- By CNI
- Category: နိုင်ငံရေး
- Hits: 806
CNI International News
မယ်လ်လီတိုပို၊ ဩဂုတ် ၁၆
ယူကရိန်းနိုင်ငံ အရှေ့တောင်ပိုင်းရှိ ဇာပိုရေဇီးယားဒေသ (Zaporozhye) တွင် ရုရှားနိုင်ငံသား ဖြစ်ခွင့်အတွက် လျှောက်ထားသူပေါင်း ၃ သောင်းကျော်ရှိခဲ့ကြောင်း ဒေသန္တရာ စစ်ဘက်၊ အရပ်ဘက်အုပ်ချုပ်ရေး အကြီးအကဲ ယွတ်ဂျီနီဘဲလစ်စကီ (Yevgen Balitsky) က ဩဂုတ် ၁၅ ရက်တွင် ပြောကြားခဲ့သည်ဟု တာ့စ်သတင်းဌာနက ဖော်ပြသည်။
“ဇာပိုရေဇီးယားဒေသမှာ နေထိုင်သူတွေထဲက ရုရှားနိုင်ငံသားဖြစ်ခွင့် လျှောက်ထားမှု ပိုများလာပါတယ်။ ဒီနေ့ အထိ လိုအပ်တဲ့ စာရွက်စာတမ်း ပြည့်စုံတဲ့ လျှောက်လွှာ ၃ သောင်းကျော်ကို သက်ဆိုင်ရာဌာနတွေက စဉ်းစားပေး နေပါတယ်။ သက်သေခံ လက်မှတ်ထုတ်ပေးဖို့ လုပ်ငန်းစဉ်တွေ နှောင့်နှေးနေတဲ့အချိန်မှာ သီးခြားကိစ္စရပ်တွေကို ဖြေရှင်းဖို့ ယန္တရားတွေ ဆက်ပြီး လုပ်ဆောင်ပေးပါတယ်” ဟု ဘဲလစ်စကီက ၎င်း၏ တယ်လီဂရမ် ချန်နယ်တွင် ရေးသားလွှင့်တင်ခဲ့သည်။
ရုရှားတပ်ဖွဲ့ကိုတွေ့ရစဉ်
သက်သေခံ လက်မှတ်များ ထုတ်ပေးရန်အတွက် ဌာန ၁၂ ခု ဖွင့်လှစ်ထားရာ မယ်လ်လီတိုပိုမြို့တွင် ၃ ခု၊ ဘာဒင် ညက်မြို့တွင် ၂ ခု၊ အကီမိုဗကာတွင် ၁ ခု၊ ပရီယာဇော့ဗ်တွင် ၁ ခု၊ တုက်မက်တွင် ၁ ခု၊ မီခေးလ်လိုဗာတွင် ၁ ခု၊ ဒနီ ပရို ပရူဒနီတွင် ၁ ခု၊ အနာဂိုဒါတွင် ၁ ခုနှင့် ကမင်ကာတွင် ၁ ခုတို့ဖြစ်ကြောင်း ဘဲလစ်စကီ၏ အဆိုအရ သိရသည်။
ရုရှားသမ္မတ ဗလာဒီမာပူတင်သည် ယူကရိန်းနိုင်ငံ ဇာပိုရေဇီးယားနှင့် ခါဆွန်ဒေသများ၌ နေထိုင်သူများအတွက် သက်သေခံ လက်မှတ်များ ထုတ်ပေးခြင်းဆိုင်ရာ လုပ်ထုံလုပ်နည်းကို ရိုးရှင်းလွယ်ကူစေရေးအတွက် ပြီးခဲ့သည့် မေလ ၂၅ ရက်တွင် လက်မှတ်ရေးထိုး ပြဋ္ဌာန်း ပေးခဲ့ပြီး ဖြစ်သည်။
Source: တာ့စ်သတင်းဌာန
- By CNI
- Category: နိုင်ငံရေး
- Hits: 1055
CNI International News
နယူးဒေလီ၊ ဩဂုတ် ၁၆
သန်းပေါင်းများစွာသော ပြည်သူများ ဆင်းရဲတွင်းမှ ရုန်းထွက်နိုင်ပြီး အိန္ဒိယနိုင်ငံကို ယခုရာစုနှစ် လေးပုံတစ်ပုံ အရောက်တွင် ဖွံ့ဖြိုးပြီး နိုင်ငံအဖြစ်သို့ ပြောင်းလဲပေးသွားမည်ဟု ဝန်ကြီးချုပ် နာရိန္ဒရာမိုဒီက အာမခံပြောကြားခဲ့ ကြောင်း အေပီက ရေးသားထားသည်။
ထို့နောက် ဗြိတိသျှတို့လက်မှ လွတ်လပ်ရေး ရရှိခဲ့သည့် ၇၅ နှစ်ပြည့် အထိမ်းအမှတ်နေ့တွင် မိုဒီက ယင်းကဲ့သို့ အာမခံခဲ့ခြင်းဖြစ်သည်။
နိုင်ငံ၏ အလံအရောင်များဖြစ်သော လိမ္မော်၊ အဖြူနှင့် အစိမ်း အစင်းကျားများ ပုံဖော်ထားသည့် နို့နှစ်ရောင် ဗောင်း ထုပ်ကို ဆောင်းထားသည့် မိုဒီသည် နယူးဒေလီမြို့တော်ရှိ ၁၇ ရာစုလက်ရာ မဂိုခံတပ်နီ ရှေ့မှနေ၍ ဩဂုတ် ၁၅ ရက်တွင် တိုင်းပြည်သို့ မိန့်ခွန်း ပြောကြားခဲ့သည်။
အိန္ဒိယလွတ်လပ်ရေးနေ့ ကျင်းပနေစဉ် (AP)
လွန်ခဲ့သည့် ၇၅ နှစ်တာ ခရီးစဉ်တွင် အိန္ဒိသည် ကြံ့ကြံ့ခံပြီး ဇွဲလုံ့လဖြင့် စိန်ခေါ်မှုအားလုံးကို တွန်းလှန်ခဲ့ရာ၌ အတက်အကျများကို ကြုံတွေ့ခဲ့ရကြောင်း မိုဒီက ဆက်လက် ပြောကြားခဲ့သည်။
ကိုလိုနီခေတ်မှ အတွေးအမြင် ဟောင်းများကို ဖယ်ရှားဖျောက်ပစ်ရန် ပြည်သူများကို မိမိတောင်းဆိုလိုကြောင်း၊ အိန္ဒိယသည် သိပ္ပံနှင့်နည်းပညာ ထွန်းကားစေရန်၊ စက်မှုလုပ်ငန်းများ ထူထောင်ရန်၊ စားနပ်ရိက္ခာနှင့် စွမ်းအင်ဖူလုံ စေရန် နိုင်ငံတကာ ပူးပေါင်းဆောင်ရွက်မှု အသိစိတ်ဓာတ်ဖြင့် လုပ်ဆောင်သွားမည်ဟု ၎င်းက ထပ်လောင်း ပြော ကြားခဲ့သည်။
