CNI International News

ပဲရစ်၊ ဧပြီ ၂၅

နာမည်ကျော် ဟင်းလျာများဖြင့် ထင်ရှားသော ပြင်သစ်နိုင်ငံတွင် ပြည်သူများသည် မီးခိုးချောင်သုံး အိုးခွက်များကို အသုံးပြုကာ အစိုးရ၏ ပင်စင်ပြုပြင်ပြောင်းလဲရေး အစီအစဉ်ကို ဆန့်ကျင် ကန့်ကွက်လျက် ရှိသည်ဟု အေပီ သတင်းတွင် ဖော်ပြထားသည်။

ပင်စင်ယူရမည့် အသက်အရွယ်ကို အသက် ၆၂ နှစ်မှ ၆၄ နှစ်အထိ မြှင့်တင်လိုက်ခြင်းအပေါ် ပြင်သစ်နိုင်ငံသားများ က ကန့်ကွက်လျက်ရှိသည်။

ထိုသို့ ကန့်ကွက်ရာတွင် ကျောက်တုံးများဖြင့် ပစ်ပေါက်ခြင်း၊ မျက်ရည်ယို ဗုံးများသုံးခြင်း၊ စာတန်းများ ဝှေ့ယမ်း ခြင်းမှသည် အိုးခွက်များကို တီးခတ်ထုရိုက်ကာ ဆူညံသံပြုလုပ် ဆန္ဒပြခြင်းသို့ ပြောင်းလဲလာခဲ့ပြီ ဖြစ်သည်။

အိုးခွက်များကို ထုရိုက်ခြင်းဖြင့် ဆန္ဒပြမှုကို သမ္မတ မက်ခရွန် (Macron) ၏ ပြီးခဲ့သည့် သီတင်းပတ် ရုပ်သံမိန့်ခွန်း တွင် စတင်လုပ်ဆောင်ခဲ့သည်။

ပြင်သစ် သမ္မတ မက်ခရွန်ကိုတွေ့ရစဉ်

ပဲရစ်၊ မာဆေးလ်၊ တူးလော့စ်၊ စတာဘော့ဂျ် အပါအဝင် ပြင်သစ်နိုင်ငံရှိ မြို့ကြီးများမှ နေရာ ၄၀၀ ကျော်တွင် အိုးခွက်ပန်းကန်များကို တီးခေါက်ခြင်းဖြင့် ဆူညံသံပြုလုပ်ကာ မက်ခရွန်၏ အသံကို ဖုံးလွှမ်းသွားရန် ကြိုးပမ်း ခဲ့ကြသည်။

အရင်းရှင်ဝါဒ ဆန့်ကျင်ရေးအဖွဲ့ (ATTAC) ၏ တောင်းဆိုချက်ကြောင့် တနင်္လာနေ့ ညနေပိုင်းတွင်လည်း ပြင်သစ် နိုင်ငံတစ်လွှား ထိုသို့ ဆန္ဒပြမှုများ လုပ်ဆောင်ခဲ့သေးသည်။

မြောက်ဘက် လိုင်လီမှ အရှေ့တောင်ဘက် လိုင်ယွန် သို့မဟုတ် အနောက်ဘက် ဘာယွန်းမြို့တို့အထိ အစိုးရ အပေါ် မကျေနပ်သော ပြည်သူများသည် မီးဖိုချောင်သုံး ပစ္စည်းများဖြင့် ၎င်းတို့၏ ကန့်ကွက်မှုကို ထုတ်ဖော် ခဲ့ကြသည်။

ထိုကန့်ကွက်မှု မတိုင်ခင် အစောပိုင်း နေ့များတွင်လည်း အစိုးရအဖွဲ့ ဝန်ကြီးများအား ကန့်ကွက်ဆန္ဒပြရန် အိုးများ နှင့်ခွက်များကို အသုံးပြုခဲ့ကြသေးသည်။

ထိုသို့ ဆန္ဒပြနေမှုနှင့် ပတ်သက်၍ ပြင်သစ်သမ္မတက ပြင်သစ်နိုင်ငံကို ရှေ့သို့ ခေါ်ဆောင်သွားမည်မှာ မီးဖိုချောင် သုံး ပစ္စည်းများမဟုတ်ဟု တုံ့ပြန်ပြောဆိုခဲ့သည်။

ပြင်သစ်ပြည်သူများ ဆန္ဒပြနေကြစဉ်

ထိုပြောဆိုမှုကိုလည်း ပြည်သူများဘက်က ပြန်လည် တုံ့ပြန်ခဲ့ကာ ပြင်သစ် မီးဖိုချောင်သုံး ပစ္စည်း ထုတ်လုပ်ရေး လုပ်ငန်းတစ်ခုဖြစ်သော Cristel က ပြင်သစ်နိုင်ငံကြီး ရှေ့သို့ ရောက်ရှိစေရန် စတိန်းလက်စ်စတီး ဒယ်အိုးများကို ထုတ်လုပ်နေသည်ဟု တွစ်တာတွင် ရေးသားခဲ့သည်။

ယခုကဲ့သို့သော ဆူညံသံဖြင့် ဆန္ဒပြမှုသည် ထူးဆန်းသည်ဟု ယူဆရသော်လည်း ပြင်သစ်တွင် လွန်ခဲ့သော နှစ် ရာချီ ကတည်းက ထိုသို့သော နည်းလမ်းဖြင့် ကန့်ကွက်ဆန္ဒပြသည့် အလေ့အထ ရှိခဲ့ဖူးသည်။

ပြင်သစ်ပြည်သူများသည် ထူးခြားသော နည်းလမ်းများဖြင့် ပင်စင်ကိစ္စ ပြုပြင်ပြောင်းလဲမှုများကို ကန့်ကွက် ဆန္ဒပြ မှုများဖြင့် အာရုံစိုက်မှုကို ရရှိထားခဲ့ပြီး ဖြစ်သည်။

ပြီးခဲ့သည့် သီတင်းပတ် စွမ်းအင်လုပ်သားများ၏ သပိတ်မှောက်မှုတွင် မသုံးတော့သော ဂတ်စ်အိုးများနှင့် လျှပ်စစ် မီတာများကို မာဆေးလ်မြို့ အုပ်ချုပ်ရေးရုံး အပြင်ဘက်သို့ စုပုံထားခဲ့ပြီး ပဲရစ်မြို့ရှိ အနုပညာရှင် တစ်ဦးကလည်း မသိမ်းရသေးသော အမှိုက်များဖြင့် ရုပ်ထုပြုလုပ် ဆန္ဒပြခဲ့သည်။

Source: AP

CNI International News

လူဇင်ဘတ်၊ ဧပြီ ၂၅

တရုတ်အစိုးရသည် ဆိုဗီယက်နိုင်ငံဟောင်းများအား အချုပ်အခြာပိုင် နိုင်ငံများအဖြစ် လေးစားမှုရှိကြောင်း တရုတ်နိုင်ငံခြားရေးဌာနက တနင်္လာနေ့တွင် ထုတ်ဖော် ပြောကြားခဲ့သည်ဟု Reuters သတင်းတွင် ဖော်ပြ ထားသည်။

ပြင်သစ်နိုင်ငံဆိုင်ရာ တရုတ်သံတမန်၏ ပြောစကားတစ်ခုကြောင့် ဥရောပနိုင်ငံများမှ ဝေဖန်မှုများ ရှိလာချိန်တွင် တရုတ်နိုင်ငံခြားရေးဌာနက ယခုကဲ့သို့ ထုတ်ဖော်ရှ င်းလင်းခဲ့ခြင်း ဖြစ်သည်။

