CNI International News

ဘန်ကောက်၊ ဇွန်လ ၁၄

ရွေးကောက်ပွဲဆိုင်ရာ ကိုယ်စားလှယ်ဖြစ်ခွင့်နှင့် ဆက်စပ်နေသော iTV ရှယ်ယာပိုင်ဆိုင်ခြင်း ကိစ္စအပေါ် ရွေးကောက်ပွဲကော်မရှင် (EC) ၌ မိမိကိုယ် မိမိ ရှင်းလင်းနိုင်မည်ဟု ယုံကြည်မှုရှိကြောင်း Move Forward ပါတီ ခေါင်းဆောင် ပီတာလင်ဂျာရိုရန်ရတ်(Pita Limjaroenrat)က ပြောသည်။ 

၎င်းအနေဖြင့် ထိုင်းနိုင်ငံ၏ ဝန်ကြီးချုပ်သစ်ဖြစ်ရန် ကိစ္စအပေါ် အတားအဆီးဖြစ်စေသည့် အချက်များကို တိုက်ခိုက်သွားရန် အသင့်ရှိသည်ဟုလည်း ပီတာက ပြောသည်။ 

ပီတာက ၎င်းအနေဖြင့် မေလ ၁၄ ရက်နေ့ အထွေထွေရွေးကောက်ပွဲတွင် အရည်အချင်း မပြည့်မှီသည်ကို သိရှိ သည့်တိုင် ပါဝင်ယှဉ်ပြိုင်ခဲ့ခြင်းဖြင့် ပုဒ်မ ၁၅၁ ကို ချိုးဖောက်မှုရှိသလား စုံစမ်းစစ်ဆေးမည့် နိုင်ငံရေးပါတီမှတ်ပုံ တင်ခြင်းဆိုင်ရာ အရာရှိ၏ ကြိုးပမ်းမှုနှင့် ရင်ဆိုင်ရမည်ဟု မထင်ကြောင်း ပြောသည်။

ဖျက်သိမ်းလိုက်ပြီဖြစ်သော Future Forward ပါတီ ခေါင်းဆောင်ဟောင်း သာနာသွန်း ဂျန်ရွန်ရန်ကစ် (Thanathorn Juangroongruangkit) ၏ ဖြစ်စဉ်ကို ကိုးကား၍ ပီတာက ထိုသို့ ပြောဆိုခဲ့ခြင်း ဖြစ်သည်။ 

Future Forward ပါတီ ခေါင်းဆောင်ဟောင်း သာနာသွန်း ဂျန်ရွန်ရန်ကစ်ကိုတွေ့ရစဉ်

သာနာသွန်းသည် မီဒီယာကုမ္ပဏီတစ်ခုတွင် ရှယ်ယာပိုင်ဆိုင်ခြင်းအတွက် လွှတ်တော်အမတ် တစ်ဦးအဖြစ် လုပ်ဆောင်ခြင်းမပြုရန် ဖွဲ့စည်းပုံ တရားရုံး၏ အမိန့်ချမှတ်ခြင်း ခံခဲ့ရသူ ဖြစ်သည်။ 

ယခုသီတင်းပတ်တွင် ဧပြီလ ၂၆ ရက်က iTV ရှယ်ယာရှင်များ အစည်းအဝေး၏ လက်ရေး မှတ်တမ်းနှင့် အစည်းအဝေး သဘာပတိမှ ထုတ်ပြန်သည့် မှတ်တမ်တို့အကြား ကွာဟချက်များ ရှိနေသည်ဆိုသည့် အငြင်းပွားဖွယ်ရာ တစ်ခုကို ရုပ်သံအစီအစဉ်တစ်ခုတွင် ဖော်ထုတ်နိုင်ခဲ့သည်။ 

ထိုကိစ္စ မတိုင်ခင် ကတည်းက iTV အား မီဒီယာကုမ္ပဏီတစ်ခုအဖြစ် ပြန်လည် အသက်သွင်းရန် ကြိုးပမ်းမှုများကို သတိပြုမိထားသည်ဟု ပီတာက ပြောသည်။ 

ထိုအငြင်းပွားမှုနှင့် ပတ်သက်၍ တစ်စုံတစ်ဦးသည် ၎င်းအား သတင်းတွင် ဖော်ပြသည်များထက် ပိုသော အချက်အလက်များ ပေးခဲ့သည်ဟု ပီတာက ပြောသည်။

ထို့နောက် ပါတီ၏ ဥပဒေအဖွဲ့သည် ထိုကိစ္စကို ကိုင်တွယ် ဆောင်ရွက်နေသည်ဟု ၎င်းက ပြောသည်။

ထိုင်းရွေးကောက်ပွဲ မဲထည့်နေကြစဉ်

နိုင်ငံရေးတက်ကြွ လှုပ်ရှားသူများ၏ ၎င်းအပေါ် တိုင်ကြားချက်များနှင့် ပတ်သက်ရာတွင်လည်း ပီတာက ၎င်းသည် သာနာသွန်း ကဲ့သို့ပင် အရည်အချင်း ပြည့်မှီမှု၊ လွှတ်တော်အမတ်ဖြစ်မှု စသည်တို့အပေါ် ဆုံးဖြတ်ပေးရန် ဖွဲ့စည်းပုံ တရားရုံး၊ ဗဟိုတရားရုံး သို့မဟုတ် ရာဇဝတ်မှု တရားရုံးတို့ထံ လွှတ်တော်အမတ်များ၏ လက်မှတ်ရေးထိုး တောင်းဆိုမှုနှင့် ရင်ဆိုင်ရဖွယ် ရှိသည်ဟု ဝန်ခံသည်။ 

၎င်းအား ဝန်ကြီးချုပ် ဖြစ်လာစေခြင်းကို တားဆီးမည့် မည်သည့် ကိစ္စမျိုးတွင်မဆို ရင်ဆိုင် ဖြေရှင်းသွားနိုင်မည်ဟု ယုံကြည်ချက်ရှိကြောင်း ပီတာက ပြောသည်။ 

ပုဒ်မ ၁၅၁ က ၎င်းအား ထိုင်းနိုင်ငံ၏ ၃၀ ဦးမြောက် ဝန်ကြီးချုပ် ဖြစ်လာခြင်းကို တားဆီးနိုင်မည် မဟုတ်ဟု ပီတာ က ပြောသည်။

လွှတ်တော်အမတ်အဖြစ် လေးနှစ်တာ သက်တမ်း ကုန်ဆုံးချိန်တွင် ပိုင်ဆိုင်မှုများကို ကြေညာရန် လိုအပ်ချက်နှင့် ပတ်သက်၍လည်း ပီတာက ၎င်းသည် လက်ရှိအချိန်၌ တရားဥပဒေအရ သတ်မှတ်ထားသည့် လိုအပ်သော စာရွက် စာတမ်းများကို ဇွန်လ ၁၈ ရက် မတိုင်ခင်အတွင်း အမျိုးသား အကျင့်ပျက်ခြစားမှု တိုက်ဖြတ်ရေး ကော်မရှင်သို့ တင်သွင်းနိုင်ရန် ပြင်ဆင်မှုများ လုပ်ဆောင်နေသည်ဟု ပြောသည်။ 

Source: Thai PBS

CNI International News

ပြုံယမ်း၊ ဇွန်လ ၁၃

မြောက်ကိုရီးယားခေါင်းဆောင် ကင်မ်ဂျုံအန်(Kim Jong Un)က အင်အားကြီး နိုင်ငံတစ်ခု တည်ထောင်ရေးဆိုင်ရာ ရည်မှန်းချက်များကို မျှဝေခြင်းနှင့် ပတ်သက်သည့် မဟာဗျူဟာမြောက် ပူးပေါင်းဆောင်ရွက်မှုများကို ရုရှားသမ္မတ ပူတင်နှင့် လက်တွဲသွားမည်ဟု ရိုက်တာသတင်းမှ ဖော်ပြခဲ့သည်။

