ဂူဝါဟာတီ၊ ဇန်နဝါရီ - ၃

အာဆွန် ညီညွတ်သောလွတ်လပ်ရေးတပ်ဦး(ULFA-I) ခေါင်းဆောင် ပါရတ်ရှ် ဘာယူ (Paresh Baruah) ၏  နယ်မြေတောင်းဆိုထားမှုကို မရုပ်သိမ်းမချင်း ULFA-I နှင့် ငြိမ်းချမ်းရေး ဆွေးနွေးပွဲများ လုပ်ရန်မဖြစ်နိုင်ဟု အာသံပြည်နယ်ဝန်ကြီးချုပ် ဟီမန်တာ ဘစ်ရှ်ဝါ ဆာမာ (Himanta Biswa Sarma)က ပြောကြားခဲ့သည်ဟု NorthEast Now သတင်းတွင် ဖော်ပြထားသည်။

ULFA-I နှင့် ငြိမ်းချမ်းရေးအတွက် ဆွေးနွေးခြင်းက အဓိကပြဿနာ မဟုတ်ကြောင်း၊ ထိုအဖွဲ့ကို ငြိမ်းချမ်းရေး ဆွေးနွေးပွဲသို့ ခေါ်ဆောင်ခြင်းက အခက်ခဲဆုံး အပိုင်းဖြစ်ကြောင်း ဝန်ကြီးချုပ်က ပြောသည်။

ပါရတ်ရှ် ဘာယူဘက်မှ နယ်မြေတောင်းဆိုနေခြင်းကို မရပ်သရွေ့ ULFA-I နှင့် ဆွေးနွေးပွဲများ ဖြစ်လာနိုင်ဖွယ် မရှိ ကြောင်း၊ ထိုကိစ္စက ပြဿနာများ၏ အခြေခံ အကြောင်းအရင်း ဖြစ်ကြောင်းလည်း အာသံဝန်ကြီးချုပ်က ထပ်လောင်း ပြောဆိုသည်။

အာသံပြည်နယ်အတွင်း လူမျိုးစုများကိုတွေ့ရစဉ် (GETTY IMAGES)

ULFA-I နှင့် ဆက်သွယ်ရေး လမ်းကြောင်းများ အားလုံးကို ဖွင့်ပေးထားကြောင်း၊ အာသံအစိုးရ အနေဖြင့် ထိုကိစ္စ အတွက် ကြိုးစားနေကြောင်းနှင့် အာသံပြည်သူများသည် ကာလရှည် ULFA ပုန်ကန်မှုပြဿနာကို ဖြေရှင်းရန် အဓိကနေရာတွင် ပါဝင်နေကြောင်းလည်း ဝန်ကြီးချုပ်က ပြောသည်။

ULFA-I အကြီးအကဲ ပါရတ်ရှ်ဘာယူသည် နယ်မြေတောင်းဆိုမှုများကို ထပ်ခါထပ်ခါ ပြောဆိုလျက်ရှိကာ ULFA-I ဘက်မှ ငြိမ်းချမ်းရေး ဆွေးနွေးပွဲများ အစပျိုးရန် နယ်မြေကိစ္စကို အစီအစဉ်ထဲတွင် မဖြစ်မနေ ထည့်သွင်းရမည်ဟု ကြိမ်ဖန်များစွာ ပြောဆိုခဲ့သည်။

Source: NorthEast Now

CNI International News

ရှန်ဟိုင်း၊ဇန်နဝါရီ ၂

တရုတ်လေယာဉ် တစ်စင်းနှင့် ထိပ်တိုက်တွေ့ဆုံခဲ့သော အမေရိကန်စစ်တပ် လေယာဉ်၏ ဖြစ်စဉ်မှာ နိုင်ငံတရား ဥပဒေကို ချိုးဖောက်ခြင်း ဖြစ်ကြောင်းနှင့် တရုတ်လေယာဉ်မှူးများ၏ လုံခြုံရေးကို ခြိမ်းခြောက်မှု ဖြစ်စေကြောင်း တရုတ်ကာကွယ်ရေးဌာနက ပြောသည်။

ထိုဖြစ်ရပ်သည် အငြင်းပွားနေသော တောင်တရုတ် ရေပြင်တွင် ပြီးခဲ့သည့် သီတင်းပတ်က ဖြစ်ပွားခဲ့ခြင်း ဖြစ်သည်။

ယခု ဖြစ်စဉ်နှင့်ပတ်သက်၍ အမေရိကန်စစ်တပ် ဘက်ကလည်း ဒီဇင်ဘာ ၂၉ ရက်တွင် သတင်း ထုတ်ပြန်ခဲ့သည်။

ထိုထုတ်ပြန်မှုတွင် တရုတ်ရေတပ်မှ J-11 ဂျက်တိုက်လေယာဉ် တစ်စင်းသည် ဒီဇင်ဘာ ၂၁ ရက်တွင် အမေရိကန် လေတပ်၏ RC-135 လေယာဉ်နှင့် ၃ မီတာအကွာသို့ ရောက်ရှိလာခဲ့ကြောင်း၊ ထို့ကြောင့် တိုက်မိခြင်းကို ရှောင်ရှား ရန် တိမ်းရှောင်ခဲ့ရကြောင်း ဖော်ပြထားသည်။

 တရုတ်လေယာဉ်တစ်စီးကိုတွေ့ရစဉ် (Reuters)

သို့သော် ထိုဖော်ပြမှုက အလိမ်အညာတစ်ခုသာ ဖြစ်သည်ဟု တရုတ်က တုန့်ပြန်သည်။ တရုတ်၏တောင်ပိုင်း စစ်ဌာနချုပ် ပြောခွင့်ရပုဂ္ဂိုလ် တီယန်ဂျန်လီက စနေနေ့တွင် ထိုဖြစ်ရပ်နှင့် ပတ်သက်၍ ကြေညာချက် တစ်စောင် ထုတ်ပြန်ခဲ့ပြီး တောင်တရုတ်ပင်လယ်တွင်းမှ အငြင်းပွားနေသော Paracel ကျွန်းများအနီးတွင် ဖြစ်ပွားခဲ့သော ကိစ္စအပေါ် အမေရိကန်ဘက်က လူများကို လှည့်စားခဲ့သည်ဟု ပြောသည်။

