CNI International News

နေပြည်တော်၊ မေလ ၅

နှစ်နိုင်ငံကြားရှိ ကျယ်ပြန့်သော မဟာဗျူဟာမြောက် ပူးပေါင်းဆောင်ရွက်မှုကို ပိုမိုမြှင့်တင်ရန် တရုတ်နှင့် မြန်မာ တို့ တရုတ်နိုင်ငံတော်ကောင်စီဝင်နှင့် နိုင်ငံခြားရေးဝန်ကြီး မစ္စတာကျင်ဂန်း၏ မေလ ၂ ရက်မှ ၄ ရက်နေ့အထိ မြန်မာပြည်ခရီးစဉ်အတွင်း သဘောတူခဲ့ကြောင်း CGTN သတင်းတွင် ဖော်ပြထားသည်။

နစကဥက္ကဋ္ဌ ဗိုလ်ချုပ်မှူးကြီးမင်းအောင်လှိုင်နှင့် နေပြည်တော်တွင် တွေ့ဆုံခဲ့ရာစဉ် တရုတ်နိုင်ငံတော် ကောင်စီဝင် နှင့် နိုင်ငံခြားရေးဝန်ကြီးဖြစ်သူ မစ္စတာကျင်ဂန်း (Qin Gang)က အိမ်နီးချင်း နှစ်နိုင်ငံကြားတွင် ပေါက်ဖော် ဆက်ဆံရေးကို ပိုင်ဆိုင်ထားခြင်းကြောင့် တရုတ်သည် မြန်မာနှင့်ဆက်ဆံရေးအား အလေးအနက်ထားသည်ဟု ပြောသည်။

တရုတ်နိုင်ငံသည် တရုတ်-မြန်မာ အသိုက်အဝိုင်းကို တည်ဆောက်ရန်၊ ကမ္ဘာလုံးဆိုင်ရာ ဖွံ့ဖြိုးတိုးတက်မှု ခြေလှမ်း၊ ကမ္ဘာလုံးဆိုင်ရာ လုံခြုံရေး ခြေလှမ်းနှင့် ကမ္ဘာလုံးဆိုင်ရာ ယဉ်ကျေးမှု ခြေလှမ်းများကို ဦးဆောင်ရန် အတွက် မြန်မာနှင့်ပူးပေါင်းသွားရန် အဆင်သင့်ရှိသည်ဟု ကျင်က ပြောသည်။

မြန်မာနိုင်ငံတွင် တည်ငြိမ်မှုနှင့် အမျိုးသားဖွံ့ဖြိုးတိုးတက်မှုရရှိရန် တရုတ်နိုင်ငံဘက်က ရိုးသားစွာ မျှော်လင့်ထား ကြောင်း ကျင်က ပြောသည်။

 ၂၀၂၃ ခုနှစ်၊ မေလ ၂ ရက်က တရုတ်နိုင်ငံခြားရေးဝန်ကြီးဖြစ်သူ မစ္စတာကျင်ဂန်းနဲ့ နစက၏ နိုင်ငံခြားရေး ဝန်ကြီး ဦးသန်းဆွေတို့ တွေ့ဆုံစဉ်

၎င်းက “မြန်မာ့ အခြေအနေများနှင့် ကိုက်ညီမှုရှိသော မြန်မာ့စရိုက် လက္ခဏာများနှင့် တိုးတက်မှု လမ်းကြောင်း တစ်ခုကို ဖော်ဆောင်ရေး တရုတ်နိုင်ငံအနေဖြင့် ကူညီပေးသွားမည်”ဟု ပြောသည်။

တရုတ်သည် မြန်မာနိုင်ငံ၏ နိုင်ငံရေး ပြုပြင်ပြောင်းလဲမှု လုပ်ငန်းစဉ်အား ထောက်ပံ့ ကူညီလျက်ရှိကြောင်း၊ ဖွဲ့စည်းပုံ အခြေခံဥပဒေနှင့် ဥပဒေမူဘောင်အတွင်း အမျိုးသား ပြန်လည် ရင်ကြားစေ့ရေးနှင့် ကွဲပြားမှုများကို ဖြေရှင်းရေး သက်ဆိုင်ရာ အဖွဲ့အစည်းများကို ထောက်ခံလျက်ရှိကြောင်း ကျင်က ဆက်ပြောသည်။

နိုင်ငံတကာ အသိုင်းအဝိုင်းအနေဖြင့် မြန်မာနိုင်ငံ၏ အချုပ်အခြာအာဏာကို လေးစားရန်၊ မြန်မာနိုင်ငံ၏ ငြိမ်းချမ်း ရေးနှင့် ရင်ကြားစေ့ရေးတို့တွင် အပြုသဘော ဆောင်သည့်ဘက်မှ ပါဝင်ကူညီရန်လည်း ကျင်က တိုက်တွန်းသည်။

၎င်းက “တရုတ်နိုင်ငံသည် မြန်မာနိုင်ငံ၏ ဖွံ့ဖြိုးတိုးတက်ရေး ကြိုးပမ်းမှုများအပြင် တရုတ်-မြန်မာ စီးပွားရေး စင်္ကြံန်ရှိ စီမံကိန်းများတွင် အဓိကကျသော ပူးပေါင်းဆောင်ရွက်မှုများကို မြှင့်တင်ရန်၊ မြန်မာနိုင်ငံသားများအတွက် အကျိုး ဖြစ်ထွန်းစေမည့် စိုက်ပျိုးရေး၊ ပညာရေး၊ ကျန်းမာရေး စောင့်ရှောက်မှုနှင့် တခြားသော အကြောင်းအရာ များဆိုင်ရာ စီမံကိန်းများကို ပြည့်မှီအောင် ဆောင်ရွက်ရေးတို့၌ ဆက်လက် ကူညီသွားမည်”ဟု ပြောခဲ့သည်။

တရုတ်အနေဖြင့် မြန်မာနှင့် ဘင်္ဂလားဒေ့ရှ်နိုင်ငံတို့၏ ဆက်ဆံရေးများ မြှင့်တင်ရန် ဆက်လက် ထောက်ပံ့သွားမည် ဖြစ်ကြောင်း၊ တရုတ်-မြန်မာ- ဘင်္ဂလားဒေ့ရှ် သုံးနိုင်ငံ လက်တွေ့ဆန်သော ပူးပေါင်းဆောင်ရွက်မှုများကို တိုးချဲ့ရေး အတွက် နှစ်နိုင်ငံလုံးနှင့် လုပ်ဆောင်သွားလိုသည်ဟုလည်း တရုတ်နိုင်ငံခြားရေးဝန်ကြီးက ပြောသည်။

၂၀၂၃ ခုနှစ်၊ မေလ ၂ ရက်က တရုတ်နိုင်ငံခြားရေးဝန်ကြီးဖြစ်သူ မစ္စတာကျင်ဂန်းနဲ့ ဗိုလ်ချုပ်မှူးကြီးမင်းအောင်လှိုင် တွေ့ဆုံစဉ်

နှစ် ၇၀ နီးပါးကြာ သံတမန် ဆက်ဆံရေး စတင်ခဲ့သည့် ကာလတစ်လျှောက်လုံးတွင် နှစ်နိုင်ငံကြား ဖွံ့ဖြိုးတိုးတက်မှု အရှိန်ကို အစဉ်အမြဲ ထိန်းသိမ်းကာ ကောင်းမွန်သော ရလဒ်များ ရရှိခဲ့သည်ဟု မြန်မာခေါင်းဆောင် ဗိုလ်ချုပ်မှူး ကြီး မင်းအောင်လှိုင်က ပြောသည်။

CGTN ၏ ဖော်ပြချက်တွင် ဗိုလ်ချုပ်မှူးကြီးမင်းအောင်လှိုင်အား မြန်မာခေါင်းဆောင်ဟု ရည်ညွန်းထားသည်ကိုလည်း တွေ့ရသည်။

