CNI Sport News

၂၀၂၃ ခုနှစ်၊ မေလ ၂

နိုင်ငံတကာခရီးသွားတွေအနေနဲ့ ကိုဗစ်ကာကွယ်ဆေးထိုးဖို့ မလိုအပ်တော့ဘူးလို့ အမေရိကန်ပြည်ထောင်စုက အတည်ပြုခဲ့ပြီးနောက် ကမ္ဘာ့နံပတ် ၁ တင်းနစ်ကစားသမား ဂျိုကိုဗစ်ဟာ အမေရိကန်အိုးပန်းပြိုင်ပွဲမှာ ပါဝင် ယှဉ်ပြိုင်ခွင့်ရရှိသွားခဲ့ပါတယ်။

ဂရမ်းဆလမ်းဆုကို ၂၂ ကြိမ်ရရှိထားတဲ့ ဂျိုကိုဗစ်ဟာ ကာကွယ်ဆေးမထိုးတဲ့အတွက် ပြီးခဲ့တဲ့နှစ်က အမေရိကန် အိုးပန်းပြိုင်ပွဲမှာ ပါဝင်ယှဉ်ပြိုင်ခွင့်မရခဲ့ပါဘူး။သူဟာ ပြီးခဲ့တဲ့ မာစတာပွဲ ၂ ပွဲဖြစ်တဲ့ အင်ဒီးယန်းဝဲလ်စ်နဲ့ မိုင်ယာမီ ပြိုင်ပွဲတို့ကိုလည်း ယှဉ်ပြိုင်ခွင့်မရခဲ့တာဖြစ်ပါတယ်။ဒါပေမယ့် အမေရိကန်က မေလ ၁၂ ရက်မှာ သူတို့ရဲ့ မူဝါဒကို ပြောင်းလဲမှာဖြစ်လို့ ဂျိုကိုဗစ်ဟာ အမေရိကန်မှာ ကျင်းပမယ့် ပြိုင်ပွဲတွေမှာ ပြန်လည်ယှဉ်ပြိုင်ခွင့်ရသွားခဲ့တာပါ။

“ကိုဗစ်ပြည်သူ့ကျန်းမာရေး အရေးပေါ်အခြေအနေပြီးဆုံးတဲ့နေ့ မေလ ၁၁ ရက် ကုန်ဆုံးချိန်မှာ ဗဟိုအစိုးရ ဝန်ထမ်းတွေ၊ ဗဟိုအစိုးရကန်ထရိုက်တာတွေနဲ့ နိုင်ငံတကာလေကြောင်းခရီးသည်တွေအတွက် ကိုဗစ်ကာကွယ် ဆေးနဲ့ ပတ်သက်တဲ့လိုအပ်ချက်တွေကို ရပ်ဆိုင်းတော့မယ်လို့ ကြေညာကြောင်း” အိမ်ဖြူတော်ရဲ့ ထုတ်ပြန်ချက် မှာ ဖော်ပြထားပါတယ်။

ဆားဘီးယားတင်းနစ်သမားဟာ ပြီးခဲ့တဲ့လတွေက ပြိုင်ပွဲယှဉ်ပြိုင်ချင်တာကြောင့် အမေရိကန်နိုင်ငံအတွင်း ဝင်ရောက်နိုင်ဖို့အတွက် အထူးခွင့်ပြုချက်လျှောက်ထားခဲ့ပေမယ့် ခွင့်မပြုတဲ့အတွက် မတ်လက အင်ဒီးယန်းဝဲလ်စ် ပြိုင်ပွဲကနေ နုတ်ထွက်ခဲ့ရတာပါ။ဂျိုကိုဗစ်ဟာ ပြီးခဲ့တဲ့နှစ် ဇန်နဝါရီလကလည်း ကိုဗစ်ကာကွယ်ဆေးမထိုးလို့ သြစတြေးလျကနေ ပြည်နှင်ဒဏ်ပေးခံခဲ့ရပေမယ့် တစ်နှစ်အကြာ အခုနှစ် ဇန်နဝါရီမှာတော့ ပြန်လည်ယှဉ်ပြိုင်ခွင့် ရခဲ့ကာ ချန်ပီယံဆုကို ရယူနိုင်ခဲ့တာဖြစ်ပါတယ်။

ဂျိုကိုဗစ်ဟာ လက်ရှိကျင်းပနေတဲ့ မက်ဒရစ်အိုးပန်းပြိုင်ပွဲမှာ ဒဏ်ရာကြောင့် မပါဝင်နိုင်ခဲ့ပေမယ့် အခုလကုန်ပိုင်း မှာ ကျင်းပမယ့် ပြင်သစ်အိုးပန်းပြိုင်ပွဲမှာ ပါဝင်ယှဉ်ပြိုင်နိုင်ဖို့ရှိနေပြီး ဂရမ်းဆလမ်းချန်ပီယံဆုကို စံချိန်တင် ၂၃ ကြိမ်မြောက်ရယူနိုင်ဖို့ ပစ်မှတ်ထားနေတာဖြစ်ပါတယ်။

Source:BBC

CNI Sport News

၂၀၂၃ ခုနှစ်၊ မေလ ၂

ဘုန်းမောက်အသင်းကို အရေးနိမ့်ခဲ့တဲ့ ပရီးမီးယားလိဂ်ပွဲ မတိုင်ခင်မှာ ပရိသတ်တွေကို လျစ်လျူရှုခဲ့တဲ့အတွက် လိဒ်စ်ယူနိုက်တက် အသင်းကစားသမားတွေက တောင်းပန်လိုက်ပါတယ်။

လိဒ်စ်ကစားသမားတွေက “ပထမဆုံး ပြောချင်တာက ကျနော်တို့ရဲ့ စွမ်းဆောင်ရည်က မလုံလောက်ပါဘူး။ ဒါကို ကြည့်ဖို့ တခြားနည်းလမ်းမရှိဘဲ အကောင်းဆုံး လုပ်ပြနိုင်ဖို့ နည်းလမ်းက ကွင်းထဲမှာပါ။ လိဒ်စ် ပရိသတ်တွေဟာ နိုင်ငံအတွင်း နေရာ အများအပြားကို သွားလာခဲ့ရတဲ့အတွက် ဒါကပိုပြီးတော့ ထိုက်တန်ပါတယ်။ လိဒ်စ်ဝတ်စုံ ဝတ်ဆင်ထားတဲ့ လူငယ်လေးအပေါ် ချစ်ခြင်းမေတ္တာတွေ မပြသနိုင်ခဲ့လို့ ဝမ်းနည်းကြောင်းကို စကားလုံးနဲ့တောင် ဖော်ပြလို့မရပါဘူး”လို့ ပြောခဲ့တာပါ။

