CNI Sport News

၂၀၂၃ ခုနှစ်၊ မတ်လ ၂၈

အင်ဒိုနီးရှားနိုင်ငံမှာ ကျင်းပမယ့် ယူ-၂၀ ကမ္ဘာ့ဖလားပြိုင်ပွဲမှာ အစ္စရေး ပါဝင်နေတဲ့အပေါ် ကန့်ကွက် ဆန္ဒပြမှုတွေ ပြုလုပ်နေတာကြောင့် အင်ဒိုနီးရှားဘောလုံးအဖွဲ့ချုပ်ဟာ ဖီဖာနဲ့ တွေ့ဆုံ ဆွေးနွေးမှု ပြုလုပ်ဖို့ စီစဉ်နေပါတယ်။

ဒီလို ကန့်ကွက် ဆန္ဒပြမှုတွေကြောင့် ပြိုင်ပွဲအတွက် မဲခွဲမှုပြုလုပ်မယ့် အစီအစဉ်ကို ရွှေ့ဆိုင်းခဲ့ရတာပါ။

အင်တာမီလန်အသင်းရဲ့ ဥက္ကဋ္ဌဟောင်းဖြစ်တဲ့ လက်ရှိ အင်ဒိုနီးရှား ဘောလုံးအဖွဲ့ချုပ်ဥက္ကဋ္ဌဖြစ်တဲ့ အဲရစ်သိုဟီရာ ဟာ ဆွေးနွေးမှုတွေ ပြုလုပ်ဖို့ ဇူးရစ်ကို သွားရောက်မှာ ဖြစ်တယ်လို့ အင်ဒိုနီးရှား ဘောလုံးအဖွဲ့ချုပ် အမှုဆောင် ကော်မတီ အဖွဲ့ဝင် အာရီယာက ပြောပါတယ်။

လေယာဉ်ပျံသန်းမှု အစီအစဉ်တွေကို ပြုလုပ်နေဆဲဖြစ်ကြောင်းနဲ့ ဖီဖာတာဝန်ရှိသူ ဘယ်သူနဲ့ တွေ့ဆုံ မလဲဆိုတာ ကိုတော့ အာရီယာက ပြောကြားခဲ့ခြင်း မရှိပါဘူး။

အင်ဒိုနီးရှားနိုင်ငံဟာ အခုနှစ် မေလ ၂၀ ရက်ကနေ ဇွန်လ ၁၁ ရက်အထိ ၂၄ သင်း ပါဝင်တဲ့ ယူ-၂၀ ကမ္ဘာ့ဖလား ပြိုင်ပွဲကို အိမ်ရှင်အဖြစ် လက်ခံကျင်းပသွားမှာ ဖြစ်ပါတယ်။

ဒါပေမယ့် ပြိုင်ပွဲမှာ အစ္စရေး ပါဝင်လာတဲ့အပေါ် ကန့်ကွက်ဆန္ဒပြ ခဲ့ကြတာကြောင့် အင်ဒိုနီးရှား ဘောလုံးအဖွဲ့ ချုပ်ဟာ မဲခွဲမှု အစီအစဉ်ကို ဖျက်သိမ်းခဲ့တယ်လို့ တနင်္ဂနွေနေ့က ပြောခဲ့ပါတယ်။

အင်ဒိုနီးရှား ဘောလုံးအဖွဲ့ချုပ်ဥက္ကဋ္ဌ အဲရစ်သိုဟီရာကိုတွေ့ရစဉ်

ဘာလီ အုပ်ချုပ်ရေးမှူး ဝါရမ်ကိုစတာက ပါလက်စတိုင်းနဲ့ ပဋိပက္ခကြောင့် အစ္စရေးကို ဘာလီမှာ ဝင်ရောက် ယှဉ်ပြိုင်ခြင်း မပြုအောင် တားမြစ်တဲ့ မူဝါဒချမှတ်ဖို့ လူငယ်နဲ့ အားကစားဝန်ကြီးဌာနကို တိုက်တွန်းခဲ့တာပါ။

ဒါနဲ့ ပတ်သက်ပြီး မှတ်ချက်ပေးဖို့ တောင်းဆိုတာကို ကိုစတာရဲ့ရုံးက ချက်ချင်း တုန့်ပြန်ခြင်းမရှိခဲ့ဘဲ အစိုးရရဲ့ ရပ်တည်ချက်ကို လိုက်နာနေတယ်လို့ တနင်္လာနေ့က မီဒီယာတွေထံ ပြောခဲ့ပါတယ်။

အင်ဒိုနီးရှားဟာ အစ္စရေးနဲ့ တရားဝင် သံတမန် ဆက်ဆံရေး မရှိတဲ့အတွက် မကြာသေးခင်က ဆန္ဒပြသူတွေဟာ ဂျကာတာထံ ချီတက်ဆန္ဒပြခဲ့ကြပြီး အစ္စရေးကို ဒီပြိုင်ပွဲမှာ ပါဝင်ခွင့်မပြုဖို့ တောင်းဆိုခဲ့တာပါ။

ရိုက်တာ သတင်းဌာနကတော့ ဒီအဖြစ်အပျက်နဲ့ ပတ်သက်ပြီး မှတ်ချက်ပေးဖို့ အစ္စရေးအက်ဖ်အေထံ ဆက်သွယ် ခဲ့တယ်လို့ သတင်းမှာ ဖော်ပြထားတာ ဖြစ်ပါတယ်။ ဒီလိုမဲခွဲမှုကို ဖျက်သိမ်းခဲ့တဲ့အတွက် အင်ဒိုနီးရှားဟာ ပြိုင်ပွဲ ကျင်းပခွင့် ဆုံးရှုံးသွားနိုင်သလို အားကစားပြိုင်ပွဲတွေ ယှဉ်ပြိုင်ခွင့်ကနေ ထပ်ပြီး ပိတ်ပင်ခံရနိုင်တာပါ။

အင်ဒိုနီးရှားဟာ အစိုးရ ဝင်ရောက် စွက်ဖက်မှုကြောင့် ဖီဖာက ၂၀၁၆ ခုနှစ်၊ မေလအထိ ပြိုင်ပွဲဝင်ရောက် ယှဉ်ပြိုင် ခွင့် တစ်နှစ်ကြာ ဆိုင်းငံ့ခဲ့တာ ဖြစ်ပါတယ်။

