CNI International News

ဒါကာ၊ ဇွန်လ ၃

ရဲတပ်ဖွဲ့နှင့် ဆီနီဂေါ အတိုက်အခံ ခေါင်းဆောင် အူစမာနီဆွန်ကို(Ousmane Sonko)အား ထောက်ခံသူများ အကြား ပဋိပက္ခများ ကြောင့် လူ ၉ ဦး သေဆုံးခဲ့ရသည်ဟု ဆီနီဂေါအစိုးရက ဇွန်လ ၂ ရက်နေ့တွင် ပြောကြား ခဲ့သည်ဟု အေပီမှ ရေးသားခဲ့သည်။

အကြမ်းဖက်မှုများ ဖြစ်ပွားပြီးနောက်တွင် အာဏာပိုင်များက လူမှုကွန်ယက် အသုံးပြုမှုများကိုလည်း ပိတ်ပင်မှု လုပ်ဆောင်ထားသည်။

သေဆုံးမှုများသည် ဆွန်ကို နေထိုင်ရာနှင့် မြို့တော်ဝန်အဖြစ် ဆောင်ရွက်သော မြို့တော် ဒါကာ (Dakar)နှင့် တောင်ပိုင်းရှိ ဇီချင်ချော် (Zinguinchor) မြို့တို့တွင် အဓိက ဖြစ်ပွားခဲ့သည်ဟု ပြည်ထဲရေးဝန်ကြီး အန်တိုနီဖိလစ် အဒီယိုလာယီ ဒီအိုမီ (Antoine Felix Abdoulaye Diome) က ကြေညာချက် တစ်စောင်တွင် ပြောသည်။

Facebook၊ WhatsApp နှင့် Twitter တို့ကဲ့သို့ အကြမ်းဖက်မှုများကို လှုံ့ဆော်ရန် ဆန္ဒပြသူများ အသုံးပြုသော လူမှုကွန်ယက်တချို့ကို ခေတ္တပိတ်ပင် ထားသည်ဟုလည်း ၎င်းက ပြောသည်။

ပြည်သူများနှင့် ပိုင်ဆိုင်မှုများ ဘေးကင်းရေးကို အာမခံချက် ပေးနိုင်ရန် ဆီနီဂေါအစိုးရသည် လိုအပ်သည့် ဆောင်ရွက်ချက်ကို ချမှတ်ဆောင်ရွက်ထားကြောင်း၊ နိုင်ငံတွင်း လုံခြုံရေးကို တိုးမြှင့်ဆောင်ရွက် သွားမည် ဖြစ်ကြောင်းလည်း ဒီအိုမီက ပြောသည်။

ဆွန်ကိုအား ထောက်ခံသူများနှင့် ရဲတပ်ဖွဲ့တို့အကြား ပဋိပက္ခများ ဆက်လက် ဖြစ်ပွားနေခြင်းကြောင့် မြို့၏ အစိတ်အပိုင်းတချို့တွင် စစ်တပ်ကို တပ်ဖြန့်ထားရသည်။

ဆီနီဂေါ အတိုက်အခံ ခေါင်းဆောင် အူစမာနီဆွန်ကိုအား တွေ့ရစဉ်

ဇွန်လ ၁ ရက်တွင် ဆွန်ကိုအား လူငယ်များကို အလွဲသုံးစားလုပ်မှုဖြင့် ပြစ်ဒဏ် ချမှတ်ခဲ့သော်လည်း အနှိပ်ပညာ ရှင် အမျိုးသမီးတစ်ဦးကို အဓမ္မကြံစည်မှု၊ သူမကို အသက်အန္တရာယ် ခြိမ်းခြောက်မှု စသည့် စွဲချက်များကိုတော့ တရားသေ လွှတ်ပေးခဲ့သည်။

ဒါကာတွင် ပြုလုပ်ခဲ့သည့် တရားရုံးစစ်ဆေးမှုကို တက်ရောက်ခဲ့ခြင်း မရှိသည့် ဆွန်ကိုအား ထောင်ဒဏ် ၂ နှစ် ချမှတ်ခဲ့ခြင်း ဖြစ်သည်။

လက်ရှိအချိန်အထိ ဆွန်ကိုအား ဖမ်းဆီးရန် ဝရမ်းထုတ်ပြန်ခြင်း မရှိသေးဟုလည်း ရှေ့နေဖြစ်သူက ပြောသည်။

ဆွန်ကိုသည် ဆီနီဂေါ၏ ၂၀၁၉ သမ္မတ ရွေးကောက်ပွဲတွင် တတိယနေရာ ရရှိခဲ့သူဖြစ်ပြီး နိုင်ငံတွင်းရှိ လူငယ်များ ကြားတွင် အထူးထင်ရှားသည်။

လက်ရှိ ၎င်းအပေါ် စစ်ဆေးမှုများသည် ၂၀၂၄ သမ္မတ ရွေးကောက်ပွဲ မဝင်နိုင်စေရန် ယခု တာဝန်ယူထားသည့် အစိုးရ၏ ကြိုးပမ်းမှုဟုလည်း ထောက်ခံသူများက ယုံကြည်လျက် ရှိသည်။

သမ္မတ မက်ကီဆောလ်ကို တွေ့ရစဉ်

ဆွန်ကိုသည် သမ္မတ မက်ကီဆောလ် (Macky Sall)၏ ပင်မ အတိုက်အခံ တစ်ဦးအဖြစ် သတ်မှတ်ခံထားရသူ ဖြစ်ကာ တတိယအကြိမ်မြောက် သမ္မတသက်တမ်းကို ဝင်မပြိုင်ပါဟု လူသိရှင်ကြား ထုတ်ပြန်ရန်လည်း သမ္မတကို တိုက်တွန်းထားသူ ဖြစ်သည်။

ဆွန်ကိုအား ပြစ်ဒဏ် ချမှတ်ပြီးချိန်မှစ၍ နိုင်ငံတစ်ဝန်းလုံး၌ ပဋိပက္ခများ ပေါ်ပေါက်လာခဲ့ကာ ဆန္ဒပြသူများက ကျောက်တုံးများဖြင့် ပစ်ခြင်း၊ ကားများကို မီးရှို့ခြင်း၊ တချို့အရပ်များတွင် အတားအဆီးများကို ပြုလုပ်ခြင်းတို့ လုပ်ဆောင်ခဲ့သည်။

ထို့နောက် ၎င်းတို့ကို မျက်ရည်ယို ဗုံးများဖြင့် ရဲတပ်ဖွဲ့က တုန့်ပြန်ခဲ့သည်။

ထိုသို့ ဆန္ဒပြသူများနှင့် ရဲတပ်ဖွဲ့တို့၏ ထိပ်တိုက် တွေ့ဆုံမှုများကြောင့် ဒါကာရှိ ပင်မတက္ကသိုလ်ကို ပိတ်ခဲ့ရသည်။

Source: AP

CNI International News

ဘန်ကောက်၊ ဇွန်လ ၃

ပြည်ပြေးအဖြစ် ၁၇ နှစ်ကြာ နေထိုင်ခဲ့ပြီးနောက်တွင် ထိုင်းဝန်ကြီးချုပ်ဟောင်း သက်ဆင်ရှင်နာဝပ် (Thaksin Shinawatra) သည် ဇူလိုင်လတွင် ထိုင်းနိုင်ငံသို့ ပြန်လာရန် စိတ်ပိုင်းဖြတ်ထားသည်ဟု Thai PBS World သတင်း တွင် ဖော်ပြထားသည်။

