CNI International News

ဘန်ကောက်၊ဇွန်လ ၂၁

ထိုင်းနိုင်ငံ၊ ပတ္တယား (Pattaya)မြို့တွင် ဇွန်လ ၁၉ ရက်နေ့က ပြုလုပ်ခဲ့သော မြန်မာ့အရေး အလွတ်သဘော ဆွေးနွေးပွဲသည် အကျိုးဖြစ်ထွန်းခဲ့သလို ပါဝင်သူများအနေဖြင့်လည်း ထိုသို့ ဆွေးနွေးမှုများကို ထပ်မံ လုပ်ဆောင် လိုသည်ဟု ထိုင်းအိမ်စောင့်အစိုးရ၏ နိုင်ငံခြားရေးဝန်ကြီးဖြစ်သူ ဒွန် ပရာမတ်ဝီနိုင် (Don Pramudwinai)က ပြောသည်ဟု ဘန်ကောက်ပို့စ်မှ ဖော်ပြခဲ့သည်။ 

ဆွေးနွေးပွဲ အခြေအနေများသည် ကောင်းမွန်ခဲ့ကြောင်း၊ ပါဝင်သူများအနေဖြင့် ထိုင်းနိုင်ငံအား ထိုသို့ ဆွေးနွေးပွဲ များ ထပ်လုပ်စေလိုကြောင်း ဒွန်က ဇွန်လ ၂၀ ရက်နေ့၌ အစိုးရအဖွဲ့တွင် ပြောကြားခဲ့သည်။ 

အလွတ်သဘော ဆွေးနွေးမှုများသည် ပြဿနာများကို ဖြေရှင်းရန် နည်းလမ်းတစ်ခုဖြစ်ကြောင်း၊ ထိုင်းနိုင်ငံသည် ယခင်ကလည်း ထိုသို့ ဆွေးနွေးမှုမျိုး နှစ်ကြိမ် လုပ်ဆောင်ဖူးကြောင်း၊ ယင်းတို့သည် အကျိုးဖြစ်ထွန်း စေခဲ့ခြင်း သို့မဟုတ် ယခင်က ဆွေးနွေးပွဲတွင် ပါဝင်သူများသည် နောက်တစ်ကြိမ် ဆွေးနွေးမှုကို ပျက်ကွက်ခြင်း မရှိခဲ့ ကြောင်း ဒွန်က ပြောသည်။ 

ဇွန်လ ၁၉ ရက်နေ့ ဆွေးနွေးမှုများတွင် ယခင်က မဆွေးနွေးခဲ့ဖူးသော အကြောင်းအရာများကိုပါ ဆွေးနွေးနိုင်ခဲ့ရုံ မက ယခင်ကထက် ပါဝင်ဆွေးနွေးသူ အရေအတွက် မြင့်တက်လာခဲ့ကြောင်းလည်း ဒွန်၏ ပြောဆိုမှုတွင် ပါဝင် သည်။ 

ထိုင်း ဒုတိယဝန်ကြီးချုပ်နဲ့ နိုင်ငံခြားရေးဝန်ကြီးဖြစ်သူ ဒွန်ပရာမတ်ဝီနိုင်ကို တွေ့ရစဉ်

ထိုဆွေးနွေးပွဲများသို့ မြန်မာနှင့် နယ်နိမိတ်ချင်း ထိစပ်နေသည့် တရုတ်၊ အိန္ဒိယတို့ အပါအဝင် နိုင်ငံ ၇ နိုင်ငံမှ ကိုယ်စားလှယ်များ တက်ရောက်ခဲ့သည်ဟု ၎င်းက ပြောသည်။ 

မြန်မာနှင့် ပတ်သက်သော ကိစ္စများကို အိမ်စောင့်အစိုးရ အနေဖြင့် နောင်လာမည့် ထိုင်းအစိုးရသစ် သို့မဟုတ် အာဆီယံအဖွဲ့အား မည်သည့်အတွက်ကြောင့် မဖြေရှင်းခိုင်ရသလဲဟု မေးမြန်းခဲ့ရာတွင် ဒွန်က ထိုင်းသည် မြန်မာနှင့် ကီလိုမီတာ ၂၀၀၀ နယ်နိမိတ်ချင်း ထိစပ်နေကြောင်း၊ ထို့ကြောင့် မြန်မာနိုင်ငံမှ ပြဿနာများကို ဖြေရှင်းရန် အချိန်မဆွဲသင့်ကြောင်း ပြန်လည် ဖြေကြားခဲ့သည်။ 

တခြားသော အာဆီယံနိုင်ငံများသည် ထိုင်းကဲ့သို့ မြန်မာနှင့်ရှည်လျားသော နယ်နိမိတ်ကို မပိုင်ဆိုင်ထားကြောင်း၊ ထို့ကြောင့် ၎င်းတို့အနေဖြင့် စိုးရိမ်မှု သို့မဟုတ် ကာလရှည် မြန်မာပြဿနာကို ဖြေရှင်းရေး အဖြေတစ်ခုကို အလျင် အမြန် ရှာဖွေရမည်ဟု မခံစားရခြင်း ဖြစ်ကြောင်း ဒွန်က ဆက်လက် ပြောကြားသည်။

အလွတ်သဘော ဆွေးနွေးမှုများကို ထိုင်းနိုင်ငံ၏ အကောင်းဆုံး အကျိုးစီးပွားအတွက် လုပ်ဆောင်ခဲ့ခြင်း ဖြစ်သော် လည်း လူများစွာက ထိုအရေးနှင့်ပတ်သက်၍ သတိမပြုမိသလို အာဆီယံအဖွဲ့သာလျှင် ထိုကိစ္စကို ဦးဆောင် ကိုင်တွယ်သင့်သည်ဟု ခံယူထားကြောင်းလည်း ၎င်းက ထောက်ပြသည်။ 

အင်ဒို-မြန်မာ-ထိုင်း နိုင်ငံခြားရေးဝန်ကြီးများ ၂၀၂၁ ခုနှစ်က တွေ့ဆုံစဉ်

မြန်မာအရေးသည် ထိုင်းနိုင်ငံကို သာမက၊ နယ်စပ်ကုန်သွယ်ရေး၊ စီးပွားရေးတို့အပေါ် သက်ရောက်မှု ရှိစေသည်။ 

ထိုမျှမက မြန်မာနိုင်ငံတွင်းမှ လူလိမ် အဖွဲ့များသည် နိုင်ငံများစွာမှ ပြည်သူများအပေါ် ပြစ်မှုကျူးလွန် နေကြောင်း၊ ထိုင်းနိုင်ငံသားများသည် တရားမဝင် လုပ်ငန်းများအတွက် နယ်စပ်ဖြတ်ကျော် ဆောင်ရွက်နေကြောင်းနှင့် မူးယစ် ဆေးဝါး အပြင် တခြားသော တရားမဝင် ပစ္စည်းများနှင့် ပတ်သက်သည့် ပြဿနာများလည်း ရှိနေကြောင်း နိုင်ငံ ခြားရေးဝန်ကြီးက ပြောသည်။ 