ဗိုလ်ချုပ်မှူးကြီးမင်းအောင်လှိုင်က “မြန်မာနိုင်ငံအနေဖြင့် နှစ်နိုင်ငံကြား မိတ်ဖက် ဆက်ဆံရေးနှင့် ပူးပေါင်း ဆောင်ရွက်မှုတို့ကို မြှင့်တင်ရန်နှင့် အနာဂတ်ကို မျှဝေပိုင်ဆိုင်ထားသည့် မြန်မာ-တရုတ် အသိုက်အဝန်းကို တည်ထောင်သွားလိုသည်”ဟု ပြောသည်။

မြန်မာနိုင်ငံနှင့် ပတ်သက်သည့် ကိစ္စများတွင် တရုတ်နိုင်ငံ၏ မျှတ၍ ဘက်မလိုက်သော ရပ်တည်ချက်အတွက် ကျေးဇူးတင်ကြောင်းလည်း ၎င်းက ပြောခဲ့သည်။

Source: CGTN

CNI International News

ဘရာစီးလီးယား၊ မေလ ၄

ကိုဗစ် ၁၉ ရောဂါ ကာကွယ်ဆေး ထိုးခြင်းဆိုင်ရာ စာရွက်စာတမ်းများ အတုပြုလုပ်မှုအတွက် စုံစမ်းစစ်ဆေးမှု အစိတ်အပိုင်း တစ်ခုအဖြစ် ဘရာဇီးလ်ရဲတပ်ဖွဲ့က သမ္မတဟောင်း ဂျဲလ်ဘော်ဆိုနာရို၏ နေအိမ်ကို စီးနင်း ရှာဖွေ ခဲ့သည်ဟု Al Jazeera သတင်းတွင် ဖော်ပြသည်။

ပြည်သူ့ကျန်းမာရေး စနစ်တွင်းသို့ ကာကွယ်ဆေးဆိုင်ရာ အချက်အလက် အမှားများ ထည့်သွင်းခဲ့သည်ဟု ယူဆ ရသည့် ရာဇဝတ်မှု အဖွဲ့တစ်ခုကို ပစ်မှတ်ထားကာ မြို့တော် ဘရာစီးလီးယား (Brasillia)နှင့် ရီယိုဒီဂျနေ ရိုး (Rio de Janeiro) မြို့တို့တွင် စီးနင်းရှာဖွေမှု ၁၆ ခု ပြုလုပ်ခဲ့သည်ဟု ဖက်ဒရယ်ရဲတပ်ဖွဲ့က ဗုဒ္ဓဟူးနေ့မှာ ထုတ်ပြန် သည့် ကြေညာချက် တစ်စောင်တွင် ဖော်ပြထားသည်။

ယင်းတွင် ဘော်ဆိုနာရို၏ အမည်အား သီးသန့် ဖော်ပြထာခြင်းတော့ မရှိပေ။

ကာကွယ်ဆေး လက်မှတ်အတုများသည် ၂၀၂၁ ခုနှစ်၊ နိုဝင်ဘာလနှင့် ပြီးခဲ့သည့်နှစ် ဒီဇင်ဘာလအတွင်း ပေါ်ပေါက် လာခဲ့ကာ တစ်ဦးချင်းစီ၏ ကာကွယ်ဆေးထိုးမှု၊ မထိုးမှုဆိုင်ရာ အမှန်တကယ် အခြေအနေ တစ်ရပ်လုံးကို မေးခွန်း ထုတ်စရာ ဖြစ်စေခဲ့သည်ဟု ရဲတပ်ဖွဲ့က ပြောသည်။

သမ္မတဟောင်း ဂျဲလ်ဘော်ဆိုနာရိုနဲ့ သမ္မတသစ် လူလာဒါဆေးဗားကိုတွေ့ရစဉ်

ရလဒ်အနေဖြင့် ဘရာဇီးလ်၊ အမေရိကန် အာဏာပိုင်များက ချမှတ်ထားသော ကျန်းမာရေးဆိုင်ရာ ကန့်သတ်ချက် များကို ရှောင်လွဲနိုင်ရန်အတွက် ကာကွယ်ဆေး လက်မှတ်များ ထုတ်လုပ်မှုကို ဖြစ်စေခဲ့သည်ဟု ကြေညာချက်တွင် ပါဝင်သည်။
ကာကွယ်ဆေး လက်မှတ်ဆိုင်ရာ စုံစမ်းစစ်ဆေးမှုသည် လက်ယာစွန်း ခေါင်းဆောင်ဟောင်း ရင်ဆိုင်နေရသည့် စုံစမ်းစစ် ဆေးမှုများမှ တစ်ခုဖြစ်သည်။

ဘော်ဆိုနာရိုသည် ကိုဗစ် ၁၉ နှင့် ပတ်သက်သည့် သတင်းများကို လက်မခံသူဖြစ်ကာ သမ္မတအဖြစ် ဆောင်ရွက် စဉ်အချိန်ကလည်း ဗိုင်းရပ်စ်၏ အန္တရာယ်နှင့် ပတ်သက်၍ မကြာခဏ ဆိုသလို လျှော့ပေါ့ ပြောဆိုခဲ့ပြီး ပြည်သူ့ ကျန်းမာရေးဆိုင်ရာ ကန့်သတ်ချက်များကိုလည်း လိုက်နာရန် ငြင်းဆန်ခဲ့သည်။

ယခု စုံစမ်းစစ်ဆေးမှုက ရောဂါ ကာကွယ်ဆေး မထိုးဟု ကတိပြုထားသည့် ဘော်ဆိုနာရို တစ်ယောက် ဖေဖော်ဝါရီလတွင် လူသိရှင်ကြား ထုတ်ပြန်ခဲ့သည့် ကျန်းမာရေးမှတ်တမ်း၌ မည်ကဲ့သို့ ကာကွယ်ဆေး ထိုးပြီး ကြောင်း သတ်မှတ် ခံထားရသလဲဆိုသည့် မေးခွန်းကိုလည်း ဖြေရှင်းပေးနိုင်မည်ဟု ယူဆရသည်။

ဂျွန်ဟော့ကင်းစ် တက္ကသိုလ်မှ အချက်အလက်များအရ ဘရာဇီးလ်တွင် ကိုရိုနာဗိုင်းရပ်စ်ကြောင့် လူ ၇၀၀,၀၀၀ ခန့် သေဆုံးခဲ့ကာ အမေရိကန်ပြီးနောက် ဒုတိယအများဆုံး ဖြစ်သည်။

သတင်းထောက်များနဲ့ တွေ့ဆုံနေတဲ့ ဘော်ဆိုနာရို

ဘော်ဆိုနာရို အစိုးရသည်လည်း ကူးစက်ရောဂါ ပျံ့နှံ့မှုကို ကိုင်တွယ်ပုံနှင့် ပတ်သက်၍ ဝေဖန်မှုများ၊ အကြီး အကျယ် ဆန္ဒပြမှုများဖြင့် ရင်ဆိုင်ခဲ့ရသည်။

ဗုဒ္ဓဟူးနေ့က နေအိမ်အပြင်ဘက်တွင် သတင်းထောက်များနှင့် စကားပြောရာ၌ ဘော်ဆိုနာရိုက ရှာဖွေမှုကြောင့် အံ့သြခဲ့ရကြောင်း၊ ၎င်းအနေဖြင့် ကာကွယ်ဆေး လုံးဝ ထိုးခဲ့ခြင်း မရှိကြောင်း ပြောခဲ့သည်။

၎င်းအနေဖြင့် အတုမလုပ်ခဲ့ကြောင်း၊ ကာကွယ်ဆေးလည်း မထိုးခဲ့ကြောင်း ပြော၍ ရဲများသည် ဖုန်းအား သိမ်းယူသွားသည်ဟုလည်း သမ္မတဟောင်းက ပြောသည်။

