CNI International News

နယူးဒေလီ၊ ဖေဖော်ဝါရီ ၁၅

နယူးဒေလီနှင့်မွမ်ဘိုင်းမြို့တို့ရှိ BBC သတင်းဌာန ရုံးခန်းများကို အိန္ဒိယအကောက်ခွန်အရာရှိများက အင်္ဂါနေ့တွင် ဝင်ရောက်ရှာဖွေခဲ့သည်ဟု AP သတင်းတွင်ဖော်ပြသည်။

ဝန်ကြီးချုပ် နာရန်ဒရာ မိုဒီ (Narendra Modi) အား ဝေဖန်သည့် မှတ်တမ်းရုပ်ရှင်တစ်ခုကို ဗြိတိန်တွင် ထုတ်လွှင့် ပြသခဲ့ပြီး သီတင်းပတ်များအကြာတွင် ထိုသို့ လုပ်ဆောင်ခဲ့ခြင်းဖြစ်သည်ဟုလည်း BBC ဘက်က ပြောသည်။

အိန္ဒိယဝင်ငွေခွန်ဌာန၏ လုပ်ဆောင်ချက်သည် မီဒီယာအား ခြိမ်းခြောက်မှုတစ်ခုဖြစ်သည်ဟု လူ့အခွင့်အရေး အဖွဲ့များနှင့် အတိုက်အခံနိုင်ငံရေးသမားများက ပြစ်တင်ရှုတ်ချသည်။ အာဏာပိုင်များနှင့်အပြည့်အဝ ပူးပေါင်း ဆောင်ရွက်နေကြောင်း၊ ယခုအခြေအနေကို အမြန်ဆုံးဖြေရှင်းသွားနိုင်မည်ဟု မျှော်လင့်ကြောင်း BBC ဘက်က ပြောသည်။ အခွန်အရာရှိများသည် အင်္ဂါနေ့ညနေပိုင်းအထိ ရုံးများတွင်ရှိနေဆဲဟုလည်း သိရသည်။

အိန္ဒိယနိုင်ငံ နယူးဒေလီရှိ ဘီဘီစီ ရုံးခန်းအဆောက်အအုံ ဂိတ်ပေါက်၌ သတင်းထောက်များအား ရဲအရာရှိနှင့် ပုဂ္ဂလိက လုံခြုံရေးအစောင့်တစ်ဦးက တားဆီးနေစဉ်(ဓါတ်ပုံ-အေပီ)

ဝန်ထမ်းတစ်ချို့ကို ရုံးတွင်ဆက်ရှိနေရမည်ဟု တောင်းဆိုထားကြောင်း၊ လက်ရှိစစ်ဆေးမှုများနှင့် ဆက်လက်ပူး ပေါင်းဆောင်ရွက်သွားမည်ဖြစ်ကြောင်း၊ သတင်းထုတ်လွှင့်မှုများကို ပုံမှန်အတိုင်းဆောင်ရွက်သွားမည်ဖြစ်ကြောင်း လည်း BBCC ဘက်က ပြောသည်။ အဆိုပါဖြစ်စဉ်နှင့်ပတ်သက်၍ တစ်စုံတစ်ရာမှတ်ချက်ပေးရန် အိန္ဒိယ အခွန် အရာရှိများက ငြင်းဆိုသည်။

အခွန်အရာရှိများသည် BBC နှင့် ၎င်းအိန္ဒိယရုံးခွဲ၏ စီးပွားလုပ်ငန်းဆောင်ရွက်မှုနှင့် ဆက်စပ်နေသည့် စာရွက် စာတမ်းများကို ရှာဖွေနေခဲ့သည်ဟု အတည်မပြုနိုင်သော သတင်းအရင်းအမြစ်များကို ကိုးကား၍ Press Trust of India သတင်းတွင် ဖော်ပြသည်။

Editors Guild of India ဘက်ကလည်း ယခုလုပ်ဆောင်ချက်ကို ရှုတ်ချခဲ့ပြီး အိန္ဒိယအစိုးရသည် အစိုးရ၏ မူဝါဒ များနှင့် အုပ်ချုပ်ရေးအဖွဲ့အစည်းအတွက် အရေးပါသော မီဒီယာအဖွဲ့များကို အစိုးရအေဂျင်စီများ အသုံးပြုကာ ခြိမ်းခြောက်၊ နှောင့်ယှက်ခြင်းလမ်းစဉ်ကို ဆက်လက်ကျင့်သုံးနေသည်ဟုလည်း ပြောသည်။ အပြည်ပြည်ဆိုင်ရာ လွတ်ငြိမ်းချမ်းသာခွင့် အိန္ဒိယဘုတ်အဖွဲ့၏ ဥက္ကဋ္ဌဖြစ်သူ အက်ကာ ပါတဲလ်(Aakar Patel) ကလည်း ယခုလုပ်ရပ် သည် လွတ်လပ်စွာထုတ်ဖော်ပြောဆိုခွင့်ကို စော်ကားခြင်းဟု ပြောသည်။ အခွန်အရာရှိများ၏ စုံစမ်းစစ်ဆေးခြင်း သည် ဒီမိုကရေစီနည်းလမ်းများနှင့်ဆန့်ကျင်နေကြောင်း၊ ယင်းက မိုဒီ အစိုးရသည် ဝေဖန်မှုများကို ကြောက်လန့် နေသည်ကို ဖော်ပြနေကြောင်း အိန္ဒိယအတိုက်အခံတစ်ဦးက ပြောကာ အဆိုပါလုပ်ရပ်ကို ပြင်းပြင်းထန်ထန် ရှုတ်ချသည်ဟု တွစ်တာတွင် ရေးသားခဲ့သည်။

အိန္ဒိယနိုင်ငံ နယူးဒေလီရှိ ဘီဘီစီ ရုံးခန်းအပြင်ဘက်တွင် တွေ့ရှိရသည့် မီဒီယာသမားများ(ဓါတ်ပုံ-အေပီ)

BBC အနေဖြင့် အိန္ဒိယ၏ ဥပဒေများကို လိုက်နာခဲ့ပါလျှင် ယခုစစ်ဆေးမှုများနှင့်ပတ်သက်၍ စိုးရိမ်စရာ မရှိ ကြောင်း မိုဒီ၏ ပါတီမှ ပြောခွင့်ရပုဂ္ဂိုလ်တစ်ဦးက ပြောသည်။

