CNI International News

ပြုံယမ်း၊ သြဂုတ် ၁၁

မြောက်ကိုရီးယားခေါင်းဆောင် ကင်မ်ဂျုံအန် (Kim Jong-un)က ခံစစ်အသွင်ဖြင့် စစ်ပွဲအတွက် ပြင်ဆင်မှုများကို တိုးမြှင့်ရန် တိုက်တွန်းခဲ့သည်ဟု မြောက်ကိုရီးယားနိုင်ငံပိုင် KCNA သတင်းအေဂျင်စီမှ ဖော်ပြခဲ့သည်။ 

တောင်ကိုရီးယားနှင့် အမေရိကန်သည် ယခုလကုန်တွင် ပူးတွဲစစ်ရေး လေ့ကျင့်မှုများ ပြုလုပ်ရန် စီစဉ်နေချိန်တွင် ကင်မ်၏ ပြောကြားချက် ထွက်ပေါ်ခဲ့ခြင်း ဖြစ်သည်ဟု Korea Times မှ ဖော်ပြခဲ့သည်။ 

ကင်မ်သည် သြဂုတ် ၉ ရက်က အာဏာရကိုရီးယား အလုပ်သမားပါတီ၏ ဗဟိုစစ်ကော်မရှင် (Central Military Commission of the ruling Workers' Party of 
Korea)အစည်းအဝေးအတွင်း ထိုကဲ့သို့ မှတ်ချက်ပေးခဲ့သည်ဟု နိုင်ငံပိုင် KCNA သတင်းအေဂျင်စီက ဖော်ပြခဲ့သည်။

ပုံမှန်အားဖြင့် အဆိုပါ အစည်းအဝေးကို ဖေဖော်ဝါရီလ၊ မတ်လနှင့် ဧပြီလများတွင် ဆက်တိုက် ပြုလုပ်လေ့ရှိသည်။

မြောက်ကိုရီးယားခေါင်းဆောင် ကင်မ်ဂျုံအန်နဲ့ စစ်ဦးစီးချုပ်ဖြစ်လာတဲ့ ရီယွန်ဂျီကိုတွေ့ရစဉ်

"ကင်မ်ဟာ ကိုရီးယားကျွန်းဆွယ်ရဲ့ လက်ရှိ အခြေအနေကို လေ့လာသုံးသပ်ခဲ့ပြီး မြောက်ကိုရီးယားစစ်တပ်ရဲ့ စစ်ပြင်ဆင်မှုတွေကို အရှိန်မြှင့်တင်ဖို့ အရေးကြီးတဲ့အကြောင်း မှာကြားခဲ့ပါတယ်"ဟု KCNA က ဖော်ပြခဲ့သည်။

တောင်ကိုရီးယားနှင့် အမေရိကန်တို့သည့် နှစ်စဉ်ပြုလုပ်နေကျ ပူးတွဲစစ်ရေး လေ့ကျင့်မှုဖြစ်သည့် Ulchi Freedom Shield စစ်ရေးလေ့ကျင့်မှုကို ယခုလကုန်တွင် ပြုလုပ်ရန် စီစဉ်နေချိန်တွင် မြောက်ကိုရီးယားက ဗဟိုစစ်ကော်မရှင် အစည်းအဝေး ပြုလုပ်ခဲ့ခြင်း ဖြစ်သည်။

မြောက်ကိုရီးယားရဲ့ ဗဟိုစစ်ကော်မရှင် အစည်းအဝေး ကျင်းပနေစဉ်

တောင်ကိုရီးယားနှင့် အမေရိကန်၏ စစ်ရေးလေ့ကျင့်မှုများသည် ကျူးကျော်မှုအတွက် အစမ်းလေ့ကျင့်မှုများ ဖြစ်သည်ဟု မြောက်ကိုရီးယားက မှတ်ယူခဲ့သည်။

ထို့ပြင် မြောက်ကိုရီးယားသည် ၎င်း၏ စစ်အင်အားကို ပြသသည့်အချိန်နှင့် တိုက်ဆိုင်နေသည်။

ထို့နောက် ပြီးခဲ့သည့်လက ရုရှားကာကွယ်ရေးဝန်ကြီး ဆာဂျေရွိုက်ဂူ (Sergei Shoigu) ဦးဆောင်သည့် ကိုယ်စား လှယ်အဖွဲ့ မြောက်ကိုရီးယားသို့ လာရောက်ခဲ့ပြီး မြောက်ကိုရီးယား၏ လက်နက်ခဲယမ်း စက်ရုံများကို ကင်မ်နှင့် အတူ သွားရောက် ကြည့်ရှုခဲ့သည့် အချိန်နှင့်လည်း မရှေးမနှောင်းဖြစ်သည်။

ကင်မ်သည် လက်နက်ခဲယမ်း စက်ရုံများ၏ အရေးကြီးပုံကို အလေးထား ပြောကြားခဲ့သည်။

ထိုစက်ရုံများသည် မြောက်ကိုရီးယားစစ်တပ်ကို ပိုမိုအင်အား တောင့်တင်းစေရန် အရေးကြီးသည့် အခန်းကဏ္ဍမှ ပါဝင်နေကြောင်း၊ လက်နက် အများအပြား ထုတ်လုပ်ရန်နှင့် ရှိရင်းစွဲ လက်နက်များကို အဆင့်မြှင့်တင်ရန် လိုအပ် ကြောင်း ကင်မ်က ပြောသည်။

ဗဟိုစစ်ကော်မရှင် အစည်းအဝေးအတွင်း ကင်မ်သည် ထိပ်သီး ဗိုလ်ချုပ်ကြီးတစ်ဦးဖြစ်သည့် စစ်ဦးစီးချုပ် ပတ်ဆူအီ (Pak Su-il)၏ ရာထူးနေရာကို ရီယွန်ဂျီ (Ri Yong-gil) နှင့် အစားထိုးခဲ့သည်။

မြောက်ကိုရီးယား၏ ကာကွယ်ရေးဝန်ကြီးဖြစ်သည့် ရီသည် ဝန်ကြီးရာထူးနေရာတွင် ဆက်ရှိနေမည် ဟုတ်၊ မဟုတ် ရှင်းလင်းတိကျသည့်သတင်း ထွက်ပေါ်ခဲ့ခြင်း မရှိပေ။ 

