CNI International News

ဝါရှင်တန်၊ သြဂုတ် ၂၁

ထိုင်ဝမ်ကျွန်း ပတ်ပတ်လည်တွင် တရုတ်က စစ်ရေးလေ့ကျင့်မှုများ ပြုလုပ်ခဲ့ပြီးနောက် တရုတ်အနေဖြင့် ထိုင်ဝမ် အပေါ် ဖိအားပေးနေခြင်းကို ရပ်တန့်ရန် အမေရိကန်က ပြောကြားခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

တရုတ်သည် ထိုင်ဝမ် ဒုတိယသမ္မတ ဝီလျံလိုင်၏ ပါရာဂွေးခရီးစဉ်အတွင်း အမေရိကန်သို့ ဝင်ရောက်ခဲ့မှုကို တုံ့ပြန် သည့်အနေဖြင့် စစ်ရေးလေ့ကျင့်မှုများ ပြုလုပ်ခဲ့သည်။

လိုင်သည် ပါရာဂွေးသို့ အသွားတွင် အမေရိကန်နိုင်ငံ နယူးယောက်မြို့သို့ ဝင်ရောက်ခဲ့ပြီး ပါရာဂွေးမှ အပြန်ခရီး တွင်လည်း ဆန်ဖရန်စစ္စကိုမြို့သို့ ဝင်ရောက်ခဲ့သည်။

ပြီးခဲ့သည့် ၂၄ နာရီအတွင်း တရုတ်လေတပ်မှ လေယာဉ် ၂၅ စင်းသည် ထိုင်ဝမ်ရေလက်ကြား၏ အလယ်စည်းကို ကျော်ဖြတ်ခဲ့သည်ဟု ထိုင်ဝမ်က ပြောကြားခဲ့ပြီးနောက် အမေရိကန်၏ အထက်ပါအတိုင်း ပြောကြားချက် ထွက်ပေါ်ခဲ့ခြင်း ဖြစ်သည်။

ထိုင်ဝမ် ဒုတိယသမ္မတ ဝီလျံလိုင်ကို တွေ့ရစဉ်

တရုတ်၏ လေယာဉ်များအနက် SU-30 နှင့် J-11 တိုက်လေယာဉ်များ ပါဝင်ခဲ့သည်ဟု ထိုင်ဝမ်ကာကွယ်ရေး ဝန်ကြီးဌာနက ထုတ်ပြန်ခဲ့သည်။

အမေရိကန် နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိ သူက အမေရိကန်အနေဖြင့် တရုတ်၏ စစ်ရေးလေ့ကျင့် မှုများကို အနီးကပ် စောင့်ကြည့်ခဲ့ကြောင်း၊ တရုတ်အနေ ဖြင့် ထိုင်ဝမ်အပေါ် စစ်ရေး၊ သံတမန်ရေးနှင့် စီးပွားရေး ဖိအားများ ပေးနေခြင်းကို ရပ်တန့်ရန် ပြောကြားခဲ့သည်။

ထိုသို့ ဖိအားများ ပေးနေမည့်အစား တရုတ်သည် ထိုင်ဝမ်နှင့် အဓိပ္ပာယ်ပြည့်ဝသည့် ဆွေးနွေးညှိနှိုင်းမှု ပြုလုပ်ရန် လည်း အမေရိကန်က တိုက်တွန်းခဲ့သည်။

တရုတ်နှင့် ထိုင်ဝမ်သည် ၁၉၄၉ ခုနှစ် ပြည်တွင်းစစ် အပြီးတွင် ကွဲကွာသွားခဲ့ပြီး တရုတ်၏ အာဏာရ ကွန်မြူနစ် ပါတီက ပြည်မကြီးကို ထိန်းချုပ်ခဲ့သည်။ 

ထိုင်ဝမ်သည် မည်သည့်အခါကမျှ တရုတ်၏ အစိတ်အပိုင်းတစ်ခု မဟုတ်ခဲ့ကြောင်း ထိုင်ဝမ်က ပြောကြားခဲ့သော် လည်း တရုတ်ကမူ ထိုင်ဝမ်သည် တရုတ်၏ ခွဲထွက်ပြည်နယ်တစ်ခုဖြစ်ကာ လိုအပ်လာပါက အင်အားသုံးပြီး သိမ်းယူသွားမည်ဟု ပြောကြားခဲ့သည်။

တရုတ်သမ္မတ ရှီကျင့်ဖျင်နဲ့ အမေရိကန်သမ္မတ ဘိုင်ဒန်ကိုတွေ့ရစဉ်

အမေရိကန်သည် ထိုင်ဝမ်နှင့် တရားဝင် ဆက်ဆံရေး မရှိသော်လည်း ထိုင်ဝမ်ကို လက်နက်များ အများဆုံး ထောက်ပံ့ပေးနေပြီး နိုင်ငံရေးနှင့်စစ်ရေး အကူအညီများ ပေးခဲ့သဖြင့် တရုတ်နှင့် ဆက်ဆံရေးများ တင်းမာခဲ့သည်။

တရုတ်သည် အမေရိကန်နှင့် ထိုင်ဝမ်အကြား တရားဝင် ထိတွေ့ဆက်ဆံမှုများကို ဒေါသတကြီး ဝေဖန်လေ့ရှိပြီး ၂၀၂၂ ခုနှစ်၊ သြဂုတ်လကလည်း အမေရိကန်အောက်လွှတ်တော်ဥက္ကဋ္ဌ နန်စီ ပယ်လိုစီ (Nancy Pelosi)၏ ထိုင်ဝမ် ခရီးစဉ်ကို တုံ့ပြန်သည့်အနေဖြင့် ထိုင်ဝမ်ကျွန်း ပတ်ပတ်လည်တွင် အကြီးစား စစ်ရေးလေ့ကျင့်မှုများ ပြုလုပ်ခဲ့ သည်။

ထို့ပြင် ထိုင်ဝမ်သမ္မတ ဆိုင်အင်ဝမ် (Tsai Ing-wen) သည် ယခုနှစ်အတွင်း အမေရိကန်တွင် လက်ရှိ အောက်လွှတ်တော်ဥက္ကဋ္ဌ ကီဗင် မက္ကာသီ (Kevin McCarthy) နှင့် တွေ့ဆုံခဲ့မှုကို တုံ့ပြန်သည့်အနေဖြင့် တရုတ်သည် အကြီးစား စစ်ရေးလေ့ကျင့်မှုများကို ပြုလုပ်ခဲ့သည်။

Source: အယ်လ်ဂျာဇီးယား

CNI International News

ဘန်ကောက်၊ သြဂုတ် ၂၁

ဖြူးထိုင်းပါတီသည်  ညွန့်ပေါင်းအစိုးရအဖွဲ့သစ်အတွင်း ပါဝင်မည့် ပါတီစာရင်းကို အပြီးသတ် ကြေညာမည်ဖြစ်ပြီး ထိုအစိုးရအဖွဲ့တွင် Palang Pracharath (PPRP) ပါတီ သေချာပေါက် ပါဝင်လိမ့်မည်ဟု သတင်းရင်းမြစ်တစ်ခုက ပြောကြားခဲ့ကြောင်း ဘန်ကောက်ပို့စ်မှ ဖော်ပြခဲ့သည်။