BBC သည်မကောင်းသည့်သမိုင်းကြောင်းနှင့် အိန္ဒိယအတွက် အမုန်းတရားများရှိကြောင်း၊ ယင်းသည် အကျင့်ပျက် ကြောင်းပြောခဲ့သော်လည်း တိတိကျကျ ဖြေရှင်းချက်ပေးခဲ့ခြင်းမရှိပေ။

ဗြိတိန်မီဒီယာအဖွဲ့သည် ပြီးခဲ့သည့်လတွင် “India: The Modi Question,” ဆိုသော မှတ်တမ်းရုပ်ရှင်ကို ဗြိတိန် တွင် ထုတ်လွှင့်ခဲ့သည်။ ယင်းတွင် ဂူဂျာရတ်ပြည်နယ်ကို မိုဒီဝန်ကြီးချုပ်အဖြစ် တာဝန်ယူခဲ့စဉ် ၂၀၀၂ ခုနှစ်၌ ဖြစ်ပွားခဲ့သော မူဆလင်ဆန့်ကျင်ရေး ပဋိပက္ခများတွင် မိုဒီ၏ပါဝင်မှုကို ဖော်ပြထားသည်။

Source:AP

CNI International News

မော်စကို၊ ဖေဖော်ဝါရီ ၁၅

မိမိ အစိုးရကို ဖြုတ်ချရန် ရုရှားဘက်က ကြံစည်ခဲ့သည်ဆိုသော မော်ဒိုဗာသမ္မတ၏ စွပ်စွဲချက်ကို ရုရှားဘက်က အင်္ဂါနေ့တွင် ဒေါသတကြီး ငြင်းဆိုခဲ့သည်။

မော်ဒိုဗာအစိုးရသည် ၎င်းတို့၏ ပြည်တွင်း ပြဿနာများကို ပြည်သူများ အာရုံမစိုက်နိုင်အောင် ပြည်သူများကို အာရုံလွှဲရန် ကြိုးစားနေသည်ဟု ရုရှားနိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ် မာရီယာဇတ်ဟာရိုဗာ (Maria Zakharova) ပြန်လည်စွပ်စွဲခဲ့ကြောင်း အေပီသတင်းတွင် ဖော်ပြသည်။

ရုရှားသည် မော်ဒိုဗာကို ၎င်းတို့ လက်အောက်ခံအဖြစ် ထားရှိရေးနှင့် အီးယူသို့ ပူးပေါင်းရန် ကြိုးပမ်းခြင်းကို လမ်းလွဲသွားစေရေးအတွက် အစိုးရအဆောက်အဦများအား တိုက်ခိုက်ရန်၊ ဓားစာခံများ ဖမ်းဆီးရန်နှင့် သောင်း ကျန်းသူများ၏ တခြားသော အကြမ်းဖက်မှုများ လုပ်ဆောင်ရန် ကြံစည်ခဲ့သည်ဟု မော်ဒိုဗာသမ္မတ မာယာ ဆန်ဒူ (Maia Sandu) က တနင်္လာနေ့တွင် ပြောသည်။

ထိုပြောဆိုချက်သည် လုံးဝ အခြေအမြစ်မရှိဟု ရုရှားနိုင်ငံခြားရေးဝန်ကြီးဌာန ပြောခွင့်ရပုဂ္ဂိုလ် မာရီယာဇတ်ဟာ ရိုဗာ (Maria Zakharova) က အင်္ဂါနေ့တွင် တုန့်ပြန်ခဲ့သည်။

မော်ဒိုဗာသမ္မတ မာယာဆန်ဒူနဲ့ မော်ဒိုဗာပြည်သူများကိုတွေ့ရစဉ်(fb)

အဆိုပါ ပြောဆိုချက်များသည် အမေရိကန်၊ အနောက်နိုင်ငံများနှင့် ယူကရိန်းတို့ အသုံးပြုခဲ့သော နည်းလမ်းများ ကို အခြေခံကာ ဖန်တီးခဲ့ကြောင်း၊ အတည်မပြုနိုင်သည့် ထောက်လှမ်းရေး အချက်အလက်များကို အသုံးပြု၍ စွပ်စွဲချက်များကို ဦးစွာဖန်တီးပြီး ၎င်းတို့၏ တရားဝင်လုပ်ရပ်များကို အဆုံးအဖြတ်ပေးရေးအတွက် အသုံးချနေ ခြင်းဖြစ်ကြောင်း ဇတ်ဟာရိုဗာက ပြောသည်။

မော်ဒိုဗာနိုင်ငံကို ဖျက်ဆီးရန် ရုရှားလျှို့ဝှက် ထောက်လှမ်းရေးအဖွဲ့၏ အစီအစဉ်များအား ယူကရိန်းဘက်က တွေ့ရှိခဲ့သည်ဟု ယူကရိန်းသမ္မတ ဇာလန်းစကီးက ပြောခဲ့ပြီးနောက် သီတင်းပတ် တစ်ပတ်အကြာတွင် ဆန်ဒူ၏ စွပ်စွဲချက် ပေါ်ထွက်လာခဲ့ခြင်း ဖြစ်သည်။

ယူကရိန်းသမ္မတ၏ ပြောဆိုမှုကို အတည်ပြုနိုင်သည်ဟုလည်း မော်ဒိုဗာ ထောက်လှမ်းရေး အရာရှိများက ပြော သည်။

 မော်ဒိုဗာသမ္မတ မာယာဆန်ဒူနဲ့ ယူကရိန်းသမ္မတ ဇာလန်းစကီးကိုတွေ့ရစဉ်(GETTY IMAGES)

ယူကရိန်းသည် ရုရှားနှင့် ထိပ်တိုက် တွေ့ဆုံမှုအတွင်း မော်ဒိုဗာကို ဆွဲခေါ်ရန် ထိုသို့ ပြောခဲ့ခြင်း ဖြစ်ကြောင်း၊ မော်ဒိုဗာ အစိုးရသည်လည်း နိုင်ငံအတွင်းမှ ပြဿနာများအပေါ် ပြည်သူများ အာရုံလွဲစေရန်နှင့် ပြည်တွင်းမှ အတိုက်အခံများကို တိုက်ခိုက်နိုင်ရေးအတွက် ရုရှား၏ ခြိမ်းခြောက်မှုနှင့် ပတ်သက်သော စိတ်ကူးယဉ် ဇာတ်လမ်း ဖန်တီးခဲ့ခြင်းသာ ဖြစ်သည်ဟုလည်း ဇတ်ဟာရိုဗာက ပြောသည်။