ရုရှား၏ အမျိုးသားနေ့အတွက် ပူတင်သို့ ပေးပို့သော သတင်းစကားတွင် ကင်မ်က ထိုကဲ့သို့ ကတိပေးခဲ့ခြင်းဖြစ် သည်။

မြောက်ကိုရီးယားနဲ့ ရုရှားအလံကိုတွေ့ရစဉ်

ကင်မ်သည် ပူတင်၏ ယူကရိန်း ကျူးကျော်စစ်ကို ကာကွယ်ပြောဆိုခဲ့ပြီး ရုရှားကို အပြည့်အဝ ထောက်ခံကြောင်း၊ တစ်သားတည်း ရှိကြောင်းလည်း ပြသခဲ့သည်။ 

တရားမျှတမှုသည်သာ အနိုင်ရမည်ဖြစ်ကြောင်း၊ ရုရှားပြည်သူများသည် ၎င်းတို့၏ အောင်မြင်မှု သမိုင်းကြောင်းသို့ ဂုဏ်ကျက်သရေများ ထပ်မံပေါင်းထည့် နိုင်နေဦးမည်ဖြစ်ကြောင်းလည်း ကင်မ်က ပြောသည်ဟု နိုင်ငံပိုင် KCNA သတင်းတွင် ဖော်ပြထားသည်။

ပူတင်နဲ့ ကင်မ်ဂျုံအန်ကိုတွေ့ရစဉ်

ရုရှားနှင့်မဟာဗျူဟာမြောက် နီးကပ်စွာ ပူးပေါင်းဆောင်ရွက်ရေး ကင်မ်က တောင်းဆိုခဲ့သည်။

ထို့နောက် အင်အားကြီး နိုင်ငံတစ်ခု ထူထောင်ရေး ရည်မှန်းချက်ကို ဖြည့်ဆည်းနိုင်ရေးအတွက် နှစ်နိုင်ငံပြည်သူ များ၏ တူညီသော သဘောထားအတိုင်း ပူတင်နှင့်လက်တွဲ ဆောင်ရွက်သွားမည်ဟုလည်း ကင်မ်က ပြောသည်။ 

မြောက်ကိုရီးယားသည် ရုရှားနှင့် ပိုမို နီးကပ်သော ဆက်ဆံရေးကို ထူထောင်နိုင်ရန် ကြိုးပမ်းလျက်ရှိကာ ရုရှားတို့ ၏ ပြီးခဲ့သည့်နှစ် ယူကရိန်းအား ကျူးကျော်မှုကို ထောက်ခံခဲ့ရုံမက ထိုကျူးကျော်စစ်သည် အမေရိကန်နှင့် အနောက်အုပ်စုနိုင်ငံများ၏ မူဝါဒများနှင့် ဖိအားပေးမှုများကြောင့် ပေါ်ပေါက်လာရခြင်း ဖြစ်သည်ဟုပင် အပြစ်တင် ထားသည်။

Source: Reuters

CNI International News

စတော့ဟုမ်၊ ဇွန်လ ၁၃

ပထဝီနိုင်ငံရေးဆိုင်ရာ တင်းမာမှုများ မြင့်တက်နေချိန်တွင် နိုင်ငံတချို့ အထူးသဖြင့် တရုတ်၏ နျူကလီးယား လက်နက်အင်အားသည် မြင့်တက်လာကာ တိုးချဲ့မှုများ လုပ်နေကြောင်း ဘန်ကောက်ပို့စ်မှ ဖော်ပြခဲ့သည်။

ထို့နောက် တခြားသော နျူကလီးယားပိုင်ရှင် နိုင်ငံများသည်လည်း ၎င်းတို့၏ လက်နက်များကို အဆက်မြှင့် တင်မှုများ ဆက်လက် ဆောင်ရွက်နေသည်ဟု လေ့လာသူများက ပြောခဲ့သည်။

ကမ္ဘာတစ်ဝန်းလုံးရှိ နျူကလီးယား လက်နက်ပမာဏ လျော့ကျခြင်းဆိုင်ရာ ကာလရှည် အနေအထား တစ်ခု အဆုံး သတ်ခြင်း အခြေအနေသို့ ရောက်ရှိနေပြီ သို့မဟုတ် ရောက်ရှိခဲ့ပြီဟု စတော့ဟုမ် အပြည်ပြည်ဆိုင်ရာ ငြိမ်းချမ်းရေး လေ့လာမှုအဖွဲ့ (SIPRI)၏ ဒါရိုက်တာ ဒန်စမစ် ( Dan Smith) က ပြောသည်။ 

ဗြိတိန်၊ တရုတ်၊ ပြင်သစ်၊ အိန္ဒိယ၊ အစ္စရေး၊ မြောက်ကိုရီးယား၊ ပါကစ္စတန်၊ ရုရှားနှင့် အမေရိကန်တို့ကဲ့သို့ နျူကလီးယားပိုင်ရှင် ၉ နိုင်ငံ၏ နျူကလီးယားထိပ်ဖူး စုစုပေါင်း အရေအတွက်သည် ၂၀၂၃ ခုနှစ်တွင် ၁၂၅၁၂ သို့ ရောက်လာကြောင်း၊ ၂၀၂၂ ခုနှစ် ၁၂၇၁၀ မှ ကျဆင်းလာခြင်းဖြစ်ကြောင်း SIPRI က ပြောသည်။ 

စတော့ဟုမ် အပြည်ပြည်ဆိုင်ရာ ငြိမ်းချမ်းရေး လေ့လာမှုအဖွဲ့ (SIPRI)၏ ဒါရိုက်တာ ဒန်စမစ်ကို တွေ့ရစဉ်

ထိုအထဲမှ နျူကလီးယားထိပ်ဖူး ၉၅၇၆ သည် စစ်ရေးအရ အသုံးပြုနိုင်ဖွယ် သီးသန့် ဖယ်ထားသည့် အရာများဖြစ် ကြောင်း၊ ယခင်နှစ်ကထက် ၈၆ ခု မြင့်တက်လာခြင်း ဖြစ်သည်။ 

SIPRI က နိုင်ငံများ၏ အသုံးပြု၍ရသော ထိပ်ဖူး အရေအတွက်နှင့် ဖျက်ဆီးရမည့် ထိပ်ဖူးအဟောင်းများ အပါအဝင် လက်နက်တိုက်အတွင်းမှ စုစုပေါင်း အရေအတွက်ကို ခွဲခြားသတ်မှတ်ခဲ့ခြင်းလည်း ဖြစ်သည်။
 
သီးသန့် သိုလှောင်ထားသည့် နျူကလီးယားထိပ်ဖူး အရေအတွက်မှာ တည်ငြိမ်မှု မရှိကြောင်း၊ ထိုအရေအတွက် သည် ကျဆင်းလာလျက်ရှိကြောင်း စမစ်က ပြောသည်။

ထို့နောက် ယင်းသည် ၁၉၈၀ ပြည့်နှစ်များ၏ ထိပ်ဖူးအရေအတွက်နှင့် ယှဉ်လျှင် များစွာ နည်းပါးနေသေးသည်ဟု လည်း ဆိုသည်။ 

တိုးမြင့်လာမှု အများဆုံးမှာ တရုတ်နိုင်ငံမှဖြစ်ပြီး ထိပ်ဖူး အရေအတွက်မှာ ၃၅၀ မှ ၄၁၀ အထိ မြင့်တက်လာသည်။ 

အိန္ဒိယ၊ ပါကစ္စတန်နှင့် မြောက်ကိုရီးယားတို့သည်လည်း သီးသန့် ဖယ်ထားသည့် ထိပ်ဖူး အရေအတွက်ကို မြှင့်တင် ခဲ့ကာ ရုရှားတွင် မြင့်တက်မှု အနည်းငယ်ရှိကြောင်း၊ ကျန် နျူကလီးယား ပိုင်ရှင်နိုင်ငံများ၏ ပိုင်ဆိုင်မှု အရေ အတွက်မှာ ပြောင်းလဲမှု မရှိကြောင်းလည်း SIPRI က ပြောသည်။ 

