- By CNI
- Category: နိုင်ငံရေး
- Hits: 714
CNI International News
ဘေဂျင်း၊ စက်တင်ဘာ ၁၆
ထိုင်ဝမ်အရေးနှင့်ပတ်သက်၍ ကမ္ဘာပေါ်တွင် မည်သည့်နိုင်ငံမျှ စီရင်ဆုံးဖြတ်ပိုင်ခွင့် မရှိသလို တရုတ်နိုင်ငံ အနေ ဖြင့်လည်း ပြည်ပဝင်ရောက်စွက်ဖက်မှုကို သည်းခံနေမည် မဟုတ်ကြောင်း တရုတ်သမ္မတ ရှီကျင့်ဖျင်က ရှန်ဟိုင်း ပူးပေါင်းဆောင်ရွက်ရေးအဖွဲ့ (SCO) ထိပ်သီးအစည်းအဝေးပြင်ပ၌ ရုရှားခေါင်းဆောင် ဗလာဒီမာပူတင်နှင့် သီးခြား တွေ့ဆုံရာ၌ ပြောကြားခဲ့သည်။
စက်တင်ဘာ ၁၅ ရက်၌ ဥဇဘက်ကစ္စတန်နိုင်ငံ၊ ဆမာခန်မြို့တော်သို့ ရှီကျင့်ဖျင် ရောက်ရှိလာခဲ့ပြီးနောက် ပူတင် နှင့် တွေ့ဆုံ၍ ဆွေးနွေးခဲ့သည်။
“ထိုင်ဝမ်လွတ်လပ်ရေးအတွက် ရပ်တည်တဲ့ ခွဲထွက်ရေး အင်အားစုတွေကို တရုတ်က ပြင်းပြင်းထန်ထန် ဆန့်ကျင် ပါတယ်။ ပြည်ပ ဝင်ရောက် စွက်ဖက်မှုကိုလည်း ဆန့်ကျင်ပါတယ်။ ထိုင်ဝမ်အရေးမှာ ဘယ်နိုင်ငံကမျှ တရား သူကြီးလုပ်ပြီး စီရင်ဆုံးဖြတ်ပိုင်ခွင့် မရှိပါဘူး” ဟု ရှီကျင့်ဖျင်က အတိအလင်း ပြောကြားခဲ့သည်။
ပူတင်နဲ့ရှီကျင့်ဖျင် ဆွေးနွေးနေစဉ် (AP)
ရုရှားသမ္မတ ပူတင်နှင့် တရုတ်သမ္မတ ရှီကျင့်ဖျင်တို့သည် ၂၄ ကြိမ်မြောက် ဆောင်းရာသီ (ဘေဂျင်း) အိုလံပစ် အားကစားပြိုင်ပွဲ ဖွင့်ပွဲ အခမ်းအနား ကျင်းပခဲ့သည့် လွန်ခဲ့သော ဖေဖော်ဝါရီလ၌ တစ်ကြိမ် တွေ့ဆုံခဲ့ကြပြီး ဖြစ်သည်။
ချန်ကေရှိတ် (၁၈၈၇-၁၉၄၅) ဦးဆောင်သော လက်ကျန် ကူမင်တန်တပ်ဖွဲ့များ တရုတ်ပြည်တွင်းစစ်၌ အရေးနိမ့်ပြီး နောက် ထိုင်ဝမ်ကျွန်းပေါ်သို့ ထွက်ပြေး အခြေစိုက်စဉ်မှစ၍ ထိုင်ဝမ်သည် သီးခြားအုပ်ချုပ်ရေး စတင်ခဲ့သည်။
ထိုကာလမှ အစပြုပြီး ထိုင်ဝမ်ကို တရုတ်ကွန်မြူနစ်များ သိမ်းပိုက်နိုင်ခြင်း မရှိဘဲ ယခင်တရုတ်ပြည်မကြီးရှိ တရုတ်ပြည်သူ့သမ္မတနိုင်ငံ အစိုးရဟောင်း၏အလံနှင့် အခြားသင်္ကေတ သရုပ်လက္ခဏာများကို ကျွန်းပေါ်တွင် ထိန်းသိမ်းထားခဲ့သည်။
ဘေဂျင်းသည် အဆိုပါကျွန်းကို ၎င်း၏ပြည်နယ် အစိတ်အပိုင်း တစ်ခုအဖြစ် မှတ်ယူထားပြီး ရုရှား အပါအဝင် နိုင်ငံအများစုက ထောက်ခံထားကြောင်း တာ့စ်သတင်းဌာနက ရေးသားဖော်ပြထားသည်။
Source: တာ့စ်သတင်းဌာန
- By CNI News
- Category: နိုင်ငံရေး
- Hits: 649
CNI International News
၂၀၂၂ ခုနှစ်၊ စက်တင်ဘာ ၁၅
ရုရှားသမ္မတ ဗလာဒီမာပူတင်သည် တရုတ်ခေါင်းဆောင် ရှီကျင့်ဖျင်ကို စက်တင်ဘာ ၁၅ ရက်က တွေ့ဆုံရာတွင် ယူကရိန်း အကျပ်အတည်းသို့ ၎င်း၏ ဟန်ချက်ညီညီ ချဉ်းကပ်မှုအတွက် ကျေးဇူးတင်ရှိကြောင်း ပြောကြားခဲ့သည် ဟု အေပီက ရေးသားဖော်ပြသည်။
ထို့နောက် စစ်မြေပြင်တွင် မော်စကိုအတွက် ကြီးမားသော အရှုံးနှင့်ရင်ဆိုင်ရပြီးနောက် ကျင်းပသည့် ယခု အစည်းအဝေး၌ ဝါရှင်တန်၏ မလိုလားအပ်သော မူဝါဒများကို ပူတင်က အပြစ်တင် ဝေဖန်ခဲ့သည်။
ဥဇဘက်ကစ္စတန်တွင် ရှီနှင့် ဆွေးနွေးမှု အစပိုင်း၌ ရုရှားသမ္မတ ပူတင်က "ယူကရိန်းနှင့်ပတ်သက်၍ တရုတ် နိုင်ငံ၏ စိုးရိမ်နေမှုများကို လျော့ကျစေရန် ကြိုးပမ်းနေသည်"ဟု ပြောကြားခဲ့သည်။
ရုရှားသမ္မတ ပူတင်(AP)
"ယူကရိန်း အကျပ်အတည်းနှင့် ဆက်စပ်ပြီးတော့ ကျွနှ်ပ်တို့ တရုတ်မိတ်ဆွေတွေရဲ့ မျှတတဲ့ ရပ်တည်ချက်ကို ကျွနှ်ပ် အင်မတန်ကျေးဇူးတင်ပါတယ်" ဟု ပူတင်က စားပွဲရှည်ကြီးတစ်ခုတွင် ရှီကို မျက်နှာချင်းဆိုင် ကြည့်ရင်း ပြောကြားခဲ့သည်။
