CNI Sport News

၂၀၂၃ ခုနှစ်၊ ဧပြီ ၈

ဗြိတိန်ဟဲဗီးဝိတ် လက်ဝှေ့သမား အန်သိုနီဂျိုရွှာက ဖရန်ကလင်မ်ကို အနိုင်ရပြီးနောက် လာမယ့် ၃ လအတွင်းမှာ လက်ဝှေ့ကြိုးဝိုင်းထဲကို ပြန်လည် ဝင်ရောက်မယ်လို့ ပြောခဲ့ပါတယ်။

အန်သိုနီဂျိုရွှာက “ဖရန်ကလင်မ်နဲ့ ပွဲစဉ် မတိုင်ခင်ကဆိုရင် ပွဲနဲ့ ဝေးခဲ့တာ ၉ လ ကြာခဲ့ပါတယ်။ အဲဒီလောက် အကြာကြီး ပွဲနဲ့ မဝေးချင်ပါဘူး။ နောက် ၃ လနေရင် ကျနော် ပြန်လာချင်ပါတယ်။ နောက် ၃ လမှာ ထိုးသတ် ချင်တယ်ဆိုတာ သေချာပေမယ့် ဘယ်သူနဲ့ ထိုးသတ်ရမလဲဆိုတာတော့ မသိသေးပါဘူး”လို့ ပြောခဲ့တာပါ။

အန်သိုနီဂျိုရွှာဟာ ဖရန်ကလင်မ်ကို အနိုင်ရတဲ့ ပွဲမတိုင်ခင် ယူကရိန်း လက်ဝှေ့သမား အူဆက်ခ်ကို ၂ ကြိမ် ဆက် တိုက် အရေးနိမ့်ခဲ့ပြီး WBA (Super)၊IBF နဲ့ WBO ကမ္ဘာ့ချန်ပီယံခါးပတ်တွေ ဆုံးရှုံးခဲ့ရတာ ဖြစ်ပါတယ်။

ဧပြီလ ၁ ရက်က ထိုးသတ်ခဲ့တဲ့ ဖရန်ကလင်မ်နဲ့ ပွဲကတော့ အန်သိုနီဂျိုရွှာအတွက် ၂ နှစ်ကျော်အကြာမှ ပထမဆုံး နိုင်ပွဲ ဖြစ်ခဲ့တာပါ။ အန်သိုနီဂျိုရွှာဟာ တိုင်ဆန်ဗျူရီနဲ့ ထိုးသတ်ဖို့ အတွက်လည်း သတင်းတွေ ထွက်ခဲ့ပေမယ့် အခု အချိန်ထိ သဘောတူညီမှု မရရှိသေးတာ ဖြစ်ပါတယ်။

အန်သိုနီဂျိုရွှာကို တွေ့ရစဉ်

ဗြိတိန်ဟဲဗီးဝိတ် လက်ဝှေ့သမားတစ်ဦးဖြစ်တဲ့ ဒီလီယန်ဝှိုက်က အန်သိုနီဂျိုရွှာဟာ ဖရန်ကလင်မ်ကို အနိုင် ရပြီးတဲ့ အချိန်မှာ နောက်ထပ် မထိုးသတ်ချင်တော့တဲ့ လက္ခဏာတွေကို ပြသခဲ့တယ်လို့ ပြောခဲ့တာပါ။

“အန်သိုနီဂျိုရွှာ အနေနဲ့ နောက်ထပ် မထိုးသတ်ချင်တော့ဘူး ဆိုရင်တော့ သူရပ်တန့် လိုက်သင့်ပြီလို့ ထင်ကြောင်း” ဒီလီယန်ဝှိုက်က BBC Radio 5 Live ကို ပြောခဲ့တာ ဖြစ်ပါတယ်။

အသက် ၃၃ နှစ်အရွယ်ရှိ ဗြိတိန် လက်ဝှေ့သမားဟာ ပရော်ဖက်ရှင်နယ် လက်ဝှေ့သမားဘဝမှာ ပွဲပေါင်း ၂၈ ပွဲ အထိ ထိုးသတ်ခဲ့တာမှာ ၂၅ ပွဲအထိ အနိုင်ရခဲ့ပြီး ၃ ပွဲသာ အရေးနိမ့်ထားတာပါ။

အန်သိုနီဂျိုရွှာဟာ ဒီအရေးနိမ့်ခဲ့တဲ့ ၃ ပွဲထဲမှာ အူဆက်ခ်နဲ့ ၂ ပွဲ ပါဝင်ခဲ့ပြီး ကျန် ၁ ပွဲကတော့ ၂၀၁၉ က အန်ဒီရူးဝစ် ကို အရေးနိမ့်ခဲ့တာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဧပြီ ၈

အာဆင်နယ်အသင်းနည်းပြ အာတီတာက လီဗာပူးလ်အသင်းကို အန်ဖီးလ်ကွင်းမှာ အနိုင်ရအောင် လုပ်နိုင်စွမ်း ရှိတယ်လို့ ပွဲကြို သတင်းစာ ရှင်းလင်းပွဲမှာ ပြောလိုက်ပါတယ်။

အာတီတာက “ကျနော်တို့မှာ ကြီးမားတဲ့ စိန်ခေါ်မှုကြီး ရှိတယ်ဆိုတာကို သိပါတယ်။ ဒါဟာ အန်ဖီးလ်ကွင်းကို သွားပြီး နှစ်ပေါင်းများစွာကြာ ကျနော်တို့ မလုပ်ဖူးတဲ့ အရာတစ်ခုကို လုပ်ဖို့အတွက် ကြီးမားတဲ့ အခွင့်အရေးဖြစ်ပြီး ဒါက အသင်းကို တွန်းအားပေးနေတဲ့ အရာပါ။ ကျနော်တို့ လုပ်နိုင်စွမ်း ရှိပါတယ်။ အနိုင်ရဖို့ အကောင်းဆုံး ကြိုးစား ရမယ်ဆိုတာ သိပါတယ်။ မနှစ်ကထက် ကျနော်တို့ ပိုပြီးကောင်းမယ်ဆိုတာ အသေအချာပါပဲ”လို့ ပြောခဲ့တာပါ။

