CNI International News
နန်တာရီ၊ ဇွန်လ ၃၀
ဆယ်ကျော်သက် လူငယ်တစ်ဦးကို ရဲတပ်ဖွဲ့က ပစ်ခတ်ခဲ့ပြီးနောက် ပေါ်ပေါက်လာသော ဆူပူမှုများကို ထိန်းသိမ်း ရန်အတွက် ပြင်သစ်အစိုးရက ရဲတပ်ဖွဲ့ဝင် ၄၀၀၀၀ ကို ဇွန်လ ၂၉ ရက်နေ့တွင် စုစည်း၍ နေရာချထားခဲ့သည်။
ပစ်ခတ်မှုသည် ဇွန်လ ၂၇ ရက်နေ့တွင် ဖြစ်ပွားခဲ့ကာ ပစ်ခတ်ခံရသူသည် အသက် ၁၇ နှစ်အရွယ် နာဟဲလ်ဖြစ်သည် ဟုသာ ထုတ်ပြန်ထားသည်။
ထိုဖြစ်စဉ်တွင် လက်နက်အား တရားဝင် အသုံးပြုရန် မလိုအပ်ဟု အစိုးရရှေ့နေ တစ်ဦး၏ ကနဦးစုံစမ်းစစ်ဆေးမှု ထွက်ပေါ်လာခဲ့ပြီးနောက် ပစ်ခတ်မှုကို လုပ်ဆောင်ခဲ့သည့် ရဲအရာရှိအား လူသတ်မှုဖြင့် စွဲချက်တင်ထားသည်။
အခြေအနေကို ထိန်းသိမ်းရေးအတွက် တည်တည်ငြိမ်ငြိမ်နေကြရန် အစိုးရဘက်က တောင်းဆိုထားသော်လည်း ပဲရစ်မြို့ ဆင်ခြေဖုံး အရပ်တစ်ခုဖြစ်သော နန်တာရီ (Nanterre) တွင် ကားများကို မီးရှို့ခြင်းကြောင့် ထွက်ပေါ်လာ သော မီးခိုးများဖြင့် ဖုံးလွှမ်းနေသလို အမှိုက်ပုံးများလည်း မီးရှို့ခံခဲ့ရသည်။
သေဆုံးသူအား ဂုဏ်ပြုရန်အတွက် နေ့လယ်ပိုင်းတွင် ငြိမ်းချမ်းစွာ စုဝေးခဲ့ပြီးနောက် ထိုသို့ ဖြစ်ပွားခဲ့ခြင်း ဖြစ် သည်။
လမ်းမများဘေးရှိ ရဲတပ်ဖွဲ့ဝင် အရေအတွက်ကို ၉၀၀၀ မှ ၄၀၀၀၀ အထိ လေးဆ တိုးမြှင့်ထားသည်ဟု ပြင်သစ် ပြည်ထဲရေးဝန်ကြီး ဂျီရယ်ဒါမာနင် (Gerald Darmanin) က ပြောသည်။
ပြင်သစ် ဆူပူမှုအတွင်း ကားများ မီးရှို့ခံထားရစဉ်
ပဲရစ်မြို့တစ်မြို့ထဲတွင်ပင် ရဲတပ်ဖွဲ့ဝင် အရေအတွက် ၅၀၀၀ ကျော် ဖြန့်ကျက်ထားသည်ဟုလည်း ၎င်းက ပြော သည်။ ပြည်သူပိုင် အဆောက်အဦ ၁၀၀ ကျော် ပျက်စီးကာ ရဲတပ်ဖွဲ့ဝင် ပေါင်းများစွာ ထိခိုက်ဒဏ်ရာ ရရှိခဲ့သည့် အကြမ်းဖက်မှုများ ဖြစ်ပွားခဲ့ပြီးနောက်တွင် ပြုလုပ်သည့် မနက်ပိုင်း အစည်းအဝေးတစ်ခု အပြီး ထိုသို့ ပြောဆိုခဲ့ ခြင်း ဖြစ်သည်။
