CNI International News

ဘန်ကောက်၊ သြဂုတ် ၅

ထိုင်းနိုင်ငံတွင် ရေရာမှုမရှိသေးသည့် နိုင်ငံရေး အခင်းအကျင်းကြောင့် ဝန်ကြီးချုပ် ရွေးချယ်ရေးအတွက် မဲခွဲဆုံးဖြတ်မည့်ရက်ကို ထပ်မံ ရွှေ့ဆိုင်းခဲ့သဖြင့် ဖြူးထိုင်းပါတီ၏ အစိုးရဖွဲ့ရေး ရည်မှန်းချက်ကို ထိခိုက် စေခဲ့သည်ဟု ဘန်ကောက်ပို့စ်မှ ဖော်ပြခဲ့သည်။

ယခင်က ဝန်ကြီးချုပ် မဲပေးရွေးချယ်မှုကို သြဂုတ် ၄ ရက်တွင် ပြုလုပ်ရန် စီစဉ်ထားသော်လည်း ထိုအစီအစဉ်ကို လွှတ်တော်ဥက္ကဋ္ဌ ဝမ် မူမာမက် နျူအာ မာသာ (Wan Muhamad Noor Matha) က သြဂုတ် ၃ ရက်တွင် ဖျက်သိမ်းခဲ့သည်။

ထိုင်းဖွဲ့စည်းပုံ အခြေခံဥပဒေဆိုင်ရာ ခုံရုံးက ရွေးကောက်ပွဲအနိုင်ရ Move Forward (MFP) ပါတီ ခေါင်းဆောင် ပီတာလင်ဂျာရိုရတ် (Pita Limjaroenrat) အား ဝန်ကြီးချုပ် အမည်စာရင်း တင်သွင်းမှုကို လွတ်တော်က ပိတ်ပင် ခဲ့သည့် ဖြစ်စဉ်နှင့်ပတ်သက်ပြီး ဖွဲ့စည်းပုံနှင့် ညီ၊မညီ စဉ်းစားဆုံးဖြတ်မည်ဖြစ်သဖြင့် ဝန်ကြီးချုပ် ရွေးချယ်ရေးကို ရွှေ့ဆိုင်းခဲ့ခြင်း ဖြစ်သည်။

ထို့ကြောင့် သြဂုတ် ၂ ရက်တွင် ထိပ်သီး ဝန်ကြီးနေရာ ၅ နေရာအတွက် ကိုယ်စားလှယ်လောင်း စာရင်းကို ကြေညာခဲ့သည့် ဖြူးထိုင်းပါတီအတွက် ၎င်း၏ အစီအစဉ်ကို ပြန်လည်ရုတ်သိမ်းရမည့် အခြေအနေသို့ ရောက်ရှိ စေခဲ့သည်။ 

သက်ဆင်ကိုတွေ့ရစဉ်

ထိုသို့ နိုင်ငံရေး မတည်ငြိမ်မှုများကြောင့် သြဂုတ် ၁၀ ရက်တွင် ထိုင်းသို့ ပြန်လာမည့် ဝန်ကြီးချုပ်ဟောင်း သက်ဆင် ရှင်နာဝပ် (Thaksin Shinawatra) သည်လည်း ၎င်း၏ ပြည်တော်ပြန်ခရီးစဉ်ကို ဖျက်သိမ်းခဲ့သည်ဟု သတင်းများ ထွက်ပေါ်ခဲ့သည်။ 

ယခုဖြစ်ပွားနေသည့် နိုင်ငံရေး အခင်းအကျင်းကြောင့် ဖြူးထိုင်းသည် ဝန်ကြီးချုပ် ကိုယ်စားလှယ်လောင်းအဖြစ် ကြေညာခဲ့သည့် ဆရတ်သာ သာဗင်စင် (Srettha Thavisin) အစား အခြားပါတီတစ်ခုမှ ဝန်ကြီးချုပ် ကိုယ်စားလှယ် တစ်ဦးကို အမည်စာရင်း တင်သွင်းဖွယ် ရှိနေသည်ဟုလည်း ထင်ကြေးပေးမှုများ ထွက်ပေါ်နေသည်။

ထိုင်းအိမ်စောင့်အစိုးရ ၀န်ကြီးချုပ် ပရာယွတ်ကိုတွေ့ရစဉ်

သြဂုတ် ၂ ရက်တွင် ဖြူးထိုင်းသည် MFP နှင့် လမ်းခွဲခဲ့ပြီး MFP ကို ညွန့်ပေါင်းအဖွဲ့မှ ထုတ်ပယ်ခဲ့ကာ ဖြူးထိုင်း၏ ဝန်ကြီးချုပ် ကိုယ်စားလှယ်လောင်းအတွက် အခြားပါတီများထံမှ ထောက်ခံမှုများ ရရှိရန် ကြိုးပမ်းသွားမည်ဟု ကြေညာခဲ့သည်။ 

ဖွဲ့စည်းပုံ အခြေခံဥပဒေဆိုင်ရာ ခုံရုံးကမူ ပီတာကို ဝန်ကြီးချုပ်ရာထူး နေရာအတွက် ပိတ်ပင်ခြင်းနှင့်ပတ်သက်ပြီး လေ့လာသုံးသပ်မှုများ ပြုလုပ်မည်ဖြစ်ကြောင်း ထုတ်ပြန်ခဲ့ပြီး ထိုအမှုကို သြဂုတ် ၁၆ ရက်တွင် ဆုံးဖြတ်ချက် ချဖွယ် ရှိသည်။

Source: ဘန်ကောက်ပို့စ်

CNI International News

နိုင်ရိုဘီ၊ သြဂုတ် ၄

ဟေတီတွင် နိုင်ငံပေါင်းစုံ ပါဝင်သည့်တပ်ဖွဲ့ကို ကင်ညာက ဦးဆောင်ရန် အမေရိကန်အစိုးရက အလိုရှိနေပြီး ကင်ညာရဲအရာရှိများကိုလည်း အကြမ်းဖက် အနိုင်ကျင့်မှုများ မပြုလုပ်ရန် သတိပေးခဲ့သည်ဟု အေပီမှ ဖော်ပြခဲ့ သည်။ 

လက်ရှိတွင် ကင်ညာရဲအရာရှိ ၁၀၀၀ သည် ရာဇဝတ်ဂိုဏ်းများကို တိုက်ဖျက်သည့် စစ်ဆင်ရေးတွင် ပါဝင်ရန် ဟေတီသို့ သွားရောက်ဖွယ် ရှိနေသည်။

