CNI International News

မော်စကို၊ ဇွန်လ ၂၈

ဝဂ်နာ (Wagner) ကြေးစားစစ်သားများ ကိုင်ဆောင်ထားသည့် အကြီးစား စစ်လက်နက်များကို ရုရှားတပ်ဖွဲ့များ ထံ လွှဲပြောင်းပေးရမည်ဟု ရုရှားကာကွယ်ရေးဌာနက ပြောခဲ့ကြောင်း Al Jazeera မှ ရေးသားဖော်ပြခဲ့သည်။

ထိုသို့ လက်နက်များ အပ်ခိုင်းခြင်းက ပုန်ကန်ခဲ့သော ကြေးစားစစ်တပ်အား စစ်တပ်၏ ထိန်းချုပ်မှုအောက်သို့ ထည့်ရန် လုပ်ဆောင်ချက် ဖြစ်သည်။ 

ပုဂ္ဂလိက ကုမ္ပဏီ ဖြစ်သည့် ဝဂ်နာထံမှ အကြီးစား စစ်လက်နက်များကို ရုရှားတပ်ဖွဲ့များထံ လွှဲပြောင်းပေးရေးအ တွက် ကြိုတင်ပြင်ဆင်မှုများကို လုပ်ဆောင်လျက်ရှိသည်ဟု ရုရှားကာကွယ်ရေးဌာနက ဇွန်လ ၂၇ ရက်နေ့တွင် ထုတ်ပြန်ခဲ့သည်။
 
ဇွန်လ ၂၄ ရက်နေ့က ဝဂ်နာအဖွဲ့ပိုင်ရှင် ယက်ဂျီနီ ပရီဂေါ့ဇ်ဟင် (Yevgeny Prigozhin) ဦးဆောင်သည့် ပုန်ကန်မှု သည် ရုရှားအတွက် ဆယ်စုနှစ်များအတွင်း အပြင်းထန်ဆုံးသော လုံခြုံရေးပဋိပက္ခကို ဖြစ်စေကာ ယူကရိန်းစစ်ပွဲ ရှိနေချိန်တွင် ပူတင်၏ ရာထူးတည်မြဲမှုနှင့် ပတ်သက်သည့် မေးခွန်းများကိုလည်း ဖြစ်စေခဲ့သည်။ 

ထိုသို့သော တော်လှန်ပုန်ကန်မှုမျိုး ဖြစ်ပွားခဲ့သည့်တိုင် ရုရှားဖက်ဒရယ်လုံခြုံရေးအေဂျင်စီသည် အစိုးရကိုဖြုတ်ချ ရန် ကြိုးပမ်းခဲ့သည့် ဝဂ်နာအဖွဲ့သားများ၏ ရာဇဝတ်မှုကို ရုတ်သိမ်းပေးခဲ့သည်။

ပူတင်ကို တွေ့ရစဉ်

ပရီဂေါ့ဇ်ဟင်သည် ဝဂ်နာတပ်ဖွဲ့များ၏ ချီတက်လာမှုကို ဇွန်လ ၂၅ ရက်တွင် ရပ်ဆိုင်းလိုက်သည်။ 

ရုရှားရဟတ်ယာဉ်ခြောက်စင်း၊ ထိန်းချုပ်ကွပ်ကဲရေး လေယာဉ်တစ်စင်းတို့အား ပစ်ချကာ တောင်ပိုင်းရှိ Rostov-on-Don မြို့အား သိမ်းပိုက်ပြီးချိန်၌ ဖြစ်သည်။ 

ဘယ်လာရုစ်သမ္မတ အလက်ဇန္ဒား လူကာရှန်(Alexander Lukashenko)၏ ကြားဝင်စေ့စပ်ပေးမှုကြောင့် ပုန်ကန် မှု အပြီးသတ်ခဲ့သည်။ 

ပုန်ကန်မှု အဆုံးသတ်သွားခဲ့ပြီးနောက် ပြုလုပ်ခဲ့သည့် ပထမဆုံးသော မိန့်ခွန်းတွင် ပူတင်က ၎င်းအနေဖြင့် သွေးထွက်သံယိုမှုများကို ရှောင်လွဲရန်၊ ဝဂ်နာတပ်ဖွဲ့ဝင်များ လွှတ်ငြိမ်းချမ်းသာခွင့် ရရှိစေရန် အမိန့်များ ထုတ်ပြန် ခဲ့သည်ဟု ဇွန်လ ၂၆ ရက်နေ့တွင် ပြောသည်။ 

ထို့နောက် ယူကရိန်းနှင့် ယင်း၏အနောက်အုပ်စု မဟာမိတ်များသည် ရုရှားတို့ အချင်းချင်း ပြန်သတ်မည်ကို အလို ရှိနေကြသည်ဟုလည်း ၎င်းက စွပ်စွဲသည်။ 

ဝဂ်နာအဖွဲ့ခေါင်းဆောင် ပရီဂေါ့ဇ်ဟင်ကလည်း သူတို့၏လုပ်ရပ်ကို ဆန္ဒပြမှု တစ်ခုသာဖြစ်သည်ဟု ကာကွယ်ပြော ကြားခဲ့သည်။

ဝဂ်နာ ကြေးစားစစ်တပ်ကိုတွေ့ရစဉ်

ယင်းက ကြေးစားလက်နက်ကိုင် တပ်ဖွဲ့များကို ကာကွယ်ရန်၊ ရုရှားစစ်ဘက် ခေါင်းဆောင်များ၏ ညံ့ဖျင်းမှုကို ဖော်ထုတ်ရန် လုပ်ဆောင်ချက်သာဖြစ်ပြီး ရုရှားအစိုးရကို စိန်ခေါ်လိုသည့် သဘောမရှိဟုလည်း ပြောသည်။ 

ထိုဖြစ်ရပ် ဖြစ်ပွားပြီးနောက်ပိုင်း ထွက်ပေါ်လာသည့် ပထမဆုံးသော အသံဖိုင်တွင် ဝဂ်နာအဖွဲ့များ မော်စကိုမြို့ဆီ သို့ လျင်လျင်မြန်မြန် ချီတက်လာနိုင်ခြင်းက ဆိုးရွားသည့် လုံခြုံရေးဆိုင်ရာ ပြဿနာများကို ဖြစ်စေသည်ဟုလည်း ၎င်းက ပြောသည်။ 

မကျေလည်မှုကို ဖော်ပြခြင်းသာ ဖြစ်ကြောင်း၊ နိုင်ငံ၏ အစိုးရကို ဖယ်ရှားရန် မဟုတ်ကြောင်း ဝဂ်နာအဖွဲ့ပိုင်ရှင်က ပြောသည်။

ထို့နောက် ဝဂ်နာများသည် လေတပ်စခန်းများ အပါအဝင် စစ်တပ်၏ အခြေခံအဆောက်အဦများကို ပိတ်ဆို့ခဲ့ပြီး နောက် မော်စကိုမြို့သို့ ရောက်ရန် ကီလိုမီတာ ၂၀၀ ခန့်တွင် ရပ်တန့်ခဲ့သည်ဟု ပြောသည်။ 

