CNI Sport News

၂၀၂၃ ခုနှစ်၊ နိုဝင်ဘာ ၁၇

ဘရိုက်တန်အသင်းဟာ ယူနိုက်တက်၊ ချယ်လ်ဆီးနဲ့ စပါးအသင်းတို့ရဲ့ ပစ်မှတ်ဖြစ်နေတဲ့ တိုက်စစ်မှူး အီဗန်ဖာဂူဆန်အတွက် ပြောင်းရွှေ့ကြေး ပေါင်သန်း ၁၀၀ ကျော်နဲ့ ကမ်းလှမ်းတဲ့ ကမ်းလှမ်းမှုတွေကိုသာ လက်ခံဖွယ်ရှိတယ်လို့ သိရပါတယ်။

အသက် ၁၉ နှစ်အရွယ်ရှိ အီဗန်ဖာဂူဆန်ဟာ ပရီးမီးယားလိဂ်ရဲ့ အတောက်ပဆုံး လူငယ်ကစားသမားတွေထဲမှာ တစ်ဦး အပါအဝင်အဖြစ် သတ်မှတ်ခံထားရပြီး ဒီရာသီ ပရီးမီးယားလိဂ်ပြိုင်ပွဲမှာ ၅ ဂိုး သွင်းယူထားတာပါ။

ဘရိုက်တန်အသင်းအတွက် ပြိုင်ပွဲစုံ ၄၅ ပွဲအထိ ပါဝင်ကစားထားပြီး ၁၅ ဂိုး သွင်းယူထားတဲ့ အီဗန်ဖာဂူဆန်ရဲ့ အလားအလာဟာ စိတ်လှုပ်ရှားဖို့ ကောင်းနေတာကြောင့် အသင်းကြီးတွေရဲ့ စောင့်ကြည့်ခြင်းကို ခံနေရတာ ဖြစ်ပါတယ်။

အီဗန်ဖာဂူဆန်ဟာ အိုင်ယာလန် လက်ရွေးစင်အသင်းအတွက် ၈ ပွဲ ပါဝင်ကစားထားပြီး ၃ ဂိုးသွင်းယူကာ နိုင်ငံ တကာ စင်မြင့်ထက်မှာလည်း အထင်ကြီးမှုတွေကို ရရှိနေတာပါ။

အီဗန်ဖာဂူဆန်ကို တွေ့ရစဉ်

အိုင်ယာလန်တိုက်စစ်မှူးကို ခေါ်ယူဖို့ ပရီးမီးယားလိဂ် ထိပ်သီးကလပ်တွေဖြစ်တဲ့ ယူနိုက်တက်၊ စပါးနဲ့ ချယ်လ်ဆီး အသင်းတို့က စိတ်ဝင်စားနေတာကြောင့် ဒီကစားသမားကို ခေါ်ယူမယ်ဆိုရင် ပြောင်းရွှေ့ကြေး ကြီးမားတဲ့ ပမာဏ ကို ပေးချေရဖွယ်ရှိနေတာ ဖြစ်ပါတယ်။

TalkSPORTS က ပြီးခဲ့တဲ့နွေရာသီကမှ ကွင်းလယ်လူ ကိုင်စီဒိုကို ပေါင် ၁၁၅ သန်းနဲ့ ချယ်လ်ဆီးအသင်းထံ ရောင်းချခဲ့တဲ့ ဘရိုက်တန်အသင်းဟာ တိုက်စစ်မှူး အီဗန်ဖာဂူဆန်အတွက် ပေါင်သန်း ၁၀၀ ကျော်နဲ့ ပိုမို ကောင်းမွန်တဲ့ ကမ်းလှမ်းမှုတွေကိုသာ စိတ်ဝင်စားမယ်လို့ ဖော်ပြခဲ့တာပါ။

အီဗန်ဖာဂူဆန်ဟာ ပြီးခဲ့တဲ့ ရက်သတ္တပတ်ကမှ ဘရိုက်တန်အသင်းနဲ့ ၂၀၂၉ ခုနှစ်အထိ သက်တမ်းတိုး စာချုပ်ချုပ် ဆိုခဲ့တာဖြစ်ပြီး စာချုပ်ထဲမှာ စာချုပ်ဖျက်သိမ်းကြေး ထည့်သွင်းထားခြင်း မရှိပါဘူး။

အဲ့ဒါကြောင့် ဘရိုက်တန်အသင်းအနေနဲ့ အိုင်ယာလန် တိုက်စစ်မှူးအတွက် အပြောင်းအရွှေ့ ဆွေးနွေးညှိနှိုင်းတာ မှာ သူတို့စိတ်ကြိုက် ပြောင်းရွှေ့ကြေး တောင်းလို့ရတာ ဖြစ်ပါတယ်။ 

အီဗန်ဖာဂူဆန်ကလည်း ပုံမှန်ပွဲကစားခွင့်ရနေတဲ့ ဘရိုက်တန်အသင်းကနေ ထွက်ခွာဖို့ အလျင်စလို ဆုံးဖြတ်ဖွယ် မရှိတာပါ။ 