ကင်ညာတွင် COVID-19 ကာဖျူးမိန့် ထုတ်ပြန်ချိန် ကာလအတွင်း ကင်ညာရဲတပ်ဖွဲ့သည် အရပ်သားများကို ပစ်ခတ်မှုများ အပါအဝင် သတ်ဖြတ်မှုများနှင့် ညှင်းပန်းနှိပ်စက်မှုများ ပြုလုပ်ခဲ့သည်ဟု လူ့အခွင့်အရေး စောင့်ကြည့်ရေးအဖွဲ့များက စွပ်စွဲခဲ့သည်။ 

ဆန္ဒပြမှုများကို နှိမ်နင်းနေတဲ့ ကင်ညာရဲတပ်ဖွဲ့ကိုတွေ့ရစဉ်

ထို့ကြောင့် ယခုစစ်ဆင်ရေးသည် ကင်ညာရဲတပ်ဖွဲ့အတွက် စိန်ခေါ်မှုရှိသည့် အလှည့်အပြောင်းတစ်ခု ဖြစ်လာ နိုင်သည်။

ကင်ညာတွင် ဇူလိုင်လအတွင်း ရဲအရာရှိများသည် လူပေါင်း ၃၀ ကျော်ကို ပစ်ခတ်သတ်ဖြတ်ခဲ့ပြီး ဖြစ်စဉ်အားလုံး သည် အတိုက်အခံများ၏ ဆန္ဒပြမှုများအတွင်း ကင်ညာ၏ အဆင်းရဲဆုံး ဒေသများတွင် ဖြစ်ပွားခဲ့ခြင်း ဖြစ်သည်ဟု ဒေသတွင်း အဖွဲ့အစည်းတစ်ခုက ပြောသည်။

"ကျည်အစစ်တွေ အသုံးပြုပြီး ပစ်ခတ်တာ အပါအဝင် လူ့အသက်တွေကို ဆုံးရှုံးစေပြီး အကြမ်းဖက်မှုတွေ မြင့် တက် လာတာတွေကြောင့် ကျနော်တို့ ဝမ်းနည်းခဲ့ရပါတယ်"ဟု ဇူလိုင်လလယ်ပိုင်းက ဆန္ဒပြမှုများ ဖြစ်ပွားချိန် အတွင်း အမေရိကန်က အခြားနိုင်ငံ ၁၁ နိုင်ငံနှင့်အတူ ပူးတွဲအစီရင်ခံစာ ထုတ်ပြန်ခဲ့သည်။

ယခုလအတွက် ကုလသမဂ္ဂ လုံခြုံရေးကောင်စီ၏ အလှည့်ကျ ဥက္ကဋ္ဌနေရာကို ရယူထားသည့် အမေရိကန်သည် ဟေတီတွင် ကင်ညာရဲတပ်ဖွဲ့ ဦးဆောင်သည့် မစ်ရှင်တစ်ခုအား ခွင့်ပြုသည့် ကြေညာချက် တစ်စောင် ထုတ်ပြန်ရန် ပြင်ဆင်နေသည်။ 

ကင်ညာရဲတပ်ဖွဲ့သည် ပြည်ပစစ်ဆင်ရေးများတွင် အတွေ့အကြုံနည်းပါးပြီး ဟေတီတွင် အသုံးပြုသည့် ပြင်သစ် ဘာသာစကားကိုလည်း ကျွမ်းကျင်စွာ ပြောဆိုတတ်ခြင်း မရှိပေ။

ဆန္ဒပြမှုများကို နှိမ်နင်းနေတဲ့ ကင်ညာရဲတပ်ဖွဲ့ကိုတွေ့ရစဉ်

"ဒါက ထုံးတမ်းစဉ်လာအရ ငြိမ်းချမ်းရေး ထိန်းသိမ်းရေးတပ်ဖွဲ့လို မဟုတ်ပါဘူး" ဟု ကုလသမဂ္ဂဆိုင်ရာ အမေရိကန် သံအမတ် လင်ဒါ သောမတ်စ် ဂရင်းဖီးလ် (Linda Thomas Greenfield) က သြဂုတ် ၁ ရက်တွင် ပြောကြားခဲ့သည်။

ကမ္ဘာ့ အနောက်ခြမ်းဒေသရှိ အဆင်းရဲဆုံး ဟေတီနိုင်ငံတွင် တရားဥပဒေစိုးမိုးရေးကို ပြန်လည်ထိန်းသိမ်းရန် အားထုတ် ကြိုးပမ်းမှုအတွက် နိုင်ငံတစ်နိုင်ငံက ဦးဆောင်ပြုလုပ်ရန် ကုလသမဂ္ဂက ကိုးလကျော်ကြာ မေတ္တာရပ် ခံခဲ့သော်လည်း အောင်မြင်မှု မရခဲ့ပေ။

ကင်ညာအစိုးရကမူ ဟေတီတွင် နိုင်ငံပေါင်းစုံ တပ်ဖွဲ့ကို ဦးဆောင်ရန် စိတ်ဝင်စားကြောင်းနှင့် ဟေတီ အမျိုးသား ရဲတပ်ဖွဲ့ကို လေ့ကျင့်ပေးရန် ရဲအရာရှိ ၁၀၀၀ စေလွှတ်နေကြောင်း ကင်ညာ နိုင်ငံခြားရေးဝန်ကြီး အဲလ်ဖရက် မူတူအာ (Alfred Mutua) က ပြောကြားခဲ့သည်။

"ကင်ညာဟာ ကမ္ဘာတစ်ဝန်းမှာရှိတဲ့ အာဖရိကလူမျိုးတွေနဲ့အတူ ရပ်တည်နေပါတယ်" ဟု အဲလ်ဖရက်က ပြောကြားခဲ့သည်။

သို့သော် ဟေတီသို့ပို့ဆောင်သည့် တပ်ဖွဲ့များအကြောင်းနှင့် ဟေတီတပ်ဖွဲ့ကို ဦးဆောင်မှုအတွက် မည်သည့် အကျိုးအမြတ်များ ရရှိလိမ့်မည်ဆိုခြင်းကိုမူ ကင်ညာနိုင်ငံခြားရေးဝန်ကြီးဌာနက ထုတ်ပြန်ခဲ့ခြင်း မရှိပေ။

Source: အေပီ

CNI Internataional News

နီယာမေ၊ သြဂုတ် ၄

နိုက်ဂျာတွင် အာဏာသိမ်းမှုကို ထောက်ခံသူများသည် သြဂုတ် ၃ ရက်က နီယာမေမြို့တော်တွင် စုရုံးခဲ့ကြပြီး အာဏာသိမ်းမှုကို ဝေဖန်ခဲ့သည့် ပြင်သစ်နှင့် အခြားနိုင်ငံများကို ဝေဖန်ရှုတ်ချခဲ့သည်ဟု အေပီမှ ဖော်ပြခဲ့သည်။

