CNI Sport News
၂၀၂၄ ခုနှစ်၊ အောက်တိုဘာ ၁၁
ဂရမ်းဆလမ်း ချန်ပီယံဆုကို ၂၂ ကြိမ် ရရှိထားတဲ့ တင်းနစ်ဂန္ထဝင် ရာဖေးလ်နာဒယ်လ်ဟာ ဒီရာသီကုန်ရင် အနားယူ တော့မယ်လို့ ကြေညာခဲ့ပါတယ်။
ရာဖေးလ်နာဒယ်လ်က “ပရော်ဖက်ရှင်နယ် တင်းနစ်ကနေ အနားယူတော့မယ်ဆိုတာ ခင်ဗျားတို့ကို အသိပေးဖို့ ကျနော် ဒီမှာရှိနေပါတယ်။ ကျနော့်အတွက် ခက်ခဲတဲ့နှစ်တွေဖြစ်ခဲ့ပြီး အထူးသဖြင့် ပြီးခဲ့တဲ့ ၂ နှစ်ပါ။ အကန့် အသတ်တွေမရှိဘဲ ကစားနိုင်မယ်ဆိုတာ ကျနော်မထင်ပါဘူး”လို့ ပြောခဲ့တာပါ။
အသက် ၃၈ နှစ်အရွယ်ရှိ ရာဖေးလ်နာဒယ်လ်ဟာ နိုဝင်ဘာလတွင် ကျင်းပမယ့် Davis Cup Finals ပြိုင်ပွဲမှာ စပိန်နိုင်ငံကို ကိုယ်စားပြုပြီး သူ့ရဲ့နောက်ဆုံးပွဲစဉ်အဖြစ် ပါဝင်သွားမှာ ဖြစ်ပါတယ်။
စပိန်တင်းနစ် ကစားသမားဟာ ဒဏ်ရာတွေကြောင့် ပြီးခဲ့တဲ့ နှစ်ရာသီမှာ ပွဲအနည်းငယ်သာ ကစားနိုင်ခဲ့ပြီး ၂၀၂၄ ခုနှစ်အကုန်မှာ အနားယူမယ်လို့ ထင်ကြေးတွေ ထွက်ပေါ်ခဲ့တာပါ။
တကယ်လည်း ရာဖေးလ်နာဒယ်လ်ဟာ ဒီရာသီကုန်ရင် သူအနားယူတော့မယ်လို့ ကြေညာခဲ့တာဖြစ်ပါတယ်။
ရာဖေးလ်နာဒယ်လ်ကို တွေ့ရစဉ်
မြေစေးကွင်းဘုရင်လို့ လူသိများတဲ့ ရာဖေးလ်နာဒယ်လ်ဟာ ပြင်သစ်အိုးပန်း ချန်ပီယံဆုကို စံချိန်တင် ၁၄ ကြိမ် ရယူနိုင်ခဲ့ပြီး Roland Garros မှာကစားတဲ့ အဓိကပွဲပေါင်း ၁၁၆ ပွဲမှာ ၁၁၂ ပွဲအထိ အနိုင်ရရှိခဲ့တာပါ။
ရာဖေးလ်နာဒယ်လ်ဟာ အိုလံပစ်ပြိုင်ပွဲရဲ့တစ်ဦးချင်းနဲ့ နှစ်ယောက်တွဲ ပြိုင်ပွဲတွေမှာ ရွှေတံဆိပ် ရယူနိုင်ခဲ့သလို Davis Cup ပြိုင်ပွဲမှာ စပိန်အသင်းကို ချန်ပီယံဆု ၄ ကြိမ်ရရှိအောင် ကူညီပေးနိုင်ခဲ့တာဖြစ်ပါတယ်။
ရာဖေးလ်နာဒယ်လ်က “ဒါက ခက်ခဲတဲ့ ဆုံးဖြတ်ချက်ဖြစ်ပြီး ဆုံးဖြတ်ချက်ချဖို့ အချိန်ယူခဲ့ရပါတယ်။ ဒါပေမယ့် ဘဝမှာ အရာအားလုံးဟာ အစနဲ့အဆုံးရှိပါတယ်။ ကျနော်ဟာ ထင်ထားတာထက်ကို အများကြီးလည်း ပိုအောင်မြင်မှု ရရှိခဲ့ပါတယ်။ ကျနော့်ရဲ့ နောက်ဆုံးပြိုင်ပွဲမှာ စပိန်နိုင်ငံကို ကိုယ်စားပြုရမှာဖြစ်လို့ အလွန်စိတ် လှုပ်ရှားပါတယ်”လို့ ပြောခဲ့တာပါ။
၂၀၂၄ Davis Cup Finals ပြိုင်ပွဲကို နိုဝင်ဘာ ၁၉ ရက်ကနေ ၂၄ ရက်အထိ ကျင်းပသွားမှာဖြစ်ပြီး စပိန်အသင်းဟာ ကွာတားဖိုင်နယ်အဖြစ် နယ်သာလန်အသင်းနဲ့ ယှဉ်ပြိုင်ရမှာဖြစ်ပါတယ်။
Source: BBC
