CNI Sport News

၂၀၂၃ ခုနှစ်၊ မေလ ၆

နယူးကာဆယ်အသင်းနည်းပြ အက်ဒီဟိုဝီက ရော်နယ်ဒိုနဲ့ နေမာတို့လို စူပါစတားတွေကိုခေါ်ယူဖို့ အသင်းဟာ မတတ်နိုင်ဘူးလို့ ပြောလိုက်ပါတယ်။

အက်ဒီဟိုဝီက “ဒီလိုကစားသမားတွေ ကျနော်တို့ဆီလာဖို့အတွက် နီးစပ်အောင်မလုပ်နိုင်ပါဘူး။သူတို့က ကမ္ဘာ့အကောင်းဆုံးကစားသမားတွေပါ။ကျနော်တို့ဟာ သူတို့ရဲ့ လုပ်ခလစာတွေ၊ ပြောင်းရွှေ့ကြေးတွေကိုပေးဖို့ ဘယ်တော့မှ တတ်နိုင်မယ့် အနေအထားမှာရှိမှာ မဟုတ်ပါဘူး။ကျနော်တို့ဟာ ငယ်ရွယ်တဲ့ကစားသမားတွေကို ရှာဖွေပြီး သူတို့လို ဖြစ်နိုင်တဲ့ ကစားသမားတွေဖြစ်အောင် ပြုစုပျိုးထောင်သွားမယ်” လို့ ပြောခဲ့တာပါ။

နယူးကာဆယ်အသင်းကို ၂၀၂၁ ခုနှစ်၊ အောက်တိုဘာလက ဆော်ဒီရင်းနှီးမြုပ်နှံမှုအဖွဲ့(PIF )က ဝယ်ယူပြီးနောက် အသင်းဟာ ကမ္ဘာပေါ်မှာ အချမ်းသာဆုံးအသင်းတွေထဲက တစ်သင်းဖြစ်လာပါတယ်။လက်ရှိအချိန်မှာ နေမာနဲ့ ရော်နယ်ဒိုတို့ဟာ နယူးကာဆယ်အသင်းထံ ပြောင်းရွှေ့ဖို့ ချိတ်ဆက်မှုတွေပြုလုပ်နေတယ်လို့ သတင်းတွေ ထွက်ပေါ်နေတာပါ။နေမာဟာ မကြာသေးခင်က ပီအက်စ်ဂျီပရိသတ်တွေက သူ့အိမ်ရှေ့လာရောက်ပြီး အသင်းက ထွက်ခွာဖို့ ပြောဆိုခြင်းခံခဲ့ရပါတယ်။ရော်နယ်ဒိုကတော့ အယ်လ်နာဆာအသင်းထံ ပြောင်းရွှေ့တာ လအနည်းသာ ကြာသေးပေမယ့် ဆော်ဒီကလပ် ကနေ ပြန်ထွက်ခွာဖို့ စဉ်းစားနေတယ်လို့ သိရပါတယ်။အဲဒါကြောင့် နယူးကာဆယ်အသင်းနဲ့ သတင်းတွေ ထွက်ခဲ့ ပေမယ့် နည်းပြ အက်ဒီဟိုဝီကတော့ ဒီသတင်းတွေကို ငြင်းဆန်ခဲ့တာပါ။ နယူးကာဆယ်အသင်းကို ဆော်ဒီ ရင်းနှီး မြှုပ်နှံမှုအဖွဲ့က ရယူပြီးနောက်မှာ ကလပ်အသင်းဟာ ထရစ်ပီယာ၊ ဘရူနိုဂွီမာရေ့စ်၊ ဘောဒ့်မန်း၊ နစ်ပုပ်နဲ့ အိုင်ဆက်ခ်တို့အပါအဝင် ကစားသမားခေါ်ယူမှုတွေအတွက် ပြောင်းရွှေ့ကြေး ပေါင်သန်း ၂၅၀ သုံးစွဲခဲ့တာ ဖြစ်ပါတယ်။

နယူးကာဆယ်အသင်းဟာ အခုနှစ်ရာသီ ပရီးမီးယားလိဂ်ပွဲစဉ်ကစားဖို့ ၅ ပွဲသာကျန်ရှိတော့ချိန်မှာ အမှတ်ပေး ဇယားအဆင့် ၃ နေရာမှာ ရပ်တည်နေပြီး လာမယ့်နှစ်ရာသီ ချန်ပီယံလိဂ်ဝင်ခွင့်ရယူနိုင်ဖို့ အခြေအနေ ကောင်းနေ တာပါ။အဲဒါကြောင့် လာမယ့်အပြောင်းအရွှေ့မှာ ထိပ်တန်းကစားသမားတွေ ခေါ်ယူပြီး အသင်းကို အားဖြည့် နိုင်တယ်လို့ သတင်းတွေ ထွက်ပေါ်နေတာဖြစ်ပါတယ်။အက်ဒီဟိုဝီက “လူတွေကတော့ ကမ္ဘာ့ဘောလုံးလောကရဲ့ နာမည်ကြီးတွေဟာ နယူးကာဆယ်ကို သွားမယ်လို့ ယူဆနေကြပါတယ်။ငွေရေးကြေးရေးအရဆိုရင်တော့ လက်ရှိအချိန်မှာ ကျနော်တို့ဟာ ဒီလိုမျိုးလုပ်ဆောင်လို့ မရပါဘူး။မှန်ကန်တဲ့လူတွေနဲ့ မှန်ကန်တဲ့ကစားသမားတွေကိုပဲ အဖွဲ့ထဲ ယူဆောင်လာရပါမယ်။ အပြောင်းအရွှေ့ ဈေးကွက်က ရှုပ်ထွေးတဲ့ဆုံးဖြတ်ချက်ဖြစ်လို့ နာမည်တွေ ရွေးလိုက်ရုံနဲ့ အသင်းထဲ ခေါ်ဆောင်လို့ မရပါဘူး။ ကျနော်ဟာ အသင်းကို ဘယ်လိုဦးတည်ပြီးသွားချင်လဲဆိုတာကို သိပါတယ်” လို့ ပြောခဲ့တာပါ။