ရင်းနှီးမြှုပ်နှံမှု ဒေါ်လာဘီလီယံများစွာ ပြည်တွင်းသို့ စီးဝင်လာခဲ့ရာ ထုတ်လုပ်မှု ဗဟိုအချက်အချာ အဖြစ်သို့ ပြောင်းလဲလာခဲ့ကြောင်း ၎င်းက အသိအမှတ်ပြုခဲ့သည်။
လူဦးရေး ၁ ဒသမ ၄ ဘီလီယံရှိ အိန္ဒိယသည် မျက်မှောက်ကာလတွင် သတင်းအချက်အလက် နည်းပညာ၊ ဆေးဝါး၊ အာကာသသိပ္ပံနှင့် အရပ်ဘက် နျူကလီးယား စွမ်းအင်တို့ကြောင့် ထိပ်တန်းနိုင်ငံများ အဆင့်သို့ တက်လှမ်းနိုင်ခဲ့ပြီ ဖြစ်သည်။
အလံရောင်စုံမီးများ ထွန်းထားတဲ့ အိန္ဒိယအစိုးရရုံး (AP)
“နိုင်ငံတဝန်းရှိ သန်းနှင့်ချီသော ပြည်သူများသည် ၎င်းတို့၏ မျိုးချစ်စိတ် နိုးကြားမှုအနေဖြင့် နေအိမ်များ၊ စီးပွားရေး လုပ်ငန်းများတွင် နိုင်ငံ့အလံကို ၃ ရက်ကြာ လွှင့်ထူခြင်းဖြင့် လွတ်လပ်ရေးနေ့ကို ဂုဏ်ပြုနေကြောင်း” မိုဒီက ဖြည့်စွက် ပြောကြားခဲ့သည်။
လွတ်လပ်ရေးနေ့ အထိမ်းအမှတ်အဖြစ် အိန္ဒိယလွှတ်တော် အဆောက်အအုံ၊ သမ္မတနန်းတော်၊ နိုင်ငံ့ ထင်ကရ နေရာများနှင့် အစိုးရရုံးများကို ရောင်စုံမီးဖြင့် အလှဆင်ထားကြသည်။
မိုဒီအစိုးရသည် ယင်းကဲ့သို့ အခမ်းအနားမျိုးတွင် အတိုက်အခံပါတီကို ပါဝင်စေခြင်း မရှိကြောင်း အဓိက အတိုက်အခံပါတီဖြစ်သော ကွန်ဂရက်ပါတီက စွပ်စွဲခဲ့သည်။
အိန္ဒိယ လွတ်လပ်ရေးနေ့ကို ဂုဏ်ပြုသည့် အနေဖြင့် အမေရိကန်သမ္မတ ဂျိုးဘိုင်ဒန်က “မိမိတို့နှစ်နိုင်ငံသည် တရားဥပဒေစိုးမိုးရေးနှင့် လူသားလွတ်လပ်ခွင့်နှင့် လူ့ဂုဏ်သိက္ခာ မြှင့်တင်ရေးတို့အတွက် တူညီသော ကတိကဝတ်များ အခြေခံ၍ မရှိမဖြစ် လိုအပ်သော မိတ်ဖက်နိုင်ငံများ ဖြစ်ကြကြောင်း” ပြောကြားခဲ့သည်။
Source: AP
- By CNI
- Category: နိုင်ငံရေး
- Hits: 696
CNI International News
မော်စကို၊ ဩဂုတ် ၁၆
မိမိမဟာမိတ်များနှင့် စစ်ရေး ပူပေါင်းဆောင်ရွက်မှု တိုးချဲ့မည်ဖြစ်ရာ မော်စကို၏ အဆင့်မြင့်ဆုံး လက်နက်များ ရောင်းဝယ် ဖောက်ကားဖို့ အသင့်ရှိနေကြောင်း ရုရှားသမ္မတ ဗလာဒီမာပူတင်က ဩဂုတ် ၁၅ ရက်တွင် ပြောကြားခဲ့သည်ဟု အေပီသတင်း ဌာနက ရေးသားထားသည်။
မော်စကိုမြို့တော်၏ အပြင်ဘက်တွင် နှစ်စဉ် ကျင်းပမြဲဖြစ်သည့် လက်နက်ပြပွဲ စတင်ဖွင့်လှစ်သည့် အခမ်းအနားတွင် နိုင်ငံ ခြားမှ ဝယ်နေကျ မဟာမိတ်များကို ဖိတ်ခေါ်ဧည့်ခံခဲ့ပြီး ရုရှားသည် လက်နက်တင်ပို့ရာ၌ ‘ဝင်ရိုးစုံ နိုင်ငံတကာစနစ် စကားရပ်’ (multipolar word) ဖွံ့ဖြိုးလာစေရေးအတွက် အရေးကြီးသည့် အခန်းကဏ္ဍမှ ပါဝင်ကြောင်း ပူတင်က ဆက်လက် ပြောကြား ခဲ့သည်။
အဆိုပါ စကားရပ်သည် အမေရိကန်၏ တကမ္ဘာလုံး လွှမ်းမိုးချုပ်ကိုင်ရေးကို နှိမ်နင်းရန် ကရင်မလင်၏ ကြိုးပမ်းမှုတိုင်း အတွက် သုံးစွဲလေ့ရှိသော စကားရပ်ဖြစ်သည်။
ရုရှားသမ္မတ ဗလာဒီမာပူတင်နဲ့ ကာကွယ်ရေး၀န်ကြီးကိုတွေ့ရစဉ် (AP)
အနောက်အုပ်စုနိုင်ငံများ၏ ပိတ်ဆို့အရေးယူမှု ဖြစ်ပေါ်စေခဲ့သည့် ယူကရိန်းတွင် ရုရှားစစ်တပ်၏ ဆောင်ရွက်ချက်များကို ပူတင်က ချီးကျူးခဲ့ပြီး ၎င်းအပေါ်ထောက်ခံသည့် မော်စကို၏ မဟာမိတ်များကိုလည်း ကျေးဇူးတင်ကြောင်း ပြောကြားခဲ့သည်။
“ကျနော်တို့ရဲ့မဟာမိတ်တွေ၊ မိတ်ဖက်တွေနဲ့ ကမ္ဘာ့တိုက်ကြီး အသီးသီးမှာ ကျနော်တို့ အတွေးအခေါ်ကို မျှဝေပေးကြတဲ့ သူတွေ အများကြီးရှိတဲ့အတွက် သူတို့ကို အထူးပဲ ကျေးဇူးတင်ပါတယ်” ဟု ၎င်းက ပြောကြားခဲ့သည်။
