CNI International News

ဆိုးလ်၊ ဩဂုတ် ၄

အာရှခရီးစဉ် လှည့်လည်နေသော အမေရိကန် အောက်လွှတ်တော်ဥက္ကဋ္ဌ နန်စီပလိုစီသည် တောင်ကိုရီးယားသို့ ရောက်ရှိလာ သော်လည်း တောင်ကိုရီးယားသမ္မတ ယွန်ဆော့ရွဲ (Yoon Suk-yeol) သည် လူချင်းမတွေ့ဆုံဘဲ တယ်လီဖုန်း ဆက်သွယ်၍သာ ပြောကြားရန် စီစဉ်ထားကြောင်း သမ္မတရုံး၏ သတင်း ထုတ်ပြန်ချက်ကို ကိုးကား၍ ကိုရီးယားတိုင်းမ်က ဖော်ပြထားသည်။

သမ္မတယွန်သည် နွေရာသီ အားလပ်ရက်အတွင်း နန်စီပလိုစီနှင့် လူချင်းတွေ့ဆုံရန် စီစဉ်ထားခြင်း မရှိကြောင်း တောင်ကိုရီးယား အစိုးရတာဝန်ရှိသူများက ပြောကြားခဲ့သည်။

ပလိုစီသည် ၎င်း၏ ထိုင်ဝမ်ခရီးစဉ်အပြီး အမေရိကန်နှင့်တရုတ် တင်းမာမှု တိုးနေချိန်၌ တောင်ကိုရီးယားနိုင်ငံ၏ မြို့တော် ဆိုးလ်သို့ ရောက်ရှိလာခဲ့သည်။

အဆိုပါ ခရီးစဉ်ကို တရုတ်က ပြင်းပြင်းထန်ထန် ကန့်ကွက်ရှုတ်ချခဲ့ပြီး ထိုင်ဝမ်ကျွန်း ပတ်ပတ်လည်တွင် ရေကြောင်းနှင့် လေကြောင်း ပူးတွဲစစ်ရေးလေ့ကျင့်မှု စတင်ခဲ့သည်။

ဆိုးလ်မြို့တွင် ပလိုစီသည် တောင်ကိုရီးယား အမျိုးသားလွှတ်တော်ဥက္ကဋ္ဌ ကင်မ်ဂျင်ပျိုး (Kim Jin-pyo) နှင့် တွေ့ဆုံမည် ဖြစ်ပြီး ဒေသတွင်း လုံခြုံရေး၊ စီးပွားရေး ပူးပေါင်းဆောင်ရွက်ရေးနှင့် အခြားဆိုင်းငံ့ ကိစ္စရပ်များကို ဆွေးနွေးရန် ရည်ရွယ်ထား သည်။

နန်စီပလိုစီနဲ့ ထိုင်ဝမ်သမ္မတ ဆိုင်းအင်ဝမ် (AFP)

၎င်း၏ နှစ်ရက်ကြာ ခရီးစဉ်အတွင်း ဩဂုတ် ၄ ရက် နှောင်းပိုင်း၌ တောင်နှင့်မြောက် ကိုရီးယားနှစ်နိုင်ငံ အပစ်အခတ်ရပ်စဲရေး ဇုန်ဖြစ်သည့် ပန်းမွန်ဂျုံ ကျေးရွာသို့လည်း သွားရောက်မည်ဟု သိရသည်။

ပလိုစီသည် ၂၀၀၂ ခုနှစ်၌ လွှတ်တော်ဥက္ကဋ္ဌဟောင်း ဒန်းနစ်ဟက်စတာ့ (Dennis Hastert) နောက်ပိုင်း တောင်ကိုရီးယားသို့ ပထမဆုံး လာရောက်သည့် အမေရိကန် အောက်လွှတ်တော် ဥက္ကဋ္ဌလည်းဖြစ်ကြောင်း ကိုရီးယားတိုင်းမ်၌ ဖော်ပြထားသည်။