ညွန့်ပေါင်းအစိုးရတွင် ပါဝင်မည့် ပါတီစာရင်းကို သတင်းစာ ရှင်းလင်းပွဲပြုလုပ်ပြီး ကြေညာဖွယ်ရှိသည်။

ထိုသတင်းစာ ရှင်းလင်းပွဲတွင် အစိုးရအဖွဲ့အတွင်း ပါဝင်မည့် ပါတီအားလုံး တက်ရောက်ဖွယ် ရှိသည်။ 

အစိုးရအဖွဲ့တွင်း ရာထူးနေရာများအတွက် ခွဲတမ်းချထားရေးနှင့် ပတ်သက်ပြီး အပြီးသတ် ဆွေးနွေးညှိနှိုင်းမှုများ ပြုလုပ်မည့် ရက်အတိအကျကို သတ်မှတ်ရခြင်း မရှိသေးကြောင်း ဖြူးထိုင်းပါတီ၏ အတွင်းရေးမှူးချုပ် ပရာဆက် ချန်တာရာရွန်သောင် (Prasert Chantararuangthong) က ပြောကြားခဲ့သည်။

PPRP  ခေါင်းဆောင် ပရာဝပ်ကိုတွေ့ရစဉ်

သဘောတူညီချက်အရ သက်ဆိုင်ရာ ပါတီများအနေဖြင့် ၎င်းတို့၏ ပါတီဝင် လွှတ်တော်အမတ် ၉ နေရာစီအတွက် အစိုးရအဖွဲ့အတွင်း ရာထူးတစ်နေရာစီကို ရရှိမည်ဖြစ်ကြောင်း၊ ညွန့်ပေါင်းတွင် ပါဝင်သည့် ပါတီများနှင့် ဆွေးနွေး ညှိနှိုင်းမှုများ ပြုလုပ်ခဲ့ပြီးဖြစ်ကြောင်း ပရာဆက်က ပြောသည်။

ညွန့်ပေါင်းအစိုးရတွင် ပါတီအများအပြား ပါဝင်နေခြင်းကြောင့် အစိုးရအဖွဲ့၏ တည်ငြိမ်မှု ပျက်ယွင်းနိုင်ဖွယ် ရှိသည်ဆိုသော ထင်ကြေးပေးမှုများကို ပရာဆက်က ငြင်းဆိုခဲ့သည်။

ထို့နောက် ပါတီ အများအပြား ပါဝင်မှုသည် ပြဿနာတစ်ခု မဟုတ်ကြောင်း ၎င်းက ပြောကြားခဲ့သည်။

ဖြူးထိုင်းပါတီ၏ လက်ထောက် ခေါင်းဆောင် ဖွမ်သမ် ဝီချာရာချိုင်း (Phumtham Wechayachai) ကမူ ညွန့်ပေါင်း အစိုးရအဖွဲ့တွင် ပါဝင်နိုင်ခြေရှိသည့် ပါတီစာရင်းနှင့်ပတ်သက်ပြီး မီဒီယာများ၏ ဖော်ပြချက်များကို ငြင်းဆိုခဲ့ပြီး အသေးစိတ် အချက်အလက်များကို ထုတ်ပြန်ရခြင်း မရှိသေးကြောင်း ပြောကြားခဲ့သည်။

ဖြူးထိုင်းပါတီ၏ ဝန်ကြီးချုပ်ကိုယ်စားလှယ်လောင်း မစ္စတာ ဆရီသာကို တွေ့ရစဉ်

လက်ရှိတွင် ဖြူးထိုင်းပါတီ ဦးဆောင်သည့် ညွှန့်ပေါင်းအဖွဲ့သည် အောက်လွှတ်တော်နေရာ ၅၀၀ အနက် နေရာ ၃၁၄ နေရာကို ရရှိထားကြောင်း သတင်းအရင်းအမြစ်တစ်ခုက ပြောသည်။

သြဂုတ် ၂၂ ရက်တွင်မူ ဖြူးထိုင်းပါတီက အဆိုတင်သွင်းမည့် ဝန်ကြီးချုပ် ကိုယ်စားလှယ်လောင်း ဆရီသာ သာဗင်ဆင် (Sretha Thavisin) ကို လွှတ်တော်၌ မဲပေးရွေးချယ်မည် ဖြစ်သည်။

ဖြူးထိုင်းပါတီကမူ ၎င်းတို့တင်သွင်းမည့် ဝန်ကြီးချုပ် ကိုယ်စားလှယ်လောင်းသည် လိုအပ်သည့် ထောက်ခံမဲများ ထက် ပိုပြီး ရရှိလိမ့်မည်ဟု ပြောကြားခဲ့သည်။

မစ္စတာ ဆရီသာသည် ဝန်ကြီးချုပ်အဖြစ် ရွေးချယ်ခံရရန် အထက်နှင့်အောက် လွှတ်တော်နှစ်ရပ်ပေါင်း၏ ထောက်ခံမဲ စုစုပေါင်း ၃၇၅ မဲ ရရှိရန် လိုအပ်မည်ဖြစ်သည်။

Source:  ဘန်ကောက်ပို့စ်

CNI International News

နီယာမေ၊ သြဂုတ် ၂၁

နိုက်ဂျာအာဏာသိမ်း ခေါင်းဆောင်ဖြစ်သည့် ဗိုလ်ချုပ်ကြီး အဗ္ဗဒူရာမာနီ တီယာနီ (Abdourahmane Tiani) သည် အနောက်အာဖရိကနိုင်ငံများမှ ကိုယ်စားလှယ်အဖွဲ့နှင့် အစည်းအဝေး ပြုလုပ်ခဲ့ပြီးနောက် ၃ နှစ်ကြာ အာဏာ လွှဲပြောင်းရေးကာလကို ကြေညာခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

ထို့ပြင် နိုက်ဂျာကို တိုက်ခိုက်မည့် အစီအစဉ်သည် လွယ်ကူလိမ့်မည် မဟုတ်ကြောင်းလည်း ၎င်းက သတိပေးခဲ့ သည်။

သြဂုတ် ၁၈ ရက်က နိုင်ငံပိုင်ရုပ်သံမှ မိန့်ခွန်းပြောခဲ့ရာတွင် တီယာနီက အာဏာလွှဲပြောင်းရေးနှင့်ပတ်သက်ပြီး အသေးစိတ် ပြောဆိုခဲ့ခြင်းမရှိဘဲ ရက် ၃၀ ကြာ ဆွေးနွေးရေး ကာလအတွင်း အာဏာလွှဲပြောင်းရေးအတွက် မူဘောင်များကို ရေးဆွဲသွားမည်ဟု ပြောသည်။