Source: Korea Times

CNI International News

ကီတို၊ သြဂုတ် ၁၁

ဒုစရိုက်ဂိုဏ်းများ၏ အကြမ်းဖက်မှုများနှင့် ရင်ဆိုင်နေရသည့် အီကွေဒေါနိုင်ငံတွင် သြဂုတ် ၉ ရက်က သမ္မတ ရွေးကောက်ပွဲဝင်ပြိုင်ခဲ့သော ကိုယ်စားလှယ်လောင်းတစ်ဦး လုပ်ကြံသတ်ဖြတ်ခံခဲ့ရပြီးနောက် နိုင်ငံအတွင်း အရေးပေါ် အခြေအနေ ကြေညာခဲ့သည်ဟု အေပီမှ ဖော်ပြခဲ့သည်။

ရွေးကောက်ပွဲဝင် ကိုယ်စားလှယ်လောင်း ဖာနန်ဒို ဗီလာဗီဆန်စီယို (Fernando Villavicencio) သည် ရွေးကောက်ပွဲမတိုင်မီ သတင်းနှစ်ပတ်အလိုတွင် ကီတို (Quito)မြို့တော်၌ ပြုလုပ်သည့် မဲဆွယ်စည်းရုံးမှုအတွင်း ပစ်ခတ်သတ်ဖြတ် ခံခဲ့ရခြင်း ဖြစ်သည်။

ဖာနန်ဒိုသည် မူးယစ်ဆေးဝါးဂိုဏ်းများနှင့် အကျင့်ပျက်ခြစားမှုများကို ဆန့်ကျင်သူတစ်ဦးဖြစ်သည်။ သူသည် ရွေးကောက်ပွဲတွင် အနိုင်ရရန် ရေပန်းစားနေသည့် ကိုယ်စားလှယ်လောင်းများထဲတွင် မပါဝင်သော်လည်း သူ လုပ်ကြံသတ်ဖြတ်ခံရမှုကြောင့် သမ္မတ ဂွီလာမို လက်ဆို (Guillermo Lasso) သည် ရာဇဝတ်မှုများနှင့် ဆက်နွှယ် မှုရှိနိုင်သည်ဟု ထင်ကြေးပေးမှုများ ထွက်ပေါ်လာခဲ့သည်။

သမ္မတ ဂွီလာမို လက်ဆိုကိုတွေ့ရစဉ်

သမ္မတ လက်ဆိုကမူ ဖာနန်ဒို လုပ်ကြံခံရမှုအတွက် သုံးရက်ကြာ ဝမ်းနည်းပူဆွေးမှု ကာလအဖြစ် ကြေညာခဲ့ပြီး နိုင်ငံတစ်ဝန်း စစ်သားများကို ဖြန့်ကြက်ချထားခဲ့၍ အရေးပေါ်အခြေအနေ ကြေညာခဲ့သည်။

"ဒီမိုကရက်တစ် တစ်ဦးနဲ့ ဖိုက်တာတစ်ဦးကို ဆုံးရှုံးခဲ့ရတာကြောင့် ရွေးကောက်ပွဲကို ဆိုင်းငံ့မှာ မဟုတ်ပါဘူး။ ရွေးကောက်ပွဲကို ကျင်းပမှာဖြစ်ပြီး ဒီမိုကရေစီဟာလည်း ခိုင်မာစွာ ရှင်သန်နေရမှာ ဖြစ်ပါတယ်"ဟု လက်ဆိုက သြဂုတ် ၁၀ ရက်တွင် ပြောကြားခဲ့သည်။

အသက် ၅၉ နှစ်အရွယ် ဖာနန်ဒိုသည် လုပ်ကြံမခံရမီ နောက်ဆုံး ပြောကြားခဲ့သည့် မိန့်ခွန်းတွင် အကျင့်ပျက်ခြစား မှုကို အမြစ်ဖြတ်သွားမည်ဖြစ်ပြီး နိုင်ငံ့ဘဏ္ဍာ ခိုးယူသူများကို ထောင်ဒဏ် ချမှတ်သွားမည်ဟု ပြောကြားခဲ့သည်။

သူလုပ်ကြံခံခဲ့ရပြီးနောက် သူ့ကို လုပ်ကြံသည်ဟု သံသယရှိသူကို ပစ်ခတ်ဖမ်းဆီးခဲ့ချိန်တွင် ထိုသံသယရှိသူသည် ပစ်ခတ်မှုအတွင်း ရရှိခဲ့သည့် ဒဏ်ရာများဖြင့် အချုပ်ချခံထားရချိန်မှာပဲ သေဆုံးခဲ့သည်ဟု အီကွေဒေါ အစိုးရ ရှေ့နေချုပ်ရုံးက ထုတ်ပြန်ခဲ့သည်။

ထိုလုပ်ကြံမှုနှင့်ပတ်သက်ပြီး ကွီတိုမြို့တော်တွင် ရှာဖွေဖမ်းဆီးရေး စစ်ဆင်ရေးများကို ပြုလုပ်ခဲ့ရာ သံသယရှိသူ ခြောက်ဦးအား ဖမ်းဆီးရမိခဲ့သည်ဟု တာဝန်ရှိသူများက ပြောကြားခဲ့သည်။ 

CNI International News 

ဘန်ကောက်၊ သြဂုတ် ၁၀ 

ထိုင်းဘုရင် မဟာ ဝဇီရာလောင်ကွန်း (Maha Vajiralongkorn) ၏ ဒုတိယ အကြီးဆုံး သားဖြစ်သူ ဝချာရာဆွန်း ဝီဝချရာဝန် (Vacharaeson Vivacharawongse) သည် သြဂုတ် ၈ ရက်နေ့က ထိုင်းနိုင်ငံသို့ ပြန်လည် ရောက်ရှိ လာခဲ့သည်ဟု ရိုက်တာမှ ဖော်ပြခဲ့သည်။

အသက် ၄၂ နှစ်အရွယ် ဝချာရာဆွန်းအတွက် ၂၇ နှစ်အတွင်း ထိုင်းသို့ ပထမဆုံးအကြိမ် ပြန်လည် ရောက်ရှိလာ ခဲ့ခြင်းလည်း ဖြစ်သည်။ 

ပြီးခဲ့သည့် ဒီဇင်ဘာလက ထိုင်းဘုရင်၏ အကြီးဆုံး သမီးတော်သည် သတိမေ့မြောခဲ့ပြီးနောက် တော်ဝင်မိသားစု အတွင်း မရေရာမှုများ ဖြစ်ပွားနေချိန်တွင် ဝချာရာဆွန်းသည် ထိုင်းသို့ ရောက်ရှိလာခဲ့ခြင်း ဖြစ်သည်။

