CNI International News

မော်စကို၊ စက်တင်ဘာ ၂၇

တရားစွဲဆိုခံထားရမှုမှ တိမ်းရှောင်ထွက်ပြေးနေသည့် အမေရိကန် ထောက်လှမ်းရေး ကန်ထရိုက်တာဟောင်း အက်ဒွပ်စနိုဒင် (Edward Snowden) ကို ရုရှားက နိုင်ငံသားဖြစ်ခွင့် ပေးလိုက်ကြောင်း အေပီသတင်းတစ်ပုဒ်တွင် တွေ့ရသည်။

၎င်းသည် ကမ္ဘာတဝန်းမှ ဆက်သွယ်ရေးနှင့် အရေးကြီး အချက်အလက်များကို ကြားဖြတ်ဖမ်းယူလေ့ရှိသည့် အမေရိကန် ထောက်လှမ်းရေးစနစ်များကို ဖွင့်ချခဲ့ပြီးနောက် အမေရိကန်နိုင်ငံမှ တိမ်းရှောင်ထွက်ပြေးခဲ့သည်မှာ နှစ်ပေါင်းကြာမြင့်လှပြီ ဖြစ်သည်။

စက်တင်ဘာ ၂၆ ရက်တွင် ရုရှားသမ္မတ ဗလာဒီမာပူတင် လက်မှတ်ရေးထိုးပေးခဲ့သည့် အမိန့်အရ “စနိုဒင်ကို ရုရှား နိုင်ငံသားအဖြစ် အသိအမှတ်ပြုခံရသူ နိုင်ငံခြားသား ၇၅ ဦး စာရင်းထဲတွင် တစ်ဦးအဖြစ် အကျုံးဝင်ကြောင်း” သိရ သည်။

စနိုဒင်သည် ၂၀၁၃ ခုနှစ်တွင် အမေရိကန်မှ ထွက်ပြေးလာပြီးနောက် ၂၀၂၀ ပြည့်နှစ်တွင် ရုရှားနိုင်ငံ၌ အမြဲတမ်း နေထိုင်ခွင့် ရရှိခဲ့သည်။ တစ်ချိန်တည်းတွင် ၎င်းသည် မူလ အမေရိကန်နိုင်ငံသား ဖြစ်တည်မှုကိုလည်း မစွန့်လွှတ် ဘဲ ရုရှားနိုင်ငံသား ဖြစ်ခွင့်ကိုပါ လျှောက်ထားရန် စီစဉ်ထားကြောင်း ထုတ်ဖော်ပြောကြားခဲ့သည်။

 အက်ဒွပ်စနိုဒင်ကိုတွေ့ရစဉ် (GETTY IMAGES)

ယူကရိန်းသို့ အထူးစစ်ဆင်ရေးဟု ပူတင် တံဆိပ်ကပ်ခဲ့သည့် ကျူးကျော်စစ်ကြောင့် လက်ရှိအနေအထားတွင် ဝါရှင်တန်နှင့် မော်စကိုတို့အကြား ဆက်ဆံရေးမှာ ဆယ်စုနှစ်များအတွင်း အနိမ့်ဆုံး အခြေအနေသို့ ရောက်ရှိနေပြီ ဖြစ်သည်။

အသက် ၃၉ နှစ်ရှိ စနိုဒင်ကို ထောက်ခံသူများက အမေရိကန်ပြည်သူများ၏ လွတ်လပ်ခွင့်ကို ကာကွယ်လိုသည့် ဖြောင့်မှန်သော သတင်းပေးသူအဖြစ် ယူဆကြသော်လည်း အမေရိကန် ထောက်လှမ်းရေး အရာရှိများကတော့ ၎င်းသည် အမေရိကန်အစိုးရဝန်ထမ်းများကို အန္တရာယ်ရှိစေပြီး နိုင်ငံတော်လုံခြုံရေး ထိခိုက်စေသည်ဟု စွပ်စွဲထား သည်။

မျက်မှောက် ကာလတွင်လည်း ၎င်းသည် အမေရိကန်နိုင်ငံ၌ ထောင်ဒဏ် ဆယ်စုနှစ်နှင့်ချီ၍ ချမှတ်နိုင်သော စွဲချက်များ အတင်ခံထားရသည်။

“ကျနော်တို့ ရပ်တည်ချက်က မပြောင်းပါဘူး။ မစ္စတာစနိုဒင်ဟာ တခြား အမေရိကန် နိုင်ငံသားတွေလိုပဲ တရား ဥပဒေကို ရင်ဆိုင်သင့်တယ်။ အမေရိကန်ကို သူ ပြန်လာသင့်တယ်” ဟု အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ နက်ပရိုက်စ် (Ned Price) က စက်တင်ဘာ ၂၆ ရက်တွင် ပြောကြားခဲ့သည်ဟု အေပီက သတင်း ဆက်လက် ရေးသားထားသည်။

