CNI Sport News

၂၀၂၂ ခုနှစ်၊ ဇူလိုင် ၅

အဲဗာတန်အသင်း လက်ထောက်နည်းပြ ဒွန်ကန်ဖာဂူဆန်က နည်းပြလမ်းပတ်ဟာ သူ့ကို အသင်းမှာ ဆက် နေခိုင်းခဲ့ပေမယ့် နည်းပြရာထူးကို ရယူချင်တဲ့အတွက် ထွက်ခွာဖို့ ဆုံးဖြတ်ခဲ့တာလို့ ပြောပါတယ်။

ဒွန်ကန်ဖာဂူဆန်က “ဒါဟာ ကျနော့်အတွက် ကြီးမားတဲ့ ဆုံးဖြတ်ချက်ပါ။ဒီလိုလုပ်ဆောင်ဖို့ ခက်ခဲခဲ့ပေမယ့် ကျနော့်ရဲ့ အသက်မွေးဝမ်းကျောင်းမှာ နောက်တစ်ဆင့်တက်ဖို့နဲ့ စိန်ခေါ်မှုအသစ်တွေ ရှာဖွေဖို့ လိုအပ်ပါ တယ်။ပြီးခဲ့တဲ့ရာသီက ခက်ခဲခဲ့ပေမယ့် ဒီအသင်းက လမ်းကြောင်းမှန်ပေါ်ကို ဦးတည်နေပါပြီ။လမ်းပတ်ကတော့ ကျနော့်ကို ဒီမှာဆက်နေစေချင်ခဲ့ပါတယ်။လမ်းပတ်က ကြီးကျယ်ခမ်းနားတဲ့သူဖြစ်သလို ကြီးကျယ်ခမ်းနားတဲ့ လူငယ်နည်းပြတစ်ဦးပါ။အဲဗာတန်အတွက် သူကောင်းမွန်စွာလုပ်ဆောင်နိုင်မယ်ဆိုတာ ယုံကြည်တယ်”လို့ ပြောခဲ့ပါတယ်။

ဒွန်ကန်ဖာဂူဆန်ဟာ ဂွတ်ဒီဆင်ပါ့ခ်မှာ အန်ဆယ်လော့တီ၊ဘင်နီတက်စ်နဲ့ အခုနည်းပြ လမ်းပတ်တို့ရဲ့ လက်ထောက်နည်းပြအဖြစ် ဆောင်ရွက်ခဲ့တာပါ။ဒါ့အပြင် အသင်းနည်းပြသစ်မခန့်အပ်ရချိန်မှာ ယာယီနည်းပြ အဖြစ် နှစ်ကြိမ်ဆောင်ရွက်ခဲ့တာဖြစ်ပါတယ်။ဒွန်ကန်ဖာဂူဆန်ဟာ နည်းပြဘဝ မစတင်ခင် အဲဗာတန်အသင်းနဲ့ အတူ အက်ဖ်အေဖလား ဆွတ်ခူးနိုင်ခဲ့တဲ့ နာမည်ကျော်တိုက်စစ်မှူးတစ်ဦးလည်း ဖြစ်ခဲ့တာပါ။ဒွန်ကန်ဖာဂူဆန်ဟာ အဲဗာတန်အသင်းမှာ နှစ်ကြိမ်ကစားခဲ့ပြီး ၂၀၀၆ မှာ ကစားသမားဘဝကနေ အနားယူခဲ့တာဖြစ်ပါတယ်။

စကော့တလန်ကစားသမားဟောင်းဟာ အဲဗာတန်အသင်းအတွက် ၂၇၃ ပွဲပါဝင်ကစားခဲ့ပြီး ၇၃ ဂိုး သွင်းယူ နိုင်ခဲ့တာပါ။ဒွန်ကန်ဖာဂူဆန်က “ကျနော် ဒီကို ၁၉၉၄ မှာရောက်လာကတည်းက ပရိသတ်တွေက မယုံနိုင်လောက် အောင်ဖြစ်ခဲ့ပါတယ်။ကျနော်တို့မှာ ခိုင်မာတဲ့ သံယောစဉ်တွေရှိကြပါတယ်။ကျနော်တို့ရဲ့ ဆက်ဆံရေးက ထူးခြား ပြီး ဒါက ကျနော့်အတွက် ဘယ်လောက်အဓိပ္ပါယ်ရှိလဲဆိုတာ သူတို့သိပါတယ်။ကျနော် သူတို့ကို အမြဲတမ်း ချစ်နေမှာပါ”လို့ ပြောခဲ့ပါတယ်။

အဲဗာတန်အသင်းဟာ ပြီးခဲ့တဲ့ရာသီက ရာသီမကုန်ဆုံးခင် တစ်ပွဲအလိုထိ တန်းဆင်းဇုန်ကနေ လွတ်မြောက်အောင် ရုန်းကန်ခဲ့ရပြီး နောက်ဆုံးမှာ အဆင့် ၁၆ နေရာနဲ့ ရာသီအဆုံးသတ်နိုင်ခဲ့တာ ဖြစ်ပါတယ်။

Source:ChannelNewsAsia

CNI Sport News

၂၀၂၂ ခုနှစ်၊ ဇူလိုင် ၅

အသက် ၂၉ နှစ်အရွယ်ရှိ ပရီးမီးယားလိဂ်ဘောလုံးသမားတစ်ဦးဟာ မုဒိမ်းမှုသံသယနဲ့ လန်ဒန်မြောက်ပိုင်းမှာ ဖမ်းဆီးခံလိုက်ရပါတယ်။

