CNI International News

နယူးယောက်၊ စက်တင်ဘာ ၂၁

ဆီးရီးယားမှ ယူကရိန်းအထိ ဖြစ်ပွားနေသည့် နိုင်ငံအချင်းချင်း ပဋိပက္ခများကို ဖြေရှင်းပေးသူအဖြစ် ရပ်တည်ရန် ဆောင်ရွက်မည့် တူရကီ၏ မဟာဗျူဟာများကို တူရကီသမ္မတအာဒိုဂန်က စက်တင်ဘာ ၂၀ ရက်တွင် ကုလသမဂ္ဂ အထွေထွေ ညီလာခံ မိန့်ခွန်း၌ ချပြကာ ကြိုးပမ်းနေကြောင်း သိရသည်။

တူရကီသမ္မတသည် ဒေသတွင်း အငြင်းပွားမှုများ ပတ်ပတ်လည်တွင် ဝိုင်းနေသည့် နိုင်ငံတစ်နိုင်ငံကို ဦးဆောင်နေ ရသူ ဖြစ်သည်။

တူရကီနိုင်ငံ၏ လက်ရှိ ငွေကြေးဖောင်းပွမှုနှုန်းမှာ တရားဝင် ၈၀ ရာခိုင်နှုန်းဖြစ်သော်လည်း ယင်းပမာဏထက် နှစ်ဆပိုများကြောင်း လေ့လာသူများက ထောက်ပြနေချိန်၌ အထက်ပါအတိုင်း သမ္မတအာဒိုဂန်၏ မိန့်ခွန်း ထွက် ပေါ်လာခဲ့ခြင်း ဖြစ်သည်။

အာဒိုဂန်သည် သူ့အစိုးရ၏ စီးပွားရေးမူဝါဒများထက် တကမ္ဘာလုံး အတိုင်းအတာဖြင့် အစားအသောက်နှင့် စွမ်းအင်ဈေးနှုန်း မြင့်မားလာခြင်း၊ ငွေ‌ကြေးဖောင်းပွမှုနှုန်း အဆမတန် ဖြစ်နေခြင်းတို့အပေါ် အပြစ်တင်ခဲ့သည်။
တူရကီသည် ကမ္ဘာ့နိုင်ငံအချင်းချင်း ပဋိပက္ခများ၌ ဖြေရှင်းချက်တိုင်း၏ တစိတ်တပိုင်း ဖြစ်စေရန် ကြိုးစားနေ ကြောင်း ၎င်းက ဆက်လက် ပြောကြားခဲ့သည်။

ကုလ ညီလာခံ (GETTY IMAGES)

အာဒိုဂန်၏ မိန့်ခွန်းထဲတွင် ကမ္ဘာ့ပြဿနာများကို ထိထိမိမိ ချပြသွားခဲ့ရာ အီရတ်တွင် တည်ငြိမ်ရေး လိုအပ်ချက်၊ လစ်ဗျားတွင် တရားမျှတသော ရွေးကောက်ပွဲနှင့် အာဖရိကဦးချိုဒေသ စားနပ်ရိက္ခာဖူလုံရေး၊ ပါလက်စတိုင်း နိုင်ငံတော်အတွက် လိုအပ်ချက်၊ မြန်မာနိုင်ငံမှ ဘင်္ဂါလီ(မူရင်း-ရို)ကိစ္စနှင့် တရုတ်နိုင်ငံမှ ဝီဂါမွတ်ဆလင်ကိစ္စ၊ ကမ္ဘာ တဝန်း မွတ်ဆလင်ဆန့်ကျင်ရေး စိတ်ဓာတ်များ စသည်တို့လည်း ပါဝင်ခဲ့သည်။

၎င်းမှတ်ချက်များတွင် ပဋိပက္ခ အများအပြား၌ တူရကီ၏ အခန်းကဏ္ဍကို တိုက်ရိုက်ဖြစ်စေ၊ သွယ်ဝိုက်၍ဖြစ်စေ မီးမောင်းထိုးပြခဲ့သည်။

ဆီးရီးယားမြောက်ပိုင်း၌ အမေရိကန် ကျောထောက်နောက်ခံပြု ကာ့ဒ်သူပုန်များကို တိုက်ရိုက်ချေမှုန်းခြင်း၊ ယူကရိန်း၌ အဆင့်မြင့် သံတမန်ဆက်ဆံရေး၊ ထရီပိုလီ အခြေစိုက် အစိုးရကို ထောက်ခံသည့် လက်နက်ကိုင်တွင် လစ်ဗျားတပ်စွဲထားခြင်း၊ ဆိုက်ပရက်စ်နှင့်ဂရိတို့ ကာလအတန်ကြာ တင်းမာနေမှု၊ အဇာဘိုင်ဂျန်နှင့်အာမေးနီးယား ပဋိပက္ခတို့ကိုလည်း အာဒိုဂန်က သုံးသပ်ပြောကြားခဲ့သည်။

“လူသန်းပေါင်းများစွာကို ထိခိုက်စေတဲ့ အဲဒီကပ်ဘေးတွေအားလုံးအတွက် ကုလသမဂ္ဂက ပိုထိရောက်ရမယ်၊ ဩဇာပိုရှိရမယ်” ဟု အာဒိုဂန်က မှတ်ချက်ချခဲ့သည်။

Source: AP

CNI International News

လန်ဒန်၊ စက်တင်ဘာ ၂၀

ဂျိုးဘိုင်ဒန်သည် ကမ္ဘာပေါ်တွင် ဩဇာအာဏာ အရှိဆုံးပုဂ္ဂိုလ်အဖြစ် နေရာအတော်များများ၌ နိုင်ငံတကာ ခေါင်းဆောင်များ စုဝေးမိသည့်အခါတိုင်း ရှေ့ဆုံးနှင့် အလယ်ဗဟိုတွင် နေရာယူစမြဲ ဖြစ်သော်လည်း ဗြိတိန် ထီးသုံးနန်းသုံး တော်ဝင်ဓလေ့ထုံးစံနှင့် နှိုင်းယှဉ်လာသည့်အခါ အနောက်သို့ ရောက်သွားခဲ့ကြောင်း The Telegraph မီဒီယာက ရေးသားဖော်ပြသည်။

ဗြိတိန်ဘုရင်မကြီး အဲလိဇဘက် (၂) ၏ ဈာပနအခမ်းအနားကို စက်တင်ဘာ ၁၉ ရက်၌ ဝက်စမင်စတာ အက်ဗေး ဘုရားကျောင်းမှာ ကျင်းပခဲ့ရာ အမေရိကန်သမ္မတ ဂျိုးဘိုင်ဒန်နှင့် သမ္မတကတော်တို့သည် ခန်းမ၏ တောင်ဘက် ခြမ်း၊ ၇ တန်းတွဲ ထိုင်ခုံ၏ အနောက်ဘက်တွင် အစီအစဉ် နေရာချထားပေးမှုအတိုင်း ထိုင်ခဲ့ကြရသည်။

