CNI Sport News
၂၀၂၄ ခုနှစ်၊ ဇန်နဝါရီ ၁၃
၂၀၂၃ အာရှဖလားပြိုင်ပွဲရဲ့ အိမ်ရှင်အသင်းလည်းဖြစ်၊ လက်ရှိချန်ပီယံ အသင်းလည်းဖြစ်တဲ့ ကာတာအသင်းဟာ ဒီပြိုင်ပွဲရဲ့ အဖွင့်ပွဲစဉ်မှာ လက်ဘနွန်အသင်းကို ၃ ဂိုး- ဂိုးမရှိနဲ့ အနိုင်ရရှိခဲ့ပါတယ်။
ကာတာအသင်းအတွက် ဂိုးတွေကို အာကရမ်အဖစ်က ၂ ဂိုးနဲ့ အယ်လ်မိုယက်ဇ်အလီက ၁ ဂိုးသွင်းယူခဲ့တာပါ။
ဒီပွဲမှာ ကာတာအသင်းအတွက် အဖွင့်ဂိုး သွင်းယူပေးခဲ့တဲ့ အာကရမ်အဖစ်ရဲ့ သွင်းဂိုးဟာ ၂၀၂၃ အာရှဖလားပြိုင်ပွဲ ရဲ့ ပထမဆုံးသွင်းဂိုးလည်း ဖြစ်ခဲ့ပါတယ်။
ဒီပွဲမှာ ကာတာအသင်းဟာ လက်ဘနွန်အသင်းကို အသာစီးနဲ့ ကစားနိုင်ခဲ့ပြီး အပိုင်အခွင့်အရေးတွေကို အဆုံး မသတ်နိုင်ခဲ့လို့သာ ဒီထက်ဂိုးပြတ်ပြီး အနိုင်မရခဲ့တာပါ။
ကာတာအသင်းနည်းပြ လိုပက်ဇ်က “အာကရမ်ဟာ ဒီပွဲရဲ့ တန်ဖိုးအရှိဆုံး ကစားသမားအဖြစ် သတ်မှတ်ခံခဲ့ရပြီး သူဟာ အလွန်အရည်အသွေးမြင့်တဲ့ ကစားသမားဖြစ်တာကြောင့် ဒါဟာ သူနဲ့ထိုက်တန်ပါတယ်။ ဒီပွဲအတွက် ကျနော် အလွန်ပျော်ရွှင်ပါတယ်။ ကစားသမားတွေဟာ ကွင်းထဲမှာ လိုအပ်တဲ့အရာတွေအတွက် ၂၀၀ ရာခိုင်နှုန်း ပေးခဲ့ပါတယ်”လို့ ပွဲအပြီး သတင်းထောက်တွေကို ပြောခဲ့ပါတယ်။
လက်ဘနွန်အသင်းနည်းပြ ရာဂျူလိုဗစ်က ကစားသမားတွေဟာ သူတို့ပြုလုပ်ခဲ့တဲ့ အမှားတွေကြောင့် အပြစ်ပေးခံ ခဲ့ရပြီး ကာတာကစားသမား အာကရမ်ဟာ အာရှရဲ့ အကောင်းဆုံး ကစားသမားတွေထဲက တစ်ဦးဖြစ်တယ်လို့ ပွဲအပြီးမှာ မှတ်ချက်ပြုခဲ့တာပါ။
ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲကိုလည်း အိမ်ရှင်အဖြစ် လက်ခံကျင်းပခဲ့တဲ့ ကာတာအသင်းဟာ အုပ်စုတွင်း ၃ ပွဲ စလုံး အရေးနိမ့်ပြီး ထွက်ခွာခဲ့ရတာ ဖြစ်ပါတယ်။
ကာတာအသင်းဟာ ၂၀၂၂ ကမ္ဘာ့ဖလားပြိုင်ပွဲရဲ့ ရလဒ်ဆိုးတွေကို မေ့ပျောက်ပြီး အာရှဖလားပြိုင်ပွဲမှာ ချန်ပီယံဆု ကို ကာကွယ်နိုင်ဖို့ ပစ်မှတ်ထားနေတာပါ။
ကာတာအသင်းဟာ ၂၀၂၃ အာရှဖလားပြိုင်ပွဲရဲ့ အုပ်စု A မှာ တရုတ်၊ လက်ဘနွန်၊ တာဂျစ်ကစ္စတန်အသင်းတို့နဲ့ တစ်အုပ်စုတည်း ကျရောက်နေတာဖြစ်ပါတယ်။
Source: CNA
