CNI International News

လာဟိုး၊ မေလ ၁၅

တနင်္ဂနွေနေ့တွင် လွတ်လပ်ခွင့်အတွက် တစ်နိုင်ငံလုံးကန့်ကွက်ဆန္ဒပြကြရန် ပါကစ္စတန်ဝန်ကြီးချုပ်ဟောင်း အီမရန်ခမ်း (Imran Khan) က တောင်းဆိုခဲ့သည်ဟု Bangkok Post သတင်းတွင် ဖော်ပြသည်။

၎င်းအား ဖမ်းဆီးထိန်းသိမ်းမှုကြောင့် ပါကစ္စတန်နိုင်ငံအတွင်း ဆိုးရွားသော မတည်ငြိမ်မှုများ ပေါ်ပေါက်ခဲ့ပြီး နောက် ထိုသို့ပြောဆိုခဲ့ခြင်း ဖြစ်သည်။

ခမ်းသည် ပြီးခဲ့သည့်နှစ် ဧပြီလက ရာထူးမှ ဖယ်ရှားခံခဲ့ရပြီးနောက် တရားစွဲဆိုမှုများစွာဖြင့် ရင်ဆိုင်နေရသူ ဖြစ်သည်။ ၎င်းသည် ပြီးခဲ့သည့် သီတင်းပတ်အစောပိုင်းတွင် ဖမ်းဆီးခံခဲ့ရသော်လည်း ၎င်းအား ထိန်းသိမ်းမှုသည် တရားဥပဒေနှင့်မညီဟု ဗဟိုတရားရုံးချုပ်က အမိန်ချမှတ်ခဲ့ပြီးနောက် သောကြာနေ့တွင် အာမခံဖြင့် ပြန်လွတ် လာခဲ့သည်။ ခမ်းအားဖမ်းဆီးမှုကြောင့် ၎င်းအားထောက်ခံသူများက အစိုးရအဆောက်အဦများကို မီးရှို့ကာ၊ လမ်းများကို ပိတ်ခဲ့ပြီး စစ်တပ်ပိုင်ဆိုင်မှုများကို ဖျက်ဆီးခဲ့ကြသည်။

စစ်တပ်သည် ခမ်းရာထူးမှ ဖယ်ရှားခံရမှုအတွက် အဓိကတာဝန်ရှိသည်ဟုလည်း ၎င်းကိုထောက်ခံသူများက အပြစ်ဖို့ထားသည်။ လွတ်လပ်မှုသည် အလွယ်တကူရမလာကြောင်း၊ ယင်းကိုလုယူရမည်ဖြစ်ပြီး ထို့အတွက် ပေးဆပ်ရမည်ဖြစ်ကြောင်း စနေနေ့ည ယူကျူတွင် ထုတ်ပြန်ခဲ့သည့် မိန့်ခွန်းတစ်ခုတွင် ခမ်းက ပြောခဲ့သည်။

တနင်္ဂနွေနေ့ နိုင်ငံတစ်ဝန်းလုံးတွင် ဆန္ဒပြပွဲများကျင်းပသွားရန် ခမ်းက ထောက်ခံသူများကို တောင်းဆိုခဲ့ပြီး ရွေးကောက်ပွဲကို ချက်ချင်းဆောင်ရွက်ပေးရေး တောင်းဆိုမှုများကို ဗုဒ္ဓဟူးနေ့တွင် ပြန်လည်စတင်သွားမည်ဟု ကြေညာခဲ့သည်။

ဝန်ကြီးချုပ်ဟောင်း ခမ်း၏ စနေနေ့ညက ပြောကြားခဲ့သည့် မိန့်ခွန်းကို ထောက်ခံသူတစ်ဦးမှ မိုဘိုင်းဖုန်းဖြင့် ကြည့်ရှုနေစဉ်(ဓါတ်ပုံ-အေအက်ဖ်ပီ)

အတိုက်အခံ PTI ပါတီခေါင်းဆောင်ခမ်းသည် နိုင်ငံ၏ အင်အားကြီး စစ်တပ်အား ကာလရှည်အာခံမှု လုပ်ဆောင် ခဲ့သူဖြစ်သည်။ ခမ်းက ပြီးခဲ့သည့်နှစ် ၎င်းအား လုပ်ကြံရန် ကြိုးပမ်းမှုတွင် စစ်တပ်မှ ထိပ်တန်းအရာရှိတစ်ဦး ပါဝင် ပတ်သက်နေသည်ဟု အင်္ဂါနေ့တွင် ပြောခဲ့ပြီး ထိုပြောစကားကြောင့် နာရီပိုင်းအကြာတွင်ပင် ဖမ်းဆီးခံခဲ့ရသည်။

ပါကစ္စတန်စစ်တပ်သည် နိုင်ငံ၏ (၇၅)နှစ်ကြာ သက်တမ်း တစ်ဝက်လောက်နီးပါး တိုင်းပြည်ကို အုပ်ချုပ်ခဲ့ပြီး နိုင်ငံရေးစနစ်အတွင်းအာဏာကို ဆက်ထိန်းထားရန်လည်း ဆက်လက်ဆောင်ရွက်လျက်ရှိသည်။

စစ်ခေါင်းဆောင်၏ လုပ်ရပ်များက စစ်တပ်ကို မျက်နှာပျက်စေကြာင်း ခမ်းက ပြောခဲ့သည်။ သို့သော် ယင်း ပြောစကားက လက်ရှိ စစ်ဦးစီးချုပ်ကို ရည်ညွှန်းသလား (သို့မဟုတ်) ၎င်းအားရာထူးမှ ဖယ်ရှားရာတွင် ပါဝင် သည်ဟု ခမ်းကစွပ်စွဲထားသည့် စစ်ဦးစီးချုပ်ဟောင်းကို ရည်ညွှန်းသလား ဆိုသည်မှာ မကွဲပြားခဲ့ပေ။

ခမ်းသည်ဆန္ဒပြပွဲများတွင် စစ်တပ်အဆောက်အဦများ တိုက်ခိုက်ခံရခြင်းနှင့် ပတ်သက်၍ ထည့်သွင်းပြောဆိုခဲ့ခြင်း မရှိဘဲ တိုက်ခိုက်မှုများတွင် PTI ပါတီအလုပ်သမားများ ပါဝင်နေခြင်းကို ငြင်းဆိုခဲ့ကာ ယင်းတို့နှင့်ပတ်သက်၍ လွတ်လပ်သော စုံစမ်းစစ်ဆေးမှု လုပ်ဆောင်ပေးရန် တောင်းဆိုခဲ့သည်။

