- By CNI
- Category: အားကစား
- Hits: 439
CNI Sport News
၂၀၂၃ ခုနှစ်၊ မတ်လ ၂၄
ရော်နယ်ဒိုဟာ ပေါ်တူဂီအသင်းက လက်ချင်စတိန်းအသင်းကို ၄ ဂိုး- ဂိုးမရှိနဲ့ အနိုင်ရခဲ့တဲ့ ယူရို ၂၀၂၄ ခြေစစ်ပွဲမှာ ပါဝင် ကစားခဲ့ပြီးနောက် နိုင်ငံတကာပွဲ အများဆုံး ကစားသမားအဖြစ် စံချိန်တင်လိုက်နိုင်ပြီ ဖြစ်ပါတယ်။
ရော်နယ်ဒိုက “ကျနော့်အတွက် ဒီလိုကွင်းကြီးထဲမှာ နိုင်ငံအသင်းအတွက် ဂိုးသွင်းနိုင်ခဲ့ပြီး ဒီလိုခံစားချက်မျိုးနဲ့ ထပ်ပြီး ကစားရတာက အလွန်ကောင်းပါတယ်။ ပြီးတော့ နိုင်ငံတကာပွဲ အများဆုံးကစားသမား ဖြစ်ခွင့်ရတဲ့ အတွက်လည်း ဂုဏ်ယူမိပါတယ်”လို့ ဆိုရှယ်မီဒီယာမှာ ရေးသားထားတာပါ။
ရော်နယ်ဒိုဟာ ဒီပွဲမတိုင်ခင်က ကူဝိတ် လက်ရွေးစင် ကစားသမား မူတာဝါနဲ့ နိုင်ငံတကာပွဲ အရေအတွက် ၁၉၆ ပွဲ စီ တူညီနေခဲ့တာဖြစ်ပြီး လက်ချင်စတိန်းနဲ့ ပွဲမှာ ပါဝင်ခဲ့ပြီးနောက် ၁၉၇ ပွဲနဲ့ ပွဲအများဆုံး ကစားသမားအဖြစ် စံချိန် တင်နိုင်ခဲ့တာ ဖြစ်ပါတယ်။
ဒါအပြင် ရော်နယ်ဒိုဟာ ဒီပွဲမှာ ၂ ဂိုး သွင်းယူခဲ့တာကြောင့် နိုင်ငံတကာသွင်းဂိုး ၁၂၀ အထိ ရှိလာခဲ့တာ ဖြစ်ပါ တယ်။ ၂၀၀၃ ခုနှစ်မှာ ပေါ်တူဂီအသင်းအတွက် ပွဲထွက်ခွင့်ရခဲ့တဲ့ ရော်နယ်ဒိုဟာ နှစ်ပေါင်း ၂၀ ဆက်တိုက် ဂိုးသွင်း ယူနိုင်ခဲ့တဲ့ မှတ်တမ်းတစ်ရပ်ကိုလည်း ရရှိခဲ့တာပါ။
လက်ချင်းစတိန်းအသင်းနဲ့ ပွဲမှာ ရော်နယ်ဒိုကိုတွေ့ရစဉ်
ရော်နယ်ဒိုဟာ ပြီးခဲ့တဲ့ ကမ္ဘာ့ဖလားပြိုင်ပွဲမှာ စိတ်ပျက်ဖွယ် အဆုံးသတ် ခဲ့ရပေမယ့် နည်းပြသစ် မာတီးနတ်ဇ် လက်ထက်မှာတော့ ပွဲထွက်ခွင့် ပြန်လည်ရရှိခဲ့တာ ဖြစ်ပါတယ်။ မာတီးနတ်ဇ်ဟာ ပွဲအပြီးမှာ ရော်နယ်ဒိုကို ချီးကျူးမှု ပြုလုပ်သွားခဲ့တာပါ။
မာတီးနတ်ဇ်က “နိုင်ငံအသင်းမှာ ပါဝင်ဖို့ဆိုရင် ကတိကဝတ် ရှိရပါမယ်။ ကစားသမားတစ်ဦးဟာ ကတိကဝတ် တွေ ပြသဖို့နဲ့ သူ့ရဲ့ အတွေ့အကြုံတွေကို အသုံးချနိုင်ဖို့က အလွန်အရေးကြီးပါတယ်။ ရော်နယ်ဒိုကတော့ အတွေ့ အကြုံတွေ အများကြီးရှိတဲ့သူဖြစ်ပြီး နိုင်ငံအသင်း အတွက်ဆိုရင်လည်း ကတိကဝတ်တွေ အများကြီးရှိတဲ့သူပါ”လို့ ပြောခဲ့တာ ဖြစ်ပါတယ်။
ပေါ်တူဂီအသင်းဟာ ယူရို ၂၀၂၄ ခြေစစ်ပွဲ အုပ်စုအတွင်းမှာ လက်ချင်စတိန်း၊ လူဇင်ဘတ်၊ အိုက်စလန်၊ ဆလိုဗား ကီးယား၊ ဘော့စနီးယားတို့နဲ့ တစ်အုပ်စုတည်း ကျရောက်နေပြီး တနင်္ဂနွေနေ့မှာ လူဇင်ဘတ်အသင်းနဲ့ ယှဉ်ပြိုင်ရမှာ ဖြစ်ပါတယ်။
Source: AP
- By CNI
- Category: အားကစား
- Hits: 553
CNI Sport News
၂၀၂၃ ခုနှစ်၊ မတ်လ ၂၄
အီတလီအသင်းကို အနိုင်ရခဲ့တဲ့ပွဲမှာ နိုင်ငံအသင်းရဲ့ ဂိုးသွင်း အများဆုံး ကစားသမားအဖြစ် စံချိန်တင်နိုင်ခဲ့တဲ့ ဟာရီကိန်းက ဒါဟာ သူ့အတွက် အရာအားလုံးကို ဆိုလိုတာလို့ ပြောခဲ့ပါတယ်။
ဟာရီကိန်းက “ဒါဟာ အရာအားလုံးကို ဆိုလိုပါတယ်။ အင်္ဂလန်ဂျာစီကို ဝတ်ဆင်ပြီး လာမယ့်နှစ် ယူရိုပြိုင်ပွဲ အတွက် ခြေစစ်ပွဲ စတင်ရတာကို အလွန်စိတ်လှုပ်ရှားမိပါတယ်။ ပင်နယ်တီ ကန်သွင်းခွင့်ရခဲ့ပြီး ဂိုးပိုက်ရဲ့ နောက် ကျောကို ထိအောင် ကန်သွင်းနိုင်ခဲ့တာက ကြီးမားတဲ့ ခံစားမှု ဖြစ်ခဲ့ပါတယ်။ တကယ့်ကို မှော်ဆန်တဲ့ အခိုက်အ တန့်ပါ။ အလွန်ကောင်းတဲ့ ညပါပဲ။ အီတလီမှာ အနိုင်မရခဲ့တာ ကြာပါပြီ။ ဂိုးလည်း သွင်းနိုင်ခဲ့သလို အနိုင်ရခဲ့တာ က အလွန်ထူးခြားပါတယ်”လို့ ပြောခဲ့တာပါ။
