CNI International News

ဘန်ကောက်၊ မေလ ၂၂

ထိုင်းအထွေထွေ ရွေးကောက်ပွဲတွင် အနိုင်ရရှိခဲ့သော Move Forward Party (MFP)ပါတီ အနေဖြင့် ညွန့်ပေါင်း အစိုးရတစ်ရပ် ဖွဲ့စည်းနိုင်ခြင်းမရှိပါက နိုင်ငံတွင်း ပဋိပက္ခနှင့် နောက်ထပ် အာဏာသိမ်းမှုများ ထပ်မံပေါ်ပေါက် လာနိုင်သည်ဟု ပညာရှင်တစ်ဦးက သတိပေးကြောင်း ဘန်ကောက်ပို့စ်မှ ဖော်ပြခဲ့သည်။

သို့သော် တစ်ဖက်တွင် ထိုင်းစစ်တပ်က နိုင်ငံ၏ ငြိမ်ဝပ်ပိပြားရေးကို ထိန်းသိမ်းနိုင်ရန် အကောင်းဆုံး လုပ်ဆောင် သွားမည်ဟု အာမခံချက်ပေးထားကာ နောက်ထပ် အာဏာသိမ်းမှုတစ်ခု ထပ်ဖြစ်လာနိုင်ချေနှင့် ပတ်သက်၍ လည်း ငြင်းချက် ထုတ်ထားသည်။

စနေနေ့ ဖေ့စ်ဘွတ်ခ် စာမျက်နှာ၌ ရေးသားခဲ့ရာတွင် ထိုင်း အမျိုးသားဖွံ့ဖြိုးတိုးတက်မှု စီမံခန့်ခွဲရေးအဖွဲ့ (Nida) ၏ နိုင်ငံရေးနှင့် ဖွံ့ဖြိုးတိုးတက်ရေး မဟာဗျူဟာ အစီအစဉ်၏ ဒါရိုက်တာဖြစ်သူ ဖီချိုင်း ရတ်နာတီလာကာ နာ ဘူခတ် (Phichai Ratnatilaka Na Bhuket) က MFP ပါတီအစိုးရ ဖွဲ့စည်းနိုင်လျှင် သို့မဟုတ် မဖွဲ့စည်းနိုင်လျှင် ပေါ်ပေါက် လာနိုင်ဖွယ်ရှိသည့် အခြေအနေများကို သုံးသပ်ပြောဆိုထားသည်။

ဒါရိုက်တာဖြစ်သူ ဖီချိုင်း ရတ်နာတီလာကာနာဘူခတ်ကို တွေ့ရစဉ် 

လက်ရှိတွင် စုစုပေါင်း လွှတ်တော် ၃၁၃ နေရာအထိ ရရှိထားသော MFP ဦးဆောင်သည့် ညွန့်ပေါင်းအဖွဲ့သည် နောက်ထပ် လွှတ်တော်၏ ထောက်ခံမှု အနည်းဆုံး ၆၆ နေရာ ရရှိလျှင် အစိုးရသစ်တစ်ရပ်ကို ဖွဲ့စည်းနိုင်လိမ့်မည် ဟု ၎င်းက ပြောသည်။

မဲဆန္ဒရှင်များ၏ ထောက်ခံမှုအပြင် နိုင်ငံတကာ၏ အသိအမှတ်ပြုမှုကို ရရှိထားခြင်းကြောင့် MFP ပါတီသည် အစိုးရတစ်ရပ်ကို ဖွဲ့စည်းနိုင်ခွင့်ရှိနေကာ ပါတီခေါင်းဆောင် ပီတာ လင်ဂျာရိုရန်ရတ် (Pita Limjaroenrat) သည်လည်း ဝန်ကြီးချုပ်သစ်အဖြစ် ရေပန်းစားနေသည်။

MFP ဦးဆောင်သည့် အစိုးရသစ် လက်ထက်တွင် ထိုင်းနိုင်ငံရေး အခြေအနေများ တည်ငြိမ်ကာ ဒီမိုကရေစီစနစ် ပိုမို အားကောင်းလာပြီး စီးပွားရေး တိုးတက်မှုများလည်း ရှိလာလိမ့်မည် ဖြစ်ကြောင်း၊ ထိုင်းနိုင်ငံသည် တခြား နိုင်ငံများ၏ အထင်ကြီးလေးစားမှုကို ရရှိလိမ့်မည် ဖြစ်ကြောင်းလည်း ၎င်းက သုံးသပ်သည်။

MFP ပါတီခေါင်းဆောင် Pita Limjaroenrat ကိုတွေ့ရစဉ်

ဆီးနိတ် လွှတ်တော်အမတ်များက မစ္စတာပီတာအား ဝန်ကြီးချုပ်အဖြစ် မဲပေးရန် ငြင်းဆန်မှုကြောင့် MFP အနေ ဖြင့်သာ ညွန့်ပေါင်းအစိုးရတစ်ရပ်ကို ဖွဲ့စည်းနိုင်ခြင်းမရှိပါက တိုင်းပြည်တွင် မတူကွဲပြားမှုများနှင့် ပဋိပက္ခများရှိ နေသည်။

ထို့ကြောင့် တည်ငြိမ်မှု ပျက်ပြားကာ၊ စီးပွားရေး ကျဆင်းမှုကို ဖြစ်စေ၍ တခြားနိုင်ငံများ၏ အမြင်တွင် မကောင်း သော ပုံရိပ်ထင်ဟပ် သွားစေလိမ့်မည်ဟု မစ္စတာ ဖီချိုင်းက ပြောသည်။
ဖြူးထိုင်း (Pheu Thai) ပါတီကသာ အစိုးရဖွဲ့စည်းရန် ခေါင်းဆောင်ဖြစ်လာပြီး ၎င်းတို့၏ အမတ်လောင်းအား လွှတ်တော်တွင် ဝန်ကြီးချုပ်နေရာအတွက် မဲပေးမှုခံယူပါကာ လွှတ်တော်၏ ထောက်ခံမှု ရရှိရန် အာမခံချက် မရှိဟု ၎င်းက ပြောသည်။

ထို့အပြင် ရှပ်နီများ၏ ကန့်ကွက်မှုကြောင့် ဖြူးထိုင်းပါတီ အနေဖြင့် Palang Pracharath နှင့် Bhumjaithai ပါတီတို့အား မဟာမိတ်အဖွဲ့တွင်းသို့ ခေါ်ဆောင်နိုင်မည် မဟုတ်ကြောင်းလည်း ဖီချိုင်းက သုံးသပ်သည်။
ထို့အပြင် မတူကွဲလွဲမှုများနှင့် ပဋိပက္ခများက အာဏာသိမ်းမှုတစ်ခုထံ ဦးတည်စေနိုင်ပြီး နိုင်ငံရေးကို စစ်တပ်က ဝင်ရောက်ခွင့်ရရှိကာ အာဏာကို ဆက်ထိန်းထားနိုင်ကြောင်း၊ ယင်းက နိုင်ငံအား အဘက်ဘက်က ကျဆင်းမှု ဖြစ်စေနိုင်ကြောင်း ၎င်းက သုံးသပ်ရေးသားထားသည်။

Source: ဘန်ကောက်ပို့စ်

CNI International News

နယူးဒေလီ၊ မေလ ၂၀

အိန္ဒိယ၏ ကာကွယ်ရေးပစ္စည်းများ ထုတ်လုပ်နိုင်မှုသည် ပြီးခဲ့သည့် ဘဏ္ဍာရေးနှစ်ကထက် ၁၂ ရာခိုင်နှုန်း မြင့်တက်လာကာ ပထမဆုံးအကြိမ်အဖြစ် ရူပီး ၁ ထရီလီယံ(ဒေါ်လာ ၁၂ ဘီလီယံ)ကို ကျော်လွန်သွားခဲ့သည်ဟု အိန္ဒိယအစိုးရက သောကြာနေ့တွင် ပြောကြောင်း Reuters သတင်းတွင် ဖော်ပြသည်။

