CNI International News

ဘန်ကောက်၊ မေလ ၂၄

Palang Pracharath (PPRP)ပါတီ၏ အထွေထွေအတွင်းရေးမှူးချုပ် ဆန်တီ ပရွမ်ပတ် (Santi Prompat)က ဖြူးထိုင်း(Pheu Thai)ပါတီနှင့် ပူးပေါင်းမည်ဆိုသော သတင်းများကို ငြင်းဆိုခဲ့ကာ ဗိုလ်ချုပ်ကြီး ပရာဝပ် ဝေါင်ဆူဝန်သည် ပါတီခေါင်းဆောင်အဖြစ် ဆက်ရှိနေမည်ဟု ပြောကြောင်း ဘန်ကောက်ပို့စ်မှ ဖော်ပြခဲ့သည်။

အိမ်စောင့်အစိုးရ၏ လက်ထောက်ဘဏ္ဍာရေးဝန်ကြီးဖြစ်သူ ဆန်တီက PPRP အနေဖြင့် ဖြူးထိုင်းပါတီနှင့် ပူးပေါင်းကာ ညွန့်ပေါင်းအစိုးရအဖွဲ့သစ်ကို ဖွဲ့စည်းဦးဆောင်မည်ဟု ထိုင်းမီဒီယာများတွင် ဖော်ပြနေသည့် သတင်းများ အပေါ် တုံ့ပြန် ဖြေကြားခဲ့ခြင်းဖြစ်သည်။

PPRP ပါတီ၏ ခေါင်းဆောင်ဖြစ်သူ ဗိုလ်ချုပ်ကြီးပရာဝပ် ကလည်း ၎င်းအနေဖြင့် ပါတီခေါင်းဆောင် ရာထူးမှ ထွက်ခွာရန် သို့မဟုတ် နိုင်ငံရေးလောကမှ အနားယူရန် အစီအစဉ် မရှိဟု ပြောသည်။

မေလ ၁၄ ရက်တွင် ပြုလုပ်ခဲ့သော ထိုင်းအထွေထွေရွေးကောက်ပွဲ၏ တရားဝင် မဟုတ်သေးသော မဲရလဒ်များတွင် ဖြူးထိုင်းပါတီသည် လွှတ်တော်နေရာ ၁၄၁ နေရာကို အနိုင်ရရှိကာ ဒုတိယနေရာ၌ ရှိနေသည်။

ဖြူးထိုင်းပါတီက ပေတုန်တန်ကို တွေ့ရစဉ် 

PPRP သည် နေရာ ၄၀ အနိုင်ရကာ စတုတ္ထနေရာတွင် ရပ်တည်နေသည်။

Move Forward (MFP) ပါတီသည် ၁၅၂ နေရာဖြင့် ဒုတိယနေရာတွင် ရှိနေပြီး Bumjaithai ပါတီက နေရာ ၇၀ ဖြင့် တတိယနေရာတွင် ရှိသည်။

သို့သော် Bumjaithai ပါတီသည် MFP ဦးဆောင်သည့် ညွန့်ပေါင်းအဖွဲ့တွင် ပါဝင်ခြင်း မရှိသေးပေ။

ဖြူးထိုင်းနှင့် PPRP ပူးပေါင်းမည်ဆိုသော ယူဆချက်များမှာ မသမာသူများက လွှင့်လိုက်သော သတင်းမှားများသာ ဖြစ်ပြီး ပါတီတွင် ထိုကဲ့သို့သော အစီအစဉ်မျိုး မရှိဟု ဆန်တီက အင်္ဂါနေ့ အစိုးရအဖွဲ့တွင် ပြောခဲ့သည်။

ယင်းသည် မဖြစ်ကြောင်း၊ ဗိုလ်ချုပ်ကြီးပရာဝပ်သည် ပါတီခေါင်းဆောင် နေရာတွင် ဆက်ရှိကြောင်း၊ ၎င်းကို ပါတီဝင်များမှ ထောက်ခံနေဆဲဖြစ်ကြောင်း ဆန်တီက ပြောခဲ့သည်။

PPRP ပါတီ၏ အထွေထွေအတွင်းရေးမှူးချုပ် ဆန်တီ ပရွမ်ပတ် (Santi Prompat)ကို တွေ့ရစဉ်

MFP အနေဖြင့် အစိုးရသစ် မဖွဲ့စည်းနိုင်လျှင် PPRP အနေဖြင့် ဖြူးထိုင်းနှင့် ပူးပေါင်းနိုင်သလားဟု မေးမြန်းမှုကို တော့ ထိုကိစ္စကို စောင့်ကြည့်ရမည်ဟုသာ ဆန်တီက ပြန်လည် ဖြေကြားခဲ့သည်။

ဖြူးထိုင်းပါတီခေါင်းဆောင် ချိုနန် သီရိကော (Cholnan Srikaew) က ၎င်းတို့အနေဖြင့် PPRP နှင့် ပူးပေါင်းကာ အစိုးရဖွဲ့စည်းနိုင်ချေမရှိဟု မေလ ၂၂ ရက်တွင် ငြင်းဆိုခဲ့သည်။

ဖြူးထိုင်းသည် MFP ပါတီ ဦးဆောင်သော အစိုးရသစ်ဖွဲ့စည်းရန်၊ MFP ခေါင်းဆောင်အား ဝန်ကြီးချုပ်သစ်အဖြစ် တင်မြှောက်ရန် ထောက်ခံသည့် ပါတီများထဲမှ တစ်ခုဖြစ်သည်။

အပတ်စဉ် အစိုးရအဖွဲ့ အစည်းအဝေးပြီးချိန်တွင် PPRP ခေါင်းဆောင် ဗိုလ်ချုပ်ကြီးပရာဝပ်သည် သတင်းသမား များနှင့် တွေ့ဆုံခဲ့သည်။

တွေ့ဆုံစဉ် ၎င်းအနေဖြင့် PPRP ပါတီ ခေါင်းဆောင်နေရာမှ နုတ်ထွက်ရန်၊ နိုင်ငံရေးလောကမှ အနားယူရန် မစဉ်းစားဘူးဟု ပြောခဲ့သည်။

Source: ဘန်ကောက်ပို့စ်

CNI International News

မော်စကို၊ မေလ ၂၃

ယူကရိန်းသို့ F-16 ဂျက်တိုက်လေယာဉ်များပေးခြင်းက ပဋိပက္ခအတွင်း နေတိုးအဖွဲ့၏ ပါဝင်မှုနှင့် ပတ်သက်သည့် မေးခွန်းများကို ဖြစ်စေကြောင်း အမေရိကန်ဆိုင်ရာ ရုရှားသံအမတ် အန်နာတိုလီ အန်တိုနော့ဗ်က (Anatoly Antonov) က ပြောသည်ဟု Al Jazeera သတင်းတွင် ဖော်ပြထားသည်။

ယူကရိန်းတွင် F-16 များကို ကိုင်တွယ်ရန် အခြေခံ အဆောက်အဦများ မရှိသလို၊ လေယာဉ်မှူး အရေအတွက်နှင့် ပြုပြင် ထိန်းသိမ်းရေး ဝန်ထမ်းအင်အားလည်း မရှိကြောင်း အန်တိုနော့ဗ်က ပြောသည်ဟု တနင်္လာနေ့ ရုရှားသံရုံးမှ ထုတ်ပြန်ချက် တစ်ခု၌ ဖော်ပြထားသည်။

နိုင်ငံခြားသားများ ထိန်းချုပ်မှုဖြင့် နေတိုး လေယာဉ်ကွင်းများမှ အမေရိကန် တိုက်လေယာဉ်များ ပျံသန်းလာလျှင် ဘာဆက်ဖြစ်မလဲဟု အန်တိုနော့ဗ်က မေးခွန်းထုတ်ခဲ့သည်။

ခေတ်မီ ဂျက်တိုက်လေယာဉ်များ ထောက်ပံ့ပေးရေးအတွက် ယူကရိန်းသမ္မတ ဇာလန်းစကီး(Zelenskyy)က အ နောက်အုပ်စု မဟာမိတ်များထံ လအတန်ကြာ တောင်းဆိုခဲ့သည်။

