CNI International News

မက္ကဆီကိုစီးတီး၊ ဇန်နဝါရီ ၇

ထောင်ကျနေသော နာမည်ကျော် မူးယစ်ရာဇာ ဂျိုအာကွင်း အယ်လ်ချာပို ဂတ်ဇ်မန်း (Joaquin “El Chapo” Guzman)၏ သားဖြစ်သူ အိုဗီဒီယို ဂတ်ဇ်မန်း (Ovidio Guzman) ကို မက္ကဆီကို အာဏာပိုင်များက ဖမ်းဆီးခဲ့သည်။

ထို့နောက် ဖမ်းဆီးမှုဖြစ်ပြီး နောက်ရက်များတွင် ဆီနာလိုအာ (Sinaloa) ပြည်နယ် ကူလီယာကန် (Culiacan) မြို့တွင်း၌ ကားများမီးရှို့ခံရခြင်း၊ ဒေသခံများ၏ ကားများကို ပြန်ပေးဆွဲခြင်းများ ပေါ်ပေါက်ခဲ့သည်။

ထိုလုပ်ရပ်များကို ရာဇဝတ်ဂိုဏ်းသားများက ကျူးလွန်သည်ဟု ယူဆရသည်။ အာဏာပိုင်များ အနေဖြင့် အဘယ် ကြောင့် ယခုလို အကြမ်းဖက်မှုများ ဖြစ်နေသည်ကို ထုတ်ဖော်ပြောဆိုထားခြင်း မရှိသော်လည်း ထိုသို့သော လုပ် ရပ်များသည် ဂိုဏ်းအဖွဲ့ဝင် တစ်ဦး ဖမ်းဆီးခံရချိန်တွင် တုန့်ပြန်သည့်အနေဖြင့် ဂိုဏ်းသားများက လုပ်ဆောင် လေ့ရှိသော အပြုအမှုများ ဖြစ်သည်။

မက္ကဆီကိုသမ္မတ အန်ဒရေ မန်နျူရယ် လိုပတ်ဇ် အိုဘရာဒေါကိုတွေ့ရစဉ် (GETTY IMAGES)

မြို့နေရာ အနှံ့အပြားတွင် လမ်းများပိတ်ဆို့မှုများ ဖြစ်ပေါ်နေခြင်းကြောင့် ဒေသခံများအနေဖြင့် အိမ်အပြင်မ ထွက်ကြရန် တောင်းဆိုကြောင်း ကူလီယာကန်မြို့တော်ဝန် ဟွမ်ဒီဒီယို့ဂါမက်ဇ် (Juan de Dios Gamez) က တွစ်တာတွင် ရေးသားခဲ့သည်။

အဖမ်းခံခဲ့ရသော အိုဗီဒီယိုသည် ၎င်း၏ဖခင်ဖြစ်သူ အဖမ်းခံခဲ့ရပြီးနောက် ဆီနာလိုအာဂိုဏ်း၏ အရေးကြီးသော ပုံရိပ်တစ်ခုဖြစ်ခဲ့ပြီး ၎င်းကို မက္ကဆီကိုအာဏာပိုင်များက ၂၀၁၉ ခုနှစ်၊ အောက်တိုဘာလတွင် ဖမ်းဆီးထိန်းသိမ်း ခဲ့သည်။

ထို့နောက်တွင် အိုဗီဒီယို၏ ဂိုဏ်းသားများက မြို့အနှံ့ အင်အားပြင်း လက်နက်များဖြင့် ပစ်ခတ်မှုများ စတင်ပြု လုပ်ခဲ့ရာ အိုဗီဒီယိုလည်း ပြန်လည်လွတ်မြောက်လာခဲ့သည်။

၎င်းက မက္ကဆီကိုသမ္မတ အန်ဒရေ မန်နျူရယ် လိုပတ်ဇ် အိုဘရာဒေါ (Andres Manuel Lopez Obrador) အစိုးရအတွက် ကြီးမားသည့် အရှက်ရမှုကိုလည်း ဖြစ်စေခဲ့သည်။

 မြို့တွင်း အကြမ်းဖက်မှုများဖြစ်ထားစဉ် (AP)

ကြာသပတေးနေ့ သတင်းစာရှင်းလင်းပွဲတွင် သမ္မတက ကူလီယာကန်တွင် စစ်ဆင်ရေးများ ဆောင်ရွက်နေ သည်ဟု ပြောခဲ့သော်လည်း မည်သို့ လုပ်ဆောင်နေသည်ကိုတော့ မရှင်းပြခဲ့ပေ။

လူမှုကွန်ယက်ပေါ်သို့ ပေါ်ထွက်လာသည့် အတည်မပြုနိုင်သေးသော ဗွီဒီယိုများတွင် ရဟတ်ယာဉ် တစ်စင်းပေါ်မှ အပါအဝင် မြို့အနှံ့ ပစ်ခတ်မှုများ ဖြစ်နေသည်ကို တွေ့ခဲ့ရသည်။

ထို့ပြင် မြို့ရှိ လေဆိပ်ကိုလည်း ယာယီရပ်ဆိုင်ထားရသလို အစိုးရဝန်ထမ်းများ လုပ်ငန်းဆောင်ရွက်ခြင်းကိုလည်း ရပ်နားထားရသည်။

မက္ကဆီကိုအစိုးရသည် နိုင်ငံတစ်ဝန်းလုံးတွင် အကြမ်းဖက်မှုများ မြင့်မားနေခြင်း၊ မူးယစ်ဆေးဝါးဂိုဏ်းများ အင်အား ကြီးမားနေခြင်းတို့ကို ဖြေရှင်းရန် ရုန်းကန်နေရသည်။

Source: အယ်ဂျာဇီးယား

ဆိုးလ်၊ဇန်နဝါရီ - ၆

မကြာသေးခင်က ပြုလုပ်ခဲ့သော အခမ်းအနားများတွင် သမီးဖြစ်သူကို ပွဲထုတ်ခဲ့သော မြောက်ကိုရီးယား ခေါင်းဆောင် ကင်ဂျုံအန်(Kim Jong Un)၏ လုပ်ရပ်သည် နောင်တစ်ချိန်တွင် ၎င်း၏နေရာကို သားသမီးများ ဆက်ခံသွားမည်ကို ပြည်သူများသို့ အသိပေးရန် ကြိုးပမ်းခြင်း ဖြစ်နိုင်ကြောင်း တောင်ကိုရီးယားထောက်လှမ်းရေး အေဂျင်စီဘက်က မှတ်ယူထားကြောင်း အေပီသတင်းတွင် ဖော်ပြထားသည်။

