CNI International

တယ်လ်လင်း၊ မေလ ၂၆

ရုရှားနှင့် ဘယ်လာရုစ်တို့သည် ဘယ်လာရုစ်မြေပေါ်တွင် ရုရှား၏ တာတိုပစ် နျူကလီးယား လက်နက်များ တပ် ဆင်ရေးကို အတည်ပြုသည့် သဘောတူညီချက်ကို မေလ ၂၅ ရက်နေ့က လက်မှတ်ရေးထိုးခဲ့သည်ဟု အေပီမှ ဖော်ပြခဲ့သည်။

အဆိုပါ လက်နက်များကို ရုရှားဘက်ကသာ ထိန်းချုုပ်သွားမည် ဖြစ်သည်။

ဘယ်လာရုစ်တွင် နျူကလီးယား လက်နက်များ တပ်ဆင်မည့်ကိစ္စကို ရုရှားသမ္မတ ပူတင် (Putin) က ယခုနှစ် အစပိုင်းမှာ ကြေညာခဲ့သည်။

အနောက်အုပ်စု၏ ယူကရိန်းအပေါ် စစ်ရေးထောက်ပံ့မှုများ တိုးမြှင့်လာခြင်းအပေါ် သတိပေးချက်ဟု အားလုံးက ရှုမြင်ကြသည်။

ဘယ်လာရုစ်မြေတွင် နျူကလီးယား လက်နက်များ တပ်ဆင်ခြင်းနှင့် ပတ်သက်၍ ရက်အတိအကျကို ထုတ်ပြန် ထားခြင်း မရှိသေးသော်လည်း ယင်းတို့ကို ထိန်းသိမ်းထားရန် လိုအပ်သော အဆောက်အဦများ တည်ဆောက် ခြင်းကို ဇူလိုင် ၁ ရက်တွင် အပြီးသတ်မည်ဟု ပူတင်က ပြောခဲ့သည်။

ဘယ်လာရုစ်တွင် နျူကလီးယား လက်နက် မည်မျှထားမည်ကိုလည်း အခုထိ မသိရသေးပေ။

ပူတင်နဲ့ လူကာရှန်ကို ကိုတွေ့ရစဉ်

လေယာဉ်တွင် တပ်ဆင်နိုင်သည့် ဗုံးများ၊ တာတိုပစ် ဒုံးကျည်များအတွက် ထိပ်ဖူးများနှင့် အမြောက်ဆံများ အပါအဝင် ရုရှား၌ တာတိုပစ် နျူကလီးယား လက်နက် ၂၀၀၀ နီးပါးရှိသည်ဟု အမေရိကန်က ခန့်မှန်းထားသည်။

တာတိုပစ် နျူကလီးယား လက်နက်များကို စစ်မြေပြင်ရှိ ရန်သူ့တပ်များနှင့် လက်နက်များကို ဖျက်ဆီးရန် အသုံး ပြုသည်။

ယင်းတို့သည် ပျံသန်းနိုင်သည့် ပမာဏနည်းရုံမက တာဝေးပစ် ဒုံးကျည်များထက်လည်း အားပျော့သည်။

နျူကလီးယား လက်နက် တပ်ဆင်ရေးကို စတင်နေပြီ ဖြစ်သော်လည်း ဘယ်လာရုစ်သို့ မည်သည့် အချိန်တွင် လက်နက်များ ရောက်ရှိမလဲဆိုသည်ကိုတော့ မသိရသေးဘူးဟု ဘယ်လာရုစ်သမ္မတ လူကာရှန်ကို (Lukashenko) က မော်စကိုတွင် ပြောခဲ့သည်။

ရုရှားရဲ့ နျူကလီးယားထိပ်ဖူးကိုတွေ့ရစဉ်

၎င်းသည် ကာလရှည် လူမြင်ကွင်းမှ ပျောက်ကွယ်နေမှုကြောင့် ပြင်းပြင်းထန်ထန် နာမကျန်း ဖြစ်နေသည်ဟု အထင်ခံခဲ့ရသူ ဖြစ်သော်လည်း မေလ ၁၅ ရက်တွင် လူမြင်ကွင်းသို့ ပြန်လည် ရောက်ရှိလာသည်။

မဟာမိတ် နှစ်နိုင်ငံအကြား နျူကလီးယား သဘောတူညီချက်သည် ယူကရိန်း၏ တန်ပြန် ထိုးစစ်အတွက် ရုရှားတို့ ဘက်က ပြင်ဆင်မှုများ ပြုလုပ်နေချိန်တွင် ပေါ်ပေါက်လာခြင်း ဖြစ်သည်။

ယခုကဲ့သို့ နျူကလီးယား လက်နက်များ ဖြန့်ကျက်ထားရခြင်းသည်လည်း အနောက်အုပ်စု၏ ရန်လိုမှုများကြောင့် ဖြစ်သည်ဟု ရုရှား၊ ဘယ်လာရုစ် နှစ်နိုင်ငံစလုံးက တစ်လေသံတည်း ပြောသည်။

ဘယ်လာရုစ်သို့ နျူကလီးယား လက်နက်များ ဖြန့်ကျက်ခြင်းသည် အမေရိကန်တို့၏ လမ်းစဉ်အတိုင်း လိုက်ပါ လုပ်ဆောင်ခြင်း ဖြစ်သည်ဟု ပူတင်က ပြောသည်။

အမေရိကန်သည် ဘယ်လ်ဂျီယံ၊ ဂျာမနီ၊ အီတလီ၊ နယ်သာလန်နှင့် တူရကီတို့တွင် ၎င်းတို့၏ နျူကလီးယား လက်နက်များကို ဖြန့်ကျက်ထားသည်ဟုလည်း ပူတင်က ထောက်ပြသည်။

Source: AP

CNI International News

ဘန်ကောက်၊ မေလ ၂၆

လွှတ်တော်ဥက္ကဋ္ဌရာထူးကို ၎င်းတို့သာ ရယူသင့်သည်ဟု Move Forward Party (MFP)ပါတီဘက်ကပြော ကြောင်း ဘန်ကောက်ပို့စ်က ဖော်ပြခဲ့သည်။

MFP ၏ ညွန့်ပေါင်းမဟာမိတ် ဖြူးထိုင်း(Pheu Thai) ပါတီက လွှတ်တော်ဥက္ကဋ္ဌ ရာထူးကို ရယူလိုသည်ဟု သတင်းများ ထွက်ပေါ်နေချိန်တွင် ထိုသို့ ပြောခဲ့ခြင်း ဖြစ်သည်။