အကြမ်းဖက် သူများအနေဖြင့် အိမ်ကိုပြန်ရမည်ဖြစ်ကြောင်း၊ အရေးပေါ် အခြေအနေ ကြေညာရန် မလိုအပ်သေး ကြောင်းနှင့် အစိုးရသည် ပြတ်ပြတ်သားသား တုံ့ပြန်သွားမည်ဖြစ်ကြောင်းလည်း ၎င်းက ပြောသည်။
ဇွန်လ ၂၉ ရက်နေ့ညတွင် အကြမ်းဖက်မှုများ ဆက်ရှိနေဆဲ ဖြစ်သော်လည်း သိသိသာသာ နည်းပါးသွားကြောင်း၊ ရဲတပ်ဖွဲ့ဝင်အင်အားကို လမ်းမများပေါ်တွင် အရှင်းသား မြင်တွေ့ရကြောင်းလည်း ရဲတပ်ဖွဲ့က ထုတ်ပြန်သည်။
အစဉ်တစိုက် ငြိမ်းချမ်းလေ့ရှိသော Pau မြို့တွင်ပင် ရဲတပ်ဖွဲ့ရုံး အသစ်တစ်ခုကို Molotov ကောက်တေးဖြင့် ပစ်ခတ်တိုက်ခိုက် ခံခဲ့ရသည်ဟု ရဲတပ်ဖွဲ့က ပြောသည်။
တူးလော့စ် (Toulouse) တွင် ကားများ မီးရှို့ခံခဲ့ရကာ လိုင်ယွန် (Lyon) မြို့တွင် ဓာတ်ရထားတစ်စင်း မီးရှို့ခံ ခဲ့ရသည်။
ပြင်သစ်အမျိုးသား ရဲတပ်ဖွဲ့ဘက်က ဖမ်းဆီးမှုများနှင့် ပတ်သက်၍ သတင်းအသစ် ထုတ်ပြန်ခြင်း မရှိသေးသော် လည်း ဇွန်လ ၂၉ ရက်နေ့တွင် လူ ၄၀ ခန့်ကို ဖမ်းဆီးခဲ့သည်ဟု ပဲရစ်ရဲတပ်ဖွဲ့က ပြောသည်။
ပြင်သစ် ဆူပူမှုကိုတွေ့ရစဉ်
ဇွန်လ ၂၉ ရက်နေ့ မတိုင်ခင်အထိ လူပေါင်း ၁၈၀ ကို ဖမ်းဆီးထားသည်ဟုလည်း ပြည်ထဲရေးဌာနက ထုတ်ပြန် ထားသည်။
ယာဉ်များနှင့် ခရီးသည်များ ပစ်မှတ်ထား တိုက်ခိုက်ခံရခြင်းမှ ရှောင်လွဲနိုင်ရန် ပဲရစ်မြို့ရှိ ဘတ်စ်ကားနှင့် ရထား ဝန်ဆောင်မှုများကို နေမဝင်ခင် ပိတ်သိမ်းခဲ့သည်။
အကြမ်းဖက်မှုများသည် ပြင်သစ်မြို့များဖြစ်သော ကလာမတ် (Clamart) နှင့် မာဆေးလ် (Marseille) တို့တွင် သာမက ဘယ်လ်ဂျီယမ်နိုင်ငံ ဘရပ်ဆဲလ် (Brussels) မြို့တို့အထိပါ ကူးစက်ခဲ့သည်။
ပစ်ခတ်မှုကို ရိုက်ကူးထားသည့် ဗွီဒီယိုဖိုင်သည် ပြင်သစ် တစ်နိုင်ငံလုံးကို တုန်လှုပ်သွားစေခဲ့ကာ ယင်းသည် ယခင်ကတည်းက တင်းမာမှုများရှိနေသော ပြင်သစ်ရဲတပ်ဖွဲ့နှင့် လူငယ်များအကြားမှ အခြေအနေများကို ပို၍ ဆိုးရွားလာစေခဲ့သည်။
Source:AP