"အဆွေတော်ရဲ့ မေးခွန်းတွေနဲ့ ဒီကိစ္စမှာ အဆွေတော်ရဲ့ စိုးရိမ်ပူပန်မှုတွေကို ကျွနှ်ပ်တို့ နားလည်ပါတယ်။ စောစောက ပြောထားပြီးသားဖြစ်ပေမဲ့ ဒီနေ့ အစည်းအဝေးမှာ ဒီပြဿနာအပေါ် ကျွနှ်ပ်တို့ရဲ့ ရပ်တည်ချက်ကို အသေးစိတ် ရှင်းပြပေးမှာပါ" ဟု ပူတင်က ဆက်လက် ပြောကြားခဲ့သည်။
တရုတ်သမ္မတရှီကျင့်ဖျင်(AP)
၎င်းတို့နှစ်ဦးသည် အိန္ဒိယ၊ ပါကစ္စတန်နှင့် အာရှအလယ်ပိုင်းဒေသရှိ ဆိုဗီယက်နိုင်ငံဟောင်း ၄ နိုင်ငံတို့ ပါဝင်သော ရှန်ဟိုင်းပူးပေါင်းဆောင်ရွက်ရေးအဖွဲ့(SCO)၏ အစည်းအဝေးပြင်ပတွင် သီးခြား တွေ့ဆုံခဲ့ကြခြင်းဖြစ်သည်။
အဆိုပါ ရှန်ဟိုင်းမဟာမိတ်အဖွဲ့သည် အမေရိကန်၏ လွှမ်းမိုးမှုကို တန်ပြန်ရန် ဖွဲ့စည်းထားသည်။
- By CNI
- Category: နိုင်ငံရေး
- Hits: 549
CNI International News
ကိယက်ဗ်၊ စက်တင်ဘာ ၁၅
ယူကရိန်းသမ္မတ ဗိုလိုဒီမီယာ ဇာလန်းစကီးသည် စက်တင်ဘာ ၁၄ ရက်၌ ၎င်းစီးနင်းလာသော မော်တော်ယာဉ် မတော်တဆမှု ဖြစ်ပွားခဲ့သော်လည်း ပြင်းထန်စွာ ဒဏ်ရာမရဘဲ အန္တရာယ်မရှိခဲ့ကြောင်း CNN သတင်းအရ သိရသည်။
“ယူကရိန်းသမ္မတ စီးလာတဲ့ကားနဲ့ သူ့သက်တော်စောင့်တွေ စီးလာတဲ့ကား ငြိကြတာပါ” ဟု သမ္မတရုံးမှ တာဝန်ရှိသူတစ်ဦးက ပြောသည်။
ဇာလန်းစကီးနှင့်အတူ လိုက်ပါစီးနင်းလာသည့် ဆရာဝန်က အခင်းဖြစ်ပွားစဉ် ယာဉ်မောင်းကို အရေးပေါ် ပြုစုခဲ့ ပြီးနောက် လူနာတင်ယာဉ်ပေါ် လွှဲပြောင်းပေးခဲ့ကြောင်း သမ္မတရုံး သတင်းထုတ်ပြန်ချက်ထဲတွင် ဖော်ပြထား သည်။
“သမ္မတကို ဆရာဝန်က စစ်ဆေးကြည့်တော့ ဒဏ်ရာပြင်းထန်တာ မတွေ့ရပါဘူး” ဟု ၎င်းထုတ်ပြန်ချက်အရ သိရသည်။
ယဉ်မတော်တမှုမှာ ကိယက်ဗ်မြို့တော်တွင် ဖြစ်ပွားခဲ့ပြီး ယူကရိန်းအာဏာပိုင်များက အခင်းဖြစ်ပွားသည့် အခြေအနေများကို စုံစမ်းစစ်ဆေးလျက်ရှိသည်။
စက်တင်ဘာ ၁၄ ရက် အစောပိုင်းတွင် ဇာလန်းစကီးသည် ခါကိဗ်ဒေသ၊ အရှေ့မြောက်ပိုင်းရှိ အီဇီယွန်မြို့ငယ်ကို ရုရှားလက်မှ ယူကရိန်း ပြန်သိမ်းနိုင်ခဲ့ပြီး နောက် ၅ ရက်အကြာ သွားရောက်ကြည့်ရှုခဲ့သည်။
ယူကရိန်းတပ်ဖွဲ့ကို နှုတ်ဆက်နေတဲ့ ဇာလန်းစကီး (ယူကရိန်းကာကွယ်ရေးဌာန)
အဆိုပါမြို့ရှိ မြို့ပြအုပ်ချုပ်ရေး အဆောက်အအုံတစ်ခုရှေ့ ပင်မရင်ပြင်တွင် ယူကရိန်းအလံ လွှင့်တင်သည့် အခမ်းအနားသို့ ဇာလန်းစကီး တက်ရောက်နေသည့် မှတ်တမ်းဓာတ်ပုံများကို ယူကရိန်းတပ်ဖွဲ့ တစ်ဖွဲ့၏ ဖေ့စ်ဘွတ်ခ် စာမျက်နှာတွင် ဖော်ပြထားသည်။
အဆိုပါ အခမ်းအနားသို့ ယူကရိန်း ကာကွယ်ရေး ဒုတိယဝန်ကြီး ဟန်နာမာလီယာလည်း တက်ရောက်ခဲ့သည်။
“အရင်က မျှော်ကြည့်စရာ ကောင်းကင်ပြာကို ကျနော် အမြဲရှာတတ်တယ်။ ဒီကနေ့တော့ ကျနော် မျှော်ကြည့် စရာဟာ ယူကရိန်းအလံပါ” ဟု ဇာလန်းစကီးက သမ္မတ၏တယ်လီဂရမ်ချန်နယ် ပို့စ်တစ်ခုတွင် ပြောကြားခဲ့သည်။
“ကျနော်တို့ရဲ့ အပြာရောင်နဲ့အဝါရောင်အလံဟာ သိမ်းပိုက်ခံခဲ့ရဖူးတဲ့ အီဇယွန်ရဲ့ ကောင်းကင်ယံမှာ လွင့်ပျံနေပြီ ဖြစ်ပါတယ်။ ယူကရိန်းမြို့တိုင်းနဲ့ ရွာတိုင်းလည်း အဲဒီလိုပါပဲ။ ကျနော်တို့ဟာ ရှေ့ဆက်အောင်ပွဲခံဖို့ တစ်ခုတည်း သော ဦးတည်ရာကို ရွေ့လျားနေပါပြီ” ဟု ၎င်းက ဆက်လက် ပြောကြားခဲ့သည်။