နယူးကာဆယ်အသင်းဟာ တနင်္ဂနွေနေ့မှာ ပရီးမီးယားလိဂ်ပွဲစဉ်အဖြစ် အိမ်ကွင်းမှာ အာဆင်နယ်အသင်းနဲ့ ယှဉ်ပြိုင်ရမှာဖြစ်ပါတယ်။

CNI Sport News

၂၀၂၃ ခုနှစ်၊ မေလ ၆

မြန်မာပြည်ဖွား MMA တိုက်ခိုက်ရေးသမား အောင်လအန်ဆန်းဟာ အမေရိကန်နိုင်ငံ၊ ကော်လိုရာဒိုမှာ ကျင်းပခဲ့တဲ့ ONE Fight Night 10 ပွဲစဉ်အဖြစ် တရုတ်ဖိုက်တာ ဖန်ယောင်းနဲ့ ထိုးသတ်ခဲ့တဲ့ပွဲမှာ အနိုင်ရရှိခဲ့လို့ ONE Championship ပြိုင်ပွဲရဲ့ မစ်ဒယ်ဝိတ် ချန်ပီယံခါးပတ်ကို စိန်ခေါ်ခွင့် ရရှိသွားခဲ့ပါတယ်။

အောင်လအန်ဆန်းဟာ ဒီပွဲရဲ့ ၂ ချီမြောက်မှာ သူ့ကို လှဲချပြီး ချုပ်ဖို့ ကြိုးစားခဲ့တဲ့ ဖန်ယောင်းကို သူအားသာတဲ့ ချုပ်ကွက်နဲ့ လည်ပင်းကို ပြန်ချုပ်ခဲ့တာကြောင့် ပြိုင်ဘက်ကစားသမားဟာ အရှုံးပေးသွားခဲ့ရပါတယ်။
ဒီပွဲစဉ်မှာ အနိုင်ရတဲ့ သူဟာ မစ်ဒယ်ဝိတ်ခါးပတ် စိန်ခေါ်လို့ရမှာ ဖြစ်တဲ့အတွက် အောင်လအန်ဆန်းဟာ စိန်ခေါ် ခွင့် ရသွားခဲ့ပြီး သူကိုယ်တိုင်ကလည်း ခါးပတ်စိန်ခေါ်ပွဲကို ထိုးသတ်ချင်တယ်လို့ ပွဲအပြီးမှာ ပြောခဲ့ပါတယ်။

အောင်လအန်ဆန်းက “ကျနော့်ကို အားပေးတဲ့ ကျနော့်ရဲ့ ပရိသတ်တွေ အားလုံးကို ကျေးဇူးတင်ပါတယ်။ ဒီပွဲ အတွက် အလွန်ကောင်းမွန်စွာ ပြင်ဆင်ခဲ့ပါတယ်။ အားကစားသမား တစ်ဦးအနေနဲ့ မြန်မာအတွက် ကိုယ်စားပြုပြီး ယှဉ်ပြိုင်ရတာ အရမ်းဝမ်းသာပါတယ်။ မြန်မာပရိသတ်တွေကို အရမ်းလည်း ကျေးဇူးတင်ပြီး၊ အရမ်းလည်း ချစ်ပါ တယ်။ နောက်တစ်ပွဲမှာတော့ ချန်ပီယံရှစ်ပွဲ ထိုးရမယ်လို့ ကျနော်ယုံကြည်ပါတယ်။ ဒါပေမယ့် ဒီပွဲက ကျနော့်ရဲ့ စာချုပ်မှာ နောက်ဆုံးပွဲပါ။ အဲဒါကြောင့် ဘယ်သွားရမလဲဆိုတာတော့ ကျနော်မသိသေးပါဘူး။ ကျနော် ဆက်ပြီး ကြိုးစားသွားမယ်”လို့ Facebook မှာ Live လွှင့်ပြီး ပြောခဲ့တာပါ။

အောင်လအန်ဆန်းကိုတွေ့ရစဉ်

အောင်လအန်ဆန်းဟာ ဒီပွဲမတိုင်ခင် ကတည်းက ဖန်ယောင်းကို ၂ ချီအတွင်း အနိုင်ရအောင် ထိုးမယ်လို့ ပြောထား တဲ့ ကတိအတိုင်း တည်အောင် လုပ်နိုင်ခဲ့ပါတယ်။

ONE Championship ပြိုင်ပွဲရဲ့ ဝိတ်တန်း ၂ ခု ချန်ပီယံဟောင်း အောင်လအန်ဆန်းက သူဟာ ၂၀၂၀ က လက် လွှတ်ခဲ့ရတဲ့ မစ်ဒယ်ဝိတ် ချန်ပီယံခါးပတ်ကို ပြန်လည်ရယူနိုင်ဖို့ စိတ်အား ထက်သန်နေပါတယ်။
အဲဒါကြောင့် ဒီပွဲအပြီးမှာ စာချုပ်သစ်အတွက် ဆွေးနွေးမှုတွေ ပြုလုပ်သွားမယ်လို့လည်း အောင်လအန်ဆန်းက ပြောထားပါတယ်။

အသက် ၃၇ နှစ်အရွယ်ရှိ အောင်လအန်ဆန်းဟာ အခု အပါအဝင် MMA ပွဲပေါင်း ၄၄ ပွဲအထိ ထိုးသတ်ခဲ့တာမှာ ပွဲပေါင်း ၃၀ အနိုင်ရခဲ့ပြီး ၁၃ ပွဲရှုံးကာ ၁ ပွဲကတော့ ရလဒ် မထွက်ပေါ်ခဲ့ပါဘူး။

CNI Sport News

၂၀၂၃ ခုနှစ်၊ မေလ ၅

မန်စီးတီးအသင်းပိုင်ရှင်တွေဟာ သူတို့ရဲ့ ၁၃ ခုမြောက် ကလပ်အဖြစ် ဘရာဇီးလ်ကလပ် ဘာဟီရာအသင်းကို ဝယ်ယူလိုက်ပါတယ်။