အီဗန်ဖာဂူဆန်ဟာ လက်ရှိအချိန်မှာ နောက်ကျောဒဏ်ရာနဲ့ ရင်ဆိုင်နေရတယ်လို့ သိရပါတယ်။

Source: Metro 

CNI Sport News

၂၀၂၃ ခုနှစ်၊ နိုဝင်ဘာ ၁၆

အေစီမီလန်အသင်းနောက်ခံလူ ဖလော်ရန်ဇီဟာ တရားမဝင်လောင်းကစားမှုပြုလုပ်ခဲ့တယ်ဆိုပြီး စုံစမ်းစစ်ဆေးမှု တွေခံနေရတယ်လို့ အီတလီသတင်းတွေမှာ ဖော်ပြထားပါတယ်။

မကြာသေးခင်က အီတလီကစားသမားတွေဖြစ်တဲ့ တိုနယ်လီနဲ့ ဖာဂီယိုလီတို့ တရားမဝင်လောင်းကစားမှုနဲ့ ပွဲကစားခွင့်ပိတ်ပင်ခံရပြီးနောက် ဖလော်ရန်ဇီကပါ စုံစမ်းစစ်ဆေးမှုတွေခံနေရတာဖြစ်ပါတယ်။ နယူးကာဆယ် အသင်းကွင်းလယ်လူ တိုနယ်လီနဲ့ ဂျူဗင်တပ်စ်အသင်းကွင်းလယ်လူ ဖာဂီယိုလီတို့ဟာ ဘောလုံးနဲ့ ပတ်သက်ခွင့် ၁၀ လနဲ့ ၇ လ ပိတ်ပင်တဲ့ပြစ်ဒဏ်ချမှတ်ခြင်း ခံထားရတာပါ။ 

ဖလော်ရန်ဇီကတော့ မကြာခင်ရက်ပိုင်းအတွင်းမှာ အီတလီအစိုးရရှေ့နေတွေနဲ့ တွေ့ဆုံဖို့ မျှော်လင့်ထားတယ်လို့ သတင်းမှာ ဖော်ပြထားပါတယ်။ အသက် ၃၂ နှစ်အရွယ်ရှိ ဖလော်ရန်ဇီဟာ ဒီရာသီမှာ အေစီမီလန်အသင်းအတွက် ပြိုင်ပွဲစုံ ၁၃ ပွဲအထိ ပါဝင်ကစားထားတာပါ။ ဖလော်ရန်ဇီဟာ အေစီမီလန်အသင်းနဲ့ ၂၀၂၅ ခုနှစ်အထိ စာချုပ် သက်တမ်းကျန်ရှိနေသေးပြီး အီတလီလက်ရွေးစင်အသင်းအတွက် ၄၉ ပွဲပါဝင်ကစားထားတာဖြစ်ပါတယ်။ 

ဖလော်ရန်ဇီဟာ အေစီမီလန်အသင်းကို ၂၀၂၁ ခုနှစ်က အငှားနဲ့ ရောက်ရှိလာခဲ့တာဖြစ်ပြီး နောက်တစ်နှစ် အကြာမှာ အပြီးသတ်ပြောင်းရွှေ့ခဲ့ကာ လက်ရှိအချိန်ထိ ပွဲပေါင်း ၄၉ ပွဲပါဝင်ကစားထားပြီး ၂ ဂိုးသွင်းယူ ထားတာပါ။ ဖလော်ရန်ဇီအနေနဲ့ တရားမဝင်လောင်းကစားမှုပြုလုပ်ခဲ့ကြောင်း တွေ့ရှိခဲ့မယ်ဆိုရင် တိုနယ်လီနဲ့ ဖာဂီယိုလီတို့လို ပွဲကစားခွင့်ပိတ်ပင်တဲ့ ပြစ်ဒဏ်ချမှတ်ခံရဖွယ်ရှိနေတာဖြစ်ပါတယ်။

ဖလော်ရန်ဇီကတော့ စုံစမ်းစစ်ဆေးမှုမှာ ရလဒ်ကောင်းထွက်ပေါ်နိုင်ဖို့ မျှော်လင့်နေပြီး နိုင်ငံတကာပွဲစဉ်အပြီး နိုဝင်ဘာ ၂၅ ရက်မှာ ကစားမယ့် ဖီအိုရင်တီးနားအသင်းနဲ့ စီးရီးအေပွဲစဉ်မှာ အေစီမီလန်အသင်းအတွက် ပါဝင် ကစားပေးနိုင်ဖို့ မျှော်လင့်နေပါတယ်။

Source:Goal

CNI Sport News

၂၀၂၃ ခုနှစ်၊ နိုဝင်ဘာ ၁၆

အသင်းခေါင်းဆောင် မက်ဆီဟာ ပွဲကစားချိန်နည်းပါးနေပေမယ့် အာဂျင်တီးနားအသင်းရဲ့ ၂၀၂၆ ကမ္ဘာ့ဖလားခြေစစ်ပွဲ(တောင်အမေရိကဇုန်)ပွဲစဉ်တွေကို ပါဝင်ဖို့အတွက် ကြံ့ခိုင်မှုအပြည့်ရှိတယ်လို့ နည်းပြ စကာလိုနီက ပွဲကြိုသတင်းစာရှင်းလင်းပွဲမှာ ပြောခဲ့ပါတယ်။

