CNI International News

ဆိုးလ်၊ သြဂုတ် ၁၈ 

အမေရိကန်၊ တောင်ကိုရီးယားနှင့် ဂျပန်တို့ ပြုလုပ်မည့် သုံးပွင့်ဆိုင် အစည်းအဝေးကို တုံ့ပြန်သည့် အနေဖြင့် မြောက်ကိုရီးယားသည် တိုက်ချင်းပစ် ဒုံးကျည်တစ်စင်း ပစ်လွှတ်ခြင်း သို့မဟုတ် အခြားစစ်ရေး လုပ်ဆောင်မှု တစ်ခု ပြုလုပ်ဖွယ်ရှိနေသည်ဟု တောင်ကိုရီးယား လွှတ်တော်အမတ်တစ်ဦးက ပြောကြားခဲ့ကြောင်း ရိုက်တာမှ ဖော်ပြခဲ့သည်။

အမေရိကန်သမ္မတ ဂျိုးဘိုင်ဒန် (Joe Biden)သည် သြဂုတ် ၁၈ ရက်တွင် အမေရိကန်နိုင်ငံ Camp David စစ်စခန်းတွင် တောင်ကိုရီးယားသမ္မတ ယွန်းဆော့ရွဲ(Yoon Suk Yeol)၊ ဂျပန်ဝန်ကြီးချုပ် ဖူမီယို ကီရှီဒါ (Fumio Kishida) တို့နှင့် တွေ့ဆုံမည်ဖြစ်သည်။ 

တောင်ကိုရီးယားလွှတ်တော်အမတ် ယူဆန်ဘမ်ကိုတွေ့ရစဉ်

ဒေသတွင်း တရုတ်၏ သြဇာလွှမ်းမိုးမှု မြင့်တက်နေခြင်းနှင့် မြောက်ကိုရီးယား၏ နျူကလီးယား ခြိမ်းခြောက်မှုများ မြင့်တက်နေချိန်တွင် ၎င်းတို့သုံးနိုင်ငံအကြား ဆက်ဆံရေးကို တိုးမြှင့်ရေး အစည်းအဝေး ပြုလုပ်ရန် စီစဉ်ခဲ့သည်။

အမေရိကန်၊ တောင်ကိုရီးယားနှင့် ဂျပန်တို့အကြား စစ်ရေးပူးပေါင်း ဆောင်ရွက်မှုများကို မြောက်ကိုရီးယားက ဝေဖန်ရှုတ်ချခဲ့သည်။

ထို့နောက် အဆိုပါ သုံးနိုင်ငံသည် အာရှနေတိုးအဖွဲ့ ပုံစံမျိုး ဖန်တီးနေသည်ဟု မြောက်ကိုရီးယားဘက်က ပြောကြားခဲ့သည်။

ထို့ပြင် မြောက်ကိုရီးယားသည် သြဂုတ်လကုန် သို့မဟုတ် စက်တင်ဘာလ အစောပိုင်းတွင် စပိုင်ဂြိုဟ်တု တစ်စင်းကို ထပ်မံလွှတ်တင်ဖွယ် ရှိနေသည်။

မေလက ပထမအကြိမ် စပိုင်ဂြိုဟ်တု လွှတ်တင်မှုသည် မအောင်မြင်ဘဲ ပျက်ကျခဲ့ပြီးနောက် ဒုတိယအကြိမ် လွှတ်တင်ရန် ပြင်ဆင်ခဲ့ခြင်း ဖြစ်သည်ဟု တောင်ကိုရီးယားလွှတ်တော်အမတ် ယူဆန်ဘမ်(Yoo Sang-bum)က သတင်းထောက်များကို ပြောကြားခဲ့သည်။

အမေရိကန်၊ တောင်ကိုရီးယား၊ ဂျပန် ခေါင်းဆောင် ၃ ဦးကိုတွေ့ရစဉ်

မြောက်ကိုရီးယားသည် စက်တင်ဘာ ၉ ရက်တွင် ကျရောက်သည့် နိုင်ငံထူထောင်မှု နှစ်ပတ်လည်နေ့တွင် စပိုင် ဂြိုဟ်တုကို လွှတ်တင်ရန် အလားအလာ ရှိသည်ဟုလည်း ယူဆန်ဘမ်က တောင်ကိုရီးယား အမျိုးသား ထောက်လှမ်းရေးဌာန အကြီးအကဲနှင့် အစည်းအဝေး ပြုလုပ်ပြီးချိန်တွင် ပြောကြားခဲ့သည်။

ထို့ပြင် ရုရှားနှင့် မြောက်ကိုရီးယားသည် ကာကွယ်ရေးပူးပေါင်း ဆောင်ရွက်မှုများကို မြှင့်တင်နေပြီး တောင်ကိုရီး ယား ထောက်လှမ်းရေးအဖွဲ့သည် ထိုအခြေအနေကို အနီးကပ် စောင့်ကြည့်နေသည်ဟု ယူဆန်ဘမ်က ပြောကြားခဲ့သည်။ 

အမေရိကန်ကလည်း မြောက်ကိုရီးယားသည် ယူကရိန်းစစ်ပွဲတွင် ရုရှားအတွက် လက်နက်များ ထောက်ပံ့ပေးနေ သည်ဟုဆိုကာ ဝေဖန်ရှုတ်ချခဲ့သည်။ 

ထို့ပြင် ရုရှားနှင့်မြောက်ကိုရီးယားအကြား လက်နက်ရောင်းဝယ်ရေး သဘောတူညီမှုများတွင် ပါဝင်ပတ်သက် သည်ဟု စွပ်စွဲထားသည့် အဖွဲ့အစည်းသုံးခုကို အမေရိကန်က သြဂုတ် ၁၆ ရက်၌ ပိတ်ဆို့မှုများ ချမှတ်ခဲ့သည်။

မြောက်ကိုရီးယားနှင့် ရုရှားကမူ ၎င်းတို့ နှစ်နိုင်ငံအကြား လက်နက်များ လွှဲပြောင်းပို့ဆောင်ခြင်း မရှိကြောင်း ငြင်းဆိုခဲ့သည်။

Source: ရိုက်တာ

CNI International News

အစ္စလာမ်မာဘက်၊ သြဂုတ် ၁၈

အာဖဂန်နစ္စတန်နိုင်ငံတွင် တာလီဘန်တို့ အာဏာပြန်ရခဲ့သည့် ၂ နှစ်ပြည့် နှစ်ပတ်လည်အဖြစ် သြဂုတ် ၁၅ ရက် တွင် အခမ်းအနားတစ်ရပ် ကျင်းပနေချိန် ၎င်းတို့နှင့် ကာလကြာရှည် မဟာမိတ်ဖြစ်ခဲ့သည့် အိမ်နီးချင်း ပါကစ္စတန် နှင့် ဆက်ဆံရေး တင်းမာမှုများ ပိုမိုမြင့်တက်လာခဲ့သည်ဟု အယ်လ်ဂျာဇီးယားမှ ဖော်ပြခဲ့သည်။

