CNI International News

ဆိုးလ်၊ ဩဂုတ် ၁၀

အမေရိကန်- တရုတ် အားပြိုင်မှုမြင့်တက်လာနေသည့်အချိန်မှာ တောင်ကိုရီးယား၏ အမေရိကန်ဗဟိုပြု မူဝါဒကို တရုတ်က သတိထားစောင့်ကြည့်နေကြောင်း ကိုရီးယားတိုင်းမ် မီဒီယာက ရေးသားဖော်ပြသည်။

အမေရိကန်-တရုတ် အားပြိုင်မှုကြောင့် ဆိုးလ်နှင့်ဝါရှင်တန်ဘက်သို့ ဖိအားများ တိုးလာနေစဉ်အတွင်း တရုတ်နိုင်ငံခြားရေး ဝန်ကြီး ဝမ်ယိက တောင်ကိုရီးယားကို သီးခြားလွတ်လပ်စွာ လုပ်ဆောင်နိုင်ဖို့ အလေးပေး တိုက်တွန်းခဲ့ကြောင်း ကိုရီးယား တိုင်းမ် မီဒီယာက ရေးသားဖော်ပြသည်။

ပြီးခဲ့သည့် မေလတွင် စတင်တာဝန်ယူခဲ့သော တောင်ကိုရီးယား နိုင်ငံခြားရေးဝန်ကြီး ပက်ဂျင်သည် ၎င်း၏ပထမဆုံး တရုတ် ခရီးစဉ်အတွင်း ဝမ်ယိနှင့် တွေ့ဆုံဆွေးနွေးခဲ့ရာ ဆိုးလ်-ဘေဂျင်း ဆက်ဆံရေးအတွက် ကွန်ဆာဗေးတစ် ယွန်ဆော့ရွဲ အစိုးရ လက်ထက် အရေးကြီးသော ခြေလှမ်းတစ်ခုဟု ရှုမြင်ကြကြောင်း ကိုရီးယားတိုင်းမ်က ဆက်လက် ရေးသားထားသည်။

“တောင်ကိုရီးယား-တရုတ် သံတမန်ဆက်ဆံရေးထူထောင်မှု အနှစ် ၃၀ ပြည့်ချိန်မှာ ဆက်ဆံရေး ပိုမိုခိုင်မာဖို့ ဦးတည်နေတုန်း နှစ်ဘက်စလုံးကနေ ပြင်ပသက်ရောက်မှုမပါဘဲ လွတ်လပ်စွာ လုပ်ကိုင်ဆောင်ရွက်ခွင့်ကို ထိန်းသိမ်းသင့်ပါတယ်” ဟု ဝမ်ယိ က ပြောကြားခြင်းဖြင့် နှစ်နိုင်ငံ အကျိုးစီးပွား ထည့်သွင်းစဉ်းစားဖို့ တိုက်တွန်းခဲ့သည်။

“တည်ငြိမ်ပြီး ချောမွေ့တဲ့ ထောက်ပံ့ရေးကွင်းဆက်တွေ သေချာစေဖို့ ကျနော်တို့ဟာ Win-Win အခြေအနေ တစ်ရပ်ကို လိုက်နာသွားကြရေး လိုအပ်ပါတယ်” ၎င်းက ဆက်လက် ပြောကြားခဲ့သည်။

တောင်ကိုရီးယား သမ္မတ ယွန်ဆော့ရွဲနဲ့ အမေရိကန် သမ္မတ ဘိုင်ဒန် (Reuters)

ရက်သတ္တပတ် နှစ်ပတ်ကြာပြီးနောက် နှစ်နိုင်ငံသံတမန် ဆက်ဆံရေး ထူထောင်ခြင်း အထိမ်းအမှတ် ကျင်းပရန် စီစဉ်ထား သော်လည်း အိမ်နီးချင်း အချင်းချင်း တင်းမာသော ပြဿနာများ ပေါ်ပေါက်လာသဖြင့် ဝမ်ယိက အထက်ပါအတိုင်း မှတ်ချက် ချခဲ့ခြင်း ဖြစ်သည်။

ကမ္ဘာလုံးဆိုင်ရာ ကုန်စည်ထောက်ပံ့ရေး ကွင်းဆက်များတွင် ဘေဂျင်း၏ လွှမ်းမိုးလာမှုကို တန်ပြန်ရန်အတွက် အမေရိကန် ဦးဆောင် အဆိုပြုခဲ့သော Chip 4 (သို့မဟုတ်) Fab 4 ဟုခေါ်သည့် (အီလက်ထရောနစ်ပစ္စည်း) ချစ်ပ်မဟာမိတ်အဖွဲ့ဝင် ဖြစ်လာရေးကိုလည်း ယွန်ဆော့ရွဲအစိုးရက စီစဉ်ထားသည်။

အကယ်၍ ကိုရီးယားကျွန်းဆွယ်တွင် အမေရိကန်၏ (THAAD) လေကြောင်းရန် ကာကွယ်ရေးစနစ် (ဒုံးခွင်းဒုံး) ထပ်မံ ဖြန့်ကြက်ချထားခဲ့လျှင် Three Nos မူဝါဒကို လိုက်နာကျင့်သုံးရန် တရုတ်အစိုးရက တောင်ကိုရီးယား အစိုးရသစ်အား တိုက်တွန်းခဲ့သည်။

အမေရိကန်ကို ဗဟိုပြုသည့် တောင်ကိုရီးယား နိုင်ငံခြားရေးမူဝါဒအပေါ် တရုတ်က ပြတ်ပြတ်သားသား ရပ်တည်နေသလို ဆိုးလ်အနေဖြင့် အင်အားကြီး နှစ်နိုင်ငံကြား လွန်ဆွဲနေသည့် အနေအထားအား ဘေဂျင်း နားလည်ပေးလိမ့်မည်ဟု ထင်ကြေး များလည်း ပေါ်ထွက်နေသည်။

တရားဝင် ထုတ်ပြန်သည့် စာရင်းဇယားများအရ တောင်ကိုရီးယား၏ တပိုင်းလျှပ်ကူး(semiconductor) တင်ပို့မှုသည် တရုတ်ပြည်မကြီးနှင့် ဟောင်ကောင်သို့ ဦးတည်လျက် ယမန်နှစ်က ဒေါ်လာ ၁၂၈ ဘီလီယံတန်ဖိုးရှိခဲ့ကြောင်း သိရသည်။

Source: Korea Times

CNI International News

ဝါရှင်တန်၊ ဩဂုတ် ၁၀

မကြာသေးမီက အငြင်းပွားစရာဖြစ်ခဲ့သည့် ထိုင်ဝမ်ခရီးစဉ်အတွက် “နောင်တရမိခြင်း မရှိကြောင်းနှင့် လုံးဝထိုက်တန်ကြောင်း” အမေရိကန် အောက်လွှတ်တော်ဥက္ကဋ္ဌ နန်စီပလိုစီက Today Show မီဒီယာနှင့် တွေ့ဆုံမေးမြန်းခန်းတွင် ပြောကြားခဲ့သည်။

အသက် ၈၂ နှစ် ရှိပြီဖြစ်သည့် နိုင်ငံရေးသမား နန်စီပလိုစီက ၎င်း၏ခရီးစဉ်အတွက် ထိုင်ဝမ်အစိုးရနှင့် ပြည်သူ များက နှစ်ထောင်းအားရစွာ ကြိုဆိုမှု ခံယူရရှိခဲ့ကြောင်း ဆက်လက် ပြောကြားခဲ့သည်။