ထိုသို့ ထောက်ပံ့မှုက ရုရှားသမ္မတထံမှ ပိုမိုပြင်းထန်သော တုံ့ပြန်မှုများ ရရှိလာနိုင်သည့် စိုးရိမ်မှုများ ရှိနေချိန်တွင် ဖြစ်သည်။

F-16 တိုက်လေယာဉ်ကိုတွေ့ရစဉ်

သို့သော် ဇာလန်းစကီး၏ တက်သုတ်ရိုက် ဆောင်ရွက်မှုများကြောင့် ဂျပန်တွင် ပြုလုပ်ခဲ့သော G-7 ညီလာခံ အဆုံးမသတ်ခင်ကပင် ယူကရိန်းသို့ ဂျက်တိုက်လေယာဉ်များ ထောက်ပံ့ပေးရေး နိုင်ငံတကာ မဟာမိတ်အဖွဲ့တစ်ခု ဖွဲ့စည်းရန် သဘောတူညီမှု ရရှိခဲ့ကြောင်း ဗြိတိန်နှင့် နယ်သာလန် ဝန်ကြီးချုပ်တို့က ပြီးခဲ့သည့် သီတင်းပတ်တွင် ကြေညာခဲ့သည်။

F-16 ဂျက်တိုက်လေယာဉ်များနှင့် ပတ်သက်၍ ယူကရိန်းလေယာဉ်မှူးများအတွက် လေ့ကျင့်ရေး အစီအစဉ်များ လုပ်ဆောင်ပေးသွားမည်ဟု အမေရိကန်သမ္မတ ဘိုင်ဒန် (Biden) က သောကြာနေ့တွင် အတည်ပြုပေးခဲ့သည်။

ထိုလေယာဉ်များကို ရုရှားနယ်မြေများသို့ သွားရောက် တိုက်ခိုက်ရေးတွင် အသုံးမပြုဟုဇာလန်းစကီးထံမှ အာမခံချက် ရရှိပြီးနောက်တွင် ဖြစ်သည်။

ယူကရိန်းသို့ F-16 လေယာဉ်များ ထောက်ပံ့ပေးခြင်းကို ရှေ့ဆက်လုပ်ဆောင်လျှင် အနောက်နိုင်ငံများအနေဖြင့် အလွန်ကြီးမားသော အန္တရာယ်များနှင့် ရင်ဆိုင်ရမည်ဟု ရုရှားလက်ထောက် နိုင်ငံခြားရေးဝန်ကြီး အလက်ဇန္ဒား ဂရက်ရှ်ကို (Alexander Grushko) က ပြီးခဲ့သည့် သီတင်းပတ်ကုန်ပိုင်းတွင် သတိပေးခဲ့သည်။

ရုရှားလက်ထောက် နိုင်ငံခြားရေးဝန်ကြီး အလက်ဇန္ဒားဂရက်ရှ်ကို ကိုတွေ့ရစဉ်

အမေရိကန်အနေဖြင့် ရုရှား၏ တုံ့ပြန်မှုအပေါ် အပြည့်အဝ သတိပြုမိရန် လိုအပ်သည်ဟု အန်တိုနော့ဗ်က ပြောသည်။

အမေရိကန်ထုတ် F-16 များသည် ရုရှားလေတပ်နှင့် ရင်ဆိုင်နေရသော ယူကရိန်းအတွက် အားသာချက် တစ်ခု ဖြစ်လာနိုင်သော်လည်း အင်အားပြင်း ဒုံးကျည်များ၊ ပစ်မှတ်ဆိုင်ရာ အချက်အလက်များနှင့် ပေါင်းစပ်ပြီး ချိန်မှသာ ဖြစ်ကြောင်း လေကြောင်းကာကွယ်ရေးဆိုင်ရာ ကျွမ်းကျင်သူများက ပြောသည်။

လိုအပ်နေသော ဒုံးကျည်နှင့် ပစ်မှတ် အချက်အလက်များကို အနောက်အုပ်စုက ယူကရိန်းသို့ ထောက်ပံ့ပေးရမည် ဖြစ်ကာ ထိုသို့ လုပ်ဆောင်ခြင်းက အနောက်အုပ်စု မဟာမိတ်များ အနေဖြင့် စစ်ပွဲအတွင်း ပိုမို ပါဝင်ရဖွယ် ရှိသည့် အန္တရာယ်ကိုလည်း ဖြစ်စေသည်။

Source: Aljazeera

CNI International News

ဘန်ကောက်၊ မေလ ၂၃

အစိုးရဖွဲ့စည်းရေးအတွက် ပူးတွဲ သဘောတူညီချက်တစ်ခုတွင် လက်မှတ် ရေးထိုးခဲ့သည်ဟု ထိုင်းနိုင်ငံ၏ ညွန့်ပေါင်းမဟာမိတ်ပါတီများက မေလ ၂၂ ရက်တွင် ကြေညာခဲ့ကြောင်း The Nation သတင်းတွင် ဖော်ပြထားသည်။

ရေးထိုးခဲ့သော နားလည်မှုစာချွန်လွှာ (MoU) သည် ညွန့်ပေါင်းအစိုးရ ဖွဲ့စည်းရေးနှင့် ပါတီများအကြား ပူးပေါင်း ဆောင်ရွက်ရေးတို့အတွက် အခြေခံ ဖြစ်လာမည်ဟု ဝန်ကြီးချုပ်သစ်ဖြစ်ရန် လျာထားခံရသော Move Forward ပါတီ ခေါင်းဆောင် ပီတာလင်ဂျာရိုရန်ရတ် (Pita Limjaroenrat) က ပြောသည်။

အစိုးရ၏ လုပ်ဆောင်ချက်များသည် ထိုင်းနိုင်ငံ၏ ဘုရင်စနစ်နှင့် ချိုးဖောက်၍ မရသော ဘုရင်စနစ်တို့အပေါ် မည်သည့်ဆိုးကျိုး သက်ရောက်မှုမှ မရှိစေရေးအတွက်လည်း ပါတီအားလုံးက သဘောတူသည်ဟု ပီတ၏ ပြောစကားတွင် ပါဝင်သည်။

MoU အား လက်မှတ် ရေးထိုးခြင်းသည် ၂၀၁၄ ခုနှစ် အာဏာသိမ်းယူမှု၏ ၉ နှစ်ပြည့် နှစ်ပတ်လည် အခမ်းအနား နှင့် တိုက်ဆိုင်နေသည်။

ညွန့်ပေါင်းပါတီများ သဘောတူညီခဲ့သည့် အချက် ၂၃ ချက်ကို တွေ့ရစဉ်

ထိုအခြေအနေက ဝန်ကြီးချုပ်ဟောင်း ပရာယွတ်၏ ခေါင်းဆောင်မှု ပြီးဆုံးသွားပြီဆိုသော အမှတ်အသား ဖြစ်သည်ဟုလည်း ပီတာက ပြောသည်။

MoU အား ဖန်တီးခြင်းသည် အစိုးရနှင့် လွှတ်တော် လုပ်ငန်းစဉ်များမှတစ်ဆင့် အပြန်အလှန် အကျိုးစီးပွားနှင့် ပူးပေါင်းဆောင်ရွက်မှုကို ပူးတွဲမြှင့်တင်ရန် ရည်ရွယ်ခြင်းဖြစ်ကာ အစိုးရအတွင်း ညွန့်ပေါင်းပါတီများက တာဝန်ယူမှုများကို မျှဝေ ဆောင်ရွက်သွားမည်ဟုလည်း ပီတာက ပြောသည်။

ညွန့်ပေါင်းပါတီများမှ သဘောတူခဲ့သော အရေးပါဆုံး သဘောတူညီချက် ၂၃ ခုမှာ အောက်ပါအတိုင်း ဖြစ်သည်။

(၁) ဒီမိုကရေစီစနစ်ကို ပြန်လည်ထိန်းသိမ်းရန်အတွက် ထိုင်းဖွဲ့စည်းပုံအခြေခံဉပဒေကို ရွေးကောက်ပွဲ အနိုင်ရ လွှတ်တော်အမတ်များ ပါသည့် ကိုယ်စားလှယ်အဖွဲ့က ပြန်လည်ရေးဆွဲရန်

