- By CNI
- Category: နိုင်ငံရေး
- Hits: 926
CNI International News
အစ္စလာမ္မာဘတ် စက်တင်ဘာ ၂၉
တာလီဘန်များကို အထီးကျန်အောင်လုပ်ထားခြင်း ဆက်ထားလျှင် အန္တရာယ်များကြောင်း ပါကစ္စတန် နိုင်ငံခြားရေးဝန်ကြီး ဘီလာဝယ်ဘူတိုဇာဒါရီက ပြောကြားလိုက်ကြောင်း အယ်လ်ဂျာဇီးယားသတင်းဌာနက ရေးသားဖော်ပြသည်။
တာလီဘန်များနှင့် ကမ္ဘာကို ထိတွေ့ဆက်ဆံစေလိုကြောင်း၊ အာဖဂန်နစ္စတန်အုပ်ချုပ်နေသည့် ၎င်းတို့ကို ထပ်မံ၍ အထီးကျန်စွာ ထားရှိပါက အန္တရာယ်များသော အကျိုးဆက်များ ရှိလာနိုင်ကြောင်း ပါကစ္စတန်နိုင်ငံခြားရေးဝန် ကြီးက သတိပေးခဲ့သည်ဟု အယ်လ်ဂျာဇီးယားမှ ဆက်လက် ရေးသားထားသည်။
စက်တင်ဘာ ၂၇ ရက်တွင် ဝါရှင်တန်သို့ အလည်အပတ် ရောက်ရှိလာစဉ် AFP သတင်းဌာနနှင့် တွေ့ဆုံ မေးမြန်း ခန်း၌ ပါကစ္စတန်နိုင်ငံခြားရေးဝန်ကြီး ဘီလာဝယ်ဘူတိုဇာဒါရီက “တာလီဘန်များအပေါ် အယုံအကြည်မရှိသော အမေရိကန်သည် အာဖဂန်နစ္စတန်၏ နိုင်ငံတော်ပိုင်ဆိုင်မှုများကို လက်ဝယ်ထားရှိ၍ သိမ်းဆည်းထားပြီး ဆွစ်ဇာလန်တွင် ထည့်သွင်းထားခြင်းဖြင့် အပြိုင်အုပ်ချုပ်မှု ဖန်တီးခြင်း” မပြုရန် သတိပေးခဲ့သည်။
“လက်ဆေးပြီးတော့ နောက်ကျော ပြန်လှည့်ကြည့်တဲ့အခါ တွေ့ရတာမျိုး ကျနော်တို့ သင်ခန်းစာ ယူရမယ်။ မလို လားအပ်တဲ့ အကျိုးဆက်တွေ ဖန်တီးတာဟာ ကိုယ့်အတွက် နောက်ထပ် ပြဿနာတွေ အဆုံးမသတ်နိုင် ဖြစ်တတ် ပါတယ်” ဟု ဘူတိုဇာဒါရီက ပြောကြားခဲ့သည်။
တာလီဘန်များကိုတွေ့ရစဉ် (GETTY IMAGES)
“ကျနော်တို့ စီးပွားရေးပြိုလဲမှု၊ ဒုက္ခသည် အစုလိုက် အပြုံလိုက် ထွက်ခွာမှု၊ (လက်နက်ကိုင်) အဖွဲ့အစည်းတွေ အတွက် လူသစ်စုဆောင်းမယ့် ခြိမ်းခြောက်မှုတွေကြောင့် ဘဏ္ဍာရေးဆိုင်ရာ အဖွဲ့အစည်းတွေနဲ့ ပတ်သက်ပြီး တော့ ဒီထက်ပိုပြီး စိုးရိမ်စရာတွေ ရှိတယ်လို့ ယုံကြည်ပါတယ်” ဟု ၎င်းက ဆက်လက် ပြောကြားခဲ့သည်။
အာဖဂန်နစ္စနိုင်ငံကို ယခုအခါ လက်တွေ့ အုပ်ချုပ်နေသော တာလီဘန်တို့အပေါ် အနောက်အုပ်စုက ပိတ်ဆို့ အရေးယူမှုများ ချမှတ်ထားသည့်အပြင် လူသားချင်း စာနာထောက်ထားမှု အကူအညီများ ခေတ္တရပ်ဆိုင်းခြင်း၊ အာဖဂန်ဗဟိုဘဏ်၏ ပိုင်ဆိုင်မှု ဒေါ်လာ ၁၀ ဘီလီယံနီးပါးကို သိမ်းဆည်းထားခြင်းတို့ကြောင့် အာဖဂန် လူဦးရေ ၏ ထက်ဝက်ကျော်မှာ ဆိုးရွားသည့် အကျပ်အတည်း ကျရောက်နေသည်။
တာလီဘန်ခေါင်းဆောင်တစ်ဦးနဲ့ အမေရိကန် ကိုယ်စားလှယ်တစ်ဦး(GETTY IMAGES)
မိန်းကလေးများ၏ ပညာရေး ကန့်သတ်ချက်များအပြင် အခြေခံ လွတ်လပ်ခွင့်များ တားမြစ်ထားသော တာလီဘန် တို့အပေါ် ပိတ်ဆို့ အရေးယူမှုများသည် အာဖဂန်စီးပွားရေး အကျပ်အတည်း ပိုဆိုးလာစေပြီး လုံခြုံမှုကင်းမဲ့ခြင်း၊ ဆင်းရဲမွဲတေခြင်းနှင့် အထီးကျန်ဆန်မှု ဖြစ်ပေါ်စေမည်ကို စိုးရိမ်မကင်းဖြစ်မိကြောင်း ကုလသမဂ္ဂ (UN) က ပြော ကြားထားပြီး ဖြစ်သည်။
တာလီဘန်များ ဘက်ကလည်း အမျိုးသမီးများနှင့် မိန်းကလေးငယ်များ ရပိုင်ခွင့်များကဲ့သို့ နိုင်ငံတကာ စိုးရိမ်မှုများ ကို သိသာစွာ လျှော့ချပေးရန် လိုအပ်ကြောင်း ဘူတိုဇာဒါရီက ဆက်လက် ပြောကြားခဲ့သည်။