သို့သော် ၎င်း၏ခရီးစဉ်သည် တရုတ်ရပ်တည်ချက်နှင့် မသက်ဆိုင်ကြောင်း၊ တရုတ်သည် ထိုင်ဝမ်ကို သီးခြား ခွဲထွက်ခြင်းမပြုရန် (သို့မဟုတ်) ကျွန်းပေါ်သို့ မည်သူမည်ဝါသာ လာရောက်လည်ပတ်ရန် စသည်ဖြင့် အမိန့် ပေးနိုင်ခြင်းမရှိကြောင်း နန်စီပလိုစီက အခိုင်အမာပြောကြားခဲ့သည်။

“တရုတ်က သူလုပ်နေကျအရာကိုပဲ လုပ်တာလေ” ဟု ခရီးစဉ်နှင့်ပတ်သက်၍ ဘေဂျင်း၏တုံ့ပြန်မှုကို ပလိုစီက မှတ်ချက်ချခဲ့သည်။ သမ္မတရှီကျင့်ဖျင်သည် ၎င်း၏စိတ်မလုံခြုံမှုအတွက် ဗိုလ်ကျသကဲ့သို့ ပြုမူနေခြင်းဖြစ်ကြောင်း သူမက ထပ်လောင်းပြောကြားခဲ့သည်။

ခရီးစဉ်တလျှောက် အနှောင့်အယှက် တစုံတရာမတွေ့ခဲ့ရကြောင်း၊ ခရီးစဉ်သည် လက်ရှိ အမေရိကန်မူဝါဒနှင့် ကိုက်ညီကြောင်း ပလိုစီက ဖြည့်စွက်ပြောကြားခဲ့သည်။

အမေရိကန် အောက်လွှတ်တော်ဥက္ကဋ္ဌ နန်စီပလိုစီ ထိုင်ဝမ်သို့ ရောက်ရှိစဉ် ထိုင်ဝမ်သမ္မတ ဆိုင်အင်ဝမ်နှင့် တွေ့ဆုံစဉ်(ဓါတ်ပုံ-AFP)

‘တရုတ်တစ်ပြည်ထောင်တည်း’ မူဝါဒကို ဆုတ်ကိုင်ထားသည်ဟု ဆိုသည့် ဝါရှင်တန်သည် တိုင်ပေဆက်ဆံရေး အက်ဥပဒေအောက်တွင် တိုင်ပေကို ဆက်လက်ထောက်ခံသွားမည်ဖြစ်ကြောင်း တရုတ်သိရှိရန် အရေးကြီး ကြောင်း ပလိုစီက Today Show မီဒီယာသို့ ရှင်းပြခဲ့သည်။

ပထဝီဝင်နိုင်ငံရေးနှင့် ရာသီဥတုဆိုင်ရာများကို ကိုင်တွယ်ဖြေရှင်းရန် အိမ်ဖြူတော်၏ လက်ရှိကြိုးပမ်းနေမှုအား သူမ၏ခရီးစဉ်က ထိခိုက်စေခြင်း ရှိ/မရှိ ဆက်လက်မေးမြန်းရာ ပလိုစီက “ကျမရဲ့ခရီးစဉ်က ကျမတို့နိုင်ငံအတွက် အင်မတန်အရေးပါတယ်။

တရုတ် အရေးယူခံရမှာစိုးလို့ ဒီလိုသွားရောက်ဖို့ အစီအစဉ်ကို အမေရိကန်က မစွန့် လွှတ်ဘူးဆိုတာ ထိုင်ဝမ်ကို အသိပေးဖို့ အရေးကြီးပါတယ်” ဟု ဖြေကြားခဲ့သည်။

၁၉၉၇ ခုနှစ်နောက်ပိုင်း ထိုင်ဝမ်သို့ ပထမဆုံးသွားရောက်ခဲ့သည့် အမေရိကန်အဆင့်မြင့် ကိုယ်စားလှယ်တစ်ဦး ဖြစ်သော နန်စီပလိုစီ၏ ခရီးစဉ်ကြောင့် ထိုင်ဝမ်ကျွန်းတဝိုက်ရှိ ရေပြင်ပိုင်နက်နယ်မြေ ၆ ခုတွင် ဘေဂျင်းက ရှားရှားပါးပါး စစ်ရေးလေ့ကျင့်မှုနှင့် တိုက်ရိုက်ပစ်ခတ်ခြင်းသင်ခန်းစာများကို အကောင်အထည်ဖော်၍ ပြင်းထန်စွာ တုံ့ပြန်ခဲ့သည်။

ထို့ပြင် ဘေဂျင်းသည် နန်စီပလိုစီနှင့် မိသားစုကို ပိတ်ဆို့အရေးယူမှုချမှတ်ခဲ့ပြီး တိုင်ပေသို့လည်း ကုန်သွယ်ရေး ဆိုင်ရာ ကန့်သတ်ချက်များ ထုတ်ပြန်ခဲ့သည်။ စစ်ဘက်၊ အရပ်ဘက်ကိစ္စရပ်များအတွက် အမေရိကန်နှင့် ဆက်ဆံ ရေးအချို့ကို ဘေဂျင်းက ဖြတ်တောက်ခဲ့သည်။

Source: အာရ်တီသတင်းဌာန

CNI International News

ဝါရှင်တန်၊ ဩဂုတ် ၉

အမေရိကန် စုံစမ်းစစ်ဆေးရေးအဖွဲ့(FBI) သည် ဖလော်ရီဒါ ပြည်နယ်ရှိ သမ္မတဟောင်း ဒေါ်နယ်ထရမ့်၏ မာရာလာဂို (Mar-a-Lago) အပန်းဖြေရိပ်သာကို အိမ်ဖြူတော် မှတ်တမ်းနှင့် ဆက်စပ်ခြင်း ရှိ/မရှိ တစိတ်တပိုင်း စုံစမ်းစစ်ဆေးနေကြောင်း အေပီ သတင်းဌာနက ရေးသားဖော်ပြသည်။

ယခုဖြစ်စဉ်သည် သမ္မတဟောင်းအပေါ် တရားဥပဒေ စိုးမိုးရေးဆိုင်ရာ စိစစ်မှု သိသိသာသာနှင့် မကြုံစဖူး တိုးမြှင့်လာခြင်းကို ပြသနေကြောင်း အဆိုပါ ကိစ္စရပ်နှင့် နီးစပ်သူများက ဩဂုတ် ၈ ရက်တွင် ပြောကြားခဲ့ကြသည်။

အဆိုပါ ခြံဝင်းအတွင်းသို့ FBI ဝင်ရောက်စီးနင်း၍ ရှာဖွေခဲ့ခြင်းနှင့် ပတ်သက်၍ ရှည်လျားလှသော ကြေညာချက် တစ်စောင် ထုတ်ပြန်၍ ဒေါ်နယ်ထရမ့်က “၎င်း၏ခြံဝင်းအတွင်း ထားရှိသော မီးခံသေတ္တာများကို FBI အာရုံစိုက်ခဲ့ကြောင်း” ပြောကြားခဲ့ သည်။