တရုတ်သံတမန် လူရှေး (Lu Shaye) က ယူကရိန်းနှင့် တခြားသော ဆိုဗီယက်နိုင်ငံဟောင်းများ၏ အချုပ်အခြာ အာဏာနှင့် ပတ်သက်၍ မေးခွန်းထုတ်ခဲ့သည်။

ထို ပြောစကားနှင့် ပတ်သက်ပြီး ဥရောပသမဂ္ဂ နိုင်ငံခြားရေးဝန်ကြီး တချို့က ယင်းကို လက်မခံနိုင်ကြောင်း ပြောကာ တရုတ်အစိုးရအား ၎င်းတို့၏ ရပ်တည်ချက်နှင့် ပတ်သက်၍ ရှင်းလင်းရန် တောင်းဆိုခဲ့သည်။

လူ၏ ပြောစကားက တရုတ်နိုင်ငံ၏ တရားဝင် ရပ်တည်ချက်အပေါ် ကိုယ်စားပြုခြင်း ရှိ/မရှိ နှင့်ပတ်သက်၍ မေးမြန်းခဲ့ရာတွင် နိုင်ငံခြားရေးဌာန ပြောခွင့်ရပုဂ္ဂိုလ် မောင်းနင် (Mao Ning)က အစိုးရအနေဖြင့် ဆိုဗီယက် ပြည်ထောင်စုကြီး ပြိုကွဲခဲ့ပြီးနောက် ပေါ်ပေါက်လာသည့် နိုင်ငံများ၏ အချုပ်အခြာ အာဏာကို လေးစားမှုရှိ သည်ဟု ပြန်လည် ဖြေကြားခဲ့သည်။

ပြင်သစ်နိုင်ငံဆိုင်ရာ တရုတ်သံအမတ် လူရှေးကိုတွေ့ရစဉ်

ထိုစကားသည် တရုတ်အစိုးရ၏ ရပ်တည်ချက် ဖြစ်ကြောင်းလည်း သူမက ပြောသည်။

သံအမတ်၏ ပြောစကားနှင့် ပတ်သက်၍ ပဲရစ်ရှိ တရုတ်သံရုံးကလည်း တနင်္လာနေ့ နှောင်းပိုင်းတွင် ကြေညာချက် တစ်စောင် ထုတ်ပြန်ခဲ့ပြီး ယူကရိန်းနှင့် ပတ်သက်သည့် လူ၏ ပြောစကားသည် နိုင်ငံရေးကြေညာချက် မဟုတ် ကြောင်း၊ သူ၏ ကိုယ်ပိုင် အမြင်သာဖြစ်ကြောင်း ပြန်လည်ဖြေရှင်းခဲ့သည်။

သို့သော် ဝေဖန်မှုများ ပေါ်ပေါက်လာချိန်မှ ထွက်ပေါ်လာသော ထုတ်ပြန်ချက် နှစ်ခုစလုံးသည် အီးယူနှင့် တင်းမာမှု များ လျှော့ချရန် ကြိုးပမ်းမှု ဖြစ်နိုင်သည်။

တရုတ်အစိုးရ၏ ထုတ်ပြန် ရှင်းလင်းချက်ကို မှတ်သားထားကြောင်း၊ တာဝန်ရှိသူများက လူနှင့် တနင်္လာနေ့တွင် တွေ့ဆုံကာ ၎င်း၏ပြောစကားသည် လက်ခံနိုင်စရာ မရှိကြောင်း၊ တရုတ်အစိုးရ၏ တရားဝင် ရပ်တည်မှုနှင့်အညီ ပြောဆိုရန် ၎င်းကို တိုက်တွန်းခဲ့ကြောင်း ပြင်သစ်နိုင်ငံခြားရေးဌာနက ထုတ်ပြန်သည်။

တရုတ်နိုင်ငံခြားရေး၀န်ကြီးဌာန ပြောခွင့်ရ မောင်းနင်ကိုတွေ့ရစဉ်

ဝေဖန်ခံနေရသည့် စကားကို ပြောခဲ့သော လူသည် ၎င်း၏ တင်းမာသော သဘောထား ရပ်တည်ချက်ကြောင့် တရုတ်၏ wolf warrior သံတမန်များမှ တစ်ဦးအဖြစ် သတ်မှတ်ခံထားရသူ ဖြစ်သည်။

ခရိုင်းမီးယားသည် ယူကရိန်းပိုင် ဟုတ်/မဟုတ်နှင့် ပတ်သက်သည့် ၎င်း၏ အမြင်ကို မေးမြန်းခဲ့ရာတွင် လူက ခရိုင်းမီးယားသည် သမိုင်းကြောင်းအရ ရုရှား၏ အစိတ်အပိုင်း တစ်ခုဖြစ်ကြောင်း၊ ယင်းကို ဆိုဗီယက် ခေါင်းဆောင် ဟောင်း နီကီတာ ခရုရှက်ဗ် (Nikita Khrushchev)က ယူကရိန်းသို့ ပေးခဲ့ခြင်းဖြစ်ကြောင်း ပြန်လည် ဖြေကြားခဲ့ သည်။

ပြင်သစ် ရုပ်သံမှ ထုတ်လွှင့်ခဲ့သော အင်တာဗျူး အစီအစဉ်တွင် လူက အချုပ်အခြာပိုင် နိုင်ငံများအဖြစ် သတ်မှတ် သည့် တရားဝင် နိုင်ငံတကာ သဘောတူညီချက် မရှိခြင်းကြောင့် ဆိုဗီယက်နိုင်ငံဟောင်းများသည် နိုင်ငံတကာ ဥပဒေအရ အချုပ်အခြာပိုင် နိုင်ငံဆိုသည့် အခြေအနေကို ပိုင်ဆိုင်ထားခြင်း မရှိဟု ပြန်လည် ဖြေကြားခဲ့သည်။

Source: Reuters

CNI International News

ခါတွမ်၊ ဧပြီ ၂၅

ဆူဒန်နိုင်ငံအတွင်း ဖြစ်ပွားနေသော စစ်ပွဲကြောင့် ဆူဒန်နိုင်ငံသားများ ထွက်ပြေးရန် ရုန်းကန်နေရချိန်မှာပဲ နိုင်ငံခြားအစိုးရများက ၎င်းတို့၏ သံဝန်ထမ်းများကို လေကြောင်းကနေ ကယ်ထုတ်သွားကြောင်း အေပီမှ ရေးသား ဖော်ပြခဲ့သည်။

နိုင်ငံခြားအစိုးရများသည် ဆူဒန်နိုင်ငံအတွင်းရှိ ၎င်းတို့၏ သံအမတ်များ၊ ဝန်ထမ်းများနှင့် တခြားသူများအား တနင်္ဂနွေနေ့တွင် ကယ်ထုတ်ခဲ့သည်။

ဆူဒန်ဗိုလ်ချုပ်ကြီး နှစ်ဦးကြားက တိုက်ပွဲများ ၉ ရက်မြောက်နေ့အထိ ရောက်ရှိလာသည့်တိုင် အပစ်အခတ်ရပ်စဲရေးအတွက် လမ်းစ မရှိချိန်တွင် ဖြစ်သည်။

