CNI International News

ဘရပ်ဆဲလ်၊ အောက်တိုဘာ ၁၅

တည်ကြည်သောမွန်းတည့် (Steadfast Noon) ဟု အမည်ပေးထားသည့် နှစ်စဉ်စစ်ရေးလေ့ကျင့်မှုကို အောက်တိုဘာ ၁၇ ရက်တွင် စတင်မည်ဟု မြောက်အတ္တလန္တိတ်စစ်စာချုပ်အဖွဲ့(နေတိုး)က အောက်တိုဘာ ၁၅ ရက်တွင် ကြေညာခဲ့သည်။

အဆိုပါစစ်ရေးလေ့ကျင့်မှုတွင် ဘယ်လ်ဂျီယံနိုင်ငံပေါ်သို့ လေတပ်လေ့ကျင့်မှုအဖြစ် လေယာဉ်အစင်း ၆၀ ပါဝင်မည်ဖြစ်ပြီး မြောက်ပိုင်းပင်လယ်ဒေသနှင့်ဗြိတိန်ပိုင်နက်အတွင်း ဥရောပအခြေစိုက် အမေရိကန် နျူကလီယားဗုံးများ သုံးစွဲနည်း လက်တွေ့လေ့ကျင့်သွားမည်ဟု ရိုက်တာသတင်းဌာနက ရေးသားဖော်ပြသည်။
ရုရှားသည် ယူကရိန်းစစ်မျက်နှာတွင် စစ်ရေးအရ ရှုံးနိမ့်မှုများ ရင်ဆိုင်ခဲ့ရပြီးနောက် နျူကလီးယား လက်နက် ထုတ်သုံးမည်ဟု အကြိမ်ကြိမ် ခြိမ်းခြောက်လာခဲ့ရာ နေတိုးကလည်း ယခုကဲ့သို့ နျူကလီးယားစစ်ရေးလေ့ကျင့်မှု လုပ်ဆောင်လာခဲ့သည်။

နေတိုး တပ်ဖွဲ့ဝင်များ၏ စစ်ရေးလေ့ကျင့်နေမှု

ယခု နေတိုးစစ်ရေးလေ့ကျင့်မှုအစီအစဉ်သည် ရုရှား၏ အောက်တိုဘာကုန်ပိုင်း ပုံမှန်ခင်းကျင်းလေ့ကျင့်နေကျ ဖြစ်သည့် Grom အမည်ရှိ နျူကလီးယားစစ်ရေးလေ့ကျင့်မှုနှင့်လည်း တိုက်ဆိုင်နေသည်။ ထို့ပြင် ရုရှားသည် ၎င်း၏နျူကလီးယားဗုံးကြဲလေယာဉ်များ၊ ရေငုပ်သင်္ဘောများ၊ ဒုံးကျည်များ စမ်းသပ်အချိန်နှင့်လည်း တိုက်ဆိုင်နေ ပြန်သည်။

သို့ရာတွင် ရုရှားနှင့် နောက်ဆုံးတင်းမာသည့်အခြေအနေရှိနေ၍ အနာက်နိုင်ငံများ၏စစ်ရေးလေ့ကျင့်မှုကို ကျယ်ကျယ်ပြန့်ပြန့် လှုံ့ဆော်ခြင်း မပြုခဲ့ကြောင်း နေတိုးက ပြောကြားခဲ့သည်။

“အောက်တိုဘာ ၃၀ ရက်အထိ ကျင်းပမယ့် ဒီလေ့ကျင့်မှုဟာ ပုံမှန်အတိုင်းလေ့ကျင့်တာဖြစ်ပြီး လက်ရှိကမ္ဘာ့ ဖြစ်ရပ်တွေနဲ့ ဆက်စပ်မှုမရှိပါဘူး” ဟု နေတိုးမဟာမိတ်အဖွဲ့၏ ဝက်ဘ်ဆိုက်တွင် ကြေညာထားသည်။ လက်နက်များ တိုက်ရိုက်သုံးစွဲခြင်း ရှိမည်မဟုတ်ဟု ယင်းကြေညာချက်တွင် ဆက်လက်ဖော်ပြထားသည်။

နေတိုး တပ်ဖွဲ့ဝင်များ၏ စစ်ရေးလေ့ကျင့်နေမှု

“အခုလေ့ကျင့်မယ့်အစီအစဉ်ဟာ နေတိုးမဟာမိတ်တွေရဲ့ နျူကလီးယားအဟန့်အတားဟာ ဘေးကင်းလုံခြုံပြီး ထိရောက်မှုရှိတဲ့အကြောင်း ပြသဖို့ဖြစ်ပါတယ်” ဟု နေတိုး၏ပြောရေးဆိုခွင့်ရှိသူ အိုယာနာလန်ဆက် (Oana Lungescu) က ပြောကြားခဲ့သည်။

ဘယ်လ်ဂျီယံနိုင်ငံတွင် ပြုလုပ်သည့် စစ်ရေးလေ့ကျင့်မှုတွင် နိုင်ငံပေါင်း ၁၄ နိုင်ငံနှင့် လေယာဉ်အစင်း ၆၀ အထိ ပါဝင်မည်ဖြစ်သည်။ ဈေးကွက်အတွင်း ခေတ်အမီဆုံး နောက်ဆုံးပေါ် တိုက်လေယာဉ်များနှင့် အမေရိကန် B-52 တာဝေးပစ်ဗုံးကြဲလေယာဉ်များကို မြောက်ပိုင်း ဒါကိုတာဒေသရှိ၊ မီနော့ (Minot) လေတပ်စခန်းမှ စတင်ပျံသန်း မည်ဟု နေတိုးကြေညာချက်အရ သိရသည်။

နိုင်ငံတကာအခြေအနေတင်းမာနေသော်လည်း မိမိတို့မဟာမိတ်အဖွဲ့၏စစ်ရေးလေ့ကျင့်မှုကို ဆက်လက် လုပ်ဆောင်သွားမည်ဖြစ်ကြောင်း နေတိုးအတွင်းရေးမှူးချုပ် ဂျန့်စ်စတိုလန်ဘတ်ချ် (Jens Stoltenberg) က အောက်တိုဘာ ၁၁ ရက်၌ ပြောကြားခဲ့ပြီးဖြစ်သည်။

Source: Reuters

CNI International News

ဝါရှင်တန်၊ အောက်တိုဘာ ၁၅

ယူကရိန်းသို့ နောက်ထပ် ဒေါ်လာ ၇၂၅ သန်း တန်ဖိုးရှိ လက်နက်နှင့် အခြားစစ်ရေး အကူအညီများကို အမေရိကန် မှ ပေးပို့သွားမည်ဖြစ်ကြောင်း အိမ်ဖြူတော်က ပြောကြားခဲ့သည်ဟု အယ်လ်ဂျာဇီးယားက အောက်တိုဘာ ၁၅ ရက် တွင် သတင်းဖော်ပြသည်။