Source: AP

CNI International News

၂၀၂၂ ခုနှစ်၊ စက်တင်ဘာ ၂၆

အီရန်ရဲများ ဖမ်းဆီးချုပ်နှောင်ထားစဉ်အတွင်း အသတ်ခံခဲ့ရသည့် မာရှားအေမီနီ ဖြစ်စဉ်ကြောင့် စက်တင်ဘာ ၂၃ ရက်၌ ဘာလင်မြို့၊ ဘရန်ဒန်ဘာ့ဂ်ဂိတ်ရှေ့တွင် လူစုလူဝေးပြုလုပ်၍ ဆန္ဒပြခဲ့ကြစဉ်။ 

CNI International News

၂၀၂၂ ခုနှစ်၊ စက်တင်ဘာ ၂၆

ရဲတပ်ဖွဲ့၏ လက်ချက်ဖြင့် ကာ့ဒ်အမျိုးသမီးငယ် မာရှားအေမီနီ (Mahsa Amini) သေဆုံးမှုနှင့် ပတ်သက်၍ နိုင်ငံတဝန်း ပျံ့နှံ့နေသော ဆန္ဒပြပွဲများကို အစိုးရအနေဖြင့် ပြတ်ပြတ်သားသားတုံ့ပြန်မည်ဟု  အီရန်သမ္မတ အီဘရာဟင်ရိုင်စီက အတိအလင်းပြောကြားခဲ့သည်။ 

အဆိုပါဆန္ဒပြမှုများသည် အီရန်နိုင်ငံအတွင်းရှိ အနည်းဆုံးမြို့ပေါင်း ၁၃၃ မြို့သို့ ပျံ့နှံ့သွားခဲ့သည်။

CNI International News

ရောမ၊ စက်တင်ဘာ ၂၆

အီတလီနိုင်ငံတွင် ယနေ့ (စက်တင်ဘာ ၂၆ ရက်) ကျင်းပသည့် ရွေးကောက်ပွဲတွင် မဲဆန္ဒရှင်များက ဂျီအိုဂျီးယား မီလိုနီ (Giorgia Meloni)၏ လက်ယာအစွန်းရောက်ပါတီကို စုပုံ၍ မဲပေးခဲ့ကြကြောင်း၊ ယင်းသို့ မဲပေးမှုသည် ဒုတိယကမ္ဘာစစ်နောက်ပိုင်း အီတလီအတွက် ပထမဆုံး လက်ယာအစွန်းကို အားပေးမှုဖြစ်လာကြောင်း လတ်တလော မဲရလဒ်များကို အခြေခံ၍ အေပီသတင်းဌာနက ရေးသားဖော်ပြသည်။

အောင်ပွဲခံမိန့်ခွန်းတွင် လက်ယာအစွန်းရောက် အီတလီခေါင်းဆောင် ဂျီအိုဂျီးယားမီလိုနီက သဘောထား ပျော့ပျောင်းသည့် လေသံဖြင့် ကြွေးကြော်ခဲ့သည်။

မဲရုံများမှ မဲရေတွက်မှု သုံးပုံနှစ်ပုံ ရေတွက်မှုအပြီး ခန့်မှန်းရလဒ်များ ထွက်ပေါ်လာချိန်၌ မီလိုနီ အီတလီ ညီနောင် များ (Brothers of Italy) ပါတီက စက်တင်ဘာ ၂၅ ရက် မဲပေးမှုများ၌ အခြားပြိုင်ဘက်များထက် ရှေ့ရောက်နေ ခဲ့သည်။

“ဒီနိုင်ငံကို အုပ်ချုပ်ဖို့ ကျမတို့ကို ကမ်းလှမ်းလာတယ်ဆိုရင် နိုင်ငံသူ၊ နိုင်ငံသားအားလုံးအတွက် ကြိုးပမ်း ဆောင်ရွက်သွားမှာ ဖြစ်ပါတယ်။ ဒီနိုင်ငံက ပြည်သူတွေကို ညီညွတ်ဖို့အတွက် ရည်ရွယ်ပြီးတော့ ဆောင်ရွက် သွားမှာပါ” ဟု မီလိုနီက ရောမမြို့တော်ရှိ သူမ၏ပါတီရုံးချုပ်တွင် ပြောကြားခဲ့သည်။

အီတလီပြည်သူများ ရွေးကောက်ပွဲ မဲပေးနေစဉ် (AP)

“အီတလီ ပြည်သူတွေက ကျမတို့ကို ရွေးခဲ့ပါပြီ။ ကျမတို့ ဘယ်တော့မှ တိုင်းပြည်မှာ သစ္စာမဖောက်ပါဘူး” ဟု ၎င်းက ဆက်လက် ပြောကြားခဲ့သည်။