အစဉ်အလာများအရ လွှတ်တော် အစီအစဉ်များကို ကိုင်တွယ် ဆောင်ရွက်ရန်အတွက် ရွေးကောက်ပွဲ အနိုင်ရ သူသာလျှင် လွှတ်တော်ဥက္ကဋ္ဌ ရာထူးကို ရယူလေ့ရှိကြောင်း၊ ထိုအစဉ်အလာအတိုင်း လက်ဆက် လုပ်ဆောင် သွားမည်ဖြစ်ကြောင်း MFP ၏ ပြောခွင့်ရပုဂ္ဂိုလ် ရန်းဆီမန် ရိုမီ (Rangsiman Rome) ကပြောသည်။

MFP ပါတီ၏ အထွေထွေအတွင်းရေးမှူး ချိုင်တာဝပ် တူလာသွန်း (Chaithawat Tulathon)အား ကိုးကား၍ ပြောဆိုခဲ့ ခြင်း ဖြစ်သည်။

ညွန့်ပေါင်းမဟာမိတ်များဘက်က ထိုရာထူးအတွက် ဆွေးနွေးညှိနှိုင်းခြင်း ရှိပါသလားဟု မေးမြန်းမှုကို ရန်းဆီမန် က ဖြေကြားရန် ငြင်းဆန်ခဲ့ပြီး မဟာမိတ်အဖွဲ့၏ ဆွေးနွေးမှုကို တာဝန်ယူထားရသူ ချိုင်တာဝပ်သာလျှင် ဖြေရှင်း သင့်သည်ဟု ပြောသည်။

MFP ပါတီ ခေါင်းဆောင် ပီတာနဲ့ ဖြူးထိုင်းပါတီခေါင်းဆောင် ချိုနန်သီရကောကိုတွေ့ရစဉ်

MFP ၏ ဒုတိယခေါင်းဆောင် နာတာဝပ် ဘူပရာသွန် (Nattawut Buaprathum) အား လွှတ်တော်ဥက္ကဋ္ဌ ရာထူး အတွက် လျာထားခြင်း ရှိ/မရှိ မေးမြန်းရာတွင်လည်း ပါတီအနေဖြင့် မဆုံးဖြတ်ရသေးဟု ပြောသည်။

လွှတ်တော်ဥက္ကဋ္ဌ ရာထူးသည် နိုင်ငံရေးလောကတွင် အရေးပါဆုံး ရာထူးများမှ တစ်ခုဖြစ်ကာ လွှတ်တော် အစည်းအဝေးများနှင့် လုပ်ငန်းစဉ်များကို ကြီးကြပ်ရသည်။

MFP အနေဖြင့် ၎င်းတို့၏ ရွေးကောက်ပွဲ ကတိများနှင့် ဥပဒေပြုမှုဆိုင်ရာ လုပ်ငန်းစဉ်များကို ပြည့်ဝအောင် ဆောင်ရွက်မည်ဆိုလျှင် ထိုရာထူးကို ထိန်းချုပ်ထားနိုင်ရန် လိုအပ်သည်။

MFP ဘက်က ၎င်းတို့ ဆက်လက် လုပ်ဆောင်မည့် အစီအစဉ် သုံးခုအကြောင်းကို မေလ ၂၄ ရက်တွင် လူမှုကွန် ယက်၌ ရေးသားဖော်ပြခဲ့ပြီး ပါတီအနေဖြင့် ထိုလုပ်ဆောင်ချက်များကို အကောင်အထည်ဖော်ရန် လွှတ်တော် ဥက္ကဋ္ဌ ရာထူးကို ရယူသွားမည်ဟု ဆိုသည်။

ဖြူးထိုင်းပါတီ ခေါင်းဆောင် ချိုနန်သီရိကော (Cholnan Srikaew) က Progressive Movement ပါတီ၏ အထွေထွေအတွင်းရေးမှူး တစ်ဖြစ်လဲ MFP ၏ ရွေးကောက်ပွဲ မဲဆွယ်မှုဆိုင်ရာ တာဝန်ရှိသူ ပီယာဘွတ် ဆန်ကာ နော့ကူး (Piyabutr Saengkanokkul) ၏ ပြောစကားသည် ညွန့်ပေါင်းအဖွဲ့ဝင်များကို ဖိအားပေးရန် ကြိုးပမ်းမှု ဖြစ်သည်ဟု မေလ ၂၄ ရက်နေ့တွင် ဝေဖန်ခဲ့သည်။

ညွန့်ပေါင်းမဟာမိတ် ပါတီများကို တွေ့ရစဉ်

လွှတ်တော်ဥက္ကဋ္ဌ ရာထူးသည် MFP ပါတီဘက်က လက်လွှတ်၍ မရသော အရာဟု ပီယာဘွတ်က မေလ ၂၃ ရက် နေ့ ညတွင် ပြောခဲ့သည်။

ညွန့်ပေါင်းအစိုးရအတွင်း ဆွေးနွေးညှိနှိုင်းမှုများကို လုပ်ဆောင်သွားမည် ဖြစ်သော်လည်း MFP အနေဖြင့် လွှတ်တော်ဥက္ကဋ္ဌ ရာထူးကို လက်လွတ် ခံလိမ့်မည်မဟုတ်ဟု ၎င်းက ပြောခဲ့ခြင်း ဖြစ်သည်။

MFP ဘက်က တင်သွင်းနိုင်ဖွယ်ရှိသော အမတ်လောင်းများနှင့် ပတ်သက်၍ ချိုနန်က မှတ်ချက် ပေးရန် ငြင်းဆန် သည်။

MFP သည် အတွေ့အကြုံပိုင်း အားနည်းချက်ရှိသည်ဟု ယူဆခြင်းလည်း ခံထားရသည်။

MFP မှ တင်သွင်းသည့် ကိုယ်စားလှယ်လောင်းများကို လက်ခံရန် ခဲယဉ်းသောကြောင့် ဖြူးထိုင်းအနေဖြင့် လွှတ် တော်ဥက္ကဋ္ဌ ရာထူးအတွက် ဆွေးနွေးညှိနှိုင်းမှုများ လုပ်ဆောင်လျက် ရှိသည်ဟုလည်း ဖြူးထိုင်းပါတီ သတင်း အရင်းအမြစ်တစ်ခုက ပြောသည်။