တောင်ကိုရီးယားရှိ နိုင်ငံရေးသုတေသီ တချို့ကတော့ တောင်ကိုရီးယားသမ္မတ ယွန်ဆော့ရွဲသည် နန်စီပလိုစီနှင့် တွေ့ဆုံပါက တရုတ်၏ ကန့်ကွက်မှုကို ခံရမည့် အခြေအနေကို ရှောင်လွှဲလိုခြင်းကြောင့် လူချင်းမတွေ့ဘဲ တယ်လီဖုန်းဖြင့်သာ ဆက်သွယ်ရန် စီစဉ်ခဲ့ခြင်း ဖြစ်နိုင်ကြောင်း သုံးသပ်နေကြသည်။

တရုတ်နိုင်ငံသည် တောင်ကိုရီးယား၏ ပို့ကုန် ၂၅ ရာခိုင်နှုန်းလောက်ကို ဝယ်ယူပေးလျက်ရှိပြီး အမေရိကန်ကတော့ ၁၅ ရာခိုင်နှုန်းလောက်သာ ဝယ်ယူနေခြင်းကြောင့် တရုတ်၏ ကန့်ကွက်မှုကနေ ပို့ကုန်တင်သွင်းမှု ပိတ်ဆို့ခြင်းခံရမည်ကို သမ္မတ ယွန်ဆော့ရွဲ ရှောင်လွှဲလိုခြင်းလည်း ဖြစ်နိုင်သည်ဟု သုံးသပ်နေကြသည်။

CNI International News

မော်စကို၊ ဩဂုတ် ၃

ရုရှား အထက်တန်းလွှာများကို ပစ်မှတ်ထားသည့် အမေရိကန်၏ ပိတ်ဆို့အရေးယူမှု အသစ်တွင် အမျိုးသမီးတစ်ဦး ပါဝင်ခဲ့ရာ ၎င်းသည် သမ္မတ ဗလာဒီမာပူတင်နှင့် နှစ်ပေါင်း အတန်ကြာအောင် လက်တွဲခဲ့ဖူးသည့် ချစ်သူဟောင်းဖြစ်ကြောင်း ကောလာဟလ သတင်းများ ပေါ်ထွက်နေသည်ဟု အိန္ဒိယတူဒေးဝက်ဘ်ဆိုက်၌ ဩဂုတ် ၃ ရက် (ယနေ့) ရက်စွဲဖြင့် ရေးသား ထားသည်။

ထိုအမျိုးသမီးမှာ အလီနာကာဘေးဗာ (Alina Kabaeva) အမည်ရှိ အိုလံပစ် အားကစားမယ်ဟောင်းနှင့် လွှတ်တော် အမတ်ဟောင်း ဖြစ်သည်။

၎င်း၏ ပိုင်ဆိုင်မှုများကို ပိတ်ဆို့ အရေးယူသည့် စာရင်းထဲသို့ ထည့်သွင်းလိုက်ကြောင်း အမေရိကန် ဘဏ္ဍာရေးဝန်ကြီးဌာနက ဩဂုတ် ၂ ရက်တွင် ထုတ်ပြန်ခဲ့သည်။

သူမသည် ယူကရိန်းအား ရုရှားကျူးကျော်မှုကို အားပေးအားမြှောက် ပြုနေသည့် ရုရှားအစိုးရပိုင် မီဒီယာလုပ်ငန်းတစ်ခု၏ အကြီးအကဲလည်းဖြစ်ကြောင်း အဆိုပါ ဝန်ကြီးဌာန ထုတ်ပြန်ချက်ထဲတွင် ဆက်လက် ဖော်ပြထားသည်။

 Putin နဲ့ Alina Kabaeva ကိုတွေ့ရစဉ်(GETTY IMAGES)

ကရင်မလင် သမ္မတနန်းတော်ကို ဝေဖန်မိသဖြင့် အကျဉ်းခံရဖူးသော ရုရှားလူ့အခွင့်အရေး တက်ကြွလှုပ်ရှားသူ အဲလက် ဇေးနာဗာလန်က အလီနာကာဘေးဗာအပေါ် ပိတ်ဆို့အရေးယူရန် တောင်းဆိုခဲ့ပြီး ကာဘေးဗာသည် ရုရှားကျူးကျော်မှု အကြောင်း အနောက်အုပ်စု ဝေဖန်သုံးသပ်ချက်အား မဟုတ်မမှန် လုပ်ကြံပုံဖော်ခြင်းဖြင့် မီဒီယာကဏ္ဍမှ ဦးဆောင်နေသူ ဖြစ်ကြောင်း စွပ်စွဲခဲ့သည်။