မစ္စတာဘိုင်ဒန်၏ ရှေ့တန်းတွင် ကနေဒါဝန်ကြီးချုပ် ဂျက်စတင်ထရူဒျူး ထိုင်ခွင့်ရသည်။ ကနေဒါသည် သာမန် အချိန်များတွင် အမေရိကန်၏ ချိုးနှိမ်ခြင်းကို မကြာခဏ ခံရလေ့ရှိသည့် အိမ်နီးချင်းဖြစ်သည်။

ထို့ပြင် ဈာပနအခမ်းအနား ထိုင်ခုံအစီအစဉ်အရ အသက် ၇၉ နှစ်အရွယ်ရှိ ဘိုင်ဒန်သည် ပိုလန်ခေါင်းဆောင် အန်ဒရေးဒူဒါ၏ အနောက်တည့်တည့်သို့ ရောက်သွားခဲ့ပြီး ချက်သမ္မတနိုင်ငံ၏ ဝန်ကြီးချုပ် ပက်သလစ် ဖီယာလာ က ဘိုင်ဒန်၏ အနောက်ဘက်တန်းတွင် ထိုင်နေခဲ့သည်။

ဗြိတိန်ဘုရင်မကြီး ရုပ်ကလာပ်ကို သယ်ဆောင်နေစဉ် 

အမေရိကန်သမ္မတ ဘိုင်ဒန်ကတော့ သူနှင့် ဘေးကပ်လျက် နေရာရသူ ဆွစ်ဇာလန်သမ္မတ အစ်နာဇီယိုကက်ဆစ် နှင့် စကားလက်ဆုံ ကျနေခဲ့သည်။

ဘုရားကျောင်းအတွင်း ခုံတန်းနှင့်နံရံအကြား မင်းလမ်းနှင့်အပြိုင် တစ်ဖက်တချက်တွင် ဘိုင်ဒန်နှင့် ယှဉ်လျက် ထိုင်နေသူ တစ်ဦးကတော့ တောင်ကိုရီးယားသမ္မတ ယွန်ဆော့ရွဲ ဖြစ်သည်။ ထိုခုံတန်း၏ နှစ်တန်းမြောက်တွင် ပြင်သစ်သမ္မတ အီမန်နွယ်မက်ခရွန်ကို အစီအစဉ်အတိုင်း နေရာချထားပေးသည်။

ဈာပနသို့ တက်ရောက်လာသည့် ကနေဒါ ကိုယ်စားလှယ်အဖွဲ့တွင် ဘီဘီစီ၏ Killing Eve အစီအစဉ် တင်ဆက်သူ မင်းသမီး စန္ဒရာအိုးလည်း ပါဝင်ခဲ့ပြီး ၎င်းသည် ပြီးခဲ့သည့် ဇွန်လ၌ အနုပညာ အောင်မြင်မှုများအတွက် Order of Canada အဆင့်အတန်း ပေးအပ်ခြင်းခံရသူဖြစ်သည်။

ထို့ပြင် နိုင်ငံတကာ အနုပညာသည် တစ်ဦးဖြစ်သည့် အော်ပရာအဆိုတော် ဒိန်းကီရီတီကာနာဝါသည် နယူးဇီလန် နိုင်ငံမှ ကိုယ်စားလှယ် အဖွဲ့နှင့်အတူ ဘုရင်မကြီး၏ ဈာပနသို့ တက်ရောက်လာခဲ့ကြောင်း တွေ့ရသည်။

အမေရိကန်သမ္မတ ဂျိုးဘိုင်ဒန်၏ အနောက်ဘက် ခုံတန်းတွင် ဗြိတိန်ဝန်ကြီးချုပ် ဖြစ်ခဲ့ဖူးသူ ၇ ဦးစလုံး စုံညီစွာ တက်ရောက်ခဲ့ကြပြီး သူ့ခုံနှင့်သူ ခန့်ညားစွာ ထိုင်ခဲ့ကြသည်။

ဈာပနအခမ်းအနားသို့ တက်ရောက်လာတဲ့ နိုင်ငံတကာခေါင်းဆောင်များ

၎င်းတို့နှင့်အတူ ဘုရင်မကြီး အဲလိဇဘက် (၂) လက်ထက်တွင် ဝန်ကြီးချုပ် ၁၅ ဦး တိတိရှိခဲ့ရာ ပထမဆုံး ဝန်ကြီး ချုပ်မှာ ဝင်စတန်ချာချီဖြစ်ပြီး နောက်ဆုံး ဝန်ကြီးချုပ်မှာ လက်ရှိတာဝန် ထမ်းဆောင်နေဆဲ လစ်ဇ်ထရက်စ်တို့ ဖြစ် သည်။

လစ်ဇ်ထရက်စ်သည် ဘုရင်မကြီး မကွယ်လွန်မီ ရက်ပိုင်းအလိုမှာပင် ဗြိတိန်ဝန်ကြီးချုပ်အဖြစ် အတည်ပြုပေးခဲ့သည်။

နိုင်ငံတော်အဆင့် ဈာပန အခမ်းအနားဖြစ်၍ ကမ္ဘာအရပ်ရပ်မှ ခေါင်းဆောင်များအကြား တခါတရံ အဖုအထစ် ဖြစ်လေ့ရှိသော သံခန်းတမန်ခင်းရေးရာ ပြဿနာများကို နော့ဖလော့မြို့စား အားလ်မာရှယ်က တာဝန်ယူ ကြီးကြပ်၍ စီစဉ်ပေးခဲ့သည်။

ဘုရင်မကြီး မကွယ်လွန်မှီ နောက်ဆုံး အသိအမှတ်ပြုပေးခဲ့တဲ့ ဗြိတိန်ဝန်ကြီးချုပ် လစ်ဇ်ထရက်စ်

ယခု ဈာပနအခမ်းအနား ထိုင်ခုံအစီအစဉ်ကို မည်ကဲ့သို့ ရေးဆွဲထားကြောင်း ဗြိတိန်နိုင်ငံခြားရေးရုံးသို့ The Telegraph မီဒီယာက ဆက်သွယ်မေးမြန်းခဲ့ရာ တယ်လီဖုန်းခေါ်ဆိုမှု အားလုံးကို ဘာကင်ဟမ်နန်းတော်သို့သာ လွှဲပြောင်းပေးခဲ့သည်။

ဝက်စမင်စတာအက်ဗေးတွင် ကျင်းပသော အဆိုပါ အခမ်းအနားသို့ တက်ရောက်ကြသည့် နိုင်ငံတကာ ဧည့်သည် တော်များ ၂,၂၀၀ ရှိသည်။ ဖိတ်ကြားခံရသူ လေးပုံတစ်ပုံ (သို့မဟုတ်) လူ ၅၀၀ ခန့်မှာ နိုင်ငံအသီးသီးမှ ခေါင်းဆောင် အကြီးအကဲများ (သို့မဟုတ်) နိုင်ငံတကာ ဂုဏ်သရေရှိပုဂ္ဂိုလ်များ ဖြစ်ကြသည်။