၎င်း ထွက်ပြေးရသည့် အကြောင်းအရင်းဖြစ်သော ထောင်ဒဏ် ၁၀ နှစ် ပြစ်ဒဏ်ကို ပြန်လည် ကျခံရနိုင်ခြေ ရှိသည့် အခြေအနေတွင် ဖြစ်သည်။

သက်ဆင်၏ မွေးနေ့သည် ဇူလိုင် ၂၆ ရက်နေ့တွင် ဖြစ်သည်။

စင်္ကာပူတွင် မှတ်တမ်းတင်ထားသည့် မကြာသေးခင်က ပြုလုပ်ခဲ့သော အင်တာဗျူးတစ်ခု၌ သက်ဆင်က ပြည် တော်ပြန်မည့် ၎င်း၏ အစီအစဉ်ကို ထပ်လောင်း ပြောကြားခဲ့သည်။

သက်ဆင် သူ့ရဲ့ သားသမီး သုံးဦး ဓာတ်ပုံကိုင်ထားစဉ်

ယခင်က ပြောခဲ့သည့်အတိုင်းပင် ထပ်မံ အတည်ပြုကြောင်း၊ သူ၏ သမီးဖြစ်သူ ရက်သတ်မှတ်မည့် အချိန်ကို စောင့်နေကြောင်း သက်ဆင်က ပြောခဲ့သည်။

မြေး ၇ ဦးကို စောင့်ရှောက်နိုင်လိုကြောင်း၊ ထိုမှသာ သူတို့၏ မိဘများထံမှ ဝန်ထုပ်ဝန်ပိုးများကို လျှော့ချ နိုင်မည် ဖြစ်ကြောင်း၊ သူ၏သားသမီးများသည် ပြန်တော်ပြန် အစီအစဉ်အတွက် အာရုံစိုက် ဆောင်ရွက်နေ ကြောင်းလည်း သက်ဆင်က ပြောသည်။

သမီးဖြစ်သူ ဖြူးထိုင်းပါတီက ပေတုန်တန်ကိုတွေ့ရစဉ်

သက်ဆင်က “မိမိအနေဖြင့် နိုင်ငံရေး ကစားပွဲသို့ ထပ်ဝင်ရန် အသက်ကြီးသွားပြီ ဖြစ်ကြောင်း၊ ကျနော့်ခေတ် ကုန် သွားခဲ့ပါပြီ။ ယခုအချိန်သည် လူကြီးများအတွက် မဟုတ်ဘဲ မျိုးဆက်သစ်များအတွက် အချိန်ဖြစ်သည်။ အသက် ကြီး သူများသည် လူငယ်များနှင့်အပြိုင် မကြဲနိုင်တော့သည့်အတွက် လူငယ်များကို ဖိအားပေးခြင်းထက် အကြံ ဉာဏ်သာပေးရမည်။ အသက်ကြီးသူများသည် လူငယ်များကို နားလည်မှု ပေးနိုင်ရမည်ဖြစ်ပြီး ယင်းက ထိုင်းနိုင်ငံ တွင်နေကာ အင်္ဂလိပ်စာကို လေ့လာသူများနှင့် ဆင်တူသည်။ ထိုင်းနိုင်ငံမှ အင်္ဂလိပ်စာ လေ့လာသူများသည် နိုင်ငံ ခြားတွင် ရှင်သန်ကြီးပြင်း လာသူများကို ဘာသာစကားအရာတွင် လိုက်မမှီသကဲ့သို့ပင် ဖြစ်သည်”ဟု ပြောသည်။

သက်ဆင်က သူ့တွင် ရှည်လျားသော သမိုင်းကြောင်း ရှိခဲ့သည့်တိုင် အနာဂတ်သည် ကာလတိုသာ ရှိတော့ ကြောင်း၊ သို့သော် မျိုးဆက်သစ်များတွင် သမိုင်းကြောင်း ခိုင်ခိုင်မာမာ မရှိသည့်တိုင် ရှည်လျားသည့် အနာဂတ် ရှိ ကြောင်း၊ လူကြီးများထက် စာရင်ပို၍ ရှည်လျားသော အနာဂတ်ကို ပိုင်ဆိုင်ထားသည့် လူငယ်များသည် လူကြီးများ ထက် ပိုကောင်းသော အနာဂတ်အမြင်ကို ပိုင်ဆိုင်ထားသည်ဟု သက်ဆင်က ပြောသည်။

ကမ္ဘာသစ် တစ်ခုဆီ ရောက်ရှိနေပြီလားဟု မေးမြန်းခဲ့ရာတွင် သက်ဆင်က Yes ဟု ပြန်ဖြေခဲ့ရာ အင်္ဂလိပ်ဘာသာ တွင် ယင်းကို စံပြောင်းလဲမှုဟု ခေါ်ကြောင်း၊ လူငယ်များ၏ တွေးခေါ်ပုံသည် ပြောင်းလဲလာခဲ့ပြီဖြစ်ကြောင်း၊ လူကြီးများက ၎င်းတို့ လိုက်မှီသည်ဟု ပြောကြောင်း၊ စာအများကြီး ဖတ်သည့်တိုင် အနေအထား တစ်ခုထိသာ မြင့်တက်လာကြောင်း၊ လူငယ်များ၏ တွေးခေါ်နိုင်စွမ်းအထိ မြင့်တက်လာနိုင်ခြင်း မရှိကြောင်းလည်း သက်ဆင်က ပြန်လည် ဖြေကြားခဲ့သည်။

Source: Thai PBS

CNI International News

ကိတ်တောင်း၊ ဇွန်လ ၂

အနောက်အုပ်စုအား ယှဉ်ပြိုင်ရန် ရည်မှန်းချက်ဖြင့် ဖွဲ့စည်းထားသည့် BRICS အဖွဲ့၏ နိုင်ငံခြားရေးဝန်ကြီးများ အစည်းအဝေးတွင် ပူတင်အား ဖမ်းဝရမ်းထုတ်ထားသည့် အရေးကိစ္စသာ ကြီးစိုးခဲ့ကြောင်း ရိုက်တာသတင်းမှ ဖော်ပြခဲ့သည်။

တောင်အာဖရိကတွင် ပြုလုပ်ခဲ့သော အစည်းအဝေးတွင် သြဂုတ်လ ညီလာခံသို့ ရုရှားသမ္မတ ပူတင် (Putin) တက်ရောက်မည်ဆိုလျှင် အဖမ်းခံရမည်လားဆိုသည့် မေးခွန်းက လွှမ်းမိုးထားခဲ့သည်။

ရုရှားသမ္မတ ပူတင်သည် ဂျိုဟန်နစ္စဘာ့ဂျ် (Johannesburg) ရှိ BRICS ထိပ်သီး အစည်းအဝေးသို့ တက်ရောက် လျှင် ၎င်းကို ဖမ်းဆီးမည်လားဆိုသည့် ကိစ္စနှင့်ပတ်သက်၍ တောင်အာဖရိကနိုင်ငံက အလေးအနက်ထား စဉ်းစား နေသည်ဟု နိုင်ငံခြားရေးဝန်ကြီး နာလီဒီ ပန်ဒေါ (Naledi Pandor) က ပြောသည်။