အင်္ဂလန်အသင်းက အီတလီအသင်းကို ၂ ဂိုး- ၁ ဂိုးနဲ့ အနိုင်ရခဲ့တဲ့ ယူရို ၂၀၂၄ ခြေစစ်ပွဲမှာ ဟာရီကိန်းဟာ အသင်း အတွက် အနိုင်ဂိုး သွင်းယူပေးပြီးနောက် သွင်းဂိုး ၅၄ ဂိုးနဲ့ လက်ရွေးစင်အသင်းရဲ့ ဂိုးသွင်း အများဆုံး ကစားသမား ဖြစ်လာခဲ့ပါတယ်။
ဟာရီကိန်းကိုတွေ့ရစဉ်
ဟာရီကိန်းဟာ အရင်က အင်္ဂလန်အသင်း ခေါင်းဆောင်ဟောင်း ဝိန်းရွန်းနီနဲ့ ဂိုးအရေအတွက် ၅၃ ဂိုးစီ တူညီခဲ့ ပေမယ့် အခုအချိန်မှာတော့ အင်္ဂလန်အသင်းရဲ့ ဂိုးသွင်း အများဆုံး ကစားသမားအဖြစ် စံချိန်သစ် တင်နိုင်ခဲ့တာပါ။
၂၀၁၅ ကတည်းက စံချိန်တင်နိုင်ခဲ့တဲ့ ဝိန်းရွန်းနီကတော့ သူ့ရဲ့ စံချိန်ကိုချိုးဖျက်ပြီး စံချိန်သစ် တင်နိုင်ခဲ့တဲ့ ဟာရီကိန်းကို ဂုဏ်ပြုမှု ပြုလုပ်ခဲ့ပါတယ်။
ဟာရီကိန်းဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲ ကတည်းက ယူနိုက်တက် ဂန္တဝင်နဲ့ သွင်းဂိုး အရေအတွက် တူညီခဲ့ တာဖြစ်ပြီး ပြင်သစ်နဲ့ ကွာတားဖိုင်နယ်ပွဲမှာသာ ပင်နယ်တီဂိုး ဝင်ခဲ့ရင် အဲဒီမှာကတည်းက စံချိန်သစ် တင်နိုင်မှာပါ။
ဝိန်းရွန်းနီက “အင်္ဂလန်ရဲ့ ဂိုးသွင်း အများဆုံး ကစားသမားဖြစ်လာခဲ့တဲ့ ဟာရီကိန်းကို ဂုဏ်ပြုချင်ပါတယ်။ ဒါက သိပ်ပြီး အချိန်မကြာဘူးဆိုတာ သိပေမယ့် မြန်ဆန်ခဲ့ပါတယ်။ သူဟာ ကြီးမြတ်တဲ့လူ၊ မယုံနိုင်စရာ ကောင်း လောက်အောင် ဂိုးသွင်းတဲ့သူနဲ့ အင်္ဂလန်ဂန္တဝင်တစ်ဦးပါ”လို့ တွစ်တာမှာရေးသား ဂုဏ်ပြုခဲ့တာ ဖြစ်ပါတယ်။
အင်္ဂလန်အသင်းဟာ ဒီပွဲမှာ အီတလီအသင်းကို အနိုင်ရရှိခဲ့တာဟာ ယူရို ၂၀၂၀ ပြိုင်ပွဲ ဗိုလ်လုပွဲက ရှုံးကြွေးကို ပြန်ဆပ်နိုင်ခဲ့သလို ၁၉၆၁ နောက်ပိုင်း ပထမဆုံးအကြိမ် အနိုင်ရရှိခဲ့တာ ဖြစ်တယ်လို့ သိရပါတယ်။
Source: BBC
- By CNI
- Category: အားကစား
- Hits: 453
CNI Sport News
၂၀၂၃ ခုနှစ်၊ မတ်လ ၂၃
ရော်နယ်ဒိုက ဆော်ဒီလိဂ်ဟာ ပရီးမီးယားလိဂ်ကို လိုက်မှီဖို့ မနီးစပ်သေးပေမယ့် လာမယ့် ၅ နှစ်အတွင်းမှာ အကောင်းဆုံး လိဂ်တွေထဲက တစ်ခု ဖြစ်လာနိုင်တယ်လို့ ပြောခဲ့ပါတယ်။
ရော်နယ်ဒိုက “ဆော်ဒီလိဂ်ဟာ အလွန်ပြိုင်ဆိုင်မှုရှိတဲ့ လိဂ်ပါ။ ဒီလိဂ်ကို ကွဲပြားစွာ ကြည့်ရှုသင့်ပါတယ်။ ပရီးမီးယားလိဂ်လို မဟုတ်ဘူးဆိုတာတော့ ရှင်းပါတယ်။ ဒါကို ကျနော် မလိမ်ပါဘူး။ ဒါပေမယ့် ပြိုင်ဆိုင်မှုတော့ ပြင်းပါတယ်။ ဒီမှာ အသင်းကောင်းတွေ ရှိတယ်၊ ဟန်ချက်လည်း ညီပါတယ်။ အာရပ် ကစားသမားတွေကလည်း ကောင်းသလို နိုင်ငံခြားသား ကစားသမားတွေကလည်း အရည်အချင်းရှိတယ်။ ဒီတိုင်း ဆက်သွားနေမယ်ဆိုရင် လာမယ့် ၅ နှစ်၊ ၆ နှစ်အတွင်းမှာ ဒီလိဂ်ဟာ ကမ္ဘာ့အကောင်းဆုံး စတုတ္တမြောက် ဒါမှမဟုတ် ပဉ္စမမြောက်လိဂ် ဖြစ်လာမှာပါ”လို့ သတင်းထောက်တွေကို ပြောခဲ့တာပါ။
ရော်နယ်ဒိုဟာ ယူနိုက်တက်အသင်းနဲ့ စာချုပ်ဖျက်သိမ်းခဲ့ပြီးနောက် ဇန်နဝါရီလက ဆော်ဒီကလပ် အယ်လ်နာဆာ အသင်းထံ ပြောင်းရွှေ့လာခဲ့တာ ဖြစ်ပါတယ်။
ရော်နယ်ဒိုဟာ အယ်လ်နာဆာအသင်း ကစားသမားဘဝ အစပိုင်းမှာ အနည်းငယ် ရုန်းကန်ခဲ့ရပေမယ့် နောက်ပိုင်း မှာ အသားကျခဲ့ပြီး ဟတ်ထရစ် ၂ ကြိမ် ရယူနိုင်ခဲ့တာပါ။ ပေါ်တူဂီ ကစားသမားဟာ သွင်းဂိုးတွေရော၊ ဂိုးဖန်တီး မှုတွေပါ ပြုလုပ်ပြီး ဆော်ဒီလိဂ်ရဲ့ ဖေဖော်ဝါရီလ တစ်လတာ အကောင်းဆုံး ကစားသမားဆုကို ရရှိခဲ့ပါတယ်။