အာဆင်နယ်အသင်းက လီဗာပူးလ်အသင်းကို အန်ဖီးလ်ကွင်းမှာ နောက်ဆုံး အနိုင်ရခဲ့တဲ့ ပရီးမီးယားလိဂ် ပွဲစဉ် ကတော့ ၂၀၁၂ က ဖြစ်ပြီး အဲဒီတုန်းက အာတီတာဟာ အာဆင်နယ်အသင်းမှာ ကစားသမားအဖြစ် ရှိနေတာ ဖြစ်ပါတယ်။

အာဆင်နယ်အသင်းဟာ အန်ဖီးလ်ကွင်းမှာ နောက်ဆုံးကစားခဲ့တဲ့ ပရီးမီးယားလိဂ် ၆ ပွဲစလုံး အရေးနိမ့်ခဲ့တာ ဖြစ်ပြီး ဒီပွဲတွေ အားလုံးပေါင်းမှာ လီဗာပူးလ်က ၂၂ ဂိုးအထိ သွင်းယူထားနိုင်ခဲ့ကာ အာဆင်နယ်ကတော့ ၄ ဂိုးသာ သွင်းယူနိုင်ခဲ့တာပါ။

အာဆင်နယ်အသင်းဟာ လီဗာပူးလ်အသင်းနဲ့ ပွဲမှာ ရလဒ်ကောင်း ရယူနိုင်ခဲ့ရင် ပရီးမီးယားလိဂ် ချန်ပီယံဆု အတွက် နောက်ထပ် ခြေလှမ်းတစ်လှမ်းကို ထပ်ပြီး လှမ်းနိုင်မယ်လို့ ယုံကြည်မှုတွေ ရှိနေတာ ဖြစ်ပါတယ်။

လီဗာပူးလ်အသင်းက ဆာလတ်ကိုတွေ့ရစဉ်

အဲဒါကြောင့် အာတီတာက အန်ဖီးလ်ကွင်းမှာ ၁၁ နှစ်ကြာ နိုင်ပွဲပျောက်ဆုံးနေမှုကို အဆုံးသတ် ချင်နေတာဖြစ်ပြီး မနှစ်ကရာသီ နောက်ဆုံး တွေ့ဆုံခဲ့တဲ့ပွဲမှာ ၄ ဂိုး- ဂိုးမရှိနဲ့ ဂိုးပြတ် အရေးနိမ့်ခဲ့တာကြောင့် စပိန်လူမျိုးနည်းပြဟာ ဝေဖန်မှုတွေ ခံခဲ့ရတာပါ။

အာတီတာက “ကစားသမားတွေကို တိရစ္ဆာန်ရုံမှာ လေ့ကျင့်ခိုင်းလို့ မရပေမယ့် တနင်္ဂနွေနေ့မှာ တောအုပ်ကြီးထဲ ကို သွားရမှာပါ။ ဒါက မဖြစ်နိုင်ပေမယ့် ကိုယ့်ကိုယ်ကို အကောင်းဆုံး ပြင်ဆင်ထားရမှာဖြစ်ပြီး ကစားသမားတွေ ကလည်း ပြင်ဆင်ထားရပါမယ်။ သူတို့ ကြုံတွေ့ရမယ့် အရာတွေကို ပြောပြထားရမှာ ဖြစ်သလို ဒါကိုလည်း အသိ အမှတ် ပြုရပါမယ်။ အသင်းဟာ စိတ်အားထက်သန်မှုနဲ့ အပေါင်းလက္ခဏာဆောင်တဲ့ အရာတွေကတော့ အပြည့်ရှိ နေပါတယ်”လို့ ပြောခဲ့ပါတယ်။

အာဆင်နယ်အသင်းဟာ အခုနှစ်ရာသီ အိမ်ကွင်းမှာ လီဗာပူးလ်အသင်းကို ဧည့်ခံကစားခဲ့တာမှာတော့ ၃ ဂိုး- ၂ ဂိုးနဲ့ အနိုင်ရထားတာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဧပြီ ၈

ဘန်လေအသင်းဟာ မယ်ဒယ်ဘရော့အသင်းနဲ့ ကစားခဲ့တဲ့ ချန်ပီယံရှစ်ပွဲစဉ်မှာ ၂ ဂိုး- ၁ ဂိုးနဲ့ အနိုင်ရပြီးနောက် လာမယ့်ရာသီ ပရီးမီးယားလိဂ်ကို တန်းပြန်တက်နိုင်ခဲ့ပြီ ဖြစ်ပါတယ်။

ဒီပွဲရဲ့ ပွဲချိန် ၁၂ မိနစ်မှာ ဘားနတ်စ်က ဘန်လေအတွက် ဦးဆောင်ဂိုး သွင်းယူပေးနိုင်ခဲ့ပေမယ့် ၄၈ မိနစ်မှာ အက်ပွန်က မယ်ဒယ်ဘရော့အတွက် ချေပဂိုး ပြန်သွင်းပေးခဲ့လို့ ၁ ဂိုးစီ သရေကျနေခဲ့တာပါ။

ဒါပေမယ့် ၆၆ မိနစ်မှာ ရော်ဘတ်စ်က ဘန်လေအတွက် အဖိုးတန် အနိုင်ဂိုး သွင်းယူပေးခဲ့လို့ ဘန်လေအသင်း နိုင်ပွဲရယူနိုင်ခဲ့တာ ဖြစ်ပါတယ်။

ဘန်လေအသင်းဟာ ဒီနိုင်ပွဲကြောင့် ချန်ပီယံရှစ် ပြိုင်ပွဲပြီးဆုံးဖို့ ၇ ပွဲအလိုမှာ တတိယနေရာက လူတန်အသင်းကို ၁၉ မှတ်အထိ ဖြတ်ထားနိုင်ခဲ့ပါတယ်။ လူတန်အသင်းဟာ ဘန်လေအသင်းထက် ၁ ပွဲ ပိုကစားထားတာကြောင့် ဘန်လေအသင်းဟာ ပရီးမီးယားလိဂ်ကို တန်းပြန်တက်ဖို့ သေချာခဲ့တာ ဖြစ်ပါတယ်။

