CNI Sport News

၂၀၂၃ ခုနှစ်၊ ဩဂုတ် ၃၁

စပိန်ဘောလုံးအဖွဲ့ချုပ်ဥက္ကဋ္ဌ ရူဘီယာလက်စ်ရဲ့ မိခင်ဟာ သားဖြစ်သူကို ပြင်းပြင်းထန်ထန်ဝေဖန်နေတဲ့အပေါ် ကန့်ကွက်တဲ့အနေနဲ့ အစာငတ်ခံဆန္ဒပြပြီးနောက် လက်ရှိအချိန်မှာ ဆေးရုံတင်ထားရတာဖြစ်ပါတယ်။

ရူဘီယာလက်စ်ရဲ့ မိခင် ဘီဂျာဟာ သြဂုတ် ၂၈ ရက်ကစပြီး မိုထရေလ်ရှိ ဘုရားကျောင်းတစ်ခုမှာ အစာငတ်ခံ ဆန္ဒပြနေတာပါ။ ရူဘီယာလက်စ်ဟာ ၂၀၂၃ အမျိုးသမီးကမ္ဘာ့ဖလားပြိုင်ပွဲဗိုလ်လုပွဲအပြီးမှာ စပိန်အမျိုးသမီး အသင်းကွင်းလယ်လူ ဟာမိုဆိုရဲ့ နှုတ်ခမ်းကို နမ်းခဲ့တဲ့အတွက် ပြင်းပြင်းထန်ထန်ဝေဖန်မှုတွေကို ခံခဲ့ရတာ ဖြစ်ပါတယ်။ အဲဒါကြောင့် မိခင်ဖြစ်သူ ဘီဂျာက သားဖြစ်သူအတွက် နေ့ရော၊ညပါ အစာငတ်ခံဆန္ဒပြမယ်လို့ စပိန်သတင်းဌာန EFE ကို ပြောခဲ့တာပါ။

ဘီဂျာဟာ အစာငတ်ခံဆန္ဒပြမှု တတိယမြောက်နေ့မှာတော့ ဆေးရုံတင်ခဲ့ရတယ်လို့ ခရစ်ယာန်ဘုန်းကြီး အန်တိုနီယိုက Reuters သတင်းဌာနကို ပြောခဲ့တာဖြစ်ပါတယ်။ အဲဒါကြောင့် သတင်းစာရှင်းလင်းပွဲပြုလုပ်ဖို့ စီစဉ်ထားတာကို ဖျက်သိမ်းခဲ့ရတာပါ။

အန်တိုနီယိုက “အပူနဲ့ အခြားအရာတွေကြောင့် သူမ နေမကောင်းဘူးဖြစ်နေပါတယ်။ ခြေဖဝါးတွေလည်း ရောင်နေပြီး သူမကို ကြည့်ရတာ အလွန်ပင်ပန်းနေပါတယ်။ သူမလည်းအလွန်ထိတ်လန့်နေတယ်” လို့ ဘုရားကျောင်းအပြင်ဘက်မှာရှိတဲ့ သတင်းထောက်တွေကို ပြောခဲ့တာဖြစ်ပါတယ်။

ခရစ်ယာန်ဘုန်းကြီး အန်တိုနီယိုက ရူဘီယာလက်စ်နဲ့ သူ့ရဲ့ မိခင်တို့ဟာ အဆက်အသွယ်ရှိတယ်လို့ အတည်ပြု ခဲ့တာပါ။ ရူဘီယာလက်စ်ဟာ စပိန်ဘောလုံးအဖွဲ့ချုပ်ဥက္ကဋ္ဌ ရာထူးကနေ နုတ်ထွက်မှာမဟုတ်ဘူးလို့ ပြောခဲ့ပြီး နောက် ဖီဖာက သူ့ကို ဘောလုံးလောကနဲ့ ပတ်သက်ခွင့်ဆိုင်းငံ့ထားတာဖြစ်ပါတယ်။ 

စပိန်ဘောလုံးအဖွဲ့ချုပ်အကြီးအကဲတွေဟာ ရူဘီယာလက်စ်ကို ရာထူးကနေ ချက်ချင်းနုတ်ထွက်ဖို့ တောင်းဆို ထားတာဖြစ်ပါတယ်။

ယူအီးအက်ဖ်အေအကြီးအကဲ ဆက်ဖာရင်က ရူဘီယာလက်စ်ရဲ့လုပ်ရပ်ဟာ မသင့်လျော်ဘူးလို့ ပြောထားတာပါ။

ဆက်ဖာရင်က “ကျနော်က ရှေ့နေဖြစ်သလို ဖီဖာဒုဥက္ကဋ္ဌတွေထဲက တစ်ဦးလည်းဖြစ်ပါတယ်။ ဒီလိုမျိုးအရာက စပိန်အသင်းရဲ့အောင်ပွဲခံမှုကို လွှမ်းမိုးသွားခဲ့တဲ့အတွက် စိတ်မကောင်းဖြစ်မိတယ်လို့ ပြောချင်ပါတယ်။ ကျနော်တို့ ဟာ အရာတွေကို ပြောင်းလဲသင့်ပါတယ်”လို့ ပြောခဲ့ပါတယ်။

Source:BBC

CNI Sport News

၂၀၂၃ ခုနှစ်၊ ဩဂုတ် ၃၀

ချယ်လ်ဆီးနဲ့ စပါးအသင်းတို့ဟာ ဘာစီလိုနာအသင်းကြယ်ပွင့်ကစားသမား အန်ဆုဖာတီကို ခေါ်ယူဖို့ စိတ်ဝင်စား နေတယ်လို့ ဗြိတိန်မီဒီယာတွေက ဖော်ပြထားပါတယ်။

