CNI Sport News
၂၀၂၄ ခုနှစ်၊ အောက်တိုဘာ ၁
ပေါ်တူဂီအသင်းခေါင်းဆောင် ရော်နယ်ဒိုဟာ အယ်လ်နာဆာအသင်းက အယ်လ်ရေယန်အသင်းကို အနိုင်ရခဲ့တဲ့ အာရှချန်ပီယံလိဂ်ပြိုင်ပွဲမှာ သူသွင်းယူခဲ့တဲ့ဂိုးက ကွယ်လွန်သူ ဖခင်ဖြစ်သူအတွက်လို့ ပြောခဲ့ပါတယ်။
ရော်နယ်ဒိုက “ဒီနေ့ပွဲမှာ သွင်းယူတဲ့ဂိုးက မတူညီတဲ့ခံစားမှုဖြစ်ပြီး ကျနော့်ရဲ့ အဖေအတွက်ပါ။ သူသာ အသက်ရှင်နေသေးရင် ဒီနေ့က သူ့ရဲ့မွေးနေ့ပါ”လို့ ပွဲအပြီးမှာ ပြောခဲ့တာပါ။
ရော်နယ်ဒိုရဲ့ဖခင်ဟာ အရက်နဲ့ ဆက်စပ်တဲ့ အသည်းရောဂါကြောင့် ၂၀၀၅ ခုနှစ်မှာ ကွယ်လွန်ခဲ့တာ ဖြစ်ပါတယ်။
ရော်နယ်ဒိုရဲ့ ဖခင်သာဆက်ရှိမယ်ဆိုရင် အသက် ၇၁ နှစ်ပြည့် မွေးနေ့ဖြစ်တဲ့အတွက် အယ်လ်နာဆာအသင်း ခေါင်းဆောင်ဟာ ဂိုးသွင်းအပြီးမှာ ဖခင်အတွက် ရည်းစူးတဲ့ အောင်ပွဲခံမှုကို ပြုလုပ်ခဲ့တာပါ။
အယ်လ်နာဆာအသင်းဟာ အာရှချန်ပီယံလိဂ် ဒုတိယမြောက်ပွဲစဉ်အဖြစ် အယ်လ်ရေယန်အသင်းနဲ့ ကစားခဲ့တာ မှာ ၂ ဂိုး-၁ ဂိုးနဲ့ အနိုင်ရရှိခဲ့တာ ဖြစ်ပါတယ်။
အယ်လ်နာဆာအသင်းအတွက် ဂိုးတွေကို မာနေးနဲ့ ရော်နယ်ဒိုတို့က သွင်းယူခဲ့တာပါ။
ရော်နယ်ဒိုနဲ့ ဖခင်ဖြစ်သူကို တွေ့ရစဉ်
ဒီနိုင်ပွဲဟာ ဒီရာသီ အာရှချန်ပီယံလိဂ်ပြိုင်ပွဲမှာ အယ်လ်နာဆာအသင်းအတွက် ပထမဆုံးနိုင်ပွဲဖြစ်ခဲ့ပါတယ်။
အယ်လ်နာဆာအသင်းဟာ ချန်ပီယံလိဂ် အဖွင့်ပွဲစဉ်အဖြစ် အယ်လ်ရှောတာအသင်းနဲ့ ၁ ဂိုးစီ သရေကျခဲ့တဲ့ပွဲတုန်း က ရော်နယ်ဒိုဟာ ဗိုင်းရပ်စ်ကူးစက်မှုကြောင့် ပါဝင်နိုင်ခဲ့ခြင်းမရှိပါဘူး။
အယ်လ်နာဆာအသင်းဟာ နည်းပြ ပိုင်အိုလီ လက်ထက်မှာ နိုင်ပွဲဆက်နေပြီး ရော်နယ်ဒိုဟာ ဒီပွဲမှာသွင်းယူခဲ့တဲ့ ဂိုးကြောင့် ဒီရာသီ ဆော်ဒီကလပ်အတွက် ကစားထားတဲ့ ၈ ပွဲမှာ ၇ ဂိုးအထိ သွင်းယူထားတာပါ။
ပရော်ဖက်ရှင်နယ် ကစားသမားဘဝမှာ သွင်းဂိုး ၁,၀၀၀ ပြည့်ဖို့ ရည်မှန်းထားတဲ့ ရော်နယ်ဒိုအတွက် သွင်းဂိုးပေါင်း ၉၀၄ ဂိုးအထိလည်း ရှိသွားခဲ့ပြီဖြစ်ပါတယ်။
အယ်လ်နာဆာအသင်းဟာ ဒီတစ်ပတ် ဆော်ဒီပရိုလိဂ်ပွဲစဉ်အဖြစ် အယ်လ်အိုရိုဘက်အသင်းနဲ့ ယှဉ်ပြိုင်ရမှာပါ။
အယ်လ်နာဆာအသင်းဟာ ဒီရာသီ ဆော်ဒီပရိုလိဂ်ပြိုင်ပွဲမှာ ၅ ပွဲ ကစားထားပြီး ရမှတ် ၁၁ မှတ်နဲ့ အဆင့် ၄ နေရာ မှာ ရပ်တည်နေတာဖြစ်ပါတယ်။
Source: Goal