ရုရှားနှင့် အမေရိကန်တို့သည် တစ်ကမ္ဘာလုံးရှိ နျူကလီးယား လက်နက် အရေအတွက်၏ ၉၀ ရာခိုင်နှုန်း နီးပါးကို ပိုင်ဆိုင်ထားသည်။ 

နျူကလီးယား ထိပ်ဖူး အရေအတွက် ကျဆင်းလာသည်ကို နှစ် ၃၀ ကျော်ကြာ မြင်တွေ့ခဲ့ရသော်လည်း ထို အခြေအနေသည် အဆုံးသတ်ဆီသို့ ရောက်ရှိလာခဲ့ပြီဟု စမစ်က ပြောသည်။ 

ရုရှား၏ ယူကရိန်းအပေါ် ကျူးကျော်စစ်ကြောင့် နျူကလီးယား လက်နက် ထိန်းချုပ်ရေးနှင့် ဖျက်သိမ်းရေးဆိုင်ရာ သံတမန်ရေး လုပ်ငန်းစဉ်များလည်း ကျဆုံးခဲ့ရသည်ဟု စမစ်က ပြောသည်။

နျူကလီးယားလက်နက်ကိုင်များ အခြေအနေကို နှိုင်းယှဉ်ပြထားစဉ်

ကျူးကျော်မှု ပေါ်ပေါက်ပြီးချိန်တွင် အမေရိကန်သည် ရုရှားနှင့် အပြန်အလှန် မဟာဗျူဟာမြောက် တည်ငြိမ်ရေး ဆိုင်ရာ ဆွေးနွေးမှုကို ရပ်တန့်လိုက်ခြင်းက သိသာထင်ရှားဆုံး ဖြစ်သည်။ 

ဖေဖော်ဝါရီလတွင် ရုရှားဘက်ကလည်း ၎င်းတို့အနေဖြင့် New START ဟုခေါ်သော နျူကလီးယား လက်နက် ထိန်းချုပ်၊ လျှော့ကျရေး ၂၀၁၀ သဘောတူညီချက်တွင် ပါဝင်နေမှုကို ရပ်ဆိုင်းသည်ဟု ကြေညာခဲ့သည်။

သဘောတူညီချက်သည် အမေရိကန်နှင့်ရုရှားတို့၏ နျူကလီးယား လက်နက်အင်အားကို ထိန်းချုပ်ပေးနိုင်သည့် နောက်ဆုံး သဘောတူညီချက်ဖြစ်သည်ဟု SIPRI ကပြောသည်။

သို့သော် တစ်ဖက်တွင်လည်း နျူကလီးယား လက်နက်အင်အား မြင့်တက်လာခြင်းသည် ယူကရိန်းစစ်ပွဲကြောင့်ဟု ပုံချ၍ မရကြောင်း၊ ထိပ်ဖူးသစ်များ ပြုလုပ်ရန် အချိန်ယူရကြောင်း၊ အင်အား မြင့်တက်လာသည့် နိုင်ငံများတွင် ပဋိပက္ခနှင့် တိုက်ရိုက် ပတ်သတ်ခြင်း မရှိသည့်နိုင်ငံများပါ ပါဝင်နေကြောင်း စမစ်က ပြောသည်။ 

တရုတ်သည် စီးပွားရေးနှင့် လွှမ်းမိုးမှု အင်အား မြင့်တက်လာသည်နှင့်အမျှ စစ်တပ်၏ ကဏ္ဍတိုင်းတွင် အကြီးစား ရင်းနှီးမြှုပ်နှံမှုများစွာ လုပ်ဆောင်ထားသည်ကိုလည်း တွေ့ရသည်။ 

Source: ဘန်ကောက်ပို့စ်

CNI International News

ဘန်ကောက်၊ ဇွန်လ ၁၃

လုံခြုံရေးအေဂျင်စီများသည် နိုင်ငံတောင်ပိုင်းတွင် ပတ်ထာနီနိုင်ငံ (Patani State) လွတ်လပ်ရေး ကြိုးပမ်းမှု အတွက် ပြည်သူ့ဆန္ဒ ခံယူပွဲကျင်းပရန် တောင်းဆိုခဲ့သည့် တက်ကြွလှုပ်ရှားသူ အုပ်စုတစ်ခုနှင့် ပတ်သက်၍ စုံစမ်း စစ်ဆေးမှု လုပ်ဆောင်နေသည်ဟု ထိုင်းအမျိုးသားလုံခြုံရေးကောင်စီ (NSC) က ပြောကြောင်း ဘန်ကောက်ပို့စ်မှ ရေးသားဖော်ပြခဲ့သည်။ 

ဒေသ ၄ ပြည်တွင်း လုံခြုံရေးဆိုင်ရာ ဌာနချုပ်နှင့် နယ်မြေ ၉ ဒေသဆိုင်ရာ ရဲတပ်ဖွဲ့တို့သည် ခွဲထွက်ရေးလှုပ် ရှားသည့် အဖွဲ့၏ လုပ်ရှားမှုများနှင့် လူမှုကွန်ယက်မှ လုပ်ဆောင်ချက်များကို စောင့်ကြည့်နေသည်ဟု NSC ၏ အထွေထွေအတွင်းရေးမှူးချုပ် ဆူပို မာလာနီယွမ် (Supoj Malaniyom) က ပြောသည်။

နိုင်ငံတောင်ပိုင်း အခြေအနေများနှင့် ပတ်သက်၍ စောင့်ကြည့်ရေးဆိုင်ရာ သက်ဆိုင်ရာ လုံခြုံရေးအေဂျင်စီများ၏ ဇွန်လ ၁၂ ရက်နေ့ အစည်းအဝေး ပြီးဆုံးချိန်တွင် ထိုသို့ ပြောဆိုခဲ့ခြင်း ဖြစ်သည်။ 

ထိုင်းတောင်ပိုင်းမှာ လုံခြုံရေးနဲ့ ဆွမ်းခံကြွရသည့် ဘုန်းကြီးတစ်ပါး

ထိုအဖွဲ့သည် ခွဲထွက်ရေး လှုပ်ရှားမှုများနှင့် ပတ်သက်မှု ရှိ/မရှိကို စောင့်ကြည့်နေကြောင်း၊ ယင်းသည် ဖွဲ့စည်းပုံ အခြေခံ ဥပဒေအပြင် တခြားသော ဆက်စပ်ဥပဒေများကို ချိုးဖောက်မှုဖြစ်ကြောင်း ဗိုလ်ချုပ်ကြီး ဆူပိုက ပြော သည်။ 

စုံစမ်းစစ်ဆေးမှုတစ်ခု လုပ်ဆောင်နေကြောင်း၊ ယင်းကို ပြည်တွင်း လုံခြုံရေးဌာနချုပ်က ဦးဆောင် သွားမည် ဖြစ်ကြောင်းနှင့် အချိန်ယူရမည်ဖြစ်ကြောင်း ၎င်းက ပြောသည်။ 

ထိုအုပ်စု၏ လှုပ်ရှားမှုများတွင် နိုင်ငံရေးပါတီတချို့ ပါဝင်ပတ်သတ်မှု ရှိ/မရှိ မေးမြန်းခဲ့ရာတွင် အာဏာပိုင်များ သည် ထိုကိစ္စကို စုံစမ်းစစ်ဆေးနေကြောင်း၊ သက်သေများအပေါ် မူတည်၍ လိုအပ်သော လုပ်ဆောင်မှုများ ချမှတ်ဆောင်ရွက် သွားမည်ဖြစ်ကြောင်းလည်း ဗိုလ်ချုပ်ကြီး ဆူပိုက ပြောသည်။