ဥပဒေအကြောင်းအရ ဖမ်းဆီးထိန်းသိမ်းခံခဲ့ရတဲ့ လက်ရွေးစင်ကစားသမားတစ်ဦးရဲ့အမည်ကို ဖော်ပြလို့မရဘူးလို့ သိရပါတယ်။ပြီးခဲ့တဲ့လက ဖြစ်ပျက်ခဲ့တဲ့ ဒီအမှုနဲ့ပတ်သက်ပြီး လက်ရှိအချိန်မှာ သူ့ကို ရဲစခန်းမှာ စစ်ဆေးမေးမြန်း နေတာပါ။Metropolitan ရဲတပ်ဖွဲ့ က “အသက် ၂၀ အရွယ်ရှိ အမျိုးသမီးတစ်ဦးကို မုဒိမ်းမှုကျူးလွန်ခဲ့ကြောင်း ဇူလိုင်လ ၄ ရက်က ရဲတပ်ဖွဲ့ထံ တိုင်ကြားခဲ့ပါတယ်။ဒီ မုဒိမ်းမှုစွဲချက်ဟာ ၂၀၂၂ ခုနှစ် ဇွန်လမှာ ဖြစ်ပွားခဲ့တာလို့ သတင်းရထားကြောင်း” ထုတ်ပြန်ခဲ့ပါတယ်။

ရဲတပ်ဖွဲ့က အဆိုပါအမျိုးသားကို မုဒိမ်းမှုသံသယနဲ့ ဘားနတ်မှာရှိတဲ့လိပ်စာတစ်ခုမှာ ဖမ်းဆီးခဲ့တာဖြစ်ပြီး သူ့ကို ချုပ်နှောင်ထားတာပါ။ဒီအခြေအနေတွေနဲ့ပတ်သက်ပြီး စုံစမ်းစစ်ဆေးနေတယ်လို့ ရဲတပ်ဖွဲ့က ပြောထားပါတယ်။ တနင်္လာနေ့ မနက်အစောပိုင်းမှာ ဖမ်းဆီးထိန်းသိမ်းခံခဲ့ရတဲ့ ပရီးမီးယားလိဂ် ဘောလုံးသမားဟာ အသက် ၂၉ နှစ် အရွယ်ရှိပြီဖြစ်တယ်လို့ ရဲတပ်ဖွဲ့ရဲ့ နောက်ထပ်ထုတ်ပြန်ချက်မှာ အတည်ပြုခဲ့တာပါ။

The Telegraph ကတော့ ကစားသမားရဲ့အသင်းဟာ အခြေအနေကို သိရှိပေမယ့် မှတ်ချက်ပေးဖို့ ငြင်းဆန်ခဲ့ တယ်လို့ ဖော်ပြခဲ့ပါတယ်။ဖမ်းဆီးထိန်းသိမ်းခံခဲ့ရတဲ့ ကစားသမားဟာ နိုဝင်ဘာလမှာ စတင်မယ့် ကာတာ ကမ္ဘာ့ ဖလားပြိုင်ပွဲမှာ ပါဝင်ဖို့ ရှိနေတယ်လို့ သတင်းတွေက အခိုင်အမာဖော်ပြခဲ့တာပါ။လက်ရှိအချိန်မှာ ပရီးမီးယားလိဂ် ကလပ်အသင်းတွေဟာ ရာသီသစ်မစတင်ခင် ရာသီကြိုခြေစမ်းပွဲခရီးတွေထွက်ဖို့ ပြုလုပ်နေကြပြီး ဒီကစားသမား ပါဝင်နိုင်မလားဆိုတာ မသေချာသေးပါဘူး။

လာမယ့်ရာသီ ပရီးမီးယားလိဂ်ပြိုင်ပွဲကို သြဂုတ်လ ၅ ရက်မှာ စတင်ကျင်းပသွားတော့မှာ ဖြစ်ပါတယ်။

Source:Metro

CNI Sport News

၂၀၂၂ ခုနှစ်၊ ဇူလိုင် ၅

အမေရိကန်ဘတ်စကတ်ဘော ကြယ်ပွင့် ဘရစ်တနီဂရိုင်နာက ရုရှားအကျဉ်းထောင်ကနေ လွတ်မြောက်အောင် လုပ်ပေးဖို့ အမေရိကန်သမ္မတ ဂျိုးဘိုင်ဒန်ကို တနင်္လာနေ့က လက်ရေးနဲ့ စာရေးသားပြီး တောင်းဆိုလိုက်ပါတယ်။

ဘရစ်တနီဂရိုင်နာက “ရုရှားအကျဉ်းထောင်မှာ ထိုင်နေရင်းနဲ့ ဇနီး၊မိသားစု၊သူငယ်ချင်းတွေ၊အိုလံပစ်ဂျာစီ ဒါမှမဟုတ် ဘယ်လိုအောင်မြင်မှုတွေကို အကာအကွယ်မပါဘဲ ဒီမှာ တစ်ဦးတည်းတွေးနေခဲ့ပါတယ်။ဒီမှာပဲ ထာဝရရှိနေမှာကို ကြောက်မိတယ်”လို့ ရေးသားခဲ့တာပါ။

အိုလံပစ် နှစ်ကြိမ်ချန်ပီယံ ဘရစ်တနီဂရိုင်နာဟာ မူးယစ်ဆေးဝါးမှောင်ခိုမှု စွဲချက်နဲ့ ဖေဖော်ဝါရီလကတည်းက ရုရှားမှာ ထိန်းသိမ်းခံထားရတာပါ။သူမ ဘယ်တော့မှမလွတ်မြောက်နိုင်မှာကို ကြောက်မိတယ်လို့ ဂျိုးဘိုင်ဒန်ကို ပြောခဲ့တာဖြစ်ပါတယ်။