ကမ္ဘောဒီယား၏ ဦးဆောင်မှုဖြင့် ဖြတ်သန်းခဲ့ရသော ၂၀၂၂ ခုနှစ်တွင် အာဆီယံအဖွဲ့သည် မတူကွဲပြားသော အခြေ အနေများ၊ ပုံစံများဖြင့် မြန်မာနိုင်ငံရေး ပြဿနာကို အောင်မြင်သော ဖြေရှင်းနည်းများ ရှာဖွေရေးတွင် အားလုံး ပူး ပေါင်း ဆောင်ရွက်သင့််သည်ဟု ထုတ်ပြန်ထားခဲ့ဖူးကြောင်း ဒွန်က ပြောသည်။ 

ဇွန်လ ၁၉ ရက်နေ့ ဆွေးနွေးပွဲတွင် ပါဝင်သူများက ဆွေးနွေးပွဲ ရလဒ်များကို လူသိရှင်ကြား မထုတ်ပြန်ရန် သဘော တူခဲ့ကြောင်း၊ ယင်းတွင် အပြီးသတ် အဖြေ သို့မဟုတ် သဘောတူညီချက် တစ်စုံတစ်ရာ ရရှိခဲ့ခြင်း မရှိဟုလည်း ဒွန်က ပြောသည်။

Source: ဘန်ကောက်ပို့စ်

CNI International News

ဝါရှင်တန်၊ ဇွန်လ ၂၁

အိန္ဒိယဝန်ကြီးချုပ် နာရန်ဒရာ မိုဒီ (Narendra Modi) အား နိုင်ငံတော်အဆင့် ခရီးစဉ် ဖိတ်ကြားမှုသည် အမေရိကန်သမ္မတ ဂျိုးဘိုင်ဒန် (Joe Biden) အတွက် ထူးဆန်းသော ရွေးချယ်မှုဖြစ်ကြောင်း အေပီက ရေးသား ခဲ့သည်။ 

လွန်ခဲ့သော ၁၆ လက ယူကရိန်းအား ကျူးကျော်ရန် ရုရှားသမ္မတက အမိန့်ပေးခဲ့ပြီးနောက်တွင် အိန္ဒိယသည် ဈေးချိုသော ရုရှားရေနံများကို ဝယ်ယူမှု မြှင့်တင်ခြင်းဖြင့် ယင်း(အိန္ဒိယ)၏ စီးပွားရေးအား မြှင့်တင်ခဲ့သည်။ 

လူ့အခွင့်အရေးအဖွဲ့များနှင့် နိုင်ငံရေး အတိုက်အခံများက မိုဒီသည် သဘောထား ကွဲလွဲသူများကို ဖိနှိပ်ခြင်း၊ ကွဲပြားသော မူဝါဒများဖြင့် မူဆလင်များ၊ တခြားသော မျိုးနွယ်စုများကို ခွဲခြားဆက်ဆံခြင်းတို့ လုပ်ဆောင်ခဲ့သည် ဟု စွပ်စွဲထားသည်။
 
အိန္ဒိယနိုင်ငံခြားရေးဝန်ကြီး ဆူဘရာမန်ယန် ဂျိုင်ရှန်ကာ (Subrahmanyam Jaishankar) သည်လည်း မဟာမိတ် သို့မဟုတ် မိတ်ဆွေ မရှိကြောင်း၊ ရန်သူ-မိတ်ဆွေ ရောလျက်သာရှိကြောင်း ပြောထားသည်။ 

သို့သော် ဘိုင်ဒန်သည် အမေရိကန်၏ အိန္ဒိယနှင့် ဆက်သွယ်မှုများကို ဆက်ဆံရေးတစ်ခုအဖြစ် ရှုမြင်ထားသည်။ 

ဘိုင်ဒန်၏ အမြင်အရ အိန္ဒိယသည် လာမည့် နှစ်များတွင် ရာသီဥတုပြောင်းလဲမှု၊ မှတ်ဉာဏ်တုဆိုင်ရာ အငြင်းပွားမှု များနှင့် အင်ဒို - ပစိဖိတ်ဒေသ၌ တရုတ်၏ အင်အားကြီးထွားလာမှုတို့ အပါအဝင် အခက်ခဲဆုံးသော ကမ္ဘာလုံးဆိုင် ရာ ပြဿနာများကို ဖြေရှင်းရန် မရှိမဖြစ် အရေးပါသည်ဟု သတ်မှတ်ထားသည်။ 

အိန္ဒိယဝန်ကြီးချုပ် နာရန်ဒရာ မိုဒီနဲ့ အမေရိကန်သမ္မတ ဂျိုးဘိုင်ဒန်ကိုတွေ့ရစဉ်

လက်ရှိတွင် အိန္ဒိယနှင့် အမေရိကန်တို့သည် ကြီးမားရှုပ်ထွေးသော နိုင်ငံများ ဖြစ်သည်ကို မြင်တွေ့ရသည်ဟု အမေရိကန် နိုင်ငံခြားရေးဝန်ကြီး အန်တိုနီဘလင်ကင် (Antony Blinken) က ပြောသည်။ 

ပွင့်လင်းမြင်သာမှုကို မြှင့်တင်ရန်၊ ဈေးကွက်အတွင်း ဝင်ရောက်နိုင်မှုကို တိုးချဲ့ရန်၊ ဒီမိုကရေစီ စနစ်များကို ချဲ့ထွင် ရန်နှင့် ပြည်သူများအတွက် အလားအလာများကို အပြည့်အဝ အကောင်အထည် ဖော်ရန် လုပ်ဆောင်သွားရမည် ဖြစ်ကြောင်း၊ သို့သော် ထိုသို့သော ဆက်ဆံရေး လမ်းကြောင်းသည် ကတိကဝတ်များဖြင့် ဖြည့်ဆည်းထားကြောင်း ဘလင်ကင်က ပြောသည်။ 

အိန္ဒိယဝန်ကြီးချုပ်၏ အမေရိကန်ခရီးစဉ်သည် ဇွန်လ ၂၀ ရက်နေ့တွင် စတင်ခဲ့ပြီး လေးရက် ကြာမည်ဖြစ်သည်။

မိုဒီသည် နယူးယောက်တွင် အစည်းအဝေးပွဲများ ကျင်းပရန် စီစဉ်ထားသလို ကုလသမဂ္ဂတွင် ဇွန်လ ၂၁ ရက်နေ့၌ ကျင်းပမည့် အပြည်ပြည်ဆိုင်ရာ ယောဂနေ့ အခမ်းအနားကိုလည်း ဦးဆောင်သွားမည် ဖြစ်သည်။ 