အမေရိကန်နှင့် ဗြိတိန်တို့ကဲ့သို့ အင်အားကြီး နိုင်ငံများသည် ခါတွမ် (Khartoum)မြို့ရှိ ၎င်းတို့၏ သံဝန်ထမ်းများ ကို လေယာဉ်ဖြင့် ရွှေ့ပြောင်းပေးခဲ့သည်။

ဆူဒန်နိုင်ငံသားများစွာသည်လည်း နိုင်ငံတွင်းမှ ထွက်ခွာရန် အပြင်းအထန် ကြိုးစားလျက်ရှိသည်။

အများစုသည် အန္တရာယ်များသော လမ်းများကို ဖြတ်သန်းကာ မြောက်ဘက် နယ်စပ်ကို ဖြတ်ကျော်၍ အီဂျစ်သို့ ဝင်ရောက်ရန် ကြိုးပမ်းကြသည်။

ဆူဒန်စစ်တပ်နှင့် အင်အားကြီး RSF လက်နက်ကိုင်တပ်ဖွဲ့တို့အကြား တိုက်ပွဲများတွင် လူ ၄၂၀ ကျော် သေဆုံးခဲ့ရ ပြီးလည်း ဖြစ်သည်။

လက်ရှိ တိုက်ပွဲများသည် နိုင်ငံ၏ ပင်မနိုင်ငံတကာ လေဆိပ်မှ လုပ်ငန်းဆောင်ရွက်မှုများကို ထိခိုက်စေခဲ့ကာ အရပ်သား လေယာဉ်များ ပျက်စီးခြင်း၊ လေယာဉ်ပြေးလမ်း အနည်းဆုံးတစ်ခု ပျက်စီးခြင်းအပြင် လေယာဉ် ကွင်းတွင်လည်း မီးခိုးများက ဖုံးလွှမ်းများသည်။

ဆူဒန်နိုင်ငံသားများ တိုက်ပွဲများကို ရှောင်ဖို့ ထွက်ခွာနေကြစဉ်

တခြားသော လေဆိပ်များသည်လည်း လုပ်ငန်းဆောင်ရွက်၍ မရနိုင်သော အခြေအနေတွင် ရှိနေသည်။

အရပ်သားများကို ကာကွယ်ရေးနှင့် အီးယူ နိုင်ငံသားများကို ရွှေ့ပြောင်းပေးရေးတို့အတွက် တိုက်ပွဲများကို ချက်ချင်း ရပ်တန့်ရန် အီးယူနိုင်ငံခြားရေးမူဝါဒဆိုင်ရာ အကြီးအကဲက ဆူဒန် ဗိုလ်ချုပ်ကြီးများကို တိုက်တွန်း ပြောကြားခဲ့သည်။

တိုက်ပွဲများအတွင်း ဆူဒန်ခေါင်းဆောင်ဟောင်း အိုမာ အယ်လ်-ဘာရှားနှင့် တခြားသောအရာရှိများကို ထိန်းသိမ်း ထားရာ ထောင်ကို ထိန်းချုပ်နိုင်ခဲ့သည်ဟု ဆူဒန်စစ်တပ်ဘက်က ပြောသည်။

ထောင်သားတချို့ ထွက်ပြေးမှုရှိသော်လည်း ဘာရှားနှင့် ၎င်းလက်ထက် အရာရှိဟောင်းများကို လုံခြုံရေး တင်းကြပ်သော နေရာတွင် ထိန်းသိမ်းထားကြောင်း၊ ထောင်သားတချို့ ထိခိုက်သေဆုံးခြင်း ရှိကြောင်းလည်း ဆူဒန်စစ်တပ် အရာရှိတစ်ဦးက ပြောသည်။

ဆူဒန်စစ်တပ်သည် ဘာရှားနှင့် တခြားသော ထောင်သားများကို ထောင်မှ ဖယ်ရှားခဲ့သည်ဟု RSF ဘက်က ပြောသော်လည်း ယင်းကို သီးသန့် အတည်ပြုနိုင်ခြင်းတော့ မရှိသေးပေ။

အီဂျစ်နယ်စပ်အနီးရှိ အာကင်(Arqin)နယ်စပ် ဖြတ်ကျော်ရေးစခန်းတွင် အနည်းဆုံး လူ ၅၅ ဦး တင်ဆောင်လာ သော ခရီးသည်တင် ဘတ်စ်ကား ၃၀ ခန့်ရှိနေသည်။

ထိုနေရာသို့ ရောက်ရန်အတွက် ကုန်းလမ်းမှတဆင့် ၁၅ နာရီကြာ အသက်စွန့် လာခဲ့ရသည်ဟု အီဂျစ်ကျောင်းသား တစ်ဦးက ပြောသည်။

ဆူဒန်ကနေ ထွက်ဖို့ ရုန်းကန်နေရတဲ့ ဆူဒန်နိုင်ငံသားများကိုတွေ့ရစဉ်

ဆူဒန်တွင် အင်တာနက်နှင့် တယ်လီဖုန်း ဝန်ဆောင်မှုများသည် တနင်္ဂနွေနေ့ကတည်းက လုံးဝပျက်စီးလုနီးပါး အခြေအနေတွင် ရှိနေသည်ဟု စောင့်ကြည့်လေ့လာရေးအဖွဲ့တစ်ခုက ပြောသည်။

တိုက်ပွဲများအတွင်း အမေရိကန် အထူးတပ်ဖွဲ့ဝင်များသည် ဆူဒန်ရှိ သံရုံးဝန်ထမ်း ၇၀ နီးပါးကို လေယာဉ်များဖြင့် ကယ်ထုတ်ခဲ့သော်လည်း အမေရိကန်နိုင်ငံသား ထောင်ပေါင်းများစွာ ဆူဒန်နိုင်ငံတွင်း၌ ရှိနေဆဲ ဖြစ်သည်။

ဆူဒန်မှ ထွက်ခွာလာသည့် နိုင်ငံသားများအတွက် ထောက်ပံ့မှုများ လုပ်ဆောင်သွားမည်ဟု ပြင်သစ်နှင့် အီတလီတို့ က ပြောသည်။

ဆူဒန်ရှိ ဂျာမနီသံရုံးဝန်ထမ်း၊ မိသားစုများနှင့် မိတ်ဖက်နိုင်ငံသား ၁၀၁ ဦးကို တင်ဆောင်လာသည့် လေယာဉ် သည် ဂျော်ဒန်မှတဆင့် ဘာလင်သို့ ဘေးကင်းစွာ ရောက်ရှိလာခဲ့ကြောင်း ဂျာမနီအစိုးရက တနင်္လာနေ့ စောပိုင်း တွင် ပြောသည်။

နယ်သာလန်၊ ပြင်သစ်နှင့် အီတလီ အစိုးရများသည်လည်း ဆူဒန်နိုင်ငံတွင်းရှိ ၎င်းတို့ နိုင်ငံသားများနှင့် မိတ်ဖက် နိုင်ငံသားများအား အိမ်နီးချင်းနိုင်ငံများသို့ ပို့ဆောင်ပေးခြင်းဖြင့် ကယ်တင်မှု လုပ်ဆောင်ခဲ့ပြီး ဖြစ်သည်။

Source: AP

CNI International News

တဲလ်အဗစ်၊ ဧပြီ ၂၄

နေတန်ညာဟု၏ လက်ယာစွန်း အစိုးရနှင့် ယင်း၏ နိုင်ငံ့တရားစီရင်ရေးစနစ်ကို ပြင်ဆင်မည့် စီမံကိန်းအား အစ္စရေးပြည်သူ ထောင်ပေါင်းများစွာက တဲလ်အဗစ် (Tel Aviv) မြို့ အပါအဝင် နိုင်ငံတစ်ဝန်းလုံးရှိ မြို့များတွင် ကန့်ကွက် ချီတက် ဆန္ဒပြခဲ့ကြသည်ဟု Al Jazeera သတင်းက ဖော်ပြခဲ့သည်။