ပြီးခဲ့သည့် ဖေဖော်ဝါရီလ ကျူးကျော်စစ် စတင်ပြီးနောက် ရုရှားတို့က ခါကိဗ်ဒေသ၊ ဒွန်နက်စ်မြစ်ကမ်းပေါ်ရှိ အီဇယွန်မြို့ကို သိမ်းပိုက်ခဲ့သော်လည်း ယခု စက်တင်ဘာ ၁၀ ရက်တွင် ယူကရိန်းတပ်က ပြန်လည် သိမ်းပိုက် နိုင်ခဲ့သည်။
Source: CNN
- By CNI
- Category: နိုင်ငံရေး
- Hits: 562
CNI International News
နယူးဒေလီ၊ စက်တင်ဘာ ၁၅
ရုရှားနှင့်အိန္ဒိယကြား စစ်ရေးနည်းပညာ ပူးပေါင်းဆောင်ရွက်မှုသည် လိုအပ်ချက် အသစ်များနှင့်အညီ တဖြည်းဖြည်း တိုးတက်လာနေပြီဟု အိန္ဒိယနိုင်ငံဆိုင်ရာ ရုရှားသံအမတ် ဒီနစ်အလီပေါ့ဗ်က စက်တင်ဘာ ၁၄ ရက်တွင် ပြောကြားခဲ့ကြောင်း တာ့စ်သတင်းဌာနက ရေးသားဖော်ပြသည်။
“လိုအပ်ချက် အသစ်တွေနဲ့အညီ ဒီနယ်ပယ်မှာ ကျနော်တို့ ပူးပေါင်းဆောင်ရွက်မှုဟာ တဖြည်းဖြည်း တိုးတက်နေ ပါတယ်” ဟု ၎င်းက တာ့စ်သတင်းဌာနနှင့် အင်တာဗျူးတစ်ခုတွင် ပြောကြားခဲ့သည်။
“ပူးတွဲထုတ်လုပ်မှုနဲ့ အဆင့်မြင့် သုတေသန၊ ဖွံ့ဖြိုးရေးဆိုင်ရာ အလေ့အကျင့်တွေကို ချဲ့ထွင်သွားဖို့ အခွင့်အလမ်း တွေ အများကြီး ကျနော်တို့ မြင်တွေ့နေရပါတယ်” ဟု ၎င်းက ဆက်လက် ပြောကြားခဲ့သည်။
၂၀၁၉ ခုနှစ်က ကျင်းပခဲ့သည့် ဗလာဒီဗော့စတော့မြို့ ထိပ်သီးအစည်းအဝေးမှာ နှစ်နိုင်ငံစလုံးက နည်းပညာ အပို ပစ္စည်းများနှင့် ပြည်တွင်းဖြစ် စစ်လက်နက် ပြုပြင်ထိန်းသိမ်းရေးဆိုင်ရာ သဘောတူညီချက် လက်မှတ် ရေးထိုးခဲ့ ကြသည့်အကြောင်းကို ပြန်ပြောင်း ဆွေးနွေးခဲ့ကြသည်ဟု ရုရှားသံအမတ် ဒီနစ်အလီပေါ့ဗ်က ထပ်လောင်း ပြော ကြားခဲ့သည်။
ထိုသဘောတူညီချက်သည် တတိယနိုင်ငံများ၏ ဈေးကွက်ဆီသို့ပါ ဦးတည်ထားသည်ဟု သိရသည်။
အိန္ဒိယနိုင်ငံဆိုင်ရာ ရုရှားသံအမတ် ဒီနစ်အလီပေါ့ဗ် ကိုတွေ့ရစဉ် (GETTY IMAGES)
ရုရှား-အိန္ဒိယ စစ်ရေးနည်းပညာ ပူးပေါင်းမှု၏ ထူးခြားချက်များမှာ တစ်ဦးနှင့်တစ်ဦး အကျိုးစီးပွား ထည့်သွင်း စဉ်းစားဖို့ အပြန်အလှန် လက်ခံသည့်အပြင် ပြောင်းလဲနေသော အခြေအနေများနှင့် လိုက်လျောညီထွေ ဖြစ်စေ မည့် မြင့်မားသော အတိုင်းအတာတစ်ခုလည်း ပါဝင်ကြောင်း တာ့စ်သတင်းဌာနက ဆက်လက်ဖော်ပြသည်။
“ဒါဟာ တကယ့်ကို အချိန်နဲ့ တပြေးညီ စမ်းသပ်အောင်မြင်ခဲ့တဲ့ မိတ်ဖက်ဖွဲ့နိုင်မှု အခြေအနေပဲ ဖြစ်ပါတယ်။ ရုရှား ဟာ နယူးဒေလီရဲ့ အဆင့်မြင့် နည်းပညာတွေကို မျှဝေဖို့ အသင့်ရှိနေတဲ့ တစ်ခုတည်းသော နိုင်ငံဖြစ်ပါတယ်” ဟု ဒီနစ်အလီပေါ့ဗ်က ရှင်းပြသည်။
အိန္ဒိယနိုင်ငံသည် ၎င်း၏စစ်ဘက်နှင့် စက်မှုနည်းပညာပိုင်းကို အခြားနိုင်ငံများနှင့် ပူးပေါင်းဆောင်ရွက်ခြင်းအားဖြင့် ဖူလုံစေရေး မူဝါဒ မချမှတ်မီ နှစ်ပေါင်းများစွာကပင် မိမိတို့နှစ်နိုင်ငံ နည်းပညာဆိုင်ရာ ထုတ်လုပ်ရေးကဏ္ဍ သဘောတူညီမှုများ ရှိနှင့်ပြီးဖြစ်ကြောင်း ရုရှားသံအမတ်က ပြောကြားခဲ့သည်။
“ကျနော်တို့ T-90 တင့်ကားတွေ၊ SU-30 MK တိုက်လေယာဉ်နဲ့ တခြားကိစ္စတွေ ဆွေးနွေးညှိနှိုင်းပြီး ဖြစ်ပါတယ်။ ဒါ့အပြင် BrahMos အသံထက်မြန်တဲ့ ဒုံးကျည်တွေ ထုတ်လုပ်ဖို့ ကျနော်တို့ရဲ့ အအောင်မြင်ဆုံး ဖက်စပ် လုပ်ငန်း တစ်ခုဟာလည်း တတိယနိုင်ငံတွေရဲ့ ဈေးကွက်ထဲကို စိတ်ချလက်ချ ဝင်လာနိုင်ပြီ ဖြစ်ပါတယ်” ဟု ၎င်းက တာ့စ်သတင်းဌာနသို့ ဖြေကြားခဲ့သည်။
အဆိုပါ လက်နက်များကို ဖိလစ်ပိုင်နိုင်ငံသို့ တင်ပို့ရောင်းချသွားမည်ဖြစ်ပြီး အခြားနိုင်ငံများကလည်း စိတ်ဝင်စား လျက်ရှိသည်။