ဘိုင်ဒန်သည် အိန္ဒိယနှင့် နီးကပ်သော ဆက်ဆံရေးကို တည်ဆောက်လိုသည်။ 

အိန္ဒိယဝန်ကြီးချုပ် နာရန်ဒရာ မိုဒီနဲ့ ရုရှားသမ္မတ ပူတင်ကိုတွေ့ရစဉ်

အမေရိကန်အစိုးရသည် ယင်း၏နိုင်ငံခြားရေး မူဝါဒကို အာရှဒေသသို့ အသားပေးကာ တရုတ်၏ စိန်ခေါ်မှုများနှင့် ရင်ဆိုင်နေရချိန်တွင် ဒေသတွင်း မိတ်ဖက်များ တည်ဆောက်ရန် ရည်ရွယ်ချက် ရှိသည်။ 

မိုဒီသည်လည်း အိန္ဒိယအတွက် ပို၍ အလားအလာ ကောင်းသော ခေတ်တစ်ခုကို တည်ဆောက်ရန် ကြိုးပမ်းလျက် ရှိသည်။ 

ပြီးခဲ့သည့် ၉ နှစ်ကျော် အာဏာရရှိချိန်တွင် ပေးခဲ့သော ကတိကို အကောင်အထည်ဖော်ရန် ဖြစ်သည်။

ထို့အပြင် အိန္ဒိယခေါင်းဆောင်သည် အမေရိကန်-အိန္ဒိယ စီးပွားရေးနှင့် စစ်ဖက် ဆက်ဆံရေးများကို မြှင့်တင်ရန် ရည်ရွယ်ချက် ရှိသည်။ 

ထို့အပြင် ၎င်းသည် ဟိမဝန္တာနယ်စပ် တစ်လျှောက်နှင့် အိန္ဒိယသမုဒ္ဒရာတို့တွင်း တရုတ်၏ စစ်ရေးလှုပ်ရှားမှုများ အပေါ် စိုးရိမ်မှု ရှိနေသည်။ 

အိန္ဒိယသည် လာဒတ်ခ် (Ladakh) တောင်တန်းဒေသတွင် တရုတ်နှင့် ကာလရှည် မတင်မကျ အခြေအနေနှင့် လည်း ရင်ဆိုင်နေရသည်။ 

Source: AP

CNI International News

မော်စကို၊ ဇွန်လ ၂၁

ယူကရိန်း လက်နက်ကိုင်တပ်ဖွဲ့ ဌာနချုပ်သည် ခရိုင်းမီးယား အပါအဝင် ရုရှား၏နယ်မြေများသို့ HIMARS ဒုံးပျံများ၊ Storm Shadow ဒုံးကျည်များဖြင့် တိုက်ခိုက်ရန် စီစဉ်နေသည်ဟု ရုရှားကာကွယ်ရေးဝန်ကြီး ဆာဂျီ ရှိုဂူ (Sergey Shoigu) က ပြောသည်။  

မိမိတို့၏ အချက်အလက်များအရ ယူကရိန်း လက်နက်ကိုင်တပ်ဖွဲ့၏ ခေါင်းဆောင်ပိုင်းသည် ခရိုင်းမီးယား (Crimea) အပါအဝင် ရုရှားပြည်ထောင်စု၏ နယ်မြေများကို HIMARS နှင့် Strom Shadow များဖြင့် တိုက်ခိုက်ရန် စီစဉ်နေသည်ဟု ရှိုဂူက ပြောသည်။ 

ဌာန၏ ဘုတ်အဖွဲ့ အစည်းအဝေး တစ်ခုတွင် ထိုသို့ ပြောကြားခဲ့ခြင်း ဖြစ်သည်။ 

ရုရှားကာကွယ်ရေးဝန်ကြီး ဆာဂျီရှိုဂူကိုတွေ့ရစဉ်

အထူးစစ်ဆင်ရေးဇုန် ပြင်ပတွင် ထိုသို့သော လက်နက်များ အသုံးပြုခြင်းက ရုရှားဘက်က ယူကရိန်း၏ ဆုံးဖြတ် ချက် ပေးသော စင်တာများကို ချက်ချင်း တုံ့ပြန် တိုက်ခိုက်မှုကို သာမက ပဋိပက္ခအတွင်း အမေရိကန်နှင့် ဗြိတိန် တို့ အပြည့်အဝ ပါဝင်ပတ်သက်ခြင်းကိုပါ ဖြစ်စေသည်ဟုလည်း ဝန်ကြီးက ပြောသည်။ 

ယူကရိန်း အစိုးရသည် ဇာပိုရိုဇီယီ (Zaporozhye) နှင့် ဒွန်းနက်စ် (Donetask) ဧရိယာများသို့ပါ တိုက်ခိုက်ရန် အစဉ်တစိုက် ကြိုးပမ်းလျက်ရှိကြောင်း၊ နေတိုးအဖွဲ့က လေ့ကျင့်ပေးထားသည့် အထူးတပ်ဖွဲ့ဝင်များအပြင် အနောက်အုပ်စုမှ ထောက်ပံ့ပေးသည့် လက်နက်များကို အသုံးပြုကြောင်းလည်း ၎င်းက ပြောသည်။

ဇွန်လ ၄ ရက်မှ စတင်၍ ယူကရိန်းစစ်တပ်သည် ရုရှားတပ်ဖွဲ့များဆီသို့ တိုက်ခိုက်မှုပေါင်း ၂၆၃ကြိမ် ပြုလုပ်ခဲ့ ကြောင်း၊ ရုရှားတပ်များ၏ အရည်အချင်း ပြည့်ဝမှုနှင့် အနစ်နာခံသော စွမ်းရည်တို့ကြောင့် ထိုတိုက်ခိုက်မှုများကို တွန်းလှန်နိုင်ခဲ့ကာ ရန်သူများအနေဖြင့် ၎င်းတို့၏ ရည်ရွယ်ချက်အား အကောင်အထည် မဖော်နိုင်ခဲ့ကြောင်းလည်း ကာကွယ်ရေးဝန်ကြီးက ထပ်လောင်း ပြောခဲ့သည်။

Source: တာ့စ်

CNI International News

ဘန်ကောက်၊ ဇွန်လ ၂၁

Move Forward ပါတီခေါင်းဆောင် ပီတာလင်ဂျာရိုရန်ရတ် (Pita Limjaroenrat) အား လွှတ်တော်အမတ်အဖြစ် အရည်အချင်း ပြည့်မှီခြင်း ရှိ/မရှိ ဆုံးဖြတ်ပေးရေး ဖွဲ့စည်းပုံအခြေခံဥပဒေတရားရုံးကို တောင်းဆိုပေးရန် ရောင်ခရိုင် လီကစ်ဝပ်တာနာ (Ruangkrai Leekitwattana) က ရွေးကောက်ပွဲကော်မရှင်(EC)ထံ ထပ်မံ တောင်း ဆိုခဲ့သည်ဟု Thai PBS မှ ရေးသားခဲ့သည်။ 