အာဖဂန်နစ္စတန်နှင့် နယ်စပ်ချင်း ထိစပ်နေသည့် ပါကစ္စတန်၏ လူမျိုးစုဒေသတွင် ဆိုးရွားပြင်းထန်သည့် တိုက်ခိုက်မှုများ ဖြစ်ပွားခဲ့ခြင်းအတွက် ပါကစ္စတန်က အာဖဂန်နစ္စတန်ကို ဝေဖန်ပြစ်တင်ခဲ့သည်။

နောက်ဆုံး ဖြစ်ပွားခဲ့သည့် အသေခံဗုံးခွဲ တိုက်ခိုက်မှု ဖြစ်စဉ်တစ်ခုသည် ဇူလိုင်လကုန်ပိုင်းက ဘာဂျူအာ (Bajaur) ခရိုင်တွင် ဖြစ်ပွားခဲ့ရာ လူ ၅၄ ဦးကျော် သေဆုံးခဲ့သည်။

အဆိုပါ တိုက်ခိုက်မှုကို ၎င်းတို့လုပ်ဆောင်ခဲ့ခြင်း ဖြစ်သည်ဟု ခိုရာဆန်ပြည်နယ်မှ အိုင်အက်စ်အဖွဲ့ (ISKP/ISIS-K) က ကြေညာခဲ့သည်။

အာဖဂန်၏ အာဏာရ တာလီဘန်အစိုးရသည် နယ်စပ်ဖြတ်ကျော် တိုက်ခိုက်မှုများ ပြုလုပ်နေသည့် လက်နက်ကိုင် အဖွဲ့များကို လုံလောက်သည့် ထိန်းချုပ်ဟန့်တားမှုများ မလုပ်ခဲ့ကြောင်း ပါကစ္စတန် အရာရှိများက စွပ်စွဲခဲ့သည်။

အမေရိကန်နဲ့ တာလီဘန်တို့ ဒိုဟာ သဘောတူညီချက်ကို လက်မှတ်ထိုးခဲ့စဉ်

"ကျနော်တို့အနေနဲ့ နိုင်ငံတကာဥပဒေနဲ့အညီ ကိုယ့်ကိုယ်ကို ကာကွယ်ဖို့ လုပ်ဆောင်သွားမှာပါ။ တကယ်လို့ အာဖဂန် အာဏာပိုင်တွေက အရေးယူဆောင်ရွက်တာမျိုး မရှိဘူးဆိုရင် ကျနော်တို့ဘက်က တစ်ခုခု လုပ်ရပါ လိမ့်မယ်"ဟု နိုင်ငံရေးသမားတစ်ဦးကို ပစ်မှတ်ထားလုပ်ကြံသည့် ဘာဂျူအာ ဗုံးခွဲတိုက်ခိုက်မှု အပြီးတွင် ပါကစ္စတန်နိုင်ငံခြားရေးဝန်ကြီးဟောင်း ဘီလာဝယ် ဘူတို ဇာဒါရီ (Bilawal Bhutto Zardari) က ပြောသည်။

ပါကစ္စတန် စစ်တပ်၏ ဗိုလ်ချုပ်ကြီး ဆေးယက် အာဆင် မူနီယာ (Syed Asim Munir) ကလည်း ပါကစ္စတန် မြေပေါ်တွင် ဖြစ်ပွားသည့် တိုက်ခိုက်မှုများတွင် အာဖဂန်နိုင်ငံသားများ ပါဝင်ပတ်သက်နေခြင်းကို ရှုတ်ချခဲ့သည်။

ပါကစ္စတန်နိုင်ငံခြားရေးဝန်ကြီးဟောင်း ဘီလာဝယ် ဘူတို ဇာဒါရီကို တွေ့ရစဉ်

အဆိုပါ လက်နက်ကိုင်အဖွဲ့များသည် ဒေသတွင်း ငြိမ်းချမ်းရေးနှင့် တည်ငြိမ်ရေးကို လျော့ပါးစေရန် လုပ်ဆောင်နေ သည်ဟု ၎င်းက ပြောသည်။

ထိုတိုက်ခိုက်မှုများသည် တာလီဘန်နှင့် အမေရိကန်အကြား သဘောတူညီမှု ရရှိခဲ့သည့် ၂၀၂၀ ဒိုဟာ ငြိမ်းချမ်းရေး သဘောတူညီချက်နှင့် သွေဖည်နေသည်ဟု ဗိုလ်ချုပ်ကြီး ဆေးယက် အာဆင် မူနီယာ ပြောသည်။ 

ဒိုဟာ သဘောတူညီချက်တွင် တာလီဘန်တို့သည် လက်နက်ကိုင်အဖွဲ့များအား အာဖဂန်၏နယ်မြေကို အသုံးပြုပြီး တိုက်ခိုက်မှုများ ပြုလုပ်ခွင့် ပေးမည်မဟုတ်ဟု ကတိပြုခဲ့ခြင်း ဖြစ်သည်။

တာလီဘန်အဖွဲ့ကလည်း ဘာဂျူအာ ဗုံးခွဲတိုက်ခိုက်မှုဖြစ်စဉ်ကို ရှုတ်ချခဲ့ပြီး ပါကစ္စတန်၏ စွဲချက်များကို ငြင်းဆိုခဲ့ သည်။

"ပါကစ္စတန်မှာ မကြာသေးခင်က ဖြစ်ပွားခဲ့တဲ့ လုံခြုံရေး ဖြစ်စဉ်တွေအပြီးမှာ ပါကစ္စတန် အရာရှိတွေဟာ ကိုယ့် နိုင်ငံ လုံခြုံရေးကို မြှင့်တင်ဖို့ထက် အာဖဂန်နိုင်ငံအပေါ်ကိုပဲ အပြစ်ပုံချခဲ့ပါတယ်"ဟု တာလီဘန်အဖွဲ့၏ ပြောရေးဆိုခွင့်ရှိသူ ဇာဘီဟူလာ မူဂျာဟစ်(Zabihullah Mujahid)က ပြောကြားခဲ့သည်။

ထိုကဲ့သို့ တစ်ဖက်နှင့်တစ်ဖက် အပြန်အလှန် စွပ်စွဲပြစ်တင်မှုများသည် ပါကစ္စတန်နှင့် တာလီဘန်အဖွဲ့အကြား ဆက်ဆံရေး တင်းမာမှုကို ပိုမိုမြင့်တက်စေခဲ့ပြီး ပါကစ္စတန်အစိုးရသည် နိုင်ငံအတွင်း တိုက်ခိုက်မှုများ မြင့်တက် နေသည့်် အခြေအနေကို ရင်ဆိုင်နေရသည်။

