CNI Sport News
၂၀၂၄ ခုနှစ်၊ နိုဝင်ဘာ ၁၂
တူရကီတရားရုံးတစ်ခုက ကွင်းလယ်ဒိုင်လူကြီးကို ကွင်းထဲဝင်ရောက်ပြီး လက်သီးနဲ့ထိုးကာ တိုက်ခိုက်မှု ပြုလုပ်ခဲ့တဲ့ တူရကီကလပ်ဥက္ကဋ္ဌဟောင်းကို ထောင်ဒဏ် ချမှတ်ခဲ့ပါတယ်။
၂၀၂၃ ခုနှစ်၊ ဒီဇင်ဘာက ကစားခဲ့တဲ့ တူရကီစူပါလိဂ်ပွဲစဉ်ဖြစ်တဲ့ အန်ကာရာဂူချုအသင်းနဲ့ ရီဇီစပေါ်အသင်းတို့ ၁ ဂိုးစီ သရေကျခဲ့ပြီးနောက်မှာ အန်ကာရာဂူချုအသင်း ဥက္ကဋ္ဌဟောင်းဖြစ်သူ ကိုကာဟာ ကွင်းလယ်ဒိုင်လူကြီး မီလာရဲ့ မျက်နှာကို လက်သီးနဲ့ ထိုးခဲ့တာပါ။
အဲဒါကြောင့် အန်ကာရာရှိ တရားရုံးတစ်ခုက ကိုကာဟာ တာဝန်ရှိသူတစ်ဦးကို ရည်ရွယ်ချက်ရှိရှိနဲ့ ဒဏ်ရာ ရရှိအောင် လုပ်ဆောင်ခဲ့တယ်ဆိုပြီး ထောင်ဒဏ် ၃ နှစ်နဲ့ ၇ လ ချမှတ်ခဲ့တယ်လို့ AP သတင်းမှာ ဖော်ပြထား ပါတယ်။
ဒီဖြစ်ရပ်ကြောင့် တူရကီဘောလုံးအဖွဲ့ချုပ်ဟာ လိဂ်ပြိုင်ပွဲတွေကို ရက်သတ္တပတ်များစွာကြာ ဆိုင်းငံ့ခဲ့ရတာပါ။
ကိုကာဟာ ဒီအဖြစ်အပျက်အပြီး မကြာခင်မှာ အန်ကာရာဂူချုအသင်းဥက္ကဋ္ဌ ရာထူးကနေ နုတ်ထွက်ခဲ့ပြီး သူထိုး ခဲ့တဲ့ ကွင်းလယ်ဒိုင်လူကြီးဟာ မျက်လုံးအနားမှာ သေးငယ်တဲ့ အရိုးအက်မှုဖြစ်ခဲ့ပါတယ်။
ဒိုင်လူကြီးကို လက်သီးနဲ့ထိုးခဲ့သူကိုတွေ့ရစဉ်
တရားရုံးက ကိုကာဟာ တာဝန်ရှိသူကို ခြိမ်းခြောက်မှုနဲ့ အားကစားမှာ အကြမ်းဖက်မှုကို တားဆီးဖို့ ရည်ရွယ်တဲ့ ဥပဒေတွေကို ချိုးဖောက်မှုကြောင့်လည်း ပြစ်ဒဏ်ချမှတ်ခံခဲ့ရတာပါ။
ဒါပေမယ့် ဒီပြစ်ဒဏ်တွေကိုတော့ ဆိုင်းငံ့ထားတယ်လို့ သိရပါတယ်။
အန်ကာရာဂူချုအသင်းကိုလည်း ပေါင် ၄၅,၀၀၀ ဒဏ်ရိုက်ခဲ့ပြီး ပရိသတ်မပါဝင်ဘဲ ၅ ပွဲကစားခိုင်းခဲ့တာပါ။
အန်ကာရာဂူချုအသင်းဟာ ပြီးခဲ့တဲ့ရာသီက ရလဒ်ဆိုးတွေကြောင့် တူရကီထိပ်တန်းလိဂ် ပြိုင်ပွဲကနေ တန်းဆင်း ခဲ့ပါတယ်။
ဒါအပြင် တရားရုံးက ဒိုင်လူကြီးကို တိုက်ခိုက်ခဲ့မှုအတွက် ရုံးတင်စစ်ဆေး ခံနေရတဲ့သူ ၃ ဦးကိုလည်း ထောင်ဒဏ် ၁ နှစ်ကနေ ၅ နှစ်အထိ ချမှတ်ခဲ့ပါတယ်။
အန်ကာရာဂူချုအသင်း ဥက္ကဋ္ဌဟောင်း ကိုကာကတော့ တရားရုံးက ချမှတ်ခဲ့တဲ့ စီရင်ချက်အပေါ် အယူခံဝင်ဖို့ ရည်ရွယ်ထားတယ်လို့ သိရပါတယ်။
Source: Goal