ဆော်ဒီလိဂ်မှာ ကစားနေတဲ့ ရော်နယ်ဒိုကိုတွေ့ရစဉ်
နောက်ဆုံးကစားခဲ့တဲ့ လိဂ်ပွဲမှာဆိုရင် ရော်နယ်ဒိုဟာ ကိုက် ၃၀ အကွာက ပြစ်ဒဏ်ဘော ကန်ချက်ကနေ ဂိုးသွင်း ယူနိုင်ခဲ့တာပါ။
အသက် ၃၈ နှစ်အရွယ်ရှိ ကစားသမားဟာ လက်ရှိအချိန်မှာ အယ်လ်နာဆာ အသင်းအတွက် ၁၀ ပွဲ ပါဝင် ကစား ထားပြီး ၉ ဂိုး သွင်းယူထားကာ ဂိုးဖန်တီးမှု ၂ ကြိမ် ပြုလုပ်ထားတာ ဖြစ်ပါတယ်။ ဆော်ဒီလိဂ်ဟာ ရော်နယ်ဒို ရောက်လာပြီးနောက်မှာ ကမ္ဘာအနှံက ကြည့်ရှုသူ ပိုများလာတယ်လို့ အဲဒီနိုင်ငံရဲ့ အားကစားဝန်ကြီးက ပြောထား ပါတယ်။
ဆော်ဒီလိဂ်ဟာ ဥရောပရဲ့ နာမည်ကြီး ကစားသမား အများအပြားကို ခေါ်ယူပြီး သူတို့လိဂ်ကို လူတွေပိုပြီး စိတ်ဝင် စားလာအောင် လုပ်ဆောင်နေပါတယ်။ မကြာသေးခင်က အယ်လ်နာဆာအသင်း ပြိုင်ဘက် အသင်းတွေက ရော်နယ်ဒိုရဲ့ ပြိုင်ဘက်ဖြစ်တဲ့ မက်ဆီကို လုပ်အားခ အများအပြားပေးပြီး ခေါ်ယူဖို့ ကြိုးစားနေတယ်လို့ သတင်း တွေ ထွက်ပေါ်လာခဲ့ပါတယ်။
Source: Goal
- By CNI
- Category: အားကစား
- Hits: 597
CNI Sport News
၂၀၂၃ ခုနှစ်၊ မတ်လ ၂၃
အီဂျစ်ကွင်းလယ် ဒိုင်လူကြီး မိုဟာမက်ဖာရော့ခ်ဟာ လိဂ်ပွဲစဉ်မှာ ပွဲကြည့်ပရိသတ်တစ်ဦးရဲ့ ဖုန်းကို အသုံးပြုပြီး သွင်းဂိုးကို ခွင့်မပြုခဲ့တာကြောင့် ပွဲစဉ်တွေကို ကိုင်တွယ်ခွင့် ဆိုင်းငံ့ခံခဲ့ရပါတယ်။
ပြီးခဲ့တဲ့ သောကြာနေ့က အီဂျစ် ဒုတိယတန်း ပွဲစဉ်တစ်ပွဲဖြစ်တဲ့ စူအက်ဇ်အသင်းနဲ့ နာဆာအသင်းတို့ရဲ့ ပွဲစဉ်မှာ ဒီအဖြစ်အပျက် ဖြစ်ပွားခဲ့တာ ဖြစ်ပါတယ်။
နာဆာအသင်းဟာ ဒီပွဲရဲ့ ပွဲပြီးဆုံးဖို့ နီးကပ်တဲ့အချိန်မှာ စူအက်ဇ် အသင်းဘက်ကို နောက်ကျ ချေပဂိုး သွင်းယူခဲ့ တာ ဖြစ်ပါတယ်။ အိမ်ရှင်အသင်းဖြစ်တဲ့ စူအက်ဇ်အသင်းက လက်ထိဘောဆိုပြီး ကန့်ကွက်ခဲ့တာကြောင့် ကွင်းလယ်ဒိုင်လူကြီးဟာ ဆုံးဖြတ်ချက်ချဖို့ လုပ်ဆောင်လာခဲ့ရတာပါ။
အီဂျစ် ဒုတိယတန်းမှာ VAR မရှိတာကြောင့် ကွင်းလယ်ဒိုင်လူကြီးဟာ ဒီအဖြစ်အပျက်ကို ပြန်ပြီး ကြည့်နိုင်ဖို့ အတွက် ပွဲကြည့် ပရိသတ်တစ်ဦးရဲ့ ဖုန်းကို အသုံးပြုခဲ့ရတာ ဖြစ်ပါတယ်။
မိုဟာမက်ဖာရော့ခ်ဟာ ဒီအဖြစ်အပျက်ကို ကြည့်ပြီးနောက် ဒီသွင်းဂိုးကို ခွင့်မပြုခဲ့တာပါ။ ဒီသွင်းဂိုးကို ခွင့်မပြုဖို့ အတွက် ကြည့်ပြီး ဆုံးဖြတ်တာဟာ ကြာမြင့်ခဲ့တဲ့အတွက် နာကျင်အချိန် ၁၅ မိနစ်အထိ ခွင့်ပြုပေးခဲ့ရပါတယ်။
စူအက်ဇ်အသင်းနဲ့ နာဆာအသင်း ယှဉ်ပြိုင်နေစဉ်
ပွဲအပြီးမှာတော့ စူအက်ဇ်အသင်းက နာဆာအသင်းကို ၃ ဂိုး- ၁ ဂိုးနဲ့ အနိုင်ရရှိသွားခဲ့တာပါ။
အီဂျစ်ဘောလုံးအဖွဲ့ချုပ်ကတော့ ဒီပွဲမှာ တာဝန်ယူခဲ့တဲ့ ဒိုင်လူကြီးတွေ အားလုံးကို ပွဲစဉ်ကိုင်တွယ်ခွင့် အကန့် အသတ်မရှိ ဆိုင်းငံ့ခဲ့ပါတယ်။
“ဒီပွဲကို ကိုင်တွယ်ခဲ့တဲ့ မိုဟာမက်ဖာရော့ခ်ဟာ ပွဲရဲ့ အဖြစ်အပျက်တွေကို ပြန်လည် သုံးသပ်ဖို့အတွက် ဖုန်းကို အသုံးပြုခဲ့ပါတယ်။ ဒီဖြစ်ရပ်ကို စုံစမ်းစစ်ဆေးဖို့ ကော်မတီက ဆုံးဖြတ်ခဲ့တယ်”လို့ အီဂျစ်ဘောလုံးအဖွဲ့ချုပ်ရဲ့ ထုတ်ပြန်ချက်မှာ ဖော်ပြထားပါတယ်။
မိုဟာမက်ဖာရော့ခ်ဟာ နာဆာအသင်း တာဝန်ရှိသူတွေနဲ့ ကစားသမားတွေရဲ့ ရန်ပြုဖို့ ကြိုးစားမှုကြောင့် ရဲတွေရဲ့ အကာအကွယ်နဲ့ ကွင်းထဲကနေ ထွက်ခွာခဲ့ရပြီး စည်းမျဉ်းစည်းကမ်း ချိုးဖောက်ရင် ဒိုင်လူကြီးကို တရားဥပဒေအရ အရေးယူမယ်လို့ နာဆာအသင်းက ခြိမ်းခြောက်ခဲ့ကြောင်း သတင်းမှာ ဖော်ပြထားပါတယ်။