ယူကရိန်းသို့ ကျူးကျော်မှုကြောင့် နိုင်ငံတကာဥပဒေ ချိုးဖောက်သူဟု ရှုတ်ချခံထားရသည့် ပူတင်က “မော်စကို၏ မဟာမိတ် နိုင်ငံများမှ ခေါင်းဆောင်များသည် အချုပ်အခြာအာဏာပိုင် လွတ်လပ်သော ဖွံ့ဖြိုးရေးလမ်းစဉ်ကို ရွေးချယ်ခဲ့ကြကြောင်း၊ နိုင်ငံတကာဥပဒေ၏ အခြေခံအရ ကမ္ဘာ့အရေးနှင့်ဒေသတွင်း လုံခြုံရေးပြဿနာများကို စုပေါင်းဖြေရှင်းလိုကြောင်း၊ တာဝန် နှင့် အပြန်အလှန် အကျိုးစီးပွား ခွဲဝေပေးခြင်းဖြင့် ဘက်စုံဝင်ရိုးကမ္ဘာကို ထိန်းထားနိုင်ရန် အထောက်အကူပြုကြောင်း” ဆက်လက် ပြောကြားခဲ့သည်။
ရုရှားနဲ့မဟာမိတ်နိုင်ငံများ (GETTY IMAGES)
ရုရှားသည် လက်တင်အမေရိကန်၊ အာရှ၊ အာဖရိကနိုင်ငံများနှင့် မိမိ၏သမိုင်းကြောင်းအရ ချစ်ကြည်ရင်းနှီးပြီး ယုံကြည်စိတ် ချရသော ဆက်ဆံရေးကို စိတ်ရင်းအမှန်ဖြင့် တန်ဖိုးထားပါကြောင်း” ပူတင်က မှတ်ချက်ချခဲ့သည်။ မည်သည့် နိုင်ငံများကို ဆိုလိုကြောင်းကိုတော့ အမည်နှင့်တကွ ထုတ်ဖော်ခဲ့ခြင်း မရှိပါ။
“ကျနော်တို့ဟာ မဟာမိတ်တွေ၊ မိတ်ဖက်နဲ့အတူ ခေတ်အမီဆုံး လက်နက် အမျိုးအစားတွေဖြစ်တဲ့ သေနတ်တွေ၊ သံချပ်ကာ ကား၊ အမြောက်တွေကနေ စစ်လေယာဉ်နဲ့ ဒရုန်းတွေအထိ ရောင်းဝယ်ဖောက်ကားသွားဖို့ အသင့်ရှိနေပါတယ်” ဟု ၎င်းက ထပ်လောင်း ပြောကြားခဲ့သည်။
Source: AP
- By CNI
- Category: နိုင်ငံရေး
- Hits: 589
CNI International News
၂၀၂၂ ခုနှစ်၊ သြဂုတ် ၁၅
အာဖဂန်နစ္စတန်နိုင်ငံ၊ ကဘူးလ်မြို့တော်ကို တာလီဘန်တို့ ပြန်သိမ်းခဲ့သည့် နှစ်ပတ်လည် အကြိုနေ့တွင် သမ္မတ ဟောင်း အရှရက်ဖ်ဂါနီက “၎င်းအနေဖြင့် နိုင်ငံအတွင်းမှ ထွက်ပြေးခဲ့ရန် ဆုံးဖြတ်ချက်ချမည့် အချိန်မှာ စက္ကန့်ပိုင်းသာ ရခဲ့ကြောင်း၊ သူပုန်များထံ လက်နက်ချအညံ့ခံ၍ အရှက်တကွဲဖြစ်ရခြင်းမှ ရှောင်ရှားခဲ့ခြင်းသာဖြစ်ကြောင်း” သူ့ကိုယ်သူ ကာကွယ်ပြောကြားခဲ့သည်ဟု အေပီသတင်းတစ်ပုဒ်တွင် တွေ့ရသည်။
၂၀၂၁ ခုနှစ်၊ ဩဂုတ် ၁၅ ရက် နံနက်ပိုင်းက အာဖဂန်မြို့တော် ကဘူးလ်ဂိတ်ပေါက်ဝသို့ တာလီဘန်များ ရောက်ရှိ လာသည်နှင့်တပြိုင်နက် သမ္မတနေအိမ်ရှိ အစောင့်များ ပျောက်ကွယ်သွားပြီးနောက် မိမိသာ အိမ်ထဲတွင် နောက်ဆုံး ကျန်တော့ကြောင်း၊ ကဘူးလ်ကို အကာအကွယ် မပေးနိုင်တော့ခြင်းအား ကာကွယ်ရေးဝန်ကြီးက ထိုနေ့ အစောပိုင်းတွင် မိမိထံသို့ ပြောခဲ့ကြောင်း ဂါနီက CNN သတင်းဌာနသို့ ရှင်းပြသည်။
ကဘူးလ်မြို့တော်ရှိ သမ္မတအိမ်တော်ကို တာလီဘန်တို့ ထိန်းချုပ်လိုက်စဉ် (AP)
ကဘူးလ်မြို့ တာလီဘန်လက်သို့ ကျခဲ့သည့်နေ၌ ၎င်း၏လုပ်ရပ်များ တရားမျှတမှုရစေရန် ဂါနီက ယခင်ကလည်း ကြိုးပမ်းခဲ့သော်လည်း အသေးစိတ် အချက်အလက်များကိုတော့ ယခု ဩဂုတ် ၁၄ ရက်ကျမှ မီဒီယာသို့ ပြောကြား ရန် ကမ်းလှမ်းခဲ့သည်။
သမ္မတ နေအိမ်အတွင်းရှိ ထမင်းချက်တစ်ဦးကို အဆိပ်ခတ်ရန် ဒေါ်လာ ၁ သိန်းပေးခဲ့ကြောင်း မိမိသိရသဖြင့် နေထိုင်ရာ ပတ်ဝန်းကျင်မှာ မလုံခြုံတော့ဟု ဂါနီက အကြောင်းပြခဲ့သည်။
“ကျနော် ထွက်သွားရတဲ့ အကြောင်းရင်းကတော့ တာလီဘန်တွေနဲ့ သူတို့ကို ထောက်ခံသူတွေက အာဖဂန်သမ္မတ ကို အရှက်တကွဲ ဖြစ်စေခဲ့တယ်ဆိုတဲ့ ကျေနပ်မှု ပီတိမျိုး မပေးချင်တာကြောင့်ပါ။ သူတို့အစိုးရဟာ တရားဝင် (legitimacy) ဖြစ်ပါတယ်ဆိုပြီး ကျနော့်ကို လက်မှတ်ထိုးခိုင်းတော့မှာလေ။ ကျနော်က တခါမှ ကြောက်တာ မဟုတ်ဘူး” ဟု ၎င်းက ဆက်လက် ပြောကြားခဲ့သည်။
တာလီဘန်တို့ အာဏာရပြီး တစ်နှစ်အကြာ အခြေအနေ (AFP)