ရုရှားသည် မော်ဒိုဗာအား မည်သည့် ခြိမ်းခြောက်မှုမှ မရှိကြောင်းနှင့် နှစ်ဦးနှစ်ဖက် အကျိုးရှိစေမည့် ဆက်ဆံရေး ကို ဖန်တီးသွားရန် မျှော်လင့်ကြောင်းလည်း သူမက ပြောသည်။

ပြီးခဲ့သည့်နှစ် ယူကရိန်းကို ရုရှားကျူးကျော် လိုက်ချိန်မှ စတင်ကာ လူဦးရေ ၂ ဒသမ ၆ သန်းရှိသော ဆိုဗီယက် နိုင်ငံဟောင်းသည် အနောက်အုပ်စုနှင့် ပိုမိုနီးကပ်သော ဆက်ဆံရေးရရှိရန် ကြိုးပမ်းခဲ့သည်။

ပြီးခဲ့သည့် ဇွန်လတွင် ၎င်းတို့သည် အီးယူအဖွဲ့ဝင်ဖြစ်ရေး ကိုယ်စားလှယ်လောင်းအဖြစ် သတ်မှတ်ခြင်း ခံခဲ့ရသည်။

Source: AP

CNI International News

ဘန်ကောက်၊ ဖေဖော်ဝါရီ ၁၄

ဘန်ကောက်နှင့် ဆမွတ်ပရာကန် (Samut Prakan) တို့၌ ပြီးခဲ့သည့် သီတင်းပတ်အတွင်း စီးနင်းမှုများ လုပ်ဆောင် ခဲ့ရာ ဘတ် ၁၄ သန်း တန်ဖိုးရှိ တံဆိပ်အတုတပ် သွားတိုက်ဆေးများ၊ အလှကုန်များနှင့် အိတ်များကို သိမ်းဆည်း ရမိကာ တရုတ်နိုင်ငံသားတစ်ဦးကို ဖမ်းဆီးခဲ့သည်ဟု ဘန်ကောက်ပို့စ် သတင်းတွင် ဖော်ပြထားသည်။

စားသုံးသူ ကာကွယ်ရေး ရဲတပ်ဖွဲ့၊ အစားအသောက်နှင့်ဆေးဝါးကွပ်ကွဲရေးအဖွဲ့ (FDA) တို့ ပူးပေါင်းကာ စီးနင်းခဲ့ ခြင်း ဖြစ်သည်။

တံဆိပ်အတုတပ် သွားတိုက်ဆေးနှင့် အလှကုန်များကို သိုလှောင်ကာ နာမည်ကျော်ဆိုင် ၁၈ ဆိုင်မှ တစ်ဆင့် အွန်လိုင်းတွင် ရောင်းချရန် နေရာသုံးနေရာတွင် ထုပ်ပိုးမှုများ လုပ်ဆောင်နေသည်ဆိုသည့် တိုင်ကြားမှုများ ကြောင့် ရှာဖွေစီးနင်းမှုများကို လုပ်ဆောင်ခဲ့သည်ဟု စားသုံးသူ ကာကွယ်ရေးရဲတပ်ဖွဲ့ခွဲ (CCPD) မှ အရာရှိတစ်ဦး က ပြောသည်။

ဖရာခါနောင် (Phra Khanong) ရာဇဝတ်မှု တရားရုံးမှ ရှာဖွေဝရမ်းများ ကိုင်ဆောင်ထားသည့် လက်နက်ကိုင် CCPD ရဲတပ်ဖွဲ့က ဖေဖော်ဝါရီ ၆ ရက်တွင် ဘန်ကောက် ပရာဝပ် (Prawet) ခရိုင်ရှိ နေရာနှစ်ခုကို ရှာဖွေမှု လုပ်ဆောင်ခဲ့သည်။

တတိယမြောက် စီးနင်းမှုကို ဆမွတ်ပရာကန်ပြည်နယ် ဘန်ဖီလီ (Bang Phli) ခရိုင်ရှိ ပို့ဆောင်ရေးကုမ္ပဏီတစ်ခု၏ ဂိုထောင်တွင် ဖေဖော်ဝါရီ ၇ ရက်နေ့က လုပ်ဆောင်ခဲ့ခြင်း ဖြစ်သည်။

ရှာဖွေမှုများအတွင်း တာဝန်ရှိသူများသည် တံဆိပ်အတုကပ် ပစ္စည်းပေါင်း ၆၇၄၃၀ ကို သိမ်းဆည်းရမိခဲ့သည်။

ယင်းတို့တွင် Thep Thai အပါအဝင် တံဆိပ်အတုကပ် သွားတိုက်ဆေးများ၊ အလှကုန်များနှင့် အိတ်များ စုစုပေါင်း ဘတ်ငွေ ၁၄ သန်းကို ရှာဖွေသိမ်းဆည်းခဲ့သည်။

စမွတ်ပရာကန် ဂိုထောင်၏ တာဝန်ရှိသူ ကျွမ် (Zhong) ဟု ဖော်ပြထားသော တရုတ်နိုင်ငံသားတစ်ဦးကို ဖမ်းဆီးခဲ့ ပြီး ရောင်းချရန် အလှကုန် အတုနှင့် တခြား ပစ္စည်းများကို လက်ဝယ်တွေ့ရှိမှုတွင် အလှကုန် ဥပဒေနှင့် မူပိုင်ခွင့် ဥပဒေကို ချိုးဖောက်ခြင်းအတွက် ဖမ်းဆီးခဲ့သည်။

တရုတ်ရင်းနှီးမြုပ်နှံသူများ ခိုင်းစေသည့်အတိုင်း ပစ္စည်းများကို ထုတ်ပိုးကာ ဖောက်သည်များထံ ပို့ဆောင်ခဲ့ခြင်း သာ ဖြစ်သည့်အတွက် ကျွမ်က စွပ်စွဲချက်များကို ငြင်းဆိုသည်။

အွန်လိုင်းမှ ကုန်ပစ္စည်းများကို ဝယ်ယူရာတွင် သတိထားသင့်ကြောင်း၊ ကုန်သွယ်ရေးဌာနတွင် မှတ်ပုံတင်ထား သည့် ဆိုင်များတွင်သာ ဝယ်ယူသင့်ကြောင်းလည်း FDA အရာရှိက ပြောသည်။