Source: BBC
- By CNI
- Category: အားကစား
- Hits: 447
CNI Sport News
၂၀၂၃ ခုနှစ်၊ မတ်လ ၂၃
ယူကရိန်းကို ကျူးကျော်မှုကြောင့် ဖီဖာနဲ့ ယူအီးအက်ဖ်အေတို့ရဲ့ ပိတ်ပင်မှုတွေ ခံထားရပေမယ့် ရုရှား ယူ-၁၇ အမျိုးသမီး အသင်းဟာ ဒါကာမှာ ကျင်းပနေတဲ့ နိုင်ငံတကာပွဲမှာ ဝင်ရောက်ယှဉ်ပြိုင်နေပြီး အိမ်ရှင် ဘင်္ဂလားဒေ့ရှ် အသင်းကို ၃ ဂိုး- ဂိုးမရှိနဲ့ အနိုင် ရရှိခဲ့ပါတယ်။
ရုရှားအသင်းဟာ တောင်အာရှဘောလုံးအဖွဲ့ချုပ်ရဲ့ ယူ-၁၇ အမျိုးသမီး ချန်ပီယံရှစ်ပြိုင်ပွဲမှာ ဧည့်သည် အသင်း အနေနဲ့ ဝင်ရောက် ယှဉ်ပြိုင်နေတာပါ။
ရုရှားဘောလုံးအဖွဲ့ချုပ်ဟာ ဥရောပမှာ ပိတ်ပင်ခံထားရတဲ့အတွက် အာရှဘောလုံးအဖွဲ့ချုပ်ထံ ကူးပြောင်းဖို့ ကြိုးပမ်းနေတဲ့ အချိန်မှာ ဒီပြိုင်ပွဲကို ဝင်ရောက်ယှဉ်ပြိုင်ဖို့ ဖိတ်ခေါ်ခံခဲ့ရတာ ဖြစ်ပါတယ်။
ပြီးခဲ့တဲ့နှစ် ဖေဖော်ဝါရီလကနေ အခုအချိန်အထိ ရုရှားလက်ရွေးစင် အသင်းတွေအပြင် ကလပ်အသင်းတွေပါ ဖီဖာနဲ့ ယူအီးအက်ဖ်အေ လက်အောက်က ပြိုင်ပွဲတွေမှာ ဝင်ရောက်ယှဉ်ပြိုင်ခွင့် ဆိုင်းငံခံထားရတာပါ။
အဲဒါကြောင့် ရုရှားလက်ရွေးစင် အသင်းတွေနဲ့ ကလပ်အသင်းတွေ နိုင်ငံတကာပြိုင်ပွဲတွေမှာ ပြန်လည် ဝင်ရောက် နိုင်ဖို့အတွက် ဖြစ်နိုင်ဖွယ် ရွေးချယ်မှုအဖြစ် အာရှဘောလုံးအဖွဲ့ချုပ်ထံ ပြောင်းဖို့ ရုရှားဘောလုံးအဖွဲ့ချုပ် အကြီး အကဲ ဂျူကော့ဗ်က ပြောခဲ့တာ ဖြစ်ပါတယ်။
ရုရှား အမျိုးသမီး ယူ-၁၇ အသင်း
ဘင်္ဂလားဒေ့ရှ်နဲ့ ကစားခဲ့တဲ့ ပွဲမတိုင်ခင် ရုရှားနိုင်ငံတော် သီချင်းကို ကျယ်လောင်စွာ တီးခတ်ခဲ့ပြီး လက်တစ်ဆုပ် စာသာရှိတဲ့ ရုရှားပရိသတ်တွေကလည်း သူတို့နိုင်ငံအလံကို ကိုင်ဆောင်ကာ အသင်းကို အားပေးမှုတွေ ပြုလုပ်ခဲ့ တာပါ။
ရုရှားပရိသတ်တစ်ဦးက “ကျနော်တို့ အသင်း အနိုင်ရတဲ့အတွက် အလွန်ဂုဏ်ယူမိပါတယ်။ ဘင်္ဂလားဒေ့ရှ်ကလည်း ကောင်းမွန်စွာ တိုက်ပွဲဝင်နိုင်ခဲ့ပါတယ်။ ဒီဘောလုံးသမားတွေဟာ စစ်ပွဲမှာ တာဝန်မရှိပါဘူး။ အဲဒါကြောင့် ယူအီးအက်ဖ်အေနဲ့ ဖီဖာတို့က သူတို့ကို ပိတ်ပင်ခြင်း မပြုသင့်ပါဘူး”လို့ ပြောခဲ့ပါတယ်။
ဘင်္ဂလားဒေ့ရှ်မှာ ကျင်းပနေတဲ့ ဒီပြိုင်ပွဲမှာ အိန္ဒိယ၊ နီပေါနဲ့ ဘူတန်အသင်းတို့လည်း ပါဝင်နေပြီး ရုရှားအသင်းဟာ မတ်လ ၂၄ ရက်မှာ ဘူတန်၊ ၂၆ ရက်မှာ နီပေါနဲ့ ၂၈ ရက်မှာတော့ အိန္ဒိယအသင်းတို့နဲ့ ဆက်ပြီး ယှဉ်ပြိုင်ရမှာပါ။
အခုနှစ် ဇွန်လထဲ ဗဟိုအာရှဘောလုံးအဖွဲ့ချုပ်က ကျင်းပမယ့် ပြိုင်ပွဲမှာ ရုရှားလက်ရွေးစင် အမျိုးသား အသင်းကြီး ကို ဖိတ်ကြားထားတယ်လို့ တာဂျစ်ကစ္စတန် ဘောလုံးအဖွဲ့ချုပ်က ပြောထားပါတယ်။
Source:CNA
- By CNI
- Category: အားကစား
- Hits: 604
CNI Sport News
၂၀၂၃ ခုနှစ်၊ မတ်လ ၂၃
ပေါ်တူဂီလက်ရွေးစင်ကစားသမား ရော်နယ်ဒိုက ယူနိုက်တက်အသင်းကနေ ထွက်ခွာအပြီးမှာ သူဟာ ပိုကောင်းတဲ့ လူဖြစ်လာတယ်ဆိုပြီး ခံစားရတယ်လို့ ပြောလိုက်ပါတယ်။
