CNI International News

တီဟီရန်၊ နိုဝင်ဘာ ၂၉

နိုင်ငံတဝန်း ဆူပူအုံကြွ၍ မတည်ငြိမ်မှုများကြောင့် ၂ လအတွင်း သေဆုံးသူ ၃၀၀ ကျော် သွားခဲ့ပြီဖြစ်ကြောင်း အီရန် စစ်ဗိုလ်ချုပ်ကြီးတစ်ဦးက နိုဝင်ဘာ ၂၈ ရက်တွင် တရားဝင် ဝန်ခံပြောကြားခဲ့သည်ဟု အေပီသတင်းအရ သိရသည်။

ထိုအရေအတွက်သည် ဆန္ဒပြပွဲ စတင်ချိန်ကတည်းက အနီးကပ် ခြေရာခံ စောင့်ကြည့်နေသည့် အမေရိကန် အခြေစိုက် လူ့အခွင့်အရေး လှုပ်ရှားသူများအဖွဲ့၏ ခန့်မှန်းချက်ထက် လျော့နည်းနေသည်။

အီရန်နိုင်ငံတွင် ပြီးခဲ့သည့် စက်တင်ဘာ ၁၆ ရက်၌ အကျင့်စာရိတ္တပြုပြင်ရေးအဖြစ် ရဲတပ်ဖွဲ့က ခေါ်ယူ ထိန်းသိမ်း ထားသော အမျိုးသမီးငယ်တစ်ဦး သေဆုံးခဲ့ပြီးနောက် နိုင်ငံတဝန်း ဆူပူအုံကြွမှုများ ဆက်တိုက်ဖြစ်ပွားခဲ့သည်။

ဆန္ဒပြသူများနှင့် လုံခြုံရေးတပ်ဖွဲ့ဝင်များ ထိပ်တိုက်တွေ့ဆုံစဉ်(ဓါတ်ပုံ-amnesty international)

စတင်အုံကြွခဲ့ပြီးနောက် ဆန္ဒပြသူ ၄၅၁ ဦးနှင့် လုံခြုံရေးတပ်ဖွဲ့ဝင် ၆၀ သေဆုံးခဲ့ပြီး ဖမ်းဆီးထိန်းသိမ်းခံရသူ ၁၈,၀၀၀ ကျော်ရှိကြောင်း အမေရိကန်အခြေစိုက် လူ့အခွင့်အရေးအဖွဲ့က ပြောသည်။

အစ္စလာမ္မစ်သမ္မတနိုင်ငံဖြစ်သော အီရန်တွင် ဝတ်စားဆင်ယင်မှုဆိုင်ရာ တင်းကျပ်မှုကို ချိုးဖောက်သည်ဟု စွပ်စွဲချက်ဖြင့် ဖမ်းဆီးထိန်းသိမ်းခံရသူ အသက် ၂၂ နှစ်အရွယ်ရှိ မာရှားအေမီနီ သေဆုံးခဲ့ရသဖြင့် ဆန္ဒပြမှုများ စတင်ခဲ့သည်။

အဆိုပါဖြစ်စဉ်သည် ၁၉၇၉ ခုနှစ် တော်လှန်ရေးနောက်ပိုင်း တိုင်းပြည်ကို တင်းကျပ်စွာ အုပ်ချုပ်ခဲ့သည့် ဘာသာရေးခေါင်းဆောင်များအတွက် အဆိုးရွားဆုံးစိန်ခေါ်များထဲမှ တစ်ခုဖြစ်လာခဲ့သည်။

ရုန်းရင်းဆန်ခတ်မှုများကြောင့် လူ ၃၀၀ ကျော်သေဆုံးခဲ့ရသည်ဟု အီရန်အရံတော်လှန်ရေးအစောင့်တပ်၊ အာကာသဆိုင်ရာဌာနခွဲမှ ဗိုလ်ချုပ်ကြီး အေမီယာအလီဟာဂျီဇာဒက် (Amir Ali Hajizadeh) က ပြောကြားကြောင်း အဆိုပါအစောင့်တပ်နှင့်နီးစပ်သော ဝက်ဘ်ဆိုက်တစ်ခုက ဖော်ပြခဲ့သည်။

အောက်တိုဘာတွင် ဖြစ်ပွားခဲ့သည့် အမျိုးသမီးအခွင့်အရေး ဆန္ဒပြပွဲများ(ဓါတ်ပုံ-Getty Images)

သေဆုံးသူအများစုသည် ဆန္ဒပြပွဲများတွင် ပါဝင်မိခဲ့ကြသော သာမန်အီရန်နိုင်ငံသားများဖြစ်ကြောင်း ၎င်းဗိုလ်ချုပ်ကြီးက ဝန်ခံခဲ့သည်။

၎င်းခန့်မှန်းသည့် အသေအပျောက်အရေအတွက်မှာ မည်သည့်သတင်းရင်းမြစ်ထံမှ လာကြောင်း အတိအကျတော့ ထည့်မပြောခဲ့ပေ။

အီရန်အာဏာပိုင်များသည် ပြည်တွင်းဆန္ဒပြပွဲများအခြေအနေကို မီဒီယာများ၌ ရေးသားဖော်ပြမှုများကို ပြင်းထန်စွာ ကန့်သတ်ထားခဲ့သည်။

အစိုးရမီဒီယာများက သေဆုံးသူဦးရေကို အပြည့်အဝ သတင်းထုတ်ပြန်ခြင်းမရှိသေးသလို လုံခြုံရေးတပ်ဖွဲ့ဝင် များ၏ ဖြိုခွင်းမှုများအစား စစ်သွေးကြွများနှင့် ခွဲထွက်ရေးအုပ်စုများကို အပြစ်တင်သည့်ဖော်ပြချက်မျိုးကိုသာ ဦးစားပေးရေးသားနေကြသည်။

အဆိုပါဆန္ဒပြပွဲများသည် အီရန်၏ရန်ဘက်များဖြစ်ကြသော အနောက်အုပ်စုနှင့်ဆော်ဒီအာရေဗျတို့ကြောင့် ပေါ်ပေါက်လာရကြောင်း ဗိုလ်ချုပ်ကြီး ဟာဂျီဇာဒက်က အထောက်အထားမပြသဘဲ ပြောကြားခဲ့သည်။

Source: AP

CNI International News

ဘရပ်ဆဲလ်၊ နိုဝင်ဘာ ၂၈

ကာတာနိုင်ငံ၌ ကျင်းပနေဆဲ ကမ္ဘာ့ဖလားပွဲ၌ မော်ရိုကိုအား ဘယ်လ်ဂျီယံက နှစ်ဂိုး-ဂိုးမရှိဖြင့် ရှုံးနိမ်ခဲ့ပြီးနောက် ဘယ်လ်ဂျီယံနိုင်ငံ၊ ဘရပ်ဆဲလ်မြို့လယ်ခေါင်၌ ဘောလုံးပရိတ်သတ်များ အဓိကရုဏ်းဖြစ်ပွားခဲ့၍ ရဲက မီးသတ် ပိုက်နှင့် မျက်ရည်ယိုဗုံးများသုံး၍ ဖြိုခွင်းခဲ့ရကြောင်း AFP သတင်းကို ကိုးကား၍ ဘန်ကောက်ပို့စ်က ရေးသား ဖော်ပြသည်။

