CNI International News

အစ္စလာမ္မာဘတ်၊ ဖေဖော်ဝါရီ ၂၄

လေးရက်ကြာပိတ်ထားခဲ့သည့် ပါကစ္စတန်နှင့် အရေးပါသောနယ်စပ်ဖြတ်ကျော်ရေးလမ်းကြောင်းကို အာဖဂန်ရှိ တာလီဘန်အစိုးရက ပြန်ဖွင့်ပေးခဲ့သည်ဟု အယ်လ်ဂျာဇီးယားသတင်းတွင် ဖော်ပြသည်။

လေးရက်ကြာ ပိတ်ထားမှုကြောင့် အစားအစာနှင့် တခြားသောအရာများကို သယ်ဆောင်လာသည့် ထရပ်ကား ထောင်ပေါင်းများစွာမှာ နယ်စပ်တွင် ပိတ်မိခဲ့ရသည်။

ပါကစ္စတန်ဘက်ကလည်း စီမံခန့်ခွဲရေးဆိုင်ရာ လိုအပ်ချက်များကို ပြည့်မှီအောင် ဆောင်ရွက်ပြီးချိန်တွင် တော့ခ်ဟမ်း (Torkham) နယ်စပ်ဂိတ်ကို ပြန်ဖွင့်ပေးမည်ဟု ကြာသပတေးနေ့တွင် ပြောသည်။ လိုအပ်သော စာရွက်စာတမ်းများနှင့် စီမံခန့်ခွဲရေးလုပ်ငန်းများပြီးလျှင် ဂိတ်ကိုပြန်ဖွင့်ပေးမည်ဖြစ်ကြောင်း၊ ယင်းသည်နာရီ ပိုင်းသာ ကြာမြင့်နိုင်ကြောင်း ပါကစ္စတန်လုံခြုံရေးအရာရှိတစ်ဦးက ပြောသည်။

ပါကစ္စတန်ကာကွယ်ရေးဝန်ကြီး ခါဝါဂျာ အာဆစ် (Khawaja Asif) ဦးဆောင်သည့် အဆင့်မြင့်ကိုယ်စားလှယ် အဖွဲ့တစ်ခုက ကဘူးလ်သို့သွားကာ လုံခြုံရေးနှင့်တခြားသောအကြောင်းအရာများကို ဆွေးနွေးခဲ့ပြီးနောက် နယ်စပ်ဖြတ်ကျော်ရေးဂိတ်ကို ပြန်ဖွင့်ပေးရန် ဆုံးဖြတ်ခဲ့ခြင်းဖြစ်သည်။

ပါကစ္စတန်ကိုယ်စားလှယ်အဖွဲ့တွင် ထောက်လှမ်းရေးအေဂျင်စီအကြီးအကဲ ပါဝင်ခဲ့ပြီး ၎င်းတို့သည် အာဖဂန်၏ စီးပွားရေးဆိုင်ရာ ယာယီလက်ထောက်ဝန်ကြီးချုပ် မူလာအဗ္ဗဒူ ဂါနီ ဘာရာဒါ (Mullah Abdul Ghani Baradar) အပြင် တခြားသော တာလီဘန်အရာရှိများနှင့် တွေ့ဆုံခဲ့သည်။ အဆိုပါ တွေ့ဆုံမှုအပြီး နာရီပိုင်းအကြာတွင် အစ္စလာမ္မာဘတ်ရှိ အာဖဂန်သံရုံးမှ ပါကစ္စတန်တို့၏ ကတိဖျက်မှုတစ်ချို့ကြောင့် တနင်္ဂနွေနေ့မှ စတင်ပိတ်ထား ခဲ့ရသည့် တော့ခ်ဟမ်း ကုန်သွယ်ရေးလမ်းကြောင်းကို ကြာသပတေးနေ့တွင် ပြန်ဖွင့်ပေးမည်ဟု တွစ်တာတွင် ရေးသားခဲ့သည်။

အာဖဂန်နှင့် ပါကစ္စတန်ကြား နယ်စပ်ကုန်သွယ်ရေးလမ်းကြောင်းတစ်ခုတွင် ကုန်ကားများ တန်းစီစောင့်ဆိုင်းနေစဉ်(ဓါတ်ပုံ- Dawn)

ဂိတ်ပိတ်ထားမှုကြောင့် တနင်္ဂနွေနေ့ညမှ စတင်ကာ ထရပ်ကားထောင်ပေါင်းများစွာ ပါကစ္စတန်ဘက်အခြမ်းတွင် ပိတ်မိခဲ့သည်ဟု ပါကစ္စတန် အကောက်အခွန်ကိုယ်စားလှယ်များအဖွဲ့ခေါင်းဆောင် ကာရီနာဇင်ဂဲလ် (Qari Nazim Gul) က ပြောသည်။

ကားတန်းသည် ၃၀ ကီလိုမီတာခန့်ရှည်ကြောင်း၊ အာဖဂန်ဘက်က ဂိတ်ကို မနက်ပိုင်းတွင်ပြန်ဖွင့်ပေးခဲ့သော်လည်း ပါကစ္စတန်ဘက်က ဂိတ်ပြန်အဖွင့်ကိုစောင့်နေကြောင်း ၎င်းက ပြောသည်။ နယ်စပ်ဂိတ်ကို ပိတ်ထားသည့်အတွက် ဖြစ်ပေါ်လာသည့် ကားများသောင်တင်နေခြင်းကြောင့် နှစ်ဖက်စလုံးတွင် ရူပီး ဘီလီယံနှင့်ချီ ဆုံးရှုံးရနိုင်သည်ဟု ပါကစ္စတန်၊ အာဖဂန်ပူးတွဲကုန်သည်ကြီးများအသင်းနှင့် စက်မှုလုပ်ငန်း ဒါရိုက်တာက ခန့်မှန်းပြောဆိုသည်။

ပါကစ္စတန်နှင့်အာဖဂန်တို့သည် နယ်စပ်ဧရိယာပေါင်း ၂၆၀၀ ကီလီုမီတာ ထိစပ်လျက်ရှိပြီး ပါကစ္စတန် အစိုးရဘက် မှ အာဖဂန်ရွှေ့ပြောင်းနေထိုင်သူများကို ဆေးကုသရေးနယ်စပ်ဖြတ်ကျော်ခွင့်ပေးရန် ငြင်းဆန်မှုကြောင့် တော့ခ်ဟမ်းဂိတ်ကို ပိတ်ခဲ့ရခြင်းဖြစ်သည်ဟု တာလီဘန်များက ပြောသည်။