ရော်နယ်ဒိုက “တခါတလေမှာ ခင်ဗျားဘက်ဘယ်သူတွေရှိလဲဆိုတာ သိဖို့အတွက် အချို့အရာတွေကို ဖြတ်ကျော် ရမှာပါ။ဒီလို ပြောရလို့ ကျနော့်မှာ ပြဿနာမရှိပါဘူး။ကျနော့်ကစားသမားဘဝမှာ ဆိုးရွားတဲ့ အဆင့်ကို ရောက်ရှိခဲ့ ပါတယ်။ဒါပေမယ့် နောင်တရဖို့အတွက် အချိန်မရှိပါဘူး။ကောင်းတာပဲဖြစ်ဖြစ်၊ ဆိုးတာပဲဖြစ်ဖြစ် ဘဝက ဆက်သွားနေရမှာပါပဲ။တောင်ထိပ်ကို ရောက်ရင် အောက်ခြေကို ပြန်မမြင်ရပါဘူး။အခုတော့ ကျနော်က ပိုပြင် ဆင်ပြီး သင်ယူရတာက ပိုပြီးအရေးကြီးပါတယ်။ ပြီးခဲ့တဲ့လအနည်းငယ်ကလို ဒီလိုမျိုးတစ်ခါမှ မကြုံတွေ့ဖူးပါဘူး။ အခုတော့ ကျနော်က ပိုကောင်းတဲ့လူဖြစ်လာပါပြီ” လို့ ယူရိုခြေစစ်ပွဲရဲ့ ပွဲကြိုသတင်းစာရှင်းလင်းပွဲမှာ ပြောခဲ့တာ ပါ။
ရော်နယ်ဒိုဟာ ယူနိုက်တက်အသင်းမှာ ပထမအကြိမ်ကစားခဲ့တုန်းက ဂန္တဝင်တစ်ဦးအဖြစ် ရပ်တည်လို့ရအောင် ကောင်းမွန်စွာလုပ်ဆောင်နိုင်ခဲ့ပေမယ့် ဒုတိယအကြိမ်ကစားတာမှာတော့ ဆိုးရွားစွာ အဆုံးသတ်ခဲ့ရတာ ဖြစ်ပါတယ်။ရော်နယ်ဒိုဟာ အခုနှစ် ရာသီအစပိုင်းမှာ နည်းပြ အဲရစ်တန်ဟတ်နဲ့ ထိပ်တိုက်တွေ့ဆုံမှုတွေဖြစ်ခဲ့ပြီး စပါးအသင်းနဲ့ပွဲမှာဆို လူစားလဲဝင်ရောက်ဖို့ ငြင်းဆန်ကာ ဥမင်ထဲ ဝင်ရောက်သွားခဲ့တာပါ။
အဲဒီနောက်မှာ ရော်နယ်ဒိုဟာ ပီယာ့စ်မော်ဂန်နဲ့ ပြုလုပ်ခဲ့တဲ့ အင်တာဗျူးမှာ အသင်းပိုင်ရှင်တွေကို ဝေဖန်ခဲ့သလို နည်းပြ အဲရစ်တန်ဟတ်အပေါ်မှာလည်း လေးစားမှုမရှိနိုင်ဘူးလို့ ပြောခဲ့တာဖြစ်ပါတယ်။အဲဒါကြောင့် ယူနိုက်တက် အသင်းဟာ ရော်နယ်ဒိုနဲ့ နှစ်ဦးသဘောတူ စာချုပ်ဖျက်သိမ်းပြီး နိုဝင်ဘာလက အသင်းကနေ ထွက်ခွာခွင့် ပေးခဲ့တာပါ။ပေါ်တူဂီကစားသမားဟာ ယူနိုက်တက်ကနေ ထွက်ခွာပြီးနောက် ဆော်ဒီကလပ် အယ်လ်နာဆာ အသင်းထံ အလွတ်နဲ့ ပြောင်းရွှေ့ခဲ့တာဖြစ်ပါတယ်။
ရော်နယ်ဒိုဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲကို စိတ်ပျက်ဖွယ်ဖြတ်သန်းခဲ့ရပေမယ့် ပေါ်တူဂီနည်းပြသစ် မာတီးနတ်ဇ်လက်အောက်မှာ ယူရို ၂၀၂၄ ခြေစစ်ပွဲဝင်ပြိုင်ဖို့ ပြင်ဆင်နေတာပါ။ပေါ်တူဂီအသင်းဟာ လက်ချင် စတိန်း၊ လူဇင်ဘတ်တို့နဲ့ ခြေစစ်ပွဲကစားမှာဖြစ်ပြီး ရော်နယ်ဒိုအနေနဲ့ ဒီ ၂ ပွဲစလုံးကို ပွဲထွက်ပါဝင်ရဖွယ် ရှိနေ ပါတယ်။
ရော်နယ်ဒိုက “ဒါဟာ ကျနော်တို့အားလုံးအတွက် မတူညီတဲ့အခန်းကဏ္ဍအသစ်ပါ။အားထုတ်မှုတွေလည်း ကောင်းတယ်၊ အပေါင်းလက္ခဏာလည်းဆောင်တယ်၊ဒါတွေက အရေးကြီးဆုံးပါပဲ။အခု ကျနော်တို့ဟာ မတူညီတဲ့ အတွေးအခေါ်တွေ၊ စိတ်ဓါတ်တွေနဲ့ လေကောင်းလေသန့်ကို ရနေပါပြီ” လို့ ပြောခဲ့တာပါ။
ရော်နယ်ဒိုဟာ လက်ချင်စတိန်းနဲ့ပွဲမှာ ပါဝင်ခွင့်ရခဲ့ရင် နိုင်ငံတကာပွဲအများဆုံးကစားတဲ့သူအဖြစ် စံချိန်မှတ်တမ်း တင်နိုင်မယ်လို့လည်း သိရပါတယ်။
Source:Metro
- By CNI
- Category: အားကစား
- Hits: 533
CNI Sport News
၂၀၂၃ ခုနှစ်၊ မတ်လ ၂၂
ဘရာဇီးလ် လက်ရွေးစင်ဂိုးသမား အီဒါဆန်က အသင်းနည်းပြသစ်အဖြစ် ရီးရယ်လ်အသင်းနည်းပြ အန်ဆယ်လော့တီ ခန့်အပ်ခံရဖို့ မျှော်လင့်တယ်လို့ ပြောခဲ့ပါတယ်။
အီဒါဆန်က “ကျနော်ဟာ ဒီအကြောင်းအရာနဲ့ ပတ်သက်ပြီး ကတ်စမဲရိုး၊ ဗီနီစီးယက်စ်၊ မီလီတာအိုတို့နဲ့ ဆွေးနွေး ခဲ့ပါတယ်။ အန်ဆယ်လော့တီဟာ ကျနော်တို့ရဲ့ နည်းပြဖြစ်လာဖို့ ကြီးမားတဲ့ အလားအလာ ရှိပါတယ်။ သူ့ရဲ့ စီဗွီကို ကြည့်လိုက်ရုံပါပဲ။ သူဒီမှာရှိနေမလား၊ မရှိဘူးလားဆိုတာ မကြာခင် သိရတော့မှာပါ။ နည်းပြသစ် အမြန်ဆုံး ခန့်အပ်နိုင်ဖို့ ကျနော် မျှော်လင့်ပါတယ်။ ဘရာဇီးလ် ဒါမှမဟုတ် နိုင်ငံခြားသားနည်းပြကို ခန့်မှာလားဆိုတဲ့ စိုးရိမ်မှု အဆင့်ကို ကျနော်တို့လည်း ဖြတ်သန်းနေရပါတယ်”လို့ သတင်းစာ ရှင်းလင်းပွဲမှာ ပြောခဲ့တာပါ။