ပြီးခဲ့တဲ့နှစ် ရာသီကမှ ပရီးမီးယားလိဂ်ကနေ ချန်ပီယံရှစ်ကို တန်းဆင်းခဲ့တဲ့ ဘန်လေအသင်းဟာ တစ်ရာသီအကြာ မှာပဲ နည်းပြ ကွန်ပနီရဲ့ ဦးဆောင်မှုနဲ့ လာမယ့်နှစ်ရာသီ ပရီးမီးယားလိဂ်ပြိုင်ပွဲကို ပြန်လည် ယှဉ်ပြိုင်ခွင့် ရခဲ့တာပါ။

ဘန်လေအသင်းဟာ လက်ကျန် ၇ ပွဲမှာ ရမှတ် ၁၁ မှတ် ရယူနိုင်ရင် ချန်ပီယံရှစ် အမှတ်ပေးဖလားကို ရယူနိုင်မှာ ဖြစ်ပြီး ရမှတ် ၁၃ မှတ် ရယူနိုင်ခဲ့ရင်တော့ ၂၀၁၃-၁၄ ရာသီက လက်စတာအသင်း နောက်ပိုင်း ချန်ပီယံရှစ်ပြိုင်ပွဲမှာ ရမှတ် ၁၀၀ ရယူနိုင်တဲ့ ပထမဆုံးအသင်းအဖြစ်လည်း မှတ်တမ်းတင်နိုင်မှာ ဖြစ်ပါတယ်။

နည်းပြ ကွန်ပနီနဲ့ ဘန်လေအသင်းသားကိုတွေ့ရစဉ်

မန်စီးတီး နောက်ခံလူဟောင်း ကွန်ပနီကတော့ ဘန်လေအသင်းဟာ ပရီးမီးယားလိဂ်ကို တန်းတက်နိုင်ပြီးနောက် ဒီထက်ပိုပြီး သွားနိုင်တယ်လို့ ပြောခဲ့တာပါ။

ကွန်ပနီက “သူတို့တွေ ကလေးတွေလို အောင်ပွဲခံနေတာ မြင်တွေ့ရတာက ပျော်စရာကောင်းပါတယ်။ ပွဲစဉ် ၇ ပွဲ ကျန်နေသေးပေမယ့် ကျနော်တို့ အောင်ပွဲခံပြီးနေပါပြီ၊ ဒါကို မမျှော်လင့်ထားပါဘူး။ ကျနော်တို့ ဒီထက် ပိုပြီးသွား လို့ ရပါတယ်။ ဒါက ရည်မှန်းချက်ပါပဲ”လို့ ပြောခဲ့ပါတယ်။

ဘန်လေအသင်းဟာ ပရီးမီးယားလိဂ်မှာ ၆ ရာသီကြာ ရှိခဲ့ပေမယ့် မနှစ်က တန်းဆင်းခဲ့ရလို့ အဓိက ကစားသမား တွေ အများအပြားကို ဆုံးရှုံးခဲ့ရတာပါ။ ဘန်လေအသင်း တိုက်စစ်မှူး ဘားနတ်စ်က ချန်ပီယံအဖြစ်နဲ့ ပရီးမီးယား လိဂ်ကို သွားချင်တယ်လို့ ပြောခဲ့ပါတယ်။
ဘားနတ်စ်က “ကျနော်တို့ ရှေ့ဆက်ဖို့ အချိန်တန်ပါပြီ။ ဝန်ထမ်းတွေ၊ ကစားသမားတွေနဲ့ ပရိသတ်တွေအတွက် ကျနော် ဝမ်းသာပါတယ်။ သူတို့တွေဟာ ခက်ခဲတဲ့ အချိန်တွေကို ဖြတ်သန်းခဲ့ရပြီး ဒီနေ့မှာ သူတို့ကို ပြန်ပေးနိုင်ခဲ့ လို့ ဝမ်းသာပါတယ်။ ကျနော်တို့ဟာ အချိန်တိုင်းကို ပျော်ရွှင်နေမှာဖြစ်ပြီး အခု အလုပ်ပြီးသွားပေမယ့် ချန်ပီယံ အဖြစ်နဲ့ အဆုံးသတ် ချင်ပါတယ်”လို့ ပြောခဲ့ပါတယ်။

Source: BBC

CNI Sport News

၂၀၂၃ ခုနှစ်၊ ဧပြီ ၇

လူအုပ်ထဲက ပစ်ချတဲ့ အရာဝတ္ထုတွေဟာ ကစားသမားတွေ ဒါမှမဟုတ် ဒိုင်လူကြီးတွေကို ထိမှန်ခဲ့မယ်ဆိုရင် ဒတ်ချ်ဘောလုံးပွဲတွေကို ဖျက်သိမ်းမယ်လို့ နိုင်ငံရဲ့ ဘောလုံးအဖွဲ့ချုပ်က ပြောပါတယ်။

အေဂျတ်စ်အသင်းက ဖီယင်နုအသင်းကို ၂ ဂိုး- ၁ ဂိုးနဲ့ အနိုင်ရခဲ့တဲ့ ဒတ်ချ်ဖလား ဆီမီးဖိုင်နယ်ပွဲစဉ်မှာ အေဂျတ်စ် ကွင်းလယ်လူ ကလာဆန်ဟာ လူအုပ်ကြီးထဲက ပစ်ချတဲ့ မီးခြစ်က ဦးခေါင်းကို ထိမှန်ခဲ့တာပါ။

ဒီပွဲမှာ ပွဲချိန်မိနစ် ၃၀ နီးပါး ရပ်တန့်ခဲ့ရပြီး ရဲတွေက အမျိုးသားတစ်ဦးကို ဖမ်းဆီးထိန်းသိမ်းခဲ့ပါတယ်။

ဒတ်ချ်ဘောလုံးအဖွဲ့ချုပ်ကတော့ ဒါကို လုံးဝ လက်ခံနိုင်မှာ မဟုတ်ဘဲ ဒိုင်လူကြီးတွေ အနေနဲ့ ဒီလိုမျိုးဖြစ်ရပ်တွေ ထပ်ပြီးဖြစ်ခဲ့ရင် ပွဲကို ချက်ချင်း အဆုံးသတ်ရမယ်လို့ ပြောခဲ့တာပါ။

ဒီနှစ်သင်း ကစားခဲ့တဲ့ပွဲ မစတင်ခင်မှာလည်း ပရိသတ်တွေက မီးရှူးမီးပန်းတွေ ပစ်လွှတ်ခဲ့တဲ့အတွက် ပွဲကို စတင်ဖို့ နှောင့်နှေးခဲ့ရသလို ဂျူးဆန့်ကျင်တဲ့ အော်ဟစ်မှုတွေလည်း ပြုလုပ်ခဲ့ကြပါတယ်။