အာဖဂန်ပြည်တွင်း၌ အနှစ် ၂၀ ကြာ ရှိနေခဲ့သော အမေရိကန်နှင့် နေတိုးတပ်များ ဖရိုဖရဲ ဆုတ်ခွာခဲ့ခြင်း၏ နောက် ဆုံး အဆင့်တွင် ဂါနီ ရုတ်တရက် လျှို့ဝှက်စွာ ထွက်ပြေးခဲ့သဖြင့် ဩဂုတ် ၁၅ ရက်မှစ၍ ကဘူးလ်မြို့တော်ကို အထိန်းအကွပ် ကင်းမဲ့သွားခဲ့ကြောင်း ဝေဖန်သူများက ထောက်ပြခဲ့ကြသည်။
၎င်းနှင့် အခြားအစိုးရ ထိပ်တန်းပုဂ္ဂိုလ်များ ရဟတ်ယာဉ်တစ်စင်းဖြင့် ထွက်ပြေးကြစဉ် ဒေါ်လာသန်းပေါင်းများစွာ ယူဆောင်သွားကြောင်း စွပ်စွဲချက်များကို ယခုအခါ ဂါနီက ငြင်းဆိုခဲ့သည်။
ယခင်သီတင်းပတ်၌ ထုတ်ပြန်ခဲ့သည့် အစီရင်ခံစာ တစ်စောင်တွင် အမေရိကန်ကွန်ဂရက် (လွှတ်တော်) စောင့် ကြည့် အဖွဲ့က “ဂါနီနှင့် ၎င်း၏ ထိပ်တန်း ခေါင်းဆောင်များ လွတ်မြောက်ရေး ထွက်ပြေးရာ၌ ရဟတ်ယာဉ်ပေါ်သို့ ငွေသားအများအပြား ယူဆောင်သွားသည်ဆိုခြင်းမှာ မဖြစ်နိုင်ကြောင်း” ငြင်းဆန်ခဲ့သည်။
Source: AP
- By CNI
- Category: နိုင်ငံရေး
- Hits: 709
CNI International News
တိုင်ပေ၊ ဩဂုတ် ၁၅
ထိုင်ဝမ်ကျွန်းပေါ်သို့ အမေရိကန် လွှတ်တော်ကိုယ်စားလှယ်အဖွဲ့ ယခုလအတွင်း ဒုတိယအကြိမ် ရောက်ရှိမှုအဖြစ် တိုင်ပေမြို့တော်သို့ ကြိုတင် ကြေညာထားခြင်းမရှိဘဲ မက်ဆာချူးဆက်ပြည်နယ် ဒီမိုကရက်တစ် အထက် လွှတ်တော်အမတ် အီးဒီမာကီး (Ed Markey) ဦးဆောင်သော အဖွဲ့တစ်ဖွဲ့ ရောက်ရှိလာခဲ့ကြောင်း CNN သတင်း တစ်ပုဒ်တွင် တွေ့ရသည်။
ဝါရှင်တန်-ဘေဂျင်း ဆက်ဆံရေး အထူးတင်းမာနေချိန်၌ ၂၅ နှစ်အတွင်း ထိုင်ဝမ်သို့ ပထမဆုံး လာရောက်သည့် အမေရိကန်အောက်လွှတ်တော်ဥက္ကဋ္ဌ နန်စီပလိုစီကြောင့် တရုတ်ကို ဒေါသတကြီး ဖြစ်စေခဲ့သည်။
အဖွဲ့ဝင် ၅ ဦးပါသည့် အဆိုပါ ကိုယ်စားလှယ်အဖွဲ့သည် ထိုင်ဝမ်သို့ လာရောက်ခြင်းမှာ ကျွန်းအပေါ် အမေရိကန်၏ ထောက်ခံမှုကို ထပ်လောင်း အတည်ပြုရန်နှင့် ထိုင်ဝမ် ရေလက်ကြားတလျှောက် တည်ငြိမ်ရေးနှင့်ငြိမ်းချမ်းရေးကို အားပေးရန် ကြိုးပမ်းခြင်းဖြစ်ကြောင်း အီးဒီမာကီး၏ ပြောရေးဆိုခွင့်ရှိသူက ကြေညာချက်တစ်စောင် ထုတ်ပြန်၍ ပြောကြားခဲ့သည်။
ထိုကိုယ်စားလှယ်အဖွဲ့တွင် ဒီမိုကရက်ပါတီဝင် လွှတ်တော်ကိုယ်စားလှယ်များ ဖြစ်ကြသော ဂျွန်ဂရာမန်ဒီ (John Garamendi) ၊ အလန်လိုဝမ်သယ် (Alan Lowenthal) နှင့် ဒွန်ဘေယာ (Don Beyer) ၊ ရီပက်ဘလစ်ကန်ပါတီဝင် ကိုယ်စားလှယ်ဖြစ်သည့် ဩမျူယာ အေမာတာ ကိုးမန်း ရာဒီဝပ်ဂန် (Aumua Amata Coleman Radewagen) တို့ ပါဝင်ကြောင်း ကြေညာချက်ထဲတွင် ဖော်ပြထားသည်။
မာကီး ဦးဆောင်သော အဖွဲ့သည် ယခု ခရီးစဉ်အတွင်း ထိုင်ဝမ်သမ္မတ ဆိုင်းအင်ဝမ် (Tsai Ing-wen) နှင့် နိုင်ငံခြား ရေးဝန်ကြီး ဂျိုးဇက်ဝူ (Joseph Wu) တို့နှင့် တွေ့ဆုံရန် စီစဉ်ထားပြီး လုံခြုံရေး၊ ကုန်သွယ်ရေးဆိုင်ရာ ကဏ္ဍများ အတွက် ထိုင်ဝမ်လွှတ်တော် နိုင်ငံခြားရေးနှင့် အမျိုးသားကော်မတီဝင်များအား ဆွေးနွေးရန် ရှိကြောင်း ထိုင်ဝမ် နိုင်ငံခြားရေးဝန်ကြီးဌာနက သတင်းထုတ်ပြန်ခဲ့သည်။
အမေရိကန်နိုင်ငံဆိုင်ရာ တရုတ် သံရုံးပြောရေးဆိုခွင့်ရှိသူ လျူပန်ဂူး (GETTY IMAGES)
ဘေဂျင်းဘက်မှ တင်းမာမှု တိုးလာသော်လည်း ထိုင်ဝမ်အပေါ် အမေရိကန်၏ ခိုင်မာစွာ ထောက်ခံမှုရှိကြောင်း ပြသခဲ့သည့် ယခုလွှတ်တော် ကိုယ်စားလှယ်အဖွဲ့ကို ကျေးဇူးတင်ရှိကြောင်း ထိုင်ဝမ်နိုင်ငံခြားရေးဝန်ကြီးဌာန၏ ထုတ်ပြန်ချက်ထဲတွင် ဖော်ပြထားသည်။
အဆိုပါ ကိုယ်စားလှယ်အဖွဲ့သည် ထိုင်ဝမ်ရေလက်ကြား တင်းမာမှုများ လျှော့ချရန်နှင့် (အီလက်ထရောနစ်) တပိုင်းလျှပ်ကူးပစ္စည်းများ ရင်းနှီးမြှုပ်နှံရန် အပါအဝင် စီးပွားရေး ပူးပေါင်းဆောင်ရွက်မှု တိုးချဲ့ခြင်း၊ အကျိုးတူ ခံစားခွင့်များ ဆွေးနွေးခြင်းတို့ကို ထိုင်ဝမ် ရွေးကောက်ခံ ခေါင်းဆောင်များ၊ ပုဂ္ဂလိက လုပ်ငန်းများနှင့် တွေ့ဆုံ ဆွေးနွေးရန် စီစဉ်ထားသည်။