ပူတင်သည် စစ်ရာဇဝတ်မှုဆိုင်ရာ စွပ်စွဲချက်များဖြင့် နိုင်ငံတကာရာဇဝတ်မှုခုံရုံး (ICC)၏ ဖမ်းဝရမ်း ထုတ်ခြင်းကို ခံထားရသူ ဖြစ်သည်။

ICC ၏ အဖွဲ့ဝင် နိုင်ငံတစ်ခု အနေဖြင့် တောင်အာဖရိကသည် ပူတင်အား ဖမ်းဆီးရန် တာဝန်ရှိနေသည်။

ရုရှားကိုယ်စားလှယ်နဲ့ အာဖရိကကိုယ်စားလှယ်တွေ့ဆုံစဉ်

ပန်ဒေါသည်လည်း ဘရာဇီးလ်၊ ရုရှား၊ အိန္ဒိယနှင့် တရုတ်တို့မှ ကိုယ်စားလှယ်များ ပါဝင်သော ဆွေးနွေးပွဲ ပထမ အကျော့သို့ ရောက်ရှိလာချိန်တွင် ပူတင်အား ဖမ်းဆီးမည်လားဆိုသည့် မေးခွန်းအား တရစပ် မေးမြန်းခြင်းနှင့် ရင်ဆိုင်ခဲ့ရသည်။

ထိုမေးခွန်းကို သမ္မတ စီရယ် ရာမာဖိုဆာ (Cyril Ramaphosa)က တောင်အာဖရိကသည် မည်သည့် အနေအထားတွင် ရှိနေမည်လဲဆိုခြင်းဖြင့် အဖြေပေးသွားမည်ဟု ပန်ဒေါက ပြောသည်။

နောက်ပိုင်းတွင် ပြုလုပ်ခဲ့သော သတင်းစာ ရှင်းလင်းပွဲတွင်လည်း တောင်အာဖရိက နိုင်ငံခြားရေးဝန်ကြီးသည် ပူတင်နှင့် ပတ်သက်သော မေးခွန်းများအား ဖြေဆိုခြင်းကို ရှောင်လွှဲသွားခဲ့သည်။

ပူတင်သည် ရုရှားတို့ သိမ်းပိုက်ထားရာ ယူကရိန်းမြေမှ ကလေးများကို အတင်းအကြပ် ရွှေ့ပြောင်းခဲ့ကြောင်း မတ်လတွင် ICC က စွပ်စွဲခဲ့သည်။
ထိုစွပ်စွဲမှုများ အားလုံးကို ရုရှားဘက်က ငြင်းထားသည်။

BRICS အဖွဲ့၀င် အလံများကိုတွေ့ရစဉ် 

တောင်အာဖရိကသည် ဇန်နဝါရီလတွင်လည်း ပူတင်အား ဖိတ်ခေါ်ခဲ့သေးသည်။ လက်ရှိ အချိန်အထိ ပူတင်က ၎င်း၏ အစီအစဉ်နှင့်ပတ်သက်၍ အတည်မပြုသေးဘဲ ကရင်မလင်ဘက်ကလည်း ရုရှားသည် သင့်တော်သော အနေအထားတစ်ခုဖြင့် ပါဝင် ဆောင်ရွက်သွားမည်ဟုသာ ပြောသည်။

ဆွေးနွေးပွဲတွင် နိုင်ငံခြားရေးဝန်ကြီးများသည် အားလုံးပါဝင်မှုရှိသော ကမ္ဘာ့အရေး၌ အဖွဲ့၏ လွှမ်းမိုးမှုကို တည်ဆောက်ရေးနှင့် ပတ်သက်သည့် ၎င်းတို့၏ ရည်ရွယ်ချက်ကို အာရုံစိုက်နိုင်ရန် ကြိုးပမ်းခဲ့ကြသည်။

ကမ္ဘာ့စီးပွားရေး အင်အားကြီး နိုင်ငံများနှင့်ပတ်သက်၍ ပြောဆိုရာတွင် အိန္ဒိယနိုင်ငံခြားရေးဝန်ကြီး ဆူဘရာ မန်ယမ် ဂျိုင်ရှန်ကာ (Subrahmanyam Jaishankar)က နိုင်ငံပေါင်းများစွာသည် ၎င်းတို့ပြုသမျှ နုရသည့် အခြေအနေတွင် ရှိနေကြောင်း၊ ထို့ကြောင့် ကုသမဂ္ဂလုံခြုံရေးကောင်စီ အပါအဝင် ကမ္ဘာလုံးဆိုင်ရာ အကြောင်း အရာများအတွက် ဆုံးဖြတ်ချက်ပေးသည့် အခြေအနေကို ပြောင်းလဲရန် လိုအပ်သည်ဟု ပြောသည်။

နည်းလမ်းဟောင်းများသည် ပြောင်းလဲသော အခြေအနေ သစ်များကို မဖြေရှင်းနိုင်တော့ကြောင်း၊ BRICS သည် ပြောင်းလဲမှုအတွက် ပြယုဂ်ဖြစ်ကာ မဖြစ်မနေ ဆောင်ရွက်ရမည်ဖြစ်ကြောင်း အိန္ဒိယဝန်ကြီးက ပြောခဲ့သည်။

Source: ရိုက်တာ

CNI International News

စင်္ကာပူ၊ ဇွန်လ ၂

နှစ်နိုင်ငံကြား အရေးပေါ် ဆက်သွယ်ရန် ဖုန်းနံပါတ်တစ်ခု (hotline) ထားရှိရေး တရုတ်နှင့်စင်္ကာပူတို့အကြား ဇွန်လ ၁ ရက်နေ့က သဘောတူညီခဲ့သည်ဟု အေပီသတင်းမှ ဖော်ပြခဲ့သည်။

အမေရိကန်နှင့် တင်းမာမှုများ မြင့်တက်နေချိန်၊ ဆွေးနွေးပွဲများ နှောင့်နှေးနေချိန်တွင် တရုတ်သည် အမေရိကန်၏ အနီးကပ်ဆုံး အာရှမဟာမိတ်စင်္ကာပူနှင့် အဆင့်မြင့် ဆက်သွယ်ရေး လမ်းကြောင်း တစ်ခုကို ဖွင့်လှစ်နိုင်ခြင်း ဖြစ် သည်။

မတ်လတွင် ခန့်အပ်ခြင်း ခံခဲ့ရသည့် တရုတ်ကာကွယ်ရေးဝန်ကြီး လီရှန်းဖူ (Li Shangfu) နှင့် စင်္ကာပူ ကာကွယ် ရေးဝန်ကြီး ငှာအန်ဟန် (Ng Eng Hen) တို့သည် ကာကွယ်ရေးခေါင်းဆောင် နှစ်ဦးကြား အဆင့်မြင့် ဆက်သွယ် ရေးအတွက် စိတ်ချရသော တယ်လီဖုန်း လမ်းကြောင်းတစ်ခု တည်ထောင်ရေး ဆောင်ရွက်ရန် နားလည်မှု စာချွန် လွှာ (MoU) တွင် လက်မှတ်ရေးထိုးခဲ့သည်ဟု စင်္ကာပူဘက်မှ ထုတ်ပြန်ခဲ့သည်။