လိဒ်စ် ကစားသမားတွေဟာ ဘုန်းမောက်အသင်းကို ၄ ဂိုး- ၁ ဂိုးနဲ့ ဂိုးပြတ် အရေးနိမ့်တဲ့ပွဲ မတိုင်ခင် ဟိုတယ်ကနေ ထွက်ခွာချိန် ကလေးငယ်တစ်ဦး အပါအဝင် ပရိသတ်တွေကို လျစ်လျူရှုတဲ့ ဗွီဒီယိုဖိုင် တစ်ခုဟာ ဆိုရှယ်မီဒီယာ ပေါ်မှာ ရောက်ရှိသွားခဲ့တာ ဖြစ်ပါတယ်။
ဒီအဖြစ်အပျက်ကြောင့် လိဒ်စ်ကစားသမားတွေဟာ ဝေဖန်မှုတွေ အများအပြားနဲ့ ရင်ဆိုင်ခဲ့ရတာပါ။ ဒီဗွီဒီယိုထဲမှာ ပါဝင်ခဲ့တဲ့ ကလေးငယ်တစ်ဦးရဲ့ ဖခင်ကတော့ ကစားသမားတွေ ဘက်ကနေ ကာကွယ်ခဲ့ပါတယ်။

လိဒ်စ်ယူနိုက်တက် ကစားသမားများ လျစ်လျူရှုနေသလို ကလေးငယ် တစ်ဦးက အားပေးနေစဉ်

“အယ်လ်လင်းက သူ့ကို လက်သီးနဲ့ လာထိုးတယ်၊ ဂါစီယာက လာပြီးမေးစေ့ကို ကိုင်ကာ စကားတွေ ပြောခဲ့ပါ တယ်။ ဟာရစ်ဆင်ကလည်း သူနဲ့အတူ ရယ်မောနေသလို၊ အာရွန်ဆင်က လက်မှတ်ရေးထိုး ပေးခဲ့ပါတယ်”လို့ ၎င်းက Yorkshire Post ကို ပြောခဲ့ပါတယ်။

လိဒ်စ်အသင်းဟာ နောက်ဆုံး ကစားခဲ့တဲ့ ပရီးမီးယားလိဂ် ၅ ပွဲမှာ ရမှတ် ၁ မှတ်သာ ရယူထားနိုင်ပြီး ရမှတ်တူ၊ ဂိုး ကွာခြားချက်နဲ့ တန်းဆင်းဇုန်အထက်မှာ ရပ်တည်နေတာ ဖြစ်ပါတယ်။

နည်းပြ ဂါစီယာရဲ့ အနာဂတ်နဲ့ ပတ်သက်ပြီး ကလပ်အသင်းဘက်က ဆွေးနွေးမှုတွေ ပြုလုပ်နေကာ ပရီးမီးယား လိဂ် ဝါရင့်နည်းပြ ဆမ်အလာဒွိုက်စ်နဲ့ အစားထိုးဖွယ် ရှိတယ်လို့လည်း သတင်းတွေမှာ ဖော်ပြထားတာပါ။

လိဒ်စ်အသင်းဟာ လာမယ့် ပရီးမီးယားလိဂ် ပွဲစဉ်အဖြစ် မန်စီးတီးအသင်းနဲ့ အဝေးကွင်းမှာ သွားရောက် ယှဉ်ပြိုင်ရမှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ မေလ ၂

အာဆင်နယ်အသင်းနည်းပြ အာတီတာက သူတို့ဟာ ပရီးမီးယားလိဂ်ချန်ပီယံဆုကို ရယူနိုင်သေးတယ်လို့ ချယ်လ်ဆီးအသင်းနဲ့ ကစားမယ့်ပွဲမတိုင်ခင် ပြုလုပ်တဲ့ ပွဲကြိုသတင်းစာရှင်းလင်းပွဲမှာ ပြောခဲ့ပါတယ်။

အာတီတာက “ကျနော်တို့ ပရီးမီးယားလိဂ်ချန်ပီယံဆုကို ရယူနိုင်ပါသေးတယ်။ပွဲကစားဖို့အတွက် ၅ ပွဲ ကျန်ရှိ နေသေးပြီး အဖြစ်အပျက်တွေအများကြီး ဖြစ်ပျက်နိုင်ပါသေးတယ်။ကျနော်တို့ လုပ်ရမှာက ပြီးခဲ့တဲ့အပတ်က ဖြစ်ပျက်ခဲ့တဲ့အရာကို မေ့လိုက်ဖို့ပါ။လန်ဒန်ဒါဘီပွဲစဉ်မှာ မှန်ကန်တဲ့အရာတွေကို လုပ်ရမှာပါ။ချယ်လ်ဆီးနဲ့ပွဲကို အနိုင်ရခဲ့ရင် အမှတ်ပေးဇယားထိပ်ဆုံးနေရာကို ပြန်လည်ရောက်ရှိသွားမှာပါ” လို့ ပြောခဲ့တာပါ။

ပရီးမီးယားလိဂ်အမှတ်ပေးဇယားကို ကာလကြာရှည်ရပ်တည်နိုင်ခဲ့တဲ့ အာဆင်နယ်အသင်းဟာ နောက်ဆုံး ကစားခဲ့တဲ့ ၄ ပွဲဆက်တိုက်နိုင်ပွဲ ပျောက်ဆုံးခဲ့တာဖြစ်ပါတယ်။အဲဒါကြောင့် စနေနေ့က ကစားခဲ့တဲ့ပွဲမှာ ဖူလ်ဟမ်အသင်းကို အနိုင်ရခဲ့တဲ့ မန်စီးတီးအသင်းဟာ အမှတ်ပေးဇယားထိပ်ဆုံးနေရာကို ၁ မှတ်အသာနဲ့ အာဆင်နယ်အသင်းဆီကနေ ပြန်လည်ရယူသွားနိုင်ခဲ့တာပါ။မန်စီးတီးအသင်းဟာ ပွဲကျန်ကစားဖို့ ကျန်ရှိနေ သေးပေမယ့် အာတီတာကတော့ အမှတ်ပေးဖလားကို အရှုံးပေးသွားမှာမဟုတ်ဘူးလို့ အခိုင်အမာ ပြောခဲ့တာ ဖြစ်ပါတယ်။