အကယ်၍ အသက် ၄၅ နှစ်ရှိ မီလိုနီသည် အောင်ပွဲခံနိုင်ခဲ့ပါက အီတလီ၏ ပထမဆုံးအမျိုးသမီး ဝန်ကြီးချုပ် ဖြစ်လာမည်ဟု အေပီသတင်းဌာနက ဆက်လက်ရေးသားသည်။

မီလိုနီ၏ လက်ယာယိမ်းပါတီကို အခြားလက်ယာ ဗဟိုပြု မဟာမိတ်များ၏ အကူအညီဖြင့် အာဏာရ ညွန့်ပေါင်း အစိုးရအဖွဲ့ ဖွဲ့စည်းရန်မှာ ရက်သတ္တပတ်များစွာ ကြာမြင့်နိုင်သည်။

ပါတီခေါင်းဆောင်များနှင့် ညှိနှိုင်းပြီးနောက် အစိုးရဖွဲ့ရေး ကြိုးပမ်းသည့် လုပ်ပိုင်ခွင့်ကို အီတလီသမ္မတက ပေးအပ် ခဲ့ပြီဖြစ်သည်။

လတ်တလော ကာလအတွင်း ပြီးခဲ့သည့် ၂ လ၌ အစိုးရ ပြုတ်ကျစေခဲ့သည့် ဥရောပဗဟိုဘဏ် အကြီးအကဲဟောင်း မာရီယိုဒရက်ဂီ (Mario Draghi) က အီတလီနိုင်ငံ၏ အိမ်စောင့်အစိုးရတာဝန်ကို ဆက်လက် ထမ်းဆောင်နေ သည်။

Source: AP

CNI International News

ပြုံယမ်း၊ စက်တင်ဘာ ၂၆

တောင်ကိုရီးယားနှင့် အမေရိကန်တို့ စီစဉ်ထားသော စစ်ရေးလေ့ကျင့်မှုမတိုင်မီ မြောက်ကိုရီးယားက ၎င်း၏ ပဲ့ထိန်း ဒုံးကျည်တစ်စင်းကို ကျွန်းဆွယ် အရှေ့ဘက် ပင်လယ်ပြင်ထဲသို့ စက်တင်ဘာ ၂၅ ရက်၌ ပစ်လွှတ်ခဲ့ ကြောင်း အယ်လ်ဂျာဇီးယား သတင်းတစ်ပုဒ်တွင် တွေ့ရသည်။

အဆိုပါ လက်နက်စမ်းသပ်မှုတွင် ပြုံယမ်းမြို့တော် မြောက်ဘက်ရှိ တေချွန် (Taechon) ဒေသအနီးမှ ပစ်လွှတ်ခဲ့ သော တာတိုပစ် ဒုံးကျည်တစ်စင်း ပါဝင်ကြောင်း တောင်ကိုရီးယားစစ်တပ်က ပြောသည်။

ထိုစမ်းသပ်ပစ်လွှတ်မှုတွင် မည်သည့်ဒုံးကျည် အမျိုးအစား (သို့မဟုတ်) အကွာအဝေးမည်မျှ ပျံသန်းခဲ့ကြောင်း အပါအဝင် လက်နက်နှင့်ပတ်သက်၍ အသေးစိတ် အချက်အလက်များကို ချက်ချင်း မသိရသေးပေ။

အမေရိကန် လေယာဉ်တင် သင်္ဘော (AP)

ယင်းလက်နက်သည် ဒေါင်လိုက် အမြင့်ဆုံး ကီလိုမီတာ ၅၀ (၃၁ မိုင်) အကွာသို့ ရောက်ရှိခဲ့ကြောင်း ဂျပန်ဘက်မှ ခန့်မှန်းထားကြောင်း၊ သမားရိုးကျမဟုတ်သော လမ်းကြောင်းပျံသန်း သွားနိုင်ဖွယ်ရှိကြောင်း ဂျပန်ကာကွယ်ရေး ဝန်ကြီး ယာစူကာဇူဟာမာဒါက ပြောသည်။

ဒုံးကျည်သည် ဂျပန်နိုင်ငံ၏ သီးသန့်စီးပွားရေးဇုန် အပြင်ဘက်သို့ ကျရောက်သွားခဲ့ပြီး သင်္ဘောနှင့် လေကြောင်း သွားလာရေးဆိုင်ရာ ကြိုတင် သတင်းပေးပို့မှုမရှိကြောင်း ဟာမာဒါက ဆက်လက်ပြောကြားခဲ့သည်။