ကင်သည် သမီးဖြစ်သူကို ပြီးခဲ့သည့် လများတွင် ပြုလုပ်ခဲ့သော ဒုံးကျည်ပစ်လွှတ်ခြင်း၊ လက်နက်ပညာရှင်များနှင့် ဓာတ်ပုံရိုက်ခြင်း၊ ဒုံးကျည်စက်ရုံသို့ခေါ်သွားခြင်း စသဖြင့် လူမြင်ကွင်းသို့ခေါ် ထုတ်လာခဲ့သည်။

ကင်၏ သမီးဖြစ်သူကို မြောက်ကိုရီးယားမီဒီယာက ချစ်စရာ အကောင်းဆုံး ကလေးအဖြစ် သတ်မှတ်ထားပြီး သူမ၏ အသက်မှာ ၉ နှစ် သို့မဟုတ် ၁၀ နှစ်အရွယ် ဖြစ်သည့်တိုင် ထိုကလေးသည် နောင်တစ်ချိန်တွင် ကင်၏ ဆက်ခံသူ ဖြစ်လာနိုင်မလားဆိုတာ ငြင်းခုံမှုများ ရှိလာသည်။

တံခါးပိတ် လွှတ်တော်ကော်မတီ အစည်းအဝေးတစ်ခုတွင် တောင်ကိုရီးယား အမျိုးသားထောက်လှမ်းရေး အဖွဲ့(NIS)က ကင်၏ ပွဲထုတ်မှုသည် နောင်တစ်ချိန်တွင် ဆက်ခံသူကို ဖော်ပြရန် ရည်ရွယ်သည်ဟု ပြောကြောင်း ထိုအစည်းအဝေးကို တက်ရောက်ခဲ့သည့် လွှတ်တော်အမတ် ယိုဆန်ဘမ်း (Yoo Sang-bum) ကပြောသည်။

တောင်ကိုရီးယားအမျိုးသားလုံခြုံရေးကော်မတီရုံး(GETTY IMAGES)

ကင်တွင် သားသမီး သုံးဦးရှိသည်ဟု တောင်ကိုရီးယားမီဒီယာများက ဖော်ပြကြပြီး သမီးဖြစ်သူမှလွှဲ၍ မည်သူ့ကိုမှ လူမြင်ကွင်းသို့ ထုတ်မပြခဲ့ဖူးချေ။ ကင်၏အကြီးကလေးမှာ ယောင်္ကျားလေး ဖြစ်သည်ဟု သိရပြီး ယခုကဲ့သို့ လူမြင် ကွင်းကို ထုတ်ပြသည့်တိုင် ကင်၏သမီးသည် ခေါင်းဆောင်နေရာကို မဖြစ်မနေ ဆက်ခံလိမ့်မည်ဟု NIS ဘက်က မယူဆထားဟုလည်း ယိုက ပြောသည်။

ကင်သည် သမီးဖြစ်သူကို နိုဝင်ဘာလတွင် ပထမဆုံး လူမြင်ကွင်းသို့ ပွဲထုတ်ခဲ့ခြင်းဖြစ်ပြီး ထိုကလေးသည် အသက် ၁၀ နှစ်ဝန်းကျင်အရွယ် ကင်၏ဒုတိယသမီး ဂျူအီ (Ju Ae) ဖြစ်သည်ဟု NIS က လွှတ်တော် အမတ်များကို ပြောခဲ့ သည်။
သမီးဖြစ်သူကို ဒုံးကျည် ပစ်လွှတ်ရာ နေရာသို့ ခေါ်ဆောင်လာခြင်းသည် နိုင်ငံ၏အနာဂတ် မျိုးဆက်သစ်များ၏ လုံခြုံရေးကို ကာကွယ်ရန် ကင်၏ကြိုးပမ်းမှုဟု ထိုအချိန်တုန်းက NIS က သုံးသပ်ခဲ့သည်။ ဂျူအီသည် NBA ကစားသမားဟောင်း ဒန်းနစ်ရော့မန်း (Dennis Rodman) မြောက်ကိုရီးယားသို့ သွားရောက်စဉ်က တွေ့ဆုံခဲ့သည့် ကလေးငယ်လည်း ဖြစ်သည်။

အသက် ၃၉ နှစ် ပြည့်တော့မည်ဖြစ်သော ကင်သည် မြောက်ကိုရီးယားနိုင်ငံ၏ မျိုးရိုးသုံးဆက်မြောက် ခေါင်းဆောင်ဖြစ်ကာ ၎င်းမတိုင်ခင် အဖေဖြစ်သူ ကင်ဂျုံအီ (Kim Jong Il) နှင့် အမျိုးဖြစ်သူ ကင်အီဆန်း (Kim Il Sung) တို့က အုပ်ချုပ်ခဲ့သည်။

ကင်ဂျုံအန်သည် အင်ဂျုံအီ၏ တတိယမြောက်နှင့် အငယ်သုံးသားဖြစ်ပြီး ၎င်းကို ဖခင်ဖြစ်သူက အသက် ၂၆ နှစ် အရွယ်မှသာ လူမြင်ကွင်းသို့ ထုတ်ပြခဲ့ခြင်း ဖြစ်သည်။

ထို့ကြောင့် ကင်ဂျုံအန်၏ ၁၀ နှစ်ဝန်းကျင်အရွယ် သမီးဖြစ်သူကို လူမြင်ကွင်းသို့ ခေါ်ဆောင်လာခြင်းက မြောက်ကိုရီးယားအရေး စောင့်ကြည့်သူများကို အံ့သြသင့်စေခဲ့သည်။

Source: AP

CNI International News

ဒီမာပေါ၊ ဇန်နဝါရီ ၆

အဖွဲ့၏ ခွင့်ပြုချက်မပါဘဲ ကိုယ့်သဘောအတိုင်း လုပ်ဆောင်နေသည့်အတွက်ကြောင့် NSCN-K(Khango) အဖွဲ့၏ ဥက္ကဋ္ဌ ဖြစ်သူ ခန်ဂိုကွန်ယတ် (Khango Konyak)က အထွေထွေအတွင်းရေးမှူး အိုင်ဆတ် ဆူမီ (Isak Sumi) ကို ရာထူးမှထုတ်ပယ်၍ အပြစ်ပေးခဲ့သည်ဟု NORTHEAST News သတင်းတွင် ဖော်ပြထားသည်။

ကြာသပတေးနေ့တွင် ရရှိခဲ့သော အသိပေးစာ၌ ဆူမီသည် စုပေါင်းခေါင်းဆောင်မှု၏ ခွင့်ပြုချက်မရှိဘဲ အကြွင်းမဲ့ အာဏာများနှင့် လုပ်ဆောင်မှုများကို လုယူခဲ့မှုအတွက် အပြစ်ရှိကြောင်း တွေ့ရှိခဲ့သည် ကွန်ယတ်က ပြောသည်။

