CNI Sport News

၂၀၂၃ ခုနှစ်၊ မေလ ၁၇

အင်တာမီလန်ဒုဥက္ကဋ္ဌ ဇနက်တီက ချန်ပီယံလိဂ်ဗိုလ်လုပွဲမှာ မန်စီးတီးအသင်းနဲ့သာ ကစားချင်ပြီး ရီးရယ်လ် အသင်းကို ရှောင်ချင်တယ်လို့ ပြောခဲ့ပါတယ်။

ဇနက်တီက “ကျနော်တို့ရဲ့ စိတ်ခံစားမှုတွေဟာ ကောင်းမွန်နေပြီး ကျနော်တို့အသင်းဟာ ဒီလိုခံစားမှုမျိုးနဲ့ ထိုက်တန်ပါတယ်။ကျနော်တို့နဲ့ တွေ့ဆုံရမယ့် ပြိုင်ဘက်က ဘယ်အသင်းလဲဆိုတာ သိရဖို့ မနက်ဖြန်အထိ စောင့်ဆိုင်းရမှာပါ။ကျနော်တို့က ရီးရယ်လ်အသင်းကို ရှောင်ချင်ပါတယ် ဘာကြောင့်လဲဆိုရင် ဒီပြိုင်ပွဲက ရီးရယ်လ် အတွက် ရည်ရွယ်ထားလို့ပါ။ဆီမီးဖိုင်နယ်ကို မြို့ခံပြိုင်ဘက်နဲ့ ဒါဘီပွဲကစားရတာက အလွန်ခက်ခဲပါတယ်။ အရေးကြီးဆုံးကတော့ ဗိုလ်လုပွဲရောက်ဖို့ဖြစ်ပြီး ဒါကခက်ခဲတဲ့လမ်းပါပဲ” လို့ Sky Italia ကို ပြောခဲ့တာပါ။

ချန်ပီယံလိဂ် ဆီမီးဖိုင်နယ် ဒုတိယအကျော့ပွဲစဉ်အဖြစ် ဆန်စီရိုမှာပဲ ကစားခဲ့တဲ့ ဒီပွဲမှာ အင်တာမီလန်အသင်းက အေစီမီလန်အသင်းကို ၁ ဂိုး- ဂိုးမရှိနဲ့ အနိုင်ရခဲ့တာဖြစ်ပြီး အနိုင်ဂိုးကို တိုက်စစ်မှူး လောတရိုမာတီးနတ်ဇ်က သွင်းယူခဲ့တာဖြစ်ပါတယ်။အင်တာမီလန်အသင်းဟာ ပထမအကျော့တုန်းကလည်း အေစီမီလန်အသင်းကို ၂ ဂိုး- ဂိုးမရှိနဲ့ အနိုင်ရခဲ့တာဖြစ်လို့ နှစ်ကျော့ပေါင်းရလဒ် ၃ ဂိုး- ဂိုးမရှိနဲ့ အနိုင်ရကာ ချန်ပီယံလိဂ် ဗိုလ်လုပွဲ တက်နိုင် ခဲ့တာပါ။

အင်တာမီလန်အသင်းဟာ ချန်ပီယံလိဂ်ဗိုလ်လုပွဲကို ၂၀၁၀ က နောက်ဆုံးအကြိမ် တက်ရောက်နိုင်ခဲ့တာဖြစ်ပြီး နှစ်ပေါင်း ၁၃ နှစ်အကြာမှ ပထမဆုံးအကြိမ် ပြန်လည်တက်ရောက်နိုင်ခဲ့တာဖြစ်ပါတယ်။ အင်တာမီလန်အသင်း ဟာ ချန်ပီယံလိဂ်ဗိုလ်လုပွဲကို နောက်ဆုံးအကြိမ်ရောက်ရှိခဲ့တဲ့ ၂၀၁၀ က နည်းပြမော်ရင်ဟိုရဲ့ လက်အောက်မှာ ချန်ပီယံဆုကို ရယူနိုင်ခဲ့တာပါ။

အင်တာမီလန်အသင်းတိုက်စစ်မှူး လူကာကူကတော့ ဗိုလ်လုပွဲမှာ ရီးရယ်လ်နဲ့ပဲဖြစ်ဖြစ်၊ မန်စီးတီးနဲ့ပဲဖြစ်ဖြစ် ပွဲကြီးပွဲကောင်း ကစားရမယ်ဆိုတာကို သိတယ်လို့ ပြောပါတယ်။

လူကာကူက “ဗိုလ်လုပွဲမှာ ဘယ်အသင်းနဲ့ ရင်ဆိုင်ချင်လဲဆိုတာက ကိစ္စမရှိပါဘူး။ချန်ပီယံလိဂ် ဗိုလ်လုပွဲမှာတော့ အကြီးမားဆုံးအသင်းတွေနဲ့ ကစားရမယ်ဆိုတာကို သိပါတယ်။မန်စီးတီးက ဘောလုံးကစားတာမှာ အလွန် ကောင်းမွန်ပြီး ဂွာဒီယိုလာဆိုရင် ပွဲတိုင်းအတွက် သူ့မှာ နည်းစနစ်ပိုင်းအစီအစဉ်တွေရှိပါတယ်။ ရီးရယ်လ်မှာလည်း အရည်အသွေးအပြည့်အဝရှိတဲ့ ဗီနီစီးယက်စ်နဲ့ ရိုဒရီဂိုတို့လို တောင်ပံကစားသမားတွေအပြင် ဗယ်လ်ဗာဒီတို့လို ကွင်းလယ်ကစားသမားတွေရှိပါတယ်။ကျနော်ကတော့ ပွဲကောင်းတစ်ပွဲကို မြင်ချင်ပြီး ပွဲရဲ့အဆုံးမှာ အကောင်းဆုံး အသင်းက အနိုင်ရသွားမှာပါ” လို့ ပြောခဲ့ပါတယ်။