အာတီတာက “ကျနော်တို့ဟာ ပရီးမီးယားလိဂ်မရခဲ့ရင်တောင် အောင်မြင်တယ်ဆိုတဲ့ စကားလုံးကို နည်းပြတစ်ဦးအနေနဲ့ အသုံးမပြုချင်ပါဘူး။ကျနော်တို့ကြိုးစားခဲ့တာတွေ၊ ရည်မှန်းချက်တွေနဲ့ ကျနော်တို့ ဘာတွေလုပ်နေလဲ ဆိုတာကို သိပါတယ်။ကျနော်တို့ ကစားဖို့အတွက် ရာသီရဲ့ အကောင်းဆုံးအပိုင်းတွေ ရှိနေပါသေးတယ်။ ကျနော် တို့ဟာ ၅ ပွဲကစားဖို့ ကျန်သေးတဲ့အတွက် ဆုဖလားအတွက် ယှဉ်ပြိုင်မှုက မပြီးဆုံးသေးပါဘူး။ မနက်ဖြန် ကစားရ မယ့်ပွဲမှာ အနိုင်ယူရမှာပါ၊ဒါကိုပဲ ကျနော်တို့ လုပ်ဆောင်ရမှာပါ” လို့ ပြောခဲ့တာပါ။

အာဆင်နယ်အသင်းဟာ ဒီနှစ်ရာသီ ပရီးမီးယားလိဂ်ချန်ပီယံဆုကို မရယူနိုင်ခဲ့ရင်တောင်မှ ချန်ပီယံလိဂ်ဝင်ခွင့် ရခဲ့တာက သူတို့ရဲ့အောင်မြင်မှုလို့ ဘောလုံးဝေဖန်သုံးသပ်သူတွေနဲ့ ကစားသမားဟောင်းတွေက မှတ်ချက်ပြု ထားပါတယ်။အာဆင်နယ်အသင်းဟာ ချန်ပီယံလိဂ်ပြိုင်ပွဲကို ၂၀၁၆-၁၇ ရာသီက နောက်ဆုံးယှဉ်ပြိုင်ခဲ့ရတာဖြစ်ပြီး အဲဒီနောက်ပိုင်းမှာ ယူရိုပါလိဂ်ပြိုင်ပွဲမှာသာ ယှဉ်ပြိုင်ခဲ့ရတာပါ။ဒါပေမယ့် အာတီတာကတော့ ပရီးမီးယားလိဂ် ရယူ နိုင်ဖို့အတွက် ရာသီကုန်ဆုံးတဲ့အချိန်ထိ တိုက်ပွဲဝင်ချင်နေတာဖြစ်ပါတယ်။

အာဆင်နယ်အသင်းဟာ အခုနှစ်ရာသီ ပရီးမီးယားလိဂ်ပြိုင်ပွဲရဲ့ အမှတ်ပေးဇယားထိပ်ဆုံးနေရာကို ရက်ပေါင်း ၂၄၇ ရက်ကြာရပ်တည်နိုင်ခဲ့တယ်လို့ အချက်အလက်တွေအရ သိရပါတယ်။

Source:Metro

CNI Sport News

၂၀၂၃ ခုနှစ်၊ ဧပြီ ၂၉

ဘာစီလိုနာအသင်းရဲ့ နည်းပြ ဇာဗီက အသင်းထံ မက်ဆီ ပြန်လာနိုင်ဖို့ ဖြစ်နိုင်ခြေအတွက် လာလီဂါနဲ့ တွေ့ဆုံမှု တွေ ပြုလုပ်ခဲ့တယ်လို့ ပြောခဲ့ပါတယ်။

ဇာဗီက “ဘာစီလိုနာက လာလီဂါနဲ့ တွေ့ဆုံမှု ပြုလုပ်ခဲ့ပါတယ်။ ဒါပေမယ့် လီယို ပြန်ရောက်လာနိုင်ခြေ တစ်ခု တည်းအတွက် မဟုတ်ပါဘူး။ လာမယ့်နှစ်မှာတော့ အသင်းတိုးတက်လာဖို့ ကျနော်တို့ မြင်တွေ့ရမှာပါ။ ဒါပေမယ့် ဒါက အရေးကြီးတဲ့ ကိစ္စမဟုတ်သေးဘဲ ဆုဖလားရယူနိုင်မယ့် လိဂ်တော့ ရှိပါသေးတယ်။ ကျနော်တို့ဟာ ဘတ်စ်တစ် ပွဲနဲ့ လာလီဂါဆုဖလားကို ရယူဖို့ အာရုံစိုက်ထားပြီး ဒါတွေပြီးရင်တော့ ဖြစ်နိုင်ခြေရှိတဲ့ ခေါ်ယူမှုတွေနဲ့ ပတ်သက်ပြီး ပြောသွားမှာပါ”လို့ သတင်းထောက်တွေကို ပြောခဲ့တာပါ။

ဘာစီလိုနာအသင်းဟာ ၂၀၂၁ က အသင်းကနေ ထွက်ခွာပြီး အလွတ်ပြောင်းရွှေ့ကြေးနဲ့ ပီအက်စ်ဂျီကို ပြောင်းရွှေ့ သွားတဲ့ မက်ဆီကို ပြန်လည်ခေါ်ယူဖို့ စိတ်ဝင်စားနေတာ ဖြစ်ပါတယ်။

မက်ဆီနဲ့ ပီအက်စ်ဂျီတို့ ချုပ်ဆိုထားတဲ့ စာချုပ်ဟာ အခုရာသီအကုန်မှာ ကုန်ဆုံးတော့မှာဖြစ်ပြီး အခုအချိန်ထိ စာချုပ်သစ်အတွက် သဘောတူညီမှု မရသေးတာကြောင့် အပြောင်းအရွှေ့နဲ့ ပတ်သက်ပြီး ထင်ကြေးတွေ အမျိုးမျိုး ထွက်ပေါ်နေတာပါ။

