CNI International News

ဘန်ကောက်၊ ဇူလိုင် ၂၂

ဖြူးထိုင်းပါတီကို အစိုးရဖွဲ့စည်းရာတွင် ခေါင်းဆောင်ခွင့်ပြုခဲ့သလို ဝန်ကြီးချုပ်လောင်း ရွေးချယ်ခံနိုင်ရန်အတွက် လည်း Move Forward Party(MFP)က နောက်ဆုတ်ပေးရန် ဆုံးဖြတ်လိုက်ကြောင်း MFP ၏ အထွေထွေအတွင်း ရေးမှူး ချိုင်သာဝပ် တူလသွန် (Chaithawat Tulathon)က ဇူလိုင် ၂၁ ရက်တွင် ကြေညာခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

အမတ် အရေအတွက်အားဖြင့် ကြည့်လျှင် MFP နှင့် ဖြူးထိုင်းတို့သည် ပထမနှင့် ဒုတိယ နေရာအဖြစ် အသီးသီး အနိုင်ရထားသည်။

ထို့နောက် အစိုးရသစ်ကို အစိုးရဟောင်းအုပ်စုနှင့် ပတ်သက်ခြင်းမရှိသည့် ပါတီများဖြင့် ဖွဲ့စည်းစေလိုသော လူထု၏ဆန္ဒကို ရှေးရိုးစွဲအုပ်စုများနှင့် ၎င်းတို့၏ မဟာမိတ်များက MFP ကို အစိုးရမဖွဲ့နိုင်အောင် တားဆီး ပိတ်ပင်ခဲ့ကြကြောင်း မစ္စတာချိုင်သာဝပ်က ပြောသည်။ 

သို့သော် MFP ၏ အဓိက ရည်မှန်းချက်မှာ ပါတီခေါင်းဆောင် ပီတာလင်ဂျာရိုရတ် ဝန်ကြီးချုပ်ဖြစ်ရေး မဟုတ် ကြောင်း ၎င်းက ပြောသည်။ 

MFP ၏ အထွေထွေအတွင်းရေးမှူး ချိုင်သာဝပ်တူလသွန်ကို တွေ့ရစဉ်

 “ကျနော်တို့ရဲ့ ရည်မှန်းချက်က (၈)ပါတီ လက်မှတ်ရေးထိုးထားတဲ့ နားလည်မှု စာချွန်လွှာအရ ဒီမိုကရေစီ ဘက်တော်သားတွေနဲ့ အစိုးရဖွဲ့ဖို့ပါပဲ”ဟု မစ္စတာချိုင်သာဝပ်က ပြောသည်။ 

မစ္စတာပီတာသည် ဝန်ကြီးချုပ်ရာထူးအတွက် နှစ်ကြိမ်တိုင်တိုင် ပိတ်ပင်ခံရသောကြောင့် MFP က ဖြူးထိုင်းကို အခွင့်အရေးပေးရန် ဆုံးဖြတ်လိုက်ခြင်း ဖြစ်ကြောင်း ၎င်းက ပြောသည်။

ဇူလိုင် ၂၇ ရက်နေ့တွင် ကျင်းပမည့် တတိယအကြိမ် ပူးတွဲလွှတ်တော်တွင် MFP က ဖြူးထိုင်းပါတီမှ ဝန်ကြီးချုပ် လောင်း တစ်ယောက်ကို အဆိုပြုမည် ဖြစ်သလို ဖြူးထိုင်းပါတီကလည်း ၎င်းတို့ ရွေးချယ်ထားသည့် ဝန်ကြီးချုပ် လောင်းအား အဆိုပြုနိုင်ကြောင်း မစ္စတာချိုင်သာဝပ်က ပြောသည်။ 

ပြီးခဲ့သည့် နှစ်လတာ အတောအတွင်းမှာ ရှေးရိုးစွဲဖက်ခြမ်းမှ နည်းအမျိုးမျိုးသုံး၍ MFP ကို အစိုးရမဖွဲ့နိုင်အောင် နှောင့်ယှက်နေခဲ့သည်ဟု MFP ၏ အထွေထွေအတွင်းရေးမှူးချုပ် မစ္စတာချိုင်သာဝပ်က ပြောသည်။

ရှေးရိုးစွဲများက တော်ဝင်အဖွဲ့အစည်းကို သစ္စာစောင့်သိဟန်ဖြင့် ဘုရင်အားစော်ကားမှုကို တားမြစ်သည့်ဥပဒေ ပုဒ်မ ၁၁၂ ကို ကျယ်ကျယ်ပြန့်ပြန့်သုံးကာ ပါတီ၏ နိုင်ငံရေးအခွင့်အရေးများအား ဖယ်ရှားရန် ရည်ရွယ်ချက်ဖြင့် MFP ကို ဥပဒေကြောင်းအရ စွဲချက်များ တင်လာခဲ့သည်ဟု ၎င်းက ပြောသည်။ 

ဖြူးထိုင်းနဲ့ MFP ပူးတွဲသတင်းစာ ရှင်းလင်းပွဲကိုတွေ့ရစဉ်

အထက်လွှတ်တော် အမတ်အများစုမှာ လူထုဆန္ဒကို ဆန့်ကျင်မဲ ပေးခဲ့ကြရုံမက မစ္စတာပီတာကို ဒုတိယအကြိမ် အဆိုမတင်နိုင်အောင် လွှတ်တော်အစည်းအဝေး ကျင့်ထုံးကို လိုရာဆွဲသုံး၍ ဖွဲ့စည်းပုံကို ချိုးဖောက်ခဲ့ကြသည်ဟု မစ္စတာချိုင်သာဝပ်က ပြောကြားသည်။ 

“Move Forward ပါတီက ခိုင်မာတဲ့ ရပ်တည်ချက်ရှိပါတယ်။ ဦးကြီးတွေမရှိခဲ့ရင် ကျနော်တို့လည်း ရှိမလာဘူးပေါ့။ (ဝန်ကြီးချုပ် ပရာယွတ်ချန်အိုချာနှင့် ဒုဝန်ကြီးချုပ် ပရာဝပ်ဝမ်ဆူဝန်တို့ကို ရည်ညွှန်းသည်) ကျနော်တို့ ရပ်တည် ချက်ကိုလည်း လူသိရှင်ကြား ကြေညာခဲ့သလို၊ ပြည်သူကို ပေးထားတဲ့ ကတိကဝတ်ကိုလည်း မချိုးဖောက်နိုင် ပါဘူး။ ပါတီဖျက်သိမ်း ခံရနိုင်ခြေနဲ့ ပတ်သက်လို့လည်း ကျနော်တို့ သတိမထားလို့ မရပါဘူး။ ဘာ့ကြောင့်လဲဆို တော့ ထိုင်းနိုင်ငံမှာ ပုံမှန်တရားရေးစနစ် မရှိဘူးဆိုတာ သိသာထင်ရှားနေလို့ပါပဲ”ဟု ၎င်းက ပြောသည်။ 