ဗြိတိန်နိုင်ငံသည် ပြီးခဲ့သည့် မေလကတည်းက ကာဘေးဗာကို ဒဏ်ခတ်ပိတ်ဆို့ခဲ့ပြီး ဥရောပသမဂ္ဂ (EU) ကလည်း သူမ၏ ခရီးသွားလာမှုနှင့် ပိုင်ဆိုင်မှုများကို ကန့်သတ်ချက်များ ချမှတ်ခဲ့သည်။

အမေရိကန် ဘဏ္ဍာရေး ဝန်ကြီးဌာန၏ ပိတ်ဆို့အရေးယူသည့် လူပုဂ္ဂိုလ် စာရင်းထဲတွင် ပြီးခဲ့သည့် ဧပြီလ၌ ပူတင်၏ အရွယ်ရောက်ပြီး သမီးများဖြစ်ကြသော ကေတာရီနာ ဗလာဒီမာ နာတီခိုနိုဗာနှင့် မာရီယာ ဗလာဒီမာ နာဗိုရွန်စတိုဗာ တို့လည်း ထည့်သွင်း ခံခဲ့ရသည်။

 လွှတ်တော်အမတ်ဖြစ်ခဲ့တဲ့ Alina Kabaeva (GETTY IMAGES)

အသက် ၃၉ နှစ် အရွယ်ရှိ ကာဘေးဗာ၏ အမေရိကန်နိုင်ငံရှိ ပိုင်ဆိုင်မှုမှန်သမျှ ဆိုင်းငံ့လိုက်ပြီဖြစ်ပြီး ယေဘုယျအားဖြင့် အမေရိကန်နိုင်ငံသားများသည် သူမနှင့် ဆက်စပ် လုပ်ကိုင်ခြင်း မပြုရန် တားမြစ်ထားသည်။

အိမ်ထောင်ရေး ကိစ္စတွင် ကွာရှင်းပြတ်စဲထားသော ပူတင်သည် ကာဘေးဗာနှင့် ယခုနောက်ပိုင်း ကိုယ်ရေးကိုယ်တာ ပတ်သက်မှု မရှိတော့ကြောင်း ကရင်မလင် နန်းတော်က ငြင်းဆိုထားသည်မှာ ကာလအတန်ကြာပြီ ဖြစ်သော်လည်း အချို့ သတင်းများတွင် သူမသည် ကလေးများ၏ မိခင်တစ်ဦးဖြစ်ကြောင်း ရေးသားထားကြသည်။

ပူတင်နှင့် ကာဘေးဗာတို့သည် တစ်ချိန်က လက်ထပ်ခဲ့ကြသော်လည်း မခိုင်လုံသော အကြောင်းပြချက်များကြောင့် လမ်းခွဲခဲ့ ကြကြောင်း ၂၀၀၈ ခုနှစ်တွင် မော်စကိုထုတ် သတင်းစာတစ်စောင်က ဖော်ပြခဲ့ဖူးသည်။

ဥဇဘက် ကစ္စတန်နိုင်ငံတွင် မွေးဖွားခဲ့သူ ကာဘေးဗာသည် ၂၀၀၄ ခုနှစ် အေသင်အိုလံပစ်ပွဲတွင် ရွှေတံဆိပ်ရခဲ့ဖူးပြီး နောက် ပိုင်းတွင် ပူတင်၏ ရုရှားပေါင်းစည်းရေးပါတီတွင် ဥပဒေပြု လွှတ်တော်အမတ် တစ်ဦးအဖြစ် ၆ နှစ်တိုင်တိုင် လုပ်ကိုင်ခဲ့သည်။ ၂၀၁၄ ခုနှစ်တွင် အမျိုးသားမီဒီယာအုပ်စု (National Media Group) ကို လွှဲပြောင်းရယူခဲ့ပြီး TV talkshow အစီအစဉ်များကို တင်ဆက်ထုတ်လုပ်ခဲ့သည်။