တရုတ်ကာကွယ်ရေးဝန်ကြီး လီရှန်းဖူ ဦးဆောင်သည့် ကိုယ်စားလှယ်အဖွဲ့ကိုတွေ့ရစဉ်

ထိုကဲ့သို့ အဆင့်မြင့် ဆက်သွယ်ရေး လမ်းကြောင်းများသည် အပြန်အလှန် နားလည်မှုနှင့် ယုံကြည်မှုတို့ကို ခိုင်မာ စေရေးအတွက် အရေးပါသည်ဟု ထိုကြေညာချက်တွင် ဖော်ပြထားသော်လည်း စတင် ဆောင်ရွက်မည့် အချိန် ကာလကိုမူ မဖော်ပြထားပေ။

လီသည် ကာကွယ်ရေးဝန်ကြီး ရာထူးနှင့် ပထမဆုံးသော ခရီးစဉ်အဖြစ် စင်္ကာပူကို လာရောက်ခဲ့ခြင်းဖြစ်ပြီး စင်္ကာပူအရာရှိများစွာဖြင့် ကမ္ဘာလုံးဆိုင်ရာနှင့် ဒေသဆိုင်ရာ လုံခြုံရေးကိစ္စများကို ဆွေးနွေးသွားမည် ဖြစ်သည်။
နှစ်နိုင်ငံကြား သီးသန့်၊ ပူးပေါင်း လေ့ကျင့်မှုများဖြင့် ကာကွယ်ရေး အဖွဲ့များသည် ထိတွေ့ဆက်ဆံမှုရှိကြောင်း စင်္ကာပူက ပြောခဲ့သည်။

လီ၏ခရီးစဉ်က ကာလရှည်၊ နွေးထွေး၍ မိတ်ဆွေဆန်သော ဆက်ဆံရေးများကို မီးမောင်းထိုး ပြနေသည်ဟု စင်္ကာပူဘက်က ပြောသည်။

တစ်ဖက်တွင်လည်း စင်္ကာပူသည် အမေရိကန်၏ စီပွားရေးနှင့် စစ်ရေးဆိုင်ရာ နီးကပ်သည့် မဟာမိတ်နိုင်ငံတစ်ခု လည်း ဖြစ်သည်။

တရုတ်ကာကွယ်ရေးဝန်ကြီး လီရှန်းဖူနဲ့ စင်္ကာပူ ကာကွယ် ရေးဝန်ကြီး ငှာအန်ဟန်ကိုတွေ့ရစဉ်

လီသည် တင်းမာမှုများ ရှိနေသော ဒေသတွင်း မတော်တဆ ထိပ်တိုက် တွေ့ဆုံမှုကို ရှောင်လွဲနိုင်ရေး၊ ဆက်သွယ် မှုများကို တိုးမြှင့်ရေးတို့အတွက် ဂျပန်နှင့်လည်း ကာကွယ်ရေးဆိုင်ရာ hotline တစ်ခုကို မတ်လတွင် စတင်ခဲ့ သည်။

စင်္ကာပူသို့ ရောက်ရှိနေစဉ် လီသည် ဇွန်လ ၄ ရက်နေ့၌ ကာကွယ်ရေးဆိုင်ရာ အရာရှိများ၊ သံတမန်များနှင့် နိုင်ငံ့ ခေါင်းဆောင်များကို မိန့်ခွန်းပြောမည်ဟု ယူဆရသော်လည်း ဘေးဆွယ် အစည်းအဝေးတစ်ခုအဖြစ် အမေရိကန် ကာကွယ်ရေးဝန်ကြီး လွိုက် အော်စတင် (Lloyd Austin) နှင့်တွေ့ဆုံရန် အမေရိကန်ဘက်က တောင်းဆိုမှုကို တော့ ငြင်းပယ်သွားခဲ့သည်။

အော်စတင်လည်း စင်္ကာပူသို့ ရောက်ရှိနေကာ ဇွန်လ ၃ ရက်တွင် ရှန်ဂရီလာ (Shangri-La) ကာကွယ်ရေး ညီလာခံ တွင် မိန့်ခွန်း ပြောကြားသွားမည်ဟု သိရသည်။

Source: AP

CNI International News

ဘန်ကောက်၊ ဇွန်လ ၂

Move Forward(MFP)ပါတီ ခေါင်းဆောင် ပီတာလင်ဂျာရိုရန်ရတ် (Pita Limjaroenrat) အား စွပ်စွဲထားသည့် ရှယ်ယာပိုင်ဆိုင်မှု ချိုးဖောက်ခြင်းဆိုင်ရာ တိုင်ကြားချက်များသည် ၎င်း၏ကံကြမ္မာနှင့် မေလ ၁၄ ရက်နေ့ အထွေ ထွေရွေးကောက်ပွဲကို ဖျက်သိမ်းခြင်း လုပ်/မလုပ် ဆုံးဖြတ်ပေးမည်ဖြစ်ကြောင်း အိမ်စောင့်အစိုးရ၏ ဒုတိယဝန်ကြီး ချုပ် ဝစ်ဆနူ ကရီရာဂမ် (Wissanu Krea-ngam) က ပြောသည်။

ဖွဲ့စည်းပုံအခြေခံဥပဒေတရားရုံးက ပီတာအား အရေးယူမည့်အမိန့် ချမှတ်လိုက်လျှင် မည်သို့ဖြစ်လာမည်နည်း ဆိုသည့် မေးခွန်းများကို ဝစ်ဆနူက ထိုသို့ ဖြေကြားခဲ့ခြင်း ဖြစ်သည်။
ပီတာသည် ၁၉၉၀ ပြည့်နှစ်များတွင် တည်ထောင်ခဲ့သော iTV ၏ ရှယ်ယာ ၄၂၀၀၀ ကို ပိုင်ဆိုင်ခဲ့သူ ဖြစ်သည်။

ထိုင်းဥပဒေအရ ကိုယ်စားလှယ်တစ်ဦးသည် မီဒီယာကုမ္ပဏီတစ်ခု၏ ရှယ်ယာများကို ပိုင်ဆိုင်ထားမည်ဆိုလျှင် ထိုသူအား ရွေးကောက်ပွဲ ဝင်ရောက်ယှဉ်ပြိုင်ရန် တားမြစ်သည်။

ရွေးကောက်ပွဲကော်မရှင်(EC)သည် ပီတာအား တိုင်ကြားထားသည့် ရှယ်ယာပိုင်ဆိုင်မှုဆိုင်ရာ တိုင်ကြားချက်ကို စတင် စုံစမ်းနေပြီ ဖြစ်သည်။

MFP ပါတီ ခေါင်းဆောင် ပီတာလင်ဂျာရိုရန်ရတ်ကို တွေ့ရစဉ်

ပီတာသည် MFP ပါတီ၏ ဝန်ကြီးချုပ်လောင်းအဖြစ် အဆိုပြု ခံထားရသူလည်း ဖြစ်သည်။

တိုင်ကြားမှုသည် ပီတာ၏ လွှတ်တော်အမတ် တစ်ဦးအဖြစ် အခြေအနေနှင့် ဝန်ကြီးချုပ်လောင်း တစ်ဦးအဖြစ် အခြေအနေတို့အပေါ် မေးခွန်းများကို ဖြစ်စေသည်။

ထိုအခြေအနေက MFP ကိုယ်စားလှယ်လောင်းများ၏ အနေအထားကိုလည်း ထိခိုက်စေနိုင်သည်ဆိုသည့် ခန့်မှန်းမှုများလည်း ကြီးထွားလာသည်။

တိုင်ကြားမှုတွင် ပါဝင်သော အသေးစိတ် အချက်အလက်များက အခြေအနေများ မည်သို့ဖြစ်မည်ကို ဆုံးဖြတ်ပေး သွားမည်ဟု ဝစ်ဆနူက ပြောသည်။

