CNI International News

အဘူဂျာ၊ဖေဖော်ဝါရီ ၂၇

အာဖရိက၏ လူဦးရေ အထူထပ်ဆုံးနိုင်ငံ၏ သမ္မတနှင့်လွှတ်တော် ရွေးကောက်ပွဲများအတွက် မဲပေးမှုများသည် စနေနေ့တွင် အဆုံးသတ်ရမည်ဖြစ်သည့်တိုင် တနင်္ဂနွေနေ့ မနက်ပိုင်းအထိ နိုင်ဂျီးရီးယား ပြည်သူများမှာ မဲပေးနေ ကြဆဲ ဖြစ်သည်ဟု အေပီသတင်းတွင် ဖော်ပြထားသည်။

မဲရုံများ ပိတ်ခဲ့ပြီဖြစ်သော ပြည်နယ်များတွင် တနင်္ဂနွေနေ့၌ မဲရေတွက်မှုများ လုပ်ဆောင်လျက်ရှိသော်လည်း ဘီနူး၊ အက်ဒါမာဝါနှင့် ဘာရယ်လ်ဆာ (Benue၊ Adamawa နှင့် Bayelsa) ပြည်နယ်များတွင် မဲပေးမှုများ ဆက်ရှိ နေဆဲဟု ရွေးကောက်ပွဲ လေ့လာစောင့်ကြည့်သူများက ပြောသည်။

မဲရေတွက်မှု ကနဦးရလဒ်များကို တနင်္ဂနွေနေ့ ညနေပိုင်းတွင် ထုတ်ပြန်မည်ဟုလည်း ယူဆရသည်။

လုံခြုံရေးတပ်ဖွဲ့များကိုတွေ့ရစဉ်(AP)

သယ်ယူပို့ဆောင်ရေးနှင့် လုံခြုံရေးဆိုင်ရာ စိန်ခေါ်မှုများက စနေနေ့တွင် နိုင်ငံတစ်လွှား ကြန့်ကြာမှုများကို ဖြစ်စေခဲ့ပြီး မဲဆန္ဒရှင်များကို ဒေါသထွက်စေခဲ့သည်။

မဲဆန္ဒရှင်တချို့သည် ညလုံးပေါက်နီးပါး ထိုင်စောင့်ခဲ့ကြသော်လည်း နောက်တစ်နေ့ မနက်မိုးလင်းချိန်အထိ မဲမပေးရသည်များလည်း ရှိသည်။

ခေါင်းဆောင်ကောင်း တစ်ဦးကိုရွေးရန် အနစ်နာခံသင့်ရင် ခံရပါမည်ဟု စောင့်ဆိုင်းနေသည့် မဲဆန္ဒရှင်တစ်ဦးက ပြောသည်။

ရွေးကောက်ပွဲ တာဝန်ရှိသူများက ကြန့်ကြာမှုများအတွက် သယ်ယူပို့ဆောင်ရေး ကိစ္စများကို အပြစ်တင်သော်လည်း တချို့သော လေ့လာသူများက ငွေကြေးပုံစံသစ် ဖန်တီးခြင်းကြောင့် ပြည်သူများ လက်ထဲတွင် ငွေမရှိခြင်းကို ထောက်ပြသည်။

နိုင်ဂျီးရီးယား ရွေးကောက်ပွဲ မဲရလဒ် စောင့်ကြည့်နေသူများကိုတွေ့ရစဉ်(AP)

ငွေစက္ကူ ရှားပါးနေခြင်းသည် မဲဆန္ဒရှင်များအတွက် သယ်ယူပို့ဆောင်ရေးဆိုင်ရာ ကိစ္စများကို သာမက၊ ရွေးကောက်ပွဲ ဝန်ထမ်းများနှင့် လုံခြုံရေး ဆောင်ရွက်ပေးမည့် ရဲတပ်ဖွဲ့ဝင်များအတွက်လည်း ဆိုးကျိုုးများကို ဖြစ်စေသည်။

ထိုအခြေအနေက မဲပေးသူအရေအတွက် နည်းပါးခြင်းကို ဖြစ်စေသည်ဟု နိုင်ငံ၏ အကြီးမားဆုံးသော ရွေးကောက်ပွဲ စောင့်ကြည့်ရေးအဖွဲ့ Yiaga Africa က ပြောသည်။

စိန်ခေါ်မှုများစွာ ရှိခဲ့သော စနေနေ့က ကျင်းပသည့် နိုင်ဂျီးရီးယား ရွေးကောက်ပွဲသည် အများအားဖြင့် ငြိမ်းချမ်းစွာ ပြီးစီးခဲ့သော်လည်း မဲလုပြေးမှု ရှစ်ခုအပြင် တိုင်းပြည်၏ ဒီမိုကရေစီကို ထိပါးစေသော အရေးကြီးသည့် ဖြစ်ရပ် အနည်းဆုံး ၁၃၅ ခုခန့် ဖြစ်ပွားခဲ့သည်ဟု လေ့လာသူများက ပြောသည်။

Source: AP

CNI International News

တယ်လင်း၊ဖေဖော်ဝါရီ ၂၇

ရုရှားတွင် ရွေးချယ်စရာမရှိကြောင်း၊ နေတိုး၏ နျူကလီးယားစွမ်းရည်ကို ထည့်သွင်းစဉ်းစားရမည်ဖြစ်ကြောင်း တနင်္ဂနွေနေ့၌ ထုတ်လွှင့်ခဲ့သော အင်တာဗျူးတစ်ခုတွင် ရုရှားသမ္မတ ပူတင်က ပြောခဲ့သည်ဟု AP သတင်းတွင် ဖော်ပြသည်။

New START စာချုပ်တွင် ပါဝင်နေမှုအား ရုရှားဘက်မှ ရပ်ဆိုင်းလိုက်ခြင်းနှင့်ပတ်သက်၍ မေးမြန်းမှုကို ပူတင်က ပြန်လည်ဖြေကြားခဲ့ခြင်းဖြစ်သည်။

နေတိုးအဖွဲ့ဝင်နိုင်ငံများသည် ရုရှားအား စစ်ဗျူဟာအရ ရှုံးနိမ့်စေရန် လုပ်ဆောင်နေခြင်းကြောင့် ရုရှားသည် ဖြစ်တည်မှုဆိုင်ရာ ခြိမ်းခြောက်မှုနှင့် ရင်ဆိုင်နေရသည်ဟု ပူတင်က ပြောသည်။ ယူကရိန်းစစ်ပွဲနှင့်ပတ်သက် ၍လည်း ၎င်းကထိုသို့ ကြိမ်ဖန်များစွာ ပြောဆိုခဲ့ဖူးသည်။ New START နျူကလီးယားသဘောတူညီချက်မှ နုတ်ထွက်ခြင်းသည် ရုရှားအတွက်လုံခြုံရေး၊ မဟာဗျူဟာမြောက်တည်ငြိမ်ရေး စသည့်လိုအပ်ချက်များကြောင့် ဖြစ်သည်ဟု ပူတင်က ရုရှားနိုင်ငံပိုင်သတင်းသို့ ပြောခဲ့သည်။