ရီးရယ်လ်နဲ့ မန်စီးတီးအသင်းတို့ရဲ့ ချန်ပီယံလိဂ်ဆီမီးဖိုင်နယ် ပထမအကျော့ပွဲစဉ်က ၁ ဂိုးစီ သရေကျခဲ့လို့ ဒုတိယ အကျော့ပွဲစဉ်ဟာ အဆုံးအဖြတ်ဖြစ်လာမှာဖြစ်ပြီး အနိုင်ရတဲ့အသင်းက ဗိုလ်လုပွဲတက်နိုင်မှာ ဖြစ်ပါတယ်။

Source:Metro

CNI Sport News

၂၀၂၃ ခုနှစ်၊ မေလ ၁၆

လိဒ်စ်ယူနိုက်တက်အသင်းနည်းပြဟောင်း ဘီယယ်လ်ဆာဟာ ဥရုဂွေးလက်ရွေးစင်ဘောလုံးအသင်းရဲ့ နည်းပြသစ် အဖြစ် ခန့်အပ်ခြင်းခံခဲ့ရပါတယ်။

အသက် ၆၇ နှစ်အရွယ်ရှိ အာဂျင်တီးနားလူမျိုးနည်းပြဟာ ၂၀၂၂ ခုနှစ်၊ ဖေဖော်ဝါရီလက လိဒ်စ်ယူနိုက်တက် အသင်းကနေ ထုတ်ပယ်ခံရပြီးကတည်းက အနားယူနေရတာပါ။ဘီယယ်လ်ဆာဟာ မကြာသေးခင်က နည်းပြ ရာထူးလစ်လပ်နေတဲ့ ဘုန်းမောက်၊ အဲဗာတန်အသင်းတို့ရဲ့ နည်းပြရာထူးအတွက်လည်း ဆွေးနွေးမှုတွေ ရှိခဲ့တာ ဖြစ်ပါတယ်။

ဘီယယ်လ်ဆာဟာ ၂၀၁၈ က လိဒ်စ်အသင်းကို ရောက်ရှိလာခဲ့တာဖြစ်ပြီး အသင်းကို ၁၆ နှစ်ကြာ ဝေးကွာခဲ့တဲ့ ပရီးမီးယားလိဂ်ကို ရောက်ရှိအောင် ပို့ဆောင်ပေးနိုင်ခဲ့တာပါ။အခုအချိန်မှာတော့ ဘီယယ်လ်ဆာဟာ ဥရုဂွေး အသင်းရဲ့ နည်းပြသစ်အဖြစ် ခန့်အပ်ခံခဲ့ရပြီး အမေရိကန်၊ မက္ကဆီကိုနဲ့ ကနေဒါနိုင်ငံတို့က ပူးတွဲအိမ်ရှင်အဖြစ် ကျင်းပမယ့် ၂၀၂၆ ကမ္ဘာ့ဖလားပြိုင်ပွဲအထိ ကိုင်တွယ်ရတော့မှာ ဖြစ်ပါတယ်။

ကမ္ဘာ့ဖလားချန်ပီယံဆုကို ၂ ကြိမ်ရရှိထားတဲ့ ဥရုဂွေးအသင်းဟာ ပြီးခဲ့တဲ့ ၂၀၂၂ ကမ္ဘာ့ဖလားပြိုင်ပွဲမှာ အုပ်စု အဆင့်နဲ့ ကျေနပ်ခဲ့ရတာပါ။ဥရုဂွေးအသင်းဟာ ၂၀၂၁ က ဒီယေဂိုအလွန်ဆိုကို နည်းပြအဖြစ် ခန့်အပ်ခဲ့ပေမယ့် ကမ္ဘာ့ဖလားအပြီးမှာ ရာထူးကနေ နုတ်ထွက်ခဲ့ပါတယ်။ဥရုဂွေးအသင်းဟာ ဘီယယ်လ်ဆာကို နည်းပြသစ်အဖြစ် မခန့်အပ်ခင် မာဆယ်လိုဘရိုလီကို ယာယီနည်းပြအဖြစ် ခန့်အပ်ခဲ့တာပါ။

ဘီယယ်လ်ဆာဟာ လာမယ့်စက်တင်ဘာလမှာ ကစားမယ့် ချီလီအသင်းနဲ့ ၂၀၂၆ ကမ္ဘာ့ဖလား တောင်အမေရိက ဇုန်ခြေစစ်ပွဲမှာ ဥရုဂွေးအသင်းကို စတင်ကိုင်တွယ်ရတော့မှာ ဖြစ်ပါတယ်။ဒီပွဲပြီးရင် ဥရုဂွေးအသင်းဟာ အီကွေဒေါ အသင်းနဲ့ ယှဉ်ပြိုင်ရမှာပါ။

အာဂျင်တီးနားလူမျိုးနည်းပြဟာ တောင်အမေရိကအသင်းဖြစ်တဲ့ ချီလီလက်ရွေးစင်အသင်းကို ၂၀၀၇ ကနေ ၂၀၁၁ အထိ ကိုင်တွယ်ခဲ့ပြီး အဲဒီနောက်မှာ ဘီလ်ဘာအို၊ မာဆေးလ်နဲ့ လိုင်လီအသင်းတွေကို ကိုင်တွယ်ခဲ့တာဖြစ်ပါတယ်။

Source:Goal

CNI Sport News

ပေါ်တူဂီနဲ့ အယ်လ်နာဆာ အသင်းခေါင်းဆောင် ရော်နယ်ဒိုဟာ ဇွန်လထဲ စင်္ကာပူကို သွားရောက်မယ်လို့ CNA သတင်းဌာနက ဖော်ပြထားပါတယ်။

ဘောလွန်းဒီအောဆုကို ၅ ကြိမ် ရရှိထားတဲ့ ရော်နယ်ဒိုဟာ ပြီးခဲ့တဲ့နှစ်တွေ အတွင်းမှာ စင်္ကာပူနိုင်ငံကို အကြိမ် ပေါင်းများစွာ သွားရောက်ခဲ့ပါတယ်။