မကြာသေးမီ နှစ်များအတွင်း မြောက်ကိုရီးယား စမ်းသပ်ခဲ့သည့် တာတိုပစ်ဒုံးကျည်များသည် ပျံသန်းနေစဉ် အတွင်း အခြားဒုံးကျည်များ၏ လမ်းကြောင်းကို ရှောင်ကွင်းသွားနိုင်ရန် ဒီဇိုင်းထုတ်လုပ်ထားကြောင်း လက်နက် ရေးရာ ကျွမ်းကျင်သူများက ပြောကြားခဲ့ကြသည်။

ခရုဇ်ဒုံးကျည်များ ပစ်လွှတ်မှုကိုပါ ထည့်သွင်း ရေတွက်မည်ဆိုလျှင် ယခုလက်နက် စမ်းသပ်မှုသည် ရှားရှားပါးပါး ၁၉ ကြိမ်မြောက် အရှိန်အဟုန်မြှင့် ပစ်လွှတ်ခြင်းဖြစ်ကြောင်း ဟာမာဒါက သုံးသပ်ပြသည်။

အမေရိကန်ဒုတိယသမ္မတ ကာမယ်လာဟားရစ် (AP)

“မြောက်ကိုရီးယားရဲ့ လုပ်ရပ်ဟာ ကျနော်တို့နိုင်ငံ၊ ဒေသတွင်းနဲ့ နိုင်ငံတကာ အသိုင်းအဝိုင်းရဲ့ ငြိမ်းချမ်းရေး၊ လုံခြုံရေးကို ခြိမ်းခြောက်မှု ဖြစ်ပါတယ်။ ယူကရိန်းကျူးကျော်မှုလိုမျိုး ကျယ်ကျယ်ပြန့်ပြန့် လုပ်ဆောင်ချင် တယ်ဆိုရင်တော့ ခွင့်မလွှတ်နိုင်စရာပါ” ဟု ၎င်းက မှတ်ချက်ချခဲ့သည်။

ယခုဖြစ်စဉ်အပေါ် တရုတ်နိုင်ငံ၊ ဘေဂျင်းမြို့တော်ရှိ မြောက်ကိုရီးယား သံရုံးမှတဆင့် ဂျပန်က ကန့်ကွက်ထား ကြောင်း ၎င်းက ထပ်လောင်း ပြောကြားခဲ့သည်။

တောင်ကိုရီးယားတပ်ဖွဲ့များနှင့် ပူးတွဲစစ်ရေးလေ့ကျင့်မှု ပါဝင်ရန်အတွက် အမေရိကန်ဒုတိယသမ္မတ ကာမယ် လာဟားရစ်သည် ယခုသီတင်းပတ်အတွင်း ဆိုးလ်မြို့တော်သို့ သွားမည်ဟု သိရသည်။

အမေရိကန်-တောင်ကိုရီးယား ပူးတွဲစစ်ရေးလေ့ကျင့်မှုတွင် နျူကလီးယားစွမ်းအင်သုံး အမေရိကန် လေယာဉ်တင် သင်္ဘော USS Ronald Reagan ဂျပန်ပင်လယ်သို့ ရောက်ရှိလာပြီးနောက် ယခုကဲ့သို့ မြောက်ကိုရီးယား၏ စမ်းသပ် ပစ်လွှတ်မှု ပေါ်ပေါက်လာခဲ့သည်။

Source: Aljazeera

CNI International News

ဘေဂျင်း၊ စက်တင်ဘာ ၂၄

တရုတ်သမ္မတ ရှီကျင့်ဖျင်ကို နေအိမ်အကျယ်ချုပ်ချ၍ အာဏာသိမ်းမှုဖြစ်ပွားကြောင်း ထင်ကြေးများနှင့် ကောလာဟလများ လူမှုကွန်ရက် မီဒီယာများတွင် ပျံ့နှံ့သွားခဲ့သည်ဟု ယနေ့ (စက်တင်ဘာ ၂၄ ရက်) ညနေ ပိုင်းတွင် အိန္ဒိယတူဒေးဝက်ဘ်ဆိုက်က ရေးသားဖော်ပြသည်။

အတည်မပြုနိုင်သော သတင်းများဖြစ်သည့် အင်တာနက် လူမှုကွန်ရက်ရှိ ပို့စ်များစွာတွင် “ရှန်ဟိုင်းပူးပေါင်း ဆောင်ရွက်ရေးအဖွဲ့ (SCO) ထိပ်သီး အစည်းအဝေး တက်ရောက်ရန် ဥဇဘက်ကစ္စတန်နိုင်ငံ၊ ဆမာခန်မြို့သို့ ရှီကျင့်ဖျင် ရောက်ရှိနေစဉ်အတွင်း တရုတ်ပြည်သူ့လွတ်မြောက်ရေးတပ်မတော် (PLA) က တရုတ်ပြည်တွင်း၌ ၎င်းကို ရာထူးမှ ဖယ်ရှားလိုက်ကြောင်း” ပြောဆိုရေးသားနေကြသည်။