ဘာစီလိုနာအသင်းနည်းပြ ဇာဗီဟာ အန်ဆုဖာတီနဲ့ ပတ်သက်တဲ့အစီအစဉ်တွေကို သိသိသာသာ ပြောင်းလဲ သွားခဲ့ပြီးနောက် စပိန်ကစားသမားဟာ အသင်းကနေ ထွက်ခွာဖို့ စဉ်းစားလာခဲ့တာပါ။

အန်ဆုဖာတီရဲ့ အေးဂျင့် ဂျော့ချ်မန်ဒက်စ်ဟာ ကစားသမားရဲ့ လက်ရှိအခြေအနေတွေနဲ့ပတ်သက်ပြီး စပါးနဲ့ ချယ်လ်ဆီးအသင်းတို့ကို အသိပေးနေတာဖြစ်ပါတယ်။

လာမာစီယာအကယ်ဒမီထွက် အန်ဆုဖာတီဟာ ဒဏ်ရာတွေကြောင့် ပြီးခဲ့တဲ့ဘောလုံးရာသီမှာ စိတ်ပျက်စရာ တွေကို ကြုံတွေ့ခဲ့ရပေမယ့် နည်းပြ ဇာဗီလက်အောက်မှာ နေရာရဖို့အတွက် တိုက်ပွဲဝင်ချင်နေတယ်လို့ စပိန် သတင်းတွေက ဖော်ပြထားတာပါ။ ဒါပေမယ့် နွေရာသီအပြောင်းအရွှေ့ဈေးကွက်ပိတ်ဖို့ နီးကပ်လာချိန်မှာတော့ အန်ဆုဖာတီဟာ ဘာစီလိုနာအသင်းကနေ ထွက်ခွာဖွယ်ရှိနေတာဖြစ်ပါတယ်။

ချယ်လ်ဆီးနဲ့ စပါးအသင်းတို့ဟာ အပြောင်းအရွှေ့မပိတ်ခင်မှာ တိုက်စစ်ကစားသမားတစ်ဦးကို ခေါ်ယူနိုင်ဖို့ ရှာဖွေနေပြီး အန်ဆုဖာတီက သူတို့ရဲ့ ပစ်မှတ်ဖြစ်လာခဲ့ပါတယ်။ ဘာစီလိုနာအသင်းဟာ အန်ဆုဖာတီကို အသင်းရဲ့ အနာဂတ်ကစားသမားအဖြစ် သတ်မှတ်ထားပြီး မက်ဆီထွက်ခွာသွားချိန်မှာ ကျောနံပတ် ၁၀ ဂျာစီကိုပေး ဝတ်ဆင်ခဲ့တာပါ။ ဘာစီလိုနာအသင်းနဲ့ အန်ဆုဖာတီတို့ ချုပ်ဆိုထားတဲ့ စာချုပ်ဟာ ၂၀၂၇ ခုနှစ်အထိ သက်တမ်း ရှိနေတာဖြစ်ပါတယ်။

၂၀၁၉ ခုနှစ်က ဘာစီလိုနာအသင်းကြီးအတွက် စတင်ပွဲထွက်ခွင့်ရခဲ့တဲ့ အန်ဆုဖာတီဟာ စပိန်ကလပ်အတွက် ၁၁၂ ပွဲ ပါဝင်ကစားထားပြီး ၂၉ ဂိုးသွင်းယူထားကာ လာလီဂါ၊ကိုပါဒယ်လ်ရေးနဲ့ စပိန်စူပါဖလားတို့ကို ရယူထားနိုင်ခဲ့ တာပါ။ အန်ဆုဖာတီဟာ စပိန်လက်ရွေးစင်အသင်းအတွက်လည်း ၉ ပွဲပါဝင်ကစားထားပြီး ၂ ဂိုးသွင်းယူထားကာ ယူအီးအက်ဖ်အေနေးရှင်းလိဂ်ချန်ပီယံဆုကို ရရှိထားတာဖြစ်ပါတယ်။

Source:Goal

CNI Sport News

၂၀၂၃ ခုနှစ်၊ ဩဂုတ် ၃၀

ရာပီနိုးဟာ တောင်အာဖရိကအသင်းနဲ့ ခြေစမ်းပွဲမှာ အမေရိကန်အမျိုးသမီးအသင်းအတွက် နောက်ဆုံးပွဲစဉ်အဖြစ် ပါဝင်ကစားသွားမယ်လို့ နိုင်ငံရဲ့ ဘောလုံးအဖွဲ့ချုပ်က အတည်ပြုခဲ့ပါတယ်။ ဒီ ခြေစမ်းပွဲကို စက်တင်ဘာ ၂၄ ရက် ချီကာဂိုမှာ ကျင်းပသွားမှာပါ။

အသက် ၃၈ နှစ်အရွယ်ရှိ ရာပီနိုးဟာ NWSL လိဂ်ပြိုင်ပွဲပြီးဆုံးမယ့် နိုဝင်ဘာလမှာ ကစားသမားဘဝက အနားယူ တော့မယ်လို့ ပြီးခဲ့တဲ့ အမျိုးသမီးကမ္ဘာ့ဖလားပြိုင်ပွဲမတိုင်ခင်က ကြေညာခဲ့တာဖြစ်ပါတယ်။ ဝါရင့်ရှေ့တန်း ကစားသမားဟာ အမေရိကန်အမျိုးသမီးအသင်းအတွက် ကမ္ဘာ့ဖလားပြိုင်ပွဲ ၄ ကြိမ်ဝင်ရောက်ယှဉ်ပြိုင်ခဲ့ပြီး ၂၀၁၅ နဲ့ ၂၀၁၉ ခုနှစ်ကပြိုင်ပွဲတွေမှာ ချန်ပီယံဆုကို ရယူနိုင်ခဲ့တာပါ။ 