ထို့အပြင် ၎င်း(ဆူမီ)သည် အာဏာအလွဲသုံးစားမှုလုပ်ခြင်း၊ ဆွေမျိုးကောင်းစားရေးနှင့် တစ်ဦးတည်း အုပ်ချုပ်မှုဟု ကိုယ့်ကိုယ်ကို သတ်မှတ်ခြင်း စသဖြင့် စွဲဆိုခံထားရသည်။

အဆိုပါ လုပ်ဆောင်ချက်များသည် အခြေခံဥပဒေနှင့် စည်းမျဉ်းတို့ကို ချိုးဖောက်မှုဖြစ်သည်ဟု သတ်မှတ်ခဲ့သည်။

ဆူမီအား အပြစ်ပေးမှုသည် ၂၀၂၃ ခုနှစ်၊ ဇန်နဝါရီ ၄ ရက်နေ့မှ စတင် အကျုံးဝင်ခဲ့ကြောင်းလည်း ကွန်ယတ်က ပြောသည်။

NSCN-K (Khango) မှ ခေါင်းဆောင် ခန်ဂိုကွန်ယတ်နဲ့အဖွဲ့ကိုတွေ့ရစဉ်(GETTY IMAGES)

ထို့နောက် ဆူမီအား ၎င်း၏လုပ်ပိုင်ခွင့်၊ တာဝန်များအားလုံးမှ ဖယ်ရှားကြောင်း ၊ ၎င်းသည် GPRN/NSCN-K တို့၏ အစိတ်အပိုင်း မဟုတ်တော့ကြောင်း၊ အဖွဲ့အစည်း အနေဖြင့် ယခုအချိန်မှ စတင်ကာ ၎င်း၏ လုပ်ဆောင်မှုများကို လုံးဝ တာဝန်ယူမည် မဟုတ်ကြောင်း ကွန်ယတ်၏ အသိပေးစာတွင် ဖော်ပြထားသည်။

ဆူမီသည် နာဂလန်းအမျိုးသားနိုင်ငံရေးအုပ်စုများ (NNPGs) မှ NSCN-K (Khango) ကို ကိုယ်စားပြုကာ ယင်း၏ လုပ်ငန်းကော်မတီမှ ပူးတွဲဖိတ်ခေါ်သူတစ်ဦးလည်း ဖြစ်သည်။

ခန်ဂိုကွန်ယတ်သည် မြန်မာနိုင်ငံတွင် အခြေစိုက်၍ အိန္ဒိယကိုတော်လှန်နေသည့် နာဂအမျိုးသားဆိုရှယ်လစ် ကောင်စီ-ကပ္ပလန်(NSCN-K)မှ ဖြစ်သည်။

ဦးကပ္ပလန် ၂၀၁၇ ခုနှစ်၊ ဇွန်လတွင် ကွယ်လွန်သွားခဲ့သည့်အတွက် ခန်ဂိုကွန်ယတ်ကို NSCN-K(Khango) ဥက္ကဋ္ဌအဖြစ် ရွေးချယ်တင်မြောက်ခဲ့သည်။

ထို့နောက် ခန်ဂိုကွန်ယတ်ကို တာဝန်မကျေမွန်မှုဖြင့် NSCN-K ၏ ဗဟိုဌာနချုပ်တည်ရှိရာ နမ်းယွန်းမြို့နယ်ရှိ တံခါးစခန်းတွင် ၂၀၁၈ ခုနှစ်၊ သြဂုတ်လ ၁၅ ရက်နေ့မှ ၁၇ ရက်နေ့အထိ ခေါင်းဆောင်ပိုင်း အစည်းအဝေး ပြုလုပ်ပြီး ဥက္ကဋ္ဌ အဖြစ်မှ ထုတ်ပယ်ကာ ဦးယုံးအောင်(Yung Aung)အား ဥက္ကဋ္ဌအဖြစ် တင်မြှောက်ခဲ့သည်။

လက်ရှိတွင် ခန်ဂိုကွန်ယတ် ဦးဆောင်သည့် NSCN-K(Khango)သည် အိန္ဒိယအစိုးရနှင့် ငြိမ်းချမ်းရေးယူထားပြီး အိန္ဒိယဘက်ခြမ်းမှာ နေထိုင်လျက်ရှိသည်။

Source: Northeast News

CNI International News

လန်ဒန်၊ ဇန်ဝါရီ ၆

တော်ဝင်မင်းသားနှစ်ဦး စကားများရန်ဖြစ်ခဲ့သည့် ဖြစ်စဉ်တစ်ခုအတွင်း မင်းသားဝီလျံက ညီဖြစ်သူ မင်းသား ဟယ်ရီကို ပုတ်ခတ်ပြောဆိုကာ ရုပ်ပိုင်းဆိုင်ရာ တိုက်ခိုက်မှုလုပ်ဆောင်ခဲ့သည်ဟု မင်းသားဟယ်ရီ၏ စာအုပ်သစ် တွင် ထည့်သွင်းရေးသားထားကြောင်း The Guardian သတင်းစာက ကြာသပတေးနေ့တွင် ဖော်ပြခဲ့သည်။

မင်းသားဟယ်ရီ၏ ကိုယ်တွေ့မှတ်တမ်းစာအုပ်သစ်ဖြစ်သော Spare ကို လာမည့် သီတင်းပတ်တွင် ထုတ်ဝေမည် ဖြစ်ကာ ယင်း၏ကနဦးမိတ္တူကို ရရှိထားသည်ဟု The Guardian က ဆိုသည်။ သတင်းတွင် ဖော်ပြချက်အရ ၂၀၁၉ ခုနှစ် ကန်ဆင်တန် (Kensington) နန်းတော် နေအိမ်၌ စကားများမှုတစ်ခုအတွင်း ဝီလျံက ဟယ်ရီ၏ ဇနီးဖြစ်သူ မင်းသမီးဟောင်း မီဂန်မာကယ် (Meghan Markle) ကို ပေါင်းသင်းရ ခက်ခဲသူ၊ ရိုင်းပြသူ၊ ကြမ်းတမ်းသူဟု ပြောခဲ့ ကြောင်း ဖော်ပြထားပြီး ဝီလျံသည် ဟယ်ရီကို ကော်လံမှဆွဲကာ ကိုင်ပေါက်ခဲ့သည်ဟုလည်း သတင်းစာတွင် ရေးသားထားသည်။ ခွေးစားခွက်ပေါ်ကို ပြုတ်ကျခဲ့ပြီး ခွက်လည်း ကွဲသွားခဲ့ကြောင်း၊ အကွဲစများက အသားထဲ စူးဝင်ခဲ့ကြောင်း မင်းသားက ရေးသားထားသည်ဟု သတင်းတွင်ဖော်ပြထားကာ အဆိုပါဖြစ်ရပ်ကြောင့် ပွန်းရာများအပြင် အသားကြေမှုပါဖြစ်ခဲ့သည်ဟု သိရသည်။ နောက်ပိုင်းတွင် ဝီလျံက ပြန်လည်တောင်းပန်ခဲ့ သည်ဟုလည်း သတင်း၏ကောက်နုတ်ချက်တွင် ပါရှိသည်။