Source: အယ်လ်ဂျာဇီးယား

CNI International News

ဂျိုဟန်နက်စဘတ်ချ်၊ သြဂုတ် ၁၈

ကမ္ဘာ့အရေးတွင် အနောက်အုပ်စု၏ သြဇာလွှမ်းမိုးမှုကို စိန်ခေါ်နိုင်မည့် ပထဝီနိုင်ငံရေး အင်အားစုအဖြစ် ပြောင်းလဲ ရေးအတွက် ဆွေးနွေးရန် BRICS အဖွဲ့ဝင်နိုင်ငံများမှ ခေါင်းဆောင်များသည် လာမည့်သီတင်းပတ်တွင် တောင်အာဖရိကနိုင်ငံတွင် အစည်းအဝေး တစ်ရပ် ကျင်းပမည်ဟု ရိုက်တာမှ ဖော်ပြခဲ့သည်။

ဘရာဇီးလ်၊ ရုရှား၊ အိန္ဒိယ၊ တရုတ်နှင့် တောင်အာဖရိကနိုင်ငံများ ဖွဲ့စည်းထားသည့် BRICS အဖွဲ့၏ အဆိုပါ အစည်းအဝေးသို့ ယူကရိန်းစစ်ပွဲနှင့်ပတ်သက်ပြီး စစ်ရာဇဝတ်မှုများဖြင့် နိုင်ငံတကာဖမ်းဝရမ်း ထုတ်ခံထားရသည့် ရုရှားသမ္မတပူတင် တက်ရောက်မည် မဟုတ်ကြောင်း သိရသည်။ 

တောင်အာဖရိကနိုင်ငံက အိမ်ရှင်အဖြစ် လက်ခံကျင်းပမည့် ထိုအစည်းအဝေးကို တရုတ်သမ္မတ ရှီကျင့်ဖျင် (Xi Jinping) ၊ ဘရာဇီးလ်သမ္မတ လူးစ် အင်နာစီယို လူလာ ဒါ ဆေးလ်ဗား (Luiz Inacio Lula da Silva) နှင့် အိန္ဒိယ ဝန်ကြီးချုပ် မိုဒီ (Modi) တို့အပြင် ကမ္ဘာ့တောင်ခြမ်းမှ နိုင်ငံခေါင်းဆောင်များ တက်ရောက်မည် ဖြစ်သည်။

အမေရိကန်သမ္မတ ဘိုင်ဒန်ကိုတွေ့ရစဉ်

BRICS အဖွဲ့ဝင် နိုင်ငံများအကြား မတူကွဲပြားမှုများ ရှိနေသည့်တိုင် တူညီသည့် သဘောထား တစ်ခုမှာ အမေရိကန်နှင့် ၎င်း၏ ချမ်းသာကြွယ်ဝသည့် မဟာမိတ်နိုင်ငံများသည် နိုင်ငံတကာ စံချိန်စံညွှန်းများကို ပြဋ္ဌာန်းခဲ့ သော်လည်း ထိုစံနှုန်းများကို ၎င်းတို့ကိုယ်တိုင် လိုက်နာကျင့်သုံးခြင်း မရှိဆိုသည့်အချက် ဖြစ်သည်။

သြဂုတ် ၂၂ ရက်မှ ၂၄ ရက်အထိ ပြုလုပ်မည့် BRICS အစည်းအဝေးအတွင်း ဆွေးနွေးမည့် အကြောင်းအရာများနှင့် ပတ်သက်ပြီး အသေးစိတ် အချက်အလက်များ အနည်းငယ်သာ ထွက်ပေါ်ခဲ့သော်လည်း ထိုအစည်းအဝေးကို တက် ရောက်ရန် စိတ်ဝင်စားသည့် နိုင်ငံပေါင်း ၄၀ ခန့် ရှိသည်ဟု တောင်အာဖရိကက ပြောကြားခဲ့သည်။

ထိုနိုင်ငံများအနက် ဆော်ဒီအာရေဗျ၊ အာဂျင်တီးနားနှင့် အီဂျစ်နိုင်ငံတို့လည်း ပါဝင်ကြောင်း သိရသည်။

တရုတ်သည် အမေရိကန်နှင့် ပထဝီနိုင်ငံရေး သြဇာလွှမ်းမိုးမှုကို ယှဉ်ပြိုင်ရန် BRICS အဖွဲ့ကို ပိုမိုအင်အား တောင့် တင်းစေရန် ကြိုးပမ်းနေသော်လည်း ဘရာဇီးလ်နိုင်ငံကမူ နိုင်ငံတကာ အသိုင်းအဝိုင်းတွင် ၎င်း၏ သြဇာလျော့ နည်းနေသည့် အနေအထားကြောင့် BRICS အဖွဲ့ကို အင်အားချဲ့ထွင်ရန် တွန့်ဆုတ်နေသည်။

ရုရှားကတော့ ယူကရိန်းစစ်ပွဲနှင့်ပတ်သက်ပြီး သံတမန်ရေးအရ ဖယ်ကြဉ်ခံထားရသည့် အခြေအနေကို တန်ပြန် ရန် မိတ်ဖက်နိုင်ငံများကို လိုအပ်နေသဖြင့် BRICS တွင် အဖွဲ့ဝင်နိုင်ငံအသစ်များ ပိုမိုပါဝင်လာစေရန် ကြိုးပမ်းနေ သည်။ 

BRICS အဖွဲ့၀င် ခေါင်းဆောင်များကိုတွေ့ရစဉ်

အထူးသဖြင့် ရုရှားအတွက် အာဖရိကတွင် အရေးအကြီးဆုံး မဟာမိတ်နိုင်ငံမှာ တောင်အာဖရိကနိုင်ငံ ဖြစ်သည်။

အိန္ဒိယနိုင်ငံကမူ အနောက်အုပ်စုနှင့် BRICS အဖွဲ့အကြား ကြားနေရပ်တည်မည့် ပုံစံမျိုး ရှိနေသည်ဟု ကျွမ်းကျင် သူများက ပြောကြားခဲ့သည်။ 

တောင်အာဖရိကတွင် ပြုလုပ်မည့် ၁၅ ကြိမ်မြောက် BRICS အစည်းအဝေး၏ ခေါင်းစဉ်မှာ "BRICS နှင့် အာဖရိက" ဖြစ်ပြီး ထိုအစည်းအဝေးအတွင်း ကမ္ဘာ့အင်အားကြီး နိုင်ငံများအကြား ပြိုင်ဆိုင်မှုများကြောင့် ဖြစ်ပေါ်လာမည့် ခြိမ်းခြောက်မှုများနှင့်အတူ BRICS အဖွဲ့အတွင်း ဆက်ဆံရေးများကို မည်ကဲ့သို့ တည်ဆောက်မည်ဆိုသည့် အချက်ကို အဓိကထား ဆွေးနွေးသွားမည်ဖြစ်သည်။ 

BRICS အဖွဲ့ဝင် ငါးနိုင်ငံ၏ လူဦးရေသည် ကမ္ဘာ့လူဦးရေ၏ ၄၀ ရာခိုင်နှုန်းဖြစ်ပြီး ထိုငါးနိုင်ငံ၏ စီးပွားရေး အင်အား စုစုပေါင်းသည် ကမ္ဘာလုံးဆိုင်ရာ စီးပွားရေး၏ လေးပုံတစ်ပုံ ရှိသည်။