“ဆိုလိုချင်တာကတော့ ကျနော်တို့ဟာ အိန္ဒိယမိတ်ဆွေတွေ ကာကွယ်ရေးထုတ်ကုန် တင်ပို့မှု မြှင့်တင်ရေး လမ်းကြောင်းကို လိုက်ပါကူညီပေးနေတာဖြစ်ပါတယ်” ဟု ဒီနစ်အလီပေါ့ဗ်က မှတ်ချက်ချခဲ့သည်။
Source: တာ့စ်သတင်းဌာန
- By CNI
- Category: နိုင်ငံရေး
- Hits: 584
CNI International News
ပို့အော်ပရင့်စ်၊ စက်တင်ဘာ ၁၅
လောင်စာဆီဈေးနှုန်းများ တိုးမြှင့်လိုက်ကြောင်း ဟေတီအစိုးရ ကြေညာလိုက်ပြီးနောက် နိုင်ငံတဝန်းရှိ မြို့များတွင် လူအများ လမ်းပေါ်ထွက်၍ လူနေမှုစရိတ် ဖိစီးလာခြင်းအပေါ် ဒေါသတကြီးဖြင့် ဆန္ဒပြခဲ့ကြကြောင်း အယ်လ်ဂျာဇီးယားက ရေးသားသည်။
ဒီဇယ်နှင့် လောင်စာဆီဈေးနှုန်း အနည်းငယ်တိုးလိုက်ပြီး ဓာတ်ငွေ့ဈေးနှုန်းလည်း နှစ်ဆကျော်တက်မည်ဟု ဟေတီအာဏာပိုင်များက ဇူလိုင် ၁၄ ရက်တွင် ကြေညာခဲ့သည်။
ဓာတ်ငွေ့ဈေးနှုန်းများကို ထိန်းချုပ်လိုက်ပြီးနောက် ပြင်ဆင်သတ်မှတ်လိုက်သော ဈေးနှုန်းအသစ်များ မည်သည့် အချိန်တွင် စတင်မည်ကို အစိုးရက ပြောကြားခြင်းမရှိပေ။ သို့သော် ဟေတီတွင် ပေါက်ဈေးမှာ နိုင်ငံတကာ ဈေးကွက်ထက် သိသာစွာ လျော့နည်းမည် ဟု တွစ်တာတွင် ရေးသားဖော်ပြခဲ့သည်။
ရေနံထွက်ပစ္စည်းတင်သွင်းမှုကုန်ကျစရိတ်သည် တစ်လလျှင် ဟေတီသုံးငွေကြေး ၉ ဘီလီယံ (ဒေါ်လာ ၇၆ ဒသမ ၂ သန်း) ရှိပြီး လစဉ်နိုင်ငံတော်လုပ်ခလစာဘတ်ဂျက်ထက် နှစ်ဆပိုများနေကြောင်း ဟေတီအစိုးရ၊ ဆက်သွယ်ရေး ဝန်ကြီးဌာန၏တွစ်တာစာမျက်နှာတွင် ရေးသားထားသည်။
မြို့တော် ပို့အော်ပရင့်စ်ရှိ လမ်းများကို ဆန္ဒပြသူများက ပိတ်ဆို့ခဲ့ကြပြီး ယင်းနေရာများသည် ပုံမှန်လူစည်ကားရာ နေရာများဖြစ်သည်။ လမ်းမပေါ် ကျောက်တုံးများဖြင့် ပိတ်ဆို့၍ မော်တော်ယာဉ်များ၊ ကားတာယာများကို မီးရှို့ ခဲ့ကြပြီး စာသင်ကျောင်းများနှင့် စီးပွားရေးလုပ်ငန်းကုမ္ပဏီရုံးများ ပိတ်ထားခဲ့ကြသည်။
ဟေတီနိုင်ငံရှိ စက်သုံးဆီဆိုင်တစ်ခုတွင် စက်သုံးဆီရရှိရန် တန်းဆီစောင့်ဆိုင်းနေစဉ်(ဓါတ်ပုံ-Getty Imgaes)
ဆန္ဒပြပွဲများသည် ငွေကြေးဖောင်းပွမှု တိုးလာခြင်းနှင့် အုပ်စုဖွဲ့အကြမ်းဖက်မှု များပြားလာခြင်းတို့ကြောင့် လှုပ်ခတ်နေခဲ့သည့် ဟေတီနိုင်ငံကို တစ်ပူပေါ် နှစ်ပူဆင့်စေခဲ့သည်။
“အခုအချိန်ဟာ ဟေတီအတွက် အင်မတန်စိန်ခေါ်မှု ရေချိန်မြင့်နေပါတယ်” ဟု ဟေတီနိုင်ငံသို့ ရောက်ရှိနေသော သတင်းထောက် ဟာရိုးအီးဇက် (Harold Isaac) က အယ်လ်ဂျာဇီးယားသတင်းဌာနသို့ စက်တင်ဘာ ၁၄ ရက်၊ မွန်းလွဲပိုင်းတွင် ပြောကြားခဲ့သည်။
ဟေတီနိုင်ငံသားများသည် ၂၀၂၁ ခုနှစ်၊ ဇူလိုင်လတွင် သမ္မတ ဂျိုဗီနယ်မော်စီ လုပ်ကြံသတ်ဖြတ်ခံရပြီးနောက် မလုံခြုံမှုများ တိုးပွား၍ ဆိုးရွားနေချိန်တွင် ငွေကြေးဖောင်းပွမှုဒဏ်ကိုလည်း ယခုနှစ် ဆက်လက်ရင်ဆိုင်ခဲ့ရ ကြောင်း ၎င်းသတင်းထောက်က ဆက်လက်ပြောကြားခဲ့သည်။
“အခုဒီမှာ ပေါင်းစပ်အကျပ်အတည်းတွေနဲ့ ရင်ဆိုင်နေရပါတယ်။ နောက်ဆုံးအကျပ်အတည်းကတော့ ပြည်သူတွေရဲ့ နေ့စဉ်ဘဝကို တကယ်ခက်ခဲစေတဲ့ ဓာတ်ငွေ့ရှားပါးလာမှုဖြစ်ပါတယ်” ၎င်းက ရှင်းပြသည်။
ဟေတီနိုင်ငံသားအချို့သည် လောင်စာဆီရရှိရန်အတွက် မှောင်ခိုသမားများထံမှ မတန်တဆဈေးနှုန်းဖြင့် ဝယ်ယူသုံးစွဲနေရသည်။
Source: Aljazeera
- By CNI
- Category: နိုင်ငံရေး
- Hits: 673