၎င်းသည် ပီတာ၏ ကိစ္စအား အရေးယူပေးရန် ထပ်ခါထပ်ခါ တောင်းဆိုခဲ့သူဖြစ်ပြီး ယခုတစ်ကြိမ်တွင်လည်း ပီတာ ဝန်ကြီးချုပ် ဖြစ်လာခြင်းကို တားဆီးရန် နောက်တစ်ကြိမ် ထပ်မံ လုပ်ဆောင်ခဲ့ခြင်း ဖြစ်သည်။ 

အောက်လွှတ်တော်၏ အမတ် ၅၀၀ လုံးကို EC က အတည်ပြု ပေးခဲ့ပြီးချိန်တွင် ရောင်ခရိုင်က ဖွဲ့စည်းပုံ အခြေခံ ဥပဒေ၏ ပုဒ်မ ၉၈ ကို ကိုးကားကာ ထိုသို့ ကြိုးပမ်းခဲ့ခြင်း ဖြစ်သည်။ 

မီဒီယာကုမ္ပဏီ တစ်ခုတွင် ရှယ်ယာ ပိုင်ဆိုင်ခြင်းနှင့် ပတ်သက်၍ ရွေးကောက်ပွဲ ကိုယ်စားလှယ်လောင်း တစ်ဦး၏ အရည်အချင်း ပြည့်မှီမှုနှင့်ပတ်သက်၍ သံသယဖြစ်ခဲ့မည်ဆိုလျှင် EC အနေဖြင့် ထိုကိစ္စကို စုံစမ်းစစ်ဆေးပေးရန် ဖွဲ့စည်းပုံအခြေခံဥပဒေတရားရုံးကို တောင်းဆိုခွင့် ရှိသည်ဟု ပုဒ်မ ၉၈ တွင် ဖော်ပြထားသည်။ 

iTV နဲ့ ပတ်သက်တဲ့ အချက်အလက်တွေကို တင်ဖို့လာတဲ့ ရောင်ခရိုင် လီကစ်ဝပ်တာနာကိုတွေ့ရစဉ်

ဖွဲ့စည်းပုံအခြေခံဥပဒေ ပုဒ်မ ၈၂ အရလည်း လွှတ်တော်အမတ်များ၏ ၁၀ ပုံ ၁ ပုံက ပီတာ၏ အရည်အချင်း ပြည့်မှီ မှုကို စဉ်းစားပေးရေး ၎င်းတို့၏ တင်ပြချက်ကို ဖွဲ့စည်းပုံတရားရုံးသို့ တင်ရေး လွှတ်တော် သို့မဟုတ် လွှတ်တော် ဥက္ကဋ္ဌကို တောင်းဆိုခွင့် ရှိသည်ဟုလည်း ၎င်းက ပြောသည်။ 

ဖွဲ့စည်းပုံတရားရုံး အနေဖြင့် ယင်းကို လက်ခံမည်ဆိုလျှင် ပီတာအား တရားရုံးအမိန့် မချမချင်း လွှတ်တော်အမတ် အဖြစ် ဆောင်ရွက်နေခြင်းကို တားဆီးနိုင်ရန် အမိန့်ချမှတ် နိုင်သည်ဟုလည်း ရောင်ခရိုင်က ပြောသည်။

ပီတာသည် ရွေးကောက်ပွဲကာလတွင် မီဒီယာကုမ္ပဏီအဖြစ် စွပ်စွဲခံထားရသော iTV ကုမ္ပဏီ၌ ရှယ်ယာ ၄၂၀၀၀ ပိုင်ဆိုင်ထားသည်ဟု သတင်းများမှာ ဖော်ပြခံထားရသည်။ 

လွန်ခဲ့သော ၁၇ နှစ်တွင် ကွယ်လွန်သွားသည့် ဖခင်ဖြစ်သူထံမှ အမွေဆက်ခံရရှိထားခြင်း ဖြစ်သည်။

သို့သော် ပီတာသည် ထိုရှယ်ယာများကို တခြား အမွေဆက်ခံသူများထံသို့ လွဲပြောင်းပေးခဲ့ပြီးလည်း ဖြစ်သည်။

Source: Thai PBS

CNI International News

ကဘူးလ်၊ ဇွန်လ ၂၀

၂၀၂၁ ခုနှစ်၊ သြဂုတ်လ တာလီဘန်တို့ အာဏာလွဲပြောင်း ရယူပြီးချိန်မှစ၍ အာဖဂန်နစ္စတန်တွင် နိုင်ငံခြား လက်နက်ကိုင် အဖွဲ့များနှင့် ပြည်တွင်း လုံခြုံရေးဆိုင်ရာ ခြိမ်းခြောက်မှုများမှာ မြင့်တက်လာခဲ့သည်ဆိုသည့် အမေရိကန်စောင့်ကြည့်ရေးအဖွဲ့တစ်ခု၏ ထုတ်ပြန်ချက်ကို တာဘီလန်တို့က ပယ်ချခဲ့ကြောင်း Al Jazeera သတင်းတွင် ဖော်ပြသည်။ 

SIGAR ၏ ဝါဒဖြန့်ချီမှုများကို ပြင်းပြင်းထန်ထန် ကန့်ကွက်သည်ဟု တာလီဘန်အဖွဲ့၏ ပြောခွင့်ရပုဂ္ဂိုလ် ဇဘီဟူလာ မူဂျာဟစ် (Zabihullah Mujahid) က ဇွန်လ ၁၈ ရက်နေ့ နှောင်းပိုင်း ထုတ်ပြန်ချက် တစ်စောင်တွင် ပြောသည်။ 

အမေရိကန်နိုင်ငံ၏ အာဖဂန်ပြန်လည် တည်ဆောက်ရေး အထူးစုံစမ်း စစ်ဆေးရေးမှူးချုပ်ကို ရည်ညွှန်း ပြောဆို ခြင်းလည်း ဖြစ်သည်။ 

အာဖဂန်ရှိ အစ္စလာမ္မစ် အစိုးရသည် အခြေအနေ အရပ်ရပ်ကို အပြည့်အဝ ထိန်းချုပ်ထားနိုင်ကြောင်း၊ အာဖဂန်ကို မတည်မငြိမ် ဖြစ်စေရန် သို့မဟုတ် အာဖဂန်မြေကို သုံးကာ တခြားသော နိုင်ငံများကို ဆန့်ကျင်ရန် မည်သည့်အုပ်စု သို့မဟုတ် အဖွဲ့အစည်းကိုမှ ခွင့်ပြုသွားမည် မဟုတ်ကြောင်း မူဂျာဟစ်က ပြောသည်။ 

SIGAR ၏ နောက်ဆုံး ထုတ်ပြန်ချက်တွင် တာလီဘန်အစိုးရသည် လုံခြုံရေးဆိုင်ရာ ပြင်းထန်သော  ပြဿနာများ နှင့် ရင်ဆိုင်နေရသလို နိုင်ငံခြား လက်နက်ကိုင် တပ်ဖွဲ့များနှင့် ပြည်တွင်း ခြိမ်းခြောက်မှုများလည်း မြင့်တက်လာ သည်ဟု မူဂျာဟစ်ကပြောသည်။ 