အင်ဒိုနီးရှား ဘောလုံးအဖွဲ့ချုပ်ကတော့ အစိုးရနဲ့ ဆွေးနွေးမှုပြုလုပ်ပြီး အဖြေတစ်ခု ရနိုင်ဖို့လည်း မျှော်လင့်နေ တယ်လို့ သိရပါတယ်။

Source: CNA

CNI Sport News

၂၀၂၃ ခုနှစ်၊ မတ်လ ၂၈

အီတလီလူမျိုးနည်းပြ ကွန်တီဟာ အသင်းနဲ့ အတူတူသွားနေတဲ့ ခရီးစဉ်က ပြီးဆုံးသွားပြီလို့ အင်စတာဂရမ်မှာ ရေးသားကာ စပါးနဲ့ပရိသတ်တွေကို နှုတ်ဆက်လိုက်ပါတယ်။

ကွန်တီက “ဘောလုံးက စိတ်အားထက်သန်မှုပါ။ကျနော့်ရဲ့ စိတ်အားထက်သန်မှု၊ နည်းပြတစ်ဦးအနေနဲ့ ကျနော့်ရဲ့ ပြင်းပြတဲ့ ဘောလုံးနေထိုင်မှုပုံစံကို တန်ဖိုးထားပြီး မျှဝေပေးတဲ့ စပါးအသင်းမှာရှိတဲ့ အားလုံးကို ကျေးဇူးတင် တယ်လို့ ပြောချင်ပါတယ်။ကျနော့်ကို အမြဲတမ်းထောက်ခံအားပေးပြီး ကျနော့်ရဲ့နာမည်ကို ပရိသတ်တွေ သီဆို နေတာ ကြားရတာဟာ မမေ့နိုင်စရာအရာပါပဲ။အခုတော့ အတူတူသွားနေတဲ့ ခရီးစဉ်က ပြီးဆုံးသွားပါပြီ။ အနာဂတ်မှာ အားလုံးအဆင်ပြေဖို့ ကျနော်ဆန္ဒပြုကြောင်း” ရေးသားထားတာပါ။

ကွန်တီဟာ စပါးအသင်းကို ၁၆ လကြာ ကိုင်တွယ်အပြီးမှာ အသင်းနဲ့နှစ်ဦးသဘောတူညီမှုနဲ့ ထွက်ခွာခဲ့တာ ဖြစ်ပါ တယ်။ဆောက်သမ်တန်အသင်းနဲ့ စပါးအသင်းတို့ ၃ ဂိုးစီ သရေကျခဲ့တဲ့ ပရီးမီးယားလိဂ်ပွဲအပြီးမှာ ကွန်တီဟာ ဒေါသထွက်ပြီး ကစားသမားတွေနဲ့အသင်းကို သတင်းစာရှင်းလင်းပွဲမှာ ပြင်းပြင်းထန်ထန် ဝေဖန်ခဲ့တာပါ။ စပါး အသင်းဟာ ဒီပွဲမှာ ၃ ဂိုး- ၁ ဂိုးနဲ့ ဦးဆောင်နေခဲ့ပေမယ့် ပွဲအပြီးမှာ သရေရလဒ်ထွက်ပေါ်ခဲ့တဲ့အပေါ် ကွန်တီက စိတ်ပျက်ခဲ့တာ ဖြစ်ပါတယ်။

ကွန်တီက ကစားသမားတွေဟာ တစ်ကိုယ်ကောင်းဆန်တယ်လို့ တံဆိပ်ကပ်ခဲ့သလို အသင်းရဲ့ယဉ်ကျေးမှုကို လည်း ပြင်းပြင်းထန်ထန် ဝေဖန်ခဲ့တာပါ။စပါးအသင်းနဲ့ ကွန်တီတို့ ချုပ်ဆိုထားတဲ့စာချုပ်ဟာ ရာသီအကုန်မှာ ကုန်ဆုံးမှာဖြစ်ပေမယ့် ဒီလိုပြောဆိုမှုတွေကြောင့် လန်ဒန်ကလပ်ဟာ ရာသီအကုန်ထိ မစောင့်ဆိုင်းတော့ဘဲ နှစ်ဦးသဘောတူညီမှုနဲ့ ထွက်ခွာခွင့်ပေးခဲ့တာဖြစ်ပါတယ်။စပါးအသင်းဟာ ကွန်တီရဲ့နေရာမှာ သူ့ရဲ့လက်ထောက် နည်းပြဖြစ်တဲ့ စတယ်လီနီကို ရာသီအကုန်ထိ ခန့်အပ်ခဲ့တာပါ။

စပါးအသင်းဟာ ရာသီအကုန်မှာတော့ နည်းပြသစ်ခန့်အပ်နိုင်ဖို့ အခုကတည်းက ရှာဖွေမှုတွေပြုလုပ်နေတာ ဖြစ်ပြီး ဘိုင်ယန်မြူးနစ်နည်းပြဟောင်း နာဂျယ်လ်စမန်း၊ အသင်းနည်းပြဟောင်း ပိုချက်တီနိုနဲ့ စပိန်နည်းပြဟောင်း အင်းနရစ်တို့ ၃ ဦးထဲက ၁ ဦးက နည်းပြသစ်ဖြစ်လာဖို့ ရေပန်းစားနေတာဖြစ်ပါတယ်။လန်ဒန်ကလပ်ဟာ ပရီးမီးယားလိဂ်အမှတ်ပေးဇယားရဲ့ အဆင့် ၄ နေရာမှာ ရပ်တည်နေတာကြောင့် လာမယ့်ရာသီ ချန်ပီယံလိဂ် ဝင်ခွင့်ရဖို့ကို အဓိက ပစ်မှတ်ထားနေတာပါ။
စပါးအသင်းဟာ ဒီတစ်ပတ်ပရီးမီးယားလိဂ်ပွဲစဉ်အဖြစ် တန်းဆင်းဇုန်က လွတ်မြောက်ဖို့ ကြိုးစားနေတဲ့ အဲဗာတန် အသင်းနဲ့ ဧပြီလ ၃ ရက်မှာ ယှဉ်ပြိုင်သွားမှာဖြစ်ပါတယ်။