ပြီးခဲ့တဲ့ ၂၀၂၂ ကမ္ဘာ့ဖလား ပြိုင်ပွဲအပြီးမှာ နည်းပြဖြစ်သူ တီထီဟာ ရာထူးကနေ ထွက်ခွာခဲ့ပြီးနောက် ဘရာဇီးလ် အသင်းဟာ နည်းပြသစ် မခန့်အပ်ရသေးဘဲ ယာယီနည်းပြနဲ့သာလာမယ့် ခြေစမ်းပွဲကို ကစားသွားမှာ ဖြစ်ပါတယ်။
ဘရာဇီးလ်အသင်း နည်းပြသစ် ဖြစ်လာဖို့ အန်ဆယ်လော့တီဟာ အစောပိုင်းမှာ သတင်းတွေ ထွက်ခဲ့ပေမယ့် ရီးရယ်လ်နဲ့ အီတလီလူမျိုးနည်းပြတို့က ငြင်းဆန်ခဲ့ပါတယ်။
ဒါပေမယ့် မန်စီးတီး ဂိုးသမားကတော့ အန်ဆယ်လော့တီကို ဘရာဇီးလ်နည်းပြသစ် ဖြစ်လာဖို့ မျှော်လင့်နေတာ ဖြစ်ပါတယ်။
ဘရာဇီးလ် လက်ရွေးစင်ဂိုးသမား အီဒါဆန်ကိုတွေ့ရစဉ်
အန်ဆယ်လော့တီနဲ့ ရီးရယ်လ်အသင်းတို့ ချုပ်ဆိုထားတဲ့ စာချုပ်ဟာ ၂၀၂၄ မှာ ကုန်ဆုံးမှာ ဖြစ်ပေမယ့် အီတလီ လူမျိုးနည်းပြကတော့ သူဟာ စပိန်ကလပ်မှာဆက်ပြီး နေချင်တယ်လို့ ပြောခဲ့တာပါ။
ဒါပေမယ့် ရီးရယ်လ်အသင်းသာ ဒီရာသီမှာ ဆုဖလားတွေ မရယူနိုင်ဘူးဆိုရင် အန်ဆယ်လော့တီရဲ့ အနာဂတ်ဟာ သံသယတွေ ရှိလာနိုင်ပြီး ဖိအားတွေအောက် ကျရောက်နိုင်တာ ဖြစ်ပါတယ်။
ရီးရယ်လ်အသင်းဟာ လာလီဂါပြိုင်ပွဲမှာ ဘာစီလိုနာအသင်းနဲ့ ၁၂ မှတ် ကွာဟနေပြီး ကိုပါဒယ်ရေးဖလား ဆီမီးဖိုင်နယ် ပထမအကျော့ ပွဲစဉ်မှာ ဘာစီလိုနာကို ၁ ဂိုး- ဂိုးမရှိနဲ့ အရေးနိမ့်ထားတာပါ။
ဒါပေမယ့် ရီးရယ်လ်အသင်းဟာ ချန်ပီယံလိဂ် ပြိုင်ပွဲမှာတော့ ကွာတားဖိုင်နယ်အဆင့်ကို ရောက်ရှိနေပြီး ချယ်လ်ဆီး အသင်းနဲ့ ယှဉ်ပြိုင်ရမှာ ဖြစ်ပါတယ်။
ဘရာဇီးလ် အသင်းနည်းပြသစ် ဖြစ်လာနိုင်တဲ့သူတွေ စာရင်းထဲမှာ ရိုးမားအသင်းနည်းပြ မော်ရင်ဟိုလည်း ပါဝင်ခဲ့ တာပါ။ လက်ရှိ အချိန်မှာတော့ ဘရာဇီးလ်အသင်းကို လူငယ်အသင်းနည်းပြ မန်နက်ဇက်က ယာယီကိုင်တွယ် နေပြီး မော်ရိုကိုနဲ့ ခြေစမ်းပွဲကို တာဝန်ယူသွားမှာ ဖြစ်ပါတယ်။
Source: Goal
- By CNI
- Category: အားကစား
- Hits: 484
CNI Sport News
၂၀၂၃ ခုနှစ်၊ မတ်လ ၂၂
ဆားဘီးယားတင်းနစ်သမား ဂျိုကိုဗစ်က ကိုဗစ်ကာကွယ်ဆေးမထိုးတဲ့ အခြေအနေကြောင့် အင်ဒီးယန်းဝဲလ်နဲ့ မိုင်ယာမီပြိုင်ပွဲတွေမှာ မပါဝင်နိုင်တဲ့အပေါ် နောင်တမရဘူးလို့ ပြောလိုက်ပါတယ်။
ဂျိုကိုဗစ်က “ကျနော် နောင်တရစရာမရှိပါဘူး။ နောင်တတွေက ခင်ဗျားကို ချုပ်ကိုင်ပြီး အခြေခံအားဖြင့် ခင်ဗျား ကို အတိတ်မှာ နေထိုင်တယ်ဆိုတာဟာ ကျနော်ဘဝ တစ်လျှောက်လုံး သင်ယူခဲ့ရတာပါ။ ကျနော်ဒီလို မလုပ်ချင်ပါ ဘူး။ အနာဂတ်မှာလည်း အများကြီး မရှင်သန်ချင်ပါဘူး။ လက်ရှိအချိန်မှာ ဖြစ်ချင်ပေမယ့် အနာဂတ်ကို တွေးပြီး၊ ပိုကောင်းတဲ့ အနာဂတ်ကို ဖန်တီးပါ”လို့ CNN ကို ပြောခဲ့တာပါ။
လက်ရှိအချိန်မှာ အမေရိကန်နိုင်ငံဟာ ကာကွယ်ဆေး မထိုးထားတဲ့ နိုင်ငံခြားသားတွေကို နိုင်ငံအတွင်း ဝင်ရောက်ခွင့် တားမြစ်ထားတာ ဖြစ်ပေမယ့် အစိုးရဟာ မေလမှာ သူ့ရဲ့ ကိုဗစ်အရေးပေါ် ကြေညာချက်ကို အဆုံးသတ်ဖို့ ရှိနေတာ ဖြစ်ပါတယ်။
ဒီလို လုပ်လိုက်မယ်ဆိုရင် ကိုဗစ်မူဝါဒကို ရုပ်သိမ်းသွားဖို့ ရှိနေတာပါ။ အသက် ၃၅ နှစ်အရွယ်ရှိ ဂျိုကိုဗစ်ဟာ အထူးခွင့်ပြုချက်အတွက် အမေရိကန်အစိုးရထံ လျှောက်ထားခဲ့ပေမယ့် အောင်မြင်မှု မရခဲ့ပါဘူး။