အဲဒါကြောင့် ဖီယင်နုအသင်းဟာ ဧပြီလ ၁၃ ရက် ရိုးမားအသင်းနဲ့ ကစားရမယ့် ယူရိုပါလိဂ်ပွဲစဉ်မှာ မီးခြစ်ပစ်ချခဲ့တဲ့ ထိုင်ခုံ ၂၀၀၀ ဆန့်အပိုင်းကို ပိတ်ပင်ပြီး ယှဉ်ပြိုင်ရမှာပါ။

ဒတ်ချ်ဘောလုံးပွဲ တစ်ပွဲမှာ ပရိသတ်က သောင်းကျန်းလို့ ပွဲရပ်ခဲ့ရ

အဲဗာတန် ကစားသမားဟောင်း ကလာဆန်ကို မီးခြစ်နဲ့ ပစ်ချခဲ့တဲ့ အသက် ၃၂ နှစ်အရွယ်ရှိ အမျိုးသားအပြင် လူ ၂၂ ဦးကို ဖမ်းဆီးထားတယ်လို့ ရဲတပ်ဖွဲ့က ကြာသပတေးနေ့က ပြောခဲ့ပါတယ်။

ဖီဖာအကြီးအကဲ အင်ဖန်တီနိုဟာ ဒီဖြစ်ရပ်တွေနဲ့ ပတ်သက်ပြီး အရေးယူပေးဖို့ နယ်သာလန်အာဏာပိုင်တွေကို တောင်းဆိုခဲ့သလို နယ်သာလန် ဝန်ကြီးချုပ်ကလည်း ဒီအဖြစ်အပျက်ကို လုံးဝသည်းမခံနိုင်ဘူးလို့ ပြောခဲ့တာ ဖြစ်ပါတယ်။

နိုင်ငံအစိုးရကတော့ အမြင့်ဆုံးအဆင့်မှာ စုံစမ်းစစ်ဆေးမှုတွေ ပြုလုပ်ပေးဖို့ ကတိပြုထားတာပါ။

အေဂျတ်စ်ကွင်းလယ်လူ ကလာဆန်ဟာ ဒီဖြစ်ရပ်အပြီးမှာ ကုသမှုတွေ ခံယူပြီး ပြန်ကစားခဲ့ပေမယ့် မူးဝေတာကို ခံစားခဲ့ရလို့ လူစားလဲမှု ပြုလုပ်ခဲ့ရတာ ဖြစ်ပါတယ်။

ဒီပွဲမှာ အနိုင်ရခဲ့တဲ့ အေဂျတ်စ်အသင်းကတော့ ဒတ်ချ်ဖလားဗိုလ်လုပွဲအဖြစ် ပီအက်စ်ဗွီအသင်းနဲ့ ဧပြီလ ၃၀ ရက် မှာ ယှဉ်ပြိုင်ရမှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ ဧပြီ ၇

ဘောလုံးပွဲ ဝေဖန်သုံးသပ်သူအဖြစ် ဆောင်ရွက်နေတဲ့ ပေါလ်မာဆင်က အာဆင်နယ်အသင်း အနေနဲ့ တနင်္ဂနွေနေ့ မှာ ကစားမယ့် လီဗာပူးလ်အသင်းနဲ့ပွဲမှာ အနိုင်ရရင် ပရီးမီးယားလိဂ် ချန်ပီယံဆုကို ရယူနိုင်မယ်လို့ ယုံကြည် ကြောင်း ပြောခဲ့ပါတယ်။

ပေါလ်မာဆင်က “ဒီပွဲက အာဆင်နယ်အတွက် စိုးရိမ်စရာပါ။ လီဗာပူးလ်အသင်းဟာ ချယ်လ်ဆီးအသင်းနဲ့ ပွဲမှာ ဆာလတ်၊ ဗန်ဒိုက်၊ ရော်ဘတ်ဆန်နဲ့ အာနိုးလ်တို့ကို ပွဲထွက်လူစာရင်းမှာ အသုံးမပြုခဲ့ပါဘူး။ ကလော့ပ်က ဒီ ကစားသမားတွေကို အာဆင်နယ်နဲ့ပွဲအတွက် ထားထားတဲ့ပုံပါပဲ။ အာဆင်နယ်နဲ့ပွဲမှာ သူတို့ ထပ်ပြီး မပါလာရင် အံ့သြစရာတွေ ဖြစ်မှာပါ။ အိမ်ကွင်းမှာ ကစားရမယ့် အာဆင်နယ်နဲ့ပွဲက ကလော့ပ်အတွက် ပိုအရေးကြီးပုံရပြီး အာဆင်နယ် ပရိသတ်အနေနဲ့ ကျနော့်ကို စိုးရိမ်စေပါတယ်။ အာဆင်နယ်က ဒီပွဲသာနိုင်ရင် ပရီးမီးယားလိဂ် ရနိုင် မယ်လို့ ထင်ကြောင်း”ပြောခဲ့တာပါ။

အာဆင်နယ်အသင်းဟာ အန်ဖီးလ်မှာ ကစားမယ့် လီဗာပူးလ်နဲ့ပွဲ မတိုင်ခင်မှာ ပရီးမီးယားလိဂ် အမှတ်ပေးဇယား ကို ၈ မှတ်ဖြတ်ထားပြီး ဒုတိယနေရာက မန်စီးတီးအသင်းဟာ စနေနေ့မှာ ဆောက်သမ်တန်အသင်းနဲ့ အဝေးကွင်း ပွဲစဉ်ယှဉ်ပြိုင်ရမှာ ဖြစ်ပါတယ်။

အာဆင်နယ်အသင်းကိုတွေ့ရစဉ်

အာဆင်နယ်အသင်းဟာ မန်စီးတီးအသင်းထက် ၁ ပွဲ ပိုကစားထားပြီး အမှတ်ပေးဇယားကို ဦးဆောင်နေပေမယ့် လက်ကျန် ပွဲစဉ်တွေမှာ လီဗာပူးလ်အသင်းနဲ့ပွဲ အပါအဝင် မန်စီးတီး၊ ချယ်လ်ဆီး၊ နယူးကာဆယ် စတဲ့ ပွဲကြီး ပွဲကောင်းတွေ ပါဝင်နေတာပါ။