အမေရိကန်တပ်တွေ အာဖဂန်က ထွက်ခွာနေစဉ်

ထို့ပြင်  တခြားနိုင်ငံများအတွက် အန္တရာယ်ကို ပိုများလာစေသည်ဟုလည်း ဖော်ပြထားကြောင်း မူဂျာဟစ်က ပြောသည်။ 

လက်ရှိတွင် အာဖဂန်သည် နှစ် ၄၀ အတွင်း မဖြစ်ခဲ့ဖူးသော လုံခြုံရေးနှင့် တည်ငြိမ်ရေးကို ရရှိနေသည်ဟုလည်း ၎င်းက အခိုင်အမာ ပြောသည်။ 

အာဖဂန်တွင် မည်သည့် နိုင်ငံခြား လက်နက်ကိုင် တပ်ဖွဲ့မှ လှုပ်ရှားနေခြင်း မရှိကြောင်း မူဂျာဟစ်က ပြောကာ ISIS အဖွဲ့သည်ပင် ပြိုကွဲမည့် အခြေအနေသို့ပင် ရောက်ရှိနေသည်ဟု ဆိုသည်။ 

အာဖဂန်သည် မည်သူ့အတွက်မှ ခြိမ်းခြောက်မှု မဟုတ်ကြောင်း၊ သို့သော် တစ်ဖက်တွင် အာဖဂန်အစိုးရသည် အမေရိကန် အပါအဝင် နိုင်ငံတကာ အသိုင်းအဝိုင်းဖြင့် အပြုသဘောဆောင် ကောင်းမွန်သော ဆက်ဆံရေးများကို တည်ဆောက်ထား လိုကြောင်းလည်း ၎င်းက ပြောသည်။ 

တာလီဘန်များ အာဖဂန်နိုင်ငံအတွင်း လက်နက်ကိုင် သွားလာနေစဉ်

တာလီဘန်များက ၎င်းတို့သည် အာဖဂန်မြေပေါ်တွင် မည်သည့် လက်နက်ကိုင် တပ်ဖွဲ့ကိုမှ လှုပ်ရှားခွင့် မပြုဟူ သော အမေရိကန်နှင့် ၂၀၂၀ ဒိုဟာ သဘောတူညီချက်ကို ဆက်လက် ထိန်းသိမ်း ထားသည်ဟု ပြောသည်။ 

ထိုသဘောတူညီချက်ကြောင့် အာဖဂန်မှ အမေရိကန် ဦးဆောင်သည့် နိုင်ငံခြားတပ်များ ထွက်ခွာခြင်းကိုလည်း ဖြစ်စေခဲ့သည်။

အမေရိကန်တပ်များ ထွက်ခွာမှုကြောင့် အနောက်အုပ်စုမှ ထောက်ခံသော အာဖဂန်အစိုးရနှင့် စစ်တပ်တို့ ပြုတ် ကျကာ တာလီဘန်တို့ ပြန်လည် အာဏာရရှိခဲ့သည်။ 

အမေရိကန်သည် အာဖဂန်အား သံတမန်ရေးဆိုင်ရာ ပိတ်ဆို့မှုများ ထပ်မံပြုလုပ်နေခြင်းဖြင့် ၎င်းတို့ ပေးထားသော ကတိများကို မတည်ဟူ၍လည်း တာလီဘန်များက စွပ်စွဲသည်။ 

Source: Al Jazeera

CNI International News

ဘေဂျင်း၊ ဇွန်လ ၂၀

အမေရိကန်နိုင်ငံခြားရေးဝန်ကြီး ဘလင်ကင် (Antony Blinken) သည် ဇွန်လ ၁၉ ရက်နေ့တွင် တရုတ်သမ္မတ ရှီကျင့်ဖျင် (Xi Jinping) နှင့် တွေ့ဆုံခဲ့ကာ ဆိုးဆိုးရွားရွား ပျက်စီးနေသော အမေရိကန် - တရုတ် ဆက်ဆံရေးကို တည်ငြိမ်အောင် ဆောင်ရွက်ရန် သဘောတူညီခဲ့သည်ဟု အေပီမှ ဖော်ပြခဲ့သည်။ 

ရှီနှင့် တွေ့ဆုံပြီးနောက်တွင် တရုတ်သည် စစ်တပ် အချင်းချင်း ဆက်သွယ်မှု လုပ်ဆောင်ရန် အဆင်သင့် မဖြစ်သေး ဟု ဘလင်ကင်က ပြောသည်။ 

ထိုသို့ ဆက်သွယ်မှုသည် အထူးသဖြင့် ထိုင်ဝမ်အရေးနှင့် ပတ်သက်သော မှားယွင်းတွက်ချက်မှုနှင့် ပဋိပက္ခကို ရှောင်လွဲရန် အရေးပါသည်ဟု အမေရိကန်ဘက်က ရှုမြင်ထားသည်။ 

မည်သို့ပင်ဆိုစေကာမူ ဘလင်ကင်၏ တရုတ်ခရီးစဉ်သည် အသစ်တစ်ဖန် စတင်ခြင်းကို ထင်ဟပ်စေသည်ဟု တရုတ်ထိပ်တန်း သံတမန်တစ်ဦးဖြစ်သူ ယန်တာအို (Yang Tao) က ပြောသည်။

ဘလင်ကင်နဲ့ ဝမ်ယိကိုတွေ့ရစဉ်

စစ်တပ်အချင်းချင်း အပြန်အလှန် ဆက်ဆံမှု လုပ်ဆောင်ရန် ဘာအတွက်ကြောင့် ခက်ခဲနေသည်လဲ ဆိုခြင်းကို အမေရိကန်ဘက်က အပြည့်အဝ သတိပြုမှုမိကြောင်း ၎င်းကပြောသလို အမေရိကန်တို့၏ ပိတ်ဆို့အရေးယူမှု များကိုလည်း ပြစ်တင် ပြောဆိုခဲ့သည်။ 

ဘလင်ကင်၏ နှစ်ရက်ကြာ ခရီးစဉ်အတွင်း ဖြစ်ပေါ်လာသည့် တိုးတက်မှုများနှင့် ပတ်သက်၍ စိတ်ကျေနပ်မိ ကြောင်း ဘလင်ကင်နှင့်ရှီတို့ နှစ်ဖက်စလုံးက ထုတ်ပြန် ကြေညာခဲ့သည်။ 

သို့သော် ပြီးခဲ့သည့်နှစ် တရုတ်သမ္မတ ရှီနှင့် အမေရိကန်သမ္မတ ဂျိုးဘိုင်ဒန် (Joe Biden) တို့ ဘာလီ ညီလာခံတွင် သဘောတူညီခဲ့သည့် ပူပေါင်းဆောင်ရွက်မှုနှင့် ယှဉ်ပြိုင်ခြင်းဆိုင်ရာ ကျယ်ပြန့်သော အစီအစဉ်များဆီသို့ ပြန်သွား ရေး နှစ်ဦး သဘောတူ ဆုံးဖြတ်ချက် တစ်ခုမှလွဲ၍ ကျန်သည့် သဘောတူညီမှုဆိုင်ရာ ကိစ္စရပ်များကိုတော့ ထောက်ပြခဲ့ခြင်း မရှိပေ။
 