ဘရာဆီးလီးယားရှိ ဘော်ဆိုနာရို၏ ကွန်ဒိုအား ရဲများက ဝင်ရောက် ရှာဖွေနေခြင်းကို ဘရာဇီးလ် ရုပ်သံတွင် ဖော်ပြခဲ့ကာ ဘော်ဆိုနာရို၏ လက်ထောက်နှစ်ဦးကို ရဲတပ်ဖွဲ့က ဖမ်းဆီးခဲ့သည်ဟု ယခု စီးနင်းမှုနှင့် နီးစပ်သူများ က ပြောသည်။
ဘော်ဆိုနာရိုသည် ဒီဇင်ဘာလ နှောင်းပိုင်းတွင် အမေရိကန်သို့ ထွက်ခွာခဲ့ကာ မတ်လ၌ ဘရာဇီးလ်သို့ ပြန်မလာ ခင် အမေရိကန်တွင် သုံးလကြာ နေထိုင်ခဲ့သည်။

ဘရာဇီးလ် သမ္မတဟောင်းသည် နိုင်ငံ၏ ရွေးကောက်ပွဲစနစ်အား တိုက်ခိုက်မှု၊ နိုင်ငံခြား လက်ဆောင်ပစ္စည်းများ ကို ကိုယ်ကျိုးအတွက် သုံးစွဲမှု စသည့် စွပ်စွဲချက်များနှင့်လည်း ရင်ဆိုင်နေရသူ ဖြစ်သည်။

Source: Aljazeera

CNI International News

ဘန်ကောက်၊ မေလ- ၄

ထိုင်းနိုင်ငံသို့ မကြာခင် ပြန်လာမည့် ကိစ္စနှင့် ပတ်သက်သည့် ပြည်ပြေး ဝန်ကြီးချုပ်ဟောင်း သက်ဆင်ရှင်နာဝပ် ထရာ (Thaksin Shinawatra) ၏ တွစ်တာပို့စ် တစ်ခုသည် နိုင်ငံရေးပါတီများထံမှ မတူညီသော တုံ့ပြန်မှုများကို ရရှိခဲ့သည်ဟု Bangkok Post သတင်းတွင် ဖော်ပြသည်။

သက်ဆင်သည် ၎င်း၏ဆန္ဒအလျှောက် ထိုင်းနိုင်ငံပြင်ပတွင် ကာလအတန်ကြာ နေထိုင်နေသူ ဖြစ်သည်။

သက်ဆင်အနေဖြင့် ထိုင်းဥပဒေအား လေးစားလိုက်နာ နေသရွေ့ ၎င်း၏ ပြည်တော်ပြန် ခရီးသည် ကြာမြင့်နေဦး မည်ဟု ဘွမ်ဂျိုင်ထိုင်း (Bhumjaithai)ပါတီ ခေါင်းဆောင် အနူတင် ချန်ဗီရာကူလ် (Anutin Charnvirakul) က အင်္ဂါနေ့တွင် ပြောခဲ့သည်။

တနင်္လာနေ့တွင် ရေးသားခဲ့သော သက်ဆင်၏ နောက်ဆုံး တွစ်တာပို့စ်တွင် အသက် ၇၃ နှစ်အရွယ်ရှိ ဝန်ကြီးချုပ် ဟောင်းက ၎င်းအနေဖြင့် မြေးများကို စောင့်ရှောက်ရန် ထိုင်းသို့ ပြန်လာချင်သည်ဟု ရေးသားထားသည်။

ထိုပြောဆိုမှုက MFP အား ပြည်သူ့ထောက်ခံမှုကို ထိခိုက်စေမည်ဟု မထင်ကြောင်း Move Forward Party (MFP) ၏ ပြောခွင့်ရပုဂ္ဂိုလ် ရန်းဆီမာ ရို့စ် (Rangsima Rome) က ပြောသည်။

လက်ရှိ ထိုင်းဝန်ကြီးချုပ် ပရာယွတ်ချန်အိုချာကိုတွေ့ရစဉ်

သက်ဆင်ကို ချစ်ကြသူ များစွာရှိကြောင်း၊ သက်ဆင်၏ ပြောစကားသည် ၎င်းတို့ပေါ်တွင်သာ အကျိုးသက်ရောက် မှုရှိကြောင်း၊ ယင်းသည် နိုင်ငံရေးဖြစ်စဉ် တစ်ခု ဖြစ်လာရန်အတွက် လုံလောက်မှု ရှိသည်ဟု မထင်ကြောင်း ၎င်းက ပြောသည်။

သက်ဆင်၏ ပြည်တော်ပြန် ခရီးစဉ်သည် မည်သည့်ပါတီက အစိုးရသစ်ကို ဦးဆောင်မည်လဲ ဆိုခြင်းနှင့် များစွာ သက်ဆိုင်နေသည်ဟုလည်း ရို့စ်က ပြောသည်။

United Thai Nation Party (UTN) ၏ မဟာဗျူဟာ အကြီးအကဲ ထာနာကွန်း ဝမ်ဘွန်ခေါင်ချနာ (Thanakorn Wangloonkongchana) ကလည်း သက်ဆင်အနေဖြင့် ထိုင်းနိုင်ငံသို့ ပြန်လာချင်သည်ဟု ပြောလေလေ၊ ပြည်သူ များ အနေဖြင့် ဝန်ကြီးချုပ် ပရာ ယွတ်ချန်အိုချာ (Prayut Chan-o-cha) အား မည်မျှ သတိရကြောင်း ပြသ လေလေ ဖြစ်လိမ့်မည်ဟု မှတ်ချက်ပြုသည်။

လက်ရှိ အချိန်မှစ၍ မဲဆန္ဒရှင်များကြားတွင် ဖြူးထိုင်း (Pheu Thai) ပါတီအား ထောက်ခံသူနှင့် ဗိုလ်ချုပ်ကြီး ပရာယွတ်အား ထောက်ခံသူဟု၍ နှစ်ပိုင်းကွဲသွားပြီဟုလည်း ထာနာကွန်းက ပြောသည်။

ဖြူးထိုင်းပါတီက သက်ဆင်ရဲ့ သမီး ပေတုန်တန်ကိုတွေ့ရစဉ်

တစ်ဖက်တွင်လည်း ညီညွတ်သော ရှပ်နီ ဒီမိုကရေစီ တပ်ဦး ( red-shirt United Front for Democracy) ၏ ဥက္ကဋ္ဌဖြစ်သူ ဂျာတူပွန်ပရွမ်ပန် (Jatuporn Prompan) က သက်ဆင်အား ထိုင်းသို့ ပြန်လာရန်အတွက် မည်သည့် အရာကမှ တားဆီးထားခြင်း မရှိဟု ပြောသည်။

၎င်းသည် ဖြူးထိုင်းပါတီအား ဝေဖန်သူများမှ တစ်ဦးလည်းဖြစ်သည်။

သက်ဆင် အနေဖြင့် ထိုင်းကို အချိန်မရွေး ပြန်လာနိုင်ခြင်းကြောင့် ပြန်လာခွင့်အတွက် ခွင့်ပြုချက် တောင်းရန် မလိုအပ်ကြောင်း၊ လူဝင်မှုကြီးကြပ်ရေး ရဲတပ်ဖွဲ့က ၎င်းအား ဘန်ကောက် ရီမန်းထောင် (Bangkok Remand Prison) သို့ ခြံရံလိုက်ပို့ လိမ့်မည်ဖြစ်ကြောင်း ပြောခဲ့သည်။

Source: ဘန်ကောက်ပို့စ်

CNI International News

ကန်ဘာယာ၊ မေလ ၄

တရုတ်နှင့် စစ်ဖြစ်ခဲ့လျှင် ထိုင်ဝမ်အနေဖြင့် ၎င်းတို့ဘာသာ တိုက်ခိုက်သွားရန် ရည်ရွယ်ထားကြောင်း၊ ၎င်းတို့ ဘေးတွင် မည်သည့်နိုင်ငံက ဝင်ရောက် ရပ်တည်ပေးမည်လဲ ရှင်းရှင်းလင်းလင်း မသိရှိထားကြောင်း ထိုင်ဝမ် နိုင်ငံခြားရေးဝန်ကြီးက ပြောခဲ့သည်ဟု AP သတင်းမှ ဖော်ပြခဲ့သည်။