Source:Aljazeera

CNI International News

နာဘလက်စ်၊ ဖေဖော်ဝါရီ ၂၃

သိမ်းပိုက်ထားသော အနောက်ဘက်ကမ်းခြေ နာဘလက်စ်မြို့တွင် အစ္စရေးစစ်တပ်က ဝင်ရောက်စီးနင်းမှု တစ်ခု လုပ်ဆောင်ခဲ့ရာ ပါလက်စတိုင်း အနည်းဆုံး ၁၀ ဦး သေဆုံးခဲ့ပြီးများစွာဒဏ်ရာရရှိခဲ့သည်ဟု အယ်ဂျာဇီးယား သတင်းတွင် ဖော်ပြထားသည်။

ဗုဒ္ဓဟူးနေ့ ဖြစ်စဉ်တွင် ဒဏ်ရာရရှိသူ အရေအတွက်မှာ ၁၀၂ ဦးရှိပြီး ထိုအထဲမှ ၈၂ ဦးမှာ ကျည်ထိမှန်ခဲ့ခြင်း ဖြစ်ကာ ခြောက်ဦးမှာ စိုးရိမ်ရသည်ဟု ပါလက်စတိုင်း ကျန်းမာရေးဌာနက ပြောသည်။

အစ္စရေး အထူးတပ်ဖွဲ့ဝင်များသည် မနက် ၁၀ နာရီခန့်တွင် မြို့တွင်းသို့ ဝင်ရောက် စီးနင်းခဲ့ခြင်းဖြစ်ပြီး ၎င်းတို့ ဝင်လာချိန် ကတည်းက ထိပ်တိုက်တွေ့ဆုံမှုများ ဖြစ်ပွားခဲ့ရသည်။

အစ္စရေးတပ်ဖွဲ့များသည် မြို့တွင်းသို့ ဝင်ပေါက်အားလုံးကို ပိတ်ဆို့ထားခဲ့ပြီး အလိုရှိနေသော ပါလက်စတိုင်း တိုက်ခိုက်ရေး သမားနှစ်ဦးရှိကာ အိမ်ကို ပိတ်ဆို့ ဖမ်းဆီးခဲ့သည်။

တိုက်ခိုက်ရေးသမား နှစ်ဦးစလုံး သေဆုံးခဲ့သည်။ စီးနင်းမှုအတွင်း ပါလက်စတိုင်း တပ်ဖွဲ့များကို Balata Brigades အဖွဲ့နှင့်အတူ တိုက်ခိုက်ခဲ့သည်ဟု Lions’ Den ဟုခေါ်သော ပါလက်စတိုင်း လက်နက်ကိုင်အဖွဲ့က ထုတ်ပြန် သည်။

အစ္စရေးတပ်ဖွဲ့နဲ့ ပါလက်စတိုင်းများ ထိပ်တိုက်တွေ့စဉ်

မြို့တွင်း ဝင်ရောက်လာချိန်တွင် အစ္စရေးတပ်ဖွဲ့များကို ကလေးငယ်များကလည်း ကျောက်ခဲများဖြင့် ပစ်ပေါက်ခဲ့ ကြသည်။ ထိုဖြစ်စဉ်နှင့်ပတ်သက်၍ ပါလက်စတိုင်းဘက်မှ လုံခြုံရေးတပ်ဖွဲ့များသည် နာဘလက်စ်မြို့တွင် စစ်ဆင်ရေး လုပ်ဆောင်နေသည်ဟု ပြောသော်လည်း အတိအကျကို ထုတ်ပြန်ခဲ့ခြင်း မရှိပေ။

နာဘလက်စ်မြို့နှင့် အနီးအနားရှိ ဂျီနင် (Jenin) မြို့တို့သည် မကြာသေးခင်ကမှ အရှိန်မြင့်တက်လာသည့် အစ္စရေး တပ်ဖွဲ့ဝင်များ၏ အကြမ်းဖက် ဝင်ရောက်တိုက်ခိုက်ခြင်းများအတွက် ပစ်မှတ်ထားရာ မြို့များ ဖြစ်သည်။

ထိုမြို့များတွင် လက်နက်ကိုင် ခုခံမှု ပြင်းထန်လာလျက် ရှိသည်ဟုလည်း ပါလက်စတိုင်း သတင်းသမားတစ်ဦးက ပြောသည်။

အစ္စရေးဘက်က အနောက်ဘက်ကမ်းခြေ ဧရိယာများကို တိုးချဲ့လာခဲ့သော်လည်း Lions’ Den နှင့် Balata Brigades တို့သည် ပါလက်စတိုင်းတို့၏ လက်နက်ကိုင် ခုခံရေးတွင် ဗဟိုချက်အဖြစ် ရှိနေခြင်း၊ လူငယ် အုပ်စု များက တိုက်ခိုက်လာခြင်းတို့ကြောင့် ထိုမြို့များသည် အစ္စရေးတို့၏ ပစ်မှတ်ထားရာ ဖြစ်လာသည်ဟု သတင်း သမား ဘာဂိုတီက ပြောသည်။

Source: အယ်ဂျာဇီးယား

CNI International News

ဝါဆော၊ ဖေဖော်ဝါရီ ၂၃

ရုရှားသမ္မတ ပူတင်၏ နျူကလီးယား သတိပေးချက်အပြီး အမေရိကန်သမ္မတ ဂျိုးဘိုင်ဒန်က နေတိုး၏ အရှေ့ပိုင်း မဟာမိတ်များနှင့် တွေ့ဆုံကာ လုံခြုံရေးအာမခံအပေါ် ဆွေးနွေးခဲ့သည်။

ဥရောပအရှေ့ခြမ်းရှိ မဟာမိတ်များကို ထပ်ဆင့် အာမခံချက်အဖြစ် နေတိုး၏ ဧရိယာ တစ်လက်မတိုင်းကို ကာကွယ်သွားမည်ဖြစ်ကြောင်း အမေရိကန်သမ္မတ ဂျိုးဘိုင်ဒန်က ဗုဒ္ဓဟူးနေ့တွင် ပြောခဲ့သည်ဟု ရိုက်တာ သတင်း တွင် ဖော်ပြထားသည်။