Source:Bangkokpost

CNI International News

ဘန်ကောက်၊ မေလ ၁၅

စစ်တပ်နှင့်ပတ်သက်နေသော ပါတီများကို အပြတ်အသတ် အနိုင်ရရှိခဲ့ပြီးနောက် တနင်္ဂနွေနေ့ ရွေးကောက်ပွဲတွင် ထိုင်းအတိုက်အခံ ပါတီများ အောင်ပွဲရရှိခဲ့သည်ဟု Reuters က ရေးသားဖော်ပြခဲ့သည်။

ထို့ကြောင့် ၎င်းတို့သည် အစိုးရတစ်ရပ် ဖွဲ့စည်းရေးနှင့် ပတ်သက်သည့် သဘောတူညီမှု ရရှိရန် တက်သုတ်ရိုက် ဆောင်ရွက်သွားမည့် အခြေအနေတွင် ရှိနေသည်။

မဲအရေအတွက် ၉၉ ရာခိုင်နှုန်းနီးပါး ရေတွက်ပြီးချိန်တွင် Move Forward နှင့် ဖြူးထိုင်း (Pheu Thai) ပါတီ တို့သည် ကျန်ပါတီများကို အပြတ်အသတ် အသာစီး ရရှိနေသည်။

သို့သော် စစ်တပ်ကို ဇောင်းပေးရေးဆွဲထားသည့် လွှတ်တော်ဆိုင်ရာ သတ်မှတ်ချက်များကြောင့် ပါတီတစ်ခုချင်းစီ အနေဖြင့် အစိုးရသစ်ဖွဲ့စည်းရန် ရုန်းကန်ရဦးမည်ဖြစ်သည်။

ရှေ့ဆုံးက ဦးဆောင်နေတဲ့ Move Forward ပါတီခေါင်းဆောင် ပီတာ လင်ဂျာရိုရန်ရတ်ကို တွေ့ရစဉ်

အစိုးရသစ်ဖွဲ့စည်းရန် အတိုက်အခံပါတီများ အနေဖြင့် သဘောတူညီချက်များကို သာမက စစ်တပ်မှဖွဲ့စည်းထား သော ဆီးနိတ်အဖွဲ့ဝင်များ အပါအဝင် ကျန်အဖွဲ့အစည်းများထံမှ ထောက်ခံမှုရရှိရန် လိုအပ်မည် ဖြစ်သည်။

ဆီးနိတ်သည် စစ်တပ်ပါတီများဘက်မှဖြစ်ကာ အစိုးရသစ်ဖွဲ့ရန်နှင့် ဝန်ကြီးချုပ်သစ် ရွေးချယ်ရန် မဲပေးခွင့် ရှိနေသည်။

တနင်္ဂနွေနေ့ ရွေးကောက်ပွဲသည် သက်ဆင် ရှင်နာဝပ် (Shinawatra) မိသားစုနှင့် ထိုင်းစစ်တပ်တို့ အကြား အရေးပါသော အဖွဲ့အစည်းများကို လွှမ်းမိုးမှုရရှိရေး ဆယ်စုနှစ်ကြာ အားပြိုင်မှု၏ နောက်ဆုံးတိုက်ပွဲ ဖြစ်သည်။

သို့သော် လူငယ်မဲဆန္ဒရှင်များ၏ အထောက်အပံ့ဖြင့် အံ့သြသင့်ဖွယ် ရလဒ်ကို ရရှိခဲ့သည့် Move Forward ပါတီ၏ အောင်မြင်မှုက ထိုင်းအဖွဲ့အစည်းများနှင့် အာဏာရပါတီများ၏ စိတ်ပိုင်းဖြတ်မှုအတွက် စမ်းသပ်ချက် ဖြစ်လာ မည်ဖြစ်သည်။

ထွက်ပေါ်လာသော ရလဒ်များတွင် Move Forward ပါတီက ဦးဆောင်နေကာ ဖြူးထိုင်းပါတီက ဒုတိယနေရာတွင် နီးကပ်စွာ ရပ်တည်နေသည်။

ဒုတိယ ဦးဆောင်နေတဲ့ ဖြူးထိုင်းပါတီက ပေတုန်တန်ကိုတွေ့ရစဉ်

Reuters သတင်းဌာန၏ တွက်ချက်မှုအရ ထိုပါတီနှစ်ခုသည် စစ်တပ်၏ ပင်မ ပါတီဖြစ်သော Palang Prachara ပါတီအပြင်၊ စစ်တပ်ထောက်ခံသော United Thai Nation ပါတီတို့ထက် လွှတ်တော်တွင်း နေရာ သုံးဆကျော် ပိုမို ရရှိနိုင်သည်ကိုလည်း တွေ့ရသည်။

မဲရလဒ်သည် အံ့သြဖွယ်ကောင်းသည်ဟု Move Forward ပါတီခေါင်းဆောင် ပီတာ လင်ဂျာရိုရန်ရတ် (Pita Limjaroenrat) ပြောကာ အစိုးရဖွဲ့စည်းချိန်တွင်လည်း ပါတီ၏ တန်ဖိုးများကို မှန်ကန်စွာ ဆောင်ရွက်သွားမည်ဟု ပြောသည်။

အစိုးရသစ်သည် စစ်တပ်နှင့် အာဏာရှင် ထောက်ခံသော ပါတီများကို ဆန့်ကျင့်သွားမည်ဟု ပီတာက သတင်းထောက်များကို ပြောခဲ့ကာ လူနည်းစု အစိုးရအတွက် ထိုင်းတွင် နေရာမရှိတော့ဟု ပြောနိုင်ကြောင်းလည်း ၎င်းက ပြောခဲ့သည်။

ဖြူးထိုင်းပါတီနှင့် မဟာမိတ်ဖွဲ့ရန် လမ်းဖွင့်ထားဆဲ ဖြစ်သည်ဟု ပီတာက ပြောခဲ့သော်လည်း ဝန်ကြီးချုပ်သစ် ရွေးချယ်ရေးတွင် ကိုယ်ပိုင်အမြင်ရှိသည်ဟု ပြောသည်။

နောက်ဆုံး အာဏာသိမ်းမှုကို လုပ်ဆောင်ခဲ့သည့် စစ်ဗိုလ်ချုပ်ကြီးဟောင်း ပရာယွတ်ချန်အိုချာ (Prayuth Chan-ocha) သည်လည်း ယခုရွေးကောက်ပွဲတွင် ဝင်ရောက်ယှဉ်ပြိုင်ကာ ဝန်ကြီးချုပ်အဖြစ် ထပ်မံရွေးချယ်ခံရရန် ကြိုးပမ်းခဲ့သည်။

အစိုးရအဖွဲ့အတွင်း ပြောင်းလဲခြင်းက ပဋိပက္ခဖြစ်စေ နိုင်သည်ဟုလည်း ၎င်းက သတိပေးထားသည်။