ဘရစ်တနီဂရိုင်နာဟာ ရုရှားနိုင်ငံအတွင်းကို ဆေးခြောက်ဆီခိုးသွင်းရန် ကြိုးစားမှုနဲ့ သောကြာနေ့က ရုံးတင်စစ်ဆေးခံခဲ့ရတာပါ။သူမဟာ ဒီပြစ်မှုနဲ့ ထောင်ဒဏ် ၁၀ နှစ်အထိ ကျခံရနိုင်တယ်လို့ သတင်းတွေမှာ ဖော်ပြထားပါတယ်။သူမရဲ့အမှုနဲ့ပတ်သက်ပြီး လာမယ့် ကြာသပတေးနေ့မှာ ကြားနာဖို့ စီစဉ် ထားတာပါ။

အမေရိကန်အစိုးရတာဝန်ရှိသူတွေကတော့ ဘရစ်တနီဂရိုင်နာကို ရုရှားက မတရားဖမ်းဆီးထားတယ်လို့ ပြောခဲ့ပါ တယ်။ဘရစ်တနီဂရိုင်နာဟာ ရုရှားတပ်တွေက ယူကရိန်းထံ ကျူးကျော်ဖို့ ရက်ပိုင်းအလိုမှာ ဖမ်းဆီးထိန်းသိမ်းခံ ခဲ့ရတာပါ။

ဂရိုင်နာကတော့ အမေရိကန်သမ္မတအနေနဲ့ ကိုင်တွယ်နေတဲ့ ကိစ္စရပ်အများအပြား ရှိတယ်ဆိုတာ နားလည်ပေမယ့် သူမနဲ့ ရုရှားမှာ ဖမ်းဆီးထိန်းသိမ်းခံထားရတဲ့ အခြားအမေရိကန်နိုင်ငံသားတွေကို မမေ့ဖို့ ပြောခဲ့ပါတယ်။

ဘရစ်တနီဂရိုင်နာက “အလုပ်တွေအများကြီးလုပ်ကိုင်နေရတယ်ဆိုတာ နားလည်ပါတယ်။ကျေးဇူးပြုပြီးတော့ သူနဲ့အတူ အခြားအမေရိကန်အကျဉ်းသားတွေကို မမေ့ပါနဲ့။အားလုံးကို အိမ်ပြန်ခေါ်နိုင်ဖို့ တတ်နိုင်သမျှ လုပ်ဆောင်ပေးပါ။၂၀၂၀ မှာ ပထမဆုံးအကြိမ်မဲပေးခဲ့ပြီး သင့်ကို မဲပေးခဲ့တာပါ။ဇနီး၊မိသားစုနဲ့ အသင်းဖော်တွေ အားလုံးကို လွမ်းတယ်။ဒီအချိန်မှာ ဘယ်လိုပဲလုပ်လုပ် အိမ်ပြန်ပို့ပေးမယ်ဆိုရင် ကျေးဇူးတင်ပါတယ်”လို့ ရေးသား ခဲ့တာဖြစ်ပါတယ်။

ဘရစ်တနီဂရိုင်နာ ရေးသားထားတဲ့စာကို အမေရိကန်လွတ်လပ်ရေးနေ့ အားလပ်ရက်မှာ အိမ်ဖြူတော်ထံ တင်ပြ ခဲ့တယ်လို့ သိရပါတယ်။

Source:Bangkokpost

CNI Sport News

၂၀၂၂ ခုနှစ်၊ ဇူလိုင် ၄

မန်ချက်စတာကို လေ့ကျင့်မှုတွေ ပြုလုပ်ဖို့ ရောက်လာမယ့် ရော်နယ်ဒိုက နည်းပြသစ် အဲရစ်တန်ဟတ်နဲ့ အရေးတကြီး ဆွေးနွေးမှုတွေ ပြုလုပ်သွားမယ်လို့ The Sun သတင်းဌာနက ဖော်ပြလိုက်ပါတယ်။

ပြီးခဲ့တဲ့ရာသီက ထိပ်တန်းဂိုးသွင်းရှင် ရော်နယ်ဒိုဟာ အသင်းကနေ ထွက်ခွာခွင့် တောင်းဆိုထားတာပါ။ ရော်နယ်ဒို အပါအဝင် နိုင်ငံအသင်းတွေအတွက် ပါဝင်ကစားထားတဲ့ ကစားသမားတွေဟာ ကာရင်တန်ကွင်းကို လာရောက်ပြီး အသင်းဖော်တွေနဲ့ ပူးပေါင်းကာ လေ့ကျင့်မှုတွေ ပြုလုပ်ရတော့မှာ ဖြစ်ပါတယ်။

ရော်နယ်ဒိုဟာ ထွက်ခွာခွင့် တောင်းဆိုထားပေမယ့် အသင်းဘက်ကတော့ ရောင်းချသွားမှာ မဟုတ်ဘူးလို့ ပြတ်ပြတ်သားသား ပြောထားခဲ့တာပါ။ အဲ့ဒါကြောင့် ရော်နယ်ဒိုဟာ ထိုင်း၊ သြစတြေးလျကို ရာသီကြို ခြေစမ်းပွဲ သွားမယ့် အသင်းနဲ့အတူ လိုက်ပါ သွားရမှာ ဖြစ်ပါတယ်။

ရော်နယ်ဒိုကတော့ ဒီခရီးမသွားခင် နည်းပြသစ်နဲ့အတူ သူ့ရဲ့ မျှော်မှန်းချက်တွေနဲ့ ပတ်သက်ပြီး အရေးတကြီး ဆွေးနွေးမှုတွေ ပြုလုပ်သွားဖို့ ရှိနေပါတယ်။ ကစားသမားဘဝ ကုန်ဆုံးဖို့ နီးကပ်လာပြီဖြစ်တဲ့ ရော်နယ်ဒိုဟာ ဆုဖလားတွေ ရယူနိုင်ဖို့ မျှော်လင့်ချက်နဲ့အတူ ကြိုးစားနေတာ ဖြစ်ပါတယ်။

