ရေလက်ကြား ငြိမ်းချမ်းရေးနှင့် တည်ငြိမ်ရေးအား ထိခိုက်စေသည့် ရန်လိုမှု ဖြစ်သည်ဟုလည်း သူမက ဆက်ပြောခဲ့သည်။

ထိုင်ဝမ်သမ္မတ ဆိုင်အင်ဝမ်ကိုတွေ့ရစဉ်

ထိုအခြေအနေကို လုံးဝဆန့်ကျင်ကြောင်း၊ ယင်းကို တုန့်ပြန်ရန် လုပ်ဆောင်သွားမည်ဖြစ်ကြောင်း ဇူက ပြောခဲ့ သော်လည်း အတိအကျကိုမူ မပြောခဲ့ပေ။

အမေရိကန်က ထိုင်ဝမ်သမ္မတ အဆက်ဆက်သည် အမေရိကန်အား ခရီးတစ်ထောက် နားရာ နေရာအဖြစ် ပုံမှန်အသုံးပြုခဲ့ကြောင်း၊ ထိုင်ဝမ်အပေါ် ရန်လိုသော လုပ်ဆောင်ချက်များ ချမှတ်ရန် ယင်းကို အသုံးမချသင့် ကြောင်း ပြောသည်။

ထိုင်ဝမ်သမ္မတ၏ ယခုသီတင်းပတ်နှင့် နောက်လ အမေရိကန်သို့ တစ်ထောက်နား ခရီးစဉ်အပေါ် တရုတ်အနေဖြင့် အလွန်အမင်း တုန့်ပြန်ရန် မလိုအပ်ဟုလည်း အမေရိကန်အရာရှိများက ပြောသည်။

Source:CNA

CNI International News

ဝါရှင်တန်၊ မတ်လ ၃၀

ဒီမိုကရက်တစ် အဖွဲ့အစည်းများ ကာလရှည် အင်အားကျဆင်းလာခြင်းကို တားဆီးရန် ကမ္ဘာ့ခေါင်းဆောင်များက ပြောင်းလဲမှုများ လုပ်ဆောင်နေကြောင်း ကြေညာခြင်းဖြင့် အမေရိကန်သမ္မတ ဂျိုးဘိုင်ဒန် (Joe Biden) သည် ကမ္ဘာတစ်ဝန်းရှိ ဒီမိုကရေစီ အခြေအနေများအပေါ် ဗုဒ္ဓဟူးနေ့တွင် အကောင်းမြင်သော ရှုမြင်သုံးသပ်မှု လုပ် ဆောင်သွားခဲ့သည်ဟု အေပီက ဖော်ပြခဲ့သည်။

သမ္မတ သက်တမ်းအတွင်း ဒုတိယအကြိမ်မြောက် ဒီမိုကရေစီ ထိပ်သီး အစည်းအဝေး ဖွင့်လှစ်ခြင်းတွင် ရုရှား၏ ယူကရိန်းအား ကျူးကျော်မှု၊ အမေရိကန်နှင့် တရုတ်တို့အကြား စီးပွားရေး-စစ်ရေး အားပြိုင်မှုများ ရှိနေသော်လည်း ပြီးခဲ့သည့်နှစ်အတွင်း ပိုမိုကောင်းမွန် ကျယ်ပြန့်လာမှုများကို ဘိုင်ဒန်က ဦးစားပေး ပြောခဲ့သည်။

အန်ဂိုလာ၊ ခရိုအေးရှားနှင့် ဒိုမီနီကန်တို့၏ ပြောင်းလဲမှုမှ စတင်၍ ကမ္ဘာတစ်ဝန်း တိုးတက်မှု လက္ခဏာများကို ကိုးကား၍ ဘိုင်ဒန်က ထိုသို့ ပြောခဲ့ခြင်း ဖြစ်သည်။

အမေရိကန်နိုင်ငံတွင်း မဲပေးမှုကို ကာကွယ်ပေးရေးနှင့် ပတ်သက်သည့် လုပ်ဆောင်ချက်များသည်လည်း ဒီမိုကရေစီစနစ်အား ထောက်ပံ့ရန် အစိုးရ၏ ပေးထားသော ကတိအပေါ် သက်သေပြချက်ဟု ဘိုင်ဒန်က ပြောသည်။

ယနေ့ခေတ် အနေအထားများအရ ကမ္ဘာကြီးတွင် ဒီမိုကရေစီစနစ်သည် ပိုမိုအားကောင်းလာကာ သက်ဦဆံပိုင် စနစ်များ ပိုမိုအားနည်းလာသည်ဟု ဂုဏ်ယူစွာဖြင့် ပြောနိုင်ကြောင်း ဘိုင်ဒန်က ပြောသည်။

ထရမ့်ထောက်ခံသူများက အမေရိကန်လွှတ်တော်တိုက်ခိုက်နေစဉ်

ဗုဒ္ဓဟူးနေ့က အစည်းအဝေးသည် အမေရိကန်အစိုးရ၏ ပိုမိုခိုင်မာသော ပူးပေါင်းမှုကို တည်ဆောက်ရန်၊ သက်ဦးဆံပိုင် စနစ်ဘက်သို့ ယိမ်းနေသော နိုင်ငံများအား ပြောင်းလဲမှုဆီသို့ ပို့ဆောင်ပေးရန် ကြိုးပမ်းမှုအတွက် အရေးပါသော အစိတ်အပိုင်းတစ်ခုလည်း ဖြစ်သည်။

ကမ္ဘာတစ်ဝန်းလုံးတွင် လွတ်လပ်၍ အမှီအခိုကင်းသော မီဒီယာများ ပေါ်ပေါက်လာရေးမှသည် လွတ်လပ်၍ အမှီအခိုကင်းသော ရွေးကောက်ပွဲများ ကျင်းပနိုင်ရေးအထိ အားလုံးပါဝင်သော ဒီမိုကရေစီ အစီအစဉ်များကို မြှင့်တင်ရန် အမေရိကန်ဘက်မှ ဒေါ်လာ သန်း ၆၉၀ အသုံးပြုသွားမည်ဟုလည်း သမ္မတက ပြောသည်။

ယခု အစည်းအဝေးအား ခေတ်မှီ ဒီမိုကရက်တစ် အစိုးရဖြစ်ရေး နည်းပညာများ အသုံးပြုခြင်းနှင့် ပတ်သက်၍ ဆွေးနွေးမှုများကို ဆက်လက် လုပ်ဆောင်နိုင်ရေး ထိန်းသိမ်းပေးရန် အသုံးချသွားလိုသည်ဟုလည်း ဘိုင်ဒန်က ပြောသည်။

စီးပွားဖြစ် spyware များ တိုးပွားမှုနှင့် ယင်းတို့အား မလျော်ကန်စွာ အသုံးချမှုကို တန်ပြန်ရေး နိုင်ငံတကာ ပူးပေါင်း ဆောင်ရွက်မှုများ ခိုင်မာစေရန် ကိစ္စအတွက်လည်း အမေရိကန်သည် တခြားသော နိုင်ငံ ၉ နိုင်ငံနှင့် ပူးတွဲ ကြေညာချက်တွင် လက်မှတ်ရေးထိုးခဲ့သည်။

ဘရာဇီးလ်သမ္မတ ဘိုဆိုနာရိုထောက်ခံသူများက သမ္မတအသစ်ဖြစ်သည့် လူရာကို ကန့်ကွက်ပြီး တိုက်ခိုက်စဉ်

ယင်းတို့တွင် သြစတြေးလျ၊ ကနေဒါ၊ ကော်စတာရီကာ၊ ဒိန်းမတ်၊ ပြင်သစ်၊ နယူးဇီလန်၊ နော်ဝေး၊ ဆွီဒင်၊ ဆွစ်ဇာလန်နှင့်ဗြိတိန်တို့ ပါဝင်သည်။