ရာပီနိုးဟာ အမေရိကန်အသင်းကို ၂၀၁၂ လန်ဒန်အိုလံပစ်ပြိုင်ပွဲမှာ ရွှေတံဆိပ်ဆုရရှိအောင်လည်း ကူညီပေးနိုင် ခဲ့ပါတယ်။ အမေရိကန်အသင်းဟာ ပြီးခဲ့တဲ့ အမျိုးသမီးကမ္ဘာ့ဖလားပြိုင်ပွဲမှာ ဆွီဒင်အသင်းကို ပင်နယ်တီ အဆုံးအဖြတ်မှာ အရေးနိမ့်ပြီး ၁၆ သင်းအဆင့်ကနေ ထွက်ခွာခဲ့ရတာပါ။ ရာပီနိုးဟာ ဆွီဒင်အသင်းနဲ့ပွဲမှာ ပင်နယ်တီလွဲချော်ခဲ့တဲ့ အမေရိကန်ကစားသမား ၃ ဦးထဲမှာ ၁ ဦးအပါအဝင်ဖြစ်ခဲ့ပါတယ်။

ရာပီနိုးက “လူတွေက ကျမကစားသမားဘဝကနေ အနားယူသွားလို့ ဝမ်းနည်းစရာကောင်းတယ်လို့ ထင်ကောင်းထင်ကြပေမယ့် ပွဲတွေကစားခဲ့တဲ့ နှစ်ပေါင်း ၃၀ ကို ပြန်ပြီးတွေးကြည့်ရင် ဝမ်းသာရပါတယ်။ ဒါဟာမယုံနိင်စရာခရီးစဉ်တစ်ခုပါပဲ။ ကျမနိုင်ငံအတွက် နောက်ဆုံးအခွင့်အရေးကို ရခဲ့တာကတော့ ထူးခြား ပါတယ်။ ကစားသမားတစ်ဦးအနေနဲ့ရော၊ လူပုဂ္ဂိုလ်တစ်ဦးအနေနဲ့ပါ နှစ်ပေါင်းများစွာလက်တွဲခဲ့တဲ့ အသင်းဖော် တွေနဲ့ အားလုံးကို ကျေးဇူးတင်ဖို့ အခွင့်အရေးရမှာပါ” လို့ ပြောခဲ့ပါတယ်။

ရာပီနိုးဟာ အမေရိကန်အသင်းအတွက် ၂၀၃ ပွဲ၊ သွင်းဂိုး ၆၃ ဂိုး၊ ဂိုးဖန်တီးမှု ၇၃ ဂိုးနဲ့ နိုင်ငံလက်ရွေးစင် ကစားသမားဘဝကို အဆုံးသတ်တော့မှာပါ။ ရာပီနိုးဟာ LGBT+ အခွင့်အရေးတွေနဲ့ အမျိုးသမီးဘောလုံး သမားတွေအတွက် လစာတန်းတူညီမျှရရှိဖို့အတွက် တိုက်ပွဲဝင်နေတဲ့သူအဖြစ်လည်း ရပ်တည်နေတာဖြစ်ပါတယ်။

Source:ChannelNewsAsia

CNI Sport News

၂၀၂၃ ခုနှစ်၊ ဩဂုတ် ၃၀

စပါးအသင်းဟာ ကာရာဘောင်းဖလားဒုတိယအဆင့်အဖြစ် ဖူလ်ဟမ်အသင်းနဲ့ ကစားခဲ့တာမှာ ပင်နယ်တီ အဆုံးအဖြတ်နဲ့ အရေးနိမ့်ပြီး ပြိုင်ပွဲကနေ ထွက်ခွာခဲ့ရပါတယ်။

ပွဲချိန်အတွင်းမှာ ဖူလ်ဟမ်အသင်းက စပါးအသင်းကစားသမား ဗန်ဒီဗန်ရဲ့ ကိုယ့်ဂိုးကိုယ်သွင်းယူမှုနဲ့ ဦးဆောင် နိုင်ခဲ့ပေမယ့် ရစ်ချာလီဆန်က စပါးအသင်းအတွက် ချေပဂိုးပြန်သွင်းခဲ့လို့ ၁ ဂိုးစီသရေနဲ့ ပင်နယ်တီ အဆုံး အဖြတ်ခံယူခဲ့ရတာပါ။ ပင်နယ်တီအဆုံးအဖြတ်မှာ ဖူလ်ဟမ်အသင်းက ၅ ဂိုးစလုံးဝင်ခဲ့ပြီး စပါးအသင်းဘက်က ဒါဗန်ဆန် ဆန်းချက်ဇ်ဂိုးမဝင်ခဲ့လို့ ဖူလ်ဟမ်အသင်း ၅ ဂိုး- ၃ ဂိုးနဲ့ အနိုင်ရပြီး နောက်တစ်ဆင့် တက်နိုင်ခဲ့တာ ဖြစ်ပါတယ်။