အဲရစ်တန်ဟတ်၊ ဒီဂျောင်၊ အဲရစ်ဆန် တို့ကို တွေ့ရစဉ်

ဒါပေမယ့် လက်ရှိအသင်းရဲ့ အခြေအနေတွေဟာ သူရဲ့ ရည်မှန်းချက်ကို ဖြည့်ဆည်းနိုင်ဖွယ် မရှိဘူးလို့ ရော်နယ်ဒိုက ယုံကြည် နေခဲ့တာပါ။ ဒါကြောင့်လည်း ရော်နယ်ဒိုဟာ အသင်းကနေ ထွက်ခွာခွင့် တောင်းဆိုခဲ့တာ ဖြစ်ပါတယ်။

ရော်နယ်ဒိုရဲ့ အေးဂျင့်ဖြစ်သူ ဂျော့ချ်မန်ဒတ်စ်ဟာ ကစားသမားအတွက် အသင်းသစ်ကို ရှာဖွေနေပြီး သူ့ကို ခေါ်ယူဖို့ ချယ်လ်ဆီး၊ ဘိုင်ယန်မြူးနစ်၊ နာပိုလီ၊ စပို့တင်းလစ္စဘွန်းနဲ့ ပေါ်တိုအသင်းတို့က စိတ်ဝင်စား နေတယ်လို့ သတင်းတွေ ထွက်ပေါ်နေပါတယ်။

ရော်နယ်ဒိုနဲ့ ယူနိုက်တက်တို့ ချုပ်ဆိုထားတဲ့ စာချုပ်ဟာ တစ်နှစ် ကျန်ရှိနေသေးပြီး စာချုပ်အရ နောက်ထပ် တစ်နှစ် ထပ်တိုးဖို့ ရွေးချယ်ခွင့် ရှိနေပါတယ်။

မန်ချက်စတာယူနိုက်တက် အသင်းဟာ အခုနွေရာသီ အပြောင်းအရွှေ့အတွက် ပထမဆုံး ကစားသမား ခေါ်ယူမှုအဖြစ် ဖီယင်နုအသင်းက ဘယ်နောက်ခံလူ မာလာစီယာကို ခေါ်ယူထားပါတယ်။

ဒါ့အပြင် ဘာစီလိုနာအသင်း ကွင်းလယ်လူ ဒီဂျောင်၊ ဘရန်ဖို့ဒ်အသင်း ကွင်းလယ် ကစားသမားဟောင်း အဲရစ်ဆန်၊ အေဂျတ်စ် တောင်ပံကစားသမား အန်တိုနီတို့ကို ခေါ်ယူနိုင်ဖို့လည်း ကြိုးစားနေပါတယ်။ မန်ချက်စတာကလပ်ဟာ ရာသီကြိုခြေစမ်းပွဲ ပထမဆုံးပွဲအဖြစ် ဇူလိုင် ၁၂ ရက်မှာတော့ ဘန်ကောက်မှာ လီဗာပူးလ်အသင်းနဲ့ ယှဉ်ပြိုင်သွားဖို့ ရှိနေပါတယ်။

Source: The Sun

CNI Sport News

၂၀၂၂ ခုနှစ်၊ ဇူလိုင် ၂

စီးရီးအေဟာ လာမယ့် ၂၀၂၂-၂၃ ရာသီအတွက် မာရီရာဆိုလီကို သူတို့ရဲ့ ပထမဆုံးအမျိုးသမီး ဒိုင်လူကြီးအဖြစ် ခန့်အပ်လိုက်ပါတယ်။

အီတလီရှိ ဒိုင်လူကြီးဉက္ကဋ္ဌ အယ်လ်ဖရီဒိုက “ဒါဟာ အလွန်လှပတဲ့ အခိုက်အတန့်နဲ့ ကျေနပ်စရာအကောင်းဆုံး အချိန်ဖြစ်ပြီး မာရီရာဆိုလီဟာ စီးရီးအေရဲ့ ပထမဆုံးအမျိုးသမီးဒိုင်လူကြီး ဖြစ်လာမှာပါ။ဒါဟာ သမိုင်းဝင် အခိုက်အတန့်ပါပဲ။ဒီလို ရာထူးတိုးလာခြင်းဟာ အခွင့်ထူးခံကြောင့်မဟုတ်ဘဲ သူ့ရဲ့ တိုးတက်မှုတွေကြောင့် အခုလိုဖြစ်လာရတာ” လို့ ပြောခဲ့တာပါ။

အသက် ၃၁ နှစ်အရွယ်ရှိ မာရီရာဆိုလီဟာ ပြီးခဲ့တဲ့ရာသီက ကာဂလီယာရီနဲ့ စီတာဒယ်လာအသင်းတို့ ကစားခဲ့တဲ့ ဖလားပွဲကို ကိုင်တွယ်ခဲ့ပြီးနောက် စီးရီးအေအသင်းပါဝင်တဲ့ ပွဲကိုကိုင်တွယ်ခဲ့တဲ့ ပထမဆုံး အမျိုးသမီးဒိုင်လူကြီး ဖြစ်ခဲ့ပါတယ်။မာရီရာဆိုလီဟာ လာမယ့်ရာသီမှာတော့ ပထမဆုံးအကြိမ်အဖြစ် စီးရီးအေ ထိပ်တန်းလိဂ်ပြိုင်ပွဲမှာ ဒိုင်လူကြီးအဖြစ် ဆောင်ရွက်ရတော့မှာပါ။သူမဟာ ၂၀၀၇ မှာ ဒိုင်လူကြီးများအဖွဲ့ထဲကို ဝင်ရောက်လာခဲ့တာ ဖြစ်ပါတယ်။