လွတ်လပ်သော မူဆလင်နိုင်ငံတစ်ခု တည်ထောင်ရေး ပြည်သူ့ဆန္ဒခံယူပွဲ ကျင်းပရန် တောင်းဆိုမှုမျိုးကို ဖွဲ့စည်းပုံ အခြေခံဥပဒေအရ ပိတ်ပင်ထားသည်ဟုလည်း ဗိုလ်ချုပ်ကြီး ဆူပိုက ပြောသည်။ 

မွတ်ဆလင်များ ၀တ်ပြုနေသည်ကို စောင့်ကြည့်နေတဲ့ ထိုင်းလုံခြုံရေးတပ်ဖွဲ့ 

တပ်မဟာ ၄ ၏ တပ်မှူးဖြစ်သူ ဒုတိယဗိုလ်ချုပ်ကြီး ဆန်တီ ဆကယ်တာနတ် (Santi Sakultanak) ကလည်း ဆန္ဒခံယူပွဲ ကျင်းပရန် တောင်းဆိုမှုကို ပြစ်တင်ရှုတ်ချခဲ့ကာ ယင်းသည် ဖွဲ့စည်းပုံနှင့် မညီကြောင်း၊ ထိုင်းနိုင်ငံ၏ နယ်မြေပိုင်ဆိုင်မှုနှင့် အမျိုးသားလုံခြုံရေးတို့အပေါ် ခြိမ်းခြောက်မှု ဖြစ်ကြောင်း ပြောသည်။ 

ပြီးခဲ့သည့် သီတင်းပတ်တွင် လုပ်ဆောင်ခဲ့သော ဆွေးနွေးပွဲတစ်ခုအတွင်း ထိုင်းတောင်ပိုင်း ပြည်နယ် သုံးခုမှ ကျောင်းသားများကို ကိုယ်စားပြုသည့် လူငယ်အဖွဲ့အစည်း Pelajar Bangsa ကို တည်ထောင်ခဲပြီးနောက် ယခု ကဲ့သို့ တုံ့ပြန် ပြောဆိုခဲ့ခြင်း ဖြစ်သည်။ 

ထိုအဖွဲ့သည် ၂၀၂၁ ခုနှစ်၊ နိုဝင်ဘာလတွင် ဖျက်သိမ်းခဲ့သော ပတ်ထာနီကျောင်းသား၊ လူငယ်အဖွဲ့အစည်း နေရာတွင် အစားထိုး ဝင်ရောက်ခြင်း ဖြစ်သည်ဟု အရင်းအမြစ်များက ပြောသည်။ 

ကိုယ်ပိုင်ဆုံးဖြတ်ခွင့်၊ ပတ်ထာနီ ငြိမ်းချမ်းရေးဆိုသည့် ခေါင်းဆောင်အောက်တွင် ဆွေးနွေးပွဲကို လုပ်ဆောင်ခဲ့ခြင်း ဖြစ်သည်။ 

ထိုဆွေးနွေးပွဲတွင် လွှတ်တော်အမတ်အဖြစ် ရွေးချယ်ခံထားရသူများ၊ ပါတီခေါင်းဆောင်များ ပါဝင်ခဲ့ကြောင်း၊ ထို ဆွေးနွေးပွဲတွင် ပတ်ထာနီနိုင်ငံ လွှတ်လပ်ရေး ဆန္ဒခံယူပွဲ ကျင်းပခြင်းနှင့် ပတ်သက်၍ မဲပေးရွေးချယ်ပေးရန် လည်း တောင်းဆိုခဲ့သည်ဟု သိရသည်။

Source: ဘန်ကောက်ပို့စ်

CNI International News

ကိယတ်ဗ်၊ ဇွန်လ ၁၂

နိုင်ငံအရှေ့တောင်ပိုင်းရှိ ကျေးရွာတစ်ခုကို ပြန်လည် သိမ်းပိုက်နိုင်ခဲ့သည်ဟု ယူကရိန်းစစ်တပ်က ဇွန်လ ၁၁ ရက် က ကြေညာခဲ့ပြီး ထိုဧရိယာတွင် ယူကရိန်းတို့၏ တိုက်ခိုက်မှုများကို တွန်းလှန်နိုင်ခဲ့သည်ဟု ရုရှားဘက်ကလည်း  ကြေညာခဲ့ကြောင်း အေပီမှ ရေးသားခဲ့သည်။

ရုရှားတို့ သိမ်းပိုက်ထားရာ ဧရိယာများမှ ရေဘေးသင့်နေသူများကို ကယ်ဆယ်လာသည့် လှေတစ်စင်းအား ရုရှား တပ်ဖွဲ့များ၏ ပစ်ခတ်မှုကြောင့် လူ ၆ ဦးဒဏ်ရာ ရရှိခဲ့သည်ဟုလည်း ယူကရိန်းသမ္မတ ဇာလန်းစကီးက အကြံပေး တစ်ဦးမှ ပြောသည်။ 

ထိုကဲ့သို့ ယူကရိန်း၏ တောင်ပိုင်းနှင့် အရှေ့တောင်ပိုင်း ဒေသများမှ မတည်ငြိမ်မှုများ၊ တိုက်ပွဲများသည် ၁၆ လ အတွင်းသို့ ရောက်ရှိလာခဲ့ပြီဖြစ်သော ရုရှား၏ ကျူးကျော်စစ်ကာလအတွင်း ထပ်မံ ပေါ်ပေါက်လာသည့် က သောင်းကနင်း ဖြစ်မှုများနှင့် သွေးထွက်သံယိုမှုများကို ဖော်ညွှန်းနေသည်။ 

ဒဏ်ရာ ရရှိခဲ့သူများကို ခါဆွန် (Kherson) မြို့ရှိ ဆေးရုံသို့ တင်ပို့ခဲ့ရသည်ဟု ယူကရိန်းသမ္မတ၏ အကြံပေး ပုဂ္ဂိုလ် အန်ဒရီ ယာမတ်ခ် (Andriy Yarmak) က ပြောသည်။ 

ထိုမြို့သည် ရေကြီးမှုများ ဖြစ်နေသော ဒီနီပါ (Dnieper) မြစ် အနောက်ဘက်တွင် ရှိသည်။ 

ယူကရိန်းတပ်ဖွဲ့က ကယ်ဆယ်ရေးလုပ်နေစဉ်

သိမ်းပိုက်ထားသော ဒေသများမှ ရုရှားအရာရှိများသည် ရုရှားပတ်စပို့စ် ပြနိုင်သူများကိုသာ ရေကြီးရာမှ ဘေးလွှတ် ရာ နေရာသို့ ရွှေ့ပြောင်းပေးသည်ဟု ဒေသခံများက ပြောသည်။ 

ထို့ကြောင့် မြစ်ကြောတစ်လျှောက်ရှိ ယူကရိန်းထိန်းချုပ်ရာ နေရာများမှ လှေငယ်များသည် အိမ်ခေါင်မိုးများ၊ ထပ်ခိုးများနှင့် မြေအမြင့်ပိုင်း နေရာများတွင် ပိတ်မိနေသူများကို ခေါက်တုန့်ခေါက်ပြန် သွားရောက် ကယ်ဆယ် ခဲ့ရသည်။ 

ယူကရိန်းအရှေ့မြောက်ဘက် ရှေ့တန်းစစ်မြေပြင်အနီးရှိ ဘလာဟိုဒတ်နီ (Blahodatne) ရွာမှ ရုရှား တပ်ဖွဲ့များကို ရှင်းလင်းနိုင်ခဲ့သည်ဟု ယူကရိန်းစစ်တပ်က ပြောသည်။ ထိုရွာသည် ရုရှားတို့ တစ်စိတ်တစ်ပိုင်း သိမ်းပိုက်ထား သည့် ဒွန်းတက်ခ်ဒေသတွင် ရှိသည်။ 