CNI International News

ဘေဂျင်း၊ ဩဂုတ် ၃

နန်စီပလိုစီ ထိုင်ဝမ်ကျွန်းသို့ ရောက်ရှိလာသည့် ဩဂုတ် ၂ ရက်နေ့မှစတင်၍ တရုတ်ပြည်သူ့လွတ်မြောက်ရေးတပ်မတော် (PLA) သည် ကျွန်း၏အနီးတဝိုက် စစ်ရေးလေ့ကျင့်မှုများ စတင်ခဲ့ရာ J-20 ကိုယ်ပျောက်တိုက် လေယာဉ်များ၊ ကျွန်းပေါ်သို့ ပစ်ခတ်နိုင်သော အဆင့်မြင့်ဒုံးကျည်များ ပါဝင်ခဲ့ကြောင်း ဂလိုဘယ်တိုင်းမ် သတင်းစာ၏ ဝက်ဘ်ဆိုက်တွင် ရေးသားထား သည်။

အဆိုပါ စစ်ရေးလေ့ကျင့်မှုသည် ၁၉၉၆ ခုနှစ် အကျပ်အတည်း နောက်ပိုင်း တစ်ကြိမ်ထက်ပို၍ တိုးချဲ့လေ့ကျင့် နိုင်ဖွယ်ရှိ ကြောင်း သိရသည်။

နန်စီပလိုစီ၏ လေယာဉ် ဩဂုတ် ၂ ရက် ညနေပိုင်းတွင် တိုင်ပေမြို့တော်သို့ ဆင်းသက်ပြီးလျှင်ပြီးချင်း PLA အရှေ့ပိုင်းတိုင်း စစ်ဌာနချုပ်က မိမိတို့ ထိုင်ဝမ်ကျွန်းတဝိုက် စစ်ရေးလေ့ကျင့်မှုများ ဆက်တိုက် ပြုလုပ်သွားမည်ဖြစ်ကြောင်း ကြေညာခဲ့သည်။

တရုတ်စစ်တပ်သည် ထိုင်ဝမ်ကျွန်း၏ မြောက်ဘက်၊ အနောက်တောင်ဘက်နှင့် အရှေ့တောင်ဘက်တို့ရှိ ပင်လယ်ရေပြင်နှင့် ဝေဟင်တို့တွင် ရေတပ်နှင့်လေတပ် ပူးတွဲစစ်ရေး လေ့ကျင့်သွားမည်ဖြစ်ပြီး သမားရိုးကျ ဒုံးကျည်များနှင့် တာဝေးတိုက်ရိုက် ပစ် ခတ်မှုများကို ထိုင်ဝမ်ရေလက်ကြား၌ PLA အရှေ့ပိုင်းစစ်ဌာနချုပ်မှ ပြောခွင့်ရသူ ဗိုလ်မှူးကြီး ရှီယီ (Shi Yi) က ဩဂုတ် ၂ ရက် ၌ ထုတ်ပြန်ချက် တစ်စောင်ထဲတွင် ပြောကြားခဲ့သည်။

တရုတ်ရဲ့ ကိုယ်ပျောက် တိုက်လေယာဉ် (GETTY IMAGES)

သို့ဖြင့် ထိုင်ဝမ်ကျွန်းကို လမ်းကြောင်း ငါးသွယ်ခွဲ၍ PLA တပ်၏ စစ်ရေးလေ့ကျင့်မှုများဖြင့် ဝန်းရံထားမည်ဟု ဂလိုဘယ်တိုင်းမ်က ဆက်လက် ရေးသားထားသည်။

မြောက်၊ အနောက်တောင်နှင့် အရှေ့တောင်တို့တွင် ရေကြောင်းနှင့်လေကြောင်း ပူးတွဲစစ်ရေး လေ့ကျင့်ခြင်းအားဖြင့် ဝေဟင် ၏ သာလွန်ကောင်းမွန်နှင့် ပင်လယ်ပြင် ထိန်းချုပ်နိုင်ရေးအတွက် စစ်လေယာဉ်များနှင့် စစ်သင်္ဘောများ၏ စွမ်းဆောင်ရည် မြှင့်တင်နိုင်မည်ဟု သိရသည်။

ထိုင်ဝမ် ရေလက်ကြားတွင် တာဝေးပစ်ခတ် လေ့ကျင့်မှု၌ ပြည်မကြီးမှ တိုက်ရိုက်ပစ်ခတ်နိုင်သော တာဝေးဒုံးပစ်လောင်ချာ အများအပြား ပါဝင်နိုင်ဖွယ် ရှိသည်။