ဂွာဒီယိုလာရဲ့ မန်စီးတီးအသင်းဟာ ၂၀၁၉ နဲ့ ၂၀၂၂ တွေမှာ ဒီလို အခြေအနေတွေကနေ လီဗာပူးလ်ကို ကျော်ဖြတ် ပြီး ဆုဖလား ရယူနိုင်ခဲ့တဲ့ အတွေ့အကြုံတွေ ရှိနေတာ ဖြစ်ပါတယ်။

အာဆင်နယ် အသင်းကတော့ ၁၉ နှစ်ကြာ ဝေးကွာနေတဲ့ ဆုဖလားကို အခုနှစ်ရာသီမှာ အရယူဖို့ ဆုံးဖြတ်ထားပြီး ပေါလ်မာဆင်ကလည်း လီဗာပူးလ်နဲ့ပွဲဟာ သူတို့ရဲ့ ကံကြမ္မာကို အဆုံးအဖြတ် ပေးနိုင်မယ်လို့ ယုံကြည်နေတာပါ။

ပေါလ်မာဆင်က “အာဆင်နယ်အသင်းဟာ နယူးကာဆယ်နဲ့ ကစားရမယ့် ပွဲကြီးပွဲကောင်းတွေ ရှိနေပေမယ့် လီဗာပူးလ်နဲ့ပွဲမှာ ပိုကောင်းအောင် လုပ်နိုင်ခဲ့မယ်ဆိုရင် အာဆင်နယ်အနေနဲ့ သူတို့ကို အနိုင်ယူဖို့ မလိုအပ်ပါဘူး။ လီဗာပူးလ်ကို နိုင်ရင်တော့ သူတို့အနေနဲ့ ကြီးကြီးမားမား ခြေချော်မှသာ ချန်ပီယံဆုကို ဆုံးရှုံးသွားမှာပါ။ လီဗာပူးလ်က မကြာသေးခင်က ယူနိုက်တက်ကို အိမ်ကွင်းမှာ အနိုင်ယူခဲ့ပါတယ်။ ဒီပွဲက အာဆင်နယ်အတွက် ခက်ခဲတဲ့ပွဲ ဖြစ်လာမယ်”လို့ ပြောခဲ့တာပါ။
ပေါလ်မာဆင်ကတော့ ဒီပွဲမှာ အာဆင်နယ်အသင်းက လီဗာပူးလ်အသင်းကို ၂ ဂိုး- ၁ ဂိုးနဲ့ အနိုင်ရမယ်လို့ ခန့်မှန်း ခဲ့တာ ဖြစ်ပါတယ်။

Source: Metro

CNI Sport News

၂၀၂၃ ခုနှစ်၊ ဧပြီ ၇

ပီအက်စ်ဂျီအသင်းဟာ ၂၀၂၃-၂၄ ရာသီအတွက် လက်မှတ်တွေရောင်းချခဲ့တာမှာ ဘတ်ပီပါဝင်တဲ့ ဗွီဒီယိုကို အသုံးပြုခဲ့တာကြောင့် ကစားသမားဟာ ဒေါသထွက်နေပြီး ဒီအသင်းဟာ ကိုင်လီယန်စိန့်ဂျာမိန်း မဟုတ်ဘူးလို့ ပြောခဲ့ပါတယ်။

ဘတ်ပီက “ကျနော့်ရဲ့ အင်တာဗျူးပါဝင်ခဲ့တာကို အကြောင်းကြားခဲ့ခြင်းမရှိပါဘူး။ဒါက ကလပ်ရဲ့ ဈေးကွက် ရှာဖွေရေးအတွက် အခြေခံအင်တာဗျူးလိုပါပဲ။ဒီတင်ထားတဲ့ ဗွီဒီယိုကို ကျနော်သဘောမတူပါဘူး။ ဒါကြောင့် ကျနော်က တစ်ဦးချင်းပုံရိပ်အသုံးပြုခွင့်နဲ့ပတ်သက်ပြီး တိုက်ပွဲဝင်တာပါ။ပီအက်စ်ဂျီက အသင်းကြီးနဲ့ မိသားစု ကြီးပါ။ကိုင်လီယန်စိန့်ဂျာမိန်းမဟုတ်ဘူးဆိုတာ အသေအချာပါပဲ” လို့ အင်စတာဂရမ်မှာ ရေးသားခဲ့တာပါ။

ဘတ်ပီဟာ ပီအက်စ်ဂျီရဲ့ကြော်ငြာမှာ ရှေ့ဆုံးကနေပါဝင်ခဲ့ပြီး သူ့ရဲ့အင်တာဗျူး၊ အသင်းရဲ့ပွဲစဉ်တွေနဲ့ ပရိသတ် တွေရဲ့ အားပေးမှုတွေဟာ ဗွီဒီယိုထဲမှာ ပါဝင်နေတာဖြစ်ပါတယ်။ပီအက်စ်ဂျီအသင်းရဲ့ ရာသီသစ်အတွက် ဗွီဒီယိုမှာ နာမည်ကျော်ကစားသမား ၂ ဦးဖြစ်တဲ့ မက်ဆီနဲ့ နေမာတို့ မပါဝင်ခဲ့ပါဘူး။အဲဒါကြောင့် အသက် ၂၄ နှစ်အရွယ်ရှိ ကစားသမားက သူ့ရဲ့ပုံရိပ်ကို ဒီလိုနည်းနဲ့ အသုံးပြုတဲ့အပေါ် ကန့်ကွက်ခဲ့ပြီး ကလပ်က ကိုင်လီယန်စိန့်ဂျာမိန်း မဟုတ်ဘူးလို့ အခိုင်အမာပြောခဲ့တာပါ။