၎င်းသည် ပါတီ အခြေမလှမှုကြောင့် United Thai Nation ပါတီရုံးချုပ်မှ တနင်္ဂနွေနေ့တွင် တိတ်တဆိတ် ထွက်ခွာသွားသည်ကို တွေ့ရပြီး ထောက်ခံသူ အင်အားလည်း အနည်းငယ်ကိုသာ မြင်တွေ့ခဲ့ရသည်။

Source: ရိုက်တ

စိန့်ပီတာစဘတ်၊ မေလ ၁၃

ရုရှားနိုင်ငံ၏ ရန်ဘက်များသည် တတိယကမ္ဘာစစ်နှင့် ကမ္ဘာလုံးဆိုင်ရာ ကပ်ဘေးတစ်ခု ဖြစ်စေရန် ဦးဆောင်နေ ကြသည်ဟု ရုရှားလုံခြုံရေးကောင်စီ၏ ဒုတိယဥက္ကဋ္ဌဖြစ်သူ ဒီမီထရီ မက်ဗီဒက်ဗ် (Dmitry Medvedev) က ယုံကြည်နေကြောင်း တာ့စ်သတင်းတွင် ဖော်ပြသည်။

ယနေ့အချိန်တွင် ကျနော်တို့သည် ရုရှားနိုင်ငံ၏ အချုပ်အခြာအာဏာ၊ နယ်မြေပိုင်ဆိုင်မှုနှင့် လူသန်းပေါင်း များစွာ ၏ လုံခြုံရေးကို ကာကွယ်ရန်အတွက် အထူးစစ်ဆင်ရေး တစ်ခုကို ဆောင်ရွက်နေသည်ဟု မက်ဗီဒက်ဗ်က သောကြာနေ့၌ စိန့်ပီတာစဘတ် (St.Petersburg)နိုင်ငံတကာ တရားဥပေဒ ဖိုရမ်မှာ ပြောခဲ့သည်။

ရုရှားနိုင်ငံအပေါ် အကြီးစား စစ်ပွဲတစ်ခု ဆင်နွှဲနေသည်မှာ သိသာထင်ရှားကြောင်း၊ အမေရိကန်နှင့် ဥရောပနိုင်ငံ များသည် ရုရှား၏ ရန်သူများကို သေစေနိုင်သည့် လက်နက်မျိုးစုံ ထောက်ပံ့ပေးနေကြောင်း၊ ၎င်းတို့သည် ရုရှား နယ်စပ် ဒေသတွင် အကြမ်းဖက်မှုများ လုပ်ဆောင်နေကာ၊ အဖျက်အမှောင့် လုပ်ငန်းများနှင့် နိုင်ငံရေးအရ လုပ်ကြံ မှုများကိုပါ ကျူးလွန်နေသည်ဟုလည်း ပြောခဲ့သည်။

 ယူကရိန်းစစ်ပွဲကိုတွေ့ရစဉ်

၎င်းအနေဖြင့် ရုရှား၏ ရန်ဘက်နိုင်ငံများသည် တတိယကမ္ဘာစစ်နှင့် ကမ္ဘာလုံးဆိုင်ရာ ကပ်ဆိုးကြီးတစ်ခုဖြစ်စေရန် ဦးဆောင်နေကာ အားလုံးသိရှိထားသည့်အတိုင်း ယင်းတွင် မည်သူမှ အနိုင်ရရှိမည် မဟုတ်နိုင်ကြောင်း ယူဆထား သည်ဟုလည်း မက်ဗီဒက်ဗ်က ပြောသည်။

ကာရေဘီယံ ပဋိပက္ခ (Caribbean Crisis)အတွင်း ကမ္ဘာလုံးဆိုင်ရာ ဆိုးရွားပြင်းထန်သည့် အခြေအနေ တစ်ခုကို စတင်ရန် အမေရိကန်အတွက် ဆိုဗီယက်ဒုံးကျည် မည်မျှ လိုအပ်သည် ဆိုသည်ကို အမှတ်ရစေကြောင်း၊ အခြား တစ်ဖက်တွင် ရုရှားနယ်စပ်အနီးရှိ နေတိုးထိန်းချုပ်ရာ အကြမ်းဖက်သမားများထံ အချိန်တိုအတွင်း လက်နက် မည်မျှ ရောက်ရှိနေသည်ကို အမှတ်ရစေသည်ဟုလည်း မက်ဗီဒက်ဗ်က ပြောသည်။

ကမ္ဘာကြီးအား ပျက်ကပ်ကာလဆီသို့ မည်သူ ခေါ်ဆောင်လာသလဲ မေးခွန်းထုတ် လိုသည်ဟုလည်း ရုရှားအရာ ရှိက အဆုံးသတ် ပြောဆိုခဲ့သည်။

Source: တာ့စ်

CNI International News

အင်ဖယ်လ်၊ မေလ ၁၃

မဏိပူရပြည်နယ်တွင် နောက်ထပ် ငါးရက်ကြာ အင်တာနက် ဖြတ်တောက်ထားဦးမည်ဟု NORTHEAST NOW သတင်း၌ ဖော်ပြသည်။

အင်တာနက် ဖြတ်မည့်အပေါ် မဏိပူရပြည်နယ်အစိုးရက မေလ ၁၂ ရက်တွင် ထုတ်ပြန် ကြေညာခဲ့ခြင်း ဖြစ်သည်။

ပြည်နယ်အတွင်း၌ တင်းမာမှုများ ဆက်ရှိနေဆဲ အခြေအနေကြောင့် အင်တာနက်ကို ထပ်မံဖြတ်တောက် ထားရ ခြင်း ဖြစ်သည်။

ဖုန်းကြည့်နေတဲ့ လူငယ်တစ်ဦးကိုတွေ့ရစဉ်

ထွက်ပေါ်လာသော သတင်းများအရ ပြည်နယ်အတွင်း၌ တင်းမာမှုများ ဆက်ရှိနေဆဲ ဖြစ်ကာ နေရာတစ်ချို့တွင် အကြမ်းဖက်မှုများ ဖြစ်နေဆဲဟု မဏိပူရရဲတပ်ဖွဲ့က ပြည်နယ်အစိုးရကို အကြောင်းကြားခဲ့သည်ဟု သိရသည်။

ထို့အပြင် အင်တာနက် အသုံးပြု၍ရသည့် အခြေအနေတွင် လူမှုကွန်ယက်များ၌ ဓာတ်ပုံများ၊ အမုန်းစကားများနှင့် မုန်းတီးမှုကိုဖြစ်စေသော ဗွီဒီယိုများ ပျံ့နှံ့လာမည်ကိုလည်း စိုးရိမ်မှုများ ရှိနေသည်။