ဆယ်ဂဏန်းမျှရှိသော ဘောလုံးပရိသတ်များသည် အရောင်းဆိုင်ပြတင်းပေါက်များကို ရိုက်ခွဲကြပြီး မော်တော် ယာဉ်များကို မီးတင်ရှို့ခဲ့ကြသည်။ အဓိကရုဏ်းများကြောင့် လူ ၁၁ ဦးကို ဖမ်းဆီးထားပြီး ကျန် ၁ ဦးကို အချုပ်ချ ထားခဲ့သည်။

ဘောလုံးပွဲတိုက်ရိုက်ထုတ်လွှင့်မှု မပြီးဆုံးခင်မှာပင် ခေါင်းစွပ်အင်္ကျီဝတ်ဆင်ထားသူအချို့အပါအဝင် လူဆယ် ဂဏန်းမျှ လမ်းပေါ်ထွက်လာပြီး အများပြည်သူလုံခြုံရေးနှင့် ပတ်ဝန်းကျင်ထိခိုက်ပျက်စီးဖြစ်အောင် ရဲတပ်ဖွဲ့နှင့် ထိပ်တိုက်တွေ့ရန် ကြိုးစားခဲ့ကြောင်း ဘရပ်ဆဲလ်မြို့တော်ရဲတပ်ဖွဲ့၏ထုတ်ပြန်ချက်တွင် ဖော်ပြထားသည်။

ကမ္ဘာ့ဖလားပြိုင်ပွဲတွင် မော်ရိုကိုက ဘယ်လ်ဂျီယံကို အနိုင်ရပြီးနောက် ဘရပ်ဆဲလ်တွင် အကြမ်းဖက်မှုတွေ ဖြစ်ပွားခဲ့စဉ်(ဓါတ်ပုံ-အေအပ်ဖ်ပီ)

ဆူပူမှုအချို့သည် တုတ်များကိုင်ဆောင်ထားပြီး မီးကျည်ပစ်ခတ်ခဲ့မှုကြောင့် သတင်းထောက်တစ်ဦး၏မျက်နှာတွင် ဒဏ်ရာရခဲ့သည်။

မြို့လယ်ခေါင်ရှိ အချို့နေရာများသို့ သွားလာခြင်းမှ ရှောင်ရှားကြရန် မြို့ခံများကို သတိပေးချက်ထုတ်ခဲ့ပြီး ရဲတပ်ဖွဲ့ဝင် ၁၀၀ ခန့် တာဝန်ချထားခဲ့သည်။

အကြမ်းဖက်မှု မပြန့်ပွားစေရန် မြေအောက်ဘူတာရုံများကို ယာယီပိတ်ခဲ့ပြီး လမ်းများပေါ် အတားအဆီးများ ကာရံခဲ့သည်။

ဒေသစံတော်ချိန် ည ၇ နာရီ (ဂရင်းနစ်စံတော်ချိန် ညနေ ၆ နာရီ) ဝန်းကျင်တွင် အခြေအနေ ပြန်လည် ငြိမ်သက်ခြင်းရှိ/မရှိ ထောက်လှမ်းရေးရဟတ်ယာဉ်တစ်စင်း ပျံသန်းလာချိန်မှာတော့ ဆန္ဒပြသူများသည် မော်တော်ယာဉ်၊ အမှိုက်ပုံးများနှင့် လျှပ်စစ်စကူတာ(အသေးစားယာဉ်)တို့ကို မီးတင်ရှို့နေကြောင်း AFP သတင်းထောက်က မြင်တွေ့ခဲ့ရသည်။

“ဒီနေ့မွန်းလွဲပိုင်း အဖြစ်အပျက်တွေကို အပြင်းထန်ဆုံး ရှုတ်ချပါတယ်။ရဲတပ်ဖွဲ့က တင်းတင်းကြပ်ကြပ် အရေးယူကိုင်တွယ်နေပြီဖြစ်လို့ မြို့လယ်ခေါင်ကို လောလောဆယ် မလာကြပါနဲ့လို့ အကြံပြု တိုက်တွန်း ချင်ပါတယ်။ ရဲတပ်ဖွဲ့ကလည်း အများပြည်သူ စည်းကမ်းထိန်းသိမ်းရေး တတ်နိုင်သမျှ လုပ်ဆောင်နေပါတယ်” ဟု ဘရပ်ဆဲလ်မြို့တော်ဝန် ဖီလစ်ပီကလို့စ် (Philippe Close) က တွစ်တာလူမှုကွန်ရက်တွင် ရေးသားခဲ့သည်။

Source: AFP, Bangkok Post

CNI International News

ရှန်ဟိုင်း၊ နိုဝင်ဘာ ၂၈

ကိုဗစ်ကပ်ရောဂါ နှိမ်နင်းရေးအတွက် တင်းကျပ်မှုများကြောင့် ဒေါသထွက်နေသော လူအုပ်ကြီးက ဩဇာကြီးမား လှသော တရုတ်သမ္မတ ရှီကျင့်ဖျင် ရာထူးမှ နုတ်ထွက်ရန် တောင်းဆိုခဲ့ကြကြောင်း အေပီသတင်းတွင် တွေ့ရ သည်။

တရုတ်ပြည်တွင်း မြို့ကြီး ၈ မြို့ရှိ အာဏာပိုင်များသည် အာဏာရကွန်မြူနစ်ပါတီအတွက် ရှားရှားပါးပါး တိုက်ရိုက် စိန်ခေါ်မှုကို ကိုယ်စားပြုသည့် ဆန္ဒပြပွဲများအား နိုဝင်ဘာ ၂၇ ရက်တွင် နှိမ်နင်းရန် ကြိုးစားခဲ့ကြသည်။

ရှီကျင့်ဖျင် ရာထူးမှ နုတ်ထွက်ရန်နှင့် တစ်ပါတီစနစ် အုပ်ချုပ်ရေး အဆုံးသတ်ဖို့ တောင်းဆိုသည့် ရှန်ဟိုင်းမြို့မှ ဆန္ဒပြသူများကို ရဲတပ်ဖွဲ့က ငရုတ်ကောင်းဖျန်းဆေးဖြင့် ဖြိုခွင်းရှင်းလင်းခဲ့သော်လည်း နောက်ထပ် နာရီပိုင်း အကြာတွင် ယင်းနေရာများ၌ပင် လူစုလူဝေး တဖန်ဖြစ်ပေါ်လာခဲ့သည်။

ဆန္ဒပြသူများကို ရဲတပ်ဖွဲ့က ထပ်မံနှိမ်နင်းခဲ့ပြီး ဖမ်းဆီးခံရသူများကို ဘတ်စ်ကားတစ်စင်းဖြင့် ခေါ်ထုတ်သွားခဲ့ ကြောင်း သတင်းထောက်တစ်ဦးက မြင်တွေ့ခဲ့ရသည်။