၇၅ စက္ကန့်ကြာတဲ့ ဒီဗွီဒီယိုဖိုင်မှာ ဘတ်ပီရဲ့ ပြောစကား၊ သူ့ရဲ့ မျက်နှာနဲ့ ကလပ်မှာ အခုအချိန်ထိ ရှိနေတာကို မီးမောင်းထိုးပြထားပြီး ပြင်သစ်တိုက်စစ်မှူးရဲ့ ပုံရိပ်ကို ကြီးကြီးမားမားအသုံးပြုထားတာဖြစ်ပါတယ်။ လာမယ့်နှစ် ရာသီမှာ မက်ဆီနဲ့ နေမာတို့ဟာ ပီအက်စ်ဂျီအသင်းမှာ ဆက်ပြီးရှိဖို့ မသေချာဘူးလို့ သတင်းတွေ ထွက်နေတာပါ။ အဲဒါကြောင့် ပြင်သစ်ကလပ်ဟာ ဘတ်ပီကစားတာကို ကွင်းထဲအထိ လာရောက်ကြည့်ဖို့ လာမယ့်နှစ်ရာသီ လက်မှတ်ရောင်းချတော့မှ ဆွဲဆောင်ထားပုံရတယ်လို့ သတင်းမှာ ဖော်ပြထားပါတယ်။

ဘတ်ပီဟာ ပီအက်စ်ဂျီအသင်းအတွက် ၂၅၁ ပွဲ ကစားအပြီးမှာ ၂၀၂ ဂိုး သွင်းယူကာ ၉၆ ဂိုးဖန်တီးထားပြီး အသင်း ရဲ့ဂိုးသွင်းအများဆုံးကစားသမားအဖြစ် ရပ်တည်နေတာပါ။ဘတ်ပီနဲ့ ပီအက်စ်ဂျီအသင်းတို့ ချုပ်ဆိုထားတဲ့ စာချုပ် ဟာ ၂၀၂၅ အထိ သက်တမ်းရှိနေပြီး ရီးရယ်လ်အသင်းရဲ့ ကာလကြာရှည် ချိတ်ဆက်မှုတွေတော့ ခံနေရတာ ဖြစ်ပါတယ်။ပရော်ဖက်ရှင်နယ် ကစားသမားဘဝကို မိုနာကိုအသင်းမှာ စတင်ခဲ့တဲ့ ဘတ်ပီဟာ ပီအက်စ်ဂျီအသင်း နဲ့အတူ ပြင်သစ်လိဂ်နဲ့ ပြင်သစ်ဖလားအများအပြားကို ရယူထားနိုင်ခဲ့တာပါ။

ဘတ်ပီဟာ ပီအက်စ်ဂျီအသင်းနဲ့ ချန်ပီယံလိဂ်ဖလား ရယူနိုင်ဖို့ မျှော်လင့်နေပေမယ့် အခုနှစ်ရာသီမှာလည်း ၁၆ သင်း အဆင့်ကနေ ထွက်ခွာခဲ့ရတာကြောင့် ဒီရာသီမှာ ရယူနိုင်စရာဆုဖလားအဖြစ် လီဂူးဝမ်းသာ ကျန်ရှိတော့တာ ဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဧပြီ ၇

ဂရေဟမ်ပေါ်တာနေရာမှာ ချယ်လ်ဆီးအသင်းရဲ့ ယာယီနည်းပြအဖြစ် ခန့်အပ်ခံခဲ့ရတဲ့ လမ်းပတ်က အသင်း ပရိသတ်တွေ လိုချင်တာကို ပေးမယ်လို့ ပြောလိုက်ပါတယ်။

လမ်းပတ်က “ဒါက ကျနော့်အတွက် လွယ်ကူတဲ့ဆုံးဖြတ်ချက်ပါပဲ၊ဒါက ကျနော့်ရဲ့ကလပ်ပါ။ကျနော်က အလွန် လက်တွေ့ကျတဲ့သူတစ်ဦးပါ။ချယ်လ်ဆီးကနေ ထွက်ခွာပြီးကတည်းက မတူညီတဲ့လမ်းကြောင်းပေါ်မှာ ရောက်ခဲ့ ပေမယ့် ရာသီအကုန်ထိ ကူညီပေးနိုင်မယ်ဆိုတဲ့ ယုံကြည်ချက်နဲ့ ပြန်လာခဲ့တာပါ။ချယ်လ်ဆီး ပရိသတ်တွေ ဂုဏ်ယူရတဲ့ အသင်းတစ်သင်းဖြစ်ဖို့အတွက် ကျနော်အစွမ်းကုန်ကြိုးစားသွားမှာပါ။ ချယ်လ်ဆီးပရိသတ်တွေနဲ့ ကျနော့်ရဲ့ဆက်ဆံရေးက အများကြီးပြောနေဖို့ မလိုအပ်ပါဘူး။သူတို့က ကျနော့်အတွက် ကြီးမားတဲ့ ပံ့ပိုးမှု တွေပေးခဲ့ပြီး အဲဒီအတွက်လည်း ကျနော်က ထာဝရကျေးဇူးတင်နေမှာပါ” လို့ ပြောခဲ့တာပါ။

ချယ်လ်ဆီးအသင်းဟာ ကစားသမားဟောင်းနဲ့ နည်းပြဟောင်းဖြစ်တဲ့ လမ်းပတ်ကို အခုနှစ်ရာသီအကုန်ထိ ယာယီနည်းပြအဖြစ် ခန့်အပ်ခဲ့ပါတယ်။လမ်းပတ်ဟာ ချယ်လ်ဆီးအသင်းကို ၂၀၁၉ ကနေ ၂၀၂၁ အထိ ပထမ အကြိမ် ကိုင်တွယ်ခဲ့ဖူးပြီး အဲဒီတုန်းက အသင်းရလဒ်ပိုင်းတွေ မကောင်းတာကြောင့် ထုတ်ပယ်ခံခဲ့ရတာပါ။ အင်္ဂလန်ကစားသမားဟောင်းဟာ ချယ်လ်ဆီးကနေ ထုတ်ပယ်ခံရပြီးနောက် ၂၀၂၂ မှာ အဲဗာတန်အသင်းကို ကိုင်တွယ်ခဲ့ပြီး မနှစ်ကရာသီက တန်းဆင်းဇုန်ကနေ လွတ်မြောက်အောင် စွမ်းဆောင်ပေးနိုင်ခဲ့ပေမယ့် ဒီရာသီမှာတော့ ရလဒ်ဆိုးတွေကြောင့် ဇန်နဝါရီလက ထုတ်ပယ်ခြင်းခံခဲ့ရပါတယ်။