ပရီးမီးယားလိဂ်ပြိုင်ပွဲ ၃ ပွဲကစားအပြီးမှာ ရှုံးပွဲမရှိရလဒ်ကောင်းတွေရနေတဲ့ စပါးအသင်းဟာ ဒီရာသီ ပြည်တွင်း ဖလားပြိုင်ပွဲတစ်ခုဖြစ်တဲ့ ကာရာဘောင်းဖလားပြိုင်ပွဲကနေ စောစီးစွာထွက်ခွာခဲ့ရတာပါ။ စပါး အသင်းဟာ ဖူလ်ဟမ်အသင်းနဲ့ပွဲမှာ ကစားသမား ၉ ဦးအထိပြောင်းလဲပြီး ပွဲထွက်ခဲ့ပေမယ့် နည်းပြ ပိုစတီကိုဂလူးက သူ့ရဲ့ ဆုံးဖြတ်ချက်ကို ကာကွယ်သွားခဲ့ပါတယ်။

ပိုစတီကိုဂလူးက “ကျနော့်ကစားသမားတွေကို ကျနော်ဘယ်လိုရှာဖွေရမှာလဲ။ ကစားသမားတွေကို ပါဝင်နိုင်ဖို့ အတွက် အခွင့်အရေးပေးဖို့ လိုအပ်ပါတယ်။ ကျနော်လုပ်ခဲ့တဲ့ အပြောင်းအလဲတွေက အံ့သြစရာတော့ မဟုတ် ပေမယ့် ကျနော်တို့ အကောင်းဆုံးမလုပ်ဆောင်နိုင်ခဲ့ကြပါဘူး။ အသင်းဟာ ကြီးထွားလာနိုင်မယ့် နည်းလမ်းမျိုးစုံ ရှိသလို စရိုက်လက္ခဏာအစစ်အမှန်ကိုလည်း ကျနော်တို့ပြသခဲ့ပါတယ်။ ဒုတိယပိုင်းမှာ ကျနော်တို့ဟာ အနိုင်ရဖို့ အတွက် အချိန်တွေရှိခဲ့ပေမယ့် ပင်နယ်တီမှာ ရှုံးနိမ့်သွားခဲ့ပါတယ်”လို့ ပြောခဲ့တာပါ။

စပါးအသင်းဟာ ပရီးမီးယားလိဂ် ပွဲစဉ် ၄ အဖြစ် ဘန်လေအသင်းနဲ့ စက်တင်ဘာ ၂ ရက် အဝေးကွင်းမှာ ယှဉ်ပြိုင် ရမယ်လို့ သိရပါတယ်။

Source:BBC

CNI Sport News

၂၀၂၃ ခုနှစ်၊ ဩဂုတ် ၃၀

ပရော်ဖက်ရှင်နယ်ဘောလုံးသမားများအစည်းအရုံး(PFA)ကပေးတဲ့ တစ်နှစ်တာအကောင်းဆုံးကစားသမားဆုကို မန်စီးတီးအသင်းတိုက်စစ်မှူး ဟာလန်းက ရရှိသွားခဲ့ပါတယ်။

အသက် ၂၃ နှစ်အရွယ်ရှိတိုက်စစ်မှူးဟာ မန်စီးတီးအသင်းအတွက် ပွဲဦးထွက်ခဲ့တဲ့ ပြီးခဲ့တဲ့ရာသီက ပြိုင်ပွဲစုံသွင်းဂိုး ၅၂ ဂိုးအထိ သွင်းယူနိုင်ခဲ့ပြီး အသင်းနဲ့အတူ ဆုဖလား ၃ လုံးရယူနိုင်ခဲ့တာပါ။ ဟာလန်းဟာ PFA တစ်နှစ်တာ အကောင်းဆုံးကစားသမားဆုကို မန်စီးတီးအသင်းဖော်တွေဖြစ်တဲ့ ဒီဘရိုင်းနဲ့ဂျွန်စတုန်းစ်၊ အာဆင်နယ်အသင်းက ဆာကာနဲ့ အိုဒီဂတ်၊ စပါးအသင်းကစားသမားဟောင်း ဟာရီကိန်းတို့ကို ကျော်ဖြတ်ပြီး ရရှိခဲ့တာဖြစ်ပါတယ်။

ဟာလန်းက “ဒီလိုဂုဏ်ထူးဆောင်ဆုကို ရယူနိုင်ခဲ့တာက ဂုဏ်ယူစရာပါပဲ။ ပြိုင်ဘက်တွေရဲ့ အသိအမှတ်ပြု ခံရတာက အလွန်ကောင်းမွန်တဲ့ခံစားချက်ဖြစ်ပြီး ကျနော့်ကို မဲပေးခဲ့တဲ့သူတွေအားလုံးကို ကျေးဇူးတင်တယ်လို့ ပြောချင်ပါတယ်။ ပြီးခဲ့တဲ့ရာသီဟာ ကျနော့်အတွက်ရော အသင်းအတွက်ပါ မမေ့နိုင်တဲ့ရာသီပါ။ ဆုဖလား ၃ လုံး ကိုရယူနိုင်ဖို့က ကျနော်ဘယ်တုန်းကမှ စိတ်ကူးထဲတောင် မတွေးဖူးတဲ့အရာဖြစ်ပါတယ်။ အခုနှစ်မှာလည်း မနှစ်ကလိုပဲ ထပ်ပြီးလုပ်ချင်ပါတယ်” လို့ ဆုယူအပြီးမှာ ပြောခဲ့တာပါ။