Source: Aljazeera

CNI International News

မော်စကို၊ ဇွန်လ ၂၇

ဇွန် ၂၄ ရက်က တပ်တွင်းပုန်ကန်မှုအတွင်း ပြင်သစ်သမ္မတ အီမန်နျူရန် မက်ခရွန် (Emmanuel Macron) သည် ရုရှားနှင့် အပေးအယူလုပ်ရန် ခြိမ်းခြောက်မှုသည် ဆိုးရွားပြင်းထန်သည့် ထိုးနှက်ချက် တစ်ခုဖြစ်သည်ကို နားလည်သဘောပေါက်ရန် အခွင့်အရေးဖြစ်ခဲ့သည်ဟု ရုရှားနိုင်ငံခြားရေးဝန်ကြီး ဆာဂျေလာဗရော့ဗ် (Sergey Lavrov)က ပြောသည်။

ရုရှားသတင်းဌာနဖြစ်သည့် အာတီသတင်းဌာနနှင့် အင်တာဗျူးတစ်ခုတွင် ပြောခဲ့ခြင်းသည်။  

မက်ခရွန်သည် အမေရိကန်နှင့် အတူတကွရှိနေကြောင်း လာဗရော့ဗ်က ပြောသည်။

အခြေအနေကို ဂရုတစိုက် စောင့်ကြည့်နေကြောင်း၊ ယင်းသည် အလျင်အမြန်ပင် ပြောင်းလဲဖြစ်ပျက်နေကြောင်း၊ သို့သော် အဓိကအချက်မှာ ခွဲထွက်မှု၊ အစိုးရနှင့်စစ်တပ်၏ ထိလွယ်ရှလွယ် ဖြစ်မှုတို့သည် ယူကရိန်းတွင် စစ်ရေး အရ ထောက်ပံ့မှုများကို ဆက်လက် လုပ်ဆောင်ရန် ကြိုးပမ်းမှုများသည် တရားမျှတမှုရှိသည်ကို အပြည့်အဝ ဖော်ပြနေကြောင်း ရုရှားသံတမန်က ပြောသည်။ 

လာဗရော့ဗ်နဲ့ အာတီ အင်တာဗျူး လုပ်နေစဉ်

ဖြစ်စဉ်များတွင် မက်ခရွန်သည် ယူကရိန်း၏ ရုရှားနှင့်ဆက်ဆံခြင်းဆိုင်ရာ ခြိမ်းခြောက်မှုသည် မဟာဗျူဟာ မြောက် ထိုးနှက်ချက် ဖြစ်သည်ကို နားလည် သဘောပေါက် သွားခဲ့ကြောင်း၊ ယင်းသည် နေတိုးအဖွဲ့ ခေါင်းဆောင် များ ကိုင်ဆွဲထားသည့် အယူအဆတစ်ခုလည်းဖြစ်ကြောင်း လာဗရော့ဗ်က ပြောသည်။ 

မက်ခရွန်သည်လည်း ယူကရိန်းနှင့် အနောက်အုပ်စု မီဒီယာများမှ အာဏာပိုင်များနည်းတူ ရုရှားအား ဆန့်ကျင် သည့် စက်တစ်လုံး၏ အစိတ်အပိုင်း တစ်ခုသာဖြစ်သည်ဟု လာဗရော့ဗ်က ပြောသည်။ 

ရုရှားသမ္မတ ပူတင်၏ ဇွန်လ ၂၄ ရက်နေ့ မိန့်ခွန်းကဲ့သို့ပင် အနောက်အုပ်စု၏ စစ်ဘက်၊ စီးပွားရေးနှင့် သတင်း အချက်အလက် အဖွဲ့အစည်းတစ်ခုလုံးသည် ရုရှားကို ဆန့်ကျင်ရန်အတွက် ဖန်တီးထားသည်ဟုလည်း ရုရှား နိုင်ငံခြားရေးဝန်ကြီးက အဆုံးသတ် ပြောသွားခဲ့သည်။ 

Source: တာ့စ်

CNI International News

ဘန်ကောက်၊ ဇွန်လ ၂၇

လွှတ်တော်၏ ဝန်ကြီးချုပ်အသစ် ရွေးချယ်မှုတွင် Move Forward ပါတီ (MFP)ခေါင်းဆောင် ပီတာလင်ဂျာရိုရန် ရတ်(Pita Limjaroenrat) အပြင် တခြားသော အမည်များကိုလည်း အဆိုပြု တင်သွင်းနိုင်ဖွယ်ရှိကြောင်း လွှတ်တော်အမတ်တစ်ဦးဖြစ်သူ ဗိုလ်ချုပ်ကြီး အကာနစ် မြူအမ်ဆာဝပ် (Akanit Muensawad) ကပြောသည်။  

မစ္စတာပီတာအား ဝန်ကြီးချုပ်သစ်အဖြစ် ရွေးချယ်ရန် MFP ထောက်ခံသူများက လွှတ်တော်အမတ်များအပေါ် ဖိအားပေးမှုများ မြင့်တက်လာချိန်တွင် ၎င်းက ထိုသို့ ပြောခဲ့ခြင်း ဖြစ်သည်။ 

တခြားသော ကိုယ်စားလှယ်ဟောင်းများ၏ အမည်စာရင်း တင်သွင်းမှုများလည်း ရှိလာနိုင်ခြင်းကြောင့် လွှတ်တော် အမတ်များအနေဖြင့် ဝန်ကြီးချုပ်အသစ်ရာထူးတွင် ကျင့်ဝတ်ပိုင်းနှင့် လုပ်နိုင်စွမ်း နှစ်ခုစလုံး ကောင်းမွန်သည်ဟု ၎င်းတို့ ယူဆသူအား မဲပေးရန် အခွင့်အရေး ရှိနေသည်ဟု ဗိုလ်ချုပ်ကြီး အကာနစ်က ပြောသည်။ 

လွှတ်တော်အမတ်တစ်ဦးဖြစ်သူ ဗိုလ်ချုပ်ကြီး အကာနစ် မြူအမ်ဆာဝပ်ကိုတွေ့ရစဉ်

MFP အနေဖြင့် ကနဦး အခြေအနေတွင် ကတည်းက လွှတ်တော်အမတ် ၃၇၆ ဦးထံမှ ထောက်ခံမဲ ရရှိထားသင့် ကြောင်း၊ ထိုအခြေအနေတွင် လွှတ်တော်အမတ်များသည် ဝန်ကြီးချုပ်အသစ် ရွေးချယ်မှုကို လက်ရှောင်နေတော့ မည်ဖြစ်ကြောင်းလည်း ၎င်းက ပြောသည်။

ပီတာအနေဖြင့် လွှတ်တော်အတွင်းမှ ထောက်ခံမဲ ၃၇၆ မဲ မရရှိခဲ့လျှင် MFP အား ထောက်ခံသူများက လွှတ်တော် အား ပြစ်တင်ဝေဖန်မှု လုပ်ဆောင်လာနိုင်သည်ဆိုသည့် ခန့်မှန်းမှုများအပေါ် အကာနစ်က တုံ့ပြန် ပြောဆိုခဲ့ခြင်း ဖြစ်သည်။ 