ထိုသို့ အမေရိကန်၏ ရန်စလာခြင်းများကို တုံ့ပြန်ရန်အတွက် ပြတ်ပြတ်သားသား တန်ပြန်အရေးယူမှုများ လုပ် ဆောင် သွားမည်ဖြစ်ကြောင်း ဝါရှင်တန်မြို့တော်ရှိ တရုတ်သံရုံးက ဩဂုတ် ၁၄ ရက်တွင် ကြေညာချက် ထုတ်ပြန် ခဲ့သည်။
၎င်းတို့၏ ထိုင်ဝမ်ခရီးစဉ်ကို တရုတ်နိုင်ငံအနေဖြင့် ဆန့်ကျင်ကြောင်း ကြေညာချက်ထဲတွင် တုံ့ပြန်ခဲ့သည်။
“အမေရိကန် လွှတ်တော်ကိုယ်စားလှယ်တွေဟာ အမေရိကန်အစိုးရ လက်ခံထားတဲ့ “တရုတ်တစ်နိုင်ငံတည်း မူဝါဒ” (one-China policy) အတိုင်း ဆောင်ရွက်သင့်ပါတယ်” ဟု သံရုံးပြောရေးဆိုခွင့်ရှိသူ လျူပန်ဂူး (Liu Pengyu) က တွစ်တာလူမှုကွန်ရက်တွင် ပြောကြားခဲ့သည်။
Source: CNN
- By CNI
- Category: နိုင်ငံရေး
- Hits: 714
CNI International News
မော်စကို၊ ဩဂုတ် ၁၅
အခြားနိုင်ငံများ၏လက်ကို သုံး၍ ရုရှားအပေါ် အကြမ်းဖက်ဝါဒ တံဆိပ်ကပ်ရန် အမေရိကန်ကြိုးစားခဲ့ကြောင်း ရုရှား နိုင်ငံခြားရေးဝန်ကြီးဌာန ပြောရေးဆို ခွင့်ရှိသူ မာရီယာဇာဒါရိုဗာ (Maria Zakharova) က ဩဂုတ် ၁၅ တွင် ပြောကြား ခဲ့သည်ဟု တာ့စ်သတင်းဌာနက ရေးသား ဖော်ပြသည်။
ထို့နောက် ကမ္ဘာပေါ်တွင် ရုရှားကို သီးခြားအထီးကျန်စေဖို့ အမေရိကန်၏ အစီအစဉ် မအောင်မြင်ခဲ့ကြောင်း ၎င်းက ဆက် လက် ပြောကြားခဲ့သည်။
“ကျမတို့နိုင်ငံကို ဒီစာရင်းထဲကို သူတို့စိတ်ကူး အကောင်အထည် ဖော်တဲ့နေရာမှာ တခြားသူတွေကို အသုံးချတာ ရှင့်။ တကယ်တော့ ဘောလ်တစ်နိုင်ငံတွေက ဒီကိစ္စနဲ့ပတ်သက်လို့ ထုတ်ဖော်ပြောပြီးသား ဖြစ်ပါတယ်” ဟု Rossiya-1 ရုပ်သံလိုင်းမှ ထုတ်လွှင့်နေကျဖြစ်သည့် ဗလာဒီမာ ဆိုလိုယော့ဗ် (Vladimir Solovyov) အစီအစဉ်နှင့် ဗော့ရက်နီဗီချာ (Voskerensy Vecher) ကဏ္ဍတို့နှင့် အင်တာဗျူးတွင် မာရီယာဇာဒါရိုဗာက ပြောကြားခဲ့သည်။
ရုရှားယဉ်ကျေးမှုနှင့် သမိုင်းအစဉ်အလာကို ဖျက်သိမ်းရန် ရည်ရွယ်၍ အနောက်အုပ်စု နိုင်ငံများသည် ရုရှားကို အထီးကျန်စေရန် ကြိုးစားမှုမှာ မအောင်မြင်ကြောင်း ၎င်းက အလေးပေး ပြောကြားခဲ့သည်။
ရုရှား နိုင်ငံခြားရေးဝန်ကြီးဌာန ပြောရေးဆို ခွင့်ရှိသူ မာရီယာဇာဒါရိုဗာ (TASS)
“ဘာမှ မထိရောက်ခဲ့ပါဘူး။ ဝါရှင်တန် ပြောသမျှကိုလည်း ကမ္ဘာက ဂရုမစိုက်ဘူး။ ကျမတို့နိုင်ငံကို သီးခြား ခွဲထုတ် ပြီး ကျန်ရစ်နေအောင် သူတို့တတ်နိုင်သမျှ အန္တရာယ်ပေးဖို့ Plan B ကိုလည် စခဲ့ပါတယ်။ အဲဒါတွေ အများစုက တစ်ဆင့်ခံ (သူများလက်ငှားပြီး) လုပ်တာဖြစ်ပါတယ်” ဟု ၎င်းက ရှင်းပြသည်။
မကြာသေးမီက ဥရောပသမဂ္ဂ (EU) အုပ်စုထဲ ဝင်ရောက်လာသည့် အဖွဲ့ဝင် နိုင်ငံသစ်များမှတဆင့် ထိုသို့ အပြုအမူ မျိုး ပြုလုပ်ပြစေခြင်းကို ဝါရှင်တန်က ပိုမိုလိုလားကြောင်း မာရီယာက ဆက်လက် ပြောကြားခဲ့သည်။
မော်စကိုသည် ယခုအဆင့် သတ်မှတ်ချက် (ရုရှားကို အကြမ်းဝါဒ အားပေးသည့် နိုင်ငံများ စာရင်းထဲသို့ သွင်းခြင်း) ၏ နောက်ဆက်တွဲ အကျိုးဆက်များကို ဝါရှင်တန်အား အတိအလင်း ရှင်းလင်း အသိပေးပြီးဖြစ်ကြောင်း ၎င်းက ပြန်ပြောင်း ပြောကြားခဲ့သည်။