ကိယက်ဗ်မြို့တော် အပါအဝင် ယူကရိန်းပစ်မှတ်များကို ရုရှားဒုံးကျည် ပစ်ခတ်မှုများရှိခဲ့သည့် ယခု သီတင်းပတ် အတွင်း ဥရောပမဟာမိတ်များထံမှ အကူအညီများ ရရှိရေးအတွက်လည်း အိမ်ဖြူတော်၏ ထုတ်ပြန်ချက်ထဲတွင် ထည့်သွင်းဖော်ပြသည်။

အမေရိကန် နိုင်ငံခြားရေးဝန်ကြီး အန်တိုနီဘလင်ကင်က “ယူကရိန်းနိုင်ငံတဝန်းရှိ အရပ်သားများကို ရက်စက် ကြမ်းကြုတ်စွာဖြင့် ရုရှားတိုက်ခိုက်နေသည့် အထောက်အထားများ တိုးပွားနေသဖြင့် ယခုစစ်ရေး အကူအညီ ထပ်မံပေးအပ်ရန် ဖြစ်လာခဲ့ကြောင်း” အောက်တိုဘာ ၁၄ ရက်တွင် ပြောကြားခဲ့သည်။

အမေရိကန်စစ်သားများကိုတွေ့ရစဉ် (GETTY IMAGES)

ယူကရိန်း ကာကွယ်ရေး သမားများက ရုရှား၏တပ်ဖွဲ့များကို တွန်းလှန်နေချိန်၌ အမေရိကန်သည် ယူကရိန်းနှင့် အတူ တစိတ်တဝမ်းတည်း ရပ်တည်ပေးနေကြောင်း ဘလင်ကင်က နောက်ပိုင်းတွင် တွစ်တာလူမှုကွန်ရက်၌ ပြောကြားခဲ့သည်။

ဝါရှင်တန်၏ နောက်ဆုံး ပေးအပ်သော စစ်ရေးအကူအညီများထဲတွင် ဟိုင်းမာ့စ် (HIMARS) ဒုံးကျည်စနစ်အတွက် ခဲယမ်းမီးကျောက်များ ပါဝင်သည်။

ဂျိုးဘိုင်ဒန် အစိုးရလက်ထက် ယူကရိန်းသို့ ပေးအပ်သည့် အကူအညီမှာ စုစုပေါင်း ဒေါ်လာ ၁၈ ဒသမ ၃ ဘီလီယံ အထိ ရှိသွားပြီဖြစ်ကြောင်း အမေရိကန် ကာကွယ်ရေးဝန်ကြီးဌာန၏ သီးခြားထုတ်ပြန်ချက်ထဲတွင် ဖော်ပြထား သည်။

အမေရိကန်သည် ယူကရိန်းသို့ ဟိုင်းမားစ် ဒုံးကျည် ပစ်လွှတ်သည့် စနစ်ပေါင်း ၂၀ အထိ ပေးအပ်ခဲ့ပြီး နောက်ထပ် ၁၈ ခုကိုလည်း လာမည့် နှစ်များတွင် ဆက်လက် ပို့ပေးမည်ဟု ကတိပြုထားသည်။

ယူကရိန်းနဲ့ အမေရိကန် အလံများကိုတွေ့ရစဉ် (GETTY IMAGES)

ဟိုင်းမားစ်သည် ရုရှား၏ ထောက်ပံ့ပို့ဆောင်ရေး လမ်းကြောင်းများ ဖြတ်တောက်ရန်အတွက် တံတားများ၊ သိုလှောင်ရုံများ အပါအဝင် အခြားအဓိက ပစ်မှတ်များကို ယူကရိန်း တုံ့ပြန်တိုက်ခိုက်နိုင်စွမ်းကို မြှင့်တင်ပေးရာ တွင် အရေးပါသော လက်နက်ကြီးဖြစ်ကြောင်း သက်သေပြခဲ့သည်။

ထိုသို့ ရုရှားကို တုံ့ပြန်တိုက်ခိုက်ရာတွင် အောင်မြင်စေခဲ့သည့် လက်နက်စနစ်များအတွက် ထောင်နှင့်ချီ၍ လိုအပ် သည့် ခဲယမ်းမီးကျောက်များကို ယခုစစ်ရေး အကူအညီ၌ အဓိက ရည်ရွယ်ထားသည်။

ယူကရိန်းသို့ ရုရှားကျူးကျော်စစ် ကာလသည် ၈ လတိုင်တိုင် ရှိသွားပြီ ဖြစ်သည်။

Source: Aljazeera

CNI News

၂၀၂၂ ခုနှစ်၊ အောက်တိုဘာ ၁၄

ငြိမ်းချမ်းရေးလုပ်ငန်းစဉ် ဦးဆောင်အဖွဲ့(PPST)သည် မူလ NCA ပြဋ္ဌာန်းချက်များကို အပြည့်အဝ အကောင်အထည် မဖော်နိုင်တော့သည့်အတွက် ပြည်သူလူထုများအား အကျပ်အတည်းများမှ လွတ်မြောက်နိုင်စေရန် NCA ၏ အခြေခံမူ ၃ ရပ်ကိုသာ ကိုင်စွဲ၍ အတတ်နိုင်ဆုံး အကောင်အထည်ဖော်ရေး ကြိုးပမ်းနေဆဲဖြစ်သည်ဟု PPST က ယနေ့ (အောက်တိုဘာ ၁၄ ရက်)ထုတ်ပြန်ခဲ့သည်။

၂၀၂၁ ခုနှစ်၊ ဖေဖော်ဝါရီလ နောက်ပိုင်း နိုင်ငံရေး အခြေအနေ အပြောင်းအလဲ ကြီးမားစွာ ဖြစ်ပေါ်လာသဖြင့် နောက်ဆက်တွဲ မတည်ငြိမ်မှုများ၊ ပဋိပက္ခများ၊ လက်နက်ကိုင် ပဋိပက္ခများ တစ်နေ့ထက် တစ်နေ့ ကြီးထွားလာ ခဲ့ကြောင်း၊ ပြည်သူလူထု တစ်ရပ်လုံးသည်လည်း အကျပ်အတည်း မျိုးစုံနှင့်ကြုံတွေ့နေရကြောင်း PPST က ဆိုသည်။

အဆိုပါ အကျပ်အတည်းများကနေ လွတ်မြောက်နိုင်ရန်အတွက် NCA ၏ နိုင်ငံရေးပြဿနာကို နိုင်ငံရေးနည်း ဖြင့် ဖြေရှင်းရေး၊ သက်ဆိုင်သူ အားလုံး ပါဝင်ပြီး အဓိပ္ပာယ်ပြည့်ဝသည့် နိုင်ငံရေးဆွေးနွေးပွဲများ ဖြစ်မြောက်ရေး၊ အရပ်သားများအား အကာအကွယ်ပေးရေး ဟူသော အခြေခံမူ ၃ ရပ်ကို ယနေ့အချိန်အထိ ကြိုးပမ်း အကောင် အထည်ဖော် နေကြောင်း PPST က ထုတ်ပြန်ခဲ့သည်။