အစပိုင်း ထောက်ခံမဲ ၃၇၆ မဲရခဲ့လျှင် အစိုးရဖြစ်လာမည်ဖြစ်ကြောင်း၊ ထိုသို့ လုပ်နိုင်ပါသလား၊ ထိုသို့ မလုပ်နိုင်ခဲ့ လျှင်လည်း လွှတ်တော်၏အပြစ်ဟု မထိုးချသင့်ကြောင်း အကာနစ်က ပြောသည်။ 

MFP ပါတီသည် ပီတာအား ဝန်ကြီးချုပ်သစ်အဖြစ် တင်မြှောက်နိုင်ရေးအတွက် လွှတ်တော်အမတ်များနှင့် တွေ့  ဆုံဆွေးနွေးရန် ကြိုးပမ်းလျက်ရှိချိန်တွင် လွှတ်တော်အမတ်တချို့သည် ၎င်းတို့နှင့် တွေ့ဆုံလိုခြင်း မရှိဟုလည်း လွှတ်တော်အမတ် ဂျာတီသီရသာရာနွန့် (Jate Siratharanont) က ပြောသည်။ 

MFP သည် တော်ဝင်မိသားစုနှင့် သက်ဆိုင်သည့် ပုဒ်မ ၁၁၂ ကို ပြင်ဆင်လိုနေကြောင်း၊ ယင်းကို ပြည်သူတချို့က လက်မခံကြပေ။ 

Move Forward ပါတီ (MFP)ခေါင်းဆောင် ပီတာလင်ဂျာရိုရန်ရတ်ကိုတွေ့ရစဉ်

MFP ပါတီ၏ လက်နက်ကိုင်တပ်ဖွဲ့များ ပြုပြင်ပြောင်းလဲရေး မူဝါဒနှင့်ပတ်သက်၍ မေးမြန်းခဲ့ရာတွင် ဗိုလ်ချုပ်ကြီး အကာနစ်က လက်နက်ကိုင်တပ်ဖွဲ့များအတွက် ပြုပြင်ပြောင်းလဲရေးကို လက်နက်ကိုင်တပ်ဖွဲ့ဝင်များကသာ လုပ်ဆောင်သင့်ကြောင်း၊ MFP မှ အဆိုပြုသည့် ပုံစံမျိုးမဖြစ်သင့်ကြောင်း ပြန်လည်ဖြေကြားခဲ့သည်။ 

MFP သည် ထိုင်းလက်နက်ကိုင် တပ်ဖွဲ့များအတွက် ပြုပြင်ပြောင်းလဲရေးမူဝါဒကို အမေရိကန် စစ်တပ် ဖွဲ့စည်းပုံ အား ကူးချထားသည်ဟုလည်း အကာနစ်က စွပ်စွဲသည်။ 

MFP ပါတီမှ အဆိုပြုထားသည့် ပြုပြင်ပြောင်းလဲရေး လုပ်ငန်းစဉ်များတွင် စစ်မှု မထမ်းမနေရစနစ်ကို ရပ်ဆိုင်း ထားရန်နှင့် ကာကွယ်ရေးကောင်စီ၊ ပြည်တွင်းလုံခြုံရေးဌာနချုပ် (Isco) နှင့် စစ်ခုံရုံးတို့အား ဖျက်သိမ်းမှုများ ပါဝင်နေသည်။ 

Source: ဘန်ကောက်ပို့စ်

CNI International News

ဆိုးလ်၊ ဇွန်လ ၂၇

ကိုရီးယားစစ်ပွဲဖြစ်ပွားခြင်း ၇၃ နှစ်ပြည့် အထိမ်းအမှတ်အဖြစ် မြောက်ကိုရီးယားနိုင်ငံသားများသည် မြို့တော် ပြုံယမ်း (Pyongyang) တွင် ကြီးမားသည့် လူထုစုဝေးပွဲများ ကျင်းပကာ အမေရိကန်အား ဖျက်ဆီးရေးအတွက် လက်တုံ့ပြန်စစ်ပွဲ ကျင်းပရန် ဆောင်ပုဒ်များကို သံပြိုင်အော်ဟစ်ခဲ့ကြသည်။

ဇွန်လ ၂၅ ရက်နေ့ မြို့တော်တစ်လွှား ကျင်းပခဲ့သည့် လူထုစုဝေးပွဲများသို့ လုပ်သားနှင့်ကျောင်းသား ၁၂၀,၀၀၀ ခန့် တက်ရောက်ခဲ့သည်ဟု နိုင်ငံပိုင် KCNA သတင်းတွင် ဖော်ပြထားသည်။ 

နိုင်ငံပိုင်သတင်းဌာနမှ ထုတ်ပြန်သည့် ဓာတ်ပုံများတွင်  ကွင်းလုံးပြည့် လူအုပ်ကြီးကို မြင်တွေ့ရပြီး ထိုသူများသည် အမေရိကန်တစ်နိုင်ငံလုံးသည် ငါတို့ပစ်ခတ်နိုင်သည့် အတိုင်းအတာ အတွင်း၌ပင်ရှိသည်၊ နယ်ချဲ့ အမေရိကန်တို့ သည် ငြိမ်းချမ်းရေးကို ဖျက်ဆီးသူများ ဖြစ်သည်ဟု အဓိပ္ပါယ်ရသည့် စာတန်းများကိုလည်း ကိုင်ဆောင်ထားသည် ကို တွေ့ရသည်။ 

အမေရိကန်ကို ဆန့်ကျင်ကြောင်း ပြသနေသည့် မြောက်ကိုရီးယားလူထု

ဇွန်လ ၂၅ ရက်နေ့ နှစ်ပတ်လည် အခမ်းအနားသည် မြောက်ကိုရီးယား အနေဖြင့် ၎င်းတို့၏ ပထမဆုံးသော စစ်ဘက်ဆိုင်ရာ ထောက်လှမ်းရေး ဂြိုဟ်တုကို ထပ်မံလွှတ်တင် နိုင်သည်ဆိုသည့် စိုးရိမ်မှုများ ရှိနေချိန်တွင် ပေါ်ထွက်လာခဲ့သည်။ 

အမေရိကန်၏ စစ်ရေးလှုပ်ရှားမှုကို စောင့်ကြည့်နိုင်မှုအား မြှင့်တင်ရန် ဂြိုဟ်တုလွှတ်တင်ခြင်းဖြစ်သည်။

သို့သော် ၎င်းတို့၏ မေလ ၃၁ ရက်က ပထမအကြိမ် ကြိုးပမ်းမှုသည် မအောင်မြင်ခဲ့ပေ။

အမေရိကန်၏ နယ်ချဲ့ဝါဒကို အပြစ်ပေးရန် မြောက်ကိုရီးယားသည် အခိုင်မာဆုံး လက်နက်ကို ပိုင်ဆိုင်ထား ကြောင်း၊ ကိုရီးယားကျွန်းပေါ်ရှိ လက်စားချေသူများသည် ရန်သူအား လက်စားချေရန်အတွက် တောက်လောင်နေ သော စိတ်ဓာတ်ကို ပိုင်ဆိုင်ထားသည်ဟု KCNA တွင် ဖော်ပြသည်။