စကာလိုနီက “မက်ဆီဟာ ကောင်းမွန်စွာလုပ်ဆောင်နေပါတယ်။ သူဟာ ပြီးခဲ့တဲ့ ၂၅ ရက်မှာ တစ်ပွဲပဲ ကစားခဲ့ရတယ်ဆိုပေမယ့် လေ့ကျင့်မှုတွေကို ပုံမှန်ပြုလုပ်နေတာပါ။ အဲဒါကြောင့် သူဟာ ကြံ့ခိုင်မှုရှိပြီး ကောင်းမွန်နေပါတယ်”လို့ ပြောခဲ့တာပါ။

မက်ဆီရဲ့ အင်တာမိုင်ယာမီအသင်းဟာ မေဂျာလိဂ်ပလေးအောဖ့်ယှဉ်ပြိုင်ခွင့်မရခဲ့တာကြောင့် ကစားသမားဟာ တစ်လနီးပါးကြာအနားယူနေခဲ့ရတာဖြစ်ပါတယ်။ အဲဒါကြောင့် မက်ဆီရဲ့ကြံ့ခိုင်မှုပိုင်းနဲ့ ပတ်သက်ပြီး စိုးရိမ်မှု တွေရှိနေကြပေမယ့် နည်းပြစကာလိုနီကတော့ သူတို့ရဲ့အသင်းခေါင်းဆောင်ဟာ ကြံ့ခိုင်မှုအပြည့်ရှိတယ်လို့ ပြောခဲ့တာပါ။ မက်ဆီဟာ ၂၀၂၆ ကမ္ဘာ့ဖလားခြေစစ်ပွဲတွေမှာ အာဂျင်တီးနားအသင်းအတွက် ၃ ဂိုးသွင်းယူ ပေးထားပါတယ်။

အာဂျင်တီးနားအသင်းဟာ နိုဝင်ဘာ ၁၇ ရက်မှာ ဥရုဂွေးအသင်းနဲ့ ယှဉ်ပြိုင်ရမှာဖြစ်ပြီး ၂၂ ရက်မှာတော့ ဘရာဇီးလ်အသင်းနဲ့ ယှဉ်ပြိုင်ရမှာပါ။ အာဂျင်တီးနားအသင်းနည်းပြ စကာလိုနီက သူတို့ဟာ ဘယ်ပြိုင်ဘက်နဲ့မဆို ယှဉ်ပြိုင်နိုင်တယ်ဆိုတာ ပြသပြီးသားဖြစ်တဲ့အတွက် ဒီပွဲတွေကို ယှဉ်ပြိုင်ဖို့ အဆင်သင့်ဖြစ်နေပြီလို့ ပြောခဲ့ပါ တယ်။

အာဂျင်တီးနားအသင်းဟာ ၂၀၂၆ ကမ္ဘာ့ဖလားခြေစစ်ပွဲ(တောင်အမေရိကဇုန်)မှာ ၄ ပွဲကစားအပြီး ရာနှုန်းပြည့် နိုင်ပွဲနဲ့ ထိပ်ဆုံးနေရာမှာ ဦးဆောင်နေကာ ဥရုဂွေး၊ ဘရာဇီးလ်နဲ့ ဗင်နီဇွဲလားတို့က ရမှတ်တူညီနေပြီး အဆင့် ၂၊ ၃နဲ့ ၄ နေရာမှာရပ်တည်နေတာဖြစ်ပါတယ်။

Source:ChanelNewsasia

CNI Sport News

၂၀၂၃ ခုနှစ်၊ နိုဝင်ဘာ ၁၆

ယူနိုက်တက်အသင်းမှာ ၁၆ နှစ်ကြာ တာဝန်ထမ်းဆောင်ခဲ့တဲ့ ရစ်ချတ်အာနိုးလ်ဟာ အမှုဆောင်အရာရှိချုပ်(CEO) ရာထူးကနေ အခုနှစ်အကုန်မှာ ထွက်ခွာတော့မှာ ဖြစ်ပါတယ်။

၂၀၂၂ ခုနှစ်၊ ဖေဖော်ဝါရီလက အက်ဒ်ဝုဒ်ဝက်ဒ်ရဲ့ နေရာမှာ ယူနိုက်တက်အသင်း CEO အဖြစ် စတင်တာဝန်ယူခဲ့တဲ့ ရစ်ချတ်အာနိုးလ်ဟာ ဒီဇင်ဘာလ အကုန်အထိ အသင်းရဲ့ အသွင်ကူးပြောင်းမှုတွေကို ပံ့ပိုးကူညီပေးသွားမှာပါ။

ဗြိတိန်ဘီလျံနာ ဆာဂျင်ရက်ကလစ်ဖ်ဟာ ယူနိုက်တက်အသင်းရဲ့ အစုရှယ်ယာ ၂၅ ရာခိုင်နှုန်းကို ပေါင် ၁.၂၅ ဘီလီယံနဲ့ ဝယ်ယူမှုကို အပြီးသတ်ဖို့ လုပ်ဆောင်နေချိန်မှာ ရစ်ချတ်အာနိုးလ်ရဲ့ နုတ်ထွက်မှု ဖြစ်ပေါ်လာခဲ့ပါတယ်။

ယူနိုက်တက်အသင်းရဲ့ အထွေထွေအကြံပေး စတီးဝက်ဒ်ဟာ ကလပ်အသင်းက CEO အသစ် မခန့်အပ်ခင် အချိန် အတွင်း ယာယီ CEO အဖြစ် တာဝန်ထမ်းဆောင်သွားမှာ ဖြစ်ပါတယ်။ 