Source: ဘန်ကောက်ပို့စ်

CNI International News

မင့်ခ်၊ မေလ ၂၆

အမေရိကန်နိုင်ငံသည် အာဖဂန်နစ္စတန်ရှိ တရားမဝင် လက်နက်ကိုင် အဖွဲ့များ၏ အလားအလာကို အသုံးချကာ ဒေသတွင်း အခြေအနေများကို မတည်မငြိမ် ဖြစ်စေရန် ရည်ရွယ်ချက် ရှိနေသည်ဟု ရုရှားကာကွယ်ရေးဝန်ကြီး ဆာချီရှိုဂူ (Sergey Shoigu) က မေလ ၂၅ ရက်နေ့တွင် ပြောခဲ့သည်ဟု တာ့စ်သတင်းမှ ဖော်ပြခဲ့သည်။

မင့်ခ်မြို့တွင် ပြုလုပ်ခဲ့သော CSTO ကာကွယ်ရေးဝန်ကြီးများ အစည်းအဝေးတွင် ထိုသို့ ပြောခဲ့ခြင်း ဖြစ်သည်။

အာဖဂန်သည် မတည်ငြိမ်မှုများ ထူပြောရာ အရပ်အဖြစ် ဆက်ရှိနေဆဲဖြစ်ကြောင်း၊ အဓိကခြိမ်းခြောက်မှုများမှာ တာလီဘန်များ အာဏာရရှိပြီးနောက် နိုင်ငံတွင်း အားကောင်းလာသော တရားမဝင် လက်နက်ကိုင်အဖွဲ့များထံမှ ဖြစ်ကြောင်း၊ အမေရိကန်သည် ထိုသို့သော အကြမ်းဖက် အဖွဲ့များ၏ အလားအလာကို အသုံးချကာ ဒေသတွင်း မတည်ငြိမ်မှု ဖြစ်အောင် လုပ်ဆောင်ရန် ရည်ရွယ်ထားသည်ဟု ယုံကြည်ကြောင်း ရှိုဂူက ပြောသည်။

ထိုရည်ရွယ်ချက်ကြောင့် အရှေ့အလယ်ပိုင်းရှိ ၎င်းတို့ ထိန်းချုပ်ထားရာ အဖွဲ့များမှာ တိုက်ခိုက်ရေးသမားများကို အာဖဂန်သို့ ပြန်လည် ပို့ဆောင်ရန် လုပ်ဆောင်လျက် ရှိကြောင်းလည်း ၎င်းက ပြောခဲ့သည်။

ရုရှားကာကွယ်ရေးဝန်ကြီး ဆာချီရှိုဂူကိုတွေ့ရစဉ်

ထိုတိုက်ခိုက်ရေး သမားများသည် အနာဂတ်တွင် အိမ်နီးချင်းနိုင်ငံများသို့ပါ စိမ့်ဝင်၍ အကြမ်းဖက်မှုများ လုပ်ဆောင်လာနိုင်သည်ဟု ရုရှားကာကွယ်ရေးဝန်ကြီးက သုံးသပ်ကာ ထိုသို့သော အခြေအနေများအတွက် အာဖဂန်အရေးနှင့် ပတ်သက်၍ ပူးပေါင်းဆောင်ရွက်မှုများ လုပ်ဆောင်ရန်၊ ပူးတွဲလေ့ကျင့်မှုများကို အာရုံစိုက် ဆောင်ရွက်ရန် အရေးကြီးသည်ဟု ယူဆကြောင်းလည်း မှတ်ချက်ပြုခဲ့သည်။

နေတိုးအဖွဲ့သည်လည်း ၎င်းတို့၏ တပ်များ အာဖဂန်မှ ထွက်ခွာချိန်တွင် အာဖဂန်၏ ပြန်လည်ထူထောင်ရေးကို လုပ်ဆောင်ရမည့်အစား ဗဟိုအာရှဒေသတွင် ယင်း၏ စစ်အင်အားကို ထိန်းသိမ်းနိုင်ရန်အတွက် နည်းလမ်းပေါင်းစုံ ကို အသုံးပြုနေသည်ဟု ရှိုဂူက ပြောသည်။

ထိုအချက်သည် အာဖဂန်၏ တည်ငြိမ်မှု အတွက်သာမက CSTO ၏ ဖြစ်တည်မှုအတွက် တိုက်ရိုက်ခြိမ်းခြောက်မှု ဖြစ်သည်ဟု ယုံကြည်ကြောင်းလည်း ရုရှားဝန်ကြီးက ပြောသည်။

Source: တာ့စ်

CNI International News

ကိယက်ဗ်၊ မေလ ၂၅

ရုရှား၏ ဝဂ်နာ (Wagner) အဖွဲ့ပိုင်ရှင်သည် ယူကရိန်းအရေးနှင့်ပတ်သက်၍ ရုရှားအစိုးရ၏ ရပ်တည်ချက်ကို ထပ်မံဆန့်ကျင်ပြောဆိုခဲ့သည်ဟု အေပီသတင်းတွင် ဖော်ပြသည်။

ရုရှား၏ ယူကရိန်းအားစစ်မဲ့ဖြစ်ရေး လုပ်ဆောင်ချက်သည် ပြောင်းပြန်ရလဒ်ထွက်ပေါ်နေသည်ဟု ၎င်းကပြောကာ ရုရှားတပ်များသည် အရပ်သားများကို သတ်နေကြောင်း ဝန်ခံခဲ့ပြီး ဘတ်မွတ်ခ် (Bakhmut) တိုက်ပွဲတွင် တပ်ဖွဲ့ဝင် ၂၀၀၀၀(နှစ်သောင်း)ကျော် သေဆုံးခဲ့သည်ဟု အတည်ပြုပြောဆိုခဲ့သည်။

ဘတ်မွတ်ခ်မြို့တွင် သေဆုံးခဲ့သူများ၏ တစ်ဝက်ခန့်သည် စစ်ပွဲအတွက် လူသစ်စုခြင်းခံရသည့် ရုရှားအကျဉ်းသား များဖြစ်ကြောင်း ယက်ဗ်ဂျီနီ ပရီဂေါ့ဇင် (Yevgeny Prigozhin) က ပြောသည်။ ၎င်း၏ပြောဆိုမှုသည် ဇန်နဝါရီလ အထိ တပ်သား ၆၀၀၀ သာ သေဆုံးထားသည်ဆိုသော ရုရှားအစိုးရထုတ်ပြန်ချက်နှင့် လုံးဝဆန့်ကျင်နေသည်။