 PPST အဖွဲ့ အစည်းအဝေး ကျင်းပနေစဉ် (NCA-S EAOs)

PPST က “ NCA သည် ပြည်တွင်းစစ်ကို ဦးတည်နေသည့် လက်ရှိ အကြမ်းဖက် ပဋိပက္ခများကို ရပ်စဲ၊ လျော့ နည်းစေပြီး နိုင်ငံရေးပြဿနာများကို နိုင်ငံရေးနည်းဖြင့် ဖြေရှင်းရေး အခြေခံအပေါ် ပြည်သူလူထုအများစုက လိုလားတောင့်တနေသော ပြည်တွင်းငြိမ်းချမ်းရေးကို ပြန်လည် အစပျိုး တည်ဆောက်ရန် လမ်းစပင်ဖြစ် ကြောင်း မိမိတို့ PPST က အလေးအနက် ယုံကြည်ပါတယ်”ဟု ထုတ်ပြန်ချက်မှာ ပြောထားသည်။

မြန်မာနိုင်ငံသမိုင်းတွင် ပင်လုံစာချုပ်ပြီးနောက် ဒုတိယ အရေးပါဆုံး စာချုပ်တစ်ရပ်ဖြစ်သည့် NCA ဟု အတို ကောက်ခေါ်သော စာချုပ်ကို ပြင်ဆင်ညှိနှိုင်းဆွေးနွေးသည့် ကာလ ၂၀၁၁ မှ လက်မှတ်ရေးထိုးပြီး အကောင် အထည်ဖော်သည့်ကာလ ၂၀၂၁ နှစ်ဦးအထိ ၁၀ နှစ်ကြာရှိချိန်တွင် ပြည်သူ လူထုတစ်ရပ်လုံးသည် တည်ငြိမ် အေးချမ်းမှု၊ ဖွံ့ဖြိုးတိုးတက်မှု၊ လူတစ်ဦးချင်း၏ လွတ်လပ်မှုတို့ကို သိသာစွာ ရရှိခံစားခဲ့ရခြင်းမှာ NCA အကျိုး ကျေးဇူးကြောင့်ဆိုလျှင် မှားမည်မထင်ပါဟု PPST က ထုတ်ပြန်ခဲ့သည်။

၂၀၂၂ ခုနှစ်၊ အောက်တိုဘာ ၁၅ ရက်နေ့တွင် တစ်နိုင်ငံလုံးပစ်ခတ် တိုက်ခိုက်မှု ရပ်စဲရေး သဘောတူစာချုပ် (NCA) လက်မှတ်ရေးထိုးခြင်း ၇ နှစ်ပြည့်မည် ဖြစ်သည်။

PPST ၏ ထုတ်ပြန်ချက်ကိုတွေ့ရစဉ်

NCA စာချုပ်ကို ရှမ်းပြည်ပြန်လည်ထူထောင်ရေးကောင်စီ(RCSS)၊ ကရင်အမျိုးသားအစည်းအရုံး(KNU)၊ ဒီမိုက ရေ စီ အကျိုးပြုကရင်တပ်မတော်(DKBA)၊ ကရင်အမျိုးသားအစည်းအရုံး/ ကရင်အမျိုးသားလွတ်မြောက်ရေး တပ်မတော်-ငြိမ်းချမ်းရေးကောင်စီ(KNU/KNLA-PC)၊ ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)၊ ချင်း အမျိုးသားတပ်ဦး (CNF)၊ ရခိုင်ပြည်လွတ်မြောက်ရေးပါတီ(ALP)၊ မြန်မာနိုင်ငံလုံးဆိုင်ရာ ကျောင်းသားများ ဒီမိုကရက်တစ် တပ်ဦး (ABSDF)တို့ ၂၀၁၅ ခုနှစ်၊ အောက်တိုဘာ ၁၅ ရက်တွင် လက်မှတ်ရေးထိုးခဲ့သည်။

ထို့နောက် ၂၀၁၈ ခုနှစ်၊ ဖေဖော်ဝါရီ ၁၃ ရက်တွင် မွန်ပြည်သစ်ပါတီ(NMSP)၊ လားဟူဒီမိုကရက်တစ် အစည်းအရုံး (LDU)တို့ NCA လက်မှတ်ထိုးခဲ့သည်။

PPST ကို NCA လက်မှတ်ထိုးထားသော တိုင်းရင်းသား လက်နက်ကိုင် အဖွဲ့အစည်းများဖြင့် ၂၀၁၇ ခုနှစ်တွင် ဖွဲ့စည်းခဲ့သည်။

CNI International News

ဘေဂျင်း၊ အောက်တိုဘာ ၁၄

ဝါရှင်တန်သည် စစ်အေးတိုက်ပွဲအတွေးအခေါ်များကို လုံခြုံရေးမဟာဗျူဟာတွင် ထည့်သွင်းရေးဆွဲထားကြောင်း တရုတ်အစိုးရက စွပ်စွဲလိုက်ပြီး ၎င်းတို့အကြား တင်းမာနေသော ဆက်ဆံရေးကို ပြန်လည်ပြုပြင်နိုင်အောင် ကြိုးပမ်းဖို့ အောက်တိုဘာ ၁၃ ရက်တွင် တောင်းဆိုလိုက်သည်ဟု အေပီသတင်းအရ သိရသည်။

ကမ္ဘာ့ရေးရာများတွင် ပြိုင်ဘက်ကင်းသည့် တရုတ်နိုင်ငံဖြစ်အောင် ပုံဖော်ကြိုးပမ်းနေကြောင်း သုံးနှုန်းထားသည့် အမေရိကန်အမျိုးသားလုံခြုံရေးမဟာဗျူဟာကို သမ္မတ ဂျိုးဘိုင်ဒန်က လက်မှတ်ရေးထိုး၍ ထုတ်ပြန်ပြီးနောက် တရုတ်က အထက်ပါအတိုင်း စွပ်စွဲလိုက်ခြင်းဖြစ်သည်။

တရုတ်၊ ရုရှားနှင့် အခြားအစိုးရများ၏ ပထဝီဝင်နိုင်ငံရေးအရ အကျပ်ကိုင်ခံရမှုမှ ကာကွယ်ရန် အမေရိကန်သည် ၎င်း၏ကမ္ဘာ့ထောက်ပံ့ပို့ဆောင်ရေးကွင်းဆက်များကို အားဖြည့်သွားမည်ဟု ဘိုင်ဒန်အစိုးရ၏ ဘဏ္ဍာရေးဝန်ကြီး ဂျာနက်ယီလန်က ပြောကြားပြီးနောက် ထိုအပြုအမူသည် ဝါရှင်တန်၏ကုန်သွယ်ရေးကာကွယ်မှုဝါဒဟု တရုတ် နိုင်ငံခြားရေးဝန်ကြီးဌာနက စွပ်စွဲခဲ့သည်။