ဘရာဇီးလ် ထိပ်တန်းလိဂ်မှာ ယှဉ်ပြိုင်နေတဲ့ ဘာဟီရာအသင်းဟာ ဒီပြိုင်ပွဲမှာ ချန်ပီယံဆုကို ၂ ကြိမ် ရယူထားပြီး နောက်ဆုံး ရယူခဲ့တာကတော့ ၁၉၈၈ က ဖြစ်ပါတယ်။

မန်စီးတီးဘောလုံးအုပ်စု (CFG) က ဘာဟီရာအသင်းရဲ့ အလားအလာကို အပြည့်အဝ ရောက်ရှိအောင် ကူညီဖို့ အတွက် မိတ်ဖက်တွေအနေနဲ့ ခရီးစဉ်ကို အခုစတင်နေပြီလို့ ပြောခဲ့ပါတယ်။

CFG အကြီးအကဲ ဆိုရီယာနိုက “ဘရာဇီးလ်မှာ ဘောလုံးက နံပါတ်တစ် အားကစားဖြစ်ပေမယ့် စီးပွားရေး အမြင် မှာတော့ သူတို့ဟာ တိုးတက်သင့်သလောက် တိုးတက်မှုမရှိပါဘူး။ အလားအလာကတော့ အံ့မခန်းပါပဲ။ သူတို့ဟာ ကမ္ဘာပေါ်မှာ အကြီးကျယ်ဆုံးအရည်အချင်းတွေရဲ့ အရင်းအမြစ်ပါ။ဒီအခွင့်အရေးကို အဆုံးရှုံးမခံဘဲ ကူညီပေးချင် ပါတယ်။ ကျနော်တို့ရဲ့ ခရီးစဉ်က အခုစတင်နေပါပြီ”လို့ ပြောခဲ့တာ ဖြစ်ပါတယ်။

မန်စီးတီးဘောလုံးအုပ်စုဟာ ဆယ်လ်ဗေးဒေါ အခြေစိုက် အသင်းရဲ့ ရှယ်ယာ ၉၀ ရာခိုင်နှုန်းကို ဝယ်ယူထားတာပါ။

မန်စီးတီးပိုင်ရှင်များကိုတွေ့ရစဉ်

ဘာဟီရာအသင်းဟာ ၂၀၀၁ ကတည်းက ဘရာဇီးလ် ဘောလုံးထိပ်တန်းလိဂ်မှာ အဆင့် ၈ ထက် ပိုပြီး မရောက်ရှိခဲ့တာ ဖြစ်ပါတယ်။

ဆိုရီယာနိုက ဒါက ရေရှည်စီမံကိန်းဖြစ်ပြီး ပရီးမီးယားလိဂ် လက်ရှိချန်ပီယံ မန်စီးတီး အသင်းအနေနဲ့ ဒီလိုနေရာ ရောက်ဖို့အတွက် ၁၄ နှစ်လောက် အချိန်ယူခဲ့ရတယ်လို့ ပြောခဲ့တာပါ။

မန်စီးတီး ဘောလုံးအုပ်စုဟာ ဘရာဇီးလ်ကလပ် ဘာဟီရာအသင်း မတိုင်ခင် မန်စီးတီး၊ နယူးယော့ခ်စီးတီး၊ မဲလ်ဘုန်းစီးတီး၊ ယိုကိုဟားမားအက်ဖ်မာရီနို၊ ဂျီရိုနာ၊ ဂျီအန်နူ၊ မွမ်ဘိုင်းစီးတီး၊ လိုမယ်လ်၊ ထရိုယတ်စ်၊ ပါလာမို၊ မွန်တီဗွီဒီယိုနဲ့ ဘိုလီဗာတို့ကို ပိုင်ဆိုင်ထားတာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ မေလ ၅

ဘရိုက်တန်အသင်းနည်းပြ ဒီဇာဘီက ယူနိုက်တက်အသင်းကို ပွဲချိန် ၉၉ မိနစ်မှာ သွင်းယူတဲ့ ပင်နယ်တီသွင်းဂိုးနဲ့ အနိုင်ရပြီးနောက် ဘောလုံးရဲ့ နတ်ဘုရားရှိတယ်လို့ ပြောခဲ့ပါတယ်။

ဒီဇာဘီက “ဘောလုံးရဲ့ နတ်ဘုရားဆိုတာ ရှိပါတယ်။ ကျနော်တို့ အက်ဖ်အေဖလား ဆီမီးဖိုင်နယ်မှာ အနိုင်ရဖို့ ထိုက်တန်ခဲ့ပေမယ့် ပင်နယ်တီနဲ့ အရေးနိမ့်ခဲ့ပါတယ်။ ဒီနေ့မှာတော့ ကျနော်တို့ ပင်နယ်တီနဲ့ အနိုင်ရခဲ့ပါတယ်။ ၂ ပွဲစလုံးမှာ ကျနော်တို့က ယူနိုက်တက်ထက် ပိုပြီးကောင်းခဲ့ပါတယ်။ နောက်ဆုံးရလဒ်က မျှတမှု မရှိပါဘူး။ ပင်နယ်တီ ကန်သွင်းတဲ့အချိန်မှာ မကြည့်ခဲ့တာက ဒါက အလွန်ခက်ခဲတဲ့ အခိုက်အတန့်မို့ပါ”လို့ ပြောပါတယ်။

ပရီးမီးယားလိဂ် ပွဲကျန်အဖြစ် ကစားခဲ့တဲ့ ဒီပွဲမှာ ဘရိုက်တန်အသင်းက ၁ ဂိုး- ဂိုးမရှိနဲ့ အနိုင်ရရှိခဲ့တာ ဖြစ်ပါတယ်။

ဒီပွဲရဲ့ မိနစ် ၉၀ ပြည့်ပြီး နာကျင်အချိန်ပိုမှာ ယူနိုက်တက် နောက်ခံလူ လုခ်ရှောရဲ့ လက်ထိဘောကနေ ဘရိုက်တန် အသင်း ပင်နယ်တီ ကန်သွင်းခွင့်ရခဲ့ပါတယ်။