တဖက်တွင် ယူကရိန်းဘက်က တစ်နှစ်ကျော်ကြာ စစ်ပွဲအတွင်း ၎င်းတို့တပ်ဖွဲ့ဝင် မည်မျှသေဆုံးသည်ကို ထုတ်ပြန် ဖူးခြင်းမရှိပေ။ ပရီဂေါ့ဇင်၏ ပြောဆိုမှုသည် ရုရှားစစ်သားသေဆုံးမှု မြင့်တက်လာသည်ဆိုသော ၎င်းတို့ ခန့်မှန်း ချက်နှင့် ကိုက်ညီသည်ဟု အိမ်ဖြူတော်က ဗုဒ္ဓဟူးနေ့တွင် ပြောသည်။ ရုရှားတပ်ဖွဲ့ဝင်သေဆုံးမှု အရေအတွက် သည် ၁၀၀၀၀၀(တစ်သိန်း)အထိရှိလာပြီဟု အိမ်ဖြူတော်က ယခုလအတွင်း ခန့်မှန်းပြောဆိုခဲ့သည်။

ဝဂ်နာအုပ်စု၏ စစ်ဘက်ဆိုင်ရာကုမ္ပဏီအကြီးအကဲ ပရီဂေါ့ဇင်သည် ယူကရိန်းနိုင်ငံ ဘတ်မွတ်ခ်မြို့ရှိ ၎င်း၏ စစ်သားများရှေ့တွင် ရုရှားနိုင်ငံအလံကို ကိုင်ဆောင်ကာ စကားပြောနေစဉ်(ဓါတ်ပုံ-အေပီ)

သေဆုံးသူများ၏ တစ်ဝက်ခန့်မှာ ဝဂ်နာအဖွဲ့ဝင်များဖြစ်သည်ဟုလည်း အိမ်ဖြူတော်အမျိုးသားလုံခြုံရေးကောင်စီ ပြောခွင့်ရပုဂ္ဂိုလ် ဂျွန်ကာဘီ (John Kirby) က ပြောသည်။ကိုးလကြာ ဘက်မွတ်ခ်မြို့သိမ်းတိုက်ပွဲအတွင်း သေဆုံး ခဲ့သူအများစုမှာ စစ်ရေးလေ့ကျင့်မှု အားနည်းသည့် ရုရှားအကျဉ်းသားများဖြစ်သည်ဟု လေ့လာသူများက ယုံကြည် နေသည်။

အကျဉ်းသားဟောင်းတစ်ဦးဖြစ်ခဲ့ဖူးသော ပရီဂေါ့ဇင်က ခဲယမ်းများကို လုံလောက်စွာ မထောက်ပံ့ပေးမှုနှင့် ပတ်သက်၍ ရုရှားအာဏာပိုင်များကို မကြာခဏဆိုသလို ဝေဖန်ခဲ့သူဖြစ်သည်။ ၎င်းသည် ရုရှားအရာရှိများ၏ နည်းဗျူဟာ၊ ကတိကဝတ်၊ ခေါင်းဆောင်မှုစွမ်းရည်တို့နှင့် ပတ်သက်၍လည်း မေးခွန်းထုတ်ကာ ရုရှားစစ်ဘက် အရာရှိများသည် တိုက်ပွဲအောင်မြင်မှုများအတွက် ဝဂ်နာတို့အပေါ် လုံလောက်သော ဂုဏ်ပြုမှုလည်း မရှိဟု ပြော သည်။

ပရီဂေါ့ဇင်သည် ဘတ်မွတ်ခ်မြို့ကိုသိမ်းနိုင်ပြီဖြစ်ကြောင်း စနေနေ့တွင်ပြောဆိုခြင်းဖြင့် ဝဂ်နာများ၏ စွန့်လွှတ် အနစ်နာခံမှုကိုလည်း ထောက်ပြပြောဆိုခဲ့သည်။ ရုရှားအစိုးရကို လိုလားသော မီဒီယာတစ်ခုနှင့် အင်တာဗျူးရာ တွင် ၎င်းသည် ရုရှားသမ္မတပူတင် (Putin) ၏ ယူကရိန်းစစ်ပွဲ ဆင်နွှဲရခြင်း ရည်ရွယ်ချက်ကို မေးခွန်းထုတ်ခဲ့ပြန် သည်။ အနောက်အုပ်စု၏ လက်နက်နှင့် လေ့ကျင့်ရေးဆိုင်ရာ အထောက်အပံ့များကြောင့် ယူကရိန်းစစ်တပ် ပိုမို အားကောင်းလာသည့်အတွက် ယူကရိန်းတွင် စစ်မဲ့ရေး ရုရှားအစိုးရ၏ လုပ်ဆောင်ချက်မှာ ပြောင်းပြန်ရလဒ် ထွက်ပေါ်နေသည်ဟု ပြောခဲ့သည်။

Source:AP

CNI International News

အစ္စလာမ္မာဘတ်၊ မေလ ၂၅

တိုင်းပြည်အား တိုက်ခိုက်ခြင်းအတွက် ပါကစ္စတန်ဝန်ကြီးချုပ်ဟောင်း အီမရန်ခမ်း (Imran Khan) ၏ ပါတီအား ဖျက်သိမ်းရန် အစိုးရမှ စဉ်းစားနေသည်ဟု ပါကစ္စတန်ကာကွယ်ရေးဝန်ကြီးက ပြောကြောင်း အယ်ဂျာဇီးလ်ယား သတင်းတွင် ဖော်ပြထားသည်။

ထိုဆုံးဖြတ်ချက်က ခမ်းအား ထောက်ခံသူများနှင့် စစ်တပ်၏ နိုင်ငံရေးတွင် ပါဝင် ပတ်သက်မှုများ အပေါ် ဒေါသ ထွက်မှုများကိုလည်း ဖြစ်လာစေနိုင်သည်။

ခမ်းသည် အရပ်ဘက် နိုင်ငံရေးသမားများနှင့် ပါကစ္စတန် စစ်တပ်တို့၏ ကာလရှည် အားပြိုင်မှုအတွင်း ပါဝင် ပတ်သက်လာသည့် နောက်ဆုံးလူ ဖြစ်သည်။

အီမရန်ခမ်းနှင့် အင်အားကြီး စစ်တပ်၏ အားပြိုင်မှုများကြောင့် အီမရန်ခမ်းအား ထောက်ခံသူများ၏ ဆန္ဒပြမှုများ နေရာအနှံ့တွင် ပေါ်ပေါက်လာခဲ့သည်။