ထို့နောက် ပြည်သူလူထုကို တောင်းပန်ပါကြောင်း၊ သူတို့က Move Forward ပါတီကို အစိုးရအဖွဲ့မှာ အဓိက ထောက်တိုင် မဖြစ်စေချင်ကြကြောင်း၊ မစ္စတာပီတာ ဝန်ကြီးချုပ်မဖြစ်လို့ အစိုးရသစ်ဖွဲ့ပြီး ဟောင်းနွမ်းသည့် အာဏာအုပ်စုများကို မောင်းထုတ်ရေး မအောင်မြင်တော့ဘူးဟု မှတ်ယူ၍ မရကြောင်း  မစ္စတာချိုင်သာဝပ်က ပြောသည်။

Source: ဘန်ကောက်ပို့စ်

CNI International News

ဘဂ္ဂဒက်၊ ဇူလိုင် ၂၁ 

ဆွီဒင်နိုင်ငံတွင် ကိုရမ်ကျမ်းစာအုပ်များကို မီးရှို့လိုက်သောကြောင့် ဒေါသထွက်နေသည့် အီရတ် ဆန္ဒပြသူများက ဘဂ္ဂဒက်မြို့လယ်မှ ဆွီဒင်သံရုံးအားဝင်စီးပြီး မီးတင်ရှို့ခဲ့ကြကြောင်း အယ်ဂျာဇီးလ်ယားမှ ဖော်ပြခဲ့သည်။

ထို့နောက် နာရီပိုင်းအကြာတွင် အီရတ်အစိုးရက ဆွီဒင်သံအမတ်ကို နိုင်ငံအတွင်းကနေ နှင်ထုတ်ခဲ့သည်။ 

အီရတ်ဝန်ကြီးချုပ်က ဆွီဒင်မှ ၎င်း၏ လက်ထောက်သံအမတ်ကို ပြန်ခေါ်ခဲ့သည့်အပြင် ဆွီဒင် ဆက်သွယ်ရေး ကုမ္ပဏီ အဲရစ်ဆန် (Ericsson)ကိုလည်း အီရတ်မြေပေါ်တွင် လုပ်ကိုင် ခွင့်အား ဆိုင်းငံ့ထားလိုက်ကြောင်း အီရတ်နိုင်ငံပိုင် မီဒီယာမှ ဖော်ပြခဲ့သည်။

ဇူလိုင် ၂၀ ရက်နေ့ နံနက် အစောပိုင်း အချိန်တွင် သံရုံးတဝိုက်မှ ဆန္ဒပြသူများသည် အလံများ ဝှေ့ယမ်းကာ သြဇာ ကြီးမားသည့် အီရတ် ရှီးယားဘာသာရေးနှင့် နိုင်ငံရေးခေါင်းဆောင် မူတာဒါ အယ်လ် ဆာဒါ (Muqtada al-Sadr)၏ ပုံပါသည့် ဆိုင်းဘုတ်များကို ကိုင်ဆောင်ထားကြသည်။ 

ဇူလိုင် ၂၀ ရက်တွင် စတော့ဟုမ်းမှ အီရတ်သံရုံးရှေ့တွင် ကိုရမ်ကျမ်းစာအုပ်ကို မီးရှို့မည့် ဒုတိယအစီအစဉ်ကို ဆန့်ကျင်ကန့်ကွက်သည့် အနေဖြင့် ဆာဒါကို ထောက်ခံသူများက သံရုံးအား မီးရှို့ရန် လှုံ့ဆော်ခဲ့ကြခြင်းပင် ဖြစ်သည်။ 

ဆွီဒင်မှ ဆန္ဒပြသူများက သူတို့ခြိမ်းခြောက်ထားသလို မီးမရှို့သော်လည်း ခြေထောက်နှင့် ကန်ကျောက်၍ တစ်စိတ်တစ်ပိုင်း ပျက်စီးသွားသည့် စာအုပ်မှာ ကိုရမ်ကျမ်းစာအုပ်ဖြစ်သည်ဟု အီရတ်ဆန္ဒပြသူများက ပြောကြားခဲ့ကြသည်။

ဆွီဒင်နိုင်ငံမှာ ကိုရမ်ကျမ်းကို မီးရှို့ဖို့လုပ်နေတဲ့ အီရတ်ဒုက္ခသည် ဆယ်ဝမ်မိုမီကာကို တွေ့ရစဉ်

ဘဂ္ဂဒက်မြို့ရှိ သံရုံးဝန်ထမ်းများ ဘေးကင်းကြသော်လည်း ဆွီဒင် နိုင်ငံခြားရေးဝန်ကြီးဌာန ပြန်ကြားရေးရုံးကမူ ကြေညာချက်ထုတ်ပြန်ပြီး တိုက်ခိုက်မှုကို ရှုတ်ချလိုက်သည့်အပြင် အီရတ်အာဏာပိုင်များအနေဖြင့် သံအမှုထမ်း များကို ကာကွယ်ရန် လိုအပ်ကြောင်း ပြောသည်။

အီရတ်နိုင်ငံခြားရေးဝန်ကြီးဌာနကလည်း တိုက်ခိုက်မှုကို ရှုတ်ချခဲ့သည်။ 

ဆန္ဒပြသူများကမူ နောက်ထပ် ကိုရမ်ကျမ်းကို မီးရှို့မှုများ ထပ်ဖြစ်လာခဲ့ပါက ဆက်လက် ဆန္ဒပြသွားကြရန် ဆုံးဖြတ်ထားကြသည်။ 

အကယ်၍ အီရတ်အစိုးရက ဆွီဒင်သံအဖွဲ့ကို ချက်ချင်း နှင်မထုတ်ပါက ကိုယ်ထိလက်ရောက် အရေးယူဖို့လည်း ပြင်ဆင်ထားကြသည်။ 

ဆွီဒင်မီဒီယာ သတင်းတွင်မူ ဆွီဒင်တွင် ရောက်နေသည့် အီရတ်ဒုက္ခသည် ဆယ်ဝမ် မိုမီကာက ကိုရမ်ကျမ်းစာအုပ် ကို မီးရှို့ရန်အစီအစဉ်အား ဆော်သြော်ခဲ့ခြင်း ဖြစ်သည်ဟု ဖော်ပြထားကြသည်။