CNI International News
ဝါရှင်တန်၊ စက်တင်ဘာ ၁၄
ထိုင်ဝမ်သို့ ကျူးကျော်ဝင်ရောက်ခြင်းမှ ဟန့်တားနိုင်ရန်အတွက် တရုတ်နိုင်ငံအပေါ် ပိတ်ဆို့အရေးယူမှု ချမှတ်ရန် အမေရိကန် စဉ်းစားနေကြောင်း အယ်လ်ဂျာဇီးယား သတင်းဌာနက ရေးသားဖော်ပြသည်။
အလားတူ ဥရောပသမဂ္ဂ (EU) ကလည်း တစ်ချိန်တည်းမှာပင် တိုင်ပေအစိုးရနှင့်ပတ်သက်၍ သံတမန်ရေးအရ ဖိအားပေးမှုများ ပြုလုပ်ရန် ဆွေးနွေးနေကြောင်း ၎င်းတို့နှင့်နီးစပ်သည့် သတင်းရင်းမြစ်များထံမှ သိရသည်။
ကွန်ပျူတာ chip များနှင့် တယ်လီကွန်ပစ္စည်းများကဲ့သို့ အရေးကြီးသော နည်းပညာများအတွက် တရုတ်နှင့် ကုန်သွယ်ရေး၊ ရင်းနှီးမြှုပ်နှံမှုအချို့ကို ကန့်သတ်တားဆီးရန် အနောက်နိုင်ငံများအနေဖြင့် အရေးယူပိတ်ဆို့မှုများ ချမှတ်ဖို့ အမေရိကန်နှင့် EU တို့က စိတ်ကူးနေကြသည်။
ထိုသို့စိတ်ကူးများအကြောင်းအသေးစိတ်ကို သတင်းရင်းမြစ်များက ထုတ်ဖော်မပြောသော်လည်း ကမ္ဘာ့ဒုတိယ အကြီးဆုံးစီးပွားရေးနှင့် ကမ္ဘာ့အကြီးဆုံးထောက်ပံ့ရေးကွင်းဆက်တို့ တည်ရှိသည့် တရုတ်အပေါ် ပိတ်ဆို့ အရေးယူ ဖို့ စိတ်ကူးအတွက် ဖြစ်နိုင်ခြေ ရှိ/မရှိ မေးခွန်းများလည်း ပေါ်ထွက်လာခဲ့သည်။
အမေရိကန် အောက်လွှတ်တော်ဥက္ကဋ္ဌ နန်စီပေလိုစီနှင့် ထိုင်ဝမ်သမ္မတ ဆိုင်အင်းဝမ်တို့ တိုင်ပေရှိ သမ္မတရုံးတွင် တွေ့ဆုံခဲ့ကြစဉ်(ဓါတ်ပုံ-ထိုင်ဝမ်သမ္မတရုံး)
“တရုတ်ကို ဒဏ်ခတ်ပိတ်ဆို့ဖို့က ရုရှားအပေါ် ပိတ်ဆို့တာထက် ပိုပြီး ရှုပ်ထွေးတဲ့ အစီအမံဖြစ်လိမ့်မယ်။ တရုတ် စီးပွားရေးကို အမေရိကန်နဲ့သူ့ရဲ့မဟာမိတ်တွေက ကျယ်ကျယ်ပြန့်ပြန့် ဆက်စပ်လုပ်ကိုင်နေရတာလေ” ဟု အမေရိကန်ကူးသန်းရောင်းဝယ်ရေးဌာန အကြီးတန်းအရာရှိဟောင်း နာဇက်နီကာခါတာ (Nazak Nikakhtar) က ပြောကြားခဲ့သည်။
ထိုင်ဝမ်ကို ၎င်း၏ပိုင်နက်နယ်မြေဟု ကြေညာခဲ့သော တရုတ်သည် ပြီးခဲ့သည့်လ၌ ထိုင်ဝမ်ကျွန်းပေါ်ကို ဖြတ် ကျော်၍ ဒုံးကျည်များ ဆက်တိုက်ပစ်လွှတ်ခဲ့သည်။ အမေရိကန်အောက်လွှတ်တော်ဥက္ကဋ္ဌ နန်စီပလိုစီ၏ ထိုင်ဝမ်ခရီးစဉ်ကို တရုတ်က ရန်စမှုအဖြစ် မှတ်ယူ၍ ယင်းကဲ့သို့ တုံ့ပြန်ခဲ့သည်။ ထို့ပြင် ၎င်း၏ပိုင်နက်မဟုတ်သော ပင်လယ်ရေပြင်နယ်နိမိတ်ကို ဖြတ်ကျော်ဝင်ရောက်ပြီး တရုတ်စစ်သင်္ဘောများ ခုတ်မောင်းခဲ့သည်။
ဒီမိုကရေစီနည်းကျ ကိုယ်ပိုင်အုပ်ချုပ်နေသည့် ထိုင်ဝမ်ကျွန်းကို ဘေဂျင်း၏ထိန်းချုပ်မှုအောက်သို့ ရောက်ရှိလာရန် တရုတ်သမ္မတ ရှီကျင့်ဖျင်က အခိုင်အမာပြောကြားခဲ့သော်လည်း အင်အားသုံးခြင်းရှိမည်မဟုတ်ဟု ငြင်းဆိုထား သည်။
ရှီသည် လာမည့်လတွင် ကျင်းပမည့် ကွန်မြူနစ်ပါတီကွန်ဂရက်အစည်းအဝေးတွင် ၅ နှစ်ကြာ ဦးဆောင်မှု တတိယ အကြိမ်မြောက် သက်တမ်းကို ဆက်လက်ရယူရန် စီစဉ်ထားသည်။
ထိုင်ဝမ်အစိုးရကတော့ တရုတ်၏အချုပ်အခြာအာဏာကို အတိအလင်း ပယ်ချထားသည်။
Source: Aljazeera
- By CNI
- Category: နိုင်ငံရေး
- Hits: 631
ကမ္ဘာ့အန္တရာယ်ကို ပူးပေါင်းဖြေရှင်းဖို့ UN တိုက်တွန်း
CNI International News
နယူးယောက်၊ စက်တင်ဘာ ၁၄
ကမ္ဘာ့အန္တရာယ်ကို စည်းလုံးညီညာစွာဖြင့် ပူးပေါင်းဖြေရှင်းကြဖို့ ကုလသမဂ္ဂ (UN) အထွေထွေအတွင်းရေးမှူးချုပ် အန်တိုနီဂူတာရက်စ်က မေတ္တာရပ်ခံ တိုက်တွန်းလိုက်ကြောင်း အယ်လ်ဂျာဇီးယား သတင်းတစ်ပုဒ်တွင် တွေ့ရသည်။