Source:Besoccer

CNI Sport News

၂၀၂၃ ခုနှစ်၊ မတ်လ ၂၈

တောင်အမေရိကဘောလုံးအဖွဲ့ချုပ်(CONMEBOL)ဟာ အာဂျင်တီးနားအသင်းကို ၂၀၂၂ ကမ္ဘာ့ဖလားရရှိအောင် ဦးဆောင်ပေးနိုင်ခဲ့တဲ့ မက်ဆီကို သူ့ရဲ့ပုံတူရုပ်တုပြုလုပ်ပြီး ဂုဏ်ပြုခဲ့ပါတယ်။

တောင်အမေရိကဘောလုံးအဖွဲ့ချုပ်ဟာ တနင်္လာနေ့က မက်ဆီကို ရုပ်တုထုလုပ်ပေးခဲ့တာဖြစ်ပြီး အဆိုပါရုပ်တုကို ဂန္တဝင်ကစားသမားတွေဖြစ်တဲ့ ပီလီ၊ မာရာဒိုနာတို့နဲ့အတူ အဖွဲ့ချုပ်ရဲ့ ပြတိုက်မှာ ထားရှိသွားမှာပါ။ ကိုပါလီ ဘာတေးဒိုးစ်ပြိုင်ပွဲအတွက် မဲခွဲမှုပြုလုပ်တဲ့ အခမ်းအနားမှာ မက်ဆီဟာ ကမ္ဘာ့ဖလားနဲ့ Finalissima ဆုဖလား ပုံတူတွေကိုလည်း ရရှိခဲ့ပါတယ်။မက်ဆီရဲ့ လက်ရွေးစင်အသင်းဖော်တွေနဲ့ နည်းပြ စကာလိုနီတို့ဟာ ဘရာဇီးလ် အသင်းကို အနိုင်ရပြီး ရရှိခဲ့တဲ့ ၂၀၂၁ ကိုပါအမေရိကဖလား အပါအဝင် ဆုဖလားအသေးစားတွေကို ရရှိခဲ့တာပါ။

မက်ဆီက “ကျနော်တို့ဟာ အလွန်ထူးခြားစွာနေထိုင်ကြပြီး လှပတဲ့အခိုက်အတန့်တွေနဲ့ ချစ်ခြင်းမေတ္တာ အများ အပြားကို ရယူနေကြပါတယ်။ကမ္ဘာ့ဖလားကို တောင်အမေရိက အသင်းတစ်သင်းထပ်မံရယူဖို့ အချိန်တန်ပါပြီ”လို့ ပြောခဲ့တာဖြစ်ပါတယ်။

ဒါ့အပြင် တောင်အမေရိက ဘောလုံးအဖွဲ့ချုပ် ဥက္ကဋ္ဌက မက်ဆီထံ ဘောလုံးရဲ့ ကျိုင်းတုတ်ကို ပေးအပ်ခဲ့ပြီး ဘောလုံးလောကရဲ့ခေါင်းဆောင်အဖြစ် အသိအမှတ်ပြုကြောင်း ကြေညာခဲ့တာပါ။ အသက် ၃၅ နှစ်အရွယ်ရှိ မက်ဆီဟာ မကြာသေးခင်ကလည်း အာဂျင်တီးနားဘောလုံးအဖွဲ့ချုပ်က နိုင်ငံရဲ့ ဘောလုံးလေ့ကျင့်ရေးစခန်းကို သူ့ရဲ့နာမည်ပြောင်းပြီး ဂုဏ်ပြုခြင်းခံခဲ့ရပါတယ်။အဲဒါကြောင့် အခုရက်သတ္တပတ်ဟာ မက်ဆီအတွက် ပြီးပြည့်စုံတဲ့ ရက်သတ္တပတ်ဖြစ်ခဲ့ရတာပါ။

အာဂျင်တီးနားအသင်းဟာ ၂၀၂၂ ကမ္ဘာ့ဖလားပြိုင်ပွဲမှာ ချန်ပီယံဆုရယူပြီးနောက် ပထမဆုံးပွဲစဉ်အဖြစ် ပြီးခဲ့တဲ့ ကြာသပတေးနေ့က ပနားမားအသင်းနဲ့ ခြေစမ်းပွဲကစားခဲ့တာမှာ ၂ ဂိုး- ဂိုးမရှိနဲ့ အနိုင်ရရှိခဲ့ပါတယ်။ဒီပွဲမှာ မက်ဆီ ဟာ ပြစ်ဒဏ်ဘောကန်သွင်းချက်ကနေ တိုက်ရိုက်ဂိုးသွင်းပြီး ကစားသမားဘ၀ သွင်းဂိုး ၈၀၀ ပြည့်မြောက် ခဲ့တာပါ။အာဂျင်တီးနားအသင်းဟာ မတ်လ ၂၉ ရက်မှာ ခြေစမ်းပွဲအဖြစ် ကူရာကာအိုအသင်းနဲ့ ယှဉ်ပြိုင်ဖို့ ရှိနေပါတယ်။

မက်ဆီဟာ ဒီ ခြေစမ်းပွဲအပြီးမှာတော့ ကလပ်အသင်းပွဲစဉ်တွေ ပြန်ကစားဖို့ ပီအက်စ်ဂျီအသင်းနဲ့ ပူးပေါင်းရမှာပါ။ ပီအက်စ်ဂျီအသင်းဟာ ဒီတစ်ပတ်မှာတော့ လီဂူးဝမ်းပွဲစဉ်အဖြစ် လိုင်ယွန်အသင်းနဲ့ အိမ်ကွင်းပွဲစဉ် ယှဉ်ပြိုင်ရမှာ ဖြစ်ပါတယ်။

Source:AP

CNI Sport News

၂၀၂၃ ခုနှစ်၊ မတ်လ ၂၅

ရီးရယ်လ်ကနေ ထွက်ခွာပြီး အာဆင်နယ်အသင်းထံ ပြောင်းရွှေ့ရမယ့်အချိန် ဗြိတိန်ကိုသွားမယ့် လေယာဉ်ပေါ်မှာ ငိုကြွေးခဲ့တယ်လို့ အိုဇေးလ်က ပြောခဲ့ပါတယ်။

