CNI International News

ဆိုးလ်၊ စက်တင်ဘာ ၁

မြောက်ကိုရီးယားသည် တောင်ကိုရီးယားရှိ ပစ်မှတ်အားလုံးကို နျူကလီးယားဖြင့်တိုက်ခိုက်ရန် သရုပ်ဖော် လေ့ကျင့်သည့် စစ်ရေးလေ့ကျင့်မှုတစ်ခုကို ပြုလုပ်ခဲ့သည်ဟု နိုင်ငံပိုင် KCNA သတင်းအေဂျင်စီက သြဂုတ် ၃၁ ရက်တွင် ဖော်ပြခဲ့သည်။

၎င်းနျူကလီးယားစစ်ရေးလေ့ကျင့်မှုသည် အမေရိကန်နှင့် တောင်ကိုရီးယား၏ စစ်ရေးလေ့ကျင့်မှုများကို တုံ့ပြန်သည့််အနေဖြင့် လုပ်ဆောင်ခြင်းဖြစ်သည်။

အမေရိကန်၏ နျူကလီးယားတိုက်ခိုက်မှုကို ကြိုတင်လက်ဦးမှုရယူရန်အတွက် ထိုစစ်ရေးလေ့ကျင့်မှုကို ပြုလုပ်ခဲ့ခြင်းဖြစ်သည်ဟု မြောက်ကိုရီးယားက ပြောကြားခဲ့ကြောင်း ရိုက်တာမှ ဖော်ပြခဲ့သည်။

နျူကလီးယားတိုက်ခိုက်ရေး မစ်ရှင်တွင် ဒုံးကျည်တပ်ဖွဲ့သည် ပဲ့ထိန်းဒုံးကျည်နှစ်စင်းကို ပစ်လွှတ်ခဲ့သည်ဟု မြောက်ကိုရီးယား ပြည်သူ့ တပ်မတော် (KPA) ၏ စစ်ဦးစီးချုပ်က ပြောသည်။

မြောက်ကိုရီးယားခေါင်းဆောင် ကင်မ်ဂျုံအန်ကို တွေ့ရစဉ်(Reuters)

"သြဂုတ် ၃၀ ရက်ညပိုင်းက KPA ဟာ နည်းဗျူဟာမြောက် နျူကလီးယား တိုက်ခိုက်ရေး စစ်ရေးလေ့ကျင့်မှုကို ပြုလုပ်ခဲ့ပြီး တောင်ကိုရီးယားရဲ့ အဓိက စစ်ဌာနတွေနဲ့ လေယာဉ်ကွင်းတွေကို တိုက်ခိုက်တဲ့ ပုံစံမျိုးနဲ့ သရုပ်ဖော် လေ့ကျင့်ခဲ့ပါတယ်"ဟု မြောက်ကိုရီးယားစစ်ဦးစီးချုပ်က ပြောသည်။ 

အမေရိကန်သည် တောင်ကိုရီးယားနှင့် လေတပ်ပူးတွဲစစ်ရေးလေ့ကျင့်မှုများအတွက် B-1B ဗုံးကြဲ လေယာဉ် များကို ဖြန့်ကြက်ခဲ့ပြီးနောက် နာရီပိုင်းအကြာတွင် မြောက်ကိုရီးယားက တာတိုပစ် ပဲ့ထိန်းဒုံးကျည် နှစ်စင်းကို ပင်လယ်အတွင်းသို့ ပစ်လွှတ်ခဲ့သည်ဟု တောင်ကိုရီးယားက ပြောသည်။ 

အမေရိကန်သည် တောင်ကိုရီးယားနှင့် ၁၁ ရက်ကြာ ပူးတွဲစစ်ရေးလေ့ကျင့်မှုများကို မပြုလုပ်မီ တစ်ရက် အလိုတွင် မြောက်ကိုရီးယားက ဒုံးကျည်များပစ်လွှတ်ခဲ့ခြင်းလည်းဖြစ်သည်။

မြောက်ကိုရီးယားက အမေရိကန်နှင့် တောင်ကိုရီးယား၏ ပူးတွဲစစ်ရေးလေ့ကျင့်မှုများသည် စစ်ပွဲအတွက် လေ့ကျင့်ပြင်ဆင်နေမှုဖြစ်ကြောင်း ရှုတ်ချခဲ့သည်။

သြဂုတ် ၂၉ ရက်ကလည်း မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) သည် တောင်ကိုရီးယားနှင့် စစ်ပွဲဖြစ်ပွားမည့်အခြေအနေအတွက် ကြိုတင်ပြင်ဆင်သည့်အနေဖြင့် တပ်မှူးများနှင့်် စစ်တပ်၏ ဌာနအသီးသီးမှ ဝန်ထမ်းများပါဝင်သည့် စစ်ရေးလေ့ကျင့်မှုတစ်ခုကို လေ့လာကြည့်ရှုခဲ့သည်ဟု KCNA ကထုတ်ပြန်ခဲ့သည်။

ထိုစစ်ရေးလေ့ကျင့်မှုသည် အလစ်အငိုက် ကျူးကျော်ဝင်ရောက်ခံရသည့်အခြေအနေမျိုးတွင် တန်ပြန် တိုက်ခိုက်နိုင်ရေးနှင့် တောင်ကိုရီးယားတစ်နိုင်ငံလုံးကို သိမ်းယူရေးအတွက် ရည်ရွယ်လုပ်ဆောင်ခဲ့ခြင်း ဖြစ်သည်ဟု ၎င်းထုတ်ပြန်ချက်တွင် ဖော်ပြခဲ့သည်။

Source: ရိုက်တာ

CNI International News 

ဘန်ကောက်၊ သြဂုတ် ၃၁

ထိုင်းဝန်ကြီးချုပ် သက်ဆင်ရှင်နာဝပ် (Thaksin Shinawatra) သည် ထိုင်းဘုရင်၏ တော်ဝင် လွတ်ငြိမ်း ချမ်းသာခွင့်ရရှိရန် ပြင်ဆင်နေသော်လည်း မည်သည့်အချိန်တွင် တင်သွင်းမည်ဆိုခြင်းကိုမူ လျှို့ဝှက်ထားသည်ဟု သက်ဆင်၏ ရှေ့နေက သြဂုတ် ၃၀ ရက်တွင် ပြောကြားခဲ့သည်။

သက်ဆင်သည် ပြည်ပြေးဘဝဖြင့် ပြည်ပတွင် ၁၅ နှစ်ကြာ နေထိုင်ခဲ့ပြီးနောက် ပြီးခဲ့သည့် သီတင်းပတ်တွင် ထိုင်းသို့ ပြန်လည်ရောက်ရှိခဲ့ခြင်းဖြစ်သည်။ 

သက်ဆင်သည် ကိုယ်ပိုင်ဂျက်လေယာဉ်ဖြင့် ထိုင်းသို့ ပြန်လည်ရောက်ရှိချိန်တွင် တရားရုံးချုပ်သို့ ဆင့်ခေါ်ခံခဲ့ရပြီး အာဏာအလွဲသုံးစားလုပ်မှု၊ ကိုယ်ကျိုးစီးပွားရှာမှုတို့ဖြင့် ထောင်ဒဏ် ၈ နှစ် ချမှတ်ခံခဲ့ရသည်။ 