စက်တင်ဘာ ၁၃ ရက်တွင် ကျင်းပသည့် ၇၇ ကြိမ်မြောက် ကုလသမဂ္ဂ အထွေထွေညီလာခံ (UNGA) ဖွင့်ပွဲ အခမ်း အနားတွင် ဂူတာရက်စ်က အထက်ပါအတိုင်း မေတ္တာရပ်ခံခဲ့ခြင်းဖြစ်သည်။
“ငြိမ်းချမ်းရေး၊ လူ့အခွင့်အရေးနှင့် စဉ်ဆက်မပြတ် ဖွံ့ဖြိုးတိုးတက်ရေးတို့အတွက် ကျနော်တို့ လုပ်ငန်းဆောင်တာ တွေ ဆောင်ရွက်နေရင်းမှာပဲ ကမ္ဘာတဝန်း အန္တရာယ် ကြုံနေရပါတယ်” ဟု လက်ရှိပဋိပက္ခများ၊ ရာသီဥတု ပြောင်းလဲမှု၊ ဆင်းရဲမွဲတေမှု၊ သာတူညီမျှ မရှိမှု၊ ငတ်မွတ်ခေါင်းပါးမှု၊ ခွဲခြားထားမှုများကို ရည်ညွှန်း၍ ဂူတာရက်စ် က ပြောကြားခဲ့သည်။
အထွေထွေညီလာခံ ဖွင့်ပွဲမတိုင်မီ ၎င်းက “ဘုံစိန်ခေါ်မှုတွေကို ကိုင်တွယ်ဖြေရှင်းရာမှာ ကျနော်တို့ဟာ ဒီ (UN) အဖွဲ့အစည်းရဲ့ ကြီးမားတဲ့ ကတိကဝတ်နဲ့ အလားအလာကို ထုတ်ပြခြင်းအားဖြင့် ဆက်လက် စည်းလုံးညီညာနေဖို့ လိုပါလိမ်မယ်” ဟု ပြောကြားခဲ့သည်။
ရုရှားနိုင်ငံခြားရေးဝန်ကြီး ဆာဂျီလာဗရော့ဗ် ကုလမှာ မိန့်ခွန်းပြောစဉ် (UN)
လာမည့် သီတင်းပတ်တွင် အမေရိကန်နိုင်ငံ၊ နယူးယောက်မြို့၌ ကျင်းပမည့် အထွေထွေညီလာခံသို့ ကမ္ဘာ့နိုင်ငံ အသီးသီးမှ နိုင်ငံ့ခေါင်းဆောင်များ၊ အစိုးရအကြီးအကဲများ တက်ရောက်ကြပြီး အလှည့်ကျ မိန့်ခွန်း ပြောကြမည် ဖြစ်သည်။
ရုရှားနိုင်ငံခြားရေးဝန်ကြီး ဆာဂျီလာဗရော့ဗ်လည်း မော်စကိုမှ တောင်းဆိုထားသည့် ကိုယ်စားလှယ်ထက်ဝက်ဖြင့် နှစ်စဉ် အထွေထွေညီလာခံသို့ တက်ရောက်ရန် အမေရိကန်ပြည်ဝင်ခွင့်(ဗီဇာ) ရရှိထားကြောင်းလည်း ရုရှား သံတမန် သတင်းရင်းမြစ် တစ်ခုက ရိုက်တာသတင်းဌာနသို့ ပြောကြားခဲ့သည်။
ရုရှားနိုင်ငံဆိုင်ရာ UN သံအမတ်ကြီး ဗာစီလီနီဗန်ဇညာက ယခုစက်တင်ဘာ ၂ ရက်၌ ဂူတာရက်စ်ထံသို့ ပေးစာ တစ်စောင် ပို့ခဲ့ပြီး မော်စကိုအနေဖြင့် အမေရိကန်ပြည်ဝင်ခွင့် ဗီဇာ ၅၆ ခု တောင်းခံခဲ့သည်။
ထိုသို့ တောင်းခံခြင်းအပေါ် အမေရိကန်က ဗီဇာ ၂၄ ခု ခွင့်ပြုပေးခဲ့ကြောင်း အဆိုပါ ရုရှားသံတမန် သတင်းရင်းမြစ် က ဆက်လက် ပြောကြားခဲ့သည်။
ကမ္ဘာ့အန္တရာယ် ပုံဖော်မှု (GETTY IMAGES)
၁၉၄၇ ခုနှစ်၊ UN ဌာနချုပ် သဘောတူညီချက်အရ နိုင်ငံခြားသံတမန်များ UN အစည်းအဝေးများသို့ တက်ရောက် နိုင်ရန်အတွက် အမေရိကန်၏ ပြည်ဝင်ခွင့်ကိစ္စမှာ ယေဘုယျအားဖြင့် လိုအပ်သည်။
သို့သော် လုံခြုံရေး၊ အကြမ်းဖက်မှုနှင့် နိုင်ငံခြားရေးမူဝါဒတို့ကြောင့် ဗီဇာများကို ငြင်းပယ်နိုင်ကြောင်း ဝါရှင်တန် အစိုးရက ပြောကြားထားသည်။
အမေရိကန်နှင့်ရုရှားတို့ ဗီဇာကိစ္စ ဆွေးနွေးခဲ့ကြကြောင်း UN က ယခုလ အစောပိုင်းတွင် သတင်းထုတ်ပြန်ခဲ့သည်။
ပြီးခဲ့သည့် ဖေဖော်ဝါရီလတွင် အိမ်နီးချင်း ယူကရိန်းကို မော်စကို ကျူးကျော်ပြီး ကတည်းက အမေရိကန်-ရုရှား ဆက်ဆံရေး ပြတ်တောက်သွားခဲ့သည်။
ယခုလာမည့် UN အထွေထွေညီလာခံ၏ အဆင့်မြင့် အစည်းအဝေးများကို စက်တင်ဘာ ၂၀ ရက်တွင် နယူးယောက်မြို့တွင် စတင်ကျင်းပမည်ဖြစ်သည်။
Source: Aljazeera
- By CNI
- Category: နိုင်ငံရေး
- Hits: 1462
CNI International News
မော်စကို၊ စက်တင်ဘာ ၁၃
ရုရှားနိုင်ငံ၏အထင်ကရ မြို့တော်များဖြစ်သည့် မော်စကိုနှင့် စိန့်ပီတာစဘတ်(ယခင်လီနင်ဂရက်)တို့မှ စည်ပင် သာယာရေးအရာရှိ ဆယ်ဂဏန်းတို့က သမ္မတဗလာဒီမာပူတင်အား ရာထူးမှ နုတ်ထွက်ပေးရန် တောင်းဆိုချက်ကို စက်တင်ဘာ ၁၂ ရက်တွင် အိတ်ဖွင့်ပေးစာပေးပို့ခဲ့ကြောင်း မော်စကိုတိုင်းမ်သတင်းစာ၏ဝက်ဘ်ဆိုက်တွင် ဖော်ပြထားသည်။