“အဲဒီလို အသိပေးတာတွေ သူတို့ဖတ်မိရင် နားလည်လောက်ပါတယ်။ နှုတ်နဲ့ပြောရုံတင် မဟုတ်ဘဲ စာနဲ့ရေးထား တဲ့ သဘောထား မှတ်ချက်တွေကို အင်္ဂလိပ်လို ဘာသာပြန်ပြီးလည်း ကျမတို့ အကြိမ်ကြိမ် ပြောခဲ့ဖူးပါတယ်။ ဒီ တော့ မေးစရာရှိတာက ကျမတို့နဲ့ ဆက်ဆံတဲ့သူတွေကိုပါ။ ဘယ်လိုပဲဖြစ်ဖြစ် ကျမတို့ဘက်ကတော့ ဒီကိစ္စ အားလုံးဟာ ကျမတို့ အကြိမ်ကြိမ် ပြောပြီးသားတွေရှင့်” ဟု မာရီယာတွင် ထပ်လောင်း ပြောကြားခဲ့သည်။
ယူကရိန်းစစ်ပွဲမှာ ပျက်စီးနေခြင်း (Reuters)
လက်ဗီးယားနိုင်ငံ၏ လွှတ်တော်သည် ယခင်သီတင်းပတ် ဩဂုတ် ၁၁ ရက်တွင် ယူကရိန်းမြေပေါ်၌ ရုရှား၏ လုပ်ရပ်များကို အကြမ်းဖက်ဝါဒအဖြစ် အသိအမှတ်ပြုကြောင်းနှင့် ရုရှားကို အကြမ်းဖက်ဝါဒ ကျင့်သုံးနေသော နိုင်ငံဖြစ်ကြောင်း ကြေညာခဲ့သည်။
ထို့ပြင် ရုရှားနိုင်ငံသားများကို ပြည်ဝင်ခွင့်ဗီဇာ ထုတ်ပေးခြင်းကို ဆိုင်းငံ့ထားရေး လက်ဗီးယား လွှတ်တော်အမတ် များက EU နိုင်ငံကို တောင်းဆိုခဲ့သည်။
အလားတူ ယူကရိန်းကလည်း အကြမ်းဖက်ဝါဒ ပံ့ပိုးကူညီသည့် နိုင်ငံများ စာရင်းထဲသို့ ရုရှားကို ထည့်သွင်းရန် အမေရိကန်ထံသို့ တောင်းဆိုခဲ့သည်။
Source: တာ့စ်သတင်းဌာန
- By CNI
- Category: နိုင်ငံရေး
- Hits: 722
CNI International News
မော်စကို၊ ဩဂုတ် ၁၅
မော်စကိုနှင့်ပြုံယမ်းတို့အကြား ဆက်ဆံရေးကို တိုးချဲ့လိုကြောင်း ရုရှားသမ္မတ ဗလာဒီမာပူတင်က မြောက်ကိုရီးယား ခေါင်းဆောင် ကင်မ်ဂျုံအန်းကို ပြောကြားခဲ့သည်ဟု မြောက်ကိုရီးယားအစိုးရ မီဒီယာက ထုတ်လွှင့်ခဲ့သည်။
ကိုရီးယားကျွန်းဆွယ် ဂျပန်တို့လက်အောက်မှ ပြန်လည်လွတ်မြောက်ခြင်း ၇၇ နှစ်မြောက် နှစ်ပတ်လည်နေ့တွင် ပူတင်က ကင်မ်ဂျုံအန်းထံသို့ သဝဏ်လွှာတစ်စောင် ပေးပို့ခဲ့ရာ နှစ်နိုင်ငံစလုံး အကျိုးစီးပွားအတွက် ပိုမိုနီးကပ်သော ဆက်ဆံရေး ထားရှိ မည်ဖြစ်ကြောင်း ပြောကြားခဲ့သည်ဟု မြောက်ကိုရီးယား KCNA သတင်းဌာနက ဩဂုတ် ၁၅ ရက်တွင် ထုတ်လွှင့်ခဲ့ကြောင်း အယ်လ်ဂျာဇီးယားက ရေးသားဖော်ပြသည်။
၎င်း၏သဝဏ်လွှာထဲတွင် ရုရှားနှင့်မြောက်ကိုရီးယားတို့သည် ဘုံကြိုးပမ်းမှုများဖြင့် နှစ်နိုင်ငံဆက်ဆံရေးကို အပြုသဘော ဆောင်ပြီး ကျယ်ကျယ်ပြန့်ပြန့် ဆက်လက် ချဲ့ထွင်သွားမည်ဖြစ်ကြောင်း၊ ကိုရီးယားကျွန်းဆွယ်နှင့် အာရှတိုက်၏ အရှေ့ မြောက်ဒေသ လုံခြုံရေးနှင့်တည်ငြိမ်စေရေးကို ၎င်းအနေဖြင့် အထောက်အကူ ပြုသွားမည်ဖြစ်ကြောင်း ပူတင်က ဆက်လက် ပြောကြားခဲ့သည်။
ကိုရီးယားကျွန်းဆွယ်ကို ၁၉၁၀ ပြည့်နှစ်မှ ၁၉၄၅ ခုနှစ်အထိ ဂျပန်သိမ်းပိုက် ခံထားရခြင်းမှ အောင်ပွဲခံ၍ လွတ်မြောက်လာ ခဲ့သဖြင့် ဒုတိယကမ္ဘာစစ်အတွင်း ရုရှား-မြောက်ကိုရီးယား ချစ်ကြည်ရင်းနှီးမှုကို မိမိတို့ လက်ထက်တွင်လည်း အတုယူရမည် ဖြစ်ကြောင်း ကင်မ်ဂျုံအန်းက ပူတင်ထံ ပေးပို့သော စာတစ်စောင်ထဲတွင် ရေးသားခဲ့သည်။
အထူးသဖြင့် နှစ်နိုင်ငံအကြား မဟာဗျူဟာမြောက် ပူးပေါင်းဆောင်ရွက်မှု၊ ပံ့ပိုးမှုနှင့် စည်းလုံးမှုတို့မှာ အဆင့်သစ်တစ်ခုသို့ ရောက်ရှိသွားပြီဖြစ်ကြောင်း၊ အထူးသဖြင့် စစ်အင်အားကြီး နိုင်ငံများထံမှ ခြိမ်းခြောက်မှုနှင့် ရန်လိုမှုများကို ဖြိုခွင်းရန် မိမိတို့ ဘုံကြိုးပမ်းမှုတွင် ပါဝင်ကြောင်း ကင်မ်က ဆက်လက် ရေးသားခဲ့သည်။
မြောက်ကိုရီးယားခေါင်းဆောင် ကင်မ်ဂျုံအန်း(KCNA)
ရန်လိုသော စစ်အင်အား(တပ်ဖွဲ့)ဆိုသော အသုံးအနှုန်းဆိုသော KCNA ၏ ထုတ်လွှင့်ချက်တွင် မည်သူမည်ဝါဟု အတိအကျ မရည်ညွှန်းသော်လည်း အမေရိကန်နှင့် ၎င်း၏မဟာမိတ်များကို ဆိုလို၍ ယေဘုယျသုံးနှုန်းထားကြောင်း အယ်လ်ဂျာဇီးယား သတင်းတွင် တွေ့ရသည်။