ရုရှား၏ အထင်ကရ နျူကလီးယား လက်နက်ထိန်းချုပ်ရေး စာချုပ်ကို ရပ်ဆိုင်းခြင်း လုပ်ရပ်က အမှားကြီး ဖြစ်သည်ဟု ဘိုင်ဒန်က ပြောသည်။

ကိယက်ဗ်(ယူကရိန်း)သို့ မထင်မှတ်ဘဲ သွားရောက် လည်ပတ်ခဲ့ပြီး နှစ်ရက်အကြာ ဥရောပအရှေ့ခြမ်းနေတိုး မဟာမိတ်များနှင့် ပိုလန်မြို့တော် ဝါဆော (Warsaw)တွင် တွေ့ဆုံချိန်တွင် ဘိုင်ဒန်က ထိုသို့ ပြောခဲ့ခြင်း ဖြစ်သည်။

စစ်အေးကာလအပြီး ရုရှားနှင့်အနောက်အုပ်စုတို့ကြား တင်းမာမှု အမြင့်ဆုံး အခြေအနေတွင် ဘိုင်ဒန်သည် ဝါဆောမြို့လယ်၌ လူထောင်ပေါင်းများစွာကို မိန့်ခွန်းပြောခဲ့ပြီး ရုရှားသမ္မတ ပူတင်ကဲ့သို့ သက်ဦးဆံပိုင်ခေါင်းဆောင်မျိုးကို ဆန့်ကျင်ရမည်ဟု ပြောသည်။

ဘိုင်ဒန်ကိုတွေ့ရစဉ် (AP)

ဘိုင်ဒန် မတိုင်ခင် နာရီပိုင်းအကြာတွင် ပူတင်သည် အနောက်အုပ်စုအား ရည်ရွယ်သည့် ပြင်းပြင်းထန်ထန် ဝေဖန်မှုကို ပြုလုပ်ခဲ့ကာ ယူကရိန်းစစ်ပွဲအတွက်လည်း အပြစ်တင်ခဲ့သည်။

သို့သော် အနောက်အုပ်စု အနေဖြင့် ရုရှားကို တိုက်ခိုက်ရန် မကြံစည်ခဲ့ဖူးကြောင်း၊ ကျူးကျော်စစ်သည် ပူတင်၏ ရွေးချယ်မှုသာဖြစ်ကြောင်း ဘိုင်ဒန်က တုန့်ပြန်သည်။

ပူတင်သည် အမေရိကန်၊ ရုရှား နှစ်နိုင်ငံနျူကလီးယား လက်နက် အရေအတွက်ကို ကန့်သတ်ပေးသည့် ၂၀၁၀ ခုနှစ် New Start လက်နက်ထိန်းချုပ်ရေး သဘောတူညီချက်ကို ရပ်ဆိုင်းကြောင်း ကြေညာခဲ့ပြီး နျူကလီးယား စမ်းသပ်မှုများကို ပြန်လည်လုပ်ဆောင်သွားနိုင်သည်ဟု သတိပေးခဲ့သည်။

ယင်းသည် ကြီးမားသည့် အမှားဖြစ်သည်ဟု ဘိုင်ဒန်က ပြောသည်။ Bucharest Nine ဟုခေါ်သော ဥရောပ အရှေ့ပိုင်း မဟာမိတ်များနှင့် မတွေ့ဆုံမီ ထိုသို့ ပြောခဲ့ခြင်း ဖြစ်သည်။

ပူတင်ကိုတွေ့ရစဉ်(AP)

အမေရိကန်၏ နေတိုးအဖွဲ့အပေါ် ခံယူချက်သည် ရှင်းလင်းကြောင်း၊ အပိုဒ်ခွဲ ၅ သည် အမေရိကန်တို့၏ အလေး ထားရာ ဖြစ်ကြောင်းနှင့် နေတိုး၏ တစ်လက်မချင်းတိုင်းကို ကာကွယ်သွားမည်ဖြစ်ကြောင်း ဘိုင်ဒန်က ပြောသည်။

အပိုဒ်ခွဲ ၅ တွင် နေတိုးအဖွဲ့၏ မည်သည့် အဖွဲ့ဝင်နိုင်ငံကိုမဆို ကျူးကျော်တိုက်ခိုက်ခြင်းသည် အားလုံးအပေါ် တိုက်ခိုက်ခြင်းဖြစ်ပြီး ယင်းကို စုပေါင်းတုန့်ပြန်ရန် လိုအပ်သည်ဟု ဖော်ပြထားသည်။

ဘိုင်ဒန်နှင့် တွေ့ဆုံခဲ့သော နိုင်ငံ့ခေါင်းဆောင် အများစုသည် ယူကရိန်းအား စစ်ဘက်ဆိုင်ရာ အကူအညီများစွာ ပေးနေကြသူများ ဖြစ်သည်။

နေတိုးအဖွဲ့တွင် ဆွီဒင်၊ ဖင်လန်တို့ကဲ့သို့ နိုင်ငံများ မကြာခင် ပါဝင်လာတော့မည်ဖြစ်ပြီး ယင်းကို ရုရှားနိုင်ငံ အတွက် အရေးကြီးသော ခြိမ်းခြောက်မှုတစ်ခုအဖြစ် ရှုမြင်ထားသည်ဟု ရုရှားဘက်က ပြောသည်။

Source: Reuters

CNI International News

မော်စကို၊ဖေဖော်ဝါရီ ၂၃

ဗုဒ္ဓဟူးနေ့က ပြုလုပ်ခဲ့တဲ့ အစည်းအဝေးများမှာ ရုရှားနှင့်တရုတ်တို့က ၎င်းတို့ကြား ဆက်ဆံရေးခိုင်မာမှုကို ထုတ်ဖော်ပြသခဲ့ပြီး တရုတ်က ယူကရိန်းစစ်ပွဲအတွက် ရုရှားအားထောက်ပံ့မှုများ လုပ်ဆောင်မည့် အလားအလာ တစ်ခုအဖြစ် အခြားနိုင်ငံများက ၎င်းတို့အား စောင့်ကြည့်နေသည်ဟု AP သတင်းတွင် ဖော်ပြသည်။