အမေရိကန်ကို ဆန့်ကျင်ကြောင်း ပြသနေသည့် မြောက်ကိုရီးယားလူထု

နျူကလီးယားပိုင်ရှင် မြောက်ကိုရီးယားသည် ၎င်းတို့၏ အကြီးမားဆုံးသော တိုက်ချင်းပစ် ပဲ့ထိန်ဒုံးကျည် အပါအဝင် လက်နက်ပေါင်းများစွာကို ပစ်ခတ်စမ်းသပ်ခဲ့သောကြောင့် တောင်ကိုရီးယားနှင့်သာမက အမေရိကန်နှင့်ပါ တင်းမာမှုများ မြင့်တက်လာခဲ့ရသည်။ 

နိုင်ငံခြားရေးဌာန၏ သီးခြားထုတ်ပြန်ချက် တစ်ခုတွင် အမေရိကန်သည် ဒေသတွင်းသို့ မဟာဗျူဟာမြောက် အင်အားများ ပို့ဆောင်နေကြောင်း စွပ်စွဲခဲ့သလို အမေရိကန်သည် နျူကလီးယားစစ်ပွဲ ဖြစ်ပွားစေရန် မီးရှို့ နေသည်ဟု ပြောခဲ့သည်။ 

၁၉၅၀-၅၃ ခုနှစ် ကိုရီးယားစစ်ပွဲသည် သဘောတူညီချက် မဟုတ်သော အပစ်အခတ်ရပ်စဲရေး စာချုပ်ဖြင့်သာ အဆုံးသတ်ခဲ့ခြင်းကြောင့် တောင်နှင့်မြောက် ကိုရီးယားနှစ်နိုင်ငံသည် စစ်ပွဲအခြေအနေ၌ပင် တည်ရှိနေဆဲ ဖြစ် သည်။ 

Source: Reuters

CNI International News

မော်စကို၊ ဇွန်လ ၂၆

မော်စကိုမြို့လမ်းမများပေါ်ရှိ ရုရှားအစိုးရတပ်များသည် ဇွန်လ ၂၅ ရက်နေ့တွင် ရုတ်သိမ်းသွားခဲ့ပြီဖြစ်သလို မြို့များကို သိမ်းပိုက်ထားသော ကြေးစားစစ်သားများသည်လည်း ပြန်လည်ဆုတ်ခွာသွားပြီဟု အေပီမှ  ဖော်ပြခဲ့ သည်။ 

အချိန်ပိုင်းသာ ကြာမြင့်ခဲ့သော ပုန်ကန်မှုသည် ယူကရိန်းတွင် တန်ပြန်ထိုးစစ်နှင့် ရင်ဆိုင်နေရသည့် သမ္မတ ဗလာဒီမာပူတင် (Vladimir Putin) ကို အားနည်း သွားစေခဲ့သည်။ 

မြို့တော်ဆီသို့ ချီတက်မှုကို ဖျက်သိမ်းခဲ့ခြင်းက ယက်ဂျီနီ ပရီဂေါ့ဇ်ဟင် (Yevgeny Prigozhin) နှင့်သူ၏ ဝဂ်နာ (Wagner) တပ်ဖွဲ့များ၏ ကံကြမ္မာကိုလည်း မရေမရာ ဖြစ်စေခဲ့သည်။

 ပဋိပက္ခကို အဆုံးသတ်စေခဲ့သည့် သဘောတူညီချက်အရ ပရီဂေါ့ဇ်ဟင်သည် ဘယ်လာရုစ်သို့ ရွှေ့ပြောင်းရမည် ဖြစ်ကာ ဖမ်းဆီး အရေးယူမှုနှင့် ရင်ဆိုင်ရမည် မဟုတ်ပေ။ 

ထိုသဘောတူညီချက်ကို ဘယ်လာရုစ်သမ္မတ အလက်ဇန္ဒား လူကာရှန်ကို (Alexander Lukashenko) က ကြားဝင် စေ့စပ်ပေးခဲ့ခြင်းဖြစ်ပြီး ဇွန်လ ၂၄ ရက်ညတွင် ထုတ်ပြန် ကြေညာခဲ့သည်။ 

ပူတင်ကို တွေ့ရစဉ်

ထိုထုတ်ပြန်မှု ပြီးချိန်ကတည်းက ပူတင်နှင့် ပရီဂေါ့ဇ်ဟင်တို့ထံမှ မည်သည့်အကြောင်းမှ ထပ်မံမကြားသိရသေး ပေ။ 

သီတင်းပတ်ကုန်ပိုင်းတွင် ဖြစ်ပွားခဲ့သော ဖြစ်ရပ်များကို ပုံမှန်မဟုတ်သော အခြေအနေများဟု အမေရိကန် နိုင်ငံ ခြားရေးဝန်ကြီး အန်တိုနီ ဘလင်ကင် (Antony Blinken)က ပြောသည်။ 

ပြီးခဲ့သော ၁၆ လက ပူတင်သည် ယူကရိန်းမြို့တော်သို့ ချီတက်ပုံနှင့် လက်ရှိအချိန်တွင် ၎င်း၏ မော်စကိုမြို့အား ခုခံရန် ပြင်ဆင်နေရပုံ တို့ကိုလည်း ၎င်းက ဆက်စပ် ပြောဆိုခဲ့သည်။ 

ရုရှားစာမျက်နှာတွင် အက်ကြောင်းများစွာကို မြင်တွေ့ရမည်ဟုလည်း ၎င်းက ပြောသည်။ 

ဘာတွေဖြစ်နေသလဲ တိတိကျကျ မသိရသော်လည်း ပူတင်သည် ယခုကိစ္စကို လာမည့် သီတင်းပတ်များအတွင်း ဖြေရှင်းရတော့မည်မှာ သေချာသည်ဟုလည်း ရုရှားနိုင်ငံခြားရေးဝန်ကြီးက ပြောသည်။ 

လက်ရှိအချိန်အထိ ၂၄ နာရီကြာ ပုန်ကန်မှုသည် ယူကရိန်းစစ်ပွဲအတွက် မည်သို့မည်ပုံ သက်ရောက်မှု ရှိသည်ကို လည်း မသိရသေးပေ။

သို့သော် ထိုဖြစ်ရပ်ကြောင့် ယူကရိန်းစစ်မြေပြင်တွင် ရုရှားဘက်က တိုက်ခိုက်ပေးနေသည့် အကောင်းဆုံး တပ်ဖွဲ့များသည် စစ်မြေပြင်မှ ပြန်လည် ဆုတ်ခွာလာခြင်းကို ဖြစ်စေခဲ့သည်။ 

ဝဂ်နာအုပ်စု ပုန်ကန်မှုလုပ်နေစဉ်

ယင်းတို့တွင် ဝဂ်နာများနှင့် ချေချင်းညာ တပ်ဖွဲ့ များလည်း ပါဝင်သည်။ 

ဝဂ်နာများ မော်စကိုမြို့ဆီသို့ ချီတက်ရာ လမ်းကြောင်းသည် အတားအဆီးမရှိဘဲ လျင်လျင်မြန်မြန် ရှေ့တိုး လာနိုင် ခဲ့ခြင်းက ရုရှားလုံခြုံရေးနှင့် စစ်တပ်တို့၏ အားပျော့မှုကိုလည်း ဖော်ပြနေသည်။ 