ရစ်ချတ်အာနိုးလ်နဲ့ ဆာဂျင်ရက်ကလစ်ဖ်ကို တွေ့ရစဉ်

ရစ်ချတ်အာနိုးလ်ဟာ ၂၀၀၇ ခုနှစ်၊ သြဂုတ်လက ယူနိုက်တက်အသင်းကို စတင်ရောက်ရှိလာခဲ့တာဖြစ်ပြီး ရာထူး အမျိုးမျိုးကို တာဝန်ယူခဲ့ရတာ ဖြစ်ပါတယ်။ 

ရစ်ချတ်အာနိုးလ်ဟာ ယူနိုက်တက်အသင်းကို ကောင်းမွန်တဲ့ စပွန်ဆာ သဘောတူညီမှုတွေကို ရှာဖွေပေးနိုင်ခဲ့ ပေမယ့် တိုက်စစ်မှူး ဂရင်းဝုဒ်ရဲ့ အခြေအနေကို ကိုင်တွယ်မှုနဲ့ ပတ်သက်ပြီး ဝေဖန်မှုတွေ ခံခဲ့ရပါတယ်။

ယူနိုက်တက်အသင်းဟာ CEO အသစ်အဖြစ် ခန့်အပ်ဖို့ ရှာဖွေသွားမယ်လို့ ထုတ်ပြန်ချက်ထဲမှာ ဖော်ပြခဲ့ပေမယ့် သတင်းတွေမှာတော့ ဆာဂျင်ရက်ကလစ်ဖ်ရဲ့ Ineos အစုအဖွဲ့နဲ့ နီးစပ်တဲ့သူကို ခန့်အပ်သွားမယ်လို့ သိရပါတယ်။

ဗြိတိန်ဘီလျံနာ ဆာဂျင်ရက်ကလစ်ဖ်ဟာ အသင်းရဲ့ အစုရှယ်ယာကို ဝယ်ယူမှု ပြီးမြောက်တာနဲ့ ယူနိုက်တက် အသင်းကို ပြုပြင်ပြောင်းလဲမှုတွေ ပြုလုပ်သွားမယ့် အစီအစဉ်တွေကို ရေးဆွဲထားပါတယ်။

ဆာဂျင်ရက်ကလစ်ဖ်ဟာ အစုရှယ်ယာ ဝယ်ယူမှုအပြင် ယူနိုက်တက်အသင်းရဲ့ အားကစားကွင်းနဲ့ လေ့ကျင့်ရေး ကွင်းတွေကို အဆင့်မြှင့်တင်နိုင်ဖို့အတွက် နောက်ထပ်ပေါင် ၂၄၅ သန်း ထပ်ပြီးပေးသွားဖို့ ရှိနေတာ ဖြစ်ပါတယ်။

ယူနိုက်တက်အသင်း ပရိသတ်တွေကတော့ ဇန်နဝါရီလ အပြောင်းအရွှေ့ မတိုင်ခင်မှာ ဆာဂျင်ရက်ကလစ်ဖ်ရဲ့ အစုရှယ်ယာဝယ်ယူမှုကို ကြေညာနိုင်ဖို့ မျှော်လင့်နေပါတယ်။

Source: BBC

CNI Sport News

၂၀၂၃ ခုနှစ်၊ နိုဝင်ဘာ ၁၅

ဘရိုက်တန်အသင်းတောင်ပံကစားသမား မီတိုမာဟာ ဒဏ်ရာကြောင့် ၂၀၂၆ ကမ္ဘာ့ဖလားခြေစစ်ပွဲယှဉ်ပြိုင်မယ့် အသင်းလူစာရင်းကနေ နုတ်ထွက်ခဲ့တယ်လို့ ဂျပန်ဘောလုံးအဖွဲ့ချုပ်က ထုတ်ပြန်ခဲ့ပါတယ်။

အဲဒါကြောင့် မီတိုမာဟာ မြန်မာအသင်းနဲ့ ကစားမယ့် အိမ်ကွင်းပွဲစဉ်၊ ဆီရီးယားအသင်းနဲ့ အဝေးကွင်းပွဲစဉ်တွေမှာ ဂျပန်အသင်းအတွက် ပါဝင်နိုင်တော့မှာမဟုတ်ပါဘူး။ အသက် ၂၆ နှစ်အရွယ်ရှိ မီတိုမာဟာ ဂျပန်အသင်းအတွက် ၁၈ ပွဲပါဝင်ကစားထားပြီး ၇ ဂိုးသွင်းယူကာ ပရီးမီးယားလိဂ်ရဲ့ စိတ်လှုပ်ရှားစရာအကောင်းဆုံး တိုက်စစ် ကစားသမားတွေထဲက တစ်ဦးအဖြစ် သတ်မှတ်ခံထားရတာ ဖြစ်ပါတယ်။

