- By CNI
- Category: အားကစား
- Hits: 3268
CNI Sport News
၂၀၂၄ ခုနှစ်၊ မေလ ၃၁
ရီးရယ်လ်အသင်း ဂိုးသမား လူနင်ဟာ ဖျားနာနေတာကြောင့် အသင်းနဲ့အတူ လေ့ကျင့်မှုတွေ ပြုလုပ်နိုင်ခြင်း မရှိတဲ့အတွက် ချန်ပီယံလိဂ်ဗိုလ်လုပွဲကို ပါဝင်နိုင်ဖွယ်မရှိဘူးလို့ ပြောလိုက်ပါတယ်။
လူနင်က “ရာသီရဲ့ အရေးကြီးဆုံးပွဲနဲ့ ကျနော့်ဘဝရဲ့ အရေးကြီးဆုံးပွဲအတွက် အသင်းနဲ့အတူ ပြင်ဆင်မှု ပြုလုပ်နိုင် ခဲ့ခြင်းမရှိလို့ စိတ်မကောင်းဖြစ်မိပါတယ်။ ခင်ဗျားတို့ရဲ့ မက်ဆေ့ချ်တွေ၊ ပံ့ပိုးမှုတွေ၊ အားပေးမှုတွေအတွက် ကျေးဇူး တင်ပါတယ်”လို့ အင်စတာဂရမ်မှာ ရေးသားထားတာပါ။
ဒီရာသီ ရီးရယ်လ်အသင်းရဲ့ နံပါတ်တစ်ဂိုးသမားအဖြစ် လက်စွမ်းပြသနေတဲ့ လူနင်ဟာ ဒီရက်သတ္တပတ်ထဲမှာ တုပ်ကွေးရောဂါ ခံစားခဲ့ရတာကြောင့် တနင်္လာနေ့ကနေ ဗုဒ္ဓဟူးနေ့အထိ အသင်းနဲ့ လေ့ကျင့်မှု ပြုလုပ်နိုင်ခဲ့ခြင်း မရှိပါဘူး။
ဒါအပြင် လူနင်ဟာ ရီးရယ်လ်အသင်း ဖော်တွေနဲ့အတူ ချန်ပီယံလိဂ် ဗိုလ်လုပွဲကစားမယ့် လန်ဒန်ကို လိုက်ပါ လာခဲ့ခြင်းမရှိတာ ဖြစ်ပါတယ်။
အသက် ၂၅ နှစ်အရွယ်ရှိ လူနင်ဟာ ဗိုလ်လုပွဲ မစတင်ခင် ဒါမှမဟုတ် ဒီထက်စောပြီး သူတစ်ဦးတည်း လန်ဒန်ကို လာရောက်မယ်လို့ သတင်းတွေ ထွက်ပေါ်နေတာပါ။
အဲဒါကြောင့် လူနင်ဟာ ချန်ပီယံလိဂ် ဗိုလ်လုပွဲကို ပါဝင်ကစားနိုင်ဖို့ အခွင့်အရေး နည်းလာခဲ့တာ ဖြစ်ပါတယ်။
ရီးရယ်လ် ဂိုးသမားကို တွေ့ရစဉ်
အခုအချိန်မှာတော့ လူနင် ကိုယ်တိုင်က ဒီပွဲမှာ သူပါဝင်နိုင်ဖွယ်မရှိဘူးလို့ ပြောလာခဲ့တာပါ။
လူနင်ဟာ အဓိကဂိုးသမား ကော့တွိုက်စ် ဒဏ်ရာကြောင့် အနားယူနေရချိန်မှာ ဒီရာသီ ရီးရယ်လ်အသင်းရဲ့ ဂိုးပေါက်ကို အကောင်းဆုံး ကာကွယ်နိုင်ခဲ့ပြီး လာလီဂါ ဆုဖလားရရှိအောင် စွမ်းဆောင်ပေးနိုင်ခဲ့တာ ဖြစ်ပါတယ်။
ဒါအပြင် လူနင်ဟာ မန်စီးတီးအသင်းကို အနိုင်ရခဲ့တဲ့ ချန်ပီယံလိဂ် ကွာတားဖိုင်နယ်ပွဲစဉ်မှာ ပင်နယ်တီ ၂ လုံး ကာကွယ်ပေးခဲ့ပြီး အသင်းကို ဆီမီးဖိုင်နယ်တက်စေခဲ့တာပါ။