သက်ဆင် ထိုင်းသို့ပြန်လည်ရောက်ရှိခဲ့ပြီး နာရီပိုင်းအကြာတွင် သက်ဆင်မိသားစု၏ ဖြူးထိုင်းပါတီသည် လွှတ်တော်မဲခွဲဆုံးဖြတ်မှုတွင် ပါတီ၏ ဝန်ကြီးချုပ်ကိုယ်စားလှယ်လောင်းအား အတည်ပြု ရွေးချယ်ခံခဲ့ရသည်။

သက်ဆင်ကို ထောက်ခံသူများက ဒွန်မောင်းလေဆိပ်တွင် စောင့်ဆိုင်းနေစဉ်(gettyimages)

ထို့ကြောင့် သက်ဆင်မိသားစု၏ ဖြူးထိုင်းပါတီသည် စစ်တပ်နှင့် လျှို့ဝှက်သဘောတူညီမှု ရရှိခဲ့ဖွယ်ရှိသည်ဟု ထင်ကြေးပေးမှုများ ထွက်ပေါ်ခဲ့သော်လည်း သက်ဆင်နှင့် ဖြူးထိုင်းပါတီက ငြင်းဆိုခဲ့သည်။

သက်ဆင်သည် အကျဉ်းထောင်တွင် စတင်အကျဉ်းချခံသည့် ည၌ပင် ရင်ဘတ်အောင့်သည့်ဝေဒနာ၊ သွေးတိုးရောဂါတို့ဖြင့် ရဲတပ်ဖွဲ့ဆေးရုံသို့ ရွှေ့ပြောင်းခဲ့သည်။

သို့သော် သြဂုတ် ၃၀ ရက်တွင် သက်ဆင်၏ ရှေ့နေ ဝင်ယတ် ချာ့မွန်ထရီ (Winyat Chartmontri) က သက်ဆင်သည် တော်ဝင်လွတ်ငြိမ်းချမ်းသာခွင့်ကို တောင်းဆိုရန်ပြင်ဆင်နေသည်ဟု ပြောကြားခဲ့သည်။ 

သက်ဆင်ကို တင်ဆောင်လာသည်ဟု ယူဆရသည့် ရဲကားတစ်စီး(gettyimages)

"သက်ဆင်ဟာ တော်ဝင်လွတ်ငြိမ်းချမ်းသာခွင့်ကို လျှောက်ထားဖို့ လုပ်ဆောင်နေပြီး အချက်အလက်တွေကို စုဆောင်းနေတဲ့ အဆင့်မှာ ရှိနေပါတယ်" ဟု ဝင်ယတ်က ပြောကြားခဲ့ပြီး သက်ဆင်၏ တရားရေးအဖွဲ့သည် တော်ဝင်လွတ်ငြိမ်းချမ်းသာခွင့်အတွက် လျှောက်ထားရခြင်းမရှိသေးကြောင်း ထပ်လောင်းပြောဆိုခဲ့သည်။

တော်ဝင်လွတ်ငြိမ်းချမ်းသာခွင့် လျှောက်ထားမည့် အချိန်ကို သက်ဆင်၏ ကိုယ်ပိုင် ဆုံးဖြတ်ချက်ဖြင့် လုပ်ဆောင်သွားမည်ဟုလည်း ဝင်ယတ်က ပြောကြားခဲ့သည်။

သက်ဆင်ကို ဆန့်ကျင်သည့် အဖွဲ့ကမူ တော်ဝင်လွတ်ငြိမ်းချမ်းသာခွင့်ရရှိရန်အတွက် သက်ဆင်၏ အားထုတ် ကြိုးပမ်းမှုများအား ပိတ်ပင်ရန် အကျဉ်းထောင်ဌာနသို့ အသနားခံစာ တင်သွင်းခဲ့သည်။

Source: ရိုက်တာ

CNI International News

လိုင်ဘရီဗီလီ၊ သြဂုတ် ၃၁

ဂါဘွန်နိုင်ငံတွင် စစ်တပ်၏အရာရှိများက သြဂုတ် ၃၀ ရက်နေ့၌ နိုင်ငံ့အာဏာအား ရယူခဲ့ကြောင်းနှင့် သမ္မတ အလီ ဘွန်ဂို (Ali Bongo) ကို နေအိမ် အကျယ်ချုပ်ဖြင့် ဖမ်းဆီးထားကြောင်း ရိုက်တာမှ ဖော်ပြခဲ့သည်။

ဂါဘွန်သမ္မတ အလီ ဘွန်ဂိုသည် ရွေးကောက်ပွဲတွင် ၎င်း၏ တတိယသက်တမ်းအတွက် အနိုင်ရရှိကြောင်း ရွေးကောက်ပွဲ အာဏာပိုင်များက ကြေညာခဲ့ပြီးနောက် မိနစ်ပိုင်းအကြာတွင် စစ်တပ်အရာရှိများက နိုင်ငံ့အာဏာကို ရယူကြောင်း ကြေညာခဲ့ခြင်းဖြစ်သည်။

ထိုအရာရှိများက ၎င်းတို့သည် ဂါဘွန်လက်နက်ကိုင်တပ်ဖွဲ့များကို ကိုယ်စားပြုပြီး ရွေးကောက်ပွဲရလဒ်များကို ပယ်ဖျက်ကြောင်း၊ နယ်စပ်များကို ပိတ်ကြောင်းနှင့် နိုင်ငံ့အင်စတီကျူးရှင်းများကို ဖျက်သိမ်းကြောင်း ပြောကြားခဲ့သည်။

ဂါဘွန်တွင် စစ်တပ်၏ ကြားဝင်စွက်ဖက်မှုကို ရာနှင့်ချီသည့် ဂါဘွန်ဒေသခံများက အောင်ပွဲခံခဲ့ကြပြီး ဂါဘွန်အား ကိုလိုနီပြုခဲ့သည့် ပြင်သစ်နိုင်ငံကမူ အဆိုပါ အာဏာသိမ်းမှုကို ရှုတ်ချခဲ့သည်။

သမ္မတ အလီဘွန်ဂိုအား တွေ့ရစဉ်

ဖမ်းဆီးထိန်းသိမ်းခံခဲ့ရသည့် သမ္မတ ဘွန်ဂိုသည် ဂါဘွန်နိုင်ငံကို ၁၉၆၇ ခုနှစ်ကတည်းက အုပ်ချုပ်ခဲ့သည့် ဖခင်ဖြစ်သူ အိုမာ (Omar) ကွယ်လွန်ခဲ့ပြီးနောက် ၂၀၀၉ ခုနှစ်က ပြုလုပ်ခဲ့သည့် ရွေးကောက်ပွဲတွင် ပထမဆုံးအကြိမ်အဖြစ် ရွေးကောက်ခံခဲ့ရသည်။