ဝဂ်နာများသည် ပြီးခဲ့သည့် တစ်ရက်အတွင်း ယူကရိန်းတပ်ဖွဲ့များ၏ သုံးပတ်တာ ကာလထက်ပိုကာ ရုရှားလေတပ် ကို ထိခိုက်ပျက်စီးမှု ဖြစ်စေခဲ့သည်ဟု ယူဆကြောင်း ရုရှားအရေး လေ့လာသုံးသပ်သူတစ်ဦးက မှတ်ချက်ပြုသည်။ 

ဝဂ်နာများသည် မော်စကိုမြို့သို့ ချီတက်ရာတွင် ရဟတ်ယာဉ်တချို့နှင့် စစ်တပ်၏ ဆက်သွယ်ရေး လေယာဉ်များ ကို ပစ်ချခဲ့သည်ဟု သတင်းများတွင် ဖော်ပြသည်။ 

ကာကွယ်ရေးဌာနကတော့ ယင်းနှင့်ပတ်သက်၍ မှတ်ချက်ပြု ပြောဆိုခြင်း မရှိသေးပေ။ ရုရှားတို့၏ ပြည်တွင်း မငြိမ်သက်မှုများက ၎င်းတို့ စစ်တပ်အတွက် အခွင့်အရေးများ ဖန်တီးပေးမည်ကိုလည်း ယူကရိန်းဘက်က မျှော်လင့်နေသည်။

Source: AP

CNI International News

ဘရပ်ဆဲလ်၊ ဇွန်လ ၂၃

နှစ်နိုင်ငံနယ်စပ်အနီးတွင် အကြမ်းဖက်ပဋိပက္ခများ ဖြစ်ပွားနေခြင်းကို အဆုံးသတ်နိုင်ရေး အရေးပေါ် အစည်း အဝေးအတွက် ဥရောပသမဂ္ဂက ဆားဘီးယားနှင့် ကိုဆိုဗိုခေါင်းဆောင်များကို ခေါ်ယူတွေ့ဆုံခဲ့သည်ဟု Al Jazeera သတင်းတွင် ဖော်ပြထားသည်။ 

ကိုဆိုဗို ဝန်ကြီးချုပ် အယ်လ်ဘင် ကာတီ (Albin Kurti)၊ ဆားဘီးယား သမ္မတ အလက်ဇန္ဒား ဗူချိ(Aleksander Vucic) တို့နှင့် ကြားသပတေးနေ့၌ ဘရပ်ဆဲလ် (Brussels) မြို့တွင် အရေးပေါ် အစည်းအဝေး ကျင်းပသွားမည်ဟု EU နိုင်ငံခြားရေးမူဝါဒ အကြီးအကဲ ဂျိုးဆက် ဘော်ရယ် (Josep Borrell) က ပြောသည်။

သို့သော် ခေါင်းဆောင်နှစ်ဦးသည် မျက်နှာချင်းဆိုင် တွေ့ဆုံမည်လား သို့မဟုတ် ဘော်ရယ်နှင့် သီးခြားစီ တွေ့ဆုံ သွားမည်လား ဆိုသည်ကိုတော့ တိတိကျကျ မသိရသေးပေ။ 

တင်းမာမှုများကို လျှော့ချရန်၊ ကိုဆိုဗိုရှိ ဆာ့ဘ်လူမျိုးများ ပါဝင်သည့် မြောက်ပိုင်း ရွေးကောက်ပွဲသစ်များ ပြန်လည် စတင်ရန် ချက်ချင်း ကြိုးပမ်းသင့်ကြောင်း၊ ယင်းသည် ဒေသတွင်းနှင့် EU တို့အတွက် မရှိမဖြစ် အရေးပါကြောင်း ဘော်ရယ်က ဆွေးနွေးပွဲမတိုင်ခင် တွစ်တာတွင် ပြောခဲ့သည်။

အဖွဲ့ဝင် ၂၇ နိုင်ငံပါ EU အဖွဲ့သည် နှစ်နိုင်ငံကြား ပြန်လည်ရင်ကြားစေ့မှုအတွက် ဆွေးနွေးပွဲများကို နှစ်ချီကာ ဦးဆောင် ကျင်းပပေးခဲ့သော်လည်း အောင်မြင်မှု အနည်းငယ်သာ ရရှိထားသည်။

ကိုဆိုဗိုမှာ အကြမ်းဖက်မှုများ ဖြစ်ပွားစဉ်

ဆားဘီးယားနှင့် ယင်း၏ ပြည်နယ်ဟောင်း တစ်ခုဖြစ်သော ကိုဆိုဗိုတို့ကြားတွင် ကာလရှည် တင်းမာမှုများရှိခဲ့ သည်။ 

၁၉၉၈-၉၉ ခုနှစ်က နှစ်နိုင်ငံကြား ပဋိပက္ခများကြောင့် လူ ၁၀၀၀၀ ကျော် သေဆုံးခဲ့ကာ အများစုမှာ ကိုဆိုဗို အယ်လ်ဘေးနီးယား လူမျိုးများ ဖြစ်သည်။ 

ကိုဆိုဗို၏ ၂၀၀၈ ခုနှစ် လွတ်လပ်ရေး ကြေညာချက်ကို ဆားဘီးယားဘက်က အသိအမှတ်ပြုရန် ငြင်းဆန်သည်။ 

ဆားဘီးယားသည် ကိုဆိုဗိုအား ၎င်းတို့နှင့် နှီးနှော ဆက်နွယ်မှုများစွာ ရှိသည့် နယ်မြေတစ်ခုအဖြစ် ရှုမြင်ထားကာ ကိုဆိုဗိုတွင် ဆားဘီးယား အော်သိုဒေါ့ အသင်းတော်၏ အထင်ရှားဆုံး ကျောင်းတော်များ ဆက်လက် တည်ရှိ နေ ဆဲလည်း ဖြစ်သည်။ 

နှစ်နိုင်ငံကြား တင်းမာမှုများသည် ပြီးခဲ့သည့်လတွင် ပိုမိုဆိုးရွားလာခဲ့သည်။ 

ကိုဆိုဗို လုံခြုံရေးတစ်ဦးကိုတွေ့ရစဉ်

ဒေသတွင်း ရွေးကောက်ပွဲတစ်ခု ကျင်းပခဲ့ပြီးနောက် အယ်လ်ဘေးနီးယား မြို့တော်ဝင်များကို တင်မြှောက်ရန် ကိုဆိုဗို မြောက်ပိုင်းရှိ မြူနီစီပယ် အဆောက်အဦတစ်ခုကို ကိုဆိုဗိုရဲတပ်ဖွဲ့က သိမ်းပိုက်ခဲ့ပြီးနောက်တွင် ဖြစ်သည်။

ထိုဒေသတွင် ဆာ့ဘ်လူမျိုး အများစုနေထိုင်ကာ ယင်းတို့သည် ရွေးကောက်ပွဲကိုလည်း အကြီးအကျယ် သပိတ် မှောက်ခဲ့ကြသည်။ 

ဆားဘီးယားသည် နယ်စပ်ရှိ ၎င်းတို့၏ တပ်ဖွဲ့များကို အမြင့်ဆုံး အဆင့် တပ်လှန့်မှု လုပ်ဆောင်ထားသည်။ 