"အမိမြေ ကာကွယ်ရေး အမျိုးသား ကောင်စီ (National Council for the Safeguard of the Homeland) က ရော၊ နိုက်ဂျာပြည်သူတွေကပါ စစ်ပွဲကို မလိုလားပါဘူး။ ဆွေးနွေးမှုတွေ ပြုလုပ်ဖို့ လမ်းဖွင့်ပေးထားပါတယ်"ဟု တီယာနီက နီယာမေမြို့တော်တွင် အနောက်အာဖရိကနိုင်ငံများ စီးပွားရေးအဖွဲ့ (ECOWAS) မှ ကိုယ်စားလှယ် များနှင့် ပထမဆုံးအကြိမ် အစည်းအဝေး ပြုလုပ်ခဲ့ပြီးနောက် ပြောကြားခဲ့သည်။

 ECOWAS ခေါင်းဆောင်များကို တွေ့ရစဉ်

"ဒါပေမယ့် ရှင်းအောင်ပြောရမယ်ဆိုရင် ကျနော်တို့ကို ဆန့်ကျင်တဲ့ ဘယ်လိုတိုက်ခိုက်မှုမျိုးမဆို အချို့လူတွေ တွေးထင်ထားသလို လွယ်ကူမှာတော့ မဟုတ်ပါဘူး"ဟု ၎င်းက ပြောသည်။ 

၂၀၂၃ ခုနှစ်၊ ဇူလိုင် ၂၆ ရက်က အာဏာသိမ်းမှု ဖြစ်ပွားခဲ့ပြီးနောက် ECOWAS သည် နိုက်ဂျာအပေါ် ပိတ်ဆို့မှုများ ချမှတ်ခဲ့ပြီး နိုက်ဂျာတွင် ဖွဲ့စည်းပုံအခြေခံဥပဒေကို ပြန်လည်ထိန်းသိမ်းရန် စစ်ပွဲအတွက် အသင့်ပြင်ထားသည့် တပ်ဖွဲ့များ ဖြန့်ကြက်ချထားမှုကို ကြေညာခဲ့သည်။

နိုက်ဂျာကို စစ်ရေးအရ ဝင်ရောက်မည့် နေ့ရက်အတိအကျကို သဘောတူညီမှု ရရှိထားပြီဟုလည်း ECOWAS က ၁၈ ရက်နေ့တွင် ပြောကြားခဲ့သည်။

ထို့နောက် အဖွဲ့ဝင် ၁၅ နိုင်ငံအနက် ၁၁ နိုင်ငံက နိုက်ဂျာစစ်ဆင်ရေးတွင် စစ်သားများကို စေလွှတ်ရန် သဘောတူခဲ့ သည်ဟု ဆိုသည်။

နိုင်ငံပိုင်ရုပ်သံမှ ပြောကြားခဲ့သည့် ၁၂ မိနစ်ကြာမြင့်သည့် မိန့်ခွန်းတွင် တီယာနီက ECOWAS သည် ပြည်ပ စစ်တပ် တစ်ခုနှင့် ပူးပေါင်းပြီး ကျူးကျော်ဝင်ရောက်ရေး တပ်ဖွဲ့ကိုဖွဲ့စည်းကာ နိုက်ဂျာကို တိုက်ခိုက်ရန် အသင့်ပြင်နေ ကြောင်း ပြောကြားခဲ့သည်။ 

အာဏာသိမ်းမှုကို နိုက်ဂျာပြည်သူတွေ ထောက်ခံနေစဉ်

"ကျနော်တို့ရဲ့ ရည်ရွယ်ချက်က အာဏာကို ဆုပ်ကိုင်ထားဖို့ မဟုတ်ဘူးဆိုတာ ကျနော်ထပ်လောင်း အတည်ပြုပါ တယ်။ နိုက်ဂျာပြည်သူတွေရဲ့ ဆန္ဒနဲ့ ဂုဏ်သိက္ခာကို အကျိုးရှိစေမယ့် ဘယ်လို ဆွေးနွေးမှုမျိုးကိုမဆို ပြုလုပ်ဖို့ အဆင်သင့်ပဲဆိုတာကိုလည်း ထပ်လောင်း အတည်ပြုပါတယ်"ဟု တီယာနီက ပြောသည်။

ECOWAS သည် ဒေသတွင်း နိုင်ငံများအကြား သုံးနှစ်အတွင်း သတ္တမမြောက် အာဏာသိမ်းမှု ဖြစ်ပွားခဲ့သည့် နိုက်ဂျာအရေးတွင် သဘောထားတင်းမာသည့် ရပ်တည်ချက်ကို ပြသခဲ့ပြီး စစ်ရေးခြိမ်းခြောက်မှုများကိုလည်း ပြုလုပ်ခဲ့သည်။

Source: အယ်လ်ဂျာဇီးယား

CNI International News

၂၀၂၃ ခုနှစ်၊ သြဂုတ် ၁၉

အနောက်အာဖရိကနိုင်ငံများမှ စစ်တပ်အကြီးအကဲများသည် နိုက်ဂျာအား စစ်ရေးအရ ကြားဝင်ရေးနှင့်ပတ်သက် ပြီး ဂါနာနိုင်ငံ၏မြို့တော် အက်ကရာ (Accra)တွင် တွေ့ဆုံဆွေးနွေးခဲ့ကြသည်ဟု ရိုက်တာမှ ဖော်ပြခဲ့သည်။

နိုက်ဂျာအရေးတွင် သံတမန်ရေးရာ အားထုတ်ကြိုးပမ်းမှုများ အောင်မြင်ခြင်းမရှိပါက နိုက်ဂျာစစ်အာဏာသိမ်းမှုကို ဆန့်ကျင်ရန် ဖြစ်လာနိုင်ခြေရှိသည့် အသေးစိတ် အစီအစဉ်များကို အနောက်အာဖရိကနိုင်ငံများမှ စစ်တပ် အကြီးအကဲများ ဆွေးနွေးခဲ့ကြသည်။

ဇူလိုင် ၂၆ ရက်က နိုက်ဂျာတွင် စစ်တပ် ခေါင်းဆောင်များသည် နိုက်ဂျာသမ္မတ မိုဟာမက် ဘာဇုမ်း (Mohamed Bazoum) ကို ဖြုတ်ချခဲ့သည်။

ထို့နောက် ကုလသမဂ္ဂနှင့် အနောက်အာဖရိကနိုင်ငံများ စီးပွားရေးအဖွဲ့ (ECOWAS)က ဘာဇုမ်းအား အာဏာပြန်အပ်ရန် တောင်းဆိုခဲ့သော်လည်း အာဏာသိမ်းစစ်ခေါင်းဆောင်များက တောင်းဆိုမှုကို ငြင်းဆန်ခဲ့ သည်။

ထို့ကြောင့် ဒေသတွင်း တင်းမာမှုများ မြင့်တက်လာခဲ့ပြီး ECOWAS က စစ်ပွဲအတွက် အသင့်ပြင်ဆင်ထားသည့် တပ်ဖွဲ့ကို ဖြန့်ကြက်ရန် အမိန့်ထုတ်ပြန်ခဲ့သည်။