နေတိုး၏ ဦးဆောင်နိုင်ငံများအားလုံးမှ ၎င်းတို့၏ ပင်မရည်ရွယ်ချက်သည် ရုရှားအား စစ်ဗျူဟာအရ ရှုံးနိမ့်မှု ဖြစ်စေရေးအတွက်ဟု ကြေညာထားချိန်တွင် နျူကလီးယားစွမ်းရည်ကို မည်သည့်အတွက်ကြောင့် လျစ်လျူရှုထားရပါမည်လဲဟု ပူတင်က ပြောခြင်းဖြစ်သည်။

တောင်ကိုရီးယားနိုင်ငံ ဆိုးလ်မြို့လယ်တွင် ရုရှားကျူးကျော်မှု တစ်နှစ်ပြည့် အထိမ်းအမှတ် လူထုစည်းဝေးပွဲ အတွင်း အမေရိကန်သမ္မတ ဂျိုးဘိုင်ဒန်နှင့် ရုရှားသမ္မတ ဗလာဒီမာပူတင်တို့၏ ဓာတ်ပုံများကို ကိုင်ဆောင်ကာ ဆန္ဒပြနေစဉ်(ဓါတ်ပုံ-အေပီ)

ပြီးခဲ့သည့်နှစ် ယူကရိန်းအားကျူးကျော်မှုသည် ၎င်းတို့ယူဆထားသည့် ရုရှားလုံခြုံရေးအပေါ်ခြိမ်းခြောက်မှုများကို လျော့ချရန်ဟု ပူတင်ကပြောခဲ့ပြီး ထိုအချိန်၌ ယင်းကိုပဋိပက္ခအတွင်း ခြိမ်းခြောက်မှုများအတွက် နျူကလီးယား အသုံးပြုရန် သက်သေပြမှုအဖြစ် ၎င်းကအသုံးချခဲ့သည်။ ၂၀၁၀ ခုနှစ် New START သဘောတူညီချက်တွင် ပါဝင်မှုကို ရုရှားအနေဖြင့် ရပ်ဆိုင်းကြောင်း အင်္ဂါနေ့တွင် ပူတင်က ကြေညာခဲ့သည်။ အမေရိကန်နှင့် နေတိုးမဟာ မိတ်များက ယူကရိန်းအရေးတွင်ရုရှားကို ရှုံးနိမ့်ရန်လုပ်ဆောင်နေချိန်တွင် ရုရှားအနေဖြင့် ၎င်းတို့ နျူကလီးယား စခန်းများအပေါ် အမေရိကန်၏ စစ်ဆေးမှုကိုလက်မခံနိုင်ကြောင်း ပူတင်က ပြောသည်။

သို့သော် စာချုပ်မှ နုတ်ထွက်ခြင်းမဟုတ်ကြောင်း၊ စာချုပ်ပါအချက်အလက်များကို လေးစားသွားမည်ဖြစ်ကြောင်း နှင့် ပဲ့ထိန်းဒုံးကျည်စမ်းသပ်မှုများကို အမေရိကန်သို့ အသိပေးမှု ဆက်လက်လုပ်ဆောင်သွားမည်ဖြစ်ကြောင်း ရုရှားတာဝန်ရှိသူများက ပြောသည်။

Russia 1 ရုပ်သံနှင့် အင်တာဗျူးတွင် ပူတင်က နေတိုးနိုင်ငံများသည် စာချုပ်တွင် မပါဝင်သော်လည်း ၎င်းတို့သည် ထိုအကြောင်းအရာနှင့် ပတ်သက်သည့် ဆွေးနွေးမှုများတွင် ပါဝင်လာကြောင်း၊ ယင်းကို ရုရှားက ကန့်ကွက် ကြောင်း၊ အထူးသဖြင့် နေတိုး၏ နျူကလီးယားစွမ်းရည်ကို လျစ်လျူရှုထား၍ မရသည့်အခြေအနေတွင်ရှိကြောင်း ပြောသည်။ အနောက်အုပ်စုသည် ရုရှားကို ပျောက်ကွယ်သွားစေလိုနေသည်ဟုလည်း ပူတင်က စွပ်စွဲသည်။ ယူကရိန်းကျူးကျော်စစ်နှင့်ပတ်သက်၍ ကာကွယ်ရာတွင်လည်း ၎င်းက ထိုသို့ ကြိမ်ဖန်များစွာ ပြောခဲ့ဖူးသည်။

၎င်းတို့တွင် ရည်ရွယ်ချက်တစ်ခုသာရှိကြောင်း၊ ဆိုဗီယက်ပြည်ထောင်စုဟောင်းနှင့် ယင်း၏အခြေခံအကျဆုံး အစိတ်အပိုင်းဖြစ်သော ရုရှားဖက်ဒရေးရှင်းနိုင်ငံကို ဖျက်သိမ်းရန်ပင်ဖြစ်ကြောင်းလည်း ပူတင်က ပြောခဲ့သည်။

Source:AP

CNI International News

ကိုလံဘို၊ဖေဖော်ဝါရီ ၂၇

ရွေးကောက်ပွဲဆိုင်ရာ မကျေနပ်ချက်များအပေါ် ဆန္ဒပြသူများကို သီရီလင်္ကာရဲတပ်ဖွဲ့က တနင်္ဂနွေနေ့တွင် မျက်ရည်ယိုဗုံးများ၊ ရေအမြောက်များသုံးကာ လူစုခွဲခဲ့သည်ဟု အေပီသတင်းတွင် ဖော်ပြထားသည်။

ယိုယွင်းနေသော တိုင်းပြည်၏ စီးပွားရေး အခြေအနေကြောင့် ရွေးကောက်ပွဲ ကျင်းပရန် အကုန်အကျခံနိုင်ခြင်း မရှိဟုဆိုကာ အစိုးရကဒေသဆိုင်ရာ ရွေးကောက်ပွဲများကို ရွှေ့ဆိုင်းလိုက်ပြီးနောက် ထိုသို့ ဆန္ဒပြခဲ့ကျခြင်း ဖြစ်သည်။

တနင်္ဂနွေနေ့ ဖြစ်ရပ်တွင် လူ ၁၅ ဦးခန့် အသေးစား ဒဏ်ရာများ ရရှိခဲ့သည်ဟု ကိုလံဘိုအမျိုးသားဆေးရုံက ပြော သည်။

တနင်္ဂနွေနေ့ ဆန္ဒပြပွဲတွင် အတိုက်အခံ National People’s Power ပါတီအား ထောက်ခံသူ ထောင်ပေါင်းများစွာ သည် မြို့တော်ကိုလံဘို (Colombo) ရှိ စီးပွားရေး အချက်အချာကျရာ ခရိုင်သို့ ချီတတ်ရန် ကြိုးပမ်းခဲ့သည်။

ယင်းတွင် သမ္မတနန်းတော်၊ ရုံးနှင့် အရေးပါသော အစိုးရ အဆောက်အဦးများ ရှိနေခြင်းကြောင့် ထိုဧရိယာသို့ မဝင်ရောက်ရန် တရားရုံးအမိန့်ကို လျစ်လျူရှု ချီတက်ခဲ့ခြင်း ဖြစ်သည်။

ဆန္ဒပြသူများနဲ့ သီရီလင်္ကာရဲတပ်ဖွဲ့ကိုတွေ့ရစဉ်(AP)