မဏိပူရအစိုးရသည်လည်း ထိုကဲ့သို့ လူမှုကွန်ယက်များကို အသုံးပြုခြင်းက ပြည်သူများအတွက် သွေးထိုး လှုံ့ဆော် မှုကို ဖြစ်စေကာ ပြည်နယ်တွင်းမှ တရားဥပဒေစိုးမိုးရေးအပေါ် ဆိုးကျိုးသက်ရောက်မှု ရှိစေမည်ကို စိုးရိမ်နေသည်။

မဏိပူရပြည်နယ်တွင်း အင်တာနက် ဖြတ်ထားရခြင်းသည် အကြမ်းဖက် လုပ်ရပ်များ၊ အစီအစဉ်များ ကိုတားဆီး ရန်၊ ငြိမ်းချမ်းရေးနှင့်အတူ ယှဉ်တွဲနေထိုင်ရေးကို ထိန်းသိမ်းရန်၊ အသက်ဆုံးရှုံးရခြင်း သို့မဟုတ် အစိုးရနှင့် ပုဂ္ဂလိ က ပိုင်ဆိုင်မှုများ ဆုံးရှုံးရနိုင်မှုကို တားဆီးရန် ဖြစ်သည်ဟု အစိုးရက ပြောသည်။

မဏိပူရအဓိကရုဏ်းကိုတွေ့ရစဉ်

ဆန္ဒပြသူများ၊ သွေးထိုးလှုံ့ဆော်သူများကို အစုအဝေး သို့မဟုတ် အထောက်အပံ့ ဖြစ်စေသည့် သတင်း အမှားများ၊ ကောလာဟလများ WhatApp၊ Facebook၊ Instagram၊ Twitter နှင့် SMS တို့မှ ပျံ့နှံ့ခြင်းကို တားဆီးခြင်းဖြင့် ပြည်သူ့ အကျိုးစီးပွားအတွက် တရားဥပဒေစိုးမိုးမှုကို ထိန်းသိမ်းရေး လိုအပ်သော ဆောင်ရွက်ချက်များကို ချမှတ် ဆောင်ရွက်ရန် မဖြစ်မနေ အရေးပါသည်ဟု အစိုးရ၏ ထုတ်ပြန်ချက်တွင် ဖော်ပြထားသည်။

ယင်းက ပြည်သူများ၏ အသက်အန္တရာယ်နှင့် ပုဂ္ဂလိကပိုင် သို့မဟုတ် ပြည်သူပိုင်များ ပျက်ဆီးဆုံးရှုံးခြင်းအတွက် အတားအဆီး ဖြစ်စေမည်ဟုလည်း သိရသည်။

Source: NORTHEAST NOW

CNI International News

ကိယက်ဗ်၊ မေ - ၁၃

အရှေ့ဘက် ဘက်ခ်မွတ်(Bakmut) မြို့ တိုက်ပွဲအတွင်း ရုရှားတို့ သိမ်းပိုက်ထားသော နယ်မြေတချို့ကို ပြန်လည် ရယူနိုင်ခဲ့သည်ဟု ယူကရိန်းစစ်တပ် အရာရှိများက သောကြာနေ့တွင် ပြောခဲ့ကြောင်း အေပီမှ ဖော်ပြခဲ့သည်။

သို့သော် ယင်းက ယူကရိန်းဘက်မှ တန်ပြန်ထိုးစစ်ဆင်မှုများ စတင်ခြင်း ဟုတ်/မဟုတ်ကိုတော့ ကွဲကွဲပြားပြား မသိရသေးပေ။

ယူကရိန်းတပ်များသည် မြို့၏ မြောက်ဘက်သို့ ချီတက်လာသည်ဟု ရုရှားကာကွယ်ရေးဌာနက ပြောသော်လည်း ယူကရိန်းတပ်များသည် ကာကွယ်ရေးကို ထိုးဖောက်နိုင်ခဲ့သည်ဟု ရုရှားစစ်ရေး ဘလော့ဂါများ၏ ပြောစကားကို တော့ ငြင်းဆိုခဲ့သည်။

ယခု သီတင်းပတ်အတွင်း ယူကရိန်းတပ်များက ပြန်လည် သိမ်းပိုက်နိုင်ခဲ့သည့် ဘက်ခ်မွတ်မြို့ တောင်ဘက် ၁ ဒသမ ၂ မိုင်ခန့် နယ်မြေများသည် အရှည်ကြာဆုံးနှင့် အသေအပျောက် အများဆုံး ဘက်ခ်မွတ်မြို့ စစ်ပွဲတွင် ကြီးမားသည့် အောင်မြင်မှုတစ်ခုဖြစ်သည်။

ဇာလန်းစကီးကိုတွေ့ရစဉ်

ထိုမြို့သည် အရေးပါသော ထောက်ပံ့ရေး လမ်းကြောင်းကိုပါ ကာကွယ်ပေးနိုင်လိမ့်ဟု တိုက်ခိုက်မှုကို ဦးဆောင်ခဲ့ သည့် ယူကရိန်းအထူးတပ်ဖွဲ့ တပ်မှူးများက ပြောသည်။

သောကြာနေ့တွင် တပ်မှူးများနှင့် တွေ့ဆုံခဲ့ကာ ယူကရိန်းတပ်များသည် ရန်သူများကို ဟန့်တားနိုင်ခဲ့ကာ တန်ပြန် တိုက်ခိုက်မှုများပင် လုပ်ဆောင်နိုင်ခဲ့သည်ဟု သတင်းရရှိခဲ့ကြောင်း ယူကရိန်းသမ္မတ ဇာလန်းစကီးက ပြောသည်။

မိန့်ခွန်းတစ်ခုတွင် ဇာလန်းစကီး(Volodymyr Zelenskyy)က ယူကရိန်းတပ်ဖွဲ့များကို ချီးကျူးကာ ရုရှားများ တပ်ပျက်နေပြီဟုလည်း ထောက်ပြသွားခဲ့သည်။

ကျူးကျော်သူများသည် စိတ်ဓာတ်ရေးရာတွင် အရှုံးပေးထားပြီဖြစ်ကာ ၎င်းတို့ကို နေ့စဉ် တွန်းအားပေးနိုင်ပါက ၎င်းတို့၏ စိတ်ထဲမှ ကြောက်ရွံ့နေမှုများသည် အညံ့ခံမှု၊ အမှားအယွင်းနှင့် ရှုံးနိမ့်မှုတို့ကို ဖြစ်စေလိမ့်မည်ဟုလည်း ဇာလန်းစကီးက ပြောခဲ့သည်။