ဒီပင်နယ်တီကို မက်အက်လစ္စတာက အမှားအယွင်းမရှိ ကန်သွင်းခဲ့တာပါ။ ဘရိုက်တန်အသင်းဟာ ပြီးခဲ့တဲ့ အက်ဖ်အေဖလား ဆီမီးဖိုင်နယ်ရဲ့ ပင်နယ်တီ အဆုံးအဖြတ်မှာ ယူနိုက်တက်အသင်းကို အရေးနိမ့်ပြီးနောက် ပရီးမီးယားလိဂ်မှာ ဒီရှုံးကြွေးကို ပြန်ဆပ်နိုင်ခဲ့တာ ဖြစ်ပါတယ်။

ဘရိုက်တန်အသင်းဟာ ဒီရာသီ ပရီးမီးယားလိဂ် ပြိုင်ပွဲမှာ ယူနိုက်တက်အသင်းကို အိမ်ကွင်း၊ အဝေးကွင်း ၂ ပွဲစလုံး အနိုင်ယူနိုင်ခဲ့တာပါ။

ဘရိုက်တန်နဲ့ ယူနိုက်တက် ယှဉ်ပြိုင်နေစဉ်

ယူနိုက်တက် အသင်းနည်းပြ အဲရစ်တန်ဟတ်ကတော့ ရှုံးနိမ့်ခဲ့လို့ စိတ်ပျက်ရပေမယ့် အလုပ်ကို နောက်ဆုံး အချိန် ထိ လုပ်ဆောင်သွားရမှာ ဖြစ်တယ်လို့ ပြောခဲ့ပါတယ်။

အဲရစ်တန်ဟတ်က “ရှုံးနိမ့်မှုတိုင်းဟာ စိတ်ပျက်စရာ ကောင်းပါတယ်။ နောက်ဆုံးစက္ကန့်မှာ အရှုံးပေးရတာက ပိုပြီး တော့ စိတ်ရှုပ်စရာ ဖြစ်ခဲ့ပါတယ်။ အဆုံးသတ်မှာ ကျနော်တို့ဟာ သူတို့ကို ဂိုး ခွင့်ပြုပေးခဲ့ရပါတယ်။ ဒါပေမယ့် ကျနော်တို့ရဲ့ အလုပ်တွေကို အဆုံးထိ လုပ်ရပါမယ်။ ကျနော်တို့ဟာ ထိန်းချုပ်နိုင်မှုလည်း မရှိသလို ပွဲကိုလည်း အရှုံးပေးခဲ့ရပါတယ်”လို့ ပြောခဲ့ပါတယ်။

ယူနိုက်တက်အသင်းဟာ ဒီပွဲမှာ အရေးနိမ့်ခဲ့ပေမယ့် အမှတ်ပေးဇယား အဆင့် ၄ နေရာမှာ ဆက်လက် ရပ်တည် နေပြီး အဆင့် ၅ နေရာက လီဗာပူးလ် အသင်းထက် ၁ ပွဲလျော့ ကစားထားကာ ရမှတ် ၄ မှတ် အသာ ရထားတာပါ။

ဘရိုက်တန်အသင်းကတော့ အဆင့် ၆ နေရာမှာ ရှိနေပြီး ပွဲကျန် ၂ ပွဲကစားဖို့ ကျန်ရှိနေသေးတာကြောင့် ချန်ပီယံ လိဂ် ဝင်ခွင့်ရဖို့ မျှော်လင့်ချက်တွေ ရှင်သန်နေသေးတာ ဖြစ်ပါတယ်။

ယူနိုက်တက်အသင်းဟာ ဒီတစ်ပတ် ပရီးမီးယားလိဂ် ပွဲစဉ်အဖြစ် ဝက်စ်ဟမ်းနဲ့ အဝေးကွင်း၊ ဘရိုက်တန်အသင်းက အဲဗာတန်အသင်းနဲ့ အိမ်ကွင်းပွဲစဉ် ယှဉ်ပြိုင်ရမှာ ဖြစ်ပါတယ်။

Source: Daily Mail

CNI Sport News

၂၀၂၃ ခုနှစ်၊ မေလ ၅

နှစ်ပေါင်း ၃၃ နှစ်ကြာဝေးကွာခဲ့တဲ့ စီးရီးအေဆုဖလားကို ပထမဆုံးအကြိမ်ရယူနိုင်ခဲ့တဲ့ နာပိုလီအသင်းရဲ့ အောင်ပွဲခံအခမ်းအနားမှာ အသက် ၂၆ နှစ်အရွယ်ရှိ ပရိသတ်တစ်ဦး အသတ်ခံရတာနဲ့အတူ ကြေကွဲစရာ ဖြစ်ရပ်ဆိုးတွေ ထွက်ပေါ်လာခဲ့တာဖြစ်ပါတယ်။

သေနတ်ပစ်ခတ်ခံရမှုကြောင့် အဆိုပါပရိသတ်တစ်ဦးဟာ ဒဏ်ရာပြင်းထန်စွာရပြီး သေဆုံးသွားခဲ့တယ်လို့ သိရတာပါ။သေဆုံးသွားတဲ့သူကို ကာဒါရယ်လီဆေးရုံ ပို့ဆောင်ပြီး အရေးပေါ်ကုသမှုခံယူခဲ့ပေမယ့် အချိန် အနည်းငယ်အကြာမှာ သေဆုံးသွားခဲ့တာဖြစ်ပါတယ်။နာပိုလီအသင်းဟာ ဒီယေဂိုမာရာဒိုနာခေတ် နောက်ပိုင်း ပထမဆုံးစီးရီးအေချန်ပီယံဆုကို ရယူနိုင်ခဲ့တာကြောင့် ထောင်နဲ့ချီတဲ့ ပရိသတ်တွေဟာ လမ်းမတွေ အထက်မှာ အောင်ပွဲခံခဲ့ကြတာပါ။

ဒီဖြစ်ရပ်မှာ အနည်းဆုံး လူ ၂၀၀ ဒဏ်ရာရရှိခဲ့ပြီး ဒီထဲက ၄ ဦးကတော့ ကျည်ဆန်ထိမှန်တဲ့ ဒဏ်ရာရရှိခဲ့တာ ဖြစ်ပါတယ်။ရဲတပ်ဖွဲ့ကတော့ ဒီဖြစ်ပျက်ခဲ့တဲ့ အခြေအနေကို အတိအကျ စုံစမ်းစစ်ဆေးနေတယ်လို့ ပြောခဲ့ပါ တယ်။အသက် ၂၆ နှစ်အရွယ် ပရိသတ်ဟာ သွေးထွက်သံယိုဖြစ်ပြီး မြေပြင်ပေါ်မှာ အခြား ၃ ဦးနဲ့အတူ လဲကျ နေခဲ့တာဖြစ်ပြီး အားလုံးကို နီးစပ်ရာဆေးရုံ ပို့ဆောင်ပေးခဲ့ကြတာဖြစ်ပါတယ်။