ဒီသွားရောက်မှုတွေထဲမှာ စင်္ကာပူအိုလံပစ် ဖောင်ဒေးရှင်း ပီတာလင် ပညာသင်ဆုအတွက် သွားရောက်တာတွေ လည်း ပါဝင်ပါတယ်။

၂၀၁၉ ခုနှစ်က ပေါ်တူဂီ အသင်းခေါင်းဆောင်ဟာ ယူမင်မူလတန်းကျောင်းကိုလည်း အံ့အားသင့်ဖွယ် သွားရောက် ခဲ့ပါသေးတယ်။

ရော်နယ်ဒိုက “လွန်ခဲ့တဲ့ နှစ်အနည်းငယ်က စင်္ကာပူနိုင်ငံကို သွားရောက်ရတာကို ပျော်ရွှင်မိပါတယ်။ ဒီလို အံ့သြ စရာကောင်းတဲ့ ကလေးတွေနဲ့အတူ အချိန်အနည်းငယ်ရှိခဲ့ပြီး ပီတာလင် ပညာသင်ဆုအတွက် ကြီးကျယ်တဲ့ အရာ တွေကို မြင်တွေ့ခဲ့ရတယ်။ နောက်လမှာ အားလုံးနဲ့ ပြန်တွေ့ရဖို့ စောင့်မျှော်နေပါတယ်”လို့ သူသွားရောက်ခဲ့တဲ့ ဓါတ်ပုံနဲ့အတူ အင်စတာဂရမ်မှာ တင်ခဲ့တာ ဖြစ်ပါတယ်။

ရော်နယ်ဒို စင်္ကာပူကို ရောက်ခဲ့စဉ်

ဒီပညာသင်ဆုကို စင်္ကာပူအိုလံပစ် ဖောင်ဒေးရှင်းက ၂၀၁၀ ခုနှစ်မှာ စတင် တည်ထောင်ခဲ့ပြီး ပီတာလင်က အမေရိကန်ဒေါ်လာ ၇.၄၈ သန်း လှူဒါန်းခဲ့တာပါ။

ပီတာလင်ဟာ စပိန်လာလီဂါထိပ်သီး အသင်းတစ်သင်းဖြစ်တဲ့ ဗလင်စီယာအသင်းကို ပိုင်ဆိုင်ထားတာဖြစ်ပြီး ရော်နယ်ဒိုနဲ့ သူငယ်ချင်းလည်း ဖြစ်ပါတယ်။ သူဟာ ရည်မှန်းချက်မြင့်မားတဲ့ လူငယ်အားကစားသမားတွေကို ငွေကြေး အကူအညီ ပေးတယ်လို့ သတင်းမှာ ဖော်ပြထားတာပါ။

အသက် ၃၈ နှစ်အရွယ်ရှိ ရော်နယ်ဒိုဟာ ယူနိုက်တက်အသင်းနဲ့ စာချုပ်ဖျက်သိမ်းပြီးနောက် ဆော်ဒီပရိုလိဂ်ကလပ် အယ်လ်နာဆာအသင်းမှာ ကစားနေတာဖြစ်ပြီး ၁၆ ပွဲကစားထားတာမှာ ၁၂ ဂိုး သွင်းယူထားတာ ဖြစ်ပါတယ်။

Source: CNA

CNI Sport News

၂၀၂၃ ခုနှစ်၊ မေလ ၁၆

လက်စတာအသင်းကို အနိုင်ရပြီး ချန်ပီယံလိဂ်ဝင်ခွင့်ရဖို့ မျှော်လင့်ချက်တွေရှိလာပြီးနောက် အသင်းရဲ့အလုပ်က ချန်ပီယံလိဂ်ဝင်ခွင့်အတွက် အပေါ်မှာရှိနေတဲ့အသင်းတွေကို ဖိအားပေးဖို့လို့ နည်းပြ ကလောပ့်က ပြောခဲ့ပါတယ်။

ကလောပ့်က “လွန်ခဲ့တဲ့ ၆ ပတ် ဒါမှမဟုတ် ၇ ပတ်လောက်က ဒီလိုဖြစ်လာမယ်လို့ မထင်ခဲ့တဲ့ ဥရောပဝင်ခွင့်ကို ရယူနိုင်ခဲ့ပါပြီ။ဘောလုံးပွဲအများအပြားကို အနိုင်ရပြီးနောက် ကျနော်တို့အတွက် အခွင့်အရေးတွေရှိလာခဲ့ပါတယ်။ ကျန်တဲ့အရာတွေက ကျနော်တို့ရဲ့ လက်ထဲမှာမရှိပေမယ့် အခွင့်အရေးကို ရယူနိုင်ဖို့အတွက်ဆိုရင် ရာသီအကုန်ထိ ပွဲအားလုံးကို အနိုင်ရရမယ်ဆိုတာကို ကျနော်တို့ သိပါတယ်။အခုအချိန်မှာ ကျနော်တို့အလုပ်က ချန်ပီယံလိဂ် ဝင် ခွင့်အတွက် ဖိအားတွေကို ဆက်ပြီးထိန်းထားဖို့ပါ”လို့ သတင်းထောက်တွေကို ပြောခဲ့တာပါ။

လီဗာပူးလ်အသင်းဟာ ပရီးမီးယားလိဂ်ပွဲစဉ် ၃၆ အဖြစ် ကစားခဲ့တဲ့ပွဲမှာ လက်စတာအသင်းကို အဝေးကွင်းမှာ ၃ ဂိုး-ဂိုးမရှိနဲ့အနိုင်ရခဲ့ပြီး ကာတစ်ဂျုံးစ်က ၂ ဂိုးနဲ့ အာနိုးလ်က ၁ ဂိုးသွင်းယူခဲ့ကာ ဒီဂိုးတွေက တိုက်စစ်မှူး ဆာလတ်က ဖန်တီးပေးခဲ့တာ ဖြစ်ပါတယ်။