မည်သို့ပင်ဆိုစေကာမူ အမေရိကန်သမ္မတ ဘိုင်ဒန်သည် လက်ရှိဗြိတိန်ဘုရင်သစ် ချားလ်စ်၏ ခပ်လှမ်းလှမ်းတွင် ထိုင်ခဲ့ရသည်။ ဘိုင်ဒန်၏ ခုံတန်းနှင့်အတူတူ အခြားတဖက်တွင် တရုတ် ဒုတိယသမ္မတ ဝမ်ကျူရှန် ထိုင်နေခဲ့ ကြောင်း The Telegraph က ရေးသားဖော်ပြထားသည်။

Source: The Telegraph

CNI International News

နယူးယောက်၊ စက်တင်ဘာ ၂၀

ရှေးရိုးစွဲ(ကွန်ဆာဗေးတစ်)တစ်ဦးဖြစ်သည့် တောင်ကိုရီးယားသမ္မတ ယွန်ဆော့ရွဲသည် စက်တင်ဘာ ၂၀ ရက် (ယနေ့)၌ ကုလသမဂ္ဂ (UN) အထွေထွေညီလာခံသို့ တက်ရောက်၍ မိန့်ခွန်းပြောကြားခဲ့ကြောင်း South China Morning Post သတင်းစာ၏ အွန်လိုင်းစာမျက်နှာ၌ ဖော်ပြထားသည်။

၎င်းသည် သိမ်မွေ့နက်နဲသော သံတမန်ရေးရာ စမ်းသပ်မှုနှင့် ရင်ဆိုင်ရလျက်ရှိကြောင်း၊ တရုတ်-အမေရိကန် ပြိုင် ဆိုင်မှုတိုးလာနေချိန်၌ တောင်ကိုရီးယားသည် စူပါပါဝါနိုင်ငံများအကြား ဟန်ချက်ညီညီ လုပ်ဆောင်ရန် ပိုမိုခက်ခဲ လာကြောင်း လေ့လာသုံးသပ်သူများက ဝေဖန်ခဲ့ကြသည်။

သမ္မတယွန်၏ ကုလသမဂ္ဂခရီးစဉ်သည် လူမျိုးရေးခွဲခြားမှု စွပ်စွဲချက်များကြောင့် ပြည်တွင်းရတက်မအေးစရာများ နှင့် ၎င်း၏ဇနီး ကင်မ်ကန်ဟီးနှင့်ပတ်သက်၍ အငြင်းပွားမှုများမှ သက်သာရာ ရစေမည်ဟု သိရသည်။

တစ်ချိန်တည်းမှာပင် ၎င်း၏ရှေ့မှ လစ်ဘရယ်ဝါဒီ သမ္မတဟောင်း မွန်းဂျေအင်းသည် မြောက်ကိုရီးယားအလိုကျ အောင် တရုတ်ကို အလျှော့ပေး၍ ဒူးထောက်ဆက်ဆံခဲ့ကြောင်း လက်ရှိသမ္မတ ယွန်က အပြစ်တင်ဝေဖန်ခဲ့သည်။ မွန်းဂျေအင်းလုပ်ပုံလုပ်နည်းအစား မိမိသည် အမေရိကန်နှင့်ဂျပန်တို့ကိုသာ မဟာမိတ်ဖွဲ့သွားမည်ဟု ယွန်က ကတိပြုခဲ့သည်။

လွတ်လပ်မှုကို ချဲ့ထွင်ဖို့ မိမိအစိုးရသည် အခြားစိတ်တူကိုယ်တူနိုင်ငံများနှင့် ပူးပေါင်းဆောင်ရွက်သွားမည် ဖြစ် ကြောင်း၊ လူ့အခွင့်အရေးနှင့် စည်းစနစ်အခြေခံသောအမိန့်၊ တရုတ်နှင့်ရုရှားတို့ကို ရင်ဆိုင်ရန် ကမ္ဘာက မည်သို့ လုပ်ဆောင်သင့်ပုံတို့ကို ဝါရှင်တန် ရွေးချယ်ပေးသည့်အတိုင်း ဆက်လက်လျှောက်လှမ်းသွားရန် ရည်ရွယ်ထား ကြောင်း ၎င်းက ဆက်လက်ပြောကြားခဲ့သည်။

အမေရိကန် သမ္မတ ဂျိုးဘိုင်ဒန်နှင့် တောင်ကိုရီးယားသမ္မတ ယွန်ဆော့ရွဲတို့ ပြီးခဲ့သည့် မေလက ဆိုးမြို့လ်ရှိ သမ္မတ အိမ်တော်တွင် သတင်းစာရှင်းလင်းပွဲပြုလုပ်နေစဉ်(ဓါတ်ပုံ - အေအက်ဖ်ပီ)

သို့သော် တောင်ကိုရီးယားသည် တရုတ်နှင့်ရုရှားတို့ကဲ့သို့ သီးခြားနိုင်ငံများကို ဆန့်ကျင်သွားမည်ဟု ဆိုလိုခြင်း မဟုတ်ကြောင်း ဆိုးလ်အစိုးရတာဝန်ရှိသူတစ်ဦးက ရှင်းပြခဲ့သည်။

“ကုလသမဂ္ဂမှာ ပြောကြားမယ့် သမ္မတရဲ့မိန့်ခွန်းဟာ လွတ်လပ်မှုကို ချစ်မြတ်နိုးတဲ့နိုင်ငံတွေနဲ့ ကမ္ဘာလုံးဆိုင်ရာ မဟာမိတ်ဖွဲ့မှု ချဲ့ထွင်ဖို့၊ လွတ်လပ်မှုကို ချဲ့ထွင်ဖို့ စံနှုန်းတွေ ပါဝင်လိမ့်မယ်လို့ မျှော်လင့်ရပါတယ်” ဟု တောင်ကိုရီးယားသမ္မတရုံးမှ အကြီးတန်းအရာရှိတစ်ဦးက သတင်းထောက်များကို ယခင်သီတင်းပတ်၊ စက်တင်ဘာ ၁၅ ရက်တွင် ပြောကြားခဲ့သည်။

“လွတ်လပ်မှု၊ လူ့အခွင့်အရေးနဲ့ စည်းစနစ်အခြေခံတဲ့အမိန့်ကို မြှင့်တင်ဖို့ အယူအဆနဲ့ပတ်သက်လို့ လုံးဝသဘောမတူတဲ့ နိုင်ငံတချို့ ရှိမှာပါ။ အဲဒီလိုသဘောမတူတဲ့နိုင်ငံတွေနဲ့လည်း အပြန်အလှန်လေးစားပြီး အကျိုးရှိစေမယ့် အစီအစဉ်တွေ ဖော်ဆောင်သွားဖို့ နည်းလမ်းတွေ ကျနော်တို့ ရှာဖွေသွားမယ်” ဟု သမ္မတယွန်က UN တွင် ထပ်လောင်းပြောကြားခဲ့သည်။