ဒဏ်ရာရနေတဲ့ ယူကရိန်းစစ်သားတွေကို ဆေးကုသပေးနေစဉ်

ဘက်ခ်မွတ်တွင် ယူကရိန်းတပ်များ အသာစီးရရှိနေမှု အခြေအနေနှင့် ပတ်သက်၍လည်း ယူကရိန်း ကာကွယ်ရေး ဌာန ဒုတိယဝန်ကြီးက တယ်လီဂရမ် ကြေညာချက် တစ်စောင် ထုတ်ပြန် အတည်ပြုပေးသည်။

သို့သော် အမေရိကန်ဘက်က ဘက်ခ်မွတ်မြို့သည် မည်သည့် ဘက်တွင်မှ အသာစီး ရရှိထားသည့် အခြေအနေ တွင် မရှိသေးဟု သိရှိထားကြောင်း အိမ်ဖြူတော် အမျိုးသားလုံခြုံရေးကောင်စီ ပြောခွင့်ရပုဂ္ဂိုလ် ဂျွန်ကာဘီ (John Kirby) က ပြောသည်။

အမေရိကန်ဘက်က ဘက်ခ်မွတ်မြို့နှင့် ပတ်သက်သည့် မဟာဗျူဟာမြောက် တန်ဖိုးများကို ကန့်သတ်ထားသော် လည်း ရှစ်လကြာ တိုက်ပွဲအတွင်း ရုရှားတပ်များသည် လူအင်အားနှင့် လက်နက် အင်အားများစွာ ဆုံးရှုံးထားခဲ့ ပြီးလည်း ဖြစ်သည်။

Source: AP

CNI International News

အော်စလို၊ မေလ ၁၂

ပြီးခဲ့သည့်နှစ်တွင် ပဋိပက္ခ သို့မဟုတ် သဘာဝဘေးအန္တရာယ်များကြောင့် ပြည်တွင်း၌ပင် နေရပ်စွန့်ခွာ ထွက်ပြေး ခဲ့ရသူ အရေအတွက်သည် ၇၁ ဒသမ ၁ သန်းအထိ စံချိန်တင် မြင့်တက်ခဲ့သည်ဟု နော်ဝေဒုက္ခသည် ကောင်စီ၏ နေရပ်စွန့်ခွာခဲ့ရသူ စောင့်ကြည့်ရေးစင်တာက ထုတ်ပြန်ကြောင်း AP သတင်းတွင် ဖော်ပြသည်။

ယူကရိန်းပဋိပက္ခကြောင့်လည်း နေရပ်စွန့်ခွာရသူ အရေအတွက် မြင့်တက်လာရခြင်း ဖြစ်သည်။

ရုရှား၏ ကျူးကျော်မှုကြောင့် ၂၀၂၂ နှစ်ကုန်ပိုင်းတွင် ယူကရိန်းပြည်တွင်း၌ လူပေါင်း ၅ ဒသမ ၉ သန်းသည် နေရပ် စွန့်ခွာခဲ့ရသည်။

ထို့ကြောင့် ပဋိပက္ခ သို့မဟုတ် အကြမ်းဖက်မှုများကြောင့် နေရပ်စွန့်ခွာ ထွက်ပြေးရသူ အရေအတွက်မှာ ၆၂ သန်း သို့ မြင့်တက်လာသည်။

၂၀၂၁ ခုနှစ်နှင့် ယှဉ်လျှင် ၁၇ ရာခိုင်နှုန်း တိုးမြင့်လာခြင်း ဖြစ်သည်။ ဆီးရီးယား၏ ကာလရှည် ပဋိပက္ခကြောင့် လူပေါင်း ၆ ဒသမ ၈ သန်း နေရပ်စွန့်ခွာခဲ့ရသည်။

ပြည်တွင်း ဒုက္ခသည်များကိုတွေ့ရစဉ်

တစ်ဖက်တွင်လည်း ရေကြီးမှု၊ အငတ်ဘေး စသည့် သဘာဝဘေး အန္တရာယ်များကြောင့် နိုင်ငံတွင်း၌ပင် ရွှေ့ပြောင်းနေထိုင်ခဲ့ရသူ အရေအတွက်သည် ပြီးခဲ့သည့်နှစ်တွင် ၈ ဒသမ ၇ သန်းရှိခဲ့သည်။

၂၀၂၁ ခုနှစ်ကထက် ၄၅ ရာခိုင်နှုန်း မြင့်တက်လာခြင်း ဖြစ်သည်။ ထိုအခြေအနေများကြောင့် ပြီးခဲ့သည့်နှစ်တွင် ပြည်တွင်း၌ပင် နေရပ်စွန့်ခွာ ထွက်ပြေးရသူ အရေအတွက် စုစုပေါင်းမှာ ၇၁ ဒသမ ၁ အထိ မြင့်လာခဲ့ပြီး ယခင်နှစ် ကထက် ၂၀ ရာခိုင်နှုန်း မြင့်တက်လာခြင်း ဖြစ်သည်။

ပြည်တွင်း၌ပင် နေရပ်စွန့်ခွာ ထွက်ပြေးရသူ ဆိုခြင်းသည် ၎င်းတို့၏ ကိုယ်ပိုင်နိုင်ငံအတွင်း တစ်နေရာမှ တခြား တစ်နေရာသို့ တိမ်းရှောင် ထွက်ပြေးရသူများကို ရည်ညွှန်းခြင်းဖြစ်ကာ ယင်းတွင် တခြားနိုင်ငံများသို့ ထွက်ခွာသွား သူများကို ထည့်သွင်း သတ်မှတ်ခြင်းမရှိဟု စောင့်ကြည့်ရေးစင်တာ၏ ထုတ်ပြန်ချက်တွင် ပါဝင်သည်။

ယူကရိန်း၊ ဆီးရီးယားနှင့် အီသီယိုးပီးယားတို့အပြင် တခြားနေရာများမှ ပဋိပက္ခများကြောင့် ပြည်တွင်း နေရပ် စွန့်ခွာ ထွက်ပြေးရသူ အရေအတွက်သည် ၂၀၂၃ ခုနှစ်တွင်လည်း လျော့ကျသွားမည့်ပုံစံတွင် မရှိပေ။

ပြည်တွင်း ဒုက္ခသည်များကိုတွေ့ရစဉ်

ဆူဒန်ပဋိပက္ခကြောင့် နေရပ်စွန့်ခွာ ထွက်ပြေးရသူ အရေအတွက်သည်ပင် ၇၀၀,၀၀၀ ရှိနေပြီဟု ကုလသမဂ္ဂ ရွေ့ပြောင်း နေထိုင်သူများ အေဂျင်စီက ပြောသည်။