မင်းသားဟယ်ရီ၏ စာအုပ်အသစ်အတွက် ပရိုမိုးရှင်း ပိုစတာ(ဓါတ်ပုံ-အေပီ)

Guardian ၏ သတင်းဖော်ပြမှုမတိုင်ခင် ဆယ်လီဝက်ဘ်ဆိုဒ်တစ်ခုဖြစ်သော Page Six တွင်လည်း မင်းသား ဝီလျံနှင့် ဇနီးသည်ဖြစ်သူ ကိတ်တို့သည် ၂၀၀၅ ခုနှစ်ပါတီပွဲတစ်ခုအတွက် နာဇီဝတ်စုံကိုဝတ်ဆင်ရန် ဟယ်ရီကို တိုက်တွန်းခဲ့ဖူးသည်ဟုလည်း ရေးသားခဲ့ဖူးသည်။ သို့သော် ဘက်ကင်ဟမ်နန်းတော် (Buckingham Palace) အပြင် ဝီလျံ၏ ကန်ဆင်တန် နန်းတော် (Kensington Palace) တို့ဘက်မှ အဆိုပါရေးသားမှုများအတွက် တစုံတရာတုန့်ပြန်ထားခြင်းမရှိသေးပေ။

ဟယ်ရီ၏စာအုပ်အသစ်ကို လာမည့် အင်္ဂါနေ့တွင် ထုတ်ဝေမည်ဖြစ်ပြီး ယင်းနှင့်ဇနီးဖြစ်သူတို့၏ ဖွင့်ဟဖော်ထုတ်မှု များက ဗြိတိန်တော်ဝင်မိသားစုအပေါ်လှုပ်ခတ်မှုများ ပေါ်ပေါက်လာဦးမည်လည်းဖြစ်သည်။ အသက် ၃၈ နှစ် အရွယ်မင်းသားဟယ်ရီသည် အမေရိကန်မင်းသမီးဟောင်းနှင့် ၂၀၁၈ ခုနှစ် မေလတွင် ဝင်းဆောရဲတိုက် (Windsor Castle) တွင် လက်ထပ်ခဲ့သည်။

မင်းသား ဝီလျံနှင့် မင်းသားဟယ်ရီတို့ကို ၎င်းတို့၏ ဇနီးများနှင့်အတူ တွေ့ရစဉ်(ဓါတ်ပုံ-အေပီ)

လက်ထပ်ပြီး နှစ်နှစ်အကြာတွင် ၎င်းတို့စုံတွဲသည် တော်ဝင်အဆောင်အယောင်များကို စွန့်ခွာပြီး ကယ်လီဖိုးနီးယား သို့ ပြောင်းရွှေ့ခဲ့သည်။ မင်းသမီးအပေါ် ခွဲခြားဆက်ဆံမှုများနှင့် တော်ဝင် နန်းတော်၏ မင်းသမီးအပေါ် မကြည်ဖြူ မှုများကြောင့်ဟု အကြောင်းပြကာ ထိုသို့ လုပ်ဆောင်ခဲ့ခြင်းဖြစ်သည်။

ထိုအချိန်မှစ၍ ၎င်းတို့သည် တော်ဝင်မိသားစုနှင့်ပတ်သက်သည့် ၎င်းတို့ဘက်မှ အမြင်များကို အော်ပရာဝင်းဖရေး (Oprah Winfrey) နှင့် အင်တာဗျူးပြုလုပ်ခဲ့သလို လွန်ခဲ့သောလက Netflix မှ ထုတ်လွှင့်ခဲ့သော အပိုင်း ခြောက်ပိုင်းပါ documentary တွင်လည်း ၎င်းတို့အပေါ် ဗြိတိန်မီဒီယာများ၏ဆက်ဆံမှု၊ တော်ဝင်မိသားစု၏ အမြင်မကြည်မှုတို့ကို ထုတ်ဖော်ခဲ့သည်။

Source:AP

CNI International news

အစ္စလာမ္မာဘတ်၊ ဇန်နဝါရီ - ၅

မိမိတို့ကို စစ်ကြေညာခဲ့သည့်အတွက် အစိုးရအဖွဲ့အတွင်းရှိနေသော နိုင်ငံရေးပါတီများ၏ ထိပ်သီး ခေါင်းဆောင် များအပေါ် ပြင်းထန်သည့် တုန့်ပြန်မှုများ ပြုလုပ်သွားမည်ဟု ပါကစ္စတန်တာလီဘန်အဖွဲ့(TTP)က သတိပေးခဲ့ ကြောင်း အယ်ဂျာဇီးယားသတင်းတွင် ဖော်ပြထားသည်။

TTP အဖွဲ့မှ ဗုဒ္ဓဟူးနေ့တွင် ထုတ်ပြန်ခဲ့သော ကြေညာချက်၌ ဝန်ကြီးချုပ် ရှာဘတ် ရှရစ် (Shehbaz Sharif) နှင့် နိုင်ငံခြားရေးဝန်ကြီး ဘီလာဝယ်လ် ဘူတိုဇာဒါရီ (Bilawal Bhutto Zardari) တို့၏ နာမည်များလည်း ပါဝင်နေသည်။

ရှရစ်သည် PML-N ပါတီ၏ ဥက္ကဋ္ဌဖြစ်ကာ ဘူတိုဇာဒါရီ၏ PPP ပါတီသည် ပါကစ္စတန် အစိုးရတွင် အဓိက ပါတနာ များ ဖြစ်သည်။ TTP အနေဖြင့် ယခင်က နိုင်ငံရေးပါတီများကို ပစ်မှတ်ထားခြင်းမျိုး မလုပ်ခဲ့ကြောင်း အဖွဲ့၏ ပြောခွင့်ရပုဂ္ဂိုလ်က အယ်ဂျာဇီးယားသို့ ပြောကြားခဲ့သည်။

ပါကစ္စတန်တာလီဘန်အဖွဲ့ကိုတွေ့ရစဉ် (GETTY IMAGES)