လက်ရှိအချိန်မှာ ကော့တွိုက်စ်ဟာ ဒဏ်ရာကနေ ပြန်သက်သာလာပြီဖြစ်ပေမယ့် အားလုံးက ချန်ပီယံလိဂ် ဗိုလ်လုပွဲမှာ လူနင်ကို ဆက်ပြီး အသုံးပြုစေချင်နေတာ ဖြစ်ပါတယ်။
ဒါပေမယ့် လူနင်ကိုယ်တိုင်က ချန်ပီယံလိဂ်ဗိုလ်လုပွဲကို ပါဝင်နိုင်ဖွယ် မရှိဘူးလို့ ပြောခဲ့တာကြောင့် နည်းပြ အန်ဆယ်လော့တီဟာ ကော့တွိုက်စ်ကိုသာ ပွဲထွက်ဂိုးသမားအဖြစ် အသုံးပြုတော့မှာပါ။
ကော့တွိုက်စ်ဟာ လီဗာပူးလ်အသင်းကို ၁ ဂိုး- ဂိုးမရှိနဲ့ အနိုင်ရခဲ့တဲ့ ၂၀၂၂ ချန်ပီယံလိဂ်ဗိုလ်လုပွဲမှာ ရီးရယ်လ် အသင်းကို ချန်ပီယံဆုရရှိအောင် လက်စွမ်းပြသနိုင်ခဲ့တာ ဖြစ်ပါတယ်။
Source: Metro
- By CNI
- Category: အားကစား
- Hits: 1719
CNI Sport News
၂၀၂၄ ခုနှစ်၊ မေလ ၃၀
ပြင်သစ်တိုက်စစ်မှူး ဘတ်ပီက သူဟာ အေစီမီလန်အသင်းရဲ့ ပရိသတ်ဖြစ်တာကြောင့် အီတလီမှာ ကစား ဖြစ်မယ်ဆိုရင် အေစီမီလန်အသင်းမှာ ကစားချင်တယ်လို့ ဖွင့်ဟခဲ့ပါတယ်။
ဘတ်ပီက “ကျနော်ဟာ ကလေးဘဝကတည်းက မီလန်ရဲ့ အမာခံပရိသတ်ပါ။ အဲဒါကြောင့် ကျနော်တစ်နေ့နေ့ အီတလီမှာ ကစားဖြစ်ခဲ့မယ်ဆိုရင် အေစီမီလန်မှာ ကစားချင်တယ်လို့ အမြဲတမ်းပြောခဲ့ပါတယ်။ ဘာဖြစ်လာနိုင် မလဲဆိုတာ မသိပေမယ့် ကျနော်ဟာ အေစီမီလန်ပါဝင်တဲ့ အီတလီလိဂ်ပွဲတိုင်းကို အခုထိ ကြည့်ဖြစ်ပါတယ်။ ကျနော့်ရဲ့ မိသားစုဟာ အေစီမီလန်ရဲ့အမာခံ ပရိသတ်တွေဖြစ်တယ်”လို့ Sky Sport Italia နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။
ဇွန်လအကုန်မှာ ပီအက်စ်ဂျီအသင်းနဲ့ စာချုပ်ကုန်ဆုံးမယ့် ဘတ်ပီဟာ ရီးရယ်လ်အသင်းထံ ပြောင်းရွှေ့ဖို့ နီးစပ် နေပြီး မကြာခင်ရက်ပိုင်းအတွင်းမှာ နှစ်ဖက်စလုံးက ဒီအပြောင်းအရွှေ့ကို ကြေညာဖို့ရှိနေတာ ဖြစ်ပါတယ်။
ပီအက်စ်ဂျီအသင်းအတွက် ၃၀၈ ပွဲ ပါဝင်ကစားခဲ့ပြီး ၂၅၆ ဂိုး သွင်းယူနိုင်ခဲ့တဲ့ ဘတ်ပီဟာ ရီးရယ်လ်အသင်းနဲ့ အပြောင်းအရွှေ့ မကြေညာခင်မှာတင် အေစီမီလန်အသင်းမှာ ကစားချင်တဲ့ သူ့ရဲ့အစီအစဉ်ကို ပြောလာခဲ့တာပါ။
အဲဒါကြောင့် ဘတ်ပီဟာ ရီးရယ်လ်အသင်းမှာ ကစားပြီးရင် အီတလီစီးရီးအေမှာ သွားရောက် ကစားဖွယ်ရှိနေတာ ဖြစ်ပါတယ်။
ဘတ်ပီကို တွေ့ရစဉ်