(၂) စုံတွဲတိုင်းအတွက် ညီမျှသော အခွင့်အရေးရှိစေရန် လက်ထပ် ထိမ်းမြှားခြင်းဆိုင်ရာ သာတူညီမျှမှု ဥပဒေအား အတည်ပြုရန်

(၃) ဒီမိုကရေစီ နည်းလမ်းများနှင့်အတူ အစိုးရဝန်ထမ်းများ၊ ရဲတပ်ဖွဲ့၊ စစ်တပ်နှင့် တရားစီရင်ရေး လုပ်ငန်းစဉ်များ ကို ပြုပြင်ပြောင်းလဲရန်

(၄) စစ်မှု မထမ်းမနေရစနစ်မှ ကိုယ့်သဘောဆန္ဒဖြင့် စစ်မှုထမ်းခြင်းသို့ ပြောင်းလဲရန်

(၅) တောင်ပိုင်းနယ်စပ် ပြည်နယ်များတွင် တည်ငြိမ်သော ငြိမ်းချမ်းရေး လုပ်ငန်းစဉ်အတွက် ပူးပေါင်းဆောင်ရွက်ရန်

(၆) အာဏာခွဲဝေနှင့် ဘတ်ဂျက်တို့တွင် ဗဟိုချုပ်ကိုင်မှုကို ဖျက်သိမ်းရေး လုပ်ဆောင်ရန်

(၇) အကျင့်ပျက် ခြစားမှုများကို တိုက်ဖြတ်ရန်

(၈) စီးပွားရေး ပြန်လည်ဦးမော့လာစေရန်

(၉) ပြည်သူများ၏ အသက်မွေး ဝမ်းကြောင်းလုပ်ငန်း၊ စားသောက်နေထိုင်ရေးတို့နှင့် ပတ်သက်သော ဥပဒေများကို ပြင်ဆင်မွမ်းမံရန်

(၁၀) စီးပွားရေး လုပ်ငန်းများတွင် လက်ဝါးကြီးအုပ်မှုများကို ဖယ်ရှားကာ မျှတစွာယှဉ်ပြိုင်ရသော စနစ်ဖြစ်လာရန်

(၁၁) သက်ဆိုင်ရာ ဥပဒေများကို ပြင်ဆင်ခြင်းဖြင့် မြေယာခွဲဝေမှုစနစ်ကို ပြုပြင်ပြောင်းလဲရန်

(၁၂) လျှပ်စစ်မီး ထုတ်လုပ်မှုနှင့် ဈေးနှုန်းပြောင်းလဲ သတ်မှတ်ရန်

(၁၃) ဘတ်ဂျက်စနစ်သစ်တစ်ခု ထူထောင်ရန်

(၁၄) မွေးဖွားသည်မှ သေဆုံးသည်အထိ ကျယ်ပြန့်သော ဖူလုံရေး စနစ်တစ်ခု တည်ထောင်ရန်

(၁၅) မူးယစ်ဆေးဝါးပြဿနာကို အမြန်ဆုံးဖြေရှင်းရန်

(၁၆) ဆေးခြောက် ရောင်းဝယ်သုံးစွဲမှုအား ကန့်သတ်ရန်

(၁၇) စိုက်ပျိုးရေးနှင့် မွေးမြူရေးကဏ္ဍတွင် ပြုပြင်ပြောင်းလဲမှုများ လုပ်ဆောင်ရန်

(၁၈) ရေလုပ်ငန်းဥပဒေကို ပြန်လည်ရေးဆွဲရန်

(၁၉) အလုပ်သမား အခွင့်အရေးများကို မြှင့်တင်ရန်

(၂၀) ကျန်းမာရေးစနစ်ကို မြှင့်တင်ရန်

(၂၁) ပညာရေးစနစ်ကို ပြုပြင်ပြောင်းလဲရန်

(၂၂) ညစ်ညမ်းမှုများကို ဖြေရှင်းရေး ပြည်တွင်း/ပြည်ပ ပူးပေါင်းဆောင်ရွက်မှု၊ လုပ်ငန်းစဉ်များကို မြှင့်တင်ရန်

(၂၃) အာဆီယံဒေသတွင်း ဦးဆောင်မှုနှင့် နိုင်ငံတကာ စာမျက်နှာတွင် ပူးပေါင်းဆောင်ရွက်မှုများကို ပြန်လည်ထိန်း သိမ်းရေး နိုင်ငံရေးမူဝါဒပိုင်းဆိုင်ရာ ဆောင်ရွက်ချက်များကို အကောင်အထည်ဖော် ဆောင်ရွက်ရန်တို့ ဖြစ်သည်။

အချက် ၂၃ ချက်ကို လက်မှတ်ထိုးထားမှု ထုတ်ပြန်စဉ်

ညွန့်ပေါင်းပါတီများသည် အောက်ပါ အကြောင်းအရာများကို အခြေခံကာ တိုင်းပြည်အား အုပ်ချုပ်ရေးအတွက် ပူးပေါင်းဆောင်ရွက်သွားရန်လည်း သဘောတူညီခဲ့သည်။ ထိုသဘောတူညီချက်များမှာ

(၁) ပြည်သူများ၏ အခွင့်အရေးနှင့် နိုင်ငံရေး အခွင့်အရေးကို ကာကွယ်ပေးရန်

(၂) ရိုးသားဖြောင့်မတ်စွာ တာဝန်ယူ ဆောင်ရွက်ရန်

(၃) အပြန်အလှန်လေးစားမှု၊ ရိုးသားမှုတို့ဖြင့် ဆောင်ရွက်ကာ အပြန်အလှန် ထောက်ပံ့ကူညီကြရန်

(၄) ပူးတွဲ သဘောတူညီချက်ပါ အချက်အလက်များကို မချိုးဖောက်သော ပါတီတိုင်းအနေဖြင့် အစိုးရအဖွဲ့ အတွင်း ရှိ ပါတီကိုယ်စားပြု ဝန်ကြီးများ၏ စီမံခန့်ခွဲမှုဆိုင်ရာ အခွင့်အာဏာဖြင့် ထပ်တိုးမူဝါဒများကို အတည်ပြု ခွင့်ရှိခြင်း

(၅) ပူးတွဲ သဘောတူညီချက်ပါ အချက်အလက်များကို မချိုးဖောက်သော ပါတီများအနေဖြင့် ပါတီကိုယ်စားလှယ် များ၏ ဥပဒေပြု အခွင့်အာဏာဖြင့် ထပ်တိုးမူဝါဒများကို အတည်ပြုရန် အခွင့်အရေးရှိခြင်းတို့ ဖြစ်သည်။

ညွန့်ပေါင်းပါတီများကို ဦးဆောင်သည့် Move Forward Party ခေါင်းဆောင်ကို တွေ့ရစဉ်

MoU အား လက်မှတ် ရေးထိုးသည့် အထင်ကရ ဖြစ်ရပ်သည် ထိုင်းနိုင်ငံတွင် စုပေါင်းအစိုးရအဖွဲ့၏ ခေတ်သစ် တစ်ခု ထူထောင်ခြင်းနှင့် အာဏာသိမ်းမှုများ လွှမ်းမိုးခဲ့သည့် ခေတ်တစ်ခု အဆုံးသတ်ခြင်းကို ကိုယ်စားပြုကြောင်း နိုင်ငံရေး လေ့လာသုံးသပ်သူများက ပြောသည်။

ယင်းက အစပြုမှု အသစ်တစ်ခုဖြစ်ကာ ထိုင်းနိုင်ငံ၏ အနာဂတ်အတွက် မျှော်လင့်ချက်များကို ရှင်သန် လာစေ သည်ဟုလည်း မှတ်ချက်ပေးသည်။

Source: The Nation

CNI International News

ဒူဘိုင်း၊ မေလ ၂၃

အီရန် နျူကလီးယား အရေးနှင့် ပတ်သက်၍ တင်းမာမှုများ ရှိနေချိန် ယခုလအတွင်း အမေရိကန်စစ်တပ်က ၎င်းတို့၏ အင်အားပြင်း ဗုံးလက်နက်တစ်ခု၏ ဓာတ်ပုံများကို ထုတ်ဖော်ပြသခဲ့သည်ဟု အေပီသတင်းတွင် ဖော်ပြ ထားသည်။