Source: ဘန်ကောက်ပို့စ်

CNI International News

ဘေဂျင်း၊ ဖေဖော်ဝါရီ ၁၄

ပြီးခဲ့သည့် နှစ်အတွင်း၌ အမေရိကန်မှ မိုးပျံပူဖောင်း ၁၀ လုံးကျော်သည် ခွင့်ပြုချက်မရှိဘဲ တရုတ်လေပိုင်နက် အတွင်းသို့ ရောက်ရှိလာခဲ့သည်ဟု တရုတ်ဘက်က တနင်္လာနေ့တွင် ပြောခဲ့ကြောင်း အေပီသတင်းတွင် ဖော်ပြထားသည်။

တရုတ်သည် ကမ္ဘာတစ်ဝန်းလုံးသို့ ထောက်လှမ်းရေးပူဖောင်းများ လွှတ်တင်ခဲ့သည်ဟု အမေရိကန် ဘက်က စွပ်စွဲခဲ့ပြီးနောက် ထိုသို့ ပြန်လည် ချေပခဲ့ခြင်း ဖြစ်သည်။

သို့သော် အမေရိကန်ဘက်က တရုတ်သို့ မည်သည့် ထောက်လှမ်းရေး ပူဖောင်းကိုမှ စေလွှတ်ခြင်း မရှိခဲ့ကြောင်း ငြင်းဆိုသည်။

တရုတ်၏ စွပ်စွဲမှုသည် တရုတ်စပိုင် ပူဖောင်းဟု သံသယရှိသည့် အရာတစ်ခုကို အမေရိကန်ဘက်က ပစ်ချ လိုက်ပြီးနောက် ပေါ်ပေါက်လာခြင်း ဖြစ်သည်။

ထိုဖြစ်ရပ်ကြောင့် တင်းမာမှုများစွာ ရှိနေသော နှစ်နိုင်ငံ ဆက်ဆံရေးအတွင်း ပဋိပက္ခသစ်တစ်ခု ပေါ်ပေါက်ခဲ့ ရသည်။

အမေရိကန် ကာကွယ်ရေးဝန်ကြီး အန်တိုနီ ဘလင်ကင်ကိုတွေ့ရစဉ်(AP)

တရုတ်နိုင်ငံခြားရေးဌာန ပြောခွင့်ရပုဂ္ဂိုလ် ဝမ်ဝန်ဘင်း (Wang Wenbin) စွပ်စွဲခဲ့သော အမေရိကန်ပူဖောင်းများကို မည်သို့လုပ်ဆောင်ခဲ့ကြောင်း၊ ထိုမိုးပျံပူဖောင်းများသည် အစိုးရ သို့မဟုတ် စစ်တပ်နှင့်ဆက်စပ်မှု တစ်စုံတစ်ရာ ရှိ မရှိဆိုသည့် အသေးစိတ် အချက်အလက်များကိုတော့ ထုတ်ဖော်ပြောဆိုခဲ့ခြင်း မရှိပေ။

အမေရိကန်အနေဖြင့် ထိပ်တိုက် တွေ့ဆုံမှုဖြစ်ရန် ဆွပေးခြင်းထက် မိမိကိုယ် မိမိ ပြန်လည်သုံးသပ် ဆင်ခြင်သင့် သည်ဟု ဝမ်က ပြောသည်။

အမေရိကန်ဘက်က ပစ်ချခဲ့သော ပူဖောင်းသည် မိုးလေဝသဆိုင်ရာ လေ့လာမှု လုပ်ဆောင်သည့် အရာဖြစ် ကြောင်း၊ ယင်းသည် လမ်းကြောင်းမှားကာ အမေရိကန်သို့ ရောက်ရှိသွားခဲ့ကြောင်း တရုတ်ဘက်က ပြောသည်။

အမေရိကန်သည် ပူဖောင်း ဖြစ်ရပ်ကို လွန်ကဲစွာ လုပ်ဆောင်ခဲ့ကာ ယင်းအတွက် တုန့်ပြန်မှု လုပ်ဆောင်သွား မည်ဟုလည်း တရုတ်ဘက်က ခြိမ်းခြောက်ထားသည်။

အမေရိကန်အစိုးရက တရုတ်ဘက်သို့ ထောက်လှမ်းရေး ပူဖောင်းများ စေလွှတ်သည် ဆိုခြင်းသည် မှားယွင်း ကြောင်း အမေရိကန်အမျိုးသား ကာကွယ်ရေးကောင်စီ ပြောခွင့်ရပုဂ္ဂိုလ် ဝပ်ဆန် (Watson) က တနင်္လာနေ့တွင် တုန့်ပြန်ခဲ့သည်။

 မိုးပျံပူဖောင်းကိုတွေ့ရစဉ်(GETTY IMAGES) 

တရုတ်နိုင်ငံသာလျှင် ပြည်သူ့လွတ်မြောက်ရေးတပ်မတော်နှင့် ချိတ်ဆက်ကာ ထောက်လှမ်းရေး မိုးပျံပူဖောင်း အစီအစဉ်ကို လုပ်ဆောင်ခဲ့ကြောင်း၊ ၎င်းတို့သည် အမေရိကန် အပါအဝင် တိုက်ကြီးငါးတိုက်မှ နိုင်ငံပေါင်း ၄၀ ကျော်၏ အချုပ်အခြာအာဏာကို ချိုးဖောက်ခဲ့ခြင်း ဖြစ်ကြောင်းလည်း ဝပ်ဆန်က ပြောသည်။

မိုးပျံပူဖောင်း ဖြစ်ရပ်ကြောင့် အမေရိကန် ကာကွယ်ရေးဝန်ကြီး အန်တိုနီ ဘလင်ကင်(Antony Blinken) ၏ တရုတ်ခရီးစဉ်ကို ဖျက်သိမ်းခဲ့သည်။

ထိုခရီးစဉ်သည် ထိုင်ဝမ်အရေး၊ ကုန်သွယ်ရေး၊ လူ့အခွင့်အရေးနှင့် အငြင်းပွားနေသော တောင်တရုတ် ပင်လယ် အတွင်း တရုတ်၏ ခြိမ်းခြောက်သော လုပ်ရပ်များနှင့်ပတ်သက်၍ နှစ်နိုင်ငံကြား တင်းမာမှုများကို ဖြေလျော့စေ လိမ့်မည်ဟု မျှော်လင့်ခဲ့သော ခရီးစဉ်လည်း ဖြစ်သည်။