ထောက်လှမ်းရေး နည်းပညာများကို အစိုးရများ အနေဖြင့် မည်သို့ အသုံးပြုသင့်ကြောင်း ဆိုသည်နှင့် ပတ်သက်၍ စည်းကမ်းချက်များ သတ်မှတ်ရေးတွင် နိုင်ငံပေါင်း ၄၀ ခန့်က ပါဝင်လက်မှတ် ရေးထိုးခဲ့သည်ဟု ထိုကိစ္စနှင့် နီးစပ် သည့် အမေရိကန် အရာရှိတစ်ဦးက ပြောသည်။

ထိုသတ်မှတ်ချက်များကို ညီလာခံ မပြီးဆုံးခင် ထုတ်ပြန် သွားမည်ဖြစ်သည်။

Source: AP

CNI International News

မော်စကို၊ မတ်လ ၃၀

ရုရှားအနေဖြင့် ဒုံးကျည်စမ်းသပ်မှုများနှင့် ပတ်သက်၍ အမေရိကန်ဘက်ကို ယခင်တုန်းကလို သတင်းအချက်အလက် မျှဝေခြင်းများ လုပ်ဆောင်တော့မည် မဟုတ်ကြောင်း ရုရှားထိပ်တန်းအရာရှိ တစ်ဦးက ပြောသည်ဟု အေပီက ဖော်ပြခဲ့သည်။

အမေရိကန်နှင့် နျူကလီးယား သဘောတူညီချက်မှ နှုတ်ထွက်သည်ဟု ရုရှားဘက်က ကြေညာခဲ့ခြင်းကြောင့် ဖြစ်သည်။

ပြီးခဲ့သည့်လက နျူကလီးယား သဘောတူညီချက်တွင် ပါဝင်မှုကို ရပ်ဆိုင်းကြောင်း ကြေညာခဲ့ခြင်းကြောင့် ရုရှားသည် အမေရိကန်နှင့် တစ်ခုတည်းသာ ကျန်တော့သော နျူကလီးယား သဘောတူညီချက်အတိုင်း သတင်း အချက်အလက်များ မျှဝေခြင်းကို လုပ်တော့မည် မဟုတ်ဟု ရုရှားလက်ထောက် နိုင်ငံခြားရေးဝန်ကြီး ဆာဂျီ ရတ်ဘ်ကော့ဗ် (Ryabkov) က သတင်းဌာနများသို့ ပြောခဲ့သည်။

New START သဘောတူညီချက်အရ နှစ်နိုင်ငံလုံးသည် ၎င်းတို့၏ နျူကလီးယား အင်အားများနှင့် ပတ်သက်၍ ခြောက်လတစ်ကြိမ် ပုံမှန် သတင်းထုတ်ပြန်မှု လုပ်ဆောင်ရပြီး သဘောတူညီချက်ပါ နိုင်ငံများသည် ၎င်းတို့၏ နျူကလီးယား လက်နက်များ စမ်းသပ် ပစ်လွှတ်ခြင်း၊ နေရာချထားခြင်းနှင့် ပတ်သက်၍ ကြိုတင် သတိပေး အကြောင်း ကြားရသည်။

ထိုသို့သော အကြောင်းကြားမှုများသည် မဟာဗျူဟာမြောက် တည်ငြိမ်မှုအတွက် ဆယ်စုနှစ်ပေါင်းများစွာ မရှိမဖြစ် အရေးပါခဲ့ပြီး နှစ်နိုင်ငံကြားတွင် တခြားတစ်နိုင်ငံ၏ လုပ်ဆောင်ချက်များအပေါ် မှန်ကန်စွာ သိရှိစေကာ မည်သည့် နိုင်ငံတွင်မှ ဒုံးကျည်တိုက်ခိုက်မှုနှင့် ပတ်သက်၍ အဓိပ္ပါယ်ကောက် လွဲမှားမှုမရှိစေရန် သေချာစေခဲ့ သည်။

ရုရှားလက်ထောက် နိုင်ငံခြားရေးဝန်ကြီး ဆာဂျီ ရတ်ဘ်ကော့ဗ် (Ryabkov)ကိုတွေ့ရစဉ်

သဘောတူညီချက်ပါ သတင်းအချက်အလက်များ မျှဝေမှုကို ရပ်တန့်လိုက်ခြင်းက နျူကလီးယား လက်နက်တိုက် ကို အသုံးချပြီး ယူကရိန်းအပေါ် အနောက်အုပ်စုဘက်မှ ထောက်ပံ့မှု လုပ်ဆောင်နေခြင်းကို တားဆီးရေးအတွက် ရုရှား၏ နောက်ထပ် လုပ်ဆောင်ချက်တစ်ခု ဖြစ်သည်။

ပြီးခဲ့သည့် ရက်များတွင်လည်း ရုရှားမဟာမိတ် ဘယ်လာရုစ်မြေတွင် နျူကလီးယား လက်နက်ကြီးများ ဖြန့်ကျက် ထားသည်ဟု ရုရှားသမ္မတ ပူတင်က ကြေညာခဲ့သည်။

ပူတင်သည် New START သဘောတူညီချက်တွင် ပါဝင်မှုကို ရပ်ဆိုင်းကြောင်း ပြီးခဲ့သည့်လက ကြေညာခဲ့သည်။

ယူကရိန်းစစ်မြေပြင်တွင် ရုရှားအား ချေမှုန်းရန် အမေရိကန်နှင့် နေတိုးမဟာမိတ်များက ရည်ရွယ်ချက် ထားရှိချိန် တွင် ရုရှားအနေဖြင့် သဘောတူညီချက်အတိုင်း အမေရိကန်၏ ဝင်ရောက် စစ်ဆေးခြင်းကို လက်မခံနိုင်သည့် အတွက်ကြောင့် ဖြစ်သည်။

အဆိုပါ လုပ်ဆောင်ချက်သည် သဘောတူညီချက်မှ လုံးလုံးနှုတ်ထွက်ခြင်း မဟုတ်ကြောင်း၊ ရုရှားအနေဖြင့် သဘောတူညီချက်အတိုင်း နျူကလီးယားလက်နက် ကန့်သတ်ချက်များအပေါ် လေးစားသွားမည် ဖြစ်ကြောင်း လည်း ရုရှားဘက်က အလေးအနက်ထား ပြောကြားထားသည်။

ရုရှား သမ္မတ ပူတင်ကိုတွေ့ရစဉ်

လက်ရှိအချိန်ထိ ရတ်ဘ်ကော့ဗ်၏ ပြောစကားသည် ရုရှားအနေဖြင့် ဒုံးကျည် စမ်းသပ်မှုများနှင့် ပတ်သက်သည့် သတိပေးချက် အားလုံးကို ရပ်တန့်လိုက်ခြင်းလား သို့မဟုတ် New START သဘောတူညီချက်ပါ သတိပေးမှုများ ကိုသာ ရပ်တန့်လိုက်ခြင်းလား ကွဲကွဲပြားပြား မသိရသေးပေ။

ရုရှားနှင့် အမေရိကန်တို့သည် စစ်အေးခေတ်ကတည်းက ပဲ့ထိန်းဒုံးကျည် စမ်းသပ်မှုများနှင့် ပတ်သက်၍ အသိပေးချက်များ အပြန်အလှန် လုပ်ဆောင်ခဲ့ကြသည်။ New START မှ နှုတ်ထွက်ခဲ့သော်လည်း ၁၉၈၈ အမေရိကန်-ဆိုဗီယက် သဘောတူညီချက်ကို ဆက်လက် လိုက်နာသွားမည်ဟုလည်း ရုရှားနိုင်ငံခြားရေးဌာနက ပြီးခဲ့သည့် လတွင် ပြောခဲ့သည်။