အခြားသူတွေကတော့ ဒဏ်ရာအနည်းငယ်ရရှိခဲ့လို့ ဆေးရုံပေါ်မှာ ဆေးကုသမှုခံယူနေပြီး လာမယ့်ရက် အနည်း ငယ်အတွင်းမှာ ဆေးရုံကနေ ဆင်းနိုင်ဖို့ မျှော်လင့်နေတာပါ။နောက်ပိုင်းမှာတော့ နေပယ်လ်မြို့ရှိ ဆေးဘက်ဆိုင်ရာ အာဏာပိုင်တွေက လူပေါင်း ၂၀၃ ဦးကို မြို့အနှံမှာ ဆေးကုသမှုပေးခဲ့ရတယ်လို့ နောက်ဆုံးသတင်းထုတ်ပြန် ခဲ့ပါတယ်။

တာဝန်ရှိသူတွေက မီးရူးမီးပန်းထိမှန်တာတွေ၊ ကားပေါ်ကနေ ပြုတ်ကျတာ၊ မီးလောင်ဒဏ်ရာ၊ ဦးခေါင်းဒဏ်ရာ တွေနဲ့ အရိုးကျိုးတဲ့ဒဏ်ရာတွေကြောင့် ၂၂ ဦးဟာ ပြင်းထန်တဲ့အခြေအနေမှာရှိနေခဲ့တယ်လို့ ပြောထားပါတယ်။ နာပိုလီပရိသတ်တွေဟာ နှစ်ပေါင်းများစွာစောင့်ဆိုင်းခဲ့ရတဲ့ အောင်ပွဲအတွက် နေပယ်လ်မြို့တစ်ခုလုံးမှာ အကြီး အကျယ်အောင်ပွဲခံမှုတွေပြုလုပ်နေကြတာဖြစ်ပါတယ်။

Source:Goal

CNI Sport News

၂၀၂၃ ခုနှစ်၊ မေလ ၅

နာပိုလီအသင်းဟာ အူဒီးနီးစ်အသင်းနဲ့ ၁ ဂိုးစီ သရေကျပြီးနောက် နှစ်ပေါင်း ၃၃ နှစ်အကြာ ဝေးကွာခဲ့တဲ့ စီးရီးအေ ဖလားကို ပထမဆုံးအကြိမ် ရယူနိုင်ခဲ့ပြီ ဖြစ်ပါတယ်။

အခုနှစ်ရာသီ စီးရီးအေပြိုင်ပွဲ ပြီးဆုံးဖို့ ၅ ပွဲ ကျန်ရှိနေသေးပေမယ့် နာပိုလီအသင်းဟာ ဒုတိယနေရာက လာဇီယို အသင်းကို ၁၆ မှတ် ဖြတ်ထားနိုင်ခဲ့တာကြောင့် စီးရီးအေဖလားကို ရယူနိုင်ဖို့ သေချာသွားခဲ့တာပါ။

နာပိုလီအသင်းဟာ ပြီးခဲ့တဲ့ အပတ်ကတည်းက စီးရီးအေဖလားကို ရယူနိုင်ဖို့ ရှိခဲ့ပေမယ့် ဆလာနီတာနာအသင်းနဲ့ သရေကျခဲ့လို့ ချန်ပီယံအဖြစ်နဲ့ အောင်ပွဲခံဖို့ စောင့်ဆိုင်းခဲ့ရတာ ဖြစ်ပါတယ်။

နာပိုလီအသင်း ပရိသတ်တွေဟာ အူဒီးနီးစ်အသင်းနဲ့ ပွဲအပြီးမှာ ကွင်းအတွင်း ဝင်ရောက်ပြီး ကစားသမားတွေနဲ့ အောင်ပွဲခံခဲ့ကြပါတယ်။

နာပိုလီအသင်းဟာ စီးရီးအေဖလားကို တတိယအကြိမ်မြောက်အဖြစ် ရယူနိုင်ခဲ့တာဖြစ်ပြီး အရင် ၂ ကြိမ်ဖြစ်တဲ့ ၁၉၈၇ နဲ့ ၁၉၉၀ က အာဂျင်တီးနားဂန္တဝင် မာရာဒိုနာက ရယူပေးခဲ့ခြင်း ဖြစ်ပါတယ်။

နာပိုလီအသင်း ပရိသတ်တွေဟာ သူတို့ရဲ့ အိမ်ကွင်းမှာလည်း အောင်ပွဲခံခဲ့ကြသလို နေပယ်လ်မြို့ တစ်ခုလုံးဟာ အောင်ပွဲခံမှုတွေနဲ့ ပြည့်နှက်ခဲ့ပါတယ်။

နာပိုလီကစားသမားတွေဟာ နေပယ်လ်မြို့ကို ပြန်ရောက်တဲ့ အချိန်မှာလည်း အောင်ပွဲခံ အခမ်းအနားတွေကို ဆက်ပြီး ဆင်နွှဲသွားဦးမယ်လို့ သိရပါတယ်။

စီးရီးအေဖလားရလို့ နာပိုလီအသင်း ပရိသတ်တွေ အောင်ပွဲခံနေစဉ်

နာပိုလီအသင်းနည်းပြ စပယ်လက်တီက “နာပိုလီပရိသတ်တွေ ပျော်ရွှင်နေတာကို မြင်တွေ့ရတာက သူတို့ဟာ ပျော်ရွှင်မှုကို ခံစားရဖို့ လုံလောက်ပါတယ်။ ဒီလူတွေဟာ ဘဝကို ခက်ခက်ခဲခဲ ကြုံတွေ့လာရတော့ ဒီလိုမျိုး အောင်ပွဲခံမှုတွေကို လုပ်ပိုင်ခွင့် ရှိပါတယ်။ သူတို့ကို ပျော်ရွှင်မှု အခိုက်အတန့်တွေ ပေးလိုက်ပြီဆိုတော့ အနည်း ငယ် စိတ်သက်သာရာ ရသွားပါပြီ”လို့ DAZN ကို ပြောပါတယ်။