သို့သော် PML-N နှင့် PPP ပါတီနှစ်ခု အနေဖြင့် ၎င်းတို့၏ ရပ်တည်ချက်အတိုင်း ဆက်သွားနေမည်ဆိုလျှင် ၎င်းတို့၏ ပါတီများမှ ခေါင်းဆောင်များအပေါ် အရေးယူမှုများ လုပ်ဆောင်သွားမည်ဖြစ်ကြောင်းနှင့် ပြည်သူများ အနေဖြင့် ၎င်းတို့နှင့် နီးကပ်စွာနေခြင်းကို ရှောင်ကျဉ်ရမည်ဖြစ်ကြောင်းလည်း ပါကစ္စတန်တာလီဘန်(TTP)အဖွဲ့ ပြောခွင့်ရပုဂ္ဂိုလ်က ပြောသည်။

TTP ၏ ပစ်မှတ်များသည် နိုင်ငံ၏အကျိုးစီးပွားကို လျစ်လျူရှုကာ အနောက်အုပ်စု အလိုကျ လုပ်ဆောင်နေသော လုံခြုံရေးတပ်ဖွဲ့များသာ ဖြစ်ကြောင်းနှင့် နိုင်ငံတွင်းရှိ ဘာသာရေးကို အခြေခံသော ပါတီများ အနေဖြင့်လည်း TTP အား ဆန့်ကျင်မှုများကို ရှောင်ရှားစေလိုသည်ဟု ၎င်းက ပြောခဲ့သည်။

ပါကစ္စတန်နိုင်ငံ၏ အကြီးဆုံး လုံခြုံရေးအဖွဲ့ အမျိုးသားလုံခြုံရေးကော်မတီ(NSC)ကတော့ အကြမ်းဖက်မှုကို လုံးဝ သည်းခံမည် မဟုတ်ကြောင်းနှင့် အကြမ်းဖက်မှုကို ဖြစ်စေသည့် အရာများကိုလည်း လက်သင့်ခံမည် မဟုတ် ကြောင်း ထုတ်ပြန် ကြေညာခဲ့ပြီး နှစ်ရက်အကြာတွင် ပါကစ္စတန်တာလီဘန်၏ ခြိမ်းခြောက်မှု ပေါ်ထွက်လာခဲ့ခြင်း ဖြစ်သည်။

ပါကစ္စတန်လုံခြုံရေးတပ်ဖွဲ့ကိုတွေ့ရစဉ် (GETTY IMAGES)

NSC တွင် ရှရစ်နှင့် ပါကစ္စတန် စစ်ဦးစီးချုပ်သစ်တို့ အဖွဲ့ဝင်အဖြစ် ပါဝင်နေပြီး ပါကစ္စတန်မှ လုံခြုံရေး အခြေအနေ များအတွက် နှစ်ရက်ကြာ အစည်းအဝေး ပြုလုပ်ခဲ့ခြင်း ဖြစ်သည်။
တင်းကြပ်သော အစ္စလာမ္မစ် ဥပဒေများကို ပြဋ္ဌာန်းရန်၊ အနောက်မြောက် ခါဘာ ပတ်တန်ခွာ (Khyber Pakhtun khwa) ပြည်နယ်ကို ပါကစ္စတန်လူမျိုးစု ဧရိယာများနှင့် ပေါင်းစည်းခြင်းကို ပြန်ရုပ်သိမ်းရန် တိုက်ခိုက် နေရခြင်း ဖြစ်သည်ဟု TTP ဘက်က ပြောသည်။

TTP အဖွဲ့သည် ပြီးခဲ့သည့် နိုဝင်ဘာလတွင် အာဖဂန်တာလီဘန်အဖွဲ့က ကြားဝင် ဆောင်ရွက်ပေးထားသော အစိုးရနှင့် အပစ်အခတ် ရပ်စဲရေး သဘောတူညီချက်ကို တစ်ဖက်သတ် ဖျက်သိမ်းကာ တိုက်ခိုက်မှုများ ပြုလုပ်ရန် အဖွဲ့ဝင်များကို အမိန့်ထုတ်ပြန်ခဲ့သည်။

TTP ခေါင်းဆောင်ပိုင်းသည် အာဖဂန်မြေပေါ်တွင် ရှိနေသည်ဟု ပါကစ္စတန်ဘက်က စွပ်စွဲထားသော်လည်း အာဖဂန်အစိုးရကတော့ ငြင်းဆိုထားသည်။

Source: အယ်ဂျာဇီးယား

CNI International News

ကိယက်ဗ်၊ ဇန်နဝါရီ ၅

ရုရှားစစ်သားများစခန်းချရာ စက်ရုံသို့ ယူကရိန်းဒုံးကျည်ကျရောက်ခဲ့ခြင်းမှာ ခွင့်ပြုချက်မရှိဘဲ ဆဲလ်ဖုန်း ခိုးသုံးသည့် ရုရှားစစ်သားများကြောင့်ဖြစ်သည်ဟု ရုရှားစစ်တပ်ဘက်မှ ထုတ်ပြန်ကြောင်း AP သတင်းတွင် ဖော်ပြသည်။

အဆိုပါဖြစ်ရပ်ကြောင့် ရုရှားစစ်သားသေဆုံးမှုအရေအတွက်မှာ ၈၉ ဦးအထိ မြင့်တက်လာပြီလည်းဖြစ်သည်။

ဖုန်းမှထွက်သော အချက်ပြမှုများကြောင့် ယူကရိန်းဘက်မှ ရုရှားစစ်သားများရှိရာနေရာကို ပစ်ခတ်နိုင်ခဲ့ခြင်း ဖြစ်သည်ဟု အင်္ဂါနေ့နှောင်းပိုင်းထုတ်ပြန်ချက်တစ်ခု၌ ရုရှားဗိုလ်ချုပ်ကြီး ဆာဂီဆီယူကော့ဗ်(Sergei Sevryukov)က ပြောသည်။

နောင်တွင် ထိုသို့သော ဆိုးရွားသည့်ဖြစ်ရပ်မျိုး ထပ်မဖြစ်စေရန်အတွက် ကန့်သတ်ချက်များကို ထုတ်ပြန်သွားမည် ဟု ၎င်းကပြောကာ ဆဲလ်ဖုန်း ခိုးသုံးခဲ့သူများကိုလည်း ထိထိရောက်ရောက်အရေးယူသွားမည်ဟုပြောသည်။