ဘိုင်ဒန် အစိုးရသည် ရုရှားနိုင်ငံခြားရေးဌာနမှ အရာရှိ၏ ပြောဆိုမှုကို သတိပြုမိကြောင်း၊ သို့သော် ထိုသို့သော ပြောင်းလဲမှုနှင့် ပတ်သက်၍ မည်သည့် အသိပေးမှုကိုမှ မရရှိထားကြောင်း အမေရိကန်နိုင်ငံခြားရေးဌာန ပြောခွင့်ရ ပုဂ္ဂိုလ် ဗီဒန့် ပါတဲလ် (Vedant Patel) က ပြောသည်။

Source: AP

CNI International News

ကိယက်ဗ်၊ မတ်လ ၃၀

တရုတ်သမ္မတ ရှီကျင့်ဖျင် (Xi Jinping)အား ယူကရိန်းသို့ လာရောက်လည်ပတ်ရန် ယူကရိန်းသမ္မတ ဇာလန်းစကီး က ဖိတ်ကြားခဲ့သည်ဟု အေပီသတင်းတွင် ဖော်ပြထားသည်။

ယူကရိန်းစစ်ပွဲ စတင်ချိန်ကတည်းက ရှီနှင့် အဆက်အသွယ် မရှိကြောင်း၊ ၎င်းအနေဖြင့် ရှီအား ယူကရိန်းမြေတွင် လက်ခံတွေ့ဆုံရန် အဆင်သင့် ဖြစ်နေပြီ ဖြစ်ကြောင်းလည်း ယူကရိန်းသမ္မတက ပြောသည်။

ရှီနှင့် တွေ့ဆုံလိုသည်ဟု ဗိုလိုဒီမာ ဇာလန်းစကီး(Volodymyr Zelenskyy)က အင်္ဂါနေ့တွင် အေပီသို့ ပြောသည်။ ရှီ၏ ရုရှားခရီးစဉ် အပြီးတွင် ထိုသို့ ပြောဆိုခဲ့ခြင်း ဖြစ်သည်။

သို့သော် ယင်းအပေါ် တရုတ်ဘက်မှ မည်သို့မျှ မတုန့်ပြန်သေးပေ။ တရုတ်သည် ယူကရိန်း၏ ရန်ဘက် ရုရှား၏ စီးပွားရေးနှင့် နိုင်ငံရေးမဟာမိတ်အဖြစ် ကာလရှည်ရပ်တည်ခဲ့သည်။

တရုတ်အစိုးရသည် ယူကရိန်းပဋိပက္ခတွင် ကြားနေအဖြစ် ရပ်တည်ကာ ရုရှားအပေါ် သံတမန်ရေးရာ အကာအကွယ်ပေးမှု လုပ်ဆောင်လျက်ရှိသည်။

 ရှီကျင့်ဖျင်နဲ့ ပူတင်ကိုတွေ့ရစဉ်

တရုတ်သည် ရုရှား-ယူကရိန်း ပဋိပက္ခတွင် အရေးပါသော အင်အားစုတစ်ခုဖြစ်ကာ ပဋိပက္ခတွင် ပါဝင်မှုမရှိခြင်း ကလည်း တရုတ်၏ အနေအထားကို ပို၍အားကောင်းစေခဲ့သည်။

ဇာလန်းစကီးသည် ယူကရိန်းနိုင်ငံတွင်းရှိ ရှေ့တန်းစစ်မျက်နှာသို့ သွားရောက်စဉ် ရထားပေါ် ၌ အေပီ သတင်းအဖွဲ့ နှင့် တွေ့ဆုံ ပြောဆိုခဲ့ခြင်း ဖြစ်သည်။

ဇာလန်းစကီး၏ ဖိတ်ကြားမှုနှင့် ပတ်သက်၍ တရုတ်သမ္မတဘက်က လက်ခံသည်လား သို့မဟုတ် တရားဝင် ဆက်သွယ် ပြောဆိုမှုရှိခဲ့သလားဟု သတင်းထောက်များက တရုတ်နိုင်ငံခြားရေးဌာန ပြောခွင့်ရပုဂ္ဂိုလ် မောင်းနင် (Mao Ning) အား ဘေဂျင်းမြို့တွင် မေးမြန်းခဲ့သည်။

ထိုကိစ္စနှင့်ပတ်သက်၍ မည်သည့် သတင်းမှ မရှိကြောင်း သူမက ပြန်လည် ဖြေကြားခဲ့ကာ တရုတ်သည် ယူကရိန်း အပါအဝင် သက်ဆိုင်ရာ အဖွဲ့အစည်းတိုင်းနှင့် ဆက်ဆံရေးကို ထိန်းသိမ်းထားသည်ဟု ပြောသည်။

ယူကရိန်းသမ္မတ၏ ဖိတ်ကြားမှုပေါ် ရှီက လက်ခံနိုင်သလားဟု ရုရှားအစိုးရအဖွဲ့ ပြောခွင့်ရပုဂ္ဂိုလ် ဒီမီထရီ ပတ်စ်ကော့ဗ် (Dmitry Peskov) အား မေးမြန်းခဲ့ရာတွင်လည်း ရုရှားအရာရှိများသည် ပဋိပက္ခအတွင်း တရုတ်၏ မျှတသော ရပ်တည်ချက်နှင့်ပတ်သက်၍ များစွာမျှော်လင့်ထားကြောင်း သို့သော် ခေါင်းဆောင်နှစ်ဦး တွေ့ဆုံမှု နှင့်ပတ်သက်၍ ၎င်းအနေဖြင့် မည်သည့် မှတ်ချက်မှ ပေးခွင့်မရှိကြောင်း ပြန်လည် ဖြေကြားခဲ့သည်။

ယူကရိန်းစစ်ပွဲအတွင်းက မီးလောင်နေမှုကို ကြည့်ပြီး ပြည်သူတစ်ဦး ငိုကြွေးနေစဉ်

ရှီနှင့် ဇာလန်းစကီးတို့ တွေ့ဆုံမှုအပေါ် အမေရိကန်အနေဖြင့် ထောက်ခံကြောင်း အမေရိကန်လုံခြုံရေးကောင်စီ ပြောခွင့်ရပုဂ္ဂိုလ် ဂျွန်ကာဘီ (John Kirby) က ပြောသည်။

ရှီ၏ ပြီးခဲ့သည့် သီတင်းပတ် ရုရှားခရီးစဉ်ကြောင့် တရုတ်အနေဖြင့် ရုရှားတို့ လိုအပ်နေသော လက်နက်နှင့် ခဲယမ်း များကို ထောက်ပံ့ပေးရန် အဆင်သင့် ရှိနေနိုင်သည်ဆိုသည့် ယူဆချက်များ ထွက်ပေါ်လာခဲ့သည်။

သို့သော် ရှီ၏ ခရီးစဉ်သည် ထိုသို့သော ကြေညာချက်မျိုး ထွက်ပေါ်လာခြင်းမရှိဘဲ အဆုံးသတ်သွားခဲ့သည်။

ခရီးစဉ်အပြီး ရက်အနည်းငယ် အကြာတွင် အိမ်နီးချင်း ဘယ်လာရုစ်သို့ နျူကလီးယား လက်နက်များ ဖြန့်ကျက် ထားမည်ဟု ပူတင်က ကြေညာခဲ့သည်။

ရှီ၏ခရီးစဉ်တွင် တရုတ်ထံမှ အာမခံချက် ကောင်းကောင်း မရရှိခဲ့ခြင်းကြောင့် ပူတင်သည် ထိုသို့ လုပ်ဆောင်ရခြင်းဖြစ်သည်ဟု ဇာလန်းစကီးက ယူဆထားသည်။