တစ်နှစ်တာအကောင်းဆုံးလူငယ်ကစားသမားဆုကိုတော့ အာဆင်နယ်အသင်းတောင်ပံကစားသမား ဆာကာက ရရှိခဲ့ပါတယ်။ အသက် ၂၁ နှစ်အရွယ်ရှိကစားသမားဟာ ပြီးခဲ့တဲ့ရာသီက ပြိုင်ပွဲစုံ ၁၅ ဂိုးအထိ သွင်းယူပြီး အာဆင်နယ်အသင်းကို ပရီးမီးယားလိဂ်ချန်ပီယံဆုရယူနိုင်ဖို့အတွက် အနီးစပ်ဆုံးအခြေအနေအထိ ရောက်ရှိ အောင် စွမ်းဆောင်ပေးနိုင်ခဲ့တာပါ။ 

အဲဒါကြောင့်လည်း ဆာကာဟာ ဟာလန်း၊ ကိုင်စီဒို၊ ရမ်ဆေး၊မာတင်နယ်လီနဲ့ အီဗန်ဖာဂူဆန်တို့ကို အနိုင်ရပြီး ဒီဆုကို ရယူနိုင်ခဲ့တာဖြစ်ပါတယ်။ ပရိသတ်တွေကပေးတဲ့ တစ်နှစ်တာအကောင်းဆုံးကစားသမားဆုကို ယူနိုက်တက်တိုက်စစ်မှူး ရက်ရှ်ဖိုဒ့်က ရရှိသွားခဲ့တာပါ။

PFA ရဲ့တစ်နှစ်တာအကောင်းဆုံးအသင်းမှာတော့ မန်စီးတီးနဲ့ အာဆင်နယ်အသင်းတို့ရဲ့ ကစားသမားတွေကသာ လွှမ်းမိုးထားနိုင်ခဲ့ပါတယ်။ ဂိုးသမားအဖြစ် ရမ်စဒေးလ်၊နောက်တန်းမှာ ထရစ်ပီယာ၊ ရူဘင်ဒီယက်ဇ်၊ဂျွန်စတုန်းစ်နဲ့ ဆာလီဘာ၊ ကွင်းလယ်မှာ ဒီဘရိုင်း၊ရိုဒရီနဲ့ အိုဒီဂတ်၊ ရှေ့တန်းမှာ ဆာကာ၊ ဟာလန်းနဲ့ ဟာရီကိန်းတို့ ပါဝင်ခဲ့ ကြတာဖြစ်ပါတယ်။

PFA အမျိုးသမီးတစ်နှစ်တာအကောင်းဆုံးကစားသမားဆုကို အက်စတွန်ဗီလာအသင်းတိုက်စစ်မှူး ရီချယ်ဒါလီက ရရှိခဲ့ပြီး အကောင်းဆုံးလူငယ်ကစားသမားဆုကိုတော့ ချယ်လ်ဆီးအသင်းတောင်ပံကစားသမား လော်ရန်ဂျိမ်းစ်က ရရှိသွားခဲ့ပါတယ်။

Source:BBC

CNI Sport News

၂၀၂၃ ခုနှစ်၊ ဩဂုတ် ၂၉

ဆားဘီးယားတင်းနစ်အကျော်အမော် ဂျိုကိုဗစ်ဟာ ကျင်းပနေတဲ့ အမေရိကန်အိုးပန်းပြိုင်ပွဲ ပထမအဆင့်မှာ အနိုင်ရပြီးနောက် လူငယ်ပြိုင်ဘက် ကားလို့စ်အယ်လ်ကာရတ်ဇ်ရဲ့ ကမ္ဘာ့အဆင့် ၁ နေရာကို ပြန်လည်ရောက်ရှိ သွားခဲ့ပါတယ်။

ဂျိုကိုဗစ်ဟာ ပထမအဆင့်မှာ ပြင်သစ်တင်းနစ်သမား မူလာကို ၆-ဝ၊ ၆-၂၊ ၆-၃ နဲ့ အနိုင်ရပြီး ဒုတိယအဆင့် ရောက်ရှိသွားခဲ့တာပါ။ အသက် ၃၆ နှစ်အရွယ်ရှိ ဂျိုကိုဗစ်ဟာ ကိုဗစ်ကာကွယ်ဆေးမထိုးရသေးတာကြောင့် ပြီးခဲ့တဲ့နှစ်က အမေရိကန်အိုးပန်းပြိုင်ပွဲမှာ ယှဉ်ပြိုင်ခွင့်မရခဲ့ပါဘူး။ ဂျိုကိုဗစ်ဟာ အခုနှစ်ပြိုင်ပွဲမှာ ယှဉ်ပြိုင်ခွင့် ရခဲ့တဲ့အတွက် စံချိန်တင်ဂရမ်းဆလမ်းဆုဖလား၂၄ ကြိမ်မြောက်ရယူနိုင်ဖို့ မျှော်လင့်လို့ရပြီဖြစ်တာပါ။

ဂျိုကိုဗစ်ဟာ အခုနှစ်ထဲမှာ ဂရမ်းဆလမ်းပြိုင်ပွဲတွေဖြစ်တဲ့ သြစတြေးလျအိုးပန်းနဲ့ ပြင်သစ်အိုးပန်းပြိုင်ပွဲတွေမှာ ချန်ပီယံဆုကို ရယူနိုင်ခဲ့ပြီး ဝင်ဘယ်လ်ဒန်အိုးပန်းပြိုင်ပွဲမှာ ကားလို့စ်အယ်လ်ကာရတ်ဇ်ကို အရေးနိမ့်ခဲ့တာ ဖြစ်ပါတယ်။ ကားလို့စ်အယ်လ်ကာရတ်ဇ်ဟာ ဂျိုကိုဗစ်မပါဝင်နိုင်ခဲ့တဲ့ ပြီးခဲ့တဲ့နှစ်ပြိုင်ပွဲမှာ ချန်ပီယံဖြစ်ခဲ့တဲ့ အတွက် အခုနှစ်ပြိုင်ပွဲကို ဆီဒင်သတ်မှတ်ချက် ၁ အဖြစ်သတ်မှတ်ခြင်းခံထားရတာပါ။