ချယ်လ်ဆီးအသင်းဟာ ထုတ်ပယ်ခဲ့တဲ့ ဂရေဟမ်ပေါ်တာနေရာမှာ အစားထိုးဖို့ နည်းပြသစ်ရှာဖွေနေချိန်မှာ လမ်းပတ်ကို ရာသီအကုန်ထိ ယာယီနည်းပြအဖြစ် ခန့်အပ်ဖို့ ဆုံးဖြတ်ခဲ့ကာ ရာသီကုန်ချိန်မှသာ အမြဲတမ်း နည်းပြကို ခန့်အပ်သွားဖို့ ရှိနေတာပါ။ချယ်လ်ဆီးအသင်းကို ပြန်လာတာဟာ မပြီးပြတ်သေးတဲ့လုပ်ငန်း တွေကြောင့် မဟုတ်ဘဲ ကလပ်ကို ပြန်ပြီးတည်ငြိမ်အောင်လုပ်ဖို့အတွက်သာ အာရုံစိုက်မယ်လို့ လမ်းပတ်က ပြောခဲ့ပါတယ်။

လမ်းပတ်က “ဒီထိုင်ခုံမှာ ဘယ်တော့မှရှိမှာမဟုတ်ဘူးဆိုပြီး ကျနော်မတွေးထားပါဘူး။ကျနော်က ယုံကြည်မှု ရှိတဲ့သူတစ်ဦးပါ။မပြီးပြတ်သေးတဲ့လုပ်ငန်းတွေကြောင့် ပြန်လာတာမဟုတ်ပါဘူး။အခုအချိန်ဟာ မတူညီတဲ့ ကာလတစ်ခုကို ရောက်ရှိနေပြီး ကျနော်တတ်နိုင်သမျှ အကောင်းဆုံးလုပ်ဆောင်သွားမှာပါ။ကျနော့်ရဲ့ ပစ်မှတ် ကတော့ ယုံကြည်မှုအမြင့်မားဆုံးနဲ့ ပွဲအများအပြားကို အနိုင်ရချင်ပါတယ်။ကျနော်တို့အတွက် ရှေ့လာမယ့် ပွဲတွေမှာ ပွဲကြီးပွဲကောင်းတွေရှိပေမယ့် ကစားသမားတွေအနေနဲ့ ယုံကြည်မှုရှိဖို့လိုပါတယ်” လို့ ပြောခဲ့တာပါ။

လမ်းပတ်ဟာ စနေနေ့မှာ ကစားမယ့် ဝုလ်ဗ်စ်အသင်းနဲ့ ပရီးမီးယားလိဂ်ပွဲမှာ ချယ်လ်ဆီးအသင်းကို ယာယီ နည်းပြ အဖြစ် စတင်ကိုင်တွယ်သွားမှာ ဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဧပြီ ၆

၂၀၂၃ အာရှဖလားပြိုင်ပွဲကို ၂၀၂၄ ခုနှစ်၊ ဇန်နဝါရီ ၁၂ ရက်ကနေ ဖေဖော်ဝါရီ ၁၀ ရက်အထိ ကာတာမှာ ကျင်းပ သွားမယ်လို့ အာရှဘောလုံးအဖွဲ့ချုပ်က ဧပြီလ ၅ ရက်နေ့က အတည်ပြုလိုက်ပါတယ်။

ဒီပြိုင်ပွဲကို အိမ်ရှင်အဖြစ် ကျင်းပဖို့ ၂၀၁၉ ကတည်းက တရုတ်ကို ပေးအပ်ခဲ့ပေမယ့် နိုင်ငံအတွင်း ကိုဗစ် မူဝါဒ တွေကြောင့် ပြီးခဲ့တဲ့နှစ်က အိမ်ရှင်အဖြစ် ကျင်းပခွင့်ကို စွန့်လွှတ်ခဲ့တာပါ။

တောင်ကိုရီးယားနဲ့ အင်ဒိုနီးရှားတို့ဟာ အာရှဖလားပြိုင်ပွဲကို အိမ်ရှင်အဖြစ် ကျင်းပခွင့်ရဖို့ ကာတာနဲ့ ပြိုင်ဆိုင် ခဲ့ပေမယ့် ကာတာဟာ ၂၀၂၂ ကမ္ဘာ့ဖလားပြိုင်ပွဲကို အိမ်ရှင်အနေနဲ့ ကျင်းပခဲ့တာကြောင့် အိမ်ရှင်အဖြစ် အာရှ ဘောလုံးအဖွဲ့ချုပ်က ရွေးချယ်ခဲ့ပါတယ်။

ပင်လယ်ကွေ့နိုင်ငံရဲ့ အပူဒဏ်ကို ရှောင်ရှားနိုင်ဖို့အတွက် ၂၄ သင်းနဲ့ ကျင်းပမယ့် အာရှဖလားပြိုင်ပွဲကို ၂၀၂၃ ခုနှစ် အလယ်ကနေ ၂၀၂၄ အစပိုင်းကို ပြောင်းပြီး ကျင်းပဖို့ ဆုံးဖြတ်ခဲ့တာပါ။

ကာတာဟာ အာရှဖလားပြိုင်ပွဲကို ၁၉၈၈ နဲ့ ၂၀၁၁ တွေမှာ ၂ ကြိမ် ကျင်းပခဲ့ပြီး ၂၀၁၉ က ယူအေအီးမှာ ကျင်းပခဲ့ တဲ့ အာရှဖလားပြိုင်ပွဲမှာတော့ ချန်ပီယံဆုကို ရယူထားနိုင်ခဲ့ပါတယ်။

အာရှဖလားပြိုင်ပွဲကျင်းပမယ့် ကာတာနိုင်ငံရှိ ဘောလုံးကွင်များကိုတွေ့ရစဉ်

၂၀၂၃ အာရှဖလားပြိုင်ပွဲကို အားကစားကွင်း ၈ ကွင်းမှာ ကျင်းပသွားမှာ ဖြစ်ပြီး ဒီထဲက အားကစားကွင်း ၆ ကွင်း ကတော့ ပြီးခဲ့တဲ့ ကမ္ဘာ့ဖလားပြိုင်ပွဲမှာ အသုံးပြုခဲ့တာပါ။