ပြီးခဲ့သည့် ဇူလိုင်လက ပြင်းထန်သော ဆန္ဒပြပွဲများ ဖြစ်ပွားပြီးနောက် တရားရုံးဘက်က ထိုသို့ အမိန့်ထုတ်ပြန် ခဲ့ခြင်း ဖြစ်သည်။ ဇူလိုင်က ဆန္ဒပြပွဲများတွင် လူထောင်ပေါင်းများစွာသည် သမ္မတနန်းတော်နှင့် ရုံးကို ဝင်စီးကာ ရက်ပေါင်းများစွာ သိမ်းပိုက်ခဲ့သည်။

ထိုပဋိပက္ခကြောင့် ထိုစဉ်က သမ္မတ ဂိုတာဘာယာ ရာဂျာပတ်ဆာ(Gotabaya Rajapaksa)သည် နိုင်ငံမှထွက်ပြေးကာ ရာထူးမှ နုတ်ထွက်ခဲ့ရသည်။

နိုင်ငံခြားကြွေးမြီများ မပေးနိုင်တော့ခြင်းကြောင့် သီရီလင်္ကာနိုင်ငံသည် ဒေဝါလီခံခဲ့ ရသည်။

ဒေဝါလီ ခံခဲ့ပြီးနောက်နိုင်ငံတွင်း အစားအစာ၊ လောင်စာ၊ ဟင်းချက်ဓာတ်ငွေ့နှင့် ဆေးဝါးများ ရှားပါးလာမှုကြောင့် ကြီးမားသော ဆန္ဒပြပွဲများ ပေါ်ပေါက်ခဲ့ရခြင်း ဖြစ်သည်။

သမ္မတသစ် ရာနီဝစ်ရီမီဆင်ဟီ (Ranil Wickremesinghe) သည် လေးနှစ်အတွင်း ဒေါ်လာ ၂ ဒသမ ၉ ဘီလီယံ ရရှိမည့် ကယ်ဆယ်ရေး အစီအစဉ်တစ်ခုကို နိုင်ငံတကာ ငွေကြေးရန်ပုံငွေအဖွဲ့နှင့် ဆွေးနွေးခဲ့သော်လည်း အကြွေး များနှင့်ပတ်သက်၍ အကြွေးရှင်များဘက်မှ အာမခံချက်ပေးမှ သာလျှင် ယင်းကို အပြီးသတ် နိုင်မည် ဖြစ်သည်။

သီရီလင်္ကာနိုင်ငံ၏ နိုင်ငံခြား အကြွေးမှာ ဒေါ်လာ ၅၁ ဘီလီယံကို ကျော်လွန်သွားခဲ့ပြီဖြစ်ပြီး ယင်းတို့မှ ၂၈ ဘီလီယံ ကို ၂၀၂၇ တွင် ပြန်ဆပ်ရမည် ဖြစ်သည်။ အိန္ဒိယနှင့် တခြားသော အကြွေးရှင် နိုင်ငံတစ်ချို့က IMF သတ်မှတ်ချက် များနှင့် ကိုက်ညီစေမည်ဟု အာမခံချက် ပေးထားသော်လည်း တရုတ်အနေဖြင့် တခြားနိုင်ငံများ နည်းတူ လက်ခံ နိုင်မလားဆိုသည်က မေးခွန်းထုတ်စရာ ရှိနေသည်။

သမ္မတသစ် ရာနီဝစ်ရီမီဆင်ဟီကိုတွေ့ရစဉ်(AP)

မတ်လ ၉ ရက်တွင် ကျင်းပရန် စီစဉ်ထားသော မြို့နှင့်ကျေးရွာကောင်စီ ရွေးကောက်ပွဲအတွက် နိုင်ငံရေးပါတီများ ဘက်မှ အမည်စာရင်း တင်သွင်းထားသော်လည်း ယင်းအတွက် လိုအပ်သော ရံပုံငွေကို အစိုးရအနေဖြင့် ကျခံနိုင် ခြင်းမရှိဟု ဝစ်ရီမီဆင်ဟီ အစိုးရ၏ ဘဏ္ဍာရေးဝန်ကြီးက ပြောသည်။

ထိုဆုံးဖြတ်ချက်ကြောင့် ရွေးကောက်ပွဲကော်မရှင်သည် ရွေးကောက်ပွဲကို ရွှေ့ဆိုင်းလိုက်ခြင်း ဖြစ်သည်။

တစ်နှစ်ကျော်ကြာ ကာလအတွင်း ရှားပါးမှုနှင့် နေ့စဉ်စွမ်းအင် ပြတ်တောက်မှုတို့ကို လျော့နည်းလာအောင် ဆောင်ရွက်နိုင်ခဲ့သော်လည်း ဝစ်ရီမီဆင်ဟီသည် ပြည်သူများကြားတွင် ရေးပန်းစား လာခဲ့ခြင်း မရှိပေ။

ရာဂျာပတ်ဆာ ဘက်တော်သား လွှတ်တော်အမတ်များ၏ ရွေးချယ်ခံထားရခြင်းကြောင့် ဝစ်ရီမီဆင်ဟီတွင် မည်သည့် လုပ်ပိုင်ခွင့်မှမရှိဟု အများစုက ပြောသည်။

ဝစ်ရီမီဆင်ဟီသည် လွှတ်တော်တွင်း ထောက်ခံမှု ရရှိရန် ရာဂျာပတ်ဆာ မိသားစု၏ အကျင့်ပျက် ခြစားမှုများကို ကာကွယ်ပေးနေသည်ဟုလည်း စွပ်စွဲခံထားရသည်။

တနင်္ဂနွေနေ့ လူထုချီတက်ပွဲကို ဦးဆောင်ခဲ့သော အတိုက်အခံ National People’s Power ပါတီသည် ၂၂၅ နေရာ ရှိသော သီရီလင်္ကာလွှတ်တော်အတွင်း အမတ် သုံးနေရာသာ ရရှိထားသော်လည်း စီးပွားရေး အကြပ်အတည်း ပြီးနောက် ပြည်သူများ၏ တစ်ခဲနက် ထောက်ခံမှုကို ရရှိထားသည်။

Source: AP

CNI International News

ဝါရှင်တန်၊ဖေဖော်ဝါရီ ၂၅

၂၀၂၁ ခုနှစ်အတွင်း အမေရိကန်သမ္မတ ဘိုင်ဒန်နှင့် မိသားစုအား လက်ဆောင်ပေးခဲ့သူများစာရင်းတွင် ရုရှား သမ္မတ ပူတင်နှင့် အာဖဂန်ပြည်ပြေး သမ္မတဂါနီတို့က ထိပ်ဆုံးမှာ ရှိနေကြောင်း ကြာသပတေးနေ့၌ ထုတ်ပြန် ခဲ့သည့် ဖက်ဒရယ်စာရွက်စာတမ်းများတွင် ဖော်ပြထားသည်ဟု အေပီသတင်းက ဖော်ပြခဲ့သည်။

ဆက်ဆံရေး ကောင်းမွန်နေချိန်တွင် ပူတင်သည် ဘိုင်ဒန်အား ဒေါ်လာ ၁၂၀၀၀ တန်ဖိုးရှိ သစ်စေးသုတ် သေတ္တာနှင့် ဘောပင်တို့ကို လက်ဆောင်ပေးခဲ့သည်။