မက်ဆီဟာ မကြာသေးခင် ရက်ပိုင်းက ဘာစီလိုနာဆီ လာရောက်ခဲ့တာကြောင့် အသင်းဟောင်းထံ ပြန်လာမယ့် အပြောင်းအရွှေ့ သတင်းတွေဟာ ပိုပြီး ကျယ်ပြန့်ခဲ့တာ ဖြစ်ပါတယ်။

မက်ဆီကိုတွေ့ရစဉ်

ဘာစီလိုနာ ပရိသတ်တွေဟာ မက်ဆီကို အသင်းထံ ပြန်လာဖို့ တောင်းဆိုမှုတွေ ရှိနေကြပြီး ဇာဗီ အပါအဝင် ကစားသမားဟောင်းတွေနဲ့ လက်ရှိ ကစားသမားတွေကပါ အာဂျင်တီးနား ကစားသမား ပြန်လာဖို့ အလိုရှိ နေကြတာပါ။

ဒါပေမယ့် မက်ဆီကတော့ အခုအချိန်ထိ အနာဂတ်နဲ့ ပတ်သက်ပြီး အရိပ်အမြွက်တောင် ပြောခြင်းမရှိလို့ ရာသီအကုန်ထိ စောင့်ဆိုင်းရမှာ ဖြစ်ပါတယ်။

ဘာစီလိုနာအသင်းဟာ ပြီးခဲ့တဲ့ရက်ပိုင်းက ကစားခဲ့တဲ့ လာလီဂါပွဲစဉ်မှာ ဗယ်လက်ကာနိုကို အရေးနိမ့်ခဲ့ပေမယ့် ဒုတိယနေရာက ရီးရယ်လ်အသင်းကလည်း အရေးနိမ့်ခဲ့တာကြောင့် စပိန်လာလီဂါ အမှတ်ပေးဇယားကို ရမှတ် ၁၁ မှတ်ဖြတ်ပြီး ဆက်လက် ဦးဆောင်နေတာပါ။

ဘာစီလိုနာအသင်းဟာ ဒီရာသီမှာ ဥရောပပြိုင်ပွဲတွေကနေ ထွက်ခွာခဲ့ရပြီး၊ ပြည်တွင်းဖလား ပြိုင်ပွဲဖြစ်တဲ့ ကိုပါဒယ်ရေးဖလား ကနေလည်း ထွက်ခွာထားခဲ့ရလို့ လာလီဂါ ဆုဖလားရယူနိုင်ဖို့ကို အပြည့်အဝ အာရုံစိုက်နေတာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ ဧပြီ ၂၉

ယူနိုက်တက် အကယ်ဒမီထွက်ကစားသမားဖြစ်တဲ့ ဂရင်းဝုဒ်ဟာ အသင်းအတွက် မကစားပေးတော့ဘူးဆိုပြီး သူငယ်ချင်းတွေကို ပြောခဲ့တယ်လို့ သတင်းတွေရဲ့ ဖော်ပြချက်အရ သိရပါတယ်။

ဂရင်းဝုဒ်ဟာ မုဒိမ်းမှုနဲ့ပတ်သက်တဲ့ စွဲချက်တွေအားလုံးကို ဖေဖော်ဝါရီလမှာ ရုပ်သိမ်းပေးခြင်းခံထားရပေမယ့် ယူနိုက်တက်အသင်းကတော့ အသင်းအတွက်ကစားခွင့်ကို ဆိုင်းငံ့ထားပြီး အသင်းအတွင်းပိုင်း စုံစမ်းစစ်ဆေးမှု တွေကို ဆက်လက်လုပ်ဆောင်ခဲ့တာပါ။၂၀၂၂ ခုနှစ်၊ ဇန်နဝါရီလအစောပိုင်းက ဖမ်းဆီးထိန်းသိမ်းခံခဲ့ရတဲ့ ဂရင်းဝုဒ် ဟာ အဲရစ်တန်ဟတ်ရဲ့အသင်းမှာ ပါဝင်နိုင်ဖို့ မျှော်လင့်ခဲ့တာဖြစ်ပါတယ်။

ဒါပေမယ့် အသက် ၂၁ နှစ်အရွယ်ရှိ ကြယ်ပွင့်ကစားသမားဟာ ယူနိုက်တက်အသင်းမှာ တစ်ပတ်လုပ်ခပေါင် ၇၀,၀၀၀ ရရှိနေပေမယ့် အခုအချိန်ထိ အသင်းနဲ့ လေ့ကျင့်ခန်းပြန်ဆင်းခွင့်မရသေးပါဘူး။ဂရင်းဝုဒ်နဲ့ ယူနိုက်တက် တို့ ချုပ်ဆိုထားတဲ့ စာချုပ်ဟာ ၂၀၂၅ နွေရာသီမှာ ကုန်ဆုံးတော့မှာပါ။ဂရင်းဝုဒ်နဲ့နီးစပ်သူတစ်ဦးက ကစားသမား ဟာ ယူနိုက်တက်နဲ့ ပြီးဆုံးသွားပြီလို့ ယုံကြည်နေကြောင်း The Sun ကို ပြောခဲ့တာဖြစ်ပါတယ်။

ဂရင်းဝုဒ်ဟာ ဘောလုံးပြန်ကစားဖို့ကို စိတ်ပိုင်းဖြတ်ထားပေမယ့် ယူနိုက်တက်ဂျာစီကို ထပ်ပြီး ဝတ်ဆင်မှာ မဟုတ်တော့ဘူးလို့ ပြောခဲ့တာပါ။ဂရင်းဝုဒ်ဟာ ယူနိုက်တက်ကစားသမားဘဝကို အမြန်ဆုံး ပြန်လည် ရယူချင်တာ ကြောင့် အသင်းတာဝန်ရှိသူတွေနဲ့ ပြီးခဲ့တဲ့လက ဆွေးနွေးမှုတွေကို ကျယ်ကျယ်ပြန့်ပြန့်ပြုလုပ်ခဲ့တယ်လို့ သိရပါတယ်။