ရှီကျင့်ဖျင် ရာထူးက ဆင်းပေးဖို့ တောင်းဆိုနေကြ (AP)

နိုဝင်ဘာ ၂၅ ရက်နေ့ ကတည်းက စတင်ခဲ့သော ဆန္ဒပြမှုများသည် မြို့တော်ဘေဂျင်းနှင့် ဆယ်ဂဏန်းမျှ ရှိသော တက္ကသိုလ်ကျောင်းများသို့ ပျံ့နှံ့သွားခဲ့ရာ ဆယ်စုနှစ်များစွာအတွင်း အာဏာရကွန်မြူနစ်ပါတီ (CCP) ကို အကျယ် ပြန့်ဆုံး ဆန့်ကျင်မှုအဖြစ်သို့ ရောက်ရှိလာခဲ့သည်။

အေပီမှ အတည်ပြုနိုင်ခဲ့သည့် ရှန်ဟိုင်းမြို့ ဆန္ဒပြပွဲ သတင်းမှတ်တမ်း ဗွီဒီယိုဖိုင် တစ်ဖိုင်တွင် ၁၉၈၀ ပြည့်လွန် နောက်ပိုင်း ဩဇာအာဏာအကြီးဆုံး ရှီကျင့်ဖျင်၏ အမည်နှင့် တရုတ်ကွန်မြူနစ်ပါတီတို့ကို ထုတ်ဖော်အော်ဟစ်၍ “ရှီကျင့်ဖျင် ဆင်းပေး၊ CCP ဆင်းပေး”ဟု တောင်းဆိုခဲ့ကြကြောင်း တွေ့ရှိရသည်။

ကိုဗစ် ကပ်ရောဂါ စတင်ဖြစ်ပွားပြီး ၃ နှစ် အကြာအထိ တရုတ်နိုင်ငံသည် ရောဂါကူးစက်မှု ရပ်တန့်ရန် အပြင်း အထန် ကြိုးစားနေဆဲ တစ်ခုတည်းသော နိုင်ငံအဖြစ် ကျန်ရှိနေခဲ့သည်။

Zero Covid မဟာဗျူဟာအရ လူနေရပ်ကွက်များထဲသို့ ရက်သတ္တပတ် များစွာအတွင်း တစ်ကြိမ်သာ ထွက်ခွင့် ခွင့်ပြုထားသည်။

တရုတ်အာဏာပိုင်များ ဆန္ဒပြသူများကို တားဆီးနေစဉ်(AP)

မြို့ကြီးအချို့တွင် နေထိုင်သူပေါင်း သန်းနှင့်ချီ၍ နေ့စဉ် ဗိုင်းရပ်စ်စစ်ဆေးမှု ခံယူကြရသည်။

ထို့ကြောင့် တရုတ်ပြည်တွင်း၌ ကူးစက်ခံရသူ အရေအတွက်မှာ အမေရိကန်နှင့် အခြားနိုင်ငံကြီးများထက် လျော့ကျသွားသော်လည်း အများပြည်သူ သည်းခံနိုင်စွမ်းမှာ အားနည်းသွားခဲ့သည်။

အချို့နေရာများတွင် အိမ်တွင်း သီးခြားခွဲထား၍ နေထိုင်ရသူများအတွက် အစားအသောက်နှင့်ဆေးဝါးများ ချို့တဲ့နေခဲ့သည်။

ဗိုင်းရပ်စ် နှိမ်နင်းရေး ထိန်းချုပ်မှုများသည် ဆေးဝါးကုသမှုဆိုင်ရာ အကူအညီ ရယူရေး ကြိုးစားမှုများကို အဟန့်အတား ဖြစ်စေကြောင်း ကလေးနှစ်ဦး သေဆုံးခဲ့ရသည့် မိဘများက ထုတ်ဖော် ပြောကြားခဲ့ပြီးနောက် အာဏာရတရုတ်ကွန်မြူနစ်ပါတီမှာ လူထုဒေါသနှင့် ရင်ဆိုင်ခဲ့ရသည်။

Source: AP

CNI Intetnational  News

တီဟီရန်၊ နိုဝင်ဘာ ၂၈

အမေရိကန်ဘောလုံးအသင်းနှင့် အမေရိကန်နိုင်ငံရှိ လူမှုကွန်ရက် မီဒီယာပို့စ်များတွင် ၎င်းတို့၏ အစ္စလာမ္မစ် သမ္မတနိုင်ငံ(အီရန်)အလံပုံထဲမှ အလ္လာဟ်ဟူသော စကားလုံး အဖယ်ရှားခံရခြင်းနှင့် ပတ်သက်၍ အီရန်ဘောလုံး အဖွဲ့ချုပ်က ဖီ‌ဖာထံသို့ ကန့်ကွက်ကြောင်း တိုင်ကြားထားသည်ဟု သိရသည်။

လက်ရှိ ကမ္ဘာ့ဖလားပြိုင်ပွဲတွင် နိုဝင်ဘာ ၃၀ ရက်၌ အီရန်အသင်းနှင့် အမေရိကန်အသင်း ယှဉ်ပြိုင်ကစားကြမည့် ပွဲ မတိုင်မီ အထက်ပါအတိုင်း အီရန်ဘက်မှ ကန့်ကွက်မှု ပေါ်ပေါက်လာခဲ့သည်။

“အမေရိကန်ဘောလုံးအဖွဲ့ချုပ်ရဲ့ အင်စတာဂရမ်(Instagram)မှာ အီရန်အသင်း အလံထဲကနေ အလ္လာဟ်ရှင်မြတ် ရဲ့ အမှတ်လက္ခဏာကို ဖြုတ်ချ ဖယ်ရှားခဲ့ပါတယ်။ ဒါဟာ စံချိန်စံညွှန်း မညီတဲ့လုပ်ရပ်ပါ” ဟု အီရန်အစိုးရမီဒီယာ IRNA က နိုဝင်ဘာ ၂၇ ရက်တွင် သတင်းဖော်ပြခဲ့သည်။

“အမေရိကန်ဘောလုံးအဖွဲ့ချုပ်ကို ပြင်းထန်တဲ့ သတိပေးချက် ထုတ်ပေးဖို့ အီရန်ဘောလုံးအဖွဲ့ချုပ်ကနေ ဖီဖာထံ သို့ အီးမေးလ်တစ်စောင် ပေးပို့ခဲ့ပါတယ်” ဟု အဆိုပါသတင်းတွင် ရေးသားထားသည်။

ထိုတိုင်ကြားချက်အပေါ် ကမ္ဘာ့ဘောလုံးအဖွဲ့ချုပ်ဖြစ်သည့် ဖီဖာထံမှ အများသိအောင် တုံ့ပြန်ပြောကြားခြင်း မရှိသေးပေ။