ယူကရိန်း၏ တပ်မ ၆၈ မှ ဗွီဒီယိုဖိုင်တစ်ခု ထုတ်ပြန်ခဲ့သည်။ ထိုဗွီဒီယိုထဲတွင် ကျေးရွာအတွင်းရှိ ပျက်စီးနေသော အဆောက်အဦ တစ်ခုတွင် ယူကရိန်းအလံ လွှင့်တင်နေခြင်းကို ဖော်ပြထားသည်။ 

ထိုသို့ ဘလာဟိုဒတ်နီရွာအား သိမ်းပိုက်နိုင်ခြင်းကြောင့် ယူကရိန်းတို့၏ တန်ပြန် ထိုးစစ်ဆင်မှု စတင်နေပြီဆို သော ယူဆချက်များလည်း ပိုမိုခိုင်မာလာသည်။

သို့သော် လက်ရှိအချိန်အထိ ယူကရိန်းအရာရှိများက ထိုစစ်ဆင်ရေးနှင့် ပတ်သက်၍ လူသိရှင်ကြား ထုတ်ပြန်မှု တစ်စုံတစ်ရာ လုပ်ဆောင်ခြင်း မရှိသေးပေ။

ဘလာဟိုဒတ်နီရွာတွင် ရုရှားတပ်ဖွဲ့ဝင် ၆၀ ခန့် တပ်စွဲထားကာ တပ်ဖွဲ့ဝင် ခြောက်ဦးကို ဖမ်းမိခဲ့သည်ဟု ယူကရိန်း ၏ တပ်မ ၆၈ မှ ပြောခွင့်ရပုဂ္ဂိုလ်က ပြောသည်။ 

ဘလာဟိုဒတ်နီရွာ ရေလွှမ်းမိုးနေစဉ်

၎င်းတို့သည် နောက်ထပ် ကျေးရွာတစ်ခုကို ဆက်လက် သိမ်းပိုက်ကာ တောင်ပိုင်းသို့ ချီတက်ရန် စီစဉ်ထားသည် ဟုလည်း ပြောသည်။ 

ဘလာဟိုဒတ်နီရွာအား သိမ်းပိုက်နိုင်မှုသည် ယူကရိန်း စစ်တပ်အတွက် အသေးစား အောင်မြင်မှုဖြစ်သော်လည်း ရုရှားတပ်ဖွဲ့အားလုံးကို ရှင်းလင်းရန်ကိစ္စကို အချိန်ယူ ဆောင်ရွက်သွားရန် လိုအပ်သည်ဟု ယူကရိန်းနှင့် အနောက် အုပ်စု အရာရှိများက ပြောသည်။ 

ရုရှားဘက်ကလည်း ယူကရိန်းတို့၏ တိုက်ခိုက်မှုများကို တွန်းလှန်နိုင်ခဲ့သည်ဟု ကြေညာသည်။ ပြီးခဲ့သည့် ၂၄ နာရီအတွင်း ဒွန်းတက်ခ် (Donetsk) တောင်ပိုင်းနှင့် ဇာပိုရီဇီယာ (Zaporizhzhia) ဒေသများမှ ယူကရိန်းတို့၏ ထိုး စစ်ဆင်မှုများကို ဟန့်တားနိုင်ခဲ့သည်ဟု ရုရှားကာကွယ်ရေးဌာနက ဇွန်လ ၁၁ ရက်နေ့တွင် ထုတ်ပြန်ခဲ့သည်။ 

Source: AP

CNI International News

ဝါရှင်တန်၊ ဇွန်လ ၁၀

ယူကရိန်းမှ ခေတ်ရှေ့ပြေး တင့်ကားများကို ဖျက်ဆီးနိုင်သည်ဟု ရုရှားစစ်တပ်မှ ထုတ်ပြန်သော ဗွီဒီယိုသက်သေ များမှာ အတုများဖြစ်နိုင်ကြောင်း လက်နက်ကျွမ်းကျင်သူများက ပြောသည်ဟု အေပီသတင်းမှာ ဖော်ပြထားသည်။

ရုရှားစစ်တပ်က တင့်ကားများကို ဖျက်ဆီးနိုင်ခဲ့ကြောင်း ပြောဆိုမှုကို အတည်ပြု ပေးနိုင်ရန် ယခုသီတင်းပတ်အ တွင်း ထုတ်ပြန်ခဲ့သည့် အဖြူအမည်း ဗွီဒီယိုဖိုင်ပါ ယာဉ်သည် တင့်ကားမဟုတ်ဘဲ လယ်ထွန်စက် တစ်စီးသာဖြစ် သည်ဟုလည်း အေပီ၏ ပုံရိပ်သွင်ပြင်ဆိုင်ရာ လေ့လာဆန်းစစ်မှုတွင် တွေ့ခဲ့ရသည်။ 

နေတိုးနိုင်ငံများမှ ယူကရိန်းသို့ ထောက်ပံ့ပေးထားသည့် ခေတ်အမှီဆုံးနှင့် စွမ်းရည်အမြင့်ဆုံး ဂျာမနီလုပ် Leopard တင့်ကားရှစ်စီးကို ရုရှားတပ်များက ဖျက်ဆီးနိုင်ခဲ့သည်ဟု ဝါရှင်တန်ရှိ ရုရှားသံရုံးက တွစ်တာ၌ ကြေညာခဲ့သည်။

Leopard တင့်ကားကိုတွေ့ရစဉ်

ရုရှားကာကွယ်ရေးဝန်ကြီဌာနကလည်း တယ်လီဂရမ်၌ ဗွီဒီယိုတစ်ခုကို တင်ခဲ့ပြီး Leopard တင့်ကားများ အပါအ ဝင် တခြားနိုင်ငံများ၏ ကျည်ကာယာဉ်များကို ဖျက်ဆီးနိုင်ခဲ့သည်ဟု ရေးသားခဲ့သည်။ 

ထိုဗွီဒီယိုကို KA-51 Alligator တိုက်ခိုက်ရေး ရဟတ်ယာဉ်၏ အပူလှိုင်းသုံး ပုံဖော်စနစ်ဖြင့် ရိုက်ကူးထားခြင်းဟု ဆိုကာ ရုရှားနိုင်ငံပိုင် သတင်းဌာနများတွင် ဖော်ပြကြသည်။ 

ထိုဗွီဒီယိုတွင် ယာဉ်များ၏ အနက်ရောင် အရိပ်ကို မြင်တွေ့ရပြီး ထိုယာဉ်များမှ တစ်စင်းကို ရဟတ်ယာဉ်၏ ပဲ့ထိန်းဒုံးကျည်ဖြင့် ပစ်ခတ်ခဲ့ကာ ဖောက်ခွဲဖျက်ဆီးခဲ့သည်။ 

တည့်တည့်ကြီး ထိသည်ဟု ရုရှားဘာသာဖြင့် ပြောဆိုသံကိုလည်း ဗွီဒီယိုဖိုင်တွင် ကြားခဲ့ရသည်။ 

ယူကရိန်းသို့ Leopard 2 တိုက်ခိုက်ရေး တင့်ကား ၁၈ စီး ထောက်ပံ့ပေးမည်ဟု ဂျာမနီက ယခုနှစ် အစောပိုင်းတွင် ကြေညာခဲ့သည်။ 

ထိုတင့်များသည် ကမ္ဘာပေါ်တွင် အကောင်းဆုံး တိုက်ခိုက်ရေး တင့်ကားများ ဖြစ်သည်ဟုလည်း ထုတ်လုပ်သူ Krauss-Maffei Wegmann က ပြောသည်။ ယူကရိန်းအရာရှိများက Leopard များကို တိုက်ပွဲတွင် အသုံးပြု နေပြီလားဆိုခြင်းနှင့် ပတ်သက်၍ မေးမြန်းမှုကို ဖြေဆိုရန် ငြင်းပယ်သည်။