ဆန္ဒပြသူများသည် နေတန်ညာဟု မျက်နှာပေါ်တွင် “Crime Minister” ဟူသော စကားလုံးများ ရေးသားထား သည့် စာတန်းများကို ကိုင်ဆောင်ကာ တဲလ်အဗစ်မြို့၌ ဆန္ဒပြခဲ့ကြသည်။

ယင်းက ယခုနှစ် စတင်ချိန်ကတည်းက ပြုလုပ်လာသည့် အပတ်စဉ် ဆန္ဒပြပွဲများ၏ အစိတ်အပိုင်းလည်း ဖြစ်သည်။

ဗဟိုတရားရုံးချုပ်၏ လုပ်ပိုင်ခွင့်ကို လျှော့ချမည့် နေတန်ညာဟု အစိုးရ၏ စီမံကိန်းများအပေါ် အစ္စရေးပြည်သူများ က ဒေါသထွက်နေကြပြီး ယင်းတို့သည် နိုင်ငံ၏ မျှခြေထိန်းသိမ်းမှု စနစ်အပေါ် တိုက်ခိုက်ခြင်းဖြစ်ကာ ဒီမိုကရေးစီ အတွက် ခြိမ်းခြောက်မှုဟု လက်ခံထားသည်။

“Crime Minister” ဟူသော စကားလုံးများ ရေးသားထားစဉ်

ထိုကိစ္စသည် တရားဥပဒေရေးရာ ပြုပြင်ပြောင်းလဲမှု သက်သက် မဟုတ်ကြောင်း၊ ယင်းသည် ဒီမိုကရေစီစနစ် အတွက်ပါ ဖြစ်ကြောင်း တဲလ်အဗစ်မြို့လယ်တွင် ဆန္ဒပြနေသည့် ဂျူအမျိုးသမီးများ ကောင်စီ၏ ခေါင်းဆောင်က ပြောသည်။

ပြည်သူများ၏ အခွင့်အရေးကို ကာကွယ်ပေးရန် မြင့်မြတ်သော တရားရုံးများ အနေဖြင့် နိုင်ငံရေးနှင့် ပတ်သက် ဆက်နွယ်မှု မရှိရန် လိုအပ်သည်ဟုလည်း သူမက ဆက်လက် ပြောဆိုသည်။

ပြီးခဲ့သည့်လ ဆန္ဒပြပွဲများတွင် အစ္စရေးမြို့ကြီးများသည် ရပ်တန့်သွားသည့် အနေအထားသို့ ရောက်ရှိခဲ့ကာ စီးပွားရေး ပြိုလဲသွားမည့် အန္တရာယ်နှင့်လည်း ရင်ဆိုင်ခဲ့ရသောကြောင့် နေတန်ညာဟု အနေဖြင့် အပေးအယူ တစ်ခု ရှာဖွေရေးအတွက် တရားဥပဒေရေးရာ ပြုပြင်ပြောင်းလဲမှု စီမံကိန်းများကို ရွေ့ဆိုင်းခဲ့ရသည်။

သို့သော် ယင်းက ဆန္ဒပြပွဲများကို ရပ်တန့်သွားရန် မစွမ်းသာခဲ့ပေ။

နေတန်ညာဟုနဲ့ အစိုးရအဖွဲ့၀င် တစ်ဦးကိုတွေ့ရစဉ်

နေတန်ညာဟု ဘက်က နောက်ဆုတ် သွားပြီးချိန်တွင်ပင် လမ်းမများပေါ်ရှိ ဆန္ဒပြလူအုပ်ကြီးက ရှက်ဖို့ကောင်း သည်ဟု သံပြိုင်အော်ဟစ်ကာ ဥပဒေပြုပြင်ပြောင်းလဲရေး စီမံကိန်းများကို ဖျက်သိမ်းရန်ပါ တောင်းဆိုခဲ့ကြသည်။

နေတန်ညာဟုသည် အကျင့်ပျက် ခြစားမှု စွဲချက်ဖြင့် တရားရင်ဆိုင်နေရသူ ဖြစ်သည်။

ပြုပြင်ပြောင်းလဲရေး စီမံကိန်းကြောင့် ၎င်းနှင့် လက်ယာစွန်း ညွန့်ပေါင်းအစိုးရအတွင်းမှ မိတ်ဖက်များအနေဖြင့် နိုင်ငံ၏ တရားသူကြီးများ ခန့်အပ်ရေးအတွက် အဆုံးအဖြတ် ပေးခွင့် ရရှိမည် ဖြစ်သည်။

ထို့အပြင် စီမံကိန်းသည် နေတန်ညာဟု၏ မိတ်ဘက်များ ထိန်းချုပ်ထားသည့် လွှတ်တော်အား ဗဟိုတရားရုံးချုပ် ၏ ဆုံးဖြတ်ချက်များကို ပြောင်းလဲရန်၊ ဥပဒေများကို ပြန်လည် ဆန်းစစ်ခွင့်အား ကန့်သတ်ရန် လုပ်ပိုင်ခွင့် ရရှိစေ မည်လည်း ဖြစ်သည်။

Source: Aljazeera

CNI International News

နယူးဒေလီ၊ ဧပြီ ၂၄

ဆစ်ခ် (Sikh) ဒေသ လွတ်လပ်ရေးနှင့် ပန်ဂျပ် (Punjab) ပြည်နယ် ခွဲထွက်ရေးတို့ကို ပြန်လည်တောင်းဆိုခဲ့သည့် ခွဲထွက်ရေး ခေါင်းဆောင်တစ်ဦးကို အိန္ဒိယရဲတပ်ဖွဲ့က တနင်္ဂနွေနေ့တွင် ဖမ်းဆီးခဲ့သည်ဟု အေပီသတင်းမှ ဖော်ပြခဲ့သည်။

အသက် ၃၀ အရွယ် တရားဟောဆရာ တစ်ဦးဖြစ်သူ အမ်ရစ်ပယ် ဆင်း(Amritpal Singh) သည် ၎င်း၏ ထောက်ခံ သူများက ပန်ဂျပ်ပြည်နယ်ရှိ ရဲစခန်းတစ်ခုကို ဝင်ရောက် စီးနင်းခဲ့ခြင်းအတွက် တစ်နိုင်ငံလုံး၏ အာရုံစိုက်မှုကို ရရှိခဲ့ပြီးနောက် ပြီးခဲ့သည့်လက ထွက်ပြေးခဲ့သည်။

၎င်းကို မိုဂါ (Moga) မြို့တွင် ဖမ်းမိခဲ့သည့်ဟု ပန်ဂျပ်ရဲတပ်ဖွဲ့က တနင်္ဂနွေနေ့၌ တွစ်တာမှာ ရေးသားခဲ့သည်။

ဆင်းသည် မိုဂါမြို့ ဆစ်ခ်ဘုရားကျောင်း တစ်ခုတွင် မနက်ပိုင်း ဝတ်ပြုဆုတောင်းမှုပြီးနောက် ရဲတပ်ဖွဲ့ထံ အဖမ်းခံခဲ့သည်ဟု ဆစ်ခ်ဘာသာရေး ခေါင်းဆောင်တစ်ဦးက ပြောသည်။