Source: ရိုက်တာ

CNI International News

ဝါဆော၊ သြဂုတ် ၁၆

ပိုလန်နိုင်ငံ ဝါဆောမြို့တော်တွင် ဒုတိယကမ္ဘာစစ်နောက်ပိုင်း အကြီးဆုံး စစ်ရေးပြအခမ်းအနားကို သြဂုတ် ၁၅ ရက်က ပြုလုပ်ခဲ့သည်ဟု ရိုက်တာမှ ဖော်ပြခဲ့သည်။

နေတိုးအဖွဲ့ဝင်ဖြစ်သည့် ပိုလန်သည် ရုရှားကို စစ်အင်အားပြရန်နှင့် အောက်တိုဘာလတွင် ပြုလုပ်မည့် ရွေးကောက်ပွဲအတွက် မဲဆန္ဒရှင်များကို မဲဆွယ်စည်းရုံးသည့်အနေဖြင့် ထိုစစ်ရေးပြ အခမ်းအနားကို ခမ်းနားစွာ ပြုလုပ်ခဲ့ခြင်းဖြစ်သည်ဟု ကျွမ်းကျင်သူများက ယူဆထားသည်။
ယူကရိန်းကို ရုရှားက ကျူးကျော်ခဲ့ပြီးနောက် ပိုလန်၏ အာဏာရပါတီဖြစ်သည့် Law and Justice ပါတီသည် နိုင်ငံ၏ စစ်အင်အားကို မြှင့်တင်ရန် ဦးစားပေးလုပ်ဆောင်ခဲ့သည်။

ထို့နောက် နိုင်ငံ့ လုံခြုံရေးအာမခံချက်ကို ပြသသည့်အနေဖြင့် စစ်လက်နက် အင်အားများကို ပြသပြီး မဲဆန္ဒရှင် များအား မဲဆွယ်စည်းရုံးသည့်ပုံစံမျိုး လုပ်ဆောင်ခဲ့ခြင်း ဖြစ်သည်။

"ဒီစစ်ရေးပြ အခမ်းအနားကတော့ အရင်လုပ်ခဲ့တဲ့ စစ်ရေးပြ အခမ်းအနားတွေနဲ့ မတူပါဘူး။ ဒီစစ်ရေးပြ အခမ်းအ နားမှာ ပိုလန်စစ်တပ်ရဲ့ အဆင့်မြှင့်တင် မွမ်းမံထားတဲ့ စစ်လက်နက် အင်အားတွေကို မြင်တွေ့ရမှာဖြစ်ပါတယ်"ဟု ပိုလန်ကာကွယ်ရေးဝန်ကြီး မာရီရုစ် ဘလက်ဆက်က သြဂုတ် ၁၅ ရက်တွင် ပြောကြားခဲ့သည်။ 

ပိုလန်စစ်ရေးပြနေစဉ်

ဝါဆောတိုက်ပွဲ (Battle of Warsaw) တွင် ဆိုဗီယက်ယူနီယံအား ပိုလန်က အနိုင်ရခဲ့သည့် ၁၀၃ နှစ်ပြည့် နှစ်ပတ် လည်တွင် ပြုလုပ်ခဲ့သည့် ပိုလန် တပ်မတော်နေ့ စစ်ရေးပြ အခမ်းအနား၌ ပိုလန်နှင့် အခြားနေတိုး အဖွဲ့ဝင် နိုင်ငံ များမှ စစ်သား ၂၀၀၀ သည် စစ်လက်နက်ပစ္စည်းပေါင်း ၂၀၀ နှင့် လေယာဉ် ၉၂ စင်းနှင့်အတူ ဝါဆောမြို့တော်သို့ ချီတက်ခဲ့ကြသည်။

ထိုစစ်ရေးပြ အခမ်းအနားအတွင်း ပြသခဲ့သည့် စစ်လက်နက် ပစ္စည်းများအနက် အမေရိကန်မှ ဝယ်ယူခဲ့သည့် M1A1 Abrams တင့်ကားများ၊ တောင်ကိုရီးယားလုပ် K2 တင့်ကားများနှင့် K9 ဟောင်ဝပ်ဇာ အမြောက်များ၊ HIMARS ဒုံးပစ်လောင်ချာများနှင့် Patriot လေကြောင်း ကာကွယ်ရေးစနစ်များ ပါဝင်ခဲ့သည်။

ထို့ပြင် ပိုလန်နိုင်ငံလုပ် Borsuk ခြေလျင်တပ် တိုက်ခိုက်ရေးယာဉ်များနှင့် Rosomak ကျည်ကာကားများလည်း ပါဝင်ခဲ့သည်။ 

အဆိုပါ စစ်ရေးပြ အခမ်းအနားသည် ယခင်အစိုးရလက်ထက်က ရင်းနှီးမြှုပ်နှံမှု နည်းပါးခဲ့သည့် စစ်တပ်ကို ပြန်လည် တည်ဆောက်ခဲ့ရသည့် အခြေအနေကို ဖော်ပြရာရောက်သည်ဟု ၂၀၁၅ ခုနှစ်ကတည်းက အာဏာရ ခဲ့သည့် Law and Justice ပါတီက ပြောကြားခဲ့သည်။

ထို့ပြင် ယခုနှစ် ကာကွယ်ရေး ဘတ်ဂျက်အတွက် နိုင်ငံ့ဂျီဒီပီ၏ ၄ ရာခိုင်နှုန်းခန့်ကို သုံးစွဲခဲ့ပြီး စစ်တပ်၏ အင်အားကိုလည်း နှစ်ဆ မြှင့်တင်ခဲ့သည်ဟု Law and Justice ပါတီက ပြောကြားခဲ့သည်။

မည်သို့ပင်ဆိုစေ အတိုက်အခံ လွှတ်တော်အမတ်များကမူ အာဏာရပါတီသည် နိုင်ငံရေး အမြတ်ထုတ်ရန်အတွက် စစ်တပ်ကို အသုံးချခဲ့ခြင်းဖြစ်သည်ဟု ပြောကြားခဲ့သည်။

Source: ရိုက်တာ

CNI International News

နယူးဒေလီ၊ သြဂုတ် ၁၆

အကြမ်းဖက်မှုများ ဖြစ်ပွားခဲ့သည့် အိန္ဒိယ၏ အရှေ့မြောက်ပိုင်း မဏိပူရပြည်နယ်တွင် ငြိမ်းချမ်းရေး ပြန်လည် ရရှိနေပြီဟု အိန္ဒိယဝန်ကြီးချုပ် မိုဒီက ပြောကြားခဲ့ကြောင်း ရိုက်တာမှ ဖော်ပြခဲ့သည်။ 

မဏိပူရပြည်နယ်တွင် မေလကတည်းက လူမျိုးစု အကြမ်းဖက်မှုများကြောင့် လူ ၁၈၀ ထက်မနည်း သေဆုံးခဲ့ကာ လူပေါင်း သောင်းချီ အိုးမဲ့အိမ်မဲ့ ဖြစ်ပေါ်ခဲ့သည်။