ကြိုတင် အသိပေးခြင်းမရှိဘဲ ယခုကဲ့သို့ ဝင်ရောက် စီးနင်းခဲ့ခြင်းသည် တရားဥပဒေနှင့် မညီဘဲ လွဲမှားစွာ ပြုမူခြင်းသာ ဖြစ်ကြောင်း ထရမ့်က တုံ့ပြန်ခဲ့သည်။

ဒေါ်နယ်ထရမ့်ရဲ့ မာရာလာဂိုရိပ်သာကို စီးနင်းခဲ့တဲ့ FBI (Reuters)

မာရာလာဂိုရိပ်သာရှိ သေတ္တာဆယ်ဂဏန်းခန့်တွင် ခွဲခြားသိမ်းဆည်းထားသော စာရွက်စာတမ်းများ မည်သို့ အခြေအနေ ရှိကြောင်း FBI က ယခုနှစ် အစောပိုင်း ကတည်းက လပေါင်းများစွာကြာအောင် စုံစမ်းနေခဲ့ပြီးနောက် ဩဂုတ် ၈ ရက်နေ့ ညမှာ အပူတပြင်း ဝင်ရောက် ရှာဖွေခဲ့ခြင်း ဖြစ်သည်။

၂၀၂၀ ပြည့်နှစ် သမ္မတရွေးကောက်ပွဲ ရလဒ်များကို လွှမ်းမိုးရန်အတွက် ထရမ့်၏ ကြိုးပမ်းခဲ့မှုများကို လုပ်ပိုင်ခွင့်ရှိသည့် ဂျူရီ လူကြီးများဖြင့် ဥပဒေကြောင်းအရ စုံစမ်းစစ်ဆေးနေစဉ် ယခုကဲ့သို့ FBI စီးနင်းရှာဖွေမှု ပေါ်ပေါက်လာခဲ့ခြင်း ဖြစ်သည်။

ထိုလုပ်ဆောင်ချက်များအပေါ် အခြေခံ၍ ထရမ့်အတွက် ဖြစ်နိုင်ခြေရှိသော ဥပဒေပိုင်းဆိုင်ရာ အရေးယူမည့် အရိပ်အယောင် ပြသလာကြောင်း အေပီသတင်းဌာနက ဆက်လက် ရေးသားသည်။

ထရမ့်နှင့် ၎င်း၏မဟာမိတ်များသည် ရာဇဝတ်မှုကြောင်းအရ တရားစီရင်ရေးစနစ်ကို လက်နက်သဖွယ် ဖန်တီးခဲ့ပြီး ၂၀၂၄ ခုနှစ်တွင် ဒီမိုကရက်တစ်ပါတီမှ ထပ်မံ၍ သမ္မတရာထူး သက်တမ်း မရအောင် ကြိုးပမ်းအားထုတ်ခဲ့ကြသော်လည်း ၎င်းတို့ ကြိုးပမ်းမှုကို အိမ်ဖြူတော်က ကြိုတင်မသိရှိကြောင်း ပြောကြားခဲ့သည်။

လက်ရှိ FBI ညွှန်ကြားရေးမှူး ခရစ္စတိုဗာဝေး (Christopher Wray) ကို လွန်ခဲ့သည့် ၅ နှစ်၌ ထရမ့် သမ္မတဖြစ်နေစဉ် ခန့်အပ်ခဲ့ ခြင်းဖြစ်ပြီး ၎င်းသည် ရီပတ်ဘလစ်ကန် ပါတီဝင်များ ဦးဆောင်သည့် တရားရေးဌာန၌ အဆင့်မြင့် ရာထူးတာဝန်များကိုလည်း ထမ်းဆောင်ခဲ့ဖူးသည်။

ဒေါ်နယ်ထရမ့်ရဲ့ မာရာလာဂိုရိပ်သာ (AFP)

“ဖလော်ရီဒါပြည်နယ်၊ ထန်းရိပ်ကမ်းခြေက ကျနော့်ရဲ့ လှပတဲ့အိမ်ဖြစ်တဲ့ မာရာလာဂိုရိပ်သာကို FBI အေးဂျင့်အဖွဲ့က ဝင်စီးပြီး တော့ အသိမ်းပိုက် ခံခဲ့ရတဲ့အတွက် အခုအချိန်ဟာ ကျနော်တို့နိုင်ငံအတွက် အမှောင်ကျသွားခဲ့ပါတယ်” ဟု ထရမ့်က ၎င်း၏ ကြေညာချက်ထဲတွင် ပြောကြားထားသည်။

“အရင်တုန်းက အမေရိကန်သမ္မတ တစ်ယောက်မှ ဒီလိုမျိုး မကြုံဖူးဘူး။ သက်ဆိုင်ရာအစိုးရ အေဂျင်စီတွေနဲ့ ပူးပေါင်းပြီး အခုလိုမျိုး ကျနော့်အိမ် မပြောမဆိုနဲ့ ဝင်ရောက်စီးနင်းတာဟာ လုပ်စရာမလိုသလို လုပ်ဖို့လည်း မသင့်တော်ပါဘူး” ဟု ၎င်းက ဆက်လက် ပြောကြားခဲ့သည်။

ယခုဖြစ်စဉ်အပေါ် ရှေနေ့ချုပ် မားရစ်ဂါလန်း (Merrick) ကို ကိုယ်တိုင်ကိုယ်ကျ ခွင့်ပြုထားခြင်း ရှိ/မရှိနှင့် စီးနင်းရှာဖွေခြင်း အပေါ် သဘောထား မှတ်ချက်ပေးရန် အေပီ သတင်းဌာန၏ တောင်းခံမှုအား အမေရိကန်တရားရေးဌာန ပြောရေးဆိုခွင့်ရှိသူ ဒီနာအီဗာဆင် (Dena Iverson) က ငြင်းဆန်ခဲ့သည်။

Source: AP

CNI International News

မော်စကို၊ ဩဂုတ် ၉

သမ္မတ ဗလာဒီမာ ပူတင်သည် လာမည့် စက်တင်ဘာလတွင် ကျင်းပမည့် ကုလသမဂ္ဂ(UN) အထွေထွေညီလာခံသို့ တက် ရောက်မည် မဟုတ်ကြောင်းနှင့် ဗွီဒီယိုလင့်ခ်မှ တစ်ဆင့် မိန့်ခွန်းပြောရန်လည်း အစီအစဉ်မရှိကြောင်း ကရင်မလင် သမ္မတ နန်းတော်မှ ပြောရေးဆိုခွင့်ရှိသူ ဒီမီထရီပက်စကော့က တာ့စ်သတင်းဌာနသို့ ပြောကြားခဲ့သည်။

“ခရီးစဉ်နဲ့ မိန့်ခွန်းပြောဖို့ စီစဉ်ထားတာ မရှိပါဘူး” ဟု မီဒီယာများ ပေးပို့ကြသည့် သက်ဆိုင်ရာ မေးခွန်းများအလိုက် ဖြေဆိုရာ ၌ ၎င်းက တုံ့ပြန် ဖြေကြားခဲ့သည်။

ရုရှားတိုက်ခိုက်မှုကို ခံထားရတဲ့ ယူကရိန်း(GETTY IMAGES)

UN အထွေထွေညီလာခံ၌ ကမ္ဘာ့ထိပ်တန်း ခေါင်းဆောင်များ တက်ရောက်ကြမည့် အဆင့်မြင့် အစည်းအဝေးများကို လာမည့် စက်တင်ဘာ ၂၀ ရက်မှ ၂၆ ရက်အထိ အမေရိကန်နိုင်ငံ၊ နယူးယောက်မြို့တွင် ကျင်းပသွားမည်ဖြစ်သည်။