ဘွန်ဂို၏ သားဖြစ်သူ နျူအာရက်ဒင် ဘွန်ဂို ဗလန်တင် (Noureddin Bongo Valentin) နှင့် အခြားသူများကိုလည်း အကျင့်ပျက်ခြစားမှု၊ နိုင်ငံတော် သစ္စာဖောက်မှုတို့ဖြင့်ဖမ်းဆီးခဲ့သည်ဟု စစ်တပ်အရာရှိများက ပြောသည်။

Gabon 24 ရုပ်သံမှတစ်ဆင့် ကြေညာချက်ထုတ်ပြန်ခဲ့ရာတွင် ထိုစစ်တပ်အရာရှိများက ၎င်းတို့သည် ဂါဘွန် နိုင်ငံတွင် လုံခြုံရေးနှင့် ကာကွယ်ရေးတပ်ဖွဲ့အားလုံးကို ကိုယ်စားပြုကြောင်း ပြောကြားခဲ့သည်။ 

အာဏာရယူမှုအား ထောက်ခံကြောင်းပြသနေသည့် ဂါဘွန်ပြည်သူများ(Reuters)

ထို့နောက် ရွေးကောက်ပွဲရလဒ်များကိုလည်း ပယ်ဖျက်ပြီး နယ်စပ်များကိုလည်း နောက်ထပ် ကြေညာချက် မထုတ်ပြန်မီ အချိန်အထိ ပိတ်ထားမည်ဟု ကြေညာခဲ့သည်။

အာဏာလွှဲပြောင်းရေးနှင့်  အင်စတီကျူးရှင်းများအား ပြန်လည်ထိန်းသိမ်းရေး ကော်မတီဟု ၎င်းတို့ကိုယ်ကိုယ် မိတ်ဆက်ခဲ့သည့် စစ်တပ်အရာရှိများက ဂါဘွန်နိုင်ငံသည် ဆိုးရွားသော အင်စတီကျူးရှင်း၊ နိုင်ငံရေး၊ စီးပွားရေးနှင့် လူမှုရေး အကျပ်အတည်းနှင့် ရင်ဆိုင်နေရသည်ဟု ပြောသည်။ 

အာဏာသိမ်းမှုအား မည်သူက ဦးဆောင်ခဲ့သည်ဆိုခြင်းကို ရှင်းလင်းတိကျစွာ မသိရသေးသော်လည်း နိုင်ငံပိုင် ရုပ်သံလိုင်းတွင် ဖော်ပြခဲ့သည့် စစ်သားများသည် ဂါဘွန်အစိုးရ အစောင့်တပ်ဖွဲ့၏ အကြီးအကဲ ဘရိုက်စ် အိုလီဂွီ အန်ဂွီမာ (Brice Oligui Nguema) ဖြစ်နိုင်ခြေရှိသည်ဟု ထင်ကြေးပေးမှုများ ထွက်ပေါ်နေသည်။

Source: ရိုက်တာ

CNI International News

ဘန်ကောက်၊ သြဂုတ် ၃၁

စစ်တပ်နှင့် ဆက်နွှယ်သော ပါတီများဖြင့် ညွန့်ပေါင်းအစိုးရဖွဲ့ရန် ဆုံးဖြတ်ခဲ့သဖြင့် ဖြူးထိုင်းပါတီ ခေါင်းဆောင် ဒေါက်တာ ချိုနန် သီရိကော (Cholnan Srikaew) က သြဂုတ် ၃၀ ရက်တွင် ပါတီခေါင်းဆောင်ရာထူးနေရာမှ နုတ်ထွက်ခဲ့သည်ဟု ဘန်ကောက်ပို့စ်တွင် ဖော်ပြထားသည်။ 

၎င်း၏ ကတိစကားကိုတည်ကြောင်း ပြသသည့်အနေဖြင့် ယခုကဲ့သို့ နုတ်ထွက်ခဲ့ခြင်းဖြစ်သည်။

Nan ပြည်နယ်မှ ဝါရင့်နိုင်ငံရေးသမားတစ်ဦးဖြစ်သူ ချိုနန်သည် ရွေးကောက်ပွဲမတိုင်မီ ဧပြီ ၂၈ ရက်က ဖြူးထိုင်းပါတီအတွက် မဲဆွယ်စည်းရုံးခဲ့ချိန်တွင် ၎င်း၏ပါတီသည် စစ်တပ်နှင့်ဆက်နွှယ်သည့် PPRP (Palang Pracharath) ပါတီနှင့် ညွန့်ပေါင်းအစိုးရဖွဲ့မည်ဆိုလျှင် ပါတီမှ နုတ်ထွက်မည်ဟု ကတိပြုခဲ့ခြင်းဖြစ်သည်။

ရာထူးမှ ထွက်ခွာတော့မည့် ဗိုလ်ချုပ်ကြီး ပရာဝပ် ဝေါင်ဆူဝမ် (Prawit Wongsuwon) နှင့် ဝန်ကြီးချုပ်ဟောင်း ပရာယွတ် ချန်အိုချာ (Prayut Chan-o-cha) တို့ဦးဆောင်သည့် ပါတီတို့ ညွန့်ပေါင်းအစိုးရအဖွဲ့ထဲတွင် နေရာရ လိမ့်မည်ဟု ထင်ကြေးပေးခံထားရသည်။

ဖြူးထိုင်းပါတီခေါင်းဆောင် ဒေါက်တာ ချိုနန်သီရိကောကို တွေ့ရစဉ်(gettyimages)

အသက် ၆၂ နှစ်အရွယ် ဆရာဝန်တစ်ဦးဖြစ်သည့် ချိုနန်က ပါတီမှ နုတ်ထွက်မှုသည် ၎င်း၏ လွှတ်တော်အမတ် နေရာအပေါ် သက်ရောက်မှုရှိမည်မဟုတ်ကြောင်းလည်း ပြောသည်။
ထို့အပြင် ချိုနန်သည် ညွန့်ပေါင်းအစိုးရအဖွဲ့အတွင်း ပြည်သူ့ကျန်းမာရေးဝန်ကြီးအဖြစ် ခန့်အပ်ခံရလိမ့်မည်ဟု ယူဆခံထားရသူလည်းဖြစ်သည်။

ထို့နောက် ဖြူးထိုင်းပါတီ၏ လက်ထောက်ခေါင်းဆောင် ချူဆက် သီရိနီလ် (Chusak Sirinil) သည် ပါတီခေါင်းဆောင်ရာထူးကို ယာယီတာဝန်ထမ်းဆောင်မည်ဖြစ်ကြောင်း ပါတီအတွင်းရေးမှူးချုပ် ပရာဆက် ချန်သာရာရွန်သွန်း (Prasert Chanthararuangthong) က ပြောသည်။

ဝန်ကြီးချုပ်ဟောင်းပရာယွတ်နဲ့ ဗိုလ်ချုပ်ကြီး ပရာဝပ်ကို တွေ့ရစဉ်(gettyimages)