ထိုဗုံးများကို GBU-57 ဟု ခေါ်ပြီး ယင်းသည် ယူရေနီယံ သန့်စင်မှု လုပ်ဆောင်နေသော မြေအောက်ရှိ စက်ရုံများကို ဖျက်ဆီးရန်အတွက် ရည်ရွယ်ထုတ်လုပ်ထားခြင်း ဖြစ်သည်။

ဘန်ကာဖျက် ဗုံးလက်နက်ကြီး (Massive Ordnance Penetrator) ဟုခေါ်သော GBU-57 လက်နက်များ၏ ပုံကို အမေရိကန်လေတပ်က မေလ ၂ ရက်နေ့တွင် ထုတ်ပြန်ခဲ့ခြင်း ဖြစ်သော်လည်း နောက်တွင် ပြန်ဖြုတ်ချသွားခဲ့ သည်။

ဓာတ်ပုံထဲတွင် ထိုလက်နက်နှင့် ပတ်သက်သည့် အသေးစိတ် အချက်အလက်များကို ဖော်ပြထားခြင်းကြောင့် ယခုကဲ့သို့ ပြန်ဖြုတ်ချ သွားခဲ့ပုံရသည်။

GBU-57 သည် မြေအောက် ဘန်ကာများကို ဖျက်ဆီးရေးနှင့် ပတ်သက်သည့် အမေရိကန်စစ်တပ်၏ နောက်ဆုံး လက်နက် ဖြစ်သည်။

အီရန်ရဲ့ မြေအောက် နျူကလီးယား စက်ရုံကိုတွေ့ရစဉ်

အီရန်အနေဖြင့် GBU-57 များ မရောက်ရှိနိုင်သော မြေအောက် နျူကလီးယားစက်ရုံတစ်ခု တည်ဆောက်ရေးတွင် တိုးတက်မှုများစွာ ရရှိထားသည်ဟု သတင်းများ ထွက်ပေါ်လာခဲ့ပြီးနောက် အမေရိကန်စစ်တပ်က ယခုကဲ့သို့ လက်နက်ပုံများကို လူသိရှင်ကြား ထုတ်ပြန်ခဲ့ခြင်း ဖြစ်သည်။

အီရန်၏ မြေအောက် နျူကလီးယားစက်ရုံများ တည်ဆောက် အောင်မြင်နေခြင်းနှင့် ပတ်သက်သည့် စိုးရိမ်မှုများ မြင့်တက်လာချိန် ၂၀၀၀ ပြည့်နှစ်များတွင် အမေရိကန်သည် GBU-57 များကို စတင်တီထွင်ခဲ့သည်။

လေတပ်မှ ထုတ်ပြန်ခဲ့သော လက်နက်ပုံများသည် Whiteman လေတပ်စခန်း အတွက်ဖြစ်ကာ ယင်းတွင် ဗုံးများ ကို သယ်ဆောင်နိုင်သည့် တစ်ခုတည်းသော B-2 ကိုယ်ပျောက် လေယာဉ်များ အခြေစိုက်သည်။

GBU-57 ဗုံးနှစ်လုံး ရရှိထားခြင်းကြောင့် ယင်း၏ စွမ်းဆောင်ရည်ကို စမ်းသပ်နိုင်တော့မည်ဆိုသည့် caption နှင့်အတူ ဗုံးပုံများကို တင်ခဲ့ခြင်း ဖြစ်သည်။

အီရန်ရဲ့ မြေအောက် နျူကလီးယားစက်ရုံကိုတွေ့ရစဉ်

အီရန်နျူကလီးယား အရေးနှင့်ပတ်သက်၍ တင်းမာမှုများ မြင့်တက်ချိန်တိုင်း အမေရိကန်စစ်တပ်သည် GBU-57 ပုံများကို ဖော်ပြလေ့ရှိပြီး ၂၀၁၉ ခုနှစ်ကလည်း B-2 ဗုံးကြဲ လေယာဉ်တစ်စင်းမှ GBU-57 ဗုံးနှစ်လုံး ပစ်ချလိုက် သည့် ဗွီဒီယိုဖိုင်တစ်ခုကို ထုတ်ပြန်ခဲ့ဖူးသည်။

ဗုံးပုံများကို တင်ကာ ပြန်ဖြုတ်ခဲ့ခြင်းနှင့် ပတ်သက်၍ အမေရိကန် လေတပ်ဘက်က တစ်စုံတစ်ရာ တုန့်ပြန်မှု မရှိ သေးသော်လည်း ထွက်ပေါ်လာသော ဓာတ်ပုံပါ ဗုံးတွင် ရိုက်နှိပ်ထားသည့် စာများအရ ယင်းတို့သည် ၁၂၃၀၀ ကီလို ဂရမ် အလေးချိန် ရှိသည်ဟု သိနိုင်သည်။

ထို့အပြင် ဗုံး၌ AFX-757 နှင့် PBXN-114 ကဲ့သို့ ဖောက်ခွဲရေးပစ္စည်းများ ပါဝင်ကြောင်းကိုလည်း တွေ့မြင်ရသည်ဟု လက်နက်ရေးရာ ကျွမ်းကျင်သူတစ်ဦးက ပြောသည်။

ဓာတ်ပုံပါ အချက်လက်များအရ ဗုံး၏ အလေးချိန် အများစုမှာ ယင်း၏ ထူထဲသော စတီးကိုယ်ထည်ကြောင့်ဖြစ်ပြီး ထိုစတီးကိုယ်ထည်က ဗုံးမပေါက်ခင် မြေကြီး သို့မဟုတ် ကွန်ကရစ်မျက်နှာပြင်များကို ထိုးဖောက်နိုင်ရန် ဆောင် ရွက်ပေးသည်။

သို့သော် လက်ရှိ အချိန်အထိ ဗုံး၏ စွမ်းဆောင်ရည် အတိအကျကိုမူ မသိရသေးပေ။

Source: AP

CNI International News

ဘန်ကောက်၊ မေလ ၂၃

Move Forward Party (MFP)ပါတီနှင့် ညွန့်ပေါင်းမဟာမိတ်ပါတီ(၇ ပါတီ)တို့သည် ရည်ရွယ်ချက် ကြီးမားသော ပြုပြင်ပြောင်းလဲရေး အစီအစဉ်များကို ချမှတ်ပေးမည့် သဘောတူညီချက်တစ်ခု လက်မှတ်ရေးထိုးခဲ့သည်။

ထိုသဘောတူညီချက်ထဲတွင် ဘုရင်စနစ်ကို ဖျက်သိမ်း သို့မဟုတ် ပြုပြင်ပြောင်းလဲရေးလုပ်မည်ဟု မပါဝင်ဘဲ နိုင်ငံ၏ ဘုရင်စနစ်ကို ဆက်လက် ထိန်းသိမ်းသွားရန် ကတိကဝတ်ပြုထားခြင်းဖြင့် လုပ်ဆောင်ခဲ့သည်ဟု ဘန်ကောက်ပို့စ်က ရေးသားဖော်ပြထားသည်။

တနင်္လာနေ့ ညနေပိုင်းတွင် လက်မှတ်ရေးထိုးခဲ့သော နားလည်မှုစာချွန်လွှာ (MoU) သည် ၎င်းတို့ အတူတကွ ဖွဲ့စည်းခြင်းဖြင့် လာမည့် အစိုးရသစ်အတွက် မူဝါဒဆိုင်ရာ လမ်းပြမှုတစ်ခု ဖြစ်လာလိမ့်မည်ဟု ညွန့်ပေါင်းပါတီများ က ပြောသည်။

အစိုးရသစ်၏ လုပ်ငန်းစဉ်များသည် ဖွဲ့စည်းပုံအခြေခံဥပဒေနှင့်ညီသော ဘုရင်စနစ်အပြင် တော်ဝင်မိသားစု၏ ဂုဏ်သတင်းနှင့် ရပ်တည်ချက်တို့ကို ထိခိုက်မှုမရှိစေရဟု MFP ပါတီခေါင်းဆောင် ပီတာ လင်ဂျာရိုရန်ရတ် (Pita Limjaroenrat) က ပြောသည်။