အသက် ၆၄ နှစ်အရွယ်ရှိ စပယ်လက်တီဟာ စီးရီးအေဖလားကို ရယူနိုင်တဲ့ အသက်အကြီးဆုံး နည်းပြအဖြစ်လည်း မှတ်တမ်းဝင်ခဲ့ပါတယ်။

နာပိုလီအသင်း တိုက်စစ်မှူး အိုဆင်ဟမ်ဟာ အခုနှစ်ရာသီ စီးရီးအေပြိုင်ပွဲမှာ ၂၁ ဂိုး သွင်းယူထားပြီး၊ တောင်ပံ ကစားသမား ကာဗီချာက ၁၂ ဂိုးသွင်း၊ ၁၀ ဂိုးဖန်တီးကာ အသင်း စီးရီးအေဖလား ရယူနိုင်ဖို့အတွက် အရေးပါတဲ့ ကစားသမားတွေအဖြစ် ရှိခဲ့တာပါ။

အိုဆင်ဟမ်က “ဒါက အံ့သြစရာကောင်းတဲ့ ခံစားချက်ပါပဲ။ ဒီလို အခိုက်အတန့်မျိုးရဖို့ ကျနော်တို့ နှစ်ပေါင်းများစွာ ကြာ စောင့်ဆိုင်းခဲ့ရပါတယ်။ စကူဒတ်တိုဖလားကို နာပိုလီပရိသတ်တွေဆီ အရောက်ပို့ ပေးနိုင်တာက ဘယ်တော့ မှ မမေ့နိုင်တဲ့ အရာဖြစ်ပြီး ဒါက ကျနော်တို့ရဲ့ နှလုံးသားထဲမှာ ထာဝရရှင်သန်နေမှာပါ”လို့ ပြောခဲ့ပါတယ်။

နာပိုလီအသင်းဟာ လာမယ့် စီးရီးအေ ပွဲစဉ်အဖြစ် မေလ ၇ ရက်မှာ ဖီအိုရင်တီးနားအသင်းနဲ့ အိမ်ကွင်းပွဲစဉ် ယှဉ်ပြိုင်ရမှာ ဖြစ်ပါတယ်။

Source: BBC

CNI Sport News

၂၀၂၃ ခုနှစ်၊ မေလ ၄

ချယ်လ်ဆီးအသင်း ပူးတွဲပိုင်ရှင် တော့ဒ်ဘိုလီက ဆိုးရွားတဲ့ရာသီအတွက် အများကြီး သင်ယူခဲ့ရပြီး ဒီအတွက် အဖြေ ရှာကြည့်ရမယ်လို့ ဝန်ခံလိုက်ပါတယ်။

တော့ဒ်ဘိုလီက “ဘောလုံးဆိုတာ ကမ္ဘာလုံးဆိုင်ရာ အားကစားပါ။ ကမ္ဘာပေါ်က နိုင်ငံတိုင်းမှာ ထိပ်တန်း ကစားသမားတွေအတွက် ဈေးကွက်ရှိပါတယ်။ အဲဒီဈေးကွက်တွေကလည်း တစ်ခုနဲ့တစ်ခု မတူပါဘူး။ ကျနော်တို့ဟာ အသင်းတစ်သင်းကို တည်ဆောက်ရမှာဖြစ်ပြီး နည်းပြက အသင်းကို ဦးဆောင်သူ ဖြစ်ပါတယ်။ ဒါကြောင့် ကျနော် တို့ဟာ အကြောင်းအရာ အများကြီးကို သင်ယူခဲ့ရပါတယ်။ ပရိသတ်တွေက တောင်းဆိုကြပါတယ်။ သူတို့လည်း အနိုင်ရချင်သလို ကျနော်တို့လည်း အနိုင်ရချင်တယ်ဆိုတာ ခင်ဗျားတို့ သိပါတယ်။ ဒါကြောင့် ကျနော်တို့ အမြင်က ဒါက ရေရှည်စီမံကိန်းဖြစ်ပြီး ရေရှည်အတွက် ကတိကဝတ် ပြုထားတယ်ဆိုတာ ခင်ဗျား သိပါတယ်။ ဒါကို အဖြေ ရှာ နိုင်မယ်ဆိုတာ ကျနော် အလွန်ယုံကြည်ပါတယ်”လို့ ပြောပါတယ်။

တော့ဒ်ဘိုလီ အစုအဖွဲ့ဟာ ချယ်လ်ဆီးအသင်းကို ပေါင် ၄.၂၅ ဘီလီယံနဲ့ ဝယ်ယူပြီးနောက် အသင်းပရိသတ်တွေ ဟာ စိတ်အား ထက်သန်မှုတွေ အများကြီး ရှိခဲ့ကြပါတယ်။

ပိုင်ရှင်အသစ်တွေဟာ ချယ်လ်ဆီးအသင်းကို ပထမဆုံး ရာသီအပြည့်မှာ ကြီးမားတဲ့ အသင်းတစ်သင်းကို တည်ဆောက်နိုင်ဖို့ မျှော်လင့်ချက်နဲ့ အပြောင်းအရွှေ့ ၂ ခုအတွက် ပေါင်သန်း ၆၀၀ ကျော် သုံးစွဲခဲ့ပါတယ်။

ချယ်လ်ဆီးအသင်းကိုတွေ့ရစဉ်

ဒါပေမယ့် ချယ်လ်ဆီးအသင်းဟာ ဒီရာသီမှာ ဆုဖလား အောင်မြင်မှု မရခဲ့သလို ချန်ပီယံလိဂ် ဝင်ခွင့်လည်း မရခဲ့ပါဘူး။