ယခင်သမ္မတမွန်းဂျေအင်းလက်ထက်က တရုတ်နှင့်အမေရိကန်တို့အပေါ် တောင်ကိုရီးယား၏ မရေရာသော မူဝါဒကို ယွန်ဆော့ရွဲ အပြစ်တင်ဝေဖန်ခဲ့ကြောင်း စက်တင်ဘာ ၁၉ ရက်တွင် ထုတ်ဝေသည့် နယူးယောက်တိုင်းမ် သတင်းစာပါ အင်တာဗျူးတွင် ဖော်ပြထားသည်။

“ကြိုတင်ခန့်မှန်းထားတဲ့အတိုင်း ကျနော် ဆက်လုပ်သွားမှာဖြစ်ပါတယ်။ တောင်ကိုရီးယားက အမေရိကန်နဲ့ တရုတ်နဲ့ ဆက်ဆံရေးကို ပိုပြီး ရှင်းရှင်းလင်းလင်း ရပ်တည်သွားမှာပါ” ဟု ယွန်ဆော့ရွဲ၏ပြောကြားချက်ကို ကိုးကား၍ နယူးယောက်တိုင်းမ်က ဆက်လက်ရေးသားထားသည်။

Source: South China Morning Post

CNI International News

တိုင်ပေ၊ စက်တင်ဘာ ၂၀

ယူကရိန်းနိုင်ငံ၏ မိမိကိုယ်ကိုခုခံကာကွယ်ရေးအတွက် ကူညီရန် ကြိုးပမ်းမှုအတွက် မိမိတို့ဂုဏ်ယူကြောင်း၊ ဆက်လက်၍လည်း ကြိုးပမ်းသွားမည်ဖြစ်ကြောင်း နယူးယောက်မြို့တွင် ကျင်းပသည့် ညီလာခံတစ်ခုတွင် ထိုင်ဝမ်သမ္မတ ဆိုင်အင်ဝမ်က ပြောကြားခဲ့သည်။

ယူကရိန်း၏အကျပ်အတည်းကို စာနာနားလည်ပေးသည့် ထိုင်ဝမ်နိုင်ငံတွင် တိုင်ပေအစိုးရအနေဖြင့် ယူကရိန်း အခြေအနေနှင့် အလားတူခြိမ်းခြောက်ခံနေရကြောင်း အများက ရှုမြင်နေကြသည်။ ထိုင်ဝမ်ကို တရုတ်က ၎င်း၏ပို င်နက်နယ်မြေအစိတ်အပိုင်းအဖြစ် အခိုင်အမာပြောကြားပြီး ခြိမ်းခြောက်နေဆဲဖြစ်သည်။

ပြီးခဲ့သည့် ဖေဖော်ဝါရီလတွင် ယူကရိန်းကို ကျူးကျော်ခဲ့သည့် ရုရှားအပေါ် အနောက်အုပ်စုနိုင်ငံများ ဝိုင်းဝန်း ပိတ်ဆို့ကြရာတွင် ထိုင်ဝမ်လည်း ပါဝင်ခဲ့ပြီး လူသားချင်းစာနာထောက်ထားမှုဆိုင်ရာကယ်ဆယ်ရေးအတွက် ဒေါ်လာ သန်း ၃၀ ကျော် လှူဒါန်းပြီးဖြစ်သည်။ မော်စကိုကတော့ ယူကရိန်းနှင့်ပတ်သက်၍ ၎င်း၏လုပ်ရပ်များကို အထူးစစ်ဆင်ရေးဟု တံဆိပ်ကပ်ထားသည်။

“ရုရှားကျူးကျော်သတ်ဖြတ်မှုတွေကို ကျမတို့ ကြည့်နေရင်းက ယူကရိန်းနိုင်ငံနဲ့လွတ်လပ်ရေးကို ကာကွယ်ဖို့ ယူကရိန်းနိုင်ငံသူ၊ နိုင်ငံသားတွေကို ကူညီဖို့ ကြိုးပမ်းနိုင်ခဲ့လို့ ထိုင်ဝမ်က ဂုဏ်ယူမိပါတယ်။ ဒီကြိုးပမ်းမှုတွေ ကိုလည်း ဆက်လုပ်သွားမှာပါ” ဟု ဆိုင်အင်ဝမ်က ပြောကြားခဲ့သည်။

တရုတ်နှင့် ပြုလုပ်မည့် ကုန်သွယ်ရေးသဘောတူညီချက်ကို ဆန့်ကျင်သည့် တိုင်ပေပြည်သူများသည် ပြီးခဲ့သည့် ဇွန်လ ၂၆ ရက်နေ့က“ပြန်လည်ပေါင်းစည်းခြင်းကို ငြင်းဆိုခြင်း” ဟူသော စာတန်းများ ကိုင်ဆောင်ကာ ဆန္ဒပြခဲ့ကြသည်(ဓါတ်ပုံ-Agence France-Presse)

သူမ၏ရုံးခန်းထဲတွင် ကြိုတင်ရိုက်ကူးထားသော ဗီဒီယိုမှတ်တမ်းပါ သဘောထားမှတ်ချက်များနှင့်အတူ စက်တင်ဘာ ၁၉ ရက်တွင် Concordia ထိပ်သီးညီလာခံသို့ ဆိုင်အင်ဝမ်က မိန့်ခွန်းပြောကြားခဲ့သည်။
ထိုင်ဝမ်သည် တရုတ်၏ပြင်းထန်သော ခြိမ်းခြောက်မှုများဖြင့် ရင်ဆိုင်နေရကြောင်း ၎င်းက ထပ်လောင်း ပြောကြားခဲ့သည်။

“ကျမတို့ဟာ အာဏာရှင်ဆန်တဲ့ ပြဇာတ်တစ်ပုဒ်မှာ ကိုယ့်ကိုယ်ကို အသိပညာပေးဖို့ လိုအပ်ပါတယ်။ ထိုင်ဝမ် ဒီမိုကရေစီဟာ PRC က အုပ်စည်းဖို့ ကြိုးစားနေတဲ့ တစ်ခုတည်းသော အရာမဟုတ်ဘူးဆိုတာ နားလည်ထားဖို့ လိုတယ်” ဟု ဆိုင်အင်ဝမ်က ပြောကြားခဲ့သည်။

၎င်းသည် တရုတ်ပြည်သူ့သမ္မတနိုင်ငံ၏အတိုကောက်အမည် PRC ဟု ရည်ညွှန်းသုံးနှုန်း၍ ပြောကြားခဲ့ခြင်း ဖြစ်သည်။

“ထိုင်ဝမ်ရဲ့ဒီမိုကရေစီလုံခြုံစေရေးဟာ ကျမတို့ စုပေါင်းအနာဂတ်အတွက် လွတ်လပ်မှုနဲ့ လူ့အခွင့်အရေးတွေ လုံခြုံစေဖို့ မရှိမဖြစ် လိုအပ်ပါတယ်” ဟု ၎င်းက ဖြည့်စွက်ပြောကြားခဲ့သည်။