ထို့နောက် ဆိုးရွားသော စီးပွားရေး ပြဿနာများကို ကာလရှည် ရင်ဆိုင်နေရသည့် ပါကစ္စတန်၏ တည်ငြိမ်မှုနှင့် ပတ်သက်၍လည်း စိုးရိမ်မှုများ မြင့်တက်လာစေခဲ့သည်။

ပါကစ္စတန် ကာကွယ်ရေးဝန်ကြီး ခါဝါဂျာ အာဆစ်ကို တွေ့ရစဉ်

ခမ်း၏ PTI ပါတီသည် တိုင်းပြည်၏ အခြေခံ အကြောင်းအရာများအပေါ် ထိခိုက်စေနေကြောင်း၊ ယင်းကို သည်းခံ၍ မရကြောင်း ပါကစ္စတန် ကာကွယ်ရေးဝန်ကြီး ခါဝါဂျာ အာဆစ် (Khawaja Asif)က ဗုဒ္ဓဟူးနေ့တွင် ပြောခဲ့သည်။

PTI အား ဖျက်သိမ်းရန် စဉ်းစားနေကြောင်း၊ ပါတီအား ဖျက်သိမ်းရန် အစိုးရ၏ ဆုံးဖြတ်ချက်ကို လွှတ်တော်က အပြီးသတ် အတည်ပြုချက် ပေးရမည်ဟုလည်း ၎င်းက ပြောသည်။

ဆန္ဒပြမှုများ ပြုလုပ်နေသော ခမ်းအား ထောက်ခံသူများက ယခုလအတွင်း စစ်တပ် အဆောက်အဦများ၊ ရုံးချုပ် များနှင့် အစိုးရအဆောက်အဦများအပေါ် တိုက်ခိုက်ခြင်းကို ရည်ညွှန်း ပြောဆိုခြင်း ဖြစ်သည်။

ကာကွယ်ရေးဝန်ကြီး၏ ပြောဆိုမှုနှင့် ပတ်သက်၍ PTI ပါတီ၏ ရှေ့နေဖြစ်သူ အလီဇာဖာ (Ali Zafar) က ထိုကိစ္စကို တရားရုံးတွင်သာ ဆုံးဖြတ်ရမည် ဖြစ်ကြောင်း တစ်ဦးချင်းစီ၏ လုပ်ရပ်များအတွက် ပါတီတစ်ခုလုံးကို အပြစ် တင်၍ မရကြောင်း တုံ့ပြန်ခဲ့သည်။

အီမရန်ခမ်းကို တွေ့ရစဉ်

ခမ်းသည် စစ်တပ်၏ ထောက်ခံမှုဖြင့် ၂၀၁၈ ခုနှစ်တွင် ဝန်ကြီးချုပ် ဖြစ်လာခဲ့သူ ဖြစ်သော်လည်း နှစ်ဖက်စလုံးက ယင်းကို ထိုအချိန်၌ ငြင်းဆန်ခဲ့သည်။

သို့သော် နောက်ပိုင်းတွင် ခမ်းသည် စစ်ဗိုလ်ချုပ်ကြီးများနှင့် အကွဲအပြဲ ဖြစ်လာခဲ့ကာ ၂၀၂၂ ခုနှစ် အယုံအကြည် မရှိကြောင်း မဲခွဲမှု၌ ရှုံးနိမ့်ခဲ့သည့်အတွက် ဝန်ကြီးချုပ်အဖြစ်မှ ဖယ်ရှားခြင်း ခံခဲ့ရသည်။

ထို့နောက် ခမ်းသည် တစ်နိုင်ငံလုံးက ထောက်ခံသူများ၏အားဖြင့် ရွေးကောက်ပွဲကို စောလျင်စွာ ကျင်းပပေးရန် တောင်းဆိုခဲ့သော်လည်း ထိုတောင်းဆိုမှုကို အီမရခမ်း၏နေရာကို အစားဝင်သည့် ဝန်ကြီးချုပ် ရှာဘတ်ရှရစ်ဖ် (Shehbaz Sharif)က ပယ်ချခဲ့သည်။

ခမ်းသည် အကျင့်ပျက်ခြစားမှုဆိုင်ရာ စွဲချက်များစွာဖြင့်လည်း ရင်ဆိုင်နေရသည်။

သို့သော် ခမ်းကတော့ ထိုစွဲချက်များသည် မဟုတ်မှန်ကြောင်း၊ ၎င်းအား ရွေးကောက်ပွဲ မဝင်နိုင်စေရေးအတွက် နိုင်ငံရေးအရ လုပ်ကြံမှုသာ ဖြစ်ကြောင်း ငြင်းဆို တုံ့ပြန်ထားသည်။

Source: အယ်ဂျာဇီးလ်ယား

CNI International News

ဘန်ကောက်၊ မေလ ၂၅

Move Forward Party (MFP)ပါတီ ခေါင်းဆောင် ပီတာလင်ဂျာရိုရန်ရတ် (Pita Limjaroenrat) အား ဝန်ကြီးချုပ် အဖြစ် ထောက်ခံရေး ဆီးနိတ်လွှတ်တော်အမတ်များ ယတိပြတ် မဆုံးဖြတ်ရသေးကြောင်း လွှတ်တော်အမတ် တစ်ဦးဖြစ်သူ ဝမ်ချိုင်း ဆွန်သီရိ (Wanchai Sornsiri) က ပြောသည်ဟု ဘန်ကောက်ပို့စ်သတင်းတွင် ဖော်ပြထားသည်။

ထိုကိစ္စနှင့် ပတ်သက်၍ လွှတ်တော်အမတ်များအကြား သောကြာနေ့တွင် အမြင်ချင်း ဖလှယ်ခဲ့သော်လည်း ၎င်းတို့ ၏ အယူအဆများသည် ၎င်းတို့၏ နောက်ဆုံး ရပ်တည်ချက်ကို ကိုယ်စားပြုခြင်း သို့မဟုတ် ၎င်းတို့ မည်သို့ မဲပေး မည်ကို ဖော်ညွှန်းခြင်းမရှိဟု ဝမ်ချိုင်းက ပြောသည်။