အန်ဖီးလ်ကလပ်ဟာ ပရီးမီးယားလိဂ်မှာ ၇ ပွဲဆက်နိုင်ပွဲရခဲ့တာဖြစ်ပြီး အဆင့် ၅ နေရာမှာ ရပ်တည်နေကာ အဆင့် ၃ နေရာက နယူးကာဆယ်၊ အဆင့် ၄ နေရာက ယူနိုက်တက်အသင်းတို့ထက် ၁ ပွဲပို ကစားထားပြီး ၁ မှတ်သာ ကွာဟတော့တာပါ။

လီဗာပူးလ်အသင်းဟာ ရာသီအစပိုင်းက ရလဒ်ဆိုးတွေကြောင့် ဥရောပဝင်ခွင့်အတွက် ခက်ခဲနိုင်တယ်လို့ သုံးသပ် နေကြပေမယ့် အခုအချိန်မှာတော့ တည်ငြိမ်တဲ့ပုံစံတွေနဲ့အတူ ချန်ပီယံလိဂ်ဝင်ခွင့်ရဖို့ မျှော်လင့်ချက်တွေ ရှိလာ ခဲ့တာဖြစ်ပါတယ်။

လီဗာပူးလ်အသင်းဟာ ပရီးမီးယားလိဂ်လက်ကျန် ၂ ပွဲမှာ အက်စတွန်ဗီလာ၊ဆောက်သမ်တန်အသင်းတို့နဲ့ ယှဉ်ပြိုင် ရမှာဖြစ်လို့ နယူးကာဆယ်နဲ့ ယူနိုက်တက်တို့ အမှားအယွင်းပြုလုပ်မိတာနဲ့ ချန်ပီယံလိဂ်ဝင်ခွင့်အတွက် အခြေ အနေကောင်းနိုင်တာပါ။

၂၀၁၆ ပရီးမီးယားလိဂ်ပြိုင်ပွဲမှာ ချန်ပီယံဖြစ်ခဲ့တဲ့ လက်စတာအသင်းကတော့ လီဗာပူးလ်အသင်းကို အရေးနိမ့် ခဲ့တာကြောင့် အမှတ်ပေးဇယားအဆင့် ၁၉ နေရာမှာ ရပ်တည်နေပြီး တန်းဆင်းဇုန်အန္တရာယ်ကျ ရောက်နေတာ ဖြစ်ပါတယ်။လက်စတာအသင်းအနေနဲ့ လက်ကျန် ၂ ပွဲစလုံးမှာ အနိုင်ရလဒ် မရယူနိုင်ဘူးဆိုရင်တော့ လာမယ့် နှစ်ရာသီ ချန်ပီယံရှစ်ပြိုင်ပွဲမှာ သွားရောက်ယှဉ်ပြိုင်ရတော့မှာပါ။

လက်စတာအသင်းဟာ ပရီးမီးယားလိဂ်လက်ကျန် ၂ ပွဲအဖြစ် နယူးကာဆယ်၊ ဝက်စ်ဟမ်းအသင်းတို့နဲ့ ကစား ရမှာဖြစ်လို့ တန်းဆင်းရနိုင်တယ်လို့ သုံးသပ်မှုတွေ ရှိနေတာ ဖြစ်ပါတယ်။

Source:Reuters

CNI Sport News

၂၀၂၃ ခုနှစ်၊ မေလ ၁၆

ချန်ပီယံလိဂ် ဆီမီးဖိုင်နယ် ပထမအကျော့ပွဲစဉ်မှာ အင်တာမီလန်အသင်းကို ၂ ဂိုး- ဂိုးမရှိနဲ့ အရေးနိမ့်ခဲ့ပေမယ့် အေစီမီလန်အသင်း ချန်ပီယံလိဂ် ဗိုလ်လုပွဲ တက်နိုင်မယ်လို့ ယုံကြည်ကြောင်း နည်းပြဖြစ်သူ ပိုင်အိုလီက ပြောခဲ့ ပါတယ်။

ပိုင်အိုလီက “ကျနော်တို့ဟာ အားနည်းချက်နဲ့ စတင် ရမယ်ဆိုတာကို သိပေမယ့် ဒါကို ပြောင်းပြန်လှန်အောင် လုပ်ပစ်နိုင်မယ့် အရည်အသွေးတွေ ရှိပါတယ်။ အခုအချိန်မှာ ကျနော်တို့ ဗိုလ်လုပွဲ တက်နိုင်မယ်လို့ ဘယ်သူကမှ ထင်မှာ မဟုတ်ပါဘူး။ ကျနော်တို့ဟာ ကြီးမားတဲ့ပွဲတွေကို ကစားခဲ့ပြီး ကစားသမားတွေ ဘယ်လောက် သန်မာလဲ ဆိုတာကို သိပါတယ်။ ကျနော်တို့စိတ်ထဲမှာ အရေးကြီးဆုံး ရည်မှန်းချက်ကတော့ ချန်ပီယံလိဂ် ဗိုလ်လုပွဲတက်ဖို့ ပါပဲ”လို့ ပွဲကြို သတင်းစာ ရှင်းလင်းပွဲမှာ ပြောခဲ့တာပါ။

ပထမအကျော့ပွဲစဉ်မှာ အင်တာမီလန် အသင်းအတွက် ဂိုးတွေကို ဂျက်ကိုနဲ့ မီခီတာရန်တို့က သွင်းယူခဲ့တာဖြစ်ပြီး ဆန်စီရိုမှာပဲ ကျင်းပမယ့် ဒုတိယအကျော့ပွဲစဉ်ကို အင်တာမီလန်အသင်းက အိမ်ရှင်အဖြစ် ကျင်းပရမှာ ဖြစ်ပါ တယ်။

