CNI Sport News
၂၀၂၄ ခုနှစ်၊ အောက်တိုဘာ ၂
အာဆင်နယ်အသင်းဟာ ပီအက်စ်ဂျီအသင်းကို အနိုင်ရခဲ့ပြီးနောက် နည်းပြ အာတီတာက သူတို့ဟာ ချန်ပီယံလိဂ် ဖလားအတွက် စိန်ခေါ်သူတွေဖြစ်နိုင်တယ်လို့ ယုံကြည်ကြောင်း ပြောခဲ့ပါတယ်။
အာတီတာက “ကျနော်တို့ရဲ့စွမ်းဆောင်ရည်အပေါ် အလွန်ပျော်ရွှင်ပါတယ်။ ကျနော်တို့ဟာ ကိုယ်ရည်ကိုယ်သွေး အများကြီးရှိတဲ့ ပြိုင်ဘက်နဲ့ ကစားခဲ့ရပြီး ဘောလုံးမရှိတဲ့အချိန်တွေမှာ ရင်ဆိုင်ရတာခက်ခဲပါတယ်။ ပထမပိုင်းကို ကျနော်တို့အသာစီးနဲ့ ကစားနိုင်ခဲ့သလို အခွင့်အရေးတွေလည်းအများကြီးဖန်တီးနိုင်ခဲ့ပါတယ်။ ချန်ပီယံလိဂ် ပြိုင်ပွဲ ရဲ့ မတူညီတဲ့တောင်းဆိုမှုတွေကို ကျနော်တို့ ကောင်းမွန်စွာကိုင်တွယ်နိုင်ခဲ့တယ်လို့ထင်ပါတယ်။ ကစားသမား တွေကလည်း ကျနော်တို့လမ်းကြောင်းမှန်ပေါ်ဦးတည်နေတယ်လို့ခံစားနေရကြောင်း”ပြောခဲ့တာပါ။
အာဆင်နယ်အသင်းဟာ ပီအက်စ်ဂျီအသင်းနဲ့ ကစားခဲ့တဲ့ ချန်ပီယံလိဂ်အိမ်ကွင်းပွဲစဉ်မှာ ၂ ဂိုး-ဂိုးမရှိနဲ့ အနိုင်ရရှိ ခဲ့တာဖြစ်ပါတယ်။
အာဆင်နယ်အသင်းအတွက် ဂိုးတွေကို ဟာဗက်ဇ်နဲ့ ဆာကာတို့က ပထမပိုင်းမှာ သွင်းယူခဲ့တာ ပါ။ ပီအက်စ်ဂျီအသင်းဟာ ဒုတိယပိုင်းမှာ ချေပဂိုးရယူနိုင်ဖို့ကြိုးစားခဲ့ပေမယ့် အာဆင်နယ်အသင်းက ပွဲကို အကောင်းဆုံးထိန်းချုပ်ကစားနိုင်ခဲ့တာဖြစ်ပါတယ်။
ဒီပွဲမှာ အာဆင်နယ်အသင်းခေါင်းဆောင်အဖြစ် တာဝန်ယူခဲ့တဲ့ ဆာကာက အသင်းဟာ ဒီရာသီမှာ ဆုဖလားတွေနဲ့ အောင်ပွဲခံနိုင်မယ်လို့ ယုံကြည်ကြောင်း ပွဲအပြီးအင်တာဗျူးမှာ ပြောခဲ့တာပါ။
ပီအက်စ်ဂျီအသင်းနည်းပြ လူးဝစ် အင်းနရစ်က သူတို့ဟာ ဒီပွဲမှာ လိုအပ်နေတဲ့ စံနှုန်းတွေနဲ့ ဝေးကွာခဲ့ပြီး အာဆင်နယ်အသင်းကို မယှဉ်နိုင်ခဲ့ဘူးလို့ ဝန်ခံခဲ့ပါတယ်။
အာဆင်နယ်နဲ့ ပီအက်စ်ဂျီအသင်းတို့ဟာ ချန်ပီယံလိဂ်ပွဲစဉ် ၂ ပွဲစီ ကစားအပြီးမှာ အာဆင်နယ်အသင်းက ၄ မှတ်၊ ပီအက်စ်ဂျီအသင်းက ၃ မှတ်ရရှိထားတာပါ။
လာမယ့်အောက်တိုဘာနိုင်ငံတကာပွဲစဉ်တွေမတိုင်ခင် နောက်ဆုံး လိဂ်ပွဲစဉ်တွေအဖြစ် အာဆင်နယ်အသင်းက ဆောက်သမ်တန်၊ပီအက်စ်ဂျီအသင်းက နိုက်စ်အသင်းနဲ့ ယှဉ်ပြိုင် ရမှာဖြစ်ပါတယ်။
Source:DailyMail