“သမိုင်းတလျှောက်မှာ သီအိုကရက်တစ်၊ သက်ဦးဆံပိုင်အုပ်ချုပ်တဲ့ အစိုးရတွေဟာ စီးပွားရေး မပြေလည်တဲ့အခါ အခွင့်အရေးတွေကို ဘယ်လိုချဲ့ထွင်ယူရမယ်ဆိုတာ အတိအကျ မထိန်းညှိတတ်ကြဘူး။ တကယ်တော့ သူတို့ဟာ သူတို့ပြည်သူတွေနဲ့ ထိတွေ့ဆက်ဆံတဲ့နေရာမှာ ယဉ်ကျေးမှုဓလေ့ထုံးစံ ပြဿနာတွေနဲ့ တခြားပြဿနာတွေကို ကိုင်စွဲထားလေ့ရှိကြတယ်ဗျ” ဟု ၎င်းက ထပ်လောင်း ပြောကြားခဲ့သည်။
ပါကစ္စတန်ဝန်ကြီးချုပ်ဟောင်း အီမရန်ခမ်းကို လွှတ်တော်အတွင်း အယုံအကြည် မရှိကြောင်း မဲခွဲဆုံးဖြတ်၍ ဖြုတ်ချပြီးနောက် ပြီးခဲ့သည့် ၅ လအတွင်း အစိုးရသစ် တက်လာခဲ့ရာ ဘူတိုဇာဒါရီသည် နိုင်ငံခြားရေးဝန်ကြီး ဖြစ်လာခဲ့သည်။
Source: Aljazeera
- By CNI
- Category: နိုင်ငံရေး
- Hits: 784
CNI International News
တိုကျို၊ စက်တင်ဘာ ၂၈
အမေရိကန်ဒုတိယသမ္မတ ကာမယ်လာဟားရစ်သည် ဂျပန်နိုင်ငံရောက် အမေရိကန်သင်္ဘောသားများနှင့် တွေ့ဆုံ ရာတွင် မိမိတို့ကို အနှောင့်အယှက်ဖြစ်စေသော တရုတ်၏လုပ်ရပ်များကို ရှုတ်ချကြောင်း ပြောကြားခဲ့သည်ဟု ရိုက်တာသတင်းဌာနက ရေးသားဖော်ပြသည်။
ထိုင်ဝမ်ကို တိုက်ခိုက်လာပါက အမေရိကန်တပ်များဖြင့် အကာအကွယ်ပေးသွားမည်ဟု ဘိုင်ဒန်အစိုးရ ကတိပြုပြီး ရက်ပိုင်းအတွင်း ဒုတိယသမ္မတက ယင်းကဲ့သို့ သဘောထားမှတ်ချက်ပေးခဲ့ခြင်းဖြစ်သည်။
တိုကျိုမြို့တော်အပြင်ဘက်ရှိ ယိုကိုဆူကာဒေသရှိ ကမ္ဘာ့အကြီးဆုံးပင်လယ်ရပ်ခြား အမေရိကန်ရေတပ်စခန်း ဌာနသို့ ရောက်ရှိစဉ်အတွင်း ဟားရစ်က “တရုတ်သည် နိုင်ငံတကာစည်းမျဉ်းအခြေခံသည့်လုပ်ဆောင်ချက်များ၏ အဓိကအစိတ်အပိုင်းများကို အားပျော့အောင် လုပ်ဆောင်နေကြောင်း” ပြောကြားခဲ့သည်။
“တရုတ်ဟာ အိမ်နီးချင်းနိုင်ငံတွေကို ခြိမ်းခြောက်အကျပ်ကိုင်ဖို့ သူ့ရဲ့စစ်ရေးနဲ့စီးပွားရေးအင်အားကို အရှိန်မြှင့် နေပါတယ်။ အရှေ့တရုတ်ပင်လယ်နဲ့ တောင်တရုတ်ပင်လယ်မှာ တခြားသူတွေ စိတ်အနှောင့်အယှက်ဖြစ်စေတဲ့ အပြုအမူတွေ လုပ်ခဲ့ပြီးတော့ မကြာခင်ကပဲ ထိုင်ဝမ်ရေလက်ကြားကို ဖြတ်ပြီး ရန်စမှုတွေ ရှိခဲ့ပါသေးတယ်” ဟု ၎င်းက ဆက်လက်ပြောကြားခဲ့သည်။
ယခင်က မရှိခဲ့ဖူးသည့် တိုက်ခိုက်ရန်စမှုကို ကာကွယ်ရန် အမေရိကန်သမ္မတ ဂျိုးဘိုင်ဒန်က စက်တင်ဘာလ ၁၈ ရက်တွင် ထုတ်လွှင့်ခဲ့သည့် အင်တာဗျူးတစ်ခုတွင် သဘောထားမှတ်ချက်ပေးခဲ့ပြီးဖြစ်သည်။
ဘိုင်ဒန်၏သဘောထားမှတ်ချက်ထွက်ပေါ်လာပြီး မရှေးမနှောင်းမှာပင် ယခုကဲ့သို့ ဟားရစ်၏ ကမ္ဘာ့အရှေ့ဖျား ခရီးစဉ်လည်း ပေါ်ပေါက်လာခဲ့သည်။
အမေရိကန်ဒုတိယသမ္မတ ကာမယ်လာဟားရစ်နှင့် ဂျပန်ဝန်ကြီးချုပ် ဖူမီယိုကီရှိဒါတို့ တိုကျိုမြို့ရှိ Akasaka Palace ပြည်နယ် ဧည့်ရိပ်သာတွင် စက်တင်ဘာလ ၂၆ ရက်နေ့က တွေ့ဆုံနှုတ်ဆက်ကြစဉ်(ဓါတ်ပုံ-အေပီ)