ဘတ်ပီဟာ ပြီးခဲ့တဲ့ Globe Soccer Awards ဆုပေးပွဲမှာ အကောင်းဆုံး ကစားသမားဆုကို ရယူပြီးနောက် သူ့ရဲ့ အသင်းသစ်ကို ရက်ပိုင်းအတွင်း သိရမှာပါလို့ CNN နဲ့ ပြုလုပ်ခဲ့တဲ့ အင်တာဗျူးမှာ ပြောခဲ့တာပါ။
ဘတ်ပီဟာ လက်ရှိ အချိန်မှာတော့ ယူရို ၂၀၂၄ ပြိုင်ပွဲဝင်ဖို့အတွက် လေ့ကျင့်မှုတွေ စတင်နေတဲ့ ပြင်သစ်အသင်းနဲ့ ပူးပေါင်းပြီး လေ့ကျင့်မှုတွေ ပြုလုပ်နေပြီ ဖြစ်ပါတယ်။
ပြင်သစ်အသင်းဟာ ယူရို ၂၀၂၄ ပြိုင်ပွဲအတွက် ဂျာမနီကို မသွားရောက်ခင်မှာ လူဇင်ဘတ်၊ ကနေဒါအသင်းတို့နဲ့ ခြေစမ်းပွဲ ယှဉ်ပြိုင်သွားမှာပါ။
ပြင်သစ်အသင်းဟာ ယူရို ၂၀၂၄ ပြိုင်ပွဲမှာ သြစတြီးယား၊ နယ်သာလန်၊ ပိုလန်အသင်းတို့နဲ့ တစ်အုပ်စုတည်း ကျရောက်နေပြီး အုပ်စုအဖွင့်ပွဲစဉ်အဖြစ် ဇွန်လ ၁၇ ရက်မှာ သြစတြီးယားအသင်းနဲ့ ယှဉ်ပြိုင်ရမှာဖြစ်ပါတယ်။
Source: Sportsmole
- By CNI
- Category: အားကစား
- Hits: 1630
CNI Sport News
၂၀၂၄ ခုနှစ်၊ မေလ ၃၀
အီတလီနဲ့ ဂျူဗင်တပ်စ်အသင်း နောက်ခံလူဟောင်း ဘိုနူချီဟာ ၁၉ နှစ်ကြာ ကစားခဲ့တဲ့ ပရော်ဖက်ရှင်နယ် ကစားသမားဘဝက အနားယူပြီလို့ ကြေညာခဲ့ပါတယ်။
အီတလီအသင်းနဲ့ ယူရို ၂၀၂၀ ပြိုင်ပွဲမှာ ချန်ပီယံဖြစ်ခဲ့တဲ့ ဘိုနူချီဟာ ဂျူဗင်တပ်စ်အသင်းမှာ ၂ ကြိမ်ကစားခဲ့ပြီး စီးရီအေဖလား ၈ ကြိမ်၊ ကိုပါအီတာလီယာဖလား ၄ ကြိမ်နဲ့ အီတလီစူပါဖလား ၅ ကြိမ်ရယူနိုင်ခဲ့တာပါ။
ဂျူဗင်တပ်စ်အသင်းအတွက် ပွဲပေါင်း ၅၀၀ ကျော် ပါဝင်ကစားခဲ့တဲ့ ဘိုနူချီဟာ ပြီးခဲ့တဲ့ရာသီအကုန်မှာ အသင်းက ထွက်ခွာခဲ့ပြီး ဘွန်ဒက်လီဂါကလပ် ယူနီယံဘာလင်အသင်းထံ ပြောင်းရွှေ့ခဲ့ပါတယ်။
ဒါပေမယ့် အသက် ၃၇ နှစ်အရွယ်ရှိ ကစားသမားဟာ ယူနီယံဘာလင်အသင်းမှာ ရာသီဝက်သာကစားပြီး တူရကီ ကလပ် ဖီနာဘာချီအသင်းထံ ပြောင်းရွှေ့ခဲ့တာပါ။
ဘိုနူချီဟာ ဖီနာဘာချီအသင်းအတွက် ၁၃ ပွဲ ကစားခဲ့ပြီး ရာသီအကုန်မှာ ကစားသမားဘဝက အနားယူပြီလို့ ကြေညာခဲ့တာဖြစ်ပါတယ်။
ဘိုနူချီကိုတွေ့ရစဉ်
ဘိုနူချီဟာ ပရော်ဖက်ရှင်နယ် ကစားသမားဘဝမှာ အင်တာမီလန်၊ ထရီဗီဆို၊ ပီဆာ၊ ဘာရီနဲ့ အေစီမီလန်အသင်း တွေမှာလည်း ကစားခဲ့တာပါ။