တရုတ်သည် ထိုင်ဝမ်အား ၎င်းတို့နယ်မြေအဖြစ် သတ်မှတ်ကာ လိုအပ်ပါက အင်အားသုံး ထိန်းချုပ်သွားမည်ဟု ပြောထားသည်။

ထို့ကြောင့် စစ်ပွဲတစ်ခု ပေါ်ပေါက်လာနိုင်ခြေနှင့် ပတ်သက်သည့် စိုးရိမ်မှုများလည်း မြင့်တက်လာခဲ့သည်။

Sky News Australia နှင့် အင်တာဗျူး တစ်ခုတွင် နိုင်ငံခြားရေးဝန်ကြီး ဂျိုးဆက်ဝူ (Joseph Wu)က ထိုင်ဝမ် အနေဖြင့် မိမိကိုယ်ကို ကာကွယ်ရမည်ဖြစ်ကြောင်း၊ ၎င်းတို့အတွက် တိုက်ခိုက်ပေးရန် တခြားနိုင်ငံများကို အကူအညီ တောင်းမည် မဟုတ်ဟု ပြောသည်။

တရုတ်နိုင်ငံဆိုင်ရာ အမေရိကန် သံအမတ် နီကိုလပ်စ် ဘန်းစ်ကိုတွေ့ရစဉ်

တရုတ်နှင့် စစ်ဖြစ်ခဲ့လျှင် ၎င်းတို့ဘေး၌ မည်သည့်နိုင်ငံ ရှိနေမည်လဲဟု ထပ်မံ မေးမြန်းရာတွင် ဝူက မဟာဗျူဟာ ပိုင်းဆိုင်ရာ ပြတ်သားမှု၊ မပြတ်သားမှုနှင့် ပတ်သက်၍ လူပေါင်းများစွာက ငြင်းခုံနေကြကြောင်း၊ ၎င်းတို့ အနေဖြင့် မိမိတာဝန်ကို သိရှိသဘောပေါက်ကြောင်း ပြန်လည်ဖြေကြားခဲ့သည်။

ထိုင်ဝမ်သားများအနေဖြင့် မိမိကိုယ်ကို ကာကွယ်ရမည်ဖြစ်ကြောင်း၊ ကာကွယ်ရန်လည်း ဆုံးဖြတ်ထားကြောင်း၊ ထိုင်ဝမ်အတွက် တိုက်ခိုက်ပေးရန် တခြားနိုင်ငံများကို အကူအညီ တောင်းဆိုသွားမည် မဟုတ်ကြောင်း ပြောသည်။

အမေရိကန် တပ်ဖွဲ့များက ထိုင်ဝမ်ကို ကာကွယ်ရေး ပါဝင်ကူညီသွားမည်ဟု အမေရိကန်သမ္မတ ဂျိုးဘိုင်ဒန် (Joe Biden) က မကြာခဏ ပြောဆိုခဲ့သော်လည်း တပ်ဖွဲ့များ စေလွှတ်ရေးနှင့် ပတ်သက်၍ အမေရိကန်၏ တရားဝင် မူဝါဒသည် ပြတ်သားမှု မရှိသေးပေ။

အမေရိကန်၏ ထိုင်ဝမ်နှင့် ပတ်သက်သည့် ချဉ်းကပ်မှုသည် မပြောင်းလဲကြောင်း၊ ထိုင်ဝမ် ရေလက်ကြား တစ်လျှောက် မပြေလည်မှုများကို ငြိမ်းချမ်းစွာ အဖြေရှာရမည်ဖြစ်ကြောင်း တရုတ်နိုင်ငံဆိုင်ရာ အမေရိကန် သံအမတ် နီကိုလပ်စ် ဘန်းစ် (Nicholas Burns) က ပြောခဲ့သည်။

သြစတြေးလျ ကာကွယ်ရေးဝန်ကြီး ရတ်ချက် မားလက်စ်ကိုတွေ့ရစဉ်

အမေရိကန် အနေဖြင့် ထိုင်ဝမ်အား ကာကွယ်ရေး လက်နက်များ ထောက်ပံ့ရန် တာဝန်နှင့် စိတ်ဝင်စားမှုရှိ ကြောင်း၊ ယင်းက ထိုင်ဝမ် အာဏာပိုင်များအတွက် သင့်တော်သော ကာကွယ်မှုကို ဖြစ်စေပြီး အမေရိကန်အနေ ဖြင့် အဟန့်အတားတစ်ခု တည်ဆောက်ရေး ကူညီသွားမည်ဖြစ်ကြောင်းလည်း ၎င်းက ပြောသည်။

ထိုင်ဝမ်အနေဖြင့် သင့်တော်သော အဟန့်အတား တစ်ခု ရှိထားလျှင်၊ ကမ္ဘာ့နိုင်ငံများ အနေဖြင့် ငြိမ်းချမ်းသော အဖြေတစ်ခုကို ထောက်ပံ့ပေးနိုင်လျှင် ယင်းက ထိုင်ဝမ် ရေလက်ကြားတွင် အင်အား အသုံးပြုခြင်းနှင့် ပတ် သက်သည့် အကျိုးဆက်များအပေါ် တရုတ်အနေဖြင့် နားလည် လာနိုင်သည်ဟုလည်း ၎င်းက ပြောသည်။

သြစတြေးလျ အနေဖြင့်လည်း အမေရိကန်၏ နျူကလီးယား စွမ်းအင်သုံး ရေငုပ်သင်္ဘောများ ရရှိရန် သဘောတူညီချက်တွင် ထိုင်ဝမ်အရေး ပဋိပက္ခများ၌ အမေရိကန်အား ဝင်ရောက်ကူညီပေးရန် ကတိကဝတ် ပြုထားခြင်းမရှိဟု သြစတြေးလျ ကာကွယ်ရေးဝန်ကြီး ရတ်ချက် မားလက်စ် (Richard Marles)က ပြောသည်။

Source:AP

CNI International News

ကိယတ်ဗ်၊ မေလ ၄

ဗုဒ္ဓဟူးနေ့ အစောပိုင်းတွင် ကရင်မလင်အား ယူကရိန်းဘက်မှ ဒရုန်းဖြင့် တိုက်ခိုက်မှုကို ကြားဖြတ် ရှင်းလင်းခဲ့ရ ကြောင်း၊ ယင်းသည် သမ္မတ ဗလာဒီမာပူတင် (Vladimir Putin) အား လုပ်ကြံမှုဖြစ်ကာ အကြမ်းဖက် လုပ်ရပ် အတွက် လက်တုံ့ပြန်သွားမည်ဟု ကတိပေးကြောင်း ရုရှားဘက်က ထုတ်ပြန်ခဲ့သည်။

သို့သော် ပူတင် သို့မဟုတ် ရုရှားနိုင်ငံအား တိုက်ခိုက်ခဲ့ခြင်းမရှိဟု ယူကရိန်းသမ္မတက ငြင်းဆန်ခဲ့ကြောင်း AP သတင်းမှ ဖော်ပြခဲ့သည်။

တိုက်ခိုက်မှု ဖြစ်ပွားချိန်တွင် ပူတင်သည် ကရင်မလင်၌ ရှိမနေဘဲ မော်စကိုမြို့ပြင်ရှိ ၎င်း၏ Novo-Ogaryovo အိမ်၌ရှိနေခဲ့ကြောင်း ပြောခွင့်ရပုဂ္ဂိုလ် ပတ်စ်ကော့ဗ် (Peskov) က ရုရှားနိုင်ငံပိုင်ရုပ်သံသို့ ပြောခဲ့သည်။

ကရင်မလင်အား တိုက်ခိုက်မှုသည် ဗုဒ္ဓဟူးနေ့ ညဘက်တွင် ဖြစ်ပွားခဲ့သည်ဟု ရုရှားအာဏာပိုင်များက ပြောသော် လည်း ထိုအခြေအနေနှင့် ပတ်သက်၍ လွတ်လပ်စွာ အတည်ပြုမှု မရှိသေးသလို သက်သေလည်း မပြသေးပေ။