ရုရှားနှင့်မြောက်ကိုရီးယားအကြား ၂၀၁၉ ခုနှစ်တွင် ၎င်းနှင့်ပူတင်တို့ တွေ့ဆုံစဉ် ချုပ်ဆိုခဲ့သော သဘောတူ စာချုပ်အပေါ် အခြေခံ၍ ပူးပေါင်းဆောင်ရွက်မှု တိုးလာမည်ဟု မျှော်မှန်းကြောင်း ကင်မ်က ၎င်း၏ ပေးစာထဲတွင် ထပ်လောင်း ပြောကြားခဲ့ သည်။
ပြီးခဲ့သည့် ဇူလိုင်လတွင် ယူကရိန်းအရှေ့ပိုင်းရှိ ရုရှားကျောထောက် နောက်ခံပြု ခွဲထွက်နယ်မြေနှစ်ခုကို ပြည်သူ့သမ္မတနိုင်ငံ နှစ်နိုင်ငံအဖြစ် လွတ်လပ်သော နိုင်ငံများဖြစ်ကြကြောင်း မြောက်ကိုရီးယားက အသိအမှတ်ပြုကြောင်း ကြေညာခဲ့သည်။
ထို့ပြင် အဆိုပါနယ်မြေသို့ ဆောက်လုပ်ရေးကဏ္ဍနှင့် လုပ်သားအင်အား ကူညီရန်အတွက် မြောက်ကိုရီးယားလုပ်သားများ စေလွှတ်မည့် အလားအလာကိုလည်း ကင်မ်ဂျုံအန်းက တိုးမြှင့်လုပ်ဆောင်ခဲ့သည်။
Source: Aljazeera
- By CNI
- Category: နိုင်ငံရေး
- Hits: 649
CNI International News
ဘိုဂိုတာ၊ ဩဂုတ် ၁၃
ကိုလံဘီယာအစိုးရသစ်နှင့် ပြည်တွင်း နောက်ဆုံးလက်ကျန် ပြောက်ကျားသူပုန်အဖွဲ့မှ အဖွဲ့ဝင်များသည် ကျူးဘား နိုင်ငံတွင် လွန်ခဲ့သော ၃ နှစ်က ဆိုင်းငံ့ခဲ့သော ငြိမ်းချမ်းရေးဆွေးနွေးပွဲများ ပြန်လည်စတင်ရန်အတွက် ဩဂုတ် ၁၂ ရက်တွင် ခြေလှမ်းများ ဦးတည်နေပြီဖြစ်ကြောင်း အေပီသတင်းတစ်ပုဒ်တွင် တွေ့ရသည်။
ကျူးဘားနိုင်ငံ၊ ဟာဗားနားမြို့တော်၌ နှစ်ဘက် ကိုယ်စားလှယ်များ တွေ့ဆုံမှုအပြီးတွင် ကိုလံဘီယာ အမျိုးသား ငြိမ်းချမ်းရေး ကော်မရှင်အကြီးအကဲ ဒါနီလိုရူးဒါက “ELN ဟု အတိုကောက် ခေါ်ကြသည့် အမျိုးသား လွတ်မြောက် ရေးတပ်နဲ့ ငြိမ်းချမ်းရေးဆွေးနွေးပွဲများ အထမြောက်လာစေရန်အတွက် မိမိတို့ အစိုးရအနေဖြင့် လိုအပ်သည့် တရားစီရင်ရေးနှင့်နိုင်ငံရေးဆိုင်ရာ ခြေလှမ်းများကို စတင်သွားမည်ဖြစ်ကြောင်း” ပြောကြားခဲ့သည်။
အဆိုပါ အဆင့်များတွင် ကျူးဘားကျွန်းပေါ်မှာ လက်ရှိနေထိုင်ကြသော ELN ဘက်မှ စေ့စပ်ညှိနှိုင်းရေးမှူးများ အတွက် ဖမ်းဝရမ်းများ ရုပ်သိမ်းရေးလည်း ပါဝင်နိုင်ဖွယ်ရှိသည်ဟု လေ့လာသူများက သုံးသပ်ကြသည်။
ELN သူပုန်အဖွဲ့ ကိုယ်စားလှယ်များကိုတွေ့ရစဉ် (AP)
ကျမ်းသစ္စာ ကျိန်ဆိုပြီးခါစ သမ္မတသစ် ဂက်စတာဗိုပီထရို ဦးဆောင်သောအစိုးရသည် ELN ကိုယ်စားလှယ်အဖွဲ့နှင့် ထိတွေ့ဆက်ဆံမည်ဖြစ်ပြီး ထိုကိုယ်စားလှယ်အဖွဲ့ကို လက်နက်ကိုင်တပ်၏ တရားဝင် ကိုယ်စားလှယ်များအဖြစ် သတ်မှတ်ကြောင်း ဒါနီလိုရူးဒါက ပြောကြားခဲ့သည်။
“ELN ဟာ ကိုလံဘီယာအစိုးရလိုပဲ ငြိမ်းချမ်းရေးအတွက် တူညီတဲ့ဆန္ဒရှိတယ်လို့ ကျနော်တို့ ယုံကြည်ပါတယ်။ ပြီးတော့ ဒီလက်နက်ကိုင် ပဋိပက္ခအတွက် ငြိမ်းချမ်းတဲ့အဖြေကို ရှာနေတဲ့ နယ်ပယ်အသီးသီးက အသံတွေကို လည်း သူတို့နားစွင့်နေတယ်လို့ မျှော်လင့်ပါတယ်” ဟု ၎င်းက ကြေညာချက် တစ်စောင်တွင် ပြောကြားခဲ့သည်။
ဘိုဂိုတာမြို့တော်ရှိ ရဲသင်တန်းကျောင်း တစ်ကျောင်းတွင် သူပုန်များ ကားဗုံးဖောက်ခွဲခဲ့၍ ရဲအုပ်လောင်း ၂၀ ကျော် သေဆုံးခဲ့ပြီးနောက် ကိုလံဘီယာနိုင်ငံ၏ ယခင်အစိုးရနှင့် ELN အကြား ငြိမ်းချမ်းရေး ဆွေးနွေးပွဲများမှာ ၂၀၁၉ ခုနှစ်တွင် ဆိုင်းငံ့ထားခဲ့သည်။
အဆိုပါ ဖြစ်စဉ်များအပြီး ကိုလံဘီယာ အာဏာပိုင်များသည် ကျူးဘားကျွန်းပေါ်ရှိ ELN ခေါင်းဆောင်များကို ငြိမ်းချမ်းရေး ဆွေးနွေးမှုအစား ဖမ်းဝရမ်းများသာ ထုတ်ခဲ့သည်။
ကိုလံဘီယာ ငြိမ်းချမ်းရေး ကော်မရှင်အကြီးအကဲ ဒါနီလိုရူးဒါ (AP)