ဘိုင်ဒန်၏မဟာဗျူဟာထုတ်ပြန်ချက်သည် တရုတ်အပေါ် အမေရိကန်မဟာမိတ်များနှင့် အဆက်ပြတ်အောင်နှင့် ၎င်း၏ကိုယ်ပိုင်အာဏာရှင်ပုံစံဖြစ်စေဖို့ အခြေအနေများ ဖန်တီးလာအောင် ကြိုးပမ်းချက်ဟု တရုတ်က အောက်တိုဘာ ၁၂ တွင် စွပ်စွဲခဲ့ခြင်းဖြစ်သည်။

တရုတ်နိုင်ငံခြားရေး ဝန်ကြီးဌာန ပြောရေးဆိုခွင့်ရှိသူ မော်နင်း (ဓါတ်ပုံ-အေပီ)

နိုင်ငံရေးမဟာမိတ်များနှင့် ကမ္ဘာ့ဦးဆောင်မှုအခန်းကဏ္ဍအပြင် စီးပွားရေး၊ နည်းပညာနှင့် စစ်ရေးတို့တွင် ပြိုင်ဆိုင်မှုမရှိသော တရုတ်နိုင်ငံသာဖြစ်ကြောင်း ဝါရှင်တန်ကို ချေပပြောကြားခဲ့သည်။

လတ်တလောအနေအထားတွင် နည်းပညာ၊ လုံခြုံရေး၊ ထိုင်ဝမ်နှင့် လူ့အခွင့်အရေးဆိုင်ရာ အငြင်းပွားမှုများကြောင့် ဆယ်စုနှစ်များစွာအတွင်း အမေရိကန်-တရုတ်ဆက်ဆံရေးသည် အထူးတင်းမာနေပြီး အနိမ့်ဆုံးအဆင့်တွင် ရှိနေခဲ့သည်။

“စစ်အေးခေတ်အတွေးအခေါ်နှင့် သုညရလဒ်ဂိမ်းများ၊ ပထဝီဝင်နိုင်ငံရေးပဋိပက္ခများနှင့် ကြီးမားသော ပါဝါ ပြိုင်ဆိုင်မှုများကို အရသာခံနေခြင်းသည် လူကြိုက်နည်းပြီး အပြုသဘော မဆောင်ကြောင်း တရုတ်နိုင်ငံခြားရေး ဝန်ကြီးဌာန ပြောရေးဆိုခွင့်ရှိသူ မော်နင်းက ပြောကြားခဲ့သည်။

“ကျမတို့တရုတ်ပြည်ကို အချိုးအကွေ့တစ်ခုရောက်နေတယ်လို့ မြင်ရင် အမေရိကန်-တရုတ်ဆက်ဆံရေးမြှင့်တင်ဖို့ ဝါရှင်တန်ကို ကျမတို့တောင်းဆိုပါတယ်။ ဒါမှ ဆက်ဆံရေးပြန်ကောင်းပြီး တည်ငြိမ်တဲ့လမ်းကြောင်းပေါ် ပြန် ရောက်မှာပါ” ဟု ၎င်းက ဆက်လက်ပြောကြားခဲ့သည်။

Source: AP

CNI International News

ဝါရှင်တန်၊ အောက်တိုဘာ ၁၄

ယူကရိန်းစစ်မျက်နှာ၌ ရုရှား၏ဗျူဟာမြောက် ပစ်မှတ်များကို တိုက်ခိုက်နေခြင်းမှ ကာကွယ်ရန် ခေတ်မီ လက်နက် ကိရိယာများ အလျင်အမြန်ထုတ်လုပ်၍ ပေးပို့ထောက်ပံ့ကြဖို့ မြောက်အတ္တလန္တိတ်စစ်စာချုပ် (နေတိုး) အုပ်စုဝင် မဟာမိတ်များကို အမေရိကန်က တိုက်တွန်းခဲ့ကြောင်း AFP သတင်းကို ကိုးကားလျက် Channel News Asia ဝက်ဘ်ဆိုက်တွင် ဖော်ပြထားသည်။

ယခုသီတင်းပတ်အတွင်း မော်စကိုသည် ယူကရိန်းနိုင်ငံတဝန်းရှိ စွမ်းအင်ဆိုင်ရာ အဆောက်အအုံများကို ဒုံးကျည် များဖြင့် ပစ်ခတ်ခဲ့ပြီး အနည်းဆုံး လူ ၂၀ သေဆုံးခဲ့ရသဖြင့် အထက်ပါအတိုင်း နေတိုးအုပ်စုကို အမေရိကန်က တိုက်တွန်းခဲ့ခြင်း ဖြစ်သည်။

“မနေ့တနေ့ကအထိ (ယူကရိန်း)မှာ အလိုအပ်ဆုံးက လေကြောင်းရန် ကာကွယ်ရေး စွမ်းရည်ပဲ” ဟု အမေရိကန် ကာကွယ်ရေးဝန်ကြီး လွိုက်အော်စတင် (Lloyd Austin) က အောက်တိုဘာ ၁၄ ၌ ဘရပ်ဆဲလ်မြို့တွင် ပြောကြားခဲ့သည်။

ဘရပ်ဆဲလ်မြို့တွင် ကိယက်ဗ်ကို စစ်ရေးကူညီသည့် မဟာမိတ်နိုင်ငံပေါင်း ၅၀ ကျော်တို့၏ အစည်းအဝေးအပြီး တစ်ရက်အကြာ အော်စတင်က အထက်ပါအတိုင်း ပြောကြားခဲ့ခြင်း ဖြစ်သည်။

အမေရိကန်နဲ့ မဟာမိတ်နိုင်ငံများကိုတွေ့ရစဉ် (GETTY IMAGES)

သို့သော်လည်း ရုရှား၏ အမျိုးမျိုးသော တိုက်ခိုက်မှုများမှ ယူကရိန်းကို ကာကွယ်ရန်အတွက် အလွှာအဆင့်ဆင့်ဖြင့် လေကြောင်းရန် ကာကွယ်ရေးစနစ်များ တည်ဆောက်ပေးသွားရန် လိုအပ်ချက်ရှိနေကြောင်း အမေရိကန် ထိပ်တန်း စစ်ဗိုလ်ချုပ်ကြီး မာ့ခ်မိုင်လီ (Mark Milley) က ပြောကြားခဲ့သည်။

“တကယ်တမ်းကြည့်ရင် ခင်ဗျားတို့ မြင်ရမှာက တာတို၊ အနိမ့်အမြင့် စနစ်တွေ၊ တိုလတ်အဆင့်၊ တာဝေးပစ်နဲ့ အမြင့်ပေ အများကြီးကနေ လာတာတွေကို ဟန့်တားနိုင်မယ့် စနစ်တွေ လိုအပ်ချက်ပဲ” ဟု ၎င်း ဘရပ်ဆဲလ်မြို့ တွင် အောက်တိုဘာ ၁၂ ၌ ပြောကြားခဲ့သည်။