နိုက်ဂျာ အာဏာသိမ်းခေါင်းဆောင်ကို တွေ့ရစဉ် 

အက်ကရာတွင် နှစ်ရက်ကြာ ပြုလုပ်ခဲ့သည့် အနောက်အာဖရိက စစ်ခေါင်းဆောင်များ၏ အစည်းအဝေးသည် သြဂုတ် ၁၈ ရက် ဂရင်းနစ်စံတော်ချိန် ညနေ ၄ နာရီတွင် အဆုံးသတ်ခဲ့သည်။ 

အနောက်အာဖရိက စစ်ခေါင်းဆောင်များသည် နိုက်ဂျာကို စစ်ရေးအရ ဝင်ရောက်နိုင်မည့် အခြေအနေအတွက် သယ်ယူပို့ဆောင်ရေးနှင့် အခြားလိုအပ်သည့် အစီအစဉ်များကို ဆွေးနွေးခဲ့ကြသည်ဟု ထိုအစည်းအဝေးနှင့် နီးစပ်သည့် သတင်းရင်းမြစ်တစ်ဦးက ပြောသည်။

အင်အားသုံးဖြေရှင်းရေးသည် နောက်ဆုံးရွေးချယ်စရာအဖြစ် ကျန်ရှိနေဆဲဖြစ်ပြီး သံတမန်ရေး ကြိုးပမ်းမှုအားလုံး မအောင်မြင်ပါက အနောက်အာဖရိကနိုင်ငံများမှ လက်နက်ကိုင်တပ်ဖွဲ့များသည် စစ်ရေးအတွက် တာဝန် ထမ်းဆောင်ရန် အသင့်ရှိနေသည်ဟု ECOWAS ၏ နိုင်ငံရေး၊ ငြိမ်းချမ်းရေးနှင့် လုံခြုံရေးဆိုင်ရာ မဟာမင်းကြီး အဗ္ဗဒယ် ဖာတူ မူရှာ (Abdel Fatau Musha) က အစည်းအဝေး စတင်သည့်် ပထမနေ့တွင် ပြောကြားခဲ့သည်။

နိုက်ဂျာ အာဏာသိမ်းမှုကို ထောက်ခံနေကြစဉ်

စစ်အာဏာသိမ်း ခေါင်းဆောင်များ အုပ်ချုပ်နေသည့် မာလီ၊ ဘာကီနာဖာဆို၊ ဂီနီနိုင်ငံများအပြင် သေးငယ်သည့် ကိပ်ဗာဒီ (Cape Verde) နိုင်ငတို့မှလွဲပြီး ECOWAS ၏ အဖွဲ့ဝင် ၁၅ နိုင်ငံအနက် နိုင်ငံအများစုသည် ၎င်းတို့၏ တပ်ဖွဲ့ဝင်များကို စေလွှတ်ရန် ပြင်ဆင်နေကြသည်ဟု ၎င်းက ပြောသည်။

နိုက်ဂျာ အရေးနှင့်ပတ်သက်ပြီး စစ်ရေးအရ ကြားဝင်ဆောင်ရွက်မှုများသည် အနောက်အာဖရိကတွင် ဆင်းရဲ မွဲတေပြီး အစ္စလာမ်မစ် သောင်းကျန်းမှုများနှင့် ရင်ဆိုင်နေရသည့် ဆာဟယ်ဒေသ၏ အခြေအနေကို ပိုမိုဆိုး ရွားစေမည် ဖြစ်သည်။ 

ထို့ပြင် နိုက်ဂျာသည် ဆာဟယ်ဒေသတွင် အယ်ကိုင်းဒါ၊ အိုင်အက်စ်အဖွဲ့များနှင့် ဆက်နွှယ်မှုရှိသည့် အကြမ်းဖက် အဖွဲ့များကို တိုက်ခိုက်နေသည့် အနောက်နိုင်ငံများအတွက် အဓိကကျသည့် မဟာမိတ်နိုင်ငံတစ်ခု ဖြစ်သည့်အပြင် ယူရေနီယံနှင့် ရေနံများ ပေါကြွယ်ဝသဖြင့် အနောက်နိုင်ငံများမှ တပ်ဖွဲ့များအတွက် မဟာဗျူဟာမြောက် အရေး ပါသည့် နိုင်ငံဖြစ်သည်။

Source: ရိုက်တာ

CNI International News

မင့်စ်၊ သြဂုတ် ၁၉

ယူကရိန်း၊ ပိုလန်နှင့် ဘော်လ်တစ်နိုင်ငံများက ဘယ်လာရုစ်နိုင်ငံကို ဆန့်ကျင်သည့် ရန်စမှုများ ပြုလုပ်မည်ဆိုပါက မိမိတို့အနေနှင့် ချက်ချင်း တုံ့ပြန်သွားမည်ဟု ဘယ်လာရုစ်သမ္မတ အလက်ဇန္ဒား လူကာရှန်ကို (Alexander Lukashenko)က ပြောကြားခဲ့ကြောင်း တာ့စ်သတင်းဌာနက ဖော်ပြခဲ့သည်။

"ခြိမ်းခြောက်မှုတစ်ခုပဲ ရှိနိုင်ပါတယ်။ အဲဒါကတော့ ကျနော်တို့နိုင်ငံကို ဆန့်ကျင်တဲ့ ရန်စမှုပါ။ ရန်စမှုဟာ ယူကရိန်းရဲ့ နယ်မြေက ဖြစ်ဖြစ်၊ ပိုလန်၊ လစ်သူယေးနီးယားနဲ့ လတ်ဗီးယားနိုင်ငံတွေက နယ်မြေတွေကဖြစ်ဖြစ် စတင် ပေါ်ပေါက်လာမယ်ဆိုရင် ကျနော်တို့အနေနဲ့ ကျနော်တို့မှာရှိသမျှ အရာအားလုံးနဲ့ တုံ့ပြန်သွားမှာပါ"ဟု လူကာရှန်ကိုက ပြောကြားခဲ့သည်။

လူကာရှန်ကိုသည် ယူကရိန်း သတင်းထောက် ဒိုင်ယာနာ ပန်ချန်ကို (Diana Panchenko) နှင့် ပြုလုပ်ခဲ့သည့် အင်တာဗျူးတစ်ခုအတွင်း အထက်ပါအတိုင်း ပြောကြားခဲ့ခြင်း ဖြစ်သည်။

ဘယ်လာရုစ်သမ္မတ အလက်ဇန္ဒား လူကာရှန်ကိုနဲ့ ယူကရိန်း သတင်းထောက် ဒိုင်ယာနာ ပန်ချန်ကို ကိုတွေ့ရစဉ်

ထို့ပြင် ဘယ်လာရုစ်၏ တုံ့ပြန်မှုသည် သာလွန်အင်အားဖြင့် ဖြစ်လိမ့်မည်ဟုလည်း ၎င်းက ပြောသည်။

"ကျနော်တို့ဟာ သူတို့တွေနဲ့ ပြိုင်နေတာ မဟုတ်ပါဘူး။ ကျနော်တို့အနေနဲ့ သာလွန်အင်အားနဲ့ တိုက်ခိုက်မယ် ဆိုရင် သူတို့တွေဟာ ဆိုးရွားပြင်းထန်တဲ့ နစ်နာဆုံးရှုံးမှုတွေ၊ ထိခိုက်ပျက်စီးမှုတွေနဲ့ အဆုံးသတ်သွားပါလိမ့် မယ်"ဟု ဘယ်လာရုစ်ခေါင်းဆောင်က ပြောကြားခဲ့သည်။ 