အမေရိကန်နှင့် အီရန်တို့သည် ၁၉၈၀ ပြည့်နှစ်မှစ၍ သံတမန်ဆက်ဆံရေး ပြတ်တောက်ခဲ့သည်။

အီရန်အလံကို ပြောင်းလဲ ထားတဲ့ အုပ်စုတွင်း ဖော်ပြမှုကိုတွေ့ရစဉ် (GETTY IMAGES)

အမေရိကန်ဘောလုံးအဖွဲ့ချုပ် (USSF) က နိုဝင်ဘာ ၂၇ ရက်၊ နံနက်ပိုင်းတွင် ကြေညာချက်တစ်စောင် ထုတ်ပြန်ခဲ့ ရာတွင် ရဲများလက်ထဲ ဖမ်းဆီးခံရသူ အသက် ၂၂ နှစ်အရွယ် အီရန်အမျိုးသမီး မာရှားအေမီနီ သေဆုံးမှုကို ထည့် သွင်း ရေးသားခဲ့သည်။

၎င်းသေဆုံးမှုကို အကြောင်းပြု၍ အခြေခံလူ့အခွင့်အရေးအတွက် တိုက်ပွဲဝင်နေသည့် အီရန်အမျိုးသမီးများနှင့် အတူ USSF ကလည်း ရပ်တည်ကြောင်း ပြသသည့်အနေဖြင့် မိမိတို့လူမှုကွန်ရက်ပေါ် လွှင့်တင်ထားသည့် အီရန် အလံကို ပြောင်းလဲရန် ဆုံးဖြတ်ခဲ့သည်ဟု ကြေညာချက်ထဲတွင် ဆက်လက်ရေးသားထားသည်။

အီရန်အလံတွင် အနီ၊ အဖြူနှင့် အစိမ်းရောင်ဖြင့် အလျားလိုက်အစင်း ၃ ကြောင်း၏ အလယ်ခေါင်တွင် အလ္လာဟ်ဟူ သော စကားလုံးကို ခတ်နှိပ်ထားသည်။

ထို့ပြင် အမေရိကန်အမျိုးသား ဘောလုံးအသင်း၏ တွစ်တာ account တွင် အုပ်စုအဆင့် ပွဲစဉ်များကို ဖော်ပြရာ၌ အီရန်အလံကို အနီ၊ အဖြူ၊ အစိမ်းရောင် အစင်းများသာ ပါရှိပြီး အလ္လာဟ်ဟူသော စကားလုံးကို ဖြုတ်ချထား ကြောင်း တွေ့ရှိရသည်။

အလားတူ အမေရိကန်အသင်း၏ ဖေ့စ်ဘွတ်နှင့် အင်တာဂရမ်များတွင် အုပ်စုအတွင်း ရမှတ် စုစုပေါင်း ဖော်ပြရာ၌ အီရန်အလံကို ထိုကဲ့သို့ ပြောင်းလဲ ပြင်ဆင်ထားသည်။

Source: Aljazeera

CNI International News

လန်ဒန်၊ နိုဝင်ဘာ ၂၈

ယူကရိန်းသို့ ဗြိတိန်၏ စစ်ရေးအကူအညီကို ၂၀၂၃ ခုနှစ်တွင် တိုးမြှင့်သွားရန် ဗြိတိန်ဝန်ကြီးချုပ် ရီရှီဆန်းနက် (Rishi Sunak) ၏ရုံးက နိုဝင်ဘာ ၂၈ ရက်နေ့တွင် ကြေညာနိုင်ဖွယ်ရှိကြောင်း တာ့စ်သတင်းဌာနက ရေးသားဖော် ပြသည်။

“ယူကရိန်းပြည်သူတွေကို ကျနော်တို့က သံသယကင်းကင်းနဲ့ အချိန်ကြာကြာ ရပ်တည်ပေးသွားမယ်။ လာမယ့်နှစ် မှာ ကျနော်တို့ရဲ့ စစ်ရေးအကူအညီ ဆက်ပေးမယ် (ဒါမှမဟုတ်) တိုးမြှင့်ပေးသွားမယ်။ ပြီးတော့ ယူကရိန်းပြည်သူ တွေကို အကာအကွယ်ပေးဖို့ လေကြောင်းရန်ကာကွယ်ရေး အထောက်အပံ့သစ်တွေ ပို့ပေးသွားမယ်။ ယူကရိန်းကို ကာကွယ်ခြင်းဟာ ကျနော်တို့ကိုယ်ကို ကာကွယ်ရာလည်း ရောက်ပါတယ်” ဟု ၎င်း၏ရုံးက ပြောကြားခဲ့သည်။

လန်ဒန်မြို့ရှိ ဂီးလ်ခန်းမ (Guildhall) တွင် ကျင်းပသည့် အခမ်းအနားတစ်ခု၌ ဝန်ကြီးချုပ် ဆန်းနက်က အထက်ပါ ကိစ္စကို အတည်ပြု ကြေညာသွားနိုင်မည်ဟု မျှော်လင့်ရသည်။

ရီရှီဆန်းနက်နဲ့ ဇာလန်းစကီးကိုတွေ့ရစဉ် (AP)

ထို့ပြင် ၎င်း၏ ပထမဆုံး နိုင်ငံခြားရေးမူဝါဒ မိန့်ခွန်းတွင် ဆန်းနက်က ဗြိတိန်နိုင်ငံအတွက် ရေရှည်ကျင့်သုံးမည့် မဟာဗျူဟာ တစ်ရပ်လိုကြောင်း ချပြသွားရန် ပြင်ဆင်ထားသည်။

“ကျနော်တို့ ဦးဆောင်မှုအောက်မှာ လက်ရှိအနေအထား ရပ်တည်ချက်ကို ဆက်ရွေးမှာ မဟုတ်ဘူး။ ကွဲပြားခြား နားတဲ့ အသွင်အပြင်နဲ့ ကျနော်တို့ လုပ်မယ်။ လွတ်လပ်မှု၊ ပွင့်လင်းမှုနဲ့ တရားဥပဒေစိုးမိုးရေးတို့မှာ ကျနော်တို့က ခိုင်မာယုံကြည်ချက်နဲ့ ဆက်လက် ရပ်တည်သွားမယ်။ ဒီလို စိန်ခေါ်မှုနဲ့ ပြိုင်ဆိုင်မှုရှိနေတဲ့ အခိုက်အတန့်မှာ  ကျနော်တို့ အကျိုးစီးပွားကို ကာကွယ်ပေးဖို့ ကျနော်တို့ရဲ့ တန်ဖိုးတွေကို အလေးပေး လုပ်ဆောင်သွားမှာ ဖြစ်ပါ တယ်” ဟု ဝန်ကြီးချုပ်ရုံးက ဆက်လက် ပြောကြားခဲ့သည်။