သတင်းအရ အမ်ရစ်ပယ်ဆင်း ရှိရာ ဘုရားကျောင်းကို ရဲတပ်ဖွဲ့က ပိတ်ဆို့ခဲ့ကြောင်း၊ ဘုရားကျောင်းအတွင်းသို့ ဝင်ရောက်ခြင်းမရှိဘဲ ၎င်းထွက်လာချိန်မှသာ ဖမ်းဆီးခြင်းဖြစ်ကြောင်း ရဲအရာရှိ ဂီးလ် (Gill) က ပြောသည်။

အမ်ရစ်ပယ်ဆင်းအား ထောက်ခံသူများ ပြောသကဲ့သို့ အဖမ်းခံခဲ့ခြင်း ဟုတ်/မဟုတ်ကိုတော့ အတည်ပြုခဲ့ခြင်း မရှိပေ။

အမ်ရစ်ပယ်ဆင်း နဲ့ သူ၏ ထောက်ခံသူများကိုတွေ့ရစဉ်

ဆင်းအား တရားရင်ဆိုင်မှုများ မလုပ်ဆောင်ခင် အိန္ဒိယအရှေ့မြောက်ပိုင်းရှိ ဒီဘရူဂါ့ (Dibrugarh) တွင် ထိန်းသိမ်း ထားမည် ဖြစ်သည်။ ဆင်းအား ဝရမ်းပြေးတစ်ဦးအဖြစ် ရဲတပ်ဖွဲ့က ကြေညာထားကာ ၎င်းနှင့်လက်ထောက်ဖြစ်သူ များသည် ပြည်နယ်အတွင်း မတည်ငြိမ်မှုများဖြစ်အောင် လုပ်ဆောင်နေသည်ဟု စွပ်စွဲထားသည်။

ထို့အပြင် ၎င်းတို့သည် ပြည်သူများ အချင်းချင်း သွေးကွဲစေရန် ဆောင်ရွက်မှု၊ လူသတ်ရန် ကြံစည်မှု၊ ရဲတပ်ဖွဲ့ဝင် များကို တိုက်ခိုက်မှု၊ ပြည်သူ့ဝန် ထမ်းများကို နှောင့်ယှက်မှုတို့နှင့်လည်း စွပ်စွဲခံထားသည်။

ဖမ်းဆီးခံထားရသော လက်ထောက်တစ်ဦးကို လွှတ်ပေးရေး တောင်းဆိုရန်အတွက် ဆင်းအား ထောက်ခံသူ ရာပေါင်းများစွာက အန်နာလာ (Ajnala) မြို့ရှိ ရဲစခန်းတစ်ခုကို သစ်သားတုတ်များ၊ ဓားများ၊ သေနတ်များဖြင့် ဝင်ရောက် စီးနင်းခဲ့ကြသည်။

ထို့ကြောင့် အာဏာပိုင်များ အနေဖြင့် ပန်ဂျပ်ပြည်နယ်အတွင်း လက်နက်ကိုင် တပ်ဖွဲ့ဝင် ထောင်နှင့်ချီ အသုံးပြုခဲ့ ရပြီး ဆင်းအား ထောက်ခံသူ တစ်ရာနီးပါးကိုလည်း ဖမ်းဆီးခဲ့ကြသည်။

၂၀၂၂ ပန်ဂျပ်ပြည်နယ်သို့ ရောက်မလာခင် ၎င်း၏ အကြောင်းကို အနည်းငယ်သာ သိရှိထားပြီး ၎င်းသည် ဆစ်ခ် လူမျိုးများ၏ အခွင့်အရေး ကာကွယ်ပေးရေး ချီတက်ပွဲများကိုလည်း ဦးဆောင်ခဲ့သည်။

ဆစ်ခ်လူမျိုးများသည် အိန္ဒိယလူဦးရေ၏ ၁ ဒသမ ၇ ရာခိုင်နှုန်းနီးပါး ရှိသည်။

ပန်ဂျပ်ပြည်နယ်တွင် ၁၉၈၀ နှစ်များ၌ သွေးထွက်သံယို မှုများသော ပုန်ကန်ထကြွမှုများ ဖြစ်ပွားခဲ့သည်။

အမ်ရစ်ပယ်ဆင်းကို ဖမ်းဆီးနေစဉ်

အဆိုပါ ပုန်ကန်ထကြွမှုများ ဖြစ်ပွားစဉ် အချိန်ကာလမှာပဲ ဝန်ကြီးချုပ် အင်ဒီယာ ဂန္ဒီ (Indira Gandhi)အား သူမ ၏ ဆစ်ခ်လူမျိုး သက်တော်စောင့်က လုပ်ကြံခဲ့သည်။

လုပ်ကြံမှုကြောင့် သူမ၏ ဟိန္ဒူထောက်ခံသူများက နိုင်ငံမြောက်ပိုင်းရှိ ဆစ်ခ်လူမျိုးများကို တိုက်ခိုက်မှုများ လုပ်ဆောင်ခဲ့ကြသည်။

ဆင်းအား ဖမ်းမိခြင်းက ခွဲထွက်ရေး ကွန်ယက်များနှင့် ၎င်းအား ထောက်ခံသူများကို ဖြိုခွဲရေးတွင် ရဲတပ်ဖွဲ့ အတွက် များစွာ အထောက်အကူ ဖြစ်စေလိမ့်မည်ဟု ပန်ဂျပ်ပြည်နယ်မှ ရှေ့နေတစ်ဦးက ပြောသည်။

ပန်ဂျပ်သည် အိန္ဒိယထိန်းချုပ်ရာ ကတ်ရှ်မီးဒေသ၊ ပါကစ္စတန်နိုင်ငံတို့နှင့် ထိစပ်နေသည်။

ပါကစ္စတန်သည် သူပုန်များကို ထောက်ပံ့ခြင်း၊ လေ့ကျင့်ပေးခြင်းနှင့် လက်နက်တပ်ဆင်ခြင်းများ လုပ်ဆောင်ပေး နေသည်ဟု အိန္ဒိယဘက်က စွပ်စွဲထားသော်လည်း ပါကစ္စတန်ဘက်က ငြင်းဆိုသည်။

Source: AP

CNI International News

မော်စကို၊ ဧပြီ ၂၄

နိုင်ငံခြားရေးဝန်ကြီး ဆာဂျေ လာဗရော့ (Servey Lavrov) ၏ နယူးယောက်ခရီးစဉ်တွင် သတင်းယူမည့် ရုရှား ဂျာနယ်လစ်များကို အမေရိကန်ဘက်က ဗီဇာပေးရန် ငြင်းဆိုခဲ့သည်ဟု ရုရှားအစိုးရက တနင်္ဂနွေနေ့တွင် ပြောကြောင်း အေပီသတင်းတွင် ဖော်ပြသည်။

ယင်းကိုရုရှားဘက်က ပြင်းပြင်းထန်ထန် ပြန်လည်တုန့်ပြန်သွားမည်ဟုလည်း လာဗရော့က ပြောသည်။