နိုက်ဂျာ၏ လွတ်လပ်ရေးနေ့တွင် စစ်အာဏာသိမ်းအုပ်စုနှင့် မြို့ပြ လူမှုရေးအဖွဲ့များက စီစဉ်ပြုလုပ်ခဲ့သည့် အဆိုပါ ဆန္ဒပြစုရုံးမှုတွင် ပါဝင်သူ များပြားခဲ့သည်။

နီယာမေမြို့တော်တွင် ဆန္ဒပြသူများသည် မကြာသေးမီ နှစ်များအတွင်းက အာဏာသိမ်းမှုများ ဖြစ်ပွားခဲ့သည့် အိမ်နီးချင်း နိုင်ငံများထံမှ ထောက်ခံမှုများကို တောင်းဆိုသည့် ကြွေးကြော်သံများကို ဟစ်ကြွေးခဲ့ကြသည်။ 

ဆန္ဒပြသူအချို့သည် ရုရှားအလံများကို ဝှေ့ယမ်းခဲ့ပြီး အမျိုးသားတစ်ဦးကတော့ နိုက်ဂျာနှင့် ရုရှားအလံကို ပေါင်းစပ်ထားသည့် အလံကို ဝှေ့ယမ်းခဲ့သည်။

နိုက်ဂျာ အာဏာသိမ်းမှုနဲ့ ရုရှားကို ထောက်ခံကြောင်း ပြသနေကြစဉ်

ပြီးခဲ့သည့် သီတင်းပတ်က ဖြစ်ပွားခဲ့သည့် အာဏာသိမ်းမှုတွင် ပြင်သစ်ထံမှ လွတ်လပ်ရေး ရပြီးနောက် နိုက်ဂျာ၏ ဒီမိုကရေစီနည်းကျ ရွေးကောက်ခံခဲ့ရသည့် သမ္မတ မိုဟာမက် ဘာဇုမ်း (Mohamad Bazoum) သည် ရာထူးမှ ဖြုတ်ချခံခဲ့ရသည်။

ထို့နောက် နိုင်ငံအတွင်း ပြင်သစ်ဆန့်ကျင်မှုများ မြင့်တက်ခဲ့သဖြင့် အာဖရိက၏ ဆာဟယ်ဒေသတွင် အစွန်းရောက် များကို နှိမ်နင်းနေသည့် အနာဂတ် စစ်ဆင်ရေးများအပေါ် မေးခွန်းများ ထွက်ပေါ်ခဲ့သည်။ 

ဆာဟယ်ဒေသသည် အနောက်နိုင်ငံများနှင့် ရုရှားအကြား သြဇာလွှမ်းမိုးရေးအတွက် အားပြိုင်နေသည့် ဒေသ တစ်ခု ဖြစ်သည်။

နိုက်ဂျာအာဏာသိမ်းမှုကို အနောက်နိုင်ငံများနှင့် အနောက်အာဖရိကနိုင်ငံများ စီးပွားရေးအဖွဲ့အစည်း (ECOWAS) တို့က ရှုတ်ချခဲ့သည်။ 

ECOWAS ကမူ ဘာဇုမ်းကို အာဏာပြန်မအပ်ပါက အာဏာသိမ်းအုပ်စုကို အင်အားသုံးပြီး ဖယ်ရှားသွားမည်ဟု ခြိမ်းခြောက်ခဲ့သည်။ 

နီယာမေမြို့တော်တွင် တင်းမာမှုများ မြင့်တက်နေသဖြင့် ဥရောပ နိုင်ငံသား အများအပြားသည် နိုက်ဂျာရှိ ၎င်းတို့ နိုင်ငံသားများကို ရွှေ့ပြောင်းပေးခဲ့ကြသည်။ 

 နိုက်ဂျာ အာဏာသိမ်းမှုကို ထောက်ခံသူများကို တွေ့ရစဉ်

သြဂုတ် ၃ ရက်က ပြုလုပ်ခဲ့သည့် ဆန္ဒပြမှုတွင် ပါဝင်သူ အများစုက အာဏာသိမ်းမှုကို ထောက်ခံကြောင်းနှင့် ပြည်ပ၏ ကြားဝင်စွက်ဖက်မှုကို ရှုတ်ချကြောင်း ပြောကြားခဲ့သည်။

ကျန်သည့် ပြည်သူအများစုကမူ အာဏာသိမ်းမှုကို ထောက်ခံခြင်း ရှိ/မရှိ ရှင်းလင်းစွာ မသိရသေးဘဲ သြဂုတ် ၃ ရက်တွင် နီယာမေမြို့တော်၏ နေရာဒေသအများစု၌ ပြည်သူများသည် ပုံမှန်အတိုင်း လှုပ်ရှားသွားလာနေ ကြ သည်။

အာဏာသိမ်း စစ်ခေါင်းဆောင် ဗိုလ်ချုပ်ကြီး အဗ္ဗဒူရာဟမ်မာနီ တီယာနီ (Abdourahmane Tiani) ကမူ အာဏာ သိမ်းမှုများ ရှုတ်ချသူများကို ပြစ်တင်ဝေဖန်ခဲ့ပြီး ပြည်သူများအနေဖြင့် နိုင်ငံကို ကာကွယ်ရေးအတွက် အသင့် ပြင်ထားရန် သြဂုတ် ၂ ရက်က နိုင်ငံတော်မိန့်ခွန်းတွင် ထည့်သွင်း ပြောကြားခဲ့သည်။ 

ECOWAS ကမူ နေအိမ်အကျယ်ချုပ်ဖြင့် ထိန်းသိမ်းခံထားရသည့် ဘာဇုမ်းကို သြဂုတ် ၆ ရက် နောက်ဆုံးထားပြီး အာဏာပြန်အပ်ရန် နိုက်ဂျာစစ်ခေါင်းဆောင်များကို သတိပေးခဲ့သည်။

Source: အေပီ

CNI International News

ဘန်ကောက်၊ သြဂုတ် ၄

Move Forward (MFP)ပါတီ မပါဘဲ အစိုးရဖွဲ့ရန် အသင့်ဖြစ်နေကြောင်း သြဂုတ် ၂ ရက်တွင် ထုတ်ပြန်ခဲ့သည့် ဖြူးထိုင်းပါတီသည် ၎င်းတို့ ဖွဲ့စည်းမည့် အစိုးရအတွင်း အဓိက ဝန်ကြီးနေရာ ၅ နေရာအတွက် ကိုယ်စားလှယ် လောင်းများကို ကြေညာခဲ့သည်ဟု The Nation သတင်းဌာနမှ ဖော်ပြခဲ့သည်။