၂၀၂၂ ခုနှစ်တွင် သုံးနှစ် ဆက်တိုက်ဖြစ်ခဲ့သော လာနီနာ (La Nina) ရာသီဥတု အခြေအနေသည် သဘာဝဘေး အန္တရာယ်ကြောင့် ရွှေ့ပြောင်း နေထိုင်မှုကို ဖြစ်စေသည့် အဓိက အကြောင်းအရင်း ဖြစ်သည်ဟု စောင့်ကြည့်ရေး စင်တာက ပြောသည်။

ယင်းသည် ပါကစ္စတန်၊ နိုင်ဂျီးရီးယားနှင့် ဘရာဇီးလ်တို့တွင် ရေကြီးမှုကြောင့် နေရပ်စွန့်ခွာ ထွက်ပြေးခဲ့ရသူ အရေအတွက်ကို စံချိန်တင် မြင့်တက်စေခဲ့ကာ ဆိုမာလီ၊ ကင်ညာနှင့် အီသီယိုးပီးယားတို့တွင် အဆိုးရွားဆုံး မိုးခေါင်မှုကို ဖြစ်စေခဲ့သည်ဟု သိရသည်။

Source: AP

CNI International News

အစ္စလာမ္မာဘတ်၊ မေလ ၁၂

ပါကစ္စတန် ဗဟိုတရားရုံးချုပ်က ဝန်ကြီးချုပ်ဟောင်း အီမရန်ခမ်း(Imran Khan)အား ဖမ်းဆီးထားခြင်းသည် တရားမဝင်ကြောင်း အမိန့်ချမှတ်ကာ ၎င်းအား ချက်ချင်း ပြန်လွှတ်ပေးရန် အမိန့်ပေးခဲ့သည်ဟု Al Jazeera သတင်းတွင် ဖော်ပြသည်။

အကျင့်ပျက် ခြစားမှု စွပ်စွဲချက်များနှင့် ၎င်းအား ထိန်းသိမ်းခဲ့မှုကြောင့် အကြမ်းဖက် ဆန္ဒပြမှုများ ပေါ်ပေါက်လာ ခဲ့ပြီးနောက် နှစ်ရက်အကြာတွင် ထိုသို့ အမိန့်ပေးခဲ့ခြင်းလည်း ဖြစ်သည်။

ဗဟိုတရားရုံး၏ ကြာသပတေးနေ့ တရားစီရင်မှုပြီးနောက် နိုင်ငံတစ်ဝန်းလုံးတွင် အကြမ်းဖက်မှုများ လျော့ကျသွား ပုံရသည်။

သို့သော် တရားရုံး အဆောက်အဦ အနီးတွင် အမိန့်နှင့်ပတ်သက်၍ အောင်ပွဲခံနေရကြသော ခမ်းအား ထောက်ခံသူ များနှင့် ရဲတပ်ဖွဲ့တို့အကြား ပဋိပက္ခဖြစ်ပွားမှု တစ်ချို့တော့ ရှိခဲ့သည်။

အစိုးရဘက်ကလည်း တရားရုံး ဆုံးဖြတ်ချက်ကို ဝေဖန်ပြစ်တင်ခဲ့ကာ PTI ပါတီခေါင်းဆောင်အား ဖမ်းဆီးရန် အတွက် တခြားသော တရားဝင် သက်သေများကို ရှာဖွေသွားမည်ဟု ပြောသည်။

အသက် ၇၀ နှစ်အရွယ် ခမ်းသည် အင်္ဂါနေ့ တရားရုံးထုတ်မှု တစ်ခုတွင် အကျင့်ပျက်ခြစားမှု စွဲချက်တစ်ခုဖြင့် အမျိုးသား တာဝန်ယူမှုဆိုင်ရာဗျူရို (NAB)၏ ဖမ်းဆီးခြင်းကို ခံခဲ့ရသည်။

 ပြည်ထဲရေးဝန်ကြီး ရာနာ ဆာနူလာ ခမ်းကို တွေ့ရစဉ်

ဖမ်းဆီးမှုကြောင့် နိုင်ငံတစ်ဝန်းလုံးတွင် အကြမ်းဖက် ဆန္ဒပြမှုများကို ဖြစ်စေခဲ့ကာ တည်ငြိမ်မှုကို ထိန်းသိမ်းရန် အစိုးရသည် ပါကစ္စတန်စစ်တပ်ကိုပင် အကူအညီ တောင်းခံခဲ့ရသည်။

ခမ်း၏ PTI ပါတီအား ထောက်ခံသူများသည်လည်း နေရာအနှံ့အပြားတွင် ရဲတပ်ဖွဲ့နှင့် ပဋိပက္ခဖြစ်ခဲ့သည်။

ထို့နောက် ၎င်းတို့(PTI ပါတီ)သည် စစ်တပ်နှင့် အစိုးရပိုင် အဆောက်အဦများကို တိုက်ခိုက်ရုံမက စစ်တပ်၏ ဌာနချုပ်များအား ဝင်ရောက် စီးနင်းရန် ကြိုးပမ်းခဲ့သလို လာဟိုး (Lahore)ရှိ ထိပ်တန်းအရာရှိ တစ်ဦး၏ နေအိမ်ကိုလည်း မီးရှို့ခဲ့ကြသည်။

ထိုသို့သော ပဋိပက္ခများအတွင်း လူ ၂၀၀၀ ကျော် ဖမ်းဆီးခံခဲ့ရကာ အနည်းဆုံး ၁၁ ဦး သေဆုံး၍ များစွာ ဒဏ်ရာ ရရှိခဲ့သည်။

လက်ရှိ အချိန်အထိ ခမ်း အိမ်ကို ပြန်နိုင်မည်လား ဆိုခြင်းကိုတော့ မသိရသေးပေ။ တရားရုံးအမိန့်တွင် PTI အကြီး အကဲ အနေဖြင့် အစ္စမ္မာဘတ် (Islamabad) ရှိ ရဲတပ်ဖွဲ့ဝင်းအတွင်း ရဲအစောင့်အရှောက်ဖြင့် ဆက်နေရမည်ဟု ပါဝင်သည်။

ခမ်းသည် ထိန်းသိမ်းခံရစဉ်ကတည်းက ယင်း၌ ရှိနေခြင်း ဖြစ်သည်။

PTI  ပါတီ၀င်များနဲ့ ထောက်ခံသူများကိုတွေ့ရစဉ်

ယခင်က တရားဝင်ဟု သတ်မှတ်ထားသော ဖမ်းဆီးမှုနှင့် ပတ်သက်၍ ပြန်လည်စဉ်းစားရန် ခမ်းအား သောကြာနေ့ တွင် အစ္စလာမ္မာဘတ် ဗဟိုတရားရုံးချုပ်သို့ လာရောက်ရန် တရားသူကြီးချုပ် အူမာအာတာဘန်ဒီရယ် (Umar Ata Bandial) က တောင်းဆိုခဲ့သည်။