Source:AP

CNI International News

မော်စကို၊ မတ်လ ၂၉

ဂျပန်ပင်ပင်လယ်ပြင်သို့ သင်္ဘောဖျက် ဒုံးကျည်နှစ်စင်း ပစ်လွှတ်စမ်းသပ်ခဲ့သည်ဟု ရုရှားကာကွယ်ရေးဌာနက အင်္ဂါနေ့တွင် ထုတ်ပြန် ပြောခဲ့ကြောင်း အေပီသတင်းတွင် ဖော်ပြသည်။

သင်္ဘောနှစ်စင်းပေါ်မှ ၁၀၀ ကီလိုမီတာအကွာရှိ ရန်သူသင်္ဘောအုပ်စုသို့ ဖန်တီး ပစ်ခတ်စမ်းသပ်ခဲ့ခြင်း ဖြစ်သည်။

ပစ်လွှတ်ခဲ့သော Moskit ခရုစ်ဒုံးကျည် နှစ်စင်းသည် ပစ်မှတ်ကို အောင်မြင်စွာ ထိမှန်ခဲ့သည်ဟု ရုရှားကာကွယ်ရေး ဝန်ကြီးဌာနက ပြောသည်။

Moskit ဒုံးကျည်များကို နေတိုးဘက်က SS-N-22 Sunburn ဟု အမည်ပေးထားပြီး ယင်းတို့သည် အသံထက် ပိုမြန်သော သင်္ဘောဖျက် ဒုံးကျည်များဖြစ်ကာ သမားရိုးကျ အတိုင်းသာမက နျူကလီးယား ထိပ်ဖူးတပ်၍ပါ အသုံးပြု နိုင်သည်။

ဆိုဗီယက်ခေတ် ခရုစ်ဒုံးကျည်များသည် အသံထက် သုံးဆပိုမြန်ပြီး အများဆုံး ၂၅၀ ကီလိုမီတာအထိ သွားရောက် နိုင်သည်။ ယခု စမ်းသပ်လေ့ကျင့်မှုတွင် စစ်သင်္ဘောများ၊ ရေတပ်လေယာဉ်များပါ ပါဝင်ခဲ့ပြီး ယင်းကို ဂျပန် ပင်လယ်၏ ပီတာပင်လယ်ကွေ့ (Peter the Great Gulf)၌ ပြုလုပ်ခဲ့သည်ဟု ရုရှားကာကွယ်ရေးဌာနက ပြော သော်လည်း နေရာအသေးစိတ်ကို ထုတ်ပြန်ခဲ့ခြင်း မရှိပေ။

ထိုပင်လယ်ကွေ့သည် ဖိုကီနို(Fokino) ရှိ ရုရှား၏ ပစိဖိတ်ရေတပ်အုပ်စု ရုံးချုပ်နှင့် ထိစပ်နေပြီး ဂျပန်မြောက်ပိုင်း ဟော့ကိုင်းဒိုး (Hokkaido) ကျွန်းနှင့် ၇၀၀ ကီလိုမီတာခန့် အကွာတွင် ရှိသည်။

ဂျပန်အစိုးရအဖွဲ့၏ ဒုတိယ ဝန်ကြီး ယိုရှီဟီကို အီဆိုဇာကီကိုတွေ့ရစဉ်

ရုရှားစစ်တပ်သည် နိုင်ငံတစ်ဝန်း စစ်ရေးလေ့ကျင့်မှုများ ပုံမှန် လုပ်ဆောင်လေ့ရှိပြီး ရုရှားစစ်သင်္ဘောများသည် လည်း တပ်သားများ လေ့ကျင့်ပေးရန်၊ စစ်အင်အားကို ပြသရန် စစ်ရေးလေ့ကျင့်မှုများကို လုပ်ဆောင်လျက်ရှိ သည်။

ယခု ဖြစ်ရပ်နှင့်ပတ်သက်၍ အမေရိကန် ရေတပ်၏ အမှတ် ၇ ရေတပ် သင်္ဘောအုပ်စုကို မေးမြန်းခဲ့သော်လည်း ပြန်လည် ဖြေကြားခြင်း မရှိသေးပေ။  

နှစ်နိုင်ငံကြားရှိ ရေပြင်ထက်တွင် ရုရှား၏ ဗလာဒီဗိုစတော့ (Vladivostok)မြို့ အနီးတွင် လုပ်ဆောင်ခဲ့သည့်  ရုရှား၏ စစ်ရေးလေ့ကျင့်မှုနှင့် ပတ်သက်၍ ဂျပန်ဘက်က တည်ငြိမ်စွာ တုန့်ပြန်ထားသည်။

Moskit ဒုံးကျည်ကိုတွေ့ရစဉ်

ဂျပန်အနေဖြင့် ရုရှား၏ စစ်ရေးလေ့ကျင့်မှုများကို ဆက်လက် စောင့်ကြည့်သွားမည်ဟု ဂျပန်အစိုးရအဖွဲ့၏ ဒုတိယ ဝန်ကြီး ယိုရှီဟီကို အီဆိုဇာကီ (Yoshihiko Isozaki) က အင်္ဂါနေ့ နှောင်းပိုင်း သတင်းစာ ရှင်းလင်းပွဲတစ်ခုတွင် ပြောခဲ့သည်။

ယခု လေ့ကျင့်မှုနှင့် ပတ်သက်၍ ဂျပန်ဘက်က တစ်စုံတစ်ရာ ကန့်ကွက် ဆန္ဒပြမှု လုပ်ဆောင်သွားမည် မဟုတ်ဟု ရုရှားနိုင်ငံဆိုင်ရာ ဂျပန်နိုင်ငံခြားရေးဝန်ကြီးဌာန အရာရှိက ပြောသည်။

လေ့ကျင့်မှု လုပ်ခဲ့ရာ နေရာသည် နှစ်နိုင်ငံကြား ရေပြင်နှင့် မျက်နှာချင်းဆိုင် အနေအထားတွင် ရှိသော်လည်း ယင်းသည် ရုရှား ကမ်းရိုးတန်းသာဖြစ်ကြောင်း ၎င်းက ပြောသည်။

ရုရှားသည် ထိုဧရိယာတွင် စစ်ရေးလေ့ကျင့်မှုများ ပုံမှန်ဆောင်ရွက်လေ့ရှိပြီး မလုပ်ခင် ကြိုတင် အကြောင်းကြားမှု များ လုပ်ဆောင်လေ့ရှိသည်ဟု ဂျပန်နိုင်ငံခြားရေးဝန်ကြီးဌာန အရာရှိက ပြောသည်။

ပြီးခဲ့သည့် သီတင်းပတ်အတွင်း ရုရှား၏ နျူကလီးယား တင်ဆောင်နိုင်သော Tu-95 ဗုံးကြဲလေယာဉ်များသည် ဂျပန်ပင်လယ်ပြင်ပေါ်တွင် နာရီအတန်ကြာ ပျံသန်းခဲ့သည်ဟုလည်း သိရသည်။

Source: AP

CNI International News

ဘဲလ်ဂရိတ်၊ မတ်လ ၂၉

လက်ရှိ ကမ္ဘာတွင် ဖြစ်ပွားနေသည့် အရာများအပေါ် အင်မတန် ကြောက်သည်ဟု ဆားဘီးယား သမ္မတ အလက် ဇန္ဒား ဗူချိ(Aleksandar Vucic)က အင်္ဂါနေ့တွင် ပြောခဲ့ကြောင်း တာ့စ်သတင်းတွင် ဖော်ပြထားသည်။