ထိုဖြစ်စဉ်သည် နှစ်သစ်ကူးပြီးချိန်တွင်ပေါ်ပေါက်ခဲ့ခြင်းဖြစ်ကာ ယင်းမှာ ၁၀ လ ကျော်ကြာ ယူကရိန်းစစ်ပွဲအတွင်း ရုရှားတပ်ဖွဲ့ဝင် အများအပြားသေဆုံးခဲ့ရသည့် ဆိုးဆိုးရွားရွားဖြစ်ရပ်များမှတစ်ခုလည်း ဖြစ်သည်။ ယခုဖြစ်ရပ် သည် ယူကရိန်းကျူးကျော်စစ်အတွင်း ရှေ့တိုးနိုင်ရန် ရုန်းကန်နေရသော ရုရှားတပ်များအတွက် အထိနာစေသည့် ဖြစ်ရပ်တစ်ခုဖြစ်ရုံသာမက ယူကရိန်းတို့၏ တန်ပြန်ထိုးစစ်ဆင်မှုများ အောင်မြင်မှုရှိနေချိန်တွင် ရုရှားတို့၏စစ်ရေး ကိစ္စရပ်များအပေါ် ရုရှားနိုင်ငံတွင်းမှ ဝေဖန်မှုသစ်များကိုလည်း ပေါ်ပေါက်လာခဲ့စေသည်။

ယူကရိန်းဘက်မှ ဒုံးကျည်ထိမှန်ခဲ့သည့် ရုရှားစစ်သားများ  စခန်းချရာနေရာ၌ ပျက်ဆီးနေမှုများကို ဖယ်ရှားနေစဉ်(ဓါတ်ပုံ-ရိုက်တာ)

နှစ်သစ်ကူးညဖြစ်ရပ်တွင် ယူကရိန်းတပ်ဖွဲ့များသည် ရုရှားစစ်သားများစခန်းချရာ အဆောက်အဦကို အမေရိကန်မှ ထောက်ပံ့ထားသော HIMARS ဒုံးကျည်ပစ်ခတ်မှုစနစ်ဖြင့် ဒုံးကျည် ၆ လုံးပစ်ခတ်ခဲ့သည်။ နှစ်လုံးကို ရုရှားတို့ဘက် မှ ပစ်ချနိုင်ခဲ့သော်လည်း ၄ လုံးမှာ အဆောက်အဦကို ထိမှန်ပေါက်ကွဲခဲ့သောကြောင့် အဆောက်အဦ ပြိုကျမှု ဖြစ်စေခဲ့သည်။

အဆိုပါ တိုက်ခိုက်မှုနှင့်ပတ်သက်သည့် အသေးစိတ်အချက်အလက်များသည် ပြီးခဲ့သည့် ရက်ပိုင်းတွင်မှ တ ဖြည်းဖြည်းချင်း ပေါ်ပေါက်လာခဲ့ခြင်းဖြစ်သည်။ ယခုကဲ့သို့ ရုရှားတပ်ဖွဲ့ဝင်များသေဆုံးမှု မြင့်တက်နေရခြင်းမှာ ရုရှားအစိုးရ၏ ပရော်ဖက်ရှင်နယ်မဆန်သော စစ်ရေးလုပ်ဆောင်ချက်များကြောင့်ဖြစ်သည်ဟုလည်း ဗြိတိန် ထောက်လှမ်းရေးအရာရှိများက ဗုဒ္ဓဟူးနေ့တွင်ပြောခဲ့သည်။

အပျက်အစီးများ၏ အခြေအနေအရ တပ်ဖွဲ့များစခန်းချရာ နေရာအနီးတွင် လက်နက်ခဲယမ်းများကို ထားရှိနိုင်မည် ဟု ယူဆရကြောင်း၊ အဆိုပါ လက်နက်ခဲယမ်းများကပါ ထပ်မံပေါက်ကွဲခြင်းကြောင့် သေဆုံးသူအရေအတွက် များပြားရခြင်း ဖြစ်နိုင်သည်ဟု ဗြိတိန်ထောက်လှမ်းရေးဌာနက တွစ်တာတွင် ရေးသားခဲ့သည်။

ယခုဖြစ်ရပ် ဖြစ်ပွားပြီးနောက် ရုရှားကာကွယ်ရေးဌာနသည် ရုရှားစစ်သားသေဆုံးမှုများနှင့်ပတ်သက်သည့် ရှားရှား ပါးပါး ဝန်ခံမှုတစ်ခုကိုလုပ်ဆောင်ခဲ့ပြီး ကနဦးထုတ်ပြန်ချက်တွင် စစ်သား ၆၃ ဦးသေဆုံးသည်ဟု ဆိုသည်။

သို့သော် အပျက်အစီးများကို ရှာဖွေမှုများလုပ်ဆောင်ခဲ့ပြီးနောက် သေဆုံးသည့် စစ်သားအရေအတွက်မှာ မြင့်တက် လာခြင်းဖြစ်သည်။

Source:AP

CNI International News

ကိုလံဘို၊ ဇန်နဝါရီ ၅

ဖေဖော်ဝါရီလ မကုန်ခင် တစ်နိုင်ငံလုံးအတိုင်းအတာဖြင့် ရွေးကောက်ပွဲ ကျင်းပမည်ဟု သီရိလင်္ကာအစိုးရက ဗုဒ္ဓဟူးနေ့တွင် ကြေညာခဲ့ကြောင်း CNA သတင်းတွင် ဖော်ပြထားသည်။

၎င်းက ပဋိပက္ခများဖြင့် ရှုပ်ထွေးနေသော သီရိလင်္ကာနိုင်ငံတွင် ဆန္ဒပြမှုများကြောင့် သမ္မတဟောင်း ရာထူးမှ နုတ်ထွက်၍ ထွက်ပြေးခဲ့ရပြီးနောက် ပထမဆုံးသော ရွေးကောက်ပွဲ ဖြစ်ရုံမက လက်ရှိ သမ္မတသစ်အပေါ် ပြည်သူများ၏ ထောက်ခံမှုဆိုင်ရာ စမ်းသပ်ချက်လည်း ဖြစ်လာလိမ့်မည်။

၂၀၂၃ ခုနှစ်၊ ဖေဖော်ဝါရီလ မကုန်ခင် ရွေးကောက်ပွဲများကို ကျင်းပသွားမည်ဟု အာဏာပိုင်များက ပြောခဲ့သည်။