လက်မှတ် ရေးထိုးကြောင်း ကြေညာချက် မတိုင်ခင် မဟာမိတ်ပါတီများသည် ဘုရင်စနစ်ကို ကာကွယ်ရေးနှင့် ပတ်သက်၍ MFP ပါတီအား စည်းရုံးနိုင်ခဲ့သည်ဟု နီးစပ်သူ တစ်ဦးက ပြောသည်။

ထိုင်းဘုရင်ကိုတွေ့ရစဉ်

MFP ပါသည် မေလ ၁၄ ရက်က ကျင်းပခဲ့သည့် ရွေးကောက်ပွဲတွင် နေရာအများစုကို အနိုင်ရခဲ့ခြင်းဖြစ်ကာ တော်ဝင်မိသားစုနှင့် ပတ်သက်သည့် ဥပဒေကို ပြင်ဆင်လိုကြောင်း ပြောစကားကြောင့် ပြင်းထန်သော ဝေဖန်မှု များနှင့် ရင်ဆိုင်နေရသည်။

လက်မှတ် ရေးထိုးခဲ့သော မဟာမိတ်ပါတီများ(၇ ပါတီ)မှာ Pheu Thai (ဖြူးထိုင်း)ပါတီ၊ Prachachart ပါတီ။ Thai Sang Thai (ထိုင်းဆမ်ထိုင်း)ပါတီ၊ Seri Ruam Thai(စီရီ ရမ်လွန်း ထိုင်း) ပါတီ၊ Fair(ဖဲလ်)ပါတီ၊ Plung Sungkom Mai (ဖလမ် ဆန်ခွန် မိုင်)ပါတီနှင့် Peu Thai Rumphlang (ဖုထိုင်းရမ်ဖလိမ်း)ပါတီတို့ ဖြစ်သည်။

ထိုနားလည်မှု စာချွန်လွှာက ပြုပြင်ပြောင်းလဲရေးနှင့် ပတ်သက်၍ ရည်မှန်းချက်ကြီးမားကာ အားလုံး ပါဝင်မှုရှိ သော အစီအစဉ်တစ်ခုကို ရှေ့ဆက်လုပ်ဆောင်ရန် ဖြစ်သည်။

ညွန့်ပေါင်းအဖွဲ့သည် တိုက်ရိုက် ရွေးကောက်ခံရသူများနှင့်အတူ ဖွဲ့စည်းပုံအခြေခံဥပဒေသစ်တစ်ခု ရေးဆွဲခြင်းကို အလျင်အမြန် ဆောင်ရွက်နိုင်ရေး ကြိုးပမ်းသွားမည် ဖြစ်သည်။

ဗျူရိုကရေစီစနစ်၊ ရဲတပ်ဖွဲ့၊ လက်နက်ကိုင်တပ်ဖွဲ့နှင့် တရားစီရင်ရေးတို့တွင်လည်း ပြုပြင်ပြောင်းလဲမှု လုပ်ဆောင် နိုင်ရေး တွန်းအားပေးသွားမည် ဖြစ်သည်။

အစိုးရသစ်၏ အစီအစဉ်သစ်များတွင် လိင်တူလက်ထပ်ခြင်းကို အတည်ပြုမှုလည်း ပါဝင်သည်။ သို့သော် ယင်းကို ဘာသာရေး ရှုထောင့်အရ လက်မခံမှု ရှိလာနိုင်သည်။

Move Forward Party ခေါင်းဆောင် ပီတာ လင်ဂျာရိုရန်ရတ်ကို တွေ့ရစဉ်

စစ်မှု မထမ်းမနေရစနစ်မှ ကိုယ်ပိုင်သဘောဆန္ဒဖြင့် စစ်မှုထမ်းခြင်းစနစ်သို့ ပြောင်းလဲမည်လည်းဖြစ်ကာ နိုင်ငံ တောင်ပိုင်းရှိ နယ်စပ်ပြည်နယ်များတွင် တည်ငြိမ်သော ငြိမ်းချမ်းမှုရရှိရန် ဆောင်ရွက်သွားမည်။

အစိုးရသစ်သည် ဝင်ငွေမြှင့်ပေးခြင်း၊ အကျင့်ပျက် ခြစားမှု ကင်းစင်အောင် ဆောင်ရွက်ခြင်း၊ အသေးစားနှင့် အလတ်စား လုပ်ငန်းများအတွက် ငွေကြေးထောက်ပံ့မှုကို တိုးမြှင့်ခြင်းဖြင့် စီးပွားရေး ပြဿနာများကို ဖြေရှင်းရန် စီစဉ်ထားသလို အဖျော်ယမကာအပြင် စီးပွားရေးကဏ္ဍများတွင် လက်ဝါးကြီး အုပ်မှုကိုလည်း အဆုံးသတ် သွားမည် ဖြစ်သည်။

အစိုးရသစ်၏ ပြုပြင်ပြောင်းလဲရေး အစီအစဉ်များတွင် မြေယာပိုင်ဆိုင်မှု၊ လျှပ်စစ်မီးရရှိမှု၊ ပြည်သူ့အသုံးစရိတ် မြှင့်တင်မှု၊ မူးယစ်ဆေးဝါး၊ ရေလုပ်ငန်း၊ အလုပ်သမားအရေး၊ ပညာရေး၊ ကျန်းမာရေးတို့အပြင် အကျင့်ပျက် ခြစားမှု တိုက်ဖြတ်ရေးတို့လည်း ပါဝင်နေသည်။

Source: ဘန်ကောက်ပို့စ်

CNI International News

ဘန်ကောက်၊ မေလ ၂၂

တနင်္လာနေ့တွင် ထုတ်ပြန်ကြေညာမည်ဟု ယူဆထားကြသော နားလည်မှုစာချွန်လွှာ (MoU)ပါ အချက်အလက် များကို ညွန့်ပေါင်းအစိုးရအဖွဲ့ဝင် ဖြစ်လာနိုင်သည့် နိုင်ငံရေးပါတီများအကြား သဘောတူညီချက် ရရှိသေးခြင်း မရှိဟု Move Forward Party(MFP)ပါတီ၏ ထိပ်တန်း အရာရှိ တစ်ဦးက ပြောကြောင်း ဘန်ကောက်ပို့စ်သတင်း တွင် ရေးသားဖော်ပြထားသည်။

ညွန့်ပေါင်းအဖွဲ့ဝင် ဖြစ်လာနိုင်ဖွယ်ရှိသည့် ပါတီများနှင့် လက်မှတ်ရေးထိုးရန် ပြင်ဆင်ထားသော နားလည်မှု စာချွန်လွှာပါ အချက်အလက်များကို သဘောတူညီမှု ရရှိရေးအတွက် MFP ပါတီသည် ညွန့်ပေါင်းအဖွဲ့ဝင် လောင်းများ၏ ကိုယ်စားလှယ်များနှင့် သီးခြား တွေ့ဆုံသွားမည်ဟု ပါတီ၏ အထွေထွေအတွင်းရေးမှူးချုပ် ချိုင်တာဝပ် တူလာနွန် (Chaithawat Tulanon) က တနင်္ဂနွေနေ့တွင် ပြောသည်။

နိုင်ငံရေးပါတီများအကြား အမြင်မတူညီမှုများ ရှိနေဆဲဖြစ်ကြောင်း၊ ၎င်းတို့အနေဖြင့် တနင်္လာနေ့ သတင်းစာ ရှင်းလင်းပွဲ မတိုင်မီ ပူးတွဲသဘော တူညီချက်များ ထုတ်ပြန်နိုင်ရေး ဆောင်ရွက်သွားမည်ဖြစ်ကြောင်း ချိုင်တာဝပ် က ပြောသည်။

MoU တွင် MFP ပါတီ၏ အစီအစဉ်များသာမက တောင်ပိုင်းနယ်စပ် ပြည်နယ်သုံးခုတွင် ငြိမ်းချမ်းမှု ထိန်းသိမ်းရေး အပါအဝင် တခြား ပါတီများ၏ အစီအစဉ်များလည်း ပါဝင်သည်ဟု MFP ၏ အတွင်းရေးမှူးချုပ်က ပြောသည်။