ဘိုနူချီဟာ ကလပ်အသင်း အများအပြားမှာ ကစားခဲ့ပေမယ့် ဂျူဗင်တပ်စ်အသင်းမှာ ကာလရှည်ကြာ ကစားခဲ့ပြီး ပထမအကြိမ် ကစားခဲ့တုန်းက ၇ ရာသီ၊ ဒုတိယအကြိမ်မှာတော့ ၅ ရာသီကြာ ကစားခဲ့တာဖြစ်ပါတယ်။
ဂျူဗင်တပ်စ်အသင်းက ဘိုနူချီအနေနဲ့ အနာဂတ်မှာ အကောင်းဆုံးဖြစ်ဖို့ ဆုတောင်းပေးတယ်လို့ ကြေညာချက် ထုတ်ပြန်ခဲ့တာပါ။
ဘိုနူချီဟာ အီတလီအသင်းမှာ ၂၀၁၀ ခုနှစ်က စတင်ကစားပြီး ပွဲပေါင်း ၁၂၁ ပွဲ ပါဝင်ကစားခဲ့ကာ အင်္ဂလန်အသင်းနဲ့ ယူရို ၂၀၂၀ ဗိုလ်လုပွဲမှာ သွင်းယူခဲ့တဲ့ ဂိုးအပါအဝင် ၈ ဂိုးသွင်းယူခဲ့တာ ဖြစ်ပါတယ်။
ဘိုနူချီဟာ ယူရို ၂၀၂၄ ပြိုင်ပွဲဝင်မယ့် အီတလီအသင်းမှာ ရွေးချယ်ခံရဖို့ မျှော်လင့်ခဲ့ပေမယ့် ရွေးချယ်ခံရခြင်း မရှိတာပါ။
ဘိုနူချီဟာ အီတလီအသင်းနဲ့ ယူရို ၂၀၂၀ ချန်ပီယံဆုအပြင် ကွန်ဖက်ဒရေးရှင်းဖလားပြိုင်ပွဲမှာ တတိယ ၁ ကြိမ်၊ နေးရှင်းလိဂ်ပြိုင်ပွဲမှာ တတိယ ၂ ကြိမ်ရယူနိုင်ခဲ့တာ ဖြစ်ပါတယ်။
Source: DailyMail
- By CNI
- Category: အားကစား
- Hits: 1544
CNI Sport News
၂၀၂၄ ခုနှစ်၊ မေလ ၃၀
ဘိုင်ယန်မြူးနစ်အသင်းဟာ ကွန်ပနီကို နည်းပြသစ်အဖြစ် ၃ နှစ် စာချုပ်ချုပ်ဆိုကာ ခန့်အပ်လိုက်ပြီလို့ တရားဝင် ကြေညာခဲ့ပါတယ်။
ကွန်ပနီဟာ ဘိုင်ယန်မြူးနစ်အသင်း နည်းပြသစ်အဖြစ် တူချယ်လ်ရဲ့နေရာမှာ အစားထိုး ဝင်ရောက်မှာဖြစ်ပြီး ဘိုင်ယန်မြူးနစ်အသင်းဟာ ကွန်ပနီအတွက် ဘန်လေအသင်းကို လျော်ကြေး ပေါင် ၁၀.၂ သန်း ပေးချေခဲ့ရတယ်လို့ သိရပါတယ်။
ကွန်ပနီဟာ အသင်းဟောင်း ဘန်လေအသင်းကို ပြီးခဲ့တဲ့ရာသီက ချန်ပီယံရှစ်ပြိုင်ပွဲကနေ ပရီးမီးယားလိဂ်ကို တန်းတက်အောင် ကိုင်တွယ်ပေးနိုင်ခဲ့ပေမယ့် ဒီရာသီမှာတော့ ဘန်လေအသင်းဟာ ချန်ပီယံရှစ်ပြိုင်ပွဲကို ပြန်ပြီး တန်းဆင်းခဲ့ရတာ ဖြစ်ပါတယ်။
ဒါပေမယ့် နည်းပြသစ် ရှာဖွေနေတဲ့ ဘိုင်ယန်မြူးနစ်အသင်းဟာ ကွန်ပနီကို နည်းပြသစ်အဖြစ် ခန့်အပ်ဖို့ ကြိုးစားခဲ့တာပါ။
ကွန်ပနီကိုတွေ့ရစဉ်