Source: Reuters

CNI International News

နယူးယောက်၊ စက်တင်ဘာ ၂၀

တရုတ်နိုင်ငံ၊ အနောက်မြောက်ပိုင်း ရှင်ကျန်းဒေသ၌ ဖြစ်ပျက်နေမှုများကို ထပ်မံစိစစ်ရန် ဘေဂျင်းအစိုးရ ကြိုးစား နေသဖြင့် သံတမန်များနှင့် လူ့အခွင့်အရေး လှုပ်ရှားသူများက အဆိုပါဒေသရှိ ဝီဂါနှင့် အခြားမွတ်ဆလင် အများစု အပေါ် တရုတ်၏ပြုမူဆက်ဆံပုံများကို အရေးယူဆောင်ရွက်ရန် ကုလသမဂ္ဂ (UN) တွင် အရှိန်မြှင့် ဖိအားပေးနေကြောင်း အယ်လ်ဂျာဇီးယား သတင်းအရ သိရသည်။

လူသားမျိုးနွယ်အပေါ် တရုတ်ကျူးလွန်နိုင်ဖွယ်ရှိသည့် ရှင်ကျန်းဒေသ အစီရင်ခံစာ တစ်စောင်ကို ကုလသမဂ္ဂ၊ လူ့အခွင့်အရေးကောင်စီက လက်ခံဖတ်ရှုပြီးနောက် နှစ်ပတ်အကြာ နှစ်စဉ်ကျင်းပနေကျဖြစ်သည့် ကုလသမဂ္ဂ အထွေထွေညီလာခံ (UNGA) အစည်းအဝေးသို့ တက်ရောက်ရန် ကမ္ဘာအရပ်ရပ်မှ ခေါင်းဆောင်များ အမေရိကန် နိုင်ငံ၊ နယူးယောက်မြို့သို့ ရောက်ရှိလာခဲ့သည်။

တရုတ်သည် ရှန်ကျန်းဒေသ၌ ရာဇဝတ်မှု ကျူးလွန်နိုင်ဖွယ်ရှိသည်ဟု UN လူ့အခွင့်အရေးကောင်စီက ပြောကြားခဲ့ ပြီးလည်း ဖြစ်သည်။

အတ္တလန္တိတ်ကောင်စီနှင့် လူ့အခွင့်အရေး စောင့်ကြည့်အဖွဲ့က ကမကထပြု၍ ကျင်းပခဲ့သည့် ဖိုရမ်တွင် UN ၏ လူနည်းစုအခွင့်အရေးဆိုင်ရာ အထူးကိုယ်စားလှယ် ဖာနန်ဒီဗာရန်နက်စ် (Fernand de Varennes) က “ ဒီအရေးကိစ္စနဲ့ ပတ်သက်ပြီး လုပ်ဆောင်နိုင်စရာ မရှိတော့ဘူးဆိုတာ မဖြစ်နိုင်ပါဘူး။ ဒါကို အရေးမယူဘဲ ခွင့်ပြုရင် ဘယ်လို သတင်းစကား(မတ်ဆေ့ချ်)မျိုး ဒီနေရာမှာ ဖြန့်နေလဲ” ဟု မေးခွန်းထုတ်ခဲ့သည်။

ရှင်ကျန်းဒေသသို့ ရှီကျင့်ဖျင်ရောက်ရှိစဉ် (GETTY IMAGES)

UN ဆိုင်ရာ အမေရိကန် လက်ထောက်သံအမတ် ဂျက်ဖရေးပရီစကော့ (Jeffrey Prescott) က UN အဝန်းအဝိုင်း ထဲ၌ တရုတ်ကို တုံ့ပြန်ရာတွင် အဖွဲ့အစည်းဆိုင်ရာ အသွင်သဏ္ဌာန် (the institution)၏ ဂုဏ်သိက္ခာ အရေးကြီး ကြောင်း အကြံပြု ဆွေးနွေးခဲ့သည်။

“ဒီလိုရက်စက်မှုတွေကို ဘယ်လိုဖြေရှင်းမလဲဆိုတာ အဖြေရှာရင် နောက်ဆုံးမှာ အဲဒီနိုင်ငံရဲ့စနစ်ရဲ့ ယုံကြည်စိတ် ချရမှု၊ ကျနော်တို့ နိုင်ငံတကာ လက်ခံတဲ့စနစ်ရဲ့ ယုံကြည်စိတ်ချရမှုဆီကို ရောက်သွားလိမ့်မယ်” ဟု ဂျက်ဖရေးက ပြောကြားခဲ့သည်။

“ခေတ်မီတဲ့ UN စနစ်ဖန်တီးရာမှာ အဓိကအရေးကြီးတဲ့ နိုင်ငံတစ်နိုင်ငံလည်းဖြစ်၊ လုံခြုံရေးကောင်စီ အမြဲတမ်း အဖွဲ့ဝင်လည်းဖြစ်တဲ့ နိုင်ငံကနေ ဒီလိုအနေအထားတွေ့ရတာဟာ အင်မတန် စိတ်မကောင်းစရာပါ” ဟု ၎င်းက ဆက်လက် ပြောကြားခဲ့သည်။

ကုလ အထူးကိုယ်စားလှယ် ဖာနန်ဒီဗာရန်နက်စ် (GETTY IMAGES)

ရှန်ကျန်းဒေသရှိ ထိန်းသိမ်းရေးစခန်း ကွန်ရက်တစ်ခုတွင် လူပေါင်း ၁ သန်းကျော် ဖမ်းဆီးချုပ်နှောင်ထားကြောင်း ၂၀၁၈ ခုနှစ်တွင် လူမျိုးရေးခွဲခြားမှု ပပျောက်ရေးဆိုင်ရာ UN ကော်မတီက စတင်ဖော်ထုတ်ခဲ့သည်။

တရုတ်အာဏာပိုင်များသည် ဝီဂါမွတ်ဆလင်များအပေါ် အဓမ္မလုပ်အားပေး စေခိုင်းမှုမှ မိသားစု ခွဲထွက်နေထိုင်ရေး အထိ အလွဲသုံးစားပြုခဲ့ကြောင်း၊ ၎င်းတို့၏ ယဉ်ကျေးမှုနှင့် ဘာသာရေးဆိုင်ရာ သရုပ်လက္ခဏာများကို ဖျက်ဆီးခဲ့ ကြကြောင်း ပညာရှင်များ၊ ပြည်ပရောက်သူများနှင့် မီဒီယာများက ဆက်လက်ဖော်ထုတ်၍ ဖွင့်ချခဲ့ကြသည်။

ကုလသမဂ္ဂ အထွေထွေညီလာခံကို နယူးယောက်မြို့၌ နှစ်စဉ် ကျင်းပနေချိန်အတွင်း လူ့အခွင့်အရေးကောင်စီ၏ အစည်းအဝေးကိုလည်း ဆွစ်ဇာလန်နိုင်ငံ၊ ဂျနီဗာမြို့တွင် ပြုလုပ်လျက်ရှိနေသည်။