အိုဇေးလ်က “ ကျနော် ရီးရယ်လ်ကနေ ထွက်ခွာချိန်တုန်းက အလွန်ဝမ်းနည်းခဲ့ပါတယ်။ ကျနော်ဟာ မက်ဒရစ် ကနေ လေယာဉ်ထွက်ခွာမယ့် အချိန်မှာ စပြီး ငိုကြွေးတော့တာပါပဲ။ ကျနော်ဟာ ရီးရယ်လ်မှာ တကယ်ကို ပျော်ရွှင် ခဲ့ပေမယ့် ဒီလိုမျိုး ဖြစ်သွားခဲ့ပါတယ်။ ကျနော်ဟာ ရာသီအစမှာ ကစားချိန် မရရှိတော့တဲ့အတွက် ပီရတ်ဇ်နဲ့ ကျနော့် အဖေ၊ အေးဂျင့်တို့ကြားထဲမှာ ပဋိပက္ခတွေ ဖြစ်ခဲ့ပါတယ်။ အဲဒါကြောင့် ကျနော်တို့ ကလပ်အသစ် ရှာဖွေ ခဲ့ရတယ်။ ဒါဟာ ခက်ခဲခဲ့ပါတယ်။ လေယာဉ်ပေါ်ရောက်တဲ့ အချိန်မှာ ကျနော့်ရဲ့ မျက်လုံးထဲကနေ မျက်ရည်တွေ စီးကျလာခဲ့ပြီး ဒါဟာ ပြီးသွားပြီဆိုတာကို ကျနော် သဘောပေါက်ခဲ့ပါတယ်”လို့ စပိန်သတင်းစာ မာကာကို ပြောခဲ့တာပါ။

အိုဇေးလ်ဟာ ၂၀၁၃ မှာ ရီးရယ်လ်အသင်းကနေ ထွက်ခွာပြီး အာဆင်နယ်အသင်းထံ ပြောင်းရွှေ့လာခဲ့တာဖြစ်ပြီး လန်ဒန်ကလပ်မှာ ၈ နှစ်ကြာရှိခဲ့ကာ အသင်းကို အက်ဖ်အေဖလား ၄ ကြိမ် ရရှိအောင် ကူညီပေးနိုင်ခဲ့ပါတယ်။

အိုဇေးလ်နဲ့ အာတီတာကိုတွေ့ရစဉ်

ဒါပေမယ့် အိုဇေးလ်ဟာ နည်းပြ အာတီတာ လက်ထက်မှာ ပွဲကစားခွင့်ရဖို့ ရုန်းကန်ခဲ့ရတာနဲ့အတူ ၂၀၂၁ မှာ ထွက်ခွာကာ တူရကီကလပ် ဖီနာဘာချီအသင်းထံ ပြောင်းရွှေ့ခဲ့တာပါ။

ဂျာမနီ ကစားသမားဟောင်းဟာ တူရကီကလပ် အသင်းတွေဖြစ်တဲ့ ဖီနာဘာချီနဲ့ အစ္စတန်ဘူလ် ဘာဆက်ဆီဟာ အသင်းတွေမှာ ကစားခဲ့ပြီးနောက် အသက် ၃၄ နှစ်အရွယ်မှာ ကစားသမားဘဝကို အဆုံးသတ်ခဲ့တာ ဖြစ်ပါတယ်။ အိုဇေးလ်ဟာ ဂျာမနီအသင်းနဲ့အတူ ၂၀၁၄ ကမ္ဘာ့ဖလား ရယူနိုင်ခဲ့တာ အပါအဝင် ကစားသမားဘဝမှာ အောင်မြင် မှု အများအပြား ရယူနိုင်ခဲ့တာပါ။

အိုဇေးလ်ဟာ ကစားသမားဘဝကနေ အနားယူဖို့ ဆုံးဖြတ်ပြီးပြီ ဖြစ်ပေမယ့် နောက်ထပ် ခြေလှမ်းနဲ့ ပတ်သက်ပြီး ရှင်းရှင်းလင်းလင်း မသိရသေးပါဘူး။ ဒါပေမယ့် ဂျာမနီ ကစားသမားဟောင်းဟာ နည်းပြလောကထဲကို ဝင်ရောက် မလားဆိုတာကတော့ စောင့်ကြည့်ရဦးမှာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ မတ်လ ၂၅

အင်္ဂလန်အသင်းဟာ ပြီးခဲ့တဲ့ အဓိကပြိုင်ပွဲတွေမှာ တိုးတက်မှုတွေ ရရှိပြီးနောက် လာမယ့်နှစ် ယူရိုပြိုင်ပွဲမှာ အနိုင် မရဘူးဆိုရင် ကျရှုံးမှုဖြစ်လိမ့်မယ်လို့ နောက်ခံလူ မက်ဂွဲယားက ပြောလိုက်ပါတယ်။

မက်ဂွဲယားက “ကျနော်တို့မှာ အနိုင်ရနိုင်အောင် လုပ်နိုင်တဲ့ ကစားသမားတွေ ရှိတယ်ဆိုတာ ကျနော် ယုံကြည်ပါ တယ်။ ကျနော်တို့ ပြိုင်ပွဲကြီးကို အနိုင်မရဘူးဆိုရင်တော့ ကျရှုံးသွားပြီလို့ အတွေးထဲမှာ ရှိနေပါတယ်။ ကျနော် အဓိက ပြိုင်ပွဲကြီး ၃ ခုကို ရောက်ပြီးသွားပါပြီ။ နောက်ထပ် တစ်ခုကလည်း နီးစပ်လာပါပြီ”လို့ ပြောခဲ့တာပါ။

မက်ဂွဲယားဟာ နည်းပြ ဆောက်ဂိတ် လက်ထက်မှာ အင်္ဂလန်အသင်းရဲ့ အဓိက ဗဟိုနောက်ခံလူအဖြစ် သတ်မှတ် ခံထားရပြီး ပြင်သစ်အသင်းကို အရေးနိမ့်ကာ ကွာတားဖိုင်နယ်ကနေ ထွက်ခွာခဲ့ရတဲ့ ၂၀၂၂ ကမ္ဘာ့ဖလားပြိုင်ပွဲမှာ ပွဲတိုင်း ပါဝင်ခဲ့ရတာ ဖြစ်ပါတယ်။

ဒါအပြင် ယူနိုက်တက် အသင်းခေါင်းဆောင်ဟာ ၂၀၁၈ ကမ္ဘာ့ဖလားပြိုင်ပွဲ ဆီမီးဖိုင်နယ်နဲ့ ယူရို ၂၀၂၀ ဗိုလ်လုပွဲ တက်နိုင်ခဲ့တဲ့ အင်္ဂလန်အသင်းမှာလည်း အစိတ်အပိုင်းအဖြစ် ပါဝင်ခဲ့တာပါ။

