ထိုင်းလွှတ်တော်မှာ ထိုင်းဝန်ကြီးချုပ် ရွေးချယ်နေ
CNI News
၂၀၂၃ ခုနှစ်၊ ဇူလိုင် ၁၃
ထိုင်းအစိုးရအဖွဲ့သစ်အတွက် တာဝန်ထမ်းဆောင်ရမည့် ဝန်ကြီးချုပ်အသစ် ရွေးချယ်ခြင်း အစည်းအဝေးကို ဇူလိုင် ၁၃ ရက်နေ့ ညနေ ၄ နာရီကျော်မှာ ထိုင်းလွှတ်တော်၌ ကျင်းပနေပြီ ဖြစ်သည်။
ထိုင်းဝန်ကြီးချုပ်အသစ်အဖြစ် မေလ ၁၄ ရက်နေ့တွင် ကျင်းပခဲ့သော ထိုင်းရွေးကောက်ပွဲ၌ အများဆုံး အနိုင်ရရှိခဲ့သည့် Move Forward ပါတီ ခေါင်းဆောင် ပီတာလင်ဂျာရုန်ရတ်က ရေပန်းစားနေသည်။
သို့သော် ပီတာသည် လွှတ်တော်၏ ၃၇၆ မဲ ရရှိမှသာလျှင် ဝန်ကြီးချုပ် ဖြစ်မည်။ တခြားတစ်ဖက်မှာတော့ ပီတာ ကို ထောက်ခံသူများက လွှတ်တော် ပြင်ပမှာ လူစုလူဝေးဖြင့် စောင့်ကြည့်နေသည်။
အကယ်၍ ပီတာ ထောက်ခံသူများက မျှော်မှန်းသည့် ရလဒ်မထွက်လာပါက ဆန္ဒပြမှုများ လုပ်သွားရန်လည်း ပြင်ဆင်ထားခြင်းကြောင့် ထိုင်းရဲတပ်ဖွဲ့ကလည်း လမ်းများနှင့် လွှတ်တော် အဆောက်အဦကို အကာအရံများ ထားကာ လုံခြုံရေးယူထားသည်။