ထိုသို့ ရုရှားသမ္မတ ရာထူးမှ နုတ်ထွက်၍ ဆင်းပေးရန် တောင်းဆိုချက်သည် ယခုသီတင်းပတ်အကုန်ပိုင်းတွင် ကျင်းပမည့် ဒေသအလိုက် ရွေးကောက်ပွဲများ၌ မတိုင်မီ မဲလိမ်သည်၊ မဲခိုးသည်ဟူသော မဲမသမာမှုစွပ်စွဲချက်များ ကြောင့် ထွက်ပေါ်လာခြင်းဖြစ်သည့်အပြင် တိုင်းပြည်အတွက် အကြီးမားဆုံးဆုတ်ယုတ်မှုအဖြစ် လက်ရှိစစ်ပွဲ၌ ယူကရိန်းတပ်ဖွဲ့များ အင်အားကောင်းကောင်းဖြင့် ရှေ့တိုးချီတက်နိုင်ခြင်းလည်း ပါဝင်သည်။
ယူကရိန်းကို ကျူးကျော်စစ် စတင်ပြီး မရှေးမနှောင်းမှာပင် စစ်ဆန့်ကျင်ရေး သဘောထားကွဲလွဲမှုအားလုံးကို ရုရှားပြည်တွင်း၌ တားမြစ်ထားသဖြင့် ယခုတောင်းဆိုလက်မှတ်ရေးထိုးမှုများမှာ ဥပဒေအရ ပြစ်ဒဏ်ပေးခြင်းခံရ နိုင်သည့် အန္တရာယ်လည်း ရှိနေကြောင်း မော်စကိုတိုင်းမ်သတင်းစာက ဆက်လက်ရေးသားသည်။
“သမ္မတပူတင်ရဲ့လုပ်ရပ်တွေဟာ ရုရှားပြည်နဲ့ နိုင်ငံသူ၊ နိုင်ငံသားတွေရဲ့အနာဂတ်ကို ထိခိုက်စေပါတယ်” ဟု စိန့်ပီတာစဘတ်မြို့၊ ဆမ်ယိုနိုဗက်စကီ (Semyonoysky) ခရိုင်မှ လက်ထောက်အရာရှိတစ်ဦးဖြစ်သူ ကက်ဆင် နီးယားတော်စထွင်း (Ksenia Torstrem) က တွစ်တာလူမှုကွန်ရက်တွင် ရေးသားခဲ့သည်။
“ရုရှားဖက်ဒရေးရှင်းသမ္မတရာထူးကနေ ဗလာဒီမာပူတင် နုတ်ထွက်ပေးဖို့ ကျနော်တို့ တောင်းဆိုပါတယ်” ဟု ကနဦး စုပေါင်းလက်မှတ်ရေးထိုးထားသည့် ကိုယ်စားလှယ် ၁၉ ဦး၏ ကြေညာချက်ထဲတွင် ဆက်လက်ဖော်ပြထားသည်။
စက်တင်ဘာ ၁၂ ရက်တွင် အခြားလူပုဂ္ဂိုလ် ၈၄ ဦးတို့လည်း သီးခြားမေတ္တာရပ်ခံလွှာတစ်စောင် ထုတ်ပြန်၍ အလားတူ လက်မှတ်ရေးထိုးခဲ့ကြကြောင်း တော်စထွင်း၏အဆိုအရ သိရသည်။
ရုရှားနိုင်ငံ၏ ဒေသအလိုက်ရွေးကောက်ပွဲများတွင် ကရင်မလင်ကို လိုလားသော ကိုယ်စားလှယ်လောင်းများက အခြားပြိုင်ဘက်များကို နှိပ်ကွပ်၍ ၎င်းတို့ကို အတင်းအကျပ်မဲထည့်စေခြင်း၊ မဲဝယ်ခြင်း၊ မဲစာရင်းများ မှားယွင်းစွာ ဖော်ပြခြင်းတို့ အများအပြားဖြစ်ပွားခဲ့ကြောင်း ဂိုလော့စ် (Golos) အမည်ရှိ လွတ်လပ်သောရွေးကောက်ပွဲ စောင့်ကြည့်ရေးအဖွဲ့၏ သတင်းထုတ်ပြန်ချက်အရ သိရသည်။
ထိုအတောအတွင်း ယူကရိန်းအရှေ့မြောက်ပိုင်း ခါကိဗ်ဒေသတွင် ယူကရိန်းတို့၏တန်ပြန်ထိုးစစ်ကြောင့် မော်စကိုအစိုးရက ယခင်သိမ်းပိုက်ခဲ့သော စတုရန်းကီလိုမီတာ ၃၀၀၀ ဝန်းကျင်ရှိ နယ်မြေများကို ကိယက်ဗ်က ပြန်လည်သိမ်းယူနိုင်ခဲ့သည်။
စိန့်ပီတာစဘတ်မြို့၊ စမော်နင်စကိုရီခရိုင်မှ လက်ထောက်အရာရှိတစ်ဦးဖြစ်သည့် ဒီမီထရီပေးယူဂါ (Dmitry Palyuga) သည် ယူကရိန်းအရေး သစ္စာဖောက်ဖျက်မှုစွဲချက်ဖြင့် သမ္မတပူတင်ကို စုံစမ်းစစ်ဆေးရန် နိုင်ငံတော် ဒူးမားလွှတ်တော်သို့ တောင်းဆိုခဲ့ပြီးနောက် သမ္မတရာထူးမှ နုတ်ထွက်ရန် အလားတူတောင်းဆိုသံများလည်း ကျယ်လောင်သွားခဲ့သည်။
ဒီမီထရီပေးယူဂါကို ရုရှားစစ်တပ်အပေါ် အသရေဖျက်မှုစွဲချက်ဖြင့် ရဲစခန်းက ခေါ်ယူသွားခဲ့သော်လည်း နောက် ပိုင်းတွင် ပြန်လွှတ်ပေးခဲ့သည်။
Source: The Moscow Times
- By CNI
- Category: နိုင်ငံရေး
- Hits: 940
CNI International News
ဂျနီဗာ၊ စက်တင်ဘာ ၁၃