အဲဒါကြောင့်လည်း ဂျိုကိုဗစ်ဟာ အယ်လ်ကာရတ်ဇ်ကို သူ့ရဲ့ ကမ္ဘာ့နံပါတ် ၁ နေရာကို ပြန်လွှဲပြောင်း ပေးခဲ့ရတာ ဖြစ်ပါတယ်။
ဂျိုကိုဗစ် ပရိသတ်ကိုနှုတ်ဆက်နေစဉ်
ဂျိုကိုဗစ်က “ကျနော် အယ်လ်ကာရတ်ဇ်ကို ဂုဏ်ပြုချင်ပါတယ်။ သူဟာ နံပါတ် ၁ နေရာကို ပြန်လည် ရယူနိုင်ဖို့ အတွက် လုံးဝ ထိုက်တန်ပါတယ်”လို့ ပြောခဲ့တာပါ။
ဆားဘီးယား တင်းနစ်ကစားသမားဟာ အောင်မြင်မှု အများအပြား ရယူနိုင်ခဲ့တဲ့ အမေရိကန်မှာ ယှဉ်ပြိုင်ခွင့် မရတဲ့ အပေါ် ဝမ်းနည်းမိပေမယ့် အခုနှစ်ကုန်ပိုင်းမှာ ကျင်းပမယ့် အမေရိကန် အိုးပန်းပြိုင်ပွဲမှာ ပါဝင်ယှဉ်ပြိုင်ခွင့်ရဖို့ မျှော်လင့်တယ်လို့ ပြောခဲ့တာ ဖြစ်ပါတယ်။
ဂျိုကိုဗစ်ဟာ ဂရမ်းဆလမ်းပြိုင်ပွဲ တစ်ခုဖြစ်တဲ့ အမေရိကန် အိုးပန်းပြိုင်ပွဲမှာ ချန်ပီယံဆု ၃ ကြိမ်အထိ ရရှိထားပါတယ်။
Source: CNA
- By CNI
- Category: အားကစား
- Hits: 477
CNI Sport News
၂၀၂၃ ခုနှစ်၊ မတ်လ ၂၂
ဝါရင့်တိုက်စစ်မှူး အီဘရာဟီမိုဗစ်ဟာ အသက်အရွယ် ရနေပြီဖြစ်ပေမယ့် လာမယ့် ယူရို ၂၀၂၄ ပြိုင်ပွဲမှာ ပါဝင် ကစားနိုင်ဖို့ မျှော်လင့်တယ်လို့ ပြောလိုက်ပါတယ်။
အီဘရာဟီမိုဗစ်က “ဒဏ်ရာတွေနဲ့ ဒီလိုမျိုး ကြုံတွေ့ခဲ့ရတာတွေကို ကြိုပြီးတွေးထားလို့ မရပါဘူး။ ရုပ်ပိုင်းဆိုင်ရာ သာ ကောင်းမွန်တယ်လို့ ခံစားရရင်တော့ ကျနော်ဆက်ပြီးသွားမှာပါ”လို့ ဆွီဒင်အသင်း ခြေစစ်ပွဲအောင်ရင် ယူရို ၂၀၂၄ ပြိုင်ပွဲမှာ ကစားဖို့ ရည်ရွယ်ထားလားဆိုတာနဲ့ ပတ်သက်ပြီး သတင်းထောက်တွေက မေးမြန်းချိန်မှာ ဖြေခဲ့ တာပါ။
မကြာသေးခင်ကမှ ဒဏ်ရာကနေ ပြန်ကောင်းလာပြီး အေစီမီလန် အသင်းအတွက် ပါဝင်ကစားပေးနိုင်ခဲ့ပြီဖြစ်တဲ့ အီဘရာဟီမိုဗစ်ကို ဆွီဒင်လက်ရွေးစင်အသင်းက ယူရို ၂၀၂၄ ခြေစစ်ပွဲ လူစာရင်းမှာ ရွေးချယ်ခဲ့တာ ဖြစ်ပါတယ်။
အီဘရာဟီမိုဗစ်ဟာ အသက် ၄၁ နှစ် အရွယ်ရှိပြီ ဖြစ်တာကြောင့် ယူရိုခြေစစ်ပွဲမှာ ပါဝင်ခဲ့ရင် ၁၉၈၃ က စံချိန်တင် ထားတဲ့ အီတလီဂိုးသမားကြီး ဒီဇိုဇော့ဖ်ရဲ့ စံချိန်ကို ကျော်ဖြတ်နိုင်မှာပါ။
ဒီနိုဇော့ဖ်ဟာ အသက် ၄၀ နှစ်၊ ၉၀ ရက်နဲ့ စံချိန်တင်ထားခဲ့တာ ဖြစ်ပါတယ်။
အေစီမီလန်မှာ ကစားနေတဲ့ အီဘရာဟီမိုဗစ်ကိုတွေ့ရစဉ်
ဝါရင့်တိုက်စစ်မှူးဟာ မကြာသေးခင်က အေစီမီလန်အသင်းအတွက် ဂိုးသွင်းယူပြီးနောက် စီးရီးအေသမိုင်းမှာ အသက်ကြီးဆုံး ဂိုးသွင်းတဲ့သူအဖြစ် စံချိန်သစ် တင်နိုင်ခဲ့တာပါ။ အီဘရာဟီမိုဗစ်ဟာ ပြီးခဲ့တဲ့နှစ်က ကျင်းပခဲ့တဲ့ ကမ္ဘာ့ဖလားပြိုင်ပွဲမှာ ဆွီဒင်အသင်း ခြေစစ်ပွဲ မအောင်မြင်ခဲ့ပြီးနောက် သူဟာ ကစားနိုင်တဲ့အချိန်ထိ ဆက်ပြီး ကစားပေးသွားဦးမယ်လို့ ပြောခဲ့ပါတယ်။
အီဘရာဟီမိုဗစ်က “ကျနော်ဟာ ပရဟိတ လုပ်ငန်းလုပ်ဖို့ ဒီကိုလာတာ မဟုတ်ပါဘူး။ ပွဲကစားဖို့နဲ့ ကျနော့်ရဲ့ စွမ်းဆောင်ရည်တွေ ကနေတဆင့် ရလဒ်ကောင်းတွေ ယူဆောင်လာဖို့အတွက် ဒီမှာ ရှိနေတာပါ။ ဒါကြောင့်လည်း ကျနော်ဟာ ဆက်ပြီး လုပ်နိုင်မယ်လို့ မျှော်လင့်ကြောင်း”ပြောခဲ့တာပါ။
ဆွီဒင်အသင်းသာ လာမယ့်နှစ် ယူရိုပြိုင်ပွဲကို ခြေစစ်ပွဲအောင်ပြီး အီဘရာဟီမိုဗစ် အနေနဲ့ ဝင်ရောက် ကစားနိုင်ခဲ့ မယ်ဆိုရင်တော့ နောက်ထပ် စံချိန်တစ်ခုကို ထပ်ပြီး ချိုးဖျက်နိုင်ဖို့ရှိတာ ဖြစ်ပါတယ်။