အမေရိကန်သည် ဘေဂျင်းတစ်ခုတည်းကိုသာ တရားဝင်အသိအမှတ်ပြုသည့် တရုတ်တစ်ပြည်ထောင်တည်းမူဝါဒ (One China Policy) ကို လက်ခံထားသော်လည်း ဒီမိုကရေစီနည်းကျအုပ်ချုပ်နေသော ထိုင်ဝမ်ကို ခုခံ ကာကွယ် ရန် အခိုင်အမာပြောကြားထားပြီးဖြစ်သည်။
တရုတ်ကတော့ ထိုင်ဝမ်သည် ၎င်း၏ပြည်နယ်များထဲမှ အစိတ်အပိုင်းတစ်ခုဖြစ်ကြောင်း မှတ်ယူထားသည်။ သို့သော် ဘေဂျင်းအောက်သို့ ထိုင်ဝမ်ရောက်လာရှိလာရေးအတွက် အင်အားသုံးမည်မဟုတ်ဟု အာမခံခဲ့သည်။
ထိုင်ဝမ်အစိုးရသည် တရုတ်၏အချုပ်အခြာအာဏာကို ပြင်းပြင်းထန်ထန် ကန့်ကွက်နေပြီး ကျွန်း၏ လူဦးရေ ၂၃ သန်းကသာ မိမိတို့အနာဂတ်ကို ဆုံးဖြတ်နိုင်ကြောင်း အတိအလင်းကြေညာခဲ့သည်။
ပြီးခဲ့သည့်ဩဂုတ်လတွင် အမေရိကန်အောက်လွှတ်တော်ဥက္ကဋ္ဌ နန်စီပလိုစီ ထိုင်ဝမ်ကျွန်းပေါ်သို့ ရောက်ရှိ လည်ပတ်ခဲ့ပြီးနောက် တရုတ်က ကျွန်းတဝိုက် အကြီးစားစစ်ရေးလေ့ကျင့်မှုများ ပြုလုပ်ခဲ့သည်။
ယခု ဂျပန်ခရီးစဉ်တွင်လည်း ဒုတိယသမ္မတ ဟားရစ်က “တောင်တရုတ်ပင်လယ်ဒေသတွင် အမေရိကန် တပ်များသည် ထိတ်လန့်တုန်လှုပ်နေမည်မဟုတ်ဘဲ လုပ်စရာရှိသည်များ ဆက်လုပ်သွားမည်” ဟု ပြောကြားခဲ့သည်။
“လက်ရှိအနေအထားကို တဖက်သတ်ပြောင်းလဲစေမယ့်ကိစ္စတွေ ကျမတို့ ဆက်လက်ဆန့်ကျင်သွားမှာပါ” ဟု ၎င်းက ပြောကြားခဲ့သည်။
“ထိုင်ဝမ်ရဲ့ရပ်တည်ချက်မူဝါဒနဲ့အညီ၊ ထိုင်ဝမ်ကာကွယ်ရေးအတွက် ကျမတို့ ဆက်ပြီးထောက်ခံသွားမယ်။ ထိုင်ဝမ်ဟာ ကမ္ဘာလုံးဆိုင်ရာ ကောင်းကျိုးတွေကို ပံ့ပိုးတဲ့ တက်ကြွတဲ့ ဒီမိုကရေစီနိုင်ငံဖြစ်တယ်” ဟု ၎င်းက မှတ်ချက်ချခဲ့သည်။
Source: Reuters
- By CNI
- Category: နိုင်ငံရေး
- Hits: 1317
CNI International News
ဝါရှင်တန်၊ စက်တင်ဘာ ၂၈
အိန္ဒိယဘက်မှ ဝေဖန်သံများ ကျယ်လောင်လာသဖြင့် ပါကစ္စတန်သို့ အမေရိကန် စစ်လက်နက်များ ရောင်းချမှုကို အမေရိကန်နိုင်ငံခြားရေးဝန်ကြီး အန်တိုနီဘလင်ကင်က ခုခံကာကွယ်ပြောကြားခဲ့ကြောင်း အယ်လ်ဂျာဇီးယား သတင်းအရ သိရသည်။
ဝါရှင်တန်နှင့် အစ္စလမ္မာဘတ်တို့အကြား အမေရိကန်ဒေါ်လာ သန်း ၄၅၀ တန်ဖိုးရှိ F-16 တိုက်လေယာဉ် ရောင်းချ ပေးရေး သဘောတူညီချက်ကို အိန္ဒိယက ဝေဖန်ခဲ့ခြင်း ဖြစ်သည်။
စက်တင်ဘာ ၂၇ ရက်တွင် အမေရိကန်နိုင်ငံ၊ ဝါရှင်တန်မြို့တော်၌ ကျင်းပသည့် သတင်းစာ ရှင်းလင်းပွဲ၌ ဘလင်ကင်က “ယခုလအစောပိုင်း အတည်ပြုခဲ့သည့် စစ်ရေးအသုံးအဆောင်များ ရောင်းချမှုမှာ ပါကစ္စတန်၏ ရှိနှင့်ပြီးသား တိုက်လေယာဉ်အုပ်စု ပြုပြင်ထိန်းသိမ်းရေး အတွက်သာ ဖြစ်ကြောင်း” ကာကွယ်ပြောကြားခဲ့သည်။
“အခု ရောင်းပေးလိုက်တာတွေက လေယာဉ်အသစ်၊ စနစ်သစ်၊ လက်နက်အသစ်အဆန်းတွေ မဟုတ်ပါဘူး။ သူတို့ မှာ ရှိပြီးသား အသုံးအဆောင်တွေကို ထိန်းသိမ်းမွမ်းမံပေးဖို့ပါ” ဟု အိန္ဒိယပြည်ပရေးရာဝန်ကြီး ဆူဘာရာမန်ယန် ဂျိုင်ရှန်ကာနှင့်တွေ့ဆုံစဉ် ဘလင်ကင်က ပြောကြားခဲ့သည်။
“ပါကစ္စတန်ရဲ့ အစီအစဉ်ဟာ ဒေသတွင်းမှ ထွက်ပေါ်လာတဲ့ အကြမ်းဖက် ခြိမ်းခြောက်မှုတွေကို ကိုင်တွယ် ဖြေရှင်းနိုင်စွမ်းကို အားကောင်းစေပါတယ်။ ဒီခြိမ်းခြောက်မှုတွေက လွတ်ဖို့နဲ့ ရှေ့ဆက် တိုးချဲ့ဆောင်ရွက်နိုင်ဖို့ပဲ ဖြစ်ပါတယ်။ ဘယ်သူ့အကျိုးစီးပွားမှ မပါပါဘူး” ဟု ဘလင်ကင်က ပြောကြားခဲ့သည်။