ရုရှားကဲ့သို့ တခြားနိုင်ငံများမှ လက်နက် တင်သွင်းမှုအပေါ် မှီခိုနေရခြင်းကို လျှော့ချရန်အတွက် ပြည်တွင်း ထုတ်လုပ်မှုကို မြှင့်တင်ဆောင်ရွက်နေခြင်းလည်း ဖြစ်သည်။

အိန္ဒိယသည် ပြီးခဲ့သည့် ဆယ်စုနှစ်တွင် ကမ္ဘာ့လက်နက် တင်သွင်းမှု အများဆုံးနိုင်ငံတစ်ခုဖြစ်ကာ ယင်းစစ်တပ်၏ လက်နက်လိုအပ်ချက် တစ်ဝက်နီးပါးအတွက် ရုရှားကို မှီခိုနေရသည်။

သို့သော် ယူကရိန်းစစ်ပွဲကြောင့် ရုရှား၏ လက်နက်ရောင်းဝယ်မှု ရပ်တည်ချက် ပြောင်းလဲသွားကာ တင့်ကားများ၊ ဂျက်တိုက် လေယာဉ်များကို အိန္ဒိယသို့ ရောင်းချခြင်းထက် နိုင်ငံတွင်း သိုလှောင်ထားရန် ပိုမို ဦးစားပေးလာခဲ့သလို လေကြောင်းကာကွယ်ရေးစနစ်များ ပို့ဆောင်မှုတွင်လည်း ကြန့်ကြာမှုများ ရှိခဲ့သည်။

အိန္ဒိယစစ်တပ်ကိုတွေ့ရစဉ်

မတ်လ ၃၁ ရက်တွင် အဆုံးသတ်သော တစ်နှစ်အတွင်း အိန္ဒိယ၏ ပြည်တွင်း ကာကွယ်ရေးပစ္စည်းများ ထုတ်လုပ်မှု တန်ဖိုးသည် ရူပီး ၁ ဒသမ ၀၇ ထရီလီယံ ကျော်သွားခဲ့ကာ ပုဂ္ဂလိက ကုမ္ပဏီတချို့၏ အချက်အလက်များ ထပ်ပေါင်းလျှင် ယင်းထက်ပို၍ တန်ဖိုးမြင့်တက် လာနိုင်သည်ဟု ကာကွယ်ရေးဌာနက ထုတ်ပြန်သော ကြေညာချက် တစ်စောင်တွင် ဖော်ပြသည်။

အစိုးရသည် ကာကွယ်ရေးပစ္စည်း ထုတ်လုပ်ရေးလုပ်ငန်းများ၊ အဖွဲ့အစည်းများနှင့် စဉ်ဆက်မပြတ် ပူးပေါင်း ဆောင်ရွက်ကာ ၎င်းတို့ ရင်ဆိုင်နေရသော စိန်ခေါ်မှုများကို ဖယ်ရှာရေးနှင့် နိုင်ငံတွင်း ကာကွယ်ရေး လက်နက် ထုတ်လုပ်မှုအား အဆင့်မြှင့်တင်ရေးတို့ကို လုပ်ဆောင်နေသည်ဟုလည်း ကာကွယ်ရေးဝန်ကြီးဌာနက ပြောသည်။

ရုရှားနဲ့ အိန္ဒိယ ပူးပေါင်းထုတ်လုပ်တဲ့ ဒုံးကျည်ကိုတွေ့ရစဉ်

ပြီးခဲ့သည့် နှစ်များအတွင်း ကာကွယ်ရေးပစ္စည်း ထုတ်လုပ်မှု လိုင်စင်ထုတ်ပေးခြင်း အရေအတွက်သည် သုံးဆ နီးပါး မြင့်တက်လာသည်ဟုလည်း ကြေညာချက်တွင် ပါဝင်သည်။

ထို့အပြင် အိန္ဒိယ၏ လက်နက်တင်ပို့မှုသည်လည်း မြင့်တက်လာကာ ပြီးခဲ့သည့် ဘဏ္ဍာရေးနှစ်အတွင်း ၂၄ ရာခိုင် နှုန်း ရူပီး ဘီလီယံ ၁၆၀ အထိ မြင့်တက်လာသည်ဟု ဖော်ပြထားသည်။

အိန္ဒိယမှ တင်ပို့သော ပစ္စည်းများတွင် Dornier-228 လေယာဉ်များ၊ အမြောက်များ၊ ရုရှားနှင့် ပူးတွဲ ထုတ်လုပ်ထား သော Brahmos ဒုံးကျည်များ၊ ရေဒါများ၊ သံချပ်ကာ ကားများ၊ ဒုံးများနှင့် လောင်ချာများ၊ ခဲယမ်းများ အပြင် တခြားသော အသုံးအဆောင်ပစ္စည်းများပါ ပါဝင်သည်ဟု သိရသည်။

Source: Reuters

CNI International News

ဟီရိုရှီးမား၊ မေလ ၂၀

နျူကလီးယားကင်းစင်သော ကမ္ဘာကြီးဖြစ်ရေးအမြင်အား မြှင့်တင်ရန်အတွက် ဂျပန်ဝန်ကြီးချုပ် ဖူမီရို ကီရှီဒါက ဟီရိုရှီးမား (Hiroshima) မြို့ရှိ နျူကလီးယားဗုံးကျရောက်ခဲ့သောနေရာသို့ G7 ခေါင်းဆောင်များကို ခေါ်ဆောင် သွားခဲ့သည်ဟု အယ်လ်ဂျာဇီးယားသတင်းတွင် ဖော်ပြသည်။

ဂျပန်သည် အမေရိကန်၏ နျူကလီးယားအရိပ်အောက်တွင် စစ်အင်အားကို တိုးချဲ့ရေးအတွက် အရှိန်မြှင့်တင် ဆောင်ရွက်နေသောနိုင်ငံဖြစ်ခြင်းကြောင့် ကီရှီဒါသည် ဂျပန်၏ ကာလရှည် စစ်ဆန့်ကျင်ရေး ရပ်တည်ချက်ကို ပြောင်းလဲခဲ့သည့် ခေါင်းဆောင်တစ်ဦးအဖြစ်လည်း သတ်မှတ်ခြင်းခံရမည့်သူ ဖြစ်လာနိုင်သည်။

ထိုသို့ မတူညီသောအခြေအနေနှစ်ခုက လုံခြုံရေးအရ မသေချာမရေရာမှုများသော အခြေအနေတွင် ဂျပန် ဝန်ကြီးချုပ်အနေဖြင့် အစီအစဉ်များကို ရေးဆွဲရန် ကြိုးစားကာ ၎င်းတို့၏ နိုင်ငံတကာပုံရိပ်ကိုဆင့်ကဲ ပြောင်းလဲ နေသည်ဆိုခြင်းကိုလည်း ဖော်ညွှန်းနေသည်။

ထိုင်ဝမ်အပါအဝင် တရုတ်၏ဒေသတွင်း နယ်မြေပိုင်ဆိုင်ကြောင်း ထုတ်ဖော်ပြောဆိုမှုများ မြင့်တက်လာခြင်း၊ မြောက်ကိုရီးယား၏ နျူကလီးယားလက်နက်နှင့် ပဲ့ထိန်းဒုံးကျည်များထုတ်လုပ်မှုအတွက် စိုးရိမ်မှုရှိနေရခြင်း စသည့်အခြေအနေများက ဂျပန်အစိုးရကို တုန်လှုပ်စေလျက်ရှိသည်။