လာမည့်ရက်ပေါင်း ၆၀ အတွင်း ပါတီခေါင်းဆောင်သစ်တစ်ဦးရွေးချယ်ပြီး အမှုဆောင် ဘုတ်အဖွဲ့ အစည်းအဝေးကျင်းပသွားမည်ဟုလည်း ၎င်းကဆက်လက်ပြောကြားသည်။

ဖြူးထိုင်းပါတီသည် အစိုးရအဖွဲ့အတွင်း နေရာ ၁၇ နေရာရရှိမည်ဖြစ်ပြီး အစိုးရအဖွဲ့၏ ဖွဲ့စည်းပုံကို အပြီးသတ် ရေးဆွဲခဲ့ပြီး ဖြစ်သည့်အတွက် ၎င်း၏ နုတ်ထွက်မှုသည် အချိန်မှန်ကန်ကြောင်း ဒေါက်တာ ချိုနန်က ပြောကြားခဲ့သည်။

"တာဝန်တွေကို အပြီးသတ်လုပ်ဆောင်ခဲ့ပြီးပါပြီ။ ဖြူးထိုင်းပါတီအနေနဲ့ PPRP (Palang Pracharath) ပါတီနဲ့ အစိုးရဖွဲ့မယ်ဆိုရင် ပါတီခေါင်းဆောင်ရာထူးနေရာက ထွက်မယ်ဆိုတဲ့ ကျွန်တော့်ရဲ့ ကတိကို တည်ကြောင်း ပြသခဲ့ပြီးပါပြီ" ဟု ချိုနန်က ပြောသည်။

သြဂုတ် ၂၁ ရက်က ဖြူးထိုင်းပါတီသည် ညွန့်ပေါင်းမဟာမိတ်အသစ်ကို ကြေညာခဲ့ပြီးနောက် ဒေါက်တာချိုနန်ကို ပါတီခေါင်းဆောင်ရာထူးမှ နုတ်ထွက်ရန် နိုင်ငံရေးပြိုင်ဘက်များက ဖိအားပေးတောင်းဆိုခဲ့ခြင်းဖြစ်သည်။

မည်သို့ပင်ဆိုစေ ချိုနန်က အစိုးရအဖွဲ့သစ်၏ ဖွဲ့စည်းပုံကို အပြီးသတ်ရေးဆွဲပြီးသည့်အချိန်အထိ ပါတီ ခေါင်းဆောင်အဖြစ် ဆက်လက်တာဝန်ထမ်းဆောင်မည်ဟု ပြောကြားခဲ့ပြီး သြဂုတ် ၃၀ ရက်တွင် ယခုကဲ့သို့ ရာထူးမှ နုတ်ထွက်ကြောင်း ကြေညာခဲ့ခြင်းဖြစ်သည်။

Source:ဘန်ကောက်ပို့စ်

CNI International News 

ဆော်ပိုလို၊ သြဂုတ် ၃၁

ဝဂ်နာအုပ်စု အကြီးအကဲ ယက်ဗ်ဂျီနီ ပရီဂေါ့ဇင် (Yevgeny Prigozhin) သေဆုံးခဲ့သည့် ဂျက်လေယာဉ် ပျက်ကျမှုကို နိုင်ငံတကာဥပဒေများအရ စုံစမ်းစစ်ဆေးမည်မဟုတ်ကြောင်း ရုရှားအစိုးရက ဘရာဇီးနိုင်ငံ၏ လေယာဉ် စုံစမ်းစစ်ဆေးရေး အာဏာပိုင်အဖွဲ့ကို အကြောင်းကြားခဲ့သည်ဟု ရိုက်တာမှ ဖော်ပြခဲ့သည်။

ဝဂ်နာသည် ရုရှားနိုင်ငံက ကြေးစားစစ်သားငှားရမ်းသည့် အုပ်စုဖြစ်ပြီး ပျက်ကျခဲ့သည့် ဂျက်လေယာဉ်မှာ ဘရာဇီးနိုင်ငံလုပ် Embraer ဖြစ်သည်။

ပြီးခဲ့သည့် သီတင်းပတ်က မော်စကိုမြို့တော် မြောက်ပိုင်းတွင် Embraer Legacy 600 လေယာဉ်ပျက်ကျမှု၌ ပရီဂေါ့ဇင်နှင့်အတူ ဝဂ်နာအုပ်စု၏ ဗိုလ်နှစ်ဦး၊ သက်တော်စောင့်လေးဦး အပါအဝင် လူ ၁၀ ဦးသေဆုံးခဲ့သည်။

ပရီဂေါ့ဇင်သည် ၁၉၉၉ ခုနှစ်ကတည်းက အာဏာရလာခဲ့သည့် ရုရှားသမ္မတ ဗလာဒီမာ ပူတင် (Vladimir Putin) ကို ဆန့်ကျင်သည့် တစ်ရက်ကြာ ပုန်ကန်မှုအပြီး နှစ်လနီးပါးအကြာတွင် လေယာဉ်ပျက်ကျ၍ သေဆုံးခဲ့ခြင်း ဖြစ်သည်။

PMC Wagner ရုံးရှေ့မှ ပရီဂေါ့ဇင်တို့အတွက် အောက်မေ့ဖွယ်မြင်ကွင်း(gettyimages)

၎င်းလေယာဉ်ပျက်ကျမှုအား နိုင်ငံတကာ ဥပဒေများအောက်တွင် စုံစမ်းစစ်ဆေးရန် ဖိတ်ကြားခံရမည်ဆိုပါက ရုရှားဦးဆောင်သည့် စုံစမ်းစစ်ဆေးမှုကို ပူးပေါင်းပါဝင်မည်ဟု ဘရာဇီး၏ လေကြောင်း မတော်တဆမှု တားဆီးရေးနှင့် သုတေသနစင်တာ (CENIPA) က ပြောကြားခဲ့သည်။ 

သို့သော် ရုရှား၏ လေကြောင်းအာဏာပိုင်အဖွဲ့မှ CENIPA ကို ဖိတ်ကြားခဲ့ခြင်းမရှိခဲ့ဘဲ သြဂုတ် ၂၃ ရက်က ဖြစ်ပွားခဲ့သည့် Embraer Legacy 600 လေယာဉ်ပျက်ကျမှုနောက်ကွယ်၌ ရုရှားအစိုးရ ရှိနေနိုင်သည်ဟု အမေရိကန်နှင့် အခြား အနောက်နိုင်ငံများမှ အစိုးရများက သံသယရှိနေကြသည်။

ရုရှားအစိုးရအနေဖြင့် ထိုလေယာဉ်ပျက်ကျမှုတွင် ပါဝင်ပတ်သက်ခြင်းမရှိကြောင်း ငြင်းဆိုခဲ့သည်။

ပရီဂေါ့ဇင်သည် ယူကရိန်းစစ်ပွဲအတွင်း ရုရှားစစ်တပ်၏ စွမ်းဆောင်ရည်များအပေါ် လူသိရှင်ကြား ဝေဖန်ခဲ့သူဖြစ်သည်။ 