ရုရှားဘက်က ထုတ်ပြန်သည့် ဗွီဒီယိုဖိုင် လူမှုကွန်ယက်ပေါ်တွင် ပျံ့နှံ့သွားပြီးနောက်တွင် ရုရှားတို့၏ ရဟတ်ယာဉ် ဖြင့် ပစ်ခတ်မှုသည် Leopard တင့်ကား ဖြစ်နိုင်ချေနည်းသည်ဟု လက်နက်ကျွမ်းကျင်သူများနှင့် စစ်ဘက် ဘလော့ဂါများက လူမှုကွန်ယက်တွင် ရေးသားခဲ့သည်။ 

ရုရှားထုတ်ပြန်ခဲ့သည့် တင့်ကားဆိုသော ပုံကို အေပီက စစ်ဆန်းပြထားစဉ်

AP ၏ ပုံရိပ်ပိုင်းဆိုင်ရာ လေ့လာဆန်းစစ်မှုတွင် ညအချိန် ရိုက်ကူးထားသည့် ဗွီဒီယိုဖိုင်ပါ ယာဉ်များသည် လယ်ကွင်း တစ်ခုအတွင်း ရပ်ထားသည့် လယ်ယာသုံး ယာဉ်တစ်မျိုး ဖြစ်ပုံရသည်ကို တွေ့ခဲ့ရသည်။ 

ပြောင်းနှင့်ဂျုံများကို ရိတ်သိမ်းရာတွင် အသုံးပြုသော ယာဉ်ဖြစ်နိုင်သည်။ ရုရှားဒုံးကျည် ထိမှန်ခဲ့သော ယာဉ်တွင် ဘီးအကြီး လေးလုံးရှိကာ ယင်းသည် အတော်လေးမြင့်သည်။ 

Leopard 2 တင့်ကားသည် နိမ့်ကာ ဘူဒိုဇာကဲ့သို့ ဘီးများသာ ရှိသည်။ ရုရှားသံရုံး၏ ထုတ်ပြန်ချက်တွင် ပြင်သစ် ထုတ် AMX-10 တင့်ကားသုံးစီး ဖျက်ဆီးနိုင်ခဲ့သည်ဟုလည်း ပါဝင်သည်။ 

ထိုတင့်ကားများတွင် ဘီးများရှိသည် မှန်သော်လည်း ဘီးခြောက်လုံးဖြစ်ကာ လေးလုံး မဟုတ်ချေ။ 

ရုရှားဘက်က ဖျက်ဆီးနိုင်ခဲ့သည်ဆိုသော ယာဉ်၏ပုံရိပ်များအရ ယာဉ်သည် တင့်ကားထက် ကိုယ်တိုင်သွားလာနိုင် သည့် ခေတ်မီ လယ်ယာသုံး ယာဉ်ဖြစ်ရန် ရာခိုင်နှုန်းများသည်။ 

ရုရှားရဟတ်ယာဉ်တွင် တပ်ဆင်ထားသော အပူလှိုင်းသုံး ပုံရိပ်ဖော်စနစ်သည် ရန်သူ့ယာဉ် ပစ်မှတ်များ၏ အပူ လှိုင်းကို မီးခိုးများ သို့မဟုတ် အလင်းရောင် ဖျော့ဖျော့ အခြေအနေဖြင့် ဖော်ပြပေးသည်။ 

ဗွီဒီယိုပါ ရပ်ထားသော ယာဉ်များသည် အနက်ရောင် ဖြစ်နေသည်ကို တွေ့ရပြီး ယင်းက ထိုအင်ဂျင်များ အေးနေ သည်ဟု အဓိပ္ပာယ်ရသည်။ 

ရှေ့တန်းစစ်မျက်နှာရှိ တင့်ကားတပ်ဖွဲ့များသည် ၎င်းတို့၏ ယာဉ်များကို ပုန်းကွယ် ရပ်နားထားလေ့ရှိပြီး ရွေ့လျားမှုနှင့် ပစ်ခတ်မှု ပြုလုပ်ရန်သာ ပေါ်လာလေ့ရှိသည်ဟု စစ်သုံးယာဉ်ဆိုင်ရာ ကျွမ်းကျင်သူနှစ်ဦးက ပြောသည်။ 

ရန်သူ၏ တိုက်ခိုက်မှုကို အလွယ်တကူ ခံရနိုင်မှုကြောင့် တင့်ကားများကို ကွင်းပြောင်ပြောင်တွင် ရပ်လေ့မရှိ ကြောင်းလည်း ၎င်းတို့က ပြောသည်။ 

 Source: AP

CNI International News

ခါတွန်၊ ဇွန်လ ၁၀

ဇွန်လ ၁၀ ရက်နေ့ အစောပိုင်းမှ စတင်ကာ ၂၄ နာရီကြာ တစ်နိုင်ငံလုံး အပစ်အခတ် ရပ်စဲရေးကို ဆူဒန်ရှိ စစ်ဖြစ် နေသော အဖွဲ့အစည်းများက သဘောတူခဲ့သည်ဟု ကြားဝင်စေ့စပ်သူများဖြစ်သော ဆော်ဒီနှင့် အမေရိကန်တို့က သဘောတူခဲ့သည်ဟု အယ်ဂျာဇီးလ်ယား သတင်းတွင် ဖော်ပြထားသည်။ 

အပစ်အခတ်ရပ်စဲရေးသည် ဒေသစံတော်ချိန် မနက် ၆ နာရီတွင် စတင်မည်ဟု ဆော်ဒီနိုင်ငံရေးခြားဝန်ကြီးဌာနက တွစ်တာ၌ ဇွန်လ ၉ ရက်က ရေးသားထားသည်။

ထိုသဘောတူညီချက်သည် ဆူဒန်စစ်တပ်နှင့် RSF လက်နက်ကိုင် အဖွဲ့များအကြား သီတင်းပတ်များစွာကြာ တိုက်ပွဲများကို အဆုံးသတ်ရေး နောက်ဆုံး ကြိုးပမ်းမှုလည်း ဖြစ်သည်။

ဆော်ဒီနဲ့အမေရိကန် စေ့စပ်ပေးမှုနဲ့ ဆူဒန်အပစ်အခတ်ရပ်စဲရေး သဘောတူလက်မှတ်ထိုးနေစဉ်

ယခင်ရရှိခဲ့သော အပစ်အခတ်ရပ်စဲရေးများ ကျိုးပျက်ခဲ့ပြီးနောက် နှစ်ဖက်စလုံးက ၂၄ နာရီအတွင်း စစ်ရေးအရ အသာရရှိအောင် ကြိုးပမ်းခြင်း၊ လှုပ်ရှားမှုများ၊ တိုက်ခိုက်မှုများ၊ လေယာဉ် သို့မဟုတ် ဒရုန်းများ သုံးခြင်း၊ လေ ကြောင်း တိုက်ခိုက်မှုများ လုပ်ဆောင်ခြင်း၊ အမြောက်ဖြင့် ပစ်ခတ်ခြင်းတို့အပြင် တပ်အင်အား ဖြည့်တင်းခြင်း တို့ ကိုပါ ရပ်တန့်သွားရန် သဘောတူခဲ့သည်ဟု ဆော်ဒီနိုင်ငံရေးခြားဝန်ကြီးဌာန၏ ထုတ်ပြန်မှုတွင် ပါဝင်သည်။

ထို ၂၄ နာရီအတွင်း နိုင်ငံတစ်ဝန်းလုံးသို့ လူသားချင်း စာနာမှုဆိုင်ရာ အကူအညီများ ဖြန့်ဝေရန်၊ နှောင့်ယှက်မှု မလုပ်ဆောင်ရန်လည်း သဘောတူခဲ့သည်ဟု ယင်းက ဆိုသည်။

ယခုတစ်ကြိမ် အပစ်အခတ် ရပ်စဲရေးသည် ကြီးမားသော လူသားချင်း စာနာမှုဆိုင်ရာ ပဋိပက္ခကို ဖြစ်စေသည့် ဆိုးရွားသော တိုက်ခိုက်မှုများကို ရပ်တန့်ရေး ကြိုးပမ်းမှုဖြစ်သည်ဟု ကြားဝင်စေ့စပ်ပေးသူများက ပြောသည်။