UN ရုံးချုပ်တွင် နှစ်စဉ် ကျင်းပနေကျဖြစ်သည့် အထွေထွေညီလာခံဖွင့်ပွဲ အခမ်းအနားသို့ အဖွဲ့ဝင် နိုင်ငံအသီးသီးမှ သမ္မတများ၊ ဝန်ကြီးချုပ်များနှင့် ဝန်ကြီးများ တက်ရောက်လေ့ရှိသည့် အစဉ်အလာရှိသည်။

ယခုနှစ်အတွက် ရုရှားနိုင်ငံ ကိုယ်စားလှယ်အဖွဲ့ကို နိုင်ငံခြားရေးဝန်ကြီး ဆာဂျေလာဗရော့ဗ် ဦးဆောင်၍ တက်ရောက်မည်ဟု တာ့စ်သတင်းဌာနက ရေးသားဖော်ပြထားသည်။

Source: တာ့စ်သတင်းဌာန

CNI International News

ဖနွမ်ပင်၊ ဩဂုတ် ၈

မြန်မာ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည် လာမည့် နိုဝင်ဘာလတွင် ကျင်းပမည့် အာဆီယံထိပ်သီး အစည်းအဝေးနှင့် ဆက်စပ်ထိပ်သီး အစည်းအဝေးများသို့ တက်ရောက်ခွင့် ထပ်မံ ပိတ်ပင်ခံရနိုင်ကြောင်း ကမ္ဘောဒီးယားနိုင်ငံအခြေစိုက် ခမာတိုင်းမ် သတင်းဝက်ဘ်ဆိုက်တွင် ဩဂုတ် ၈ ရက် (ယနေ့) ရက်စွဲဖြင့် ရေးသား ဖော်ပြထား သည်။

မြန်မာနိုင်ငံဆိုင်ရာ အာဆီယံအထူးသံတမန် ပရတ်ဆိုခွန်က အကျပ်အတည်း ဖြစ်ပွားနေသော မြန်မာပြည်တွင်း၌ တက်ကြွ လှုပ်ရှားများကို မကြာသေးမီက ကွပ်မျက်ခဲ့ခြင်းအပေါ် အဓိကဆုတ်ယုတ်မှုအဖြစ် ထုတ်ဖော်ပြောကြားခဲ့သည်။

၂၀၂၁ ခုနှစ်၊ ဖေဖော်ဝါရီ ၁ ရက်၌ ဒေါ်အောင်ဆန်းစုကြည်၏ အမျိုးသားဒီမိုကရေစီအဖွဲ့ချုပ် (NLD) အစိုးရကို ဖြုတ်ချပြီး မြန်မာနိုင်ငံတွင် အာဏာရယူခဲ့သည့် ဗိုလ်ချုပ်မှူးကြီး မင်းအောင်လှိုင်ကို ဘရူနိုင်းနိုင်ငံတွင် ကျင်းပသည့် နှစ်ပတ်လည် ထိပ်သီး အစည်းအဝေးမှလည်း ဖယ်ထုတ်ခဲ့ပြီး ဖြစ်သည်။

ထိုသို့ လုပ်ဆောင်ချက်များမှာ အသင်းဝင် နိုင်ငံအချင်းချင်း ပြည်တွင်းရေး မစွက်ဖက်ခြင်းကြောင့် ဒေသတွင်း ထင်ရှားသည့် အာဆီယံ၏ ရဲရင့်သော ခြေလှမ်းအဖြစ် လေ့လာသုံးသပ်သူများက ရှုမြင်ကြသည်။

၅၅ ကြိမ်မြောက် အာဆီယံနိုင်ငံခြားရေးဝန်ကြီးများ အစည်းအဝေး(MOFAICC)

ယခုနှစ် အသင်း၏ အလှည့်ကျဥက္ကဋ္ဌအဖြစ် ကမ္ဘောဒီးယား ဆောင်ရွက်နေချိန်၌ အာဆီယံ အစည်းအဝေးများသို့ နစကမှ စေလွှတ်မည့် ဦးဝဏ္ဏမောင်လွင်ကိုလည်း တစ်နှစ်အတွင်း နှစ်ကြိမ်တိုင်တိုင် တက်ရောက်ခွင့် ပိတ်ပင်ခဲ့သည်။

ပထမတစ်ကြိမ် အစည်းအဝေးမှာ အာဆီယံနိုင်ငံခြားရေးဝန်ကြီးများ ပြန်လည် သုံးသပ်သည့် အစည်းအဝေး (AMM Retreat) ဖြစ်သည်။ နောက်တစ်ကြိမ်မှာ ၅၅ ကြိမ်မြောက် အာဆီယံနိုင်ငံခြားရေးဝန်ကြီးများ အစည်အဝေးနှင့် ဆက်စပ် အစည်းအဝေး များဖြစ်ပြီး ယခင်သီတင်းပတ်၌ ကမ္ဘောဒီးယားနိုင်ငံ၊ ဖနွမ်ပင်မြို့တွင် ကျင်းပပြီးစီးခဲ့သည်။

၅၅ ကြိမ်မြောက် အစည်းအဝေးအပြီး ကမ္ဘောဒီးယား နိုင်ငံခြားရေးဝန်ကြီးဌာနရုံးတွင် ဩဂုတ် ၆ ရက်၌ ကျင်းပသည့် သတင်း စာ ရှင်းလင်းပွဲ၌ ကမ္ဘောဒီးယား နိုင်ငံခြားရေးဝန်ကြီးလည်းဖြစ်၊ မြန်မာဆိုင်ရာ အာဆီယံအထူးသံတမန်လည်းဖြစ်သည့် ပရတ်ဆိုခွန်က “ယမန်နှစ်က အာဆီယံ ဘုံသဘောတူညီမှု အချက် ၅ ချက်မှာ အနည်းငယ်သာ တိုးတက်မှုရှိသဖြင့် မြန်မာ နိုင်ငံမှ နိုင်ငံရေးမဟုတ်သော ကိုယ်စားလှယ်သာ တက်ရောက်စေရန် မိမိတို့ အသင်းမှ ခေါင်းဆောင်က သဘောတူခဲ့ကြ ကြောင်း” ပြောကြားခဲ့သည်။

သို့သော် နိုင်ငံရေးမဟုတ်သော ကိုယ်စားလှယ်ကိုပင် ယခုအစည်းအဝေးသို့ စေလွှတ်ခြင်းမရှိခဲ့သော နိုင်ငံတော်စီမံအုပ်ချုပ် ရေးကောင်စီ (SAC) က အထက်ပါ ပြောကြားချက်များကို ပယ်ချခဲ့သည်။

 အာဆီယံအထူးကိုယ်စားလှယ် ပရတ်ဆိုခွန်(MOFAICC)

“မြန်မာနိုင်ငံက တန်းတူရည်တူ ကိုယ်စားလှယ်ကို လက်ခံဖို့က ကျနော်တို့ အာဆီယံ ၉ နိုင်ငံအနေနဲ့ တိုးတက်မှု မလုံလောက် သေးဘူးလို့ မြင်နေသရွေ့ ဒီပုံစံအတိုင်းပဲ ဆက်သွားမှာပါ” ဟု ပရတ်ဆိုခွန်က ပြောကြားခဲ့သည်။