ကွန်ပနီကိုယ်တိုင်ကလည်း ဘိုင်ယန်မြူးနစ်အသင်းကို ကိုင်တွယ်ဖို့ စိတ်ဝင်စားခဲ့တာကြောင့် ဂျာမနီကလပ်ဟာ ဘန်လေအသင်းကို လျော်ကြေးပေးပြီး နည်းပြသစ်အဖြစ် ခန့်အပ်ခဲ့တာ ဖြစ်ပါတယ်။
ကွန်ပနီက ဘိုင်ယန်မြူးနစ်အသင်းအတွက် အလုပ်လုပ်ခွင့်ရတာကို အလွန်ဂုဏ်ယူမိတယ်လို့ ပြောခဲတာပါ။
ကွန်ပနီက “ဘိုင်ယန်မြူးနစ်မှာ စိန်ခေါ်မှုတွေကို မျှော်လင့်နေပြီး နည်းပြတစ်ဦးအနေနဲ့ ကိုယ်သွားချင်တဲ့ ပုံစံအတိုင်း ဆက်ပြီးလုပ်မှာပါ။ ကျနော်ဟာ ဘောလုံးပိုင်ဆိုင်မှု အသာစီးနဲ့ ကစားပြီး ဖန်တီးမှုပြုလုပ်ကာ ကွင်းထဲမှာ ရဲရဲရင့်ရင့် ကစားတာကို နှစ်သက်ပါတယ်။ ကစားသမားတွေနဲ့ လက်တွဲပြီး အသင်းကို အကောင်းဆုံး တည်ဆောက်သွားမယ်”လို့ ပြောခဲ့ပါတယ်။
ဘိုင်ယန်မြူးနစ်အသင်းဟာ ပြီးခဲ့တဲ့ရာသီက ဆုဖလားလက်မဲ့နဲ့ ရာသီအဆုံးသတ်ခဲ့ပြီး ဘွန်ဒက်လီဂါပြိုင်ပွဲမှာ အဆင့် ၃ နေရာ ရပ်တည်ကာ ၂၀၁၀-၁၁ ရာသီနောက်ပိုင်း လိဂ်ပြိုင်ပွဲမှာ အဆိုးရွားဆုံးအဆင့် ရပ်တည်မှု ဖြစ်ခဲ့တာပါ။
အဲဒါကြောင့် ကွန်ပနီဟာ ဘိုင်ယန်မြူးနစ်အသင်းကို ဆုဖလား အောင်မြင်မှုတွေပြန်ပြီး ရရှိအောင် လုပ်ဆောင်ပေးရတော့မှာ ဖြစ်ပါတယ်။
Source: BBC
- By CNI
- Category: အားကစား
- Hits: 1807
CNI Sport News
၂၀၂၄ ခုနှစ်၊ မေလ ၃၀
ဥရောပတတိယတန်းစား ပြိုင်ပွဲဖြစ်တဲ့ ယူရိုပါကွန်းဖရန့်လိဂ် ဗိုလ်လုပွဲမှာ အိုလံပီယာကို့စ်အသင်းဟာ ဖီအိုရင်တီးနားအသင်းကို အနိုင်ရပြီး ချန်ပီယံဆုကို ရရှိသွားခဲ့ပါတယ်။
ဂရိမြေမှာကစားခဲ့တဲ့ ဒီပွဲမှာ ပွဲချိန်မိနစ် ၉၀ ပြည့်တဲ့အထိ ဂိုးမရှိ သရေကျနေတာကြောင့် အချိန်ပို ဆက်ကစားခဲ့ ရပြီး အချိန်ပို ၁၁၆ မိနစ်မှာ အယ်လ်ကာဘီက အိုလံပီယာကို့စ်အသင်းအတွက် အနိုင်ဂိုးသွင်းယူပေးခဲ့တာပါ။
အဲဒါကြောင့် အိုလံပီယာကို့စ်အသင်းဟာ ဖီအိုရင်တီးနားအသင်းကို ၁ ဂိုး- ဂိုးမရှိနဲ့ အနိုင်ရပြီး ယူရိုပါကွန်းဖရန့်လိဂ် ချန်ပီယံဆုကို ရယူနိုင်ခဲ့တာ ဖြစ်ပါတယ်။
အိုလံပီယာကို့စ်အသင်းဟာ အသင်းသမိုင်းတစ်လျှောက် ပထမဆုံး ဥရောပဖလား ရယူနိုင်ခဲ့သလို ဥရောပဖလား ရယူနိုင်တဲ့ ပထမဆုံး ဂရိကလပ်အဖြစ်လည်း မှတ်တမ်းဝင်ခဲ့တာပါ။