ဂျိုကိုဗစ်နဲ့ ကားလို့စ်အယ်လ်ကာရတ်ဇ်တို့ဟာ အမေရိကန်အိုးပန်းပြိုင်ပွဲမှာ ချန်ပီယံဆုရယူနိုင်ဖို့ ရေပန်း အစားဆုံး အဖြစ် ပူးတွဲရပ်တည်နေတာဖြစ်ပါတယ်။သူတို့နှစ်ဦးဟာ ဒီပြိုင်ပွဲမှာ ဆီဒင်သတ်မှတ်ချက်ထိပ်ဆုံး ၂ ဦး အဖြစ် သတ်မှတ်ခံထားရတာကြောင့် ဗိုလ်လုပွဲအဆင့်ထိ ရောက်ရှိမှသာ တွေ့ဆုံနိုင်မယ်လို့ သိရပါတယ်။ ဂျိုကိုဗစ်ဟာ အမေရိကန်အိုးပန်းပြိုင်ပွဲမှာ ချန်ပီယံဆု ၃ ကြိမ်ရရှိထားပြီး ၂၀၁၈ ခုနှစ်က ပြိုင်ပွဲမှာ နောက်ဆုံး ရရှိခဲ့တာပါ။

အသက် ၂၀ နှစ်အရွယ်ရှိ ကားလို့စ်အယ်လ်ကာရတ်ဇ်ကတော့ အမေရိကန်အိုးပန်းပြိုင်ပွဲမှာ ပြီးခဲ့တဲ့နှစ်က ချန်ပီယံ ဆုရရှိခဲ့တဲ့ ၁ ကြိမ်သာအောင်မြင်မှုရရှိထားတာဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ ဩဂုတ် ၂၉

ပေါ်တူဂီကွင်းလယ်လူ မာသီးယက်စ်နူနက်စ်ဟာ မန်စီးတီးအသင်းထံ ပြောင်းရွှေ့ချင်နေတာကြောင့် ဝုလ်ဗ်စ် အသင်းနဲ့ လေ့ကျင့်ခန်းဆင်းဖို့ ငြင်းဆန်ခဲ့တယ်လို့ ဗြိတိန်မီဒီယာတွေက ဖော်ပြထားပါတယ်။

မန်စီးတီးအသင်းဟာ ကွင်းလယ်ပိုင်းကို အားဖြည့်ဖို့အတွက် မာသီးယက်စ်နူနက်စ်ကို ပေါင် ၄၇ သန်းနဲ့ ကမ်းလှမ်း ခဲ့တာကို ဝုလ်ဗ်စ်အသင်းက ပယ်ချထားတာပါ။ ဝုလ်ဗ်စ်အသင်းဟာ မာသီးယက်စ်နူနက်စ်အတွက် ပြောင်းရွှေ့ ကြေး ပေါင်သန်း ၆၀ ကျော်အလိုရှိနေတာကြောင့် မန်စီးတီးအသင်းဆီကနေ နောက်ထပ်ကမ်းလှမ်းမှုတွေထပ်ပြီး ရရှိဖို့ မျှော်လင့်နေတာဖြစ်ပါတယ်။ 

ပေါ်တူဂီကစားသမားကတော့ သူထွက်ခွာချင်တယ်ဆိုပြီး ဝုလ်ဗ်စ်အသင်းကို ပြောထားသလို အသင်းနဲ့ လေ့ကျင့်မှု လည်း လာရောက်ပြုလုပ်ခြင်းမရှိဘူးလို့ The Athletic က ဖော်ပြထားတာပါ။ ဝုလ်ဗ်စ်အသင်းက လေ့ကျင့်ရေး ကွင်းကို လာရောက်ခဲ့ခြင်းမရှိတဲ့ မာသီးယက်စ်နူနက်စ်ကို စည်းကမ်းပိုင်းဆိုင်ရာ အရေးယူမှုတွေပြုလုပ်သွားမယ် လို့ သိရပါတယ်။ 

အသက် ၂၅ နှစ်အရွယ်ရှိ ကွင်းလယ်လူဟာ ပြီးခဲ့တဲ့နှစ်ကမှ စပို့တင်းလစ္စဘွန်းအသင်းကနေ ကလပ်စံချိန်တင် ပြောင်းရွှေ့ကြေး ပေါင် ၃၈ သန်းနဲ့ ရောက်ရှိလာခဲ့ပြီး ဝုလ်ဗ်စ်အသင်းနဲ့ ၅ နှစ် စာချုပ်ချုပ်ဆိုခဲ့တာပါ။ မာသီးယက်စ်နူနက်စ်ဟာ ပြီးခဲ့တဲ့ရာသီက ဝုလ်ဗ်စ်အသင်း ပရီးမီးယားလိဂ်မှာ ဆက်ပြီးရှင်သန်နိုင်အောင် အဓိကခြေစွမ်းပြသနိုင်ခဲ့တဲ့ ကစားသမားတွေထဲကတစ်ဦးလည်း ဖြစ်ပါတယ်။