“ဗိုလ်ချုပ်မှူးကြီး မင်းအောင်လှိုင်ရဲ့ သဘောတူညီချက်ကို လက်တွေ့ ကောက်ယူနိုင်မယ်ဆိုရင် လာမယ့် နိုဝင်ဘာ ထိပ်သီး အစည်းအဝေးမှာ တွေ့ရမှာ ဖြစ်ပါတယ်။ အဲဒီ ထိပ်သီးအစည်းအဝေးကို မြန်မာဘက်ကနေ တန်းတူရည်တူ ကိုယ်စားပြု ပြန်လည် တက်ရောက်နိုင်ဖို့ အပြုသဘောဆောင်တဲ့ အကဲဖြတ်ချက်တွေ ထွက်လာစေမယ့် ထင်သာမြင်သာ တိုးတက်မှုတွေ ရှိဖို့ လိုအပ်ပါတယ်” ဟု ၎င်းက ဆက်လက် ပြောကြားခဲ့သည်။

ဘုံသဘောတူညီမှု အချက် ၅ ချက် မတိုးတက်သေးဘူးဆိုတာ အဖွဲ့ဝင်တိုင်း သတိပြုမိပြီး ဒီမိုကရေစီအရေး လှုပ်ရှားသူတွေကို စစ်တပ်က ဆက်လက်ဖိနှိပ်နေလျှင် မြန်မာ့ငြိမ်းချမ်းရေး အစီအစဉ်ကို အာဆီယံက ပြန်လည်စဉ်းစားရမည်ဖြစ်ကြောင်း ၅၅ ကြိမ်မြောက် အာဆီယံနိုင်ငံခြားရေးဝန်ကြီးများ အစည်းအဝေး ဖွင့်ပွဲအခမ်းအနားတွင် အာဆီယံဥက္ကဋ္ဌ တာဝန်ယူထားသူ ဝန်ကြီးချုပ် ဟွန်ဆန်က ပြောကြားခဲ့သည်။

“အကျဉ်းသားတွေ ထပ်ပြီး ကွပ်မျက်ခံရတယ်ဆိုရင် အာဆီယံရဲ့ အချက် ၅ ချက်သဘောတူညီမှုနဲ့ ကျနော်တို့ရဲ့ အခန်းကဏ္ဍ ကို ပြန်စဉ်းစားရတော့မှာ ဖြစ်ပါတယ်” ယခင်သီတင်းပတ်၌ ကမ္ဘောဒီးယားဝန်ကြီးချုပ် ဟွန်ဆန်က ပြောကြားခဲ့သည်။

မြန်မာ့အရေးကိစ္စအတွက် မိမိ အရှုံးမပေးလိုကြောင်း၊ မြန်မာပြည်တွင်း မည့်သည့် အစိတ်အပိုင်းကမျှ ၎င်းတို့တိုက်ပွဲကို စွန့်လွှတ်ရန် ဆန္ဒမရှိကြကြောင်း၊ လာမည့် စက်တင်ဘာတွင် မြန်မာနိုင်ငံသို့ မိမိ ထပ်မံသွားရောက်ရန် စဉ်းစားထားကြောင်း ပရတ်ဆိုခွန်က ပြောကြားခဲ့သည်။

Source: Khmer Times skh

CNI International News

ဆိုးလ်၊ ဩဂုတ် ၈

သမ္မတ ယွန်ဆော့ရွဲ(Yoon Suk-yeol)ကို လူထုမလိုလား၍ ကန့်ကွက်မှုအဆင့်သတ်မှတ်ချက်သည် 70 ရာခိုင်နှုန်းအထိ စံချိန်တင် အမြင့် ဆုံးသို့ ရောက်ရှိသွားကြောင်း ဩဂုတ် ၈ ရက် (ယနေ့) တွင် စစ်တမ်းတစ်စောင်တွင် ဖော်ပြထားကြောင်း ကိုရီးယားတိုင်းမ် မီဒီယာက ရေးသားဖော်ပြသည်။

အာဏာရပါတီအတွင်း ငွေကြေးဖောင်းပွမှုနှင့် မငြိမ်မသက်မှုများ မြင့်မားလာမှုအပေါ် ဆက်လက် စိုးရိမ်ပူပန်မှုများနှင့် အဆိုပြုထားသည့် ပညာရေးမူဝါဒတို့ကြောင့် ယခုကဲ့သို့ ကန့်ကွက် ဆန့်ကျင်မှု ရာခိုင်နှုန်း တိုးလာခြင်းဖြစ်ကြောင်း အဆိုပါ စစ်တမ်းက ဆက်လက် ဖော်ပြခဲ့သည်။

ဩဂုတ်လ ၅ ရက်နှင့် ၆ ရက်တို့တွင် ကိုရီးယားလူ့အဖွဲ့အစည်း သဘောထားဆိုင်ရာသိပ္ပံကျောင်း (Korea Society Opinion Institute-KSOI) က ကောက်ယူခဲ့သော ပြည်သူ ၁,၀၀ ၂ ဦး၏ စစ်တမ်းတွင် ၇၀ ဒသမ ၁ ရာခိုင်နှုန်းသည် သမ္မတ၏ စွမ်းဆောင်ရည်အပေါ် အဆိုးမြင် အကဲဖြတ်မှုများ ပြသဖြေဆိုခဲ့ကြရာ ယခင်အပတ်ကထက် အဆိုးမြင်မှု ၁ ဒသမ ၆ ရာခိုင်နှုန်း တက်လာခဲ့သည်။

သီးခြား စစ်တမ်းကောက်ယူသည့် နောက်ထပ် တစ်ဖွဲ့ဖြစ်သော Realmeter ကလည်း ဩဂုတ် ၁ ရက်မှ ၅ ရက်အထိ Realmeter အမည်ရှိ စစ်တမ်း ကောက်ခံရေးအဖွဲ့တစ်ဖွဲ့က ကိုရီးယားပြည်သူ ၂,၅၂၈ ဦးကို ဆန္ဒသဘောထား စစ်တမ်း ကောက်ခံခဲ့ရာ ယွန်ဆော့ရွဲအပေါ် ထောက်ခံမှုနှုန်း ယခင်သီတင်းပတ်ထက် ၃ ဒသမ ၈ ရာခိုင်နှုန်း ထပ်မံ ကျဆင်းလာ ခဲ့ကြောင်း ဖော်ပြထားသည်။

သို့သော် ၎င်း(သမ္မတ ယွန်ဆော့ရွဲ)သည် တိုင်းပြည်အုပ်ချုပ်ရေး တာဝန်ဝတ္တရားများကို ကောင်းစွာ ထမ်းဆောင်နေဆဲ ဖြစ်ကြောင်း သိရသည်။

တောင်ကိုရီးယားပြည်သူများ (AFP)

သမ္မတအပေါ် အဆိုးမြင် အကဲဖြတ်သူနှုန်းမှာ ယခင်က ၃ ဒသမ ၃ ရာခိုင်နှုန်းသာ ရှိခဲ့ရာ ၆၄ ဒသမ ၅ ရာခိုင်နှုန်းသို့ တရှိန်ထိုး မြင့်တက်သွားခဲ့ပြီး ထိုနှုန်းမှာ အကောင်းမြင် အကဲဖြတ်သူရာခိုင်နှုန်း၏ နှစ်ဆကျော် ဖြစ်သွားခဲ့သည်။