အစိုးရဖွဲ့ရေး အစီအစဉ်အရ ဖြူးထိုင်းသည် အိမ်ခြံမြေ လုပ်ငန်းရှင်ဟောင်း ဆရတ်သာ သာဗင်ဆင် (Srettha Thavisin) ကို ထိုင်းနိုင်ငံ၏ အယောက် ၃၀ မြောက် ဝန်ကြီးချုပ်အဖြစ် အမည်စာရင်း တင်သွင်းမည်ဖြစ်သည်။

ထိုင်း၀န်ကြီးချုပ်အဖြစ် ယာထားသူ ဆရတ်သာ သာဗင်ဆင်ကိုတွေ့ရစဉ်

ဖြူးထိုင်းပါတီခေါင်းဆောင် ချိုနန် သီရိကော (Cholnan Srikeaw) ကို ပြည်ထဲရေးဝန်ကြီး၊ ပါတီ၏ နောက်ထပ် ဝန်ကြီးချုပ် ကိုယ်စားလှယ်လောင်းဖြစ်သည့် ပေတုန်တန် ရှင်နာဝပ် (Paetongtarn Shinawatra)ကို နိုင်ငံခြားရေး ဝန်ကြီးအဖြစ် အမည်စာရင်း တင်သွင်းမည် ဖြစ်သည်။

ထို့ပြင် စွမ်းအင်ဝန်ကြီးနှင့် သယ်ယူပို့ဆောင်ရေးဝန်ကြီး နေရာများအတွက် ဖြူးထိုင်းပါတီ၏ အတွင်းရေးမှူးချုပ် ပရာဆတ် ဂျန်တာရာရွန်တောင် (Prasert Jantararuangtong) နှင့် ပါတီလက်ထောက် ခေါင်းဆောင် ဂျူလာပန် အမွန်ဗီဗက် (Julapun Amornvivat) တို့ကို အမည်စာရင်း တင်သွင်းမည် ဖြစ်သည်။

ထိုင်းနိုင်ငံခြားရေး၀န်ကြီးအဖြစ် ယာထားသူ ပေတုန်တန်ကိုတွေ့ရစဉ်

ဘဏ္ဍာရေးဝန်ကြီးနေရာအတွက် ပါတီပြင်ပမှ ကိုယ်စားလှယ်လောင်း တစ်ဦးကို အမည်စာရင်း တင်သွင်းမည်ဟု ဖြူးထိုင်းနှင့် နီးစပ်သည့် သတင်းရင်းမြစ်တစ်ခုက ပြောကြားခဲ့သည်။

ကျန်ရှိနေသည့်် ဝန်ကြီးနေရာများအတွက် ဖြူးထိုင်းသည် ညွန့်ပေါင်းအဖွဲ့ထဲမှ အခြားပါတီများနှင့် ဆွေးနွေးသွား မည် ဖြစ်သည်။

ညွန့်ပေါင်းအဖွဲ့တွင် ပါဝင်သည့် အခြားပါတီများသည် ရွေးကောက်ပွဲတွင် အနိုင်ရခဲ့သည့် အမတ်နေရာ အရေ အတွက်အလိုက် ဝန်ကြီးနေရာများနှင့် လက်ထောက်ဝန်ကြီး နေရာများကို ဝေပုံကျ ရရှိလိမ့်မည်ဟု ထို သတင်းရင်းမြစ်က ပြောသည်။

CNI International News

ဝါဆော၊ သြဂုတ် ၄

ရုရှား၏ ပုဂ္ဂလိက ကြေးစားစစ်သား ဝဂ်နာအုပ်စုမှ တိုက်ခိုက်ရေးသမားများသည် ပိုလန်၏ တည်ငြိမ်မှုကို ပျက်ယွင်းစေရန် နေတိုး၏ အရှေ့ပိုင်းစစ်မျက်နှာအနီးသို့ ရွှေ့ပြောင်းလာခဲ့သည်ဟု ပိုလန်ဝန်ကြီးချုပ် မာသက်ရှ် မိုရာယက်စကီး (Mateusz Morawiecki) က ပြောကြောင်း ရိုက်တာမှ ဖော်ပြခဲ့သည်။

ဝဂ်နာ ကြေးစားစစ်သားများသည့် ဘယ်လာရုစ် စစ်တပ်နှင့် စစ်ရေးလေ့ကျင့်မှုများ ပြုလုပ်ခဲ့သဖြင့် ပိုလန်သည် ၎င်း၏ နယ်စပ်တွင် စစ်သား ၁၀၀၀ ကျော်ကို ရွှေ့ပြောင်း ပို့ဆောင်ခဲ့သည်။

သြဂုတ် ၁ ရက်ကလည်း ဘယ်လာရုစ်သည် စစ်ရဟတ်ယာဉ်များဖြင့် ပိုလန်၏ လေပိုင်နက်ကို ချိုးဖောက် ဝင်ရောက်ခဲ့သည်ဟု ပိုလန်က စွပ်စွဲခဲ့သည်။

ဝဂ်နာအုပ်စုမှ တိုက်ခိုက်ရေးသမားများကိုတွေ့ရစဉ်

"ကျနော်တို့အနေနဲ့ အခုလို ရန်စမှုတွေ မြင့်တက်လာတာကို သတိထားဖို့ လိုပါတယ်"ဟု မိုရာယက်စကီးက လစ်သူယေးနီးယားသမ္မတ ဂီတာနက်စ် နျူစီဒါ (Gitanas Nauseda)နှင့် ပိုလန်အရှေ့ပိုင်းတွင် အစည်းအဝေး ပြုလုပ်ခဲ့ပြီးနောက် ပြောကြားခဲ့သည်။

"ဝဂ်နာ အုပ်စုဟာ အရမ်း အန္တရာယ်ကြီးပြီး သူတို့ဟာ တည်ငြိမ်မှုကို ဖျက်ဆီးဖို့ အရှေ့ပိုင်း စစ်မျက်နှာကို ရွှေ့ပြောင်းလာခဲ့ပါတယ်"ဟု ၎င်းက ပြောသည်။