ဘလင်ကင်သည် ပါကစ္စတန် နိုင်ငံခြားရေးဝန်ကြီး ဘီလာဝယ်ဘူတိုဇာဒါရီနှင့် သီးခြားတွေ့ဆုံပြီး နောက်တစ်ရက် အကြာတွင် အိန္ဒိယနိုင်ငံခြားရေးဝန်ကြီး ဂျိုင်ရှန်ကာနှင့် ဆက်လက် တွေ့ဆုံခဲ့ခြင်း ဖြစ်သည်။
“ကျနော်တို့ တွေ့ဆုံဆွေးနွေးမှုမှာ အိန္ဒိယနဲ့အတူ တာဝန်သိသိ ဆက်ဆံရေးကို စီမံခန့်ခွဲခြင်းရဲ့ အရေးပါမှု အလေး ပေး ဆွေးနွေးခဲ့ကြပါတယ်” ဟု ဘလင်ကင်က စက်တင်ဘာ ၂၆ ရက် တွေ့ဆုံမှုအပြီးတွင် ပြောကြားခဲ့သော်လည်း အသေးစိတ်ကိုတော့ ထည့်သွင်း ပြောကြားခြင်းမရှိပါ။
နိုင်ငံများအကြား တင်းမာမှု အမျိုးမျိုးရှိသော်လည်း အိန္ဒိယနှင့်ပါကစ္စတန် နှစ်နိုင်ငံစလုံးသည် ဆယ်စုနှစ် ပေါင်း များစွာ အမေရိကန်နှင့် ခိုင်မာသော ဆက်ဆံရေးကို ထိန်ထားခဲ့ကြသည်။
“အိန္ဒိယနဲ့ ကျနော်တို့ ဆက်ဆံရေးဟာ သူ့နည်းသူ့ဟန်သူ ရှိနေပါတယ်။ အလားတူ ပါကစ္စတန်နဲ့ ကျနော်တို့ ဆက်ဆံရေးကလည်း သူ့နည်းသူ့ဟန်နဲ့ ရပ်တည်နေတာပါ” ဟု အမေရိကန်နိုင်ငံခြားရေးဝန်ကြီးဌာန ပြောရေးဆို ခွင့်ရှိသူ နက်ပရိုက်စ် (Ned Price) က ပြောကြားခဲ့သည်။
Source: Aljazeera
- By CNI
- Category: နိုင်ငံရေး
- Hits: 631
CNI International News
ဘေဂျင်း၊ စက်တင်ဘာ ၂၈
ယခုလ အစောပိုင်း နိုင်ငံခြားခရီးစဉ်မှ ပြန်ရောက်ပြီးနောက် တရုတ်သမ္မတ ရှီကျင့်ဖျင်သည် ကွန်မြူနစ်ပါတီ (ကွန်ဂရက်) ညီလာခံမတိုင်မီ သီတင်းသုံးပတ်အတွင်း ပထမဆုံးအကြိမ်ဖြစ် စက်တင်ဘာ ၂၇ ရက်၌ အများ ပြည်သူ မြင်ကွင်းသို့ ပြန်လည်ထွက်ပေါ်လာခဲ့ကြောင်း South China Morning Post သတင်းစာက ရေးသား ဖော်ပြသည်။
ပြီးခဲ့သည့် နှစ်နှစ်တာ ကာလအတွင်း တရုတ်နိုင်ငံ၏ အောင်မြင်တိုးတက်မှု အခြေအနေများကို ထင်ဟပ်ပြသခဲ့ သော ဘေဂျင်းမြို့တော်တွင် ကျင်းပသည့် ပြပွဲတစ်ပွဲသို့ ရှီကျင့်ဖျင် သွားရောက်ကြည့်ရှုခဲ့သည်။
ကွန်မြူနစ်ပါတီသည် လွန်ခဲ့သော ၁၀ နှစ်အတွင်း နိုင်ငံရေး၊ စီးပွားရေး၊ ဝါဒရေးရာ စိန်ခေါ်မှုများနှင့် သဘာဝဘေး ဒဏ် အမျိုးမျိုးကို ကျော်ဖြတ်လျက် တိုင်းပြည်ကို ဦးဆောင်မှုပေးခဲ့ကြောင်း အဆိုပါ ပြပွဲကို ကိုးကားလျက် ဆင်ဟွာသတင်းဌာနက ရေးသားဖော်ပြသည်။
တရုတ်ကွန်မြူနစ်ပါတီ ပေါ်လစ်မြူရိုအဖွဲ့ကိုတွေ့ရစဉ် (GETTY IMAGES)
ပါတီကို ရှီကျင့်ဖျင် စတင်ဦးဆောင်ခဲ့သည့် ၂၀၁၂ ခုနှစ်ကတည်းက တရုတ်အာဏာပိုင်များ၏ အဓိက အောင်မြင်မှု များကို ပိုမို၍ ကျယ်ကျယ်ပြန့်ပြန့် ဖြစ်အောင် ဖြန့်ဝေသင့်ကြောင်း ရှီက မှာကြားခဲ့သည်။
ရှီသည် ပါတီ၏ အပြီးသတ် ဆုံးဖြတ်ချက်ချသည့် အဖွဲ့ဖြစ်သော ဘေဂျင်းအခြေစိုက် အဖွဲ့ဝင် ၂၅ ဦးပါ ပေါ်လစ်ဗျူ ရို (နိုင်ငံရေးဦးဆောင်)အဖွဲ့ အပါအဝင် ဆယ်ဂဏန်းမျှရှိသော တရုတ်ထိပ်တန်း အရာရှိများနှင့် ပူးပေါင်း ဆောင် ရွက်မှုများ ရှိခဲ့ကြောင်း ဆင်ဟွာက ဆက်လက် ရေးသားဖော်ပြသည်။