“ကျနော်တို့ရဲ့ရန်သူတွေနဲ့ ပြိုင်ဖက်တွေကို ရေရှည်ရင်ဆိုင်သွားနိုင်ဖို့ အစီအစဉ်တွေ ရေးဆွဲထားပါတယ်။ ဒီလို ရင်ဆိုင်နိုင်ဖို့ ရေတိုတွေးခေါ်မှုမျိုးနဲ့ မလုံလောက်ပါဘူး။ ဒါကြောင့် ကျနော်တို့ရဲ့ ချဉ်းကပ်မှုမှာ ဆင့်ကဲဖြစ်စဉ် တွေကို ကျော်လွှားသွားမယ်။ ဆိုလိုချင်တာကတော့ ကျနော်တို့ရဲ့ တန်ဖိုးတွေကို အကာအကွယ်ပေးတဲ့ နေရာမှာ ပိုအားကောင်းဖို့နဲ့ ပွင့်လင်းမြင်သာမှု ဖြစ်ပါတယ်” ဟု ရီရှီဆန်းနက်က ၎င်း၏မိန့်ခွန်းထဲတွင် ထည့်သွင်း ပြောကြား မည်ဟု ဝန်ကြီးချုပ်ရုံး၏ အဆိုအရ သိရသည်။

လက်နက်ခဲယမ်းများကို တွေ့ရစဉ် (AP)

ဆန်းနက် ဦးဆောင်သော အစိုးရသစ်သည် ကြီးမားသော ပထဝီဝင်နိုင်ငံရေး ပြောင်းလဲမှုများကို ထည့်သွင်းစဉ်းစား ရန်၊ ဗြိတိန်၏ လက်ရှိ လုံခြုံရေး၊ ကာကွယ်ရေး၊ ဖွံ့ဖြိုးတိုးတက်ရေးနှင့် နိုင်ငံခြားရေးမူဝါဒဆိုင်ရာ တို့ကို ပြန်လည် သုံးသပ်ရန်နှင့် အဆင့်မြှင့်တင်ရန် လုပ်ဆောင်နေသည်ဟု ဝန်ကြီးချုပ်ရုံးက ထပ်လောင်း ပြောကြားခဲ့သည်။

ယူကရိန်းသို့ ဗြိတိန်၏ စစ်ရေးအကူအညီ ပမာဏမှာ ပေါင် ၃ ဘီလီယံ (ဒေါ်လာ ၃ ဒသမ ၆ ဘီလီယံ) ကျော်သွား ပြီဟု နိုဝင်ဘာ ၁၉ ရက်၌ ၎င်း၏ယူကရိန်း ခရီးစဉ်အတွင်း ပြောကြားခဲ့သည်။

ဗြိတိန်သည် ယူကရိန်းသို့ NLAW တင့်ကား ချေမှုန်းရေးစနစ်ပေါင်း ၇ဝဝဝ နီးပါး၊ သံချပ်ကာယာဉ် အစင်း ၁၀၀ ကျော်၊ Starstreak ဒုံးကျည်များ အပါအဝင် Stormer မောင်းသူမဲ့ လေကြောင်းရန် ကာကွယ်ရေး (ဒရုန်း ချေမှုန်း ရေး) စက်သေနတ်များ၊ M109 ဟောင်ဝပ်ဇာများနှင့် L119 လက်နက်များ ၊ M270 MLRS အမျိုးအစား လက်နက် များ၊ အမြောက်ကျည်ဆန် ၁၆ဝဝဝ ကျော်၊ ခဲယမ်းမီးကျောက်များနှင့် ပလတ်စတစ် ဖောက်ခွဲရေးပစ္စည်းများ ၄ ဒသမ ၅ တန်တို့ကို ပေးအပ်ခဲ့ပြီး ဖြစ်သည်။

Source: တာ့စ်သတင်းဌာန

CNI International News

ရွိုင်ယိုဒီဂျနီးရိုး၊ နိုဝင်ဘာ ၂၆

ပြီးခဲ့သည့် အောက်တိုဘာလ အထွေထွေရွေးကောက်ပွဲတွင် ရှုံးနိမ့်ခဲ့မှုကို လက်ခံရန် အပြင်းအထန် ငြင်းဆန်နေသည့် လက်ရှိသမ္မတ ဂျိုင်ယာဘော်ဆိုနာရိုကို ထောက်ခံအားပေးသူများက လမ်းများပိတ်ဆို့ပြီး ဘရာဇီးလ်နိုင်ငံ၊ မက်တိုဂရော်ဆိုပြည်နယ်ရှိ စစ်ဘက် အဆောက်အအုံ အပြင်ဘက်၌ စခန်းချ၍ ဆန္ဒပြနေခဲ့ကြသည်။

ဆန္ဒပြသူများသည် အကြမ်းဖက်မှုများလည်း ကျူးလွန်ကြပြီး ၎င်းတို့အကြောင်းပြချက်မှာ ရွေးကောက်ပွဲရလဒ် အပေါ် မကျေလည်မှုနှင့် ဒီမိုကရေစီမဆန်ဘဲ အသွင်ကူးပြောင်းရေးကြောင့် ဖြစ်သည်။ ၎င်းတို့၏ လုပ်ရပ်များကို ကြိုတင်ထိန်းသိမ်းရန်အတွက် ဖက်ဒရယ်တရားသူကြီးက အမိန့်တစ်ရပ် ထုတ်ပေးခဲ့သည်။

ရွေးကောက်ပွဲရလဒ် မကျေနပ်တဲ့ ဘော်ဆိုနာရို ထောက်ခံသူများ ဆန္ဒပြနေကြစဉ် (AP)

အပူဒဏ်မှ သက်သာရန် ဘားတစ်ခု၌ ထိုင်၍ အဖျော်ယမကာ သောက်စားနေသူ အမျိုးသားနှစ်ဦးကို ရဲက နိုဝင်ဘာ ၂၁ ရက်၌ ဖမ်းဆီးခဲ့သည်။ ၎င်းတို့သည် ကုန်တင်ယာဉ်နှင့် လူနာတင်ယာဉ်များကို မိုလိုတော့ဗ် (ဓာတ်ဆီ ပုလင်းဗုံး)ဖြင့် မီးရှို့ကြောင်း စွပ်စွဲချက်ဖြင့် ရဲက ဖမ်းဆီးခဲ့ခြင်း ဖြစ်သည်။

ဘော်ဆိုနာရိုကို ထောက်ခံသူများသည် လက်နက်ကိုင်တပ်ဖွဲ့များ၏ ကြားဝင်စွက်ဖက်မှု (သို့မဟုတ်) တပ်မှူးများ ချီတက်ကြရန် တောင်းဆိုနေကြပြီး နိုင်ငံတဝန်း အခြားပြည်နယ်များတွင် ဆူပူဆန္ဒပြခဲ့ကြသည်။

ရွေးကောက်ပွဲ ရှုံးနိမ့်ပြီးကတည်းက ဘော်ဆိုနာရိုသည် ယခုဆန္ဒပြမှုများ တရားဝင်ကြောင်းနှင့် ပြည်သူများ အသွားအလာ အဟန့်အတားမဖြစ်မချင်း ဆက်လက်ဆန္ဒပြကြရန် တိုက်တွန်းကြောင်း ပြောကြားခဲ့သည်။