ကူးစက်ရောဂါကြောင့် ရွေးကောက်ပွဲကို တစ်နှစ် နောက်ကျ ကျင်းပရခြင်း ဖြစ်သည်။

သမ္မတဟောင်း ဂိုတာ ဘာယာ ရာဂျာပတ်ဆာ (Gotabaya Rajapaksa) ၏ နေရာကို ဆက်ခံထားသော လက်ရှိ သမ္မတ ရာနီဝစ်ရီမီဆင်ဟီ (Ranil Wickremesinghe)သည် လွှတ်တော်တွင်း၌ ၎င်းတို့ပါတီ၏ တစ်ဦးတည်းသော ကိုယ်စားလှယ် ဖြစ်နေခြင်းကြောင့် ရွေးကောက်ပွဲတွင် အရှက်ရစရာ ဖြစ်ရပ်များနှင့် ကြုံတွေ့ရနိုင်သည်ဟုလည်း ခန့်မှန်းထားကြသည်။

သီရိလင်္ကာ သမ္မတဟောင်း ဂိုတာ ဘာယာ ရာဂျာပတ်ဆာ နုတ်ထွက်ရေးတောင်းဆိုကြစဉ် (GETTY IMAGES)

အစားအစာ၊ လောင်စာနှင့် လျှပ်စစ်မီး ရှားပါးပြတ်လတ်မှုများကြောင့် ၂၀၂၁ နောက်ပိုင်းတွင် သီရိလင်္ကာပြည်သူများက သမ္မတဟောင်း ရာဂျာပတ်ဆာ အစိုးရကို လမ်းပေါ်ထွက် ဆန္ဒပြခဲ့ကြသည်။

ထို့ကြောင့် ၎င်းသည် ရာထူးမှ နုတ်ထွက်ကာ နိုင်ငံတွင်းမှ ထွက်ပြေးခဲ့ရသည်။ ရာဂျာပတ်ဆာ၏ နေရာတွင် အစားထိုးရန် လွှတ်တော်မဲခွဲမှုအတွင်း ဝန်ကြီးချုပ်အဖြစ် ခြောက်ကြိမ် တာဝန်ထမ်းဆောင်ဖူးသူ အသက် ၇၃ နှစ်အရွယ် ဝစ်ရီမီဆင်ဟီက အနိုင်ရ ရှိခဲ့သည်။

ရာဂျာပတ်ဆာ၏ ပါတီဖြစ်သော SLPP ၏ ထောက်ခံမှုဖြင့် ရရှိခဲ့သော်လည်း ၎င်းသည် လူကြိုက်များသူ တစ်ဦးတော့ မဟုတ်ပေ။

၎င်းသည် သမ္မတဟောင်း၏ အခွန်လျော့ချရေးကို ပြန်လည်ကျင့်သုံးခဲ့ကာ ငွေကြေးဖောင်းပွဲမှု စံချိန်တင် ၇၀ ရာခိုင်နှုန်းနီးပါး မြင့်တက်လာခြင်းကြောင့် ဈေးနှုန်းများကိုလည်း မြှင့်တင်ခဲ့သည်။

ထို့အပြင် အစိုးရဆန့်ကျင် ဆန္ဒပြပွဲများကို ဖြိုခွင်းရန်လည်း ဝစ်ရမီဆင်ဟီက အမိန့်ပေးခဲ့သည်။

၂၀၁၈ ရွေးကောက်ပွဲတွင် ၎င်း၏ပါတီသည် နေရာ ၃၄၀ မှ ၁၀ ရာခိုင်နှုန်းကိုသာ ရရှိခဲ့သည်။ သမ္မတက ဒေဝါလီ ခံထားရသော နိုင်ငံအနေဖြင့် ရွေးကောက်ပွဲကျင်းပရန် ကုန်ကျစရိတ် ရူပီး ၁၀ ဘီလီယံကို မသုံးနိုင်ကြောင်း ပြော ကာ ရွေးကောက်ပွဲကို ဆက်လက် ရွေ့ဆိုင်းရန် ပြောသော်လည်း ရွေးကောက်ပွဲကော်မရှင်က ကျင်းပခဲ့ခြင်း ဖြစ် သည်။

Source:CNA

CNI News

၂၀၂၃ ခုနှစ်၊ ဇန်နဝါရီ ၄

ဒီမိုကရေစီအရေးနှင့် တိုင်းရင်းသား တန်းတူညီမျှရေး ဖက်ဒရယ်အရေးကို တစ်ဦးတစ်ယောက်ကောင်း၊ အဖွဲ့အစည်းတစ်ခုကောင်းဖြင့် တည်ဆောက်၍ မရကြောင်း ပြည်သူ့ပါတီ (PP) က ထုတ်ပြန်ခဲ့သည်။

ထို့အတူ လက်ရှိ ပြည်တွင်းတွင် ဖြစ်ပေါ်နေသည့် နိုင်ငံရေးပြဿနာများကိုလည်း ရွေးကောက်ပွဲ နည်းလမ်းဖြင့် ဖြေရှင်းနိုင်မှာ မဟုတ်ကြောင်း ယနေ့ (၇၅ နှစ်ပြည့် လွတ်လပ်ရေးနေ့) နှင့် ပတ်သက်သည့် သဝဏ်လွှာတွင် ဖော်ပြထားသည်။

ပြည်သူ့ပါတီက “အခြေခံနိုင်ငံရေး ပြဿနာဖြစ်သည့် ဒီမိုကရေစီရေးနှင့် တိုင်းရင်းသား တန်းတူညီမျှရေး ဖက်ဒရယ်အရေးကို တစ်ဦးကောင်း တစ်ဖွဲ့ကောင်းဖြင့် တည်ဆောက်နိုင်မည် မဟုတ်ပါ။ ရွေးကောက်ပွဲ နည်းလမ်း သက်သက်ဖြင့်လည်း ဖြေရှင်းနိုင်မည် မဟုတ်ပါ။ နိုင်ငံတော်နှင့် နိုင်ငံသားများ၊ မွေးဖွားကြီးပြင်းလာကြမည့် မျိုးဆက်သစ် လူငယ်များ၏ အနာဂတ်အတွက် ရှေ့လာမည့် ဆယ်စုနှစ်တစ်ခုစာ နှစ်ခုစာ စသည်ဖြင့် ဘုံမျှော်မှန်း ချက်၊ ပြင်ဆင်ချက် တစ်ခုကို ဦးတည်လျက် နိုင်ငံရေး စစ်ရေး စီးပွါးရေး ဘာသာရေး လူမှုရေး နယ်ပယ်အသီးသီးမှ ခေါင်းဆောင်များ ဝိုင်းဝန်းညှိနှိုင်း ဖော်ထုတ်ကြမှသာ ဆိုးမွေများကို ချုပ်ငြိမ်းစေပြီး လွတ်လပ်ငြိမ်းချမ်းသော ကြွယ်ဝချမ်းသာသော အနာဂတ်နိုင်ငံတော်ကို လက်ဆင့်ကမ်း အမွေပေးနိုင်ကြမည်” ဟု သဝဏ်လွှာတွင် ပြောထားသည်။