အသနားခံမှုသည် ပီတာ၏ လွှတ်တော်အမတ်ဖြစ်သော အခြေအနေကိုသာ ပစ်မှတ်ထားသည်ဆိုလျှင် ပီတာသည် ဝန်ကြီးချုပ်အဖြစ် တာဝန်ထမ်းဆောင်ခွင့် ရရှိမည်ဖြစ်ကြောင်း၊ ဝန်ကြီးချုပ်ဖြစ်ရန် လွှတ်တော်အမတ် တစ်ဦး အဖြစ် အရည်အချင်း ပြည့်ဝနေရန် မလိုအပ်သောကြောင့် ဖြစ်ကြောင်း ဝစ်ဆနူက ပြောသည်။

တိုင်ကြားမှုများသည် ပီတာ၏ ဝန်ကြီးချုပ်ဖြစ်ခွင့်နှင့် ပတ်သက်၍ ပစ်မှတ်ထားသည်ဆိုလျှင် ၎င်းသည် လွှတ်တော် အမတ် ဖြစ်ခွင့်ရှိနေကြောင်း ဝစ်ဆနူက ဆက်လက် ပြောဆိုခဲ့သည်။

MFP ပါတီ ခေါင်းဆောင် ပီတာလင်ဂျာရိုရန်ရတ်ကို တွေ့ရစဉ်

နှစ်ခုစလုံးအပေါ် ပစ်မှတ်ထားသည်ဆိုလျှင် ထိုအခြေအနေကို တရားရုံးက အဆုံးဖြတ် ပေးသွားမည်ဖြစ်သည်။

ယင်းက မေလ ၁၄ ရက်နေ့ ရွေးကောက်ပွဲတွင် MFP ကိုယ်စားလှယ်လောင်းများအပေါ် ပီတာ၏ ထောက်ခံချက်ကို လည်း ထိခိုက်မှု ရှိစေမည်ဖြစ်သည်။

ထိုအခြေအနေ သုံးရပ်စလုံးသည် တိုင်ကြားမှုများအပေါ် မူတည်နေကြောင်း၊ ပီတာ၏ MFP ကိုယ်စားလှယ်လောင်း များအပေါ် အတည်ပြုမှုနှင့် ပတ်သက်၍ တိုင်ကြားမှုရှိလာလျှင် ယင်းက တစ်နိုင်ငံလုံး အတိုင်းအတာဖြင့် ရွေးကောက်ပွဲ ပြန်လည် ကျင်းပရမည့် အခြေအနေကို ဖြစ်စေနိုင်ကြောင်းလည်း ဝစ်ဆနူက ပြောသည်။

တိုင်ကြားမှုများကို မသိရှိထားကြောင်း၊ မည်သို့ တိုင်ကြားရမည်ကိုလည်း အကြံပေးသွားမည် မဟုတ်ကြောင်း ၎င်း က ဆက်လက် ပြောကြားခဲ့သည်။

ထို့နောက် ပြည်သူများ အနေဖြင့်လည်း မည်သည့်အရာကိုမှ အလွယ်တကူ ကောက်ချက် မချကြရန် ၎င်းက တိုက်တွန်းခဲ့သည်။

Source: ဘန်ကောက်ပို့စ်

CNI International News

ဘဲလ်ဂရိတ်၊ ဇွန်လ ၂

အကြမ်းဖက်မှုများအထိ ဖြစ်စေခဲ့သော ပဋိပက္ခကို ဖြေရှင်းရန်အတွက် ကိုဆိုဗိုမြောက်ပိုင်းရှိ မြို့တော်ဝန်များကို ဖယ်ရှားပေးရန် ဆားဘီးယားသမ္မတ အလက်ဇန္ဒား ဘူချိ (Aleksandar Vucic)က ကိုဆိုဗို အာဏာပိုင်များကို တောင်းဆိုခဲ့သည်ဟု အယ်ဂျာဇီးလ်ယားမှ ဖော်ပြခဲ့သည်။

ထိုမြို့တော်ဝန်များသည် တရားမဝင်ဟုလည်း ၎င်းက သုံးနှုန်းသွားခဲ့သည်။

မော်လ်ဒိုဗာတွင် ကျင်းပမည့် ဥရောပနိုင်ငံရေး အသိုင်းအဝိုင်း ညီလာခံသို့ ရောက်ရှိလာချိန် ဘူချိက ပြောခဲ့ခြင်း ဖြစ်သည်။

ဆာ့ဘ်လူမျိုး အများစုနေထိုင်ရာ ဒေသတွင် အယ်လ်ဘေးနီးယားလူမျိုး မြို့တော်ဝန်များကို ခန့်အပ်ခဲ့ပြီးနောက် ကိုဆိုဗိုမြောက်ပိုင်းတွင် မတည်ငြိမ်မှုများ မြင့်တက်လာခဲ့သည်။

ဧပြီလ ရွေးကောက်ပွဲကို ဆာ့ဘ်လူမျိုးများက သပိတ်မှောက်ခဲ့ပြီးနောက်တွင် ထိုသို့ ပြုလုပ်ခဲ့ခြင်းဖြစ်သည်။

လုံခြုံရေးတပ်ဖွဲ့ကိုတွေ့ရစဉ်

ထိုအခြေအနေအတွက် အမေရိကန်နှင့် မဟာမိတ်နိုင်ငံများက ကိုဆိုဗိုအစိုးရကို ဝေဖန်ပြစ်တင်ခဲ့သည်။

တစ်ဖက်တွင်လည်း ကိုဆိုဗိုသမ္မတ ဂျိုဆာ အော့စ်မာနီ (Vjosa Osmani) က နိုင်ငံမြောက်ပိုင်းမှ အကြမ်းဖက်မှု များကို အဆုံးသတ် စေရန်အတွက် ဆားဘီးယားအနေဖြင့် ကိုဆိုဗိုအား မတည်မငြိမ်ဖြစ်အောင် ရည်ရွယ်သည့် လုပ်ရပ်များကို ရပ်တန့်ရန် လိုအပ်သည်ဟု ဇွန်လ ၁ ရက်နေ့တွင် ပြောခဲ့သည်။

စိန်ခေါ်မှုများသည် ဆားဘီးယားမှ လာကြောင်း၊ ဆားဘီးယားအနေဖြင့် အတိတ်က စံနှုန်းများအတိုင်း ပြုမှုရန် လိုအပ်နေဆဲဖြစ်ကြောင်း အော့စ်မာနီက Reuters သို့ ပြောခဲ့သည်။

အခြေအနေများသည် ခက်ခဲမှုရှိကြောင်း၊ သို့သော် ကိုဆိုဗိုတွင် တရားဥပဒေ ပြန်လည်စိုးမိုးမှုရှိသည်ကို သေချာ အောင် လုပ်ဆောင်ရန် လိုအပ်ကြောင်း၊ ကိုဆိုဗိုအား အချုပ်အခြာပိုင် နိုင်ငံတစ်ခုအဖြစ် လက်ခံခြင်း မရှိသည့် ဆားဘီးယား၏ သဘောထားက ခြိမ်းခြောက်မှုများကို ဖြစ်စေသည်ဟု နားလည်ထားကြောင်း ကိုဆိုဗို သမ္မတက ပြောခဲ့သည်။