ဖီအိုရင်တီးနားအသင်းကတော့ ယူရိုပါကွန်းဖရန့်လိဂ်ပြိုင်ပွဲမှာ ၂ နှစ်ဆက်တိုက် ဒုတိယနဲ့သာ ကျေနပ်ခဲ့ရတာ ဖြစ်ပါတယ်။
အီတလီကလပ်ဟာ ပြီးခဲ့တဲ့နှစ်က ဗိုလ်လုပွဲမှာ ဝက်စ်ဟမ်းအသင်းကို မိနစ် ၉၀ မှာပေးခဲ့ရတဲ့ ဂိုးကြောင့် အရေးနိမ့် ခဲ့ပြီး အခုလည်း အချိန်ပိုပွဲပြီးဆုံးဖို့ မိနစ်အနည်းငယ်အလိုမှာ ပေးခဲ့ရတဲ့ ဂိုးကြောင့် အရေးနိမ့်ခဲ့တာပါ။
အိုလံပီယာကို့စ်အသင်းကို တွေ့ရစဉ်
ဖီအိုရင်တီးနားအသင်းနည်းပြ အီတလီယာနိုက ဒုတိယမြောက်စိတ်ပျက် စရာဖြစ်ခဲ့ပြီး သူ့ရဲ့ကစားသမားတွေ ငိုကြွေးတာကို မြင်တွေ့ရတာ နာကျင်တယ်လို့ ပွဲအပြီးမှာ ပြောခဲ့ပါတယ်။
ဂရိဝန်ကြီးချုပ် မစ်ဆိုတာကစ်က ယူရိုပါကွန်းဖရန့်လိဂ်ဖလား ရယူနိုင်ခဲ့တဲ့ အိုလံပီယာကို့စ်အသင်းကို ချီးကျူး ဂုဏ်ပြုခဲ့ပြီး ကလပ်အသင်းအတွက် သာမကဘဲ ဂရိဘောလုံးလောက တစ်ခုလုံးအတွက် စိတ်လှုပ်ရှားကောင်းတဲ့ ညလို့ ပြောကြားခဲ့ပါတယ်။
အိုလံပီယာကို့စ်အသင်းနည်းပြ မန်ဒီလီဘာဟာ ပြီးခဲ့တဲ့ရာသီက ဆီဗီလာအသင်းနဲ့ ယူရိုပါလိဂ်ဖလား ရယူနိုင်ခဲ့ပြီး ဒီနှစ်မှာ ဂရိကလပ်နဲ့ ယူရိုပါကွန်းဖရန့်လိဂ်ဖလား ရယူနိုင်ခဲ့တာ ဖြစ်ပါတယ်။
မန်ဒီလီဘာက “အရင်က ကလပ်အသင်း မရယူနိုင်ခဲ့တဲ့ အောင်မြင်မှုကို ရယူပေးနိုင်တဲ့အတွက် ကျနော်အလွန် ပျော်ရွှင်ပါတယ်။ ကျနော်တို့ အောင်ပွဲခံမှုတွေ ပြုလုပ်ပြီးရင် နောက်လာမယ့် အရာတွေအတွက် အလုပ်ပြန်ပြီး လုပ်သွားရမှာပါ”လို့ ပြောပါတယ်။
အိုလံပီယာကို့စ်အသင်းဟာ ဒီပြိုင်ပွဲမှာ ချန်ပီယံဖြစ်ခဲ့တဲ့အတွက် လာမယ့်ရာသီ ယူရိုပါလိဂ်ပြိုင်ပွဲကို ယှဉ်ပြိုင်ခွင့်ရခဲ့ပြီး ဖီအိုရင်တီးနားအသင်းဟာ စီးရီးအေ အဆင့် ၈ နေရာမှာ ရပ်တည်ခဲ့တာကြောင့် ကွန်းဖရန့်လိဂ်ပြိုင်ပွဲမှာ ထပ်ပြီးယှဉ်ပြိုင်ရမှာ ဖြစ်ပါတယ်။
Source:ESPN
- By CNI
- Category: အားကစား
- Hits: 1113
CNI Sport News
၂၀၂၄ ခုနှစ်၊ မေလ ၂၉
ရီးရယ်လ်အသင်းကို ၃၆ ကြိမ်မြောက် လာလီဂါဖလားရရှိအောင် အဓိကနေရာက စွမ်းဆောင်ပေးခဲ့တဲ့ ဘယ်လင်ဂမ်ဟာ ၂၀၂၃-၂၄ ရာသီ စပိန်လာလီဂါ အကောင်းဆုံး ကစားသမားအဖြစ် မဲပေးရွေးချယ်ခြင်း ခံခဲ့ရပါတယ်။