အိန္ဒိယဗဟိုအစိုးရသည် မြန်မာနိုင်ငံနှင့် နယ်စပ်ချင်း ထိစပ်နေသည့် မဏိပူရပြည်နယ်သို့ လုံခြုံရေးတပ်ဖွဲ့များ ဖြန့်ကြက်ချထားခဲ့သည်။ 

အိန္ဒိယတွင် လာမည့်နှစ် မေလ၌ ပြုလုပ်ရန် စီစဉ်ထားသည့် ရွေးကောက်ပွဲမတိုင်မီ မိုဒီ၏ အာဏာရ BJP ပါတီ လွှမ်းမိုးထားသည့် မဏိပူရပြည်နယ်၌ အကြမ်းဖက်မှုများ ဖြစ်ပွားခဲ့ခြင်း ဖြစ်သည်။

မဏိပူရပြည်နယ် လူမျိုးစုအဓိကရုန်းကြောင့် နေရပ်စွန့်ခွာ တိမ်းရှောင်လာကြသူများကိုတွေ့ရစဉ်

"ပြီးခဲ့တဲ့ ရက်ပိုင်းကတော့ မဏိပူရမှာ ငြိမ်းချမ်းနေတဲ့ သတင်းတွေကို ကျနော်တို့ ရရှိခဲ့ပါတယ်။ အိန္ဒိယဟာ မဏိပူရ ဒေသခံတွေနဲ့ အတူရှိနေပါတယ်။ မဏိပူရ ဒေသခံတွေအနေနဲ့ ငြိမ်းချမ်းရေးကို ဆက်လက် ကိုင်ဆွဲသွားဖို့ တစ်နိုင်ငံလုံးက ဆန္ဒရှိနေပါတယ်" ဟု မိုဒီက သြဂုတ် ၁၅ ရက်တွင် ကျရောက်သည့် အိန္ဒိယ၏ လွတ်လပ်ရေးနေ့ တွင် နယူးဒေလီမြို့တော်ရှိ Red Fort (အနီရောင်ခံတပ်)ခံတပ်တွင် မိန့်ခွန်းပြောကြားခဲ့သည်။

မဏိပူရပြည်နယ်တွင် ကူကီး (Kuki) လူမျိုးစုနှင့် ကသည်း (Meitei) လူမျိုးစုများအကြား ပညာရေး၊ အလုပ်အကိုင်၊ သြဇာလွှမ်းမိုးမှုများနှင့်ပတ်သက်ပြီး အစိုးရထံမှ အကျိုးအမြတ်များ ရရှိရေးအတွက် ပြိုင်ဆိုင်ရာမှ အကြမ်းဖက်မှု များ ဖြစ်ပွားလာခဲ့ခြင်း ဖြစ်သည်။

သေဆုံးသူများထဲတွင် အမျိုးသမီး ၂၁ ဦး ပါဝင်ခဲ့ပြီး အဓမ္မပြုကျင့်မှုဖြစ်စဉ်များ ရှိခဲ့သဖြင့် လုံခြုံရေးကို ပြန်လည် ထိန်းသိမ်းရန် BJP ပါတီ၏ စွမ်းဆောင်နိုင်စွမ်းအပေါ် ပြည်တွင်း/ပြည်ပမှ မေးခွန်းများ ထွက်ပေါ်လာခဲ့သည်။

မဏိပူရပြည်နယ်အတွင်းက လူမျိုးစုအဓိကရုန်းအတွင်း ကားများမီးရှို့ခံရစဉ်

မိုဒီကမူ မဏိပူရပြည်နယ်တွင် အမျိုးသမီးများအပေါ် လိင်ပိုင်းဆိုင်ရာ တိုက်ခိုက်မှုများကို ရှုတ်ချခဲ့ပြီး ပြင်းထန်စွာ အရေးယူမည်ဟု ကတိပြုခဲ့သည်။

သို့သော် အတိုက်အခံများကတော့ မိုဒီ၏ အစိုးရအဖွဲ့သည် မဏိပူရပြည်နယ်တွင် စိတ်သဘောထားကွဲစေရန် လုပ်ဆောင်နေကြောင်းနှင့် ပဋိပက္ခများကို အဆုံးသတ်စေရန် လုပ်ဆောင်ခဲ့ခြင်းမရှိကြောင်း စွပ်စွဲခဲ့သည်။

ထို့နောက် မိုဒီအစိုးရက ထိုစွပ်စွဲချက်များကို ငြင်းဆိုခဲ့ပြီး မဏိပူရပြည်နယ် အရေးနှင့်ပတ်သက်ပြီး ပြီးခဲ့သည့် သီတင်းပတ်က လွှတ်တော်တွင် အယုံအကြည်မရှိ အဆိုတင်သွင်းသည့် မဲခွဲဆုံးဖြတ်မှု၌ အတိုက်အခံများကို အနိုင်ရခဲ့သည်။

ထို့ပြင် ပြည်နယ်အစိုးရနှင့် ဗဟိုအစိုးရသည် မဏိပူရပြည်နယ် အရေးကို ငြိမ်းချမ်းစွာ ဖြေရှင်းရန် အားထုတ် ကြိုးပမ်းခဲ့ပြီး နောက်ထပ်လည်း ဆက်လက် လုပ်ဆောင်သွားမည်ဟု မိုဒီက ပြောကြားခဲ့သည်။

Source: ရိုက်တာ

CNI International News

မော်စကို၊ သြဂုတ် ၁၆

နိုင်ငံအများစုသည် ၎င်းတို့၏ အချုပ်အခြာအာဏာအတွက် ရပ်တည်ရန် ပြင်ဆင်လာခဲ့ပြီးဖြစ်ကြောင်း ရုရှားသမ္မတ ပူတင် (Vladimir Putin) က ပြောကြားခဲ့သည်ဟု တာ့စ်သတင်းဌာနမှ ဖော်ပြခဲ့သည်။

ပူတင်သည် ၁၁ ကြိမ်မြောက် မော်စကို နိုင်ငံတကာ လုံခြုံရေး ညီလာခံ (Moscow Conference on International Security) သို့ တက်ရောက်လာသည့် ဧည့်ပရိသတ်များကို ဗွီဒီယိုမှတဆင့် မိန့်ခွန်းပြောကြားရာတွင် အထက်ပါ အတိုင်း ပြောကြားခဲ့ခြင်း ဖြစ်သည်။

ထို့ပြင် ကမ္ဘာကြီး၏ အနာဂတ်ကို ပုံဖော်ရာတွင် နိုင်ငံတကာ အသိုင်းအဝိုင်းအနေနှင့် ပူးပေါင်းဆောင်ရွက်ကြရန် အချိန်တန်ပြီဟုလည်း ပူတင်က ပြောကြားခဲ့သည်။