ယူနိုက်တက်အသင်းဟာ အခုအချိန်ထိ ဂရင်းဝုဒ်ကို အသင်းရဲ့လူစာရင်းကနေ ထုတ်ပယ်ထားခြင်းမရှိပေမယ့် အသင်းရဲ့ စီးပွားရေးအကြီးအကဲတွေကတော့ ကစားသမားပြန်လာမှုဟာ ကလပ်ရဲ့ဂုဏ်သတင်းကို ထိခိုက်နိုင်တာ ကြောင့် စိုးရိမ်မှုတွေ ရှိနေကြတာပါ။

ယူနိုက်တက်ဘက်ကတော့ ဂရင်းဝုဒ်နဲ့ ပတ်သက်တဲ့လုပ်ငန်းစဉ်တွေ မပြီးဆုံးမချင်း နောက်ထပ် ဘာမှတ်ချက်မှ ပေးမှာ မဟုတ်ဘူးလို့ ဖေဖော်ဝါရီလက ကြေညာချက်ထုတ်ပြန်ထားပါတယ်။ ၂၀၀၇ ကတည်းက ယူနိုက်တက် လူငယ်အသင်းမှာ ကစားခဲ့တဲ့ ဂရင်းဝုဒ်ဟာ အသင်းကြီးအတွက် ပွဲပေါင်း ၁၂၉ ပွဲ ပါဝင်ကစားခဲ့ပြီး ၃၅ ဂိုး သွင်းယူ ထားတာပါ။ဂရင်းဝုဒ်ဟာ အင်္ဂလန်လက်ရွေးစင်အသင်းအတွက်လည်း ၁ ပွဲ ပါဝင်ကစားထားတာဖြစ်ပါတယ်။

Source:DailyMail

CNI Sport News

၂၀၂၃ ခုနှစ်၊ ဧပြီ ၂၉

မန်စီးတီးအသင်း နည်းပြ ဂွာဒီယိုလာက အာဆင်နယ်အသင်း အနေနဲ့ ၇ နှစ်ကြာ ဝေးကွာခဲ့တဲ့ ချန်ပီယံလိဂ် ဝင်ခွင့် ပြန်လည် ရရှိခဲ့တာကြောင့် ပရီးမီးယားလိဂ်မှာ အဆင့် ၂ နဲ့ အဆုံးသတ်ခဲ့ရင် သူတို့အတွက် အောင်မြင်မှုလို့ ပြောခဲ့ပါတယ်။

ဂွာဒီယိုလာက “အာဆင်နယ်က ချန်ပီယံလိဂ် ဝင်ခွင့်ရသွားပါပြီ။ ချန်ပီယံလိဂ်နဲ့ ၆ နှစ်၊ ၇ နှစ်ကြာဝေးပြီးမှ ပြန် လည် ယှဉ်ပြိုင်ရမှာက ဘယ်လောက်ထိ အဓိပ္ပါယ်ရှိလဲဆိုတာ အာဆင်နယ်အသင်း ပိုင်ရှင်တွေကို မေးကြည့်ပါ။ လာမယ့် ရာသီမှာဆိုရင် အာဆင်နယ်အသင်းဟာ ဥရောပရဲ့ အကောင်းဆုံးအသင်းတွေနဲ့ ယှဉ်ပြိုင်ရမယ့် ပြိုင်ပွဲမှာ ပါဝင်ရတော့မှာပါ။ ဒါက သူတို့အတွက် လုံးဝအောင်မြင်မှု တစ်ခုပါပဲ”လို့ ပြောပါတယ်။

မန်စီးတီးအသင်းဟာ ပြီးခဲ့တဲ့ ရက်ပိုင်းက ကစားခဲ့တဲ့ပွဲမှာ အာဆင်နယ်အသင်းကို ၄ ဂိုး- ၁ ဂိုးနဲ့ အနိုင်ရခဲ့ပြီး နောက် ပရီးမီးယားလိဂ် ဆုဖလားကို ရယူနိုင်ဖို့ အခြေအနေ ကောင်းသွားခဲ့တာ ဖြစ်ပါတယ်။

မန်စီးတီးအသင်းဟာ လက်ရှိအချိန်မှာ အာဆင်နယ်အသင်းထက် ၂ မှတ်လျော့ နေပေမယ့် ပွဲကျန် ၂ ပွဲကစားဖို့ ကျန်ရှိနေတာက သူတို့ရဲ့ အားသာချက်အဖြစ် ရှိနေခဲ့တာပါ။

အာဆင်နယ်အသင်းဟာ အခုနှစ်ရာသီ အစောပိုင်းက အမှတ်ပေးဇယား ထိပ်ဆုံးနေရာမှာ ၈ မှတ်အသာနဲ့ ဦးဆောင်နိုင်ခဲ့လို့ ပရီးမီးယားလိဂ်ဖလားကို ၁၉ နှစ်အကြာမှ ပထမဆုံးအကြိမ် ပြန်လည်ရယူနိုင်ဖို့ ရေပန်းစားခဲ့ပါတယ်။

ဒါပေမယ့်လည်း အာဆင်နယ်အသင်းဟာ မန်စီးတီးအသင်းကို အရေးနိမ့်ခဲ့တဲ့ပွဲ အပါအဝင် နောက်ဆုံး ၄ ပွဲဆက် နိုင်ပွဲ ပျောက်ဆုံးပြီးနောက် ရမှတ်ကွာဟမှုတွေ လျော့နည်းလာခဲ့တာ ဖြစ်ပါတယ်။

ဂွာဒီယိုလာကို တွေ့ရစဉ်

အာဆင်နယ်အသင်းဟာ မန်စီးတီးအသင်းကို အရေးနိမ့်ခဲ့ပေမယ့် ၂၀၁၆-၁၇ ရာသီနောက်ပိုင်း ပထမဆုံးအကြိမ် ချန်ပီယံလိဂ် ဝင်ခွင့်ရခဲ့တာကြောင့် ဂွာဒီယိုလာက ဒါကို အာဆင်နယ် အသင်းအနေနဲ့ ပျော်ရွှင်သင့်တယ်လို့ ယုံကြည်နေတာပါ။

ဒါအပြင် ဂွာဒီယိုလာက မန်စီးတီးအနေနဲ့ ချန်ပီယံဖြစ်ချင်ရင် အမှားယွင်းခံလို့ မရဘူးလို့လည်း ပြောခဲ့ပါတယ်။