ခမ်းဘက်ကလည်း ၎င်းအား အကျင့်ပျက် ခြစားမှု စွဲချက်များဖြင့် ထပ်မံဖမ်းဆီးခြင်း မလုပ်ရန် တရားရုံးတွင် အကာအကွယ်ပေးရေး တောင်းဆိုသွားဖွယ် ရှိနေသည်။

သို့သော် ၎င်းအား ဖမ်းဆီးသွားဦးမည်ဖြစ်ကြောင်း ပြည်ထဲရေးဝန်ကြီး ရာနာ ဆာနူလာ ခမ်း (Rana Sanaullah Khan) က ပြောသည်။

ပါကစ္စတန် အစိုးရအရာရှိ များသည်လည်း တရားရုံး၏ အမိန့်ကို ဝေဖန်ပြစ်တင်ခဲ့ကာ တရားသူကြီးချုပ်သည် ခမ်းနှင့်ပတ်သက်၍ ဘက်လိုက်နေသည်ဟု စွပ်စွဲကြသည်။

တရားသူကြီးချုပ် အနေဖြင့် ဗဟိုတရားရုံးတွင် ခမ်းပါတီ၏ အလံအား လွှင့်ထူထားခြင်း သို့မဟုတ် တရားရုံးသည် PTI ၏ ရုံးခွဲဖြစ်ပါသည်ဟု ကြေညာခြင်း လုပ်ဆောင်သင့်ကြောင်း ဝန်ကြီးချုပ်၏ အကြံပေးတစ်ဦးက ပြင်းပြင်း ထန်ထန် ဝေဖန်ခဲ့သည်။

Source: Aljazeera

CNI International News

အိုကီနာဝါ၊ မေလ ၁၂

တရုတ်က ထိုင်ဝမ်အား ကျူးကျော်ချိန်တွင် ဂျပန်နိုင်ငံသည် ပဋိပက္ခ၌ ပါဝင်ပတ်သက်နေမည်ကို ဂျပန်လူမျိုးများ က စိုးရိမ်နေကြသည်ဟု DW သတင်းတွင် ဖော်ပြထားသည်။

အဆာဟိရှင်ဘွန်း(Asahi Shimbun) သတင်းစာမှ ပြုလုပ်ခဲ့သော အင်တာဗျူးတစ်ခုတွင် အရွယ်ရောက်ပြီး ဂျပန် လူမျိုး အယောက် ၃၀၀၀ ၏ ၈၀ ရာခိုင်နှုန်းက စိုးရိမ်ကြောင်း ဖြေကြားခဲ့ခြင်း ဖြစ်သည်။

သို့သော် စစ်တမ်းကောက်ယူမှု ရလဒ်နှင့် ပတ်သက်၍ အံ့သြခြင်း မဖြစ်မိဟု နိုင်ငံရေးလေ့လာသူများနှင့် ဂျပန် နိုင်ငံရေး နယ်ပယ်အတွင်းရှိ အဖွဲ့ဝင်များက ပြောသည်။

တရုတ်ကသာ ထိုင်ဝမ်ကို ကျူးကျော်မည်ဆိုလျှင် အမေရိကန်သည် ထိုင်ဝမ်ဘက်ကို အကူအညီပေးမည်ဟု အားလုံးက သတ်မှတ်ထားသည်။

စစ်တပ်အင်အား မြှင့်တင်မှု ပေါင်းများစွာ လုပ်ဆောင်ထားသော ဂျပန်အစိုးရသည်လည်း တရုတ်၏ ထိုင်ဝမ်အပေါ် ကျူးကျော်မှုက ဂျပန်အတွက်လည်း ပြင်းထန်သော ခြိမ်းခြောက်မှုကို ဖြစ်စေသည်ဟု ပြောခဲ့ဖူးသည်။

ထိုင်ဝမ်ကိုတွေ့ရစဉ်

ဂျပန်အတွက် လိုအပ်သော စွမ်းအင် ၉၀ ရာခိုင်နှုန်း၊ အစားအစာ ၆၀ ရာခိုင်နှုန်းတို့အား သယ်ယူရန် အသုံးပြုသည့် ပင်လယ်လမ်းကြောင်းများကို တရုတ်ဘက်က ထိန်းချုပ်ခွင့် ရှိသွားမည် ဖြစ်ခြင်းကြောင့်ပင်။
ဂျပန်အစိုးရအနေဖြင့် တရုတ်၏ တိုက်ခိုက်မှုကို တွန်းလှန်ရန် ကြည်း၊ရေ၊လေ တပ်များ သုံးမည်ဟု ကြေညာထား ခြင်း မရှိသော်လည်း ရေတပ်နှင့်လေတပ်တို့အား အဆင့်မြှင့်တင်ရန် အသုံးစရိတ်များစွာ အသုံးပြုထားခြင်းက ကြို တင် ပြင်ဆင်ထားသည့် အဓိပ္ပာယ်ပင် ဖြစ်သည်။

စစ်ဘက် အသုံးစရိတ် တိုးမြှင့်ခြင်းကြောင့် ပဋိပက္ခဖြစ်ချိန်တွင် ဂျပန်အနေဖြင့် မည်သည့်နေရာတွင် ရှိနေမည်လဲ ဆိုသည့် ငြင်းခုံမှုများကို ဖြစ်စေခဲ့သည်။

စစ်တမ်းအရ ၅၆ ရာခိုင်နှုန်းသည် ဂျပန်၏ ကိုယ့်ကိုယ်ကို ကာကွယ်ရေးတပ်ဖွဲ့များ(JSDF) အနေဖြင့် အမေရိကန် တပ်များသို့ သယ်ယူပို့ဆောင်ရေး၊ လောင်စာ၊ အစားအစာနှင့် ဆေးဝါးကဲ့သို့ အကူအညီများ ထောက်ပံ့ခြင်းကို ကန့်သတ်သင့်သည်ဟု ပြောသည်။

၁၁ ရာခိုင်နှုန်းကသာလျှင် ဂျပန်စစ်တပ်အနေဖြင့် အမေရိကန်နှင့် ပူးပေါင်းကာ ကျူးကျော်မှုကို တွန်းလှန်သင့် သည်ဟု ဖြေဆိုခဲ့သည်။