ယင်းက ရပ်တန့်ထားရသော ဂျီဒတ် (Jeddah) မြို့မှ ဆွေးနွေးပွဲများကို ပြန်လည် စတင်ရေးအတွက် ယုံကြည်မှု တည်ဆောက်ခြင်းဆိုင်ရာ လုပ်ရပ် တစ်ခုဟုလည်း ၎င်းတို့က ပြောသည်။

ထို့နောက် အပစ်အခတ်ရပ်စဲရေးကို ချိုးဖောက်ခြင်းက ထိုလုပ်ငန်းစဉ်ကို အနှောင့်အယှက် ဖြစ်စေနိုင်သည်ဟု လည်း ကြားဝင်စေ့စပ်ပေးသူများက သတိပေးထားသည်။ 

အဆိုပြုသည့် အပစ်အခတ်ရပ်စဲရေးကို သဘောတူသည်ဟု ဆူဒန်စစ်တပ်က ထုတ်ပြန် ကြေညာခဲ့သော်လည်း RSF ဘက်က အပစ်အခတ်ရပ်စဲရေးအတွက် တရားဝင် ထုတ်ပြန်မှု တစ်စုံတစ်ရာ လုပ်ဆောင်ခြင်း မရှိသေးပေ။ 

ဆော်ဒီနိုင်ငံခြားရေး၀န်ကြီးကိုတွေ့ရစဉ်

သို့သော် ဆူဒန်ပြည်သူများထံတွင်တော့ ယခုတစ်ကြိမ် အပစ်အခတ်ရပ်စဲမှုကိုလည်း အကောင်းမြင်မှု မရှိကြချေ။ 

ပထမတစ်ကြိမ် အပစ်အခတ်ရပ်စဲရေးတုန်းက သဘောတူညီမှုများကဲ့သို့ ချိုးဖောက်ခြင်းမရှိဟု ယုံကြည်စရာ အကြောင်းပြချက် မရှိကြောင်း ဆူဒန်မြို့တော် ခါတွန် (Khartoum) မှ ဒေသခံများက ပြောသည်။ 

မြို့ တော်နှင့် တခြား အရပ်များရှိ ပြည်သူများထံတွင် ဇွန်လ ၁၀ ရက်နေ့ အပစ်အခတ်ရပ်စဲမှုအပေါ် ယုံကြည်မှု အနည်းငယ်သာရှိသည်ဟု ဆူဒန်ရှိ အယ်ဂျာဇီးလ်ယား သတင်းထောက်က ပြောသည်။ 

ဆူဒန်လူဦးရေ၏ တစ်ဝက်ဖြစ်သော ပြည်သူ ၂၅ သန်းခန့်သည် လက်ရှိတွင် လူသားချင်း စာနာမှုဆိုင်ရာ အကူအညီ များ လိုအပ်နေသည်ဟုလည်း ကုလသမဂ္ဂအဖွဲ့က ထုတ်ပြန်ထားသည်။ 

Source: အယ်ဂျာဇီးလ်ယား

CNI International News

ဘေဂျင်း၊ ဇွန်လ ၁၀

ပါလက်စတိုင်းသမ္မတ မာမွတ်အာဘတ်စ် (Mahmoud Abbas) သည် လာမည့် သီတင်းပတ်တွင် တရုတ်သို့ အလည်အပတ် ရောက်ရှိလာမည်ဟု အယ်ဂျာဇီးလ်ယားမှ ဖော်ပြခဲ့သည်။ 

အစ္စရေး - ပါလက်စတိုင်း ငြိမ်းချမ်းရေး ဆွေးနွေးပွဲများ ပေါ်ပေါက်လာရေး ကူညီပေးရန် အဆင်သင့် ရှိနေသည်ဟု တရုတ်ဘက်က ပြောဆိုခဲ့ပြီးနောက်တွင် ဖြစ်သည်။ 

တရုတ်သမ္မတ ရှီကျင့်ဖျင် (Xi Jinping)၏ ဖိတ်ခေါ်မှုကြောင့် ပါလက်စတိုင်းသမ္မတ အာဘတ်စ်သည် ဇူလိုင် ၁၃ ရက်မှ ၁၆ ရက်အထိ တရုတ်နိုင်ငံသို့ လာရောက်မည်ဟု တရုတ်နိုင်ငံခြားရေးဌာန ပြောခွင့်ရပုဂ္ဂိုလ် ဟွာချွန်းယင် (Hua Chunying) က ပြောသည်။ 

အာဘတ်စ်သည် တရုတ်ပြည်သူများ၏ မိတ်ဆွေကောင်း၊ မိတ်ဆွေဟောင်း ဖြစ်သည်ဟုလည်း တရုတ်နိုင်ငံခြား ရေးဝန်ကြီးဌာန ပြောခွင့်ရပုဂ္ဂိုလ် ဝမ်ဝန်ဘင်း (Wang Wenbin) က ပြောသည်။ 

အမေရိကန် နိုင်ငံခြားရေး၀န်ကြီး ဘလင်ကင်နဲ့ မာမွတ်အာဘတ်စ်ကိုတွေ့ရစဉ်

အာဘတ်စ်သည် ယခုနှစ်အတွင်း တရုတ်သို့ ပထမဆုံး လာရောက်သည့် အာရပ်ခေါင်းဆောင် ဖြစ်ကြောင်း၊ ယင်း က သမိုင်းကြောင်းအရ မိတ်ဆွေများဖြစ်ခဲ့သည့် တရုတ်-ပါလက်စတိုင်း ဆက်ဆံရေးကို ကိုယ်စားပြုကြောင်း ၎င်းက ပြောသည်။

ထို့နောက် တရုတ်သည် ပါလက်စတိုင်း ပြည်သူများ၏ တရားဝင် အခွင့်အရေးများကို ပြန်လည်ရရှိရေး ကြိုးပမ်း မှုကို အစဉ်တစိုက် ထောက်ပံ့လျက်ရှိသည်ဟု ဆိုသည်။ 

ပြီးခဲ့သည့် ဒီဇင်ဘာလတွင် သမ္မတရှီသည် ဆော်ဒီသို့ သွားရောက်ခဲ့သည်။ ထိုခရီးစဉ်အတွင်း ရှီသည် အာဘတ်စ် နှင့် တွေ့ဆုံကာ ပါလက်စတိုင်းအရေးအတွက် ခိုင်မာသော အဖြေတစ်ခု ရရှိရေး လုပ်ဆောင် သွားမည်ဟု ကတိ ပြုခဲ့သည်။ 

ဧပြီလတွင်လည်း တရုတ်နိုင်ငံခြားရေးဝန်ကြီး ကျင်ဂန် (Qin Gang)က အစ္စရေး၊ ပါလက်စတိုင်း ဝန်ကြီးများနှင့် တွေ့ဆုံကာ တရုတ်နိုင်ငံသည် ငြိမ်းချမ်းရေး ဆွေးနွေးမှုများအတွက် ပါဝင်ကူညီရန် ဆန္ဒရှိသည်ဟု ပြောခဲ့ကြောင်း Xinhua သတင်းတွင် ဖော်ပြသည်။ 

အစ္စရေးတပ်ဖွဲ့နဲ့ ပါလက်စတိုင်းအမျိုးသမီးတစ်ဦးကိုတွေ့ရစဉ်

တရုတ်အနေဖြင့် ဆွေးနွေးပွဲများ တတ်နိုင်သမျှ အစောဆုံး စတင်နိုင်ရန်၊ နှစ်နိုင်ငံကြား ပြေလည်မှု ရရှိရန် တွန်းအားပေး ဆောင်ရွက်သွားမည်ဟု ကျင်ဂန်းက ပါလက်စတိုင်း နိုင်ငံခြားရေးဝန်ကြီးကို ပြောခဲ့သည်ဟု သိရသည်။ 