ကိုဆိုဗိုသမ္မတ ဂျိုဆာအော့စ်မာနီကို တွေ့ရစဉ်

ဆားဘီးယားသည် ကိုဆိုဗိုနိုင်ငံတွင်း မတည်ငြိမ်မှုများ ဖြစ်စေရန် တရားမဝင်သည့် အဖွဲ့အစည်းများကို ထောက်ပံ့ နေသည်ဟုလည်း ၎င်းက စွပ်စွဲခဲ့ကာ သမ္မတဘူချိ အနေဖြင့် ငြိမ်းချမ်းရေးကို အမှန်တကယ် လိုလားလျှင် ရာဇဝတ် ဂိုဏ်များအား ထောက်ပံ့နေမှုကို ရပ်တန့်ရမည်ဟု သူမ ပြောသည်။

ထိုသို့ မလုပ်ဆောင်သေးကြောင်းလည်း ဆက်လက် ပြောကြားသည်။

လီပိုဆာဗစ် (Leposavic)ရှိ နေရာတိုင်းတွင် ဆားဘီးယား အလံများကို လွှင့်ထူထားကာ ဒေသခံများသည်လည်း ယင်းသည် ဆားဘီးယား၏ အစိတ်အပိုင်းတစ်ခုဟုသာ ပြောကြောင်း၊ ယင်းသည် ပဋိပက္ခဖြစ်ပွားရခြင်း၏ ပင်မ ကိစ္စဖြစ်ကြောင်း အယ်ဂျာဇီးလ်ယား သတင်းထောက်က ပြောသည်။

Source: အယ်ဂျာဇီးလ်ယား

CNI International News

ဘေဂျင်း၊ ဇွန်လ ၁

ခေတ်ရှေ့ပြေး AI နည်းပညာကြောင့် ဖြစ်လာသော စိန်ခေါ်မှုများနှင့် ပတ်သက်၍ တရုတ်၏အာဏာရ ကွန်မြူနစ် ပါတီက သတိပေးခဲ့သလို အမျိုးသားလုံခြုံရေးဆိုင်ရာ ဆောင်ရွက်ချက်များကို မြှင့်တင်ရန်လည်း တောင်းဆိုခဲ့ သည်ဟု အေပီသတင်းမှ ဖော်ပြခဲ့သည်။

မေလ ၃၀ ရက်နေ့က ပါတီခေါင်းဆောင်နှင့် သမ္မတဖြစ်သူ ရှီကျင့်ဖျင် (Xi Jinping) ဦးဆောင်သော အစည်းအဝေး တစ်ခုအပြီး ထုတ်ပြန်ခဲ့သော ကြေညာချက် တစ်စောင်တွင် ခေတ်ရှေ့ပြေး နည်းပညာများအတွင်း ကမ္ဘာလုံး ဆိုင် ရာ ခေါင်းဆောင်မှု ရရှိရန် အားပြိုင်မှုများကြောင့် လူမှုရေးနှင့် နိုင်ငံရေးဆိုင်ရာ ထိခိုက်မှုများအပေါ် စိုးရိမ်မှုများကို မီးမောင်းထိုးပြခဲ့သည်။

ထိုမတိုင်ခင်ကတည်းက Microsoft နှင့် Google တို့မှ ရာထူးကြီးပုဂ္ဂိုလ်များ အပါအဝင် အမေရိကန်ရှိ နည်းပညာ ရပ်ဝန်းမှ ခေါင်းဆောင်များ၊ သိပ္ပံပညာရှင်များသည်လည်း လူသားမျိုးနွယ်များအပေါ် AI ကြောင့် ဖြစ်လာမည့် ဘေးအန္တရာယ်များနှင့် ပတ်သက်၍ သတိပေးခဲ့ဖူးသည်။

တရုတ်သမ္မတ ရှီကျင့်ဖျင်ကိုတွေ့ရစဉ်

ဘေဂျင်း (Beijing) တွင် ပြုလုပ်ခဲ့သည့် အစည်းအဝေးတွင် နိုင်ငံရေးဆိုင်ရာ လုံခြုံမှုကို ထိန်းသိမ်းရန်၊ အင်တာနက် အချက်အလက်နှင့် AI တို့၏ အုပ်ချုပ်ရေးဆိုင်ရာ လုံခြုံရေးကို မြှင့်တင်ရန်တို့အတွက် ဆုံးဖြတ်ထားသော လုပ် ဆောင်ချက်များအပေါ် ဆွေးနွေးခဲ့သည်ဟု နိုင်ငံပိုင် Xinhua သတင်းတွင် ဖော်ပြထားသည်။

တရုတ်နိုင်ငံ ရင်ဆိုင်နေရသည့် အမျိုးသားလုံခြုံရေး ပြဿနာများ၏ ရှုပ်ထွေးမှုနှင့် ပြင်းထန်မှုတို့သည် တဖြည်း ဖြည်း မြင့်တက်လာသည်ဟု အစည်းအဝေးတွင် ပြောဆိုခဲ့ကြောင်း၊ အမျိုးသားလုံခြုံရေးဆိုင်ရာ တာဝန်ရှိသူများ သည် ကိုယ့်ကိုယ်ကို ယုံကြည်မှုကို မြှင့်တင်ရမည်ဖြစ်ကြောင်း၊ အောင်ပွဲဆင်ရေးအတွက် လုံလောက်သော ယုံကြည်မှုရှိ၍ ကိုယ်ပိုင် အားသာချက်နှင့် အင်အားတို့ကို ကောင်းမွန်စွာ သဘောပေါက် နားလည်းထားရမည် ဟုလည်း Xinhua တွင် ဖော်ပြထားသည်။

အဆိုးရွားဆုံး အခြေအနေများအတွက် ပြင်ဆင်ထားရမည်ဖြစ်သလို ဖြတ်ကျော်နိုင်ရန် အဆင်သင့် ဖြစ်နေရမည် ဟုလည်း Xinhua ၏ ဖော်ပြချက်တွင် ပါဝင်သည်။

အစည်းအဝေးတွင် အမျိုးသားလုံခြုံရေးအတွက် ရင်ဆိုင်နေရသော ရှုပ်ထွေးမှုနှင့် စိန်ခေါ်မှုများသော အခြေအနေ များအတွက် သတိကပ်ထားရန်လည်း ရှီက တောင်းဆိုခဲ့သည်။

တရုတ်နိုင်ငံသည် လုံခြုံရေးဆိုင်ရာ တည်ဆောက်ပုံ အသစ်ဖြင့် ဖွံ့ဖြိုးတိုးတက်မှု အခြေအနေသစ် တစ်ရပ် လိုအပ် နေသည်ဟု ရှီက ပြောခဲ့သည်ဟုလည်း Xinhua တွင် ဖော်ပြသည်။

တရုတ်ရဲ့ AI ပြခန်းကိုတွေ့ရစဉ်

တရုတ်အစိုးရသည် ခန့်မှန်းနိုင်သည့် နိုင်ငံရေးဆိုင်ရာ ခြိမ်းခြောက်မှုများကို ကျော်ဖြတ်နိုင်ရေးအတွက် အရင်း အမြစ်များစွာကို အသုံးပြုရန် ဆုံးဖြတ်ထားပြီးဖြစ်သည်။

အလားတူ ရဲတပ်ဖွဲ့နှင့် လုံခြုံရေးတပ်ဖွဲ့များအတွက် အသုံးစရိတ်သည် စစ်ဘက်ဆိုင်ရာ အသုံးစရိတ်ထက် ပိုများ နေပြီလည်း ဖြစ်သည်။