အင်တာမီလန်အသင်းဟာ ၂ ဂိုးအသာနဲ့ အနိုင်ရထားတာကြောင့် ချန်ပီယံလိဂ် ဗိုလ်လုပွဲတက်နိုင်ဖို့ အခြေအနေ ကောင်းနေပေမယ့် အေစီမီလန်နည်းပြကတော့ သူတို့ဗိုလ်လုပွဲ တက်နိုင်အောင် လုပ်နိုင်မယ်လို့ ယုံကြည်နေ တာပါ။

ပထမအကျော့ပွဲစဉ်မှာ ပေါင်ဒဏ်ရာကြောင့် မပါဝင်နိုင်ခဲ့တဲ့ အသက် ၂၃ နှစ်အရွယ်ရှိ တောင်ပံကစားသမား ရာဖေးလ်လီယိုဟာ ဒုတိယအကျော့ပွဲမှာ ပါဝင်နိုင်ဖို့ အလားအလာရှိတယ်လို့ အေစီမီလန်နည်းပြ ပိုင်အိုလီက ပြောခဲ့ပါတယ်။

အင်တာနဲ့ အေစီ ယှဉ်ပြိုင်နေစဉ်

ပိုင်အိုလီက “လီယိုရဲ့ အခြေအနေက ကောင်းမွန်လာပြီး ကွင်းလယ်လူ ကရူနစ်နဲ့ တောင်ပံကစားသမား မက်ဆီး ယတ်စ် တို့လည်း ဒီလိုပါပဲ။ အရာအားလုံး အဆင်ပြေတယ်ဆိုရင် သူတို့ကို ဒုတိယအကျော့ပွဲအတွက် အသုံးပြုလို့ ရပါလိမ့်မယ်”လို့ ပြောခဲ့ပါတယ်။

အင်တာမီလန်အသင်းဟာ ၂၀၁၀ က ချန်ပီယံလိဂ်ဖလား ရယူပြီးနောက်ပိုင်း ပထမဆုံးအကြိမ် ဒီပြိုင်ပွဲရဲ့ ဗိုလ်လုပွဲ ကို တက်နိုင်ဖို့ မျှော်လင့်နေပါတယ်။

ဒါကြောင့် အေစီမီလန်နဲ့ ပွဲက သူတို့အတွက် အရေးကြီးဆုံး ပွဲတစ်ပွဲလို့ နည်းပြ အင်ဇာဂီက ပြောပါတယ်။

အင်ဇာဂီက “ဒီပွဲက အင်တာမီလန်အသင်း သမိုင်းမှာ အရေးကြီးဆုံး ပွဲတစ်ပွဲဆိုတာ ကျနော်တို့ သိပါတယ်။ ကျနော်တို့နဲ့ ထိုက်တန်တဲ့ အားသာချက်ရှိပေမယ့် ဒါကို စီမံခန့်ခွဲသွားမှာ မဟုတ်ပါဘူး။ ကျနော်တို့ဟာ သန်မာတဲ့ အင်တာမီလန်အသင်းလိုပဲ ကစားသွားမှာပါ”လို့ ပြောခဲ့တာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ မေလ ၁၅

ချယ်လ်ဆီးအသင်း နည်းပြသစ် ဖြစ်လာမယ့် ပိုချက်တီနိုဟာ ၃ နှစ် စာချုပ်ချုပ်ဆိုဖို့နဲ့ လာမယ့်ရာသီ အပြောင်း အရွှေ့ အစီအစဉ်ကို စတင်နိုင်ဖို့အတွက် အခုရက်သတ္တပတ်ထဲ လန်ဒန်ကို လာရောက်မယ်လို့ သိရပါတယ်။

အာဂျင်တီးနား လူမျိုးနည်းပြဟာ စပါးအသင်းကနေ ထွက်ခွာခဲ့တဲ့ ၂၀၁၉ ခုနှစ်၊ နိုဝင်ဘာလနောက်ပိုင်း ပထမဆုံး အဖြစ် လန်ဒန်ကို လာရောက်မှာ ဖြစ်ပါတယ်။

ပိုချက်တီနိုဟာ မကြာသေးခင်က ချယ်လ်ဆီးအသင်းကို နည်းပြသစ်အဖြစ် ကိုင်တွယ်ဖို့ အပြည့်အဝ သဘော တူညီမှု ရရှိခဲ့တာဖြစ်ပြီး အခုရက်သတ္တပတ်ထဲ ဘာစီလိုနာမြို့ကနေ ထွက်ခွာကာ အသင်းရဲ့ နည်းပြသစ်အဖြစ် တရားဝင် ကြေညာခြင်းခံရမှာ ဖြစ်တယ်လို့ The Times က ဖော်ပြထားတာ ဖြစ်ပါတယ်။

ချယ်လ်ဆီးအသင်းနဲ့ ကနဦး ၃ နှစ် စာချုပ်ချုပ်ဆိုမယ့် ပိုချက်တီနိုဟာ လန်ဒန်ကလပ် အသင်းထံ သူ့ရဲ့ နည်းပြ အဖွဲ့ဝင် ၄ ဦး ခေါ်ဆောင်လာမှာ ဖြစ်ပါတယ်။

ပိုချက်တီနိုဟာ အသင်းနဲ့ ပတ်သက်ပြီး ယာယီနည်းပြ ဖရန့်လမ်းပတ်နဲ့ ဆွေးနွေးမှုတွေ မပြုလုပ်ရသေးပေမယ့် နောက်ပိုင်းမှာ အာဂျင်တီးနားလူမျိုးက ချဉ်းကပ်မယ်ဆိုရင် ပူးပေါင်း ဆောင်ရွက်သွားဖို့ ရှိနေတာ ဖြစ်ပါတယ်။

ချယ်လ်ဆီးအသင်းဟာ လာမယ့် အပြောင်းအရွှေ့မှာ အသင်းလူစာရင်းကို လျှော့ဖို့အတွက် ကစားသမားတချို့ကို ရောင်းချသွားဖို့ ရှိနေပါတယ်။