တရုတ်ကွန်မြူနစ်ပါတီ၏ နိုင်ငံခြားရေးမူဝါဒဆိုင်ရာ ရာထူးအကြီးဆုံးပုဂ္ဂိုလ်ဖြစ်သည့် ဝမ်ယိ (Wang Yi) သည် မော်စကိုသို့ ရောက်ရှိနေသည်။ ရုရှားနှင့်အနောက်အုပ်စုကြားဆက်ဆံရေး အဆိုးရွားဆုံးဖြစ်နေချိန်၊ တရုတ် နှင့်အမေရိကန်တို့ ဆက်ဆံရေး ယိုယွင်းနေချိန်၊ ရုရှားဘက်က အမေရိကန်နှင့်နျူကလီးယားလက်နက်ထိန်းချုပ်ရေး သဘောတူညီချက်မှ နုတ်ထွက်သွားချိန်တွင် ဝမ်၏ခရီးစဉ်က တရုတ်အနေဖြင့် ရုရှားအား လက်နက် ထောက်ပံ့သွားနိုင်ဖွယ်ရှိနေသည်ဆိုသည့် စိုးရိမ်မှုများကို ဖြစ်စေသည်။

ဝမ်နှင့် အစည်းအဝေးအစတွင် ပူတင်က နှစ်နိုင်ငံကြားဆက်ဆံရေးအခြေအနေကို ချီးကျူးခဲ့ပြီး တရုတ်သမ္မတ ကိုလည်း ရုရှားသို့ လာစေချင်သည်ဟု ပြောသည်။ ကမ္ဘာ့စင်မြင့်တွင် တရုတ်နှင့်ရုရှားတို့ ပူးပေါင်းခြင်းက အပြည်ပြည်ဆိုင်ရာအခြေအနေများကို တည်ငြိမ်မှုရှိစေရေးအတွက် အရေးပါသည်ဟု ပူတင်က ပြောသည်။

ရုရှား-တရုတ် ဆက်ဆံရေးတွင် မည်သည့်တတိယနိုင်ငံမှ ဝင်ရောက်စွက်ဖက်၍ မရကြောင်းနှင့် စစ်၏ ခြောက်လှန့်မှုများ၊ စစ်ပွဲကြောင့်ဖြစ်သည့် အနောက်အုပ်စု၏ ထိတ်လန့်မှုများကိုလည်း ဝမ်ယိက ပြောသည်။ ရုရှားနှင့်တရုတ်တို့သည် နိုင်ငံတကာဆက်ဆံရေးများတွင် အာဏာဝေမျှမှုနှင့် ဒီမိုကရေစီကျင့်သုံးမှုတို့ကို ထောက်ခံကြောင်း ဝမ်က ပြောသည်။ ကမ္ဘာလုံးဆိုင်ရာ အရေးကိစ္စများတွင် အမေရိကန်၏ ကြီးစိုးထားမှုကို တန်ပြန်ရေးအတွက် နှစ်နိုင်ငံကြား တူညီသော ရည်ရွယ်ချက်ရှိမှုကို ရည်ညွှန်းခြင်းဖြစ်သည်။

ရုရှားနိုင်ငံခြားရေးဝန်ကြီး ဆာဂျီလာဗရော့ဗ်နှင့် တရုတ်ကွန်မြူနစ်ပါတီ၏ နိုင်ငံခြားရေးမူဝါဒရေးရာ အကြီး အကဲ ဝမ်ယိ(ဓါတ်ပုံ-အေပီ)

တရုတ်သည် ယူကရိန်းစစ်ပွဲနှင့်ပတ်သက်၍ ရုရှားကိုအပြစ်တင်ရန် ငြင်းဆိုထားကာ အမေရိကန်နှင့် နေတိုးတို့မှ ရန်စခြင်းကြောင့်ဟုသာ ရုရှား၏လေသံအတိုင်း ကာကွယ်ပေးထားသည်။ယူကရိန်းအရေးအတွက် ရုရှားအပေါ် အရေးယူပိတ်ဆို့မှုများ ချမှတ်ထားခြင်းကိုလည်း တရုတ်အစိုးရကဘက်က ဝေဖန်ထားသည်။တဖက်တွင်လည်း ထိုင်ဝမ်အရေး အမေရိကန်နှင့် ထိပ်တိုက်တွေ့ဆုံနေသော တရုတ်အစိုးရကို ရုရှားဘက်က ထောက်ခံပေးသည်။

နှစ်နိုင်ငံကြားကာကွယ်ရေးဆိုင်ရာ ဆက်ဆံရေးကောင်းမွန်မှုကိုလည်း ပူးတွဲစစ်ရေးလေ့ကျင့်မှုများ လုပ်ဆောင် ပြသထားပြီး ၎င်းတို့သည် တောင်အာဖရိကနှင့်အတူ ယခုသီတင်းပတ်အတွင်း အိန္ဒိယသမုဒ္ဒရာအတွင်း၌ ရေတပ် စစ်ရေးလေ့ကျင့်မှုပြုလုပ်ရန် စီစဉ်ထားသည်။

ထိုသို့သောအခြေအနေများက အနောက်အုပ်စုကို စိုးရိမ်မှုများဖြစ်စေပြီး ရုရှား၏ စစ်ရေးလှုပ်ရှားမှုများတွင် တရုတ် နိုင်ငံပါဝင်နေခြင်းက ပြင်းထန်သော ပြဿနာတစ်ခုဖြစ်စေသည်ဟု အမေရိကန်နိုင်ငံခြားရေးဝန်ကြီးက ပြောသည်။

Source:AP

CNI International News

တိုင်ပေ၊ ဖေဖော်ဝါရီ ၂၃

သေသေချာချာ ပြင်ဆင်မှု ပြုလုပ်ထားမည်ဆိုလျှင် ထိုင်ဝမ်တပ်ဖွဲ့များသည် တရုတ်၏ ကနဦး တိုက်ခိုက်မှုများကို တွန်းလှန်နိုင်သည်ဟု ထိုင်ဝမ်ကာကွယ်ရေးဝန်ကြီး ချူကူချန်းက ပြောကြောင်း ဘန်ကောက်ပို့စ် သတင်းတွင် ဖော်ပြထား သည်။

တရုတ်သည် စစ်ပွဲတစ်ပွဲစတင်ရန် အင်အားကောင်းသော်လည်း ထိုင်ဝမ်ကို တစ်ပတ်၊ နှစ်ပတ်အတွင်း အောင်မြင်စွာ သိမ်းပိုက်နိုင်ရန် အင်အားကောင်းခြင်းမရှိဟု ချူကူချန်း (Chiu Kuo-cheng)က ပြောသည်။