 ရွေးကောက်ပွဲရလဒ် မကျေနပ်တဲ့ ဘော်ဆိုနာရို ထောက်ခံသူများ ဆန္ဒပြနေကြစဉ် (AP)

ထို့ပြင် မကြာသေးမီက ဖြစ်ပွားခဲ့သည့် အကြမ်းဖက်မှု ဖြစ်စဉ်များကိုလည်း ဘော်ဆိုနာရိုက ကန့်ကွက်ရှုတ်ချခြင်း မပြုခဲ့ပေ။

ဆန္ဒပြပွဲ အများစုသည် ငြိမ်းချမ်းစွာ စီတန်းလှည့်လည်ခြင်း ဖြစ်ကြသော်လည်း နောက်ပိုင်းတွင် အာဏာပိုင်များ အပေါ် သဘောထား တင်းမာသူများ ပါဝင်လာကြပြီး နည်းဗျူဟာအချို့ကို စတင်သုံးစွဲလာခဲ့သည်။

၎င်းတို့၏ လှုပ်ရှားမှုများသည် ပြောက်ကျားတိုက်ခိုက်ရေးသမားများ၊ ပြည်သူ့စစ်များနှင့် ပြည်တွင်း အကြမ်းဖက် သမားများနှင့် နှိုင်းယှဉ်၍ရကြောင်း ပြည်နယ်အစိုးရရှေ့နေချုပ် ဂျိုစီအန်တိုနီယိုဘော်ဂက်က ပြောကြားခဲ့သည်။

မက်တိုဂရော်ဆိုပြည်နယ်သည် ဘရာဇီးလ်ပြည်တွင်း ဆူပူအုံကြွမှုများအနက် အဓိကတစ်နေရာဖြစ်နေပြီး ဆန္ဒပြ သူများက လက်လုပ်ဗုံးများ၊ မီးရှူးမီးပန်းများ၊ သံတုတ်များ၊ ကျောက်တုံးများ၊ မော်တော်ကား တာယာများဖြင့် အဝေးပြေးလမ်းမများကို ပိတ်ဆို့ခဲ့ကြကြောင်း အဝေးပြေးလမ်း တာဝန်ကျရဲတပ်ဖွဲ့က ပြောကြားခဲ့သည်။

Source: AP

CNI International News

ကိယက်ဗ်၊ နိုဝင်ဘာ ၂၆

ယူကရိန်းကို ဥရောပသမဂ္ဂ (EU) ထဲသို့ နောက်ဆုံး ဝင်ရောက်ခွင့်ပြုသည့်တိုင် မိမိတို့နိုင်ငံသူ၊ နိုင်ငံသားများသည် နှစ်နှင့်ချီ၍ အပူပေးစနစ်နှင့် လျှပ်စစ်ဓာတ်အား ပြတ်တောက်မှုဒဏ်ကို ခံနိုင်ရည်ရှိကြကြောင်း ယူကရိန်းသမ္မတ ကတော် အယ်လီနာဇာလန်းစကာ (Elena Zelenskaya)က နိုဝင်ဘာ ၂၅ ရက်၌ ဘီဘီစီနှင့်တွေ့ဆုံမေးမြန်းခန်း၌ ပြောကြားခဲ့သည်။

ယူကရိန်း၏ စွမ်းအင်ဆိုင်ရာ စက်ရုံများကို ပြီးခဲ့တဲ့ရက်များအတွင်းက ရုရှားတိုက်ခိုက်ခဲ့ပြီးနောက် ဗြိတိန်ရုပ်သံ ဌာန ဘီဘီစီနှင့် သမ္မတကတော်တို့ တွေ့ဆုံခဲ့ကြခြင်း ဖြစ်သည်။

ယူကရိန်းအနေဖြင့် EU အဖွဲ့ဝင် တစ်နေရာ အောင်မြင်စွာ ဖြစ်လာသည့်အခါ ယခုဆောင်းရာသီ အအေးဒဏ်ကို နိုင်ငံသူ၊ နိုင်ငံသားများ ကြံ့ကြံ့ခံကြဖို့ အသင့်ဖြစ်နေကြောင်း ၎င်းက ပြောကြားခဲ့သည်။

မကြာသေးမီက ကောက်ယူခဲ့သော စစ်တမ်းတစ်စောင်အရ ယူကရိန်းနိုင်ငံသား ၉၀ ရာခိုင်နှုန်းသည် EU အဖွဲ့ဝင် ဖြစ်လာခဲ့သည့်တိုင်အောင် နှစ်နှစ်မှ သုံးနှစ်ကြာသည်အထိ လျှပ်စစ်ဓာတ်အား ပြတ်တောက်မှုနှင့် အပူပေးစနစ် ကင်းမဲ့ခြင်းတို့ကို ကြုံတွေ့ရလိမ့်ဦးမည်ဟု သိရသည်။

ဥရောပကော်မရှင်ဥက္ကဋ္ဌ အာဆူလာဗွန်ဒါလေးယန်းနဲ့ ဇာလန်းစကီးကိုတွေ့ရစဉ် (GETTY IMAGES)

“ကျမတို့မှာ ကြောက်စရာကောင်းတဲ့ စိန်ခေါ်မှုတွေ အများကြီး ရှိခဲ့ဖူးပါတယ်။ စတေးခံ ဘဝတွေ အများကြီး တွေ့ခဲ့ရတယ်။ ပျက်စီးမှုကလည်း တော်တော်များပါတယ်။ မီးပြတ်တာလောက်ကတော့ ကျမတို့အတွက် အဆိုးဆုံး မဟုတ်တော့ဘူး” ဟု သမ္မတကတော်က ဘီဘီစီသို့ ပြောကြားခဲ့သည်။

ဥရောပကော်မရှင်ဥက္ကဋ္ဌ အာဆူလာဗွန်ဒါလေးယန်း (Ursula von der Leyen) ၏ စေ့ဆော်မှုကြောင့် ယူကရိန်း သည် ပြီးခဲ့သည့် ဖေဖော်ဝါရီလတွင် EU အဖွဲ့သို့ ဝင်ရောက်ရေး လျှောက်ထားခဲ့ရာ ဇွန်လတွင် EU အဖွဲ့ဝင် အလောင်းအလျာ ဖြစ်လာခဲ့သည်။

သို့သော် ယူကရိန်းသည် အိမ်နီးချင်း ရုရှား၏ တိုက်ခိုက်မှု ခံနေရသဖြင့် EU အဖွဲ့ဝင် အပြည့်အဝ ဖြစ်လာရေးမှာ နှောင့်နှေးနေခဲ့သည်။

အဖွဲ့ဝင် စည်းမျဉ်းတွင် အကျင့်ပျက်ခြစားမှု အမြစ်ပြတ် ရှင်းလင်းရေး၊ လူ့အခွင့်အရေး မှတ်တမ်းနှင့် တရားဥပဒေ စိုးမိုးမှု လုပ်ဆောင်ပြမှသာ အဖွဲ့ဝင်အဖြစ် လက်ခံမည်ဟု EU က ပြဋ္ဌာန်းထားသည်။