မာရီရာဆိုလီဟာ စီးရီးဒီပွဲစဉ်တွေကို စတင်ကိုင်တွယ်တဲ့ ၂၀၁၅ မတိုင်ခင် ခရိုင်နဲ့ ဒေသဆိုင်ရာလိဂ်တွေမှာ တာဝန်ယူအလုပ်လုပ်ခဲ့ရတာပါ။အဲဒီနောက် ၂၀၁၉ မှာ အမျိုးသမီးဥရောပချန်ပီယံရှစ် ခြေစစ်ပွဲ ၂ ပွဲကိုင်တွယ်ခဲ့ပြီး နောက်ထပ်ခြေလှမ်းအသစ်တွေ ထမ်လှမ်းနိုင်ခဲ့တာဖြစ်ပါတယ်။အီတလီအမျိုးသမီး ဒိုင်လူကြီးဟာ နောက်တစ်နှစ် အကြာမှာ စီးရီးစီ ပွဲစဉ်တွေအပြင် စီးရီးဘီပွဲစဉ်ဖြစ်တဲ့ စီတာဒယ်လာနဲ့ စပဲလ်အသင်းတို့ရဲ့ ပွဲစဉ်ကိုပါ ကိုင်တွယ်ခဲ့ ရတာပါ။ပြီးခဲ့တဲ့ရာသီမှာတော့ အီတလီဖလားပွဲစဉ်တစ်ပွဲကို တာဝန်ယူကိုင်တွယ်ခဲ့ရတာ ဖြစ်ပါတယ်။

စီးရီးအေဟာ လာမယ့်ရာသီက စတင်ကာ အမှတ်ပေးဇယားထိပ်ဆုံးနေရာမှာ ရပ်တည်နေတဲ့နှစ်သင်း နောက်ဆုံး ပွဲစဉ်မှာ အမှတ်တူနေခဲ့ရင် ပလေးအောဖ့်ကစားပြီး ချန်ပီယံဆုကို ဆုံးဖြတ်ဖို့လည်း အတည်ပြုထားတာ ဖြစ်ပါ တယ်။

Source:ChannelNewsAsia

CNI Sport News

၂၀၂၂ ခုနှစ်၊ ဇူလိုင် ၂

အမေရိကန်အမျိုးသားအသင်းဟာ ၂၀၂၄ အိုလံပစ်ပြိုင်ပွဲ ယှဉ်ပြိုင်ခွင့်ရသွားခဲ့တာကြောင့် ဒီပြိုင်ပွဲကိုယှဉ်ပြိုင်နိုင်ဖို့ ၁၆ နှစ်ကြာ စောင့်ဆိုင်းခဲ့ရတာကို အဆုံးသတ်သွားခဲ့ပြီဖြစ်ပါတယ်။

အမေရိကန် ယူ-၂၃ အသင်းဟာ ၂၀၀၈ က ဘေဂျင်းမှာကျင်းပခဲ့တဲ့ အိုလံပစ်ပြိုင်ပွဲကို နောက်ဆုံးယှဉ်ပြိုင်ခဲ့ရတာပါ။ အမေရိကန်အသင်းဟာ ၂၀၂၂ ကွန်ကာကပ်ဖ် ယူ-၂၀ ချန်ပီယံရှစ် ဆီမီးဖိုင်နယ်ပွဲစဉ်အဖြစ် ဟွန်ဒူးရပ်စ်နဲ့ ကစားခဲ့ရာ ၃ ဂိုး- ဂိုးမရှိနဲ့ ဂိုးပြတ်အနိုင်ရခဲ့တာဖြစ်ပါတယ်။ပဲရစ်မှာ ကျင်းပမယ့် ၂၀၂၄ အိုလံပစ်ပြိုင်ပွဲမှာ အခု ကျင်းပနေတဲ့ ဒီပြိုင်ပွဲက ဗိုလ်လုပွဲရောက်တဲ့နှစ်သင်းသာ ခြေစစ်ပွဲအောင်မြင်မှာပါ။ အဲဒါကြောင့် အမေရိကန်နဲ့ အတူ ဒိုမီနီကန် သမ္မတနိုင်ငံပါ အိုလံပစ်ပြိုင်ပွဲ ယှဉ်ပြိုင်ခွင့်ရရှိသွားခဲ့တာ ဖြစ်ပါတယ်။

ဒိုမီနီကန်သမ္မတနိုင်ငံဟာ ဆီမီးဖိုင်နယ်မှာ ဂွာတီမာလာကို ပင်နယ်တီအဆုံးအဖြတ်နဲ့ အနိုင်ရရှိခဲ့တာပါ။ အဲဒါ ကြောင့် အမေရိကန်နဲ့ ဒိုမီနီကန်သမ္မတနိုင်ငံတို့ဟာ ကွန်ကာကပ်ဖ် ယူ-၂၀ ချန်ပီယံရှစ်ပြိုင်ပွဲ ဗိုလ်လုပွဲအဖြစ် ယှဉ်ပြိုင်ကြရမှာ ဖြစ်ပါတယ်။ဒါ့အပြင် ကျင်းပနေတဲ့ ကွန်ကာကပ်ဖ်ပြိုင်ပွဲမှာ ဆီမီးဖိုင်နယ်တက်ခဲ့တဲ့ အမေရိကန်၊ ဒိုမီနီကန်သမ္မတနိုင်ငံ၊ ဂွာတီမာလာနဲ့ ဟွန်ဒူးရပ်စ်အသင်းတို့ဟာ ၂၀၂၃ ခုနှစ် ယူ-၂၀ ကမ္ဘာ့ဖလားပြိုင်ပွဲ ယှဉ်ပြိုင်ခွင့် ရရှိသွားခဲ့တာပါ။