ပြည်သူ့ပါတီခေါင်းဆောင် ဦးကိုကိုကြီးကိုတွေ့ရစဉ်

လက်ရှိ အချိန်ထိ အချုပ်အခြာအာဏာ ကိုယ်စားပြုမှုနှင့် ပတ်သက်၍ ကမ္ဘာ့ကုလသမဂ္ဂ အပါအဝင် အာဆီယံ အဖွဲ့အစည်းများအထိ အငြင်းပွားနေရဆဲဖြစ်ကြောင်း ပြည်သူ့ပါတီ၏ သဝဏ်လွှာတွင် ဖော်ပြထားသည်။

လက်နက်ကိုင်ပဋိပက္ခ၏ သက်တမ်းသည်လည်း လွတ်လပ်ရေးနှင့်အမျှ ကြာရှည်နေပြီး သေကြေပျက်စီးမှုများ၊ နိုင်ငံရေးအကျဉ်းသားများ၊ စစ်ဘေးရှောင်ပြည်သူများ၊ ပြည်ပထွက်ခွာနေကြသည့် လူသားအရင်းအမြစ်များ၏ ပမာဏမှာ ကြီးမားလွန်းလှပြီး အချုပ်အခြာအာဏာသည်လည်း လက်နက်ကိုင်ပဋိပက္ခများကြောင့် ပြင်းထန်စွာ ထိခိုက်နေရပြီဖြစ်ကြောင်း ဖော်ပြထားသည်။

CNI International News

ဘာလင်၊ ဇန်နဝါရီ ၃

နှစ်သစ်ကူးပွဲတော်တွင် မီးသတ်နှင့်ရဲတပ်ဖွဲ့ဝင်များကို မီးရှူးမီးပန်းများဖြင့် တိုက်ခိုက်ခဲ့မှုများအပေါ် ဂျာမနီအစိုးရက တနင်္လာနေ့(ဒီဇင်ဘာ ၂ ရက်)တွင် ပြစ်တင်ရှုတ်ချခဲ့သည်ဟု အေပီသတင်းတွင် ဖော်ပြထားသည်။

ဂျာမနီနိုင်ငံ တစ်ဝန်းလုံးရှိ လူများစွာသည် နှစ်သစ်ကူးချိန်တွင် မီးရှူးမီးပန်းများစွာကို အများနှင့်ဆိုင်သော နေရာများ၌ ပစ်လွှတ် ဖောက်ခွဲသည့် ဓလေ့အား ပြီးခဲ့သည့် စနေနေ့(ဒီဇင်ဘာ ၃၁ ရက်)တွင် ပြန်လည် ပြုလုပ်ခဲ့သည်။

ဆေးရုံကို အစုလိုက် အပြုံလိုက် ရောက်ရှိလာခြင်းကို ရှောင်ရှားရန်၊ ကိုဗစ်ရောဂါ ပျံ့နှံ့နေချိန်တွင် လူစုလူဝေး ဖြစ်ပေါ်ခြင်းကို တားဆီးရန်အတွက် မီးရှူးမီးပန်းများ ရောင်းချခြင်းအား နှစ်နှစ်ကြာ တားမြစ်ထားပြီးနောက် ထိုသို့ ပြန်လည် ပြုလုပ်လာခြင်း ဖြစ်သည်။

ထိုသို့ နှစ်သစ်ကူးချိန် အောင်ပွဲခံမှု အခမ်းအနားများတွင် အရေးပေါ် တပ်ဖွဲ့ဝင်များကို မီးရှူးမီးပန်းများနှင့် တိုက် ခိုက်မှုများ ပေါ်ပေါက်ခဲ့ခြင်း ဖြစ်သည်။ ဘာလင်မြိုတွင် တိုက်ခိုက်ခံရမှုပေါင်း အနည်းဆုံး ၃၈ ခုရှိပြီး ဝန်ထမ်း ၁၅ ဦး ဒဏ်ရာရှိခဲ့သည်ဟု မီးသတ်တပ်ဖွဲ့က ပြောသည်။

AP ဝန်ကြီးချုပ် အိုလပ်ဖ် စခို့ဇ်ကိုတွေ့ရစဉ် (GETTY IMAGES)

ရဲတပ်ဖွဲ့ကလည်း တပ်ဖွဲ့ဝင် ၁၈ ဦး ဒဏ်ရာ ရရှိခဲ့သည်ဟု ထုတ်ပြန်ကြောင်း DPA သတင်းတွင် ဖော်ပြထားသည်။

အကြမ်းဖက်မှုနှင့် ဖျက်ဆီးမှုများကို အလုံးအရင်းနှင့် လုပ်ဆောင်ခဲ့ခြင်းက မြို့ကို ဖျက်ဆီးခဲ့သည်ဟု ဘာလင် မြို့တော်ဝန် ဖရန်ဇီကာ ဂစ်ဖေး (Franziska Giffey) ကပြောသည်။

မီးရှူးမီးပန်းများ ရောင်းချခြင်းကို ပိတ်ပင်သည့် ဧရိယာများအား ထပ်မံတိုးချဲ့ရန် တာဝန်ရှိသူများက ဆွေးနွေးနေသည်ဟုလည်း သူမက တွစ်တာတွင် ရေးသားခဲ့သည်။

မီးရှူးမီးပန်းများဖြင့် တိုက်ခိုက်မှု ဖြစ်စဉ်များတွင် ပါဝင်မှုဖြင့် ဘာလင်မြို့ တစ်ခုထဲမှာပဲ လူ ၁၀၀ ကျော်ကို ဖမ်းဆီး ခဲ့သည့် ရဲတပ်ဖွဲ့ဝင်များကိုလည်း ဂျာမာန်ပြည်ထဲရေးဝန်ကြီး နန်စီဖေဆာ (Nancy Faeser) က ကျေးဇူးတင် ကြောင်း၊ တိုက်ခိုက်မှု၌ ပါဝင်သူတိုင်း တရားဥပေဒအရ အပြစ်ပေးခြင်းကို ခံရမည်ဟု ပြောသည်။

ဂျာမနီအစိုးရပြောခွင့်ရပုဂ္ဂိုလ် ခရစ္စတိန်း ဟော့ဖ်မန်း (Christiane Hoffmann) ကလည်း ဝန်ကြီးချုပ် အိုလပ်ဖ် စခို့ဇ် (Olaf Scholz)နှင့် အစိုးရအဖွဲ့သည် တိုက်ခိုက်မှုများနှင့် ပတ်သက်၍ ပြင်းပြင်းထန်ထန် ရှုတ်ချကြောင်း ပြောသည်။

Source: AP