ကိုဆိုဗို ဆာ့ဘ်လူမျိုးများနှင့် ကိုဆိုဗိုရဲတပ်ဖွဲ့၊ နေတိုး ဦးဆောင်သည့် ငြိမ်းချမ်းမှု ထိန်းသိမ်းရေး တပ်ဖွဲ့များအကြား ပဋိပက္ခများ ဖြစ်ပွားခဲ့ပြီးနောက်တွင် ထိုသို့ လုပ်ဆောင်ခဲ့ခြင်း ဖြစ်သည်။

နေတိုးအဖွဲ့သည် မကြာသေးခင်ကလည်း တပ်ဖွဲ့များကို အင်အား ဖြည့်တင်းမှု လုပ်ဆောင်ခဲ့သည်ဟု သိရသည်။

Source:  Aljazeera

CNI International News

ဘန်ကောက်၊ ဇွန်လ ၂၃

ပါတီသည် ညွန့်ပေါင်းမဟာမိတ်များထက် ပါတီဝင်များ၏ အမြင်ကို ပို၍ အလေးထားကြောင်းနှင့် ဖြူးထိုင်း(Pheu Thai)ပါတီဝင် အများစုသည် လွှတ်တော်ဥက္ကဋ္ဌ ရာထူးကို ရယူလိုနေကြောင်း ဖြူးထိုင်းပါတီခေါင်းဆောင်က ပြော သည်။  

သို့သော် ဖြူးထိုင်းအနေဖြင့် မည်သည့်ပါတီသည် ထိုရာထူးကို ရယူသင့်သည်ဟူသည့် ပါတီ၏ တရားဝင် ရပ်တည် ချက်ကို မချမှတ်ရသေးဟုလည်း ပါတီခေါင်းဆောင် ချိုနန် သီရိကော (Cholnan Srikaew) က ပြောသည်။

ဖြူးထိုင်းပါတီသည် ရွေးကောက်ပွဲတွင် လွှတ်တော်အတွင်း နေရာ ၁၄၁ နေရာ အနိုင်ရရှိခဲ့ပြီး ရွေးကောက်ပွဲ အနိုင် ရရှိခဲ့သည့် Move Forward ပါတီက နေရာ ၁၅၁ နေရာ အနိုင်ရသည်။ 

တခြားသော ညွန့်ပေါင်းပါတီ ခြောက်ခုပေါင်းသည် နေရာ ၂၂ နေရာသာ ရှိသည်။ 

ဖြူးထိုင်းနဲ့ Move Forward ပါတီခေါင်းဆောင် ၂ ဦးကိုတွေ့ရစဉ်

လွှတ်တော်ဥက္ကဋ္ဌ ရာထူးသည် ဖြူးထိုင်းပါတီ အတွက်သာဖြစ်သည်ဟု ပါတီဝင် အများစုက ယူဆထားကြောင်း  ချိုနန်က ပြောသည်။ 

ဖြူးထိုင်းသည် တခြားသော ပါတီများ၏ သဘောဆန္ဒကို အလေးထားကြောင်း၊ နံပါတ်တစ် ဦးစားပေးမှာ အာဏာ လွှဲပြောင်းပေးမည့် သူများဖြစ်ကြောင်း၊ နံပါတ်နှစ်မှာ ပါတီဝင်များနှင့် ပါတီ၏ ရွေးကောက်ခံ ကိုယ်စားလှယ်များ ဖြစ်ကြောင်း၊ နောက်ဆုံးတစ်ခုမှာ ညွန့်ပေါင်းပါတီများ ဖြစ်သည်ဟုလည်း ချိုနန်က ပြောသည်။ 

လက်ရှိအချိန်အထိ ပါတီဝင်များနှင့် ပါတီ၏ အမတ်များသည် လွှတ်တော်ဥက္ကဋ္ဌ ရာထူးနှင့်ပတ်သက်၍ ယတိပြတ် မဆုံးဖြတ်ရသေးကြောင်း၊ ပါတီအနေဖြင့်လည်း ထိုကိစ္စ ထိန်းချုပ်၍ မရတော့သော အခြေအနေသို့ ရောက်ရှိသွား ခြင်းကို တားဆီးရန် ပြင်းပြင်းထန်ထန် ကြိုးပမ်းလျက်ရှိကြောင်းလည်း ၎င်းက ပြောသည်။

ပါတီဝင်များအနေဖြင့် ပါတီစာရင်းဝင် လွှတ်တော်အမတ် ဆူချက်တန်ချာရွန် (Suchart Tancharoen)အား ဥက္ကဋ္ဌ အဖြစ် အဆိုပြုနိုင်ဖွယ် ရှိပါသလားဟု မေးမြန်းခဲ့ရာတွင် ပါတီဝင်များ အနေဖြင့် အဆိုပြုရန် အခွင့်အရေး ရှိသည် ဟု ချိုနန်က ဖြေကြားသည်။ 

ဆူချက်သည် ၂၀၁၉ ရွေးကောက်ပွဲ ပြီးချိန်တွင် လွှတ်တော်ဒုဥက္ကဋ္ဌအဖြစ် ဆောင်ရွက်ခဲ့ဖူးသည့် အတွေ့အကြုံရှိသူ ဖြစ်သည်။ 

Prachachat ပါတီခေါင်းဆောင် ဝမ်မူဟာမက်နော်မာသာ ကိုတွေ့ရစဉ်

ထို့အပြင် ချိုနန်သည် ညွန့်ပေါင်းမဟာမိတ် Prachachat ပါတီခေါင်းဆောင် ဝမ်မူဟာမက်နော်မာသာ (Wan Muhammad Nor Matha) ၏ ၎င်းတို့ပါတီအား လွှတ်တော်ဒုဥက္ကဋ္ဌ နေရာပေးရေး အဆိုပြုချက်ကိုလည်း ပယ်ချ သည်။ 

လက်ရှိ ညွန့်ပေါင်းပါတီ ရှစ်ခုအနေဖြင့် လွှတ်တော်ဥက္ကဋ္ဌ ရာထူးကိစ္စကို မဖြေရှင်နိုင်ချင်း အစိုးရဖွဲ့စည်းနိုင်လိမ့် မည် မဟုတ်ဟုလည်း ဝမ်နော်နှင့် Thai Sang Thai ပါတီဥက္ကဋ္ဌတို့က သတိပေးခဲ့ဖူးသည်။ 

သို့သော် ညွန့်ပေါင်းအဖွဲ့သည် ထိုသို့ အခြေအနေမျိုးနှင့် ရင်ဆိုင်ရလိမ့်မည်ဟု မထင်ကြောင်း၊ ဖြူးထိုင်းပါတီနှင့် Move Forward ပါတီတို့သည် ဥက္ကဋ္ဌ ရွေးချယ်ရေး လွှတ်တော်၏ ပထမဆုံး အစည်းအဝေး မတိုင်ခင် ထိုကိစ္စကို ဖြေရှင်းသွားမည်ဖြစ်ကြောင်းလည်း ချိုနန်က ပြောသည်။ 