ရှီသည် ကာဇက်စတန်နှင့် ဥဇဘက်ကစ္စတန် နိုင်ငံများမှ ခရီးစဉ်အပြီး ဘေဂျင်းမြို့တော်သို့ ပြန်ရောက်ခဲ့ရာ ၁၀ ရက်အကြာ ကွန်ဂရက်နှင့် ပါတီခေါင်းဆောင်အဖြစ် တတိယသက်တမ်း ထပ်မံထမ်းဆောင်ဖို့ စပ်ကူးမတ်ကူး ကာလသို့ ရောက်ရှိလာခဲ့သည်။
စက်တင်ဘာ ၂၇ ရက်တွင် ပါတီသည် ရှီ၏ မူဝါဒပန်းတိုင်များကို ထောက်ခံအားပေးရန် ထင်ရှားသည့် ကြိုးပမ်းမှု များဖြင့် တရုတ်နိုင်ငံ၏ ပြန်လည် အားသစ်လောင်းစေရေး စာပေများ စုစည်းထုတ်ဝေမည်ဟု ကြေညာခဲ့သည်။
“ပြန်လည် အားသစ်လောင်း စေရေးစာစု” များဟု အမည်ပေးထားသည့် စာအုပ်အတွဲ ၅ တွဲ စုစည်းထုတ်ဝေမှုတွင် ရှီကျင့်ဖျင်၏ ထီးရိပ်မူဝါဒ ဆောင်ပုဒ်ဖြစ်သော ၎င်း ၂၀၁၂ ခုနှစ် အာဏာရလာချိန်မှစ၍ “တရုတ်ပြည် အားသစ် လောင်း” ၍ တဖန်နုပျို လန်းဆန်းလာပုံကို ပုံဖော်ရေးသားပြုစုထားသည်။
တရုတ်ကွန်မြူနစ်ပါတီ ထောက်ခံခြင်း (GETTY IMAGES)
“ကွန်မြူနစ်ပါတီရဲ့ ခိုင်မာတဲ့ ဦးဆောင်မှုအောက်မှာ တရုတ်ပြည်သူပြည်သားတွေဟာ တရုတ်ပြည်ရဲ့ကံကြမ္မာနဲ့ တိုးတက်မှုကို သူတို့လက်ထဲမှာ ကျစ်ကျစ်လစ်လစ် ဆုတ်ကိုင်နိုင်တဲ့ သမိုင်းကြောင်းကို ဆက်လက် ပြသသွားမှာ ဖြစ်ပါတယ်” ဟု ရှီကျင့်ဖျင်၏ အတွေးအခေါ်များ စာစုထဲ၌ နိဒါန်းပျိုးထားသည်ဟု ဆင်ဟွာက သတင်း ဆက် လက် ဖော်ပြသည်။
“မိမိတို့နိုင်ငံသည် ပါတီတည်ထောင်ချိန်မှစ၍ ယနေ့ ခေတ်သစ်သမိုင်းတွင် မကြုံစဖူး ကပ်ဆိုးဘေးဆိုးများ ကြုံတွေ့ခဲ့ရပြီး တရုတ်ပြည် ပြန်လည် အားသစ်လောင်းမှုကို အကောင်အထည်ဖော်ဖို့ မှန်ကန်သည့် လမ်းကြောင်း တွေ့ရှိခဲ့ပြီဖြစ်ကြောင်း” ရှီကျင့်ဖျင်က ၎င်း၏စာစုထဲတွင် ပြောကြားထားသည်။
Source: South China Morning Post
- By CNI
- Category: နိုင်ငံရေး
- Hits: 689
CNI International News
တိုကျို၊ စက်တင်ဘာ ၂၇
သူလျှိုလုပ်သည်ဟူသော စွပ်စွဲချက်ဖြင့် ဂျပန်သံတမန်တစ်ဦးကို ဖမ်းဆီးခဲ့ခြင်းအပေါ် ရုရှား ဝန်ချတောင်းပန်ရန် ဂျပန်အစိုးရက စက်တင်ဘာ ၂၇ ရက် (ယနေ့) တောင်းဆိုလိုက်ကြောင်း ဂျပန်တိုင်းမ်မီဒီယာ၏ သတင်း ဖော်ပြ ချက်အရ သိရသည်။
ရုရှားအာဏာပိုင်များ၏ စွပ်စွဲချက်ကို ဂျပန်က ငြင်းဆိုခဲ့ပြီး မယုံနိုင်စရာလုပ်ရပ်များဖြင့် မျက်ကွယ်ပြု အရေးယူ ခဲ့ခြင်းသာဖြစ်ကြောင်း တုံ့ပြန်ခဲ့သည်။
ရုရှားနိုင်ငံ၊ ဗလာဒီဗော့စတော့မြို့အရှေ့ပိုင်းတွင် ရုံးထိုင်သည့် ဂျပန်သံတမန်သည် တရားမဝင် သူလျှိုလုပ်သဖြင့် အရေးယူခံရခြင်းဖြစ်ကြောင်း ရုရှားနိုင်ငံခြားရေးဝန်ကြီးဌာန၏ထုတ်ပြန်ချက်ကို ကိုးကား၍ ဂျပန်အစိုးရထိပ်တန်း ပြောရေးဆိုခွင့်ရှိသူ ဟီရိုကာဇူးမက်ဆူနိုက သတင်းထောက်များကို ပြောကြားခဲ့သည်။
“ကျနော်တို့သံတမန်အရာရှိဟာ သူ့မျက်စိနှစ်ဘက်ကို ရုရှားအာဏာပိုင်တွေဘက်က အတင်းပိတ်ပြီး ဖမ်းဆီး စစ်ကြောမေးမြန်းတာ ခံခဲ့ရပါတယ်” ဟု ဟီရိုကာဇူးမက်ဆူနိုက ဆက်လက်ပြောကြားခဲ့သည်။
နောက်ပိုင်းတွင် ယင်းသံတမန်ကို ရုရှားတို့က ပြန်လွှတ်ပေးခဲ့ပြီး စက်တင်ဘာ ၂၈ ရက် (မနက်ဖြန်)တွင် ရုရှားနိုင်ငံ အတွင်းမှ ထွက်ခွာစေမည်ဖြစ်ကြောင်း ၎င်းက ဖြည့်စွက်ပြောကြားခဲ့သည်။