၂၀၂၁ ခုနှစ်၊ ဇွန်လ ဂျီနီဗာညီလာခံတွင် ပေးခဲ့ခြင်း ဖြစ်သည်။

နောက်တစ်လအကြာတွင် ထိုစဉ်က အာဖဂန်သမ္မတဟောင်း မိုဟာမက် အာရှရဖ် ဂါနီ (Mohammed Ashraf Ghani) နှင့် ဇနီးဖြစ်သူတို့သည် အမေရိကန်သမ္မတနှင့် သမ္မတကတော်တို့အား ခန့်မှန်းခြေ ဒေါ်လာ ၂၈၈၀၀ တန်ဖိုးရှိ ခြေသုတ်ခုံ လက်ဆောင်ပေးခဲ့သည်။

အာဖဂန်သမ္မတ မိုဟာမက် အာရှရဖ် ဂါနီနဲ့ ဘိုင်ဒန်ကိုတွေ့ရစဉ်(AP)

သို့သော် ဂျီနီဗာ အစည်းအဝေး ပြီးဆုံးချိန်မှ စတင်ခဲ့သော အမေရိကန်နှင့် ရုရှားနိုင်ငံတို့ကြား ဆက်ဆံရေး အဆင်မပြေမှုသည် ယူကရိန်းအရေးတွင် ပို၍ ဆိုးရွားခဲ့သည်။

တစ်ဖက်တွင်လည်း ဂါနီသည် အာဖဂန်နိုင်ငံတွင်းမှ အမေရိကန်တပ်များ ထွက်ခွာခဲ့သည့် ၂၀၂၁ ခုနှစ်၊ သြဂုတ်လ နောက်ပိုင်း အာဖဂန်နိုင်ငံကို တာလီဘန်များ ထိန်းချုပ်လိုက်ခြင်းကြောင့် ထွက်ပြေးခဲ့ရသည်။

ဘိုင်ဒန်သည် ၂၀၂၁ ခုနှစ်၊ ဇွန်လတွင် ထိုစဉ်က အာဖဂန်အစိုးရ၌ ဒုတိယရာထူးအကြီးဆုံးဟု သတ်မှတ်ခံထားရသည့် အဗ္ဗဒူလာ အဗ္ဗဒူလာ(Abdullah Abdullah) ထံမှ ခန့်မှန်းခြေ ဒေါ်လာ ၁၁၅၀ တန်ဖိုးရှိ ကျောက်မျက်သေတ္တာ တစ်ခုကိုလည်း ရရှိခဲ့သည်။

ထို့နောက် ဂါနီသည် ၂၀၂၁ ခုနှစ်၊ မတ်လတွင် ကာကွယ်ရေးဝန်ကြီး လွိုက်အော်စတင် (Lloyd Austin) အား ဒေါ်လာ ၂၆၅၀ တန်ဖိုးရှိ ကော်ဇောတစ်ခု လက်ဆောင်ပေးခဲ့သည်။

ကမ္ဘာ့ခေါင်းဆောင်များထံမှ အမေရိကန်အရာရှိများ လက်ဆောင် ရရှိမှုနှင့် ပတ်သက်သည့် အသေးစိတ် အချက်အလက်များကို နိုင်ငံခြားရေးဌာနမှ ထုတ်ပြန်ခဲ့ပြီး Federal Register ဝဘ်ဆိုဒ်၌ ကြာသပတေးနေ့တွင် ဖော်ပြခဲ့ သည်။

အဲလိဇဘတ် ဘုရင်မကြီးနဲ့ ဘိုင်ဒန်ကိုတွေ့ရစဉ်

၂၀၂၁ ခုနှစ်အတွက် လက်ဆောင်စာရင်းဆိုင်ရာ တရားဝင် ထုတ်ပြန်ချက်ကို သောကြာနေ့တွင် ပြုလုပ်သည်။

ပူတင်နှင့်ဂါနီတို့ထံမှ ရရှိသော လက်ဆောင်များကို အမျိုးသားမော်ကွန်းတိုက်တွင် ထိန်းသိမ်းထားသည်။

၄၁၅ ဒေါ်လာထက် ပို၍ တန်ဖိုးရှိသော လက်ဆောင်ပစ္စည်းများကို အမေရိကန်အရာရှိများအနေဖြင့် မော်ကွန်း တိုက်သို့ လွဲပြောင်းပေးရမည်ဆိုသည့် သတ်မှတ်ချက်ကြောင့် ဖြစ်သည်။

သို့သော် လက်ခံရရှိသူမှ ပစ္စည်းတန်ဖိုးအတိုင်း ပေးမည်ဆိုလျှင် ယင်းကို ရယူခွင့်ရှိသည်။ ဘိုင်ဒန်သည် အင်္ဂလန် တွင် ကျင်းပခဲ့သော G-7 အစည်းအဝေး၌ လက်ဆောင်ရရှိခဲ့သော ခန့်မှန်းခြေ ဒေါ်လာ ၂၂၀၀ တန် အဲလိဇဘတ် ဘုရင်မကြီး၏ ငွေဘောင်ကွပ် ဓာတ်ပုံကို ရယူထားရန် ဆုံးဖြတ်ခဲ့သည်ဟုလည်း သိရသည်။

Source: AP

CNI International News

ဝါရှင်တန်၊ဖေဖော်ဝါရီ ၂၅

လာမည့် သီတင်းပတ် နိုင်ငံတကာအစည်းအဝေးပွဲများအတွက် အမေရိကန် နိုင်ငံခြားရေးဝန်ကြီး အန်တိုနီ ဘလင်ကင် (Antony Blinken) သည် အာရှအလယ်ပိုင်းနှင့် တောင်ပိုင်းသို့ လာရောက်မည်ဖြစ်ကာ ရုရှားနှင့် တရုတ်တို့မှ ဝန်ကြီးများနှင့်အတူတကွ အစည်းအဝေးလုပ်ဆောင်သွားမည်ဟု AP သတင်းတွင်ဖော်ပြသည်။

ဘလင်ကင်သည် ဆိုဗီယက်နိုင်ငံဟောင်းများဖြစ်သည့် ကာဇက်စတန်နှင့် ဥဇဘက်ကစ္စတန်တို့ဆီသို့ ဦးစွာ သွားရောက်မည်ဖြစ်ပြီး ထိုမှတစ်ဆင့် G-20 အစည်းအဝေးသို့ တက်ရောက်ရန် အိန္ဒိယသို့ သွားရောက်မည်ဟု နိုင်ငံခြားရေးဌာနက ထုတ်ပြန်သည်။