စစ်တမ်းသို့ ဆန္ဒသဘောထား မဲပေးကြသူများမှာ အပတ်စဉ် အကြောင်းအမျိုးမျိုးကြောင့် ထောက်ခံမှုနှုန်း ကျဆင်းနေခဲ့ရာ ကလေးများ ကျောင်းဝင်ခွင့် အသက်အရွယ် လျှော့ချရန် တောင်ကိုရီးယား ပညာရေးဝန်ကြီး ပက်ဆောင်အေ၏ အဆိုပြုချက် အပါအဝင် အာဏာရပါတီအတွက် ဦးဆောင်မှု နှုန်းစံနှင့် စီးပွားရေး မပြေလည်မှုများ ဆက်တိုက် ရှိနေခဲ့၍ ဖြစ်သည်။

“ကျောင်းဝင်ခွင့် အရွယ်ကိစ္စမှာ အိမ်ရှင်မတွေရဲ့ နှစ်သက်ဖွယ်အဆင့် သတ်မှတ်ချက်ဟာ အရင်က ၄၀ ရာခိုင်နှုန်းအထက်မှာ ရှိနေခဲ့တာကနေ အခုတော့ အဲဒီအဆင့်က သိသိသာသာ ကျဆင်းသွားပါတယ်” ဟု Realmeter ၏ အကြီးတန်းသုတေသီ ဘေချွဲဟို (Bae Cheol-ho) က ပြောကြားခဲ့သည်။

“အာဏာရပါတီနဲ့ အတိုက်အခံ ပါတီတွေအတွက် အရေးပေါ်စနစ် အဆင့်သို့ ရောက်လာချိန်မှာတော့ မကြာမီက စီးပွားရေး အကျပ်အတည်းနဲ့ Covid-19 ကြောင့် ထိခိုက်မှုတွေဟာ အတိုက်အခံပါတီထက် ယောင်ဆန်းနဲ့ အာဏာရပါတီအပေါ်မှာ ဖိအား ပိုများပါလိမ့်မယ်” ဟု ဘေချွဲဟိုက သမ္မတရုံးတည်နေရာ ယောင်ဆန်းရပ်ကွက်ကို ရည်ညွှန်း၍ ပြောကြားခဲ့သည်။

တောင်ကိုရီးယားနိုင်ငံ၏ အဓိက အတိုက်အခံဖြစ်သော ဒီမိုကရက်တစ်ပါတီကို ထောက်ခံသည့် အဆင့် သတ်မှတ်ချက်များမှာ ယခင် ၂ ဒသမ ၅ ရာခိုင်နှုန်းသာ ရှိရာမှ ယခု ၄၈ ဒသမ ၅ ရာခိုင်နှုန်းသို့ တက်လာခဲ့သည်။ ထိုတက်လာသည့် နှုန်းသည် ရက်သတ္တပတ် ၁၀ ပတ် ဆက်တိုက် တက်လာခဲ့ခြင်း ဖြစ်သည်။

အဆိုပါ စစ်တမ်းတွင် ယုံကြည်ရသည့် အဆင့် သတ်မှတ်ချက်မှာ ၉၅ ရာခိုင်နှုန်းဖြစ်ပြီး လွဲချော်မှု အပေါင်း (သို့မဟုတ်) အနုတ် ရာခိုင်နှုန်းမှာ ၁ ဒသမ ၉ ဖြစ်ကြောင်း သိရသည်။

Source: Korea Times

CNI International News

ဒါကာ၊ ဩဂုတ် ၈

တရုတ်နိုင်ငံခြားရေးဝန်ကြီး ဝမ်ယိ၏ ခရီးစဉ်အတွင်း မြန်မာဘက်သို့ ဒုက္ခသည်များ နေရပ်ပြန်ပို့ရေးအတွက် တရုတ်၏ ပူးပေါင်း ဆောင်ရွက်မှုရရှိရန် ဘင်္ဂလားဒေ့ရှ်အစိုးရက ကြိုးစားခဲ့ကြောင်း အေပီသတင်းအရ သိရသည်။

တောင်အာရှဒေသရှိ ၎င်းနိုင်ငံအတွင်း အခြေခံ အဆောက်အဦ ဖွံ့ဖြိုးတိုးတက်ရေးအတွက် ကုန်သွယ်ရေး၊ ရင်းနှီးမြှုပ်နှံမှုနှင့် အခြား ပံ့ပိုးမှုတို့ကို ဝမ်ယိက ကတိပြုခဲ့ကြောင်း အေပီက ဆက်လက် ရေးသားခဲ့သည်။

၂၀၁၇ ခုနှစ်၊ ဩဂုတ်လတွင် မြန်မာဘက်မှ ထွက်ပြေးလာသည့် မွတ်ဆလင်ဒုက္ခသည် ၇ သိန်းခန့်ကို နေရပ်ပြန်ပို့ရေးအတွက် ထိုနှစ် နိုဝင်ဘာလ သဘောတူညီချက် ပေါ်ထွက်လာအောင် တရုတ်က မြန်မာနိုင်ငံအတွက် ၎င်း၏ဩဇာကို အသုံးချခဲ့သည်။

ဝမ်ယိသည် ဩဂုတ် ၆ ရက်တွင် ဘင်္ဂလားဒေ့ရှ်နိုင်ငံ၊ ဒါကာမြို့တော်သို့ ရောက်ရှိခဲ့ပြီး ဩဂုတ် ၇ ရက်တွင် ပြန်လည်ထွက်ခွာခဲ့ သည်။

မွတ်ဆလင် ဒုက္ခသည်များကိုတွေ့ရစဉ် (GETTY IMAGES)

အဆိုပါ ခရီးစဉ်အတွင်း ဝမ်ယိသည် ဝန်ကြီးချုပ် ရှိတ်ဟာစီနာ (Sheikh Hasina) နှင့် နိုင်ငံခြားရေးဝန်ကြီး အေကေအဗ္ဗဒူမိုမန် (A.K. Abdul Momen) တို့နှင့် တွေ့ဆုံခဲ့ရာ နှစ်နိုင်ငံဆက်ဆံရေးနှင့် ကမ္ဘာလုံးဆိုင်ရာ ပြဿနာများကို ဆွေးနွေးခဲ့ကြကြောင်း ဘင်္ဂလားဒေ့ရှ် နိုင်ငံခြားရေး အငယ်တန်းအတွင်းဝန် ရှာရီရာအလမ် (Shahriar Alam) ပြောကြားခဲ့သည်။

ဘင်္ဂလားဒေ့ရှ်သည် ကုန်ကြမ်း အများစု ရရှိရေးအတွက် အဓိကကုန်သွယ်ဖက်ဖြစ်သည့် တရုတ်နိုင်ငံနှင့် ခိုင်မာသော ဆက်ဆံ ရေး ထူထောင်ထားသည်။

သို့သော် ဘေဂျင်းအစိုးရနှင့် နီးကပ်သော ဆက်ဆံရေး ထားရှိခြင်းသည် ဘင်္ဂလားဒေ့ရှ်အတွက် စိန်ခေါ်မှုတစ်ရပ် ဖြစ်နေပြီး တရုတ်၏ အဓိကပြိုင်ဘက်ဖြစ်သော အိန္ဒိယ၊ အမေရိကန်တို့နှင့် သံတမန်ရေးရာ၊ ကုန်သွယ်မှုဆက်ဆံရေး စသည်တို့ကိုလည်း ဟန်ချက်ညီအောင် ကြိုးစားနေရသည်။