တိုက်ခိုက်မှုနှင့် ပတ်သက်၍ အဘယ့်ကြောင့် နောက်ကျမှ ထုတ်ပြန်သလဲဟု မေးခွန်းများလည်း ပေါ်ထွက် လာနေသည်။

ထို့နောက် တိုက်ခိုက်ခံရမှု ဗွီဒီယိုဖိုင်ကိုလည်း မည်သည့်အတွက်ကြောင့် ချက်ချင်း မထုတ်ပြန် သလဲဟု မေးခွန်းများ ထွက်ပေါ်နေသည်။

ရုရှား သတင်းဌာနများတွင် တင်ထားသော ဗွီဒီယိုတစ်ခု၌ အဆောက်အဦများ ပေါ်တွင် မီးခိုးများ ထွက်နေသည်ကို မြင်တွေ့ခဲ့ရသည်။

ဇာလန်းစကီးကိုတွေ့ရစဉ်

သို့သော် ယင်းသည် အစစ်အမှန် ဟုတ်/မဟုတ်ကိုမူ အတည်မပြုနိုင်သေးပေ။

ဗွီဒီယိုတွင် ပါဝင်သော စာများတွင်လည်း အနီးအနားရှိ ဒေသခံများသည် မနက် ၂ နာရီ ၃၀ မိနစ်ခန့်တွင် ပေါက်ကွဲသံများကို ကြားခဲ့ပြီး မီးလောင်မှုအား မြင်တွေ့ခဲ့ရသည်ဟု ရေးသားထားသည်။

လူမှုကွန်ယက်တွင် ထွက်ပေါ်နေသည့် နောက်ထပ် ဗွီဒီယိုတစ်ခုတွင်လည်း ကရင်မလင်ရှိ ဆီးနိတ် နန်းတော်၏ အမိုးပေါ်တွင် ဒရုန်းတစ်ခု မီးလောင် ပျက်စီးသွားသည်ကို တွေ့ခဲ့ရသည်။

ရုရှား၏ သုံးရောင်ချယ် အလံလွှင့်ထူထားသည့် အလံတိုင် တစ်ခုအနီးတွင်ဖြစ်ကာ အပျက်အစီးများ အမိုးပေါ် ကျလာသည်ကိုလည်း တွေ့ရသည်။ သို့သော် ယင်းကိုလည်း စစ်မှန်ကြောင်း အတည်မပြုနိုင်သေးပေ။

တိုက်ခိုက်မှု တစ်စုံတစ်ရာ မလုပ်ခင် ရုရှားစစ်တပ်နှင့် လုံခြုံရေးတပ်ဖွဲ့များက ဒရုန်းကို တားဆီးနိုင်ခဲ့ကြောင်း၊ မည်သူမှ ထိခိုက်မှု မရှိခဲ့ကြောင်း ကရင်မလင်ဘက်က ပြောသည်။

ဒရုန်း၏ အပျက်အစီးများသည်လည်း ကရင်မလင်ထဲသို့ ကျရောက်ခဲ့ကြောင်း စစ်တပ်၏ တရားဝင် ဝက်ဘ်ဆိုဒ်တွင် ရေးသားထားသည်။

သို့သော် ယူကရိန်းဘက်က မည်သည့် တိုက်ခိုက်မှုမှ မလုပ်ခဲ့ဟု သမ္မတ ဇာလန်းစကီးက ပြောသည်။

ရုရှား တိုက်ခိုက်မှုကြောင့် ပျက်စီးနေတဲ့ ယူကရိန်းအတွင်းက အဆောက်အဦများ

နော်ဒစ် (Nordic) ၅ နိုင်ငံမှ ခေါင်းဆောင်များနှင့် ဆွေးနွေးရန်အတွက် ဟယ်လ်ဆင်ကီ (Helsinki)သို့ ရောက်နေချိန် ပြောခဲ့ခြင်း ဖြစ်သည်။

ပူတင် သို့မဟုတ် မော်စကိုအား တိုက်ခိုက်ခဲ့ခြင်း မရှိကြောင်း၊ မိမိ၏ နယ်မြေအတွက်သာ တိုက်ခိုက်ကြောင်း၊ မိမိပိုင် ကျေးရွာများနှင့် မြို့များကိုသာ ကာကွယ်နေခြင်း ဖြစ်ကြောင်းလည်း ဇာလန်းစကီးက ပြောသည်။

ရုရှားအနေဖြင့် ယူကရိန်းမြို့ကြီးများရှိ အရပ်သား ဧရိယာများနှင့် အခြေခံ အဆောက်အဦများအား အပြင်းအထန် တိုက်ခိုက်ခဲ့မှုကို အကြောင်းပြချက်ပေးရန်အတွက် လုပ်ဇာတ်ထွင် နေခြင်းဟုလည်း ယူကရိန်းသမ္မတ အကြံပေးက ပြောသည်။

ရုရှားဘက်က ပြောစကား၏ မှန်ကန်မှုကို အတည်ပြုရန် မဖြစ်နိုင်သေးကြောင်းလည်း အိမ်ဖြူတော်ဘက်က ထုတ်ပြန်သည်။

Source: AP

CNI International News

အက်ဆန်စီယွန်၊ မေလ ၂

ပါရာဂွေး ရွေးကောက်ပွဲတွင် ဆန်တီယာဂို ပီနာ (Santiago Pena) အနိုင်ရရှိခြင်းက ထိုင်ဝမ်အရာရှိများအတွက် အားတက်စရာ သတင်းဖြစ်သည်ဟု Reuters သတင်းတွင် ဖော်ပြထားသည်။

ထိုင်ဝမ်တွင် ကမ္ဘာတစ်ဝန်းလုံး၌ မဟာမိတ် ၁၃ နိုင်ငံသာရှိပြီး ပါရာဂွေး အပါအဝင် ထိုနိုင်ငံများနှင့် ဆက်ဆံရေးကို ထိန်းသိမ်းရန်အတွက် တရုတ်၏ အင်အားမမျှတသော စီးပွားရေးဆိုင်ရာ အားပြိုင်မှုနှင့် ရင်ဆိုင်နေရသည်။

တနင်္ဂနွေနေ့ သမ္မတရွေးကောက်ပွဲတွင် အနိုင်ရရှိခဲ့သော ပီနာသည် ရွေးကောက်ပွဲအတွက် မဲဆွယ်မှုများတွင် ထိုင်ဝမ်နှင့် ပါရာဂွေးတို့၏ နှစ် ၇၀ နီးပါး သံတမန်ဆက်ဆံရေးကို ဆက်လက် ထိန်းသိမ်းသွားမည်ဟု အစဉ်တစိုက် ပြောကြားခဲ့သည်။

ထိုင်ဝမ်သည် ဒီမိုကရေစီနည်းကျ အုပ်ချုပ်သော နိုင်ငံဖြစ်သော်လည်း တရုတ်ဘက်က ယင်းကို ၎င်းတို့အပိုင်ဟု ပြောဆိုထားသည်။

ထိုင်ဝမ်ကို တွေ့ရစဉ်

သို့သော် တိုင်းပြည်၏ စီးပွားရေး အခြေအနေကြောင့် ပီနာ၏ ဦးစားပေးမှုသည် ပြောင်းလဲလာလိမ့်မည်ဟု အတိုက် အခံ အက်ဖ်ရိန် အယ်လီဂရီ (Efrain Alegre)က ပြောသည်။ နိုင်ငံ၏ စီးပွားရေးနှင့် ပို့ကုန်တို့အတွက် အဓိက အရေးပါသော ပဲနှင့် အမဲသားတို့အတွက် တရုတ်၏ ကြီးမားသော ဈေးကွက်အတွင်း ဝင်ရောက်ခွင့် ရရန် ရပ်တည် ချက် ပြောင်းလဲရလိမ့်မည်ဟု ခန့်မှန်းခြင်း ဖြစ်သည်။