ဝဂ်နာကြေးစားစစ်သားများသည် ယူကရိန်းစစ်ပွဲတွင် ရုရှားစစ်သားများဘက်မှ ပါဝင်တိုက်ခိုက်ပေးခဲ့သည်။

ပျက်ကျသွားသည့် Embraer Legacy 600 လေယာဉ် အစိတ်အပိုင်းတစ်ခု(gettyimages)

ကနေဒါနိုင်ငံ မွန်ထရီယယ်မြို့ အခြေစိုက် နိုင်ငံတကာ မြို့ပြလေကြောင်း အဖွဲ့ (ICAO) ၏ အဆိုအရ Embraer Legacy 600 လေယာဉ်သည် မော်စကိုမှ စိန့် ပီတာစဘတ်ချ်မြို့သို့ ပျံသန်ချိန်အတွင်း ပျက်ကျခဲ့သဖြင့် ပြည်တွင်းလေကြောင်းခရီးစဉ် ပျက်ကျမှုဖြစ်ကာ နိုင်ငံတကာ ဥပဒေများအရ စုံစမ်းစစ်ဆေးစရာမလိုကြောင်း သိရသည်။

ထိုလေယာဉ်ပျက်ကျမှုကို နိုင်ငံတကာဥပဒေများဖြင့် မဖြစ်မနေ စုံစမ်းစစ်ဆေးရန်မလိုသော်လည်း ရုရှား အနေဖြင့် နိုင်ငံတကာဥပဒေများအောက်တွင် စုံစမ်းစစ်ဆေးမှုများ ပြုလုပ်ရန် ခွင့်ပြုမည်ဆိုပါက မိမိတို့ ပူးပေါင်း ပါဝင်သွားမည်ဟု CENIPA အကြီးအကဲ မာဆယ်လို မိုရီနို (Marcelo Moreno) က ပြောကြားခဲ့သည်။

ရုရှား၏ ပြည်တွင်း စုံစမ်းစစ်ဆေးမှုတွင် ပျက်ကျခဲ့သည့် လေယာဉ်ကို ထုတ်လုပ်ခဲ့သည့် ဘရာဇီးနိုင်ငံ ပါဝင်ခြင်းမရှိခဲ့သဖြင့် မေးခွန်းထုတ်စရာ ဖြစ်နေသည်ဟုလည်း အမေရိကန် လေကြောင်း လုံခြုံရေး အတိုင်ပင်ခံပုဂ္ဂိုလ် ဂျွန်ကော့စ် (John Cox) က ပြောသည်။

CNI International News

ဘန်ကောက်၊ သြဂုတ် ၃၀

ဖခင်ဖြစ်သူ သက်ဆင်ရှင်နာဝပ် (Thaksin Shinawatra) ၏ နှလုံးရောဂါအခြေအနေကို စိုးရိမ်ရကြောင်း သမီးဖြစ်သူ ပေတုန်တန် ရှင်နာဝပ် (Paetongtarn Shinawatra) က သြဂုတ် ၃၀ ရက်တွင် ပြောကြားခဲ့သည်ဟု ဘန်ကောက်ပို့စ်တွင် ဖော်ပြခဲ့သည်။

သို့သော် သက်ဆင်အနေဖြင့် ပုဂ္ဂလိကဆေးရုံသို့ ပြောင်းရွှေ့မည် မဟုတ်ဘဲ ရဲတပ်ဖွဲ့ အထွေထွေ ဆေးရုံတွင်သာ ဆက်လက် ကုသမှုခံယူမည်ဟုလည်း သမီးဖြစ်သူ ပေတုန်တန်က ပြောသည်။

ပေတုန်တန်သည် သြဂုတ် ၂၉ ရက် နံနက်ပိုင်းက ရဲတပ်ဖွဲ့ဆေးရုံရှိ သက်ဆင်ဆီသို့ နောက်တစ်ကြိမ် သွားရောက် ခဲ့သည်။ 

ထို့နောက် ဖြူးထိုင်းပါတီဌာနချုပ်၌ သတင်းထောက်များနှင့် တွေ့ဆုံခဲ့ချိန်တွင် ဖခင်သည် မောပန်းနွမ်းနယ်နေ သော်လည်း ၎င်းအား စကားပြန်ပြောနိုင်ကြောင်း ပြောကြားခဲ့သည်။

ပြည်တော်ပြန် ရောက်ရှိလာသည့် သက်ဆင်အား တွေ့ရစဉ်(AP)

"အဖေ့ရဲ့ နှလုံးရောဂါကို ကျွန်မ စိုးရိမ်မိပါတယ်။ သူ့မှာ အဆုတ်ရောဂါလည်း ရှိနေပါတယ်။ ဒါပေမယ့် အဲဒါဟာ အရင်က ဖြစ်ခဲ့တဲ့ ရောဂါဖြစ်ပြီး အရမ်းမဆိုးပါဘူး။ နှလုံးရောဂါကို ကျွန်မ ပိုပြီး စိုးရိမ်ပါတယ်"ဟု ပေတုန်တန်က ပြောသည်။ 

သက်ဆင်သည် ထိုင်းသို့ ပြန်လည်ရောက်ရှိခဲ့ချိန်ကတည်းက ပင်ပန်းနေပြီး စိတ်ဖိစီးမှုကို ခံစားခဲ့ရကြောင်းလည်း ၎င်းက ဆက်လက်ပြောကြားသည်။

သက်ဆင်သည် အစောပိုင်းက Covid-19 ကူးစက်ခံခဲ့ရပြီး ဆေးဝါးကုသမှုခံယူခဲ့ရကြောင်း၊ ကိုဗစ်ကူးစက်ခံခဲ့ရ ချိန်တွင် သက်ဆင်သည် ဆေးရုံ၏ အထူးကြပ်မတ်ကုသဆောင်၌ ၉ ရက်ကြာ ကုသမှုခံယူခဲ့ရပြီး ဆေးရုံတွင် တစ်လနေခဲ့ရကြောင်းနှင့် လက်ရှိအချိန်အထိ သက်ဆင်၏ အဆုတ်သည် ကိုဗစ်ကြောင့် ထိခိုက်မှုများ ရှိနေဆဲ ဖြစ်ကြောင်း ပေတုန်တန်ကပြောကြားခဲ့သည်။ 

သက်ဆင်၏ စိတ်ပိုင်းဆိုင်ရာ အခြေအနေသည် ကြံ့ခိုင်နေဆဲဖြစ်ပြီး မိမိနှင့် တွေ့ရှိချိန်တွင် အလွန် ပျော်ရွှင်နေ ကြောင်းနှင့် ပုဂ္ဂလိကဆေးရုံသို့ ပြောင်းရွှေ့ရန် အစီအစဉ်မရှိဘဲ ရဲတပ်ဖွဲ့ဆေးရုံမှာပင် ဆက်လက် ကုသမှု ခံယူမည်ဖြစ်ကြောင်း ပေတုန်တန်က ပြောသည်။

နိုင်ငံရေးသမားတစ်ဦးဖြစ်သူ သီရိဆုဝမ် ဂျန်ယာအား တွေ့ရစဉ် (Thai PBS)