မိမိတို့အား ရန်မစပါက မိမိတို့နိုင်ငံတွင် ထားရှိသည့် (ရုရှား၏) နျူကလီးယား လက်နက်များကို အသုံးပြုမည် မဟုတ်ကြောင်း၊ သို့သော် မိမိတို့အား ရန်စလာခဲ့ပါက မိမိတို့၏ လက်နက်တိုက်အတွင်းရှိ လက်နက်အားလုံးကို မဆိုင်းမတွ အသုံးပြုသွားမည်ဖြစ်ကြောင်း လူကာရှန်ကိုက ပြောကြားခဲ့သည်။

Source: တာ့စ်

CNI International News

ဆိုးလ်၊ သြဂုတ် ၁၉

မြောက်ကိုရီးယား၏ ပထမဆုံး လောင်စာတောင့်သုံး တိုက်ချင်းပစ်ဒုံးကျည် (ICBM) အမျိုးအစားဖြစ်သည့် Hwasong-18 ဒုံးကျည်ထုတ်လုပ်မှု စီမံကိန်းတွင် ရုရှား၏ အခန်းကဏ္ဍ ပါဝင်ခြင်း ရှိ/မရှိအပေါ် ငြင်းခုံမှုအသစ်များ ထွက်ပေါ်လာခဲ့သည်ဟု ရိုက်တာမှ ဖော်ပြခဲ့သည်။

သြဂုတ် ၁၇ ရက်က အမေရိကန်အခြေစိုက် မဟာဗျူဟာနှင့် နိုင်ငံတကာလေ့လာရေး စင်တာ (Center fo Strategic and International Studies) က ထုတ်ပြန်ခဲ့သည့် အစီရင်ခံစာတွင် Hwasong-18 ဒုံးကျည်သည် ရုရှားနှင့် နည်းပညာပိုင်းဆိုင်ရာ ပူးပေါင်းဆောင်ရွက်မှု၏ ရလဒ်တစ်ခု ဖြစ်နိုင်သည်ဟု မက်ဆာချူးဆက် နည်း ပညာတက္ကသိုလ်မှ ဂုဏ်ထူးဆောင် ပါမောက္ခ သီအိုဒို ပိုစတို (Theodore Postol) က ပြောကြားခဲ့သည်။

Hwasong-18 ဒုံးကျည်ကို ဧပြီနှင့် ဇူလိုင်လများတွင် နှစ်ကြိမ်စမ်းသပ်ခဲ့ပြီး ဖြစ်သည်။ ထိုစမ်းသပ်မှုများအနက် ဇူလိုင် ၁၂ ရက်က စမ်းသပ်မှုသည် မြောက်ကိုရီးယား၏ ဒုံးကျည်စမ်းသပ်မှု သမိုင်းတွင် အရှည်ကြာဆုံး ဒုံးကျည် ပျံသန်းမှုအဖြစ် မှတ်တမ်းဝင်ခဲ့သည်။

 Hwasong-18 ဒုံးကျည်ပစ်လွတ်စမ်းသပ်နေစဉ်

Hwasong-18 ဒုံးကျည်သည် မြောက်ကိုရီးယား၏ ပထမဆုံး လောင်စာတောင့်သုံး ICBM ဒုံးကျည် အမျိုးအစား ဖြစ်သည်။ လောင်စာတောင့်သုံး ဒုံးကျည်များသည် စစ်ပွဲအတွင်း ဒုံးကျည်များကို ပိုမိုလွယ်ကူလျင်မြန်စွာ ဖြန့်ကြက်ချထားနိုင်သလို ဒုံးကျည်ပျံသန်းမှု အရှိန်သည်လည်း ပိုမိုမြန်ဆန်သည်။

"မြောက်ကိုရီးယားအနေနဲ့ ရုရှားနဲ့ ပူးပေါင်းဆောင်ရွက်ခြင်းမရှိဘဲ အခုလို ခေတ်မီနည်းပညာတွေ အသုံးပြုနိုင်ဖို့ ခက်ခဲပါလိမ့်မယ်" ဟု ပိုစတိုက ပြောသည်။

ထို့ပြင် ရုရှားသည် တန် ၅၀ အလေးချိန်ရှိသည့် လောင်စာတောင့်သုံး Topol-M တိုက်ချင်းပစ်ဒုံးကျည် နည်းပညာ ကို မြောက်ကိုရီးယားအား လွှဲပြောင်းပေးခဲ့ဖွယ် ရှိသည်ဟုလည်း ပိုစတိုက ပြောသည်။ 

Topol-M ဒုံးကျည်ကို SS-27 ဒုံးကျည်အဖြစ်လည်း လူသိများသည်။

မကြာသေးမီက ရုရှားနှင့် မြောက်ကိုရီးယားသည် စစ်ဘက်ဆိုင်ရာ ဆက်ဆံရေးကို တိုးမြှင့်မည်ဟု ပြောကြားခဲ့ သော်လည်း မြောက်ကိုရီးယားသည် ရုရှားနှင့် လက်နက် ရောင်းဝယ်သည့် သဘောတူညီချက်များ မပြုလုပ်ခဲ့ ကြောင်း ငြင်းဆိုခဲ့သည်။

Hwasong-18 ဒုံးကျည်ထုတ်လုပ်သည့် စက်ရုံကို မြောက်ကိုရီးယားခေါင်းဆောင် သွားရောက်စစ်ဆေးနေစဉ်

ထိုအကြောင်းအရာနှင့်ပတ်သက်ပြီး ရုရှားနိုင်ငံခြားရေးဝန်ကြီးဌာနက မှတ်ချက်ပေးခဲ့ခြင်း မရှိပေ။

ကယ်လီဖိုးနီးယားရှိ ဂျိမ်းစ်မာတင် လက်နက်မပျံ့ပွားမှု လေ့လာရေး စင်တာ (James Martin Center for Nonproliferation Studies-CNS) မှ ကျွမ်းကျင်သူများကတော့ မြောက်ကိုရီးယား၏ Hwasong-18 ဒုံကျည် နှင့်ပတ်သက်ပြီး ထွက်ပေါ်လာသည့် ဓာတ်ပုံများအရ ရုရှားသည် မြောက်ကိုရီးယားကို ICBM နည်းပညာအပြည့် အစုံ ပေးခဲ့ပုံမပေါ်ကြောင်း ပြောကြားခဲ့သည်။ 

Hwasong-18 ဒုံးကျည်၏ ပဲ့ထိန်းစနစ်များနှင့် ဒုံးကျည်၏ တတိယအဆင့်သည် ရုရှား၏ Topol-M ဒုံးကျည် တည်ဆောက်ပုံနှင့် ကွဲလွဲချက်များ ရှိနေသည်ဟုလည်း CNS မှ သုတေသီများက ပြောကြားခဲ့သည်။