လက်ရှိအချိန်အထိ ရုရှားဂျာနယ်လစ်များ၏ ဗီဇာကို ငြင်းဆိုခဲ့သည်ဟူသော ပြောဆိုမှုနှင့်ပတ်သက်၍ အမေရိကန်နိုင်ငံခြားရေးဌာနက တစုံတရာ မှတ်ချက်ပြု ပြောဆိုခြင်းမရှိသေးပေ။ ရုရှားဂျာနယ်လစ်များသည် ကုလသမဂ္ဂ လုံခြုံရေးကောင်စီတွင် ရုရှားအနေဖြင့် ဥက္ကဋ္ဌရာထူးကို ရယူခြင်းအတွက် လာဗရော့၏ ကုလသမဂ္ဂသို့ ခရီးစဉ်တွင် သတင်းရယူရန် ဗီဇာလျှောက်ထားခဲ့ခြင်းဖြစ်သည်။

ကိုယ့်ကိုယ်ကို အခိုင်မာဆုံး၊ အတော်ဆုံး၊ လွတ်လပ်၍ တရားမျှတသည်ဟု ပြောထားသော နိုင်ငံတစ်ခုအနေဖြင့် ကလေးဆန်သော အပြုအမူကိုလုပ်ဆောင်ခဲ့ကာ လွတ်လပ်စွာထုတ်ဖော်ပြောဆိုခွင့်နှင့် သတင်းအချက်အလက် ရယူခွင့်တို့သည် အဖိုးတန်သည်ဟု ပြောခြင်းဖြင့် ရူးကြောင်ကြောင်လုပ်ရပ်ကို လုပ်ဆောင်ခဲ့သည်ဟု လာဗရော့က မော်စကိုမြို့မှ မထွက်ခွာခင် တနင်္ဂနွေနေ့တွင် ပြောဆိုခဲ့သည်။ ယခုကိစ္စကို လုံးမဝမမေ့ရန်၊ ခွင့်မလွှတ်ရန် လိုအပ် သည်ဟုလည်း ၎င်းက ပြောသည်။

ယခုအခြေအနေကို တုန့်ပြန်ရန် နည်းလမ်းရှာဖွေသွားမည်ဖြစ်ပြီး ထိုမှသာ အမေရိကန်အနေဖြင့် ယခု ဖြစ်ရပ် နှင့်ပတ်သက်၍ အချိန်အတန်ကြာ မှတ်မိနေလိမ့်မည်ဟုလည်း လက်ထောက်နိုင်ငံခြားရေးဝန်ကြီး ဆာဂျေ ရက်ကော့ဗ်က ပြောသည်။

မတ်လ ၂၃ ရက်နေ့က ကုလသမဂ္ဂဌာနချုပ်တွင် နျူကလီးယားမပြန့်ပွားရေးနှင့် ပတ်သက်သည့် ကုလသမဂ္ဂ လုံခြုံရေးကောင်စီ အစည်းအဝေးတစ်ခု ပြုလုပ်ဖို့ ကိုယ်စားလှယ်အဖွဲ့များ စုဝေးခဲ့ကြစဉ်(ဓါတ်ပုံ-အေပီ)

ယခု ပဋိပက္ခသည် အမေရိကန်နှင့် ရုရှားနိုင်ငံတို့အကြား Wall Street Journal သတင်းထောက် အီဗန် ဂတ်ရှ် ကိုဗစ်ချ် (Evan Gershkovich) အား ဖမ်းဆီးမှုနှင့်ပတ်သက်၍ တင်းမားမှုများမြင့်တက်နေချိန်တွင် ပေါ်ပေါက် လာခြင်းဖြစ်သည်။

ရုရှားဘက်က အီဗန်အား သူလျှိုလုပ်သည်ဟု စွပ်စွဲထားသော်လည်း အမေရိကန်ဘက်ကမူ ၎င်းကို မှားယွင်း ဖမ်းဆီးထားခြင်းဖြစ်သည်ဟု ကြေညာထားသည်။ ရုရှားအစိုးရက ယူကရိန်းကျူးကျော်စစ် စတင်ပြီးကတည်းက အနောက်နိုင်ငံသားဂျာနယ်လစ်များစွာ ရုရှားမှ ထွက်ခွာခဲ့ကြသည်။

လက်ရှိတွင်ရုရှားအစိုးရသည်နိုင်ငံတွင်းရှိ အနောက်နိုင်ငံသား ဂျာနယ်လစ်များကို သုံးလတစ်ကြိမ် ဗီဇာသက်တမ်း တိုးရန် သတ်မှတ်ထား ပြီး ယူကရိန်းစစ် မဖြစ်ခင်က သတ်မှတ်ချက်မှာ တစ်နှစ်တစ်ခါသာ သက်တမ်းတိုးရန် ဖြစ်သည်။

Source:AP

CNI International News

ဝါရှင်တန်၊ ဧပြီ ၂၄

အမေရိကန် အထူးတပ်ဖွဲ့ဝင်များသည် စစ်ဖြစ်နေသော ဆူဒန်ရှိ အမေရိကန်သံရုံးမှ ဝန်ထမ်းများကို တနင်္ဂနွေနေ့ တွင် သွားရောက် ကယ်ထုတ်ခဲ့သည်ဟု အေပီသတင်းက ရေးသား ဖော်ပြခဲ့သည်။

အန္တရာယ်များသော မစ်ရှင်အဖြစ် မြို့တော် ခါတွမ် (Khartoum) သို့ ရဟတ်ယာဉ်များဖြင့် ရောက်ရှိလာကာ တစ်နာရီ မပြည့်ခင် အချိန်အတွင်း ရွှေ့ပြောင်းရေးကို လုပ်ဆောင်ခဲ့ခြင်း ဖြစ်သည်။

မစ်ရှင်အတွင်း ပစ်ခတ်ခံခဲ့ရခြင်းနှင့် ကြီးကြီးမားမား ထိခိုက်ဒဏ်ရာ ရရှိမှု တစ်စုံတစ်ရာလည်း မရှိခဲ့ပေ။

အမေရိကန် သံဝန်ထမ်းအားလုံးကို ရွှေ့ပြောင်းပြီးချိန်တွင် ခါတွမ်မြို့ရှိ အမေရိကန်သံအဖွဲ့ကို အကန့်အသတ်မရှိ ရပ်ဆိုင်းလိုက်သည်။

သို့သော် အရှေ့အာဖရိကနိုင်ငံအတွင်း အမေရိကန်နိုင်ငံသား ထောင်ချီ ကျန်ရှိနေဆဲ ဖြစ်သည်။

RSF လက်နက်ကိုင် ခေါင်းဆောင်နဲ့ နောက်လိုက်များကိုတွေ့ရစဉ်

ပိုမိုကျယ်ပြန့်သော ရွှေ့ပြောင်းရေး လုပ်ဆောင်ရန်မှာ အန္တရာယ်များသည်ဟု အမေရိကန်အရာရှိများက ပြော သည်။ ဆူဒန်နိုင်ငံတွင်းမှ တိုက်ခိုက်မှုများသည် တနင်္ဂနွေနေ့တွင် ကိုးရက်မြောက်နေ့အဖြစ် ရောက်ရှိလာပြီဖြစ် ကာ ပင်မနိုင်ငံတကာ လေဆိပ်ကို ပိတ်ထားရပြီး နိုင်ငံတွင်းမှ ထွက်ခွာသည့် လမ်းများကိုလည်း လက်နက်ကိုင်များ က ထိန်းချုပ်ထားသည်။