လက်ရှိ ဂျပန်ဝန်ကြီးချုပ် ကီရှီဒါ နိုင်ငံခြားရေးဝန်ကြီးအဖြစ် တာဝန်ထမ်းဆောင်စဉ်(ယာဘက်အစွန်း)၊ မကြာသေးခင်က လုပ်ကြံခံခဲ့ရသည့် ဂျပန်ဝန်ကြီးချုပ်ဟောင်း ရှင်ဇိုအာဘေး(အလယ်)တို့နှင့်အတူ ရုရှားသမ္မတ ဗလာဒီမာပူတင်(ဘယ်အစွန်း)တို့ကို တွေ့ရစဉ်(ဓါတ်ပုံ - ရိုက်တာ)
ဗလာဒီဗော့စတော့မြို့ရှိ ဂျပန်ကောင်စစ်ဝန်ချုပ် တက်ဆိနိုရီမိုတိုကီကို ၄၈ နာရီအတွင်း ရုရှားပြည်တွင်းမှ ထွက်ခွာရန် နှင်ထုတ်သည့်အမိန့်ကို ရုရှားအာဏာပိုင်များက ထုတ်ခဲ့သည်။
၎င်းကို နာရီအတန်ကြာအောင် ချုပ်နှောင်ခံထားရပြီးမှ ပြန်လွှတ်ပေးခြင်းဖြစ်ကြောင်း ဂျပန်အစိုးရက စက်တင်ဘာ ၂၇ ရက်(ယနေ့)တွင် ပြောကြားခဲ့သည်။
ယင်းဖြစ်စဉ်ကြောင့် ဂျပန်နိုင်ငံခြားရေးဝန်ကြီးဌာနက တိုကျိုမြို့ရှိ ဂျပန်ဆိုင်ရာရုရှားသံအမတ် မီခေးလ်ဂလူဇင်ကို စက်တင်ဘာ ၂၇ ရက်တွင် ဆင့်ခေါ်၍ ကန့်ကွက်ကြောင်း အသိပေးခဲ့သည်။
ကောင်စစ်ဝန်တစ်ဦးကို ဖမ်းဆီး၍ စစ်ကြောမေးမြန်းခြင်းသည် ကောင်စစ်ဝန်ဆက်ဆံရေးဆိုင်ရာ ဗီယင်နာ သဘောတူညီချက်ကို ပြောင်ပြောင်တင်းတင်း ချိုးဖောက်ရာရောက်ကြောင်း သတင်းထောက်များကို ဂျပန် နိုင်ငံခြားရေးဝန်ကြီး ယိုရှီမာစုဟာယာရှိက ပြောကြားခဲ့သည်။
မိမိတို့ကောင်စစ်ဝန်သည် တရားမဝင်လုပ်ရပ် ကျူးလွန်ခြင်းမရှိကြောင်းနှင့် ၎င်းဖမ်းဆီးထိန်းသိမ်းထားစဉ်အတွင်း ရုရှားအာဏာပိုင်များက အတင်းအကြပ်ဆက်ဆံခဲ့သဖြင့် ရုရှား၏လုပ်ရပ်များကို မိမိတို့လုံးဝလက်မခံနိုင်ကြောင်း ယိုရှီမာစုဟာယာရှိက ဆက်လက်ပြောကြားခဲ့သည်။
တိုကျိုအစိုးရသည် ပြီးခဲ့သည့်ဖေဖော်ဝါရီလက ယူကရိန်းသို့ ရုရှားမကျူးကျော်မီကပင် မော်စကိုအစိုးရနှင့် ရှုပ်ထွေးသောဆက်ဆံရေးရှိခဲ့ပြီး နှစ်နိုင်ငံစလုံးသည် ဒုတိယကမ္ဘာစစ်နောက်ပိုင်း ငြိမ်းချမ်းရေးသဘောတူ စာချုပ်ကို လက်မှတ်ရေးထိုးခြင်း ယခုအထိ မရှိသေးပေ။
Source: Japan Times
- By CNI
- Category: နိုင်ငံရေး
- Hits: 1035
CNI Internatioanl News
ဝါရှင်တန်၊ စက်တင်ဘာ ၂၇
အမေရိကန်ကာကွယ်ရေးဝန်ကြီး လွိုက်အော်စတင် (Lloyd Austin) သည် အိန္ဒိယပြည်ပရေးရာဝန်ကြီး ဆူဘရာ မန်ယန် ဂျိုင်ရှန်ကာ (Subrahmanyam Jaishankar) ကို စက်တင်ဘာ ၂၆ ရက်တွင် အမေရိကန်နိုင်ငံ၊ ပင်တဂွန် စစ်ဌာနချုပ်တွင် လက်ခံတွေ့ဆုံခဲ့ပြီး နှစ်နိုင်ငံကာကွယ်ရေး ပူးပေါင်းဆောင်ရွက်မှု နက်နက်ရှိုင်းရှိုင်း ဖြစ်စေမည့် နည်းလမ်းများ ဆွေးနွေးခဲ့ကြကြောင်း အာရ်တီသတင်းအရ သိရသည်။
ဝန်ကြီးနှစ်ဦးတို့သည် လွတ်လပ်၍ ပွင့်လင်းပြီး အားလုံးပါဝင်နိုင်သော အင်ဒို-ပစိဖိတ်ဒေသအတွက် အမေရိကန်နှင့် အိန္ဒိယတို့ အမြင်ချင်း ဖလှယ်ခဲ့ကြသည်။ ထို့ပြင် တည်ကြည်လေးနက်သော မိတ်ဖက်များအဖြစ် အတူတကွ ပူးပေါင်းသွားကြရန် ၎င်းတို့၏ ကတိကဝတ်ကို ထပ်လောင်း အတည်ပြုခဲ့ကြောင်း ပင်တဂွန်စစ်ဌာနချုပ်က သတင်း ထုတ်ပြန်ခဲ့သည်။