MFP ပါတီမှ အထွေထွေအတွင်းရေးမှူးချုပ် Chaithawat Tulanon ကိုတွေ့ရစဉ်

မေလ ၁၇ ရက်တွင် Prachachart ပါတီ ခေါင်းဆောင်ဖြစ်သူက ယမကာ ဈေးကွက် အတွင်း ယှဉ်ပြိုင်မှုကို ပိတ်ပင် နေသည့် အတားအဆီးများကို အဆုံးသတ်ရေးနှင့် ပတ်သက်သည်ကို မေးမြန်းခဲ့ရာတွင် MFP ပါတီဘက်က ၎င်းတို့ အနေဖြင့် အရက်သေစာ သောက်စားမှုကို အားပေးသွားမည် မဟုတ်ကြောင်း သို့သော် အဖျော်ယမကာ လုပ်ငန်း အတွင်း ဈေးကွက်လက်ဝါးကြီး အုပ်မှုကို တားဆီးရေး ဆောင်ရွက်သွားမည်ဖြစ်ကြောင်း ပြန်လည် ဖြေကြားခဲ့ သည်။

ထို့အပြင် လူမှုရေးဆိုင်ရာ ကွဲပြားမှုကို ကြိုဆိုခြင်းအဖြစ် MFP က လိင်တူလက်ထပ်ခြင်းကို တရားဝင် ပြုလုပ်ရန် လည်း စီစဉ်ထားသည်။

Prachachart ပါတီသည် သဘောတူညီချက်တွင် မူဆလင်အရေးနှင့် ပတ်သက်၍ ရှင်းလင်းပြောဆိုမှု လုပ်ဆောင် ပေးရန် အလိုရှိနေကြောင်း ချိုင်တာဝပ်က ပြောသည်။

MFP နှင့် တခြားပါတီ ၇ ခုတို့သည် လွှတ်တော်နေရာ ၃၁၃ နေရာဖြင့် အစိုးရသစ် ဖွဲ့စည်းရန် ပြင်ဆင်နေသည်ဟု ချိုင်တာဝပ်က ပြောသည်။

လွှတ်တော်မှ ထောက်ခံမဲ အလုံအလောက် ရသင့်ကြောင်း၊ လွှတ်တော်အမတ်များနှင့် ဆွေးနွေးမှုများ လုပ်ဆောင် နေပြီဖြစ်ကြောင်း ၎င်းက ပြောသည်။

 Prachachart ပါတီ ခေါင်းဆောင်ကိုတွေ့ရစဉ်

စစ်တပ်မှရေးဆွဲသော ဖွဲ့စည်းပုံအခြေခံ ဥပဒေအရ ဝန်ကြီးချုပ်သစ်အား ရွေးချယ်ရေးတွင် ရွေးကောက်ခံ မဟုတ် သော လွှတ်တော်အမတ်များပါ မဲပေးခွင့်ရှိနေခြင်းကို ရည်ညွှန်းပြောဆိုခြင်း ဖြစ်သည်။

တစ်ဆက်တည်းမှာပင် ဝန်ကြီးချုပ်ဟောင်း တစ်ဦးဖြစ်သူ သက်ဆင် ရှင်နာဝပ် (Thaksin Sihnawatra)က ၎င်းသည် အစိုးရဟောင်းမှ ကိုယ်စားလှယ်များနှင့် ဟောင်ကောင်တွင် တွေ့ဆုံဖွယ် ရှိသည်ဆိုသည့် သတင်းများ နှင့်ပတ်သက်၍ ငြင်းဆိုခဲ့သည်ဟု သိရသည်။

Source: ဘန်ကောက်ပို့စ်

CNI International News

ဘေဂျင်း၊ မေလ ၂၂

တရုတ်ပြည်မကြီး၏ ဒေသခံတစ်ဝက်ကျော်ကျော်က ထိုင်ဝမ်အား ထိန်းချုပ်ရေးအတွက် စစ်ပွဲဆင်နွှဲရန် ထောက်ခံကြောင်း လေ့လာမှုသစ်တစ်ခုတွင် တွေ့ခဲ့ရသည်ဟု ဘန်ကောက်ပို့စ်သတင်းတွင် ဖော်ပြသည်။

ယင်းက ထိုင်ဝမ်အရေးနှင့်ပတ်သက်၍ ပြည်မကြီးမှ ဒေသခံများ၏အမြင်ကို ကြုံတောင့်ကြုံခဲ မြင်တွေ့ခဲ့ရခြင်း လည်း ဖြစ်သည်။

လူပေါင်း ၁၈၂၄ ဦးကို အခြေခံသည့် စစ်တမ်းကောက်ယူမှုတွင် မတူကွဲပြားသော အမြင်များကို မြင်တွေ့ခဲ့ရသည်။ စစ်တမ်းတွင် ပါဝင်သူများ၏ ၅၅ ရာခိုင်နှုန်းက ထိုင်ဝမ်ဒေသတစ်ခုလုံးကို ပြန်ယူရေးနှင့် ပေါင်းစည်းရေး စစ်ပွဲ ဆင်နွှဲခြင်းကို သဘောတူကာ သုံးပုံတစ်ပုံက ငြင်းဆိုပြီး ကျန်လူများက သေချာမသိကြောင်း ဖြေဆိုခဲ့သည်။

အဆိုပါ စစ်တမ်းကောက်ယူမှုကို စင်ကာပူအမျိုးသားတက္ကသိုလ်မှ ပညာရှင် အဒမ်ဝိုင်လူနှင့် ရှန်ဟိုင်း NYU မှ ရှောင်ဂျန်လီတို့က ပြုလုပ်ခဲ့ခြင်းဖြစ်ကာ Journal of Contemporary China တွင် တနင်္လာနေ့၌ ဖော်ပြခဲ့သည်။ အာဏာရှင်ဆန်သော ခေါင်းဆောင်များသည် မျှတစွာ ယှဉ်ပြိုင်ရသော ရွေးကောက်ပွဲများဖြင့် အာဏာရရှိလာခြင်း မဟုတ်သော်ငြားလည်း ပြည်တွင်းမှ ကန့်ကွက်မှုကို ရှောင်ရှားရန် ၎င်းတို့၏ မူဝါဒများကို ပြည်သူ့အယူအဆများ နှင့် ကိုက်ညီရေး သေချာစေရန် မက်လုံးပေးဆောင်ရွက်နိုင်နေဆဲဖြစ်သည်ဟု စစ်တမ်းပြုလုပ်သူများက ရေးသား ထားသည်။

အစိုးရတစ်ရပ်အတွက် အဓိကဒေါက်တိုင်မှာ အမျိုးသားရေးစိတ်ဓာတ်၊ အထူးသဖြင့် အချုပ်အခြာအာဏာ နယ်မြေ ပိုင်ဆိုင်မှုနှင့် သက်ဆိုင်သည့်အကြောင်းအရာများဖြစ်ကြောင်း၊ယင်းသည် တရုတ်နိုင်ငံ၏ အရှိတရားတစ်ခု ဖြစ် ကြောင်း ၎င်းတို့က ပြောသည်။ သို့သော် အာဏာပိုင်များသည် ပြည်သူများ၏ သဘောဆန္ဒကို ပုံသွင်းရန် ခေတ်မီ သော နည်းလမ်းများကို အသုံးပြုလာနိုင်သည်ဟုလည်း ၎င်းတို့က သုံးသပ်သည်။

ထိုင်ဝမ်စစ်တပ်၏ ထိုင်ဝမ်ရှိ New Taipei City အနီး၌ နှစ်စဉ်ကျင်းပမြဲဖြစ်သော Han Kuang စစ်ရေး လေ့ကျင့်မှုမြင်ကွင်း (ဓါတ်ပုံ-အေပီ)