မိုရာယက်စကီးနှင့် နျူစီဒါတို့သည့် ဘယ်လာရုစ်နှင့် ရုရှား၏ ကလင်နင်ဂရက်ဒေသကြားရှိ ပိုလန်နယ်နိမိတ်၏ မဟာဗျူဟာမြောက် ဒေသတစ်ခုဖြစ်သည့် Suwalki Gap နယ်စပ်စင်္ကြန်တွင် တွေ့ဆုံခဲ့ကြခြင်း ဖြစ်သည်။

လစ်သူယေးနီးယားသမ္မတ ဂီတာနက်စ် နျူစီဒါကို တွေ့ရစဉ်

ဘယ်လာရုစ်တွင် ဝဂ်နာကြေးစစ်သား အရေအတွက် ၄၀၀၀ ကျော် ရှိနိုင်သည်ဟု လစ်သူယေးနီးယးသမ္မတ နျူစီဒါက ပြောသည်။ 

"ကျနော်တို့အနေနဲ့ ဒီကိစ္စကို နိုင်ငံတော်အဆင့် စီမံချက်တွေနဲ့သာမကဘဲ အခြေအနေတွေ ပိုမိုရှုပ်ထွေးလာချိန်မှာ လုပ်သင့်တာတွေကို လုပ်ဆောင်ရမှာ ဖြစ်ပါတယ်။ ဘယ်လာရုစ်နဲ့ ထိစပ်နေတဲ့ နယ်စပ်ကို ပိတ်သင့်ရင်လည်း ပိတ်ရမှာပါ" ဟု နျူစီဒါက ပြောသည်။ 

ဘယ်လာရုစ်သည် ယူကရိန်းစစ်ပွဲအတွက် ရုရှားသမ္မတ ဗလာဒီမာ ပူတင် (Vladimir Putin) အား ဘယ်လာရုစ်၏ နယ်နိမိတ်ကို အသုံးပြုခွင့် ပေးခဲ့သည်။ 

သို့သော် ယူကရိန်းစစ်ပွဲအတွင်း ၎င်း၏တပ်ဖွဲ့များ ပါဝင်မည် မဟုတ်ကြောင်း ဘယ်လာရုစ်က ကတိပေးခဲ့သည်။

Source: ရိုက်တာ

CNI International News

ဘိုဂိုတာ၊ သြဂုတ် ၃

ကိုလံဘီယာသမ္မတ၏ သားဖြစ်သူ နီကိုလက်စ် ပက်ထရို (Nicolas Petro) သည် ငွေကြေးခဝါချမှု၊ တရားဝင်     ဝင်ငွေမပြနိုင်ဘဲ ကြွယ်ဝချမ်းသာအောင် လုပ်ဆောင်မှုတို့ဖြင့် သြဂုတ် ၁ ရက်က ကြားနာစစ်ဆေးမှုတွင် တရားစွဲ ဆိုခံခဲ့ရသည်ဟု အေပီမှ ဖော်ပြခဲ့သည်။

ပက်ထရို (၃၆ နှစ်) သည် မူးယစ်ဆေးဝါး မှောင်ခိုကူးသူများထံမှ ဒေါ်လာထောင်ချီ ရယူခဲ့ပြီး ထိုငွေကြေးများကို တန်ဖိုးကြီး ဇိမ်ခံအိမ်များနှင့် ဈေးကြီးသည့် ကားများကို ဝယ်ယူရန် အသုံးပြုခဲ့သည်ဟု အစိုးရရှေ့နေများက တရား ခွင်တွင် ပြောကြားခဲ့သည်။

ပက်ထရိုကမူ စွဲချက်များ အားလုံးအတွက် အပြစ်မရှိကြောင်း လျှောက်လဲချက်ပေးခဲ့သည်။ မည်သို့ပင်ဆိုစေ ၎င်း၏ အမှုသည် ဖခင်ဖြစ်သူ သမ္မတ ဂူစတာဗို ပက်ထရို(Gustavo Petro)၏ ၂၀၂၂ ခုနှစ် သမ္မတရွေးကောက်ပွဲ မတိုင်မီ မဲဆွယ်စည်းရုံးမှုများအတွက် ရန်ပုံငွေသုံးစွဲမှု အခြေအနေအပေါ် မေးခွန်းများ ထွက်ပေါ်စေခဲ့သည်။

သို့သော် ကြားနာစစ်ဆေးမှု အပြီးသတ်ချိန်တွင် ပက်ထရိုသည် ၎င်း၏ ရပ်တည်ချက်ကို ပြောင်းလဲပုံပေါ်သည့် အနေဖြင့် သမ္မတ ပက်ထရို၏ မဲဆွယ်စည်းရုံးမှုကို စုံစမ်းစစ်ဆေးရန် ကြိုးပမ်းနေသည့် အစိုးရရှေ့နေများနှင့် ပူးပေါင်းဆောင်ရွက်ရန် ဆန္ဒရှိကြောင်း ပြောကြားခဲ့သည်။

"ကျနော့် မိသားစုနဲ့ မကြာခင် မွေးလာတော့မယ့် ကျနော့်ကလေးအတွက် ကျနော်ဒါကို လုပ်ဆောင်သွားမှာပါ '' ပက်ထရိုက ပြောကြားခဲ့ပြီး သူ့အနေနှင့် ငွေကြေး ခဝါချမှုအတွက် ပြစ်မှုထင်ရှား စီရင်ခံရမည်ဆိုပါက ထောင်ဒဏ် အနှစ် ၃၀ အထိ ချမှတ်ခံရနိုင်သည်။ 

ကိုလံဘီယာသမ္မတ ဂူစတာဗို ပက်ထရိုကို တွေ့ရစဉ်

မတ်လအတွင်းက ပက်ထရို၏ ဇနီးဟောင်း ဒေဆူရီစ် ဗက်စ်ကွက် (Daysuris Vasquez)က ဒေသခံ Semana မဂ္ဂဇင်းတွင် ပက်ထရို၏အကြောင်းကို ထုတ်ဖော် ပြောဆိုခဲ့ပြီးနောက် စုံစမ်းစစ်ဆေးမှုများ စတင်လာခဲ့ခြင်း ဖြစ် သည်။ 

သမ္မတ ပက်ထရိုသည် လူထုထောက်ခံမှုနှုန်း ကျဆင်းလာပြီး အတိုက်အခံများ၏ ဝေဖန်တိုက်ခိုက်မှုများကို ခံနေ ရချိန်တွင် သားဖြစ်သူ ပက်ထရို၏ အမှုများ ပေါ်ပေါက်လာခဲ့ခြင်း ဖြစ်သည်။