မီတိုမာက “ဒါက ကမ္ဘာ့ဖလားခြေစစ်ပွဲဖြစ်တာကြောင့် အသင်းကို ကူညီပေးနိုင်ဖို့အတွက် ပူးပေါင်းခဲ့ပါတယ်။ ဒါပေမယ့် ကံမကောင်းစွာနဲ့ ကျနော်အသင်းအတွက် ရာနှုန်းပြည့်မကစားပေးနိုင်တော့ပါဘူး။ အဲဒါကြောင့် ကျနော့်ကိုယ်စား အသင်းဖော်တွေကို ကစားခွင့်ပေးဖို့ ဆုံးဖြတ်ခဲ့ပါတယ်။ အခုအချိန်မှာတော့ ကျနော်အမြန်ဆုံး ပြန်ကောင်းလာနိုင်ဖို့ ကြိုးစားသွားမှာပါ” လို့ ဂျပန်ဘောလုံးအဖွဲ့ချုပ်ရဲ့ ထုတ်ပြန်ချက်မှာ ပြောခဲ့တာပါ။

မီတိုမာဟာ ဒီရာသီမှာ ဘရိုက်တန်အသင်းအတွက် ၁၅ ပွဲပါဝင်ကစားပြီး ၃ ဂိုးသွင်းယူထားကာ မနှစ်ကရာသီက အသင်းကို ယူရိုပါလိဂ်ပြိုင်ပွဲပထမဆုံးအကြိမ်ဝင်ခွင့်ရအောင် စွမ်းဆောင်ပေးနိုင်ခဲ့တာဖြစ်ပါတယ်။ မီတိုမာဟာ ပြီးခဲ့တဲ့ ရှက်ဖီးယူနိုက်တက်အသင်းနဲ့ ၁ ဂိုးစီသရေကျတဲ့ပွဲမှာ ဘရိုက်တန်အသင်းအတွက် လူစားဝင်ကစားသမား အဖြစ် ပါဝင်ခဲ့ရတာပါ။

၂၀၂၆ ကမ္ဘာ့ဖလားခြေစစ်ပွဲ(အာရှဇုန်)ဒုတိယအဆင့်ပွဲစဉ်အဖြစ် ဂျပန်အသင်းနဲ့ မြန်မာအသင်းတို့ဟာ နိုဝင်ဘာ ၁၆ ရက်မှာ ယှဉ်ပြိုင်မှာဖြစ်ပါတယ်။

Source:nst

CNI Sport News

၂၀၂၃ ခုနှစ်၊ နိုဝင်ဘာ ၁၅

အချက်အလက်တွေကို သုံးသပ်တဲ့ Opta က မန်စီးတီးအသင်းဟာ ပရီးမီးယားလိဂ်ဖလားကို ၄ နှစ်ဆက်တိုက် ရယူဖို့ ၈၄ ရာခိုင်နှုန်းရှိတယ်လို့ ခန့်မှန်းလိုက်ပါတယ်။

ပရီးမီးယားလိဂ် ကလပ်အသင်း ၂၀ ရဲ့လက်ရှိပုံစံနဲ့ လက်ကျန်ပွဲစဉ်တွေကို အခြေခံပြီး စူပါကွန်ပျူတာက တွက်ချက်ထားတာ ဖြစ်ပါတယ်။

Opta က မန်စီးတီးအသင်း ပရီးမီးယားလိဂ်ဖလားကို ထပ်ပြီးကိုင်မြှောက်နိုင်ဖို့ ၈၄.၆ ရာခိုင်နှုန်း ဖြစ်နိုင်ဖွယ်ရှိပြီး၊ လီဗာပူးလ်အသင်းက ၉.၁ ရာခိုင်နှုန်းသာ အခွင့်အရေးရှိကာ အာဆင်နယ်အသင်းကတော့ ၅.၆ ရာခိုင်နှုန်းသာ ရှိတယ်လို့ ဖော်ပြထားပါတယ်။

၂ ပွဲဆက် ရှုံးပွဲကြုံတွေ့ခဲ့တဲ့ စပါးအသင်းရဲ့ ပရီးမီးယားလိဂ် ဆုဖလားကို ရရှိနိုင်ဖို့ မျှော်လင့်ချက်က ဝ.၃ ရာခိုင်နှုန်း သာရှိပြီး အက်စတွန်ဗီလာအသင်းနဲ့ တူညီနေပါတယ်။

Opta ရဲ့ ခန့်မှန်းချက်ကိုတွေ့ရစဉ်

အဆင့် ၆ နေရာမှာ ရပ်တည်နေတဲ့ ယူနိုက်တက်အသင်းကတော့ အဆင့် ၇ နဲ့ ရာသီအဆုံးသတ်တော့မယ်လို့ Opta က ခန့်မှန်းထားပြီး ထိပ်ဆုံး ၄ သင်းထဲ ဝင်ရောက်ပြီး အဆုံးသတ်နိုင်ဖို့ အခွင့်အရေး ၅.၉ ရာခိုင်နှုန်းရှိတယ်လို့ ဖော်ပြထားတာ ဖြစ်ပါတယ်။

နယူးကာဆယ်အသင်းဟာ ၂ နှစ်ဆက်တိုက် အဆင့် ၄ နေရာနဲ့ ရာသီအဆုံးသတ်ဖို့ ၂၅ ရာခိုင်နှုန်း အခွင့်အရေးရှိပြီး ချယ်လ်ဆီးအသင်းက အဆင့် ၉ နေရာနဲ့ ရာသီအဆုံးသတ်မယ်လို့ ခန့်မှန်းထားတာပါ။