G7 ခေါင်းဆောင်များတွေ့ဆုံပွဲတွင် အမေရိကန်သမ္မတ ဂျိုးဘိုင်ဒန် နိုင်ငံခြားရေးဝန်ကြီး အန်တိုနီ ဘလင်ကင် နှင့် ဂျပန်နိုင်ငံဆိုင်ရာ အမေရိကန်သံအမတ် Rahm Emanuel နှင့် ဂျပန်ဝန်ကြီးချုပ် ဖူမီယို ကီရှီဒါတို့ကို တွေ့ရစဉ်(ဓါတ်ပုံ- ရိုက်တာ)

တစ်ချိန်တည်းမှာပင် အာရှဒေသတို့ အမေရိကန်၏ ကာလရှည်သြဇာလွှမ်းမိုးရေးအပေါ် မေးခွန်းထုတ်မှုများ ရှိလာချိန်တွင် ဂျပန်အစိုးရသည် ၎င်းတို့၏ ကိုယ်ပိုင်လုံခြုံရေးအတွက် ပိုမိုတာဝန်ယူရမည့် အခြေအနေသို့ ရောက်ရှိလာသည်။ ယင်းကြောင့် ဒီဇင်ဘာလတွင် ကီရှီဒါသည် လာမည့်ငါးနှစ်အတွင်း ဂျပန်၏စစ်အသုံးစရိတ်ကို GDP ၏ ၂ ရာခိုင်နှုန်းအထိ နှစ်ဆမြှင့်တင်ရန် အစီအစဉ်ကို ထုတ်ပြန်ခဲ့သည်။

ယင်းက ဒုတိယကမ္ဘာစစ် နောက်ပိုင်းကတည်းက ရှိခဲ့သောဂျပန်နိုင်ငံ၏ ကာကွယ်ရေးဆိုင်ရာ အခြေအနေကို လည်း ကြီးမားစွာ သက်ရောက်မှုရှိစေခဲ့သည်။ ဂျပန်၏လုံခြုံရေးဆိုင်ရာ မဟာဗျူဟာအရွေ့တွင် နိုင်ငံ၏ ဆိုက်ဘာ ရေးရာ လုပ်နိုင်စွမ်းကို မြှင့်တင်ရန်၊ အဝေးမှရန်သူများကို ဖျက်ဆီးနိုင်စွမ်းရှိသည့် အမေရိကန်၏ ဒုံးကျည်များကို ဝယ်ယူရန် အစီအစဉ်များလည်း ပါဝင်သည်။

အမေရိကန်နှင့်ပူးပေါင်းမှုက ဂျပန်၏လုံခြုံရေးမူဝါဒအတွက် အရေးပါဆုံးအဖြစ် ရှိနေဆဲဖြစ်သော်လည်း ယင်းကို မသင့်တော်ဟု နားလည်သဘောပေါက်မှုရှိလာကြောင်း တိုကျိုတက္ကသိုလ်တစ်ခုမှ နိုင်ငံရေးသိပ္ပွံပညာရှင် တစ်ဦး က ပြောသည်။

ကြိုတင်ခန့်မှန်း၍ မရသောမလုံခြုံမှုအပြင် ထိုင်ဝမ်အရေးအတွက် အလွန်အမင်းစိုးရိမ်မှုရှိနေခြင်းက ဂျပန်အနေ ဖြင့် လုံခြုံရေးအတွက် ၎င်းတို့ကိုယ်တိုင် လုပ်ဆောင်မှုတိုးမြှင့်ကာ Quad နှင့် နေတိုးအဖွဲ့ဝင်များကဲ့သို့ တခြား သော မိတ်ဖက်များနှင့် ပူးပေါင်းဆောင်ရွက်မှုမြှင့်တင်ရန် လိုအပ်ကြောင်း သဘောပေါက်လာစေခဲ့သည်ဟု ၎င်းက ပြောသည်။

ယင်းကြောင့်ဂျပန်အနေဖြင့် နိုင်ငံတကာရေးရာကိစ္စများတွင် ထဲထဲဝင်ဝင် ပိုမိုပတ်သက်လာကြောင်း၊ G7 ညီလာခံ သည် ယင်းကို ပြသရန် အကောင်းဆုံးအခွင့်အလမ်းဖြစ်ကြောင်းလည်း ထို ပညာရှင်က သုံးသပ်ခဲ့သည်။

Source:Aljazeera

CNI International News

ဘန်ကောက်၊ မေလ ၂၀

တော်ဝင်မိသားစုအား စော်ကားပြောဆိုခြင်းဆိုင်ရာ ဥပဒေအား ပြင်ဆင်ရေးနှင့် ပတ်သက်သော ပါတီ၏ အငြင်း ပွားဖွယ် ရပ်တည်ချက်ကို မဟာမိတ်ဖြစ်လာနိုင်သည့် ပါတီများအနေဖြင့် ထောက်ခံရန်မလိုအပ်ဟု Move Forward ပါတီက သောကြာနေ့တွင် ပြောခဲ့ကြောင်း Reuters သတင်းတွင် ဖော်ပြထားသည်။

ရွေးကောက်ပွဲတွင် နေရာ အများဆုံး အနိုင်ရရှိခဲ့သော Move Forward ပါတီသည် အစိုးရဖွဲ့ရန်အတွက် တခြား သော ပါတီများ၏ ထောက်ခံမှုကို ရရှိရန် ကြိုးပမ်းနေချိန်၌ ထိုသို့ ပြောဆိုခဲ့ခြင်း ဖြစ်သည်။

ပီတာ လင်ဂျာရိုရန်ရတ် (Pita Limjaroenrat) ဦးဆောင်သည့် Move Forward ပါတီသည် စီးပွားရေး လက်ဝါးကြီး အုပ်မှု ပယ်ချခြင်း ၊ ပုဒ်မ ၁၁၂ ဟု ထင်ရှားသော တော်ဝင်မိသားစုအား စော်ကားပြောဆိုခြင်းနှင့် သက်ဆိုင်သည့် တင်းကြပ်သော ဥပဒေကို ပြင်ဆင်ခြင်း စသော မူဝါဒများကြောင့် လူငယ်မဲဆန္ဒရှင်များ၏ ထောက်ခံမှုကို ရရှိခဲ့ခြင်း ဖြစ်သည်။

Pita Limjaroenrat ကို တွေ့ရစဉ်

တခြားပါတီများ အနေဖြင့် ၁၁၂ နှင့် ပတ်သက်၍ သဘောတူလျှင် အစိုးရဖွဲ့စည်းရေး သဘောတူညီချက်တွင် ပါဝင်ရန် အဆင်သင့် ရှိနေမည် ဖြစ်ကြောင်း၊ သို့သော် ယင်းက အစိုးရဖွဲ့စည်းရေးတွင် ပါဝင်ရန် မဖြစ်မနေ လုပ်ဆောင်ရမည့် အရာမဟုတ်ကြောင်း Move Forward ၏ တာဝန်ရှိသူတစ်ဦးက ပြောသည်။

ပါတီအနေဖြင့် ဥပဒေရေးရာ ပြင်ဆင်မှုများကို လွှတ်တော်တွင် လွတ်လပ်စွာ တင်သွင်းသွားမည် ဖြစ်ကြောင်း လည်း ၎င်းက ပြောသည်။

ထိုင်းနိုင်ငံအတွက် ညွှန့်ပေါင်းအစိုးရဆိုင်ရာ သဘောတူညီချက်ကို လာမည့် တနင်္လာနေ့တွင် ထုတ်ပြန် ကြေညာ မည်ဟု ယူဆရသည်။

ပုဒ်မ ၁၁၂ အရ တော်ဝင်မိသားစုအား စော်ကားသူကို ထောင်ဒဏ် ၁၅ နှစ်အထိ အပြစ်ပေးနိုင်ကာ ယင်းကို ထိုင်းနိုင်ငံသား အများစုက ပြင်းထန်လွန်းသည်ဟု သတ်မှတ်ထားသည်။