အမေရိကန်အသင်းဟာ ဘေဂျင်းမှာ နောက်ဆုံးယှဉ်ပြိုင်ခဲ့တဲ့ အိုလံပစ်ပြိုင်ပွဲမှာ အုပ်စုအဆင့်နဲ့သာ ကျေနပ်ခဲ့ရတာ ဖြစ်ပါတယ်။အမေရိကန်အသင်းဟာ ၁၉၀၄ ခုနှစ်က ကျင်းပခဲ့တဲ့ အိုလံပစ်ပြိုင်ပွဲမှာ ငွေတံဆိပ်နဲ့ ကြေးတံဆိပ် ရရှိ ခဲ့ပြီး အဲဒီနောက်ပိုင်း ၂၀၀၀ ခုနှစ်က သြစတြေးလျမှာ ကျင်းပခဲ့တဲ့ပြိုင်ပွဲမှာ စတုတ္တရခဲ့တာက အမြင့်ဆုံး အောင်မြင်မှုဖြစ်ခဲ့တာပါ။

၂၀၂၄ အိုလံပစ်အမျိုးသားဘောလုံးပြိုင်ပွဲကို အိမ်ရှင်အသင်း ပြင်သစ်အပါအဝင် အသင်းပေါင်း ၁၆ သင်းနဲ့ ကျင်းပ သွားမှာဖြစ်ပါတယ်။လက်ရှိအချိန်ထိတော့ ပြင်သစ်၊အမေရိကန်နဲ့ ဒိုမီနီကန်သမ္မတနိုင်ငံတို့ ၃ သင်းသာ ဝင်ခွင့်ရ အသင်းအဖြစ် ထွက်ပေါ်နေတာဖြစ်ပါတယ်။

Source:Goal

CNI Sport News

၂၀၂၂ ခုနှစ်၊ ဇူလိုင် ၂

အင်္ဂလန်အသင်းဟာ ဥရောပ ယူ-၁၉ ချန်ပီယံရှစ်ပြိုင်ပွဲမှာ အစ္စရေးအသင်းကို အချိန်ပိုမှာ အနိုင်ရပြီး ချန်ပီယံဆုကို ဆွတ်ခူး နိုင်ခဲ့ပါတယ်။

အင်္ဂလန်အသင်းနဲ့ အစ္စရေးအသင်းတို့ဟာ ပွဲချိန်အတွင်းမှာ ၁ ဂိုးစီ သရေကျခဲ့တာကြောင့် အချိန်ပို ဆက်လက် ကစားခဲ့ကြရာ မှာ အင်္ဂလန်အသင်းက နောက်ထပ် ၂ ဂိုး သွင်းယူပေးခဲ့တဲ့အတွက် ပွဲအပြီးမှာ အင်္ဂလန်အသင်းက ၃ ဂိုး- ၁ ဂိုးနဲ့ အနိုင်ရပြီး ချန်ပီယံဆုကို ရယူနိုင်ခဲ့တာ ဖြစ်ပါတယ်။

အင်္ဂလန်အတွက် ဂိုးတွေကို ဒွိုင်းလီ၊ ချူကွီမီကာနဲ့ ရမ်ဆေးတို့က သွင်းယူခဲ့ကြပြီး အစ္စရေးအတွက် ဂိုးကို ဂလော့ချ်က သွင်းယူ ခဲ့တာ ဖြစ်ပါတယ်။ အင်္ဂလန်အသင်းဟာ ဥရောပ ယူ-၁၉ ချန်ပီယံဆုကို ၂၀၁၇ က နောက်ဆုံး ရရှိခဲ့တာဖြစ်ပြီး ၅ နှစ်အကြာမှ ပြန်လည် ရယူနိုင်ခဲ့တာ ဖြစ်ပါတယ်။

ချူကွီမီကာက” ဒီလိုအချိန်တွေကို အိပ်မက် မက်နေခဲ့ကြတာပါ။ အခုတော့ ကောင်လေးတွေနဲ့အတူ အောင်ပွဲခံဖို့ အိပ်မက်က အမှန်တကယ် ဖြစ်လာပါပြီ။ ဒါကို ပျော်ပျော်ကြီး ဆင်နွှဲကြမယ်”လို့ ပြောခဲ့ပါတယ်။

အင်္ဂလန် ယူ-၁၉ အသင်းကို တွေ့ရစဉ်(England)

အင်္ဂလန်အသင်းခေါင်းဆောင် ဟာရီကိန်းနဲ့ ဂရီလစ်ရှ်တို့က လက်ရွေးစင် ယူ-၁၉ ရဲ့ အောင်ပွဲကို သူတို့ရဲ့ တွစ်တာမှာ ဂုဏ်ပြု ကြောင်း ရေးသားခဲ့ကြပါတယ်။

ဆလိုဗားကီးယားမှာ ကျင်းပခဲ့တဲ့ ဒီပြိုင်ပွဲမှာတော့ အင်္ဂလန်အသင်းဟာ အုပ်စုတွင်း ကျရောက်ခဲ့တဲ့ အစ္စရေး၊ သြစတြီးယားနဲ့ ဆားဘီးယားတို့ကို ကျော်ဖြတ်ခဲ့ပြီး ဆီမီးဖိုင်နယ်ကို တက်ရောက်ခဲ့ပါတယ်၊ ဆီမီးဖိုင်နယ်မှာတော့ အီတလီကို အနိုင်ရပြီး တော့ ဗိုလ်လုပွဲ တက်နိုင်ခဲ့တာ ဖြစ်ပါတယ်။ အင်္ဂလန်အသင်းဟာ ဥရောပ ယူ-၁၉ ပြိုင်ပွဲမှာ ချန်ပီယံဆုကို ၁၁ ကြိမ်မြောက် ရယူနိုင်ခဲ့တာ ဖြစ်ပါတယ်။

စပိန်အသင်းကလည်း ချန်ပီယံဆုကို ၁၁ ကြိမ် ရယူထားတာကြောင့် အင်္ဂလန်အသင်းဟာ စပိန်နဲ့အတူ ဒီပြိုင်ပွဲရဲ့ အအောင် မြင်ဆုံး အသင်းအဖြစ် ရပ်တည်နိုင်ခဲ့ပါတယ်။ ဒီပြိုင်ပွဲမှာ ချန်ပီယံ ဖြစ်ခဲ့တဲ့ အင်္ဂလန်ဟာ ဒုတိယရခဲ့တဲ့ အစ္စရေး၊ အီတလီ၊ ဆလိုဗားကီးယား၊ ပြင်သစ် တို့နဲ့အတူ ၂၀၂၃ ယူ-၂၀ ကမ္ဘာ့ဖလားပြိုင်ပွဲကို ယှဉ်ပြိုင်ခွင့် ရခဲ့တာပါ။