အမေရိကန် လေယာဉ်အနေဖြင့် နိုင်ငံတကာဥပဒေကို ချိုးဖောက်ခဲ့ကြောင်း၊ တရုတ်ဘက်မှ ထပ်ခါတလဲလဲ ပြု လုပ်ခဲ့သော သတိပေးမှုကို မသိကျိုးကျွံပြုကာ တရုတ်လေယာဉ်၏ ဘေးကင်းရေးကို ထိခိုက်စေသည့် ချဉ်းကပ် မှုမျိုး လုပ်ခဲ့သည်ဟုလည်း ၎င်းက ပြောသည်။

အမေရိကန်ဘက်က နိုင်ငံတကာ အသိုင်းအဝန်းက စောင့်ကြည့် လေ့လာသူတွေကို ဝေခွဲမရဖြစ်အောင် လုပ်ကာ ပြည်သူများ၏ အာရုံကိုလှည့်စားခဲ့သည်ဟုလည်း တီယန်က ပြောသည်။ ရေပြင်နှင့်လေပေါ်တွင် မတော်တဆမှု ဖြစ်ပွားခြင်းမှ ရှောင်ရှားနိုင်ရန် ရှေ့တန်းမှလေတပ်၊ ရေတပ် တပ်ဖွဲ့များ၏ လှုပ်ရှားမှုများကို ပိုမိုဂရုစိုက်ရန်၊ သက်ဆိုင်ရာ နိုင်ငံတကာဥပဒေနှင့် သဘောတူညီချက်များကို လိုက်နာရန် အမေရိကန်အစိုးရကို တောင်းဆိုသည် ဟုလည်း ၎င်းက ဖြည့်စွက်ပြောဆိုခဲ့သည်။

တရုတ်နိုင်ငံသည် တောင်တရုတ်ပင်လယ်ပြင် တစ်ခုလုံးကို၎င်းတို့ပိုင်နက်ဟုကြေညာထားသောကြောင့် ဗီယက်နမ်၊ ဖိလစ်ပိုင်၊ မလေးရှား၊ ထိုင်ဝမ်နှင့် ဘရူနိုင်း စသောနိုင်ငံများနှင့် ပိုင်နက်ဆိုင်ရာ အငြင်းပွားမှုများ ရှိနေသည်။

Source:CNA

CNI International News

ကဘူးလ်၊ ဇန်နဝါရီ ၂

အာဖဂန်နစ္စတန်နိုင်ငံ၏ မြို့တော် ကဘူးလ် (Kabul)မြို့ရှိ စစ်တပ်လေဆိပ် အပြင်ဘက်တွင် ပေါက်ကွဲမှုတစ်ခု ဖြစ်ပွားခဲ့ခြင်းကြောင့် လူသေဆုံးမှုတချို့ ရှိခဲ့သည်ဟု တာလီဘန်အာဏာပိုင်များက ပြောကြောင်း အယ်ဂျာဇီးယား သတင်းတွင် ဖော်ပြထားသည်။

တနင်္ဂနွေနေ့(ဇန်နဝါရီ ၁ ရက်)တွင် ဖြစ်ပွားခဲ့သော ပေါက်ကွဲမှုတွင် လူတချို့ သေဆုံးခဲ့သည်ဟု အာဖဂန်နစ္စတန် ပြည်ထဲရေးဌာန ပြောခွင့်ရပုဂ္ဂိုလ် အဗ္ဗဒဲလ်နာဖီတာကော် (Abdul Nafi Takor)က ပြောကြားခဲ့သည်။

ထို့နောက် ပေါက်ကွဲမှု ဖြစ်စဉ်ကို စုံစမ်းစစ်ဆေးမှုများ လုပ်ဆောင်နေသည်။ သို့သော် ယခု တိုက်ခိုက်မှုနှင့် ပတ် သက်သည့် အခြေအနေများနှင့် မည်သည်ကို ပစ်မှတ်ထားသလဲ ဆိုခြင်းနှင့်ပတ်သက်၍ ပြောဆိုခဲ့ခြင်း မရှိပေ။

လေတပ်အနီး စစ်တပ်အင်အား အလုံးအရင်းရှိရာ ဧရိယာတစ်ဝိုက်တွင် တနင်္ဂနွေနေ့ မနက် ၈ နာရီမထိုးခင် ကျယ်လောင်သော ပေါက်ကွဲသံတစ်ခု ကြားခဲ့ရသည်ဟု ဒေသခံများက ပြောသည်။

ပေါက်ကွဲမှု ဖြစ်ပွားပြီးနောက် အခင်းဖြစ်ရာ နေရာကို လုံခြုံရေးများ ရောက်ရှိလာခဲ့ပြီး လမ်းများကို ပိတ်ထားခဲ့ သည်ဟုလည်း သိရသည်။

ISKP အဖွဲ့ကိုတွေ့ရစဉ် (GETTY IMAGES)

ပေါက်ကွဲမှုတွင် လေဆိပ်၌ တာဝန်ထမ်းဆောင်နေသည့် အစ်ကိုဖြစ်သူ သေဆုံးခဲ့သည်ဟု ကဘူးလ် ဒေသခံတစ်ဦး က ပြောသည်။ အစ်ကိုနှင့်သူ၏ သူငယ်ချင်းများ လေဆိပ်အတွင်းသို့ ဝင်ရန် စစ်တပ်၏စစ်ဆေးမှုကို ခံယူရန် တန်းစီ စောင့်ဆိုင်းနေချိန်အတွင်း ပေါက်ကွဲမှု ဖြစ်ပွားခဲ့ကြောင်း ၎င်းက ပြောသည်။

ပေါက်ကွဲမှုတွင် သေဆုံးသူ အရေအတွက် များပြားနိုင်သည်။ လက်ရှိ အချိန်အထိ ထိုတိုက်ခိုက်မှုအပေါ် မည်သည့် အဖွဲ့အစည်းကမှ တာဝန်ခံခြင်းမျိုး မရှိသေးပေ။ သို့သော် IS အဖွဲ့နှင့် ဆက်စပ်နေသည့် ISKP အဖွဲ့သည် တာလီဘန်တို့ အာဖဂန်ကို ထိန်းချုပ်လိုက်ချိန်မှစ၍ တိုက်ခိုက်မှုများကို အရှိန်မြှင့်တင် ပြုလုပ်ခဲ့သည်။