အကောင်းမြင်ဝါဒီ တစ်ဦးမဟုတ်ဘဲ နိုင်ငံငယ်လေးတစ်ခုမှ မထင်မရှား ခေါင်းဆောင်တစ်ဦးသာ ဖြစ်ကြောင်း၊ ဥရောတွင် အရာအားလုံးကို ပိုသိသည့် အင်အားကြီးနိုင်ငံများမှ ခေါင်းဆောင်များ ရှိနေကြောင်း ဗူချိက ဂရိသမ္မတ ကာတီရီနာ ဆာကဲလ်လာရိုပိုလူး (Katerina Sakellaropoulou) နှင့် ပူးတွဲ သတင်းစာ ရှင်းလင်းပွဲတွင် ပြောခဲ့သည်။

အကျိုးဆက်များက ယခင်က ကြုံခဲ့ဖူးသည်များထက် များစွာ ပိုမိုဆိုးရွားနေမည်ကို ထိတ်လန့်မိ သည်ဟုလည်း ၎င်းက ပြောသည်။

ဂရိသမ္မတ ကာတီရီနာ ဆာကဲလ်လာရိုပိုလူးနဲ့ ဆားဘီးယား သမ္မတ အလက်ဇန္ဒားဗူချိကိုတွေ့ရစဉ်

နိုင်ငံငယ်လေး တစ်ခုမှ မထင်မရှား ခေါင်းဆောင်တစ်ဦး အနေဖြင့် နိုင်ငံကြီးများမှ အင်အားကြီး ခေါင်းဆောင်များသည် ပိုသိကာ ပြဿနာများကို ဖြေရှင်းနိုင်မည်ဟု ယူဆကြောင်း၊ ဆားဘီးယား အနေဖြင့် ငြိမ်းချမ်းရေးနှင့် တည်ငြိမ်ရေးကို ထိန်းသိမ်းရန် ခိုင်မာစွာ ဆောင်ရွက်သွားမည်ဖြစ်ကြောင်းလည်း ဗူချိက အခိုင်အမာ ပြောခဲ့သည်။

ယူကရိန်းပဋိပက္ခသည် လာမည့် ငါးလမှ ခြောက်လအတွင်း ပိုမိုဆိုးရွားလာကာ ထိန်းချုပ်မရသည့် အခြေအနေသို့ ရောက်ရှိသွားမည်ဟု ဗူချိက ဖေဖော်ဝါရီလတွင် ထင်မြင်ချက် ပေးခဲ့ဖူးသည်။

ယူကရိန်းသို့ တင့်ကားများ ထောက်ပံ့ပေးမည့် ဆုံးဖြတ်ချက်ပြီးလျှင် F-16 ဂျက်တိုက်လေယာဉ်များ ထောက်ပံ့ ပေးမည့် အစီအစဉ်များပါ ပေါ်ပေါက်လာလိမ့်မည်ဟု သမ္မတက ယုံကြည်ထားသည်။

ဆလိုဗက်ကီးယားဝန်ကြီးချုပ် အက်ဒွပ်ဟီဂါကိုတွေ့ရစဉ်

ယူကရိန်းသို့ MiG-29 တိုက်လေယာဉ် ၁၃ စင်းပေးရန် စလိုဗက်ကီးယားအစိုးရက မတ်လ ၁၇ ရက်နေ့တွင် အတည်ပြု ပေးခဲ့သည်ဟု ဆလိုဗက်ကီးယားဝန်ကြီးချုပ် အက်ဒွပ်ဟီဂါ(Eduard Heger)က ပြောသည်။

တစ်ချိန်တည်းမှာပင် လေယာဉ်များသည် ကာကွယ်ရေးအတွက်သာ ဖြစ်ပြီး တိုက်ခိုက်ရေးအတွက် မဟုတ် ကြောင်းလည်း ၎င်းက အခိုင်အမာ ပြောခဲ့သည်။

ယူကရိန်းအား MiG-29 များပေးခြင်းဖြင့် အီးယူထံမှ ဒေါ်လာ သန်း ၉၀၀ ခန့် ပြန်ရမည်ဟု မျှော်လင့် ထားကြောင်း လည်း ဆလိုဗက်ကီးယား ကာကွယ်ရေးဌာနက ကြေညာထားသည်။

အစောပိုင်းတွင်လည်း ပိုလန်အာဏာပိုင်များက ၎င်းတို့အနေဖြင့် ယူကရိန်းသို့ MiG-29 များပို့ပေးရန် စီစဉ်နေကြောင်း ပြောဆိုထားသည်။

Source: တာ့စ်

CNI International News

ဆိုးလ်၊ မတ်လ ၂၉

နျူကလီးယားဗုံးများ လုပ်ရေးအတွက် လိုအပ်သော လက်နက်သုံးပစ္စည်းများ ထုတ်လုပ်မှုကို အရှိန်မြှင့်တင် ဆောင်ရွက်ရန် မြောက်ကိုရီးယား ခေါင်းဆောင် ကင်မ်ဂျုံအန်က ၎င်း၏ နျူကလီးယား ပညာရှင်များကို ညွှန် ကြားခဲ့ကြောင်း အေပီသတင်းတွင် ဖော်ပြသည်။

ထွက်ပေါ်လာသော ဓာတ်ပုံများတွင် မြောက်ကိုရီးယားသည် တောင်ကိုရီးယားကို ချေမှုန်းရေးအတွက် ပြီးခဲ့သည့် နှစ်များတွင် တီထွင်ထားသော ပို့ဆောင်ရေးစနစ်များစွာတွင် တပ်ဆင် အသုံးပြုနိုင်သည့် သေးငယ်သော ဒုံးကျည် ထိပ်ဖူးသစ် တစ်မျိုးကိုလည်း မြင်တွေ့ခဲ့ရသည်။

နိုင်ငံပိုင်သတင်းတွင် ဖော်ပြချက်သည် မြောက်ကိုရီးယား၏ ဒုံးကျည်စမ်းသပ်မှုများ ပြုလုပ်ခြင်း၊ ရန်ဘက်များ အပေါ် လက်နက် အသုံးပြုရန် ခြိမ်းခြောက်မှု မြင့်တက်လာချိန်တွင် ပေါ်ပေါက်လာခြင်း ဖြစ်သည်။

မြောက်ကိုရီးယား၏ လက်နက်စမ်းသပ်မှုများနှင့် အမေရိကန်-တောင်ကိုရီးယားတို့၏ စစ်ရေးလေ့ကျင့်မှုများသည် လုံးလည်ချာလည် လိုက်နေသော အခြေအနေတွင် ရှိနေပြီး ဒေသတွင်း တင်းမာမှု မြင့်တက်နေခြင်းကိုလည်း မီးမောင်း ထိုးပြနေသည်။

မြောက်ကိုရီးယားသည် လာမည့် သီတင်းပတ်များ သို့မဟုတ် လများတွင် နျူကလီးယား လက်နက်များကို ပိုမို ရန်လိုသော အနေအထားဖြင့် ထပ်မံချပြလာ နိုင်ဖွယ်ရှိကာ နျူကလီးယား လက်နက်စမ်းသပ်မှုမျိုးပင် ဖြစ်လာနိုင်သည်ဟု တာဝန်ရှိသူများက သုံးသပ်သည်။