ပြီးခဲ့သော နှစ်များအတွင်း ထိုဥပဒေဖြင့် အရေးယူခံရသူ အယောက် ၂၀၀ ခန့်ရှိကြောင်း၊ ယင်းကို သဘောထား ကွဲလွဲသူများအား နှိပ်ကွပ်ရန် အသုံးချနေသည်ဟု အတိုက်အခံများက ပြောသည်။

Bhumjaithai ပါတီခေါင်းဆောင်ကို တွေ့ရစဉ်

Move Forward ပါတီက ဥပဒေပါ ထောင်ဒဏ်ကို လျှော့ချပြင်ဆင်ရန်၊ ယင်းနှင့်ပတ်သက်သည့် တရားလိုများကို တော်ဝင်ရေးရာဗျူရို တစ်ခုထဲအဖြစ် လျှော့ချပြင်ဆင်ရန် လိုလားနေသည်။

Move Forward ၏ ၈ ပါတီ ညွှန့်ပေါင်းအဖွဲ့သည် ဥပဒေပြုလွှတ်တော်နေရာ ၇၅၀ မှ ၃၁၃ နေရာကို ရရှိထားသော် လည်း စစ်တပ်မှ ရေးဆွဲသော အခြေခံဥပဒေအရ ၎င်းတို့အနေဖြင့် အစိုးရဖွဲ့စည်းရန် ရွေးကောက်ခံ မဟုတ်သော ဆီးနိတ်လွှတ်တော်၏ ထောက်ခံမှုနှင့် တခြားပါတီများ၏ ထောက်ခံမှုတို့ လိုအပ်မည် ဖြစ်သည်။

ရွေးကောက်ပွဲတွင် တတိယနေရာမှ အနိုင်ရရှိခဲ့သော Bhumjaithai ပါတီဘက်က ၎င်းတို့အနေဖြင့် တော်ဝင်မိသား စုအား စော်ကားခြင်းနှင့် ပတ်သက်သည့် ဥပဒေကို ပြင်ဆင်ရန် ကြိုးပမ်းမှုများကို ထောက်ခံသွားမည် မဟုတ်ဟု တရားဝင် ထုတ်ဖော်ပြောဆိုထားသည်။

Move Forward အနေဖြင့် ထိုဥပဒေပြင်ဆင်ရေးတွင် တခြားသောပါတီများကို ဖိအားမပေးခြင်းဖြင့် ထောက်ခံမှု များကို ပိုမိုရရှိနိုင်သည်ဟုလည်း လေ့လာသုံးသပ်သူများက ပြောသည်။

Source: Reuters

CNI International News

ကွီတို၊ မေလ ၁၉

အမျိုးသားလွှတ်တော်ကို ဖျက်သိမ်းသည့် သမ္မတ ဂွီလာမို လတ်ဆို (Guillermo Lasso) ၏ လုပ်ရပ်ကို အီကွေဒေါ ဥပဒေပြု လွှတ်တော်အမတ်များက ကြာသပတေးနေ့တွင် ပြစ်တင်ရှုတ်ချခဲ့သည်။

တိုင်းပြည်သည် မည်သည့် ပဋိပက္ခမှ ကြုံတွေ့နေရခြင်း မရှိဘဲ ယခုလို လွှတ်တော်ကို ဖျက်သိမ်းခြင်းက တရား မဝင်ကြောင်း စောဒကတက်ခဲ့သည်ဟု အေပီက ရေးသားခဲ့သည်။

လွှတ်တော် ဖျက်သိမ်းခြင်းကြောင့် အမတ်များသည် ရာထူးမှ ဖယ်ရှားခံခဲ့ရပြီလည်း ဖြစ်သည်။

ကွန်ဆာဗေးတစ်သမ္မတ လတ်ဆိုသည် လွှတ်တော်အား ဗုဒ္ဓဟူးနေ့တွင် ဖျက်သိမ်းခဲ့သည်။

လွှတ်တော်က ၎င်းအား စီမံခန့်ခွဲမှု အမှားများနှင့် ပတ်သက်သည့် စွပ်စွဲချက်များအပေါ် တရားရုံးတင် စစ်ဆေး ခြင်းဖြင့် ရာထူးမှ ဖယ်ရှားရန် ကြိုးပမ်းနေချိန်တွင် ထိုသို့ ဖျက်သိမ်းခဲ့ခြင်း ဖြစ်သည်။

လတ်ဆိုသည် နိုင်ငံရေးဆိုင်ရာ ပဋိပက္ခများ ပေါ်ပေါက်လာချိန်တွင် သမ္မတသည် လွှတ်တော်အား ဖျက်သိမ်းနိုင် သည်ဆိုသည့် ၂၀၀၈ ခုနှစ် ဖွဲ့စည်းပုံအခြေခံဥပဒေပါ အချက်ကို ပထမဆုံးအကြိမ် အသုံးချခဲ့ခြင်းလည်း ဖြစ်သည်။

လွှတ်တော်ဖျက်သိမ်းခြင်းဖြင့် ဥပဒေပြုလွှတ်တော် အမတ်များနှင့် သမ္မတရာထူးအတွက် ရွေးကောက်ပွဲများ ကျင်းပရန် လိုအပ်သည်ဟုလည်း ဖွဲ့စည်းပုံတွင် ပြဋ္ဌာန်းထားသည်။

သမ္မတ ဂွီလာမိုလတ်ဆိုကို တွေ့ရစဉ်

သို့သော် လွှတ်တော်ဥက္ကဋ္ဌဟောင်း ဗာဂီလီယို ဆတ်ကွီဆီလာ (Virgilio Saquicela)၏ ကြာသပတေးနေ့ တရားစွဲ ဆိုခြင်းတွင် တိုင်းပြည်သည် မည်သည့် လူမှုရေးဆိုင်ရာ အကျပ်အတည်းမှ မရှိသောကြောင့် လတ်ဆို၏ လုပ်ရပ် သည် ဖွဲ့စည်းပုံအား ချိုးဖောက်ခြင်း ဖြစ်သည်ဟု ထောက်ပြထားသည်။

၎င်းအား ရာထူးမှ ဖယ်ရှားရန် ကြိုးပမ်းခြင်းကြောင့်သာလျှင် လတ်ဆိုသည် လွှတ်တော်အား ကြောက်လန့်တကြား ဖျက်သိမ်းရခြင်း ဖြစ်သည်ဟုလည်း သမ္မတကို ဝေဖန်သူများက ပြောသည်။

အေပီနှင့် အင်တာဗျူး တစ်ခုတွင် ဆတ်ကွီဆီလာက သမ္မတသည် ၎င်းအား ရာထူးမှ ဖယ်ရှားခြင်းကို တားဆီးရန် အတွက် နောက်ဆုံး အချိန်တွင် ပရိယာယ်သုံးကာ ရှောင်တိမ်းခဲ့ခြင်း ဖြစ်သည်ဟု ပြောခဲ့သည်။

၎င်းအား ထောက်ခံသူ မရှိတော့မည့် အခြေအနေကို မြင်တွေ့ရသောအခါ သမ္မတက ထိတ်လန့်တကြား ဖြစ်ခဲ့ သည်ဟု ဆတ်ကွီဆီလာက ပြောသည်။

ဆတ်ကွီဆီလာ၏ တရားစွဲမှုအပြင် ယခင်က ရှိခဲ့ဖူးသော စွပ်စွဲချက်နှစ်ခုကို နိုင်ငံ၏ ဖွဲ့စည်းပုံအခြေဥပေဒခုံရုံးတွင် စစ်ဆေးသွားမည် ဖြစ်သော်လည်း ထိုရုံး၏ လုပ်ဆောင်ချက်များစွာသည် နှေးကွေးလွန်းသောကြောင့် ယခု တစ်ကြိမ်တွင် လျင်မြန်စွာ ဆောင်ရွက်ပေးရေး လွှတ်တော်အမတ်များက တောင်းဆိုထားသည်။ တစ်ဖက်တွင်လည်း အမျိုးသား လွှတ်တော် ကောင်စီသည် ရွေးကောက်ပွဲများ ကျင်းပရန် ရက်သတ်မှတ်ခြင်းနှင့် ပတ်သက်၍ စတင်ဆောင်ရွက် နေပြီလည်း ဖြစ်သည်။