မကြာသေးမီ နှစ်များအတွင်း တရုတ်အပေါ် ရန်လိုမှုများ ကြီးထွားလာနေခဲ့သည့် စက်မှုထိပ်သီး (G-7) အုပ်စုကဲ့သို့ အမေရိကန်ဦးဆောင်သည့် အစုအဖွဲ့များကို တန်ပြန် ဖိအားပေးသည့် အနေဖြင့် ဘေဂျင်းအစိုးရသည် ယခင် ကတည်းက ၎င်းနှင့်မိတ်ဖက်ဖြစ်ခဲ့သည့် နိုင်ငံများထံမှ အထောက်အကူပြုနိုင်ရန် မျှော်ကိုး၍ UN ကိစ္စအများအပြား တွင် ငွေကြေးအလုံးအရင်းသုံးလျက် ထောက်ပံ့ကူညီနေခဲ့သည်။

Source: Aljazeera

CNI International News

တိုင်ပေ၊ စက်တင်ဘာ ၁၉

ထိုင်ဝမ်စစ်တပ်ကို လှည့်စားရန်အတွက် အရပ်ဘက်အဆင့်သုံးသည့် မောင်းသူမဲ့လေယာဉ်ငယ်(ဒရုန်း)များကို တရုတ်ပြည်မကြီးဘက်မှ မကြာခဏ လွှတ်တင်နေကြောင်း CNN သတင်းအရ သိရသည်။
အဆိုပါ ထူးခြားသည့်အန္တရာယ်ရှိလာနိုင်သော ဒရုန်းများသည် တရုတ်ပြည်မကြီးဘက်မှ အမှန်တကယ် ဦးတည် လွှတ်တင်နေသော အရပ်ဘက်သုံး ဒရုန်းများဖြစ်ကြောင်း ထိုင်ဝမ်စစ်တပ်က နောက်ပိုင်းတွင် အတည်ပြုခဲ့သည်။

ထိုင်ဝမ်ဘက်မှ ရရှိသော ဗီဒီယိုဖိုင်မှတ်တမ်းအချို့တွင် ထိုင်ဝမ်ပိုင်နက်အစွန်အဖျားရှိ ကင်မန်း (Kinmen) ကျွန်း များတွင် စစ်ရေးပြင်ဆင်မှုများ၊ စစ်မှုထမ်းများ လှုပ်ရှားမှုအသေးစိတ်များနှင့် ဒရုန်းများ ပျံသန်းဝင်ရောက်နေပုံများ ကို တွေ့ရသည်။

တစ်ခုသော ဗီဒီယိုင်ဖိုင်ထဲတွင် ထိုင်ဝမ်စစ်သား ၄ ဦးသည် ၎င်းတို့၏ကင်းစခန်းအထက်ဘက် ကောင်းကင်ယံသို့ ဝဲပျံ၍ ရောက်ရှိလာသော ဒရုန်း၏ အခိုက်အတန့်ကို ရိုက်ကူးမှတ်တမ်းတင်ထားသည်။ ၎င်းတို့တစ်ဦးချင်းစီ၏ မျက်နှာကို ဆွဲချဲ့ရိုက်ကူးနိုင်သည့် ကျူးကျော်ဒရုန်းကို ကျောက်ခဲဖြင့် ပစ်ပေါက်၍ တုံ့ပြန်ကြသည်။

ယင်းသို့ ထူးခြားဖြစ်စဉ်ကို ရိုက်ကူးထားသည့် ဗီဒီယိုဖိုင်မှာ တရုတ်လူမှုကွန်ရက်မီဒီယာများပေါ် ပျံ့နှံ့သွားခဲ့သလို ထိုင်ဝမ်စစ်တပ်ကို လှောင်ပြောင်သည့် သဘောထားမှတ်ချက် (comments) များ ရာနှင့်ချီ၍ ထွက်ပေါ်လာခဲ့ သည်။

တရုတ်ဒရုန်းများသည် ထိုင်ဝမ်ရှိ စစ်ဘက်ဆိုင်ရာ တားမြစ်ဧရိယာများကို အချိန်မရွေး ဓာတ်ပုံရိုက်ကူး၍ ထောက် လှမ်းနိုင်သည့် စွမ်းရည်ရှိနေကြသည်။

ထိုင်ဝမ်စစ်သားများကို ဒရုန်းဗီဒီယိုများတွင် ရှင်းရှင်းလင်းလင်း မြင်တွေ့ရစဉ်(ဓါတ်ပုံ- Taiwan Ministery of Defense)

ထိုင်ဝမ်စစ်မှုထမ်းလှုပ်ရှားနေပုံကို အသေးစိတ်ပြထားပြီး အင်တာနက်ပေါ်သို့ လွှင့်တင်ခဲ့သော အဆိုပါဗီဒီယိုဖိုင် သည် ထိုင်ဝမ်အတွက် အရှက်ရစရာကောင်းလှပြီး အဆိုးဆုံးအချက်အနေဖြင့် လုံးလုံးလျားလျား အန္တရာယ်ကြီး လာပြီဖြစ်ကြောင်း လေ့လာသုံးသပ်သူများက ပြောကြားကြသည်။

ပြီးခဲ့သည့် ဩဂုတ်လတွင် လူဦးရေ ၂၄ သန်းနီးပါးရှိသော ကိုယ်ပိုင်အုပ်ချုပ်နေသည့် ဒီမိုကရေစီနိုင်ငံဖြစ်သော ထိုင်ဝမ်သို့ အမေရိကန်အောက်လွှတ်တော်ဥက္ကဋ္ဌ နန်စီပလိုစီ လာရောက်ခဲ့ပြီးနောက် တင်းမာမှုများ တိုးလာနေချိန် ၌ ဒရုန်းဖြင့် ကျူးကျော်ခံရခြင်းလည်း ဖြစ်ပွားလာခဲ့သည်။

နန်စီပလိုစီ၏ခရီးစဉ်သည် ထိုင်ဝမ်ကို ၎င်း၏နယ်မြေအစိတ်အပိုင်းဟု ရှုမြင်ထားသည့် တရုတ်အာဏာရ ကွန်မြူနစ်ပါတီကို ဒေါသထွက်စေခဲ့ပြီး ကျွန်းတဝိုက် ရှားရှားပါးပါး အကြီးစားစစ်ရေးလေ့ကျင့်မှုများ၊ စစ်လေယာဉ် စေလွှတ်မှုများ လုပ်ဆောင်လာခဲ့သည်။ ထို့ပြင် ပင်မကျွန်းပေါ်သို့ ဖြတ်ကျော်၍ တရုတ်ဒုံးကျည်များလည်း ပစ် လွှတ်ခဲ့သည်။

ယခုကဲ့သို့ ဒရုန်းများဖြင့် ထိုင်ဝမ်လေကြောင်းပိုင်နက်ထဲ ကျူးကျော်လာခြင်းမှာ နောက်ဆုံးတွန်းအားတစ်ခု ဖြစ် ကြောင်း ထိုင်ဝမ်သမ္မတ ဆိုင်အင်ဝမ်က သဘောထားမှတ်ချက်ပေးခဲ့သည်။