လက်ရှိတွင် ဆီးနိတ်လွှတ်တော် အမတ်များကြား၌ အယူအဆသုံးခုရှိကြောင်း ယင်းတို့မှာ ပီတာအား ထောက်ခံမဲ ပေးရန်၊ ကန့်ကွက်မဲပေးရန်နှင့် မဲမပေးဘဲ နေရန်တို့ဖြစ်ကြောင်း သို့သော် လက်ရှိတွင် လွှတ်တော်အမတ် အများစု က မည်သို့ ဆုံးဖြတ်မည်ကို ပြောရန် ခက်ကြောင်း၊ အများစုသည် မဲပေးသည့် နေ့တွင်မှ ဆုံးဖြတ်ချက် ချမည်ဖြစ် ကြောင်းလည်း ၎င်းက ပြောသည်။

ထိုင်းလွှတ်တော်ကို တွေ့ရစဉ်

၎င်းအနေဖြင့် လွှတ်တော်အတွင်း နေရာပေါင်း ၂၅၀ ကျော်ကို ရရှိသည့် ဝန်ကြီးချုပ်လောင်းအား ထောက်ခံမဲပေး မည်ဆိုသည့် ကတိကို တည်သွားမည်ဖြစ်ကြောင်း ဝမ်ချိုင်းက ပြောသည်။

MFP ဦးဆောင်သည့် ညွန့်ပေါင်းအဖွဲ့တွင် နိုင်ငံရေပါတီ ရှစ်ခုပါဝင်ကာ လွှတ်တော်နေရာ ၃၁၃ ခုကို ရရှိထားသော် လည်း ပီတာအား ဝန်ကြီးချုပ်အသစ်အဖြစ် တင်မြှောက်ရန် နေရာ ၇၅၀ ရှိသောလွှတ်တော်မှ ထောက်ခံမဲ အနည်း ဆုံး ၃၇၆ ခု လိုအပ်သည်။

ဝန်ကြီးချုပ် အသစ်နေရာအတွက် မဲပေးရာတွင် ဆီးနိတ်လွှတ်တော် အနေဖြင့် ပီတာ၏ iTV တွင် ရှယ်ယာများ ပိုင်ဆိုင်ထားမှုကို ထည့်သွင်း စဉ်းစားမည့် အခြေအနေမရှိဟု ဝမ်ချိုင်းက ပြောသည်။
ထိုကိစ္စကို သက်ဆိုင်ရာ အာဏာပိုင်များကသာ ကိုင်တွယ် ဖြေရှင်းသွားမည်ဖြစ်သည်။ ထိုင်းဥပဒေအရ မီဒီယာ ကုမ္ပဏီတစ်ခုခုတွင် ရှယ်ယာပိုင်ဆိုင်သူအား ရွေးကောက်ပွဲတွင် ကိုယ်စားလှယ်အဖြစ် ဝင်ရောက်ယှဉ်ပြိုင်ရန် တားမြစ်ထားသည်။

ထိုင်းပြည်သူများကို တွေ့ရစဉ်

ပီတာ၏ iTV တွင် ရှယ်ယာ ၄၂၀၀၀ ပိုင်ဆိုင်မှုအပေါ် စုံစမ်းစစ်ဆေးပေးရန် နိုင်ငံရေး တက်ကြွလှုပ်ရှားသူ ရန်ခရိုင် လီကစ်ဝတ်တာနန် (Ruangkrai Leekitwattana)က ရွေးကောက်ပွဲကော်မရှင်အား တောင်းဆိုထားသည်။

တော်ဝင်မိသားစုနှင့် ပတ်သက်သော ပုဒ်မ ၁၁၂ အား ပြင်ဆင်မည့် ပါတီ၏ အငြင်းပွားဖွယ် မူဝါဒကြောင့် ပီတာ အား ထောက်ခံမဲပေးမည် မဟုတ်ဟု လွှတ်တော်အမတ် တစ်ဦးဖြစ်သူ ကစ်တီဆတ် ရတ်တာနာဝါရာဟာ (Kittisak Rattanawaraha) က အင်္ဂါနေ့တွင် အတည်ပြု ပြောဆိုသည်။

လက်ရှိ လွှတ်တော်၏ ငါးနှစ်သက်တမ်းသည် လာမည့်နှစ် မေလ ၁၁ ရက်တွင် ကုန်ဆုံးမည်ဖြစ်သည်။

ထို့နောက်တွင် ၎င်းသည် ဝန်ကြီးချုပ် ရွေးချယ်ရေးအတွက် ပါဝင်ခွင့်ရှိတော့မည် မဟုတ်ကြောင်း ဒုတိယ ဝန်ကြီးချုပ်ဖြစ်သူ ဝစ်စနူ ကရီယာဂမ် (Wissanu Krea-ngam) က ပြောသည်။

သို့သော် ၎င်းတို့တွင် အိမ်စောင့်အစိုးရအဖြစ် လုပ်နိုင်စွမ်း ဆက်ရှိနေဦးမည် ဖြစ်သည်။

Source: ဘန်ကောက်ပို့စ်

CNI International News

ဘန်ကောက်၊ မေလ ၂၅

အိမ်စောင့်အစိုးရမှ အစိုးရသစ်ထံသို့ အဆင်ပြေ ချောမွေ့စွာ အာဏာလွဲပြောင်း ပေးနိုင်လိမ့်မည်ဟု ဝန်ကြီးချုပ် ပရာယွတ်ချန်အိုချာ (Prayut Chan-o-Cha) က မေလ ၂၃ ရက်တွင် အာမခံပြောဆိုခဲ့ကြောင်း ဘန်ကောက်ပို့စ် သတင်းတွင် ဖော်ပြထားသည်။

တိုင်းပြည်သည် ရှေ့ဆက် သွားရမည်ဖြစ်ကြောင်း၊ အစိုးရသစ် ဖွဲ့စည်းရေးအား စောင့်ဆိုင်းနေစဉ်တွင် ပြည်သူများ အား စောင့်ရှောက်ရန် ဆက်လက် လုပ်ဆောင်သွားရမည်ဖြစ်ကြောင်း ဗိုလ်ချုပ်ကြီးပရာယွတ်က ပြောသည်။

ပြည်သူများ စိတ်ပျက်စေမည့် နိုင်ငံရေး အခြေအနေများကို ဖန်တီးခြင်းဖြင့် ပြည်သူများအကြား အထိတလန့် ဖြစ်အောင် လုပ်ဆောင်ခြင်းများကို ရှောင်ကျဉ်ကြရန်လည်း ဝန်ကြီးချုပ်က သက်ဆိုင်ရာ အဖွဲ့အစည်းများကို တိုက်တွန်းခဲ့သည်။