ပိုချက်တီနိုကို တွေ့ရစဉ်

နည်းပြသစ် ဖြစ်လာမယ့် ပိုချက်တီနိုဟာ ဂိုးသမားတစ်ဦး အပါအဝင် ခေါ်ယူမယ့် ကစားသမားတွေကို အခု ကတည်းက စာရင်းပြုစုထားပြီး အသင်းတာဝန်ရှိတွေနဲ့ ဆွေးနွေးမှုတွေ ပြုလုပ်သွားမှာ ဖြစ်ပါတယ်။

ပိုချက်တီနိုဟာ လာမယ့် နွေရာသီမှာ အင်တာမီလန်ကနေ ပြန်ရောက်လာမယ့် တိုက်စစ်မှူး လူကာကူနဲ့လည်း ဆွေးနွေးမှုတွေ ပြုလုပ်သွားဖို့ ရှိနေပြီး ဘယ်လ်ဂျီယံ တိုက်စစ်မှူးကို အသင်းမှာထားဖို့ အစီအစဉ်ရှိနေတယ်လို့ သိရပါတယ်။

ချယ်လ်ဆီးအသင်းဟာ နောက်ဆုံးကစားခဲ့တဲ့ ပရီးမီးယားလိဂ်ပွဲမှာ နော်တင်ဟမ်ဖောရက်စ် အသင်းနဲ့ ၂ ဂိုးစီ သရေကျပြီး ပရီးမီးယားလိဂ် အမှတ်ပေးဇယား အဆင့် ၁၁ နေရာမှာ ရပ်တည်နေတာ ဖြစ်ပါတယ်။

လန်ဒန်ကလပ်ဟာ ဒီတစ်ပတ် ပရီးမီးယားလိဂ် ပွဲစဉ်အဖြစ် အမှတ်ပေးဇယား ထိပ်ဆုံးနေရာမှာ ရပ်တည်နေတဲ့ မန်စီးတီးအသင်းနဲ့ ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ မေလ ၁၅

ဘာစီလိုနာအသင်းဟာ အခုလာမယ့် နွေရာသီ အပြောင်းအရွှေ့မှာ ကစားသမားဟောင်း မက်ဆီကို ပြန်လည် ခေါ်ယူနိုင်ဖို့အတွက် အရာအားလုံးကို လုပ်ဆောင်သွားမယ်လို့ အသင်းဥက္ကဋ္ဌ လာပေါ်တာက ကတိပြုခဲ့ပါတယ်။

လာပေါ်တာက “ကျနော်တို့ မက်ဆီကို ဘာစီလိုနာ ပြန်လာနိုင်အောင် လုပ်ဆောင်ဖို့အတွက် အရာအားလုံး လုပ်ဆောင်သွားမယ်”လို့ ၂၀၂၂-၂၃ ရာသီ လာလီဂါဆုဖလားကို အသင်းရယူနိုင်ခဲ့ပြီးနောက် ပြောခဲ့တာပါ။

မက်ဆီဟာ ဘာစီလိုနာအသင်းရဲ့ ဘဏ္ဍာရေး အခက်အခဲကြောင့် စာချုပ်သစ် မချုပ်နိုင်ခဲ့တဲ့အတွက် ၂၀၂၁ ခုနှစ်မှာ နူးကမ့်ကနေ ထွက်ခွာခဲ့ပါတယ်။

အာဂျင်တီးနား အသင်းခေါင်းဆောင်ဟာ ဘာစီလိုနာကနေ ထွက်ခွာပြီးနောက် ပီအက်စ်ဂျီအသင်းထံ ပြောင်းရွှေ့ခဲ့ ပေမယ့် အခုရာသီအကုန်မှာ စာချုပ်ချုပ်ဆိုထားတဲ့ ၂ နှစ်စာချုပ်ဟာ ကုန်ဆုံးသွားတော့မှာ ဖြစ်ပါတယ်။

အဲဒါကြောင့် မက်ဆီကို ခေါ်ယူဖို့ ဘာစီလိုနာ အသင်းအပြင် ဆော်ဒီကလပ်တွေနဲ့ မေဂျာလိဂ် ကလပ်တွေကလည်း ချိတ်ဆက်မှုတွေ ပြုလုပ်နေတာ ဖြစ်ပါတယ်။

ဘာစီလိုနာအသင်းအနေနဲ့ မက်ဆီကို ပြန်လည် ခေါ်ယူဖို့ အတွက်ဆိုရင် အသင်းမှာရှိနေတဲ့ အခက်အခဲတွေကို ဖြေရှင်းရဖို့ ရှိနေပေမယ့် လာပေါ်ကတော့ အသင်းပရိသတ်တွေရဲ့ အိပ်မက်ကို အကောင်အထည် ဖော်ပေးနိုင်ဖို့ အတွက် အရာအားလုံးကို သူလုပ်ဆောင်ပေးသွားမယ်လို့ ပြောခဲ့တာပါ။

ဘာစီလိုနာမှာ မက်ဆီကစားခဲ့စဉ်

ဘာစီလိုနာအသင်း ဒုဥက္ကဋ္ဌဖြစ်သူ ယူစတီကလည်း မက်ဆီ ပြန်လာတာကို နှစ်သက်တယ်လို့ ပြောခဲ့ပါတယ်။

ယူစတီက “မက်ဆီဟာ အခုလာလီဂါအောင်ပွဲကို ဆင်နွှဲနေကြတဲ့ သူတွေအများအပြားရဲ့ သူငယ်ချင်းကောင်း တစ်ဦးပါ။ သူကလည်း ဒီလိုအောင်ပွဲအတွက် ပျော်ရွှင်နေမယ်ဆိုတာ သေချာပါတယ်။ မက်ဆီအသင်းထံ ပြန်လာ တာကို ကျနော် နှစ်သက်ပါတယ်”လို့ ပြောခဲ့တာပါ။