အဆိုပါ အစည်းအဝေးသို့ တရုတ်နှင့်ရုရှားနိုင်ငံတို့မှ အရာရှိများလည်း တက်ရောက်မည်ဖြစ်သည်။ယင်းအစည်းအဝေးသည် ယူကရိန်းအရေး၊ အင်ဒို-ပစိဖိတ်ဒေသအရေးများနှင့် ပတ်သက်၍ အမေရိကန်-ရုရှား၊ အမေရိကန်-တရုတ် ဆက်ဆံရေးများ ဆိုးရွားနေချိန်တွင် ပေါ်ပေါက်လာသည်။၎င်းတို့သုံးနိုင်ငံသည် ကမ္ဘာလုံးဆိုင်ရာ လွှမ်းမိုး နိုင်မှုတွင် အပြင်းအထန် ယှဉ်ပြိုင်နေကြသူများဖြစ်သည်။ကြာသပတေးနေ့ ကုလသမဂ္ဂအထွေထွေညီလာခံတွင် ရုရှား၏ယူကရိန်းအား ကျူးကျော်မှုကို ဝေဖန်ရှုတ်ချရေး မဲခွဲဆုံးဖြတ်မှု လုပ်ဆောင်ခဲ့သည်။ယင်းတွင် ကြားနေမဲ ၃၂ မဲ ပါဝင်ခဲ့ပြီး ထို ၃၂ နိုင်ငံတွင် ကာဇက်စတန်၊ဥဇဘက်နှင့် အိန္ဒိယတို့ ပါဝင်နေသည်။ အဆိုပါ အခြေအနေက အမေရိကန်ရင်ဆိုင်ရသည့် စိန်ခေါ်မှုများကို မီးမောင်းထိုးပြနေသည်။

အမေရိကန် နိုင်ငံခြားရေးဝန်ကြီး အန်တိုနီ ဘလင်ကင်(ယာ)နှင့် တရုတ်နိုင်ငံခြားရေးဝန်ကြီး ဝမ်ယိတို့ ၂၀၂၂ ခုနှစ် ဇူလိုင်လ ၉ ရက်နေ့တွင် အင်ဒိုနီးရှားနိုင်ငံ ဘာလီအပန်းဖြေကျွန်းရှိ Nusa Dua တွင် တွေ့ဆုံစဉ်(ဓါတ်ပုံ-အေပီ)

အာရှအလယ်ပိုင်းနိုင်ငံများနှင့် အိန္ဒိယတို့သည် ရုရှားနှင့်ရှည်လျားရှုပ်ထွေးသည့် ဆက်ဆံရေးများရှိခဲ့သည့်အတွက် ချက်ချင်းအဆက်ဖြတ်ရန်မှာ မဖြစ်နိုင်ကြောင်း၊သို့သော် ယူကရိန်းပဋိပက္ခအတွင်း ၎င်းတို့ ပါဝင်ကူညီနိုင်မှုနှင့် ပတ်သက်၍ ရှင်းလင်းပြောဆိုသွားမည်ဖြစ်ပြီး ဒေသဆိုင်ရာ အမေရိကန်ထိပ်တန်းသံတမန် ဒေါ်နယ်လူ (Donald Lu) က ပြောသည်။

အိန္ဒိယတွင်ကျင်းပမည့် G-20 အစည်းအဝေးတွင် ဘလင်ကင်နှင့် ရုရှားနိုင်ငံခြားရေးဝန်ကြီး၊ တရုတ်နိုင်ငံခြားရေးဝန်ကြီးတို့ တွေ့ဆုံမှုနှင့်ပတ်သက်၍ အမေရိကန်အရာရှိများ နှုတ်ဆိတ်လျက်ရှိသည်။

အဆိုပါအစည်းအဝေးနှင့်ပတ်သက်၍ သီးသန့်အစီအစဉ်များမရှိကြောင်း နိုင်ငံခြားရေးဌာန ပြောခွင့်ရပုဂ္ဂိုလ်က ပြောခဲ့သော်လည်း ဆက်သွယ်မှုများကို ဖွင့်လှစ်ထားရန် အရေးကြီးသည်ဟု ပြောသည်။ ၂၀၂၂ ခုနှစ် ဘာလီတွင် ကျင်းပခဲ့သော G-20 နိုင်ငံခြားရေးရာဝန်ကြီးများအစည်းအဝေးတွင် ဘလင်ကင်သည် ထိုစဉ်က တရုတ်နိုင်ငံခြားရေး ဝန်ကြီး ဝမ်ယိ (Wang Yi)နှင့် တွေ့ဆုံခဲ့ကာ အဆိုပါတွေ့ဆုံမှုမှတစ်ဆင့် နိုဝင်ဘာလတွင် သမ္မတနှစ်ဦးအကြား ထိပ်သီး အစည်း အဝေးကို ဖြစ်စေခဲ့သည်။

Source:AP

CNI International News

မော်စကို၊ဖေဖော်ဝါရီ ၂၅

ရုရှားနှင့် ယူကရိန်းတို့၏ ထာဝရငြိမ်းချမ်းရေးအတွက် တစ်ခုတည်းသော နည်းလမ်းမှာ ရန်လိုသော တိုင်းပြည်များ ၏ နယ်စပ်ကို နောက်ဆုတ်ရေးဖြစ်သည်ဟု ရုရှားသမ္မတဟောင်း ဒီမီထရီ မက်ဗီဒက်ဗ် (Dmitry Medvedev) က ပြောကြောင်း အယ်ဂျာဇီးယား သတင်းတွင် ဖော်ပြထားသည်။

လက်ရှိ ရုရှားလုံခြုံရေးကောင်စီ၏ ဒုတိယဥက္ကဋ္ဌဖြစ်သူ မက်ဗီဒက်ဗ်သည် ယူကရိန်းကျူးကျော်စစ် တစ်နှစ်ပြည့်ချိန် သောကြာနေ့က ၎င်း၏ တယ်လီဂရမ်၌ ထိုသို့ ပြောဆိုခဲ့ခြင်း ဖြစ်သည်။

အောင်ပွဲရရှိမည်ဖြစ်ကြောင်း၊ ယင်းကို တတ်နိုင်သမျှ မြန်မြန် အလိုရှိကြောင်းနှင့် ထိုနေ့သည် ရောက်လာမည် ဖြစ်ကြောင်း မက်ဗီဒက်ဗ်က ပြောသည်။

ယူကရိန်းနှင့် အနောက်အုပ်စုတို့ကြား ဆွေးနွေးညှိနှိုင်းမှုများကြောင့် သဘောတူညီချက်တစ်ချို့ ရရှိလိမ့်မည်ဟု လည်း ၎င်းက ကြိုတင်ခန့်မှန်းသည်။

 ပိုလန်နယ်စပ်မှာ ပိုလန်စစ်သားများကိုတွေ့ရစဉ်(GETTY IMAGES) 

ရရှိလာမည့် သဘောတူညီချက်သည် အမှန်တကယ် နယ်စပ်ရေးဆိုင်ရာ အခြေခံကျသော သဘောတူညီချက်များ နည်းပါးမည် ဖြစ်သကဲ့သို့ ဥရောပလုံခြုံရေး လမ်းကြောင်းတစ်ခုလုံးကို လွှမ်းခြုံနိုင်မည် မဟုတ်ကြောင်း၊ ထို့ ကြောင့် ရုရှားအနေဖြင့် ၎င်းတို့၏ နယ်စပ်ကို ချဲ့ထွင်ရန် အရေးကြီးကြောင်းလည်း ၎င်းက ပြောသည်။

ထိုအခြေအနေများကြောင့် အထူးစစ်ဆင်ရေး၏ ရည်မှန်းချက်များကို ပြည့်မှီအောင် လုပ်ဆောင်သင့်ကြောင်း၊ ပိုလန်နယ်စပ် ဖြစ်နေပင်လျှင် ရုရှား၏လုံခြုံရေးကို ခြိမ်းခြောက်လာမည် ဆိုပါက နောက်ဆုတ်ရန် ဆောင်ရွက်သွားမည်ဖြစ်ကြောင်း မက်ဗီဒက်ဗ်က ပြောသည်။