ထို့အပြင် ရရှိခဲ့သည့် နားလည်မှုများသည် နိုင်ငံတကာ အရေးကိစ္စနှင့် ပတ်သက်မှုများစွာ ရှိနေသည့် ၎င်းတို့၏ အရေးပါဆုံး သဘောထား ကွဲလွဲမှုများကို ဖြေရှင်းနိုင်မည်လား ဆိုခြင်းကလည်း မကွဲပြားသေးပေ။ 

မည်သို့ပင်ဆိုစေကာမူ နှစ်ဖက်စလုံးသည် ၅ နှစ်တာ ကာလအတွင်း ရာထူးအမြင့်ဆုံးသော အမေရိကန် အရာရှိ တစ်ဦး၏ တရုတ်ခရီးစဉ်မှ ထွက်ပေါ်လာသော အရာများအပေါ် ကျေနပ်မှုရှိသည်ဟု ပြောသည်။ 

ဘလင်ကင် တရုတ်ကနေ ပြန်လည်ထွက်ရန် လေယာဉ်ပေါ်တက်နေစဉ်

နောက်ထပ် ဆွေးနွေးပွဲများကို ထပ်မံ ကျင်းပရန် ဆန္ဒရှိသည်ဟုလည်း နှစ်ဖက်စလုံးက ဖော်ပြခဲ့သည်။

သို့သော် ထိုဆွေးနွေးပွဲတွင် ကုန်သွယ်ရေး၊ ထိုင်ဝမ်အရေး၊ တရုတ်နှင့် ဟောင်ကောင်းတို့မှ လူ့အခွင့်အရေး အခြေ အနေများ၊ တောင်တရုတ် ပင်လယ်အတွင်း တရုတ်စစ်တပ်၏ နယ်မြေပိုင်ဆိုင်ကြောင်း ကြေညာမှု စသည့် ကိစ္စ ရပ်များ ပါဝင်စေရန် ပြင်ဆင်ထားခြင်း မရှိသေးကြောင်း သိရသည်။

ထို့အပြင် ရုရှားနှင့် ယူကရိန်းစစ်ပွဲ အခြေအနေကိုလည်း ဆွေးနွေးပွဲမှာ မပါလိုကြောင်း တရုတ်ဘက်က သဘောထားရှိနေသည်။

အမေရိကန်သည် တရုတ်ခရီးစဉ်အတွက် ကန့်သကတ်ထားသည့် ရည်ရွယ်ချက်များ ချမှတ်ခဲ့ကာ ယင်းတို့ကို အောင်မြင်အောင် ဆောင်ရွက်နိုင်ခဲ့သည်ဟု ဘလင်ကင်က နောက်ပိုင်းတွင် ပြောသည်။ 

တွေ့ဆုံပွဲအတွင်း စစ်တပ် အချင်းချင်း ထိတွေ့ဆက်ဆံရန် ကိစ္စကို ထပ်ဖန်တလဲလဲ ပြောဆိုခဲ့သည်ဟုလည်း ဘလင်ကင်က ပြောသည်။ 

လန်ဒန်တွင် ပြုလုပ်မည့် ယူကရိန်ပြန်လည် တည်ဆောက်ရေးဆိုင်ရာ ညီလာခံသို့ မထွက်ခွာမီ သတင်းသမားများ ကို ထိုသို့ ပြောဆိုခဲ့ခြင်း ဖြစ်သည်။

Source: AP

CNI International News

မော်စကို၊ ဇွန်လ ၂၀

အနောက်နိုင်ငံများသည် ၂၀၂၄ သမ္မတ ရွေးကောက်ပွဲမတိုင်ခင် ရုရှားနိုင်ငံအား မတည်မငြိမ်ဖြစ်စေရေး ၎င်းတို့၏ ရည်ရွယ်ချက်ကို ဗြောင်ကျကျ လုပ်ဆောင်လာသည်ဟု ရုရှားနိုင်ငံခြားရေးဝန်ကြီး ဆာဂျီလာဗရော့ (Sergey Lavrov) က ဇွန်လ ၁၉ ရက်တွင် ပြောခဲ့သည်ဟု တာ့စ်သတင်းမှ ဖော်ပြခဲ့သည်။ 

အချုပ်အခြာ အာဏာပိုင် နိုင်ငံများ၏ ပြည်တွင်းရေးကို ဝင်ရောက် စွက်ဖက်သည့် မလိုမုန်းထားသော လုပ်ရပ်များ ပေါ်ပေါက်လျက်ရှိသည်ဟု လာဗရော့က ပြောသည်။ 

အာဏာရ ညီညွတ်သော ရုရှားပါတီ၏ နိုင်ငံတကာပူးပေါင်း ဆောင်ရွက်မှုနှင့် ပြည်ပရောက် နိုင်ငံသားများအား ထောက်ပံ့ရေး ကော်မရှင်၏ အစည်းအဝေး မိန့်ခွန်းတွင် ထိုသို့ ပြောကြားခဲ့ခြင်း ဖြစ်သည်။ 

အနောက်အုပ်စုသည် အထူးသဖြင့် လာမည့်နှစ် သမ္မတရွေးကောက်ပွဲ မတိုင်ခင် ရုရှားနိုင်ငံအား မတည်မငြိမ် ဖြစ်စေရေး ၎င်းတို့၏ ရည်ရွယ်ချက်ကို ဗြောင်ကျကျ လုပ်ဆောင်လာသည်ဟုလည်း ၎င်းက ပြောသည်။

လာဗရော့က အမေရိကန်ဦးဆောင်သည့် အနောက်အုပ်စု စုပေါင်းအဖွဲ့သည် ရုရှားနိုင်ငံကို ကြားခံ စစ်ပွဲ ဆင်နွဲနေ သည်ဟု ပြောသည်။ 

ယူကရိန်းအစိုးရသည် လက်ကိုင်တုတ် တစ်ခုအဖြစ် အသုံးချခံနေရကြောင်း၊ ယူကရိန်းရှိ နာဇီဝါဒီများသည် ခေတ်မီ လက်နက်များ၊ ခဲယမ်းများ အထောက်အပံ့ ရရှိနေသလို နိုင်ငံခြားမှနည်းပြများနှင့် ကြေးစားများလည်း ရောက်ရှိနေကြောင်း လာဗရော့က ညည်းတွား ပြောကြားခဲ့သည်။ 