ဆယ်ဝမ်သည် ကမ္ဘာနှင့်အဝန်း မွတ်စလင်များ၏ အထွတ်အမြတ်ဖြစ်သည့် အီးပွဲတော်အတွင်း ဇွန်လ ၂၈ ရက်နေ့ ကလည်း စတော့ဟုမ်းမှ အကြီးဆုံး ဗလီကြီးရှေ့တွင် ကိုရမ်ကျမ်း စာအုပ်တစ်အုပ်ကို မီးရှို့ခဲ့သေးသည်။ 

အီရတ်ရှိ ဆွီဒင်သံရုံးကို ဆန္ဒပြသူများက စီးနင်းထားစဉ်

တူရကီ၊ ယူအေအီး၊ ဂျော်ဒန်နှင့် မော်ရိုကို အပါအဝင် အခြား မွတ်စလင်နိုင်ငံများကလည်း တိုက်ခိုက်မှုကို ဆန့်ကျင်ကြောင်း ကြေညာချက်များ ထုတ်ပြန်ခဲ့ကြရာ အီရတ်အစိုးရကလည်း တိုက်ခိုက်မှု၏ လက်သည် တရားခံကို ရှာဖွေနေသည်ဟု ပြောသည်။ 

ဆွီဒင်အစိုးရက မိုမီကာကို နိုင်ငံ၏ လွတ်လပ်စွာ ပြောဆိုခွင့်နှင့်အညီ ခွင့်ပြုခဲ့ခြင်းဖြစ်သော်လည်း နောက်ပိုင်းတွင် မိုမီကာကို လူမျိုးရေးဆန့်ကျင်ရန် လှုံ့ဆော်မှုဖြင့် အမှုဖွင့် စုံစမ်းစစ်ဆေးသွားမည်ဟု ပြောကြားခဲ့သည်။

မိုမီကာသည် ဗလီအနီးတွင် ကိုရမ်ကျမ်းစာအုပ်မှ စာမျက်နှာတချို့ကို မီးရှို့ခဲ့ကြောင်းလည်း ဝန်ခံအသိအမှတ် ပြုခဲ့သည်။ 

Source: အယ်ဂျာဇီးလ်ယား

CNI News

၂၀၂၃ ခုနှစ်၊ ဇူလိုင် ၂၁

“ဝ”ပြည်သွေးစည်း ညီညွတ်ရေးတပ်မတော် (UWSA)၊ အမျိုးသားဒီမိုကရေစီမဟာမိတ်တပ်မတော်(NDAA)၊ ရှမ်းပြည်တိုးတက်ရေးပါတီ(SSPP)မှ ခေါင်းဆောင်များနှင့် အမျိုးသားစည်းလုံးညီညွတ်ရေးနှင့် ငြိမ်းချမ်းရေး ဖော်ဆောင်မှုညှိနှိုင်းရေးကော်မတီ(NSPNC)တို့ တွေ့ဆုံ ဆွေးနွေးလျက်ရှိသည်။

၂၀၂၃ ခုနှစ်၊ ဇူလိုင် ၂၀ ရက်နေ့က နေပြည်တော်ရှိ Horizon Lake View ဟိုတယ်မှာ နှစ်ဖက် ကိုယ်စားလှယ် များတွေ့ဆုံ၍ ယခင် ဆွေးနွေးပြီး သဘောတူထားသည့် ငြိမ်းချမ်းရေးလုပ်ငန်းစဉ်များထဲမှ မပြီးသတ်သေးသည့် ကိစ္စရပ်များကို ဆက်လက် ဆွေးနွေးခဲ့ကြခြင်း ဖြစ်ကြောင်း သိရသည်။

၂၀၂၃ ခုနှစ်၊ ဇူလိုင် ၂၀ ရက်က UWSA-SSPP-NDAA ကိုယ်စားလှယ်များကိုတွေ့ရစဉ်

UWSA ကို ဒုဥက္ကဋ္ဌ ဦးလော့ယာကု ဦးဆောင်ခဲ့သလို NDAA အား ဒုဥက္ကဋ္ဌ ဦးစန်ပေ့ ဦးဆောင်ခဲ့သည်။ ထို့နောက် SSPP ကိုတော့ ဒုဥက္ကဋ္ဌ(၃) စဝ်ဆေပန်ဖ ဦးဆောင်သည့် ကိုယ်စားလှယ် အဖွဲ့တို့ တက်ရောက်ခဲ့ ကြသည်။

နစကသည် တိုင်းရင်းသား လက်နက်ကိုင် အဖွဲ့များဖြင့် ငြိမ်းချမ်းရေး လုပ်ငန်းစဉ်များ ဆွေးနွေးနေရာကနေ ငြိမ်းချမ်းရေးညီလာခံ တစ်ရပ်ကို ကျင်းပသွားရန် နှစ်ဖက် ပြင်ဆင်နေကြကြောင်း သိရသည်။

CNI International News

ဂျကာတာ၊ ဇူလိုင် ၂၁

ယခုလ နိုင်ငံခြားရေးဝန်ကြီးများ ညီလာခံမတိုင်မီ ရက်ပိုင်းတွင် တရုတ်က ရှောင်တခင် အခြေအနေများကြောင့် ၎င်း၏ ကိုယ်စားလှယ်ကို ပြောင်းလဲမည်ဟု အိမ်ရှင် အင်ဒိုနီးရှားကို ပြောကြားလာခဲ့ရာ ဂျာကာတာအနေဖြင့် တက်ရောက်သူများအတွက် ရိုးရာလက်ဆောင် ရှပ်အင်္ကျီကို အလောသုံးဆယ် ပြောင်းလဲခဲ့ရသည်ဟု ရိုက်တာမှ ရေးသားခဲ့သည်။

မူလက ရောင်စုံရှပ်အင်္ကျီကို တရုတ်နိုင်ငံခြားရေးဝန်ကြီး ကျင်ဂန်း(Qin Gang)အတွက် ရည်ရွယ်ထားခဲ့သည်။

သို့သော် ကျင်ဂန်းမှာ တစ်လနီးပါးကြာ လူမြင်ကွင်းမှ ပျောက်နေခဲ့ပြီး နောက်အပတ် တောင်အာဖရိကတွင် ကျင်းပမည့် အရေးကြီးသော နောက်ထပ် အစည်းအဝေးတစ်ခုကိုလည်း လွဲချော်ဖွယ် ရှိနေသည်။ 

အတိအကျ မသိရသည့် ကျန်းမာရေး ပြဿနာများကြောင့် ကျင်ဂန်း အနားယူနေကြောင်း အစိုးရက ပြောကြားပြီး ကတည်းက တရားဝင် စာမျက်နှာများပေါ်တွင်လည်း မတွေ့ရတော့သလို နိုင်ငံပိုင်မီဒီယာတွင်လည်း ပျောက်ကွယ် နေသည်။

တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မောင်းနင်ကိုတွေ့ရစဉ်

ထို့ကြောင့် ခေါင်းဆောင်များ၏ ပုဂ္ဂလိကဘဝကို သိနိုင်ခဲလှသည့် တရုတ်နိုင်ငံတွင် သို့လော သို့လော ခန့်မှန်းမှုများ ထွက်ပေါ်လာနေသည်။ 

ကိုဗစ်ကြောင့် သီးခြားဖြစ်သွားသည့် နှစ်ကာလများပြီးနောက် ကမ္ဘာကြီးနှင့် ပြန်လည်ထိတွေ့ရန် ကြိုးစားလာ သည့် အချိန်တွင်မှ တရုတ်၏ လျှို့ဝှက်ဆုံးဖြတ်တတ်သော သဘာဝကို လေ့လာသူများနှင့် သံတမန်များကြား ယခုကဲ့သို့ သတင်းပြတ်လပ်မှုက သံသယများကို ပိုမိုကြီးထွားလာစေခဲ့သည်။ 

“ကျင်ဂန်း ပျောက်ကွယ်နေမှုဟာ တရုတ်ရဲ့ ဆုံးဖြတ်ချက်အပိုင်းအပေါ် မရေမရာနဲ့ ဝေခွဲမရဖြစ်စေတယ်”ဟု ဝါရှင်တန်၊ စတင်ဆန်စင်တာ၊ တရုတ်ပရိုဂရမ်ဌာန ညွှန်ကြားရေးမှူး ယွန်ဆန်းက ပြောကြားသည်။ 

“နိုင်ငံအဆင့် ခေါင်းဆောင် တစ်ယောက်ဟာ ဘာ့ကြောင့် မှန်းမသိရဘဲ ပျောက်နေတာဟာ တရုတ်ခေါင်းဆောင် တွေနဲ့ သူတို့ရဲ့ ရာထူးအပေါ် ယုံကြည်အားထားဖို့ ခက်ခဲစေပါတယ်” ဟု ၎င်းက ပြောသည်။ 

အာဆီယံအစည်းအဝေးတွင် တွေ့ရသည့် ဝမ်ယိ

ဇူလိုင် ၁၉ ရက်နေ့က နိုင်ငံခြားရေးဝန်ကြီးဌာန၏ နေ့စဉ်သတင်းစာ ရှင်းလင်းပွဲတွင် ကျင်ဂန်း၏ အခြေအနေနှင့် ပြန်လည် တာဝန်ထမ်းဆောင်နိုင်မည့် အချိန်ကို မေးမြန်းရာ ပြောခွင့်ရပုဂ္ဂိုလ် မောင်းနင်(Mao Ning)က “ခင်ဗျားအတွက် ဘာသတင်းအချက်အလက်မှ မရှိပါဘူး”ဟု ဖြေကြားသွားခဲ့သည်။ 

အင်ဒိုနီးရှားနိုင်ငံ၊ ဂျာကာတာမြို့မှာ ကျင်းပသည့် အာဆီယံ နိုင်ငံခြားရေးဝန်ကြီးများ အစည်းအဝေးတွင် ကျင်ဂန်း တက်ရောက်ခဲ့ခြင်းမရှိဘဲ သူ၏အရင်က တရုတ်နိုင်ငံခြားရေးဝန်ကြီးအဖြစ် တာဝန်ယူခဲ့သူ ဝမ်ယိ တက်ရောက် ခဲ့သည်။

ထို့နောက် ဇူလိုင် ၂၄ -၂၅ ရက်များတွင် ဂျိုဟန်နတ်စ်ဘတ်၌ ကျင်းပမည့် BRICS အစည်းအဝေးကိုလည်း တရုတ် ကိုယ်စား ဝမ်ယိပင် တက်ရောက်လိမ့်မည်ဟု ရိုက်တာမှ ဖော်ပြခဲ့သည်။ 

Source: ရိုက်တာ

CNI International News

ဘန်ကောက်၊ ဇူလိုင် ၂၁

မီဒီယာကုမ္ပဏီ iTV မှ ရှယ်ယာများကို ပိုင်ဆိုင်ထားသောကြောင့် မေလ ၁၄ ရက် ရွေးကောက်ပွဲတွင် ဝင်ရောက် ယှဉ်ပြိုင်အရွေးခံရန် သတ်မှတ်ချက်နှင့်ညီ/မညီ မဆုံးဖြတ်နိုင်သေးမီ ပီတာအား အမတ်အဖြစ်မှ ရပ်စဲထားရန် ဖွဲ့စည်းပုံခုံရုံးက ဆုံးဖြတ်လိုက်ပြီးနောက် ထောက်ခံသူများက အင်အားအပြည့်ဖြင့် ဆန္ဒပြစည်းရုံး ပြင်ဆင်နေကြ သည်။  

ပီတာသည် လွှတ်တော်ထဲတွင် မတ်တပ်ထရပ်ပြီး ဖွဲ့စည်းပုံခုံရုံး သူ့ကို အမတ်တာဝန်မှ ရပ်စဲလိုက်သည့် စာတစ် စောင်ကို လက်ခံရရှိခဲ့ကြောင်း လွှတ်တော်ကို အသိပေး ပြောကြားလိုက်ခြင်းကြောင့် ထောက်ခံသူများက သူရဲကောင်းဆန်သည်ဟု ယူဆခဲ့ကြသည်။

လွှတ်တော်ခန်းမကို ကျောမခိုင်းမီတွင် ပီတာက ရွေးကောက်ပွဲမှာကတည်းက ထိုင်းနိုင်ငံမှာ ပြောင်းလဲသွားခဲ့ပြီ ဖြစ်ကြောင်း၊ Move Forward ပါတီနှင့် ၎င်း၏  ထောက်ခံသူများမှာ တိုင်းပြည်ကို ပြုပြင်ပြောင်းလဲရန် ခရီး တစ်ဝက် ကျိုးလာခဲ့ပြီဖြစ်ကြောင်း ပြောကြားသွားခဲ့သည်။ 

Move Forward ပါတီမှာ စစ်တပ်ကို နိုင်ငံရေးထဲမှ ထုတ်ပစ်ပြီး ဘုရင်စနစ်အား မစစ်ဆေး မဝေဖန်ရဲအောင် ကာကွယ်ထားသည့် ပုဒ်မ ၁၁၂ ကို ပြင်ဆင်မည်ဟူသော ကတိကဝတ်များဖြင့် ရွေးကောက်ပွဲမှာ အနိုင်ရလာခဲ့ ခြင်း ဖြစ်သည်။ 

ပီတာ လွှတ်တော်ကနေ ထွက်သွားစဉ်

ပီတာက လက်သီးလက်မောင်းတန်းပြီး ခန်းမထဲမှ ထွက်ခွာစဉ်၊ Move Forward ပါတီမှ ၁၅၀ သော အမတ်များက ကောင်းချီး သြဘာပေးကြရာ အတော်များများမှာ မျက်ရည်များပင် စီးကျနေကြသည်။ 