အီကွေဒေါလွှတ်တော်အမတ်များကို တွေ့ရစဉ်

အီကွေဒေါဥပဒေတွင် သမ္မတအနေဖြင့် လွှတ်တော်သည် ၎င်း၏ လုပ်ပိုင်ခွင့်အား ကျော်လွန်ဆောင်ရွက်ခြင်း သို့မဟုတ် ဆိုးရွားသော နိုင်ငံရေး ပဋိပက္ခနှင့် ပြည်တွင်းရေး မတည်ငြိမ်မှုများ ရှိနေချိန်တွင် ဖျက်သိမ်းခွင့်ရှိ သည်ဟု ပြဋ္ဌာန်းထားသည်။

ဖျက်သိမ်းခံ လွှတ်တော်အမတ်များထံမှ ကန့်ကွက်မှုများ ရှိနေသော်လည်း သမ္မတသည် လွှတ်တော်အား ဖျက်သိမ်းရန် မည်သည့် အဖွဲ့အစည်းများထံမှ အတည်ပြုချက် မလိုအပ်ဟု အခြေခံဥပဒေတွင် ထင်ရှားစွာ ဖော်ပြထားကြောင်း ပြောခြင်းဖြင့် အီကွေဒေါအစိုးရအဖွဲ့ ဝန်ကြီးက သမ္မတ၏ လုပ်ရပ်ကို ကာကွယ် ပြောဆိုခဲ့ သည်။

Source: AP

CNI International News

ဟီရိုရှီးမား၊ မေလ ၁၉

ဟီရိုရှီးမား (Hiroshima) တွင် ပြုလုပ်မည့် G7 အစည်းအဝေးအတွက် ကမ္ဘာ့အင်အားကြီးနိုင်ငံများမှ ခေါင်းဆောင်များ ကြာသပတေးနေ့တွင် စုဝေးခဲ့ကြသည်ဟု AP သတင်းတွင်ဖော်ပြသည်။

ဂျပန်မှဦးဆောင်ကျင်းပမည့် အစည်းအဝေးတွင် ရုရှား၏ ယူကရိန်းကျူးကျော်စစ်ဆိုင်ရာ အကြောင်းအရာများက ကြီးစိုးသွားမည်ဟုလည်း ယူဆရသည်။

G7 နိုင်ငံများသည် အစည်းအဝေးပွဲများကို တရားဝင်စတင်မည့် သောကြာနေ့တွင် ရုရှားအား အရေးယူပိတ်ဆို့မှုသစ်များ ချမှတ်ရေး ထုတ်ပြန်ရုံသာမက ရုရှား၏ စစ်ရေးလှုပ်ရှားမှုများကို တားဆီးရေး၊ လက်ရှိအရေးယူမှုများကို နှစ်ဆမြှင့်တင်မည့် အစီအစဉ်များအပြင် ယင်းနှင့်ပတ်သက်နေသူများကို အပြစ်ပေးနိုင်ရေး စသည်တို့ကို ထုတ်ပြန် ကြေညာသွားမည်ဟု အမေရိကန်အရာရှိတစ်ဦးက ပြောသည်။

ထိုသို့ ပိတ်ဆို့အရေးယူမှုများကို အရှိန်မြှင့်တင်ဆောင်ရွက်ရေးတွင် အမေရိကန်နိုင်ငံအနေဖြင့် ရုရှားလက်နက် ထုတ်လုပ်ရေးတွင် ပါဝင်နေသာ ရုရှားနှင့်တတိယနိုင်ငံများမှ အဖွဲ့အစည်း ၇၀ ကျော်ကို အမည်ပျက်စာရင်း တင်သွင်းရေးနှင့် လူပုဂ္ဂိုလ်၊ အဖွဲ့အစည်း၊ လေယာဉ်နှင့် သင်္ဘော ၃၀၀ ကျော်ကို ပိတ်ဆို့အရေးယူမှုဆောင်ရွက်ရေး လုပ်ဆောင်သွားမည်ဟု အမည်မဖော်လိုသူ အမေရိကန်အရာရှိက ဆက်လက်ပြောကြားသည်။

အနုမြူဒဏ်သင့် အဆောက်အုံအား G7 ခေါင်းဆောင်များ ကြည့်ရှုနေစဉ်(ဓါတ်ပုံ-အေပီ)

ယူကရိန်းတွင် စစ်တိုက်နိုင်မှုကို လျော့ကျသွားစေရေးနှင့် ရုရှားအပေါ် ထပ်မံပိတ်ဆို့နိုင်ရေးတို့အတွက် G7 အဖွဲ့ အတွင်းရှိ တခြားသောနိုင်ငံများသည်လည်း အလားတူလုပ်ဆောင်ချက်များ ချမှတ်ဆောင်ရွက်သွားမည်ဟု အဆိုပါ အရာရှိကပြောသည်။ ယင်းနှင့်ပတ်သက်သည့် အသေးစိတ်အကြောင်းအရာများသည် သီတင်းပတ်ကုန်ပိုင်း အစည်းအဝေးပြီးဆုံးချိန်မှသာ ထွက်ပေါ်လာမည်လည်းဖြစ်သည်။

မွေးရပ်မြို့တွင် အစည်းအဝေးကို ဦးဆောင်ပြုလုပ်မည့် ဂျပန်ဝန်ကြီးချုပ် ဖူမီရို ကီရှီဒါ (Fumio Kishida) သည် အမေရိကန်သမ္မတ ဂျိုးဘိုင်ဒန် (Joe Biden) နှင့် တွေ့ဆုံခြင်းဖြင့် ကမ္ဘာလုံးဆိုင်ရာသံတမန်ရေးကို စတင် ဖွင့်လှစ်ခဲ့ပြီဖြစ်သည်။

ဘိုင်ဒန်သည် ဟီရိုရှီးမားမြို့အနီးရှိ စစ်စခန်းတစ်ခုသို့ သွားရောက်ပြီးနောက် ဂျပန်ဝန်ကြီးချုပ်နှင့် တွေ့ဆုံခဲ့ ခြင်းဖြစ်သည်။ ကီရှီဒါသည် သုံးရက်ကြာ အစည်းအဝေး မစတင်ခင် ဗြိတိန်ဝန်ကြီးချုပ် ရီရှီဆူနတ် (Rishi Sunak) နှင့် တွေ့ဆုံသွားမည်လည်း ဖြစ်သည်။
ဂျပန်-အမေရိကန် ပူးပေါင်းမှုသည် အင်ဒို-ပစိဖိတ်ဒေသ လုံခြုံရေးနှင့် ငြိမ်းချမ်းရေးအတွက် အခြေခံအချက်ဖြစ်သည်ဟု ဘိုင်ဒန်နှင့် တွေ့ဆုံမှုတွင် ကီရှီဒါက ပြောခဲ့သည်။

ဂျပန်ဝန်ကြီးချုပ် ဖူမီရို ကီရှီဒါနှင့် ဇနီး တို့က သမ္မတဂျိုးဘိုင်ဒန်နှင့် ဇနီးတို့အား လှည့်လည်ပြသနေစဉ်(ဓါတ်ပုံ-အေပီ)

နှစ်နိုင်ငံပူးပေါင်းမှုများ အလျင်အမြန်ဖွံ့ဖြိုးလာခြင်းအပေါ်များစွာ ကြိုဆိုကြောင်းလည်း ၎င်းက ပြောသည်။