ဘိုင်ဒန်နဲ့ ဇာလန်းစကီးကိုတွေ့ရစဉ်

ရုရှား၏ ရန်သူများက ဗြောင်ကျကျ လုပ်ဖော်ဆောင်နေသည့် ရည်ရွယ်ချက်များတွင် ရုရှားစစ်တပ်အား စစ်မြေပြင်တွင် နှိမ်နင်းရေး၊ ရုရှား၏ နိုင်ငံရေးနှင့်စီးပွားရေး အချုပ်အခြာအာဏာကို နှောင့်ယှက်ရေးနှင့် ရုရှားအား ကမ္ဘာလုံးဆိုင်ရာနိုင်ငံရေး စာမျက်နှာ၏ အစွန်အဖျားသို့ ပို့ဆောင်ရေးတို့ ပါဝင်နေသည်ဟုလည်း လာဗရော့က ပြောသည်။ 

ထိုမူဝါဒသည် လွတ်လပ်သော နိုင်ငံခြားရေးမူဝါဒကို ကျင့်သုံးကာ နာမည်ဆိုးဖြင့် ထင်ရှားသော နိုင်ငံတကာ ဥပဒေများကို အခြေခံသည့် သမ္မာစဉ်ကို လက်မခံသည့် လူတိုင်းကို အပြစ်ပေးရန် ကြိုးပမ်းခြင်း ဖြစ်သည်။

ထို့နောက် ကမ္ဘာလုံးဆိုင်ရာ လွှမ်းမိုးမှုကို ထိန်းသိမ်းရန် ကြိုးပမ်းသည့် အမေရိကန်နှင့် နေတိုးအဖွဲ့တို့၏ လုပ်ရပ်များနှင့်လည်း ကိုက်ညီမှု ရှိကြောင်း၊ အမေရိကန်များသည် တရုတ်အား ထိန်းချုပ်နိုင်ရန် ၎င်းတို့ လုပ်နိုင်သမျှ အရာအားလုံးကို လုပ်ဆောင်သွားမည်ဆိုခြင်းကိုလည်း ကွယ်ဝှက်မထားကြောင်း လာဗရော့ဗ်က အဆုံးသတ် ပြောဆိုခဲ့သည်။

Source: တာ့စ်

CNI International News

ဘန်ကောက်၊ ဇွန်လ ၂၀

ရွေးကောက်ခံ လွှတ်တော်အမတ် ၄၀၀ နှင့် ပါတီကိုယ်စားပြု အမတ် ၁၀၀ တို့ကို အတည်ပြုခဲ့ပြီဖြစ်ကြောင်း ထိုင်းရွေးကောက်ပွဲကော်မရှင် (EC) က ကြေညာခဲ့သည်ဟု Thai PBS တွင် ဖော်ပြထားသည်။

ထို့နောက် အမတ်များအနေဖြင့် ၎င်းတို့၏ အထောက်အထား လက်မှတ်များကို ဇွန်လ ၂၄ ရက်အတွင်း ထုတ်ယူနိုင်မည် ဖြစ်ကြောင်း ထိုင်းရွေးကောက်ပွဲကော်မရှင်က ပြောသည်။ 

သို့သော် အမတ်များအနေဖြင့် ချိုးဖောက်မှု တစ်စုံတစ်ရာ ရှိသည်ဆိုသည့် သက်သေ ထွက်ပေါ်လာသော အခြေအနေတွင် ကော်မရှင်အနေဖြင့် စုံစမ်းစစ်ဆေးခွင့် ရှိနေဆဲ ဖြစ်သည်ဟုလည်း EC ၏ အထွေထွေအတွင်းရေး မှူးချုပ် ဆာဝန် ဘွန်မီး (Sawaeng Boonmee) ကပြောသည်။ 

၎င်းသည် သတင်းစာ ရှင်းလင်းပွဲ တစ်ခုတွင် ပြောခဲ့ခြင်းဖြစ်သည်။ 

ထိုင်းရွေး/ကော် အထွေထွေအတွင်းရေး မှူးချုပ် ဆာဝန် ဘွန်မီးကို တွေ့ရစဉ်

EC သည် ရလဒ်ကို ပယ်ချက်ရေးနှင့် ရွေးကောက်ပွဲသစ် ကျင်းပရေးအတွက် ဗဟိုတရားရုံးချုပ်သို့ အသနားခံစာ တင်နိုင်သည်။ 

ယင်းတို့ကို မေလ ၁၄ ရက် ရွေးကောက်ပွဲနှင့် တစ်နှစ်တာ ကာလအတွင်း အပြီးသတ် လုပ်ဆောင်ရမည်လည်း ဖြစ်သည်။ 

လက်ရှိ စုံစမ်းစစ်ဆေးမှုများကို ရက် ၆၀ အတွင်း အပြီးသတ် လုပ်ဆောင်နိုင်ခြင်း မရှိသည့်အတွက် EC သည် ရလဒ်များကို အတည်ပြုခဲ့ခြင်း ဖြစ်ကြောင်း၊ ဘက်ပေါင်းစုံအတွက် မျှတမှုရှိရမည် ဖြစ်ကြောင်း၊ တင်ပြထားသော စာရွက်စာတမ်းတိုင်းကို ဆောင်ရွက်သွားမည်ဖြစ်ကြောင်းလည်း ဆာဝန်က ပြောသည်။
 
ပါတီကိုယ်စားပြု ကိုယ်စားလှယ်လောင်းများအတွက် ခိုင်လုံမှုရှိသည့် မဲအရေအတွက် ၃၁,၅၂၂,၆၉၈ ခုရှိပြီး အမတ် တစ်ဦးလျှင် ၃၇၅,၂၂၆ မဲ အချိုးဖြစ်ကြောင်း၊ ထို့ကြောင့် ပါတီကိုယ်စားပြု စနစ်ဖြင့် လွှတ်တော်သို့ ရွေးကောက်ခံ ရသည့် ပါတီစုစုပေါင်း ၁၇ ခု ရှိရမည်ဖြစ်ကြောင်းလည်း ဆာဝန်က ပြောသည်။ 

Move Forward ပါတီသည် ပါတီကိုယ်စားပြု စနစ်တွင် လွှတ်တော် ကိုယ်စားလှယ် အများဆုံး ၃၉ ဦး ရရှိခဲ့ပြီး သူ၏နောက်တွင် Phue Thai ပါတီက ၂၉ ဦး၊ United Thai Nation က ၁၃ ဦး၊ Democrats နှင့် Bhumjaithai တို့က ၃ ဦးစီ၊  Prachachat ပါတီက ၂ ဦးနှင့် ကျန် ၁၁ ပါတီက တစ်ဦးကျတို့ ပါဝင်သည်။

Source: Thai PBS

CNI International News

ကမ်ပါလာ၊ ဇွန်လ ၁၉

သူပုန်များဟု သံသယရှိသူများက ကွန်ဂိုနှင့်နယ်စပ်အနီး ယူဂန္ဓာနိုင်ငံ၏ ဝေးလံသီခေါင်သော ဧရိယာတစ်ခုမှ ကျောင်းတစ်ကျောင်းကို ဝင်ရောက်တိုက်ခိုက်ခဲ့ရာ အနည်းဆုံး ၄၁ ဦး သေဆုံးခဲ့ကြောင်း သိရသည်။