၎င်းတို့သည် တာလီဘန် ကင်းအဖွဲ့များနှင့် ရှီးရိုက် လူမျိုးစုများကို အဓိက ပစ်မှတ်ထား၍ တိုက်ခိုက်လေ့ရှိသည်။

အာဖဂန်တွင် ပြီးခဲ့သည့် လကလည်း IS အဖွဲ့နှင့် ဆက်စပ်နေသည့် တိုက်ခိုက်ရေး သမားများကြောင့် တရုတ်နိုင်ငံ သား အနည်းဆုံး ငါးဦးခန့် သေဆုံးခဲ့ရသည်။ ကဘူးလ်မြို့ရှိ တရုတ်နိုင်ငံသားများကြား ထင်ရှားသော ဟိုတယ် တစ်ခုကို တိုက်ခိုက်ရေးသမားများက ဝင်ရောက်စီးနင်း တိုက်ခိုက်ခဲ့ခြင်းဖြစ်သည်။

တာလီဘန်များ အာဏာရရှိချိန် ၂၀၂၁ ခုနှစ်၊ သြဂုတ်လမှ စတင်၍ အကြမ်းဖက်မှုများကြောင့် လူပေါင်းများစွာ သေဆုံး၊ ထိခိုက်ဒဏ်ရာ ရရှိမှုများ ဖြစ်ပွားခဲ့သည်။ ထို့ကြောင့် တာလီဘန်များ လက်ထက် အာဖဂန်နိုင်ငံ၏ လုံံခြုံရေး အခြေအနေနှင့်ပတ်သက်၍ မေးခွန်းထုတ်မှုများလည်း ရှိလာသည်။

Source: အယ်ဂျာဇီးယား

CNI International News

ဘေဂျင်း၊ ဒီဇင်ဘာ ၃၁

လက်ရှိ အမေရိကန်နိုင်ငံဆိုင်ရာ သံအမတ် ချင်ကန်(Qin Gang)ကို တရုတ်အစိုးရက နိုင်ငံခြားရေးဝန်ကြီးအဖြစ် ခန့်အပ်ခဲ့သည်ဟု South China Morning Post သတင်းတွင် ဖော်ပြထားသည်။

အသက် ၅၆ နှစ်အရွယ် ချင်ကန်သည် လက်ရှိဝန်ကြီးဖြစ်သော အသက် ၆၉ နှစ်အရွယ် ဝမ်ယိနေရာတွင် အစားထိုး မည်ဟုလည်း နိုင်ငံပိုင် CCTV သတင်းတွင် သောကြာနေ့(ဒီဇင်ဘာ ၃၀ ရက်)က ဖော်ပြခဲ့သည်။

ဝမ်ယိသည် သံတမန်ရေးဆိုင်ရာ နိုင်ငံတော်အတိုင်ပင်ခံအဖြစ် ဆက်ရှိနေမည်ဟုလည်း သတင်းတွင် ဖော်ပြထား သည်။ ချင်ကန်သည် အောက်တိုဘာလတွင် ကျင်းပခဲ့သော အာဏာရကွန်မြူနစ်ပါတီ၏ အမျိုးသားညီလာခံတွင် အင်အားကြီး ဗဟိုကော်မတီသို့ ရာထူးတိုး ခံခဲ့ရခြင်းကြောင့် ၎င်းသည် တစ်ချိန်တွင် နိုင်ငံခြားရေးဝန်ကြီး ဖြစ်လာ မည်ဟု ကြိုတင် ခန့်မှန်းခြင်း ခံထားရသည်။

နိုင်ငံခြားရေးဝန်ကြီးအဖြစ် တာ၀န်ယူခဲ့သူ ဝမ်ယိကိုတွေ့ရစဉ် (GETTY IMAEGS)

ဝမ်ယိသည် အဖွဲ့ဝင် ၂၄ ဦးပါ ပေါ်လစ်ဗျူရိုသို့ ရာထူးတိုးခြင်း ခံခဲ့ရပြီး ၎င်းသည် သမ္မတရှီ၏ နိုင်ငံ ခြားရေး မူဝါဒဆိုင်ရာ ထိပ်တန်း လက်ထောက် ယန်ဂျီးချီ၏ နေရာတွင် အစားထိုး ခံရမည်ဟုလည်း ယူဆနေကြသည်။

ချင်ကန်သည် နိုင်ငံခြားရေးဌာနတွင် ထင်ရှားသူများထဲမှ တစ်ဦးဖြစ်ကာ အမေရိကန်-တရုတ် ဆက်ဆံရေး အခက်အခဲများ ရှိနေချိန် ၂၀၂၁ ခုနှစ်၊ ဇူလိုင်လတွင် အမေရိကန်နိုင်ငံဆိုင်ရာ သံအမတ်အဖြစ် စေလွှတ်ခြင်း ခံခဲ့ရသည်။

သူ(ချင်ကန်) တာဝန်ထမ်းဆောင်စဉ် ရှင်ဂျန်းအရေး၊ ဟောင်ကောင်အရေးတို့နှင့် ပတ်သက်သည့် တရုတ် လူ့အခွင့်အရေး ကိစ္စရပ်များ၊ ထိုင်ဝမ်နှင့်နယ်နိမိတ် ပြဿနာများတို့တွင် တရုတ်နိုင်ငံ၏ အနေအထားနှင့် ပတ်သက်၍ ကာကွယ် ပြောဆိုခဲ့သည်။

ချင်ကန်သည် ယခင်က နိုင်ငံခြားရေးဌာနတွင် ဒုတိယဝန်ကြီးဖြစ်ခဲ့ပြီး မီဒီယာဆက်ဆံရေးနှင့် နိုင်ငံတကာ ခရီးစဉ် များအတွက် ပြင်ဆင်မှုများကို ကြီးကြပ်ခဲ့ရသည်။ သမ္မတ၏ ခရီးစဉ်များတွင် ပါဝင်ခဲ့မှုများအတွင်း ချင်ကန်သည် သမ္မတ ရှီကျင့်ဖျင်၏ ယုံကြည်မှုကို ရရှိခဲ့ခြင်း ဖြစ်သည်ဟုလည်း လေ့လာသူများက ပြောသည်။

တရုတ်ကွန်မြူနစ်ပါတီညီလာခံကိုတွေ့ရစဉ် (GETTY IMAGES)