ဖွဲ့စည်းပုံခုံရုံးက အများစုမဲဖြင့် ပီတာကို ဆိုင်းငံ့လိုက်ကြောင်း ကြေညာလိုက်သောအခါ ပါလီမန်အပြင်ဘက်တွင် စောင့်ဆိုင်းနေကြသော ပီတာကို ထောက်ခံသူများက ရှေ့တံခါးသို့ ပြေးလာကြပြီး ရဲတပ်ဖွဲ့၏ အတားအဆီးများကို ချိုးဖျက်ကာ အထဲသို့ ဝင်ရောက်ရန် ကြိုးစားခဲ့ကြသည်။ 

ထို့နောက် သမ္မာဆတ်နှင့် ဆန္ဒပြမှု ညီညွတ်ရေးတပ်ဦးက ဖေ့စ်ဘွတ်ခ်မှတဆင့် ဆန္ဒပြသူများ ညနေ ၅ နာရီအချိန် ဒီမိုကရေစီ ကျောက်တိုင်တွင် စုရုံးကြရန် ဆင့်ဆိုလိုက်သည်။ 

ပီတာ ထောက်ခံသူများ ဆန္ဒပြနေကြစဉ်

ညနေ ၅ နာရီအချိန်တွင် လူ ၃-၄၀၀ ခန့် ဒီမိုကရေစီ ကျောက်တိုင်တွင် စုရုံးလာကြရာ “ပီတာ၊ လူထုသဘောတူတဲ့ ဝန်ကြီးချုပ်”ဟု ရေးသားထားသည့် ဆိုင်းဘုတ်များကို ကိုင်ဆောင်လာကြသည်။ 

ထို့နောက် ဆန္ဒပြပွဲ ခေါင်းဆောင်များက ဖွဲ့စည်းပုံခုံရုံးနှင့် ရွေးကောက်ပွဲကော်မရှင်၏ နှိပ်ကွက်မှုကို ခံနေရသည့် ပီတာအတွက် တရားမျှတမှုကို တောင်းဆိုကြသည်။ 

ရွေးကောက်ပွဲ အနိုင်ရသည့် Move Forward ပါတီ၏ နောက်အစိုးရကို ဦိးဆောင်နိုင်သော ဒီမိုကရေစီ အခွင့်အရေး ကို အထက်လွှတ်တော်အမတ်များက ပိတ်ဆို့သည်ဟုလည်း ဆန္ဒပြသူများက အော်ဟစ်ခဲ့ကြသည်။

Source: The Nation Thailand 

CNI International News

ဘန်ကောက်၊ ဇူလိုင် ၂၁

ဖြူးထိုင်း(Pheu Thai)ပါတီ၏ ဝန်ကြီးချုပ်လောင်း ၃ ယောက်ထဲတွင် တစ်ဦး အပါအဝင်ဖြစ်သည့် ဆရတ်သာ သာဗီဆင်(Srettha Thavisin)က ထိုင်းနိုင်ငံ၏ ဝန်ကြီးချုပ်ရာထူးအတွက် အဆင်သင့် ဖြစ်နေပြီဖြစ်ကြောင်း ဇူလိုင် ၂၀ ရက်နေ့တွင် ပြောကြားခဲ့သည်ဟု The Nation Thailand မှ ဖော်ပြခဲ့သည်။

ထို့နောက် Move Forward Party(MFP) ဦးဆောင်သည့် (၈)ပါတီ ညွန့်ပေါင်းအဖွဲ့ကနေ ထုတ်ပယ်ရေးမှာ မလွဲ မရှောင်သာ ဖြစ်လာနိုင်ကြောင်း ၎င်းက ပြောသည်။

“ကျနော်က ဖြူးထိုင်းရဲ့ ဝန်ကြီးချုပ်လောင်း တစ်ယောက်ပါ။ ပါတီက တာဝန်ပေးထားတဲ့အတိုင်း စီးပွားရေး ပြဿနာတွေကို ကိုင်တွယ်ဖို့ အဆင်သင့် ဖြစ်နေရမှာပါ”ဟု ဆရတ်သာက သတင်းထောက်များကို ပြောကြား ခဲ့သည်။ 

ဆရတ်သာသည် အိမ်ခြံမြေသူဌေးကြီးဘဝမှ နိုင်ငံရေးသမားဖြစ်လာသူ ဖြစ်သည်။

 ပီတာနဲ့ Move Forward ပါတီအမတ်များကိုတွေ့ရစဉ်

ဝန်ကြီးချုပ်လောင်း ပီတာလင်ဂျာရိုရတ် လွှတ်တော်၏ ထောက်ခံမှု မရခဲ့လျှင် ညွန့်ပေါင်းအဖွဲ့ကနေ MFP ပါတီကို ထုတ်ပယ်လာနိုင်သလားဟု မေးမြန်းစဉ် ဆရတ်သာက “ဒါက သိပ်ကိုလွယ်တဲ့ သင်္ချာပုစ္ဆာပါ။ ကိုယ့်ဖာသာကိုယ် တွက်ကြည့်လို့ရပါတယ်။ လူတိုင်းလည်း သိကြပါတယ်”ဟု ပြောကြားခဲ့သည်။ 

MFP ပါတီကို ထုတ်ပယ်ခဲ့ပါက ဝန်ကြီးချုပ်ရွေးချယ်မည့် လွှတ်တော်မဲပေးပွဲအတွက် ဖြူးထိုင်းပါတီသည် မိမိကို အဆိုပြုလိမ့်မည်ဟု တစ်ထစ်ချ မှတ်ယူရန် စောလွန်းသေးသည်ဟု ဆရတ်သာက ပြောသည်။ 

(၈)ပါတီ မိတ်ဖက်များ၏ ကိုယ်စားလှယ်များမှာ လာမည့် ပူးတွဲလွှတ်တော်တွင် ဘာလုပ်ကြမည်ကို မကြာခင် ဆွေးနွေးတော့မည်ဖြစ်ကြောင်း၊ အကယ်၍ ၎င်းတို့က ဖြူးထိုင်းပါတီကို ဝန်ကြီးချုပ်လောင်း တင်သွင်းခွင့်ပြုရန် သဘောတူလျှင် ပါတီ၏ အမှုဆောင်အဖွဲ့မှ ဝန်ကြီးချုပ်လောင်း ၃ ယောက်ထဲမှ တစ်ယောက်ကို ရွေးချယ်ရမည် ဖြစ်သည်။ 