တရုတ်တစ်နိုင်ငံလုံးကို လွှမ်းခြုံမှုရှိသော စစ်တမ်းကောက်ယူမှုကို ၂၀၂၀ ခုနှစ် နှောင်းပိုင်းနှင့် ၂၀၂၁ ခုနှစ် အစော ပိုင်းက ပြုလုပ်ခဲ့ခြင်းဖြစ်ကာ စစ်တမ်းတွင် ပါဝင်သူများကို လက်ရှိအနေအထားနှင့်ပတ်သက်၍ ၎င်းတို့၏ အမြင် များ၊ ထိုင်ဝမ်အရေးနှင့်ပတ်သက်သည့် ၎င်းတို့၏ သဘောထားဆိုင်ရာ မေးခွန်းများစွာကို ဖြေဆိုစေခဲ့သည်။

စစ်ထိုးသိမ်းပိုက်ခြင်းကို ထောက်ခံသူ ၅၅ ရာခိုင်နှုန်းအပြင် ၁ ရာခိုင်နှုန်းသည် တခြားရွေးချယ်စရာများထက် စာလျှင် တင်းမာပြင်းထန်သော သဘောထားအမြင်ရှိသည်ကို တွေ့ခဲ့ရသည်။ တခြားသော ရွေးချယ်မှုများတွင် တရုတ်-ထိုင်ဝမ် တစ်နိုင်ငံတည်းပေါင်းစည်းရေးအတွက် အတင်းအကြပ် လုပ်ဆောင်ခြင်းကို အများစုက ထောက်ခံ ကြသည်။

ယင်းတို့တွင် ထိုင်ဝမ်ကျွန်း ပတ်ဝန်းကျင်၌ စစ်ရေးလှုပ်ရှားမှုများ လုပ်ဆောင်ခြင်း၊ စီးပွားရေးအရ ပိတ်ဆို့အရေး ယူမှုများ ပြုလုပ်ခြင်း၊ တစ်ခုတည်း မပေါင်းစည်ခင် လက်ရှိအနေအထားကိုထိန်းကာ စီးပွားရေးနှင့်စစ်ရေး အင်အားကို မြှင့်တင်ခြင်းတို့ ပါဝင်သည်။

ထူးခြားမှုတစ်ခုမှာ စစ်တမ်းတွင် ပါဝင်သူများ၏ ၂၂ ရာခိုင်နှုန်းသည် လက်ရှိအခြေအနေအတိုင်း ကွဲပြားသော နိုင်ငံရေးစနစ်များဖြင့် ဆက်သွားခြင်းကိုထောက်ခံပြီး ပေါင်းစည်းရန် မလိုအပ်ဟု သဘောတူခဲ့ခြင်း ဖြစ်သည်။ ၇၁ ရာခိုင်နှုန်းက ယင်းကို လက်မခံဟု ဖြေဆိုသည်။

Source:Bangkokpost

CNI International News

ဘန်ကောက်၊ မေလ ၂၂

မေလ ၂၃ ရက်တွင် ဘန်ကောက်မြို့ရှိ လွှတ်တော်ရှေ့၌ လွှတ်တော်အမတ် ၂၅၀ ကို ဖိအားပေးရေး လူထုစုဝေးပွဲ ကျင်းပရန် စီစဉ်ထားသည်ဟု ဘန်ကောက်ပို့စ် သတင်းတွင် ဖော်ပြသည်။

ပြည်သူ့ဆန္ဒအတိုင်း Move Forward ပါတီ အစိုးရဖွဲ့ရေးနှင့် ပါတီခေါင်းဆောင် ပီတာ လင်ဂျာရိုရန်ရတ် (Pita Limjaroenrat) အား ဝန်ကြီးချုပ်သစ် ခန့်အပ်ရေးတွင် ဆန့်ကျင်မဲပေးမှု လုပ်ဆောင်ခြင်း မပြုရေးအတွက် လွှတ်တော်အမတ်များကို ဖိအားပေးရန် ဖြစ်သည်။

လူထုစုဝေးပွဲကို United Front of Thammasat and Demonstration (UFTD) က တနင်္ဂနွေနေ့တွင် ၎င်းတို့၏ ဖေ့စ်ဘွတ်ခ် စာမျက်နှာ၌ ထုတ်ပြန်ကြေညာခဲ့ခြင်း ဖြစ်သည်။

ထိုင်းလွှတ်တော်ကို တွေ့ရစဉ်

ရွေးကောက်ပွဲသည် ပြည်သူ့ လိုအပ်ချက်နှင့် ရည်ရွယ်ချက်ကို ထင်ဟပ်သည့် အရေးပါဆုံး အရာတစ်ခုဖြစ် ကြောင်း၊ ပြည်သူများဘက်က ပြောင်းလဲရန် လိုအပ်ကြောင်း စကားသံ ထွက်ပေါ်လာချိန်တွင် ဒီမိုကရေစီ နည်း လမ်း များနှင့်အညီ ပြုမှုဆောင်ရွက်သင့်ကြောင်း၊ သို့သော် ၂၀၁၇ ဖွဲ့စည်းပုံအရ လွှတ်တော်အမတ် ၂၅၀ သည် ပြည်သူ့ဆန္ဒနှင့် ပတ်သက် ဆက်နွယ်ခြင်း ရှိမနေသော်လည်း ဝန်ကြီးချုပ် ရွေးချယ်ရေးတွင် ပါဝင်မဲပေးခွင့် ရှိနေ ခြင်းမှာ မဖြစ်သင့်ကြောင်း UFTD က ပြောသည်။

ရွေးချယ်ပွဲတွင် ပြည်သူများ၏ ရည်မှန်းချက် အစစ်အမှန်ကို မည်ကဲ့သို့ ထုတ်ဖော်ပြသခဲ့သည်ဖြစ်စေ လွှတ်တော် အမတ် တစ်ချို့သည် ဒီမိုကရေစီ နည်းလမ်းများကို သဘောမတူဟု ထုတ်ဖော် ပြသထားကြောင်း၊ ၎င်းတို့သည် ရွေးကောက်ခံ ပြည်သူ့ကိုယ်စားလှယ်များကို ဆန့်ကျင့်မဲပေးရန်၊ ပြောင်းလဲမှု တစ်စုံတစ်ရာ ပေါ်ပေါက်လာနိုင်မှု ကို အနှောင့်အယှက်ပေးရန် အဆင်သင့် ရှိနေကြောင်းလည်း ဖေ့စ်ဘွတ်ခ်ပို့စ်တွင် ရေးသားထားသည်။
လွှတ်တော်ကြောင့် ပြည်သူ့အောင်ပွဲ မပျက်စီးသင့်ဟုလည်း ပါဝင်သည်။

တနင်္ဂနွေနေ့ မနက်ပိုင်း အယုဒ္ဓယ (Ayuttaya) ပြည်နယ် ချိုဖရွမ်း (Chao Phrom) ဈေးရှေ့တွင် လူတစ်စုက ဘုရင်စနစ်ကို ကာကွယ်ရေးအတွက် စုဝေးဆန္ဒပြခဲ့ကြသည်။

ထိုင်းဘုရင် မိသားစုကို တွေ့ရစဉ်

ယင်းကို အန်တီအယုဒ္ဓယလို့ ထင်ရှားသော ကလျာနီ ဂျူပရန်း (Kalayani Juprang) ဟုခေါ်သည့် အမျိုးသမီး တစ်ဦးက ဦးဆောင်ခဲ့သည်။

အဆိုပါ လူအုပ်စုက ပုဒ်မ ၁၁၂ ခု ခေါ်သော တော်ဝင်မိသားစုအား စော်ကားပြောဆိုခြင်းနှင့် ပတ်သက်သည့် ဥပဒေအား ပြင်ဆင်ရန် လုပ်ဆောင်မှုကို ကန့်ကွက်ကြောင်း စာတန်းများ ကိုင်ဆောင်ကာ ကန့်ကွက် ဆန္ဒပြခဲ့ခြင်း ဖြစ်သည်။

ထိုဆန္ဒပြသူများနှင့် ဒေသခံများအကြား တင်းမာမှုများရှိခဲ့ကာ ယင်းတို့ကို အရပ်ဘက်၊ ယူနီဖောင်းဝတ် ရဲတပ်ဖွဲ့ ဝင်များက ဝင်ရောက် ဖြန်ဖြေပေးခဲ့ရသည်။