၂၀၁၈-၁၉ ရာသီနောက်ပိုင်း ပထမဆုံး လာလီဂါဆုဖလား ရယူနိုင်ခဲ့တဲ့ ဘာစီလိုနာ အသင်းသားတွေနဲ့အတူ လာပေါ်တာကလည်း အဝတ်လဲခန်းထဲ ဝင်ရောက်ကာ အောင်ပွဲခံခဲ့ပါတယ်။

ဘာစီလိုနာ အသင်းနည်းပြ ဇာဗီဟာ လာမယ့်နှစ်ရာသီ အသင်း ချန်ပီယံလိဂ်ပြိုင်ပွဲမှာ အောင်မြင်မှု ရယူနိုင်ဖို့ အတွက် မက်ဆီကို ခေါ်ယူပြီး အသင်းလူစာရင်း အင်အားကို တောင့်တင်းသွားအောင် လုပ်ဆောင်ချင်နေတာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ မေလ ၁၅

ဘာစီလိုနာအသင်းဟာ မြို့ခံပြိုင်ဘက် အက်စပန်ညိုအသင်းကို ၄ ဂိုး- ၂ ဂိုးနဲ့ အနိုင်ရပြီး ၂၇ ကြိမ်မြောက် လာလီဂါ ဆုဖလားကို ရယူနိုင်ခဲ့ပေမယ့် အက်စပန်ညို ပရိသတ်တွေ ကွင်းအတွင်း ဝင်ရောက် ကျူးကျော်မှုကြောင့် ကစား သမားတွေဟာ ဥမင်ထဲကို ထွက်ပြေးခဲ့ရပါတယ်။

ဘာစီလိုနာ ကစားသမားတွေဟာ ဒါဘီပြိုင်ဘက်ကို အနိုင်ရပြီးနောက် ကွင်းလယ်စက်ဝိုင်းမှာ လက်ချင်းချိတ်ကာ အောင်ပွဲခံနေခဲ့ကြပါတယ်။

ဒါပေမယ့် ဒေါသထွက်နေတဲ့ အက်စပန်ညို ပရိသတ်တွေဟာ လုံခြုံရေး အတားအဆီးတွေကို ချိုးဖျက်ကာ လာလီဂါ ချန်ပီယံအသင်းဆီ ဦးတည်သွားခဲ့ပါတယ်။

လုံခြုံရေးတွေဟာ ပရိသတ်တွေကို တားဆီးဖို့ ကြိုးစားခဲ့ပေမယ့် ပရိသတ် အရေအတွက်က များတဲ့အတွက် ဘာစီလိုနာ ကစားသမားတွေဆီ ရောက်ရှိသွားခဲ့တာပါ။

ပရိသတ်အချို့ဟာ ဥမင်ထဲထိကိုပါ လိုက်သွားခဲ့ပြီး ဘာစီလိုနာ ကစားသမားတွေဖြစ်တဲ့ ဘတ်စ်ကွက်စ်၊ အလွန်ဆို တို့နဲ့ ထိပ်တိုက် တွေ့ခဲ့ကြတာ ဖြစ်ပါတယ်။

ဒီအဖြစ်အပျက်မှာ ဘာစီလိုနာ ကစားသမားတွေ ထိခိုက်ဒဏ်ရာရတာ မရှိခဲ့ပေမယ့် ကွင်းထဲကနေ အမြန်ထွက်ခွာ ရတဲ့ ဖြစ်ရပ်ဟာ တုန်လှုပ်စရာ ဖြစ်ခဲ့ရပါတယ်။

အက်စပန်ညိုပရိသတ်တွေက ရန်ပြုနေစဉ်

အက်စပန်ညိုအသင်းဟာ လာလီဂါ အမှတ်ပေးဇယား အဆင့် ၁၉ နေရာမှာ ရပ်တည်နေပြီး တန်းဆင်းဇုန် အန္တရာယ် ကျရောက်နေချိန်မှာ မြို့ခံပြိုင်ဘက်ရဲ့ အောင်ပွဲခံနေတာကို ကြည့်နေရတဲ့အပေါ် အသင်းပရိသတ် တွေဟာ ဒေါသထွက်ခဲ့တာ ဖြစ်ပါတယ်။

ဇာဗီက “အောင်ပွဲခံတာက ပုံမှန်ပါပဲ။ ဒါပေမယ့် ကျနော်တို့က အိမ်ကွင်း မဟုတ်တဲ့အတွက် မလေးမစားပြုလုပ်လို့ မရဘူးဆိုတာကို နားလည်ပါတယ်”လို့ ပွဲအပြီးမှာ ပြောခဲ့တာပါ။

ဘာစီလိုနာအသင်းဟာ အခုနှစ်ရာသီ လာလီဂါပြိုင်ပွဲ ပြီးဆုံးဖို့ ၄ ပွဲ ကျန်ရှိနေသေးပေမယ့် ဒုတိယနေရာက ရီးရယ်လ်အသင်းကို ၁၄ မှတ်အထိ ဖြတ်ထားနိုင်ခဲ့တာကြောင့် ၂၀၁၈-၁၉ နောက်ပိုင်း ပထမဆုံး လာလီဂါဆုဖလား ရယူနိုင်ခဲ့တာ ဖြစ်ပါတယ်။

ဘာစီလိုနာအသင်းဟာ ဒီရာသီ ဥရောပပြိုင်ပွဲတွေမှာ အောင်မြင်မှု မရခဲ့ပေမယ့် လာလီဂါဖလားနဲ့ စပိန်စူပါဖလား တို့ကို ရယူနိုင်ခဲ့တာပါ။