ပီနာ၏ အောင်ပွဲသည် ထိုင်ဝမ်အတွက် စိတ်သက်သာဖွယ်ဖြစ်ကြောင်း၊ ယင်းက လွယ်ကူသော ရွေးချယ်မှုကို ဖြစ် စေကြောင်း အမည်မဖော်လိုသည့် ဥရောပသံတမန်တစ်ဦးက ပြောသည်။

ပါရာဂွေးရှိ ထိုင်ဝမ်သံရုံးကလည်း ပီနာ၏ အောင်ပွဲအတွက် ဂုဏ်ပြုကြောင်း ပြောဆိုခဲ့ကာ နှစ်နိုင်ငံကြား အကျိုးရှိ သော ဆက်ဆံရေးကို ဆက်လက် ထိန်းသိမ်းသွားမည်ဟု ပြောသည်။

သို့သော် ပါရာဂွေးအတွက် ၎င်းတို့၏ ရပ်တည်ချက်ကို ပြောင်းလဲရန် ဖိအားများမှာ မြင့်တက်လာဖွယ် ရှိနေသည်။

အထူးသဖြင့် တရုတ်၏ ဈေးကွက်များအတွင်းသို့ ပါရာဂွေး ထုတ်ကုန် ပဲနှင့် အမဲသားများကို ရောင်းချခွင့် ရလိုမှု ကြောင့် ဖြစ်သည်။

ရွေးကောက်ပွဲ အနိုင်ရသည့် ဆန်တီယာဂို ပီနာကိုတွေ့ရစဉ်

လက်ရှိ အနေအထားကို သိရှိအောင် ဆက်လက် လုပ်ဆောင်သွားမည်ဖြစ်ပြီး ဖြစ်လာနိုင်ဖွယ် ဆုံးရှုံးမှုများအတွက် ပြင်ဆင်ထားရမည်ဖြစ်ကြောင်း ပါရာဂွေး ကျေးလက်ဒေသအဖွဲ့မှ ခေါင်းဆောင်တစ်ဦးက ပြောသည်။

ပီနာ၏ ရွေးကောက်ပွဲ ရလဒ် ထွက်ပေါ်လာပြီးနောက် မကြာခင် ထိုသို့ ပြောဆိုခဲ့ခြင်းဖြစ်ကာ အဖွဲ့၏ တရုတ် လိုလားသော ရပ်တည်ချက်သည်လည်း ခိုင်မာနေ ဦးမည်ဟု ပြောသည်။

ပီနာ၏ ရွေးကောက်ပွဲ နိုင်ရရှိမှု၊ လက်ရှိ အာဏာရ ကွန်ဆာဗေးတစ်များ၏ လွှတ်တော်အတွင်း အင်အား ကောင်းမှု တို့က ပါရာဂွေးနိုင်ငံ၏ နိုင်ငံခြားရေးမူဝါဒဆိုင်ရာ ပြောင်းလဲမှုအတွက် မျှော်လင့်ချက်များကို လျော့ပါး စေသည်ဟု လည်း ၎င်းက ပြောသည်။

ပါရာဂွေးတွင် အခွန်လိုငွေပြမှုနှင့် စီးပွားရေး တိုးတက်မှုရှိရန် လိုအပ်နေခြင်းကြောင့် ပီနာ၏ ထိုင်ဝမ်အား ထောက်ခံမှုသည် ဖိအားများ ဖြစ်စေလိမ့်မည်ဟု လေ့လာသူများက ပြောသည်။

ပီနာသည် လက်ရှိသမ္မတ မာရီယို အက်ဘ်ဒို (Mario Abdo) ကဲ့သို့ အခြေအနေမျိုး ရှိလိမ့်မည် မဟုတ်ဟုလည်း သုံးသပ်ခံထားရသည်။

Source: Reuters

CNI International News

ကိယက်ဗ်၊ မေလ ၂

တနင်္လာနေ့တွင် ရုရှားဘက်က ယူကရိန်းသို့ ရက်ပိုင်းအတွင်း ဒုတိယမြောက် အင်အားပြင်း ဒုံးကျည်များဖြင့် ပစ်ခတ် တိုက်ခိုက်မှုကြောင့် မြို့တော် ကိယက်ဗ် (Kyiv) သို့ ထိမှန်ခြင်း မရှိသော်လည်း အရှေ့ဘက် ပက်ဗ်လို ရတ်ဒ် (Pavlohrad) မြို့တွင် အဆောက်အဦးများ ပျက်စီး၍ လူနှစ်ဦး သေဆုံးကာ ၄၀ နီးပါး ဒဏ်ရာရရှိခဲ့သည်ဟု အရာရှိများကပြောကြောင်း အေပီသတင်းတွင် ဖော်ပြသည်။

ဒုံးကျည်များကို ယူရိန်းလေကြောင်း ကာကွယ်ရေးများက ကြားဖြတ်ပစ်ချမှုကြောင့် ပေါက်ကွဲမှုများ ပေါ်ပေါက်ခဲ့ပြီးနောက် မြို့တော်ကိယက်ဗ်တွင် မနက် ၃ နာရီ ၄၅ မိနစ်၌ လေကြောင်း အချက်ပေးသံများဖြင့် ဆူညံခဲ့သည်။

မားမန့်ခ် (Murmansk)နှင့် ကစ္စပီယံ (Caspian) ဒေသတို့မှ ခရုစ်ဒုံးကျည် ၁၈ လုံးဖြင့် ပစ်ခတ်ခဲ့ခြင်း ဖြစ်သည်။

ထိုပစ်ခတ်ခဲ့မှုအတွင်း ဒုံးကျည် ၁၅ လုံးကို ကြားဖြတ် ပစ်ချနိုင်ခဲ့သည်ဟု ယူကရိန်းစစ်ဦးစီးချုပ်က ပြောသည်။

အဆိုပါ ပစ်ခတ်မှု မတိုင်ခင် သောကြာနေ့တွင်လည်း ရုရှားတို့က ဒုံးကျည်အလုံး ၂၀၊ ဖောက်ခွဲရေးဒရုန်း နှစ်စင်းတို့ ဖြင့် ပစ်ခတ် တိုက်ခိုက်ခဲ့ရာ လူ ၂၁ ဦး သေဆုံးခဲ့ရသည်။

ယူကရိန်းစစ်သား ရှေ့တန်းတစ်နေရာမှာ ပခုံးထမ်း လောင်ချာဖြင့် ပစ်ခတ်နေစဉ်

တနင်္လာနေ့က တိုက်ခိုက်မှုသည် အရှေ့ဘက် ဒီနီပရိုပီးထရော့ခ် (Dnipropetrovsk) ဒေသရှိ ပတ်ဗ်လိုရတ်ဒ်သို့ ထိမှန်ခဲ့ကာ လူနှစ်ဦးသေပြီး ၄၀ နီးပါး ဒဏ်ရာရခဲ့သည်ဟု ယူကရိန်းသမ္မတက ထုတ်ပြန်သည်။

မြို့သို့ ဒုံးကျည် ၇ လုံး ပစ်ခဲ့ကာ တစ်ချို့ကို ကြားဖြတ်နိုင်ခဲ့သော်လည်း စက်မှုဇုန်အတွင်း ထိမှန်ခဲ့မှုကြောင့် မီးလောင်မှု ဖြစ်ပွားခဲ့သည်ဟု ယူကရိန်းအရာရှိများက ပြောသည်။

တိုက် ၂၄ လုံး၊ အိမ် ၈၉ လုံး၊ ကျောင်း ၆ ကျောင်း၊ ဆိုင် ၅ ဆိုင်တို့ ပျက်စီးခဲ့ရသည်ဟုလည်း ဒေသတွင်း အရာရှိများ ကပြောသည်။

ဒုံးကျည်များသည် ဒီနီပရိုပီးထရော့ခ်ရှိ တခြားနေရာ သုံးခုသို့လည်း ထိမှန်ခဲ့ကာ လူနေအဆောက်အဦများနှင့် ကျောင်းတစ်ခုတို့ ပျက်စီးခဲ့ရသည်ဟု ဒေသတွင်း အရာရှိတစ်ဦးက ပြောသည်။