ဘင်္ဂလားဒေ့ရှ်သို့ တရုတ်ကုမ္ပဏီပေါင်း ၅၀၀ ကျော် လာရောက်လုပ်ကိုင်နေကြပြီး ဆိပ်ကမ်းများ၊ မြစ်အောက် ဥမင်လိုဏ် ခေါင်းနှင့် အဝေးပြေးလမ်းများကဲ့သို့ အဓိက အခြေခံ အဆောက်အအုံ စီမံကိန်းများကို အကောင်အထည် ဖော်နေသည်။

 တရုတ်နိုင်ငံခြားရေးဝန်ကြီး ဝမ်ယိနဲ့ ဘင်္ဂလားဒေ့ရှ် ဝန်ကြီးချုပ် ရှိတ်ဟာစီနာ (GETTY IMAGES)

ဒေါ်လာ ၃ ဒသမ ၆ ဘီလီယံ အကုန်အကျခံ၍ ပါဒါမာ (Padma) မြစ်ကို ဖြတ်ကူးသည့် ဘင်္ဂလားဒေ့ရှ်ပြည်တွင်း၌ အကြီးဆုံး တံတားကို တည်ဆောက်ခဲ့သည်။

တရုတ်နှင့်ထိုင်ဝမ်တို့အကြား မကြားသေးမီက တင်းမာမှုဖြစ်ပွားခဲ့ရာ ဘင်္ဂလားဒေ့ရှ်က “တရုတ်တစ်ပြည်ထောင်တည်း မူဝါဒ” ကို ထောက်ခံကြောင်း ထပ်လောင်း ပြောဆိုခဲ့သည်။

၂၀၀၈ ရွေးကောက်ပွဲတွင် အနိုင်ရခဲ့သော ဟာစီနာ၏ အစိုးရအဖွဲ့သည် တရုတ်၏ တောင်းဆိုချက်အရ ဒါကာမြို့ရှိ ထိုင်ဝမ် စီးပွားရေး ကိုယ်စားလှယ်ရုံး ပိတ်ပေးခဲ့ရာ ထိုအချိန်မှစ၍ တရုတ်က ဘင်္ဂလားဒေ့ရှ်တွင် ၎င်း၏ ထိတွေ့ဆက်ဆံရေးကို တိုးမြှင့်ခဲ့သည်။

Source: AP

CNI International News

ဘိုဂိုတာ၊ ဩဂုတ် ၈

ကိုလံဘီယာနိုင်ငံ၏ ပထမဆုံး လက်ဝဲသမ္မတအဖြစ် ဩဂုတ် ၇ ရက်တွင် ဂက်စတိုဗိုပီထရိုက ကျမ်းသစ္စာကျိန်ဆိုခဲ့ကြောင်း အေပီသတင်းဌာနက ရေးသားဖော်ပြသည်။

၎င်း(ပီထရို)သည် ယခင်က ကိုလံဘီယာပြည်တွင်း M-13 ပြောက်ကျား သူပုန်တပ်ဖွဲ့ဝင်ဟောင်း ဖြစ်ကြောင်း၊ ယခုကျမ်းသစ္စာ ကျိန်ဆိုမှုတွင် မညီမျှမှုများကို တိုက်ဖျက်၍ အစိုးရ၊ မူးယစ်မှောင်ခို သမားများနှင့် သူပုန်များအကြား သွေးထွက်သံယို ရန်စမှု များကြောင့် နှစ်များစွာ ကျီးလန့်စာစား ဖြစ်နေရသော နိုင်ငံကို ငြိမ်းချမ်းရေး ဆောင်ကြဉ်းပေးမည်ဟု သမ္မတသစ် ပီထရိုက ကတိပြုခဲ့ကြောင်း အေပီက ဆက်လက် ဖော်ပြထားသည်။

ဈေးကွက်နှင့် လိုက်လျောညီထွေဖြစ်မည့် စီးပွားရေးတစ်ရပ် လုပ်ဆောင်ပေးမည်ဟု အပြောင်းအလဲများဖြင့် ကမ်းလှမ်း မဲဆွယ်ခဲ့သော ကွန်ဆာဗေးတစ် (ရှေးရိုးစွဲ)ပါတီများကို ပီထရိုက အနိုင်နှင့်ပိုင်း၍ ယခင်ဇွန်လတွင် သမ္မတရွေးကောက်ပွဲ၌ အောင်ပွဲခံခဲ့သည်။

ကိုလံဘီယာ ပြည်သူများကိုတွေ့ရစဉ် (AP)

ကိုလံဘီယာနိုင်ငံတွင် အကြမ်းဖက်မှုနှင့် ဆင်းရဲမွဲတေမှုတို့ကို ကိုင်တွယ် ဖြေရှင်းရန်အတွက် ဒုတိယအခွင့်အရေး ရရှိနေပြီ ဖြစ်ကြောင်း သမ္မတရာထူး လက်ခံခဲ့သူ ပီထရိုက ဩဂုတ် ၇ ရက်တွင် ပြောကြားခဲ့သည်။

၎င်း၏အစိုးရသည် နှစ်ရှည်လများ ဆင်းရဲချမ်းသာကွာဟ၍ မညီမျှမှုများကို အဆုံးသတ်စေမည့် စီးပွားရေး မူဝါဒများကို အကောင်အထည် ဖော်သွားရန်နှင့် ပြည်တွင်း ထိရှလွယ်သူ အများစုနှင့်အတူ လက်တွဲ၍ စည်းလုံးညီညွတ်ရေး သေချာစေရန် ကတိပြုခဲ့သည်။

နိုင်ငံတဝန်း လက်နက်ကိုင် တပ်ဖွဲ့များနှင့် ငြိမ်းချမ်းရေးဆွေးနွေးပွဲ စတင်သွားရန် ဆန္ဒရှိကြောင်း၊ ကိုကင်းကဲ့သို့ မူးယစ် ဆေးဝါး တားဆီးတိုက်ဖျက်ရေးအပေါ် အာရုံစိုက်သည့် မူဝါဒ အပြောင်းအလဲ ပြုလုပ်ကြရန် အမေရိကန်နှင့် ဖွံ့ဖြိုးပြီးနိုင်ငံ၊ အခြား လက်တင်အမေရိကနိုင်ငံများကို တောင်းဆိုကြောင်း ပီထရိုက ဆက်လက် ပြောကြားခဲ့သည်။

 M-19 သူပုန်အဖွဲ့ အမှတ်သားကိုတွေ့ရစဉ် (AP)