၎င်းသည် နိုင်ငံခြားရေးဌာန ပြောရေးဆိုခွင့်ရှိသူအဖြစ် ၂၀၀၅ မှ ၂၀၁၂ အထိတစ်ကြိမ်၊ ၂၀၁၁ မှ ၂၀၁၅ အထိ တစ်ကြိမ် စုစုပေါင်း နှစ်ကြိမ် တာဝန်ထမ်းဆောင်ခဲ့သူ ဖြစ်သည်။

နောက်ပိုင်း အချိန်ကာလတွင် တရုတ်နိုင်ငံသည် မထင်မရှား နေထိုင်ခြင်းမှ ချင်ကန် အပါအဝင် တိုက်ခိုက်ရန် အသင့်ရှိသော ငယ်ရွယ်သည့် သံတမန်မျိုးဆက်တစ်ခုကို စင်တင်ပေးခဲ့သည်။

ချင်သည် ဥရောပနှင့်ဗြိတိန်တို့တွင် တာဝန် ထမ်းဆောင်ခဲ့ဖူးသည့် အတွေ့အကြုံလည်းရှိကာ သံမှူးဘဝမှ ကောင်စစ်ဝန်အဖြစ် မြင့်တက်လာခဲ့သလို လန်ဒန်ရှိ တရုတ်သံရုံးတွင်လည်း ဝန်ကြီးအဖြစ် တာဝန်ယူခဲ့ဖူးသူ ဖြစ်သည်။

ထို့နောက် ချင်ကန်ကို နိုင်ငံခြားရေးဝန်ကြီးအဖြစ် ခန့်အပ်ခြင်းသည် တရုတ်နိုင်ငံ၏ သံတမန် လူစာရင်း ပြောင်းလဲ မှုတွင် နောက်ဆုံး လုပ်ဆောင်ခဲ့သော အခြေအနေ ဖြစ်သည်။

Source: SCMP

CNI International News

ဆိုးလ်၊ဒီဇင်ဘာ ၃၁

ပြည်သူများအကြား UFO သို့မဟုတ် မြောက်ကိုရီးယားဒုံးကျည် လွှတ်တင်မှုဟု ဝေခွဲမရ ဖြစ်စေခဲ့သည့်ကိစ္စမှာ solid လောင်စာသုံး ဒုံးကျည် စမ်းသပ် ပစ်လွှတ်မှုဖြစ်သည်ဟု တောင်ကိုရီးယားစစ်တပ်က သောကြာနေ့(ဒီဇင် ဘာ ၃၀ ရက်)တွင် အတည်ပြု ပြောကြားခဲ့ကြောင်း အေပီသတင်းမှာ ဖော်ပြထားသည်။

ထိုသို့ ဒုံးကျည် ပစ်လွှတ်ခြင်းမှာ အာကာသအခြေစိုက် ထောက်လှမ်းရေး လုပ်နိုင်စွမ်းကို တည်ဆောက်ရန်နှင့် ကာကွယ်ရေးကို မြှင့်တင်ရန် လုပ်ဆောင်မှု အစိတ်အပိုင်းတစ်ခု ဖြစ်သည်ဟု ကာကွယ်ရေးဌာနက ကြေညာချက် ထုတ်ပြန်ခဲ့သည်။

အထိအရှမခံသော လုံခြုံရေးကိစ္စရပ်များ ပါဝင်နေခြင်းကြောင့် ပြည်သူများကို ကြိုတင် အကြောင်းမကြားခဲ့ခြင်း ဖြစ်သည်ဟုလည်း ပြောသည်။ တောင်ကိုရီးယားနိုင်ငံတွင် သောကြာနေ့ ညနေပိုင်းက အဖြူရောင် တောက် တောက် ကောင်းကင်ပြင်ပေါ်တွင် အဖြူနှင့်အနီရောင် မီးခိုးများ ထွက်လိပ်လိပ် ထွက်ခွာ ရွေ့လျားနေသော အရာတစ်ခုကို မြင်တွေ့ခဲ့ရသည်။

solid လောင်စာသုံး ဒုံးကျည်ပစ်လွှတ်စဉ် ပြည်သူများထိတ်လန့်နေကြ(GETTY IMAGES)

ထို့ကြောင့် ပြည်သူများက ၎င်းတို့သည် ဘာမှန်းမသိသော အရာဝတ္တုတစ်ခုကို မြင်တွေ့ခဲ့ရကြောင်း လူမှုကွန်ယက် နှင့် အင်တာနက်ဝက်ဘ်ဆိုဒ်များတွင် ပလူပျံနေအောင် ရေးသားခဲ့ကြပြီး တချို့ ဗွီဒီယိုများ၊ ဓာတ်ပုံများပါ တင်ခဲ့သည်။

UFO ဟုထင်ကြောင်း၊ ထိတ်လန့်မိကြောင်း တွစ်တာ အသုံးပြုသူတစ်ဦးက ရေးသားခဲ့ကာ ကျန်တစ်ဦးကလည်း မြောက်ကိုရီးယားဘက်မှ ဒုံးကျည်ဖြစ်နိုင်သောကြောင့် စစ်ဖြစ်မည်ကို စိုးရိမ်မိသည်ဟု ဆိုသည်။ အခြားသူများမှ လည်း ထိုအရာသည် ဒရုန်းတစ်စင်းဖြစ်ကြောင်း သို့မဟုတ် သံသယရှိစရာ သဘာဝလွန် အရာတစ်ခု ဖြစ်ကြောင်း လည်း အသီးသီး ရေးသားခဲ့ကြသည်။

အဆိုပါ အရာနှင့်ပတ်သက်၍ နိုင်ငံတစ်ဝန်းလုံးမှ ပြည်သူရာပေါင်း များစွာက အရေးပေါ်ဌာနနှင့် ရဲတပ်ဖွဲ့တို့ကို ဆက်သွယ် အကြောင်းကြားလာခဲ့သည်ဟုလည်း သိရသည်။

ယခုဖြစ်ရပ် မတိုင်ခင် လေးရက်က မြောက်ကိုရီးယား ဒရုန်းများ တောင်ကိုရီးယား ဘက်တွင်းသို့ ရောက်ရှိလာခဲ့ သော်လည်း တောင်ကိုရီးယားဘက်မှ ပစ်မချနိုင်ခဲ့ပေ။ ထို့ကြောင့် လေကြောင်း လုံခြုံရေးနှင့်ပတ်သက်သည့် စိုးရိမ်မှုများ ရှိလာခဲ့သည်။