အမေရိကန်နိုင်ငံ နယူးယောက်ရှိ ဥပဒေကုမ္ပဏီတစ်ခုတွင် အလုပ်လုပ်နေသည့် ဝချာရာဆွန်းသည် တော်ဝင် မိသားစုက ပံ့ပိုးပေးထားသည့် ဆင်းရဲနွမ်းပါးသည့် ကလေးများစောင့်ရှောက်ရေးဂေဟာသို့ သွားရောက်ခဲ့သည်။

ဆင်းရဲနွမ်းပါးသည့် ကလေးများစောင့်ရှောက်ရေးဂေဟာသို့ ဝချာရာဆွန်း ဝီဝချရာဝန် ရောက်ရှိလာစဉ်

"ထိုင်းကိုပြန်လာရတာ ပျော်ရွှင်ရပါတယ်။ ထိုင်းနိုင်ငံနဲ့ အဝေးကြီးကို ရောက်နေခဲ့တာ ၂၇ နှစ်တောင်ရှိပါပြီ။ ထိုင်းကို ပြန်လာဖို့အတွက် အိပ်မက်တွေ အကောင်အထည်ပေါ်လာခဲ့ပါပြီ"ဟု ဝချာရာဆွန်းက သတင်းထောက် များကို ပြောကြားခဲ့သည်။

ဝချာရာဆွန်း၏ ခရီးစဉ်နှင့်ပတ်သက်ပြီး တော်ဝင်နန်းတော်က မှတ်ချက် မပေးခဲ့ပေ။

ဝချာရာဆွန်းသည် ထိုင်းဘုရင် ဝဇီရာလောင်ကွန်း၏ ဒုတိယဇနီး သုဇာရီနီ ဝီဝချရာဝန် (Sujarinee Vivacharawongse) ၏ သားလေးဦးအနက် ဒုတိယမြောက်သား ဖြစ်သည်။

ဝဇီရာလောင်ကွန်းနှင့် သုဇာရီနီသည် ၁၉၉၆ ခုနှစ်တွင် ကွာရှင်းခဲ့ကြသည်။

ထိုအချိန်က ထိုင်းဘုရင်သည် ဘူမိဘော (Bhumibol) ဖြစ်ပြီး ဝဇီရာလောင်ကွန်းသည် အိမ်ရှေ့မင်းသားဖြစ်သဖြင့် ဘုရင့်မြေးဖြစ်သည့် ဝချာရာဆွန်းသည် မည်သည့် တော်ဝင်ဂုဏ်ပုဒ်ကိုမျှ အပ်နှင်းခံခဲ့ရခြင်း မရှိပေ။

ဝဇီရာလောင်ကွန်းနှင့် ကွာရှင်းပြီးနောက်ပိုင်း သုဇာရီနီသည် သားလေးဦး၊ သမီးတစ်ဦးနှင့်အတူ ပြည်ပသို့ ပြောင်းရွှေ့ခဲ့ကာ တော်ဝင်မိသားစုနှင့် ခပ်ခွာခွာ နေထိုင်ခဲ့သည်။

နောက်ပိုင်းတွင် ဝချာရာဆွန်း၏ ညီမဖြစ်သူကို ထိုင်းတော်ဝင်မိသားစုက ပြန်လည် လက်ခံခဲ့ပြီး တော်ဝင်မင်းသမီး သီရိဝဏ္ဏဝါရီ နာရီရတ္တနာ (Sirivannavari Nariratana) ဘွဲ့ကို ချီးမြှောက်ခဲ့သည်။

Source: ရိုက်တာ

CNI International News

နီယာမေ၊ သြဂုတ် ၁၀ 

နိုက်ဂျာတွင် သူပုန်ခေါင်းဆောင်ဟောင်းတစ်ဦးက ဇူလိုင် ၂၆ ရက်၌ အာဏာသိမ်းခဲ့သည့် စစ်ခေါင်းဆောင်များကို ဆန့်ကျင်သည့် လှုပ်ရှားမှုအား စတင်လုပ်ဆောင်ခဲ့သည်ဟု ရိုက်တာမှ ဖော်ပြခဲ့သည်။

ထိုလှုပ်ရှားမှုသည် ဆာဟယ် (Sahel) ဒေသ၏ မဟာဗျူဟာအရ အရေးကြီးသည့် နိုက်ဂျာတွင် စစ်တပ်၏ အုပ်ချုပ်မှုကို ပြည်တွင်းက ဆန့်ကျင်တော်လှန်သည့် လက္ခဏာတစ်ခု ဖြစ်လာခဲ့သည်။

သူပုန်ခေါင်းဆောင်ဟောင်း နိုင်ငံရေးသမား ရစ်ဆာအဂ်ဘူလာ (Rhissa Ag Boula) က နေအိမ်အကျယ်ချုပ်ဖြင့် ထိန်းသိမ်းခံထားရသည့် သမ္မတ မိုဟာမက် ဘာဇုမ်း (Mohamed Bazoum) ကို အာဏာပြန်လည် အပ်နှင်းရန် ရည်ရွယ်ပြီး တော်လှန်ရေး သမ္မတ ကောင်စီ (CRR) ကို ဖွဲ့စည်းခဲ့ကြောင်း ပြောကြားခဲ့သည်။

"နိုက်ဂျာကို ကာကွယ်ရမယ့်သူတွေရဲ့ လုပ်ဆောင်ချက်တွေကြောင့် နိုက်ဂျာဟာ ဝမ်းနည်းဖွယ် ဖြစ်ရပ်ဆိုးမှာ နစ်နာခဲ့ရပါတယ်" ဟု ရစ်ဆာက အစီရင်ခံစာ ထုတ်ပြန်ခဲ့သည်။

အနောက်အာဖရိကနိုင်ငံများ စီးပွားရေးအဖွဲ့ (ECOWAS)ကို တွေ့ရစဉ်

CRR သည် နိုက်ဂျာတွင် ဖွဲ့စည်းပုံအခြေခံဥပဒေဆိုင်ရာ တည်ငြိမ်ရေးကို ပြန်လည်ရရှိစေရန် ကြိုးပမ်းနေသည့် အနောက်အာဖရိကနိုင်ငံများ စီးပွားရေးအဖွဲ့ (ECOWAS) နှင့် နိုင်ငံတကာအသိုင်းအဝိုင်း၏ လုပ်ဆောင်မှုများကို ထောက်ခံကြောင်းလည်း အစီရင်ခံစာတွင် ဖော်ပြခဲ့သည်။