Source: AP

CNI International News

မင့်ခ်၊ ဖေဖော်ဝါရီ ၁၄

စုပေါင်းလုံခြုံရေးသဘောတူညီချက်အဖွဲ့အစည်း (CSTO)၏ အတွင်းရေးမှူးချုပ် အီမန်ဂါလီ တက်စ်မန် ဂမ်ဘီ တော့ဗ် (Imangali Tasmagambetov)နှင့် တနင်္လာနေ့ တွေ့ဆုံရာတွင် ဘယ်လာရုစ်သမ္မတ အလက်ဇန်းဒါး လူကာရှန်ကို (Alexander Lukashenko) က အဖွဲ့ဝင်နိုင်ငံများအနေဖြင့် ပူးပေါင်းဆောင်ရွက်ရန် ယူကရိန်း ပဋိပက္ခကြောင့်ဖြစ်မည့်အရာများအတွက် မူဝါဒတစ်ခုချမှတ်ရန် တောင်းဆိုခဲ့သည်ဟု BeITA သတင်းတွင် ဖော်ပြသည်။

ယူကရိန်းပဋိပက္ခက ကိုယ်နှင့်မဆိုင်ဟုယူဆလျှင် မှားယွင်းလိမ့်မည်ဖြစ်ကြောင်း၊ ယင်းသည် နောက်တစ်ရက်တွင် ပင်ဖြစ်လာနိုင်ကြောင်း၊ ထို့ကြောင် ပြင်ဆင်ကာ သင့်တော်သောအနေအထားတွင် ရှိနေသင့်ကြောင်း လူကာရှန်ကို က ပြောသည်။ နိုင်ငံတော်အကျိုးစီးပွားနှင့် တခြားအရာများကို ထိခိုက်စေရမည်ဟု မဆိုလိုကြောင်း၊ သို့သော် မဟာမိတ်အဖွဲ့အတွင်း အားနည်းချက်များရှိနေချိန်တွင် အတူတကွ စုစည်းဆောင်ရွက်နိုင်ရေး မူဝါဒတစ်ခုကို ရှင်းရှင်းလင်းလင်း ချမှတ်သင့်ကြောင်း၊ အတူတကွဆောင်ရွက်ခြင်းသည် အလွယ်ကူဆုံးနှင့်အရိုးရှင်းဆုံးဖြစ် ကြောင်းလည်း ၎င်းကပြောသည်။

CSTO အဖွဲ့အတွင်း ညှိနှိုင်းမှုများရှိသင့်ကြောင်း လူကာရှန်ကိုက အခိုင်အမာပြောခဲ့ပြီး အဖွဲ့ဝင်နိုင်ငံများ အားလုံး သည် အဖွဲ့အစည်းတစ်ခုအဖြစ် ဆောင်ရွက်နေသည်ဟု ဆိုသည်။ ယနေ့အချိန်တွင် ၎င်းတို့အတွက် စိန်ခေါ်မှု လုံလုံ လောက်လောက်ရှိနေပြီဟုလည်း ၎င်းက ပြောသည်။

CSTO အတွင်းရေးမှူးချုပ် ရာထူးကို မကြာသေးခင်က လွဲပြောင်းရယူခဲ့သော တက်စ်မန်ဂမ်ဘီတော့ဗ်အား ကြိုဆိုကာ ၎င်းတို့ချင်း ကာလရှည်ရင်းနှီးခဲ့သည်ဟု လူကာရှန်ကိုက ပြောသည်။ အတွေ့အကြုံရှိသူတစ်ဦးအဖြစ် ပြန်လည်တွေ့ဆုံရသည်ကို ဝမ်းသာကြောင်း၊ ၎င်းတို့သည် လူငယ်ကွန်မြူနစ်အဖွဲ့ တက်ကြွလှုပ်ရှားသူများအဖြစ် ဆောင်ရွက်ခဲ့ကာ နှစ်ဦးကြားရင်းနှီးနေသည့်အကြောင်းအရာရှိကြောင်း၊ တက်စ်မန်ဂမ်ဘီတော့ဗ်သည် ဘဝနှင့် ပတ်သက်သည့်အတွေ့အကြုံများစွာရှိကာ ယင်းသည် လေးစားခံထိုက်ကြောင်း လူကာရှန်ကိုက ပြောသည်။

ဆိုဗီယက်ခေတ်မှစ၍ ယနေ့အထိအကြောင်းအရာများကို အတွေ့အကြုံရှိသူများသည် လက်ရှိတွင် အနည်းငယ် သာ ရှိတော့ကြောင်း၊ ထိုသူများသည်တန်ဖိုးရှိသူများဖြစ်ကြောင်းလည်း လူကာရှန်ကိုက ဆက်လက် ပြောကြားခဲ့ သည်။

Source:တာ့စ်သတင်းဌာန

CNI International News

မော်စကို၊ ဖေဖော်ဝါရီ ၁၄

ရုရှားနှင့်ပဋိပက္ခအတွင်း ပါဝင်နေရသော ယူကရိန်းလူမျိုးများသည် အမေရိကန်တို့ မလုပ်လိုသော ညစ်ပတ်သည့် အလုပ်များကို လုပ်ဆောင်နေရသည်ဟု အမေရိကန်ကာကွယ်ရေးဝန်ကြီးဟောင်း မတ်ခ်အက်စ်ပါ (Mark Esper) က ပြောကြောင်း တာ့စ်သတင်းတွင် ဖော်ပြထားသည်။

ရုရှားလူပြက်နှစ်ဦးဖြစ်သူ ဗလာဒီမာ ကတ်ဇ်နတ်ဆော့ဗ် (Vladimir Kuznetsov) ၊ အလက်ဇီ စတိုယာရော့ဗ် (Alexey Stolyarov) နှင့် တွေ့ဆုံစဉ် ထိုသို့ ပြောခဲ့ခြင်း ဖြစ်သည်။

လူပြက်နှစ်ဦးသည် ယူကရိန်းသမ္မတဟောင်း ပီတာပိုရိုရှန်ကို (Petr Poroshenko) ကိုယ်စား အက်စ်ပါကို ခေါ်ယူ ခဲ့ခြင်းဖြစ်ကာ ယူကရိန်းပဋိပက္ခအတွင်း အမေရိကန်၏ ပါဝင်နှင့်ပတ်သက်၍ ၎င်း၏ သဘောထားအမြင်ကို မေးမြန်းခဲ့သည်။