အက်စပန်ညို အသင်းအတွက်တော့ လာလီဂါမှာ ဆက်ပြီး ရှိနေနိုင်ဖို့အတွက် လက်ကျန် ၄ ပွဲစလုံးမှာ အနိုင်ရလဒ် တွေ ရယူနိုင်ဖို့ လိုအပ်နေတာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ မေလ ၁၅

အာဆင်နယ်အသင်း နည်းပြ အာတီတာက ဘရိုက်တန်အသင်းကို အိမ်ကွင်းမှာ ဂိုးပြတ် အရေးနိမ့်ပြီးနောက် အသင်း အားပေးတဲ့ ပရိသတ်တွေကို တောင်းပန်သွားခဲ့ပါတယ်။

အာတီတာက “ဒါဟာ ပြီးခဲ့တဲ့ နယူးကာဆယ်နဲ့ပွဲက ခံစားချက်နဲ့ တကယ့်ကို ကွဲပြားတဲ့ ခံစားမှုတစ်ခုပါ။ ကျနော် တို့ဟာ အချို့ အခိုက်အတန့်တွေမှာ အနိုင်ရဖို့ လိုအပ်တာကို တကယ်လုပ်ခဲ့တယ်လို့ ခံစားရပြီး ဒီပွဲမှာတော့ လုံးဝ ဆန့်ကျင်ဘက် ဖြစ်ခဲ့ပါတယ်။ ဒုတိယပိုင်းမှာ ကစားခဲ့တဲ့ စွမ်းဆောင်ရည်အတွက် အသင်းပရိသတ်တွေကို ကျနော် တို့ တောင်းပန်ပါတယ်။ ဒါက လက်ခံနိုင်စရာ မရှိပါဘူး။ အခုအချိန်မှာ ပရီးမီးယားလိဂ် ဆုဖလားအတွက် စဉ်းစားဖို့ မဖြစ်နိုင်တော့ဘူး”လို့ ပြောခဲ့ပါတယ်။

အာဆင်နယ်နဲ့ ဘရိုက်တန်အသင်းတို့ ပွဲမတိုင်ခင် ကစားခဲ့တဲ့ အဲဗာတန်နဲ့ မန်စီးတီးအသင်းတို့ပွဲမှာ မန်စီးတီး အသင်းက အနိုင်ရခဲ့တာကြောင့် အာဆင်နယ် အသင်းအနေနဲ့ အနိုင်ရဖို့ လိုအပ်ခဲ့ပါတယ်။

ဒါပေမယ့် အာဆင်နယ်အသင်းဟာ ဘရိုက်တန်အသင်းကို ဒုတိယပိုင်းမှာ ပေးခဲ့ရတဲ့ ဂိုးတွေကြောင့် ၃ ဂိုး- ဂိုးမရှိနဲ့ အရေးနိမ့် သွားခဲ့ပါတယ်။

လန်ဒန်ကလပ်ဟာ ဒီရှုံးပွဲကြောင့် ထိပ်ဆုံးနေရာက မန်စီးတီးအသင်းထက် ၁ ပွဲပို ကစားထားပြီး ၄ မှတ်အကွာနဲ့ ဒုတိယနေရာမှာ ရှိနေတာ ဖြစ်ပါတယ်။

အဲဒါကြောင့် မန်စီးတီးအသင်းဟာ လာမယ့် ပရီးမီးယားလိဂ် ပွဲစဉ်မှာ နိုင်ပွဲရယူနိုင်ခဲ့ရင် ပရီးမီးယားလိဂ် ချန်ပီယံ ဆုကို ၂ နှစ်ဆက်တိုက် ရရှိသွားတော့မှာပါ။

အာဆင်နယ်အသင်းကိုတွေ့ရစဉ်

အာဆင်နယ် အသင်းခေါင်းဆောင် အိုဒီဂတ်က ဘရိုက်တန်အသင်းကို အရေးနိမ့်ပြီးနောက် သူတို့ရဲ့ ပရီးမီးယား လိဂ် မျှော်လင့်ချက် အဆုံးသတ် သွားခဲ့ပြီလို့ ဝန်ခံခဲ့ပါတယ်။

အိုဒီဂတ်က “ကျနော်တို့ မျှော်လင့်ချက် ပြီးဆုံးသွားပြီလို့ ခံစားရပါတယ်။ ရိုးရိုးသားသား ပြောရရင် ဒါက အလွန် ခက်ခဲသွားပြီလို့ ထင်ပါတယ်။ ဒုတိယပိုင်းမှာ ကစားခဲ့တဲ့ ကျနော်တို့ရဲ့ ကစားပုံက ကောင်းမွန်တဲ့ ခံစားချက်မျိုး မရှိခဲ့ပါဘူး။ ဒါက ကြီးကြီးမားမား စိတ်ပျက်ဖို့ ကောင်းပြီး၊ အခုအချိန်မှာ မျှော်လင့်ချက် မရှိတော့သလို ခံစားရပါ တယ်”လို့ ပြောခဲ့ပါတယ်။

အာဆင်နယ်အသင်းဟာ ရာသီအစကတည်းက ရလဒ်ကောင်းတွေကြောင့် ဒီရာသီ ပရီးမီးယားလိဂ် ချန်ပီယံဆုကို ရယူနိုင်ဖို့အတွက် ရေပန်းစားခဲ့ပေမယ့် ဧပြီလအတွင်း ကစားခဲ့တဲ့ ပွဲတွေမှာ ရလဒ်တွေ မကောင်းခဲ့တာကြောင့် အဆင့် ၁ နေရာကို မန်စီးတီးအသင်းထံ လွှဲပြောင်းပေးခဲ့ရတာပါ။

အာဆင်နယ်အသင်းဟာ အခုလာမယ့် စနေနေ့မှာ ပရီးမီးယားလိဂ် ပွဲစဉ်အဖြစ် နော်တင်ဟမ်ဖောရက်စ် အသင်း အိမ်ကွင်းမှာ သွားရောက် ယှဉ်ပြိုင်ရမှာ ဖြစ်ပါတယ်။

Source: Goal