သက်ဆင်အနေဖြင့် ထိုင်းဘုရင်ထံမှ တော်ဝင်လွတ်ငြိမ်းချမ်းသာခွင့်ရရှိရန် တောင်းဆိုမည် ဟုတ်၊ မဟုတ် သတင်းထောက်များမှ မေးမြန်းရာတွင် လွတ်ငြိမ်းချမ်းသာခွင့်နှင့်ပတ်သက်၍ ဖခင်ဖြစ်သူ ကိုယ်တိုင်ဆုံးဖြတ် လိမ့်မည်ဖြစ်ကြောင်းနှင့် ၎င်း၏ ဆုံးဖြတ်ချက်အတိုင်း မိသားစုက သဘောတူကြောင်း ပြန်လည်ဖြေကြားခဲ့ သည်။

သက်ဆင်၏ ကျန်းမာရေးအခြေအနေသည် အမှန်တကယ် စိုးရိမ်ရခြင်း ရှိ၊ မရှိနှင့် အကျဉ်းထောင်တွင် မဟုတ်ဘဲ ဆေးရုံတွင် ကုသမှုခံယူရန် သင့်၊ မသင့်ကို စုံစမ်းစစ်ဆေးပေးရန် အစိုးရက ခန့်ထားသော အရာရှိထံ (Ombudsman) လျှောက်ထားစာ တင်သွင်းရန် စီစဉ်နေသည်ဟု နိုင်ငံရေးသမားတစ်ဦးဖြစ်သူ သီရိဆုဝမ် ဂျန်ယာ (Srisuwan Janya) က ပြောကြားခဲ့သည်။

ထို့အပြင် ၎င်းတင်သွင်းမည့် လျှောက်ထားစာထဲတွင် အစိုးရဌာနများအပေါ် မကျေနပ်ချက်များအားလည်း စုံစမ်းတင်ပြရန်ဆိုသည့်အချက်လည်း ပါရှိကြောင်း သိရသည်။

သက်ဆင်သည် ပြည်ပြေး ဘဝဖြင့် ၁၅ နှစ်ကြာ ပြည်ပတွင် နေထိုင်ခဲ့ပြီးနောက် သြဂုတ် ၂၂ ရက်တွင် ထိုင်းနိုင်ငံသို့ ပြန်လည်ရောက်ရှိခဲ့ခြင်းဖြစ်သည်။ 

ထိုင်းသို့ ပြန်ရောက်သည့်နေ့မှာပင် တရားရုံးချုပ်က သက်ဆင်ကို ဆင့်ခေါ်ကာ ပြစ်မှုဆိုင်ရာ စွဲချက်များနှင့် ပတ်သက်၍ ထောင်ဒဏ် ၈ နှစ်ချမှတ်ခံခဲ့ရသည်။

သက်ဆင် ထောင်ဒဏ်ကျခံရသည့် ညမှာပင် သွေးတိုးရောဂါနှင့် အခြားရောဂါ ဝေဒနာများကြောင့် Bangkok Remand အကျဉ်းထောင်မှ ရဲတပ်ဖွဲ့ဆေးရုံသို့ ပြောင်းရွှေ့ပြီး ဆေးဝါးကုသမှု ခံယူခဲ့ရခြင်းဖြစ်သည်။

Source: ဘန်ကောက်ပို့

CNI International News

ဆိုးလ်၊ သြဂုတ် ၃၀

မြောက်ကိုရီးယားစစ်တပ်အနေဖြင့် အမေရိကန်ဦးဆောင်သည့် ကျူးကျော်ရေး အစီအစဉ်များကို ချေမှုန်းရေးအတွက် အသင့်ပြင်ထားရန် မြောက်ကိုရီးယားခေါင်းဆောင်ကင်မ်ဂျုံအန် (Kim Jong-Un) က တိုက်တွန်းခဲ့ကြောင်း အေပီ သတင်းတွင် ဖော်ပြခဲ့သည်။

အမေရိကန်၊ တောင်ကိုရီးယားနှင့် ဂျပန်တို့သည် မြောက်ကိုရီးယား၏ နျူကလီးယားခြိမ်းခြောက်မှုကို ရင်ဆိုင်ရန် သုံးပွင့်ဆိုင် ရေတပ် စစ်ရေးလေ့ကျင့်မှုများ ပြုလုပ်နေချိန်တွင် ကင်မ်၏ တိုက်တွန်းချက် ထွက်ပေါ်ခဲ့ခြင်း ဖြစ်သည်ဟု နိုင်ငံပိုင် KCNA သတင်းအေဂျင်စီက ဖော်ပြထားသည်။ 

အမေရိကန်နှင့် တောင်ကိုရီးယား စစ်တပ်များသည် ပြီးခဲ့သည့် သီတင်းပတ်ကတည်းက သီးခြားစစ်ရေး လေ့ကျင့်မှုအား ပြုလုပ်ခဲ့ခြင်းဖြစ်သည်။

မြောက်ကိုရီးယားအနေဖြင့် ၎င်း စစ်ရေးလေ့ကျင့်မှုများသည် ကျူးကျော်ရန် အစမ်းလေ့ကျင့် ပြင်ဆင်နေခြင်း ဖြစ်သည်ဟု ရှုမြင်ထားပြီး အမေရိကန်ကမူ ၎င်းတို့၏ စစ်ရေးလေ့ကျင့်မှုများသည် ခုခံရေးအတွက်သာ ဖြစ်သည်ဟု ပြောသည်။

ကင်မ်သည် သြဂုတ် ၂၈ ရက်တွင် ကျရောက်သည့် မြောက်ကိုရီးယားတပ်မတော်၏ ရေတပ်နေ့ အထိမ်းအမှတ် အခမ်းအနားအဖြစ် မိန့်ခွန်းပြောကြားရာတွင် အမေရိကန်ဦးဆောင်သည့် ရန်လိုမှုများကြောင့် ကိုရီးယား ကျွန်းဆွယ်၏ ကမ်းလွန်ရေပြင်များသည် နျူကလီးယားစစ်ပွဲဖြစ်ပွားမည့် အန္တရာယ်နှင့်အတူ တည်ငြိမ်မှု ယိုယွင်းလာသည်ဟု ပြောကြားခဲ့သည်။

တောင်ကိုရီးယားစစ်တပ် အထူးစစ်ဆင်ရေးကွပ်ကဲမှု အဖွဲ့ဝင်အချို့ကိုတွေ့ရစဉ်(AP)

အမေရိကန်သည် မကြာသေးမီက ကိုရီးယားကျွန်းဆွယ်အနီးရှိ ရေပြင်များတွင် အင်အားကြီးမားသည့် စစ်လက်နက်ပစ္စည်းများကို ဖြန့်ကြက်ချထားခဲ့သည်ဟုလည်း ကင်မ်က ပြောကြားခဲ့သည်။