ဇူလိုင် ၁၉ ရက်နေ့က ပူးတွဲလွှတ်တော် အစည်းအဝေးတွင် မဲပေးရန်အတွက် ပီတာကို ထပ်မံ အဆိုပြုခဲ့ကြသော် လည်း လွှတ်တော်တစ်ရပ်တည်း၌ ပယ်ချပြီးသားအဆိုကို ထပ်တင်ခွင့် မပြုသင့်ဟူသော အကြောင်းပြချက်ဖြင့် အမတ်အများစုက ဒုတိယအကြိမ်မဲပေးမှုကို ခွင့်မပြုရန် မဲပေး ကန့်ကွက်ခဲ့ကြသည်။ 

ဘုရင်အားစော်ကားမှုကို တားမြစ်သည့်ဥပဒေ (lese majeste law)ဟု အများသိကြသည့် ပုဒ်မ ၁၁၂ ပြင်ဆင်ရေး မှာ ဖြူးထိုင်းပါတီ ခေါင်းဆောင်သည့် ညွန့်ပေါင်းအဖွဲ့၏ ပေါ်လစီ ဖြစ်လာမည်မဟုတ်ဟု ဆရတ်သာက ဇူလိုင် ၂၀ ရက်နေ့တွင် ပြောကြားခဲ့သည်။ 

 ဖြူးထိုင်းပါတီက ဝန်ကြီးချုပ်လောင်းများကို တွေ့ရစဉ်

ပုဒ်မ ၁၁၂ ပြင်ဆင်ရေးကို ကြိုးစားပါက အထက်နှင့်အောက် အမတ်များ၏ ထောက်ခံမဲကို ဆုံးရှုံးသွားနိုင်သည်။

(၈)ပါတီညွန့်ပေါင်းတွင် မပါသော ပါတီများနှင့် အထက်လွှတ်တော် အမတ်များကတော့ ပုဒ်မ ၁၁၂ ကို ပြင်ဆင် (သို့) ဖျက်သိမ်းရန် ကြိုးစားမည့် ပါတီ၏ မည်သည့်အမတ်ကိုမှ မဲပေးမည်မဟုတ်ဟု ကြေညာထားကြသည်။

ထို့အပြင် Move Forward ပါတီက အဆိုပြုထားသည့် ပြုပြင်ပြောင်းလဲရေးများမှာ ဘုရင်စနစ်နှင့် နိုင်ငံတော် လုံခြုံရေးကို ဖျက်စီးလိမ့်မည်ဟုလည်း စောဒက တက်ကြသည်။

 Source: The Nation Thailand

CNI International News

ဝါရှင်တန်၊ ဇူလိုင် ၂၀

ကိုရီးယားနှစ်နိုင်ငံနယ်စပ်ကို ခွင့်ပြုချက်မရှိဘဲ ဖြတ်ကျော်ပြီး မြောက်ကိုရီးယားထဲ ဝင်ရောက်သွားသည့် အမေရိကန်စစ်သား၏ ကံကြမ္မာကို သိနိုင်ဖို့ အမေရိကန်စစ်တပ်သည် အသည်းအသန် စုံစမ်းနေကြောင်း ရိုက်တာ မှ ဖော်ပြခဲ့သည်။

အဆိုပါ ဖြစ်ရပ်သည် နျူကလီးယား လက်နက်ပိုင် နိုင်ငံနှင့် ဆက်ဆံရေးတွင် အမေရိကန်အတွက် နောက်ထပ် အကျပ်အတည်း ကြုံနေရသည်။ 

တပ်သား ထရာဗစ်တီကင်း(Travis T. King)ဆိုသော စစ်သားမှာ ၂၀၂၁ ခုနှစ်က စစ်တပ်ထဲ ဝင်လာသူဖြစ်ပြီး ယခုလုပ်ရပ်ကြောင့် စည်းကမ်းပိုင်း အရေးယူမှုကို ရင်ဆိုင်ရတော့မည် ဖြစ်သည်။ 

ကိုရီးယားနှစ်နိုင်ငံနယ်စပ်ကြား ပူးတွဲလုံခြုံရေးဧရိယာ (JSA)ကို လည်ပတ်ကြည့်ရှုစဉ် ဇူလိုင် ၁၈ ရက်နေ့က တပ်သားကင်းမှာ မြောက်ကိုရီးယား ပိုင်နက်အတွင်းသို့ ကိုယ့်သဘောနှင့်ကိုယ် ခွင့်ပြုချက်မရဘဲ ဝင်ရောက် သွားခဲ့သည်ဟု အမေရိကန်ကာကွယ်ရေးဝန်ကြီး လွိုက်အော်စတင်(Lloyd Austin)က ပြောသည်။ 

 မြောက်ကိုရီးယားထဲ ကျူးကျော်ရောက်သွားတဲ့ တပ်သား ထရာဗစ်တီကင်းကိုတွေ့ရစဉ်

“သူဟာ မြောက်ကိုရီးယားမှာ အဖမ်းခံနေရပြီလို့ ယူဆရပါတယ်။ ကျနော်တို့ အခြေအနေကို မျက်ခြည်မပြတ် စောင့်ကြည့်စုံစမ်းနေပါတယ်။ သူ့ရဲ့ ဆွေမျိုးတွေကိုလည်း အကြောင်းကြားဖို့ လုပ်နေပါတယ်”ဟု အော်စတင်က သတင်းစာ ရှင်းလင်းပွဲတွင် ပြောကြားခဲ့သည်။ 

ယခုဖြစ်ရပ်နှင့် ပတ်သက်၍ မြောက်ကိုရီးယား နိုင်ငံပိုင်မီဒီယာက တစ်စုံတစ်ရာ ဖော်ပြခြင်း မရှိသကဲ့သို့၊ နယူး ယောက်မှ မြောက်ကိုရီးယား ကုလကိုယ်စားလှယ်အဖွဲ့ကလည်း မေးမြန်းမှုကို ချက်ချင်း တုံ့ပြန်နိုင်ခြင်းမရှိခဲ့ဟု ပြောသည်။

ဇူလိုင် ၁၈ ရက်နေ့က အမေရိကန် နျူကလီးယားလက်နက်တင် ပဲ့ထိန်းဒုံးကျည်သင်္ဘော တောင်ကိုရီးယားသို့ ဆိုက်ကပ်လာမှုနှင့် ဇူလိုင် ၁၉ ရက်နေ့ အစောပိုင်းတွင် မြောက်ကိုရီးယားက ပဲ့ထိန်းဒုံးကျည် ၂ စင်း ပင်လယ်ထဲ စမ်းသပ်ပစ်ခတ်ခဲ့မှုများကြောင့် ကိုရီယားကျွန်းဆွယ်၌ တင်းမာမှုများ မြင့်တက်လာနေချိန်မှာပဲ  အမေရိကန် စစ်သားကိစ္စ ပေါ်ပေါက်လာခြင်း ဖြစ်သည်။ 