ယခုနှစ် ဆောင်းရာသီတွင် ယူကရိန်း၌ အပူချိန် ကျဆင်းလာသည်နှင့်အမျှ ရုရှားကလည်း ယူကရိန်း၏ ဓာတ်အား ပေး စက်ရုံနှင့် သဘာဝဓာတ်ငွေ့သုံး စက်ရုံများ အပါအဝင် နိုင်ငံတဝန်း စစ်ရေးအရ အရေးပါသော ပစ်မှတ်များကို ဆက်လက် တိုက်ခိုက်နေသည်။

ယူကရိန်းနိုင်ငံအတွင်းက အအေးဒဏ်ကို ခံနေရသော သားအမိနှစ်ဦးကိုတွေ့ရစဉ် (GETTY IMAGES)

ကိယက်ဗ်၊ ခါကိဗ်၊ အိုဒက်ဆာ၊ လာဗစ်နှင့် အခြားမြို့ကြီးများရှိ ယူကရိန်း အခြေခံ အဆောက်အအုံများကို နိုဝင်ဘာ ၂၃ ရက်တွင် အကြီးစား ဒုံးကျည်ဖြင့် ပစ်ခတ်ခဲ့သည်။

ယူကရိန်းမြို့တော် ကိယက်ဗ်၏ ၇၀ ရာခိုင်နှုန်း နေရာများမှာ လျှပ်စစ်မီး ပြတ်တောက်သွားပြီဖြစ်ကြောင်း နိုဝင်ဘာ ၂၄ ရက်၌ မြို့တော်ဝန် ဗီတလီကလစ်ရှန်ကို (Vitaly Klitschko) က ပြောကြားခဲ့သည်။

ယခုဆောင်းရာသီ၌ ယူကရိန်းနိုင်ငံသားများ ပြည်တွင်းမှ ထွက်ခွာဖို့ စဉ်းစားကြရန် ယူကရိန်း၏ အကြီးဆုံး ပုဂ္ဂလိက လျှပ်စစ်ဓာတ်အားပေး လုပ်ငန်း၏ အမှုဆောင်အရာရှိချုပ်က ယခင်သီတင်းပတ်၌ တိုက်တွန်းခဲ့သည်။

Source: အာရ်တီသတင်းဌာန

CNI International News

ဘေဂျင်း၊ နိုဝင်ဘာ ၂၆

တရုတ်သမ္မတ ရှီကျင့်ဖျင်က မြောက်ကိုရီးယားခေါင်းဆောင် ကင်မ်ဂျုံအန်းကို ဒေသတွင်းနှင့်ကမ္ဘာလုံးဆိုင်ရာ ငြိမ်းချမ်းရေး၊ တည်ငြိမ်ရေးနှင့် သာယာဝပြောရေးတို့အတွက် မြောက်ကိုရီးယားနှင့် ပူးပေါင်းဆောင်ရွက်ရန် ဆန္ဒရှိ ကြောင်း သတင်းစကား လက်ဆောင်ပါးခဲ့သည်ဟု မြောက်ကိုရီးယားမီဒီယာ KCNA က ဖော်ပြခဲ့သည်။

သို့သော် မကြာသေးမီက တောင်ကိုရီးယားနှင့် အမေရိကန်တို့ ပူးတွဲစစ်ရေး လေ့ကျင့်မှုအပြီး ကိုရီးယားကျွန်းဆွယ် တဝိုက် တင်းမာမှု တိုးလာစေသည့် မြောက်ကိုရီးယား၏ ဒုံးကျည်စမ်းသပ် ပစ်လွှတ်မှုများကိုတော့ KCNA သတင်း တွင် ဖော်ပြခြင်း မရှိကြောင်း သိရသည်။

မြောက်ကိုရီးယားသည် ယခုနှစ်အတွင်း ပဲ့ထိန်းဒုံးကျည်များကို ယခင်နှစ်ကထက် တိုးမြှင့် ပစ်လွှတ်၍ စမ်းသပ်ပြ နေခဲ့သည်။ ထို့ကြောင့် မြောက်ကိုရီးယားသည် ၂၀၁၇ ခုနှစ်နောက်ပိုင်း ပထမဆုံး နျူကလီးယားဗုံး စမ်းသပ်မှုကို အချိန်မရွေး လုပ်ဆောင်လာနိုင်သည်ဟု ဝါရှင်တန်အစိုးရ လအတန်ကြာကပင် ခန့်မှန်းထားခဲ့သည်။

ရှီကျင့်ဖျင်နဲ့ ကင်မ်ဂျုံအန်းကို တွေ့ရစဉ် (GETTY IMAGES)

အမေရိကန်က မြောက်ကိုရီးယား၏ ဒုံးကျည်စမ်းသပ် နေမှုများအတွက် ကုလသမဂ္ဂလုံခြုံရေးကောင်စီအတွင်း အရေးယူပေးရန် တိုက်တွန်းခဲ့သော်လည်း လုံခြုံရေးကောင်စီ၏ လုပ်ဆောင်ချက်ကို တရုတ်နှင့်ရုရှားတို့က ပိတ်ဆို့ ခဲ့ကြသည်။

ထို့သို့ ပိတ်ဆို့ခြင်းသည် ပြုံယမ်းအစိုးရကို ခိုင်မာအားကောင်းစေကြောင်း တရုတ်နှင့်ရုရှားတို့ကို အမေရိကန်က စွပ်စွဲခဲ့သည်။

၂၀၁၇ ခုနှစ်၌ ပြုံယမ်း၏ နောက်ဆုံး နျူကလီးယား စမ်းသပ်မှုအပြီး ကုလသမဂ္ဂ လုံခြုံရေးကောင်စီ၏ ဒဏ်ခတ် ပိတ်ဆို့မှုများကို တရုတ်နှင့်ရုရှားတို့က ထောက်ခံကြသော်လည်း ပြီးခဲ့သည့် မေလမှစတင်၍ ဒုံးကျည်အသစ်များ ပစ်လွှတ်မှုအပေါ် ဒဏ်ခတ်မှု ထပ်မံတိုးမြှင့်ရန် အမေရိကန်က ကုလသမဂ္ဂလုံခြုံရေးကောင်စီအတွင်း ဗီတိုအာဏာ သုံးခဲ့သည်။

မြောက်ကိုရီးယား၏ ထပ်တလဲလဲ ဒုံးကျည်ပစ်လွှတ်မှုများအပေါ် ထပ်မံဒဏ်ခတ်ဖို့ တောင်ကိုရီးယားက တွန်းအား ပေးလာခဲ့ရာ မြောက်ကိုရီးယားအစိုးရက တုံ့ပြန်ရှုတ်ချခဲ့ပြီး ၎င်း၏ရန်လိုမှုနှင့်ဒေါသကို တိုးစေလိမ့်မည်ဟု အစိုးရ ပိုင် KCNA မှ သတင်းထုတ်ပြန်ခဲ့သည်။