ဂွာဒီယိုလာက “လူတွေက ဒီပြိုင်ပွဲပြီးဆုံးသွားပြီ၊ မပြီးဆုံးသေးဘူးဆိုပြီး ပြောနေကြပေမယ့် ကျနော်တို့ ကစားဖို့ ၇ ပွဲ ကျန်ပါသေးတယ်။ ကျနော်တို့ အီးမရိတ်စ်ကွင်းမှာ အနိုင်ရပြီးချိန်မှာ နော်တင်ဟမ်ဖောရက်စ်နဲ့ ကွင်းဆီသွားပြီး သရေတစ်မှတ်သာ ရခဲ့ပါတယ်။ အခုအချိန်မှာ ကျနော်တို့ဟာ အလွန်ဖွဲ့စည်းမှုကောင်းတဲ့ ဖူလ်ဟမ်အသင်း အိမ်ကွင်းမှာ သွားရောက် ကစားရမှာပါ။ အဲဒါကြောင့် ကျနော်တို့အတွက် ဘယ်လိုအရာကိုမှ ခွင့်ပြုချက် မရှိပါဘူး။ ကျနော်တို့ဟာ ချန်ပီယံဆုရအောင် ကြိုးစားဖို့ ဒီမှာရှိနေတာပါ။ ကျနော်တို့ဟာ အရှိန်အဟုန်ကောင်းနေသလို ခံစားချက်တွေကလည်း ကောင်းနေပေမယ့် ထပ်ပြီး သက်သေပြရပါမယ်”လို့ ပြောသွားပါတယ်။

မန်စီးတီးအသင်းဟာ အခုနှစ်ရာသီမှာ ပရီးမီးယားလိဂ်၊ အက်ဖ်အေဖလားနဲ့ ချန်ပီယံလိဂ်ဖလား ရယူနိုင်မယ့် လမ်းကြောင်းပေါ်မှာ ရှိနေတာဖြစ်ပြီး အသင်းဘက်က ဆုဖလားအားလုံး ရယူနိုင်ဖို့ ပစ်မှတ်ထားနေတာ ဖြစ်ပါတယ်။

Source: Metro

CNI Sport News

၂၀၂၃ ခုနှစ်၊ ဧပြီ ၂၉

ကာတာဘဏ်လုပ်ငန်းရှင် ရှိတ်ဂျာဆင်မ်နဲ့ ဗြိတိန်ဘီလျံနာ ရက်ကလစ်ဖ်တို့ဟာ ယူနိုက်တက်အသင်းကို ဝယ်ယူဖို့အတွက် သူတို့ရဲ့ တတိယနဲ့ နောက်ဆုံးအကြိမ်လေလံတင်သွင်းမှုကို ဧပြီလ ၂၈ ရက်က ပြုလုပ် သွားခဲ့ပါတယ်။

ရှိတ်ဂျာဆင်မ်နဲ့ ရက်ကလစ်ဖ်တို့နှစ်ဦးဟာ ဂလေဇာမိသားစုဆီကနေ ပရီးမီးယားလိဂ်ကလပ်ကို ဝယ်ယူနိုင်ဖို့ အတွက် အဓိကပြိုင်ဘက်တွေအဖြစ် ရှိလာပြီးနောက် အပြိုင်အဆိုင် လေလံတင်သွင်းကမ်းလှမ်းမှုတွေ ပြုလုပ် လာခဲ့ကြတာပါ။ရှိတ်ဂျာဆင်မ်ရဲ့ နောက်ဆုံးကမ်းလှမ်းမှုဟာ ပေါင် ၅ ဘီလီယံကျော်ရှိတယ်လို့ သတင်း တွေမှာ ဖော်ပြထားပေမယ့် ရက်ကလစ်ဖ်ရဲ့ နောက်ဆုံးကမ်းလှမ်းမှု ပမာဏကိုတော့ မသိရသေးပါဘူး။ သူတို့နှစ်ဦးဟာ တတိယအကြိမ်လေလံတင်သွင်းဖို့ နောက်ဆုံးသတ်မှတ်ထားတဲ့ သောကြာနေ့မှာ အောင်မြင်စွာ တင်သွင်းနိုင်ခဲ့တာပါ။

ကာတာဘဏ်လုပ်ငန်းရှင်ဖြစ်တဲ့ ရှိတ်ဂျာဆင်မ်ဟာ ယူနိုက်တက်အသင်းကို ၁၀၀ ရာခိုင်နှုန်းရယူချင်ပြီး သူဟာ အသင်းအတွက် အပြောင်းအရွှေ့တွေနဲ့ အခြေခံအဆောက်အဦတွေအတွက် ငွေကြေးအများအပြားသုံးစွဲမယ်လို့ ကတိပြုထားကြောင်း သတင်းရင်းမြစ်တွေက ဖော်ပြထားပါတယ်။ရှိတ်ဂျာဆင်မ်ဟာ ယူနိုက်တက်အသင်းရဲ့ ခေတ်မမီတော့တဲ့ အိုးထရက်ဖိုဒ့်ကွင်းကို ပြန်လည်ပြင်ဆင်ခြင်း ဒါမှမဟုတ် အသစ်တည်ဆောက်တာနဲ့ ကလပ် ရဲ့လေ့ကျင့်ရေးအဆောက်အဦတွေကို ပြုပြင်မွမ်းမံတာတွေပါ ပြုလုပ်ပေးသွားမယ်လို့ ကတိပြုထားတာပါ။

ဒါ့အပြင် ရှိတ်ဂျာဆင်မ်ဟာ အသင်းရဲ့ ကြွေးမြီ အမေရိကန်ဒေါ်လာသန်း ၆၂၀ ကိုလည်း ကင်းစင်သွားအောင် လုပ်ပေးမယ်လို့ ပြောထားတာဖြစ်ပါတယ်။ပြီးခဲ့တဲ့နှစ်က ချယ်လ်ဆီးအသင်းကို ဝယ်ယူဖို့ မအောင်မြင်ခဲ့တဲ့ ယူနိုက်တက်အသင်းရဲ့ အမာခံပရိသတ် ရက်ကလစ်ဖ်ဟာ အသင်းရဲ့ ရှယ်ယာ ၅၀ ရာခိုင်နှုန်းကျော်ကို ဝယ်ယူ ချင်နေတယ်လို့ သတင်းတွေမှာ ဖော်ပြထားတာပါ။ရက်ကလစ်ဖ်ရဲ့ ဝယ်ယူမှုမှာ အေဗရန်နဲ့ ဂျိုရယ်လ် ဂလေဇာ တို့က ရှယ်ယာ ၂၀ ရာခိုင်နှုန်းကျော်နဲ့ အသင်းရဲ့ အစုရှယ်ယာရှင်အဖြစ် ဆက်ရှိမှာဖြစ်လို့ ယူနိုက်တက် ပရိသတ် တွေကြားမှာ စိုးရိမ်မှုတွေမြင့်တက်နေတာဖြစ်ပါတယ်။