ပြဿနာများ ထပ်မံ မဖန်တီးရန် လိုကြောင်း၊ ၎င်းအနေဖြင့် မည်သည့်ဘက်နှင့်မှ ပြဿနာမရှိကြောင်း လက်ရှိ ဒီမိုကရေစီ လုပ်ငန်းစဉ်အား လေးစားမှုရှိကြောင်း ပရာယွတ်က ပြောသည်။

အိမ်စောင့်အစိုးရမှ အစိုးရအသစ်ထံသို့ အာဏာလွှဲပြောင်းရေးအတွင်း တိုင်းပြည်၏ စီးပွားရေးဖွံ့ဖြိုးတိုးတက်မှုကို ဆက်လက် ထိန်းသိမ်းနိုင်ရန်အတွက် လိုအပ်သော လုပ်ဆောင်ချက်များကို ချမှတ် ဆောင်ရွက်သွားမည်ဟု ပရာယွတ်က ပြောသည်။

MFP ပါတီခေါင်းဆောင် လူထုနဲ့တွေ့ဆုံစဉ်

ထိုင်းနိုင်ငံ၏ နိုင်ငံရေးဆိုင်ရာ မတည်ငြိမ်မှုများနှင့် ပတ်သက်သည့် စိုးရိမ်မှုများကြောင့် ထိုင်းချေးငွေ စာချုပ်များ ကို ကမ္ဘာလုံးဆိုင်ရာ ရင်းနှီးမြှုပ်နှံသူများက အကြီးအကျယ် ရောင်းချခြင်းနှင့်ပတ်သက်၍ မေးမြန်းခဲ့ရာတွင်လည်း ယင်းတို့ကို ရပ်တန့်ရန် မဖြစ်နိုင်ဟု ဝန်ကြီးချုပ်က ပြန်ဖြေခဲ့သည်။

သို့သော် ထိုင်းနိုင်ငံသည် နိုင်ငံရေးအရ မတည်ငြိမ်မှုများ ရှိနေသည့်တိုင် ဘဏ္ဍာရေးအရ တည်ငြိမ်သည့် အခြေ အနေတွင် ရှိနေကြောင်း၊ သက်ဆိုင်ရာ အဖွဲ့အစည်းများ အနေဖြင့်လည်း ဆိုးရွားသော ပြဿနာများ ထပ်မံ မဖြစ် ပေါ် လာစေရေးအတွက် ပူးပေါင်းတားဆီးသွားရန် လိုအပ်ကြောင်း ပရာယွတ်က ပြောသည်။

မိမိ(ပရာယွတ်)၏ တစ်ခုတည်းသော မျှော်လင့်ချက်မှာ တိုင်းပြည် ငြိမ်းချမ်းရန်သာဖြစ်ပြီး အိမ်စောင့်အစိုးရ၏ ဝန်ကြီးချုပ် တစ်ဦးအနေဖြင့် အစိုးရသစ် မတိုင်ခင်အထိ တာဝန်များကို အကောင်းဆုံး ထမ်းဆောင်သွားမည်ဟု ပရာယွတ်က ပြောသည်။

ဒုဝန်ကြီးချုပ် ပရာဝပ် ဝေါင်ဆူဝမ်ကို တွေ့ရစဉ်

နိုင်ငံရေး အနာဂတ်နှင့် ပတ်သက်၍ ဒုတိယဝန်ကြီးချုပ် ပရာဝပ် ဝေါင်ဆူဝမ်နှင့် ဆွေးနွေးဖြစ်သလားဟု မေးမြန်း ခဲ့ရာတွင်လည်း ၎င်းသည် လက်ရှိ အိမ်စောင့်အစိုးရအဖွဲ့၏ တာဝန်များ အကြောင်းမှလွဲ၍ ဝေါင်ဆူဝမ်နှင့် မည်သည့် ကိစ္စမှ မဆွေးနွေးဖြစ်ဟု ဖြေကြားခဲ့သည်။

အစိုးရအဖွဲ့သစ်အတွက် MFP ဦးဆောင်သော အစီအစဉ်များကို ထောက်ခံရေး လွှတ်တော်ကို ဖိအားပေးရန်နှင့် လူထု စုဝေးပွဲများ ကျင်းပရန် Move Forward Party(MFP)ပါတီအား ထောက်ခံသူများ၏ အွန်လိုင်း လှုံ့ဆော်မှု များနှင့် ပတ်သက်၍ သက်ဆိုင်ရာ လုံခြုံရေးအဖွဲ့များက လူထုစုဝေးပွဲများသည် တရားဥပဒေ အကန့်အသတ် အတွင်း ရှိနေစေရန် ဆောင်ရွက်သွားလိမ့်မည်ဟု ပရာယွတ်က ပြန်လည် ဖြေကြားခဲ့သည်။

Source: ဘန်ကောက်ပို့စ်

CNI International News

ဘန်ကောက်၊ မေလ ၂၄

ထိုင်းနိုင်ငံ၏ အစိုးရအဖွဲ့အသစ်သည် လာမည့်သြဂုတ်လ ဒုတိယအပတ်တွင် နေရာတကျ ဖြစ်မည်ဟု ယူဆ ကြောင်း ယာယီအစိုးရ၏ ပြောခွင့်ရပုဂ္ဂိုလ် အနူချာ ဘူရာပါချိုင်သီရိ (Anucha Burapachaisri) က မေလ ၂၃ ရက်တွင် ပြောကြားခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

အစိုးရအသစ် ဖွဲ့စည်းလာရ လုပ်ဆောင်ရမည့် ရက်စွဲများ

အိမ်စောင့်အစိုးရ၏ ဒုတိယဝန်ကြီးဖြစ်သူ ဝစ်ဆာနူ ကရီရာ ဂမ် (Wissanu Krea-ngam) သည် မေလ ၂၃ ရက်တွင် အစိုးရအဖွဲ့ အစည်းအဝေးအတွင်း အစိုးရအဖွဲ့ အသစ်နှင့် ပတ်သက်သည့် အချိန်ဇယားကို အအောက်ပါ အတိုင်း သတ်မှတ်ခဲ့သည်ဟု အနူချာက ပြောသည်။ ယင်းတို့တွင်

(၁) ရွေးကောက်ပွဲကော်မရှင်က ရွေးကောက်ပွဲ တရားဝင်ရလဒ်ကို ဇူလိုင် ၁၃ ရက်နေ့တွင် ကြေညာရန်။ ယင်းက ရွေးကောက်ပွဲအပြီး ရက် ၆၀ အကြာတွင် ဖြစ်သည်။