ကင်မ်ဂျုံအန်း၏ ဩဇာကြီးလှသော ညီမ ကင်မ်ယိုဂျောင်သည် တောင်ကိုရီးယားသမ္မတ ယွန်ဆော့ရွဲနှင့် အစိုးရ အဖွဲ့ကို အမေရိကန်အပေါ် သစ္စာစောင့်သောခွေးဟု ခိုင်းနှိုင်းပြောကြားခဲ့ကြောင်း KCNA သတင်းတွင် ဖော်ပြခဲ့သည်။

Source: Reuters

CNI International News

မော်စကို၊ နိုဝင်ဘာ ၂၆

ရုရှားသမ္မတ ဗလာဒီမာပူတင်သည် ယူကရိန်းသို့ စေလွှတ်ထားသည့် ရုရှားစစ်သည်များ၏ မိခင်များနှင့် တွေ့ဆုံစဉ် မော်စကို၏စစ်ရေး လှုပ်ရှားမှုများကို ၎င်း၏သဘောထားနှင့် ကွဲလွဲစွာ ရေးသားထုတ်လွှင့်နေကြသည့် မီဒီယာများ ကို မုသားများ ဖုံးလွှမ်းနေကြောင်း နိုဝင်ဘာ ၂၅ ရက်တွင် ရှုတ်ချခဲ့သည်ဟု အေပီသတင်းမှာ တွေ့ရသည်။

“တီဗွီဖန်သားပြင် (ဒါမှမဟုတ်) အင်တာနက်ပေါ်မှာ ပြသနေတဲ့ ဘဝတွေနဲ့ လက်တွေ့ဘဝတွေ ပိုပြီး ကွဲပြားပါ တယ်။ အတုတွေ၊ အလိမ်တွေ အများကြီးရှိတယ်” ဟု ပူတင်က ပြောကြားခဲ့သည်။

မကြာသေးမီက စစ်မြေပြင်၌ အဆင်မပြေမှုများ ဆက်တိုက် ရင်ဆိုင်နေရချိန်၊ စစ်မှုထမ်း ထပ်မံခေါ်ယူရေး မရေမရာဖြစ်နေချိန်၌ ကရင်မလင်သမ္မတနန်းတော်သို့ အမျိုးသမီး ဆယ်ဂဏန်းမျှ ဖိတ်ခေါ်၍ ပူတင်က တွေ့ဆုံခဲ့ ခြင်းဖြစ်သည်။

ပူတင်ကို ယူကရိန်းစစ်ပွဲရောက် ရုရှားစစ်သားများရဲ့ မိခင်များနဲ့အတူတွေ့ရစဉ်(AP)

ကရင်မလင် မှတ်တမ်းနှင့် အစည်းအဝေး ဓာတ်ပုံများအရ ရံဖန်ရံခါ ၎င်းတပ်ဖွဲ့ဝင်များနှင့် ပူတင်က တိုက်ရိုက် စကားပြောလေ့ရှိကြောင်း သိရသည်။

“သူတို့ရဲ့စိတ်နေသဘောထားနဲ့ ပတ်သက်ပြီး အံ့ဩစရာကောင်းတဲ့ တပ်သားတွေနဲ့ ကျနော် စကားပြောပြီးပြီ။ သူတို့ဆီကတော့ ကျနော် ဒီလိုမျိုး ဖုန်းခေါ်(video call)လိမ့်မယ်လို့ မမျှော်လင့်မိကြဘူး။ သူတို့နဲ့ ပြောဖြစ်တဲ့ အခါ တိုင်းလည်း သူရဲကောင်းတွေလို့ နာမည်တပ်လို့ရမယ့် အကြောင်းပြချက်တွေ ကျနော် ထည့်ပြောလေ့ရှိပါတယ်”ဟု ပူတင်က ပြောသည်။

သို့သော် ယခုကဲ့သို့ ရုရှားစစ်သည် အချို့၏ မိဘဆွေမျိုးများကို ပူတင် ဖိတ်ခေါ်၍ တွေ့ဆုံခြင်းအပေါ် ရုရှားပြည် တွင်း၊ ပြည်ပ၌ မကျေမနပ်ဖြစ်ကြသူ အများအပြား ရှိကြောင်း၊ ပူတင်၏ ဦးဆောင်နေမှုကို တိုက်ရိုက်ဝေဖန်မှုများ ရှိခဲ့ကြောင်း အေပီက ဆက်လက်‌ရေးသားသည်။

မကြာသေးမီ တစိတ်တပိုင်း စည်းရုံးရေး အစီအစဉ်အရ ရုရှားအတွက် အရန်တပ်အင်အား ၃ သိန်းအထိ ဆင့်ခေါ်၍ စစ်မှုထမ်းစေခဲ့သည်။

အိုလက်စုကာနိုဗာ နဲ့ ပူတင်ကိုတွေ့ရစဉ် (AP)

ရုရှားအာဏာပိုင်များသည် မိမိတို့ အဖွဲ့အစည်းထံမှ မေးမြန်းချက်များနှင့် တောင်းဆိုချက်များကို လျစ်လျူရှုခဲ့ ကြောင်း တယ်လီဂရမ်ချန်နယ်ပေါ်ရှိ မိခင်နှင့်ဇနီးများကောင်စီမှ အိုလက်စုကာနိုဗာ (Olga Tsukanova) ဆိုသူ အမျိုးသမီးက ဗွီဒီယိုမက်ဆေ့ချ်ဖြင့် သတင်းထုတ်ပြန်ခဲ့သည်။

အဆိုပါကောင်စီကို စစ်သည်များ၏ မိဘဆွေမျိုး၊ ဇနီးကြင်ယာများဖြင့် စုစည်းဖွဲ့စည်းထားသည်။

“ကျမတို့က မော်စကိုမှာနေပြီး ရှင်နဲ့ တွေ့ဖို့ အဆင်သင့်ပဲ။ ရှင့်အဖြေကို ကျမတို့ စောင့်နေတယ်” ဟု သူမက ပူတင်ကို တိုက်ရိုက်ရည်ညွှန်း၍ ပြောကြားခဲ့သည်။

“ကျမတို့မှာ ကာကွယ်ရေးဝန်ကြီးဌာန၊ စစ်ဘက်ရှေ့နေရုံးနဲ့ သမ္မတရုံးတွေမှာ ဩဇာကြီးမားတဲ့ ခင်ပွန်းသည်တွေ ရှိသလို အခြားတဖက်မှာလည်း မိခင်တွေလည်း ရှိတယ်ရှင့်။ တွေ့ဆုံဆွေးနွေးရေး အမှန်တကယ်ဖြစ်လာဖို့ အခု စမှာလား (ဒါမှမဟုတ်) ဖုံးကွယ်ထားမှာလားဆိုတာ ကျမ မေးပါတယ်” ဟု သူမက တယ်လီဂရမ်ချန်နယ်ပေါ် ဗွီဒီယိုမက်ဆေ့ချ်ဖြင့် တောင်းဆိုခဲ့သည်။

Source: AP