Semana မဂ္ဂဇင်းတွင် ဗက်စ်ကွက်က သူသည် အမေရိကန်၌ မူးယစ်ဆေးဝါး မှောင်ခိုကူးမှုဖြင့် စီရင်ချက်ချခံခဲ့ရဖူး သည့် နိုင်ငံရေးသမားတစ်ဦးထံမှ ပီဆို သန်း ၆၀၀ (ဒေါ်လာ ၁၅၀၀၀၀) လှူဒါန်းမှုအတွက် နီကိုလက်စ် ပက်ထရို စီစဉ်ခဲ့သည့် အစည်းအဝေးကို တက်ရောက်ခဲ့ကြောင်း ပြောကြားခဲ့သည်။

အဆိုပါ နိုင်ငံရေးသမားသည် ဂူစတာဗို ပက်ထရို၏ ၂၀၂၂ သမ္မတရွေးကောက်ပွဲ မဲဆွယ်စည်းရုံးမှုအတွက် လှူဒါန်း လိုသည့် ဆန္ဒရှိခဲ့ကြောင်း ဗက်စ်ကွက်က ပြောသည်။ 

ထို့ပြင် ဗက်စ်ကွက်က သူ့ခင်ပွန်းဟောင်းဖြစ်သူ နီကိုလက်စ် ပက်ထရိုသည် အဆိုပါ လှူဒါန်းငွေများကို ကြားဖြတ် ရယူခဲ့ပြီး ထိုအကြောင်းကို သမ္မတပက်ထရို၏ မဲဆွယ်စည်းရုံးရေးအဖွဲ့က မသိခဲ့ကြောင်းလည်း ထုတ်ဖော် ပြော ကြားခဲ့သည်။

Source: အေပီ

CNI International News

နယူးဒေလီ ၊ သြဂုတ် ၃

အငြင်းပွားဖွယ် ဂျမူးနှင့် ကက်ရှ်မီးယား (Jammu and Kashmir) ဒေသအား နိုင်ငံအဖြစ် အသိအမှတ်ပြုမှုကို ပယ်ဖျက်ခဲ့သည့် ဖွဲ့စည်းပုံ အခြေခံဥပဒေဆိုင်ရာ ပြဋ္ဌာန်းချက်ကို တရားရေးအရ စိန်ခေါ်ထားသော အသနားခံစာ အများအပြားကို အိန္ဒိယ၏ ထိပ်သီးတရားရုံးက သြဂုတ် ၂ ရက်တွင် စတင်စစ်ဆေး ကြားနာခဲ့သည်ဟု အေပီမှ ဖော်ပြခဲ့သည်။

၂၀၁၉ ခုနှစ်က ဝန်ကြီးချုပ် မိုဒီ (Narendra Modi) ၏ အစိုးရအဖွဲ့သည် ဂျမူးနှင့် ကက်ရှ်မီးယား၏ အထူးအခွင့်အရေးကို ပယ်ဖျက်သည့် ဥပဒေတစ်ရပ်  ပြဋ္ဌာန်းခဲ့ခြင်း ဖြစ်သည်။ 

တရားရုံးချုပ်မှ တရားသူကြီးချုပ် အပါအဝင် ဖွဲ့စည်းပုံ အခြေခံဥပဒေဆိုင်ရာ တရားသူကြီး ငါးဦးသည် ၁၉၄၇ ခုနှစ်တွင် အိန္ဒိယ လွတ်လပ်ရေးရခဲ့ပြီးနောက် ဂျမူးနှင့် ကက်ရှ်မီးယား၏ တည်ရှိမှု  အခြေအနေကို စိန်ခေါ်သည့် အသနားခံစာ အများအပြားကို တစ်ပြိင်နက်တည်း စစ်ဆေးကြားနာခဲ့သည်။ 

မိုဒီကို တွေ့ရစဉ်

ထိုအသနားခံစာများသည် ၂၀၁၉ ခုနှစ် အပြောင်းအလဲ မတိုင်မီက တင်ခဲ့သည့် အသနားခံစာများ ဖြစ်သည်။

အိန္ဒိယအစိုးရသည် လာဒက်ခ် (Ladakh) နှင့် ဂျမူး-ကက်ရှ်မီးယားဟူ၍ ဖက်ဒရယ်နယ်နိမိတ် နှစ်ခုအဖြစ်သို့ အံ့အားသင့်ဖွယ် ခွဲခြားခဲ့ပြီး ယင်းနယ်နိမိတ် နှစ်ခုလုံးကို ကိုယ်ပိုင်အုပ်ချုပ်ခွင့် မပေးတော့ဘဲ ဗဟိုအစိုးရ၏ တိုက်ရိုက်အုပ်ချုပ်မှုအောက်သို့ ပြောင်းလဲထားရှိခဲ့သည်။

ထိုပြောင်းလဲမှုသည် မွတ်ဆလင် အများစုနေထိုင်သည့် ဂျမူး-ကက်ရှ်မီးယားဒေသကို ဂယက်ရိုက်ခတ်သွားခဲ့ပြီး လက်ရှိ ထိုဒေသတွင် ဒီမိုကရေစီ အလားအလာမရှိဘဲ  ကိုယ်ပိုင်အလံနှင့် ကိုယ်ပိုင်အုပ်ချုပ်ခွင့်လည်း ဆုံးရှုံးခဲ့ကာ ဗျူရိုကရက်များ၏ အုပ်ချုပ်မှုအောက်သို့ ရောက်ရှိခဲ့သည်။

"ဒီအမှုကို ဖွဲ့စည်းပုံအခြေခံဥပဒေဆိုင်ရာ တရားသူကြီးတွေက စစ်ဆေးနေပါတယ်။ ကျနော်တို့ရဲ့ လျှောက်ထား ချက်တွေဟာ အရမ်းခိုင်မာတာကြောင့် သတင်းကောင်း ကြားရလိမ့်မယ်လို့ မျှော်လင့်ပါတယ်" ဟု မိုဒီ အစိုးရအဖွဲ့ ၏ ဆုံးဖြတ်ချက်ကို စိန်ခေါ်သည့် ပထမဆုံး အသနားခံစာ တင်သွင်းသူများထဲတွင် တစ်ဦး အပါအဝင်ဖြစ်သည့်  ကက်ရှ်မီးယားအခြေစိုက် လွှတ်တော်အမတ်တစ်ဦးဖြစ်သူ ဟက်စ်နာအင် မာဆူဒီက ပြောကြားခဲ့သည်။