တဖန် ကျွန်း၏ အရှေ့ဘက်သို့ ဒုံးကျည် စမ်းသပ် ပစ်လွှတ်မှုတွင်လည်း အကယ်၍ ပြည်မကြီးမှ တိုက်ရိုက် ပစ်လွှတ်လျှင် ထိုင်ဝမ်ကျွန်းပေါ်သို့ ဖြတ်ကျော် ပျံသန်းနိုင်စွမ်းရှိကြောင်း စစ်ရေး လေ့လာသုံးသပ်သူများက ပြောကြသည်။

ယခု စစ်ဆင်ရေး လေ့ကျင့်မှု အစီအစဉ်သည် ထိုင်ဝမ်နှင့်ပတ်သက်၍ အမေရိကန်၏ မကြာသေးမီက ရန်စမှုများအား ပြင်းထန်စွာ ဟန့်တားခြင်း ဖြစ်ကြောင်း၊ ခွဲထွက်ရေးသမားများ၏ လွတ်လပ်ရေး အရယူရန် ကြိုးစားမှုတိုင်းအတွက် လေးလေးနက်နက် သတိပေးလိုက်ခြင်းဖြစ်ကြောင်း ဗိုလ်မှူးကြီး ရှီယီက ထပ်လောင်း ပြောကြားခဲ့သည်။

Source: Global Times

CNI International News

ကဘူးလ်၊ ဩဂုတ် ၃

အာဖဂန်နစ္စတန် ကဘူးလ်မြို့တော်ရှိ ဘေးကင်းလုံခြုံသည့် နေအိမ်ဝရန်တာ လသာဆောင်တွင် ရှိနေစဉ် အယ်လ် ကိုင်းဒါး ခေါင်းဆောင် အေမန် အယ်လ်ဇာဝါဟာရီ သေဆုံးစေခဲ့သည့် အမေရိကန်၏ မောင်းသူမဲ့လေယာဉ်ဖြင့် တိုက်ခိုက်မှုကြောင့် တာလီဘန် အုပ်ချုပ်သူများအတွက် ဩဂုတ် ၂ ရက်တွင် တကမ္ဘာလုံး အတိုင်းအတာဖြင့် စိစစ် သုံးသပ်မှု ပိုမိုပြင်းထန်လာစေခဲ့ကြောင်း အေပီသတင်းဌာနက ရေးသားဖော်ပြသည်။

ယခုဖြစ်စဉ်ကြောင့် တာလီဘန်တို့အပေါ် တရားဝင်အစိုးရအဖြစ် နိုင်ငံတကာအသိအမှတ်ပြုမှုရရှိရေးနှင့် အကူ အညီရရှိရေး ကြိုးပမ်းမှုများကို မှေးမှိန်သွားစေခဲ့သည်။

အာဖဂန်နစ္စတန်မှ အမေရိကန်ဆုတ်ခွာရေးအတွက် ၂၀၂၀ ပြည့်နှစ် ဒိုဟာသဘောတူညီချက်ထဲတွင် အယ်လ်ကိုင်း ဒါးအဖွဲ့ဝင်များနှင့် အမေရိကန်အပေါ် ရန်လိုတိုက်ခိုက်လိုသူများကို တာလီဘန်တို့အနေဖြင့် ပြည်တွင်း၌ ခိုအောင်း ခွင့်မပြုရန် ကတိပြုခဲ့သည်။

သို့သော်လည်း မကြာသေးမီနှစ်များအတွင်း အမေရိကန်ကို လုပ်ကြံရန် တောင်းဆိုနေသည့် ဗီဒီယိုမက်ဆေ့ချ် များစွာမှာ 9/11 အကြမ်းဖက်တိုက်ခိုက်မှုဦးဆောင်သူနှင့်ပတ်သက်၍ ထွက်ပေါ်နေခဲ့သလို ၎င်းကို တာလီဘန် တို့က လနှင့်ချီ၍ ခိုလှုံနေထိုင်ခွင့်ပေးခြင်းမှာ ထင်ရှားသည်။