ပြီးခဲ့တဲ့ရာသီက တန်းတက်လာခဲ့တဲ့ လူတန်၊ ရှက်ဖီးယူနိုက်တက်နဲ့ ဘန်လေအသင်းတို့ဟာ ပရီးမီးယားလိဂ် ပြိုင်ပွဲကနေ တန်းပြန်ဆင်းမယ်လို့ Opta က ဖော်ပြထားတာ ဖြစ်ပါတယ်။ 

ဒီရာသီ ပရီးမီးယားလိဂ်ပွဲစဉ် ၁၂ ပွဲ ကစားအပြီးမှာ မန်စီးတီးအသင်းက အဆင့် ၁ နေရာမှာ ဦးဆောင်နေပြီး လီဗာပူးလ်၊ အာဆင်နယ်နဲ့ စပါးအသင်းတို့က အဆင့် ၂ ၊၃ နဲ့ ၄ နေရာမှာ ရပ်တည်နေတာပါ။ 

လူတန်၊ ရှက်ဖီးယူနိုက်တက်နဲ့ ဘန်လေအသင်းတို့ကတော့ တန်းဆင်းဇုန် အဆင့် ၁၈၊ ၁၉ နဲ့ ၂၀ နေရာတွေမှာ ရပ်တည်နေတာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ နိုဝင်ဘာ ၁၅

လိုင်ယွန်အသင်းနောက်ခံလူ တာဂလီယာဖီဂိုက လာမယ့် ကိုပါအမေရိကဖလားပြိုင်ပွဲမှာ အာဂျင်တီးနား အသင်းအနေနဲ့ ချန်ပီယံဆုကို ဆက်ပြီးထိန်းသိမ်းနိုင်ခဲ့မယ်ဆိုရင် ၂၀၂၆ ကမ္ဘာ့ဖလားပြိုင်ပွဲကို မက်ဆီပါဝင် ကစားလိမ့်မယ်လို့ ပြောလိုက်ပါတယ်။

တာဂလီယာဖီဂိုက “၂၀၂၆ ကမ္ဘာ့ဖလားပြိုင်ပွဲမှာ မက်ဆီပါဝင်ကစားနိုင်မယ့် အဓိကအချက်က လာမယ့်နှစ်မှာ ကျင်းပမယ့် ကိုပါအမေရိကဖလားကို အရယူဖို့ပါ။ ကာတာမှာသာ ကျနော်တို့ ကမ္ဘာ့ဖလားမရယူနိုင်ခဲ့ရင် သူလက်ရွေးစင်အသင်းကနေ ထွက်သွားမှာပါ။ ဒါပေမယ့် ချန်ပီယံဆုကို ရယူနိုင်ခဲ့တဲ့အတွက် သူဟာ ဒီလတွေကို ပျော်ရွှင်နေတာပါ။ ဒါပေမယ့် ကျနော်တို့ အမေရိကန်ကိုသွားပြီး ကိုပါအမေရိကဖလားရယူနိုင်ခဲ့ရင်တော့ မက်ဆီဆက်ပြီးကစားပါလိမ့်မယ်”လို့ La Nacion ကို ပြောခဲ့တာပါ။

မက်ဆီဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲမှာ အာဂျင်တီးနားအသင်းနဲ့အတူ ချန်ပီယံဆုကို ရယူနိုင်ခဲ့ပြီးနောက် ကစားသမားဘဝမှာ မရရှိဖူးသေးတဲ့ ကမ္ဘာ့ဖလားချန်ပီယံဆုကို သူ့ရဲ့ဆုဖလားအောင်မြင်မှုထဲ ထည့်သွင်းနိုင်ခဲ့တာ ဖြစ်ပါတယ်။ မက်ဆီဟာ ကမ္ဘာ့ဖလားချန်ပီယံဆုကို ရယူနိုင်ခဲ့ပြီးနောက် သူ့ရဲ့ဘောလုံးကစားသမားဘဝဟာ ပြီးပြည့်စုံသွားပြီလို့ ဘောလုံးပွဲဝေဖန်သုံးသပ်သူတွေ၊ ကစားသမားဟောင်းတွေနဲ့ ပရိသတ်တွေက ပြောခဲ့တာပါ။

မက်ဆီကိုယ်တိုင်က လာမယ့် ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားဖို့ အစီအစဉ်မရှိဘူးလို့ ပြောထားပေမယ့် နောက်ပိုင်းမှာ ကမ္ဘာ့ဖလားပြိုင်ပွဲက အဝေးကြီးလိုသေးတဲ့အတွက် ကိုပါအမေရိကဖလားပြိုင်ပွဲအကြောင်းကိုပဲ တွေးထားတယ်လို့ ပြောခဲ့တာဖြစ်ပါတယ်။ အာဂျင်တီးနားအသင်းနောက်ခံလူ တာဂလီယာဖီဂိုအပါအဝင် တစ်သင်းလုံးကလည်း သူတို့အသင်းခေါင်းဆောင် မက်ဆီကို ၂၀၂၆ ကမ္ဘာ့ဖလားပြိုင်ပွဲမှာ ပါဝင်နိုင်ဖို့အတွက် ဆွဲဆောင်နိုင်မယ်လို့ ယုံကြည်နေကြတာပါ။