ရုရှားစစ်တပ်သည် တနင်္လာနေ့တွင် ယူကရိန်း၏ ကာကွယ်ရေးပစ္စည်းများ ထုတ်လုပ်ရာ နေရာသို့ ဒုံးကျည်များဖြင့် ပစ်ခတ်တိုက်ခဲ့သည်ဟု ရုရှားကာကွယ်ရေးဌာန ပြောခွင့်ရပုဂ္ဂိုလ်က ပြောသည်။

ဒုံးကျည်များသည် ပစ်မှတ်ကို ထိမှန်ခဲ့သည်ဟုလည်း ၎င်း၏ ပြောဆိုမှုတွင် ပါဝင်သည်။

ယူကရိန်းပြည်သူများ အဆောက်အဦ ပျက်စီးနေတာကို ကြည့်နေစဉ်

သိမ်းပိုက်ထားသော ဇာပိုရေဇေယာဒေသမှ ရုရှား အရာရှိတစ်ဦး ဖြစ်သူကလည်း ဒုံးကျည်များသည် ပတ်ဗ်လိုရတ်ဒ်ရှိ ခဲယမ်းနှင့် လောင်စာ ဂိုဒေါင်ကို ထိမှန်ခဲ့ကြောင်း ပြောသည်။

တနင်္လာနေ့ တိုက်ခိုက်မှုသည် ယူကရိန်း၏ စွမ်းအင်ပေးဝေရေ အခြေခံ အဆောက်အဦများကို ပျက်စီးစေခဲ့ကာ ယင်းတို့ကို ပြင်ဆင်ရန် ရက်အတန်ကြာ အချိန်ယူရမည်ဟု ယူကရိန်းစွမ်းအင်ဝန်ကြီးက ပြောသည်။

ခါဆွန် (Kherson) မြို့နှင့် ဒီနီပရိုပီးထရော့ခ် ဒေသတွင်းရှိ တခြားမြို့များမှ ဒေသခံ ၂၀၀၀၀ ခန့်သည် စွမ်းအင်ပျက်တောက်လျက် ရှိသည်ဟုလည်း ၎င်းက ပြောသည်။

၁၄ လကြာ ယူကရိန်းစစ်ပွဲအတွင်း ရုရှားတို့သည် တာဝေးပစ် ဒုံးကျည်များဖြင့် တိုက်ခိုက်မှုကို မကြာခဏ လုပ်ဆောင်ခဲ့ကာ တစ်ခါတစ်ရံတွင် လူနေဧရိယာများသို့ပါ ထိမှန်မှု ရှိခဲ့သည်။

Source: AP

CNI International News

ဒိုဟာ၊ မေလ ၂

တာလီဘန်များကို ဖိတ်ကြားခြင်းမရှိဘဲ အာဖဂန်အရေးနှင့် ပတ်သက်သည့် ညီလာခံတစ်ရပ်အား ကာတာနိုင်ငံ၏ မြို့တော် ဒိုဟာ (Doha) တွင် ကုလသမဂ္ဂအဖွဲ့က ဦးဆောင် ကျင်းပခဲ့သည်ဟု Al Jazeera သတင်း၌ ဖော်ပြသည်။

၎င်းတို့ ပါဝင်ခြင်းမရှိသော အာဖဂန်အရေး ဆွေးနွေးပွဲသည် မည်သည့် အကျိုးရလဒ်မှ ဖြစ်ထွန်းလိမ့်မည် မဟုတ်ဟုလည်း တာလီဘန်များက ပြောသည်။

အမေရိကန်၊ တရုတ်၊ ရုရှားတို့အပြင် ဥရောပမှ အလှူရှင်နိုင်ငံများနှင့် ပါကစ္စတန်ကဲ့သို့ အိမ်နီးချင်းနိုင်ငံများ ပါဝင်သော နိုင်ငံပေါင်း ၂၅ နိုင်ငံခန့်မှ ကိုယ်စားလှယ်များသည် ကာတာမြို့တော်တွင် တနင်္လာနေ့မှ စတင်၍ နှစ်ရက် ကြာ တံခါးပိတ် အစည်းအဝေးကို ကျင်းပခဲ့သည်။

ထိုအစည်းအဝေးကို ကုသမဂ္ဂ အထွေထွေ အတွင်းရေးမှူးချုပ် အန်တိုနီယို ဂူတာရက်စ်(Antioni Guterres)က ဦးဆောင်သည်။

အာဖဂန်အစိုးရ မပါဝင်သည့် အာဖဂန်အရေး ဆွေးနွေးပွဲတိုင်းသည် ထိရောက်မှုနှင့် တွင်ကျယ်မှု ရှိမည်မဟုတ်ဟု တာလီဘန်နိုင်ငံခြားရေးဌာန ပြောခွင့်ရပုဂ္ဂိုလ် အဘ်ဒဲလ် ကာဟာဘယ်လ်ခီ (Abdul Qahar Balkhi) က ပြောသည်။

အာဖဂန်၏ ဆိုးရွားသော လူသားချင်းစာနာမှု အခြေအနေနှင့် နိုင်ငံတကာ ပိတ်ဆို့မှုများအတွက် ဆွေးနွေးမည့် အစည်းအဝေးသို့ တာလီဘန်များကို ဖိတ်ခေါ်မည် မဟုတ်ကြောင်း ကုလအရာရှိတစ်ဦးက ပြီးခဲ့သည့် သီတင်းပတ် တွင် ပြောခဲ့သည်။

ကုလအထွေထွေအတွင်းရေးမှူးချုပ် အန်တိုနီယို ဂူတာရက်စ်ကိုတွေ့ရစဉ်

တာလီဘန်များအား အသိအမှတ်ပြုရေးသည်လည်း အစည်းအဝေး အစီအစဉ်များတွင် မပါဝင်ဟု ကုသ သတင်းအရင်းအမြစ် တစ်ခုက ပြောသည်။

ကုလ၏ ဒုတိယအတွင်းရေးမှူးချုပ်၏ ပြောစကားကြောင့် တာလီဘန်များ သတ်မှတ်သကဲ့သို့ အာဖဂန်အစ္စလာမ္မစ် စော်ဘွားများနိုင်ငံ (IEA) အစိုးရအဖြစ် တရားဝင် သတ်မှတ်မည်ကို ပြည်ပရောက် အာဖဂန်များနှင့် အနောက် နိုင်ငံများဘက်က စိုးရိမ်မှုများ ရှိနေချိန်တွင် ထိုသို့ ပြောဆိုခဲ့ခြင်း ဖြစ်သည်။

တာလီဘန်များ၏ အမျိုးသမီး အခွင့်အရေးအပေါ် ကိုင်တွယ်မှု မှတ်တမ်းများကြောင့် ယင်းတို့နှင့် တရားဝင် ဆက်ဆံရေး စတင်ရန် စဉ်စားနေသော နိုင်ငံများကို ကန့်ကွက်ရှုတ်ချသည်ဟု အာဖဂန်အမျိုးသမီး အခွင့်အရေးဆိုင်ရာ ညွှန့်ပေါင်းအဖွဲ့တစ်ခုက တနင်္ဂနွေနေ့တွင် ထုတ်ပြန် ပြောဆိုခဲ့သည်။

တာလီဘန်များ၏ အမျိုးသမီးများအပေါ် ဆက်ဆံပုံကို လက်ခံနိုင်စရာ မရှိကြောင်း၊ ပြီးခဲ့သည့် နှစ်များတွင် ရရှိထားသည့် တိုးတက်မှုများကို မမေ့ဘဲ အာဖဂန်ရှိ အမျိုးသမီးအခွင့်အရေးအတွက် ဆက်လက် တိုက်ပွဲဝင် သွားရမည် ဖြစ်ကြောင်း ထင်ရှားသည့် အာဖဂန်နိုင်ငံရေးသမားတစ်ဦးဖြစ်သူက ပြောသည်။