အဲဒါကြောင့် မက်ဂွဲယားဟာ အင်္ဂလန်အသင်းနဲ့အတူ အဓိကပြိုင်ပွဲကြီး ၄ ခုအဖြစ် ဝင်ရောက်ယှဉ်ပြိုင်ခွင့်ရမယ့် ယူရို ၂၀၂၄ ပြိုင်ပွဲမှာ အောင်မြင်မှု ရယူနိုင်ဖို့ ပစ်မှတ်ထားနေတာ ဖြစ်ပါတယ်။ လက်ရှိအချိန်မှာ အင်္ဂလန်အသင်း ဟာ ယူရို ၂၀၂၄ ခြေစစ်ပွဲအုပ်စု အဖွင့်ပွဲစဉ်အဖြစ် အီတလီအသင်းနဲ့ ကစားထားတာမှာ ၂ ဂိုး- ၁ ဂိုးနဲ့ အနိုင်ရရှိထား တာပါ။

မက်ဂွဲယားကိုတွေ့ရစဉ်

မက်ဂွဲယားက “ကျနော်တို့ဟာ ခက်ခဲတဲ့ အုပ်စုကနေ အရင်ဆုံး ခြေစစ်ပွဲ အောင်မြင်အောင်လုပ်ဖို့ လိုအပ်ပါတယ်။ အခုအချိန်မှာ ကျနော်တို့ဟာ အီတလီအသင်းကို အနိုင်ရပြီး အံ့သြစရာကောင်းတဲ့ ရလဒ်တစ်ခုကို ရရှိခဲ့ပါတယ်။ ကျနော်တို့ဟာ ကောင်းမွန်တဲ့ နေရာမှာ ရှိနေပါတယ်။ ပြီးခဲ့တဲ့ ကမ္ဘာ့ဖလားပြိုင်ပွဲမှာဆို ကျနော်တို့ တကယ်ကို ကောင်းမွန်စွာ ကစားနိုင်ခဲ့ကြတယ်လို့ ထင်ပါတယ်။ ဒါပေမယ့် ကောင်းမွန်တဲ့ ပြင်သစ်အသင်းနဲ့ ကစားခဲ့တာမှာ တော့ အရေးနိမ့်ခဲ့ပါတယ်”လို့ ပြောခဲ့တာ ဖြစ်ပါတယ်။

မက်ဂွဲယားဟာ ဒီရာသီ ယူနိုက်တက်အသင်းမှာ ဗာရန်းနဲ့ လီဆန်ဒရိုမာတီးနတ်ဇ်တို့ရဲ့ ခြေစွမ်းပြမှုတွေကြောင့် ပုံမှန်ကစားခွင့်ရဖို့ ရုန်းကန်နေရပေမယ့် အင်္ဂလန်အသင်းမှာတော့ ပုံမှန်ပွဲထွက်ခွင့် ရရှိနေတာပါ။

အင်္ဂလန်အသင်းဟာ တနင်္ဂနွေနေ့မှာ ယူကရိန်းအသင်းနဲ့ ယူရို ၂၀၂၄ ခြေစစ်ပွဲ ဆက်လက် ယှဉ်ပြိုင်ရမှာ ဖြစ်ပါတယ်။

Source:CNA

CNI Sport News

၂၀၂၃ ခုနှစ်၊ မတ်လ ၂၅

ဆွီဒင်အသင်းကို အနိုင်ရခဲ့တဲ့ ယူရို ၂၀၂၄ ခြေစစ်ပွဲမှာ ဘယ်လ်ဂျီယံ အသင်းအတွက် ဟတ်ထရစ်ဂိုး သွင်းယူပြီး နောက် တိုက်စစ်မှူး လူကာကူက ဒါဟာလူတိုင်းအတွက် အသစ်စတင်တာလို့ ပြောခဲ့ပါတယ်။

လူကာကူက “ကျနော် အသင်းအတွက် ဘာတွေ ယူဆောင်လာနိုင်မလဲ ဆိုတာကို ကျနော်သိပါတယ်။ ဒါဟာ ရှုပ်ထွေးတဲ့ ပွဲတစ်ပွဲဖြစ်ခဲ့ပြီး လူငယ်တွေကို အတက်နိုင်ဆုံး ကူညီဖို့ ကြိုးစားခဲ့ပါတယ်။ သူတို့တွေ အသက် ငယ်ငယ် ရွယ်ရွယ်နဲ့ ကြုံတွေ့လာရတဲ့ အလားအလာတွေကို မြင်တွေ့ရတာ ကျနော် ပျော်ရွှင်မိပါတယ်။ ကောင်းမွန်စွာ စတင်ဖို့က အရေးကြီးပါတယ်။ လူတိုင်းအတွက် အသစ်စတင်တာဆိုပြီး အဝတ်လဲခန်းထဲမှာ ကျနော် ပြောခဲ့ပါတယ်။ အခုအချိန်မှာ ကျနော်တို့ဟာ အပေါင်းလက္ခဏာဆောင်ပြီး အရှေ့ကို ဆက်သွားရမှာပါ”လို့ RTBF ကို ပြောခဲ့တာပါ။

ဒီပွဲမှာ ဘယ်လ်ဂျီယံအသင်းဟာ ဆွီဒင်အသင်းကို ၃ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး ၃ ဂိုးစလုံးကို လူကာကူက သွင်းယူခဲ့တာပါ။

၂၀၂၁ ခုနှစ်၊ အောက်တိုဘာလ ကတည်းက ဘယ်လ်ဂျီယံအတွက် ဂိုးမသွင်းနိုင်ခဲ့တဲ့ လူကာကူအတွက်တော့ ဟတ်ထရစ်သွင်းပြီး ဂိုးပေါက် ပျောက်ဆုံးမှုကို အဆုံးသတ်ခဲ့တာလည်း ဖြစ်ပါတယ်။ ဘယ်လ်ဂျီယံ အသင်းဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲမှာ အုပ်စုကနေ ထွက်ခဲ့ရပြီးနောက် နည်းပြသစ်အဖြစ် တာဒတ်စကိုကို ခန့်အပ်ခဲ့ တာပါ။