ပိုလန်သည် အရှေ့ပိုင်းတွင် ယူကရိန်း၊ ဘီလာရုစ်တို့နှင့် နယ်နိမိတ်ချင်း ထိစပ်လျက်ရှိပြီး အရှေ့မြောက်ပိုင်းတွင် ရုရှားနှင့် ကီလိုမီတာ ၂၀၀ ထိစပ်နေသည်။

ဘိုင်ဒန်နဲ့ပိုလန်ခေါင်းဆောင်ကိုတွေ့ရစဉ်(GETTY IMAGES)

ပိုလန်နှင့်နယ်စပ်ကို ကျူးကျော်မည်ဆိုလျှင် ရုရှားသည် နေတိုးအဖွဲ့နှင့် တိုက်ရိုက်ပဋိပက္ခဖြစ်သော အခြေအနေသို့ ပထမဆုံး ရောက်ရှိသွားမည်လည်း ဖြစ်သည်။

ဝါဆောမြို့သို့ ရောက်ရှိခဲ့စဉ်တွင် အမေရိကန်သမ္မတ ဘိုင်ဒန်က နေတိုးအဖွဲ့၏ နယ်မြေတစ်လက်မချင်းစီကို ကာကွယ်ပေးသွားမည်ဟု ပြောခဲ့သည်။

အသက် ၅၇ နှစ်အရွယ် မက်ဗီဒက်ဗ်သည် ယူကရိန်းစစ်ပွဲ စတင်ချိန်ကတည်းက ရန်လိုသော၊ သဘောထားတင်း သော ပုံစံပြောဆိုမှုများကို ဆက်တိုက် ပြုလုပ်ခဲ့သူဖြစ်ပြီး ၎င်းသည် ပူတင်၏ ရာထူးကို ဆက်ခံနိုင်သူများမှ တစ်ဦး ဖြစ်သည်ဟုလည်း နိုင်ငံရေးလေ့လာသုံးသပ်သူများက ယူဆထားသည်။

Source: အယ်ဂျာဇီးယား

CNI International News

တဲလ်အဗစ်၊ ဖေဖော်ဝါရီ ၂၄

ဂါဇာရှိ ပါလက်စတိုင်း စစ်သွေးကြွးများက အစ္စရေးတောင်ပိုင်းသို့ ဒုံးကျည်များဖြင့် ပစ်ခတ်တိုက်ခိုက်ခဲ့ပြီး အစ္စရေး ဘက်ကလည်း ကမ်းရိုးတန်းဒေသရှိ ပစ်မှတ်များကို ကြာသပတေးနေ့ အစောပိုင်းတွင် လေကြောင်းမှ ပစ်ခတ် တိုက်ခိုက်ခဲ့သည်ဟု အေပီသတင်းတွင် ဖော်ပြထားသည်။

အစ္စရေးတို့၏ စီးနင်းမှု တစ်ခုကြောင့်ဖြစ်သော အပြန်အလှန် ပစ်ခတ်မှု တစ်ခုအတွင်း ပါလက်စတိုင်း ၁၀ ဦး သေဆုံး ခဲ့ရပြီးနောက် ထိုသို့ ဖြစ်ပွားခဲ့ခြင်း ဖြစ်သည်။

ယခုကဲ့သို့ သွေးထွက်သံယိုမှုများက နှစ်များစွာအတွင်း အနောက်ဘက် ကမ်းခြေဒေသတွင် အဆိုးရွားဆုံး အခြေအနေများမှ တစ်ခု ဖြစ်စေခဲ့သည်။

ယခုနှစ်စမှ စ၍ အနောက်ဘက် ကမ်းခြေတွင် အစ္စရေးတို့၏ တိုက်ခိုက်မှုများကြောင့် ပါလက်စတိုင်း ၁၀ ဦး သေဆုံးခဲ့ကာ ပါလက်စတိုင်းတို့၏ တိုက်ခိုက်မှုများကြောင့် ၂၀၂၃ ခုနှစ် သေဆုံးသူ အစ္စရေး အရေအတွက်သည် လည်း ၁၁ ဦးအထိ ရှိလာခဲ့ပြီ ဖြစ်သည်။

ပါလက်စတိုင်းများကိုတွေ့ရစဉ်(AP)

ကြာသပတေးနေ့ အစောပိုင်းတွင် အစ္စရေးတောင်ပိုင်းသို့ ဂါဇာကမ်းရိုးတန်းမှ ဒုံးကျည်ခြောက်လုံးနှင့် လေယာဉ် ပစ် ဒုံးကျည်နှစ်လုံး ပစ်ခဲသည်ဟု အစ္စရေးစစ်တပ်က ပြောသည်။

ဒုံးကျည် ငါးလုံးကို အစ္စရေးလေကြောင်း ကာကွယ်ရေးမှ ကြားဖြတ် ပစ်ချနိုင်ခဲ့သော်လည်း တစ်လုံးသည် အစ္စရေး ဘက်သို့ ကျရောက်ခဲ့ကြေင်း၊ ဒုံးကျည်များသည် ၎င်းတို့၏ ပစ်မှတ်များကို ထိမှန်ခြင်း မရှိကြောင်း အစ္စရေးစစ်တပ်က ပြောသည်။

လက်ရှိ အချိန်အထိ ဒုံးကျည်ပစ်ခတ်မှုများကို မည်သည့် ပါလက်စတိုင်း စစ်သွေးကြွအဖွဲ့မှ တာဝန်ယူ ပြောဆိုခြင်း မရှိသေးပေ။

ထို့နောက် အစ္စရေးလေယာဉ်သည် ဂါဇာမြောက်ပိုင်းနှင့် အလယ်ပိုင်းရှိ ပစ်မှတ်များကို ပစ်ခတ်တိုက်ခိုက်မှု လုပ်ဆောင်ခဲ့ပြီး ယင်းတို့တွင် လက်နက် ထုတ်လုပ်ရေး နေရာတစ်ခု၊ ဒေသကို အုပ်ချုပ်နေသည့် ဟားမတ်ဇ် စစ်သွေးကြွအဖွဲ့၏ ခြံဝန်းတစ်ခုတို့ ပါဝင်သည်။

ယခုတိုက်ခိုက်မှုများနှင့် ပတ်သက်၍ ထိခိုက်ဒဏ်ရာ ရရှိမှု အခြေအနေကို အစ္စရေး၊ ပါလက်စတိုင်း နှစ်ဖက်စလုံးမှ ထုတ်ပြန်ခြင်း မရှိသေးပေ။

အစ္စရေးရဲ့ လေကြောင်းတိုက်ခိုက်မှုကိုခံလိုက်ရတဲ့ ဂါဇာဒေသ (AP)

ယခုကဲ့သို့ အကြမ်းဖက် တိုက်ခိုက်မှုများသည် အစ္စရေး၏ လက်ယာစွန်း အစိုးရသစ် တက်လာပြီး ပထမ သီတင်း ပတ်များတွင် ပေါ်ပေါက်လာခြင်း ဖြစ်သည်။ အစိုးရသစ်သည် ပါလက်စတိုင်းများနှင့် ပတ်သက်၍ တင်းကြပ်စွာ ကိုင်တွယ် ဆောင်ရွက်သွားမည်ဟု ကတိပြုထားသည်။