Source: Daily Mail

CNI Sport News

၂၀၂၂ ခုနှစ်၊ ဇူလိုင် ၂

ဆာလတ်ဟာ လီဗာပူးလ်အသင်းနဲ့ ၃ နှစ်စာချုပ်သစ်ချုပ်ဆိုလိုက်ပြီး အသင်းသမိုင်းတစ်လျှောက် လုပ်ခ လစာအများဆုံး ကစားသမားဖြစ်လာခဲ့တယ်လို့ သိရပါတယ်။

စာချုပ်သစ်ကြောင့် ဆာလတ်ဟာ လီဗာပူးလ်အသင်းမှာ တစ်ပတ်လုပ်ခ ပေါင် ၃ သိန်း ၅ သောင်း ရရှိမှာပါ။ အစောပိုင်းက ဆာလတ်နဲ့ လီဗာပူးလ်အသင်းတို့ စာချုပ်သစ်ချုပ်ဆိုဖို့ အဆင်မပြေတာကြောင့် ကစားသမားရဲ့ အနာဂတ်နဲ့ပတ်သက်ပြီး ထင်ကြေးတွေအမျိုးမျိုးထွက်ပေါ်ခဲ့တာ ဖြစ်ပါတယ်။ဒါပေမယ့် လီဗာပူးလ်အသင်းဟာ ဒီထင်ကြေးတွေကို အဆုံးသတ်လိုက်ပြီး ဆာလတ်ကို အသင်းမှာ ၂၀၂၅ နွေရာသီအထိ ရှိမယ့် စာချုပ်သစ်ချုပ် ဆိုခဲ့တာပါ။

ဆာလတ်နဲ့ လီဗာပူးလ်အသင်းတို့ အရင်ချုပ်ဆိုထားတဲ့စာချုပ်ဟာ လာမယ့်ရာသီအကုန်မှာ ကုန်ဆုံးမှာဖြစ်ပြီး အလွတ်ပြောင်းရွှေ့ကြေးနဲ့ လက်မလွှတ်ရအောင် အန်ဖီးလ်ကလပ်က ကြိုးစားခဲ့တာဖြစ်ပါတယ်။ လီဗာပူးလ် အသင်းဟာ အဓိကတိုက်စစ်မှူး မာနေးကို ဘိုင်ယန်မြူးနစ်အသင်းထံ ရောင်းချခဲ့ပြီးနောက် ဆာလတ်ကို စာချုပ်သစ်ချုပ်နိုင်ဖို့ အရှိန်မြှင့်တင်ခဲ့တာပါ။

ဆာလတ်က စာချုပ်သစ်နဲ့ ပတ်သက်ပြီး “ကလပ်နဲ့ နောက်ထပ်ဆုဖလားတွေရယူဖို့ စိတ်လှုပ်ရှားနေပြီး ဒါဟာ လူတိုင်းအတွက် ပျော်ရွှင်စရာနေ့ပါပဲ။သက်တမ်းတိုးဖို့ အချိန်အနည်းငယ်လိုခဲ့ပေမယ့် အခုအားလုံးပြီးဆုံးသွား ပြီဖြစ်တဲ့အတွက် နောက်လာမယ့်အရာတွေကိုပဲ အာရုံစိုက်ထားပါတယ်။ကလပ်အသင်းဟာ နှစ်တိုင်းတိုးတက် လာခဲ့ပြီး မနှစ်ကရာသီက ဆုဖလားလေးလုံးရဖို့ နီးစပ်ခဲ့ပါတယ်။လာမယ့်ရာသီမှာ ကျနော်တို့အားလုံး ကြိုးစားပြီး ဆုဖလားတွေရယူနိုင်ဖို့ အကောင်းဆုံးလုပ်မယ်လို့ ပရိသတ်တွေကို ပြောချင်ပါတယ်။ ပရိသတ်တွေကလည်း ကျနော့်တို့နောက်မှာနေပြီး ကြီးမားတဲ့တွန်းအားတွေနဲ့ ဆုဖလားအတူတူရယူမယ်”လို့ အသင်းဝက်ဘ်ဆိုက်ကို ပြောခဲ့ပါတယ်။

အီဂျစ်လက်ရွေးစင်ဟာ လီဗာပူးလ်အသင်းကို ၂၀၁၇ က ရိုးမားအသင်းကနေ ရောက်ရှိလာခဲ့တာဖြစ်ပြီး အသင်း အတွက် ၂၅၄ ပွဲမှာ ၁၅၆ ဂိုးသွင်းယူနိုင်ခဲ့တာပါ။ဆာလတ်ဟာ လီဗာပူးလ်အသင်းနဲ့အတူ ချန်ပီယံလိဂ်၊ ပရီးမီးယား လိဂ်၊ အက်ဖ်အေဖလား၊ ကာရာဘောင်းဖလား၊ ယူအီးအက်ဖ်အေစူပါဖလားနဲ့ ကလပ်ကမ္ဘာ့ဖလားတို့ကို ရယူနိုင်ခဲ့ ပါတယ်။

ဆာလတ်ဟာ လီဗာပူးလ်အသင်းကို ရောက်ရှိလာတဲ့ ၅ နှစ်အတွင်းမှာ ပရီးမီးယားလိဂ် ရွှေဖိနပ်ဆု ၃ ကြိမ်၊ PFA တစ်နှစ်တာအကောင်းဆုံးကစားသမားဆု ၂ ကြိမ် ရယူနိုင်ခဲ့တာဖြစ်ပါတယ်။