ဘယ်လ်ဂျီယံအသင်း နည်းပြသစ်အဖြစ် ပထမဆုံးပွဲ ကိုင်တွယ်ခဲ့တဲ့ တာဒတ်စကို အတွက်လည်း ပွဲဦးထွက်ကို နိုင်ပွဲရယူနိုင်ခဲ့တာပါ။ တာဒတ်စကိုကတော့ ရလဒ်ကောင်းမွန်မှုအတွက် အသင်းစိတ်ဓါတ်ပိုင်းကို ချီးကျူးမှုတွေ ပြုလုပ်သွားခဲ့ပါတယ်။

အီဘရာဟီမိုဗစ်ကိုတွေ့ရစဉ်

တာဒတ်စကိုက “တကယ်ကို ကောင်းမွန်တဲ့ ရလဒ်ပါ။ ကွင်းထဲမှာရှိတဲ့ ကစားသမားတွေတင် မဟုတ်ဘဲ အရန်ခုံ မှာရှိတဲ့ ကစားသမားတွေဆီမှာလည်း ကောင်းမွန်တဲ့ စိတ်ဓါတ်ရှိတယ်လို့ ခံစားခဲ့ရပါတယ်။ တကယ်ကို စည်းလုံး ညီညွတ်တဲ့ စိတ်ဓါတ်ပါပဲ”လို့ ပြောခဲ့တာပါ။

ဒီပွဲမှာ လူစားဝင် ကစားသမားအဖြစ် ဝင်ရောက်ကစားခဲ့တဲ့ ဆွီဒင်အသင်းရဲ့ ဝါရင့်တိုက်စစ်မှူး အီဘရာဟီမိုဗစ် ဟာ ယူရိုခြေစစ်ပွဲ သမိုင်းတစ်လျှောက် အသက်အကြီးဆုံး ကစားသမားအဖြစ် မှတ်တမ်းတင် နိုင်ခဲ့ပါတယ်။

အီဘရာဟီမိုဗစ်ဟာ လက်ရွေးစင်အသင်းကို ကူညီနိုင်ဖို့ ကြိုးစားခဲ့ပေမယ့် ခြေစစ်ပွဲ အဖွင့်ပွဲစဉ်မှာ ရှုံးပွဲနဲ့ ကြုံတွေ့ ခဲ့ရတာပါ။

ဘယ်လ်ဂျီယံအသင်းဟာ ဒီပွဲအပြီးမှာ ဂျာမနီအသင်းနဲ့ ခြေစမ်းပွဲကစားမှာဖြစ်ပြီး ဆွီဒင်အသင်းကတော့ ယူရို ခြေစစ်ပွဲအဖြစ် အဇာဘိုင်ဂျန်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Brusselstimes

CNI News

၂၀၂၃ ခုနှစ်၊ မတ်လ ၂၅

နယ်သာလန်အသင်းနဲ့ ကစားခဲ့တဲ့ပွဲမှာ ပြင်သစ် အသင်းခေါင်းဆောင်အဖြစ် ပထမဆုံး တာဝန်ယူခဲ့ပြီးနောက် အသင်းခေါင်းဆောင် လက်ပတ်က ဘတ်ပီကို ပြောင်းလဲမှာ မဟုတ်ဘူးလို့ နည်းပြ ဒက်ချမ့်စ်က ပြောခဲ့ပါတယ်။

ဒက်ချမ့်စ်က “အသင်းခေါင်းဆောင် လက်ပတ်က သူ့ကို ပြောင်းလဲမှာ မဟုတ်ပါဘူး။ သူဟာ ဒီမှာ ပါဝင်နေပြီး သူ့ကိုယ်သူ ပျော်ရွှင်နေပါတယ်။ သူဟာ အသင်းဖော်တွေလိုပဲ အစွမ်းကုန် ကြိုးစားပါတယ်။ သူဟာ နေရာတွေ လည်း ပြောင်းကစားပြီး ဘယ်လို အစားထိုး ရမလဲဆိုတာကို သူသိပါတယ်။ သူဟာ အသင်းခေါင်းဆောင် ဖြစ်ပေ မယ့် ဒီလိုမျိုးပွဲတွေ ကစားဖူးပါတယ်။ အသင်းမှာရှိတဲ့ သူတွေလိုပဲ သူဟာ အလွန်ကောင်းတဲ့ပွဲကို ဖန်တီးနိုင်ခဲ့ပြီး နိုင်ပွဲရယူလိုတဲ့ ဆန္ဒရှိပါတယ်”လို့ ပြောခဲ့တာပါ။

ပြင်သစ်အသင်းဟာ ယူရို ၂၀၂၄ ခြေစစ်ပွဲအဖြစ် ကစားခဲ့တဲ့ ဒီပွဲမှာ နယ်သာလန်အသင်းကို ၄ ဂိုး- ဂိုးမရှိနဲ့ အနိုင်ရ ခဲ့ပြီး ဂိုးတွေကို ဘတ်ပီက ၂ ဂိုး၊ ဂရစ်ဇ်မန်းနဲ့ အူပါမီကာနိုတို့က သွင်းယူခဲ့ပါတယ်။

ဂရစ်ဇ်မန်း သွင်းယူတဲ့ အဖွင့်ဂိုးဆိုရင် ဘတ်ပီ ဖန်တီးပေးခဲ့တာ ဖြစ်ပါတယ်။ ဘတ်ပီဟာ ဒီပွဲမှာ ၂ ဂိုး သွင်းယူခဲ့တာ ကြောင့် ပြင်သစ်လက်ရွေးစင် အသင်းရဲ့ ဂိုးသွင်း အများဆုံး ကစားသမားစာရင်းမှာ ဘန်ဇီမာကို ကျော်ဖြတ်ပြီး နံပါတ် ၅ နေရာအထိ ရောက်ရှိလာခဲ့တာပါ။

ဘတ်ပီဟာ လက်ရှိအချိန်မှာ ပြင်သစ်အသင်းအတွက် ၃၈ ဂိုး သွင်းယူထားပြီး သူ့ရဲ့အထက်မှာ ပလာတီနီ၊ ဂရစ်ဇ်မန်း၊ အွန်နရီနဲ့ ဂီရော့ဒ်တို့ ရှိနေတာ ဖြစ်ပါတယ်။