သို့သော် တရုတ်ကွန်မြူနစ်ပါတီ (သို့မဟုတ်) တရုတ်အစိုးရမီဒီယာများက အဆိုပါ ပြောဆိုရေးသားနေမှုများကို တရားဝင် အတည်ပြုခြင်း မရှိသေးပေ။

“စစ်ဆေးရမယ့် ကောလာဟလအသစ်ပါ။ ရှီကျင့်ဖျင်ဟာ ဘေဂျင်းမှာ အကျယ်ချုပ် ကျနေသလားပေါ့။ သူက မကြာခင်ကပဲ ဆမာခန်မြို့မှာ ရှိနေတုန်း တရုတ်ကွန်မြူပါတီ ခေါင်းဆောင်ပိုင်းက သူ့ကို ပါတီရဲ့ စစ်တပ် ကွပ်ကဲမှု တာဝန်ကနေ ဖယ်ရှားခဲ့တယ်လို့ ယူဆနေကြတာ။ အဲဒီနောက် အကျယ်ချုပ် ကျတယ်ပေါ့ဗျာ။ ဒါကြောင့် ကောလာဟလ ထွက်လာတယ်” ဟု အိန္ဒိယအစိုးရအဖွဲ့ဝင် ဝန်ကြီးဟောင်းနှင့် BJP ပါတီခေါင်းဆောင် ဆူဘရာ မာနီ ယန်းစဝါမီက တွစ်တာလူမှုကွန်ရက်တွင် ပြောကြားခဲ့သည်။

အလားတူ ရှီကျင့်ဖျင် နေအိမ် အကျယ်ချုပ် ကျနေကြောင်း တွစ်တာလူမှုကွန်ရက်တွင် တရုတ်နိုင်ငံသား အများ အပြားက ရေးသားလွှင့်တင်နေကြသည်။

၎င်းတို့အထဲမှ အများစုက PLA စစ်တပ်က အာဏာသိမ်းလိုက်ပြီဟု အခိုင်အမာ ပြောဆိုနေကြသည်။ အချို့က တော့ လီချောင်မင်ကို ယာယီသမ္မတ ခန့်ထားသည်ဟုပင် ထင်ကြေးပေးနေကြသည်။ လီချောင်မင်သည် PLA တပ်တွင် ဗိုလ်ချုပ်ကြီးအဆင့် ရာထူးရှိသူ ဖြစ်သည်။

အဆိုပါ ကောလာဟလ သတင်းများသည် ယခုရက်ပိုင်းအတွင်း တရုတ်အစိုးရ ခေါင်းဆောင်ဟောင်းများကို ပြစ်ဒဏ် စီရင်ချက်ချခြင်းနှင့် ဆက်စပ်နေသည်။ ဝန်ကြီးဟောင်းနှစ်ဦးကို သေဒဏ်ချမှတ်ခဲ့ပြီး အခြားအရာရှိ တစ်ဦးကို ယခုသီတင်းပတ်အတွင်း ထောင်ဒဏ် တစ်သက်တစ်ကျွန်း ချမှတ်ခဲ့သည်။

အဆိုပါ ၆ ဦးသည် နိုင်ငံရေး အစုအဖွဲ့ငယ်တစ်ခု ဖြစ်သည်။

လက်ရှိတွင် တရုတ်ကွန်မြူနစ်ပါတီသည် နိုင်ငံတဝန်း အဂတိလိုက်စားမှု တိုက်ဖျက်ရေး လှုပ်ရှားမှုကို အရှိန်မြှင့် နေချိန် ၎င်း ၆ ဦးမှာ ရှီကျင့်ဖျင်ကို ဆန့်ကျင်သူများ ဖြစ်သည်ဟု ယုံကြည်ရသည်။

သို့ဖြစ်၍ ရှီကျင့်ဖျင် နေအိမ် အကျယ်ချုပ် ကျခံရကြောင်း ကောလာဟလကို ၎င်းအား ဆန့်ကျင်သည့် အသိုင်း အဝိုင်းမှ စတင်ဖြန့်ချိသည်ဟု ယူဆရကြောင်း အိန္ဒိယတူဒေးက ဆက်လက်ရေးသားသည်။