"ဝင်ရိုးစုံကမ္ဘာ ပေါ်ပေါက်လာမယ့် အခင်းအကျင်း တစ်ခုဆီကို ဦးတည်ပြီး ရွေ့လျားနေတာကို ကျနော်တို့ မြင်တွေ့ နေရပါတယ်။ နိုင်ငံအများစုဟာလည်း သူတို့ရဲ့ အချုပ်အခြာ အာဏာတွေ၊ အမျိုးသား အကျိုးစီးပွားတွေ၊ ဓလေ့ ထုံးတမ်းတွေ၊ ယဉ်ကျေးမှုနဲ့ လူနေမှုဘဝတွေအတွက် ရပ်တည်ဖို့ ပြင်ဆင်ထားခဲ့ပြီး ဖြစ်ပါတယ်"ဟု ပူတင်က ပြောသည်။

မော်စကို နိုင်ငံတကာ လုံခြုံရေး ညီလာခံ ကျင်းပနေစဉ်

စီးပွားရေးစင်တာ အသစ်များနှင့် နိုင်ငံရေးသြဇာ ခိုင်မာမှုရှိလာသည့် အခြေအနေကိုလည်း ပူတင်က အလေးထား ပြောကြားခဲ့သည်။

"အဲဒီအခြေအနေက သန်းနဲ့ချီတဲ့ လူတွေရဲ့ ချမ်းသာသုခနဲ့ လူနေမှု အဆင့်အတန်း မြှင့်တင်ဖို့အပြင် စီးပွားရေး၊ လူမှုရေး၊ နည်းပညာနဲ့ သဘာဝပတ်ဝန်းကျင် ပြဿနာတွေကို အဖြေရှာနိုင်ဖို့အတွက် အားထုတ်ကြိုးပမ်းမှုတွေနဲ့ တည်ငြိမ်ပြီး တိုးတက်မှုရှိတဲ့ ကမ္ဘာလုံးဆိုင်ရာ ဖွံ့ဖြိုးမှုတွေအတွက် အထောက်အကူ ဖြစ်စေပါတယ်"ဟု ပူတင်က ပြောသည်။

မော်စကို ညီလာခံကဲ့သို့ ပွင့်လင်း၊ ရိုးသားမှုရှိပြီး ဘက်မလိုက်သည့် ဆွေးနွေးညှိနှိုင်းမှုများသည် အလွန်အရေးကြီး သည့် အခန်းကဏ္ဍမှ ပါဝင်ကြောင်း၊ အဘယ်ကြောင့်ဆိုသော် နိုင်ငံတကာ အသိုင်းအဝိုင်းသည် အနာဂတ်ကို ပုံဖော် ရာတွင် သာတူညီမျှမှုနှင့် ပူးပေါင်းဆောင်ရွက်မှု ပြုလုပ်ရန် လိုအပ်ကြောင်းလည်း ပူတင်က ပြောကြားခဲ့သည်။

Source: Tass

CNI International News

ဒက်ကာ၊ သြဂုတ် ၁၅ 

မာလီနိုင်ငံတွင် လုံခြုံရေးအခြေအနေ ယိုယွင်းလာသဖြင့် မာလီမြောက်ပိုင်းရှိ စစ်စခန်းတစ်ခုတွင် တပ်စွဲထားသည့် ကုလသမဂ္ဂ ငြိမ်းချမ်းရေး ထိန်းသိမ်းရေးတပ်ဖွဲ့များကို ပြန်လည်ရုပ်သိမ်းကြောင်း ကုလသမဂ္ဂက ပြောကြားခဲ့သည် ဟု ဘန်ကောက်ပို့စ်မှ ဖော်ပြခဲ့သည်။

စစ်ဆင်ရေးတစ်ခုအတွင်း ပစ်ခတ်ခံရမှုကြောင့် တပ်ဖွဲ့ဝင် ၃ ဦး ထိခိုက်ဒဏ်ရာ ရခဲ့သည်ဟု ကုလငြိမ်းချမ်းရေး ထိန်းသိမ်းရေးတပ်ဖွဲ့က နာရီအနည်းငယ် အကြာတွင် ထပ်မံ ထုတ်ပြန်ခဲ့သည်။

သြဂုတ် ၁၁ ရက်က မာလီမြောက်ပိုင်း ဘား (Ber) ကျေးရွာတွင် မာလီစစ်တပ်နှင့် လက်နက်ကိုင် အကြမ်းဖက် အဖွဲ့များအကြား ပစ်ခတ်တိုက်ခိုက်မှုများ ဖြစ်ပွားခဲ့ပြီး စစ်သား ၆ ဦးနှင့် စစ်သွေးကြွ ၂၄ ဦး သေဆုံးခဲ့ကြောင်း စစ်တပ်က ထုတ်ပြန်ခဲ့ပြီးနောက် အဆိုပါဒေသတွင် တပ်စွဲထားသည့် မာလီဆိုင်ရာ ကုလငြိမ်းချမ်းရေး ထိန်းသိမ်း ရေးတပ်ဖွဲ့ (MINUSMA) ၏ ရုပ်သိမ်းမှု ပေါ်ပေါက်လာခဲ့ခြင်း ဖြစ်သည်။

သြဂုတ် ၁၁ ရက်က ဘားကျေးရွားတွင် မာလီစစ်တပ်နှင့် ရုရှား၏ ကြေးစားစစ်သားအုပ်စု ဝဂ်နာတပ်ဖွဲ့ဝင်များ သည် မိမိတို့အဖွဲ့ကို တိုက်ခိုက်ခဲ့ခြင်း ဖြစ်သည်ဟု တူအာရက် (Tuareg) လူမျိုးစု၏ သူပုန်ဟောင်းများက ပြောကြားခဲ့သည်။

"ဒေသဆိုင်ရာ လုံခြုံရေး အခြေအနေ ယိုယွင်းလာပြီး မိမိတို့ တပ်ဖွဲ့အတွက် အန္တရာယ်တွေ မြင့်တက်လာတာ ကြောင့် MINUSMA ဟာ ဘားကျေးရွာကနေ တပ်ဖွဲ့တွေ ရုပ်သိမ်းမှုကို လျင်လျင်မြန်မြန် ဆောင်ရွက်ခဲ့ပါတယ်"ဟု မကြာသေးမီက X ဟု အမည်ပြောင်းလဲခဲ့သည့် Twitter တွင် ကုလတပ်ဖွဲ့က ရေးသားဖော်ပြခဲ့သည်။

မာလီနိုင်ငံမှာ လုံခြုံရေးကင်းလှည့်နေစဉ်

ထို့ပြင် သက်ဆိုင်ရာ အဖွဲ့များ အားလုံးအနေနှင့် ကုလတပ်ဖွဲ့များ၏ လုပ်ငန်းစဉ်ကို ပိုမိုရှုတ်ထွေးစေနိုင်မည့် လုပ်ရပ်များကို လုပ်ဆောင်ခြင်း မပြုရန်လည်း တိုက်တွန်းခဲ့သည်။