ဝါရှင်တန်၏ အမြင်တွင် အင်ဒို-ပစိဖိတ်ဒေသအတွက် အဓိကစိန်ခေါ်မှုမှာ တောင်တရုတ်ပင်လယ်၌ ဒေသတွင်း နိုင်ငံအသီးသီးနှင့် နယ်မြေအငြင်းပွားမှု ရှိနေခဲ့သည့် တရုတ်နိုင်ငံ ဖြစ်သည်။
တရုတ်နဲ့ အိန္ဒိယ နယ်စပ်အငြင်းပွားမှုဖြစ်ပွားခဲ့စဉ် (GETTY IMAGES)
ထို့ပြင် ဘေဂျင်းအစိုးရသည် ထိုင်ဝမ်ကို ၎င်း၏ခွဲထွက် ပြည်နယ် အစိတ်အပိုင်းတစ်ခုဟု သတ်မှတ်ထားပြီး ပြန်လည် ပေါင်းစည်းရန် ဆုံးဖြတ်ထားသည်။
အထူးသဖြင့် အမေရိကန်အောက်လွှတ်တော်ဥက္ကဋ္ဌ နန်စီပလိုစီ ပြီးခဲ့သည့် ဩဂုတ်လတွင် ကိုယ်ပိုင်အုပ်ချုပ်နေ သည့် ထိုင်ဝမ်ကျွန်းသို့ လာရောက် လည်ပတ်ပြီး နောက်ပိုင်း ကျွန်း၏အရေးကြောင့် အမေရိကန်နှင့်တရုတ်တို့ အကြား တင်းမာမှုများ ပိုမိုတိုးလာခဲ့သည်။
တရုတ်သည် ဝါရှင်တန်အစိုးရနှင့် စစ်ရေး၊ ရာသီဥတု ပြောင်းလဲမှုဆိုင်ရာ ဆက်ဆံရေးတို့ကို ဖြတ်တောက်ခဲ့ပြီး ထိုင်ဝမ်ရေလက်ကြားတွင် အကြီးစား စစ်ရေးလေ့ကျင့်မှုများ ပြုလုပ်ခြင်းဖြင့် တုံ့ပြန်ခဲ့သည်။
“အထူးသဖြင့် ထိုင်ဝမ်နဲ့ပတ်သက်ပြီး တရုတ်ရဲ့ရန်လိုမှုတွေ တိုးလာနေတာကြောင့် ဒေသတွင်း လုံခြုံရေးအတွက် အင်မတန် အရေးကြီးပါတယ်။ အရင်လတွေ တုန်းကလည်း တရုတ်ပြည်သူ့သမ္မတနိုင်ငံက နိုင်ငံတကာ စည်းမျဉ်း စည်းကမ်းကို စိန်ခေါ်ဖို့ အရှိန်မြှင့်လာတာကို ကျနော်တို့ တွေ့ရပါတယ်” ဟု လွိုက်အော်စတင်က ပြောကြားခဲ့ သည်။
နန်စီပလိုစီ ထိုင်ဝမ်ကို သွားရောက်ခဲ့စဉ်(GETTY IMAGES)
အမေရိကန်နှင့်အိန္ဒိယတို့သည် ကမ္ဘာတလွှား ငြိမ်းချမ်းရေး၊ လုံခြုံရေးနှင့် သာယာဝပြောရေးတို့အတွက် စိန်ခေါ် မှုများကို အဆက်မပြတ် ရင်ဆိုင်နေရကြောင်း အော်စတင်က ထပ်လောင်းပြောကြားခဲ့သည်။
ယူကရိန်းပဋိပက္ခနှင့် ပတ်သက်ပြီး ရုရှားကို ရှုတ်ချ၍ သီးခြားအထီးကျန်စေဖို့ ငြင်းဆိုခဲ့သည့် ဘေဂျင်း၏ အပြုအမူ ကိုလည်း ၎င်းက အပြစ်တင်ခဲ့သည်။
စက်တင်ဘာ ၂၆ ရက်၌ အော်စတင်နှင့် တွေ့ဆုံမှုတွင် အိန္ဒိယဝန်ကြီး ဂျိုင်ရှန်ကာက ယူကရိန်းအရေးကိစ္စကို အနည်းငယ်သာ ထည့်သွင်းဆွေးနွေးခဲ့ပြီး “အထူးသဖြင့် အင်ဒို-ပစိဖိတ်ဒေသဟာ အကြောင်းပြချက် အမျိုးမျိုးနဲ့ ဒီနှစ် ကမ္ဘာ့အခြေအနေအတွက် စိန်ခေါ်မှုတွေ ထပ်တိုးလာပါတယ်။ အင်ဒို-ပစိဖိတ်ဒေသ တည်ငြိမ်ရေး၊ လုံခြုံရေး နဲ့ သာယာဝပြောရေးတို့ စိတ်ချလုံခြုံစေဖို့ အရေးကြီးပါတယ်။ ကျနော်တို့နှစ်နိုင်ငံ ပူးပေါင်းဆောင်ရွက်မှုဟာ တခြား နိုင်ငံတွေအတွက်လည်း အကောင်းဆုံး လုပ်ဆောင်တာ ဖြစ်ပါတယ်” ဟု ပြောကြားခဲ့သည်။
Source: အာရ်တီသတင်းဌာန
- By CNI
- Category: နိုင်ငံရေး
- Hits: 787
CNI International News
မော်စကို၊ စက်တင်ဘာ ၂၇
တရားစွဲဆိုခံထားရမှုမှ တိမ်းရှောင်ထွက်ပြေးနေသည့် အမေရိကန် ထောက်လှမ်းရေး ကန်ထရိုက်တာဟောင်း အက်ဒွပ်စနိုဒင် (Edward Snowden) ကို ရုရှားက နိုင်ငံသားဖြစ်ခွင့် ပေးလိုက်ကြောင်း အေပီသတင်းတစ်ပုဒ်တွင် တွေ့ရသည်။