တောင်ကိုရီးယားစစ်တပ်ကိုတွေ့ရစဉ် (GETTY IMAGES)

ထို့နောက် တောင်ကိုရီးယား စစ်တပ်ဘက်ကလည်း ထိုဖြစ်ရပ်နှင့်ပတ်သက်၍ ရှားရှားပါးပါး တောင်ပန်စကားဆို ခဲ့သည်။ နိုင်ငံ၏ ပထမဆုံးသော ထောက်လှမ်းရေး ဂြိုဟ်တုကို ဂြိုဟ်ပတ်လမ်းအတွင်းသို့ လွှတ်တင်ရန် solid လောင်စာသုံး ဒုံးကျည်ကို အသုံးပြုမည်ဟု တောင်ကိုရီးယားအရာရှိများက ပြောသည်။ မတ်လတွင်လည်း တောင် ကိုရီးယားသည် ၎င်းတို့၏ ပထမဆုံးသော solid လောင်စာသုံး ဒုံးကျည်ကို အောင်မြင်စွာ လွှတ်တင်နိုင်ခဲ့သည်။ solid လောင်စာသုံး ဒုံးကျည်များသည် liquid လောင်စာသုံး ဒုံးကျည်များနှင့် ယှဉ်လျှင် လွှတ်တင်ချိန်နည်းကာ၊ တည်ဆောက်ပုံ ရိုးရှင်းပြီး အကုန်အကျ သက်သာသည်ဟု တောင်ကိုရီးယား အရာရှိများက ပြောသည်။

သောကြာနေ့ လွှတ်တင်မှုသည် မတ်လ စမ်းသပ်မှု၏ နောက်ဆက်တွဲ ဖြစ်သည်ဟုလည်း တောင်ကိုရီးယား ကာကွယ်ရေးဌာနက ပြောသည်။

Source: AP

CNI International News

ကိယက်ဗ်၊ ဒီဇင်ဘာ ၃၀

သီတင်းပတ်များအတွင် အပြင်းထန်ဆုံးသော တိုက်ခိုက်မှုများအဖြစ် ကြာသပတေးနေ့တွင် ရုရှားဘက်က ယူကရိန်းသို့ ဒုံးကျည်များဖြင့်ပစ်ခတ်ခဲ့ရာ ဓာတ်အားပေးစက်ရုံများနှင့် တခြားသော အရေးပါသည့် အခြေခံ အဆောက်အဦများ ပျက်စီးခဲ့သည်ဟု AP သတင်းတွင် ဖော်ပြသည်။

ဓာတ်အားပေးစက်ရုံများသို့ ရုရှားဘက်က ဒုံးကျည် ၆၉ လုံး ပစ်ခတ်ခဲ့ပြီး ယူကရိန်းဘက်က ၅၄ လုံးကို ပစ်ချနိုင် ခဲ့သည်ဟု ယူကရိန်းစစ်တပ်အကြီးအကဲက ပြောသည်။ အဆိုပါတိုက်ခိုက်မှုများကြောင့် နိုင်ငံ၏ ဒုတိယအကြီးဆုံး ခါကိဗ် (Kharkiv) မြို့ အနီးတစ်ဝိုက်မှ လူနှစ်ဦးသေဆုံးခဲ့ပြီး အနည်းဆုံး လူခြောက်ဦးဒဏ်ရာရရှိခဲ့သည်ဟု ဒေသခံအရာရှိများက ပြောသည်။ ထိခိုက်သေဆုံးသူအရေအတွက်မှာ ထပ်မံမြင့်တက်လာနိုင်ဖွယ် ရှိသည်။

ရုရှားသည် ဖောက်ခွဲရေးဒရုန်းများဖြင့် ဦးစွာတိုက်ခိုက်ခဲ့ကာ နောက်ပိုင်းတွင် လေကြောင်းနှင့် ပင်လယ်ပြင် အခြေစိုက်ဒုံးကျည်များဖြင့် ပစ်ခတ်ခဲ့သည်ဟု ယူကရိန်းလေတပ်က ပြောသည်။ ထိုတိုက်ခိုက်မှုများကြောင့် ယူကရိန်းတစ်နိုင်ငံလုံးတွင် လေကြောင်းအချက်ပေးသံများ ဆူညံခဲ့ပြီး စစ်တပ်က လေကြောင်းကာကွယ်ရေး စနစ်များကို စတင်ခဲ့ရသည်ဟုလည်း သိရသည်။

ဗုံးဒဏ်မှအကာအကွယ်ယူရန် ကိယက်ဗ်မြို့ရှိ မြေအောက်ရထားဘူတာရုံတွင် လာရောက်တိမ်းရှောင်နေကြ သူများ(ဓါတ်ပုံ-အေပီ)

ရုရှားသည် အောက်တိုဘာလမှစတင်ကာ ယူကရိန်းရှိ လျှပ်စစ်နှင့်ရေထောက်ပံ့ရေး အခြေခံအဆောက်အဦများကို သီတင်းပတ်တိုင်းလိုလို ပစ်မှတ်ထားတိုက်ခိုက်ခဲ့သော်လည်း မြေပြင်တွင် ရုရှားတပ်များသည် ရှေ့တိုးရန် ရုန်းကန် နေရသည်။
ယခု တိုက်ခိုက်မှုများသည် အဓိပ္ပါယ်မရှိသော ရက်စက်ကြမ်းကြုတ်မှုများသာဖြစ်သည်ဟု ယူကရိန်း နိုင်ငံခြားရေး ဝန်ကြီးက ပြောသည်။ ယခုကဲ့သို့ စစ်ရာဇဝတ်မှုများကို အစုလိုက်အပြုံလိုက်လုပ်ဆောင်နေချိန်တွင် ကြားနေဝါဒ ရှိနေမည်မဟုတ်ကြောင်း၊ ကြားနေဟု ကိုယ့်ကိုယ်ကို သတ်မှတ်ထားသူများသည် ရုရှားဘက်ကသာဖြစ်ကြောင်း လည်း ဝန်ကြီးက သူ၏တွစ်တာတွင် ရေးသားခဲ့သည်။ ၁၀ လကြာ တိုက်ပွဲအတွင်းတွင် ရုရှားနှင့် ယူကရိန်းနိုင်ငံ တို့သည် ရှေ့မတိုးသာ နောက်မဆုတ်သာ အနေအထားတွင်ရှိနေသည်။