ဒါပေမယ့် တော့ဒ်ဘိုလီက လာမယ့် ရာသီကစပြီး ကိုင်တွယ် ဖြေရှင်းသွားမယ့် စီမံခန့်ခွဲမှုအပေါ်မှာ ယုံကြည်မှုရှိဖို့ ပရိသတ်တွေကို တိုက်တွန်းထားပါတယ်။

ချယ်လ်ဆီးအသင်းဟာ ယာယီနည်းပြ လမ်းပတ် လက်ထက်မှာ ရလဒ်တွေ ဆိုးနေပြီး ၆ ပွဲ ဆက်တိုက် ရှုံးနိမ့် ထားကာ အမှတ်ပေးဇယားအဆင့် ၁၂ နေရာမှာ ရပ်တည်နေပါတယ်။

ဒါကြောင့် တန်းဆင်းဇုန် အထက်က အသင်းနဲ့ ၉ မှတ်သာ ကွာဟနေတာ ဖြစ်ပါတယ်။

ချယ်လ်ဆီးအသင်းဟာ လာမယ့်နှစ် ရာသီမှာ အသင်း ကိုင်တွယ်ဖို့အတွက် စပါးနဲ့ ပီအက်စ်ဂျီအသင်း နည်းပြ ဟောင်း ပိုချက်တီနိုကို နည်းပြသစ်အဖြစ် ခန့်အပ်ဖို့ လုပ်ဆောင်နေပြီး ရာသီမကုန်ခင်မှာ ခန့်အပ်နိုင်ဖွယ် ရှိနေပါတယ်။

ချယ်လ်ဆီးအသင်းဟာ ဒီတစ်ပတ် ပရီးမီးယားလိဂ် ပွဲစဉ်အဖြစ် ဘုန်းမောက်အသင်း အိမ်ကွင်းမှာ သွားရောက် ယှဉ်ပြိုင်ရမှာ ဖြစ်ပါတယ်။

Source: Goal

CNI Sport News

၂၀၂၃ ခုနှစ်၊ မေလ ၄

ဆော်ဒီကလပ် အယ်လ်နာဆာအသင်းကို ပြောင်းရွှေ့ခဲ့တဲ့ ရော်နယ်ဒိုဟာ ၂၀၂၃ ရဲ့ ကမ္ဘာ့လုပ်ခလစာ အများဆုံး အားကစားသမား ဖြစ်လာခဲ့တယ်လို့ Forbes က ထုတ်ပြန်ခဲ့တဲ့ စာရင်းတွေအရ သိရပါတယ်။

ရော်နယ်ဒိုဟာ ၂၀၁၇ နောက်ပိုင်း ပထမဆုံးအကြိမ် ကမ္ဘာ့လုပ်ခလစာ အများဆုံး အားကစားသမား ဖြစ်လာခဲ့ တာဖြစ်ပြီး Forbes ရဲ့ ဖော်ပြချက်အရ ပေါ်တူဂီအသင်း ခေါင်းဆောင်ဟာ ပြီးခဲ့တဲ့ ၁၂ လအတွင်းမှာ ပေါင် ၁၀၈.၇ သန်း ရရှိခဲ့တာပါ။

ရော်နယ်ဒိုဟာ အယ်လ်နာဆာအသင်းနဲ့ ချုပ်ဆိုခဲ့တဲ့ စာချုပ်အရ တစ်နှစ်ကို ပေါင် ၁၇၆.၅ သန်း ရရှိခဲ့ပါတယ်။

ရော်နယ်ဒိုရဲ့ ပြိုင်ဘက်ကြီး မက်ဆီကတော့ ပေါင် ၁၀၃.၉ သန်းနဲ့ ဒီစာရင်းရဲ့ ဒုတိယနေရာမှာ ရှိနေတာပါ။

Forbes ရဲ့ ကမ္ဘာ့လုပ်ခလစာ အများဆုံး အားကစားသမား ၁၀ ဦးထဲမှာ နာမည်ကျော် ဘတ်စကတ်ဘော အားကစားသမား လီဘရွန်ဂျိမ်းစ်နဲ့ လက်ဝှေ့ အားကစားသမား ကာနီလို အယ်လ်ဗားရတ်ဇ်တို့ ပါဝင်ခဲ့ပါတယ်။

ဒီစာရင်းထဲမှာ ဂရမ်းဆလမ်း ချန်ပီယံဆုကို အကြိမ် ၂၀ ရရှိထားတဲ့ တင်းနစ် ကစားသမားဟောင်း ရော်ဂျာဖက် ဒဲရားလည်း ပါဝင်ခဲ့ပါတယ်။

ကမ္ဘာ့လုပ်ခလစာ အများဆုံး ကစားသမားများ စာရင်းကိုတွေ့ရစဉ်

ရော်ဂျာဖက်ဒဲရားဟာ Forbes ရဲ့ ဒီစာရင်းထဲမှာ ပါဝင်တဲ့ တစ်ဦးတည်းသော အနားယူသွားတဲ့ အားကစားသမား ဖြစ်လာခဲ့ပါတယ်။

၂၀၂၀ က တိုက်ဂါးဝုဒ် နောက်ပိုင်း ဒက်စတင်ဂျွန်ဆင်နဲ့ ဖီးလ်မိုက်ကယ်လ်ဆန်တို့ဟာ ထိပ်တန်း ၁၀ ဦးထဲမှာ ပါဝင်တဲ့ ပထမဆုံး ဂေါဖ့်အားကစားသမားတွေ ဖြစ်လာခဲ့ပါတယ်။

ဒက်စတင်ဂျွန်ဆင်ဟာ ၂၀၂၂ က ထိပ်တန်း ၅၀ ဦးစာရင်းမှာ မပါဝင်ပေမယ့် ဆော်ဒီရဲ့ ကျောထောက်နောက်ခံနဲ့ ပြုလုပ်တဲ့ LIV ဂေါ့ဖ်စီးရီးပြိုင်ပွဲမှာ ပါဝင်ပြီးနောက် ဝင်ငွေ အများအပြားရကာ Forbes ရဲ့ အဆင့် သတ်မှတ်ချက် မှာ ပေါင် ၈၅.၅ သန်းနဲ့ အဆင့် ၆ နေရာအထိ ရောက်ရှိလာခဲ့တာပါ။