တိုက်ပွဲများကြောင့် လူ ၄၀၀ ကျော် သေဆုံးခဲ့ပြီးလည်း ဖြစ်သည်။

ကယ်ဆယ်ရေးတွင် ပါဝင်သည့် တပ်ဖွဲ့များကို ကျေးဇူးတင်ကြောင်း ထုတ်ပြန်ချက်၌ အမေရိကန်သမ္မတ ဂျိုး ဘိုင်ဒန် (Joe Biden) က ဆူဒန်တွင် ကျန်ရှိနေဆဲဖြစ်သည့် အမေရိကန်နိုင်ငံသားများကို ပိုမို ကူညီနိုင်ရေး လုပ် ဆောင်ချက်များနှင့် ပတ်သက်သည့် တာဝန်ရှိသူများ၏ ပုံမှန်သတင်းပို့မှုများအား ရရှိထားသည်ဟု ပြောသည်။

ဆူဒန်နိုင်ငံတွင်းမှ အကြမ်းဖက်များကို ရပ်တန့်ရန်လည်း ၎င်းက တောင်းဆိုသည်။

အမေရိကန် တပ်ဖွဲ့ဝင် ၁၀၀ ခန့်က MH-47 ရဟတ်ယာဉ် သုံးစင်းဖြင့် ကယ်ဆယ်ရေး လုပ်ဆောင်ခဲ့ခြင်း ဖြစ်သည်။

၎င်းတို့သည် အီသီယိုးပီးယားနိုင်ငံရှိ အမည်ဖော်ပြထားခြင်း မရှိသော နေရာတစ်ခုမှ သံရုံးရှိ လေယာဉ်ကွင်းဆီသို့ ပျံသန်းကာ သံဝန်ထမ်း ၇၀ ခန့်ကို ကယ်တင်ခဲ့ခြင်း ဖြစ်သည်။

အမေရိကန် အာဖရိကဌာနချုပ်နှင့် ပူးတွဲစစ်ဦးစီးချုပ်များအဖွဲ့၏ ဥက္ကဋ္ဌဖြစ်သူ မာ့ခ်မီလီကို တွေ့ရစဉ်

အီသီယိုးပီးယားသည် လေကြောင်း ပျံသန်းမှုနှင့် လောင်စာဆီ ဖြည့်တင်းမှုတို့ကို ထောက်ပံ့ပေးခဲ့သည်ဟု အမေရိကန်၏ အာဖရိကရေးရာ လက်ထောက်အတွင်းရေးမှူးက ပြောသည်။

ကယ်ဆယ်ရေးတွင် ဒီဂျိုဗူတီ၊ အီသီယိုးပီးယားနှင့် ဆော်ဒီတို့က ကူညီပေးခဲ့သည်ဟုလည်း ဘိုင်ဒန်က ထုတ်ပြန်သည်။

အမေရိကန် အာဖရိကဌာနချုပ်နှင့် ပူးတွဲစစ်ဦးစီးချုပ်များအဖွဲ့၏ ဥက္ကဋ္ဌဖြစ်သူ မာ့ခ် မီလီ (Mark Milley) သည် ကယ်ဆယ်ရေး လုပ်ငန်းများအတွက် အမေရိကန် တပ်ဖွဲ့ဝင်များနှင့် ဘေးကင်းစွာ ဆောင်ရွက်နိုင်ရေးအတွက် ဆူဒန်ရှိ နှစ်ဖက်သော လက်နက်ကိုင် အဖွဲ့များနှင့် ဆက်သွယ်ခဲ့သည်။

သို့သော် ကယ်ဆယ်ရေး လုပ်ငန်းအတွင်း RSF အဖွဲ့မှ အမေရိကန်တပ်ဖွဲ့ဝင်များကို ကူညီပေးခဲ့သည်ဆိုသည့် သတင်းများကိုတော့ ငြင်းဆိုသည်။

ဆူဒန်ရှိ တိုက်ပွဲများ ရပ်တန့်သွားရန် အနေအထား မရှိချိန်တွင် အမျိုးသားလုံခြုံရေးအဖွဲ့၏ ထောက်ခံချက်ဖြင့် သံဝန်ထမ်းများကို ကယ်ထုတ်ရန်အတွက် ဘိုင်ဒန်က အမေရိကန် အထူးတပ်ဖွဲ့များအား အမိန့်ပေးခဲ့ခြင်းဖြစ်သည်။

Source: AP

CNI International News

ပရီတိုးရီးယား၊ ဧပြီ ၂၂

ပရီတိုးရီးယားမြို့(Pretoria)ရှိ UNHCR ရုံးများ၏ အပြင်ဘက်တွင် သုံးနှစ်ကျော်ကြာ တဲထိုး နေထိုင်လျက်ရှိသော နိုင်ငံရေး ခိုလှုံခွင့်တောင်းခံသူ ၁၀၀ ကျော်ကို တောင်အာဖရိကရဲတပ်ဖွဲ့က နှင်ထုတ်ဖယ်ရှားခဲ့သည်ဟု Al Jazeera သတင်းတွင် ဖော်ပြသည်။

နိုင်ငံရေးခိုလှုံခွင့် တောင်းခံထားသူများသည် ပြီးခဲ့သည့် ၂၀၁၉ ခုနှစ်က နိုင်ငံခြားသား ကြောက်သည့် အကြမ်းဖက် မှုများ ပေါ်ပေါက်လာပြီးနောက် ၎င်းတို့အား တခြားနိုင်ငံများသို့ ရွှေ့ပြောင်းပေးရန် တောင်းဆိုကာ UNHCR ရုံးများ အပြင်ဘက်တွင် လက်လုပ်တဲများဖြင့် စတင်နေထိုင်ခဲ့ကြသည်။

ပရီတိုးရီးယား မြူနီစီပယ်အဖွဲ့က ပြီးခဲ့သည့် သီတင်းပတ်တွင် ထိုသူများ ဖယ်ရှားရေး အထက်တရားရုံး အမိန့် တစ်ခုကို ရဲတပ်ဖွဲ့က သောကြာနေ့တွင် ရယူခဲ့သည်။

တရားရုံး စာရွက်စာတမ်းများတွင် ဒုက္ခသည်များအား နှင်ထုတ်ကာ လင်ဒီလာ နေရပ်ပြန်လည် ပို့ဆောင်ရေး စင်တာ (Lindela Repatriation Centre) သို့ ရွှေ့ပြောင်းရမည်ဟု ဖော်ပြထားသည်။

၎င်းတို့အား မူလနိုင်ငံများသို့ ပြန်လည် ပို့ဆောင်ပေးရန်အတွက် အထောက်အထားမဲ့ ဒုက္ခသည်များကို ထားရှိရာ စင်တာ ဖြစ်သည်။

တဲများတွင် နေထိုင်သူများ အနေဖြင့် ဖယ်ရှားမှုကို လက်မခံလျှင် ဖမ်းဆီး ထိန်းသိမ်းခံရမည်ဟု ကြေညာကာ ဖယ်ရှား ရှင်းလင်းရေးကို စတင်လုပ်ဆောင်ခဲ့သည်။

တချို့ မိသားစုများက အသာတကြည် ပူးပေါင်း ဆောင်ရွက်သော်လည်း တချို့က အာခံဆန္ဒပြခဲ့သည်။

နိုင်ငံရေးခိုလှုံခွင့် တောင်းခံသူများက ၎င်းတို့အား တခြားနိုင်ငံများရှိ ဒုက္ခသည် စခန်းများသို့ ရွှေ့ပြောင်းပေးရန် တောင်းဆိုသော်လည်း ယင်းက အဖွဲ့၏ လုပ်ပိုင်ခွင့်ထက် ကျော်လွန်နေသည်ဟု UNHCR ပြောခွင့်ရပုဂ္ဂိုလ် လော်ရာ ပါဒိုရန် (Laura Padoan) က ပြောသည်။