နိုက်ဂျာတွင် တည်ငြိမ်အေးချမ်းမှုကို ပြန်လည်ရရှိစေရန် သံတမန်ရေးရာ လုပ်ဆောင်မှုများ ရပ်တန့်နေချိန်တွင် ရစ်ဆာ၏ အာဏာသိမ်းမှုဆန့်ကျင်သည့် လှုပ်ရှားမှု ပေါ်ပေါက်လာခဲ့ခြင်း ဖြစ်သည်။

နိုက်ဂျာ စစ်ခေါင်းဆောင်များသည် သံတမန်ရေး လှုပ်ရှားမှုများကို ငြင်းပယ်ခဲ့ပြီး စစ်အစိုးရများ အုပ်ချုပ်နေသည့် အိမ်နီးချင်း မာလီနှင့် ဘာကီနာဖာဆို နိုင်ငံများကလည်း နိုက်ဂျာကို စစ်ရေးအရ ကြားဝင်စွက်ဖက်ခြင်းကို ဟန့်တားပေးရန် ကုလသမဂ္ဂထံ မေတ္တာရပ်ခံခဲ့သည်။

သမ္မတ မိုဟာမက် ဘာဇုမ်းနဲ့ နိုက်ဂျာစစ်တပ် အရာရှိများကိုတွေ့ရစဉ်

နိုက်ဂျာအာဏာသိမ်း ခေါင်းဆောင်များသည် အာဖရိကနှင့် ကုလသမဂ္ဂ သံတမန်များကို သြဂုတ် ၈ ရက်တွင် ပြည်ဝင်ခွင့် ငြင်းပယ်ခဲ့ပြီး ဆွေးနွေးညှိနှိုင်းမှုများ ပြုလုပ်ရန် တောင်းဆိုချက်များကို ဖီဆန်ခဲ့သည်။

အနောက်အာဖရိက နိုင်ငံများမှ ခေါင်းဆောင်များသည် သြဂုတ် ၁၀ ရက်တွင် နိုက်ဂျီးရီးယားနိုင်ငံ၏ မြို့တော် အဘူဂျာ (Abuja) တွင် တွေ့ဆုံမည်ဖြစ်ပြီး နိုက်ဂျာအရေးကို ဆွေးနွေးကြမည် ဖြစ်သည်။ 

CRR အနေနှင့်လည်း အနောက်အာဖရိက ခေါင်းဆောင်များ၏ မည်သည့် ရည်ရွယ်ချက်ကိုမဆို ထောက်ခံ သွားမည်ဟု ရစ်ဆာက ပြောကြားခဲ့သည်။

Source: ရိုက်တာ

CNI International News

ဘန်ကောက်၊ သြဂုတ် ၁၀

ထိုင်းတွင် အစိုးရဖွဲ့ရန်ကြိုးပမ်းနေသည့် ဖြူးထိုင်းပါတီသည် သြဂုတ် ၉ ရက်နေ့က အခြားပါတီခြောက်ခုနှင့် ညွန့်ပေါင်းအသစ် ဖွဲ့စည်းခဲ့သည်ဟု The Nation မှ ဖော်ပြခဲ့သည်။

ဖြူးထိုင်းပါတီသည် ဆန္ဒပြသူများနှင့် ထိပ်တိုက်တွေ့မည့်အရေးမှ ရှောင်လွှဲရန် ညွန့်ပေါင်းမဟာမိတ်များနှင့် ဆွေးနွေးမှုကို လွှတ်တော်တွင် ပြုလုပ်ခဲ့သည်။

ဖြူးထိုင်းပါတီက ဦးဆောင်သည့် ညွန့်ပေါင်းအဖွဲ့ထဲတွင် ပါဝင်သည့် ပါတီများမှာ Prachachat ၊ Seri Ruam Thai ၊ Pheu Thai Ruam Palang ၊ Palang Sangkhom Mai ၊ The Party of Thai Counties နှင့် Chart Pattana Kla ပါတီတို့ ဖြစ်သည်။ 

အဆိုပါ ပါတီများအနက် Prachachat ၊ Seri Ruam Thai ၊ Pheu Thai Ruam Palang နှင့် Palang Sangkhom Mai ပါတီတို့သည် ယခင် Move Forward ပါတီက ဖွဲ့စည်းခဲ့သည့် (၈) ပါတီ ညွန့်ပေါင်းအဖွဲ့တွင် ပါဝင်ခဲ့သည့် ပါတီများ ဖြစ်သည်။

Move Forward ပါတီ ဦးဆောင်သည့် ညွန့်ပေါင်းအဖွဲ့ကို တွေ့ရစဉ်

ယခင် (၈) ပါတီ ညွန့်ပေါင်းအဖွဲ့သည် နေရာ ၅၀၀ ရှိသည့် အောက်လွှတ်တော်တွင် ၂၂၈ နေရာကိုသာ ရရှိခဲ့သော် လည်း ဖြူးထိုင်းပါတီခေါင်းဆောင် ချိုနန် သီရိကော (Cholnan Srikaew)က ယခုဖွဲ့စည်းသည့် ညွန့်ပေါင်းအသစ် သည် နေရာ ၂၅၁ နေရာအတွက် ထောက်ခံမှုကို ရရှိခဲ့ကြောင်း အတည်ပြု ပြောကြားခဲ့သည်။

ထို့ပြင် ဖြူးထိုင်းပါတီက ညွန့်ပေါင်းအဖွဲ့သစ်တွင် ပါဝင်လာမည့် နောက်ထပ်ပါတီများကို မကြာမီအချိန်အတွင်း ကြေညာသွားမည်ဖြစ်ကြောင်းနှင့် ရွေးကောက်ပွဲတွင် နေရာ ၁၀ နေရာ ရရှိခဲ့သည့် Chart Thai Pattana ပါတီနှင့် ယနေ့(သြဂုတ် ၁၀ ရက်)တွင် တွေ့ဆုံဆွေးနွေးရန် စီစဉ်ထားကြောင်း ပြောကြားခဲ့သည်။