ထို့နောက် မြောက်ကိုရီးယား၏ Hwasong-18 ဒုံးကျည်နှင့်ပတ်သက်ပြီး စစ်ရေး ကျွမ်းကျင်သူများအကြား ထင်မြင်ချက်အမျိုးမျိုး ထွက်ပေါ်လာခဲ့သည်။

Source: ရိုက်တာ

CNI International News

ဆိုးလ်၊ သြဂုတ် ၁၈ 

အမေရိကန်၊ တောင်ကိုရီးယားနှင့် ဂျပန်တို့ ပြုလုပ်မည့် သုံးပွင့်ဆိုင် အစည်းအဝေးကို တုံ့ပြန်သည့် အနေဖြင့် မြောက်ကိုရီးယားသည် တိုက်ချင်းပစ် ဒုံးကျည်တစ်စင်း ပစ်လွှတ်ခြင်း သို့မဟုတ် အခြားစစ်ရေး လုပ်ဆောင်မှု တစ်ခု ပြုလုပ်ဖွယ်ရှိနေသည်ဟု တောင်ကိုရီးယား လွှတ်တော်အမတ်တစ်ဦးက ပြောကြားခဲ့ကြောင်း ရိုက်တာမှ ဖော်ပြခဲ့သည်။

အမေရိကန်သမ္မတ ဂျိုးဘိုင်ဒန် (Joe Biden)သည် သြဂုတ် ၁၈ ရက်တွင် အမေရိကန်နိုင်ငံ Camp David စစ်စခန်းတွင် တောင်ကိုရီးယားသမ္မတ ယွန်းဆော့ရွဲ(Yoon Suk Yeol)၊ ဂျပန်ဝန်ကြီးချုပ် ဖူမီယို ကီရှီဒါ (Fumio Kishida) တို့နှင့် တွေ့ဆုံမည်ဖြစ်သည်။ 

တောင်ကိုရီးယားလွှတ်တော်အမတ် ယူဆန်ဘမ်ကိုတွေ့ရစဉ်

ဒေသတွင်း တရုတ်၏ သြဇာလွှမ်းမိုးမှု မြင့်တက်နေခြင်းနှင့် မြောက်ကိုရီးယား၏ နျူကလီးယား ခြိမ်းခြောက်မှုများ မြင့်တက်နေချိန်တွင် ၎င်းတို့သုံးနိုင်ငံအကြား ဆက်ဆံရေးကို တိုးမြှင့်ရေး အစည်းအဝေး ပြုလုပ်ရန် စီစဉ်ခဲ့သည်။

အမေရိကန်၊ တောင်ကိုရီးယားနှင့် ဂျပန်တို့အကြား စစ်ရေးပူးပေါင်း ဆောင်ရွက်မှုများကို မြောက်ကိုရီးယားက ဝေဖန်ရှုတ်ချခဲ့သည်။

ထို့နောက် အဆိုပါ သုံးနိုင်ငံသည် အာရှနေတိုးအဖွဲ့ ပုံစံမျိုး ဖန်တီးနေသည်ဟု မြောက်ကိုရီးယားဘက်က ပြောကြားခဲ့သည်။

ထို့ပြင် မြောက်ကိုရီးယားသည် သြဂုတ်လကုန် သို့မဟုတ် စက်တင်ဘာလ အစောပိုင်းတွင် စပိုင်ဂြိုဟ်တု တစ်စင်းကို ထပ်မံလွှတ်တင်ဖွယ် ရှိနေသည်။

မေလက ပထမအကြိမ် စပိုင်ဂြိုဟ်တု လွှတ်တင်မှုသည် မအောင်မြင်ဘဲ ပျက်ကျခဲ့ပြီးနောက် ဒုတိယအကြိမ် လွှတ်တင်ရန် ပြင်ဆင်ခဲ့ခြင်း ဖြစ်သည်ဟု တောင်ကိုရီးယားလွှတ်တော်အမတ် ယူဆန်ဘမ်(Yoo Sang-bum)က သတင်းထောက်များကို ပြောကြားခဲ့သည်။

အမေရိကန်၊ တောင်ကိုရီးယား၊ ဂျပန် ခေါင်းဆောင် ၃ ဦးကိုတွေ့ရစဉ်

မြောက်ကိုရီးယားသည် စက်တင်ဘာ ၉ ရက်တွင် ကျရောက်သည့် နိုင်ငံထူထောင်မှု နှစ်ပတ်လည်နေ့တွင် စပိုင် ဂြိုဟ်တုကို လွှတ်တင်ရန် အလားအလာ ရှိသည်ဟုလည်း ယူဆန်ဘမ်က တောင်ကိုရီးယား အမျိုးသား ထောက်လှမ်းရေးဌာန အကြီးအကဲနှင့် အစည်းအဝေး ပြုလုပ်ပြီးချိန်တွင် ပြောကြားခဲ့သည်။

ထို့ပြင် ရုရှားနှင့် မြောက်ကိုရီးယားသည် ကာကွယ်ရေးပူးပေါင်း ဆောင်ရွက်မှုများကို မြှင့်တင်နေပြီး တောင်ကိုရီး ယား ထောက်လှမ်းရေးအဖွဲ့သည် ထိုအခြေအနေကို အနီးကပ် စောင့်ကြည့်နေသည်ဟု ယူဆန်ဘမ်က ပြောကြားခဲ့သည်။ 

အမေရိကန်ကလည်း မြောက်ကိုရီးယားသည် ယူကရိန်းစစ်ပွဲတွင် ရုရှားအတွက် လက်နက်များ ထောက်ပံ့ပေးနေ သည်ဟုဆိုကာ ဝေဖန်ရှုတ်ချခဲ့သည်။ 

ထို့ပြင် ရုရှားနှင့်မြောက်ကိုရီးယားအကြား လက်နက်ရောင်းဝယ်ရေး သဘောတူညီမှုများတွင် ပါဝင်ပတ်သက် သည်ဟု စွပ်စွဲထားသည့် အဖွဲ့အစည်းသုံးခုကို အမေရိကန်က သြဂုတ် ၁၆ ရက်၌ ပိတ်ဆို့မှုများ ချမှတ်ခဲ့သည်။

မြောက်ကိုရီးယားနှင့် ရုရှားကမူ ၎င်းတို့ နှစ်နိုင်ငံအကြား လက်နက်များ လွှဲပြောင်းပို့ဆောင်ခြင်း မရှိကြောင်း ငြင်းဆိုခဲ့သည်။

Source: ရိုက်တာ

CNI International News

အစ္စလာမ်မာဘက်၊ သြဂုတ် ၁၈

အာဖဂန်နစ္စတန်နိုင်ငံတွင် တာလီဘန်တို့ အာဏာပြန်ရခဲ့သည့် ၂ နှစ်ပြည့် နှစ်ပတ်လည်အဖြစ် သြဂုတ် ၁၅ ရက် တွင် အခမ်းအနားတစ်ရပ် ကျင်းပနေချိန် ၎င်းတို့နှင့် ကာလကြာရှည် မဟာမိတ်ဖြစ်ခဲ့သည့် အိမ်နီးချင်း ပါကစ္စတန် နှင့် ဆက်ဆံရေး တင်းမာမှုများ ပိုမိုမြင့်တက်လာခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