အဆိုပါ အလွှာ ၃ ဆင့်ဖြင့် လေကြောင်းရန် ကာကွယ်ရေးစနစ် ချထားမှသာ ယူကရိန်း၏ အရေးပါသော မြို့ကြီး များနှင့် အခြေခံ အဆောက်အအုံများကို ရုရှားပဲ့ထိန်းဒုံးကျည်များ၊ ခရုဇ်ဒုံးကျည်များအပြင် မောင်းသူမဲ့လေယာဉ် (ဒရုန်း)များဖြင့် တိုက်ခိုက်ခြင်းမှ အကာအကွယ် ပေးနိုင်မည်ဖြစ်သည်။

အမေရိကန် ကာကွယ်ရေးဝန်ကြီး လွိုက်အော်စတင်နဲ့ ယူကရိန်း ကာကွယ်ရေးဝန်ကြီး (GETTY IMAGES)

“အဲဒါတွေက ယူကရိန်း ဝေဟင်ပိုင်နက်အားလုံးကို ထိန်းချုပ်တာတော့ မဟုတ်ဘူးဗျ။ ဒါပေမယ့် ယူကရိန်းအတွက် လိုအပ်နေတဲ့ ဦးစားပေး ပစ်မှတ်တွေကို အကာအကွယ်ပေးဖို့ ဒီဇိုင်းထုတ်ထားတာပါ” ဟု မိုင်လီက သတင်းစာ ရှင်းလင်းပွဲ တစ်ရပ်တွင် ပြောကြားခဲ့သည်။

တာတိုမှ တာလစ်ပစ်၊ တာလတ်အမြင့်ပေမှ ပျံသန်း ရောက်ရှိလာသော ဒုံးကျည်များကို ဟန့်တား၍ ပြန်လည် ပစ်ချနိုင်မည့် NASAMS လေကြောင်းရန် ကာကွယ်ရေးစနစ်ကို ဝါရှင်တန်က ယူကရိန်းထံသို့ ပေးအပ်သွားရန် ကတိပြုထားပြီး မကြာမီ အဆိုပါစနစ်နှစ်ခု ပထမဆုံး ရောက်ရှိလာမည်ဖြစ်သည်။

အဆိုပါစနစ် ထုတ်လုပ်ပေးသည့် ရေသီယွန် (Raytheon) နည်းပညာကုမ္ပဏီထံမှ နောက်ထပ် ၆ ခု မှာယူထား သော်လည်း ယူကရိန်းအရောက် ပို့ဆောင်နိုင်ရေးမှာ နှစ်နှစ်မှ သုံးနှစ်အတွင်း ဖြစ်မလာနိုင်သေးပေ။

Source: AFP, Channel News Asia

CNI International News

ဒူဘိုင်း၊ အောက်တိုဘာ ၁၄

OPEC+ နှင့် ရုရှားအပါအဝင် မဟာမိတ်များ၏ စွမ်းအင်ဖြတ်တောက်ဖို့ ဆုံးဖြတ်ချက်ကို တစ်လဆိုင်းငံ့ပေးပါရန် အမေရိကန်တောင်းဆိုလာကြောင်း ဆော်ဒီအာရေဗျက အောက်တိုဘာ ၁၃ ရက်တွင် ကြေညာချက်တစ်စောင် ထုတ်ပြန်ခဲ့သည်။

ထိုသို့ ဆိုင်းငံ့ပေးခြင်းကြောင့် လာမည့်လတွင် ကျင်းပမည့် အမေရိကန်ကြားဖြတ်ရွေးကောက်ပွဲ မတိုင်မီ စွမ်းအင်ဈေးနှုန်းများ တက်နိုင်ခြေကို လျှော့ချနိုင်မည်ဖြစ်သည်။

လာမည့် နိုဝင်ဘာ ၈ ရက် ရွေးကောက်ပွဲအတွက် ကွန်ဂရက်(လွှတ်တော်)အတွင်း ဒီမိုကရက်တစ်ပါတီဝင်အများစု ထိန်းထားရန် အမေရိကန်သမ္မတ ဂျိုးဘိုင်ဒန်က ကြိုးပမ်းနေကြောင်းတော့ ဆော်ဒီနိုင်ငံခြားရေးဝန်ကြီးဌာန၏ ထုတ်ပြန်ချက်ထဲတွင် အတိအကျရည်ညွှန်းထားခြင်း မတွေ့ရပေ။

သို့သော် စွမ်းအင်ထုတ်လုပ်မှုကို တစ်လဆိုင်းငံ့ပေးရန် မိမိတို့ကို အမေရိကန်က တောင်းဆိုကြောင်း အဆိုပါ ကြေညာချက်ထဲတွင် ရေးသားထားသည်။ ကြေညာချက်နိဂုံးပိုင်းတွင် OPEC သည် ဗီယင်နာ၌ အောက်တိုဘာ ၅ ရက်ကျင်းပပြီးစီးခဲ့သည့် အစည်းအဝေးတွင် ထိုကဲ့သို့ စွမ်းအင်ဖြတ်တောက်သွားရန် ဆုံးဖြတ်ခဲ့ကြောင်း ဆက်လက် ရေးသားဖော်ပြသည်။

၂၀၂၂ ခုနှစ် အောက်တိုဘာလ ၅ ရက်နေ့တွင် ဩစတြီးယားနိုင်ငံ ဗီယင်နာမြို့တွင်ပြုလုပ်ခဲ့သည့် OPEC အစည်းအဝေးဝင်ပေါက်တွင် မီဒီယာသမားများ သတင်းရယူရန် စောင့်ဆိုင်းခဲ့ကြစဉ်(ဓါတ်ပုံ-အေပီ)

စွမ်းအင်ဖြတ်တောက်မှုကို ဆိုင်းငံ့ခြင်းကြောင့် အမေရိကန်ပြည်တွင်းရွေးကောက်ပွဲများ ပြီးစီးချိန်အထိ လောင်စာဆီဈေးနှုန်းများ တက်လာခြင်းကို နှောင့်နှေးစေမည်ဖြစ်သည်။

ရေနံဈေးများတက်၍ လောင်စာဆီစရိတ် တိုးလာခြင်းသည် အမေရိကန်နှင့်တကမ္ဘာလုံးအတွက် ငွေကြေး ဖောင်းပွမှုဖြစ်စေခြင်းအတွက် အဓိကမောင်းနှင်အားတစ်ခုလည်းဖြစ်သည်။

လပေါင်းများစွာ ကြာမြင့်အောင် ယူကရိန်းကို ရုရှားစစ်တိုက်နေခဲ့၍ ကမ္ဘာ့စားနပ်ရိက္ခာများ ပြတ်တောက်ခဲ့ရပြီး ကမ္ဘာလုံးဆိုင်ရာ စီးပွားရေးမပြေလည်မှုမှာ ပိုမိုဆိုးရွားလာခဲ့သည်။