အသက် ၃၆ နှစ်အရွယ်ရှိ မက်ဆီဟာ လက်ရှိအချိန်မှာ ကမ္ဘာ့ဖလားခြေစစ်ပွဲကစားဖို့ အာဂျင်တီးနားအသင်းနဲ့အတူ လေ့ကျင့်မှုပြုလုပ်နေပြီး အာဂျင်တီးနားအသင်းဟာ နိုဝင်ဘာ ၁၆ ရက်မှာ ဥရုဂွေး၊ ၂၁ ရက်မှာ ဘရာဇီးလ်အသင်း တို့နဲ့ ယှဉ်ပြိုင်ရမှာဖြစ်ပါတယ်။

Source:Goal

CNI Sport News

၂၀၂၃ ခုနှစ်၊ နိုဝင်ဘာ ၁၅

စပိန်ဂိုးသမား ဒေးဗစ်ရာယာကြောင့် အာဆင်နယ်အသင်းမှာ ပွဲကစားခွင့်ဆုံးရှုံးနေတဲ့ သားဖြစ်သူ အာရွန်ရမ်စဒေးလ်ဆီမှာ အပြုံးတွေ ပျောက်ကွယ်နေပြီလို့ ဖခင်နစ်ခ်ရမ်စဒေးလ်က ပြောလိုက်ပါတယ်။

နစ်ခ်ရမ်စဒေးလ်က “အာရွန်ဆီမှာ အပြုံးတွေ ပျောက်ကွယ်နေပါပြီ။ သူ့ကို အရန်ခုံပေါ်မှာ မြင်တွေ့ရတာက တကယ်ကိုခက်ခဲပြီး အားလုံးက မင်းပြုံးနေဖို့ လိုအပ်တယ်ဆိုပြီး ပြောခဲ့ပါတယ်။ အာရွန်ကတော့ အသင်းအတွက် ပါဝင်ကစားပေးနိုင်ဖို့ အစွမ်းကုန်ကြိုးစားနေပြီး ဆုဖလားတွေ ရယူပေးနိုင်ဖို့ သူလုပ်ဆောင်သွားမှာပါ”လို့ ပြောခဲ့ပါ တယ်။

ရမ်စဒေးလ်ဟာ ဒီရာသီအစ ပရီးမီးယားလိဂ်ပွဲစဉ် ၄ ပွဲစလုံး ပွဲထွက်ခွင့် ရခဲ့ပေမယ့် ဒေးဗစ်ရာယာ ရောက်ရှိလာ အပြီးမှာတော့ ပွဲကစားခွင့် ဆုံးရှုံးခဲ့တာ ဖြစ်ပါတယ်။ 

အင်္ဂလန်အသင်းနည်းပြ ဆောက်ဂိတ်က ရမ်စဒေးလ်အနေနဲ့ အရန်ခုံမှာသာ ဆက်ပြီးရှိနေမယ်ဆိုရင် လာမယ့် ယူရို ၂၀၂၄ ပြိုင်ပွဲဝင်မယ့် လူစာရင်းမှာ ပါဝင်နိုင်မယ်လို့ ကတိမပေးနိုင်ကြောင်း ပြောထားပါတယ်။ 

ရမ်စဒေးလ်ဟာ ဒေးဗစ်ရာယာ ရောက်ရှိလာပြီးကတည်းက ပရီးမီးယားလိဂ်နဲ့ ချန်ပီယံလိဂ်ပွဲတွေမှာ အာဆင်နယ် အသင်းရဲ့ အရန်ဂိုးသမားအဖြစ် ပါဝင်ခဲ့ရပြီး ဖလားပွဲတွေမှာသာ ပွဲထွက်ခွင့်ရခဲ့ပါတယ်။ 

ရမ်စဒေးလ်ကို တွေ့ရစဉ်

အင်္ဂလန်ဂိုးသမားဟာ ပြီးခဲ့တဲ့ မေလကမှ အာဆင်နယ်အသင်းနဲ့ စာချုပ်သစ် ချုပ်ဆိုထားပေမယ့် ပွဲကစားခွင့် ဆုံးရှုံးနေတာကြောင့် သူ့ရဲ့အနာဂတ်ကို စဉ်းစားနေပြီလို့ ဗြိတိန်မီဒီယာတွေက ဖော်ပြထားပါတယ်။ 

အာဆင်နယ်အသင်းနည်းပြ အာတီတာကတော့ ရမ်စဒေးလ်အနေနဲ့ ဘယ်လိုအရာကိုမှ အလျင်စလို မဆုံးဖြတ်ဖို့ သတိပေးထားပါတယ်။

အသက် ၂၅ နှစ်အရွယ်ရှိ ရမ်စဒေးလ်ဟာ ၂၀၂၁ ခုနှစ်က ရှက်ဖီးယူနိုက်တက် အသင်းကနေ အာဆင်နယ်အသင်းထံ ပြောင်းရွှေ့လာခဲ့တာ ဖြစ်ပါတယ်။

ရမ်စဒေးလ်ဟာ အာဆင်နယ်အသင်းအတွက် ပွဲပေါင်း ၈၅ ပွဲ ပါဝင်ကစားထားပြီး မနှစ်ကရာသီက ပရီးမီးယားလိဂ် ပြိုင်ပွဲမှာ ချန်ပီယံဆုကို စိန်ခေါ်နိုင်ဖို့နဲ့ ချန်ပီယံလိဂ်ပြိုင်ပွဲ ယှဉ်ပြိုင်ခွင့်ရရှိအောင် လက်စွမ်းပြသနိုင်ခဲ့ပါတယ်။