နိုင်ငံတွင်း လူပုဂ္ဂိုလ်အလိုက် ဆန္ဒပြမှုများနှင့် အွန်လိုင်းမှ ဝေဖန်မှုများကို ပြင်းပြင်းထန်ထန် ထိန်းချုုပ်ထား သော် လည်း နိုင်ငံသားများ၏ မူဝါဒများအပေါ် မကျေနပ်မှုနှင့် ပတ်သက်၍ ထုတ်ဖော်မှုများ ဆက်လက် ပေါ်ပေါက်နေဆဲ ဖြစ်သည်။

အစိုးရ၏ ကိုဗစ် ကာကွယ်ရေးဆိုင်ရာ ကန့်သတ်ချက်များကို ပြည်သူများ၏ တုံ့ပြန်မှုက အကောင်းဆုံး ဥပမာ လည်း ဖြစ်သည်။

CNI International News

ဆိုးလ်၊ ဇွန်လ ၁

မြောက်ကိုရီးယား၏ ပထမဆုံးသော ထောက်လှမ်းရေးဂြိုဟ်တုကို အာကာသအတွင်းသို့ လွှတ်တင်ရန် ကြိုးပမ်းမှု သည် မအောင်မြင်ခဲ့ဘဲ ပင်လယ်ထဲသို့ ပျက်ကျသွားခဲ့သည်ဟု အေပီ သတင်းမှ ဖော်ပြခဲ့သည်။

မြောက်ကိုရီးယားဘက်က ထိုမအောင်မြင်မှုနှင့် ပတ်သက်၍လည်း ကြုံတောင့်ကြုံခဲ လျင်လျင်မြန်မြန်ပင် ဝန်ခံ သွားခဲ့ပြီး ယခုတစ်ကြိမ် အမှားအယွင်းကို သင်ခန်းစာယူကာ ဒုတိယအကြိမ် လွှတ်တင်မှု လုပ်ဆောင်သွားမည်ဟု လည်း ပြောသည်။

မြောက်ကိုရီးယား ခေါင်းဆောင်ကင်မ်သည် လက်နက်တိုက်ကို အားဖြည့်ရန်၊ သံတမန်ရေးရာ ကြန့်ကြာမှု ရှိနေချိန် တွင် အမေရိကန်နှင့် တောင်ကိုရီးယားတို့အပေါ် ဖိအားများ ထပ်ပေးရန် ဆုံးဖြတ်ထားသည်ဟုလည်း မြောက်ကိုရီးယား၏ ထုတ်ပြန်ချက်တွင် ပါဝင်သည်။

မြောက်ကိုရီးယားဘက်က ဂြိုဟ်တုလွှတ်တင် ပြီးသည်နှင့် ဒေသခံတချို့ကို ဘေးလွတ်ရာသို့ ရွှေ့ပြောင်းရန် တောင်ကိုရီးယားနှင့် ဂျပန်အစိုးရတို့က ထုတ်ပြန်ခဲ့သည်။

မြောက်ကိုရီးယားရဲ့ ထောက်လှမ်းရေး ဂြိုဟ်တု ပျက်ကျစဉ်

မြောက်ကိုရီးယား ဂြိုလ်တု အပိုင်းအစဟု ယူဆရသည့် အရာတစ်ခုကို အိုချုံးဒို (Eocheongdo)ကျွန်း အနောက် ဘက် ကီလိုမီတာ ၂၀၀ ရှိ ရေပြင်တွင် ဆယ်ယူရရှိခဲ့သည်ဟု တောင်ကိုရီးယားစစ်တပ်က ပြောသည်။

နောက်ပိုင်းတွင် မြောက်ကိုရီးယား ဒုံးကျည် အစိတ်အပိုင်းဟု ထင်ရသည့် အဖြူရောင် သတ္ထုဆလင်ဒါ တစ်ခု၏ ဓာတ်ပုံများကိုလည်း တောင်ကိုရီးယား ကာကွယ်ရေးဌာနက ထုတ်ပြန်ခဲ့သည်။

မြောက်ကိုရီးယား၏ ဂြိုဟ်တု လွှတ်တင်ခြင်းသည် ကုလလုံခြုံရေးကောင်စီ၏ သတ်မှတ်ချက်များကို ချိုးဖောက် ခြင်း ဖြစ်သည်။

လုံံခြုံရေးကောင်စီသည် ပဲ့ထိန်းနည်းပညာကို အခြေခံသည့် ဂြိုဟ်တုလွှတ်တင်မှုတိုင်းကို ပိတ်ပင်ထားသည်။

မြောက်ကိုရီးယား၏ ယခင်ဂြိုဟ်တု လွှတ်တင်မှုများသည် နိုင်ငံ၏ တာဝေးပစ် ဒုံးကျည်နည်းပညာကို တိုးတက်စေ ရန် အထောက်အကူ ဖြစ်စေခဲ့သည်ဟု လေ့လာသူများက သုံးသပ်သည်။

ပြီးခဲ့သည့်နှစ်က မြောက်ကိုရီးယား၏ တာဝေးပစ် ဒုံးကျည် စမ်းသပ်မှုများသည် အမေရိကန် မြေပေါ်သို့ ရောက်နိုင် သည့် အလားအလာများကို ပြသနိုင်ခဲ့သော်လည်း နျူကလီးယား ဒုံးကျည်များကို ဖန်တီးနိုင်ရေး မြောက်ကိုရီးယား တွင် လိုအပ်ချက်များ ရှိနေဆဲဖြစ်သည်ဟု လေ့လာသူများက ပြောသည်။

မြောက်ကိုရီးယားခေါင်းဆောင် ကင်မ်ကိုတွေ့ရစဉ်

မြောက်ကိုရီးယား၏ ပထမဆုံးသော ထောက်လှမ်းရေးဂြိုဟ်တု Malligyong-1 ကို နိုင်ငံအနောက် မြောက်ပိုင်းရှိ ဆိုဟေး ဒုံးကျည် လွှတ်တင်ရေးစခန်းမှ မနက် ၆ နာရီ ၃၇ မိနစ်တွင် လွှတ်တင်ခဲ့ခြင်းဖြစ်ပြီး ယင်းကို Chollima -1 ဒုံးကျည်က လေထုထဲသို့ သယ်ဆောင်သွားသည်။

ထိုဒုံးကျည်သည် ပထမနှင့် ဒုတိယအဆင့် ခွဲထွက်မှုများ ပြီးနောက် တွန်းလွှတ်အင်အား ဆုံးရှုံးခဲ့သည့်အတွက် ကိုရီးယားကျွန်းဆွယ် အနောက်ဘက်ကမ်းလွန်တွင် ပျက်ကျသွားခဲ့သည်ဟု မြောက်ကိုရီးယား၏ KCNA သတင်း တွင် ဖော်ပြခဲ့သည်။

ဒုံးကျည်သည် ရေပြင်ပေါ်သို့ မပျက်ကျခင် ပုံမှန်မဟုတ်သော ပျံသန်းမှုဖြစ်ခဲ့သည်ဟု တောင်ကိုရီးယားစစ်တပ်က ပြောသည်။

မည်သည့်အရာမှ အာကာသအတွင်းသို့ ရောက်ရှိခဲ့သည့်ပုံမျိုး မရှိဟုလည်း ဂျပန်အစိုးရအဖွဲ့၏ အထွေထွေ အတွင်းရေးမှူးချုပ်က ပြောသည်။