အခြားတဖက်တွင်လည်း ဓာတ်ဆီဈေးများ တဟုန်ထိုးတက်လာခြင်းကြောင့် ၎င်းမဲဆန္ဒရှင်များ မကျေနပ်မှုက ဘိုင်ဒန်အတွက် ထိခိုက်စေမည်ဖြစ်သည်။

ရှားရှားပါးပါး ထုတ်ပြန်ခဲ့သော ဆော်ဒီနိုင်ငံခြားရေးဝန်ကြီးဌာန၏ထုတ်ပြန်ချက်သည် အမေရိကန်နှင့်ဆော်ဒီ နှစ်နိုင်ငံကြားဆက်ဆံရေး မည်မျှတင်းမာနေကြောင်း ပြသခဲ့သည်။

အဆိုပါ ဆိုင်းငံ့စေရေး တောင်းဆိုချက်သည် အမေရိကန်ရွေးကောက်ပွဲများနှင့် ဆက်နွှယ်နေကြောင်း ကောက်ချက်ချမှုများကို အိမ်ဖြူတော်က အောက်တိုဘာ ၁၃ ရက်တွင် ငြင်းဆိုခဲ့သည်။ အမေရိကန်၏ စီးပွားရေး ဆိုင်ရာ ထည့်သွင်းစဉ်းစားမှုများ၊ ယူကရိန်းအပေါ် ရုရှားကျူးကျော်စစ်တို့နှင့်သာ ဆက်နွှယ်ခြင်းရှိသည်ဟု အိမ်ဖြူတော်က ပြောကြားခဲ့သည်။

Source: AP

CNI International News

ဘရပ်ဆဲလ်၊ အောက်တိုဘာ ၁၃

ယူကရိန်းအတွက် လက်နက်ထုတ်လုပ်ပေးရေးနှင့် ထောက်ပံ့ပို့ဆောင်ရေး ရုန်းကန်နေရသည့် စိန်ခေါ်မှုနှစ်ရပ်ကို အဖွဲ့ဝင်နိုင်ငံများ ရင်ဆိုင်နေရစဉ်အတွင်း မြောက်အတ္တလန္တိတ်စစ်စာချုပ်(နေတိုး)အဖွဲ့ဝင် နိုင်ငံအသီးသီးမှ ကာကွယ်ရေးဝန်ကြီးများ အောက်တိုဘာ ၁၂ ရက်တွင် တွေ့ဆုံဆွေးနွေးခဲ့ကြကြောင်း အေပီသတင်းတစ်ပုဒ်တွင် တွေ့ရသည်။

လတ်တလော အနေအထားတွင် ရုရှားလက်တုံ့ပြန် ဖျက်ဆီးလိုသည့် စွမ်းအင်ပိုက်လိုင်းများ (သို့မဟုတ်) ဓာတ်အားနှင့်ဆက်သွယ်ရေး ကေဘယ်ကြိုးများကဲ့သို့ အရေးကြီးသည် ဥရောပအခြေခံ အဆောက်အဦများကိုလည်း အကာအကွယ်ပေးနေရသည်။

ယူကရိန်းထဲသို့ ကျူးကျော်ဝင်ရောက်ရန် ၎င်း၏တပ်ဖွဲ့များကို သမ္မတပူတင် အမိန့်ပေးပြီးနောက်ပိုင်း ၈ လတာ အတွင်း နိုင်ငံပေါင်း ၃၀ ပါဝင်သည့် နေတိုးမဟာမိတ်အဖွဲ့သည် စည်းမျဉ်းစည်းကမ်းအတိုင်း ထိန်းသိမ်း ရပ်တည်ခဲ့သည်။

ယူကရိန်း ကာကွယ်ရေးဝန်ကြီးကိုတွေ့ရစဉ် (AP)

နျူကလီးယား လက်နက်ပိုင်ရှင် ရုရှားနှင့် စစ်ရေးအခြေအနေ ပိုမိုဆိုးရွားလာခြင်းမှ ရှောင်ရှားနိုင်ရန်အတွက် နေတိုး အဖွဲ့ဝင်နိုင်ငံများသည် ယူကရိန်းထံသို့ နယ်မြေခုခံ ကာကွယ်ရေး အတွက်သာ အထောက်အပံ့များ ပေးပို့ခဲ့သည်။

သို့သော် နေတိုးအဖွဲ့ဝင် တစ်နိုင်ငံချင်းကတော့ သံချပ်ကာယာဉ်များ၊ လေကြောင်းရန် ကာကွယ်ရေးစနစ်များ (သို့မဟုတ်) တင့်ကားဖျက် ဒုံးကျည်များ အပါအဝင် ခဲယမ်းမီးကျောက်များကို ယူကရိန်းထဲသို့ ပေးပို့နေကြသည်။

အဆိုပါ အထောက်အပံ့များအနက် ယူကရိန်းတပ်ဖွဲ့ဝင်များကို စစ်ဆင်ရေး သင်ခန်းစာများ လေ့ကျင့်သင်ကြား ပေးခြင်းလည်း အကျုံးဝင်သည်။

သို့သော် ယခုသီတင်းပတ်အတွင်း ယူကရိန်းမြို့ကြီးများကို ရုရှားက ဒုံးကျည်များဖြင့် ဆက်တိုက် ပစ်ခတ်လာခဲ့ရာ နေတိုးနိုင်ငံများ၏ လက်ရှိစစ်ရေး အထောက်အပံ့များမှာ မလုံလောက်သည့် အနေအထားသို့ ရောက်ရှိလာခဲ့သည်။

ဖင်လန်ကာကွယ်ရေးဝန်ကြီးကိုတွေ့ရစဉ် (AP)

နေတိုးကာကွယ်ရေးဝန်ကြီးများသည် ထောက်ပံ့ရေးဆိုင်ရာ နည်းလမ်းများကို စုစည်း၍ ကာကွယ်ရေးပစ္စည်း ထုတ်လုပ်ပေးရေး စက်မှုလုပ်ငန်းများ အရှိန်မြှင့်တင်ရန် ဆွေးနွေးငြင်းခုံခဲ့ကြသည်။

“ကျနော်တို့ မဟာမိတ်နိုင်ငံတွေက လေကြောင်းရန် ကာကွယ်ရေးစနစ်တွေ ထောက်ပံ့ပေးခဲ့ကြပေမယ့် ပိုပြီး ထောက်ပံ့ပေးဖို့ လိုအပ်ပါတယ်။ ခရုဇ်ဒုံးကျည်တွေ၊ ဒရုန်းတွေနဲ့ မတူညီတဲ့ စစ်ရေးတာဝန်တွေကို ဆက်လုပ်နိုင်ဖို့ တာတို၊ တာဝေး လေကြောင်းရန် ကာကွယ်ရေးစနစ်တွေ လိုအပ်တာဖြစ်ပါတယ်” ဟု နေတိုးအထွေထွေ အတွင်း ရေးမှူးချုပ် ဂျန်စ့်စတိုလန်ဘတ်က ပြောကြားခဲ့သည်။