ဖြူးထိုင်းပါတီ ဦးဆောင်သည့် ညွန့်ပေါင်းအဖွဲ့၏ အဓိကရည်မှန်းချက်မှာ ထိုင်းနိုင်ငံကို လက်ရှိဖြစ်ပွားနေသည့် နိုင်ငံရေး အကျပ်အတည်းအတွင်းမှ ဆွဲထုတ်ရန်ဖြစ်ကြောင်း၊ ဖွဲ့စည်းပုံအခြေခံဥပဒေ၊ စီးပွားရေးနှင့် လူ့အဖွဲ့ အစည်း အတွင်း နိုင်ငံရေး သဘောထားကွဲလွဲမှုများကို ဖြေရှင်းရန်ဖြစ်သည်ဟု ချိုနန်က ပြောကြားခဲ့သည်။

ထိုအချက် သုံးချက်နှင့်ပတ်သက်သည့် အကျပ်အတည်းကို အဆုံးသတ်စေရန် ဖွဲ့စည်းပုံ အခြေခံဥပဒေသစ်ကို မူကြမ်းရေးဆွဲသွားမည်ဟုလည်း ဖြူးထိုင်းပါတီက ကတိပြုခဲ့သည်။

ဖြူးထိုင်းပါတီ၏ လက်ထောက်ခေါင်းဆောင် ဖွမ်သမ် ဝီချာယာချိုင်း (Phumtham Wechayachai) ကလည်း အစိုးရအဖွဲ့သစ်ကို မမျှော်မှန်းနိုင်သည့် အခြေအနေမျိုးတွင် ဖွဲ့စည်းသွားမည်ဟု ပြောကြားခဲ့သည်။ 

Source: The Nation

CNI International News

ကရင်မလင်၊ သြဂုတ် ၁၀

ရုရှားသည် ၂၀၂၂ ခုနှစ်၊ မတ်လအစောပိုင်းက ယူကရိန်းထံမှ သိမ်းပိုက်ခဲ့သည့် ဇာပိုရီရှား နျူကလီးယားစက်ရုံ တည်ရှိသည့် ဇာပိုရီရှား (Zaporizhzhia) မြို့တွင် ချေချင်းညာတပ်ဖွဲ့ကို ဖြန့်ကြက်ချထားခဲ့သည်ဟု အယ်လ်ဂျာဇီး ယားမှ ဖော်ပြခဲ့သည်။

ဇာပိုရီရှားမြို့ရှိ ဇာပိုရီရှားနျူကလီးယား ဓာတ်အားပေးစက်ရုံ တည်ရှိသည့် အန်နာဟိုဒါ (Enerhodar) မြို့နယ်တွင် ချေချင်းညာတပ်ဖွဲ့ဝင်များ ကင်းလှည့်နေသည်ကို မြင်တွေ့ခဲ့ရသည်ဟု ထိုမြို့နယ်မှ ထွက်ပြေးတိမ်းရှောင်လာသူ များက ပြောသည်။

ချေချင်းညာတပ်ဖွဲ့များသည် ဒွန်းနက်စ် (Donetsk) နှင့် လူဟန့်စ် (Luhansk) ဒေသတို့မှ ရုရှားလိုလားသည့် ခွဲထွက်ရေး လက်နက်ကိုင်များနှင့် မတူဘဲ စစ်ယူနီဖောင်းများကို သပ်သပ်ရပ်ရပ် ဝတ်ဆင်လေ့ရှိပြီး လက်နက် အကောင်းများကို ကိုင်ဆောင်ထားကြသည်ဟု အမည်မဖော်လိုသည့် မြို့ခံများက ပြောကြားခဲ့သည်။

ချေချင်းညာခေါင်းဆောင် ရမ်ဇမ် ကာဒီရော့ဗ် (Ramzan Kadyrov) သည် ရုရှားသမ္မတ ဗလာဒီမာ ပူတင် (Vladimir Putin) ၏ လက်ရုံးတစ်ဦးဖြစ်သည်။

အဆိုပါ ကာဒီရော့ဗ်သည် တစ်ခါတစ်ရံတွင် ရုရှား အရာရှိများကိုပင် ကြိမ်းမောင်းလေ့ရှိသည်ဟု သတင်းများ ထွက်ပေါ်ခဲ့သည်။

 ရမ်ဇမ်နဲ့ ချေချင်းညာတပ်ဖွဲ့ကိုတွေ့ရစဉ်

ထို့ပြင် ချေချင်းညာတပ်ဖွဲ့များသည် အန်နာဟိုဒါမြို့တွင် ရုရှားစစ်သားများနှင့်လည်း အရောတဝင်မနေဘဲ သီးသန့် လှုပ်ရှားကြသူများဖြစ်သည်ဟု ထိုမြို့မှ ထွက်ပြေးတိမ်းရှောင်လာသည့် အင်ဂျင်နီယာတစ်ဦးက ပြောသည်။

အန်နာဟိုဒါမြို့၏ လမ်းများပေါ်တွင် ကင်းလှည့်နေသည့် ချေချင်းညာတပ်ဖွဲ့ဝင်များကို မြင်တွေ့ရမည်ဖြစ်ပြီး မြို့ခံများ၏ မှတ်ပုံတင်များကို စစ်ဆေးခြင်း၊ နေအိမ်များအတွင်းသို့ ဝင်ရောက်ရှာဖွေခြင်းတို့ ပြုလုပ်လေ့ရှိသည်ဟု လုံခြုံရေးအန္တရာယ်ကြောင့် အမည်မဖော်လိုသည့် မြို့ခံတစ်ဦးက ပြောသည်။

"ချေချင်းညာ တပ်ဖွဲ့တွေဟာ မြို့ခံတွေရဲ့ ပတ်စ်ပို့တွေကို စစ်ဆေးပြီး မေးမြန်းတာတွေ ပြုလုပ်လေ့ရှိပါတယ်။ တကယ်လို့ ပတ်စ်ပို့ဟာ ရုရှားပတ်စ်ပို့ဆိုရင် ဘာပြဿနာမှ မရှိပါဘူး။ ဒါပေမယ့် ယူကရိန်းပတ်စ်ပို့သာ ဆိုရင် တော့ အရစ်ခံရတာ၊ ပြဿနာရှာခံရတာတွေနဲ့ ရင်ဆိုင်ရနိုင်ပါတယ်"ဟု အဆိုပါ မြို့ခံတစ်ဦးက ပြောကြားခဲ့သည်။

ထို့ပြင် ချေချင်းညာတပ်ဖွဲ့များသည် နေအိမ်များအတွင်းသို့လည်း ဝင်ရောက် ရှာဖွေလေ့ရှိပြီး အိမ်ရှင်များကို ယူကရိန်းစစ်တပ်နှင့် အဆက်အသွယ် ရှိ၊မရှိ မေးမြန်းလေ့ရှိသည်။