နိုင်ငံများ အတူတကွရပ်တည်လျှင် ပို၍အင်အားကြီးလာကြောင်း၊ ထိုသို့ပြုလုပ်လျှင် ကမ္ဘာကြီးသည် ပိုမို လုံခြုံလိမ့်မည်ဟု ယုံကြည်ကြောင်း ဘိုင်ဒန်က ပြောခဲ့သည်။

အမေရိကန်သည် ရုရှားဗဟိုဘဏ်၏ ရံပုံငွေများကို ကန့်သတ်ခဲ့ကာ နိုင်ငံတကာဘဏ်စနစ်အတွင်းသို့ ရုရှားဘဏ်များ ဝင်ရောက်ခွင့်ကို ပိတ်ပင်ခဲ့ပြီး ရုရှားကုမ္ပဏီများ၊ အစိုးရအရာရှိများနှင့် မိသားစုဝင်ထောင်ပေါင်း များစွာကိုလည်း ပိတ်ဆို့အရေးယူမှု လုပ်ဆောင်ခဲ့သည်။ G7 အဖွဲ့ဝင်နိုင်ငံများသည် ပြီးခဲ့သည့်နှစ်တွင် ရုရှား၏ ရေနံနှင့်ဒီဇယ်များကို တစ်စည်လျှင် ဒေါ်လာ ၆၀ ဟုဈေးနှုန်းကန့်သတ်သည့် အရေးယူမှုကို ချမှတ်ခဲ့ကာ ယင်းက ရုရှား၏ရေနံမှ ရရှိသောဝင်ငွေကို လျော့ချရေးတွင်အောင်မြင်မှုရှိခဲ့သည်ဟု အမေရိကန်ဘဏ္ဍာရေးဌာနက ပြောသည်။

ပြီးခဲ့သည့်နှစ်နှင့် နှိုင်းယှဉ်လျှင် ရုရှား၏ ယခုနှစ် ဇန်နဝါရီမှ မတ်လအတွင်း ရေနံမှရရှိသော ဝင်ငွေပမာဏမှာ ၄၀ ရာခိုင်နှုန်းကျဆင်းသွားသည်ဟုလည်း ဘဏ္ဍာရေးဌာနက ထုတ်ပြန်သည်။

Source:AP

CNI International News

ကိယတ်ဗ်၊ မေလ ၁၉

ကြာသပတေးနေ့ အစောပိုင်းက ယူကရိန်းနိုင်ငံဒေသများသို့ ရုရှားဘက်မှ ခရုစ်ဒုံးကျည် အလုံး ၃၀ ဖြင့် ပစ်ခဲ့ရာမှာ ဒုံးကျည် ၂၉ လုံးကို ယူကရိန်းလေကြောင်းရန် ကာကွယ်ရေးက ပစ်ချနိုင်ခဲ့သည်ဟု AP သတင်းတွင် ဖော်ပြထား သည်။

အိုဒီဆာ (Odesa) တောင်ပိုင်းဒေရှိ အဆောက်အဦတစ်ခုကို ရုရှားဒုံးကျည် ထိမှန်ခဲ့ခြင်းကြောင့် လူတစ်ဦး သေဆုံးကာ နှစ်ဦးဒဏ်ရာ ရရှိခဲ့သည်ဟု ဒေသဆိုင်ရာ စစ်ဘက်အုပ်ရေးအဖွဲ့၏ ပြောခွင့်ရပုဂ္ဂိုလ် ဆာဟီဘရတ် ချောက်ခ် (Serhiy Bratchuk) က ပြောသည်။

ယူကရိန်းအပေါ် ရုရှား၏ လေကြောင်း တိုက်ခိုက်မှုများ အရှိန်မြင့်တက်လာချိန်တွင် အထူးကိုယ်စားလှယ် အဖွဲ့ သည် ယူကရိန်းသမ္မတ ဇာလန်းစကီး (Volodymyr Zelenskyy) နှင့် တွေ့ဆုံခဲ့သည်ဟု တရုတ်က ပြောသည်။

သို့သော် လက်ရှိအချိန်အထိ တရုတ်၏ ငြိမ်းချမ်းရေး အဆိုပြုချက်များသည် ယူကရိန်းစစ်ပွဲနှင့် ပတ်သက်သည့် တိုးတက်မှု တစ်စုံတစ်ရာ ဖော်ဆောင်ပေးနိုင်စွမ်း ရှိသေးသည့်ပုံ မရပေ။

 ရုရှားဒုံးကျည်ကြောင့် လူတစ်ဦးသေဆုံး

တိုးတက်မှုများကို ဖော်ဆောင်ရန်အတွက် စစ်ဖြစ်နေသော အဖွဲ့အစည်းများ အနေဖြင့် အပြန်အလှန် လေးစားမှုကို မြှင့်တင်ရန် လိုအပ်သည်ဟု တရုတ်နိုင်ငံခြားရေးဌာန ပြောခွင့်ရပုဂ္ဂိုလ် ဝမ်ဝန်ဘင်း (Wang Wenbin)က ပြော သည်။

တရုတ်ကိုယ်စားလှယ် အဖွဲ့နှင့်တွေ့ဆုံစဉ် ယူကရိန်း အာဏာပိုင်များသည် ယူကရိန်း အစိုးရ၏ ကိုယ်ပိုင် ငြိမ်းချမ်းရေး အစီအစဉ်အား တရုတ်၏ ထောက်ခံမှုရရှိရန် ကြိုးပမ်းခဲ့သည်ဟု ယူကရိန်းသမ္မတရုံးက ထုတ်ပြန် သည်။

ဇာလန်းစကီးဘက်မှ အဆိုပြုထားသော ငြိမ်းချမ်းရေး အဆိုပြုချက်တွင် ယူကရိန်း၏ အချုပ်အခြာ ပိုင်နက်ကို ပြန်လည် ထိန်းသိမ်းရန်၊ ရုရှားတပ်များ လုံးဝထွက်ခွာသွားရန်နှင့် ကျူးကျော်စစ်ပွဲအတွက် ရုရှားသမ္မတ ပူတင် (Putin) အား အရေးယူရန်တို့ ပါဝင်သည်။

တစ်ဖက်တွင်လည်း G-7 အဖွဲ့ခေါင်းဆောင်များသည် ကြာသပတေးနေ့တွင် ဂျပန်၌ တွေ့ဆုံမည်ဖြစ်ပြီး ရုရှား၏ ကျူးကျော်စစ်ကို ရှုတ်ချကာ ယူကရိန်းတပ်ဖွဲ့များကို ကူညီရေး ကတိပြုသွားမည်ဟု ယူဆရသည်။
အစည်းအဝေးတွင် ခေါင်းဆောင်များသည် ယူကရိန်းစစ်မြေပြင်နှင့် ပတ်သက်သည့် ဆွေးနွေးမှုများကို လုပ်ဆောင် သွားမည်ဟုလည်း အိမ်ဖြူတော်၏ အမျိုးသားလုံခြုံရေးအကြံပေးက ပြောသည်။

 ရုရှားက ယူကရိန်းကို ပစ်ခတ်နေစဉ်

ရုရှားသည် ကျယ်ပြန့်သော မိုင်းကွင်းများ အပါအဝင် ယူကရိန်းမြေပေါ်တွင် ခံတပ်အင်အား အခိုင်အမာ ဖော် ဆောင်ရန် ကြိုးပမ်းနေကြောင်း၊ ကီလိုမီတာ ၁၀၀၀ ခန့်ရှိသော ရှေ့တန်း စစ်မျက်နှာအတွင်း တပ်သားအင်အား ၂၀၀,၀၀၀ ကျော်ကို ပိုင်ဆိုင်ထားကြောင်း အနောက်အုပ်စုအရာရှိများ ကပြောသည်။