ဖယ်ရှား ရွှေ့ပြောင်းမှုများကို လူသားချင်းစာနာမှု၊ ဂုဏ်သိက္ခာ၊ လေးစားမှုတို့ဖြင့် ငြိမ်းချမ်းစွာ လုပ်ဆောင်သွားရန် လည်း UNHCR ဘက်မှ အာဏာပိုင်များကို တောင်းဆိုခဲ့သည်။

တောအာဖရိကနိုင်ငံသည် ကမ္ဘာပေါ်တွင် အရှုပ်ထွေးဆုံး နိုင်ငံရေး ခိုလှုံခွင့်ဆိုင်ရာ မူဝါဒများကို ပိုင်ဆိုင်ထားကာ နိုင်ငံခြားသားများအနေဖြင့် ဒုက္ခသည် အမည်ခံကာ အလုပ်လုပ်ခွင့် ရှိသည်။

သို့သော် လျှောက်ထားမှု စနစ်များ သည် အလုပ်မဖြစ်သောကြောင့် နိုင်ငံရေး ခိုလှုံခွင့် တောင်းခံသူ အများစုသည် သောင်တင်ရေမကျ အခြေအနေသို့ နှစ်ပေါင်းများစွာ ရောက်ရှိခဲ့ကြသည်ဟု လူအခွင့်အရေး အဖွဲ့များက ပြော သည်။
အာဖရိကတိုက်၏ စီးပွားရေး အင်အားကြီး နိုင်ငံဖြစ်ခြင်းကြောင့် တောင်အာဖရိကသည် စီးပွားရေးအရ ရွှေ့ပြောင်း နေထိုင်သူများ မျက်စိကျရာ နေရာလည်း ဖြစ်သည်။ ထိုအခြေအနေက နိုင်ငံတွင်းရှိ အလုပ်လက်မဲ့ နိုင်ငံသားများ ကို ဒေါသဖြစ်စေခဲ့ကာ နိုင်ငံခြားသား အလိုမရှိသော အကြမ်းဖက်မှုများကို ဖြစ်စေခဲ့သည်။

Source: Aljazeera

CNI International News

မော်စကို၊ ဧပြီ - ၂၂

ရုရှားစစ်လေယာဉ်တစ်စင်းမှ ဗုံတစ်လုံး မတော်တဆ ပြုတ်ကျလာမှုကြောင့် ယူကရိန်းနှင့်နယ်စပ်အနီးရှိ ရုရှားပိုင် မြို့တစ်ခုတွင် ပြင်းထန်သော ပေါက်ကွဲမှုတစ်ခု ဖြစ်ပွားခဲ့ရာ နှစ်ဦးဒဏ်ရာရခဲ့ကြောင်း အေပီသတင်းက ဖော်ပြခဲ့သည်။

ထို့နောက် ဒေသခံပြည်သူများလည်း ကြောက်ရွံ့ထိတ်လန့်မှု ဖြစ်စေခဲ့သည်ဟု ရုရှားစစ်တပ်က ထုတ်ပြန်ခဲ့သည်။

အဆိုပါ မြို့သည် အရှေ့ဘက် ရုရှား-ယူကရိန်း နယ်စပ်နှင့် ကီလိုမီတာ ၄၀ တွင်ရှိသည်။

ဒေသခံ ၃၄၀,၀၀၀ ကျော် နေထိုင်သော ဘဲလ်ဂိုရော့ဒ် (Belgorod) မြို့သည် ရုရှား၏ ယူကရိန်းအပေါ် စစ်ဆင်ရေး စတင်ပြီးချိန်မှစ၍ ဒရုန်းတိုက်ခိုက်မှုများနှင့် ပုံမှန်ကြုံတွေ့ခဲ့ရသည်။

ထိုတိုက်ခိုက်မှုများအတွက် ရုရှားဘက်က ယူကရိန်း စစ်တပ်ကို အပြစ်တင်ခဲ့သည်။

ကြာသပတေးနေ့ နှောင်းပိုင်းတွင် ပေါ်ပေါက်ခဲ့သော် ပေါက်ကွဲမှုသည် ဘဲလ်ဂိုရော့ဒ် ဒေသခံများ ကြုံတွေ့ ဖူးသည်ထက် များစွာပို၍ အင်အားပြင်းသည်။

အသံကြီးတစ်ခု ပေါ်ပေါက်လာခဲ့ပြီးနောက် ပေါက်ကွဲမှု ဖြစ်ပွားခဲ့ခြင်းဖြစ်ကာ အနီးအနားရှိ အဆောက်အဦများ ယမ်းခါသွားခဲ့ပြီး ပြတင်းပေါက်များလည်း ပျက်စီးခဲ့ရသည်ဟု ဒေသခံများက ပြောသည်။

ရုရှား ဗုံးမှားကြဲမိတဲ့ ဘဲလ်ဂိုရော့ဒ်မြို့ကိုတွေ့ရစဉ်

ပေါက်ကွဲမှုကြောင့် သစ်ပင်များ တန်းစီးစိုက်ပျိုးထားသည့် ရိပ်သာလမ်း တစ်ခုအလယ်တွင် မီတာ ၂၀ ခန့် ချိုင့်ကြီးတစ်ခု ဖြစ်ပွားခဲ့ရပြီး ကားတစ်ချို့ ပျက်စီးခဲ့ရကာ ယာဉ်တစ်စီးသည် စတိုးဆိုင်တစ်ခု၏ အမိုးပေါ် ရောက်ရှိသွားခဲ့သည်။

လူနှစ်ဦး ဒဏ်ရာရရှိခဲ့ပြီး သွေးတိုးမှုကြောင့် တခြားတစ်ဦးကို ဆေးရုံတင်ထားရသည်ဟု အာဏာပိုင်များက ပြောသည်။

ထိုပေါက်ကွဲမှု ဖြစ်ပွားပြီးသည်နှင့် တစ်ပြိုင်နက် ရုရှား၏ ရုပ်သံ အစီအရင်ခံသူများနှင့် စစ်ရေး ဘလော့ဂါများက တိုက်ခိုက်မှုအတွက် ယူကရိန်းဘက်က သုံးခဲ့သည့် လက်နက်များနှင့် ပတ်သက်သော သီအိုရီများကို အပြိုင်အဆိုင် ထုတ်ဖော်ရေးသားခဲ့ကာ ပြင်းထန်စွာ တုံ့ပြန်မှု ပြုလုပ်သွားရန်လည်း တောင်းဆိုခဲ့သည်။

သို့သော် တစ်နာရီခန့် အကြာတွင်မှ ရုရှားကာကွယ်ရေးဌာနက ထိုပေါက်ကွဲမှုသည် ၎င်းတို့ပိုင် Su-34 ဗုံးကြဲ လေယာဉ် တစ်စီးမှ မတော်တဆ လွတ်ကျခဲ့ခြင်း ဖြစ်သည်ဟု ထုတ်ပြန် အသိပေးခဲ့သည်။

ထို့နောက် အသေးစိတ်ကိုမူ ထုတ်ပြန်ခဲ့ခြင်းမရှိဘဲ ထိုဗုံးသည် အင်အားပြင်း ကီလိုဂရမ် ၅၀၀ ဗုံး ဖြစ်နိုင်သည်ဟု စစ်ရေးကျွမ်းကျင်သူများက ပြောသည်။

Source: AP