ကဘူးလ်မြို့တော်ရှိ ရှီယာပါ (Shirpur) လူကုန်ထံရပ်ကွက်အတွင်း အယ်လ်ဇာဝါရီ ပုန်းခိုနေထိုင်သည့် ဘေးရန် ကင်းသော နေအိမ်သည် မူလက တာလီဘန်ခေါင်းဆောင် ဆီရာဂျက်ဒင်ဟက်ကာနီ (Sirajuddin Haqqani) ၏ အကြီးတန်းလက်ထောက်ပိုင်ဆိုင်ကြောင်း အမေရိကန်ထောက်လှမ်းရေးအရာရှိတစ်ဦးက ထုတ်ဖော်ပြောကြား ခဲ့သည်။

ဟက်ကာနီသည် တာလီဘန်အဖွဲ့၏ ဒုတိယခေါင်းဆောင်ဖြစ်ပြီး အစိုးရအဖွဲ့ဝင် ပြည်ထဲရေးဝန်ကြီး တာဝန်ယူ ထားလျက် အင်အားကောင်းသော ဟက်ကာနီကွန်ရက်ကို ထူထောင်၍ ဦးစီးနေသည်။

အထူးသဖြင့် ဟက်ကာနီကွန်ရက်နှင့်လှုပ်ရှားမှုများကြောင့် နိုင်ငံရေး၊ စစ်ရေးပြိုင်ဘက်များအကြား တင်းမာလာ၍ တာလီဘန်ခေါင်းဆောင်အချင်းချင်း အမြင်မကြည်ခြင်းများ ဆက်တိုက်ဖြစ်နေကြောင်း သတင်းများလည်း ပေါ် ထွက်နေသည်။

Source: AP

CNI International News

ဘေဂျင်း၊ ဩဂုတ် ၃

ဒီမိုကရေစီနည်းကျ အုပ်ချုပ်သည့် ထိုင်ဝမ်ကျွန်းသို့ အမေရိကန် အောက်လွှတ်တော်ဥက္ကဋ္ဌ နန်စီပလိုစီ လာရောက်မှုနှင့် ပတ်သက်၍ တင်းမာမှုတိုးနေချိန်၌ တရုတ်က ထိုင်ဝမ်နှင့်ကုန်သွယ်ရေးကို ကန့်သတ်လိုက်ကြောင်း အယ်လ်ဂျာဇီးယားက ယနေ့ (ဩဂုတ် ၃ ရက်နေ့စွဲဖြင့်) သတင်းဖော်ပြသည်။

ဆောက်လုပ်ရေး လုပ်ငန်းသုံး အဓိကကုန်စည်ဖြစ်သည့် သဲ၊ ထိုင်ဝမ်လိမ္မော်သီးနှင့် ငါးအမျိုးအစားအချို့ တင်ပို့မှုများကို လုံးဝ ရပ်ဆိုင်းလိုက်ကြောင်း တရုတ်ကူးသန်းရောင်းဝယ်ရေးနှင့် အကောက်ခွန် အာဏာပိုင်များက ယနေ့ အစောပိုင်းတွင် ကြေညာ ခဲ့သည်။

တင်ပို့မှုအချို့တွင် ပိုးသတ်ဆေးနှင့် ကိုရိုနာဗိုင်းရပ်စ်ကြောင့် စားသောက်ကုန် ရပ်နားခဲ့ရခြင်း ရှိကြောင်း၊ ယခုအခါ တရုတ် ကူးသန်းရောင်းဝယ်ရေးဝန်ကြီးဌာနမှ ဥပဒေပြဋ္ဌာန်းချက်များအရ သဲတင်ပို့မှုကို ရပ်ဆိုင်းလိုက်ကြောင်း ဝန်ကြီးဌာန ကြေညာ ချက်အရ သိရသည်။

ထို့ပြင် တရုတ်ပြည်မကြီးရှိ ထိုင်ဝမ်ရေးရာရုံး၏ သီးခြားထုတ်ပြန်ချက် တစ်ရပ်တွင်လည်း “ထိုင်ဝမ်ဖောင်ဒေးရှင်း နှစ်ခုဖြစ် သော ထိုင်ဝမ်ဒီမိုကရေစီ ဖောင်ဒေးရှင်း ထိုင်ဝမ်နိုင်ငံတကာ ပူးပေါင်းဆောင်ရွက်ရေးနှင့် ဖွံ့ဖြိုးရေးရန်ပုံငွေအဖွဲ့တို့နှင့်အတူ ပြည်မကြီးမှ တရုတ်ကုမ္ပဏီများ၊ လူပုဂ္ဂိုလ်များနှင့် ငွေရေးကြေးရေး ဆက်ဆံခြင်းမှ တားမြစ်သွားမည်” ဟု ဖော်ပြခဲ့သည်။