ယူကရိန်းစစ်တပ်သည် ရုရှားဘက်မှ သိမ်းယူခဲ့သည့် နိုင်ငံ့တောင်ဘက်နှင့် အရှေ့မြောက်ဘက်မှ ဒေသများကို ပြန်လည်သိမ်းပိုက်နိုင်ခဲ့ကာ ရုရှားတို့၏ ဒွန်ဘတ်စ် (Donbas) ဒေသကို သိမ်းယူရန် ထိုးစစ်ဆင်မှုကိုလည်း ထိန်းထားနိုင်လျက်ရှိသည်။

Source:AP

CNI International News

ဘန်ကောက်၊ဒီဇင်ဘာ ၃၀

စစ်တပ်နှင့် ရဲတပ်ဖွဲ့ဝင်များ၏ လာဘ်စားမှုကို လုံးဝသည်းခံလိမ့်မည်မဟုတ်ဟု ထိုင်းနိုင်ငံ၏ ဒုတိယဝန်ကြီးချုပ် ပရာဝပ် ဝေါင်ဆူဝန် (Prawit Wongsuwon) က ပြောကြောင်း Bangkok Post သတင်းတွင် ဖော်ပြသည်။

စစ်တပ်နှင့်ရဲတပ်ဖွဲ့မှ ထိပ်တန်းအရာရှိများနှင့် တွေ့ဆုံစဉ် ထိုသို့ပြောဆိုခဲ့ခြင်းဖြစ်သည်။ နှစ်သစ်ကူး အထိမ်း အမှတ်တွေ့ဆုံပွဲအဖြစ် ထိုင်းနိုင်ငံ၏ စစ်တပ်ခေါင်းဆောင်များ၊ ရဲတပ်ဖွဲ့အကြီးအကဲများက ဗုဒ္ဓဟူးနေ့တွင် ဘန်ကောက်မြို့ရှိ ပရာဝပ်၏ သစ်တောထိန်းသိမ်းရေးဖောင်ဒေးရှင်းတွင် သွားရောက်တွေ့ဆုံခဲ့သည်။

ရဲတပ်ဖွဲ့ဝင်တစ်ဦးကို ခိုးမှု စွဲချက်ဖြင့် ရဲတပ်ဖွဲ့မှ ထုတ်ပယ်ခဲ့ပြီး အလားတူ ပြစ်မှုဖြင့် ပြန်လည်ဖမ်းဆီး ခဲ့စဉ်(ဓါတ်ပုံ- Sutthiwit Chayutworakan)

ယခုနှစ်တွေ့ဆုံပွဲကို အကျဉ်းချုံးသာကျင်းပခဲ့ပြီး နိုင်ငံရေးသမားများနှင့် အစိုးရအဖွဲ့ဝင်အရာရှိများက ဒုတိယ ဝန်ကြီးချုပ်ကို နှစ်သစ်ကူးနှုတ်ဆက်မှုအဖြစ် လာရောက်တွေ့ဆုံခဲ့ကြသည်။ ဗိုလ်ချုပ်ကြီး ပရာဝပ်သည် လက်ရှိ အာဏာရ ဖလန် ပရာချာရတ်သ် (Palang Pracharath) ပါတီ၏ ခေါင်းဆောင်ဖြစ်သည်။ ၎င်းသည် လက်နက်ကိုင် တပ်ဖွဲ့ခေါင်းဆောင်များနှင့်အတူ တွေ့ဆုံစားသောက်ခဲ့ပြီး ထိုသူကများက လာမည့် အထွေထွေရွေးကောက်ပွဲတွင် ပရာဝပ်ကို ဝန်ကြီးချုပ်လောင်းအဖြစ် ထောက်ခံရန်လည်း သဘောတူခဲ့ကြသည်။

ထိုင်းဘတ်ငွေကြေး(ဓါတ်ပုံ-ဘန်ကောက်ပို့စ်)

လာရောက်နှုတ်ဆက်သူများကို စကားပြောဆိုရာတွင် ပရာဝပ်က စစ်တပ်နှင့်ရဲတပ်ဖွဲ့ဝင်များသည် ပြည်သူများ၏ အခွန်ငွေပေါ်တွင် ရပ်တည်နေခြင်းကြောင့် မိမိတို့၏ အလုပ်ကို ရိုးသားစွာလုပ်ကိုင်ရမည်ဟု ပြောကာ တရားမဝင် ပြုလုပ်ခြင်းကို လုံးဝသည်းခံမည်မဟုတ်ဟုလည်း ဆိုသည်။

စစ်တပ်နှင့်ရဲတပ်ဖွဲ့သည် နိုင်ငံကို ထိန်းသိမ်းရေးနှင့်တိုးတက်ရေးဆီသို့လမ်းပြရန် အရေးပါသူများ ဖြစ်သည်ဟု လည်း ၎င်းက ဆက်လက် ပြောကြားခဲ့သည်။

Source:Bangkokpost

CNI International News

ကိယက်ဗ်၊ ဒီဇင်ဘာ ၂၉

ယူကရိန်းကိုစစ်ဘက်ဆိုင်ရာ ထောက်ပံ့ကူညီမှုများဆက်လက်လုပ်ဆောင်ရန် ပြင်သစ်ကာကွယ်ရေးဝန်ကြီးသည် ဗုဒ္ဓဟူးနေ့တွင် ကိယက်ဗ်မြို့သို့ ရောက်ရှိခဲ့သည်ဟု AP သတင်းတွင်ဖော်ပြသည်။

ကာကွယ်ရေးဝန်ကြီး ဆီဘတ်ဂျန် လုကော်ဟနူ (Sebastien Lecornu) သည် ပိုလန်ခရီးစဉ်ပြီးနောက် ယူကရိန်း သို့ ရောက်ရှိလာခဲ့ခြင်းဖြစ်သည်။ ပိုလန်ခရီးစဉ်တွင် ၎င်းသည် ပြင်သစ်ထုတ် စစ်ဘက်သုံး ဂြိုဟ်တုနှစ်ခုကို ရောင်းရန် သဘောတူညီမှုရရှိခဲ့သည်ဟု ကြေညာခဲ့သည်။