ထိုင်ဝမ်ကို ခြိမ်းခြောက်ရန်အတွက် တရုတ်သည် မီးခိုးရောင်ဇုန် စစ်ရေးနည်းဗျူဟာကို ထုတ်သုံးလာခဲ့ရာ စက် တင်ဘာ ၁ ရက်တွင် ထိုင်ဝမ်က ၎င်း၏ကိုယ်ပိုင်ကာကွယ်ပိုင်ခွင့် အခွင့်အရေးကျင့်သုံးမည်ဟု သတိပေးရင်း ပြည်မ ကြီးမှ တက်လာသည့် မောင်းသူမဲ့လေယာဉ်(ဒရုန်း)ကို ပစ်ချခဲ့သည်။

Source: CNN

CNI International News

ဗီနီးယက်စ်၊ စက်တင်ဘာ ၁၉

ရှန်ဂင် (Schengen) ကာလတို ပြည်ဝင်ခွင့်ဗီဇာဖြင့် ရုရှားနိုင်ငံသားများကို စက်တင်ဘာ ၁၉ ရက် (ယနေ့) မှစ၍ လစ်သူယေးနီးယားနိုင်ငံထဲ ဝင်ရောက်ခွင့်မပြုတော့ကြောင်း တာ့စ်သတင်းဌာနက ရေးသားဖော်ပြသည်။

အဆိုပါရှန်ဂင်ဗီဇာသည် ဥရောပနိုင်ငံ ၂၆ နိုင်ငံအတွင်း နယ်ခြားအကန့်အသတ်မရှိဘဲ ကာလတိုနေထိုင်ခွင့်ဗီဇာ အမျိုးအစားဖြစ်သည်။

စက်တင်ဘာလ ၁၃ ရက်တွင် ချမှတ်ခဲ့သော အထက်ပါဆုံးဖြတ်ချက်သည် ယနေ့စတင်အသက်ဝင်မည်ဖြစ်ပြီး အရေးပေါ်အခြေအနေအရ လာမည့် ဒီဇင်ဘာ ၁၅ ရက်အထိ သက်တမ်းတိုးမည်ဟု သိရသည်။

ထိုသို့ လစ်သူယေးနီးယား၏ဆုံးဖြတ်ချက်ကို ပိုလန်နိုင်ငံနှင့် အခြားဘော်လ်တစ်ဒေသနိုင်ငံများက ထောက်ခံ ကြသည်။

ဥရောပနိုင်ငံတစ်ခုဖြစ်သည့် လစ်သူယေးနီးယားနိုင်ငံသို့ ရုရှားခရီးသွားများ လာရောက်လှည်ပတ်နေစဉ် (ဓါတ်ပုံ- အေပီ)

တစ်ချိန်တည်းတွင် လစ်သူယေးနီးယားအစိုးရသည် သံတမန်များ၊ အတိုက်အခံလွှတ်တော်အမတ်များ၊ အခြား ဥရောပသမဂ္ဂ (EU) အုပ်စုဝင်နိုင်ငံများနှင့်ပတ်သက်၍ ကုန်စည်ပို့ဆောင်ရေးလုပ်ငန်း (သို့မဟုတ်) နိုင်ငံသားဖြစ်ခွင့် ရှိသူ မိသားစုဝင်များအပါအဝင် ရုရှားနိုင်ငံသားအချို့အတွက် ခြွင်းချက်ထားရှိမည်ဖြစ်သည်။

ရုရှားနိုင်ငံ၊ ကာလီနင်ဂရက် (Kaliningrad) ဒေသသို့ ခရီးသွားသူများအပါအဝင် လစ်သူယေးနီးယားနယ်စပ်ကို ဖြတ်ကျော်ဝင်ရောက်ခဲ့ကြသည့် ရုရှားနိုင်ငံသား ၈၃,၀၀၀(ရှစ်သောင်းသုံးထောင်)ကျော် ရှိခဲ့ကြောင်း လစ်သူ ယေးနီးယား အာဏာပိုင်များက ပြောသည်။

ယခုနှစ် ဇန်နဝါရီ ၁ ရက်မှစတင်၍ ရုရှားနိုင်ငံသား ၃၉၅,၀၀၀(သုံးသိန်းကိုးသောင်းငါးထောင်) ကျော်တို့သည် လစ်သူယေးနီးယားနိုင်ငံသို့ ဝင်ရောက်ခဲ့ကြပြီး ထိုအထဲမှ ၁၈၀,၀၀၀(တစ်သိန်းရှစ်သောင်း)ကျော်မှာ ပြည်တွင်း၌ ဆက်လက်နေထိုင်ခြင်းမရှိဘဲ ဖြတ်သန်းသွားလာသူများဖြစ်ကြကြောင်း သိရသည်။

ရှန်ဂင်ဗီဇာ စည်းမျဉ်းနှင့်မကိုက်ညီ၍ လစ်သူယေးနီးယားနိုင်ငံထဲသို့ ဝင်ရောက်ခွင့်မပြုခဲ့သည့် ဗီဇာအရေအတွက် မှာ ၈၆၁ ခုရှိခဲ့သည်။

Source: တာ့စ်သတင်းဌာန

CNI International News

ဝါရှင်တန်၊ စက်တင်ဘာ ၁၉

ကိုယ်ပိုင်အုပ်ချုပ်နေသည့် ထိုင်ဝမ်ကျွန်းကို တရုတ်အနေဖြင့် ၎င်း၏ပိုင်နက်အစိတ်အပိုင်းဟု ကြေညာထားသော် လည်း ကျူးကျော်ရန် ကြိုးပမ်းပါက မိမိတို့အမေရိကန်တပ်ဖွဲ့ဝင်များက ကာကွယ်ဟန့်တားသွားမည်ဖြစ်ကြောင်း သမ္မတ ဂျိုးဘိုင်ဒန်က ပြောကြားခဲ့ခြင်းဖြင့် ကျွန်း၏ဒီမိုကရေစီအရေးကို တရားဝင်ထောက်ခံကြောင်း ပြသခဲ့သည် ဟု အေပီသတင်းဌာနက စက်တင်ဘာ ၁၉ ရက် (ယနေ့)တွင် ရေးသားဖော်ပြသည်။

စက်တင်ဘာ ၁၈ ရက်၌ CBS မီဒီယာမှ ထုတ်လွှင့်ခဲ့သော မိနစ် ၆၀ အစီအစဉ်တွင် “အကယ်၍ တရုတ်က ကျူးကျော်ခဲ့လျှင် အမေရိကန်အနေဖြင့် အကာအကွယ်ပေးရန် ရှိ/မရှိ” မေးခွန်းကို ဘိုင်ဒန်က “ရှိပါတယ်” အတည်ပြုပြောကြားခဲ့သည်။

တွေ့ဆုံမေးမြန်းမှုအပြီးတွင် အမေရိကန်မူဝါဒ အပြောင်းအလဲမရှိကြောင်း အိမ်ဖြူတော်က ပြောကြားသည်ဟု CBS သတင်းတွင် ဆက်လက်ထုတ်လွှင့်ခဲ့သည်။ ထိုင်ဝမ်၏အခြေအနေကို ငြိမ်းချမ်းစွာဖြေရှင်းလိုကြောင်း အမေရိကန်မူဝါဒက ညွှန်းဆိုသော်လည်း တရုတ်၏ တိုက်ခိုက်မှု တုံ့ပြန်ရန်အတွက် အမေရိကန်တပ်ဖွဲ့များ စေလွှတ်ရန် ရှိ/မရှိကို အတိအကျ မပြောကြားပေ။