ဂလေဇာမိသားစုဟာ ယူနိုက်တက်အသင်းကို အားကစားကလပ်တစ်ခုအတွက် ကမ္ဘာ့စံချိန်တင်ကြေးဖြစ်တဲ့ ပေါင် ၆ ဘီလီယံအထိ ရရှိချင်နေတာဖြစ်ပါတယ်။ယူနိုက်တက်ပရိသတ်တွေကတော့ အသင်းအတွက် ရင်းနှီးမြုပ်နှံမှု အသစ်လိုအပ်တာကြောင့် ဂလေဇာမိသားစုဆီကနေ ပိုင်ရှင်အသစ်အမြန်ဆုံး လွှဲပြောင်းရယူတာကို လိုချင်နေကြ တာပါ။ယူနိုက်တက်ပရိသတ်တွေဟာ အိုးထရက်ဖိုဒ့်မှာ ကစားမယ့် အက်စတွန်ဗီလာအသင်းနဲ့ပွဲမှာ ဂလေဇာ မိသားစုကို ဆန္ဒပြမှုတွေပြုလုပ်ဖို့ စီစဉ်နေတယ်လို့ သိရပါတယ်။

ယူနိုက်တက်အသင်းဟာ အခုနှစ်ရာသီမှာ ကာရာဘောင်းဖလားရယူထားပြီး ၆ နှစ်ကြာဆုဖလားလက်မဲ့ဖြစ်တာကို အဆုံးသတ်နိုင်ခဲ့သလို ဇွန်လ ၃ ရက်မှာ မန်စီးတီးအသင်းနဲ့ အက်ဖ်အေဖလားဗိုလ်လုပွဲ ယှဉ်ပြိုင်ရမှာဖြစ်ပါတယ်။

Source:ChannelNewsAsia

CNI Sport News

၂၀၂၃ ခုနှစ်၊ ဧပြီ ၂၈

ယူနိုက်တက်အသင်းဟာ အာဂျင်တီးနားမှာ ကျင်းပမယ့် ယူ-၂၀ ကမ္ဘာ့ဖလားပြိုင်ပွဲမှာ ပါဝင်ယှဉ်ပြိုင်ဖို့ ဂါနာချိုရဲ့ တောင်းဆိုမှုကို ပယ်ချခဲ့ပါတယ်။

အသက် ၁၈ နှစ်အရွယ်ရှိ ဂါနာချိုဟာ မေလ ၃၀ ရက်ကနေ ဇွန်လ ၁၁ ရက်အထိ ကျင်းပမယ့် ဒီပြိုင်ပွဲမှာ အာဂျင်တီးနားအတွက် ကိုယ်စားပြုပြီး ယှဉ်ပြိုင်ချင်လို့ နည်းပြ အဲရစ်တန်ဟတ်ထံ တောင်းဆိုထားခဲ့တာပါ။

ဂါနာချိုက အာဂျင်တီးနားဂျာစီနဲ့ သူ့ရဲ့ ဇာတ်လမ်းကို ရေးချင်တာကြောင့် နည်းပြထံ တောင်းဆိုခဲ့ပြီး ဒီပြိုင်ပွဲမှာ ပါဝင် ယှဉ်ပြိုင်ချင်တယ်ဆိုတာကို ရှင်းရှင်းလင်းလင်း အသိပေးခဲ့တာ ဖြစ်ပါတယ်။

ဂါနာချို အနေနဲ့ ယူ-၂၀ ကမ္ဘာ့ဖလားပြိုင်ပွဲမှာ ပါဝင်ခဲ့ရင် မန်စီးတီးနဲ့ ကစားမယ့် အက်ဖ်အေဖလား ဗိုလ်လုပွဲမှာ ယူနိုက်တက်အတွက် ပါဝင်နိုင်မှာ မဟုတ်ပါဘူး။

မန်စီးတီးနဲ့ ယူနိုက်တက်တို့ရဲ့ ဗိုလ်လုပွဲကို ဇွန်လ ၃ ရက် ဝင်ဘာလေကွင်းမှာ ကျင်းပသွားဖို့ စီစဉ်ထားတာပါ။

အာဂျင်တီးနား ကစားသမားဟာ မကြာသေးခင်ကမှ ခြေကျင်းဝတ် ဒဏ်ရာကနေ ပြန်လည် ကောင်းမွန်လာခဲ့ပြီး နည်းပြ အဲရစ်တန်ဟတ်အတွက် တိုက်စစ် ကစားသမား ရွေးချယ်ခွင့် ပိုမိုရှိလာခဲ့တာ ဖြစ်ပါတယ်။

ဂါနာချိုကိုတွေ့ရစဉ်

အဲဒါကြောင့်လည်း ယူနိုက်တက် အသင်းဘက်က ဂါနာချိုရဲ့ တောင်းဆိုမှုကို ပယ်ချခဲ့တာ ဖြစ်ပါတယ်။

အာဂျင်တီးနား အသင်းကတော့ ဂါနာချို ပါဝင်မယ်ဆိုရင် သူတို့ရဲ့ အောင်မြင်မှု အခွင့်အလမ်းတွေအတွက် ကြီးမားတဲ့ တွန်းအားပေးမှု ဖြစ်နိုင်တာကြောင့် ယူနိုက်တက် ကစားသမားကို အသင်းရဲ့ လူစာရင်းမှာ ထည့်သွင်းဖို့ စိတ်အား ထက်သန်နေတာပါ။