တပ်ဖွဲ့များ ရုပ်သိမ်းမှုတွင် ပါဝင်သည့် စစ်သား အရေအတွက်နှင့် မည်သည့်ရက်တွင် ရုပ်သိမ်းခဲ့သည်ဆိုသည့် အသေးစိတ် အချက်အလက်များကိုမူ ထုတ်ပြန်ခြင်းမရှိခဲ့ပေ။

သြဂုတ် ၁၃ ရက်တွင် Twitter ခေါ် X တွင် တင်ခဲ့သည့် ပို့စ်တစ်ခုတွင် MINUSMA မော်တော်ယာဉ်တန်းသည် ဘားကျေးရွာမှ ယနေ့ထွက်ခွာခဲ့ပြီး လမ်းတွင် နှစ်ကြိမ် တိုက်ခိုက်ခံခဲ့ရကာ တပ်ဖွဲ့ဝင် သုံးဦး ဒဏ်ရာရရှိခဲ့သည်ဟု ဖော်ပြခဲ့သည်။

မာလီနိုင်ငံရှိ ကုလတပ်ဖွဲ့ကိုတွေ့ရစဉ်

ထိုဒဏ်ရာရရှိခဲ့သည့် တပ်ဖွဲ့ဝင်များကို တင်ဘက်တူ (Timbuktu) မြို့သို့ ပို့ဆောင်ပြီး ဆေးဝါးကုသ ပေးခဲ့သည် ဟုလည်း ဖော်ပြခဲ့သည်။ 

ငြိမ်းချမ်းရေးထိန်းသိမ်းရေး တပ်ဖွဲ့ဝင်များကို တိုက်ခိုက်မှုသည် နိုင်ငံတကာဥပဒေအရ စစ်ရာဇဝတ်မှု မြောက်သည် ဟုလည်း MINUSMA က အစီရင်ခံစာ ထုတ်ပြန်ခဲ့သည်။

စစ်သွေးကြွများနှင့် တိုက်ခိုက်မှုများ ဖြစ်ပွားခဲ့ပြီးနောက် ကုလတပ်ဖွဲ့ဝင်များ တပ်စွဲခဲ့သည့် ဘားကျေးရွာရှိ စစ်စခန်းကို စစ်တပ်က လွှဲပြောင်းရယူခဲ့သည်ဟု မာလီစစ်တပ်က သြဂုတ် ၁၃ ရက်တွင် အစီရင်ခံစာ ထုတ်ပြန်ခဲ့သည်။ 

Source: ဘန်ကောက်ပို့စ်

CNI International News

ပြုံယမ်း ၊ သြဂုတ် ၁၅ 

တောင်ကိုရီးယားနှင့် အမေရိကန်သည် နှစ်စဉ်ပြုလုပ်နေကျ စစ်ရေးလေ့ကျင့်မှုများအတွက် ပြင်ဆင်နေချိန်တွင် ကင်မ်ဂျုံအန် (Kim Jong Un)က ဒုံးကျည်များနှင့် လက်နက်ခဲယမ်း ထုတ်လုပ်မှုများကို အရှိန်မြှင့်တင်ရန် တိုက်တွန်းခဲ့သည်ဟု ရိုက်တာမှ ဖော်ပြခဲ့သည်။

မြောက်ကိုရီးယားခေါင်းဆောင် ကင်မ်ဂျုံအန် (Kim Jong Un) သည် ဒုံးကျည်ထုတ်လုပ်ရေးစက်ရုံ အပါအဝင် စစ်ဘက်ဆိုင်ရာ လက်နက်ခဲယမ်း ထုတ်လုပ်ရေးစက်ရုံများသို့ သွားရောက် စစ်ဆေးကြည့်ရှုခဲ့သည်ဟု နိုင်ငံပိုင် KCNA သတင်းအေဂျင်စီက ဖော်ပြခဲ့သည်။

သြဂုတ် ၁၁ နှင့် ၁၂ ရက်တွင် ကင်မ်သည် နည်းဗျူဟာမြောက် ဒုံးကျည်များ၊ ဒုံးပစ်လောင်ချာစနစ်များ၊ ကျည်ကာ ကားများနှင့် အမြောက်ဆန်များ ထုတ်လုပ်သည့် အဓိက ခဲယမ်းစက်ရုံများသို့ သွားရောက်ခဲ့ပြီး သာလွန်စစ် အင်အားကို စိတ်ချသေချာစေရန် လက်နက်ထုတ်လုပ်မှုများကို မြှင့်တင်ရန် အမိန့်ပေးခဲ့ခြင်း ဖြစ်သည်။

ကျည်ကာကားကို ကင်မ်မောင်းနေစဉ်

ရှေ့တန်းစစ်မြေပြင် တပ်ဖွဲ့များကို ခိုင်မာအားကောင်းစေရေးနှင့် စစ်အင်အား တိုးမြှင့်ရေးအတွက် ဒုံးကျည်များ တိုးမြှင့်ထုတ်လုပ်ရန် အရေးကြီးသည့် ရည်မှန်းချက်ကို ကင်မ်က ပြောကြားခဲ့သည်ဟု KCNA က ဖော်ပြခဲ့သည်။

"စစ်ပွဲအတွက် ပြင်ဆင်မှုအဆင့်ဟာ ခဲယမ်းစက်ရုံတွေရဲ့ ထုတ်လုပ်ဖြန့်ချိနိုင်မှု အခြေအနေအပေါ် မူတည်နေပါ တယ်။ အဲဒီစက်ရုံတွေဟာ စစ်တပ်ရဲ့ စစ်ပြင်ဆင်မှုကို အရှိန်မြှင့်တင်ပေးဖို့ ကြီးမားတဲ့ တာဝန်ရှိနေပါတယ်"ဟု ကင်မ်က ပြောသည်။

အခြားစက်ရုံများသို့ သွားရောက်ကြည့်ရှုသည့် ခရီးစဉ်တွင်လည်း ကင်မ်သည် တိုက်ခိုက်ရေး ကျည်ကာကားများကို စမ်းသပ်မောင်းနှင်ခဲ့ပြီး အတွဲလိုက် ဒုံးပစ်လောင်ချာများ ထုတ်လုပ်မှုကို အဆင့်မြှင့်တင်သည့် လုပ်ငန်းစဉ်များတွင် တိုးတက်မှုများ ရရှိခဲ့သည့်အပေါ် ချီးကျူးခဲ့သည်။

ရှေ့တန်းစစ်မြေပြင်မှ အမြောက်တပ်များကို အင်အားတောင့်တင်း စေရေးအတွက် အမြောက်ဆန်များ တိုးမြှင့် ထုတ်လုပ်ရန် အလွန်အမင်း လိုအပ်သည်ဟုလည်း ကင်မ်က ပြောကြားခဲ့သည်။

ဒုံးကျည်စက်ရုံကို ကင်မ်စစ်ဆေးနေစဉ်

တောင်ကိုရီးယားနှင့် အမေရိကန်ကမူ နှစ်စဉ်ပြုလုပ်နေကျ Ulchi Freedom Guardian စစ်ရေးလေ့ကျင့်မှုကို သြဂုတ် ၂၁ ရက်မှ သြဂုတ် ၃၁ ရက်အတွင်း ပြုလုပ်သွားမည်ဟု ပြောကြားခဲ့သည်။