မြောက်ကိုရီးယားရဲ့ နျူကလီးယားလက်နက်များ ထုတ်ပြနေတဲ့ သတင်းကို လွှင်နေစဉ်

နိုင်ငံ၏ အရာရှိများ၊ နျူကလီးယား လက်နက်အဖွဲ့မှ ပညာရှင်များနှင့် တွေ့ဆုံပွဲတွင် ကင်မ်က နျူကလီးယား လက်နက်အင်အား တိုးချဲ့ရေး အစီအစဉ်အတွက် နျူကလီးယား ဗုံးလောင်စာများ ထုတ်လုပ်ခြင်းကို မြှင့်တင်ရန် နှင့် နျူကလီးယား လုပ်ငန်းအတွက် အရေးပါသည့် တာဝန်များကို ထုတ်ပြန်ခဲ့ကြောင်း KCNA သတင်း၌ ဖော်ပြ သည်။

အစည်းအဝေးတွင် ပညာရှင်များဘက်မှ မြောက်ကိုရီးယား၏ နောက်ဆုံးထုတ် နျူကလီးယား လက်နက် စနစ်များ နှင့် ဒုံးကျည်များ၌ နျူကလီးယား ထိပ်ဖူးတပ်ဆင်ရေး နည်းပညာဆိုင်ရာ တိုးတက်မှုများကို တင်ပြခဲ့သည်။

ထို့နောက် ကင်မ်က နိုင်ငံ၏တန်ပြန် နျူကလီးယား တိုက်ခိုက်မှု ပြုလုပ်နိုင်စွမ်းကို စစ်ဆေးခဲ့သည်ဟုလည်း သတင်းတွင် ဖော်ပြသည်။

KCNA မှ ထုတ်ပြန်ထားသော ဓာတ်ပုံများတွင် အနီရောင်ထိပ်ဖူးနှင့် ကာကီစိမ်းရောင် အရာဝတ္တု ၁၀ ခု အပါအဝင် ဘက်စုံသုံး ဒုံးကျည်ထိပ်ဖူးများဟု ယူဆရသည့် လက်နက်များရှိကာ အခန်းအတွင်း ကင်မ်နှင့် တာဝန်ရှိသူများ စကားပြောနေသည်ကို မြင်တွေ့ရသည်။

တခြား လက်နက်များတွင် ရေယက်များ သို့မဟုတ် တော်ပီဒိုကြီးများ ပါဝင်သော အဖြူနှင့်အနက်ရောင် အဝိုင်းထု ချွန်ကြီးများနှင့်တူသော အရာများလည်း ပါဝင်သည်။

အစိမ်းရောင် အရာတစ်ခု၏ ဘေးနံရံတွင် Hwasan-31 ဟုခေါ်သော ဒုံးကျည်ထိပ်ဖူးတစ်ခုကို ဖော်ပြထားသည့် ပိုစတာတစ်ခုကို ချိတ်ဆွဲထားသည်။

မြောက်ကိုရီးယား ခေါင်းဆောင် ကင်မ်ဂျုံအန် နျူကလီးယားလက်နက်များ ထုတ်ပြနေစဉ်

ပိုစတာပေါ်မှ ပုံအရ ယင်းသည် မြောက်ကိုရီးယား၏ တာတိုပစ် ပဲ့ထိန်းဒုံးကျည် စနစ်များ၊ ခရုစ်ဒုံးကျည်များနှင့် ပြီးခဲ့သည့် သီတင်းပတ်တွင် ပထမဆုံး ထုတ်ပြခဲ့သည့် နျူကလီးယား သယ်ဆောင်နိုင်သော ရေအောက်ဒရုန်း စသည့် စနစ်များအားလုံးတွင် တပ်ဆင်နိုင်သည့် လက်နက်ဟု ယူဆရသည်။

Hwasan-31 များသည် အချင်း ၅၀ စင်တီမီတာ၊ အရှည် ၉၀ စင်တီမီတာရှိမည်ဟု ကျွမ်းကျင်သူများက ခန့်မှန်းပြီး ယင်းသည် မြောက်ကိုရီးယား၏ ဒုံးကျည်ထိပ်ဖူး ဖန်တီးရေး လုပ်ငန်းတွင် တိုးတက်မှုများ ရှိလာသည်ကို ဖော်ပြနေ သည်ဟု ဆိုးလ်တက္ကသိုလ် မြောက်ကိုရီးယားလေ့လာမှု ပါမောက္ခ ကင်မ်ဒေါင်-ယတ် (Kim Dong-yub)က ပြော သည်။

ထွက်ပေါ်လာသော သတင်းများအရ မြောက်ကိုရီးယားသည် နောက်တစ်ကြိမ် နျူကလီးယား စမ်းသပ်မှု လုပ်ဆောင်ရန် နီးစပ်လာပြီကို ဖော်ပြနေသည်ဟုလည်း တောင်ကိုရီးယား ပညာရှင်တစ်ဦးဖြစ်သူ ချုံဆုန်-ချန်း(Cheong Seong-Chang) က ပြောသည်။

Source:AP

CNI News

၂၀၂၃ ခုနှစ်၊ မတ်လ ၂၉

ထိုင်းနိုင်ငံသားသေဆုံးမှုဖြင့် တရားရင်ဆိုင်နေရသည့် ရခိုင်လူငယ်သည် ၁၀ လအကြာတွင် ထိုအမှုမှ အကြွင်းမဲ့ လွတ်မြောက်သွားပြီဖြစ်ကြောင်း အမှုအား လိုက်ပါဆောင်ရွက်ပေးသည့် MWRN မှ မြန်မာအလုပ်သမား တာဝန်ခံ ကိုသိန်းထွန်းက CNI သတင်းဌာနသို့ ပြောသည်။

ထို ရခိုင်လူငယ်သည် စစ်တွေမြို့မှဖြစ်ကာ ထိုင်း-မလေးရှား နယ်စပ်တွင် ထိုင်းနိုင်ငံသားတစ်ဦး အသတ်ခံရမှုနှင့် ပတ်သက်၍ လက်ဗွေတွေ့ရှိသဖြင့် ၂၀၂၂ ခုနှစ် ဇွန်လမှ စတင်ကာ တရားရင်ဆိုင်နေရခြင်းဖြစ်ပြီး ၂၀၂၃ ခုနှစ် မတ်လ ၂၈ ရက်နေ့တွင် တရားသူကြီး ၇ ဦးဖြင့် အပြီးသတ်အမိန့်ချမှတ်ကာ ယခုကဲ့သို့ အမှုမှ လွတ်မြောက်ခြင်း ဖြစ်ကြောင်း ၎င်းက ပြောသည်။

“တရားသူကြီး ပြောတာက သူ့ကို လွတ်ပေးလိုက်လို့ရပြီ။ လုံးဝ လွတ်ကင်းသွားပြီ။ ဒါပေမယ့် တရားလိုဘက်ကို သူပြောထားတာက ရက်ပေါင်း ၃၀ အတွင်းမှာ အယူခံဝင်လို့ရတယ်ဆိုပြီး ပြောထားတဲ့အခါကျတော့ ဟိုဘက်က ဘယ်လိုဆုံးဖြတ်မလဲဆိုတဲ့ဟာကို ခဏလေးလောက် စောင့်ကြည့်ရမယ်နဲ့တူတယ်။ အောင်ကိုဝင်းကိုတော့ ထောင်ကို မပို့တော့ဘူးလေ။ ရဲစခန်းမှာပဲ ပထမသူ့ကိုဖမ်းတဲ့ ဆုန်ခလာခရိုင် ရဲစခန်းမှာပဲ သူ့ကို ထိန်းသိမ်းမယ် ပေါ့လေ။ သူ့ကိုထောင်မှာမထားတော့ဘူး။