ပရိသတ်တွေ၊ အသင်းခေါင်းဆောင်တွေနဲ့ ပညာရှင်တွေက မဲပေးရွေးချယ်ခဲ့တဲ့ ဒီဆုကို ဘယ်လင်ဂမ်ဟာ အသင်းဖော် ဗီနီစီးယက်စ်၊ အသလက်တီကိုအသင်းက ဂရစ်ဇ်မန်း၊ ဘာစီလိုနာအသင်းက လီဝန်ဒေါစကီးနဲ့ ဂျီရိုနာအသင်းက ဒေ့ါဗ်ဘိခ်တို့ကို မဲအသာရပြီး ရရှိခဲ့တာပါ။
ဘယ်လင်ဂမ်ဟာ လာလီဂါပွဲပေါင်း ၂၈ ပွဲ ကစားခဲ့တာမှာ ၁၉ ဂိုးသွင်းပြီး ၆ ဂိုး ဖန်တီးနိုင်ခဲ့သလို ရီးရယ်လ်အသင်း အတွက် ကစားထားတဲ့ ပြိုင်ပွဲစုံ ၄၁ ပွဲမှာ ၂၃ ဂိုးသွင်းပြီး ၁၂ ဂိုးဖန်တီးကာ ခြေစွမ်းပြသထားတာ ဖြစ်ပါတယ်။
ဘယ်လင်ဂမ်ဟာ ချန်ပီယံလိဂ် ဗိုလ်လုပွဲအတွက် ရီးရယ်လ်အသင်းနဲ့ ပြင်ဆင်မှုတွေ ပြုလုပ်နေတာကြောင့် ဆုပေး ပွဲကို တက်ရောက်နိုင်ခဲ့ခြင်း မရှိပေမယ့် ဆုရခဲ့တဲ့အတွက် ဂုဏ်ယူတယ်လို့ ပြောခဲ့ပါတယ်။
ယာမဲလ်ကို တွေ့ရစဉ်
ဘယ်လင်ဂမ်က “ဒီဆုအတွက် ကျနော့်ရဲ့ အသင်းဖော်တွေ၊ နည်းပြအဖွဲ့ဝင်တွေနဲ့ အရေးကြီးဆုံးကတော့ ကမ္ဘာ့ အကောင်းဆုံး ကလပ်အသင်း ပရိသတ်တွေကို ရည်ညွှန်းချင်ပါတယ်။ ဒီအသင်းမှာ ကစားရတဲ့အချိန်တိုင်း ကျနော် ပျော်ရွှင်ပါတယ်”လို့ ပြောခဲ့ပါတယ်။
ဘယ်လင်ဂမ်ဟာ ရီးရယ်လ်အသင်းထံ မပြောင်းရွှေ့ခင် ဒေါ့မွန်အသင်းမှာ ကစားခဲ့ချိန်က ၂၀၂၂-၂၃ ရာသီ ဘွန်ဒက်လီဂါ အကောင်းဆုံး ကစားသမားဆုကို ရယူနိုင်ခဲ့တာ ဖြစ်ပါတယ်။
၂၀၂၃-၂၄ ရာသီအတွက် လာလီဂါ အကောင်းဆုံးဆုတွေဖြစ်တဲ့ ယူ-၂၃ အကောင်းဆုံး ကစားသမားဆုကို ဘာစီလိုနာ အသင်းကြယ်ပွင့် ယာမဲလ်က ရရှိခဲ့ပြီး အကောင်းဆုံးသွင်းဂိုးဆုကို အိုဆာဆူနာအသင်းက အေရီဆိုရဲ့ သွင်းဂိုးက ရရှိခဲ့တာပါ။
အကောင်းဆုံး နည်းပြဆုကိုတော့ ဂျီရိုနာအသင်းကို အသင်းသမိုင်းတစ်လျှောက် ပထမဆုံးအကြိမ် ချန်ပီယံလိဂ် ဝင်ခွင့်ရရှိအောင် ကိုင်တွယ်ပေးနိုင်ခဲ့တဲ့ နည်းပြ မီချဲလ်က ရရှိသွားခဲ့တာဖြစ်ပါတယ်။
Source: CNA
- By CNI
- Category: အားကစား
- Hits: 2271
CNI Sport News
၂၀၂၄ ခုနှစ်၊ မေလ ၂၉