“မူးယစ်ဆေးဝါးစစ်ပွဲ မအောင်မြင်ကြောင်း လက်ခံတဲ့ နိုင်ငံတကာ ကွန်ဗင်းရှင်း အသစ်တစ်ခု ပေါ်ပေါက်ဖို့ အချိန်တန်ပါပြီ။ ငြိမ်းချမ်းရေးဆိုတာ ဖြစ်နိုင်ခြေရှိတာကို ပြောတာဖြစ်ပါတယ်။ ဒါပေမယ့် ဖွံ့ဖြိုးပြီးနိုင်ငံတွေက လူ့အဖွဲ့အစည်းတွေမှာ မူးယစ် သုံးစွဲမှုကို တားဆီးတဲ့ ထိရောက်မယ့် အစီအမံတွေနဲ့ လက်ရှိ မူးယစ်ဆေးဝါးဆိုင်ရာ မူဝါဒတွေကို အစားထိုး အပြောင်းအလဲ လုပ်နိုင်တဲ့အပေါ် မူတည်ပါတယ်” ဟု ၎င်းက ထပ်လောင်း ပြောကြားခဲ့သည်။

ကပ်ရောဂါ စတင်ဖြစ်ပွားပြီး ကတည်းက နောက်ဆက်တွဲ စီးပွားရေး ထိခိုက်မှု ဂယက်ဒဏ်ကို ခံစားနေရသော ကမ္ဘာ့နိုင်ငံ အသီးသီး၏ အစိုးရများအကြားတွင် ပီထရိုသည် လက်တင်အမေရိကတွင် လက်ဝဲနိုင်ငံရေးသမားများ အာဏာရလာခြင်း၏ ပြယုဂ်လည်း ဖြစ်သည်။

Source: AP

CNI International News

ဖနွမ်ပင်၊ ဩဂုတ် ၆

လက်ရှိ အကျပ်အတည်းကို စူပါမန်းတောင်မှ မဖြေရှင်းနိုင်ကြောင်း၊ နောက်ဆုံး အချိန်အထိ တိုးတက်မှု အနည်းငယ်သာ ရှိခဲ့ ကြောင်း မြန်မာ့ငြိမ်းချမ်းရေးအတွက် ကြားဝင်ဆောင်ရွက်ပေးနေသည့် ဒေသတွင်း သံတမန်တစ်ဦးက သီတင်းတစ်ပတ်ကြာ ကျင်းပနေသည့် အာဆီယံနိုင်ငံခြားဝန်ကြီးများ အစည်းအဝေးတွင် ယနေ့ (ဩဂုတ် ၆ ရက်) ဝန်ခံပြောကြားခဲ့ကြောင်း အေအက်ဖ်ပီ သတင်းအရ သိရသည်။

မြန်မာ့တပ်မတော်က အာဏာရယူပြီးနောက်ပိုင်း မြန်မာနိုင်ငံသို့ နှစ်ကြိမ် လာရောက်ခဲ့သည့် အာဆီယံ အထူးကိုယ်စားလှယ် ပရတ်ဆိုခွန်က ရေတိုကာလအတွင်း တိုးတက်လာစေရေး မျှော်လင့်ချက်များ လျော့ပါးလာခဲ့ကြောင်း ယခု အစည်းအဝေးတွင် ထုတ်ဖော် ပြောကြားခဲ့သည်။

“ကျနော်က အထူးသံတမန်တစ်ဦးပါ၊ စူပါမင်း တစ်ယောက် မဟုတ်ပါဘူး။ စူပါမင်းတောင်မှ မြန်မာ့ပြဿနာကို မဖြေရှင်း နိုင်ဘူးလို့ ကျနော်ထင်ပါတယ်”ဟု ၎င်းက ဖနွမ်ပင်မြို့၌ ဩဂုတ် ၆ ရက်တွင် သတင်းထောက်များအား ပြောကြားခဲ့သည်။

ကျင်းပနေသည့် အာဆီယံအစည်းအဝေး

မြန်မာနိုင်ငံတွင် ပြီးခဲ့သည့်နှစ် ဖေဖော်ဝါရီက စစ်တပ်က အာဏာရယူမှုအပြီး ပြည်တွင်းစစ် ပိုမိုပြင်းထန်လာခဲ့ကြောင်း၊ ၎င်းတို့နှင့် သဘောထား ကွဲလွဲသူများကို လုံခြုံရေးတပ်ဖွဲ့များက ကြမ်းတမ်းစွာ နှိမ်နင်းမှုကြောင့် သေဆုံးသူဦးရေမှာ ၂,၁၀၀ ကျော်သွားပြီဖြစ်ကြောင်း ပြည်တွင်း စောင့်ကြည့်ရေးအဖွဲ့ တစ်ခုထံမှ သိရကြောင်း အေအက်ဖ်ပီ သတင်းကို ကိုးကား၍ New Indian Express ဝက်ဘ်ဆိုက်က ဖော်ပြသည်။

အဖွဲ့ဝင် (၁၀) နိုင်ငံ ပါဝင်သည့် အရှေ့တောင်အာရှနိုင်ငံများအသင်း(အာဆီယံ) မြန်မာ့အရေး မတည်ငြိမ်မှုများကို ဖြေရှင်းရန် ယခုအချိန်အထိ အဖွဲ့ဝင်အသီးသီး ကြိုးပမ်းခဲ့ကြပြီး အချက် ၅ ချက်ပါ အကျပ်အတည်း ဖြေရှင်းရေး အစီအစဉ်နှင့်ပတ်သက် ၍ တိုးတက်မှုမရှိကြောင်း ဩဂုတ် ၅ ရက်တွင် ထုတ်ပြန်သည့် ပူးတွဲကြေညာချက်တွင် အသိအမှတ် ပြုခဲ့ကြသည်။

ပရတ်ဆိုခွန်နှင့် နိုင်ငံရေးပါတီများတွေ့ဆုံစဉ် 

အရပ်သား အစိုးရဖြုတ်ချခံရမှု ဖြစ်ပွားခဲ့သော မြန်မာနိုင်ငံတွင် ငြိမ်းချမ်းရေး တိုးတက်မှု မရှိဟု အာဆီယံက ရှုတ်ချခဲ့သည်။ အထူးသဖြင့် လွန်ခဲ့သည့်လက ထင်ရှားသော ဒီမိုကရေစီ လိုလားသူနှစ်ဦး အပါအဝင် အကျဉ်းသားလေးဦးကို ကွပ်မျက်ခဲ့ခြင်း၊ ငြိမ်းချမ်းရေးအစီအစဉ်ကို မြန်မာစစ်ဗိုလ်ချုပ်များ တံတိုင်းခတ် ထားခြင်းကြောင့် အာဆီယံအတွင်း မကျေနပ်မှုများ ကြီးထွား လာခဲ့သည်။

ယမန်နှစ် ဧပြီလတွင် သဘောတူညီခဲ့သော အာဆီယံ အချက် ၅ ချက်ပါ အစီအစဉ်တွင် စစ်တပ်နှင့် အာဏာသိမ်းမှု ဆန့်ကျင် ရေး လှုပ်ရှားသူများကြား အကြမ်းဖက်မှု ချက်ချင်းရပ်တန့်ပြီး တွေ့ဆုံဆွေးနွေးကြရန် တောင်းဆိုထားသည်။

ကမ္ဘောဒီးယား နိုင်ငံခြားရေးဝန်ကြီးလည်းဖြစ် အာဆီယံအထူးကိုယ်စားလှယ်လည်းဖြစ်သူ ပရတ်ဆိုခွန်က “တွေ့ဆုံမှုတစ်ခု၊ နှစ်ခုနဲ့ နှစ်ပေါင်းများစွာကြာအောင် ဒီပြဿနာတွေကို မဖြေရှင်းနိုင်ပါဘူး” ဟု ပြောကြားခဲ့သည်။

Source: AFP, New Indian Express