ဘိုင်ဒန်နဲ့ဇာလန်းစကီးကိုတွေ့ရစဉ်(GETTY IMAGES)

အက်စ်ပါက အမေရိကန်တို့ မလုပ်ချင်သည့် ညစ်ပတ်သော အလုပ်များကို ယူကရိန်လူမျိုးများ လုပ်ဆောင်နေရ ကြောင်း၊ ထို့ကြောင့် ယူကရိန်းကို ခဲယမ်းနှင့်လက်နက် သို့မဟုတ် နည်းပညာစသော ၎င်းတို့ လိုချင်သည် များကို ဆက်လက် ထောက်ပံ့ပေးသင့်ကြောင်း ဖြေကြားခဲ့သည်။

အာဖရိက အပါအဝင် ရုရှား၏ လွှမ်းမိုးမှု ကျယ်ပြန့်လာခြင်းသည် အမေရိကန်အတွက် ပြဿနာ ဖြစ်စေသည် ဟုလည်း ၎င်းက ပြောသည်။

ယူကရိန်းသို့ လက်နက်များ ထောက်ပံ့နေရခြင်းကြောင့် အမေရိကန်၏ နည်းပညာများ တခြားသူများလက်တွင်း သို့ ရောက်ရှိသွားမည်ကို စိုးရိမ်မိသည်ဟုလည်း ပင်တဂွန် အကြီးအကဲဟောင်းက ပြောသည်။

အမေရိကန်၏ စစ်ဘက်ဆိုင်ရာ နည်းပညာများ ရန်ဘက် နိုင်ငံများထံသို့ မရောက်ရှိရေး သေချာအောင် ဆောင်ရွက်ရမည်ဟု အက်စ်ပါက အခိုင်အမာ ပြောကြားခဲ့သည်။

Source: တာ့စ်

CNI International News

ဘန်ဂါလူရူ၊ဖေဖော်ဝါရီ ၁၃

ယခု သီတင်းပတ်အတွင်း ကျင်းပမည့် အဓိကကျသော လေကြောင်းပြပွဲ တစ်ခု၌ အိန္ဒိယနိုင်ငံသည် ဒေါ်လာ ဘီလီယံ ပေါင်းများစွာ တန်ကြေးရှိ စစ်ဘက်လေယာဉ်များကို ဝယ်ယူရန်၊ အရပ်ဘက် လိုအပ်ချက်ကို ဖြည့်စည်း ရေးအတွက် အရပ်ဘက်သုံး လေယာဉ်စာချုပ်များ ချုပ်ဆိုရန်နှင့် အိန္ဒိယတွင် လာရောက် ထုတ်လုပ်ရေးအတွက် ကမ္ဘာ့လေယာဉ်ထုတ်ကုမ္ပဏီများကို တွန်းအားပေးရန် ကြိုးပမ်းသွားမည်ဟု ရိုက်တာသတင်းတွင် ဖော်ပြထားသည်။

နျူကလီးယား ပြိုင်ဘက်များဖြစ်သော တရုတ်နှင့်ပါကစ္စတန်တို့၏ စိန်ခေါ်မှုများနှင့် ရင်ဆိုင်နေရသော အိန္ဒိယ သည် ကမ္ဘာ့စတုတ္တအကြီးဆုံး လေတပ်အင်အားကို ပိုင်ဆိုင်ထားသော်လည်း ဆိုဗီယက်ခေတ် လက်ကျန်များ ဖြစ်နေခြင်းကြောင့် လေတပ်ကို ခေတ်မီအောင် ဆောင်ရွက်ရန် လိုအပ်နေသည်။

အိန္ဒိယသမုဒ္ဒရာတွင် တရုတ်၏ အင်အားကြီးထွားလာမှုကို လိုက်မှီရန် လေယာဉ်တင် သင်္ဘောများအတွက် လေယာဉ်များလည်း လိုအပ်နေသည်။ တနင်္လာနေ့မှ စတင်ကာ ဘန်ဂါလူရူတွင် Aero India လေကြောင်းပြပွဲကို လက်ခံကျင်းပသွားရန် ပြင်ဆင်နေချိန်တွင် အိန္ဒိယလေကြောင်း လိုင်းများသည်လည်း တိုးချဲ့ရန် စီစဉ်နေသည်။

လေကြောင်းပြပွဲကိုတွေ့ရစဉ်

Air India သည် Airbus နှင့် Boeing ကုမ္ပဏီတို့မှ ဒေါ်လာ ဘီလီယံ ၁၀၀ တန်ကြေးရှိ ဂျက်လေယာဉ် အစင်း ၅၀၀ နီးပါးကို စံချိန်တင် ဝယ်ယူမှုပြု လုပ်ကြောင်း ကြေညာမည်ဟု ယူဆရသည်။

IndiGo လေကြောင်းလိုင်းသည်လည်း Air India ကဲ့သို့ပင် အချီကြီး ဝယ်ယူမှု လုပ်ဆောင်နိုင်သည်ဟု CAPA India လေကြောင်း အတိုင်ပင်ခံ အဖွဲ့က ပြောသည်။

Air India နှင့် IndiGo တို့ အပါအဝင် အိန္ဒိယလေကြောင်း ကုမ္ပဏီများသည် လာမည့်နှစ်များအတွင်း လေယာဉ် အစင်းရေ ၁၅၀၀ မှ ၁၇၀၀ အထိ ဝယ်ယူမည်ဟုလည်း ယင်းက ခန့်မှန်းသည်။

လေကြောင်းပြပွဲသည် တနင်္လာနေ့မှ သောကြာနေ့အထိ ငါးရက်ကြာ ကျင်းပမည်ဖြစ်ကာ ယင်းကို ဝန်ကြီးချုပ် မိုဒီက ဖွင့်လှစ်ပေးမည်။

ထိုပြပွဲသည် စစ်ဘက်သုံး လေယာဉ်များကသာ ကြီးစိုးသွားမည် ဖြစ်သော်လည်း ယင်းက ပြည်တွင်း လေကြောင်း သွားလာမှုနှင့် နိုင်ငံတကာလေကြောင်း သွားလာမှုတွင် ပြန်လည်တည်ဆောက်ရေး အိန္ဒိယအစိုးရ၏ ကြိုးပမ်းမှုကို ထင်ဟပ်စေသည်။