“ယူကရိန်းဟာ ကျယ်ပြန့်တဲ့ နိုင်ငံတစ်နိုင်ငံ ဖြစ်ပြီးတော့ မြို့တွေလည်း အများကြီးပါပဲ။ ဒါကြောင့် မြို့တွေနဲ့ နယ်မြေ အစိတ်အပိုင်းတွေကို ရုရှားတိုက်ခိုက်ခံရတာကနေ ကာကွယ်ဖို့ ယူကရိန်းအတွက် အတိုင်းအတာတစ်ခု အထိ တိုးမြှင့်ထောက်ပံ့ဖို့ လိုအပ်ပါတယ်” ဟု ဘရပ်ဆဲလ်မြို့ရှိ နေတိုးဌာနချုပ်တွင် ကျင်းပသည့် အစည်းအဝေး မတိုင်မီ သတင်းထောက်များကို စတိုလန်ဘတ်က ရှင်းပြခဲ့သည်။

Source: AP

CNI International News

မင့်ခ်၊ အောက်တိုဘာ ၁၃

ယူကရိန်းကို ကျူးကျော်စစ် ဆင်နွှဲနေသည့် ရုရှား၏ မဟာမိတ်ဖြစ်သော ဘယ်လာရုစ်သည် ယူကရိန်းစစ်ပွဲထဲ ပါဝင်လာရန် နီးကပ်လာနေကြောင်း ရိုက်တာက ရေးသားထားသည်။

ယခုသီတင်းပတ်အတွင်း ဘယ်လာရုစ်နိုင်ငံ၌ စစ်ရေးလှုပ်ရှားမှုများ ဂယက်ရိုက်ခတ်ခြင်းကို ယူကရိန်းနှင့် အနောက်အုပ်စု နိုင်ငံများ အာရုံစိုက်ခဲ့ကြသည်။

ယူကရိန်းမြေပေါ်တွင် ရုရှား၏ ကျူးကျော်စစ်ကို ထောက်ခံအားပေးရန်အတွက် ဘယ်လာရုစ်သမ္မတ အလက်ဇန္ဒား လူကာရှန်ကို အနေဖြင့် ၎င်း၏စစ်တပ်အား ရုရှားအပေါ် ကတိကဝတ်ပြုလာမည့် အလားအလာရှိကြောင်း အရိပ် လက္ခဏာတစ်ရပ် ပြသလာသည်ဟု ရိုက်တာက ရေးသားသည်။

လူကာရှန်ကိုသည် ယူကရိန်းနယ်စပ်အနီး ရုရှားတပ်ဖွဲ့များနှင့်အတူ ဘယ်လာရုစ်တပ်များ ဖြန့်ကြက်ချထားရန် အမိန့်ပေးထားပြီး တိုက်ပွဲဝင်ရန် အသင့်ဖြစ်နေကြောင်း ဘယ်လာရုစ် ကာကွယ်ရေးဝန်ကြီးဌာနက သတင်းထုတ်ပြန်ခဲ့သည်။

ယူကရိန်းရဲ့ စစ်မြေပြင်ကိုတွေ့ရစဉ် (GETTY IMAGES)

ယူကရိန်းနယ်စပ်မှ ကီလိုမီတာ ၂၀ (၁၂ မိုင်)သာ ဝေးကွာသော ယာ့ခ် (Yelk) မြို့အနီးတွင် ဘယ်လာရုစ် ပြည်ထဲရေးဝန်ကြီးဌာနက ချေမှုန်းရေးဆိုင်ရာ လက်နက်ကိုင် လေ့ကျင့်မှုများကို အောက်တိုဘာ ၁၁ ရက်၌ ပြုလုပ်ခဲ့သည်။

ယူကရိန်းအရေးတွင် ဘယ်လာရုစ် ပါဝင်ပတ်သက်မှု ပိုမို၍ ထဲထဲဝင်ဝင် လုပ်ဆောင်လာလျှင် အနောက်အုပ်စု၏ ပိတ်ဆို့ အရေးယူခြင်းနှင့် ရင်ဆိုင်ရနိုင်ကြောင်း ပြင်သစ်က ဘယ်လာရုစ်ကို သတိပေးခဲ့သည်။

တစ်ချိန်တည်းမှာပင် အဆိုပါ နယ်စပ်အနီးတွင် နိုင်ငံတကာ လေ့လာစောင့်ကြည့်ရေးမစ်ရှင် တစ်ခုကို စေလွှတ်ချထားရန် စက်မှုထိပ်သီး (G-7) အုပ်စုဝင် ၇ နိုင်ငံထံသို့ ယူကရိန်းသမ္မတ ဗိုလိုဒီမီယာဇာလန်းစကီးက တောင်းဆိုခဲ့သည်။

ယူကရိန်းသို့ ပြီးခဲ့သည့် ဖေဖော်ဝါရီ ၂၄ ရက်တွင် ရုရှား စတင်ကျူးကျော်စဉ်က ဘယ်လာရုစ်သည် ၎င်း၏ပိုင်နက် ကို လက်နက်ကြီး ပစ်လွှတ်ရေးအတွက် အသုံးပြုခွင့် ပေးခဲ့သော်လည်း စစ်ပွဲထဲသို့ တိုက်ရိုက်ပါဝင်ခဲ့ခြင်း မရှိပေ။

ရုရှားသမ္မတ ဗလာဒီမာပူတင်က စစ်ပွဲထဲ ဝင်ရန် တောင်းဆိုလာပါက လူကာရှန်ကို အနေဖြင့် ရွေးချယ်စရာမရှိ ကြောင်း ပြောကြားခဲ့ပြီး ဖြစ်သည်။

ယူကရိန်းစစ်ပွဲအတွင်းက ယူကရိန်းပြည်သူများများကိုတွေ့ရစဉ် (GETTY IMAGES)

ယခုအခါ ယူကရိန်းစစ်မြေပြင်တွင် မော်စကိုသည် ဆက်တိုက် ရှုံးနိမ့်မှုများမှ ရုန်းထွက်နိုင်ရန် အားယူနေရပြီး ရုရှား စစ်ဗိုလ်ချုပ်များအပေါ် မကြုံစဖူး လူထုဝေဖန်မှုများ ရင်ဆိုင်နေရချိန်လည်း ဖြစ်သည်။

သို့သော် ဘယ်လာရုစ်၏ စွက်ဖက်မှုရှိလာလျှင် စစ်ရေးအခြေအနေ များစွာ ကွာခြားသွားလိမ့်မည်ဟုလည်း ယူဆနေကြသည်။