မကြာသေးမီက အမေရိကန်၊ ဂျပန်နှင့် တောင်ကိုရီးယားတို့ သုံးပွင့်ဆိုင်အစည်းအဝေးပြုလုပ်ခဲ့ပြီး မြောက်ကိုရီးယား၏ နျူကလီးယားအစီအစဉ်ကို တန်ပြန်ရေးအတွက် ကာကွယ်ရေး ပူးပေါင်းဆောင်ရွက်မှု များကို မြှင့်တင်ရန်သဘောတူညီခဲ့ကြသည်။

သို့သော် ကင်မ်က အမေရိကန်သမ္မတ ဂျိုးဘိုင်ဒန် (Joe Biden) ၊ တောင်ကိုရီးယားသမ္မတ ယွန်ဆော့ခ်ယွဲ (Yoon Suk Yeol) နှင့် ဂျပန်ဝန်ကြီးချုပ် ဖူမီယို ကီရှီဒါ (Fumio Kishida) တို့သည် လူဆိုးဂိုဏ်းခေါင်းဆောင်များ ဖြစ်သည်ဟု ပြောကြားခဲ့သည်။

ကင်မ်ဂျုံအန်နှင့် သမီးဖြစ်သူတို့ ရေတပ်ဌာနချုပ်သို့ သွားရောက်စဉ်(AP)

"လက်ရှိဖြစ်ပေါ်နေတဲ့ အခြေအနေအရ ကျွန်တော်တို့ ရေတပ်ဟာ စစ်ပွဲအတွက် စဉ်ဆက်မပြတ် တပ်လှပ် နှိုးဆော်ထားမှုအခြေအနေကို ထိန်းသိမ်းထားဖို့လိုအပ်ပြီး ရန်သူတွေရဲ့ စစ်ရေးဆန္ဒကို ရိုက်ချိုးဖို့ အသင့်ပြင် ထားရပါလိမ့်မယ်"ဟု ကင်မ်က ပြောသည်။

သြဂုတ် ၂၉ ရက်တွင် တောင်ကိုရီးယား၊ အမေရိကန်နှင့် ဂျပန်နိုင်ငံများသည် တောင်ကိုရီးယား၏ ဂျယ်ဂျူကျွန်း ကမ်းလွန်ရေပြင်များတွင် စစ်ရေးလေ့ကျင့်မှုများ ပြုလုပ်ခဲ့ပြီး အဆိုပါ စစ်ရေးလေ့ကျင့်မှုများတွင် သုံးနိုင်ငံလုံး၏ ရေတပ်များမှ ဖျက်သင်္ဘောများလည်း ပါဝင်ခဲ့သည်။

Source: အေပီ

CNI International News

ဝါရှင်တန်၊ သြဂုတ် ၃၀ 

ရုရှားသည် အမေရိကန်၏ သံရုံးဝန်ထမ်းများအား ခြိမ်းခြောက်ရန်ကြိုးပမ်းနေသည်ဟု အမေရိကန်က စွပ်စွဲခဲ့ကြောင်း အယ်လ်ဂျာဇီးယားတွင် ဖော်ပြခဲ့သည်။

အမေရိကန် ကောင်စစ်ဝန်ရုံး၏ ဝန်ထမ်းဟောင်းတစ်ဦးသည် အမေရိကန်ကိုယ်စား ယူကရိန်းစစ်ပွဲနှင့် ပတ်သက်သော သတင်းအချက်အလက်များအား စုဆောင်းမှုဖြင့် ဖမ်းဆီးထိန်းသိမ်းခံရကြောင်း ရုရှားနိုင်ငံပိုင် မီဒီယာက ဖော်ပြခဲ့ပြီးနောက်တွင် ယခုကဲ့သို့ အမေရိကန်၏ စွပ်စွဲချက်ထွက်ပေါ်ခဲ့ခြင်းဖြစ်သည်။

ရုရှားနိုင်ငံသားဖြစ်သည့် ရောဘတ် ရှိုနော့ဗ် (Robert Shonov) အမည်ရှိ အမျိုးသားသည် ယူကရိန်းစစ်ပွဲအတွက် ရုရှား၏ စစ်မှုထမ်းဥပဒေနှင့် ပတ်သက်သည့် အချက်အလက်များအား မော်စကိုမြို့တော်ရှိ အမေရိကန်သံရုံးသို့ ထောက်ပံ့ပေးခဲ့သည်ဟု ရုရှား၏ FSB ထောက်လှမ်းရေးအဖွဲ့က ပြောကြားခဲ့ကြောင်း ရုရှားနိုင်ငံပိုင် တာ့စ် သတင်းဌာနက ဖော်ပြခဲ့သည်။

ဖမ်းဆီးခံထားရသည့် မစ္စတာရောဘတ် ရှိုနော့ဗ်အား တွေ့ရစဉ်(The Moscow Times)

၎င်းလုပ်ဆောင်မှုကြောင့် ရုရှားတွင် ကျင်းပမည့် ၂၀၂၄ ခုနှစ် သမ္မတရွေးကောက်ပွဲမတိုင်မီ နိုင်ငံအတွင်း၌ နိုင်ငံရေးအရ သဘောထားကွဲလွဲမှုများကို ဖြစ်ပွားစေခဲ့သည်ဟု ရုရှားအာဏာပိုင်များက ပြောသည်။

မစ္စတာ ရှိုနော့ဗ်ကို ပြည်ပနိုင်ငံနှင့် လျှို့ဝှက်ပူးပေါင်းဆောင်ရွက်မှုဖြင့် တရားစွဲဆိုထားပြီး ပြစ်မှုထင်ရှားကြောင်း စီရင်ခံရမည်ဆိုပါက ထောင်ဒဏ် ၈ နှစ်အထိ ချမှတ်ခံရနိုင်သည်။

FSB ဌာနချုပ်ရှေ့တွင် အမျိုးသားများ လမ်းလျှောက်နေကြစဉ်(AFP)

လျှို့ဝှက်ပူးပေါင်းဆောင်ရွက်မှုဆိုသည့် ခေါင်းစဉ်အောက်တွင် ရှိုနော့ဗ်ကို ပစ်မှတ်ထား ဖမ်းဆီးခြင်းသည် ရုရှားအစိုးရအနေဖြင့် ၎င်း၏နိုင်ငံသားများကိုပင် ဖိနှိပ်နေသည့် လုပ်ရပ်အား ဖော်ပြရာ ရောက်ကြောင်း အမေရိကန် နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မက်သရူး မီလာ (Matthew Miller) က သြဂုတ် ၂၈ ရက်တွင်ပြောကြားခဲ့သည်။

ရှိုနော့ဗ်သည် ရုရှား၏ တင်းကျပ်သည့် တရားဥပဒေနှင့်အညီ မော်စကိုရှိ အမေရိကန်သံရုံးအား ဝန်ဆောင်မှု ပေးခဲ့ခြင်းဖြစ်သည်ဟု မီလာက ပြောသည်။