မြို့တော် ပြုံယမ်းအနီးမှ တာတိုပစ် ဒုံးကျည်နှစ်စင်း ပစ်ခတ်ခဲ့ရာ ဒုံးကျည်များသည် ၆၀၀ ကီလိုမီတာလောက် အထိ ပျံသန်းသွားခဲ့ပြီးမှ အရှေ့ဖက်ကမ်းရိုးတန်း ကမ်းလွန်ပင်လယ်ထဲသို့ ထိုးကျသွားခဲ့သည်ဟု တောင်ကိုရီးယား စစ်တပ်က ပြောသည်။ 

အမေရိကန်ကာကွယ်ရေးဝန်ကြီး လွိုက်အော်စတင်ကို တွေ့ရစဉ်

မြောက်ကိုရီးယားသည် ပြီးခဲ့သည့် ရက်သတ္တပတ်က လောင်စာခဲသုံး တိုက်ချင်းပစ် ပဲ့ထိန်းဒုံးကျည် အပါအဝင် နျူကလီးယား ထိပ်ဖူးများကို သယ်ဆောင်နိုင်သည့် ဒုံးကျည်များအား ပိုမိုစမ်းသပ်လာနေသည်။ 

နယ်စပ်ဧရိယာလုံခြုံရေးကို ကြီးကြပ်နေသည့် ကုလသမဂ္ဂဌာန (UNC)က အမေရိကန်စစ်သား ကိစ္စနှင့်ပတ်သက် ၍ အရေးပေါ်လိုင်းမှတဆင့် မြောက်ကိုရီးယားနှင့် ဆက်သွယ်ခဲ့သည်ဟု ကိုရီးယားမှ အမေရိကန်တပ်ဖွဲ့များ၏ ပြောခွင့်ရပုဂ္ဂိုလ်က ပြောကြားသည်။ 

ထိုကိစ္စကို ဖြေရှင်းရန် ကိုရီးယားပြည်သူ့တပ်မတော် အရာရှိများနှင့် ဆက်သွယ် အလုပ်လုပ်နေကြောင်း ဗိုလ်မှူးကြီး အစ်ဆက်တေလာ(Isaac Taylor)က ပြောသည်။ 

“နေ့တိုင်း မြောက်ကိုရီးယားတွေနဲ့ ဆက်သွယ်နေပါတယ်။ ဒီဖြစ်ရပ်ဟာ အပစ်ရပ်ရေး သဘောတူညီချက်နဲ့လည်း အကြုံးဝင်နေပါတယ်” ဟု ၎င်းက ထပ်လောင်းပြောကြားသည်။

Source: ရိုက်တာ

CNI International News

ဘေဂျင်း၊ ဇူလိုင် ၂၀

မော်စကို၏ အိမ်နီးချင်း ယူကရိန်းအား ကျူးကျော်မှုကို တရုတ်က ဆက်လက်ထောက်ခံသည့် သင်္ကေတအဖြစ် ဇူလိုင် ၁၉ ရက်နေ့က ရေတပ်သင်္ဘောများအား ရုရှား၏ ပင်လယ်ပြင်တပ်ဖွဲ့များနှင့် ပူးတွဲစစ်ရေး လေ့ကျင့်ရန် စေလွှတ်ခဲ့သည်ဟု အေပီမှ ဖော်ပြခဲ့သည်။ 

ရုရှား-ယူကရိန်းစစ်ပွဲကြောင့် စီးပွားရေးနှင့် လူသားအရေးဆိုင်ရာ ဂယက်ရိုက်မှုများ ကြီးမားနေဆဲ အချိန်မှာပဲ  ယခုလို စစ်ရေးလေ့ကျင့်မှု ပေါ်ထွက်လာခဲ့ခြင်းဖြစ်သည်။ 

ရုရှား-ယူကရိန်းစစ်ပွဲတွင် ကြားနေမည်ဟု တရုတ်က ပြောကြားခဲ့သော်လည်း အမေရိကန်နှင့် ၎င်း၏ မဟာမိတ် များသည် ရုရှားကို ရန်စနေသည်ဟု စွပ်စွဲကာ မော်စကိုနှင့် ခိုင်မာသော စီးပွားရေး၊ သံတမန်ရေးနှင့် ကုန်သွယ် ဆက်ဆံရေးများအား ဆက်လက် ထိန်းသိမ်းထားခဲ့သည်။ 

တရုတ်-ရုရှား ပူးတွဲစစ်ရေးလေ့ကျင့်မှုတွင် သင်္ဘော ၁၀ စင်းကျော်နှင့် လေယာဉ် အစင်း ၃၀ ကျော် ပါဝင်မည်ဟု တရုတ်နိုင်ငံပိုင် ဆင်ဟွာသတင်းဌာနမှ ဖော်ပြခဲ့သည်။ 

တရုတ်ကာကွယ်ရေးဝန်ကြီး လီရှန်ဖူကို တွေ့ရစဉ်

အသေးစိတ်ကို ပြောကြားခြင်း မရှိသော်လည်း လာမည့်ရက်များတွင် ဂျပန်ပင်လယ် တစ်နေရာမှာ စစ်ရေး လေ့ကျင့်ဖွယ် ရှိသည်။ 

နိုင်ငံတကာဖိုရမ်များတွင် အမေရိကန်က ယူကရိန်းကျူးကျော်မှုအား ပြစ်တင်ရှုတ်ချသည်ကို တရုတ်က ဆန့်ကျင် ၍ ရုရှားကို ထောက်ခံပေးခဲ့သည်။ သို့သော် စစ်ပွဲ၏ မည်သည့်ဘက်ကိုမှ လက်နက် ထောက်ပံ့မည် မဟုတ်ဟု  တရုတ်က ပြောသည်။ 

ယူကရိန်းစစ်ပွဲ ဖြစ်ပွားနေချိန်တွင် နှစ်နိုင်ငံ စစ်ဖက် ဆက်ဆံရေး ရှိနေဆဲဖြစ်သည်ကို ပြသသည့်အနေဖြင့် ရုရှား ရေတပ်သင်္ဘောနှစ်စင်း တရုတ်နိုင်ငံသို့ ရောက်ရှိလာခဲ့သေးသည်။ 

ရုရှား ရေတပ် ဗိုလ်ချုပ်ကြီး နီကိုလိုင်ယဲ့မီနော့ဗ်နဲ့ ရုရှားခေါင်းဆောင် ပူတင်ကို တွေ့ရစဉ်

ရုရှားတွင် ကြေးစားစစ်သားများ အခိုက်အတန့် ပုန်ကန်နေချိန်တုန်းကလည်း တရုတ်က ရုရှားအား ထောက်ခံ ခဲ့သည်။ 