နိုင်ငံတကာ မဟာဗျူဟာ လေ့လာရေးသိပ္ပံ၏ အဆိုအရ ဘယ်လာရုစ်နိုင်ငံသည် ဆိုဗီယက်ပြည်ထောင်စုပြိုကွဲပြီး ချိန် လွတ်လပ်ရေးရစဉ်ကတည်းက စစ်မတိုက်ခဲ့သည်မှာ နှစ်ပေါင်း ၃၀ ကျော် ကြာခဲ့ပြီဖြစ်ကြောင်း သိရသည်။

“သူတို့တပ်ကို တိုက်ခိုက်ရေးစွမ်းရည် အစမ်းသပ်ခံနိုင်တဲ့ လက်နက်ကိုင်တပ်ဖွဲ့လို့ အတိအကျ ပြောလို့မရပါဘူး” ဟု စစ်ရေးလေ့လာသုံးသပ်သူ ဆာမီယာပူရီ (Samir Puri) က ပြောကြားခဲ့သည်။

၎င်းသည် “ရုရှားနှင့်ယူကရိန်း စစ်ပွဲသို့ သွားရာလမ်း” စာအုပ်ကို ရေးသားပြုစုခဲ့သူ ဖြစ်သည်။

Source: Reuters

CNI International News

ပြုံယမ်း၊ အောက်တိုဘာ ၁၃

နျူကလီးယားလက်နက် သယ်ဆောင်နိုင်သည့် ခရုဇ်ဒုံးကျည်ကို မြောက်ကိုရီးယားက စမ်းသပ် ပစ်လွှတ်ခဲ့ကြောင်း သိရသည်။

အဆိုပါ တာဝေးပစ် မဟာဗျူဟာမြောက် ခရုဇ် (Cruise) ဒုံးကျည်နှစ်စင်း ပစ်လွှတ်မှုကို ခေါင်းဆောင် ကင်မ်ဂျုံ အန်း ကြီးကြပ်ခဲ့ကြောင်း မြောက်ကိုရီးယားအစိုးရမီဒီယာကို ကိုးကား၍ ရိုက်တာက အောက်တိုဘာ ၁၃ ရက်တွင် သတင်းဖော်ပြသည်။

စစ်ဘက်ဆိုင်ရာ ယူနစ်များအတွက် နျူကလီးယား စွမ်းရည်နှင့် လက်နက်များ၏ စွမ်းဆောင်ရည်ကို အတည်ပြု စမ်းသပ်ရန် ထိုဒုံးကျည်နှစ်စင်းအား ပစ်လွှတ်ခဲ့ခြင်းဖြစ်ကြောင်း မြောက်ကိုရီးယားက ပြောကြားခဲ့သည်။

အောက်တိုဘာ ၁၂ ရက်တွင် စမ်းသပ်ပစ်လွှတ်ခဲ့ခြင်းဟု သိရပြီး ဗျူဟာမြောက် နျူကလီးယား စစ်ဆင်ရေးအတွက် ကိုရီးယားပြည်သူ့တပ်မတော် သုံးစွဲမည့် ခရုဇ်ဒုံးကျည်များ၏ ချေမှုန်းရေးစွမ်းရည်ကို မြှင့်တင်ရန် ရည်ရွယ်ကြောင်း မြောက်ကိုရီးယားမီဒီယာ KCNA က ထုတ်လွှင့်ခဲ့သည်။

ယခု စမ်းသပ် ပစ်လွှတ်ခြင်းသည် မိမိ၏ ရန်သူများကို ထပ်မံ၍ အတိအလင်း သတိပေးချက်ဖြစ်ကြောင်း မြောက်ကိုရီးယားက အလေးပေး ပြောကြားခဲ့သည်။

ဒုံးကျည်ပစ်လွှတ်နေစဉ် (KCNA)

မိမိတို့နိုင်ငံသည် စစ်ရေး အကျပ်အတည်းကို အချိန်မရွေး ပြတ်သားစွာ ဟန့်တားနိုင်ရန်အတွက် ဗျူဟာမြောက် နျူကလီးယား လက်နက်ကိုင် တပ်ဖွဲ့များ၏ စစ်ဆင်ရေး နယ်ပယ်ကို ချဲ့ထွင်သင့်ကြောင်း၊ ထို့အတွက် ယခု စမ်းသပ်ပစ်လွှတ်မှုဖြင့် အစပြုခြင်းဖြစ်ကြောင်း KCNA က သတင်း ဆက်လက် ဖော်ပြသည်။

အောက်တိုဘာ ၁၀ ရက်တွင် ကင်မ်ဂျုံအန်းသည် ယခင်သီတင်းပတ်၌ တောင်ကိုရီးယားနှင့် အမေရိကန် ပူးတွဲ ရေတပ် လေ့ကျင့်မှု ကန့်ကွက်သည့် အနေဖြင့် ဗျူဟာမြောက် နျူကလီးယား စစ်ရေးစွမ်းရည် လေ့ကျင့်ရန် ညွှန်ကြားခဲ့ကြောင်း KCNA သတင်းအရ သိရသည်။

အောက်တိုဘာ ၁၂ ရက်၌ စမ်းသပ်ပစ်လွှတ်ခဲ့သော ခရုဇ်ဒုံးကျည်နှစ်စင်းသည် စက္ကန့်ပေါင်း ၁၀,၂၃၄ ကြာအောင် လေထဲတွင် ပျံသန်းခဲ့ပြီး ကီလိုမီတာ ၂,၀၀၀ ( မိုင် ၁၂၄၀) အကွာအဝေးရှိ ပစ်မှတ်ကို တိကျစွာထိမှန်ခဲ့သည်။

အဆိုပါ ဒုံးကျည် ပစ်လွှတ်မှုနှင့်ပတ်သက်၍ ရိုက်တာက သဘောထား မှတ်ချက် တောင်းခံခဲ့သော်လည်း အမေရိကန်နိုင်ငံခြားရေးဝန်ကြီးဌာနမှ ပြောရေးဆိုခွင့်ရှိသူတစ်ဦးက ငြင်းဆိုခဲ့သည်။

ဝါရှင်တန်သည် မြောက်ကိုရီးယား၏ ခြိမ်းခြောက်မှုများကို ကိုင်တွယ်ဖြေရှင်းရန် မဟာမိတ်များ၊ မိတ်ဖက် နိုင်ငံ များနှင့် အနီးကပ် ပူပေါင်းဆောင်ရွက်သွားရေး အာရုံစိုက်ထားကြောင်းသာ ၎င်းက ပြောကြားခဲ့သည်။

မြောက်ကိုရီးယားသည် ဗျူဟာမြောက် ခရုဇ်ဒုံးကျည်ကို ၂၀၂၁ ခုနှစ်၊ စက်တင်ဘာလတွင် ပထမဆုံး စမ်းသပ်ခဲ့ရာ ထိုစဉ်က အဆိုပါ ဒုံးကျည်ကို ၎င်းနိုင်ငံ၏ပထမဆုံး နျူကလီးယားလက်နက်ဟု စစ်ရေးလေ့လာသုံးသပ်သူများက ရှုမြင်ခဲ့ကြသည်။

Source: Reuters