တိုက်ခိုက်သူများသည် ညတွင်းချင်း နယ်စပ်မှတဆင့် ထွက်ပြေးသွားခဲ့ကြောင်း အာဏာပိုင်များက ပြောသည်ဟု အေပီမှ ဖော်ပြခဲ့သည်။ 

သေဆုံးသူများတွင် ကျောင်းသူ/သား ၃၈ ဦး ပါဝင်ကြောင်း၊ ၎င်းတို့ အိမ်ဆောင်များ၌ ရှိနေစဉ် အသတ်ခံခဲ့ရခြင်း ဖြစ်သည်။ 

သေဆုံးသူ ကျောင်းသားတချို့မှာ မီးရှို့ခံရခြင်းကြောင့် မမှတ်မိလောက်အောင်ကိုပင် ရုပ်ပျက် ဆင်းပျက် ဖြစ်နေပြီး တချို့မှာ ပစ်သတ်ခံရခြင်း သို့မဟုတ် ဓားဖြင့် ခုတ်သတ်ခံခဲ့ရသည်။ 

ကာစီစီ (Kasese) နယ်စပ် ခရိုင်ရှိ ကျောင်းတစ်ခုကို သေနတ်များ၊ ဓားများကိုင်ဆောင်ထားသူများက ဝင်ရောက် တိုက်ခိုက်ခဲ့ခြင်း ဖြစ်ကြောင်း သိရသည်။

ပစ်ခတ်ခံရသော -ယူဂန္ဓာကျောင်းကို တွေ့ရစဉ်

Mpondwe-Lhubiriha မြို့တွင် ဖြစ်ပွားခဲ့သော တိုက်ခိုက်မှုအတွင်း ကျောင်းသား ၃၈ ဦးအပြင် အစောင့်တစ်ဦးနှင့် ဒေသခံ နှစ်ဦးတို့ သေဆုံးခဲ့ရသည်ဟု မြို့တော်ဝန် ဆယ်လီဗက် မာပိုဇီ (Selevest Mapoze)က ပြောသည်။

သူပုန်များသည် ကျောင်း၏ စတိုခန်းတွင်းမှ ပစ္စည်းများကို ယူဆောင်ကာ၊ ယင်းတို့ကို သယ်ပေးရန် နောက်ထပ် ကျောင်းသား ခြောက်ဦးကိုပါ ပြန်ပေးဆွဲ ခေါ်ဆောင်သွားခဲ့သည်ဟုလည်း ယူဂန္ဓာစစ်တပ်က ထုတ်ပြန်သည်။

တိုက်ခိုက်မှု ဖြစ်ပွားရာ ကျောင်းသည် ကျား/မ ရောတက်၍ရသည့် ပုဂ္ဂလိကကျောင်း တစ်ခုဖြစ်ကာ ကွန်ဂို နယ်စပ်နှင့် နှစ်ကီလိုမီတာ အကွာတွင် ရှိသည်။ 

Lhubiriha Secondary ကျောင်းတွင် ယခုကဲ့သို့ အစုလိုက် အပြုံလိုက် သတ်ဖြတ်မှုအတွက် အာဏာပိုင်များက ADF အဖွဲ့ကို အပြစ်တင်သည်။

ADF သည် အစွန်းရောက် အဖွဲ့အစည်းတစ်ခုဖြစ်ကာ ကွန်ဂိုအရှေ့ပိုင်းတွင် အခြေစိုက်ပြီး ပြီးခဲ့သည့် နှစ်များတွင် လည်း တိုက်ခိုက်မှုများကို လုပ်ဆောင်ခဲ့သည်။

ကွန်ဂိုရှိ ကျေးရွာများသည်လည်း ပြီးခဲ့သည့်နှစ်များအတွင်း ၎င်းတို့၏ တိုက်ခိုက်မှုနှင့် ကြုံတွေ့ခဲ့ရသည်။

သို့သော် ယူဂန္ဓာအထိ ဝင်ရောက် တိုက်ခိုက်မှုများသည် ကြုံတောင့်ကြုံခဲဖြစ်သည်။ 

 ဗိုလ်ချုပ်ကြီး ဒစ်အိုလမ်ကိုတွေ့ရစဉ်

အဆိုပါ ဒေသတွင် ယူဂန္ဓာတပ်ရင်း တစ်ရင်း အခြေစိုက်မှုကြောင့် ဖြစ်သည်။ 

လုံခြုံရေးသည် အစိုးရအဖွဲ့၏ အင်အားဖြစ်သည်ဟု ကာလရှည် ခေါင်းဆောင်ဖြစ်သူက ပြောဆိုထားချိန်တွင် ယခုကဲ့သို့ အစုလိုက် အပြုံလိုက် သတ်ဖြတ်မှုက များသောအားဖြင့် ငြိမ်းချမ်းသော အရှေ့အာဖရိကနိုင်ငံ အတွက် အထိတ်တလန့် ဖြစ်စေခဲ့သည်။ 

ထိုတိုက်ခိုက်မှုက အဆိုပါ ဒေသနှင့်အနီးတွင် ၂၀၂၁ ခုနှစ်မှ စတင် တပ်စွဲထားသည် လုံခြုံရေးတပ်ဖွဲ့များအပေါ် ထိုးနှက်မှုလည်း ဖြစ်သည်။ 

အခင်းဖြစ်ပွားရာ ကျောင်းအနီးတွင် သတင်းသမားများနှင့် တွေ့ဆုံခဲ့ရာ၌ ကွန်ဂိုရှိ ယူဂန္ဓာတပ်မှူး ဖြစ်သူက သူပုန် များသည် တိုက်ခိုက်မှု မလုပ်ခင် ကာစီစီတွင် နှစ်ည ပုန်းအောင်း နေခဲ့ကြောင်း ပြောသော်လည်း အသေးစိတ်ကိုမူ မပြောခဲ့ပေ။ 

ADF သူပုန်များသည် ဖိအားများနှင့် ရင်ဆိုင်လာရချိန်တွင် အဖွဲ့ငယ်များခွဲကာ မတူညီသော နေရာများတွင် တိုက်ခိုက်မှုများ လုပ်ဆောင်ခြင်းဖြင့် ဖိအားများကို လျှော့ချလေ့ရှိကြောင်း ဗိုလ်ချုပ်ကြီး ဒစ်အိုလမ် (Dick Olum) က ပြောသည်။

ထို့နောက် ယခု ကျောင်းတိုက်ခိုက်မှုကိုလည်း တိုက်ပွဲများမှ ရရှိလာသော ဖိအားများကို လျှော့ချရန် လုပ်ဆောင်ခဲ့ခြင်း ဖြစ်သည်ဟု ၎င်းက ဆိုသည်။ 

Source: AP