တရုတ်က ထိုင်ဝမ်ကုန်စည်ကို ပိတ်ပင်လိုက်(Reuters)

ဝါရင့် ဒီမိုကရက်တစ်ပါတီဝင် နိုင်ငံရေးသမားတစ်ဦးဖြစ်သည့် နန်စီပလိုစီ၏ ထိုင်ဝမ်ခရီးစဉ်ကြောင့် ကြီးမားသော အကျိုး ဆက်များ ဖြစ်ပေါ်လာမည်ဟု ဘေဂျင်းက ပြင်းပြင်းထန်ထန် သတိပေးခဲ့သော်လည်း နန်စီပလိုစီကတော့ ကျွန်းပေါ်သို့ လက်တွေ့ ရောက်ရှိလည်ပတ်နိုင်ခဲ့သည်။

ကုန်သွယ်ရေး လုပ်ငန်းစဉ်များတွင် ပို့ကုန်မှတ်ပုံတင်ခြင်း သက်တမ်းတိုးရန် ပျက်ကွက်ခြင်းကြောင့် ထိုင်ဝမ်စားသောက်ကုန် အမှတ်တံဆိပ် ၁၀၀ ကျော် အမည်မည်း စာရင်းသို့ ထည့်သွင်းလိုက်ကြောင်း ဩဂုတ် ၂ ရက်တွင် တရုတ်အကောက်ခွန် အေဂျင်စီက ကြေညာခဲ့သည်။

ထိုင်ဝမ် စားသောက်ကုန်နှင့် အခြား ကုန်စည်ထုတ်လုပ်သူများသည် မတူညီသော နေရာများတွင် ခွဲခြားဆက်ဆံခံရသဖြင့် ယခု အရေးယူ တင်းကျပ်မှုများသည် နိုင်ငံရေးအရ စေ့ဆော်မှုဖြစ်နိုင်ကြောင်း ထိုင်ဝမ် အစားအသောက်နှင့် ဆေးဝါး ကွပ်ကွဲ ရေးဌာန ညွှန်ကြားရေးမှူးချုပ် ဝူရှူမိုင်း (Wu Shou-Mei) က တိုင်ပေတိုင်းမ် သတင်းစာသို့ ပြောကြားခဲ့သည်။

တရုတ်သည် ထိုင်ဝမ်၏ အကြီးဆုံး ကုန်သွယ်ဖက်နိုင်ငံဖြစ်ပြီး ကျွန်းပေါ်မှ တရုတ်ပြည်မကြီးနှင့် ဟောင်ကောင်သို့ တင်ပို့မှု တန်ဖိုးမှာ ၂၀၂၁ ခုနှစ်တွင် ဒေါ်လာ ၁၈၈ ဒသမ ၉ ဘီလီယံအထိ ရှိခဲ့သည်။

Source: Aljazeera

CNI News

၂၀၂၂ ခုနှစ်၊ သြဂုတ် ၃

ရုရှားနိုင်ငံခြားရေးဝန်ကြီး ဆာဂျေလာဗရော့နှင့် နစက၏ နိုင်ငံခြားရေးဝန်ကြီး ဦးဝဏ္ဏမောင်လွင်တို့ ယနေ့ (သြဂုတ် ၃ ရက်) နံနက်ပိုင်းက တွေ့ဆုံ၍ ဆွေးနွေးခဲ့ကြသည်။

နိုင်ငံခြားရေးဝန်ကြီး လာဗရော့သည် မြန်မာနိုင်ငံသို့ ယနေ့ (သြဂုတ် ၃ ရက်) နံနက်ပိုင်းက ရောက်ရှိလာခြင်းဖြစ်သည်။

ရုရှားနိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မာရီယာဇာခါရိုဗာကတော့ နိုင်ငံတကာနှင့် ဒေသတွင်းဆိုင်ရာ ကိစ္စရပ် များကို အလေးပေး ဆွေးနွေးကြဖို့ ရှိကြောင်း သြဂုတ် ၂ ရက်က ပြောကြားထားသည်။