အမှုအားလိုက်ပါဆောင်ရွက်ပေးသည့် ရှေ့နေ

ထားခွင့်လည်း မရှိတော့ဘူး။ ဒါပေမယ့် တရားလိုဘက်က ဘယ်လို အတိုင်းအတာမျိုးနဲ့ အယူခံဝင်မယ်၊ မဝင်မယ်ဆိုတာ သူက တရားရုံးကို တင်ပြမှာကို။ တကယ်လို့ အယူခံ မဝင်ဘူးဆိုလည်း မဝင်ဘူး။ ဝင်မယ်ဆိုလည်း ဝင်မယ် တရားရုံးကို တင်ပြရမှာကို။ အဲဒီအပေါ်မှာ အောင်ကိုဝင်း အနေနဲ့ ဘယ်နှစ်ရက်လောက်မှာ မြန်မာနိုင်ငံကို ပြန်ပို့မယ်ဆိုတာမသိဘူး။ မလုပ်တော့ဘူး အယူခံမဝင်တော့ဘူး ဆို မနက်ဖြန်လည်း ပြန်ပို့လို့ရပြီ။ ကျနော်တို့ဘက်က သက်သေက အရမ်းခိုင်တယ်။ လုံးဝ အောင်ကိုဝင်းနဲ့ မပတ်သက်ဆိုတဲ့ဟာ။ ထွက်ဆိုချက်တွေကလည်း အောင်ကိုဝင်းနဲ့ လုံးဝမသက်ဆိုင်ဘူးပေါ့လေ။ ဒီလူသတ်မှုနဲ့ လုံးဝမသက်ဆိုင်ဘူးဆိုတဲ့ဟာတွေက လုံးဝကို ထင်ထင်ရှားရှား ဖြစ်နေပြီးပြီ။ ဒါပေမယ့် ဟိုဘက်ကလည်း သူတို့ ဘက်က ရှေ့နေတွေလည်း အရမ်းကို တော်ပါတယ်။ ဒါပေမယ့် သူတို့က ခိုင်လုံတဲ့ သက်သေအချက်အလက်တွေ က ရှာလို့မရဘူး။ နောက်ပြီးတော့ သူတို့ဘက်က ထွက်ဆိုမယ့် မျက်မြင်သက်သေတွေ မရှိတာရယ်၊ နောက်ပြီး တော့ သူတို့ ကိုယ်တိုင်လည်း အခင်းဖြစ်တဲ့နေရာမှာ မရှိတာရယ်ပေါ့လေ။ အဲဒါက အားနည်းချက်ပေါ့လေ” ဟု ၎င်းက ပြောသည်။

ထို့အပြင် ၂၀၂၂ ခုနှစ် ဩဂုတ်လကတည်းက လူကုန်ကူးမှုဖြင့် ထောင်ဒဏ် ၂ နှစ်နှင့် ၃ လချမှတ်ခံထားရသည့် ပွဲစားဆိုသူ မြန်မာနိုင်ငံသားမှာလည်း ထိုင်းနိုင်ငံသားသေဆုံးမှုတွင် ပါဝင်ပတ်သက်ခြင်း မရှိသဖြင့် ထိုအမှုမှ လွတ်မြောက်ကြောင်း သိရသည်။

ယခုကဲ့သို့ အမှုမှလွတ်မြောက်သည့်အတွက် ဝမ်းသာကြောင်းနှင့် သားဖြစ်သူအား အိမ်သို့ အမြန်ဆုံး ပြန်လာ စေချင်ပြီဖြစ်ကြောင်း လက်ဗွေတွေ့ရှိသူ ရခိုင်လူငယ်၏ မိခင်ဖြစ်သူ ဒေါ်သန်းကြည်မေက CNI သတင်းဌာနသို့ ပြောသည်။

“ဒီနေ့လောက် ပျော်ဖို့ကောင်းတဲ့ရက်ဆိုတာ မရှိတော့ပါလားလို့ အဲဒီလောက်အထိ ခံစားရတယ် ရင်ထဲမှာ။ အပျော်ဆုံးနေ့လို့ခံစားရတယ်။ မျှော်လင့်ထားတာကတော့ သူအိမ်ကိုပြန်လာရင် မိသားစုသိုက်သိုက်ဝန်းဝန်းနဲ့ ပျော်ပျော်ရွှင်ရွှင်နေဖို့။ ဒီနေ့တောင်မှ ရောက်စေချင်တယ် ဒီလောက်အထိ။ သူ့ရဲ့အသံကို မကြားရတော့ အားမရ ဖြစ်နေသေးတယ်။ အန်တီကတော့ ကြာတာကို မပြောတော့ဘူး၊ လွတ်တယ်ဆိုတာပဲ ဝမ်းသာတယ်။ တစ်နေ့ ကျတော့ လကုန်ရင် ရောက်လာဖို့က အမှန်ပဲမဟုတ်လားလေ။ ဒီအမှုကို အဓိက လိုက်ပါဆောင်ရွက်ပေးနေတဲ့ သိန်းထွန်းတို့ကိုလည်း အထူးကျေးဇူးတင်တယ်။ အန်တီမှာက ကျေးဇူးတင်တာကလွဲပြီး တစ်ခုလည်း မတတ်နိုင်လေ။ ပိုက်ဆံဆိုတာလည်း အန်တီမှာ မရှိဘူးလေ” ဟု ၎င်းက ပြောသည်။

အဆိုပါ ရခိုင်လူငယ်အနေဖြင့် တရားရင်ဆိုင်နေရသည်မှာ ၁၀ လခန့်ရှိပြီဖြစ်သောကြောင့် ၎င်းတို့နှစ်ဦးအတွက် နစ်နာကြေးတောင်းခံသွားရန်ရှိကြောင်းလည်း အမှုအား လိုက်ပါဆောင်ရွက်ပေးသည့် MWRN မှ မြန်မာအလုပ် သမား တာဝန်ခံ ကိုသိန်းထွန်းက CNI သတင်းဌာနသို့ ပြောသည်။

အမှုအားလိုက်ပါဆောင်ရွက်ပေးခဲ့သည့် ရှေ့နေနှင့် MWRN မှ တာဝန်ရှိသူများကို တရားရုံးရှေ့တွင် တွေ့ရစဉ်

“ဒီလူသတ်မှုနဲ့ လွတ်တယ်ဆိုတဲ့အခါ ကျနော်တို့ကနေပြီးတော့ အပြစ်မရှိဘဲနဲ့ ကျနော်တို့နိုင်ငံသားတွေကို တရား စွဲဆိုထားတယ်၊ ထောင်ထဲမှာနေပြီးတော့ ထောင်ချထားတာဆိုလို့ရှိရင် လုပ်သင့်လုပ်ထိုက်တာကို လုပ်ဖို့ ညှိနှိုင်း တဲ့အခါ အောင်ကိုဝင်းက ၆ လပိုင်းကနေ အခုဆို ၉ လ ၁၀ ဖြစ်သွားပြီလေ ထောင်ထဲမှာနေရတာ သက်တမ်း။ အဲဒီအတွက်ကြောင့် အောင်ကိုဝင်းရော ဒီမောင်ဆန်းအေး(ပွဲစား)အတွက်ရော နစ်နာကြေးပေါ့လေ တောင်းဖို့ အတွက် ကျနော်တို့ သူတို့ကို လက်မှတ်ထိုးခိုင်းထားတာရှိတယ်။ ဒါပေမယ့် ဖောင်တွေ ဘာတွေကတော့ မဖြည့် ရသေးဘူး။ တကယ်လို့များ အမှန်တကယ် ပို့လိုက်လို့ရှိရင် လက်မှတ်ထိုးမယ့်လူ မရှိတော့ဘူးလေ။ ကြိုတင် ပြီးတော့ သူတို့ကို အရင်လက်မှတ်ထိုးခိုင်းလိုက်တယ်။ ဒီနေ့လောက်မှ ကျနော်တို့က ဖောင်ဖြည့်ပြီးတော့ နောက်နေ့မှ အဲဒါကို ကျနော်တို့ တင်မယ်ပေါ့လေ။ ဒါပေမယ့် နစ်နာကြေးနဲ့ပတ်သက်လို့ ရမယ် မရဘူး ဆိုတာ ကတော့ တရားရုံးအပေါ်မှာလည်း မူတည်သေးတာကို” ဟု ၎င်းက ပြောသည်။