"လူတွေမနေတဲ့ အိမ်တွေဆိုရင်လည်း သူတို့သဘောနဲ့သူတို့ ချိတ်ပိတ်ပစ်ပါတယ်။ ဒေသခံတွေက သူတို့ကို ကြောက်နေရပါတယ်"ဟု အန်နာဟိုဒါမြို့မှ ထွက်ပြေးတိမ်းရှောင်လာသည့် ယူကရိန်းတက်ကြွ လှုပ်ရှားသူ တစ်ဦးက ပြောသည်။

Source: အယ်လ်ဂျာဇီးယား

CNI International News

ဝါရှင်တန်၊ သြဂုတ် ၉

အမေရိကန်နိုင်ငံ အရှေ့ပိုင်းဒေသ အများအပြားတွင် အင်အားပြင်းမုန်တိုင်းများ တိုက်ခတ်ခဲ့သဖြင့် လူ ၂ ဦးသေဆုံး ကာ အဆောက်အအုံ ၇၀၀,၀၀၀ ကျော်သည် လျှပ်စစ်ဓာတ်အား ပြတ်တောက်မှုဒဏ်ကို ခံနေရကြောင်း အယ်လ်ဂျာဇီးယားမှ ဖော်ပြခဲ့သည်။

ထို့နောက် ထောင်နှင့်ချီသည့် လေကြောင်းခရီးစဉ်များကို ဖျက်သိမ်း၊ ရွှေ့ဆိုင်းခဲ့ရသည်။ 

အလာဘားမား (Alabama) မှ နယူးယောက်ခ် (New York) ပြည်နယ်အထိ အမေရိကန်အရှေ့ပိုင်း ပင်လယ် ကမ်းခြေ ဒေသများတွင် လေပြင်းများ တိုက်ခတ်ခြင်း၊ မိုးသီးများကြွေခြင်း၊ မိုးသည်းထန်စွာ ရွာသွန်းခြင်းတို့နှင့် အတူ တော်နယ်ဒို (Tornado) မုန်တိုင်း သတိပေးချက် အပါအဝင် ပြင်းထန်သော မိုးလေဝသ အန္တရာယ် သတိပေး နှိုးဆော်ချက်များ ထုတ်ပြန်ခဲ့သည်။

အမေရိကန်မှာ မုန်တိုင်းတိုက်ခတ်မှုကြောင့် ဒေသခံများ အကာအကွယ်ရှာနေကြစဉ်

အမျိုးသား မိုးလေဝသဌာန (NWS) ကမူ လေတိုက်နှုန်း တစ်နာရီ မိုင် ၈၀ (ကီလိုမီတာ ၁၃၀) ရှိသည့် လေပြင်းများ နှင့်အတူ အန္တရာယ် အသင့်အတင့်ရှိသည့် ကြောက်မက်ဖွယ် မုန်တိုင်းများ တိုက်ခတ်နိုင်သည်ဟု ခန့်မှန်းချက် ထုတ်ပြန်ခဲ့သည်။ 

"မိုးလေဝသ အခြေအနေကို သတိထားဖို့နဲ့ သက်ဆိုင်ရာရဲ့ သတိပေးချက်တွေကို အမြဲမပြတ် သိရှိနိုင်မယ့် နည်းလမ်းတွေ ရှာဖွေထားကြပါ"ဟု NWS က ဘယ်လ်တီမိုး (Baltimore) ၊ ဝါရှင်တန် (Washington) တို့တွင် သတိပေးချက် ထုတ်ပြန်ခဲ့သည်။

မုန်တိုင်းများ၏ ပျံ့နှံ့မှုသည် အလွန်ကြီးမားပြီး တော်နယ်ဒို သတိပေးချက်များကို တန်နက်ဆီ (Tennessee) မှ နယူးယောက်ခ် (New York) အထိ ပြည်နယ်ပေါင်း ၁၀ ခုတွင် ထုတ်ပြန်ခဲ့သည်။

ဝါရှင်တန်-ဘယ်လ်တီမိုး ဒေသသည် အစိုးရိမ်ရဆုံး ဒေသဖြစ်သည်ဟုလည်း NWS က ပြောသည်။

အမေရိကန်မှာ မုန်တိုင်းကြောင့် သစ်ပင်များ ချိုးချနေစဉ်

အချို့နေရာဒေသများတွင် မိုးသည်းထန်စွာ ရွာသွန်းမှုကြောင့် ရေလွှမ်းမိုးမှုများနှင့်အတူ ဗာဂျီးနီးယား (Virginia) ပြည်နယ်တွင် လုံးပတ် ၄ ဒသမ ၅ လက်မရှိသည့် မိုးသီးများကြွေခဲ့သည်ဟု NWS က ထုတ်ပြန်ခဲ့သည်။

သြဂုတ် ၇ ရက်နေ့ နှောင်းပိုင်းတွင် အမေရိကန်အရှေ့ဘက် ကမ်းရိုးတန်းရှိ အဆောက်အအုံပေါင်း ၇၀၀,၀၀၀ တွင် လျှပ်စစ်ဓာတ်အားများ ပြတ်တောက်ခဲ့ပြီး ထိုနေ့မှာပင် အမေရိကန်လေကြောင်းခရီးစဉ် ၁၇၀၀ ကျော်ကို ဖျက် သိမ်းခဲ့ရကာ လေကြောင်းခရီးစဉ် ၈၀၀၀ ကို ရက်ရွှေ့ဆိုင်းခဲ့ရသည်ဟု FlightAware ဝက်ဘ်ဆိုက်တွင် ဖော်ပြထား သည်။

ဝါရှင်တန်တွင်လည်း မိုးလေဝသ အခြေအနေကြောင့် အစိုးရဝန်ထမ်းများကို မိမိတို့ နေအိမ်များသို့ လျင်မြန်စွာ ပြန်နိုင်စေရန် ရုံးဆင်းချိန်ကို ညနေ ၃ နာရီ သတ်မှတ်ခဲ့သည်။
တက္ကဆက် (Texas)၊ လူဝီစီယားနား (Louisiana) နှင့် ဖလော်ရီဒါတို့ အပါအဝင် အမေရိကန်တောင်ပိုင်း ပြည်နယ် များတွင် အပူချိန် ၄၂ ဒီဂရီ ဆဲလ်စီးယပ်စ်အထိ မြင့်တက်မည်ဟု ခန့်မှန်းထားချိန်တွင် အမေရိကန် အရှေ့ပိုင်း၌  မုန်တိုင်းများ တိုက်ခတ်ခဲ့ခြင်း ဖြစ်သည်။