အစည်းအဝေးကို ဇူလိုင် ၆ ရက်နေ့တွင် ကျင်းပမည်ဟုလည်း ယူဆရသည်။ 

Source: ဘန်ကောက်ပို့စ်

CNI International News

ဘေဂျင်း၊ ဇွန်လ ၂၂

တရုတ်သမ္မတရှီကျင့်ဖျင် (Xi Jinping) အား အာဏာရှင်တစ်ဦးအဖြစ် ခိုင်းနှိုင်းပြောဆိုခဲ့သည့် အမေရိကန်သမ္မတ ဂျိုးဘိုင်ဒန် (Joe Biden) အား တရုတ်ဘက်က ဗုဒ္ဓဟူးနေ့တွင် တုန့်ပြန်ပြောဆိုခဲ့သည်ဟု ရိုက်တာသတင်းတွင် ဖော်ပြသည်။ 

ထိုသို့ ခိုင်နှိုင်းမှုသည် အဓိပ္ပါယ်မရှိကြောင်း၊ ရန်စမှုပင်ဖြစ်ကြောင်း တရုတ်ဘက်က ပြောသည်။ နှစ်နိုင်ငံအကြား တင်းမာမှုများ လျော့ချရေး နှစ်ဖက်စလုံးက ကြိုးပမ်းနေချိန်တွင် ယခုကဲ့သို့ ဖြစ်ပွားခဲ့ခြင်း ဖြစ်သည်။ 

ဘိုင်ဒန်၏ ပြောစကားသည် နှစ်နိုင်ငံဆက်ဆံရေးကို တည်ငြိမ်စေရန် အမေရိကန်နိုင်ငံခြားရေးဝန်ကြီး  အန်တိုနီ ဘလင်ကင် (Antony Blinken) ၏ တရုတ်ခရီးစဉ်ပြီးနောက် ရက်ပိုင်းအကြာတွင် ပေါ်ပေါက်ခဲ့ခြင်းဖြစ်သည်။ နှစ်နိုင်ငံဆက်ဆံရေးသည် တရားဝင်ဆက်ဆံရေးကို စတင်ခဲ့ပြီးနောက်ပိုင်း အဆိုးရွားဆုံးအခြေအနေသို့ ရောက်ရှိ နေသည်ဟုလည်း တရုတ်ဘက်က သတ်မှတ်ထားသည်။

ကယ်လီဖိုးနီးယားရှိ ရံပုံငွေပွဲတစ်ခုသို့ တက်ရောက်ခဲ့ရာတွင် ဘိုင်ဒန်က ယခုနှစ်အစပိုင်းတွင် တရုတ် ထောက်လှမ်းရေးဟု ယူဆရသည့် မိုးပျံပူဖောင်းတစ်ခုလမ်းကြောင်းပြောင်းကာ အမေရိကန်လေပိုင်နက်ထဲသို့ ရောက်ရှိလာခြင်းကို ရှီက အလွန်အမင်း ရှက်ရွံ့နေသည်ဟု ပြောသည်။ ယင်းမတိုင်ခင် တနင်္လာနေ့တွင် ဘလင်ကင်က ထိုအကြောင်းအရာကို မေ့ပစ်သင့်ပြီဟု ပြောခဲ့ဖူးသည်။ 

အမေရိကန်လေပိုင်နက်အတွင်းသို့ ရောက်ရှိလာသည့် သံသယရှိဖွယ် တရုတ်သူလျှိုမီးပုံးပျံ(ဓါတ်ပုံ-အေပီ)

ကားနှစ်စီးစာ ထောက်လှမ်းရေးပစ္စည်းများနှင့် မိုးပျံပူဖောင်းအား အမေရိကန်ဘက်က ပစ်ချလိုက်ခြင်းအပေါ် ရှီကျင့်ဖျင်အနေဖြင့် အလွန်အမင်းစိတ်ပျက်ခဲ့ရသည်မှာ ထိုကိစ္စကို ၎င်းသိရှိထားခြင်း မရှိသောကြောင့် ဖြစ်သည်ဟု ဘိုင်ဒန်က ပြောသည်။ 

ဘာတွေဖြစ်နေသည်လဲ မသိရှိထားခြင်းက အာဏာရှင်များအတွက် အရှက်ကွဲစရာပင်ဖြစ်ကြောင်း၊ ပူဖောင်းသည် လမ်းကြောင်းအမှန်အတိုင်းမသွားဘဲ လမ်းကြောင်းပြောင်းလဲဝင်ရောက်လာခဲ့ကြောင်း ဘိုင်ဒန်က ပြောသည်။ ရှီသည် မော်စီတုန်း (Mao Zedong) နောက်ပိုင်း အင်အားအကြီးဆုံး တရုတ်ခေါင်းဆောင်တစ်ဦးဖြစ်ကာ တရုတ် သည် စီးပွားရေးဆိုင်ရာ အခက်အခဲများနှင့် ရင်ဆိုင်နေရသည်ဟုလည်း ဘိုင်ဒန်က ပြောသည်။ 

ဘိုင်ဒန်၏ ပြောစကားသည် အခြေအမြစ်မရှိသောတာဝန်မဲ့မှုဖြစ်သည်ဟု တရုတ်နိုင်ငံခြားရေးဌာန ပြောခွင့်ရ ပုဂ္ဂိုလ်တစ်ဦးက တုန့်ပြန်သည်။ အဆိုပါ ပြောစကားနှင့်ပတ်သက်၍ တရုတ်နိုင်ငံ၏ မကျေနပ်မှုကို ဖော်ပြရာတွင် နိုင်ငံခြားရေးဌာန ပြောခွင့်ရပုဂ္ဂိုလ် နောင်နင် (Mao Ning) က ဘိုင်ဒန်၏ ပြောစကားသည် အခြေအနေအမှန်၊ သံရေးတမန်ရေးနည်းလမ်းများနှင့် တရုတ်၏နိုင်ငံရေးဆိုင်ရာ ဂုဏ်သိက္ခာတို့ကို ပြင်းပြင်းထန်ထန် ချိုးဖောက်ခြင်း ဖြစ်သည်ဟု ပြောသည်။

ယင်းသည် နိုင်ငံရေးအရ ရန်စမှုဟုလည်း သူမက ယူဆသည်။ မိုးပျံပူဖောင်းကိစ္စနှင့်ပတ်သက်၍ ရှီကမည်မျှ သတိပြုမိခဲ့သလဲဟု မေးမြန်းရာတွင် နောင်က တရုတ်တို့၏ ယခင်က ရှင်းလင်းပြောဆိုခဲ့မှုအတိုင်း ပူဖောင်းသည် အမေရိကန် လေပိုင်နက်အတွင်းသို့ ဝင်ရောက်ရန် ရည်ရွယ်ချက်မရှိကြောင်း၊ ယင်းသည် မထိန်းချုပ်နိုင်သည့် အခြေအနေများကြောင့် ဖြစ်ပွားခဲ့ရခြင်းဖြစ်ကြောင်း ပြောသည်။ ဘိုင်ဒန်သည် စကားကို လက်လွတ်စပယ် ပြောဆိုခဲ့သည်ဟုလည်း ရှန်ဟိုင်း၊ ဖူဒန်တက္ကသိုလ် အမေရိကန်လေ့လာရေးစင်တာမှ ဒါရိုက်တာက ပြောသည်။ 

ဘိုင်ဒန်၏ ပြောစကားသည် အပျက်သဘောဆောင်ကာ၊ ပျက်စီးဆုံးရှုံးမှုများကိုဖြစ်စေသည်ဟုလည်း ၎င်းက ပြောသည်။ 