Source: India Today

CNI International News

နယူးယောက်၊ စက်တင်ဘာ ၂၄

ထိုင်ဝမ်အရေး တည်ငြိမ်စေမှု ထိန်းသိမ်းရန်မှာ လွန်စွာအရေးကြီးကြောင်း အမေရိကန်နိုင်ငံခြားရေးဝန်ကြီးက စက်တင်ဘာ ၂၃ ရက်တွင် ပြောကြားခဲ့မှုအပေါ် အလွန်မှားယွင်းပြီး အန္တရာယ်များလှသည့် အချက်ပြမှုများ ပေးပို့ရာရောက်သည်ဟု တရုတ်က တုံ့ပြန်စွပ်စွဲလိုက်သည်ဟု ရိုက်တာသတင်းဌာနက ရေးသားဖော်ပြသည်။

အမေရိကန် နိုင်ငံခြားရေးဝန်ကြီး အန်တိုနီဘလင်ကင်နှင့် တရုတ်နိုင်ငံခြားရေးဝန်ကြီး ဝမ်ယိတို့၏ မိနစ် ၉၀ ကြာ ရင်းနှီးပွင့်လင်းစွာ ဆွေးနွေးခဲ့မှုများသည် နယူးယောက်မြို့၊ ကုလသမဂ္ဂ အထွေထွေညီလာခံ၏ အနားသတ် အဆုံးအဖြတ်များအတွက် အဓိကကျကြောင်း အမေရိကန်အစိုးရ အရာရှိတစ်ဦးက သတင်းထောက်များကို ပြောကြားခဲ့သည်။

“ကျနော်တို့အပိုင်းကတော့ ကျနော်တို့ဝန်ကြီးအနေနဲ့ ကျနော်တို့ရဲ့ နှစ်ပေါင်းများစွာ ရပ်တည်လာတဲ့ တရုတ် တနိုင်ငံတည်းမူဝါဒကို နောက်ထပ်တဖန် အပြောင်းအလဲမရှိပါဘူးလို့ ပြောခဲ့ပါတယ်။ ထိုင်ဝမ်ရေလက်ကြား တဝိုက် ငြိမ်းချမ်းရေးနဲ့တည်ငြိမ်ရေး ထိန်းသိမ်းဖို့က မရှိမဖြစ်အရေးကြီးတယ်လို့ အတိအလင်းပြောခဲ့ပြီးပါပြီ” ဟု အမေရိကန်အကြီးတန်းအရာရှိတစ်ဦးက ပြောသည်။

အမေရိကန်သည် ထိုင်ဝမ်နှင့်ပတ်သက်၍ လွန်စွာမှားယွင်းပြီး အန္တရာယ်များသော အချက်ပြမှုများ ပေးပို့နေ ကြောင်း၊ ထိုင်ဝမ်၏လွတ်လပ်ရေး လှုပ်ရှားမှုများ ပိုမိုပြင်းထန်လာလေလေ … ငြိမ်းချမ်းစွာ ပြေလည်မှုရရှိရန် အလားအလာနည်းလေလေဖြစ်ကြောင်း ဝန်ကြီးနှစ်ဦး တွေ့ဆုံမှုတွင် တရုတ်က ပြောကြားခဲ့သည်။

အမေရိကန်နိုင်ငံခြားရေးဝန်ကြီး အန်တိုနီဘလင်ကင်နှင့် တရုတ်နိုင်ငံတော်၏အတိုင်ပင်ခံပုဂ္ဂိုလ်နှင့် နိုင်ငံခြားရေးဝန်ကြီး ဝမ်ယိတို့ (၇၇)ကြိမ်မြောက် ကုလသမဂ္ဂ အထွေထွေညီလာခံတွင် တွေ့ဆုံနှုတ်ဆက် ကြစဉ်(ဓါတ်ပုံ- ရိုက်တာ)

“ထိုင်ဝမ်ပြဿနာဟာ တရုတ်ပြည်တွင်းရေးဖြစ်ပါတယ်။ ဒါကို ဖြေရှင်းဖို့ ဘယ်နည်းလမ်းသုံးတယ်ပဲပြောပြော အမေရိကန် ဝင်ရောက်စွက်ဖက်ခွင့် မရှိပါဘူး” ဟု ဝမ်ယိ၏ပြောကြားချက်ကို ကိုးကားလျက် တရုတ်နိုင်ငံခြား ရေးဝန်ကြီးဌာနက သတင်းထုတ်ပြန်ခဲ့သည်။

ပြီးခဲ့သည့် ဩဂုတ်လတွင် အမေရိကန်အောက်လွှတ်တော်ဥက္ကဋ္ဌ နန်စီပလိုစီ ထိုင်ဝမ်သို့ ရောက်ခဲ့ပြီးနောက် တရုတ်၏အကြီးစားစစ်ရေးလေ့ကျင့်မှုများ စတင်ခဲ့ပြီး ထိုင်ဝမ်အရေးကိစ္စ တင်းမာမှု တိုးလာခဲ့သည်။