ယူကရိန်းခရီးစဉ်တွင်လည်း ၎င်းသည် ရုရှားနှင့်စစ်ပွဲအတွင်း ကျဆုံးသွားခဲ့သော ယူကရိန်းစစ်သားများကို သွားရောက် ဂါရဝပြုခဲ့ပြီး ယူကရိန်းသမ္မတ၊ ကာကွယ်ရေးဝန်ကြီးတို့အပြင် စစ်ဘက်ဆိုင်ရာအရာရှိများနှင့် တွေ့ဆုံရန် စီစဉ်ထားသည်ဟု သိရသည်။ ပြင်သစ်သည် အမေရိကန်၊ ဗြိတိန်တို့နှင့်ယှဉ်လျှင် ယူကရိန်းကို စစ်ဘက် ဆိုင်ရာထောက်ပံ့မှုများနှင့်ပတ်သက်၍ အသံတိတ်နေခဲ့သော်လည်း ၎င်းတို့သည် ရုရှားဘက်မှ စတင်ကျူးကျော်ခဲ့ သည့် ဖေဖော်ဝါရီ ၂၄ ရက်မှစကာ ယူကရိန်းသို့ လက်နက်များစွာ ထောက်ပံ့ခဲ့သည်။

ယူကရိန်းနိုင်ငံ၊ ခါကိဗ်ဒေသ၊ ခုပီးရန့်စ်ခ်တွင် လေးလကျော်ကြာ လျှပ်စစ်မီးမရှိသောကြောင့် စေတနာ့ဝန်ထမ်း များက အစားအစာများကို လာရောက်ဝေငှပေးနေစဉ်(ဓါတ်ပုံ-အေပီ)

ယခုလအတွင်း ယူကရိန်းကို ကူညီပေးရေး ညီလာခံနှစ်ခုကိုလည်း လက်ခံကျင်းပပေးခဲ့သည်။ သို့သော်သမ္မတ အီမန်နွယ် မက်ခရွန် (Emmanuel Macron) ၏ ရုရှားသမ္မတ ဗလာဒီမာပူတင်နှင့် ဆက်ဆံရေးကို ထိန်းသိမ်း ထားမှု၊ ယူကရိန်းအရေးကို ညှိနှိုင်းအဖြေရှာရန်ကြိုးပမ်းမှုတို့ကြောင့် ယူကရိန်းပြည်သူများသည် ပြင်သစ်နိုင်ငံနှင့် ပတ်သက်၍ အမြင်မကြည်လင်တော့ပေ။

ပြင်သစ်ကာကွယ်ရေးဝန်ကြီး၏ခရီးစဉ်သည် ယူကရိန်းသမ္မတ၏အမေရိကန်ခရီးစဉ်အပြီး၊ ယူကရိန်းအရှေ့ပိုင်း တိုက်ပွဲများတွင် သူမသာ ကိုယ်မသာ အခြေအနေများရှိနေချိန်၌ ပေါ်ပေါက်လာခြင်းဖြစ်သည်။ ထို့ကြောင့် ယခု ခရီးစဉ်အတွင်း လုကော်ဟနူ၏ တွေ့ဆုံမှုများတွင် မည်သည့်ရလာဒ်များ ပေါ်ထွက်လာမည်ကိုတော့ မသိနိုင်သေးပေ။

ခါကိဗ်ဒေသ၊ ခုပီးရန့်စ်ခ်တွင် လေးလကျော်ကြာ လျှပ်စစ်မီးမရှိသောကြောင့် ဒေသခံတစ်ဦး ဖယောင်းတိုင်မီးကို အသုံးပြုနေရစဉ်(ဓါတ်ပုံ-အေပီ)

လက်ရှိအချိန်တွင် ရုရှားနှင့်ယူကရိန်း နှစ်နိုင်ငံစလုံးက ငြိမ်းချမ်းရေးဆွေးနွေးပွဲများ စတင်ရန် စိတ်အားထက်သန် နေကြသော်လည်း ၎င်းတို့၏ ရပ်တည်မှုအသီးသီးက ဆွေးနွေးရန်ပို၍ အလှမ်းဝေးစေလျက် ရှိသည်။ ရုရှားဘက်က ၎င်းတို့တရားမဝင်သိမ်းပိုက်ထားသော ယူကရိန်း၏ဒေသလေးခုကို ရုရှားပိုင်အဖြစ် အသိအမှတ်ပြုမှသာလျှင် ငြိမ်းချမ်းရေးဆွေးနွေးမည်ဟု ပြောဆိုထားပြီး ယင်းကို ယူကရိန်းဘက်က ခါးခါးသီးသီး ငြင်းဆိုထားသည်။

ပြင်သစ်သည် ယူကရိန်းစစ်တပ်အတွက် Caesar(ဆီးဇာ) အမြောက်များ၊ တင့်ကားဖျက်ဒုံးကျည်များ၊ Crotale(ခရိုတဲယ်) လေကြောင်းကာကွယ်ရေးစနစ်များနှင့် ဒုံးပစ်လောင်ချာများကို ထောက်ပံ့ပေးထားသည့်အပြင် ယူကရိန်းစစ်သား ၂၀၀၀ ကိုလည်း ပြင်သစ်မြေသို့ခေါ်ကာ လေ့ကျင့်ပေးခဲ့သည်။ ထို့အပြင် ယူကရိန်းကို လာမည့်နှစ် အစောပိုင်းတွင် လက်နက်များ ထပ်မံထောက်ပံ့ပေးသွားမည်ဟုလည်း သမ္မတ မက်ခရွန်က ကတိ ပေးထားသည်။

ထိုသို့ပြင်သစ်အပါအဝင် အနောက်အုပ်စု၏ လက်နက်ထောက်ပံ့မှုများက ရုရှားကို စိတ်ဆိုးဒေါသဖြစ်စေခဲ့ကာ အမေရိကန်နှင့်နေတိုးအဖွဲ့သည် ယူကရိန်းစစ်ပွဲကို လောင်စာထည့်ပေးနေခြင်းသည် အခြေအနေများကို ထိန်းမနိုင် သိမ်းမရဖြစ်သွားနိုင်သည်ဟု ရုရှားဘက်က သတိပေးထားသည်။