လေကြောင်းပြပွဲကို တွေ့ရစဉ်

မိုဒီသည် ၎င်း၏စီးပွားရေး မူဝါဒတွင် ပြည်တွင်းဖြစ်ကဏ္ဍကို အရေးပါသော နေရာ၌ ထည့်သွင်းထားပြီး Lockheed Martin၊ Boeing နှင့် Airbus ကဲ့သို့ လေယာဉ်ထုတ် ကုမ္ပဏီများအနေဖြင့် နည်းပညာမျှဝေးခြင်း သို့မဟုတ် အိန္ဒိယ တွင် လေယာဉ် အစိတ်အပိုင်းများ ထုတ်လုပ်ခြင်းထက်ပိုသော ထုတ်လုပ်မှုများကို လုပ်ဆောင်ခြင်း စသည်တို့ ပြုလုပ်ရန် တိုက်တွန်းထားသည်။

အဆင့်မြင့်နည်းပညာများကို မျှဝေးခြင်းနှင့် ပြည်တွင်း၌ ထုတ်လုပ်ခြင်း စသော တိုက်တွန်းမှုများက အိန္ဒိယနိုင်ငံ အား အမေရိကန်၊ ရုရှားနှင့် တရုတ်ကဲ့သို့ စစ်ဘက်ဆိုင်ရာ စူပါပါဝါနိုင်ငံများနှင့် တစ်တန်းထဲတွင် ရှိနေစေရေး မိုဒီ၏ ရည်မှန်းချက်ကိုလည်း ပေါ်လွင်စေသည်။

တစ်ချိန်တည်းမှာပင် အိန္ဒိယလေကြောင်းလိုင်းများသည်လည်း နိုင်ငံတကာ ခရီးသည်များ စီးနင်းမှုတွင် ပိုမို ကြီးမားသော ရှယ်ယာရရှိရေးအတွက် Emirates လေကြောင်းလိုင်းကဲ့သို့ ပြိုင်ဘက် များနှင့် ယှဉ်ပြိုင်မှု ပြုလုပ် လျက် ရှိသည်။

Source: Reuters

CNI International News

ဘေဂျင်း၊ဖေဖော်ဝါရီ - ၁၃

အမေရိကန်၏ ရန်ဘက်ဖြစ်သူ အီရန်သမ္မတ အီဗရာဟင် ရိုင်ဆီသည် တရုတ်နှင့်ဆက်ဆံရေး တိုးမြှင့်ရန်အတွက် တရုတ်သို့ သွားမည်ဖြစ်ကြောင်း သိရသည်။

အင်္ဂါနေ့တွင် စတင်မည့် သုံးရက်ကြာ တရုတ်ခရီးစဉ်တွင် အီရန်သမ္မတ အီဗရာဟင် ရိုင်ဆီ (Ebrahim Raisi) သည် တရုတ်သမ္မတ ရှီကျင့်ဖျင် (Xi Jinping) နှင့် တွေ့ဆုံသွားမည်ဟု အေပီသတင်းတွင် ဖော်ပြသည်။

တရုတ်နိုင်ငံခြားရေးဌာန ပြောခွင့်ရပုဂ္ဂိုလ် ဟွာချန်ရင် (Hua Chunying) က အီရန်သမ္မတ ခရီးစဉ်နှင့် ပတ်သက်ပြီး တနင်္ဂနွေနေ့တွင် ထုတ်ပြန် ကြေညာခဲ့သည်။

ရှီက ရိုင်ဆီကို ဖိတ်ကြားခဲ့ခြင်း ဖြစ်သည်ဟု ဟွာချန်ရင်က ပြောသည်။

ရိုင်ဆီသည် ရှီနှင့်တွေ့ဆုံပြီးနောက်မှာတော့ ကိုယ်စားလှယ်အဖွဲ့သည် ပူးပေါင်းဆောင်ရွက်မှုဆိုင်ရာ စာရွက် စာတမ်းများကို လက်မှတ်ရေးထိုးမည်ဟု အီရန် နိုင်ငံပိုင် IRNA သတင်းတွင် ဖော်ပြသည်။

ရှီကျင့်ဖျင်နဲ့ဘိုင်ဒန်ကိုတွေ့ရစဉ်(Reuters)

အီရန်၊ တရုတ်စီးပွားရေး ခေါင်းဆောင်များ တွေ့ဆုံခြင်း၊ တရုတ်ရှိ အီရန်နိုင်ငံသားများနှင့် တွေ့ဆုံခြင်းသည်လည်း သမ္မတ၏ ခရီးစဉ်တွင် ပါဝင်သည်ဟု သတင်းတွင် ရေးသားထားသည်။

ရိုင်ဆီ၏ တရုတ်ခရီးစဉ်သည် အမေရိကန်ဦးဆောင်သည့် ကမ္ဘာ့ရေးရာများအပေါ် အနောက်အုပ်စု၏ လွှမ်းမိုးထား ခြင်းအပေါ် ဆန့်ကျင်သည့် နှစ်နိုင်ငံအကြား ဆက်ဆံရေးများကို ခိုင်မာအောင် လုပ်ဆောင်မည်ဟု ယူဆရသည်။

ခေါင်းဆောင်နှစ်ဦးသည် ပြီးခဲ့သည့် စက်တင်ဘာတွင် အဇာဘိုင်ဂျန်၌ တွေ့ဆုံခဲ့သည်။ ထိုတွေ့ဆုံမှုတွင် တရုတ်၏ အီရန်အပေါ် ထောက်ပံ့မှုများကို ရှီက အလေးအနက်ထား ပြောကြားခဲ့သည်။

တရုတ်ဒုတိယဝန်ကြီးချုပ် ဟူချန်းဟွာ (Hu Chunhua) နှင့် ဒီဇင်ဘာလက တွေ့ဆုံမှုတွင် မဟာဗျူဟာမြောက် မိတ်ဖက် ဆက်ဆံရေးကို ခိုင်မာအောင် ဆောင်ရွက်ရေး ကတိအတိုင်း ဆက်ရှိနေမည်ဟု ရိုင်ဆီက ကတိပေးခဲ့ သည်။

တရုတ်နိုင်ငံခြားရေးဌာန ပြောခွင့်ရပုဂ္ဂိုလ် ဟွာချန်ရင်ကိုတွေ့ရစဉ်(GETTY IMAGES)

တရုတ်သည် အီရန်၏ ရေနံကို အဓိက ဝယ်ယူသူဖြစ်ကာ အီရန်နိုင်ငံတွင်းရှိ ရင်းနှီးမြှုပ်နှံမှုများအတွက် အရေးပါ သော အရင်းအမြစ်တစ်ခုလည်း ဖြစ်သည်။