အဆိုပါ စစ်ရေးလေ့ကျင့်မှုသည် မြောက်ကိုရီးယား၏ နျူကလီးယားနှင့် ဒုံးကျည်ခြိမ်းခြောက်မှုများကို တုံ့ပြန်သည့် စွမ်းဆောင်ရည်များကို မြှင့်တင်ရန်ဖြစ်သည်ဟု ကြေညာထားသည်။

မြောက်ကိုရီးယားကမူ ထိုစစ်ရေး လေ့ကျင့်မှုများသည် နျူကလီးယား စစ်ပွဲအတွက် အစမ်းလေ့ကျင့်နေသည့် လုပ်ဆောင်မှုများ ဖြစ်သည်ဟုဆိုကာ ဝေဖန်ရှုတ်ချခဲ့သည်။

Source: ရိုက်တာ

CNI International News

ဘန်ကောက်၊ သြဂုတ် ၁၅

ဖြူးထိုင်းပါတီက ဦးဆောင်သည့် ညွန့်ပေါင်းအစိုးရ ဖွဲ့စည်းပြီးချိန်တွင် ပထမဆုံးပြုလုပ်မည့် အစိုးရအဖွဲ့ အစည်းအဝေးအတွင်း ဖွဲ့စည်းပုံအခြေခံဥပဒေကို အသစ်ရေးဆွဲ သင့်/မသင့် ပြည်သူ့ဆန္ဒခံယူပွဲ ပြုလုပ်ပြီး အဖြေရှာသွားမည်ဟု The Nation မှ ရေးသားဖော်ပြခဲ့သည်။

ဖြူးထိုင်းပါတီ၏ အဓိကရည်မှန်းချက်သည် ၂၀၁၄ ခုနှစ်က အာဏာသိမ်း ခေါင်းဆောင်များ ရေးဆွဲခဲ့သည့် ၂၀၁၇ ခုနှစ် ဖွဲ့စည်းပုံအခြေခံဥပဒေကို အစားထိုးရန် ဖွဲ့စည်းပုံအခြေခံဥပဒေသစ်တစ်ရပ် ရေးဆွဲရန်ဖြစ်သည်ဟု ဖြူးထိုင်း ပါတီ၏ ပြောရေးဆိုခွင့်ရှိသူ ထရီချာဒါ သီရိသဒ္ဓါ (Treechada Srithada) က ပြောသည်။

အဆိုပါ ဖွဲ့စည်းပုံအခြေခံဥပဒေအသစ် ရေးဆွဲမှုနှင့် ၂၀၁၇ ခုနှစ်၊ ဧပြီ ၆ ရက်က အကျုံးဝင် သက်ရောက်ခဲ့သည့် လက်ရှိ ဖွဲ့စည်းပုံအခြေခံဥပဒေနေရာကို အစားထိုးရန် လူထုဆန္ဒခံယူပွဲ ပြုလုပ်သွားမည်ဟု ထရီချာဒါက ပြော သည်။

ဖြူးထိုင်းပါတီ ၀န်ကြီးချုပ်လောင်း ၂ ဦးကိုတွေ့ရစဉ်

နိုင်ငံတစ်ဝန်းရှိ မဲဆန္ဒရှင်အများစုသည် ဖွဲ့စည်းပုံအခြေခံဥပဒေ အသစ်ရေးဆွဲရေးအဖွဲ့ (CDA) ကို ဖွဲ့စည်းရန် ဆန္ဒရှိနေသည်ဟု ဖြူးထိုင်းပါတီက ယုံကြည်ကြောင်း ၎င်းက ဆိုသည်။

"ဖြူးထိုင်းပါတီဟာ ညွန့်ပေါင်းအစိုးရ ဖွဲ့ပြီးတဲ့နောက် ပထမဆုံးပြုလုပ်မယ့် အစိုးရအဖွဲ့ အစည်းအဝေးမှာ CDA ဖွဲ့စည်းရေးအတွက် ပြည်သူ့ဆန္ဒခံယူပွဲ ပြုလုပ်မယ့်အကြောင်းကို သြဂုတ် ၂ ရက်နဲ့ ၆ ရက်တွေကတည်းက အစီအရင်ခံစာ ထုတ်ပြန်ခဲ့ပြီး ဖြစ်ပါတယ်"ဟု ထရီချာဒါက ပြောသည်။

ပါတီအနေနှင့် ပြောကြားခဲ့သည့် ကတိစကားများအတိုင်း လုပ်ဆောင်မည်ဖြစ်ပြီး မဲဆန္ဒရှင်များသည် ဒီမိုကရေစီ ကို စောင့်ဆိုင်းနေကြသဖြင့် အချိန်ဆွဲ လုပ်ဆောင်မည် မဟုတ်ကြောင်း ၎င်းက ပြောသည်။

ဖြူးထိုင်းပါတီ လူထုစည်းရုံးရေးလုပ်နေစဉ်

ထို့ပြင် ဖြူးထိုင်းပါတီသည် စစ်တပ်လိုလားသည့် အထက်လွှတ်တော်အမတ်များ၏ လုပ်ပိုင်ခွင့်ကို ပယ်ဖျက်ရန်နှင့် CDA ဖွဲ့စည်းရေးအတွက် ပဋိညာဉ်ကို ပြဋ္ဌာန်းနိုင်ရန် ကြိုးပမ်းနေသည့် အောက်လွှတ်တော်၏ ကြိုးပမ်းမှုတွင် Move Forward ပါတီနှင့် ပူးပေါင်းသွားမည်ဟုလည်း ထရီချာဒါက ပြောသည်။

သို့သော် အထက်လွှတ်တော်တွင် လုပ်ပိုင်ခွင့်အာဏာများ အများဆုံး ရရှိထားသဖြင့် အဆိုပါ ကြိုးပမ်းမှုသည် ပိတ်ပင်ခံရဖွယ် ရှိနေသည်။

ဖွဲ့စည်းပုံအခြေခံဥပဒေအသစ် မူကြမ်းရေးဆွဲမှုအတွက် လူထုဆန္ဒခံယူပွဲ နှစ်ကြိမ်ပြုလုပ်ရန် လိုအပ်သည်ဟု ဖွဲ့စည်းပုံအခြေခံဥပဒေဆိုင်ရာခုံရုံးက အမိန့်ထုတ်ပြန်ထားသဖြင့် CDA မဖွဲ့စည်းမီ လူထုဆန္ဒခံယူပွဲ တစ်ကြိမ် ပြုလုပ်ရမည်ဖြစ်ပြီး ဥပဒေမူကြမ်း အလုံးစုံ ရေးဆွဲပြီးချိန်တွင် ဒုတိယအကြိမ်မြောက် လူထုဆန္ဒခံယူပွဲကို ပြုလုပ်ရမည် ဖြစ်သည်။

Source: The Nation