မန်စီးတီးအသင်းဟာ နွေရာသီအပြောင်းအရွှေ့မပိတ်ခင်မှာ မာသီးယက်စ်နူနက်စ်အတွက် ဝုလ်ဗ်စ်အသင်း လက်ခံနိုင်မယ့် ကမ်းလှမ်းမှုပြုလုပ်ပြီး ခေါ်ယူနိုင်မယ်လို့ ယုံကြည်မှုရှိနေတာပါ။ မာသီးယက်စ်နူနက်စ်ဟာ ဝုလ်ဗ်စ်အသင်းအတွက် ၄၁ ပွဲပါဝင်ကစားထားပြီး ၁ ဂိုးသွင်းယူထားပါတယ်။

Source:Goal

CNI Sport News

၂၀၂၃ ခုနှစ်၊ ဩဂုတ် ၂၉

ချယ်လ်ဆီးအသင်းဟာ တိုက်စစ်မှူး လူကာကူအတွက် ရိုးမားအသင်းက ကမ်းလှမ်းတဲ့ အငှားခေါ်ယူကြေး ပေါင် ၅ သန်းကို လက်ခံလိုက်တဲ့အတွက် အပြောင်းအရွှေ့ဖြစ်ဖို့ သဘောတူညီမှုရရှိသွားပြီလို့ The Telegraph က ဖော်ပြ ထားပါတယ်။

လူကာကူဟာ ရိုးမားအသင်းထံ အခုရာသီအကုန်ထိ အငှားနဲ့ ပြောင်းရွှေ့မှာဖြစ်ပြီး လုပ်ခလစာအဖြစ် ပေါင် ၆ သန်းရရှိမှာပါ။ ချယ်လ်ဆီးအသင်းဟာ နည်းပြ ပိုချက်တီနိုရဲ့ အစီအစဉ်မှာ ပါဝင်ခြင်းမရှိတော့တဲ့ လူကာကူကို ရောင်းချဖို့ လုပ်ဆောင်ခဲ့ပေမယ့် အပြောင်းအရွှေ့ပြီးဆုံးဖို့ နီးကပ်လာတဲ့အတွက် အငှားချဖို့သာ ဆုံးဖြတ်ခဲ့ရတာ ဖြစ်ပါတယ်။ ဘယ်လ်ဂျီယံတိုက်စစ်မှူးဟာ အင်တာမီလန်၊ဂျူဗင်တပ်စ်၊ ဆော်ဒီကလပ် အယ်လ်ဟီလယ် အသင်း တွေနဲ့ သတင်းတွေထွက်ခဲ့ပေမယ့် အပြောင်းအရွှေ့ဖြစ်မလာခဲ့ပါဘူး။

အဲဒါကြောင့် တိုက်စစ်ကစားသမားလိုအပ်ချက်ရှိနေတဲ့ ရိုးမားအသင်းက လူကာကူကို ခေါ်ယူဖို့ ချယ်လ်ဆီး အသင်းထံ ချိတ်ဆက်မှုပြုလုပ်ခဲ့သလို ကစားသမားကိုယ်တိုင်ကလည်း ဆရာဟောင်း မော်ရင်ဟိုရှိတဲ့အသင်းထံ ပြောင်းရွှေ့ချင်ခဲ့တာပါ။ ချယ်လ်ဆီးနဲ့ ရိုးမားအသင်းတို့ဟာ လူကာကူရဲ့ အငှားအပြောင်းအရွှေ့အတွက် ဆွေးနွေးမှု တွေပြုလုပ်အပြီးမှာ သဘောတူညီမှုရရှိသွားခဲ့တာဖြစ်ပါတယ်။ ရိုးမားအသင်းဟာ အငှားခေါ်ယူကြေးအပြင် လူကာကူရဲ့ လုပ်ခလစာကိုပါ ပေးချေရမှာပါ။

လူကာကူဟာ ရိုးမားအသင်းနဲ့ အငှားစာချုပ်ပြည့်ပြီး ချယ်လ်ဆီးအသင်းထံ ပြန်ရောက်လာခဲ့မယ်ဆိုရင် သူ့ရဲ့ လုပ်ခလစာကိုလျှော့ပြီးယူဖို့လည်း သဘောတူညီမှုရရှိခဲ့တာဖြစ်ပါတယ်။ ဘယ်လ်ဂျီယံတိုက်စစ်မှူးဟာ နည်းပြ မော်ရင်ဟိုရဲ့ လက်အောက် ယူနိုက်တက်နဲ့ ချယ်လ်ဆီးအသင်းတွေမှာ ကစားခဲ့တုန်းက ၇၆ ပွဲမှာ ၃၃ ဂိုးသွင်းပြီး ၁၁ ဂိုးဖန်တီးနိုင်ခဲ့တာကြောင့် ပေါ်တူဂီလူမျိုးနည်းပြက သူ့ရဲ့ အကောင်းဆုံးပုံစံတွေကို ပြန်လည်ရရှိအောင် ကူညီပေးနိုင်ဖို့ မျှော်လင့်နေတာပါ။

ရိုးမားအသင်းဟာ အခုရာသီ စီးရီးအေ ၂ ပွဲကစားအပြီးမှာ ရမှတ် ၁ မှတ်သာရရှိထားပြီး ရလဒ်ဆိုးနေတာကြောင့် လာမယ့် အေစီမီလန်အသင်းနဲ့ ပွဲစဉ်မှာ နိုင်ပွဲရယူနိုင်ဖို့ ပစ်မှတ်ထားနေတာဖြစ်ပါတယ်။