ယူကရိန်းသည် အနောက်အုပ်စု မဟာမိတ်များထံမှ ခေတ်မီ စစ်လက်နက်များကို ရရှိထားသောကြောင့် ရုရှား တပ်များအနေဖြင့် ယခင်က လုံခြုံသည်ဟု သတ်မှတ်ထားသည့် နယ်မြေများတွင်ပင် စစ်လေယာဉ်များ ဆုံးရှုံးမှုနှင့် ရင်ဆိုင်နေရသည်။

ယူကရိန်း တပ်ဖွဲ့ဝင်များသည် ရုရှားတို့၏ ခေတ်အမှီဆုံး လက်နက်တစ်ခုဖြစ်သော အသံထက် မြန်သည့် ပဲ့ထိန်းဒုံး ကျည်များကိုပင် ပစ်ချနိုင်သည့် စွမ်းရည်ကို ပိုင်ဆိုင်ထားသည်ဟု အနောက်အုပ်စု အရာရှိများက ပြောသည်။

Source: AP

CNI International News

ဘန်ကောက်၊ မေလ ၁၉

ထိုင်းရွေးကောက်ပွဲတွင် အများဆုံး အနိုင်ရရှိခဲ့သည့် Move Forward Party (MFP) ခေါင်းဆောင် ပီတာ လင်ဂျာ ရိုရန်ရတ် (Pita Limjaroenrat)က နိုင်ငံရေးပါတီ ၈ ပါတီ ပါဝင်သည့် ညွှန့်ပေါင်းအစိုးရတစ်ရပ် အစီအစဉ်ကို ကြာသပ တေးနေ့၌ တရားဝင် ထုတ်ပြန်ကြေညာခဲ့သည်။

အဆိုပါ ညွှန့်ပေါင်းအစိုးရ အစီအစဉ်ကို နိုင်ငံရေးပါတီ ၈ ပါတီထဲမှ လွှတ်တော်အမတ် ၃၁၃ ဦးပါဝင်ပြီး ပီတာက သူ့ကိုယ်သူ ဝန်ကြီးချုပ်အဖြစ် အဆိုပြုထားကြောင်း ဘန်ကောက်ပို့စ်မှ ရေးသားခဲ့သည်။

သို့သော် မဟာမိတ်အဖွဲ့၏ အကြီးမားဆုံး ပါတီနှစ်ခုဖြစ်သော MFP နှင့် ဖြူးထိုင်း (Pheu Thai) တို့အကြား တင်းမာမှုများ ဖြစ်လာနိုင်သည့် လက္ခဏာများကိုလည်း မြင်တွေ့နေရပြီ ဖြစ်သည်။

ပါတီ ၈ ပါတီ မေလ ၂၂ ရက်တွင် လက်မှတ်ရေးထိုးမည်ဟု မျှော်လင့်ရသော နားလည်မှုစာချွန်လွှာ (MoU)နှင့် ပတ်သက်၍ ၎င်းတို့အနေဖြင့် သံသယဖြစ်မှု တစ်ချို့ရှိကြောင်း ဖြူးထိုင်းပါတီ ခေါင်းဆောင် ချိုနန် သီရိကော (Cholnan Srikaew) က ပြောသည်။

MFP ၏ ဘုရင်စနစ်အား စော်ကားခြင်းဆိုင်ရာ ဥပဒေအား ပြင်ဆင်ရန် အစီအစဉ်သည်လည်း ပါတီကြီးနှစ်ခုကြား သဘောထား ကွဲလွဲစရာ အကြောင်းပြချက် တစ်ခု ဖြစ်လာနိုင်သည်ဟု ၎င်းက ပြောသည်။

 MFP ခေါင်းဆောင် ပီတာလင်ဂျာရိုရန်ရတ်ကို တွေ့ရစဉ်

ညွှန့်ပေါင်းအစိုးရဖွဲ့စည်းရေး နားလည်မှုစာချွန်လွှာ (MoU) အား မြင်တွေ့ခဲ့ရကြောင်း၊ ပင်မပါတီက ရေးဆွဲခဲ့ ကြောင်း၊ ဖြူးထိုင်းပါတီ အနေဖြင့် တစ်ချို့အကြောင်းအရာများကို ပြင်းပြင်းထန်ထန် ကန့်ကွက်ကြောင်း ဘန်ကောက်တွင် ပြုလုပ်ခဲ့သည့် ပါတီ ၈ ပါတီ၏ သတင်းစာ ရှင်းလင်းပွဲတစ်ခုအပြီးတွင် ဒေါက်တာ ချိုနန်က ပြောသည်။

တနင်္ဂနွေနေ့တွင် ပြုလုပ်ခဲ့သော ရွေးကောက်ပွဲ၏ တရားဝင် မဟုတ်သေးသော ရလဒ်များအရ ဖြူးထိုင်းပါတီနှင့် MFP ပါတီတို့သည် အောက်လွှတ်တော်တွင် နေရာပေါင်း ၂၉၃ ခု ရရှိခဲ့သည်။
ကျန်နေရာ ၂၀ သည် ပါတီခြောက်ခုမှ ဖြစ်သည်။

လွှတ်တော်နေရာ အများစုကို MFP မှ အနိုင်ရရှိခဲ့သည့်အတွက် ကျန်ညွှန့်ပေါင်း ပါတီများသည် ၎င်းအား ဝန်ကြီးချုပ်သစ်အဖြစ် ထောက်ခံရန် သဘောတူခဲ့ပြီး ဖြစ်သည်ဟု ပီတာက ပြောသည်။

မဲပေးခဲ့သူ အားလုံးကို ကျေးဇူးတင်ကြောင်း၊ ၎င်းတို့သည် ပြောင်းလဲလိုသည့် မျှော်လင့်ချက်နှင့် သဘောထားကို ကိုယ်စားပြုကြောင်း၊ အစိုးရသစ် အနေဖြင့် ရိုးသားစွာ လုပ်ငန်းဆောင်ရွက်ပြီး ထိုင်းပြည်သူ အားလုံးကို ကိုယ်စား ပြုသည့် အစိုးရ ဖြစ်လာလိမ့်မည် ဖြစ်ကြောင်းလည်း ပီတာက ပြောခဲ့သည်။

ဖြူးထိုင်းပါတီထက် ၁၁ နေရာ ပိုမို အနိုင်ရရှိခဲ့ခြင်းကြောင့် MFP သည် ညွှန့်ပေါင်းအဖွဲ့အတွင်း ဦးဆောင်ခွင့် ရရှိ မည် ဖြစ်သည်။

ဖြူးထိုင်းပါတီ ခေါင်းဆောင် ချိုနန် သီရိကောနဲ့ ပီတာလင်ဂျာရိုရန်ရတ်ကို တွေ့ရစဉ်

ထို့ကြောင့် MFP ဘက်က MoU နှင့် ပတ်သက်သည့် ပထမဆုံးမူကြမ်းကို ရေးဆွဲခဲ့ခြင်း ဖြစ်သော်လည်း အပြီးသတ် စာရွက်စာတမ်းများကို ပါတီ ၈ ပါတီလုံး ပါဝင်သည့် ကော်မတီတစ်ရပ်က ထုတ်ပြန်သွားမည်ဟု ပီတာက ပြော သည်။

MoU ၏ အပြီးသတ် အချက်အလက်များကို မေလ ၂၂ ရက်တွင် ထုတ်ပြန်မည် ဖြစ်သည်။ ယင်းက လက်ရှိ အိမ်စောင့်အစိုးရ၏ ဝန်ကြီးချုပ်ဖြစ်သူ ဗိုလ်ချုပ်ကြီး ပရာယွတ် (Prayut) ဦးဆောင်သော ၂၀၁၄ ခုနှစ်က စစ်တပ် အာဏာသိမ်းမှု၏ ၉ နှစ်မြောက် နှစ်ပတ်လည်နေ့လည်း ဖြစ်သည်။