ယခုသီတင်းပတ် အင်္ဂလိပ်ဘာသာဖြင့် ထုတ်ဝေသော ဓနသဟာရ မဂ္ဂဇင်းနှင့် အင်တာဗျူးတွင် ထိုသို့ ပြောခဲ့ခြင်း ဖြစ်သည်။

လိုအပ်သော ထောက်ပံ့မှုများ ရရှိနေမည်ဆိုလျှင် ထိုင်ဝမ်စစ်တပ်သည် တရုတ်ပြည်သူ့လွတ်မြောက်ရေး တပ်မတော် (PLA) ၏ ပိတ်ဆို့မှုများကို ဖောက်ထွက်နိုင်ကြောင်း၊ အင်တာနက်နှင့် တခြားသော ဆက်သွယ်ရေး နည်းလမ်းများအပြင် ပိတ်ဆို့မှုကို ဖောက်ထွက်ရန် နည်းလမ်းများစွာရှိကြောင်း ချူကပြောသည်။

 ထိုင်ဝမ်ကို ရောက်လာတဲ့ အမေရိကန်လွှတ်တော်ဥက္ကဋ္ဌ နန်စီပလိုစီကိုတွေ့ရစဉ်

အမေရိကန်နှင့် တခြားသော မဟာမိတ်များ၏ အကူအညီများ ရောက်ရှိလာရေး အချိန်ဆွဲထားရန်အတွက် တရုတ်၏ တိုက်ခိုက်မှုကို နှစ်ပတ်ကြာတောင့်ခံနိုင်မှုက ထိုင်ဝမ်စစ်တပ်၏ ရည်မှန်းချက် ဖြစ်သည်ဟုလည်း ချူက ပြော သည်။

ထိုင်ဝမ်ကို အမေရိကန် လွှတ်တော်ဥက္ကဋ္ဌဟောင်း ရောက်ရှိလာပြီးနောက် တရုတ်ဘက်က အကြီးမားဆုံးသော စစ်ရေး လေ့ကျင့်မှုတစ်ခု လုပ်ဆောင်ခဲ့သည်။

ထိုစစ်ရေး လေ့ကျင့်မှုတွင် ထိုင်ဝမ်ကျွန်း အရှေ့၊ အနောက်နှင့် အရေးပါသော မြို့များကို ပိတ်ဆို့ရေး စနစ်တကျ ပြင်ဆင်မှုများလည်း ပါဝင်သည်။ ထို လေ့ကျင့်မှုသည် ထိုင်ဝမ်သို့ ပြင်ပအကူအညီများ မရောက်ရှိလာစေရေး ကျွန်းကို ပတ်လည် ဝိုင်းထားရန် ကြိုတင်လေ့ကျင့်မှုဟု ရှုမြင်ကြသည်။

တစ်နေ့နေ့ တစ်ချိန်ချိန်တွင် ထိုင်ဝမ်အား ၎င်းတို့ထိန်းချုပ်မှု အောက်သို့ ရောက်ရှိစေရမည်ဟု တရုတ်က ပြောထားသည့် အခြေအနေတွင် ယူကရိန်းအပေါ် ရုရှား၏ ကျူးကျော်မှုက တရုတ်အနေဖြင့် ထိုင်ဝမ်အား ကျူးကျော် သိမ်းပိုက်နိုင်သည်ဆိုသည့် စိုးရိမ်မှုများကို ဖြစ်စေသည်။

 တရုတ်နဲ့ ထိုင်ဝမ်ကြား ဆက်စပ်မြေပုံကိုတွေ့ရစဉ်

သို့သော် တရုတ်နိုင်ငံခြားရေးဝန်ကြီး ချင်ကန်း(Qin Gang) က ထိုသို့သော စပ်ဆက်မှုများကို ရပ်ရန် တိုက်တွန်း ထားသည်။

မည်သို့ပင်ဆိုစေကာမူ ယူကရိန်းအရေးမှ သင်ခန်းစာများ ရရှိခဲ့သည်ဟု ချူက ပြောသည်။

ယူကရိန်းပဋိပက္ခက ကြိုတင်ပြင်ဆင်မှု လုပ်ဆောင်ထားရန် အရေးကြီးကြောင်းကို သင်ကြားပေးခဲ့ကြောင်း၊ ယူကရိန်းတွင် အရှေ့၊ အနောက် စစ်မျက်နှာပြင် ကွဲပြားခဲ့သော်လည်း ထိုင်ဝမ်တွင်မူ စစ်ဖြစ်သည်နှင့် မည်သို့မှ ကွဲပြားခြင်း မရှိဘဲ စစ်မျက်နှာပြင် တစ်ခုတည်းသာ ရှိမည်ဖြစ်ကြောင်း ချူက ပြောသည်။

Source: ဘန်ကောက်ပို့စ်

CNI International News

ဘန်ကောက်၊ဖေဖော်ဝါရီ ၂၂

အောက်လွှတ်တော် ဖျက်သိမ်းခြင်းကို မတ်လ အစောပိုင်းတွင် လုပ်ဆောင်ပြီး ရွေးကောက်ပွဲကော်မရှင်(EC)မှ သတ်မှတ်ထားသည့်အတိုင်း ရွေးကောက်ပွဲအား မေလ ၇ ရက်နေ့၌ လုပ်ဆောင်သွားမည်ဟု ထိုင်းဝန်ကြီးချုပ် ပရာယွတ်ချန်အိုချာ (Prayut Chan-o-chha)က အင်္ဂါနေ့ လွှတ်တော်အစည်းအဝေးမှာ ပြောခဲ့ကြောင်း ဘန်ကောက်ပို့စ် သတင်းတွင် ဖော်ပြထားသည်။

ထိုအစည်းအဝေးတွင် ဒုတိယဝန်ကြီးချုပ် ဝပ်စနူကီရာ-နမ်း (Wissanu Krea-Ngam)က ရွေးကောက်ပွဲ အချိန် အပြင် လွှတ်တော်ဖျက်သိမ်းအပြီး ကြားဖြတ်အစိုးရအဖြစ် လုပ်ဆောင်ရမည်နှင့် မလုပ်ရမည်တို့ကို လွှတ်တော် အမတ်များအား ပြောခဲ့သည်။