အာဖဂန်နစ္စတန်နှင့် နယ်စပ်ချင်း ထိစပ်နေသည့် ပါကစ္စတန်၏ လူမျိုးစုဒေသတွင် ဆိုးရွားပြင်းထန်သည့် တိုက်ခိုက်မှုများ ဖြစ်ပွားခဲ့ခြင်းအတွက် ပါကစ္စတန်က အာဖဂန်နစ္စတန်ကို ဝေဖန်ပြစ်တင်ခဲ့သည်။

နောက်ဆုံး ဖြစ်ပွားခဲ့သည့် အသေခံဗုံးခွဲ တိုက်ခိုက်မှု ဖြစ်စဉ်တစ်ခုသည် ဇူလိုင်လကုန်ပိုင်းက ဘာဂျူအာ (Bajaur) ခရိုင်တွင် ဖြစ်ပွားခဲ့ရာ လူ ၅၄ ဦးကျော် သေဆုံးခဲ့သည်။

အဆိုပါ တိုက်ခိုက်မှုကို ၎င်းတို့လုပ်ဆောင်ခဲ့ခြင်း ဖြစ်သည်ဟု ခိုရာဆန်ပြည်နယ်မှ အိုင်အက်စ်အဖွဲ့ (ISKP/ISIS-K) က ကြေညာခဲ့သည်။

အာဖဂန်၏ အာဏာရ တာလီဘန်အစိုးရသည် နယ်စပ်ဖြတ်ကျော် တိုက်ခိုက်မှုများ ပြုလုပ်နေသည့် လက်နက်ကိုင် အဖွဲ့များကို လုံလောက်သည့် ထိန်းချုပ်ဟန့်တားမှုများ မလုပ်ခဲ့ကြောင်း ပါကစ္စတန် အရာရှိများက စွပ်စွဲခဲ့သည်။

အမေရိကန်နဲ့ တာလီဘန်တို့ ဒိုဟာ သဘောတူညီချက်ကို လက်မှတ်ထိုးခဲ့စဉ်

"ကျနော်တို့အနေနဲ့ နိုင်ငံတကာဥပဒေနဲ့အညီ ကိုယ့်ကိုယ်ကို ကာကွယ်ဖို့ လုပ်ဆောင်သွားမှာပါ။ တကယ်လို့ အာဖဂန် အာဏာပိုင်တွေက အရေးယူဆောင်ရွက်တာမျိုး မရှိဘူးဆိုရင် ကျနော်တို့ဘက်က တစ်ခုခု လုပ်ရပါ လိမ့်မယ်"ဟု နိုင်ငံရေးသမားတစ်ဦးကို ပစ်မှတ်ထားလုပ်ကြံသည့် ဘာဂျူအာ ဗုံးခွဲတိုက်ခိုက်မှု အပြီးတွင် ပါကစ္စတန်နိုင်ငံခြားရေးဝန်ကြီးဟောင်း ဘီလာဝယ် ဘူတို ဇာဒါရီ (Bilawal Bhutto Zardari) က ပြောသည်။

ပါကစ္စတန် စစ်တပ်၏ ဗိုလ်ချုပ်ကြီး ဆေးယက် အာဆင် မူနီယာ (Syed Asim Munir) ကလည်း ပါကစ္စတန် မြေပေါ်တွင် ဖြစ်ပွားသည့် တိုက်ခိုက်မှုများတွင် အာဖဂန်နိုင်ငံသားများ ပါဝင်ပတ်သက်နေခြင်းကို ရှုတ်ချခဲ့သည်။

ပါကစ္စတန်နိုင်ငံခြားရေးဝန်ကြီးဟောင်း ဘီလာဝယ် ဘူတို ဇာဒါရီကို တွေ့ရစဉ်

အဆိုပါ လက်နက်ကိုင်အဖွဲ့များသည် ဒေသတွင်း ငြိမ်းချမ်းရေးနှင့် တည်ငြိမ်ရေးကို လျော့ပါးစေရန် လုပ်ဆောင်နေ သည်ဟု ၎င်းက ပြောသည်။

ထိုတိုက်ခိုက်မှုများသည် တာလီဘန်နှင့် အမေရိကန်အကြား သဘောတူညီမှု ရရှိခဲ့သည့် ၂၀၂၀ ဒိုဟာ ငြိမ်းချမ်းရေး သဘောတူညီချက်နှင့် သွေဖည်နေသည်ဟု ဗိုလ်ချုပ်ကြီး ဆေးယက် အာဆင် မူနီယာ ပြောသည်။ 

ဒိုဟာ သဘောတူညီချက်တွင် တာလီဘန်တို့သည် လက်နက်ကိုင်အဖွဲ့များအား အာဖဂန်၏နယ်မြေကို အသုံးပြုပြီး တိုက်ခိုက်မှုများ ပြုလုပ်ခွင့် ပေးမည်မဟုတ်ဟု ကတိပြုခဲ့ခြင်း ဖြစ်သည်။

တာလီဘန်အဖွဲ့ကလည်း ဘာဂျူအာ ဗုံးခွဲတိုက်ခိုက်မှုဖြစ်စဉ်ကို ရှုတ်ချခဲ့ပြီး ပါကစ္စတန်၏ စွဲချက်များကို ငြင်းဆိုခဲ့ သည်။

"ပါကစ္စတန်မှာ မကြာသေးခင်က ဖြစ်ပွားခဲ့တဲ့ လုံခြုံရေး ဖြစ်စဉ်တွေအပြီးမှာ ပါကစ္စတန် အရာရှိတွေဟာ ကိုယ့် နိုင်ငံ လုံခြုံရေးကို မြှင့်တင်ဖို့ထက် အာဖဂန်နိုင်ငံအပေါ်ကိုပဲ အပြစ်ပုံချခဲ့ပါတယ်"ဟု တာလီဘန်အဖွဲ့၏ ပြောရေးဆိုခွင့်ရှိသူ ဇာဘီဟူလာ မူဂျာဟစ်(Zabihullah Mujahid)က ပြောကြားခဲ့သည်။

ထိုကဲ့သို့ တစ်ဖက်နှင့်တစ်ဖက် အပြန်အလှန် စွပ်စွဲပြစ်တင်မှုများသည် ပါကစ္စတန်နှင့် တာလီဘန်အဖွဲ့အကြား ဆက်ဆံရေး တင်းမာမှုကို ပိုမိုမြင့်တက်စေခဲ့ပြီး ပါကစ္စတန်အစိုးရသည် နိုင်ငံအတွင်း တိုက်ခိုက်မှုများ မြင့်တက် နေသည့်် အခြေအနေကို ရင်ဆိုင်နေရသည်။