အမေရိကန် နိုင်ငံခြားရေးဝန်ကြီးဌာန၏ ပြောရေးဆိုခွင့်ရှိသူ မက်သရူး မီလာ

"ရုရှား ထောက်လှမ်းရေးအဖွဲ့ရဲ့ ကြိုးပမ်းမှုတွေကို ကျွန်တော်တို့ ပြင်းထန်စွာ ဆန့်ကျင်ပါတယ်။ ဒါ့အပြင် ကျွန်တော်တို့ ဝန်ထမ်းတွေကို ခြိမ်းခြောက်ပြီး နှောင့်ယှက်တဲ့ ရုရှား နိုင်ငံပိုင် မီဒီယာကိုလည်း ဆန့်ကျင်ကန့်ကွက်ပါတယ်"ဟု မီလာက အစီရင်ခံစာ ထုတ်ပြန်ခဲ့သည်။

ထို့နောက် ရှိုနော့ဗ်၏ အမှုနှင့်ဆက်နွှယ်ပြီး FSB ထောက်လှမ်းရေးအဖွဲ့သည် မော်စကိုမြို့တော်ရှိ အမေရိကန်သံရုံးတွင် အလုပ်လုပ်နေသည့် သံတမန်နှစ်ဦးကိုလည်း ဆင့်ခေါ်ကြောင်း ကြားသိခဲ့ရသည်ဟု မီလာက ထပ်လောင်းပြောကြားခဲ့သည်။

ရှိုနော့ဗ်သည် ရုရှားနိုင်ငံအရှေ့ပိုင်း ဗလာဒီဗော့စ်တော့ခ် (Vladivostok) မြို့ရှိ အမေရိကန် ကောင်စစ်ဝန်ရုံး၌ ၂၅ နှစ်ကြာ အလုပ်လုပ်ခဲ့ပြီး မေလကတည်းက ဖမ်းဆီးခံခဲ့ရခြင်းဖြစ်သည်။

Source:အယ်လ်ဂျာဇီးယား

CNI International News

ဟာရာရီ ၊ သြဂုတ် ၂၉

ဇင်ဘာဘွေနိုင်ငံတွင် သမ္မတ အီမာဆန် မန်ဂါဝါ(Emmerson Mnangagwa)သည် သမ္မတရွေးကောက်ပွဲ၌ အနိုင် ရရှိကြောင်း ကြေညာခဲ့ပြီး နောက် ထိုရွေးကောက်ပွဲအတွင်း ဗြောင်ကျပြီး ကြီးမားသည့် အမှားအယွင်းများ ရှိခဲ့ ကြောင်း အတိုက်အခံ ခေါင်းဆောင်က စွပ်စွဲခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။ 

နိုင်ငံတကာမှ ရွေးကောက်ပွဲ လေ့လာစောင့်ကြည့် သူများကလည်း ဇင်ဘာဘွေ သမ္မတရွေးကောက်ပွဲတွင် မဲဆန္ဒ ရှင်များကို ခြိမ်းခြောက်သည့် အခြေအနေများရှိခဲ့ကြောင်း သတင်းထုတ်ပြန်ခဲ့သည်။

သြဂုတ် ၂၅ ရက် နှောင်းပိုင်းတွင် ဇင်ဘာဘွေရွေးကောက်ပွဲ ကော်မရှင် (ZEC) က အသက် ၈၀ အရွယ် မန်ဂါဝါ သည် ရွေးကောက်ပွဲ၌ မဲရလဒ် ၅၂ ဒသမ ၆ ရာခိုင်နှုန်းဖြင့် ဒုတိယသက်တမ်းကို အနိုင်ရခဲ့ကြောင်း ကြေညာခဲ့ သည်။ 

ထို့ပြင် အတိုက်အခံပါတီဖြစ်သည့် (CCP) ပါတီ၏ ကိုယ်စားလှယ်လောင်းဖြစ်သူ နယ်လ်ဆင် ချာမီဆာ (Nelson Chamisa) သည် မဲရလဒ် ၄၄ ရာခိုင်နှုန်း ရရှိကြောင်း ရွေးကောက်ပွဲကော်မရှင်က ကြေညာခဲ့သည်။

ဇင်ဘာဘွေသမ္မတ အီမာဆန် မန်ဂါဝါကို တွေ့ရစဉ်

ချာမီဆာကမူ အတိုက်အခံများအနေနှင့် ရွေးကောက်ပွဲရလဒ်များကို အတည်မပြုကြောင်း၊ တိကျသည့် စိစစ် အတည်ပြုချက်များမရှိဘဲ မဲရလဒ်ကို ကြေညာခဲ့ခြင်း ဖြစ်သည်ဟု ပြောကြားခဲ့သည်။ 

"သူတို့ဟာ သင်တို့ရဲ့ ဆန္ဒနဲ့ မဲတွေကို ခိုးယူသွားခဲ့ပါတယ်။ ဒါပေမယ့် သင့်ရဲ့ မျှော်လင့်ချက်ကိုတော့ ဘယ်တော့မှ ခိုးယူလို့ မရပါဘူး"ဟု ချာမီဆာက ယခင်က Twitter ဟု လူသိများသည့် X လူမှုမီဒီယာတွင် ရေးသားဖော်ပြခဲ့ သည်။ 

မန်ဂါဝါသည် သမ္မတနန်းတော်မှ အမှာစကား ပြောကြားခဲ့ရာတွင် အတိုက်အခံများ၏ စွပ်စွဲချက်များကို ငြင်းဆို ခဲ့ပြီး သူ့ကို စွပ်စွဲခဲ့သူများအား အရေးယူမည်ဖြစ်ကြောင်း သတိပေးခဲ့သည်။

ဇင်ဘာဘွေတွင် သြဂုတ် ၂၃ ရက်နှင့် သြဂုတ် ၂၄ ရက်၌ ရွေးကောက်ပွဲ ကျင်းပခဲ့သည်။

အဆိုပါ ရွေးကောက်ပွဲသည် ဇင်ဘာဘွေနိုင်ငံကို ၄၃ နှစ်ကြာ အုပ်ချုပ်ခဲ့သည့် မန်ဂါဝါ၏ ZANU-PF ပါတီအပေါ် လူထု၏ ထောက်ခံမှုကို စမ်းသပ်ချက် တစ်ခုဖြစ်ခဲ့သည်။

မဲဆန္ဒရှင်များကို ခြိမ်းခြောက်သည်ဟု သတင်းထုတ်ပြန်ခဲ့သည့် ရွေးကောက်ပွဲ လေ့လာစောင့်ကြည့်သူများအား ဖမ်းဆီးမှု၊ မဲဆန္ဒရှင်များအား ခြိမ်းခြောက်မှု၊ အကြမ်းဖက် ခြိမ်းခြောက်မှု၊ နှောင့်ယှက်မှုနှင့် အကြပ်ကိုင်မှုများနှင့် ပတ်သက်ပြီး ထွက်ပေါ်နေသည့် သတင်းများအပေါ် စိုးရိမ်ကြောင်း ကုလသမဂ္ဂ အတွင်းရေးမှူးချုပ် အန်တိုနီယို ဂူတာရက်စ် (Antonio Guterres) က ပြောကြားခဲ့သည်။

Source: အယ်လ်ဂျာဇီးယား