(၂) လွှတ်တော်အမတ်သစ်များ လွှတ်တော်သို့ ဇူလိုင် ၂၀ ရက်တွင် နောက်ဆုံးသတင်းပို့ရန်။

(၃) လွှတ်တော်၏ ပထမဆုံးသော အစည်းအဝေးကို ဇူလိုင် ၂၅ ရက်တွင် စတင်ရန်။

(၄) ဝန်ကြီးချုပ်သစ် ရွေးချယ်ရန်အတွက် လွှတ်တော်ပူးတွဲ အစည်းအဝေးကို သြဂုတ်လ ပထမအပတ်တွင် ကျင်း ပရန်။

(၅) ဘုရင်ရှေ့မှောက်တွင် ကျမ်းကျိမ်ပြီးနောက် အစိုးရအဖွဲ့သစ်ကို သြဂုတ်လ ဒုတိယပတ်တွင် ခန့်အပ်ရန်

(၆) အိမ်စောင့်အစိုးရ၏ သက်တမ်းသည် သြဂုတ်လလယ်တွင် ကုန်ဆုံးရန်တို့ ဖြစ်သည်။

Source: ဘန်ကောက်ပို့စ်

CNI International News

ဗီယက်တိုင်း၊ မေလ ၂၄

ရုရှားလုံခြုံရေးကောင်စီ၏ ဒုတိယဥက္ကဋ္ဌဖြစ်သူ ဒီမီထရီ မက်ဗီဒက်ဗ် (Dmitry Medvedev) က ဘယ်ဂိုရော့ဒ် (Belgorod) ဒေသတွင် တိုက်ခိုက်မှုပြုလုပ်ခဲ့သော လက်သည်တရားခံများကို စက်ဆုပ်ဖွယ်ကောင်းသူများဟု သတ်မှတ်ခဲ့ကာ ယင်တို့ကို ကြွက်များကဲ့သို့ သုတ်သင်ရှင်းလင်းသွားရမည်ဟု ပြောခဲ့ကြောင်း တာ့စ်သတင်းတွင် ဖော်ပြသည်။

ထိုသူများကို စက်ဆုပ်ဖွယ်ကောင်းသူများဆိုသည်မှလွဲ၍ တခြားခေါ်စရာမရှိကြောင်း၊ ၎င်းတို့နှင့် ပတ်သက်၍ မည်သို့ကိုင်တွယ်ဆောင်ရွက်မည်ကို မေးစရာရှိကြောင်း၊ ၎င်းတို့ကို အကျဉ်းသားများအဖြစ် ဖမ်းဆီးခြင်းပင် မလုပ်ဘဲ ကြွက်များကဲ့သို့ သဘောထားကာ သုတ်သင်ရှင်းလင်းရမည်ဖြစ်ကြောင်း မက်ဗီဒက်ဗ်က ပြောခဲ့သည်။

ယခုကဲ့သို့ တိုက်ခိုက်မှုများသည် ၎င်းတို့နှင့် ပတ်သက်ခြင်းမရှိဟု ယူကရိန်းဘက်က မည်သို့ပင်ငြင်းဆိုစေကာမူ ယင်းသည် အလိမ်အညာသာဖြစ်ကြောင်း၊ ယူကရိန်းဘက်က လိမ်ညာနေကြောင်း ရုရှားမြေပေါ်တွင် ဖြစ်ပွား ခဲ့သောတိုက်ခိုက်မှုများနှင့်ပတ်သက်၍ တာ့စ်သတင်းဌာနမှ မေးမြန်းမှုအပေါ် လုံခြုံရေးကောင်စီ ဒုဥက္ကဋ္ဌ က ပြန်လည်ဖြေကြားခဲ့သည်။

တိုက်ခိုက်မှုများအတွက် တာဝန်ရှိမှုများသည် ယူကရိန်းအစိုးရနှင့် ယင်း၏ စပွန်ဆာများဖြစ်သော အမေရိကန်၊ အီးယူ၊ ဗြိတိန်နှင့်တခြားသောနိုင်ငံများပင်ဖြစ်ကြောင်း၊ ယင်းက ၎င်းတို့၏ တိုက်ရိုက်တုန့်ပြန်မှုပင်ဖြစ်ကြောင်း လည်း မက်ဗီဒက်ဗ်က အခိုင်အမာ ပြောဆိုခဲ့သည်။

ပြီးခဲ့သည့် တနင်္လာနေ့က ယူကရိန်းဘက်က တော်လှန်ပုန်ကန်ရေးအဖွဲ့တစ်ခုသည် ရုရှားနိုင်ငံ ဘယ်ဂိုရော့ဒ် ဒေသ၏ ဂရိုင်ဗိုရွန် (Graivoron) ခရိုင်သို့ ဝင်ရောက်ခဲ့ပြီး ပထမနေ့တိုက်ပွဲများတွင် လူရှစ်ဦးဒဏ်ရာရရှိခဲ့သည်။ အုပ်ချုပ်ရေးမှူး၏အဆိုအရ တိုက်ပွဲ ဒုတိယနေ့တွင် ယူကရိန်းစစ်သွေးကြွများ ဝင်ရောက်လာသည့် ရွာအတွင်းမှ လူနောက်ထပ်နှစ်ဦးထပ်မံ ဒဏ်ရာရရှိခဲ့ကာ ရွှေ့ပြောင်းမှုများအတွင်း အမျိုးသမီးကြီးတစ်ဦး သေဆုံးခဲ့သည်ဟု သိရသည်။

ထိုသို့တိုက်ခိုက်မှုများနှင့်ပတ်သက်၍ ဘယ်ဂိုရော့ဒ်ဒေသတွင် အကြမ်းဖက်မှုနှိမ်နင်းရေး အခြေအနေတစ်ရပ်ကို ကြေညာထားကာ ယူကရိန်းမှ အဖျက်သမားများကို ရုရှားမြေပေါ်မှ ဖယ်ရှားရှင်းလင်းနိုင်ရေးအတွက် ကြိုးပမ်းမှု များကိုလည်းလုပ်ဆောင်လျက်ရှိသည်။ ဒေသခံများအတွက် ယာယီရွေ့ပြောင်းရေးစင်တာများကိုလည်း စတာရီ အော့စ်ကို (Stary Oskol)၊ ယာကော့လတ်ဗ်ကာ (Yakovlevka) နှင့် အိုင်ဗန်ယန်ကာ (Ivanyanka) ခရိုင်တို့တွင် ဖွင့်လှစ်ထားသည်ဟု သိရသည်။

Source:Tass