CNI International News

အန်ကာရာ၊ ဇူလိုင် ၁၄

အရှေ့အလယ်ပိုင်းဒေသတွင် တူရကီသည် ပထဝီဝင်တည်နေရာ၊ စစ်အင်အား၊ စီးပွားရေးနှင့် သံတမန်ရေး လွှမ်းမိုးမှုများကြောင့် အဓိကကျသည့် အခန်းကဏ္ဍမှ ပါဝင်နေသည်ဟု Nikkei Asia မှ ဖော်ပြခဲ့သည်။

တူရကီသည် ဥရောပ၊ အာရှနှင့် အရှေ့အလယ်ပိုင်းဒေသကို ချိတ်ဆက်ထားပြီး စွမ်းအင်နှင့် ကုန်သွယ်ရေးအတွက် အဓိကကျသည့် သင်္ဘောလမ်းကြောင်းဖြစ်သော ဘော့စ်ပိုးရပ်စ် ရေလက်ကြား (Bosporus Strait) ကို ထိန်းချုပ် ထားသည်။

ထိုပထဝီဝင် အနေအထားက နေတိုး၊ ရုရှားနှင့် အရှေ့အလယ်ပိုင်း နိုင်ငံများအတွက် အရေးကြီးသည့် နေရာကို ရောက်ရှိစေခဲ့သည်။

ထို့ပြင် တူရကီသည် နေတိုးအဖွဲ့ထဲတွင် အမေရိကန်ပြီးပါက ဒုတိယစစ်အင်အား အကြီးဆုံးနိုင်ငံဖြစ်ပြီး အကြမ်းဖက်မှု တိုက်ဖျက်ရေး၌ အဓိကအခန်းကဏ္ဍမှ ပါဝင်နေသလို ဆီးရီးယား၊ အီရတ်နှင့် ကာတာနိုင်ငံများတွင် စစ်စခန်းများ အခြေစိုက်ထားသည်။

 နိုင်ငံတကာ အခင်းအကျင်းမှာ တူရကီအရေးပါပုံကို ပြသထားစဉ်

ထို့ပြင် တူရကီသည် အရှေ့အလယ်ပိုင်းနှင့် ဥရောပကြား စွမ်းအင် ဆုံချက်တစ်ခုဖြစ်ပြီး  TANAP နှင့် BTC ကဲ့သို့ ပိုက်လိုင်းများသည် တူရကီနိုင်ငံမှဖြတ်ပြီး ရေနံနှင့် ဓာတ်ငွေ့များကို ပေးပို့နေသည်။

ထို့ကြောင့် တူရကီသည် စွမ်းအင်ကဏ္ဍတွင် ရုရှားနိုင်ငံအပေါ် မှီခိုနေခြင်းကို လျှော့ချနေသည့် ဥရောပနိုင်ငံများ အတွက် အထောက်အကူ ဖြစ်စေခဲ့သည်။

တူရကီသည် ဆီးရီးယား၊ ယူကရိန်းနှင့် အစ္စရေး-ပါလက်စတိုင်း စစ်ပွဲ အပါအဝင် ပဋိပက္ခများတွင် ကြားဝင် ဖြန်ဖြေသူအဖြစ် လုပ်ဆောင်ပေးခဲ့ပြီး ၂၀၂၂ ခုနှစ်၌ ရုရှားနှင့် ယူကရိန်းကြား ငြိမ်းချမ်းရေး ဆွေးနွေးပွဲများကို လက်ခံကျင်းပပေးခဲ့သည်။

တူရကီသည် ဘာသာရေး၊ ယဉ်ကျေးမှုနှင့် သမိုင်းဝင် ဆက်ဆံရေးများမှတဆင့် အာဏာအပျော့ကို အသုံးပြု လေ့ရှိပြီး အမေရိကန်၊ ရုရှား၊ အီရန်၊ အစ္စရေး၊ ပင်လယ်ကွေ့နိုင်ငံများနှင့် ဆက်ဆံရေးများကို ဟန်ချက်ညီအောင် ထိန်းသိမ်းထားနိုင်ခဲ့သည်။

ထို့ကြောင့် တူရကီသည် ပထဝီဝင် တည်နေရာ၊ စစ်အင်အား၊ စွမ်းအင် လမ်းကြောင်းများနှင့် သံတမန် ဆက်ဆံရေး ခိုင်မာမှုကြောင့် အရှေ့အလယ်ပိုင်းဒေသ၏ ပထဝီနိုင်ငံရေး အနာဂတ်တွင် ဗဟိုချက်နေရာတွင် ရှိနေသည်ဟု ကျွမ်းကျင်သူများက သုံးသပ်ခဲ့သည်။

Source: Nikkei Asia