ထိုင်း-မလေးရှားနယ်စပ်၊ ထိုင်းဘက်အပိုင် တောထဲတွင် ထိုင်းနိုင်ငံသား အလုပ်သမားတစ်ဦး၏ အလောင်းကို မေလ ၃၁ ရက်က တွေ့ရှိခဲ့သဖြင့် ဇွန်လ ၂ ရက်နေ့မှ စတင်ကာ ယခုကဲ့သို့ မလေးရှားသို့ တရားမဝင် ခိုးဝင်မည့် မြန်မာ ၃၀၀ ကျော်အား ဖမ်းဆီးကာ စစ်ဆေးမေးမြန်းခဲ့ပြီး ထိုထဲကမှ လက်ဗွေတွေ့ရှိသဖြင့် ရခိုင်လူငယ်တစ်ဦးမှာ တရားရင်ဆိုင်နေရခြင်းဖြစ်သည်။

CNI International News

နယူးဒေလီ၊ မတ်လ ၂၈

အနက်ရောင်ဝတ်ဆင်ထားသော အတိုက်အခံပါတီအဖွဲ့ဝင်များက တနင်္လာနေ့က အိန္ဒိယလွှတ်တော်ကို နှောင့်ယှက်ခဲ့ကာ မြို့တော်နယူးဒေလီ (New Delhi) တွင် ဆန္ဒပြပွဲများလုပ်ဆောင်ခဲ့သည်ဟု အေပီသတင်းတွင် ဖော်ပြသည်။

ထင်ရှားသော အတိုက်အခံခေါင်းဆောင်တစ်ဖြစ်လဲ ဝန်ကြီးချုပ် မိုဒီ (Modi) အား ဝေဖန်သူ ရာဟူးဂန္ဒီ(Rahul Ganhi)အား ပြီးခဲ့သည့် သီတင်းပတ်က လွှတ်တော်မှ ဖယ်ရှားခဲ့ပြီးနောက် ယခုကဲ့သို့လုပ်ဆောင်ခဲ့ခြင်း ဖြစ်သည်။

ဒေလီမြို့လယ်ခေါင်တွင် ဂန္ဒီ၏ ကွန်ဂရက်ပါတီအား ထောက်ခံသူ ရာပေါင်းများစွာက ဆုဝေးဆန္ဒပြခဲ့ကြပြီး ဒါဇင်နှင့်ချီ ဖမ်းဆီးခံခဲ့ရသည်။ အတိုက်အခံပါတီ ၁၈ ခုမှ လွှတ်တော်အမတ်များသည်လည်း လွှတ်တော် အပြင်ဘက်တွင် စုဝေးခဲ့ပြီး ဝမ်းနည်းပူဆွေးသည့်သဘောဖြင့် အနက်ရောင်များဝတ်ဆင်ကာ အိန္ဒိယ၏ ဒီမိုကရေစီစနစ်သည် အန္တရာယ်ရှိနေသည်ဟု သတိပေးထားသည့် ပိုစတာများကို ကိုင်ဆောင်ဆန္ဒပြခဲ့ကြသည်။

ပါလီမန်မှ ထုတ်ပယ်ခြင်းကို ဆန့်ကျင်သည့် ခေါင်းဆောင် ရာဟူးဂန္ဒီကို ထောက်ခံသူတစ်ဦးအား ရဲတပ်ဖွဲ့က ဖမ်းဆီးထိန်းသိမ်းလာစဉ်(ဓါတ်ပုံ-အေပီ)

ရာဟူးဂန္ဒီသည် ၂၀၁၉ ခုနှစ်က ဝန်ကြီးချုပ်မိုဒီအား လှောင်ပြောင်သည့် စကားအသုံးအနှုံးများကြောင့် အသရေဖျက်မှုနှင့် ထောင်ဒဏ်နှစ်နှစ် ချမှတ်ခံခဲ့ရသည်။ ထိုသို့ ချမှတ်ခံခဲ့ရပြီး တစ်ရက်အကြာ သောကြာနေ့တွင် လွှတ်တော်အမတ်ရာထူးမှ ဖယ်ရှားခံခဲ့ရသည်။ ရာဟူးအပေါ် အပြစ်ပေးမှုအတွက် ဝန်ကြီးချုပ် မိုဒီကို အတိုက်အခံ များက ပြင်းပြင်းထန်ထန် ဝေဖန်ခဲ့ကြကာ အစိုးရသည် ဒီမိုကရေစီနှင့် လွတ်လပ်စွာပြောဆိုမှုကို လျော့ပါးစေရန် လုပ်ဆောင်နေသည်ဟု စွပ်စွဲခဲ့ကြသည်။
ရာဟူး လွှတ်တော်မှ ဖယ်ရှားခံခဲ့ရခြင်းသည် လာမည့်နှစ် ရွေးကောက်ပွဲ ကျင်းပရန်ရှိနေချိန်တွင် အတိုက်အခံ ကွန်ဂရက်ပါတီအတွက် ကြီးမားသည့် ထိုးနှက်ချက်တစ်ခုကိုလည်း ဖြစ်စေသည်။ အစိုးရသည် အတိုက်အခံများနှင့် အတိုက်အခံများ၏အသံကို ဖိနှိပ်လိုနေသည်ဟု ကွန်ဂရက်ပါတီ ဥက္ကဋ္ဌက ပြောသည်။ ၎င်းသည် မိုဒီနှင့် စီးပွားရေး လုပ်ငန်းရှင် ဂူတမ် အက်ဒါနီ (Gautam Adani) တို့ အကြားဆက်ဆံရေးကို မေးခွန်းထုတ်ခဲ့မှုအတွက် ယခုကဲ့သို့ ပစ်မှတ်ထားတိုက်ခိုက်ခံရခြင်းဖြစ်သည်ဟု ရာဟူးက သီတင်းပတ်ကုန်ပိုင်းတွင် ပြောခဲ့သည်။

ရာဟူးဂန္ဒီကို ထောက်ခံအားပေးသူများကိုတွေ့ရစဉ်(ဓါတ်ပုံ-အေပီ)

အက်ဒါနီအုပ်စုသည် ပြီးခဲ့သည့် ဇန်နဝါရီလတွင် ဒေါ်လာဘီလီယံနှင့်ချီ တန်ဖိုးရှိသော စတော့ဈေးကစားခြင်း၊ လိမ်ညာခြင်းများ လုပ်ဆောင်ခဲ့သည်ဟု အမေရိကန် Hindenburg Research အဖွဲ့က စွပ်စွဲခဲ့သည်။ ထိုအချိန်မှစ၍ ရာဟူးသည် အက်ဒါနီအုပ်စု၏လုပ်ငန်းများအကြောင်းကို စုံစမ်းစစ်ဆေးမှုလုပ်ဆောင်ရန် တောင်းဆိုခဲ့သည်။

မိုဒီ၏ BJP ပါတီဘက်က အက်ဒါနီအုပ်စုနှင့် ဝန်ကြီးချုပ်တို့အကြား မည်သည့်ဆက်စပ်မှုမျှမရှိဟု ငြင်းဆိုထား သည်။ ရာဟူးကို ထောက်ခံသည့် အတိုက်အခံများက ထိုကိစ္စကို စုံစမ်းစစ်ဆေးပေးရန်လည်း ထပ်မံ တောင်းဆို ခဲ့ကြသည်။

Source:AP