၂၀၂၁ ခုနှစ်တွင် တရုတ်နှင့် အီရန်တို့သည် ရေနံ၊ သတ္တုတူး ဖော်ရေးမှစ၍ သယ်ယူပို့ဆောင်ရေးနှင့် စိုက်ပျိုးရေး အထိ ပါဝင်သည့် အဓိကကျသော စီးပွားရေး လုပ်ဆောင်ချက်များ ပါဝင်သည့် ၂၅ နှစ် သက်တမ်းရှိ မဟာဗျူဟာ မြောက် ပူးပေါင်းဆောင်ရွက်မှု သဘောတူညီချက်ကို လက်မှတ် ရေးထိုးခဲ့သည်။

၎င်းတို့ နှစ်နိုင်ငံသည် အမေရိကန်နှင့်တင်းမာသော ဆက်ဆံရေးကို ပိုင်ဆိုင်ထားပြီး ရုရှားနှင့်အတူ အမေရိကန်အား တန်ပြန်နိုင်သည့် အင်အားစု တစ်ခု ဖြစ်စေရန် ကြိုပမ်းလျက်ရှိသည်။

Source: AP

CNI International News

လန်ဒန်၊ ဖေဖော်ဝါရီ ၁၃

ဒေသတွင်းလိုင်စင်ဖြင့် ယူကရိန်းတွင် လက်နက်များ၊ သံချပ်ကာကားများ ထုတ်လုပ်ရေးအတွက် ဗြိတိန် ကာကွယ်ရေးကဏ္ဍမှ ထိပ်တန်းအရာရှိများက ဆွေးနွေးမှုများလုပ်ဆောင်နေသည်ဟု Telegraph သတင်းတွင် စနေနေ့က ဖော်ပြသည်။

ထိုမှ အချို့သောအရာရှိများသည် ကိယက်ဗ်သို့သွားကာ ပူးတွဲထုတ်လုပ်ရေးအတွက် အခွင့်အလမ်းများ ရှာဖွေခဲ့ပြီး ဖြစ်သည်ဟုလည်း အဆိုပါသတင်းတွင် ဖော်ပြသည်။

ယင်းသို့ ဖော်ပြချက်အရ ဗြိတိန်ရှိကာကွယ်ရေးကုမ္ပဏီများသည် ၎င်းတို့ပြိုင်ဘက်များဖြစ်သော ပြင်သစ်နှင့်ဂျာမနီ တို့မှ ကုမ္ပဏီများသည် ယူကရိန်းနှင့်သဘောတူညီချက်များဦးစွာ ရရှိသွားမည်ကို စိုးရိမ်နေသည်ဟု သိရသည်။

လက်ရှိဆွေးနွေးမှုများသည် ဗြိတိန်ကို သဘောတူညီချက်ရရှိရေးအားသာချက်ဖြစ်စေသည်ဟု ကာကွယ်ရေး ကုမ္ပဏီအမှုဆောင်တစ်ဦးက ပြောသည်ကို ကိုးကားဖော်ပြထားသည်။ သို့သော် ထိုသို့ ထုတ်လုပ်ခွင့်ရရေးတွင် ဗြိတိန်အစိုးရ၏အတည်ပြုမှု လိုအပ်နေဆဲဖြစ်သည်။

ရုရှား၏ကျူးကျော်မှုကို ကာကွယ်ရန် ယူကရိန်းအစိုးရကို စစ်ဘက်အကူအညီများပေးရေးအတွက် ယင်း၏ အနောက်အုပ်စုမဟာမိတ်များက ဆောင်ရွက်နေစဉ်တွင် ယခုကဲ့သို့သတင်းထွက်ပေါ်လာခြင်းဖြစ်သည်။ ဗြိတိန် အစိုးရသည်လည်း ယူကရိန်းအစိုးရအား Challenger 2 တင့်ကားများပေးရန် ပြီးခဲ့သည့်လတွင် ကတိပြုခဲ့သည်။

ယူကရိန်းစစ်သားများသည် အမေရိကန်လုပ် Javelin တင့်ကားဖျက်ဒုံးကျည်များကို ထရပ်ကားတစ်စီးပေါ် တင်ဆောင်နေစဉ်(ဓါတ်ပုံ-အေအက်ဖ်ပီ)

ယူကရိန်းသို့ တိုက်လေယာဉ်များထောက်ပံ့ရေးအတွက် လေ့လာမှုပြုလုပ်ရန် ဗြိတိန်ဝန်ကြီးချုပ် ရီရှီ ဆူနက် (Rishi Sunak) က ကာကွယ်ရေးဌာနကို ညွှန်ကြားထားသည်။ ထိုဆုံးဖြတ်ချက်ကို ဂရုတစိုက်ဆောင်ရွက်နေကြောင်း၊ တင်းမာမှုများ ပိုမိုမြင့်တက်လာနိုင်သည်ကိုလည်း သတိပြုမိကြောင်း ဆူနက်၏ ပြောခွင့်ရပုဂ္ဂိုလ်က ထုတ်ဖော်ပြောဆိုထားသည်။

ယူကရိန်းသို့တခြားနိုင်ငံများမှ လက်နက်များထောက်ပံ့ပေးခြင်းသည် လက်ရှိ ပဋိပက္ခကို ပိုမိုဆိုးရွားလာစေမည် ဖြစ်ကြောင်း၊ အနောက်အုပ်စုမှ ထောက်ပံ့ပေးသောလက်နက်များကို တရားဝင်ပစ်မှတ်များအဖြစ် သတ်မှတ် သွားမည်ဖြစ်ကြောင်း ရုရှားဘက်က ထပ်ဖန်တလဲလဲ သတိပေးထားသည်။

လက်နက်များ ထောက်ပံ့ခြင်းက လက်ရှိယူကရိန်းပဋိပက္ခ၏ ရလာဒ်ကို ပြောင်းလဲစေနိုင်မည်မဟုတ်ဟုလည်း ရုရှားအစိုးရပြောခွင့်ရ ပုဂ္ဂိုလ်က ကြာသပတေးနေ့တွင် ပြောသည်။

ယူကရိန်းကိုလက်နက်များထောက်ပံ့ပေးခြင်းက ယူကရိန်းနိုင်ငံကို ပို၍ အထိနာစေလိမ့်မည်ဟုလည်း ၎င်းက သတိပေးထားသည်။

Source:RT