Forbes က တွက်ချက်တဲ့ ကိန်းဂဏန်းတွေမှာ လစာတွေ၊ ဆုငွေတွေနဲ့ အပိုဆုကြေးတွေ အပါအဝင် ကွင်းပြင်ပဝင်ငွေ၊ စပွန်ဆာ သဘောတူညီမှုစတဲ့ ကွင်းတွင်း၊ကွင်းပြင် ဝင်ငွေနှစ်မျိုးစလုံးပါ ပါဝင်ခဲ့တယ်လို့ သိရပါတယ်။

Source: BBC

CNI Sport News

၂၀၂၃ ခုနှစ်၊ မေလ ၄

နေမာရဲ့ နေအိမ်အပြင်ဘက်မှာ စုဝေးပြီး ကစားသမားကို ကလပ်အသင်းကနေ ထွက်ခွာဖို့ အော်ဟစ်ခဲ့ကြတဲ့ ပရိသတ်တွေရဲ့ လုပ်ရပ်ကို ပီအက်စ်ဂျီအသင်းက ရှုတ်ချလိုက်ပါတယ်။

ပီအက်စ်ဂျီအသင်းက “ဗုဒ္ဓဟူးနေ့က ဖြစ်ခဲ့တဲ့ လူတစ်စုရဲ့ သည်းမခံနိုင်စရာနဲ့ စော်ကားတဲ့ လုပ်ရပ်တွေကို အသင်း အနေနဲ့ ပြင်းပြင်းထန်ထန် ရှုတ်ချပါတယ်။ ဘယ်လိုပဲ သဘောထား ကွဲလွဲပါစေ၊ ဒီလို လုပ်ရပ်တွေဟာ ဘယ်လိုမှ တရားမျှတမှု မရှိပါဘူး။ ဒီလို ရှက်ဖွယ်ကောင်းတဲ့ အပြုအမူတွေကြောင့် ကလပ်ဟာ ကစားသမားတွေ၊ ဝန်ထမ်း တွေနဲ့ ပစ်မှတ်ထားခြင်း ခံရတဲ့ သူတွေအားလုံးကို အပြည့်အဝ ထောက်ခံပါတယ်”လို့ ကြေညာချက် ထုတ်ပြန် ထားပါတယ်။

ပီအက်စ်ဂျီအသင်းဟာ လောရီးယန့်အသင်းကို အရေးနိမ့်ပြီးနောက် အသင်းရဲ့ ခွင့်ပြုချက်မရဘဲ ဆော်ဒီကို ခရီးထွက်သွားခဲ့တဲ့ မက်ဆီကို ၂ ပတ်ကြာ ဆိုင်းငံ့တဲ့ ပြစ်ဒဏ် ချမှတ်ခဲ့ပြီးနောက် ပြဿနာ နောက်တစ်ခု ထပ်မံ ကြုံတွေ့ခဲ့ရတာပါ။

ပီအက်စ်ဂျီအသင်းရဲ့ ပရိသတ်တွေဟာ အသင်း ရုံးချုပ် အပြင်ဘက်မှာ ဘုတ်အဖွဲ့ကို ရာထူးကနေ နှုတ်ထွက်ပေးဖို့ အော်ဟစ်နေခဲ့ကြသလို၊ နောက်ထပ် ပရိသတ် အစုအဖွဲ့ကလည်း နေမာရဲ့ အိမ်ကို လာရောက်ပြီး အသင်းက ထွက်ခွာသွားဖို့ ပြောခဲ့ကြတာ ဖြစ်ပါတယ်။

မက်ဆီနဲ့ နေမာကို တွေ့ရစဉ် 

ပီအက်စ်ဂျီအသင်းရဲ့ အဓိကတိုက်စစ်မှူး တစ်ဦးဖြစ်တဲ့ မက်ဆီဟာ မကြာသေးခင်က အိမ်ကွင်း ပွဲစဉ်တွေမှာ ပရိသတ်တွေရဲ့ လှောင်ပြောင်မှုကို ခံခဲ့ရပြီး သူကလည်း အသင်းက ထွက်ခွာဖို့ ပရိသတ်တွေရဲ့ ပစ်မှတ်ထားခြင်းကို ခံခဲ့ရတာပါ။

အာဂျင်တီးနား အသင်းခေါင်းဆောင်ဟာ ပီအက်စ်ဂျီအသင်းနဲ့ စာချုပ်သက်တမ်း ကုန်ဆုံးတော့မယ့် အခုရာသီ အကုန်မှာ ပြင်သစ်ကလပ်ကနေ ထွက်ခွာဖွယ် ရှိတယ်လို့လည်း သတင်းတွေမှာ ဖော်ပြထားပါတယ်။

ပီအက်စ်ဂျီအသင်းဟာ အခုရာသီ အကုန်မှာ မက်ဆီအပြင် နေမာကိုလည်း ထွက်ခွာခွင့်ပေးဖို့ စီစဉ်နေပြီး သူတို့ နေရာတွေမှာ လူငယ် ကစားသမားတွေနဲ့ အစားထိုးဖို့ စီစဉ်နေတယ်လို့လည်း သိရပါတယ်။

ပီအက်စ်ဂျီအသင်းဟာ နောက်ဆုံးပွဲစဉ်မှာ လော်ရီးယန့်အသင်းကို အရေးနိမ့်ခဲ့ပေမယ့် ပြင်သစ်လီဂူးဝမ်းပြိုင်ပွဲရဲ့ ထိပ်ဆုံး နေရာမှာ ဆက်လက် ရပ်တည်နေပြီး ဒုတိယနေရာက မာဆေးလ်အသင်းကို ၅ မှတ် အသာ ရထားပါတယ်။

ပြင်သစ် လီဂူးဝမ်းပြိုင်ပွဲဟာ ပြီးဆုံးဖို့ ၅ ပွဲသာ ကျန်ရှိတော့တာဖြစ်ပြီး ပီအက်စ်ဂျီအသင်းဟာ မေလ ၇ ရက်မှာ ထရိုယတ်စ်အသင်းနဲ့ အဝေးကွင်း ပွဲစဉ် ယှဉ်ပြိုင်ရမှာ ဖြစ်ပါတယ်။

Source: Daily Mail