တရုတ်သည် အရှေ့အလယ်ပိုင်းတွင် ကြားဝင်စေ့စပ်သူ တစ်ဦးအဖြစ် ပါဝင်လုပ်ဆောင်လာသည်။

ထိုကဲ့သို့ လုပ်ဆောင်မှုမျိုးကို အမေရိကန်က ကာလရှည် လုပ်ဆောင်ခဲ့ခြင်း ဖြစ်သည်။  မတ်လတွင် တရုတ်နိုင်ငံသည် ကာလရှည် ရန်ဘက် ပင်လယ်ကွေ့နိုင်ငံ နှစ်ခုဖြစ်သော အီရန်နှင့်ဆော်ဒီတို့အကြား ပုံမှန်ဆက်ဆံရေး ပြန်ဖြစ်ရန် ကြားဝင်စေ့စပ်ပေးနိုင်ခဲ့ပြီး ယင်းက ကမ္ဘာလုံးဆိုင်ရာ အခြေအနေ ပြောင်းလဲလာသည့် လက္ခဏာဟု လေ့လာ သူများက သုံးသပ်သည်။ 

သို့သော် ထိုလုပ်ဆောင်ချက်များကို အမေရိကန်ဘက်က ပြင်းထန်စွာ ပြစ်တင် တုံ့ပြန်ထားသည်။ အစ္စရေးနှင့် ပါလက်စတိုင်းတို့၏ ငြိမ်းချမ်းရေး ဆွေးနွေးပွဲများသည် ၂၀၁၄ ခုနှစ်ကတည်းက ရပ်တန့်သွားခြင်း ဖြစ်သည်။

Source:  အယ်ဂျာဇီးလ်ယား

CNI International News

မော်စကို၊ ဇွန်လ ၁၀

ရုရှားသည် လာမည့်လတွင် ဘယ်လာရုစ်သို့ နျူကလီးယား လက်နက်များ တပ်ဆင်ဖြန့်ကျက်သွားမည်ဟု သမ္မတ ပူတင် (Vladimir Putin) က ပြောခဲ့ကြောင်း အေပီမှ ဖော်ပြခဲ့သည်။ 

ထိုလုပ်ရပ်က အနောက်အုပ်စုကို ခြိမ်းခြောက်သည့် လုပ်ရပ်ဟုလည်း ဘယ်လာရုစ် အတိုက်အခံများက ပြောသည်။ 

နျူကလီးယား လက်နက် သိုလှောင်ရန် လိုအပ်သည်များကို ဇူလိုင် ၇ ရက်နှင့် ၈ ရက်တွင် အဆုံးသတ် နိုင်မည်ဖြစ် ကြောင်း၊ ထို့နောက် ဘယ်လာရုစ်သို့ အမြန်ဆုံး ပို့ဆောင်သွားမည် ဖြစ်ကြောင်း ဘယ်လာရုစ်သမ္မတ အလက်ဇန္ဒား လူကာရှန်ကို (Alexander Lukashenko) နှင့် တွေ့ဆုံစဉ် ပူတင်က ပြောခဲ့သည်။ 

ရှေ့တန်း စစ်မျက်နှာတွင် ယူကရိန်းဘက်က တိုက်ခိုက်မှုများ အရှိန်မြှင့်တင် ဆောင်ရွက် လာပြီးနောက်မှာ ပူတင်က ထိုသို့ ပြောခဲ့ခြင်း ဖြစ်သည်။ 

ဘိုင်ဒန်နဲ့ အီးယူခေါင်းဆောင်များကိုတွေ့ရစဉ်

ယူကရိန်း တပ်ဖွဲ့များ၏ လှုပ်ရှားမှုများကြောင့် ကာလရှည် စောင့်ဆိုင်းနေသည့် တန်ပြန် ထိုးစစ်ဆင်မှု စတင် ပြီဟုလည်း လေ့လာသူများက သုံးသပ်သည်။ 

ရုရှားသည် ယူကရိန်းသို့ တပ်ဖွဲ့များ ပို့ဆောင်ရေးအတွက် ဘယ်လာရုစ်မြေကို အသုံးပြုခဲ့သလို ဘယ်လာရုစ်မြေမှာ တပ်သားများနှင့် လက်နက်များလည်း စခန်းချထားသည်။ 

အရာအားလုံးသည် အစီအစဉ်အတိုင်း သွားနေကြောင်း လူကာရှန်ကိုနှင့် ဆိုချီ (Sochi) မြို့နေအိမ်၌ တွေ့ဆုံစဉ် ပူတင်က ပြောခဲ့သည်။ 

ဗျူဟာမြောက် နျူကလီးယား လက်နက်များသည် တိုက်ပွဲအတွင်း ရန်သူ့တပ်များနှင့် လက်နက်များကို ဖျက်ဆီး ရန် ရည်ရွယ်သည်။ ၎င်းတို့သည် တာတိုပစ်များဖြစ်ကာ တာဝေးပစ် လက်နက်များထက် အားနည်းသည်။ 

ပူတင်သည် ဘယ်လာရုစ်တွင် နျူကလီးယား လက်နက်များ ဖြန့်ကျက်ရေးကို ယခုနှစ် အစပိုင်းတွင် ထုတ်ပြန် ကြေညာခဲ့ပြီး ယင်းက ယူကရိန်းအပေါ် အနောက်အုပ်စု၏ စစ်ရေး ထောက်ပံ့မှုများ အားကောင်းလာခြင်းပေါ် သတိပေးချက်ဟု ရှုမြင်ကြသည်။ 

ဘယ်လာရုစ် ပြည်ပြေး အတိုက်အခံ ခေါင်းဆောင် ဆဗစ်လာနာ ဆီခါနိုစကာယာကို တွေ့ရစဉ်

လက်နက်များကို ရုရှားဘက်ကသာ ထိန်းချုပ်သွားမည်ဟုလည်း ပူတင်က ပြောသည်။ ဘယ်လာရုစ်သို့ နျူကလီးယား လက်နက် မည်မျှပေးပို့သွားမည် ဆိုသည်ကိုတော့ ပူတင်က ထုတ်ပြန်ခြင်း မရှိပေ။ 

ရုရှားတွင် ဗျူဟာမြောက် နျူကလီးယား လက်နက် ၂၀၀၀ ခန့်ရှိသည်ဟု အမေရိကန်အစိုးရက ယုံကြည်နေသည်။ 

နျူကလီးယား လက်နက်များ ဘယ်လာရုစ်မြေပေါ် ရောက်ရှိလာခြင်းနှင့် ပတ်သက်ပြီး ဘယ်လာရုစ် ပြည်ပြေး အတိုက်အခံ ခေါင်းဆောင် ဆဗစ်လာနာ ဆီခါနိုစကာယာ (Sviatlana Tsikhanouskaya) က ပြင်းပြင်းထန်ထန် ဝေဖန်သည်။ 

ပူတင်နှင့်သူ၏ ရုပ်သေးရုပ် လူကာရှန်ကိုတို့သည် ဇူလိုင်လ နေတိုး ညီလာခံ မစတင်မီ ဘယ်လာရုစ်သို့ နျူကလီးယား လက်နက်များ ဖြန့်ကျက်ရန် စီစဉ်နေကြောင်း၊ ယင်းက အနောက်အုပ်စုအား နောက်ဆုတ်ရန် ကြိုးပမ်းသည့် ယုတ်မာသော အကြပ်ကိုင်မှု ဖြစ်ကြောင်း၊ နျူကလီးယားဖြင့် အကြပ်ကိုင်မှုကြောင့် အာဏာရှင်များ အပြစ်မှ လွတ်မြောက်သွားခြင်းကို လက်မခံသင့်ကြောင့်လည်း ၎င်းက ပြောသည်။ 

Source: AP