ထို့ပြင် ဒီမိုကရေစီနည်းကျ အုပ်ချုပ်နေသော ထိုင်ဝမ်ကျွန်းကို အကာအကွယ်ပေးမည်ဟု အမေရိကန်သမ္မတ ဂျိုးဘိုင်ဒန်က ကတိပြုခဲ့သည်။

ယနေ့အချိန်အထိ ဂျိုးဘိုင်ဒန်၏ ထိုသို့ ပြောကြားချက်မှာ ကျွန်းကို ကာကွယ်ရန်အတွက် အမေရိကန်တပ်များနှင့် ဆက်စပ်နေကြောင်း ရိုက်တာက ဆက်လက်ရေးသားသည်။

၎င်း၏ဆိုလိုရင်းသည် ကာလရှည်ကြာ တည်တံ့နေခဲ့သည့် တရုတ်အပေါ် အမေရိကန်၏မူဝါဒကို ကျော်လွန်သွား စေနိုင်သည့် နောက်ဆုံးသက်သေသာဓကတစ်ခုလည်း ဖြစ်သည်။

ထိုင်ဝမ်ကို ကာကွယ်ရန် အမေရိကန်က စစ်ရေးအရ တုံ့ပြန်မှာလားဆိုသည့် မေးခွန်းကို ယခုအထိ ရှင်းရှင်း လင်းလင်း မထုတ်ဖော်သေးပေ။

ထိုင်ဝမ်နှင့်ပတ်သက်၍ မူဝါဒ မပြောင်းလဲကြောင်း အိမ်ဖြူတော်က အခိုင်အမာပြောကြားထားသော်လည်း ဘိုင်ဒန်၏သဘောထားမှတ်ချက်များသည် ထိုင်ဝမ်လွတ်လပ်ရေးကြိုးပမ်းနေသူများအတွက် မှားယွင်းသည့် အချက်ပြမှုတစ်ခုဖြစ်ကြောင်း တရုတ်က တုံ့ပြန်ခဲ့သည်။

Source: Reuters

CNI International News

မော်စကို၊ စက်တင်ဘာ ၂၄

ရုရှားသမ္မတ ဗလာဒီမာပူတင် ကြေညာခဲ့သည့် စစ်မှုထမ်း အင်အားတိုးမြှင့်ရန် တစိတ်တပိုင်း စည်းရုံးရေး အစီအစဉ်အရ ဘဏ်လုပ်ငန်းရှင်များနှင့် သတင်းမီဒီယာသမားအချို့ကို ယူကရိန်းစစ်ပွဲ သွားရောက်၍ လက်နက်ကိုင်စေခြင်းမှ ကင်းလွတ်ခွင့်ပေးထားကြောင်း ရုရှားအစိုးရက ပြောကြားခဲ့သည်။

ယူကရိန်းသို့ စေလွှတ်ရန် ရုရှားစစ်တပ် အားကောင်းလာစေဖို့အတွက် နောက်ထပ် တပ်ဖွဲ့ဝင် အရေအတွက် ၃ သိန်း ထပ်မံခေါ်ယူနိုင်ရန် ကြိုးပမ်းမည်ဟု ကာကွယ်ရေးဝန်ကြီး ဆာဂျီရွှိုင်ဂုက စက်တင်ဘာ ၂၁ တွင် ပြောကြား ခဲ့သည်။

အထူးအရေးကြီးသော စက်မှုလုပ်ငန်းတွင် ဝန်ထမ်းများကို အဆင့်မြင့် နည်းပညာလုပ်ငန်းနှင့် ရုရှားဘဏ္ဍာရေး စနစ်တို့ ကင်းလွတ်ခွင့်ပေးမည်ဟု ရုရှားကာကွယ်ရေးဝန်ကြီးဌာန စက်တင်ဘာ ၂၃ ရက်တွင် ကြေညာခဲ့သည်။

ယူကရိန်းကို တိုက်ခိုက်ရေး စစ်မှုထမ်းတာဝန် ကင်းလွတ်ခွင့် ခြွင်းချက်ထားသူများထဲတွင် အိုင်တီဝန်ထမ်းများ၊ ဆက်သွယ်ရေး လုပ်ငန်းဝန်ထမ်းများ၊ ငွေကြေးဆိုင်ရာ ကျွမ်းကျင်ပညာရှင်များနှင့် တရားဝင် မှတ်ပုံတင်ထားသော မီဒီယာနှင့်ရုပ်သံလွှင့်ဌာနများ ပါဝင်ကြသည်။

ရုရှားစစ်မှုမထမ်းလို၍ နိုင်ငံကနေ ထွက်ခွာနေသူများ (AP)

အရေအတွက်၊ ဝင်ငွေ (သို့မဟုတ်) နှစ်စဉ် အခွန်ပေးဆောင်မှုများအရ အချို့သတ်မှတ်ချက်များနှင့် ပြည့်မီပါက အရေးကြီးသော လုပ်ငန်းရှင်များနှင့် အဓိကကုမ္ပဏီများကို အမျိုးအစား ခွဲခြားပေးထားသည်။