Source: အယ်လ်ဂျာဇီးယား

CNI International News

ဂျိုဟန်နက်စဘတ်ချ်၊ သြဂုတ် ၁၈

ကမ္ဘာ့အရေးတွင် အနောက်အုပ်စု၏ သြဇာလွှမ်းမိုးမှုကို စိန်ခေါ်နိုင်မည့် ပထဝီနိုင်ငံရေး အင်အားစုအဖြစ် ပြောင်းလဲ ရေးအတွက် ဆွေးနွေးရန် BRICS အဖွဲ့ဝင်နိုင်ငံများမှ ခေါင်းဆောင်များသည် လာမည့်သီတင်းပတ်တွင် တောင်အာဖရိကနိုင်ငံတွင် အစည်းအဝေး တစ်ရပ် ကျင်းပမည်ဟု ရိုက်တာမှ ဖော်ပြခဲ့သည်။

ဘရာဇီးလ်၊ ရုရှား၊ အိန္ဒိယ၊ တရုတ်နှင့် တောင်အာဖရိကနိုင်ငံများ ဖွဲ့စည်းထားသည့် BRICS အဖွဲ့၏ အဆိုပါ အစည်းအဝေးသို့ ယူကရိန်းစစ်ပွဲနှင့်ပတ်သက်ပြီး စစ်ရာဇဝတ်မှုများဖြင့် နိုင်ငံတကာဖမ်းဝရမ်း ထုတ်ခံထားရသည့် ရုရှားသမ္မတပူတင် တက်ရောက်မည် မဟုတ်ကြောင်း သိရသည်။ 

တောင်အာဖရိကနိုင်ငံက အိမ်ရှင်အဖြစ် လက်ခံကျင်းပမည့် ထိုအစည်းအဝေးကို တရုတ်သမ္မတ ရှီကျင့်ဖျင် (Xi Jinping) ၊ ဘရာဇီးလ်သမ္မတ လူးစ် အင်နာစီယို လူလာ ဒါ ဆေးလ်ဗား (Luiz Inacio Lula da Silva) နှင့် အိန္ဒိယ ဝန်ကြီးချုပ် မိုဒီ (Modi) တို့အပြင် ကမ္ဘာ့တောင်ခြမ်းမှ နိုင်ငံခေါင်းဆောင်များ တက်ရောက်မည် ဖြစ်သည်။

အမေရိကန်သမ္မတ ဘိုင်ဒန်ကိုတွေ့ရစဉ်

BRICS အဖွဲ့ဝင် နိုင်ငံများအကြား မတူကွဲပြားမှုများ ရှိနေသည့်တိုင် တူညီသည့် သဘောထား တစ်ခုမှာ အမေရိကန်နှင့် ၎င်း၏ ချမ်းသာကြွယ်ဝသည့် မဟာမိတ်နိုင်ငံများသည် နိုင်ငံတကာ စံချိန်စံညွှန်းများကို ပြဋ္ဌာန်းခဲ့ သော်လည်း ထိုစံနှုန်းများကို ၎င်းတို့ကိုယ်တိုင် လိုက်နာကျင့်သုံးခြင်း မရှိဆိုသည့်အချက် ဖြစ်သည်။

သြဂုတ် ၂၂ ရက်မှ ၂၄ ရက်အထိ ပြုလုပ်မည့် BRICS အစည်းအဝေးအတွင်း ဆွေးနွေးမည့် အကြောင်းအရာများနှင့် ပတ်သက်ပြီး အသေးစိတ် အချက်အလက်များ အနည်းငယ်သာ ထွက်ပေါ်ခဲ့သော်လည်း ထိုအစည်းအဝေးကို တက် ရောက်ရန် စိတ်ဝင်စားသည့် နိုင်ငံပေါင်း ၄၀ ခန့် ရှိသည်ဟု တောင်အာဖရိကက ပြောကြားခဲ့သည်။

ထိုနိုင်ငံများအနက် ဆော်ဒီအာရေဗျ၊ အာဂျင်တီးနားနှင့် အီဂျစ်နိုင်ငံတို့လည်း ပါဝင်ကြောင်း သိရသည်။

တရုတ်သည် အမေရိကန်နှင့် ပထဝီနိုင်ငံရေး သြဇာလွှမ်းမိုးမှုကို ယှဉ်ပြိုင်ရန် BRICS အဖွဲ့ကို ပိုမိုအင်အား တောင့် တင်းစေရန် ကြိုးပမ်းနေသော်လည်း ဘရာဇီးလ်နိုင်ငံကမူ နိုင်ငံတကာ အသိုင်းအဝိုင်းတွင် ၎င်း၏ သြဇာလျော့ နည်းနေသည့် အနေအထားကြောင့် BRICS အဖွဲ့ကို အင်အားချဲ့ထွင်ရန် တွန့်ဆုတ်နေသည်။

ရုရှားကတော့ ယူကရိန်းစစ်ပွဲနှင့်ပတ်သက်ပြီး သံတမန်ရေးအရ ဖယ်ကြဉ်ခံထားရသည့် အခြေအနေကို တန်ပြန် ရန် မိတ်ဖက်နိုင်ငံများကို လိုအပ်နေသဖြင့် BRICS တွင် အဖွဲ့ဝင်နိုင်ငံအသစ်များ ပိုမိုပါဝင်လာစေရန် ကြိုးပမ်းနေ သည်။ 

BRICS အဖွဲ့၀င် ခေါင်းဆောင်များကိုတွေ့ရစဉ်

အထူးသဖြင့် ရုရှားအတွက် အာဖရိကတွင် အရေးအကြီးဆုံး မဟာမိတ်နိုင်ငံမှာ တောင်အာဖရိကနိုင်ငံ ဖြစ်သည်။

အိန္ဒိယနိုင်ငံကမူ အနောက်အုပ်စုနှင့် BRICS အဖွဲ့အကြား ကြားနေရပ်တည်မည့် ပုံစံမျိုး ရှိနေသည်ဟု ကျွမ်းကျင် သူများက ပြောကြားခဲ့သည်။ 

တောင်အာဖရိကတွင် ပြုလုပ်မည့် ၁၅ ကြိမ်မြောက် BRICS အစည်းအဝေး၏ ခေါင်းစဉ်မှာ "BRICS နှင့် အာဖရိက" ဖြစ်ပြီး ထိုအစည်းအဝေးအတွင်း ကမ္ဘာ့အင်အားကြီး နိုင်ငံများအကြား ပြိုင်ဆိုင်မှုများကြောင့် ဖြစ်ပေါ်လာမည့် ခြိမ်းခြောက်မှုများနှင့်အတူ BRICS အဖွဲ့အတွင်း ဆက်ဆံရေးများကို မည်ကဲ့သို့ တည်ဆောက်မည်ဆိုသည့် အချက်ကို အဓိကထား ဆွေးနွေးသွားမည်ဖြစ်သည်။ 

BRICS အဖွဲ့ဝင် ငါးနိုင်ငံ၏ လူဦးရေသည် ကမ္ဘာ့လူဦးရေ၏ ၄၀ ရာခိုင်နှုန်းဖြစ်ပြီး ထိုငါးနိုင်ငံ၏ စီးပွားရေး အင်အား စုစုပေါင်းသည် ကမ္ဘာလုံးဆိုင်ရာ စီးပွားရေး၏ လေးပုံတစ်ပုံ ရှိသည်။

Source: ရိုက်တာ