 ကက်ရှ်မီးယားဒေသမှာ အိန္ဒိယလုံခြုံရေးတပ်ဖွဲ့ကိုတွေ့ရစဉ်

မာဆူဒီသည် ကက်ရှ်မီးယား အထက် တရားရုံးတွင်လည်း တရားသူကြီးအဖြစ် တာဝန်ထမ်းဆောင်ခဲ့သူ ဖြစ်သည်။

ကက်ရှ်မီးယား၏ အကြီးဆုံး နိုင်ငံရေးပါတီဖြစ်သည့် National Conference ပါတီဝင် တစ်ဦးဖြစ်သူ မာဆူဒီက ၂၀၁၉ ဆုံးဖြတ်ချက်သည် အိန္ဒိယ၏ ဖွဲ့စည်းပုံအခြေခံဥပဒေတွင် ပြဋ္ဌာန်းထားသည့် စံသတ်မှတ်ချက်များ၊ လုပ်ထုံး လုပ်နည်းများအားလုံးကို ချိုးဖောက်ခဲ့သည်ဟု ပြောသည်။ 

ကက်ရှ်မီးယား ဒေသခံ အများစုသည် ပါကစ္စတန်၏ အုပ်ချုပ်မှုအောက်တွင် နေထိုင်ရန် သို့မဟုတ် လွတ်လပ်သည့် နိုင်ငံတစ်ခုအဖြစ် ထူထောင်ရန် ဆန္ဒရှိနေကြသည်။

Source: အေပီ

CNI International News

ဘန်ကောက်၊ သြဂုတ် ၃

ထိုင်းရွေးကောက်ပွဲတွင် ဒုတိယမဲအများဆုံး ရရှိခဲ့သည့် ဖြူးထိုင်းပါတီသည် ရွေးကောက်ပွဲအနိုင်ရ Move Forward (MFP) ပါတီအား ချန်လှပ်ပြီး ကိုယ်ပိုင် ညွန့်ပေါင်းအစိုးရ တစ်ရပ်ကို ဖွဲ့စည်းသွားမည်ဟု ဘန်ကောက်ပို့စ်မှ ဖော်ပြ ခဲ့သည်။ 

ဖြူးထိုင်းပါတီ ခေါင်းဆောင် ချိုနန် သီရိကော (cholnan srikaew)က သြဂုတ် ၂ ရက် မွန်းလွဲပိုင်းတွင် ကြေညာ ချက် ထုတ်ပြန် ပြောကြားခဲ့ခြင်း ဖြစ်သည်။

ဖြူးထိုင်းနှင့် MFP သည် အစိုးရဖွဲ့ရန် ကြိုးပမ်းမှုအဖြစ် MFP က ဖွဲ့စည်းခဲ့သည့် (၈)ပါတီ ညွန့်ပေါင်းအဖွဲ့ထဲတွင် အကြီးဆုံးပါတီများ ဖြစ်သည်။

MFP သည် အောက်လွှတ်တော်နေရာ ၁၅၁ နေရာကို ရရှိခဲ့ပြီး၊ ဖြူးထိုင်းသည် နေရာ ၁၄၁ နေရာရရှိခဲ့သည်။ သို့သော် နေရာ ၅၀၀ ရှိသည့် အောက်လွှတ်တော်တွင် MFP နှင့် ဖြူးထိုင်းပါတီ နှစ်ခုပေါင်းမှ ၃၂၁ နေရာသာ ရရှိထားသည်။

၈ ပါတီ ညွန့်ပေါင်းအဖွဲ့ကိုတွေ့ရစဉ်

MFP သည် ပါတီခေါင်းဆောင်ဖြစ်သည့် ပီတာလင်ဂျာရိုရတ် (Pita Limjaroenrat) ကို ဝန်ကြီးချုပ်အဖြစ် အဆိုတင်သွင်းခဲ့သော်လည်း အထက်နှင့် အောက်လွှတ်တော် နှစ်ရပ်ပေါင်း၏ လိုအပ်သည့် မဲအရေအတွက် မရခဲ့ဘဲ အစိုးရဖွဲ့နိုင်ခဲ့ခြင်း မရှိပေ။

ထို့နောက် MFP သည် ညွန့်ပေါင်းအစိုးရ ဖွဲ့စည်းရေးအတွက် ဖြူးထိုင်းပါတီကို ဦးဆောင်ခွင့် ပြုခဲ့သည်။ 

အထက်လွှတ်တော် အမတ်များနှင့် အခြားပါတီများမှ ရွေးကောက်ခံ အမတ်များသည် တော်ဝင်မိသားစုအား အကာအကွယ်ပေးထားသည့် ပြစ်မှုဆိုင်ရာဥပဒေ ပုဒ်မ ၁၁၂ ကို ပြောင်းလဲလိုသည့် MFP ၏ ရပ်တည်ချက်ကို ဆန့်ကျင်ခဲ့ကြသည်။

MFP သည် လွှတ်တော်၏ လုံလောက်သည့် ထောက်ခံမှုကို မရရှိခဲ့သဖြင့် (၈) ပါတီ ညွန့်ပေါင်းအဖွဲ့သည် အခြားပါတီများ၊ အထက်လွှတ်တော် အမတ်များထံမှ ထောက်ခံမှုများကို ရရှိစေရန် ဖြူးထိုင်းပါတီအား တာဝန် ပေးခဲ့သည်။

ထိုသို့လုပ်ဆောင်ခြင်းဖြင့် အစိုးရဖွဲ့နိုင်မည်ဖြစ်ကြောင်း ဖြူးထိုင်းပါတီ ခေါင်းဆောင်က သြဂုတ် ၂ ရက်တွင် ပြုလုပ်ခဲ့သည့် သတင်းစာ ရှင်းလင်းပွဲတွင် ပြောကြားခဲ့သည်။

"သူတို့ (ညွန့်ပေါင်းမဟာမိတ်ပါတီများ) ကလည်း ဥပဒေပုဒ်မ ၁၁၂ ကို ပြင်ဆင်မှာကို လက်မခံပါဘူး။ တစ်ချို့ ပါတီတွေဆိုရင် MFP ပါရင် အစိုးရအဖွဲ့ထဲ မဝင်ဘူးဆိုပြီးတော့တောင် ပြောတာမျိုးတွေ ရှိခဲ့ပါတယ်" ဟု ဒေါက်တာ ချိုနန်က ပြောသည်။