ကမ္ဘာကြီး ပူနွေးလာမှုနှင့်အတူ ရာသီဥတု ဖောက်ပြန်ပြောင်းလဲမှုကြောင့် ယခုကဲ့သို့ ဆိုးရွားပြင်းထန်သည့် မိုးလေဝသ အခြေအနေများ မကြာခဏ ဖြစ်ပွားလာခဲ့ခြင်း ဖြစ်သည်ဟု သိပ္ပံပညာရှင်များက ပြောကြားခဲ့သည်။

Source: အယ်လ်ဂျာဇီးယား

CNI International News

ဝါရှင်တန်၊ သြဂုတ် ၉

အမေရိကန်နိုင်ငံ မွန်တားနားပြည်နယ်ရှိ နျူကလီးယား ဒုံးကျည်စခန်း၏ ဒုံးကျည်ပစ်လွှတ်မှု ထိန်းချုပ်ရေး မြေအောက်စခန်းများတွင် ကင်ဆာဖြစ်စေနိုင်သည့် ကာစီနိုဂျင် (Carcinogen) ဓာတ်ပစ္စည်းကို အမေရိကန် လေတပ်က ထောက်လှမ်း တွေ့ရှိခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

အဆိုပါ တွေ့ရှိမှုသည် ဒုံးကျည်စခန်းများ၏ ဝန်ထမ်းများအကြား စိုးရိမ်မှုများ မြင့်တက်နေသည့် အခြေအနေကို ဖြေရှင်းရန် ကြိုးပမ်းနေသည်။

ထို့နောက် အမေရိကန်၏ တိုက်ချင်းပစ် ပဲ့ထိန်းဒုံးကျည် စခန်းများထံမှ စုဆောင်းရရှိသော ပထမဆုံး နမူနာ ပုံစံများကို တွေ့ရှိခဲ့ကြောင်း အမေရိကန်လေတပ်၏ ကမ္ဘာလုံးဆိုင်ရာ တိုက်ခိုက်ရေး ဌာနချုပ် (US Air Force Global Strike Command)က သြဂုတ် ၇ ရက်တွင် အစီရင်ခံစာ ထုတ်ပြန်ခဲ့သည်။

ပုံ - အမေရိကန်လေတပ်၏ ကမ္ဘာလုံး ဆိုင်ရာ တိုက်ခိုက်ရေး ဌာနချုပ်မှ တပ်မှူးဖြစ်သူ ဗိုလ်ချုပ်ကြီး သောမတ် ဘတ်စီယာကို တွေ့ရစဉ်

မွန်တားနားပြည်နယ် Malmstrom လေတပ်စခန်း၏ အဆောက်အအုံနှစ်ခုမှ စုဆောင်းရရှိခဲ့သည့် နမူနာများတွင် လူလုပ် သဘာဝဓာတုပစ္စည်းများဖြစ်သည့် PCB အဆင့်သည် သဘာဝပတ်ဝန်းကျင် ကာကွယ်ရေး အေဂျင်စီ (EPA) က အကြံပြုထောက်ခံထားသော အဆင့်ထက် ပိုမိုမြင့်မားနေသည်ကို တွေ့ရှိခဲ့သည်။

PCB များသည် ဆီ သို့မဟုတ် အရည်ပျော်လွယ်သည့် ဖယောင်းကဲ့သို့ ဓာတ်ပစ္စည်းများဖြစ်ပြီး ထိုအရာများသည် ကာစီနိုဂျင်များ ဖြစ်နိုင်သည်ဟု EPA က သတ်မှတ်ထားသည်။

ထိုအကြောင်းအရာနှင့် ပတ်သက်ပြီး ထိခိုက်ခဲ့ရသည့် အဆောက်အအုံများကို ရှင်းလင်းရန် အပြင်  ဘေးအန္တရာယ် နှင့်ထိတွေ့ခဲ့ဖွယ်ရှိသည့် လေတပ်ဝန်ထမ်းများ၊ ကြီးကြပ်သူများ၏ ကျန်းမာရေးအန္တရာယ်ကို အတတ်နိုင်ဆုံး လျှော့ချရန် လုပ်ဆောင်ရမည့် စီမံကိန်းများကို ချက်ချင်းညွှန်ကြားခဲ့သည်ဟု အမေရိကန်လေတပ်၏ ကမ္ဘာလုံး ဆိုင်ရာ တိုက်ခိုက်ရေး ဌာနချုပ်မှ တပ်မှူးဖြစ်သူ ဗိုလ်ချုပ်ကြီး သောမတ် ဘတ်စီယာ (Thomas Bussiere) က ပြောကြောင်း အေပီ သတင်းဌာနမှ ဖော်ပြခဲ့သည်။

ဇန်နဝါရီလအတွင်း အေပီသတင်းဌာနက ရရှိခဲ့သည့်် စစ်ရေးမှတ်တမ်းများအရ Malmstrom လေတပ်စခန်းတွင် လက်ရှိ တာဝန်ထမ်းဆောင်ဆဲ ဝန်ထမ်းများနှင့် တာဝန်မှ အနားယူသွားသည့် ဝန်ထမ်းဟောင်း ၉ ဦးသည် ရှားပါး သွေးကင်ဆာတစ်မျိုးဖြစ်သည့် non-Hodgkin lymphoma ကင်ဆာကို ခံစားခဲ့ရကြောင်း တွေ့ရှိရသည်။

ပုံ - Malmstrom လေတပ်စခန်းက ဒုံးကျည်များတပ်ဆင်နေစဉ်

non-Hodgkin lymphoma ရောဂါသည် သွေးကင်ဆာတစ်မျိုးဖြစ်ပြီး လူ့ခန္ဓာကိုယ်အတွင်းရှိ ရောဂါများကို တိုက်ဖျက်သည့် သွေးဖြူဆဲလ်များ ပါရှိသည့် ကိုယ်တွင်းထွက် အရည်ကြည်စနစ်ကို အသုံးချပြီး ကင်ဆာဆဲလ်များ ပျံ့နှံ့သည့် ရောဂါတစ်မျိုး ဖြစ်သည်။