တရုတ်က စစ်ဖက် ဆက်ဆံရေးကို အဆင့်သင်တစ်ခုသို့ ရောက်ရှိအောင် ရုရှားနှင့် ပူးပေါင်းဆောင်ရွက်မှု ပုံစံ အမျိုးမျိုးကို တိုးမြှင့်သွားဖို့ မျှော်လင့်ထားကြောင်း တရုတ်ကာကွယ်ရေးဝန်ကြီး လီရှန်ဖူ(Li Shangfu)က ရုရှား ရေတပ် ဗိုလ်ချုပ်ကြီး နီကိုလိုင်ယဲ့မီနော့ဗ်(Nikolai Yevmenov)အား ပြောကြားခဲ့သည်။ 

လက်ရှိတွင် တရုတ်နိုင်ငံမှာ သင်္ဘော အရေအတွက်အားဖြင့် ကမ္ဘာ့အကြီးဆုံး ရေတပ်ကို ပိုင်ဆိုင်ထားပြီး အရွယ် အစားနှင့် နည်းပညာစွမ်းရည်တွင်ပါ ရုရှားရေတပ်ထက် သာလွန်နေသည်။

Source: AP

CNI International News

နိုင်ရိုဘီ၊ ဇူလိုင် ၂၀

ကင်ညာနိုင်ငံတွင် လူနေမှုစရိတ် ကြီးမြင့်မှုနှင့် အခွန်များ တိုးမြင့်လာမှုကြောင့် ၃ ရက်တိုက် ဆန္ဒပြပွဲ ဖြစ်ပွားလာ ခဲ့ရာ ဇူလိုင် ၁၉ ရက်နေ့၌ မြို့တော် နိုင်ရိုဘီ၏ ခီဘာရာရပ်ကွက်မှာ ဆန္ဒပြသူ ၁၀၀ ခန့်က ရဲများကို ခဲများဖြင့် ပစ်ပေါက်ခဲ့၍ နှစ်ဖက် ပဋိပက္ခဖြစ်ပွားခဲ့ကြောင်း အယ်ဂျာဇီးလ်ယားမှ ဖော်ပြခဲ့သည်။ 

ခီဘာရာတွင် ဆန္ဒပြသူများက ကားဘီးတာယာများကို မီးရှို့ခဲ့ကြရာ ရဲများက မျက်ရည်ယိုဗုံးများဖြင့် ပစ်ခတ် လူစုခွဲခဲ့သည်။ 

ခီဘာရာမှာ ဝါရင့်အတိုက်အခံခေါင်းဆောင် ရိုင်လာအိုဒင်ဂါ(Raila Odinga)၏ အမာခံနယ်မြေ ဖြစ်သကဲ့သို့ ၁၉၉၃ မှ ၂၀၀၃ အထိ ပါလီမန်တွင် ခီဘာရာဒေသကို ကိုယ်စားပြုခဲ့သည်။

ခီဘာရာဒေသသည် ရဲများနှင့် ရုန်းရင်းဆန်ခတ် ပဋိပက္ခများ မကြာခဏ ဖြစ်ပွားရာ နေရာဖြစ်သည်။ သို့သော် မြို့တော်၏ အခြားနေရာများမှာတော့ တည်ငြိမ်အေးချမ်းကြောင်း သိရသည်။

ဆန္ဒပြသူများနဲ့ ကင်ညာရဲတပ်ဖွဲ့ ရုန်းရင်ဆန်ခတ်ဖြစ်နေစဉ်

အာဏာပိုင်များကမူ ဇူလိုင် ၁၉ ရက်နေ့တွင် ကျောင်းများပိတ်မည်ဟု ကြေညာခဲ့သည်။ ထို့နောက် မြို့လယ်ခေါင် တွင် လုပ်ငန်းများ၊ ဆိုင်များ ပိတ်သိမ်းထားသောကြောင့် လူသူရှင်းလင်းနေသည်။ 

မြို့တော်အတွင်း ဆန္ဒပြမှုများ အဖြစ်များသည့် နေရာများတွင် အစိုးရက တပ်ဖွဲ့များကို ဖြန့်ချထားသည်။ သို့သော် လည်း မြို့တော်နေ လူအများစုသည် အိမ်အပြင်မထွက်ဘဲ အခြေအနေကို စောင့်ကြည့်နေကြသည်။ 

နိုင်ငံအနောက်ပိုင်း ဒေသတွင် ရဲက ဆန္ဒပြသူဟု ယူဆရသူများကို ဖမ်းဆီးခဲ့ သည်ဟု The Nation သတင်းစာက ဖော်ပြခဲ့သည်။ အလားတူ တန်ဇန်နီးယား နယ်စပ်အနီး မီဂိုရီတွင် ဆန္ဒပြသူ ၃ ယောက် ဆေးရုံတင်လိုက်ရသည်ဟု  Kenya Television Network သတင်းတွင် ဖော်ပြထားသည်။ 

သမ္မတ ဝီလျံရူတိုကိုတွေ့ရစဉ်

ယခုလ အစောပိုင်းက အကြမ်းဖက်မှုအဖြစ် ပြောင်းလဲသွားသည့် ဆန္ဒပြမှုများတွင် ရဲတပ်ဖွဲ့က မျက်ရည်ယို ဗုံးများ ဖြင့် လူစုခွဲခဲ့သည့်အပြင် အချို့နေရာများ၌ ကျည်အစစ်ဖြင့် ပစ်ခတ်သောကြောင့် အနည်းဆုံး လူ ၁၅ ဦး သေဆုံးပြီး ရာပေါင်းများစွာ အဖမ်းခံခဲ့ရသည်။ 

ပြီးခဲ့သည့်နှစ် သြဂုတ်လက ရွေးကောက်တင်မြှောက် ခံခဲ့ရသည့် သမ္မတ ဝီလျံရူတို (William Ruto)၏ အစိုးရက ပြီးခဲ့သည့် ဇွန်လက အခွန်အခများကို တိုးမြှင့်ပြဋ္ဌာန်းလိုက်သည်။ 

ဆင်းရဲသားများ၏ အကျိုးစီးပွားကို ဦးထိပ်ထားမည်ဟု ကတိရှိခဲ့သော်လည်း သူ့အစိုးရ လက်ထက်တွင် အခြေခံ ကုန်စည်ဈေးနှုန်းများ မြင့်တက်လာခဲ့သောကြောင့် အတိုက်အခံပါတီက ဆန္ဒပြကြရန် တိုက်တွန်းလာခဲ့သည့် အခြေအနေဖြင့် ရင်ဆိုင်နေရသည်။

Source:  အယ်ဂျာဇီးလ်ယား