ယင်းသို့ အမျိုးအစား ခွဲထားခြင်းကြောင့် အစိုးရကျောထောက်နောက်ခံပြု ချေးငွေများ၊ ထောက်ပံ့ကြေးများနှင့် နိုင်ငံတော် ရင်းနှီးမြှုပ်နှံမှုများကဲ့သို့ ကရင်မလင်၏ လုပ်ငန်းဆောင်တာများအတွက် အထူးအကျိုးရှိစေမည် ဖြစ် သည်။

ထိုကဲ့သို့ ခွဲခြားထားမှု အစီအမံများကို မကြာသေးမီက Covid-19 ကပ်ရောဂါ ကာလတွင်လည်း ကရင်မလင် သမ္မတ နန်းတော်ကို ကျင့်သုံးခဲ့သည်။

ထို့နောက် အဆိုပါ ခွဲခြားသတ်မှတ်ထားသော မီဒီယာများထဲတွင် အစိုးရပိုင် တီဗီချန်နယ်များ၊ ရေဒီယိုအသံလွှင့် လုပ်ငန်းများ၊ သတင်းဌာနများနှင့် သတင်းစာများအပြင် ရုရှားပြည်တွင်း ပုဂ္ဂလိကပိုင် မီဒီယာအချို့လည်း အကျုံး ဝင်သည်။

ကုမ္ပဏီအကြီးအကဲများ အနေဖြင့် သတ်မှတ်ချက်များနှင့် ကိုက်ညီသော ဝန်ထမ်းများကို စာရင်းပြုစုပြီး ယခု ညွှန်ကြားချက်အရ မူကြမ်းထဲမှ ဖယ်ထုတ်နိုင်ခွင့် ပြုထားကြောင်း ကာကွယ်ရေးဝန်ကြီးဌာနက သတင်းထုတ်ပြန် ထားသည်။

Source: Aljazeera

CNI International News

၂၀၂၂ ခုနှစ်၊ စက်တင်ဘာ ၂၄

ကရင်မလင်သမ္မတနန်းတော်က အရန်တပ်ဖွဲ့အင်အားများထဲကနေ ရုရှားတပ်တော်အတွက် တာဝန် ထမ်းဆောင်ရန် အမိန့်ထုတ်ပြန်ခဲ့ခြင်းကြောင့် စစ်မှုမထမ်းလိုသော ရုရှားနိုင်ငံသားများသည် အစုလိုက် အပြုံလိုက် နိုင်ငံအတွင်းကနေ ထွက်လာနေကြကြောင်း အေပီသတင်းက ဖော်ပြထားသည်။

ရုရှားနိုင်ငံသားများသည် စက်တင်ဘာ ၂၃ ရက်နေ့က ဂျော်ဂျီယာနယ်စပ်သို့ မော်တော်ယာဉ်များဖြင့် ထွက်ခွာလာကြသည်။ အဆိုပါ ဂျော်ဂျီယာနယ်စပ်သို့ ဦးတည်၍ ထွက်လာသော ရုရှားနိုင်ငံသားများ၏ ယာဉ်တန်းသည် လမ်းပေါ်တွင် ၁၀ ကီလိုမီတာ(၆ မိုင်)ထိ ရှည်လျားစွာ တန်းစီနေသည်ကိုတွေ့ရသည်။

စစ်မှုမထမ်းလို၍ နိုင်ငံက ထွက်ခွာဖို့ လုပ်နေသော ရုရှားနိုင်ငံသားများ(AP)

ရုရှားသမ္မတ ဗလာဒီမာ ပူတင်က ယူကရိန်းစစ်ပွဲအတွင်း ရုရှားစစ်သားများအဖြစ် အမှုထမ်းရန် ပြီးခဲ့သည့် ရက်ပိုင်းက အမိန့်ထုတ်ခဲ့သည်။

ထို့နောက် စစ်မှုမထမ်းလိုသော ရုရှားနိုင်ငံသားများက ဂျော်ဂျီယာနယ်စပ်သို့ ထွက်ခွာနေကြခြင်းဖြစ်သည်။

အဆိုပါ အခြေအနေများကြောင့် ကရင်မလင်သမ္မတနန်းတော်က ဂျာနယ်လစ်များ၊ ဘဏ်လုပ်ငန်းရှင်များ၊ အိုင်တီနည်းပညာရှင်များကိုတော့ စစ်မှုမထမ်းမနေရ ပြဋ္ဌာန်းချက်ကနေ ကင်းလွတ်ခွင့်ပြုကြောင်း ထုတ်ပြန်ခဲ့သည်။