NGO အဖွဲ့တစ်ခုဖြစ်သည့် Torchlight Initiative ၏ အဆိုအရ နျူကလီးယား ဒုံးကျည်စခန်းများတွင် တာဝန် ထမ်းဆောင်ခဲ့သည့် စစ်သား ၂၆၈ ဦး သို့မဟုတ် ၎င်းတို့၏ အသက်ရှင် ကျန်ရစ်သည့် မိသားစုဝင်များသည် ပြီးခဲ့သည့် ဆယ်စုနှစ်များအတွင်း ကင်ဆာရောဂါ၊ သွေးရောဂါ သို့မဟုတ် အခြားရောဂါများကို ခံစားခဲ့ရသည်ဟု ဖော်ပြခဲ့သည်။

ထိုစစ်သားများအနက် ၂၁၇ ဦးသည် ကင်ဆာရောဂါများ ခံစားခဲ့ရပြီး ၎င်းတို့ထဲမှ ၃၃ ဦးသည် non-Hodgkin lymphoma ကင်ဆာရောဂါကို ခံစားခဲ့ရသည်ဟု Torchlight Initiative အဖွဲ့က ထုတ်ပြန်ခဲ့သည်။

Source: အယ်လ် ဂျာဇီးယား

CNI International News

နယူးဒေလီ၊ သြဂုတ် ၉

အိန္ဒိယနိုင်ငံသည် စစ်ဘက်သုံး ဒရုန်းများထုတ်လုပ်သည့် ပြည်တွင်းကုမ္ပဏီများအား တရုတ်လုပ် ပစ္စည်းများကို အသုံးမပြုရန် မကြာသေးမီ လများအတွင်းက တားမြစ်ပိတ်ပင်ခဲ့သည်ဟု ရိုက်တာမှ ဖော်ပြခဲ့သည်။ 

ထောက်လှမ်းရေး အချက်အလက်များ ကျိုးပေါက်မည့် အန္တရာယ်ကို စိုးရိမ်ခြင်းကြောင့် ထိုကဲ့သို့ ပိတ်ပင်ခဲ့ခြင်း ဖြစ်သည်ဟု အမည်မဖော်လိုသည့် ကာကွယ်ရေးနှင့် စက်မှုအရာရှိ လေးဦးက ပြောကြားခဲ့သည်။

အိန္ဒိယသည် quadcopter ကဲ့သို့ မောင်းသူမဲ့ယာဉ်များအား ပိုမိုကောင်းမွန်စွာ အသုံးပြုနိုင်ရန် စစ်တပ်ကို အဆင့် မြှင့်တင်နေချိန်နှင့် နျူကလီးယား လက်နက်ပိုင်ဆိုင်သည့် တရုတ်နှင့် တင်းမာမှုများ မြင့်တက်နေချိန်တွင် တရုတ် ပစ္စည်းများကို ပိတ်ပင်ခဲ့ခြင်း ဖြစ်သည်။

သို့သော် အိန္ဒိယ၏ အခြေတည်စ စက်မှုကဏ္ဍသည် စစ်တပ်၏ လိုအပ်ချက်ကို ပြည့်မီစေရန် ကြိုးပမ်းနေရချိန်တွင် ဒရုန်းများ၌ အသုံးပြုသည့် တရုတ်နိုင်ငံလုပ် ဆက်သွယ်ရေးပစ္စည်းများ၊ ကင်မရာများ၊ ရေဒီယို ထုတ်လွှင့်မှု စနစ် များနှင့် ဆော့ဖ်ဝဲများကြောင့် ထောက်လှမ်းရေးသတင်း ကျိုးပေါက်မည့်အရေးအား အိန္ဒိယ၏ ကာကွယ်ရေးနှင့် စက်မှုကဏ္ဍမှ အရာရှိများက စိုးရိမ်နေသည်။

အိန္ဒိယစစ်တပ်က ဒရုန်းအသုံးပြုနေစဉ်

အိန္ဒိယအစိုးရနှင့် စက်မှုလုပ်ငန်းကဏ္ဍမှ အမည်မဖော်လိုသည့် အရာရှိအချို့သည် ရိုက်တာသတင်းဌာနနှင့် အင်တာဗျူး ပြုလုပ်ခဲ့ချိန်တွင် ထိုအကြောင်းအရာသည် သိမ်မွေ့နက်နဲသဖြင့် မီဒီယာများသို့ ထုတ်ဖော် ပြောဆိုခွင့် မရှိကြောင်း ဖြေကြားခဲ့သည်။

အိန္ဒိယကာကွယ်ရေးဝန်ကြီးဌာနကလည်း ထိုအကြောင်းအရာနှင့် ပတ်သက်ပြီး ရိုက်တာသတင်းဌာန၏ မှတ်ချက် ပေးရန် တောင်းဆိုမှုကို တုံ့ပြန်ခဲ့ခြင်းမရှိပေ။

အမည်မဖော်လိုသည့် အိန္ဒိယကာကွယ်ရေးဝန်ကြီးဌာနမှ ထိပ်သီးအရာရှိ တစ်ဦးကမူ အိန္ဒိယစက်မှု လုပ်ငန်းကဏ္ဍ သည် ဆိုက်ဘာတိုက်ခိုက်မှုများကို စိုးရိမ်နေရသည့်တိုင် ကမ္ဘာ့ဒုတိယ စီးပွားရေး အင်အားကြီး တရုတ်၏ စက်ပစ္စည်း အစိတ်အပိုင်းများအပေါ် မှီခိုနေရကြောင်း ရိုက်တာကို ပြောကြားခဲ့သည်။

တရုတ်ကမူ ဆိုက်ဘာတိုက်ခိုက်မှုများတွင် ပါဝင်ပတ်သက်ခြင်း မရှိကြောင်း ငြင်းဆိုထားသည်။

အိန္ဒိယစစ်တပ်က ဒရုန်းအသုံးပြုနေစဉ်

တရုတ်ကုန်သွယ်ရေး ဝန်ကြီးဌာနကလည်း ဒရုန်းများနှင့် ဆက်စပ်ပစ္စည်း ကိရိယာအချို့ကို ပို့ကုန် ထိန်းချုပ်မှု ပြုလုပ်ကြောင်း ပြီးခဲ့သည့် သီတင်းပတ်က ကြေညာခဲ့သည်။
၂၀၁၉ ခုနှစ်တွင် အမေရိကန် လွှတ်တော်က တရုတ်နိုင်ငံ၌ ပြုလုပ်သည့် ဒရုန်းများနှင့် ဆက်စပ်ပစ္စည်းများကို ဝယ်ယူခြင်း သို့မဟုတ် အသုံးပြုခြင်းကို ပင်တဂွန်အား ပိတ်ပင်ခဲ့သည်။

Source: ရိုက်တာ