အယုဒ္ဓယ ဈေးရှေ့ ဆန္ဒပြပွဲကို ဦးဆောင်ခဲ့သူ ကလျာနီက Move Forward Party (MFP)ပါတီသည် ပုဒ်မ ၁၁၂ ကို ပြောင်းလဲရန် ပြတ်သားသော သဘောထား ရှိခြင်းကြောင့် ယင်းကို ကန့်ကွက်ရေး အယုဒ္ဓယနှင့် အိမ်နီးချင်း ပြည် နယ်များကိုပါ တိုက်တွန်းခဲ့သည်။

သူမအနေဖြင့် ပါတီသည် ညွန့်ပေါင်းအစိုးရ ဖွဲ့စည်းရေးကို ဦးဆောင်ခွင့် ရရှိထားကြောင်း သဘောတူသော်လည်း ပုဒ်မ ၁၁၂ ကို ဖျက်သိမ်းရေးပါတီ၏ မူဝါဒကို လက်မခံနိုင်ဟု ပြောသည်။

Source: ဘန်ကောက်ပို့စ်

CNI International News

ဘန်ကောက်၊ မေလ ၂၂

ထိုင်းအထွေထွေ ရွေးကောက်ပွဲတွင် အနိုင်ရရှိခဲ့သော Move Forward Party (MFP)ပါတီ အနေဖြင့် ညွန့်ပေါင်း အစိုးရတစ်ရပ် ဖွဲ့စည်းနိုင်ခြင်းမရှိပါက နိုင်ငံတွင်း ပဋိပက္ခနှင့် နောက်ထပ် အာဏာသိမ်းမှုများ ထပ်မံပေါ်ပေါက် လာနိုင်သည်ဟု ပညာရှင်တစ်ဦးက သတိပေးကြောင်း ဘန်ကောက်ပို့စ်မှ ဖော်ပြခဲ့သည်။

သို့သော် တစ်ဖက်တွင် ထိုင်းစစ်တပ်က နိုင်ငံ၏ ငြိမ်ဝပ်ပိပြားရေးကို ထိန်းသိမ်းနိုင်ရန် အကောင်းဆုံး လုပ်ဆောင် သွားမည်ဟု အာမခံချက်ပေးထားကာ နောက်ထပ် အာဏာသိမ်းမှုတစ်ခု ထပ်ဖြစ်လာနိုင်ချေနှင့် ပတ်သက်၍ လည်း ငြင်းချက် ထုတ်ထားသည်။

စနေနေ့ ဖေ့စ်ဘွတ်ခ် စာမျက်နှာ၌ ရေးသားခဲ့ရာတွင် ထိုင်း အမျိုးသားဖွံ့ဖြိုးတိုးတက်မှု စီမံခန့်ခွဲရေးအဖွဲ့ (Nida) ၏ နိုင်ငံရေးနှင့် ဖွံ့ဖြိုးတိုးတက်ရေး မဟာဗျူဟာ အစီအစဉ်၏ ဒါရိုက်တာဖြစ်သူ ဖီချိုင်း ရတ်နာတီလာကာ နာ ဘူခတ် (Phichai Ratnatilaka Na Bhuket) က MFP ပါတီအစိုးရ ဖွဲ့စည်းနိုင်လျှင် သို့မဟုတ် မဖွဲ့စည်းနိုင်လျှင် ပေါ်ပေါက် လာနိုင်ဖွယ်ရှိသည့် အခြေအနေများကို သုံးသပ်ပြောဆိုထားသည်။

ဒါရိုက်တာဖြစ်သူ ဖီချိုင်း ရတ်နာတီလာကာနာဘူခတ်ကို တွေ့ရစဉ် 

လက်ရှိတွင် စုစုပေါင်း လွှတ်တော် ၃၁၃ နေရာအထိ ရရှိထားသော MFP ဦးဆောင်သည့် ညွန့်ပေါင်းအဖွဲ့သည် နောက်ထပ် လွှတ်တော်၏ ထောက်ခံမှု အနည်းဆုံး ၆၆ နေရာ ရရှိလျှင် အစိုးရသစ်တစ်ရပ်ကို ဖွဲ့စည်းနိုင်လိမ့်မည် ဟု ၎င်းက ပြောသည်။

မဲဆန္ဒရှင်များ၏ ထောက်ခံမှုအပြင် နိုင်ငံတကာ၏ အသိအမှတ်ပြုမှုကို ရရှိထားခြင်းကြောင့် MFP ပါတီသည် အစိုးရတစ်ရပ်ကို ဖွဲ့စည်းနိုင်ခွင့်ရှိနေကာ ပါတီခေါင်းဆောင် ပီတာ လင်ဂျာရိုရန်ရတ် (Pita Limjaroenrat) သည်လည်း ဝန်ကြီးချုပ်သစ်အဖြစ် ရေပန်းစားနေသည်။

MFP ဦးဆောင်သည့် အစိုးရသစ် လက်ထက်တွင် ထိုင်းနိုင်ငံရေး အခြေအနေများ တည်ငြိမ်ကာ ဒီမိုကရေစီစနစ် ပိုမို အားကောင်းလာပြီး စီးပွားရေး တိုးတက်မှုများလည်း ရှိလာလိမ့်မည် ဖြစ်ကြောင်း၊ ထိုင်းနိုင်ငံသည် တခြား နိုင်ငံများ၏ အထင်ကြီးလေးစားမှုကို ရရှိလိမ့်မည် ဖြစ်ကြောင်းလည်း ၎င်းက သုံးသပ်သည်။

MFP ပါတီခေါင်းဆောင် Pita Limjaroenrat ကိုတွေ့ရစဉ်

ဆီးနိတ် လွှတ်တော်အမတ်များက မစ္စတာပီတာအား ဝန်ကြီးချုပ်အဖြစ် မဲပေးရန် ငြင်းဆန်မှုကြောင့် MFP အနေ ဖြင့်သာ ညွန့်ပေါင်းအစိုးရတစ်ရပ်ကို ဖွဲ့စည်းနိုင်ခြင်းမရှိပါက တိုင်းပြည်တွင် မတူကွဲပြားမှုများနှင့် ပဋိပက္ခများရှိ နေသည်။

ထို့ကြောင့် တည်ငြိမ်မှု ပျက်ပြားကာ၊ စီးပွားရေး ကျဆင်းမှုကို ဖြစ်စေ၍ တခြားနိုင်ငံများ၏ အမြင်တွင် မကောင်း သော ပုံရိပ်ထင်ဟပ် သွားစေလိမ့်မည်ဟု မစ္စတာ ဖီချိုင်းက ပြောသည်။
ဖြူးထိုင်း (Pheu Thai) ပါတီကသာ အစိုးရဖွဲ့စည်းရန် ခေါင်းဆောင်ဖြစ်လာပြီး ၎င်းတို့၏ အမတ်လောင်းအား လွှတ်တော်တွင် ဝန်ကြီးချုပ်နေရာအတွက် မဲပေးမှုခံယူပါကာ လွှတ်တော်၏ ထောက်ခံမှု ရရှိရန် အာမခံချက် မရှိဟု ၎င်းက ပြောသည်။

ထို့အပြင် ရှပ်နီများ၏ ကန့်ကွက်မှုကြောင့် ဖြူးထိုင်းပါတီ အနေဖြင့် Palang Pracharath နှင့် Bhumjaithai ပါတီတို့အား မဟာမိတ်အဖွဲ့တွင်းသို့ ခေါ်ဆောင်နိုင်မည် မဟုတ်ကြောင်းလည်း ဖီချိုင်းက သုံးသပ်သည်။
ထို့အပြင် မတူကွဲလွဲမှုများနှင့် ပဋိပက္ခများက အာဏာသိမ်းမှုတစ်ခုထံ ဦးတည်စေနိုင်ပြီး နိုင်ငံရေးကို စစ်တပ်က ဝင်ရောက်ခွင့်ရရှိကာ အာဏာကို ဆက်ထိန်းထားနိုင်ကြောင်း၊ ယင်းက နိုင်ငံအား အဘက်ဘက်က ကျဆင်းမှု ဖြစ်စေနိုင်ကြောင်း ၎င်းက သုံးသပ်ရေးသားထားသည်။

Source: ဘန်ကောက်ပို့စ်