ပါတီ ၈ ပါတီသည် အိမ်စောင့်အစိုးရထံမှ အစိုးရသစ်ထံသို့ အာဏာလွှဲပြောင်းရေးကို တာဝန်ယူ ဆောင်ရွက်သွားရ န် စိစစ်အကြံပြုရေးအဖွဲ့တစ်ခု ဖွဲ့စည်းသွားမည်ဖြစ်ကာ တခြားသော ပါတီများ ညွှန့်ပေါင်းအဖွဲ့နှင့် ပူးပေါင်းရေးကို လည်း ထည့်သွင်း စဉ်းစားသွားမည် ဖြစ်သည်။

Source: ဘန်ကောက်ပို့စ်

CNI International News

အစ္စလာမ္မာဘတ်၊ မေလ ၁၈

ပါကစ္စတန်ဝန်ကြီးချုပ်ဟောင်း အီမရန်ခမ်း (Imran Khan) ၏ အိမ်ကို ရဲတပ်ဖွဲ့က ဗုဒ္ဓဟူးနေ့တွင် လာဝိုင်းခဲ့သည် ဟု အေပီသတင်းတွင် ဖော်ပြထားသည်။

မကြာသေးခင်က ဖြစ်ပွားခဲ့သော အကြမ်းဖက် ဆန္ဒပြမှုများနှင့် ပတ်သက် နေသူများကို ဝန်ကြီးချုပ်ဟောင်းက နေအိမ်တွင် ခိုလှုံခွင့် ပေးထားသည်ဆိုသည့် စွပ်စွဲချက်ကြောင့် ဖြစ်သည်။

ရဲတပ်ဖွဲ့ လာဝိုင်းခြင်းက ခမ်းအား ထောက်ခံသူများကို စိတ်ဆိုးစေနိုင်ကာ ၎င်းတို့နှင့် လုံခြုံရေး တပ်ဖွဲ့များအကြား ပဋိပက္ခများ ပိုမိုဖြစ်ပွားလာမည်ကိုလည်း စိုးရိမ်မှုများ မြင့်တက်လာသည်။

ပြီးခဲ့သည့် သီတင်းပတ် ခမ်းအား ရုံးတင် စစ်ဆေးမှုမှ ဖမ်းဆီး ထိန်းသိမ်းခဲ့ပြီးနောက် ၎င်းကို ထောက်ခံသူများက ပြည်သူပိုင် အဆောက်အဦများနှင့် စစ်ဘက် အဆောက်အဦများကို တိုက်ခိုက်ခဲ့သည်။

သို့သော် ဝန်ကြီးချုပ်ဟောင်းသည် သီတင်းပတ် ကုန်ပိုင်းတွင် ပြန်လွှတ်လာခဲ့ကာ ပန်ဂျပ် (Punjab) ပြည်နယ်၊ မြို့တော် လာဟိုး (Lahore) နေအိမ်သို့ ပြန်လည် ရောက်ရှိလာခဲ့သည်။

ခမ်းက ဗုဒ္ဓဟူးနေ့တွင် ၎င်း၏အိမ်ကို ရဲအင်အား ၂၀၀ ခန့် လာဝိုင်းခဲ့ကာ ထောင်ကားတစ်စီးပါ ပါဝင်သည်ဟု တွစ်တာတွင် ရေးသားခဲ့သည်။

ထပ်မံ အဖမ်းမခံရခင် နောက်ဆုံး တွစ်(ရေးသားချက်)ဖြစ်နိုင်ကြောင်း၊ ရဲများက အိမ်ကို လာဝိုင်းနေကြောင်း ခမ်း၏ တွစ်တာတွင် ဖော်ပြထားသည်။

အီမရန်ခမ်းရဲ့ PTI ပါတီထောက်ခံသူကိုတွေ့ရစဉ်

ခမ်း အနေဖြင့် ၎င်း၏အိမ်တွင် ပုန်းအောင်းနေသူ အယောက် ၄၀ ကို ရဲလက် အပ်ရန် ၂၄ နာရီ အချိန်ရကြောင်း၊ ထိုသို့မဟုတ်လျှင် ဝင်ရောက် စီနင်းခံရမည်ဖြစ်ကြောင်း ပန်ဂျပ်ပြည်နယ်အစိုးရအဖွဲ့ ပြောခွင့်ရပုဂ္ဂိုလ် အေမာမား (Amir Mir)က ဗုဒ္ဓဟူးနေ့ အစောပိုင်းတွင် ပြောခဲ့သည်။

အကြမ်းဖက်မှုများ လုပ်ဆောင်ခဲ့သူ ၃၄၀၀ ခန့်ကို ဖမ်းဆီးခဲ့ပြီ ဖြစ်ကြောင်းနှင့် နောက်ထပ် ရှာဖွေဖမ်းဆီးမှုများ လုပ်ဆောင်ရန် စီစဉ်ထားကြောင်းလည်း အေမာမားက သတင်းစာ ရှင်းလင်းပွဲ တစ်ခုတွင် ပြောခဲ့သည်။

ပေးထားသော ၂၄ နာရီ မပြည့်မခြင်း ကြာသပတေးနေ့အထိ ခမ်း၏ အိမ်အား စီးနင်းမှု လုပ်ဆောင်သွားမည် မဟုတ်ကြောင်း မားက ပါကစ္စတန်ရုပ်သံ တစ်ခုကိုပြောခဲ့သည်။

ထို့နောက် ခမ်း၏ တွစ်တာတွင် ရေးသားခဲ့သလို ဖမ်းဆီးခြင်းလည်း မရှိသေးဟု ၎င်းက ငြင်းဆိုခဲ့သည်။

ဗုဒ္ဓဟူးနေ့ညအထိ ခမ်း၏ အိမ်အနီးတွင် အခြေအနေများ တည်ငြိမ်နေဆဲပင် ဖြစ်သည်။ မကြာသေးခင်က ဖြစ်ပွား ခဲ့သော အစိုးရဆန့်ကျင်ရေး ဆန္ဒပြပွဲများတွင် ပါဝင်သူများကို စစ်ခုံရုံးတွင် တရားစီရင်သွားမည်ဟု ပါကစ္စတန် အာဏာပိုင်များက ပြောဆိုထားသည်။

ရဲတပ်ဖွဲ့ကိုတွေ့ရစဉ်

ယခုကဲ့သို့ ဖြစ်ရပ်များ နောက်တစ်ကြိမ် ထပ်မဖြစ်ရန်လည်း မဖြစ်မနေ တားဆီးရမည်ဟု ပါကစ္စတန် စစ်ဦးစီးချုပ် က တပ်ဖွဲ့များကို ပြောခဲ့သည်။

ပါကစ္စတန် စစ်တပ်၏ တရားစီရင်ရေးများကို တံခါးပိတ် ပြုလုပ်လေ့ရှိပြီး စိတ်ကြိုက် ရှေ့နေငှားခြင်း အပါအဝင် အခြေခံ အခွင့်အရေးများကိုလည်း ပိတ်ပင်ထားသည်။

ထို့ကြောင့် အစိုးရ၏ အစီအစဉ်နှင့် ပတ်သက်၍ လူ့အခွင့်အရေး အဖွဲ့အစည်းများက သတိပေးမှုများ လုပ်ဆောင် ထားသည်။

ခမ်းအား ဖမ်းဆီး ထိန်းသိမ်းမှုကြောင့် ဖြစ်သော ဆန္ဒပြပွဲများတွင် ခမ်းအား ထောက်ခံသူများသည် ယာဉ်များ၊ အဆောက်အဦများကို မီးရှို့ခြင်း၊ စစ်သား၊ ရဲနှင့် အဖွဲ့အစည်းပိုင် အဆောက်အဦများကို တိုက်ခိုက်ခြင်းတို့ကို လုပ်ဆောင်ခဲ့ကြသည်။

ထိုဖြစ်စဉ်များကြောင့် လူ ၁၀ ဦး သေဆုံးကာ ၄၀၀၀ ကျော် ဖမ်းဆီးခံထားရသည်။

Source: AP