သဘာဝပတ်ဝန်းကျင်ဆိုင်ရာ တက်ကြွလှုပ်ရှားသူ ရန်ယာဘူကီကို တွေ့ရစဉ်

ပြည်သူအများစုက စစ်ကို မလိုချင်ကြောင်း၊ အိုကီနာဝါ (Okinawa) တွင် ရှိသူအများစုသည်လည်း ထိုင်ဝမ် အရေး ဂျပန်စစ်တပ် ပါဝင်ခြင်းကို ကန့်ကွက်သည်ဟု စီရင်စု၏ နိုင်ငံရေးသမားတစ်ဦးဖြစ်သူ ရှီနာကို အိုယာကာဝါ (Shinako Oyakawa)က ပြောသည်။

ထိုင်ဝမ်နှင့် အိုကီနာဝါတို့သည် နီးကပ်နေခြင်းကြောင့် ယင်းရှိတိုက်ပွဲသည် ဂျပန်မှ ပြည်သူများအပေါ် တိုက်ရိုက် လွှမ်းမိုးမှု ရှိလာနိုင်ကြောင်း၊ အိုကီနာဝါ ဒေသခံများသည် စစ်၏ ဆိုးရွားမှုကို ကြုံတွေ့ခဲ့ရပြီးဖြစ်ကာ ယင်းကို နောက်တစ်ကြိမ် ထပ်မကြုံလိုကြကြောင်း၊ သို့သော် ဂျပန်အစိုးရအနေဖြင့် ထိုင်ဝမ်အရေးတွင် ပါဝင်ပတ်သက်ပါ က ယင်းသည် သေချာပေါက် ပြန်ဖြစ်လာမည်ဖြစ်ကြောင်းလည်း သူမက ပြောခဲ့သည်။

အိုကီနာဝါ ဒေသခံများသည် လက်ရှိ ဒေသတွင်းရှိ တင်းမာမှုများနှင့် ပတ်သက်၍ နှစ်သက်မှု မရှိကြောင်း၊ သို့သော် ယင်းသည် တရုတ်၏ ဖိအားတိုးမြှင့်မှုဒဏ် ခံစားနေရသည့် ထိုင်ဝမ်ပြည်သူများအပေါ် ကိုယ်ချင်း မစာချင်း မဟုတ် ကြောင်းလည်း အိုယာကာဝါက ပြောသည်။

လက်နက်ကိုင် တိုက်ပွဲများတွင် ဂျပန်စစ်တပ် ပါဝင်လာမည်ကို ကန့်ကွက်သည်ဟု သဘာဝပတ်ဝန်းကျင်ဆိုင်ရာ တက်ကြွလှုပ်ရှားသူ ရန်ယာဘူကီ (Ren Yabuki) က ပြောသည်။

လက်နက်ကိုင် ဖြေရှင်းခြင်းကို အားမပေးကြောင်း၊ နိုင်ငံရေးအရသာ အဖြေရှာသင့်ကြောင့်လည်း ၎င်းက ထောက် ပြသည်။

ပင်လယ်ကွေ့ စစ်ပွဲ အပါအဝင် JSDF သည် တခြားသော နိုင်ငံတပ်ဖွဲ့များသို့ သယ်ယူပို့ဆောင်ရေးဆိုင်ရာ အထောက်အပံ့များ ပေးခဲ့ဖူးသော်လည်း ယာဘူကီက ယင်းကို လက်မခံပေ။
JSDF သည် ဂျပန်၏ ကာကွယ်ရေးအတွက် သက်သက်သာ ဖြစ်သင့်သည်ဟုလည်း ၎င်းက ပြောသည်။

Source: DW

CNI International News

နယူးယောက်၊ မေလ ၁၂

ယူကရိန်းပဋိပက္ခကို ရပ်တန့်နိုင်ရန်အတွက် ရုရှားသမ္မတ ဗလာဒီမာပူတင် (Vladimir Putin)၊ ယူကရိန်းသမ္မတ ဗိုလိုဒီမီယာ ဇာလန်းစကီး (Vladimir Zelensky) တို့နှင့် တွေ့ဆုံသွားမည်ဟု အမေရိကန်သမ္မတဟောင်း ဒေါ်နယ်ထရမ့် (Donlad Trump) က ပြောကြောင်း တာ့စ်သတင်းတွင် ဖော်ပြသည်။

အနိုင်၊အရှုံးကို မစဉ်းစားကြောင်း၊ စစ်ပွဲကို ရပ်တန့်ရန်ကြိုးပမ်းခြင်းဖြင့် လူများစွာ သေဆုံးနေရခြင်းကို တားဆီး နိုင်ကြောင်း ထရမ့်က CNN နှင့် တွေ့ဆုံမှုတစ်ခုတွင် ဖြေကြားခဲ့သည်။ သူသာ သမ္မတဖြစ်မည်ဆိုလျှင် ယူကရိန်း ပဋိပက္ခကို ၂၄ နာရီအတွင်း ဖြေရှင်းလိမ့်မည်ဖြစ်ကြောင်းလည်း ထရမ့်က ပြောသည်။

ရုရှားဖြစ်စေ၊ ယူကရိန်းဖြစ်စေ ၎င်းတို့ သေဆုံးနေရခြင်းကို ရပ်တန့်ပေးလိုသည်ဟု အမေရိကန်သမ္မတဟောင်းက CNN ကို ဖြေကြားခဲ့ကာ ထိုကိစ္စကို ၂၄ နာရီနှင့် အပြတ်ဖြတ်နိုင်သည်ဟု ဆိုသည်။

CNN နဲ့ ဒေါ်နယ်ထရမ့် အင်တာဗျူးလုပ်နေစဉ်

ထရမ့်က ၎င်းအနေဖြင့် ပူတင်အား ထက်မြက်သူတစ်ဦးအဖြစ် သတ်မှတ်ထားကြောင်း သို့သော် ရုရှားသမ္မတသည် ယူကရိန်းအား အထူးစစ်ဆင်ရေး ဆင်နွှဲခြင်းဖြင့် အမှားကို ကျူးလွန်ခဲ့သည်ဟု ပြောသည်။

လက်ရှိအချိန်တွင် ပူတင်အား စစ်ရာဇဝတ်ကောင်အဖြစ် မသတ်မှတ်သင့်ကြောင်း ထောက်ပြခဲ့ကာ ထိုသို့ဆိုလျှင် စစ်ပွဲကိုရပ်တန့်ရေး ပို၍ခက်ခဲသွားလိမ့်မည်ဟု ထရမ့်က ထောက်ပြခဲ့သည်။

စစ်ရာဇဝတ်မှုကိစ္စကို နောက်ပိုင်းမှသာ ဆွေးနွေးအဖြေရှာသင့်သည်ဟုလည်း ထရမ့်က အကြုံပြုသည်။

Source:တာ့စ်သတင်းဌာန