၎င်းသည် ကမ္ဘာတဝန်းမှ ဆက်သွယ်ရေးနှင့် အရေးကြီး အချက်အလက်များကို ကြားဖြတ်ဖမ်းယူလေ့ရှိသည့် အမေရိကန် ထောက်လှမ်းရေးစနစ်များကို ဖွင့်ချခဲ့ပြီးနောက် အမေရိကန်နိုင်ငံမှ တိမ်းရှောင်ထွက်ပြေးခဲ့သည်မှာ နှစ်ပေါင်းကြာမြင့်လှပြီ ဖြစ်သည်။
စက်တင်ဘာ ၂၆ ရက်တွင် ရုရှားသမ္မတ ဗလာဒီမာပူတင် လက်မှတ်ရေးထိုးပေးခဲ့သည့် အမိန့်အရ “စနိုဒင်ကို ရုရှား နိုင်ငံသားအဖြစ် အသိအမှတ်ပြုခံရသူ နိုင်ငံခြားသား ၇၅ ဦး စာရင်းထဲတွင် တစ်ဦးအဖြစ် အကျုံးဝင်ကြောင်း” သိရ သည်။
စနိုဒင်သည် ၂၀၁၃ ခုနှစ်တွင် အမေရိကန်မှ ထွက်ပြေးလာပြီးနောက် ၂၀၂၀ ပြည့်နှစ်တွင် ရုရှားနိုင်ငံ၌ အမြဲတမ်း နေထိုင်ခွင့် ရရှိခဲ့သည်။ တစ်ချိန်တည်းတွင် ၎င်းသည် မူလ အမေရိကန်နိုင်ငံသား ဖြစ်တည်မှုကိုလည်း မစွန့်လွှတ် ဘဲ ရုရှားနိုင်ငံသား ဖြစ်ခွင့်ကိုပါ လျှောက်ထားရန် စီစဉ်ထားကြောင်း ထုတ်ဖော်ပြောကြားခဲ့သည်။
အက်ဒွပ်စနိုဒင်ကိုတွေ့ရစဉ် (GETTY IMAGES)
ယူကရိန်းသို့ အထူးစစ်ဆင်ရေးဟု ပူတင် တံဆိပ်ကပ်ခဲ့သည့် ကျူးကျော်စစ်ကြောင့် လက်ရှိအနေအထားတွင် ဝါရှင်တန်နှင့် မော်စကိုတို့အကြား ဆက်ဆံရေးမှာ ဆယ်စုနှစ်များအတွင်း အနိမ့်ဆုံး အခြေအနေသို့ ရောက်ရှိနေပြီ ဖြစ်သည်။
အသက် ၃၉ နှစ်ရှိ စနိုဒင်ကို ထောက်ခံသူများက အမေရိကန်ပြည်သူများ၏ လွတ်လပ်ခွင့်ကို ကာကွယ်လိုသည့် ဖြောင့်မှန်သော သတင်းပေးသူအဖြစ် ယူဆကြသော်လည်း အမေရိကန် ထောက်လှမ်းရေး အရာရှိများကတော့ ၎င်းသည် အမေရိကန်အစိုးရဝန်ထမ်းများကို အန္တရာယ်ရှိစေပြီး နိုင်ငံတော်လုံခြုံရေး ထိခိုက်စေသည်ဟု စွပ်စွဲထား သည်။
မျက်မှောက် ကာလတွင်လည်း ၎င်းသည် အမေရိကန်နိုင်ငံ၌ ထောင်ဒဏ် ဆယ်စုနှစ်နှင့်ချီ၍ ချမှတ်နိုင်သော စွဲချက်များ အတင်ခံထားရသည်။
“ကျနော်တို့ ရပ်တည်ချက်က မပြောင်းပါဘူး။ မစ္စတာစနိုဒင်ဟာ တခြား အမေရိကန် နိုင်ငံသားတွေလိုပဲ တရား ဥပဒေကို ရင်ဆိုင်သင့်တယ်။ အမေရိကန်ကို သူ ပြန်လာသင့်တယ်” ဟု အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ နက်ပရိုက်စ် (Ned Price) က စက်တင်ဘာ ၂၆ ရက်တွင် ပြောကြားခဲ့သည်ဟု အေပီက သတင်း ဆက်လက် ရေးသားထားသည်။
Source: AP
- By CNI
- Category: နိုင်ငံရေး
- Hits: 1061
CNI International News
၂၀၂၂ ခုနှစ်၊ စက်တင်ဘာ ၂၆
အီရန်ရဲများ ဖမ်းဆီးချုပ်နှောင်ထားစဉ်အတွင်း အသတ်ခံခဲ့ရသည့် မာရှားအေမီနီ ဖြစ်စဉ်ကြောင့် စက်တင်ဘာ ၂၃ ရက်၌ ဘာလင်မြို့၊ ဘရန်ဒန်ဘာ့ဂ်ဂိတ်ရှေ့တွင် လူစုလူဝေးပြုလုပ်၍ ဆန္ဒပြခဲ့ကြစဉ်။
- By CNI
- Category: နိုင်ငံရေး
- Hits: 908
CNI International News
၂၀၂၂ ခုနှစ်၊ စက်တင်ဘာ ၂၆
ရဲတပ်ဖွဲ့၏ လက်ချက်ဖြင့် ကာ့ဒ်အမျိုးသမီးငယ် မာရှားအေမီနီ (Mahsa Amini) သေဆုံးမှုနှင့် ပတ်သက်၍ နိုင်ငံတဝန်း ပျံ့နှံ့နေသော ဆန္ဒပြပွဲများကို အစိုးရအနေဖြင့် ပြတ်ပြတ်သားသားတုံ့ပြန်မည်ဟု အီရန်သမ္မတ အီဘရာဟင်ရိုင်စီက အတိအလင်းပြောကြားခဲ့သည်။
အဆိုပါဆန္ဒပြမှုများသည် အီရန်နိုင်ငံအတွင်းရှိ အနည်းဆုံးမြို့ပေါင်း ၁၃၃ မြို့သို့ ပျံ့နှံ့သွားခဲ့သည်။