ပါကစ္စတန် လုံခြုံရေးတပ်ဖွဲ့ကိုတွေ့ရစဉ်

အမျိုးသမီးများ၏ ပညာရေးနှင့် အလုပ်လုပ်ကိုင်ခွင့်တို့အပေါ် ပိတ်ပင်မှု အပါအဝင် အမျိုးသမီးများအပေါ် ကန့်သတ်မှုများ မြင့်တက်လာခြင်းအတွက် တာလီဘန်များသည် ဝေဖန်မှုများနှင့် ရင်ဆိုင်နေရသည်။

ဒိုဟာ ဆွေးနွေးပွဲသည် အာဖဂန်များအား အသိအမှတ်ပြုရေးအတွက် ကနဦး ခြေလှမ်းများကို ဖြစ်စေနိုင်သည်ဟု ကုလ၏ ဒုတိယအတွင်းရေးမှူးက ဧပြီ ၂၄ ရက်တွင် ပြောခဲ့သည်။ ထိုပြောစကားသည် နားလည်မှု လွဲခြင်းသာ ဖြစ်သည်ဟု ကုလဘက်က ပြန်လည်ဖြေရှင်းခဲ့ရသည်။

လက်ရှိ အချိန်အထိ တာလီဘန် အစိုးရအား မည်သည့်နိုင်ငံကမှ တရားဝင် အသိအမှတ်ပြုခြင်း မရှိသေးပေ။

ဆွေးနွေးပွဲတွင် IEA ကိုယ်စားလှယ်များကို မဖိတ်ခေါ်ခြင်းက ခွဲခြားမှု၊ မတရားမှုသာဖြစ်သည်ဟု ကုလဆိုင်ရာ တာလီဘန် ကိုယ်စားလှယ်က ပြောသည်။

အာဖဂန်မှ ပြဿနာများကို လက်တွေ့ဆန်သော ချဉ်းကပ်မှု၊ IEA ၏ ပါဝင်မှုဖြင့်သာ ဖြေရှင်းနိုင်သည်ဟုလည်း ၎င်းက ပြောသည်။

Source: Aljazeera

CNI International News

ဝါရှင်တန်၊ မေလ ၂

ဖိလစ်ပိုင်သမ္မတ ဖာဒီနန် မားကို့စ်ဂျူနီယာ (Ferdinand Marcos Jr.) နှင့် အိမ်ဖြူတော်တွင် တနင်္လာနေ့၌ တွေ့ဆုံစဉ် အမေရိကန်သမ္မတ ဂျိုးဘိုင်ဒန် (Joe Biden) သည် ဖိလစ်ပိုင်လုံခြုံရေးအတွက် အမေရိကန်က ပေးထားသော ကတိများကို ထပ်လောင်းပြောဆိုကာ နှစ်နိုင်ငံကြား ခိုင်မာသော ဆက်ဆံရေးအား အလေးထားပြော ကြားခဲ့သည်ဟု အေပီသတင်းမှာ ဖော်ပြထားသည်။

တောင်တရုတ်ပင်လယ်အတွင်းရှိ ဖိလစ်ပိုင်သင်္ဘောများကို တရုတ် ရေတပ်၏ နှောင့်ယှက်မှုများကြောင့် တင်းမာမှုများ မြင့်တက်လာချိန်တွင် ဖြစ်သည်။

မားကို့စ်၏ ဝါရှင်တန်ခရီးစဉ်သည် ဖိလစ်ပိုင်နှင့် အမေရိကန်တို့အကြား အကြီးမားဆုံး စစ်ရေးလေ့ကျင့်မှု ပြီးဆုံးချိန်၊ နှစ်နိုင်ငံ လေတပ်များ တနင်္လာနေ့တွင် ၁၉၉၀ နောက်ပိုင်း ပထမဆုံးသော ဂျက်တိုက်လေယာဉ် လေ့ကျင့် မှုကို ပူးတွဲပြုလုပ်မည့် အချိန်၌ ပေါ်ပေါက်လာသည်။

ဖိလစ်ပိုင်သည် ယခုနှစ်တွင် အမေရိကန် တပ်ဖွဲ့များအား ၎င်းတို့၏ နောက်ထပ် စစ်စခန်းလေးခုသို့ ဝင်ရောက် တပ်စွဲခွင့် ပေးခဲ့သည်။

တရုတ်၏ ထိုင်ဝမ်အပေါ်နှင့် တောင်တရုတ် ပင်လယ်တို့အတွင်း ရန်လိုမှုများ မြင့်တက်လာခြင်းကို တားဆီးရန် ဖြစ်သည်။

တောင်တရုတ်ပင်လယ်ပြင်ကိုတွေ့ရစဉ်

တစ်ဖက်တွင်လည်း တရုတ်သည် ဖိလစ်ပိုင် ကမ်းရိုးတန်းအနီး ရေပြင်တွင် သင်္ဘောများကို နှောင့်ယှက်ခြင်း၊ ကင်း လှည့်ခြင်းနှင့် တံငါသည်များကို မောင်းထုတ်ခြင်းတို့ဖြင့် ဖိလစ်ပိုင်အား ဒေါသထွက်အောင် လုပ်ဆောင်လျက် ရှိသည်။

သို့သော် မားကို့စ်နှင့် တွေ့ဆုံစဉ်တွင် ဘိုင်ဒန်က အမေရိကန်-ဖိလစ်ပိုင် ဆက်ဆံရေး၏ တိုးတက်မှုများနှင့် ပတ်သက်၍ ထုတ်ဖော် ပြောဆိုခဲ့သည်။

နှစ်နိုင်ငံ ဆက်ဆံရေးသည် ပြီးခဲ့သည့် နှစ်များအတွင်း အတက်အကျများစွာ ရှိခဲ့ကာ ပြီးခဲ့သည့်နှစ် မားကို့စ် အာဏာရရှိချိန်တွင် အခက်အခဲများစွာနှင့် ရင်ဆိုင်ခဲ့ရသည်။

စိန်ခေါ်မှု အသစ်များနှင့် ရင်ဆိုင်နေရကြောင်း၊ ဖိလစ်ပိုင်ထက် ပိုကောင်းသည့် မိတ်ဖက်နိုင်ငံကို မစဉ်းစားမိ ကြောင်း ဘိုင်ဒန်က ပြောသည်။

 မားကို့စ်နဲ့ ဇနီး အမေရိကန်ကို ရောက်လာစဉ်

အမေရိကန်အနေဖြင့် ဖိလစ်ပိုင်အား ကာကွယ်ရေးအတွက် ပေးထားသော ကတိများကို တည်မည့်အပြင် ဖိလစ်ပိုင် စစ်တပ် အဆင့်မြှင့်တင်ရေး အတွက်လည်း ဆက်လက် ထောက်ပံ့သွားမည်ဟု ဘိုင်ဒန်က ပြောသည်။

ဖိလစ်ပိုင်နှင့် ပစိဖိတ်ဒေသတွင် လက်ရှိ ကမ္ဘာပေါ်၌ အရှုပ်ထွေးဆုံး ပထဝီနိုင်ငံရေး အခြေအနေများနှင့် ရင်ဆိုင် နေရသည့်အတွက် နှစ်နိုင်ငံကြား ဆက်ဆံရေးမှာ မရှိမဖြစ် အရေးပါသည်ဟုလည်း မားကို့စ်က ပြောသည်။

တနင်္လာနေ့က ဘဲဥပုံ ရုံးခန်းအတွင်း တွေ့ဆုံမှုသည် ဘိုင်ဒန်၏ ပစိဖိတ်ခေါင်းဆောင်များနှင့် အဆင့်မြင့် သံတမန် ရေးဆိုင်ရာ တွေ့ဆုံမှုများမှ နောက်ဆုံးတစ်ခု ဖြစ်သည်။

မားကို့စ်၏ အမေရိကန် ခရီးစဉ်သည်လည်း ၁၀ နှစ်ကျော် ကာလအတွင်း ဖိလစ်ပိုင်သမ္မတ တစ်ဦး၏ ပထမဆုံး သော အမေရိကန်ခရီးစဉ် ဖြစ်သည်။

Source: AP