ဒီပြိုင်ပွဲအတွက် အုပ်စုမဲခွဲမှုကို မေလ ၁၁ ရက် ဒိုဟာမှာ ပြုလုပ်သွားမှာဖြစ်ပြီး အိမ်ရှင်လည်းဖြစ်၊ လက်ရှိ ချန်ပီယံ လည်းဖြစ်တဲ့ ကာတာအသင်းဟာ မဲအိုး ၁ မှာ ဂျပန်၊ အီရန်၊ တောင်ကိုရီးယား၊ သြစတြေးလျ၊ ဆော်ဒီတို့နဲ့ အတူ ကျရောက်နေတာ ဖြစ်ပါတယ်။
အာဆီယံ အသင်းတွေဖြစ်တဲ့ ဗီယက်နမ်၊ ထိုင်း၊ မလေးရှားနဲ့ အင်ဒိုနီးရှားတို့လည်း ခြေစစ်ပွဲ အောင်မြင်ခဲ့လို့ ဒီပြိုင်ပွဲမှာ ဝင်ရောက်ယှဉ်ပြိုင်မှာပါ။

အာရှဖလား ဗိုလ်လုပွဲဟာ အိုင်ဗရီကို့စ်မှာ ဇန်နဝါရီ ၁၃ ရက်ကနေ ဖေဖော်ဝါရီ ၁၁ ရက်အထိ ကျင်းပမယ့် အာဖရိကနိုင်ငံများဖလား ဗိုလ်လုပွဲနဲ့ တိုက်ဆိုင် နေတယ်လို့လည်း သိရပါတယ်။

Source: CNA

CNI Sport News

၂၀၂၃ ခုနှစ်၊ ဧပြီ ၆

ယူကရိန်းအစိုးရဟာ သူတို့ရဲ့ အားကစားသမားတွေကို ရုရှား ဒါမှမဟုတ် ဘယ်လာရုစ်နဲ့ ယှဉ်ပြိုင်ခဲ့မယ်ဆိုရင် အမျိုးသားအဆင့် အဖွဲ့ချုပ်တွေကနေ ဖယ်ရှားသွားမယ်လို့ ပြောခဲ့တဲ့အပေါ် ဆန့်ကျင်ကန့်ကွက် သွားမယ်လို့ နိုင်ငံတကာ အိုလံပစ်ကော်မတီ(IOC) က ပြောပါတယ်။

နိုင်ငံတကာအိုလံပစ်ကော်မတီက “ဒီလို ဆုံးဖြတ်ချက်မျိုးက ယူကရိန်း အားကစား အသိုက်အဝန်းနဲ့ အမျိုးသား အားကစား အဖွဲ့ချုပ်တွေကိုပဲ ထိခိုက်နစ်နာစေမှာပါ။ ကမ္ဘာက ရပ်တန့်ချင်တဲ့ စစ်ပွဲကို ဘယ်လိုမှ သက်ရောက်မှု ရှိမှာ မဟုတ်သလို IOC ကလည်း ဒါကို ပြင်းပြင်းထန်ထန် ရှုတ်ချပါတယ်”လို့ အွန်လိုင်းပေါ်မှာ တင်ထားတဲ့ ကြေညာချက်မှာ ဖော်ပြထားတာပါ။

နိုင်ငံတကာအိုလံပစ်ကော်မတီဟာ ရုရှားက ယူကရိန်းကျူးကျော်မှု ပြုလုပ်ပြီးနောက် ရုရှားနဲ့ ဘယ်လာရုစ်ကို ပိတ်ပင် အရေးယူမှုတွေ ပြုလုပ်ခဲ့ပေမယ့် ပြီးခဲ့တဲ့ အပတ်မှာတော့ ဒီနှစ်နိုင်ငံက အားကစားသမားတွေကို နိုင်ငံတကာပြိုင်ပွဲတွေမှာ ကြားနေအဖြစ် ဝင်ရောက် ယှဉ်ပြိုင်ခွင့်ပြုဖို့ အကြံပြုထားပါတယ်။

ယူကရိန်းအစိုးရဟာ သူတို့ရဲ့ အားကစားသမားတွေကို ရုရှား ဒါမှမဟုတ် ဘယ်လာရုစ် အားကစားသမားတွေနဲ့ နိုင်ငံတကာစင်မြင့်ပေါ်မှာ ယှဉ်ပြိုင်မယ်ဆိုရင် သူတို့အဖွဲ့ချုပ်တွေရဲ့ ရပ်တည်မှုတွေဟာ ဆုံးရှုံးရလိမ့်မယ်လို့ ပြောခဲ့တာပါ။

အိုလံပစ်ပွဲတော်ကိုတွေ့ရစဉ်

အဲဒါကြောင့် နိုင်ငံတကာ အိုလံပစ်ကော်မတီက ယူကရိန်းအစိုးရရဲ့ ပြောဆိုမှုကို တုန့်ပြန်လာခဲ့သလို ယူကရိန်း အားကစားအဖွဲ့ချုပ်တွေနဲ့ ပတ်သက်ပြီး လေးနက်တဲ့ မေးခွန်းတွေဟာ မြင့်တက်လာခဲ့တယ်လို့လည်း ပြောခဲ့ပါ တယ်။

ယူကရိန်း ဘက်ကတော့ ရုရှား အားကစားသမားတွေသာ ပါဝင်ခဲ့မယ်ဆိုရင် ၂၀၂၄ ပဲရစ် အိုလံပစ်ပြိုင်ပွဲမှာ သူတို့ အားကစားသမားတွေကို ယှဉ်ပြိုင်ခွင့်မပြုဖို့ အရင်က ဆုံးဖြတ်ချက် ချထားတာပါ။

ရုရှား အားကစားသမားတွေကို အိုလံပစ်ပြိုင်ပွဲမှာ ပါဝင်ခွင့်ပြုရင် ဒီပြိုင်ပွဲကို သပိတ်မှောက်မယ်လို့ ယူကရိန်းက ခြိမ်းခြောက်ထားပေမယ့် နိုင်ငံတကာအိုလံပစ်ကော်မတီကတော့ ရုရှားနဲ့ ဘယ်လာရုစ် အားကစားသမားတွေ ပါဝင်မှာနဲ့ ပတ်သက်ပြီး သီးခြား ဆုံးဖြတ်ချက် တစ်ခုကို နောက်ပိုင်းမှာ ချမှတ်သွားဖို့ ရှိနေတာ ဖြစ်ပါတယ်။

Source: CNA