ဒါပေမယ့် သူ့ရဲ့ တည်ငြိမ်မှုမရှိတဲ့ လက်စွမ်းတွေကြောင့် အာတီတာက ဒေးဗစ်ရာယာကို ဘရန်ဖို့ဒ်အသင်းကနေ ခေါ်ယူပြီး ပွဲထွက်ဂိုးသမားအဖြစ် အသုံးပြုနေတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ နိုဝင်ဘာ ၁၄

ယူနိုက်တက်အသင်းနည်းပြ အဲရစ်တန်ဟတ်ဟာ တောင်ပံကစားသမား အန်တိုနီကို ခေါ်ယူမယ့် ကမ်းလှမ်းမှုတွေကို နားထောင်သွားဖို့ ဆန္ဒရှိနေတယ်လို့ သတင်းတွေမှာ ဖော်ပြထားပါတယ်။

အန်တိုနီဟာ ၂၀၂၂ ခုနှစ်နွေရာသီအပြောင်းအရွှေ့က အေဂျတ်စ်အသင်းကနေ ပေါင် ၈၅ သန်းနဲ့ ယူနိုက်တက် အသင်းထံ ပြောင်းရွှေ့လာခဲ့တာဖြစ်ပြီး အဲရစ်တန်ဟတ်လက်ထက် ဈေးအကြီးဆုံးကစားသမား ခေါ်ယူမှု ဖြစ်ခဲ့တာပါ။ ဒါပေမယ့် အန်တိုနီဟာ ယူနိုက်တက်အသင်းပေးချေခဲ့ရတဲ့ ပြောင်းရွှေ့ကြေးအတိုင်း ခြေစွမ်း ပြသနိုင်ဖို့ ရုန်းကန်နေရတာဖြစ်ပါတယ်။ ဘရာဇီးလ်ကစားသမားဟာ အခုရာသီမှာ ယူနိုက်တက်အသင်းအတွက် ၁၂ ပွဲပါဝင်ကစားအပြီးမှာ သွင်းဂိုးရော၊ ဂိုးဖန်တီးမှုရော ပြုလုပ်နိုင်ခြင်း မရှိသေးပါဘူး။

အဲရစ်တန်ဟတ်ဟာ ခြေစွမ်းပြသဖို့ ရုန်းကန်နေရတဲ့ အန်တိုနီဘက်ကနေ ရပ်တည်ပေးခဲ့ပေမယ့် အခု အချိန် မှာတော့ သူရဲ့ရပ်တည်မှုကို ပြောင်းလဲတော့မှာဖြစ်ပါတယ်။ The Sun က ဒတ်ချ်လူမျိုးနည်းပြဟာ လာမယ့် ဇန်နဝါရီအပြောင်းအရွှေ့ဖွင့်တဲ့အချိန်မှာ အန်တိုနီကို ခေါ်ယူမယ့် ကမ်းလှမ်းမှုတွေကို နားထောင်သွားဖို့ ဆန္ဒ ရှိနေတယ်လို့ ဖော်ပြခဲ့တာပါ။ အဲရစ်တန်ဟတ်ဟာ တိုက်စစ်ပိုင်းရွေးချယ်မှုအသစ်ပြုလုပ်ဖို့ စိတ်အားထက်သန် နေပြီး အန်တိုနီအပြင် မာရှယ်နဲ့ ဆန်ချိုတို့ကိုလည်း ရောင်းချဖို့ စီစဉ်နေတာဖြစ်ပါတယ်။

အန်တိုနီရဲ့ ပုံစံကောင်းတွေပျောက်ဆုံးတာနဲ့ ပတ်သက်ပြီး အဲရစ်တန်ဟတ်က “သူဟာ ရက်သတ္တပတ် ၂ ပတ် လောက် ပွဲမကစားနိုင်ခဲ့လို့ စည်းချက်တွေပျောက်ဆုံးသွားတာပါ။ သူဟာ ကောင်းမွန်တဲ့ရာသီကြိုရှိခဲ့ပေမယ့် အနားယူခဲ့ရတာကြောင့် သူ့ရဲ့ပုံစံကောင်းတွေပြန်ရလာဖို့ လိုအပ်နေပါပြီ။ အန်တိုနီဟာ ကျနော်တို့အတွက် မှန်ကန်တဲ့ကစားသမားဖြစ်တယ်ဆိုတဲ့ စွမ်းဆောင်ရည်မျိုး ယူဆောင်လာနိုင်မယ်ဆိုတာ ယုံကြည်တယ်”လို့ ပြောခဲ့တာပါ။

အဲရစ်တန်ဟတ်ဟာ ဒီလိုပြောခဲ့ပေမယ့် နောက်ဆုံးကစားခဲ့တဲ့ ကိုပင်ဟေဂင်၊ လူတန်အသင်းနဲ့ ပွဲတွေမှာ အန်တိုနီကို ပွဲထွက်လူစာရင်းကနေ ချန်လှပ်ခဲ့ပြီး ရက်ရှ်ဖိုဒ့်နဲ့ ဂါနာချိုတို့ကို တောင်ပံတွေမှာ အသုံးပြုသွားခဲ့တာ ဖြစ်ပါတယ်။  

Source:Metro