Source:Goal

CNI Sport News

 ၂၀၂၃ ခုနှစ်၊ ဩဂုတ် ၂၉

စပိန်ကွင်းလယ်လူ ဟာမိုဆိုကို နမ်းခဲ့တဲ့ဖြစ်ရပ်နဲ့ ပတ်သက်ပြီး စပိန်ဘောလုံးအဖွဲ့ချုပ်က ရူဘီယာလက်စ်ကို ဥက္ကဋ္ဌရာထူးကနေ နုတ်ထွက်ဖို့တောင်းဆိုပြီးနောက် ဖီဖာကလည်း ဘောလုံးနဲ့ ပတ်သက်ခွင့် ၁၅ နှစ်ကြာပိတ်ပင်ဖို့ စီစဉ်နေပါတယ်။

စပိန်ဘောလုံးအဖွဲ့ချုပ်အကြီးအကဲတွေဟာ ရူဘီယာလက်စ်ကို ရာထူးကနေ ချက်ချင်းနုတ်ထွက်ဖို့ တောင်းဆိုခဲ့ တာဖြစ်ပြီး သူ့ရဲ့ လက်ခံနိုင်စရာမရှိတဲ့ အပြုအမူဟာ စပိန်ဘောလုံးလောကကို ဆိုးရွားစွာထိခိုက်နိုင်စေတယ်လို့ ပြောခဲ့တာပါ။ အစောပိုင်းက စပိန်ဘောလုံးအဖွဲ့ချုပ်ဟာ ရူဘီယာလက်စ်ဘက်ကနေ ရပ်တည်ခဲ့ပေမယ့် ဖီဖာက စပိန်လက်ရွေးစင်တွေနဲ့ ကလပ်အသင်းတွေကို ပြိုင်ပွဲယှဉ်ပြိုင်ခွင့်ပိတ်ပင်နိုင်တယ်လို့ ပြောခဲ့တာကြောင့် ဆုံးဖြတ်ချက် ပြန်ပြောင်းခဲ့တာဖြစ်ပါတယ်။

ဖီဖာဟာ ရူဘီယာလက်စ်ကို ၁၅ နှစ်ကြာအထိ ပိတ်ပင်ဖို့ စီစဉ်နေတယ်လို့ စည်းကမ်းထိန်းသိမ်းရေးလုပ်ငန်းစဉ်မှာ ပါဝင်တဲ့ သတင်းရင်းမြစ်က Mail Sport ကို ပြောခဲ့တာပါ။ ဖီဖာဟာ ပြီးခဲ့တဲ့အပတ်ကမှ ရူဘီယာလက်စ်ကို ရက်ပေါင်း ၉၀ ကြာဘောလုံးနဲ့ ပတ်သက်ခွင့်ပိတ်ပင်တဲ့ ဆုံးဖြတ်ချက်ချမှတ်ထားတာဖြစ်ပါတယ်။ စပိန် ဘောလုံး အဖွဲ့ချုပ်ဟာ စပိန်အစိုးရရဲ့ ဝင်ရောက်စွက်ဖက်မှုတွေကြောင့် ကလပ်အသင်းတွေကို ဥရောပပြိုင်ပွဲ ဝင်ရောက် ယှဉ်ပြိုင်ခွင့်ပိတ်ပင်ဖို့အတွက် ဥရောပဘောလုံးအဖွဲ့ချုပ်ထံ တောင်းဆိုမှုပြုလုပ်ခဲ့ပါတယ်။

ဒါပေမယ့် ဖီဖာက စည်းကမ်းထိန်းသိမ်းရေးလုပ်ငန်းစဉ်တွေကို ဆောင်ရွက်နေခဲ့တာကြောင့် စပိန် ဘောလုံး အဖွဲ့ချုပ်ရဲ့တောင်းဆိုမှုကို ဥရောပဘောလုံးအဖွဲ့ချုပ်က ပယ်ချခဲ့တာပါ။ အဲဒါကြောင့် စပိန်ဘောလုံး အဖွဲ့ချုပ် အကြီးအကဲတွေဟာ သြဂုတ် ၂၈ ရက်က ၅ နာရီကျော်ကြာအစည်းအဝေးပြုလုပ်ပြီးနောက် ရူဘီယာလက်စ်ကို ရာထူးက နုတ်ထွက်ပေးဖို့ တောင်းဆိုခဲ့တယ်လို့ အတည်ပြုခဲ့တာဖြစ်ပါတယ်။

ဖီဖာရဲ့ ဥပဒေတွေကို စပိန်ဘောလုံးအဖွဲ့ချုပ်က လက်မခံဘူးဆိုရင်တော့ ဖီဖာနဲ့ ဆက်စပ်တဲ့ ပြိုင်ပွဲတွေမှာ စပိန်လက်ရွေးစင်အသင်းတွေနဲ့ ကလပ်တွေအားလုံးယှဉ်ပြိုင်ခွင့်ပိတ်ပင်ခံရနိုင်တာပါ။ ဒီလိုပိတ်ပင်မယ်ဆိုရင် ဥရောပဘောလုံးအဖွဲ့ချုပ်အတွက်လည်း ကြီးမားတဲ့ထိုးနှက်ချက် ဖြစ်လာနိုင်ပါတယ်။ 

ရူဘီယာလက်စ်ရဲ့ မိခင်ကတော့ သားဖြစ်သူအပေါ်စွပ်စွဲချက်တွေကို ဘုရားကျောင်းတစ်ခုမှာ အစာငတ်ခံ ဆန္ဒပြနေတယ်လို့ သတင်းတွေမှာ ဖော်ပြထားပါတယ်။

Source:DailyMail