ထို့နောက်တွင် ဝန်ကြီးချုပ်က လွှတ်တော်ကို မတ်လတွင် ဖျက်သိမ်းမည်ဟု ပြောသည်။ လွှတ်တော်၏ လေးနှစ် သက်တမ်းသည် မတ်လ ၂၄ ရက်နေ့မှ ကုန်ဆုံးမည်ဖြစ်သည်။ ရွေးကောက်ပွဲ အချိန်နှင့်ပတ်သက်၍ သတင်း ထောက်များက မေးမြန်းခဲ့ရာတွင် ပရာယွတ်က ကျင်းပမည့် နေ့ရက်သည် ရွေးကောက်ပွဲဆိုင်ရာ ကြိုတင်ပြင်ဆင် မှုများ လုပ်ဆောင်နေသည့် EC နှင့်သာဆိုင်ကြောင်း ပြန်လည်ဖြေကြားခဲ့သည်။

ထိုင်းအောက်လွှတ်တော်ကိုတွေ့ရစဉ် (Thai PBS)

လွှတ်တော်ဖျက်သိမ်းရန် စီစဉ်နေစဉ်တွင် ပြောင်းလဲရန် ပြင်ဆင်နေသည့် အရေးကြီးသော ဥပဒေမူကြမ်းများနှင့် ပြုပြင်ပြောင်းလဲမှုများကို အရှိန်မြှင့်တင် ဆောင်ရွက်သွားရန် ဝန်ကြီးချုပ်က ဝန်ကြီးများနှင့် လွှတ်တော် အမတ် များကို ပြောခဲ့သည်။

သို့သော် ဝန်ကြီးချုပ်သည် လွှတ်တော်ဖျက်သိမ်းရေးကို အချိန်ဆွဲ ဆောင်ရွက်နေသည်ဆိုသော ဝေဖန်မှုများကို ပရာယွတ်က ငြင်းသည်။

သူ၏ United Thai Nation ပါတီသည် ရွေးကောက်ပွဲ ဝင်ပြိုင်ရေး အဆင်သင့် ဖြစ်စေရန် အချိန်များစွာ လိုအပ်နေ သည်ဟု နိုင်ငံရေး လေ့လာသုံးသပ်သူများက ထောက်ပြထားသည်။

လွှတ်တော် ဖျက်သိမ်းသည်ဖြစ်စေ ဆက်ရှိနေသည်ဖြစ်စေ အစိုးရသည် နောက်ထပ် အစိုးရသစ် မဖွဲ့စည်းရမချင်း ကြားဖြတ်အစိုးရအဖြစ် လုပ်ငန်းများကို ဆက်လက် ဆောင်ရွက်သွားမည်ဟု ပရာယွတ်က ပြောသည်။

ရွေးကောက်ပွဲဆိုင်ရာ နောက်ထပ် တိုးတက်ပြောင်းလဲမှု တစ်ခုအဖြစ် ဖွဲ့စည်းပုံ တရားရုံးသည် ပြည်နယ်တစ်ခုချင်း စီ၌ လွှတ်တော်အမတ် မည်မျှပါဝင်ရမည်ဆိုခြင်းအား သတ်မှတ်နိုင်ရေး တွက်ချက်ရာတွင် ထိုင်းမဟုတ်သူများပါ ပါဝင်နိုင်မလား ဆုံးဖြတ်ပေးရေ EC ၏ တောင်းဆိုမှုကို အင်္ဂါနေ့တွင် လက်ခံလိုက်ပြီ ဖြစ်သည်။

ထိုကိစ္စနှင့်ပတ်သက်၍ ဖွဲ့စည်းပုံအခြေခံဥပဒေဆိုင်ရာ တရားရုံးသည် မတ်လ ၃ ရက်တွင် အမိန့်ချမှတ်ရန် စီစဉ် ထားသည်ဟု တရားရုံး သတင်းအရင်းအမြစ်များက ပြောသည်။

Source: ဘန်ကောက်ပို့စ်

CNI International News

နယူးယောက်၊ ဖေဖော်ဝါရီ ၂၂

အမေရိကန်သမ္မတ ဂျိုးဘိုင်ဒန်၏ ယူကရိန်းအရေး မူဝါဒသည် တတိယကမ္ဘာစစ်ကို ဖြစ်စေနိုင်သည်ဟု သမ္မတဟောင်း ဒေါ်နယ်ထရမ့်က အင်္ဂါနေ့တွင် ပြောကြားခဲ့သည်ဟု တာ့စ်သတင်းတွင် ဖော်ပြထားသည်။

ယူကရိန်းအရေးနှင့် ပတ်သက်သည့် ဘိုင်ဒန်၏ လုပ်ဆောင်ချက်များကို စောင့်ကြည့်၊ နားလည်မည်ဆိုလျှင် သူသည် စနစ်တကျ လုပ်ဆောင်နေသည့်တိုင် ဘာကို လုပ်နေသလဲကို မသိကြောင်း၊ ထိုလုပ်ရပ်က တတိယ ကမ္ဘာစစ်ကြီးအထိ ဖြစ်စေနိုင်ကြောင်း၊ ရူးနှမ်းမှုဖြစ်ကြောင်း ဒေါ်နယ်ထရမ့်က ၎င်း၏ Truth ဆိုရှယ်မီဒီယာတွင် ရေးသားခဲ့သည်။

တနင်္လာနေ့က ဖလော်ရီဒါရှိ ၎င်းအား ထောက်ခံသူများနှင့် တွေ့ဆုံရာတွင် ထရမ့်က “၎င်းအနေဖြင့် သမ္မတရာထူး အား ပြန်လည် ရွေးချယ်ခံရပါက ယူကရိန်းနိုင်ငံမှ အခြေအနေများအတွက် အမြန်ဆုံး အဖြေရှာရေး ရုရှားနှင့် ယူကရိန်းမှ သမ္မတများကို ဆက်သွယ် ပြောဆိုသွားမည်”ဟု ပြောခဲ့သည်။

ဘိုင်ဒန်နဲ့ ဇာလန်းစကီးကိုတွေ့ရစဉ် (GETTY IMAGES)

ရုရှားသည် ယူကရိန်းကို ၂၀၂၂ ခုနှစ်၊ ဖေဖော်ဝါရီလက စတင်၍ ကျူးကျော်တိုက်ခိုက်ခဲ့ရာ ယခုဆိုလျှင် တစ်နှစ် ပြည့်တော့မည်ဖြစ်သည်။