ယခုလွှတ်တင်မှုကြောင့် ပြင်းထန်သည့် လိုအပ်ချက်များ ပေါ်ထွက်လာကာ ယင်းတို့ကို နိုင်ငံ၏ အာကာသ အေဂျင်စီက စုံစမ်းစစ်ဆေးမှု လုပ်ဆောင်၍ ဒုတိယမြောက် လွှတ်တင်မှုကို စောနိုင်သမျှ အစောဆုံး လုပ်ဆောင် သွားမည်ဟုလည်း မြောက်ကိုရီးယားမီဒီယာတွင် ဖော်ပြသည်။

Source: AP

CNI International News

ဘန်ကောက်၊ ဇွန်လ ၁

တိုင်ကြားချက်များတွင် ပါဝင်သော အသေးစိတ် အချက်အလက်များက Move Forward ပါတီခေါင်းဆောင် ပီတာ လင်ဂျာရိုရန်ရတ် (Pita Limjaroenrat) အနေဖြင့် ဝန်ကြီးချုပ်ဖြစ်ရန် အရည်အချင်း ပြည့်/မပြည့် ဆိုသည်နှင့် မေလ အထွေထွေရွေးကောက်ပွဲကို ဖျက်သိမ်းသင့်သလား ဆိုသည်ကို ဆုံးဖြတ်ပေးသွားလိမ့်မည်ဟု အိမ်စောင့် အစိုးရ၏ ဒုတိယဝန်ကြီးချုပ် ဝစ်ဆနူ ကရီရာဂမ်(Wissanu Krea-ngam)က ပြောကြောင်း ဘန်ကောက်ပို့စ်မှာ ဖော်ပြခဲ့သည်။

ဝစ်ဆနူသည် လက်ရှိ အိမ်စောင့်အစိုးရ၏ ဥပဒေရေးရာပညာရှင် တစ်ဦးဖြစ်ပြီး ပီတာ၏ iTV Plc တွင် ရှယ်ယာ ပိုင်ဆိုင်သည့် ကိစ္စနှင့်ပတ်သက်သော တိုင်ကြားချက် အသေးစိတ် အချက်အလက်များက အဓိကအချက် ဖြစ်လိမ့် ဟု အစိုးရအဖွဲ့ကို မေလ ၃၁ ရက်နေ့က ပြောခဲ့သည်။

တိုင်ကြားချက်သည် ပီတာ၏ လွှတ်တော်အမတ်ဖြစ်ရန် ကိစ္စနှင့်ပတ်သက်၍ ပစ်မှတ်ထားလျှင် ၎င်းသည် ဝန်ကြီးချုပ် ဖြစ်နိုင်ဆဲဖြစ်ကြောင်း၊ အကြောင်းမှာ ဝန်ကြီးချုပ်သည် လွှတ်တော်အမတ် ဖြစ်စရာမလိုခြင်းကြောင့် ဖြစ်ကြောင်း ဝစ်ဆနူက ပြောသည်။

ထိုင်းဒုတိယဝန်ကြီးချုပ် ဝစ်ဆနူ ကရီရာဂမ်ကို တွေ့ရစဉ်

ထို့ကြောင့် တိုင်ကြားချက်သည် ဝန်ကြီးချုပ် မဖြစ်အောင် ပစ်မှတ်ထားလျှင် ၎င်းသည် လွှတ်တော်အမတ် ဖြစ်နိုင်ဆဲ ဖြစ်ကြောင်း၊ နှစ်ခုစလုံးအပေါ် ပစ်မှတ်ထားလျှင် တရားရုံးအနေဖြင့် နှစ်ခုစလုံးနှင့် ပတ်သက်၍ အဆုံးအဖြတ် ပေးမည်ဖြစ်ကြောင်း ဝစ်ဆနူက ပြောခဲ့သည်။

တိုင်ကြားချက် အနေဖြင့် ပီတာ၏ Move Forward ပါတီ ဖြစ်ခွင့်အပေါ် အတည်ပြုမှုနှင့် ပတ်သက်၍ မေးခွန်းကို လည်း ဖြစ်စေမည်ဟု ၎င်းက ဆိုသည်။
ထိုကဲ့သို့ ဖြစ်လာလျှင် တစ်နိုင်ငံလုံး အတိုင်းအတာဖြင့် အထွေထွေရွေးကောက်ပွဲကို ထပ်မံ ကျင်းပရမည် ဖြစ် သော်လည်း ၎င်းအနေဖြင့် ပီတာအား မည်ကဲ့သို့ တရားစွဲ တိုင်ကြားသင့်သည်ကို မှတ်ချက်ပြုမည် မဟုတ်ဟု ဆိုသည်။

ထိုအချက်သည် တိုင်ကြားသူနှင့်သာ သက်ဆိုင်ကြောင်း၊ ဖွဲ့စည်းပုံအခြေခံဥပဒေ တရားရုံးသည် တိုင်ကြားချက်ပါ အချက်အလက်နှင့် ပတ်သက်၍ ဆုံးဖြတ်ပေးသွားမည် ဖြစ်ကြောင်း ဝစ်ဆနူက ပြောသည်။

ထိုင်းနိုင်ငံ၏ ဖွဲ့စည်းပုံအခြေခံဥပဒေသည် မီဒီယာအဖွဲ့အစည်းများတွင် ရှယ်ယာပိုင်ဆိုင်သူများကို အထွေထွေ ရွေးကောက်ပွဲ ယှဉ်ပြိုင်ခွင့် ပိတ်ပင်ထားသည်။

Move Forward ပါတီဦးဆောင်သည့် ညွန့်ပေါင်းမဟာမိတ်များကိုတွေ့ရစဉ်

ထို့ကြောင့် iTV Plc တွင် ရှယ်ယာ ပါခဲ့ဖူးသည့် ပီတာ၏ အခြေအနေသည် မေးခွန်းထုတ်စရာ ဖြစ်လျက်ရှိသည်။

လက်ရှိတွင် ပီတာ၏ လွှတ်တော်အမတ်ဖြစ်မှု၊ မေလ ၁၄ ရက်နေ့ ရွေးကောက်ပွဲတွင် Move Forward ပါတီ ကိုယ်စားလှယ်လောင်းများအပေါ် ၎င်း၏အတည်ပြုမှုနှင့် ၎င်းဖွဲ့စည်းမည့် အစိုးရအဖွဲ့ တစ်ခုလုံးစာအတွက် ရွေး ကောက်ပွဲ ကော်မရှင်တွင် တိုင်ကြားချက် ဖွင့်ထားသည်။

သို့သော် ထိုအခြေအနေနှင့် ပတ်သက်၍ ရှည်ရှည်ဝေးဝေး စိတ်ကူး မယဉ်သင့်ကြောင်း၊ တစ်ဆင့်ချင်းစီသာ စဉ်းစား သွားရမည်ဖြစ်ကြောင်း၊ ရွေးကောက်ပွဲကော်မရှင်သည် မည်သည့် လုပ်ရပ်ကိုမှ မလုပ်ဆောင် ရသေးသည့်အတွက် အဆိုးမြင်သည့် အခြေအနေများကို မတွေးသင့်ကြောင်းလည်း ဝစ်ဆနူက ပြောသည်။

Source: ဘန်ကောက်ပို့စ်