ဆွီဒင်အသင်းဟာ ယူရို ၂၀၂၄ ခြေစစ်ပွဲအဖြစ် သောကြာနေ့မှာ ဘယ်လ်ဂျီယံ၊ တနင်္လာနေ့မှာ အဇာဘိုင်ဂျန် အသင်းတို့နဲ့ ယှဉ်ပြိုင်ရမှာပါ။ ဆွီဒင် အသင်း ပါဝင်တဲ့ ဒီအုပ်စုမှာ ဒီ ၃ သင်းအပြင် အက်စတိုးနီးယားနဲ့ သြစတြီးယားတို့လည်း ပါဝင်နေပြီး ထိပ်ဆုံးရတဲ့ ၂ သင်းဟာ ခြေစစ်ပွဲ အောင်မြင်မှာ ဖြစ်ပါတယ်။
အသက် ၄၁ နှစ်အရွယ်ရှိ အီဘရာဟီမိုဗစ်ဟာ ဆွီဒင်လက်ရွေးစင်အတွက် ၂၀၀၁ ကတည်းက ပါဝင်ကစားခဲ့တာ ဖြစ်ပြီး ၁၂၁ ပွဲကစားထားကာ ၆၂ ဂိုးသွင်းယူထားတာ ဖြစ်ပါတယ်။
Source: Besoccer
- By CNI
- Category: အားကစား
- Hits: 460
CNI Sport News
၂၀၂၃ ခုနှစ်၊ မတ်လ ၂၂
အာဆင်နယ် ကစားသမားဟောင်း ရော်ဘတ်ပီးရတ်ဇ်က ပြင်သစ်လက်ရွေးစင်အသင်းရဲ့ အသင်းခေါင်းဆောင် အဖြစ် ဘတ်ပီကို ခန့်အပ်တာဟာ တိုက်စစ်မှူး ဂရစ်ဇ်မန်းအပေါ် လေးစားမှုမရှိကြောင်း ပြသတာလို့ ပြောလိုက် ပါတယ်။
ရော်ဘတ်ပီးရတ်ဇ်က “ဒါက ယုတ္တိတန်တဲ့ ရွေးချယ်မှုလား။ ရိုးရိုးသားသား ပြောရရင် ဒီလိုမဟုတ်ပါဘူး။ အသင်း ခေါင်းဆောင်ဖြစ်ဖို့ ဆန်ကာတင် စာရင်းမှာ ပါဝင်တဲ့ သူတွေထဲက ဂရစ်ဇ်မန်းဖြစ်ဖို့ မျှော်လင့်ခဲ့တာပါ။ ဒီဆုံးဖြတ်ချက်ကို ကျနော်အံ့သြမိပါတယ်။ ဘတ်ပီကို ဆန့်ကျင်တာ ဘာမှမရှိဘူးလို့ အခိုင်အမာ ပြောနေရင်တောင် ဒါဟာ ဂရစ်ဇ်မန်းအပေါ် လေးစားမှု မရှိကြောင်း ပြသတယ်လို့ ကျနော်ထင်ကြောင်း”ပြောခဲ့ပါတယ်။
ပြင်သစ်အသင်း ခေါင်းဆောင်အဖြစ် တာဝန်ယူနေတဲ့ ဂိုးသမား လိုရစ်ဟာ ကမ္ဘာ့ဖလား ပြိုင်ပွဲအပြီးမှာ လက်ရွေးစင် ကစားသမားဘဝကနေ အနားယူခဲ့တာကြောင့် နည်းပြ ဒက်ချမ့်စ်ဟာ အသင်းခေါင်းဆောင်သစ် ခန့်အပ်ဖို့ ရွေးချယ်ခဲ့ရတာ ဖြစ်ပါတယ်။
နည်းပြ ဒက်ချမ့်စ်ဟာ ဘတ်ပီ၊ ဂရစ်ဇ်မန်းတို့နဲ့ စကားပြောဆိုမှုတွေ ပြုလုပ်ပြီးနောက် ဘတ်ပီကို အသင်း ခေါင်းဆောင်သစ်အဖြစ် ခန့်အပ်ကာ ဂရစ်ဇ်မန်းကို ဒုအသင်းခေါင်းဆောင်အဖြစ် ခန့်အပ်ခဲ့တာပါ။
ဂရစ်ဇ်မန်းဟာ ဘတ်ပီထက် လက်ရွေးစင်အသင်းမှာ ကစားတာ ပိုပြီးသက်တမ်း ကြာပြီဖြစ်တဲ့အတွက် ဒီလို ရွေးချယ်မှုအပေါ် ဝေဖန်မှုတွေရှိခဲ့တာ ဖြစ်ပါတယ်။
ဘတ်ပီ အသင်းခေါင်းဆောင်အဖြစ် ၂၀၂၂ ကမ္ဘာ့ဖလားပြိုင်ပွဲတစ်ခုမှာ တာ၀န်ယူခဲ့စဉ်
ဂရစ်ဇ်မန်းဟာ ဘတ်ပီကို လက်ရွေးစင် အသင်းခေါင်းဆောင်အဖြစ် ခန့်အပ်တာကို စိတ်ပျက်နေပြီး ပြင်သစ်ကနေ အနားယူဖို့အထိ စဉ်းစားနေတယ်လို့လည်း သတင်းတွေ ထွက်ပေါ်ခဲ့သေးပါတယ်။
ဘတ်ပီဟာ အသက် ၂၄ နှစ် အရွယ်သာ ရှိသေးပေမယ့် ပြင်သစ်အသင်းကို ၂၀၁၈ ကမ္ဘာ့ဖလားပြိုင်ပွဲမှာ ချန်ပီယံ ဖြစ်အောင်နဲ့ ၂၀၂၂ ပြိုင်ပွဲမှာ ဗိုလ်လုပွဲအထိ ရောက်ရှိအောင် ပို့ဆောင်ပေးနိုင်ခဲ့ပါတယ်။
ဒက်ချမ့်စ်ကတော့ ဘတ်ပီဟာ အသင်းခေါင်းဆောင်အဖြစ် တာဝန်ယူဖို့အတွက် ထူးချွန်တဲ့ အရည်အချင်းတွေ အားလုံး ရှိတယ်လို့ ပြောပါတယ်။
ဒက်ချမ့်စ်က “သူ့မှာ အရည်အချင်း တစ်ခုအပြင် အခြားအရည်အချင်းတွေလည်း အများကြီး ရှိပါတယ်။ သူဟာ တော်လည်းတော်သလို ပေါင်းသင်း ဆက်ဆံရေးလည်း ကောင်းပါတယ်။ ဒါဆိုရင်တော့ သူ့ကို အသင်း ခေါင်းဆောင်ခန့်တာက ပြဿနာလို့ မထင်ပါဘူး”လို့ ပြောခဲ့ပါတယ်။
ပြင်သစ်အသင်းဟာ လာမယ့် ယူရို ၂၀၂၄ ခြေစစ်ပွဲအဖြစ် နယ်သာလန်၊ အိုင်ယာလန် အသင်းတို့နဲ့ ယှဉ်ပြိုင်ရမှာ ဖြစ်ပြီး ဒီပွဲတွေမှာ ဘတ်ပီဟာ အသင်းခေါင်းဆောင်အဖြစ် စတင် တာဝန်ယူရတော့မှာ ဖြစ်ပါတယ်။
Source: Daily Mail
Page 189 of 307
Latest News
Connect with us