အစ္စရေး လုံခြုံရေးတပ်ဖွဲ့များသည်လည်း အနောက်ဘက်ကမ်းခြေရှိ အလိုရှိသော စစ်သွေးကြွများကို ပစ်မှတ်ထား စီးနင်းမှုများ လုပ်ဆောင်လျက်ရှိသည်။

ပြီးခဲ့သည့် နွေဦး ပါလက်စတိုင်းတို့၏ တိုက်ခိုက်မှုများ အရှိန်မြင့် လာချိန်တွင် စတင်ခဲ့သော စီးနင်းမှုများသည် စစ်သွေးကြွ ကွန်ယက်များကို ဖျက်ဆီးရန်၊ နောက်ထပ် တိုက်ခိုက်မှုများ မလုပ်ဆောင်နိုင်ရန် ရည်ရွယ်သည်ဟု အစ္စရေးဘက်က ပြောသည်။

သို့သော် ထိုသို့သော စစ်ဆင်ရေးများသည် အကြမ်းဖက်မှုများ လျော့ကျစေရေးအတွက် လုပ်ဆောင်နိုင်မှု အနည်းသာ ရှိသည်။

Source: AP

CNI International News

ဘန်ဂါလူရူ၊ ဖေဖော်ဝါရီ ၂၄

G-20 ဘဏ္ဍာရေးအကြီးအကဲများကို လက်ခံတွေ့ဆုံမည့် အိန္ဒိယအစိုးရသည် ၎င်းတို့နှင့်ပူးတွဲထုတ်ပြန်မည့် ကြေညာချက်များ၌ ရုရှား၏ ယူကရိန်းအပေါ် တိုက်ခိုက်မှုအား ရည်ညွှန်းရာတွင် “စစ်ပွဲ” ဆိုသည့်စကားလုံး အသုံးအနှုန်းကို အသုံးပြုခြင်းမှ ရှောင်ကြဉ်ရန် ကြိုးပမ်းနေသည်ဟု ထိုကိစ္စနှင့်နီးစပ်သူတစ်ဦးက ပြောကြောင်း ဘန်ကောက်ပို့စ် သတင်းတွင် ဖော်ပြထားသည်။

ယင်းက ပြီးခဲ့သည့် နိုဝင်ဘာလတွင် အင်ဒိုနီးရှားမှ ဥက္ကဋ္ဌအဖြစ် ဆောင်ရွက်စဉ် ဘာလီတွင် လုပ်ဆောင်ခဲ့သော အစည်းအဝေးအတွင်း ခေါင်းဆောင်များ ရရှိခဲ့သော ဘုံသဘောတူညီချက်များနှင့် ကွဲလွဲနေသည်။

အိန္ဒိယမှ တာဝန်ရှိသူများသည် “စစ်ပွဲ”အစား ပဋိပက္ခဟူသော စကားလုံး အသုံးအနှုန်းကို ပို၍ သုံးစွဲလိုနေသည် ဟုလည်း ပြောသည်။

နိုင်ငံတစ်ချို့၏ ရုရှားကို နောက်ထပ် အရေးယူပိတ်ဆို့မှုများ ချမှတ်ရေး အစီအစဉ်များက အစည်းအဝေး၏ အဓိက အကြောင်းအရာများအပေါ် ဖုံးလွှမ်းသွားမည်ကို အိန္ဒိယအရာရှိများက စိုးရိမ်နေကြောင်း ထိုကိစ္စနှင့် နီးစပ်သူက ပြောသည်။

ယခုကိစ္စသည် တရားဝင် ထုတ်ပြန်ချက် မဟုတ်ခြင်းကြောင့် ၎င်းကို မည်သူမည်ဝါဖြစ်ကြောင်း မဖော်ပြရန်လည်း ယင်းက တောင်းဆိုသည်။

G-20 ဘဏ္ဍာရေးအကြီးအကဲများကိုတွေ့ရစဉ်

ယခုကိစ္စနှင့်ပတ်သက်၍ အိန္ဒိယဘဏ္ဍာရေးဌာနမှ ပြောခွင့်ရပုဂ္ဂိုလ် တစ်ဦးကို ဆက်သွယ်ခဲ့သော်လည်း မှတ်ချက် ပေးရန် ငြင်းဆန်သည်။

အိန္ဒိယ G-20 အစည်းအဝေး၏ ကန့်သတ်ချက်သည် နိုဝင်ဘာလ G-20 အစည်းအဝေးတွင် အသုံးပြုခဲ့သော စကားလုံး အသုံးအနှုန်းများနှင့် ယှဉ်လျှင် နောက်ပြန်ဆွဲခြင်း ဖြစ်သည်။

ဘာလီ အစည်းအဝေးကို အမေရိကန်နှင့် တရုတ်သမ္မတတို့ တက်ရောက်ခဲ့ပြီး ထုတ်ပြန်သော ကြေညာချက်တွင် G-20 ခေါင်းဆောင်များက ယူကရိန်းအရေးနှင့် ပိတ်ဆို့အရေးယူမှုများ ချမှတ်ခြင်းတွင် ကွဲပြားသော သဘောထား၊ အမြင်များရှိသော်လည်း အဖွဲ့ဝင်အများစုက ယူကရိန်းစစ်ပွဲကို ပြင်းပြင်းထန်ထန် ကန့်ကွက်ရှုတ်ချသည်ဟု ရေးသားခဲ့သည်။

ဘန်ကောက်မြို့တွင် ကျင်းပခဲ့သော အာရှ-ပစိဖိတ် စီးပွားရေး ပူးပေါင်းဆောင်ရွက်မှု (Apec) ဖိုရမ်မှ ထုတ်ပြန်ချက် တွင်လည်း စစ်ပွဲဆိုသော စကားလုံးကို ကျယ်ကျယ်ပြန့်ပြန့် သုံးနှုန်းခဲ့သည်။

ရုရှား၏ ယူကရိန်း စစ်ပွဲအပေါ် စကားလုံး အသုံးအနှုန်းနှင့် ပတ်သက်သည့် အငြင်းပွားမှုများ ပြန်လည် ပေါ်ပေါက် လာခြင်းက အစည်းအဝေးနှင့် ပတ်သက်သည့် အိန္ဒိယ၏တခြားသော ရည်ရွယ်ချက်များကိုလည်း မှေးမှိန်စေသည့် အလားအလာ ရှိသည်။

ပူတင်နဲ့ မိုဒီကိုတွေ့ရစဉ်

အိန္ဒိယ၏ G-20 ဥက္ကဋ္ဌ သက်တမ်းတစ်လျှောက် ပုံရိပ်အမြင့်ဆုံး အခမ်းအနားကို သောကြာနှင့် စနေနေ့တို့တွင် နှစ်ရက်ကြာ ကျင်းပသွားမည်ဖြစ်ပြီး ယင်းတို့တွင် ဆင်းရဲသော နိုင်ငံများအပေါ် အကြွေးများ လျော်ပစ်ရေး၊ ကမ္ဘာလုံးဆိုင်ရာ စီးပွားရေးနှင့် မူဝဒါရေးရာ ရှုမြင်သုံးသပ်မှုတို့အပြင် နိုင်ငံတကာ အခွန်ရေးရာ အစီအစဉ်များကို ဆွေးနွေးသွားမည်ဖြစ်သည်။