Source:AP

CNI International News

ဆိုးလ်၊ဒီဇင်ဘာ ၂၉

စစ်တပ်အင်အားကို ထပ်မံမြှင့်တင်ရေး စီမံကိန်းသစ်များအား မြောက်ကိုရီးယား ခေါင်းဆောင် ကင်မ်ဂျုံအန် (Kim Jong Un) က ထိပ်တန်းနိုင်ငံရေး အရာရှိများထံ ချပြခဲ့သည်ဟု နိုင်ငံပိုင်မီဒီယာမှ ဗုဒ္ဓဟူးနေ့(ဒီဇင်ဘာ ၂၉ ရက်)တွင် ဖော်ပြခဲ့သည်။

အဆိုပါ စီမံကိန်းသည် ကင်မ်ဂျုံအန်အနေဖြင့် လက်နက်များ စမ်းသပ်မှုဖြင့် ရန်စမှုများကို ဆက်လက် ပြုလုပ်သွား မည်ဆိုသည့် ညွှန်းဆိုချက် ဖြစ်သည်ဟု အေပီသတင်းက ရေးသားဖော်ပြထားသည်။

ကင်မ်၏ စီမံကိန်းအသစ်များမှာ အစဉ်အလာ ရန်ဘက် တောင်ကိုရီးယားနိုင်ငံနှင့် ဆက်ဆံရေး အခြေအနေများ ဆိုးရွားနေချိန်တွင် ပေါ်ထွက်လာခြင်း ဖြစ်သည်။ မြောက်ကိုရီးယား ဒရုန်းများသည် ငါးနှစ်အတွင်း ပထမဆုံး အ နေဖြင့် တောင်ကိုရီးယား ပိုင်နက်တွင်းသို့ ရောက်ရှိလာခဲ့ကြောင်း တောင်ကိုရီးယးဘက်က စွပ်စွဲထားသည်။

မြောက်ကိုရီးယားခေါင်းဆောင် ကင်မ်ဂျုံအန်ကိုတွေ့ရစဉ် (KCNA)

ယခုနှစ်အတွင်း မြောက်ကိုရီးယားသည် ဒုံးကျည်ပစ်လွှတ် စမ်းသပ်မှုများကို စံချိန်တင် ပြုလုပ်ခဲ့သည်။ ထို အခြေအနေသည် နိုင်ငံ၏ လက်နက်စွမ်းရည်ကို အဆင့်မြှင့်ရန်အပြင် ပြိုင်ဘက်များနှင့် ဆွေးနွေးမှုများတွင် အသာစီးရရန် ကြိုးပမ်းမှုဟု ပညာရှင်များက သုံးသပ်ကြသည်။

အာဏာရအလုပ်သမားပါတီ၏ အင်္ဂါနေ့ ဆွေးနွေးမှု အစီအစဉ်တစ်ခုတွင် ကင်မ်က ကိုရီးယား ကျွန်းဆွယ်နှင့် နိုင်ငံတကာ နိုင်ငံရေး စာမျက်နှာ၌ ပေါ်ပေါက်နေသော လုံခြုံရေးဆိုင်ရာ စိန်ခေါ်မှုသစ်များကို ခွဲခြားပြသခဲ့ ကြောင်း နိုင်ငံပိုင် KCNA သတင်းတွင် ဖော်ပြသည်။
ထို့နောက် မြောက်ကိုရီးယား၏ အချုပ်အခြာအာဏာနှင့် အကျိုးစီးပွားကို ကာကွယ်ရေးအတွက် ရန်သူများအား တိုက်ခိုက်ရန်၊ ပြင်ပဆက်ဆံရေးများ ပြုလုပ်ရန် လိုအပ်သော အခြေခံမူဘောင်များနှင့် လမ်းညွှန်ချက်များကို ရှင်းလင်းပြသခဲ့ကြောင်း မြောက်ကိုရီးယားနိုင်ငံပိုင် KCNA သတင်းတွင် ဖော်ပြသည်။

အမေရိကန်သမ္မတဟောင်း ထရမ့်နဲ့ မြောက်ကိုရီးယားခေါင်းဆောင် ကင်မ်ဂျုံအန်ကိုတွေ့ရစဉ် (GATTY IMAGES)

ကင်မ်က ဘက်ပေါင်းစုံ ပြောင်းလဲနိုင်သော အခြေအနေများတွင် ၂၀၂၃ ခုနှစ်အထိ သယ်ဆောင်သွားနိုင်သော ကိုယ့်ကိုယ်ကို ကာကွယ်နိုင်မှု စွမ်းရည်ကို မြှင့်တင်ရေး စတုတ္တမြောက် ပင်မ ရည်မှန်းချက်သစ်ကိုလည်း ချမှတ် ခဲ့သည်ဟု ထိုသတင်းတွင် ဖော်ပြထားသော်လည်း အသေးစိတ်ကိုမူ ရှင်းပြထားခြင်း မရှိပေ။

ယခု ရည်မှန်းချက်သစ်များသည် နျူကလီးယား လက်နက်တိုက်ကို တိုးချဲ့ရေး၊ ဒုံးကျည်ထိပ်ဖူးမျိုးစုံ အသုံးပြု နိုင်သည့် ဒုံးကျည်များ၊ ထောက်လှမ်းရေး ဂြိုဟ်တုနှင့် ခေတ်ရှေ့ပြေး ဒရုန်းများကဲ့သို့ နည်းပညာမြင့် လက်နက်များ ရရှိရေး အစရှိသဖြင့် ကင်မ်ဂျုံအန်၏ ဆောင်ရွက်ချက်များနှင့် ဆက်စပ်မှုရှိနိုင်သည်ဟု လေ့လာသူများက သုံးသပ်သည်။

ကင်မ်ဂျုံအန် အနေဖြင့် နျူကလီးယား လက်နက်တိုက် တိုးချဲ့ခြင်းဖြင့် ၎င်း၏ရန်ဘက်များကို မြောက်ကိုရီးယား သည် တရားဝင် နျူကလီးယားပိုင်နိုင်ငံအဖြစ် အသိအမှတ် ပြုရေးအတွက် အသုံးချလိမ့်မည်ဟုလည်း ၎င်းတို့က သုံးသပ်သည်။

ထိုသို့ အသိအမှတ် ပြုခံရခြင်းသည် မြောက်ကိုရီးယားပေါ် ချမှတ်ထားသော နိုင်ငံတကာ အရေးယူ ပိတ်ဆို့မှု များကို ဖယ်ရှားရေးအတွက် အရေးပါသော ကိစ္စရပ်လည်း ဖြစ်သည်။

Source: AP