ဘတ်ပီနဲ့ ဂရစ်ဇ်မန်း အောင်ပွဲခံနေကြစဉ်

ဘတ်ပီကို ပြင်သစ် အသင်းခေါင်းဆောင် တာဝန်ပေးခဲ့တာကြောင့် စိတ်ပျက်နေတယ်ဆိုပြီး သတင်းတွေ ထွက်နေ တဲ့ ဂရစ်ဇ်မန်းဟာ ဒီပွဲမှာ ဘတ်ပီနဲ့အတူ အောင်ပွဲခံပြီး သတင်းတွေကို တုန့်ပြန်သွားခဲ့တာပါ။

ဘတ်ပီက “ကျနော်တို့ဟာ ပရိသတ်တွေ စိတ်မပျက်စေဖို့အတွက် တစ်ပတ်လုံး ကောင်းမွန်စွာ ပြင်ဆင်ခဲ့ပါတယ်။ ဗိုလ်လုပွဲကလွဲပြီး ကမ္ဘာ့ဖလားမှာရှိခဲ့တဲ့ ကျနော်တို့ရဲ့ ပုံစံအတိုင်း လိုက်ပြီး လုပ်ချင်ခဲ့တာပါ။ ကျနော်တို့ အလွန် ပျော်ရွှင်ပါတယ်။ ကျနော်ဟာ ကိုယ့်အလုပ် ကိုယ်ဆက်လုပ်ပြီး အသင်းကို ကူညီမယ်။ ပြီးတော့ အသင်းကို ဒီထက် ပိုပြီး လုပ်ဆောင် နိုင်အောင် ကြိုးစားသွားမယ်။ ဒီနေ့ အလုပ်ဖြစ်ခဲ့ပေမယ့် ဒါက အစပဲရှိသေးတယ်”လို့ ပြောခဲ့ပါ တယ်။

ပြင်သစ်အသင်းဟာ တနင်္လာနေ့မှာ ယူရို ၂၀၂၄ ခြေစစ်ပွဲအဖြစ် အိုင်ယာလန်အသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ မတ်လ ၂၄

တရုတ်နိုင်ငံရှိ ထိပ်တန်းဘောလုံးတာဝန်ရှိသူ ၂ ဦးကို အကျင့်ပျက်ခြစားခြင်းဖြင့် ဥပဒေ ချိုးဖောက်မှုတွေနဲ့ ပတ်သက်ပြီး စုံစမ်းစစ်ဆေးမှုတွေ ပြုလုပ်နေတယ်လို့ နိုင်ငံရဲ့ အားကစားအာဏာပိုင်အဖွဲ့က မတ်လ ၂၄ ရက်က ပြောခဲ့ပါတယ်။

စုံစမ်းစစ်ဆေးခံရသူတွေကတော့ တရုတ်ဘောလုံးအဖွဲ့ချုပ်ရဲ့ ပြိုင်ပွဲဌာနအကြီးအကဲ ဟူအန်ဆောင်နဲ့ စည်းကမ်း ထိန်းသိမ်းရေးကော်မတီ အကြီးအကဲ ဝမ်ရှောင်ပင်တို့ ဖြစ်တယ်လို့ အားကစား အထွေထွေအုပ်ချုပ်ရေးရဲ့ ထုတ် ပြန်ချက်မှာ ဖော်ပြထားပါတယ်။

သူတို့တွေဟာ နိုဝင်ဘာလကတည်းက စုံစမ်းစစ်ဆေးခံနေရတဲ့ ထိပ်တန်းဘောလုံး တာဝန်ရှိသူတွေထဲမှာ နောက်ဆုံး ထွက်ပေါ်လာတဲ့သူတွေ ဖြစ်ပါတယ်။

သူတို့ ၂ ဦး မတိုင်ခင်က တရုတ်ဘောလုံးအဖွဲ့ချုပ် အကြီးအကဲ ချန်ဆုယူအန်နဲ့ လက်ရွေးစင်နည်းပြနဲ့ ပရီးမီးယား လိဂ် ဘောလုံးသမားဟောင်း လီတိုင်တို့ စုံစမ်းစစ်ဆေးခံခဲ့ရတာပါ။

စုံစမ်းစစ်ဆေးမှုတွေ ထုတ်ပြန်တဲ့ အချိန်မှာ စွပ်စွဲထားတဲ့ ပြစ်မှုတွေနဲ့ ပတ်သက်ပြီး အသေးစိတ် အချက်အလက် တွေကို ပြောကြားထားခြင်း မရှိပေမယ့် အဲဒီ စကားအသုံးအနှုန်းဟာ အကျင့်ပျက်ခြစားမှုအတွက် တရုတ်အစိုးရ အဖွဲ့အစည်းတွေက အသုံးပြုကြတဲ့ စကားဖြစ်တယ်လို့ သိရပါတယ်။

တရုတ် ဘောလုံးတာဝန်ရှိသူတစ်ဦးကို စစ်ဆေးနေစဉ် 

တရုတ်သမ္မတ ရှီကျင့်ဖျင်ဟာ ကမ္ဘာ့ဖလားပြိုင်ပွဲကို နိုင်ငံအတွင်းမှာ လက်ခံကျင်းပပြီး လက်ရွေးစင်အသင်း ကမ္ဘာ့ဖလား ဆုဖလား ကိုင်မြှောက်တာကို မြင်တွေ့ဖို့ မျှော်လင့်ထားတာပါ။

အဲဒါကြောင့် သမ္မတရှီကျင့်ဖျင် လက်မှတ်ထိုးထားတဲ့ အကျင့်ပျက်ခြစားမှု တိုက်ဖျက်ရေး တွန်းအားပေးမှုဟာ မကြာသေးခင် လတွေ အတွင်းမှာ နိုင်ငံအတွင်းမှာရှိတဲ့ အားကစားပွဲတွေဆီကို ရောက်ရှိလာခဲ့တာ ဖြစ်ပါတယ်။

ဒီလိုလုပ်ဆောင်မှုကနေ တရုတ်ထိပ်တန်းလိဂ် ၂ ခုမှာရှိတဲ့ ပရော်ဖက်ရှင်နယ် ကစားသမား အများအပြားကို အရေးယူမှုတွေ ပြုလုပ်ထားတယ်လို့ အမည်မဖော်လိုတဲ့ သတင်းရင်းမြစ်ကို ကိုးကားပြီး ဘဏ္ဍာရေးဆိုင်ရာ သတင်းအေဂျင်စီ Caixin က ကြာသပတေးနေ့က ဖော်ပြထားတာပါ။