Source:Reuters

CNI International News

ဘန်ကောက်၊ ဇွန်လ ၂၂

အာဆီယံဦးဆောင်သည့် မြန်မာပဋိပက္ခ ဖြေရှင်းရေး လုပ်ငန်းစဉ်အပေါ် ၎င်း၏ ထောက်ခံမှုနှင့် ပတ်သက်၍ Move Forward ပါတီခေါင်းဆောင် ပီတာလင်ဂျာရိုရတ်ရတ် (Pita Limjaroenrat) က ပြောကြားခဲ့သည်ဟု Thai PBS သတင်းတွင် ဖော်ပြထားသည်။ 

ယင်းက ပြည်တွင်း၊ ပြည်ပမှ ဝေဖန်မှုများနှင့် ရင်ဆိုင်နေရသည့် လက်ရှိအစိုးရ၏ ငြိမ်းချမ်းရေး လုပ်ငန်းစဉ်နှင့် ခပ်ခွာခွာ နေထိုင်ရေး ကြိုးပမ်းမှုတစ်ခုလည်း ဖြစ်သည်။ 

မြန်မာ့အရေးနှင့်ပတ်သက်၍ ဘက်ပေါင်းစုံပါဝင်သော ကြိုးပမ်းမှုများကို ချမှတ်ရေး၊ အဖြေရှာရေးတို့အတွက် ဝန်ကြီးချုပ်ရုံးတွင် အဖွဲ့အစည်းတစ်ခု ဖွဲ့စည်းသွားမည်ဟုလည်း ပီတာက ကတိပြုသည်။

ပီတာသည် ညွန့်ပေါင်းအစိုးရ တစ်ရပ်ကို ဖွဲ့စည်းရန် ကြိုးပမ်းလျက်ရှိရာ ၎င်းက ဝန်ကြီးချုပ်အဖြစ် ဆောင်ရွက် သွားမည် ဖြစ်သည်။ 

ပီတာသည် ပရာယွတ်အစိုးရ၏ မြန်မာနိုင်ငံဆိုင်ရာ မူဝါဒကို ဒဲ့ထိုးဝေဖန်ခဲ့သူဖြစ်သည်။ ပရာယွတ်အစိုးရသည် နစကဘက်သို့ ယိမ်းလွန်းသည်ဟု ၎င်းက ရှုမြင်ထားသည်။

ထိုင်းဒု၀န်ကြီးချုပ်နဲ့ နိုင်ငံခြားရေး၀န်ကြီး ဗိုလ်ချုပ်မှူးကြီးမင်းအောင်လှိုင်နဲ့တွေ့ဆုံစဉ်
 

ပရာယွတ် အစိုးရသည် မြန်မာပဋိပက္ခ ဖြေရှင်းရေး အစိတ်အပိုင်း တစ်ခုအဖြစ် ဇွန်လ ၁၉ ရက်နေ့က ဆွေးနွေးပွဲ တစ်ရပ်ကို ဦးဆောင်ကျင်းပခဲ့သည်။ ထို့နောက် ဝေဖန်မှု တချို့ကိုလည်း ကြုံတွေ့ခဲ့ရသည်။ 

ထိုအစည်းအဝေးသို့ မြန်မာ့နိုင်ငံခြားရေးဝန်ကြီးကိုပါ ဖိတ်ကြားခဲ့သော်လည်း အာဆီယံအလှည့်ကျဥက္ကဋ္ဌ အင်ဒိုနီး ရှား အပါအဝင် အဖွဲ့ဝင်နိုင်ငံသုံးခုက သပိတ်မှောက်ခဲ့သည်။

ထိုင်းအစိုးရသည် နစကဘက်သို့ ယိမ်းလွန်းနေသည်ဟု ဝေဖန်သူများက စွပ်စွဲထားသော်လည်း ထိုင်းနိုင်ငံခြားရေး ဝန်ကြီးက မြန်မာအရေးသည် ထိုင်းနိုင်ငံသို့ တိုက်ရိုက် သက်ရောက်မှု ရှိသည့်အတွက် ထိုပြဿနာကို ဖြေရှင်းရေး ဆွေးနွေးပွဲများ ကျင်းပခြင်းသည် မဖြစ်မနေ အရေးပါသည်ဟု တုံ့ပြန်ခဲ့သည်။

၂၀၂၁ ခုနှစ်၊ ဧပြီ ၂၄ ရက်နေ့က အာဆီယံ ဘုံသဘောတူညီချက် ၅ ချက်အတွင်း ချမှတ်ထားသည့် ရည်ရွယ်ချက်၊ ရည်မှန်းချက်များ ပြည့်မှီရေး အမြင်ဖြင့် အာဆီယံ၏ မူဘောင်းအတွင်း ပြုလုပ်သော လုပ်ရပ်တိုင်းကို ထောက်ခံ ကြောင်း ထပ်လောင်း ပြောကြားလိုသည်ဟု ပီတာက ဖေ့စ်ဘွတ်ခ်တွင် ဖော်ပြခဲ့သည့် ကြေညာချက် တစ်ခု၌ ပြောသည်။ 

 ၂၀၂၂ ခုနှစ်က ထိုင်း-အင်ဒို- မြန်မာ နိုင်ငံခြားရေး၀န်ကြီးများ တွေ့ဆုံစဉ် 

Move Forward ပါတီနှင့် ယင်း၏ နိုင်ငံရေး မဟာမိတ်များသည်လည်း မြန်မာပဋိပက္ခ အဖြေရှာရေးတွင် ပါဝင်သည့် အဖွဲ့အစည်းအားလုံးနှင့် ပူးပေါင်း ဆောင်ရွက်သွားမည်ဟုလည်း ပီတာက ပြောသည်။ 

အဆုံးသတ် အဖြေရှာရေးအတွက် ထိတွေ့ဆက်ဆံမှုက မဖြစ်မနေ အရေးပါသည်ဟု အခိုင်အမာ ယုံကြည် ကြောင်း၊ ထိတွေ့ဆက်ဆံမှုဆိုင်ရာ ဗျူဟာတိုင်းသည် အလွှာပေါင်းစုံမှ အားလုံး ပါဝင်ရမည်ဖြစ်ကြောင်း၊ အာဆီ ယံ အဖွဲ့၏ မူဘောင်အတွင်း သဘောတူညီထားသည့် ရည်ရွယ်ချက်၊ ရည်မှန်းချက်များနှင့်အညီ မြန်မာနိုင်ငံ၏ တည်ငြိမ်ရေးအတွက် သင့်တော်သော သက်ရောက်မှု ရှိရမည်ဟုလည်း ပီတာက ပြောသည်။ 

မြန်မာနိုင်ငံမှ လူသားချင်း စာနာမှုဆိုင်ရာ အခက်အခဲများကို ဖြေရှင်းရေးအတွက် မဟာဗျူဟာတစ်ခု လိုအပ် နေခြင်းကို ပီတာက အလေးအနက်ထား ပြောဆိုခဲ့သလို ခွဲခြားခြင်းမရှိဘဲ အကူအညီများ ပေးပို့နိုင်သည်ကို သေချာစေရေး ဆောင်ရွက်သင့်သည်ဟုလည်း ပြောသည်။ 

Source: Thai PBS