အမေရိကန် အလံနှင့် ထိုင်ဝမ်အလံတို့ကို ကိုင်ဆောင်ထားသူတစ်ဦး(ဓါတ်ပုံ-အေအက်ဖ်ပီ)

ယခင်လ၌ အမေရိကန်အောက်လွှတ်တော်ဥက္ကဋ္ဌ နန်စီပလိုစီ အပါအဝင် အမေရိကန်နိုင်ငံရေးသမားများ တိုင်ပေ မြို့တော်သို့ ဆက်တိုက်လာရောက်ခဲ့ရာ တရုတ်သမ္မတ ရှီကျင့်ဖျင်၏အစိုးရက ထိုင်ဝမ်ကျွန်းအနီးတဝိုက် ပင်လယ် ထဲသို့ ဒုံးကျည်များ ပစ်လွှတ်ခဲ့ပြီး တိုက်လေယာဉ်များ ဝဲပျံစေခဲ့သည်။

ထိုင်ဝမ်လုံခြုံရေးအတွက် ခိုင်မာသော ကတိပြုသည့်အတွက် ဘိုင်ဒန်ကို မိမိတို့စိတ်ရင်းမှန်ဖြင့် ကျေးဇူးတင်ပါ ကြောင်း ထိုင်ဝမ်နိုင်ငံခြားရေးဝန်ကြီးဌာနက စက်တင်ဘာ ၁၉ ရက် (ယနေ့)တွင် သတင်းထုတ်ပြန်ခဲ့သည်။

ထိုင်ဝမ်သည် အာဏာရှင်တို့၏ချဲ့ထွင်မှုနှင့်ရန်လိုမှုများကို တွန်းလှန်သွားမည်ဖြစ်ကြောင်း၊ ဒေသတွင်းတည်ငြိမ် မှုကို ထိန်းသိမ်းရန် ဝါရှင်တန်နှင့်အခြားအစိုးရများ၏ အလားတူအတွေးအခေါ်များဖြင့် လုံခြုံရေးအရ မိတ်ဖက် ဆက်ဆံရေးကို ထဲထဲဝင်ဝင် လုပ်ဆောင်သွားမည်ဖြစ်ကြောင်း အဆိုပါထုတ်ပြန်ချက်တွင် ဆက်လက်ဖော်ပြ ခဲ့သည်။

ထိုင်ဝမ်ထံတွင် မိမိကိုယ်မိမိ ခုခံကာကွယ်ရန် နည်းလမ်းရှိကြောင်း ထုတ်ပြနိုင်ဖို့ ဝါရှင်တန်တွင် တာဝန်ရှိ သော်လည်း အမေရိကန်တပ်များ စေလွှတ်မည်ဟူ၍ ထုတ်ဖော်ပြောကြားခြင်း မရှိသေးပေ။

အမေရိကန်သည် ထိုင်ဝမ်နှင့် တရားဝင်သံတမန်ဆက်ဆံရေး ထူထောင်ခြင်းမရှိသော်လည်း အလွတ်သဘော ဆက်ဆံရေးကို ဆက်လက်ထားရှိသည်။

Source: AP

CNI International News

၂၀၂၂ ခုနှစ်၊ စက်တင်ဘာ ၁၉

ကိုလံဘီယာအစိုးရ ကိုယ်စားလှယ်များသည် ငြိမ်းချမ်းရေးရယူထားသော FARC သူပုန်များမှ အသစ်ထွက်ပေါ် လာသည့် လက်နက်ကိုင်အဖွဲ့တစ်ဖွဲ့နှင့် တွေ့ဆုံ ဆွေးနွေးခဲ့ကြောင်း ကိုလံဘီယာသမ္မတ Gustavo Petro မှ တွစ်တာစာမျက်နှာတွင် ဖော်ပြခဲ့သည်။

ကိုလံဘီယာတော်လှန်ရေးတပ်ဖွဲ့ (FARC) နှင့် ကိုလံဘီယာ အစိုးရတို့ကြား ၂၀၁၆ ခုနှစ်က ငြိမ်းချမ်းရေး ရယူခဲ့သည်။

အဆိုပါ ငြိမ်းချမ်းရေးကို လက်မခံသည့် FARC အဖွဲ့ထဲက အတိုက်အခံများနှင့် ငြိမ်းချမ်းရေးရအောင် ဆွေးနွေးမည်ဟု သမ္မတ Gustavo Petro ကတိပြုထားသည်။
Petro သည် ၎င်း၏ တွစ်တာအကောင့်တွင် ကိုလံဘီယာအစိုးရ၏ ငြိမ်းချမ်းရေးကော်မရှင်နာ Danilo Rueda နှင့် အတိုက်အခံတပ်မှူးများ တွေ့ဆုံမှုကို ပြသထားသည့် ဓာတ်ပုံနှစ်ပုံကို တနင်္ဂနွေနေ့တွင် လွှင့်တင်ခဲ့ပြီး “ဆွေးနွေးမှုတစ်ခု စတင်ပြီ” ဟု ရေးသားထားသည်။

ကိုလံဘီယာအစိုးရ၏ ငြိမ်းချမ်းရေးကော်မရှင်အဖွဲ့နဲ့ FARC သူပုန်ကနေ ခွဲထွက်ခဲ့သော အဖွဲ့ ဆွေးနွေးနေစဉ်

ဓာတ်ပုံများ၏ နောက်ခံဆိုင်းဘုတ်များတွင် FARC အဖွဲ့ခွဲတစ်ခုဖြစ်သည့် Jorge Suarez Briceno Front ၏အမည်ကို ပြသထားသည်။

ကိုလံဘီယာအစိုးရ၊ လက်ဝဲယိမ်းသူပုန်များ၊ လက်ယာယိမ်းလက်နက်ကိုင်များနှင့် မူးယစ်ဆေးမှောင်ခိုဂိုဏ်းများ ကြား ပဋိပက္ခသည် ၁၉၈၅ ခုနှစ်မှ ၂၀၁၈ ခုနှစ်အတွင်း လူပေါင်း ၄၅၀,၀၀၀ ထက်မနည်း သေဆုံးခဲ့သည်။

ကိုလံဘီယာ အစိုးရသည် အမျိုးသား လွတ်မြောက်ရေး တပ်မတော် (ELN)နှင့်လည်း ငြိမ်းချမ်းရေး ဆွေးနွေး လျက်ရှိနေသည်။

ကိုလံဘီယာသမ္မတ Gustavo Petro သည် M-19 လက်နက်ကိုင်အဖွဲ့၏ အဖွဲ့ဝင်ဟောင်း ဖြစ်ပြီး ၂၀၂၂ ခုနှစ်၊ သြဂုတ်လတွင် ကိုလံဘီယာ သမ္မတ အဖြစ် ရွေးကောက်တင်မြောက်ခံခဲ့ရသည်။