မြန်မာနိုင်ငံမှာ လူ့အခွင့်အရေး ချိုးဖောက်မှုများ စုံစမ်းစစ်ဆေးနေသော ကုလသမဂ္ဂ (UN) အကြီးအကဲတစ်ဦးက လက်ရှိပြည်တွင်း၌ ဖြစ်ပွားနေသည့် နိုင်ငံတကာစည်းမျဉ်း ချိုးဖောက်သည့် ရာဇဝတ်မှုများ အတိုင်းအတာသည် ပြီးခဲ့သည့်နှစ်ထက် သိသာစွာ ပိုမိုကျယ်ပြန့်လာကြောင်း ပြောကြားခဲ့သည်ဟု အယ်လ်ဂျာဇီးယားသတင်းဌာနက ရေးသားဖော်ပြသည်။
မြန်မာပြည်တွင်း၌ ၂၀၂၁ ခုနှစ်၊ ဖေဖော်ဝါရီလ အာဏာသိမ်းမှု ဖြစ်ပွားပြီးနောက် စစ်တပ်သည် ၎င်း၏ထိန်းချုပ်မှု ကို အခိုင်အမာ ကြိုးပမ်းနေခဲ့သည်။
ရခိုင်ပြည်နယ်၊ အနောက်မြောက်ပိုင်းတွင် စစ်တပ်၏ ဖြိုခွင်းမှုကို စုံစမ်းစစ်ဆေးဖို့ မြန်မာနိုင်ငံအတွက် လွတ်လပ်သည့် စုံစမ်းရေးယန္တရားတစ်ခု (IIMM) ကို UN က ၂၀၁၈ ခုနှစ်တွင် ဖွဲ့စည်းပေးခဲ့သည်။
မွတ်ဆလင်ဘာသာဝင် ထောင်နှင့်ချီ၍ ဘင်္ဂလားဒေ့ရှ်နိုင်ငံသို့ နယ်စပ်ဖြတ်ကျော် ထွက်ပြေးခဲ့ကြရာ ယခုအခါ နိုင်ငံတကာ ရာဇဝတ်မှုတရားရုံး (ICJ) တွင် လူမျိုးသုဉ်း သတ်ဖြတ်မှုဆိုင်ရာ စွဲချက်တင်ခံထားရသည်။
ဘင်္ဂလားဒေ့ရှ်နိုင်ငံသို့ တိမ်းရှောင်သွားသည့် မွတ်ဆလင်ဘာသာဝင်များ (GETTY IMAGES)
IIMM ယန္တရားသည် နိုင်ငံ၊ ဒေသဆိုင်ရာ (သို့မဟုတ်) နိုင်ငံတကာ တရားရုံးများတွင် တရားစွဲရန်အတွက် အထောက်အထားများ စုဆောင်းရန်နှင့် အမှုတွဲများ တည်ဆောက်ရန် ရည်ရွယ်၍ ဖွဲ့စည်းထားခြင်းဖြစ်သည်။
IIMM ၏ အကြီးအကဲ နီကိုလပ်ကွမ်ဂျီယန် (Nicholas Koumjian) သည် မြန်မာနိုင်ငံ၌ စစ်တပ်အာဏာရယူ ပြီးနောက် ပေါ်ပေါက်ခဲ့သော ဖြစ်ရပ်များသည် ၎င်းတို့ စုံစမ်းစစ်ဆေးမှု၏ အဓိကအာရုံစိုက်မှု ဖြစ်လာကြောင်း UN လူ့အခွင့်အရေးကောင်စီထံသို့ အစီရင်ခံခဲ့သည်။
မြန်မာနိုင်ငံတွင် လက်နက်ကိုင် တွန်းလှန်မှုအဖြစ်သို့ ပြောင်းလဲသွားခဲ့သည့် လူထုဆန္ဒပြမှု ပေါ်ပေါက်ခဲ့ရခြင်းမှာ မြန်မာ့တပ်မတော် အာဏာရယူမှုကြောင့်ဖြစ်ပြီး ထိုအာဏာရယူမှုလုပ်ရပ်သည် တိုင်းပြည် အကျပ်အတည်းထဲသို့ ထိုးကျသွားစေခဲ့သည်။
ဒီမိုကရေစီအရေး တောင်းဆိုကြစဉ် (ဖရွန်းတီးယားမြန်မာ)
လူပေါင်း ၂,၂၇၃ ဦး သေဆုံးခဲ့ပြီး ၁၅,၀၀၀ ကျော် ဖမ်းဆီးခံခဲ့ရကြောင်း အခြေအနေ စောင့်ကြည့်နေသည့် နိုင်ငံရေး အကျဉ်းသားများ ကူညီစောင့်ရှောက်ရေးအသင်း (AAPP) ထံမှ သိရသည်။
“အဆိုပါ ဖြစ်ရပ်များသည် သက်ဆိုင်ရာ ရာဇဝတ်မှုများ အတိုင်းအတာ၊ သဘာဝ၊ ကော်မရှင်ပုံစံနှင့် ထိခိုက်နစ်နာ သူများအပေါ် ကျူးလွန်ခဲ့ပုံ ပဏာမ အကဲဖြတ်ချက်အပေါ် အခြေခံ၍ စုံစမ်းစစ်ဆေးရေး ဦးစားပေး လုပ်ဆောင်ခဲ့ ကြောင်း၊ အဆိုပါ ကျူးလွန်ခဲ့မှုများအပေါ် တရားရုံး (သို့မဟုတ်) ခုံရုံးက စီရင်နိုင်ခဲ့သည့် အခွင့်အာဏာရှိကြောင်း” ၂၀၂၂ ခုနှစ်၊ ဇွန်လကုန်အထိ မြန်မာ့အခြေအနေဆိုင်ရာ IIMM ၏ နောက်ဆုံး ထွက်ရှိထားသော အစီရင်ခံစာထဲတွင် နီကိုလပ်ကွမ်ဂျီယန်က ပြောကြားခဲ့သည်။
IIMM ၏ နှစ်ပတ်လည် အစီရင်ခံစာတွင် အစောပိုင်း တွေ့ရှိချက်များကို ကိုးကား၍ ဆက်လက် ရေးသားထားရာ “စစ်တပ်က အာဏာသိမ်းပြီးကတည်းက အရပ်သားများအပေါ် ကျယ်ပြန့်စွာ စနစ်တကျ တိုက်ခိုက်မှုများကို အဖွဲ့အစည်း နည်းလမ်းဖြင့် ရာဇဝတ်မှုများ ဆက်တိုက်ကျူးလွန်ခဲ့ကြောင်း၊ သံသယရှိသော ရာဇဝတ် ကျူးလွန် မှုများမှာ ပထဝီဝင် နယ်ပယ်နှင့် ရာဇဝတ်မှု သဘောသဘာဝ ကျယ်ပြန့်ကြောင်း” ဖော်ပြထားသည်။
Source: Aljazeera