တရုတ်၏ အင်အားကြီးမားလာမှုကို စောင့်ကြည့်ရန်အတွက် အိန္ဒိယသည် အမေရိကန်နှင့် ယင်း၏ မဟာမိတ်များ အတွက် ပထဝီနိုင်ငံရေးအရ အရေးပါမှု မြင့်တက်လာကာ ဂျပန်၊ သြစတြေးလျတို့ ပါဝင်သော Quad တွင်လည်း အိန္ဒိယအပေါ် အာရုံစိုက်မှု မြင့်မားလာသည်။

တစ်ဖက်တွင်လည်း အိန္ဒိယအစိုးရသည် ဈေးပေါသော စွမ်းအင်နှင့်လက်နက်များ ရရှိရန် ရုရှားအစိုးရနှင့် အနီးကပ် ဆက်ဆံရေးကို ထိန်းသိမ်းရေး ဆက်လက် ဆောင်ရွက်လျက်ရှိသည်။

Source: ဘန်ကောက်ပို့စ်

CNI International News

မော်စကို၊ ဖေဖော်ဝါရီ ၂၄

ကြန့်ကြာနေသော Sarmat တိုက်ချင်းပစ် ပဲ့ထိန်းဒုံးကျည်များ တပ်ဆင်နေရာ ချထားရေးကို ယခုနှစ်အတွင်း လုပ်ဆောင်သွားမည်ဟု ရုရှားသမ္မတ ဗလာဒီမာပူတင်က ပြောကြောင်း အယ်ဂျာဇီးယား သတင်းတွင် ဖော်ပြထား သည်။

အိမ်နီးချင်း ယူကရိန်းကို ကျူးကျော်စစ် ဆင်နွှဲပြီး တစ်နှင့်ပြည့်ချိန်တွင် ထိုသို့ ပြောခဲ့ခြင်း ဖြစ်သည်။

အရည်လောင်စာသုံး RC-28 Sarmat ဒုံးကျည်များကို အနောက်အုပ်စု လေ့လာသူများက Satan 2 ဟု ခေါ်ပြီး ယင်းကို ပူတင်က ၂၀၁၈ ခုနှစ်တွင် ပထမဆုံး ထုတ်ဖော်ကြေညာခဲ့သည်။

ပြီးခဲ့သည့်နှစ်တွင် တပ်ဆင် တပ်ဖြန့်ရန် ရည်ရွယ်ထားခြင်း ဖြစ်သည်။ ယခုသီတင်းပတ် အစောပိုင်း ဘိုင်ဒန်၏ ယူကရိန်း ခရီးစဉ်မတိုင်ခင် ရုရှားဘက်က Sarmat ဒုံးကျည်စမ်းသပ်မှုတစ်ခု လုပ်ဆောင်ခဲ့သော်လည်း မအောင် မြင်ခဲ့ဟု အမေရိကန်ဘက်က ယူဆထားကြောင်း CNN သတင်းတွင် ဖော်ပြသည်။

Sarmat ဒုံးကျည်ကိုတွေ့ရစဉ် (GETTY IMAGES)

သို့သော် ရုရှားကာကွယ်ရေးဌာနက ထိုသတင်းအပေါ် တစ်စုံတစ်ရာ မှတ်ချက်ပေးခဲ့ခြင်း မရှိပေ။ ၃၅ မီတာ ရှည်လျားသော Sarmat ဒုံးကျည်များကြောင့် ရုရှား၏ ရန်ဘက်များ နှစ်ခါပြန် စဉ်းစားရမည်ဟု ပူတင်က ပြောခဲ့ဖူး သည်။

ထိုဒုံးကျည်များသည် ၁၈၀၀၀ ကီလိုမီတာအထိ သွားနိုင်ပြီး ယင်းထက် ပိုသွားနိုင်သည်ဟုလည်း တစ်ချို့က ခန့်မှန်း သည်။ ထိုဒုံးကျည်တွင် ကွဲပြားသော ပစ်မှတ်များကို ချိန်ရွယ်နိုင်သည့် နျူကလီးယား ထိပ်ဖူးတပ် MIRV အနည်းဆုံး ၁၀ ခုပါဝင်သည်။

ထို့အပြင် ယင်းသည် ဒုံးကျည်ကာကွယ်ရေး စနစ်များကို ရှောင်လွှဲရန် ပျံသန်းရာလမ်းကြောင်း ခန့်မှန်းမရသည့် Avangard စက်မဲ့ယာဉ်များကိုလည်း ပို့ဆောင်နိုင်သည်။

ယခင်အတိုင်းပင် သုံးမျိုးပေါင်း နျူကလီးယား လက်နက်ကို အဆင့်မြှင့်တင်ရေးအတွက် အထူးအာရုံစိုက် ဆောင်ရွက်ခဲ့ကြောင်း၊ ယခုနှစ်အတွင်း ပထမဆုံးသော Sarmat ဒုံးကျည်စနစ် လောင်ချာများကို တိုက်ခိုက်ရေး တာဝန်များ၌ စတင်အသုံးပြုသွားမည်ဖြစ်ကြောင်း အဖမြေအား ကာကွယ်သူ (Defender of Fatherland Day) နေ့ အခမ်းအနားဖြစ်သော ကြာသပတေးနေ့၌ ရုရှားမှ ထုတ်ပြန်သော ဗွီဒီယိုဖိုင်တစ်ခုတွင် ပူတင်က ပြောသည်။

ဘိုင်ဒန်နဲ့ဇာလန်းစကီး ကိယက်ဗ်မြို့မှာ တွေ့ဆုံစဉ်(AP)

ထိုဒုံးကျည်များကို ၂၀၂၂ နှစ်ကုန်ပိုင်းတွင် စတင်ဖြန့်ကျက်သွားမည်ဟု ပူတင်က ပြီးခဲ့သည့် ဇွန်လတွင် ပြောခဲ့ သည်။

ယူကရိန်းအား ကျူးကျော်ခဲ့ပြီး တစ်နှစ်ပြည့်နေ့တွင် နျူကလီးယား လက်နက် ထိန်းချုပ်ရေးဆိုင်ရာ အဆုံးသတ် လိုက်ပြီဟု အချက်ပြမှုလည်း ဖြစ်သည်။

အင်္ဂါနေ့ နိုင်ငံတော် မိန့်ခွန်းတွင် အမေရိကန်နှင့် နျူကလီးယား လက်နက် ထိန်းချုပ်ရေး သဘောတူညီချက် New START ကို ရပ်ဆိုင်းကြောင်း ပူတင်က ကြေညာခဲ့သည်။ သို့သော် စာချုပ်သက်တမ်း ကုန်ဆုံးမည့် ၂၀၂၆ ခုနှစ်အထိ စာချုပ်ပါ အချက်အလက်များကို လိုက်နာကျင့်သုံးသွားမည်ဖြစ်ကြောင်း နောက်ပိုင်းတွင် ရုရှားအစိုးရဘက်မှ ထုတ်ပြန်ခဲ့သည်။

Source: အယ်ဂျာဇီးယား