နစကနှင့်နီးစပ်သူများကတော့ ရုရှား-မြန်မာ နှစ်နိုင်ငံခြား စီးပွားရေး ပူးပေါင်းဆောင်ရွက်ရေး၊ ဟိုတယ်နှင့် ခရီးသွား လုပ် ငန်းများ ဆောင်ရွက်နိုင်ရေး၊ ရုရှားနိုင်ငံအနေဖြင့် မြန်မာနိုင်ငံသို့ ရင်းနှီးမြှုပ်နှံမှုများ ပြုလုပ်လာရေး၊ ပြည်တွင်း နိုင်ငံရေး အခြေအနေများကို ဆွေးနွေးသွားရန် ရှိကြောင်း ပြောသည်။

CNI International News
၂၀၂၂ ခုနှစ်၊ သြဂုတ် ၂

ထိုင်ဝမ်ကျွန်းရှိ ဆန္ဒပြသူ ၁၀၀၀ ခန့်သည် နန်စီပလိုစီ တည်းခိုမည့် Grand Hyatt ဟိုတယ်အနီးတွင် စု‌ဝေး၍ ဆယ်စုနှစ်များစွာအတွင်း အဆိုးရွားဆုံး ဘေးအန္တရာယ် ကျရောက်နိုင်ကြောင်း ကန့်ကွက်ဆန္ဒပြခဲ့ကြ‌သည်ဟု ဘေဂျင်းအာဘော် ဂလိုဘယ်တိုင်းမ် သတင်းစာ၏ ဝက်ဘ်ဆိုက်က ရေးသားဖော်ပြသည်။

Source: Global Times

CNI International News
၂၀၂၂ ခုနှစ်၊ သြဂုတ် ၂

တရုတ် ပြည်သူ့လွတ်မြောက်ရေးတပ်မတော်( PLA) သည် သြဂုတ် ၄ ရက် (ဘေဂျင်းစံတော်ချိန် ၁၂:၀၀ နာရီ) မှ ဩဂုတ် ၇ ရက်အထိ တရုတ်ရေပိုင်နက်နယ်မြေနှင့် ဝေဟင်ပိုင်နက်တို့တွင် တိုက်ရိုက် ပစ်ခတ်လေ့ကျင့်မှု အပါအဝင် အရေးကြီးသော စစ်ရေးလေ့ကျင့်မှုနှင့် လှုပ်ရှားမှုများကို ပြုလုပ်မည်ဖြစ်‌ကြောင်း ဘေဂျင်းအာဘော် ချိုင်းနားဒေးလီးသတင်းစာ၏ တွစ်တာပို့စ်အရ သိရသည်။

တရုတ်စစ်တပ် ယခုလို စစ်ရေး လေ့ကျင့်မည့် အချိန်မှာပဲ အမေရိကန်အောက်လွှတ်တော်ဥက္ကဋ္ဌ နန်စီပလိုစီသည် ပြင်းထန်စွာ ကန့်ကွက်မှုများကြားမှာပဲ ထိုင်ဝမ်သို့ ရောက်ရှိလာခဲ့သည်။

Source: China Daily's twitter

CNI International News

တိုင်ပေ၊ ဩဂုတ် ၂

တရုတ် ပြင်းထန်စွာ သတိပေး‌နေသည့်ကြားမှ အမေရိကန် အောက်လွှတ်တော်ဥက္ကဋ္ဌ နန်စီပေလိုစီသည် ဩဂုတ် ၂ ရက် (ယနေ့)ညပိုင်း၌ ထိုင်ဝမ်၏မြို့တော် တိုင်ပေသို့ ရောက်ရှိခဲ့‌ကြောင်း ရိုက်တာသတင်းအရ သိရသည်။

မလေးရှားနိုင်ငံမှ တောင်တရုတ်ပင်လယ်သို့ ရှည်လျားလှသော ဝေဟင်ခရီးဖြင့် ရောက်ရှိလာသော နန်စီပလိုစီကို ထိုင်ဝမ် နိုင်ငံခြားရေးဝန်ကြီး ဂျိုးဇက်ဝူက တိုင်ပေလေဆိပ်တွင် ကြိုဆိုနှုတ်ဆက်ခဲ့သည်။

Source: Reuters