အဆိုပါ ယူကရိန်းစစ်ပွဲတွင် အမေရိကန်သည် ယူကရိန်းအား လက်နက် ခဲယမ်းများနှင့် နည်းပညာပိုင်းဆိုင်ရာ အကူအညီများ ပေးအပ်လျက်ရှိသလို ရုရှားအား သံတမန်နည်းလမ်းအရလည်း ဖိအားပေးလျက်ရှိနေသည်။

ထို့နောက် ရုရှားနှင့် အမေရိကန်ကြားမှာလည်း ဆက်ဆံရေး တင်းမာလျက်ရှိနေပြီး ရုရှားက နျူကလီးယား ခြိမ်းခြောက်မှုများပင် လုပ်လာလျက်ရှိသည်။

ထိုအခြေအနေများကြောင့် တတိယကမ္ဘာစစ် ဖြစ်လာနိုင်သည်ဟု နိုင်ငံတကာရှိ ကျွမ်းကျင်သူများက သုံးသပ် နေကြသည်။

Source: တာ့စ်

CNI International News

ဘေဂျင်း၊ ဖေဖော်ဝါရီ ၂၂

ယူကရိန်းပဋိပက္ခအား အဆုံးသတ်ရေးအတွက် တစ်ထောင့်တစ်နေရာမှ ပါဝင်လိုသည်ဟု တရုတ်နိုင်ငံခြားရေး ဝန်ကြီးက အင်္ဂါနေ့တွင် ပြောကြောင်း AP သတင်းတွင် ဖော်ပြသည်။

တစ်နှစ်ကြာ ယူကရိန်းစစ်ပွဲ ထပ်မံပြင်းထန်လာမည်နှင့် ထိန်းချုပ်၍မရသော အခြေအနေသို့ ရောက်ရှိသွားမည်ကို တရုတ်နိုင်ငံအနေဖြင့် စိုးရိမ်မိကြောင်း နိုင်ငံခြားရေးဝန်ကြီး ချင်းငန်း (Qin Gang) က ဘေဂျင်းရှိ လုံခြုံရေး ညီလာခံတစ်ခုတွင် ပြောခဲ့သည်။

တရုတ်နိုင်ငံသည် ငြိမ်းချမ်းရေးဆွေးနွေးပွဲများ လုပ်ဆောင်ရေးအတွက် ဆက်လက်တိုက်တွန်းသွားမည်ဖြစ်ကာ နိုင်ငံရေးအရ ကျေအေးမှု ရယူရေးတွင် တရုတ်၏ အသိပညာများကို ထောက်ပံ့ပေးသွားမည်ဟု ပြောသည်။ ယူကရိန်းအရေးတွင် မီးလောင်ရာလေပင့်နေသောနိုင်ငံများကို ရပ်တန်းကရပ်ရန်၊ တရုတ်အား အပြစ်တင်နေမှု များကိုရပ်ရန်နှင့် ယူကရိန်းအရေးနှင့် ထိုင်ဝမ်အရေးတို့ကို အကျယ်တဝင့် ရေးသားနေမှုများကို ရပ်တန့်ရန် တိုက်တွန်းကြောင်း ချင်းက ပြောသည်။ ယင်းက ယူကရိန်းကို လက်နက်ထောက်ပံ့နေသော အမေရိကန်နှင့် မဟာမိတ်နိုင်ငံများအပြင် ထိုင်ဝမ်ကို တရုတ်ကကျူးကျော်မှု လုပ်ဆောင်လိမ့်မည်ဟု စိုးရိမ်နေမှုများအပေါ် ရည်ညွှန်းပြောဆိုခဲ့ခြင်းလည်းဖြစ်သည်။

မီးလောင်ပြိုကျပျက်စီးနေသည့် အဆောက်အအုံနှင့်အတူ ယူကရိန်းဖခင်နှင့် ကလေးငယ်တစ်ဦးကို တွေ့ရ စဉ်(ဓါတ်ပုံ-ယူနက်ဆက်ဖ်)

တရုတ်အစိုးရသည် ယူကရိန်းအရပ်သားများအပေါ် ရုရှား၏ ကျူးကျော်ခြင်း (သို့မဟုတ်) ကြမ်းကြုတ် ရက်စက် ခြင်းများအပေါ် ဝေဖန်မှုလုပ်ဆောင်ရန် ငြင်းဆန်ခဲ့ပြီး ရုရှားအပေါ် အနောက်အုပ်စု၏ ပိတ်ဆို့အရေးယူမှုများ ချမှတ်ခြင်းကိုသာ ဝေဖန်ထားသည်။
ထို့အပြင် ရုရှား၏အလိုကို လိုက်လျောခြင်းအားဖြင့် ယူကရိန်း ပဋိပက္ခကို ကျူးကျော်စစ်အဖြစ်လည်း သုံးနှုန်းခြင်း မရှိပေ။ တရုတ်နှင့်ရုရှားတို့သည် အမေရိကန်ကိုဆန့်ကျင်သော နိုင်ငံခြားရေးမူဝါဒချင်း တူညီကြပြီး ယူကရိန်း ကျူးကျော်စစ်ပွဲမတိုင်ခင် နှစ်နိုင်ငံဆက်ဆံရေးမှာ အကန့်အသတ်မရှိဟု ခေါင်းဆောင်များက ပြောခဲ့သည်။

နေတိုးအဖွဲ့၏ အရှေ့ဘက်သို့ အင်အားတိုးချဲ့လာခြင်းသည် ရုရှားအနေဖြင့် တပ်အင်အားကိုသုံးရန် ရန်စမှု ဖြစ်စေခဲ့သည်ဟုလည်း တရုတ်က ရုရှားအား ကာကွယ်ပြောဆိုထားသည်။ သို့သော် တရုတ်နိုင်ငံသည် အကြောင်း အရာ၏ အခြေအနေပေါ်မူတည်ပြီး မျှတ၍ ဘက်မလိုက်သော ရပ်တည်ချက်ကို အမြဲကျင့်သုံးသည်ဟု ချင်းက ပြောသည်။