ဒီကစားသမားတွေထဲမှာ တရုတ်စူပါလိဂ်ကလပ် ရှန်ဒေါင်းတိုင်ရှန်အသင်းမှာ ကစားနေတဲ့ တရုတ် လက်ရွေးစင် ကစားသမား ဂျင်ဒါဆိုလည်း ပါဝင်တယ်လို့ သိရပါတယ်။

Source: CNA

CNI Sport News

၂၀၂၃ ခုနှစ်၊ မတ်လ ၂၄

ယူနိုက်တက်တိုက်စစ်မှူး ရက်ရှ်ဖို့ဒ်ဟာ ကလပ်အသင်း ပိုင်ရှင်အသစ် အတည်မပြုခင် အချိန်အထိ အသင်းနဲ့ စာချုပ်သစ် ချုပ်ဆိုမယ့်ကိစ္စကို ရွှေ့ဆိုင်းဖို့ စီစဉ်နေတယ်လို့ သတင်းတွေမှာ ဖော်ပြထားပါတယ်။

ကလပ်အသင်းကို ရောင်းချဖို့ လုပ်ဆောင်နေတဲ့ ယူနိုက်တက်အသင်းဟာ လာမယ့် ရာသီအကုန်မှာ စာချုပ် သက်တမ်း ကုန်ဆုံးတော့မယ့် ရက်ရှ်ဖို့ဒ်ကို စာချုပ်သက်တမ်းတိုးဖို့ လုပ်ဆောင်နေတာပါ။

အင်္ဂလန်အသင်းရဲ့ တိုက်စစ်မှူးလည်းဖြစ်တဲ့ ရက်ရှိဖို့ဒ်ဟာ ပြီးခဲ့တဲ့ရာသီက ယူနိုက်တက်အသင်းမှာ ရုန်းကန် ခဲ့ရပေမယ့် ဒီရာသီမှာတော့ ခြေစွမ်းပြသနေပြီး ပြိုင်ပွဲစုံ ၄၄ ပွဲမှာ ၂၇ ဂိုးသွင်းပြီး ၉ ဂိုး ဖန်တီးထားပါတယ်။

အသက် ၂၅ နှစ်အရွယ်ရှိ ရက်ရှ်ဖို့ဒ်ဟာ သူ့ကစားသမားဘဝရဲ့ အကြီးမားဆုံး စာချုပ်ကို ချုပ်ဆိုနိုင်ဖို့ မျှော်လင့် ထားပေမယ့် ယူနိုက်တက်အသင်းဟာ စာချုပ်သစ်အတွက် တစ်ပတ်လုပ်ခပေါင် ၂၀၀,၀၀၀ ဝန်းကျင်သာပေးဖို့သာ ဆန္ဒရှိတယ်လို့ စပေါ့မေးလ်က ဇန်နဝါရီလတုန်းက ဖော်ပြခဲ့ပါတယ်။

ယူနိုက်တက်ကစားသမားကိုတွေ့ရစဉ်

ဒါဟာ အင်္ဂလန်ကြယ်ပွင့် ကစားသမားအတွက် အဆင်မပြေမှုတွေ ရှိခဲ့ပါတယ်။ ယူနိုက်တက်အသင်းဟာ ပြီးခဲ့တဲ့ နှစ်တွေက အသင်းမှာရှိတဲ့ အဓိက ကစားသမားတွေရဲ့ ဝင်ငွေတွေဟာ ကွာခြားမှု များပြားခဲ့တာကြောင့် အသင်း ဖော် အချင်းချင်း စိတ်ဝမ်းကွဲမှု မဖြစ်အောင် လစာကို အများကြီး မပေးဖို့ စီစဉ်ခဲ့တာပါ။

အဲဒါကြောင့် ရက်ရှ်ဖို့ဒ်ဟာ အသင်းပိုင်ရှင်အသစ် ဘယ်သူဖြစ်လာမလဲဆိုတာကို စောင့်ကြည့်နေပြီး လက်ရှိ အချိန် မှာ ကာတာက ရှိတ်ဂျာဆင်မ်နဲ့ ဗြိတိန်ဘီလျံနာ ရက်ကလစ်ဖ်တို့က အသင်းကို ဝယ်ယူနိုင်ဖို့အတွက် ကမ်းလှမ်းမှု တွေ ပြုလုပ်ထားတာ ဖြစ်ပါတယ်။

သူတို့တွေဟာ ယူနိုက်တက်အသင်းကို ဝယ်ယူနိုင်ခဲ့မယ်ဆိုရင် ကြီးကြီးမားမား သုံးစွဲမယ်လို့ ကတိပြုထားတာ ဖြစ်ပြီး ရက်ရှ်ဖို့ဒ်ကလည်း တစ်ပတ်ပေါင် ၂၀၀,၀၀၀ ထက် ပိုပြီး ရနိုင်ဖို့ မျှော်လင့်နေပါတယ်။

ရက်ရှ်ဖို့ဒ်ဟာ သူ့ရဲ့ ငယ်ဘဝ ကလပ်ဖြစ်တဲ့ ယူနိုက်တက်အသင်းမှာ ဆက်ပြီး နေချင်ပေမယ့် ပြင်သစ်ကလပ် ပီအက်စ်ဂျီအသင်းဟာ သူ့ကို ခေါ်ယူဖို့ စိတ်ဝင်စားနေပါတယ်။

အဲဒါကြောင့် မန်ချက်စတာကလပ်ဟာ သူတို့ရဲ့ အဓိက ကစားသမားဖြစ်တဲ့ ရက်ရှ်ဖို့ဒ်ကို ဆုံးရှုံးမှု မရှိရအောင် အမြန်ဆုံး စာချုပ်ချုပ်ဖို့ လုပ်ဆောင်နေတာပါ။ ရက်ရှ်ဖို့ဒ်ဟာ လက်ရှိအချိန်မှာ ဒဏ်ရာကြောင့် ယူရို ၂၀၂၄ ခြေစစ်ပွဲဝင်နေတဲ့ အင်္ဂလန်အသင်း လူစာရင်းကနေ နှုတ်ထွက်ထားပါတယ်။

Source: Daily Mail