အာဂျင်တီးနား အသင်းဟာ အစောပိုင်းက ယူ-၂၀ ကမ္ဘာ့ဖလားပြိုင်ပွဲအတွက် ခြေစစ်ပွဲ အောင်မြင်ခဲ့ခြင်း မရှိပေ မယ့် ပြီးခဲ့တဲ့လက အင်ဒိုနီးရှားနေရာမှာ အိမ်ရှင်အဖြစ် အစားထိုးဝင်ခဲ့ရလို့ ပြိုင်ပွဲယှဉ်ပြိုင်ခွင့် ရခဲ့တာ ဖြစ်ပါတယ်။

ဂါနာချိုဟာ ဒီရာသီမှာ ယူနိုက်တက် အသင်းအတွက် ၂၉ ပွဲ ပါဝင်ကစားထားတာမှာ ၄ ဂိုး သွင်းယူထားပေမယ့် ခြေကျင်းဝတ်ဒဏ်ရာကြောင့် မတ်လကတည်းက အသင်းအတွက် ပါဝင်ကစားနိုင်ခြင်း မရှိတာပါ။

ဂါနာချိုဟာ သူဟာ ကြံ့ခိုင်မှု ပြန်လည် ပြည့်ဝဖို့ နီးစပ်နေပြီလို့ မကြာသေးခင်က အင်စတာဂရမ်မှာ ပို့စ်တင်ကာ ဖော်ပြခဲ့ပါတယ်။

ယူနိုက်တက် အသင်းနည်းပြ အဲရစ်တန်ဟတ်က အခုနှစ်ရာသီ မကုန်ခင်မှာ ဂါနာချို အသင်းအတွက် ပါဝင် ကစား ပေးနိုင်ဖို့ မျှော်လင့်နေတာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ ဧပြီ ၂၈

မြန်မာ ယူ-၂၂ အသင်းနည်းပြချုပ် မိုက်ကယ်က ကမ္ဘောဒီးယားနိုင်ငံက အိမ်ရှင်အဖြစ် ကျင်းပမယ့် ၃၂ ကြိမ်မြောက် ဆီးဂိမ်းစ် အမျိုးသား ဘောလုံးပြိုင်ပွဲရဲ့ ပွဲကြို သတင်းစာ ရှင်းလင်းပွဲမှာ အသင်းကို ယုံကြည်မှုထားပြီး ရမှတ်တွေ ရနိုင်သမျှယူထားချင်တယ်လို့ ပြောလိုက်ပါတယ်။

မိုက်ကယ်က “ကျနော်တို့အသင်းမှာ ပြီးခဲ့တဲ့ ဆီးဂိမ်းစ် အတွေ့အကြုံရှိ ကစားသမားက နည်းနည်းလေးပဲရှိ ပါတယ်။ အများစုကတော့ ပထမဆုံးအကြိမ်အဖြစ် ဆီးဂိမ်းစ် ကစားကြမယ့် သူတွေပါ။ ကျနော်တို့အတွက်တော့ တစ်သင်းချင်းစီ၊ တစ်ပွဲချင်းစီကိုပဲ ပစ်မှတ်ထားပြီး ပြိုင်ပွဲကို သေသေချာချာ ယှဉ်ပြိုင်ကြသွားမှာပါ။ နည်းပြတစ်ဦး အနေနဲ့ကတော့ ကိုယ့် ကစားသမားတွေအပေါ်ကို ယုံကြည်ထားပါတယ်။ တချို့ပွဲတွေမှာ အမှတ်ရဖို့ အခွင့်အရေးရှိ မယ်၊ တချို့ပွဲတွေမှာ ပြိုင်ဘက်ဆီက အမှတ်ရဖို့ ပိုမိုခက်ခဲတာ ရှိမယ်။ ဒါပေမယ့် ပထမဆုံးက အသင်းကို ယုံကြည် မှုထားပြီး ကျနော်တို့ ရနိုင်သမျှ ရမှတ်တွေ ယူထားချင်ပါတယ်”လို့ ပြောခဲ့တာပါ။

မြန်မာ ယူ-၂၂ အသင်း လေ့ကျင့်နေစဉ်

မြန်မာအသင်းဟာ ဒီပြိုင်ပွဲရဲ့ အုပ်စု A မှာ အိမ်ရှင် ကမ္ဘောဒီးယား၊ အင်ဒိုနီးရှား၊ ဖိလစ်ပိုင်၊ တီမောတို့နဲ့ တစ်အုပ်စု တည်း ကျရောက်နေတာဖြစ်ပြီး အုပ်စုအဖွင့် ပွဲစဉ်အဖြစ် မေလ ၂ ရက် မြန်မာစံတော်ချိန် ၃ နာရီခွဲမှာ တီမော အသင်းနဲ့ ယှဉ်ပြိုင်သွားမှာ ဖြစ်ပါတယ်။

မိုက်ကယ်က “ပြိုင်ဘက်အသင်းတွေ၊ နည်းပြတွေကိုလည်း ကျနော်တို့ လေးစား ရပါလိမ့်မယ်။ အုပ်စု A မှာ ပါဝင် ခွင့်ရတာကို အင်မတန် စိတ်လှုပ်ရှား မိပါတယ်။ အိမ်ရှင်အသင်းလည်း အုပ်စုမှာ ပါနေတဲ့အတွက် ပရိသတ်တွေ တကယ့်ကို ကွင်းအပြည့် လာရောက် အားပေးကြမှာ ဖြစ်သလို သူတို့ကို ဖျော်ဖြေမှု ပေးချင်တာကလည်း ကျနော် တို့ ရည်မှန်းချက်တစ်ခုပဲ”လို့ မီဒီယာတွေရဲ့ မေးမြန်းမှုကို ဖြေခဲ့တာပါ။

မြန်မာ ယူ-၂၂ အသင်းဟာ ဆီးဂိမ်းစ် ပြိုင်ပွဲမတိုင်ခင်က ထိုင်းနိုင်ငံမှာ သွားရောက် စခန်းသွင်း လေ့ကျင့်ပြီး ခြေစမ်းပွဲတွေ ယှဉ်ပြိုင် ကစားခဲ့တာ ဖြစ်ပါတယ်။

မြန်မာအမျိုးသား ဘောလုံးအသင်းဟာ ပြီးခဲ့တဲ့နှစ်က ဗီယက်နမ်မှာ ကျင်းပခဲ့တဲ့ ဆီးဂိမ်းစ်ပြိုင်ပွဲမှာ အုပ်စုကနေ ထွက်ခွာခဲ့ရတာ ဖြစ်ပါတယ်။