Source:Theathletic

CNI Sport News

၂၀၂၂ ခုနှစ်၊ ဇူလိုင် ၁

စပါးအသင်းဟာ အဲဗာတန်အသင်းတိုက်စစ်မှူး ရစ်ချာလီဆန်ကို ပေါင်သန်း ၆၀ နဲ့ ၅ နှစ်စာချုပ်ချုပ်ဆိုကာ ခေါ်ယူလိုက်ပြီလို့ ကြေညာလိုက်ပါတယ်။

ရစ်ချာလီဆန်ဟာ ပါရီဆစ်၊ ဖရေဆာဖော်စတာ၊ ဘစ်ဆိုမားတို့နောက် အခုနွေရာသီ စပါးအသင်းကို ရောက်ရှိ လာတဲ့ စတုတ္တမြောက်ကစားသမား ဖြစ်လာခဲ့တာပါ။

စပါးအသင်းဟာ လာမယ့်ရာသီ ချန်ပီယံလိဂ် ဝင်ခွင့်ရရှိခဲ့တာ ကြောင့် အသင်းလူစာရင်းကို ပိုမိုတောင့်တင်းအောင် ကစားသမားသစ်တွေ ခေါ်ယူအားဖြည့်နေတာဖြစ်ပါတယ်။

စပါးနည်းပြ ကွန်တီဟာ အသင်းရဲ့ တိုက်စစ်သုံးဦးအတွဲအဖက်အဖြစ် ဆွန်ဟောင်မင်၊ ဟာရီကိန်းနဲ့ ရစ်ချာလီဆန် တို့ကို အသုံးပြုဖို့ရှိလာတာပါ။

ဒါပေမယ့် ဘရာဇီးလ်ကစားသမားဟာ လန်ဒန်ကလပ်မှာ နေရာရဖို့ လူးကပ်စ်မော်ရာ၊ ကူလူဆက်ဗိစကီး၊ ဘာ့ဂျ် ဝင်းတို့နဲ့ ယှဉ်ပြိုင်ရမှာဖြစ်ပါတယ်။

အသက် ၂၅ နှစ်အရွယ်ရှိ ရစ်ချာလီဆန်ဟာ ပြီးခဲ့တဲ့ရာသီက အဲဗာတန်အသင်း တန်းဆင်းဇုန်က လွတ်မြောက်အောင် အဓိကစွမ်းဆောင်ပေးခဲ့တာဖြစ်ပြီး ၁၀ ဂိုးသွင်းယူကာ ၅ ဂိုးဖန်တီးနိုင်ခဲ့တာပါ။

 ရစ်ချာလီဆန်ဟာ ၂၀၁၈ က ဝက်ဖိုဒ့်အသင်းကနေ အဲဗာတန်အသင်းဆီ ရောက်လာခဲ့ပြီး ပွဲပေါင်း ၁၅၂ ပွဲမှာ ၅၃ ဂိုးသွင်းယူနိုင်ခဲ့ပါတယ်။

ဘရာဇီးလ်ကစားသမားဟာ အဲဗာတန်အသင်း ရဲ့ ပြီးခဲ့တဲ့ရာသီက နောက်ဆုံးကစားခဲ့တဲ့ ၉ ပွဲမှာ ၆ ဂိုးအထိ သွင်းယူနိုင်ခဲ့တာပါ။အဲဒါကြောင့် ရစ်ချာလီဆန်ဟာ အသင်းကြီးတွေရဲ့ ပစ်မှတ်ဖြစ်လာခဲ့ပါတယ်။

စပါးအသင်းကတော့ အခြားအသင်းတွေထက် လက်ဦးမှုရယူပြီး ရစ်ချာလီဆန်ရဲ့ အပြောင်းအရွှေ့ကို အမြန်ဆုံး အဆုံးသတ်ခဲ့တာပါ။ကစားသမားဟာ ဘရာဇီးလ်အသင်းနဲ့ ပြီးခဲ့တဲ့ ခြေစမ်းပွဲတွေမှာ ပါဝင်ကစားထားလို့ အားလပ် ရက်ရနေချိန် ဘရာဇီးလ်မှာပဲ စပါးအသင်းက ဆေးစစ်မှုတွေ ပြုလုပ်ခဲ့တာဖြစ်ပြီး ရစ်ချာလီဆန်ဟာ ပရီးမီးယား လိဂ်ကို ၂၀၁၇ မှာ ဖလူမီနက်စ်အသင်းကနေ ဝက်ဖိုဒ့်အသင်းထံ ပြောင်းပြီး ရောက်ရှိလာခဲ့တာပါ။

ရစ်ချာလီဆန်ဟာ ဘရာဇီးလ်လက်ရွေးစင်အသင်းမှာလည်း ခြေစွမ်းပြသနေပြီး ၃၆ ပွဲပါဝင်ကစားထားကာ ၁၄ ဂိုး သွင်းယူပေးထားပါတယ်။သူဟာ လက်ရွေးစင်အသင်းနဲ့ ၂၀၂၀ ကိုပါအမေရိကဖလားကို ရယူနိုင်ခဲ့သလို တိုကျို အိုလံပစ်ပြိုင်ပွဲမှာလည်း ၅ ဂိုးသွင်းပြီး နိုင်ငံအသင်းနဲ့ ရွှေတံဆိပ်ရယူနိုင်ခဲ့တာပါ။

စပါးကစားသမားသစ်ဟာ ၂၀၂၂ ကမ္ဘာ့ဖလားပြိုင်ပွဲဝင်မယ့် ဘရာဇီးလ်လက်ရွေးစင်အသင်း လူစာရင်းမှာပါဝင်ဖို့ သေချာနေတဲ့သူလည်း ဖြစ်ပါတယ်။

Source:Daily Mail