တရုတ်သည် ကုလသမဂ္ဂအဖွဲ့တွင် ရုရှားနိုင်ငံအပေါ် ဝေဖန်မှုများကိုလည်း ကန့်ကွက်ခဲ့ပြီး နိုင်ငံတိုင်း၏ အချုပ် အခြာအာဏာနှင့် နယ်မြေပိုင်ဆိုင်မှုကို လေးစားရမည်ဟု ပြောသည်။ယင်းက ထိုင်ဝမ်အရေးတွင် တရုတ်၏ ရပ်တည်ချက်ကို အထောက်အပံ့ဖြစ်စေသော အနေအထားလည်း ဖြစ်သည်။

Source:AP

CNI International News

ကိယတ်ဗ်၊ဖေဖော်ဝါရီ ၂၁

ကြေညာထားသည့်အတိုင်း အမေရိကန်သမ္မတ ဂျိုးဘိုင်ဒန်သည် တနင်္လာနေ့တွင် ယူကရိန်းမြို့တော် ကိယက်ဗ်သို့ သွားခဲ့သည်။

ယင်းက ယူကရိန်းပဋိပက္ခ နှစ်ပတ်လည် မတိုင်မီ ရက်အနည်းငယ် အလိုတွင်း ဖြစ်သည်ဟု Aljazeera သတင်း တွင် ဖော်ပြသည်။

ဘိုင်ဒန်၏ ခရီးစဉ်သည် ၂၀၂၂ ခုနှစ်၊ ဖေဖော်ဝါရီ ၂၄ ရက် ရုရှားက ယူကရိန်းကို ကျူးကျော်ခဲ့ပြီးနောက်ပိုင်း ပထမ ဆုံးသော ယူကရိန်းခရီးစဉ်လည်း ဖြစ်သည်။

ဘိုင်ဒန်နှင့် ယူကရိန်းသမ္မတ ဗိုလိုဒီမာ ဇာလန်းစကီးတို့ ယူကရိန်းမြို့တော်၌ တွေ့ဆုံနေစဉ် လေကြောင်း အချက်ပေးသံများ ထွက်ပေါ်လာခဲ့သော်လည်း ကြီးမားသည့် တိုက်ခိုက်မှု တစ်စုံတစ်ရာ မရှိခဲ့ပေ။

အမေရိကန်သမ္မတ ဂျိုးဘိုင်ဒန်နဲ့ ယူကရိန်းသမ္မတ ဇာလန်းစကီးကိုတွေ့ရစဉ်

သမ္မတ၏ ခရီးစဉ်သည် ယူကရိန်း၏ ဒီမိုကရေစီ၊ အချုပ်အခြာအာဏာနှင့် နယ်မြေပိုင်ဆိုင်မှု အပေါ်တွင် ပြောင်းလဲ ခြင်း မရှိသည့် ခိုင်မာသော သဘောထားကို ထပ်မံပြသခြင်းဟု အိမ်ဖြူတော်ဘက်က ပြောသည်။

ပြီးခဲ့သည့် တစ်နှစ်က ပူတင် ယူကရိန်းသို့ ကျူးကျော်ချိန်တွင် ယူကရိန်းသည် အားနည်းကြောင်း၊ အနောက်အုပ်စု သည် ပြိုကွဲနေသည်ဟု ယူဆခဲ့ကြောင်း၊ သို့သော် ၎င်းသည် မှားယွင်းခဲ့ကြောင်း ဘိုင်ဒန်၏ ပြောဆိုမှုကို ကိုးကား၍ အိမ်ဖြူတော်မှ ထုတ်ပြန်သော ကြေညာချက် တစ်စောင်၌ ဖော်ပြထားသည်။

ယခု သီတင်းပတ် အကုန်ပိုင်းတွင် ရုရှား၏ စစ်အင်အားကို မြှင့်တင်ထောက်ပံ့မှု လုပ်ဆောင်ပေးနေသည့် လူပုဂ္ဂိုလ် များနှင့် ကုမ္ပဏီများကိုပါ အရေးယူ ပိတ်ဆို့မှုများ ထပ်မံချမှတ်သွားမည်ဟုလည်း ကြေညာချက်တွင် ဖော်ပြထားသည်။

 အမေရိကန်သမ္မတ ဂျိုးဘိုင်ဒန်၊ ယူကရိန်းသမ္မတ ဇာလန်းစကီးနဲ့ ဇနီးဖြစ်သူကိုတွေ့ရစဉ်

တွေ့ဆုံပွဲတွင် အမေရိကန်သည် ယူကရိန်းသို့ အမြောက်ဆန်များ၊ ကျည်ကာ ဖျက်ဆီးရေး စနစ်များ၊ လေကြောင်း ထောက်လှမ်းရေး ရေဒါများ အပါအဝင် ဒေါ်လာ သန်း ၅၀၀ တန်ကြေးရှိ ထပ်တိုး အကူအညီများ ပေးသွားမည်ဟု ဘိုင်ဒန်က ပြောကာ ရုရှားအပေါ် နောက်ထပ် အရေးယူ ပိတ်ဆို့မှုများ လုပ်ဆောင်သွားမည်ဟုလည်း ကတိပေးခဲ့ သည်။

ဘိုင်ဒန် မတိုင်ခင် ယူကရိန်းသမ္မတသည် ၂၀၂၂ ခုနှစ်၊ ဒီဇင်ဘာလတွင် အမေရိကန်သို့ ရောက်ရှိလာခဲ့ပြီး လွှတ်တော်တွင် မိန့်ခွန်းပြောခဲ့သည်။

ဘိုင်ဒန်၏ ယူကရိန်းခရီးစဉ်သည် ယူကရိန်းအားလုံးအတွက် အလွန်အမင်း အရေးပါသော အချက်ပြမှု ဖြစ်သည်ဟု ဇာလန်းစကီးက ပြောသည်။

ဘိုင်ဒန်နှင့် တွေ့ဆုံစဉ် ၎င်းတို့သည် တာဝေးပစ် လက်နက်များ၊ ယခင်က မထောက်ပံ့ ပေးခဲ့ဖူးသော်လည်း ယခု အထိ ထောက်ပံ့နေဆဲ လက်နက်များ နှင့်ပတ်သက်၍ ဆွေးနွေးခဲ့သည်ဟု ဇာလန်းစကီးက ပြောသော်လည်း မည်သည့် ကတိကဝတ်များ ရရှိခဲ့သည်ကို မပြောခဲ့ပေ။

Source: Aljazeera