သို့သော် ကျူးဘားအစိုးရက ၎င်းခေါင်းဆောင်များကို ကိုလံဘီယာထံသို့ လွှဲပေးရန် ငြင်းဆန်ခဲ့ပြီး အကယ်၍ လွှဲအပ်မည်ဆိုပါလျှင် နိုင်ငံတစ်နိုင်ငံ၏ ပဋိပက္ခတွင် မိမိတို့ကြားနေနိုင်ငံ အဆင့်အတန်းမှ သံတမန်နည်းလမ်းများ ချိုးဖောက်ရာ ကျမည်ဟု တုံ့ပြန်ခဲ့သည်။
အမေရိကန်သည် ကျူးဘားကို အကြမ်းဖက်ဝါဒ အားပေးကူညီသည့် နိုင်ငံစာရင်းထဲသို့ ထည့်သွင်းခြင်းဖြင့် ထိုဖြစ်စဉ်ကို တုံ့ပြန်ခဲ့သည်။
ကျေးလက်ဒေသများတွင် လက်နက်ကိုင် အကြမ်းဖက်မှုများ လျှော့ချရန်နှင့် သန်း ၅၀ ရှိသော မိမိတို့နိုင်ငံအတွက် ရေရှည်တည်တံ့ခိုင်မဲမည့် ငြိမ်းချမ်းရေး ဆောင်ကြဉ်းရန်အလို့ငှာ ပြည်တွင်း လက်ကျန် လက်နက်ကိုင် အဖွဲ့များနှင့် ဆွေးနွေးမှုများ စတင်လိုကြောင်း သမ္မတသစ် ပီထရိုက ပြောကြားထားပြီး ဖြစ်သည်။
Source: AP
- By CNI
- Category: နိုင်ငံရေး
- Hits: 860
CNI International News
မော်စကို၊ ဩဂုတ် ၁၃
သမ္မတ ဗလာဒီမာပူတင်အပေါ် ရုရှားနိုင်ငံသားများ၏ ယုံကြည်မှုအဆင့်သည် သီတင်းတစ်ပတ်အတွင်း (၀ ဒသမ ၅) ရာခိုင်နှုန်းမှ (၈၁ ဒသမ ၃) ရာခိုင်နှုန်းအထိ တိုးလာခဲ့ကြောင်း ဩဂုတ် ၁၂ ရက်တွင် ထုတ်ပြန်ခဲ့သည့် ရုရှား လူထုသဘောထား သုတေသနဌာန၏ စစ်တမ်းတစ်စောင်ကို ကိုးကားလျက် ရုရှားနိုင်ငံအခြေစိုက် တာ့စ်သတင်း ဌာနမှ ရေးသားဖော်ပြသည်။
“ပူတင်အပေါ် သူတို့ရဲ့ယုံကြည်မှုကို မေးမြန်းတဲ့အခါ ပါဝင်ဖြေဆိုကြတဲ့ ရုရှားနိုင်ငံသား (၈၁ ဒသမ ၃) ရာခိုင်နှုန်း က ယုံကြည်ပါတယ်လို့ ဖြေဆိုခဲ့ကြပါတယ်။ အဲဒီအဖြေဟာ အရင်တစ်ပတ်က (၀ ဒသမ ၅) ရာခိုင်နှုန်းပဲ ရှိခဲ့တာ ပါ” ဟု အဆိုပါစစ်တမ်းတွင် ဖော်ပြထားသည်။
သမ္မတ၏လုပ်ဆောင်ချက်များကို ထောက်ခံသည့်အဆင့်မှာ တစ်ပတ်အတွင်း ၇၈ ဒသမ ၃ ရာခိုင်နှုန်းဖြစ်ကြောင်း ယခုဩဂုတ် ၁ ရက်မှ ၇ ရက်အထိ ရုရှားနိုင်ငံသား အရွယ်ရောက်သူပေါင်း ၁,၆၀၀ ကို ဝင်ရောက်ဖြေဆိုစေခဲ့သော စစ်တမ်းရလဒ်က ဖော်ပြသည်။
ယခင် ရက်သတ္တပတ်အတွက် ဝန်ကြီးချုပ်နှင့် ရုရှားအစိုးရ၏လုပ်ဆောင်ချက်များကို အပြုသဘောဆောင်သည့် အကဲဖြတ်မှုနှုန်းများကတော့ ၅၂ ဒသမ ၆ ရာခိုင်နှုန်းနှင့် ၅၂ ဒသမ ၂ ရာခိုင်နှုန်းသို့ အသီးသီး ကျဆင်းသွားခဲ့သည်။
သမ္မတ ပူတင်နှင့် ရုရှားနိုင်ငံသားများ(ဓါတ်ပုံ-EPA)
ရုရှားဝန်ကြီးချုပ် မီခေးလ်မစ်ရှုစတင် (Mikhail Mishustin) အပေါ် တစ်ပတ်အတွင်း စစ်တမ်းဖြေဆိုသူ ၆၃ ဒသမ ၁ ရာခိုင်နှုန်းတို့က ယုံကြည်သည်ဟု တွေ့ရသည်။
ထို့ပြင် ဖြေဆိုသူများသည် လွှတ်တော်အကြီးအကဲများအပေါ် ၎င်းတို့၏ယုံကြည်မှုအဆင့်ကို ဆက်လက်ဖော်ထုတ် ပြသခဲ့ကြသည်။
ရုရှားဖက်ဒရေးရှင်းကွန်မြူနစ်ပါတီ (CPRF) ခေါင်းဆောင်၊ အောက်လွှတ်တော်အမတ် ဂျနဒီဇူဂါနော့ဗ်ကို ယုံကြည် မှုရာခိုင်နှုန်းမှာ တစ်ပတ်အတွင်း ၃၃ ဒသမ ၈ ဖြစ်ပြီး A Just Russia ပါတီ၊ အောက်လွှတ်တော်အမတ်ကိုတော့ ၃၁ ဒသမ ၃ ရာခိုင်နှုန်း ယုံကြည်ကြသည်။
New People ပါတီခေါင်းဆောင် အဲလက်ဇီနီခါယက်ဗ်ကို တပတ်အတွင်း ယုံကြည်မှု ၁၁ ဒသမ ၆ ရာခိုင်နှုန်း ရှိကြောင်း စစ်တမ်းဖြေဆိုသူများက အမှတ်ပေးခဲ့ကြပြီး ရုရှားလစ်ဘရယ်ဒီမိုကရက်တစ်ပါတီ (LDPR) ခေါင်းဆောင် လီယိုနစ်စလုစကီကို ၁၈ ဒသမ ၆ ရာခိုင်နှုန်းအထိ ယုံကြည်ကြကြောင်း သိရသည်။
ပါတီအားဖြင့် ရုရှားပေါင်းစည်း (United Russia) ပါတီအတွက် ထောက်ခံမှုအဆင့်မှာ တစ်ပတ်အတွင်း ၄၀ ဒသမ ၇ ရာခိုင်နှုန်းတွေ့ရပြီး CPRF ကတော့ ၁၀ ဒသမ ၈ ရာခိုင်နှုန်းသာ ထောက်ခံမှုရရှိခဲ့သည်။
Source: တာ့စ်သတင်းဌာန