 ဖြူးထိုင်းပါတီက ၀န်ကြီးချုပ်လောင်း ဆရတ်သာသာဗီဆင်ကို တွေ့ရစဉ်

ထို့ကြောင့် သြဂုတ် ၂ ရက် နံနက်ပိုင်းက ပြုလုပ်ခဲ့သည့် အစည်းအဝေးတွင် ဖြူးထိုင်းပါတီသည် MFP ကို (၈) ပါတီ ညွန့်ပေါင်းအဖွဲ့ထဲမှ ချန်လှပ်ကြောင်းနှင့် မိမိတို့၏ ဝန်ကြီးချုပ် ကိုယ်စားလှယ်လောင်းအဖြစ် ဆရတ်သာ သာဗီဆင် (Srettha Thavisin) ကို အမည်စာရင်း တင်သွင်းမည်ဖြစ်ကြောင်း ပြောကြားခဲ့သည်။

"ဖြူးထိုင်းနဲ့ မစ္စတာ ဆရတ်သာဟာ ဥပဒေပုဒ်မ ၁၁၂ ကို ဒီအတိုင်း ဆက်လက်ထားရှိမှာပါ။ ညွန့်ပေါင်း အစိုးရ အဖွဲ့သစ်မှာ Move Forward ပါတီ ပါဝင်မှာ မဟုတ်ပါဘူး" ဟု ဒေါက်တာချိုနန်က ပြောကြားခဲ့သည်။

Source: ဘန်ကောက်ပို့စ်

CNI International News

ကိယက်ဗ်၊ သြဂုတ် ၃

ရိုမေးနီးယားမှ ဖြတ်သန်းစီးဆင်းလာသည့် ဒါနူဘီ (Danube) မြစ်ကမ်းပေါ်ရှိ ယူကရိန်း၏ အဓိက ကုန်းတွင်းပိုင်း ဆိပ်ကမ်းကို သြဂုတ် ၂ ရက်တွင် ရုရှားက ဒရုန်းဖြင့် တိုက်ခိုက်ခဲ့ခြင်းကြောင့် ကမ္ဘာလုံးဆိုင်ရာ အစားအစာ ဈေးနှုန်းများ ပိုမိုမြင့်တက်လာခဲ့သည်ဟု ရိုက်တာမှ ဖော်ပြခဲ့သည်။

ထိုတိုက်ခိုက်မှုများကြောင့် အစ်ဇ်မေးလ် (Izmail) ဆိပ်ကမ်းရှိ အဆောက်အအုံများ ပျက်စီးသွားခဲ့သလို ယူကရိန်း ၏ ဂျုံများကို တင်ဆောင်ရန် အဆိုပါဆိပ်ကမ်းသို့ ရောက်ရှိလာမည့် သင်္ဘောလမ်းကြောင်းများလည်း ရပ်တန့်သွား ခဲ့သည်။

ဒါဇင်နှင့်ချီသည့် နိုင်ငံတကာ သင်္ဘောများသည် ဒါနူဘီမြစ်ဝတွင် ရပ်တန့်နေခြင်း သို့မဟုတ် ကျောက်ချရပ်နား ထားခြင်းတို့ကို တွေ့ရှိရကြောင်း ကုန်ကူးသင်္ဘောများ ခြေရာခံ မှတ်တမ်းတွင် ဖော်ပြထားသည်။ 
သင်္ဘောအများစုသည် ရုရှား၏ ပိတ်ဆို့မှုကို ဖီဆန်ပြီး ပယ်လယ်နက်မှတစ်ဆင့် အစ်ဇ်မေးလ် ဆိပ်ကမ်းတွင် ဆိုက်ကပ်ရန် မှတ်ပုံတင်ထားသည့် သင်္ဘောများ ဖြစ်သည်။

ဂျုံများကိုတွေ့ရစဉ်

ဇူလိုင်လလယ်က ယူကရိန်း၏ ပင်လယ်နက် ဆိပ်ကမ်းများကို ရုရှားက ပိတ်ဆို့ခဲ့ပြီးကတည်းက နေတိုးအဖွဲ့ဝင် ရိုမေးနီးယားနိုင်ငံမှ ဖြတ်သန်းစီးဆင်းလာသည့် ဒါနူဘီမြစ်၏ အဆိုပါဆိပ်ကမ်းသည် ယူကရိန်း၏ ဂျုံတင်ပို့ ရောင်းချမှုအတွက် အဓိက လမ်းကြောင်းတစ်ခု ဖြစ်ခဲ့သည်။

ယူကရိန်းအာဏာပိုင်များက ထုတ်ပြန်သည့် ဗွီဒီယိုထဲတွင် မီးသတ်သမားများသည် မီးလောင်နေသည့် အထပ်မြင့် အဆောက်အအုံအား မီးငြှိမ်းသတ်နေပုံကို ဖော်ပြခဲ့သည်။

ထိုတိုက်ခိုက်မှုကြောင့် ထိခိုက်သေဆုံးမှုများနှင့် ပတ်သက်ပြီး သတင်းများ ထွက်ပေါ်ခဲ့ခြင်း မရှိကြောင်း အိုဒက်ဆာ (Odessa) ပြည်နယ် အုပ်ချုပ်ရေးမှူး အိုလက် ကစ်ပါ (Oleh Kiper)က Telegram တွင် ရေးသားဖော်ပြခဲ့သည်။

 ဇာလန်းစကီးကိုတွေ့ရစဉ်

" ရုရှား အကြမ်းဖက်သမားတွေဟာ ဆိပ်ကမ်းတွေ၊ ဂျုံတွေနဲ့ ကမ္ဘာလုံးဆိုင်ရာ စားနပ်ရိက္ခာ လုံခြုံရေးကို နောက် တစ်ကြိမ် တိုက်ခိုက်ခဲ့ပါတယ်"ဟု ယူကရိန်းသမ္မတ ဇာလန်စကီး(Volodymyr Zelenskiy) က ပြောသည်။

ကမ္ဘာ့ထိပ်သီး စားနပ်ရိက္ခာတင်ပို့သည့် နိုင်ငံများထဲတွင် ပါဝင်သော ယူကရိန်း၏ ဆိပ်ကမ်းတွင် ထိုတိုက်ခိုက်မှု ဖြစ်ပွားပြီးနောက် ကမ္ဘာလုံးဆိုင်ရာ စားနပ်ရိက္ခာထောက်ပံ့မှုကို ထိခိုက်စေနိုင်သည့် စိုးရိမ်မှုများကြောင့် ချီကာဂို ဂျုံဈေးသည် ၅ ရာခိုင်နှုန်းနီးပါး မြင့်တက်ခဲ့ကာ ဂျုံ (၈)ဂါလံဝင်ပုံး တစ်ပုံးကို ၆ ဒသမ ၆၀ ဒေါ်လာအထိ ရှိခဲ့သည်။

Source: ရိုက်တာ