ဒေါ့မွန်အသင်းဟာ ဂီတာဖေးအသင်းမှာ အငှားသွားရောက်ကစားပြီး ခြေစွမ်းပြသခဲ့တဲ့ ဂရင်းဝုဒ်ကို ခေါ်ယူဖို့ စိတ်ဝင်စားနေတာကြောင့် ချန်ပီယံလိဂ် ဗိုလ်လုပွဲအပြီးမှာ ဆုံးဖြတ်ချက်ချဖို့ ရှိနေပါတယ်။
ဂရင်းဝုဒ်ဟာ ဂီတာဖေးအသင်းနဲ့ အငှားစာချုပ် ကုန်ဆုံးချိန်မှာ ယူနိုက်တက်အသင်းထံ ပြန်လာရမှာဖြစ်ပေမယ့် ဂျာမနီသတင်းတွေမှာ ဒေါ့မွန်အသင်းဟာ သူ့ကို လာမယ့်ရာသီအတွက် အငှားနဲ့ ခေါ်ယူဖို့ ဆန္ဒရှိနေတယ်လို့ ဖော်ပြထားတာပါ။
ဒေါ့မွန်အသင်းရဲ့ အားကစားဒါရိုက်တာ ဆီဘတ်စတီယန်ခါးလ်က နွေရာသီမှာ ဂရင်းဝုဒ်အတွက် ဖြစ်နိုင်ဖွယ်ရှိတဲ့ အပြောင်းအရွှေ့ကို ငြင်းဆိုခဲ့ခြင်းမရှိတာ ဖြစ်ပါတယ်။
ဆီဘတ်စတီယန်ခါးလ်က “အခုအချိန်မှာတော့ ထွက်ပေါ်နေတဲ့ ထင်ကြေးတွေအကြောင်းကို မပြောချင်ပါဘူး။ စနေနေ့မှာ ဗိုလ်လုပွဲကို အရင်ဆုံးကစားသွားရမှာပါ။ ကျနော်တို့ဟာ လာမယ့်ရာသီအတွက် အစီအစဉ်တွေရှိနေပြီး ဗိုလ်လုပွဲကို အာရုံစိုက်ပြီးမှသာ ဘယ်လိုဆက်သွားကြမလဲဆိုတာ ကြည့်ရမှာပါ။ ဂရင်းဝုဒ်နဲ့ ပတ်သက်ပြီး အခု အချိန်မှာ မပြောချင်သေးပါဘူး”လို့ ပြောပါတယ်။
ဂရင်းဝုဒ်ဟာ ဂီတာဖေးအသင်းအတွက် ပြိုင်ပွဲစုံ ၃၆ ပွဲကစားပြီး ၁၀ ဂိုးသွင်းယူကာ အသင်းရဲ့ တစ်နှစ်တာ အကောင်းဆုံး ကစားသမားဆုကို ရယူနိုင်ခဲ့တာ ဖြစ်ပါတယ်။
ဂရင်းဝုဒ်ကို တွေ့ရစဉ်
အဲဒါကြောင့် ဂရင်းဝုဒ်ကို ခေါ်ယူဖို့ အသင်းအချို့က စိတ်ဝင်စားနေပြီး ဒီအထဲမှာ ဒေါ့မွန်အသင်းလည်း ပါဝင် လာခဲ့တာပါ။ ဂရင်းဝုဒ်ဟာ ယူနိုက်တက်အသင်းထံ ပြန်ရမှာဖြစ်ပေမယ့် အသင်းကလည်း သူ့ကို အပြီးသတ် ရောင်းချ ဒါမှမဟုတ် အငှားထပ်ပြီးချဖို့ ဆုံးဖြတ်ထားတာ ဖြစ်ပါတယ်။
ဒေါ့မွန်အသင်းဟာ ယူနိုက်တက်အသင်းဆီကနေ ပြီးခဲ့တဲ့ ဇန်နဝါရီလက ဆန်ချိုကို အငှားနဲ့ ခေါ်ယူခဲ့ပြီး စာချုပ်ထဲ မှာ အပြီးသတ် ဝယ်ယူခွင့် မပါဝင်တာကြောင့် သူ့အစား ဂရင်းဝုဒ်ကို ခေါ်ယူဖို့ စိတ်ဝင်စားလာခဲ့တာပါ။
ဆန်ချိုဟာ ဒေါ့မွန်အသင်းမှာ ခြေစွမ်းပြသနေပြီး အသင်းကို ချန်ပီယံလိဂ် ဗိုလ်လုပွဲ တက်နိုင်အောင် အဓိက အခန်းကဏ္ဍကနေ လုပ်ဆောင်ပေးခဲ့တာ ဖြစ်ပါတယ်။
ဒေါ့မွန်အသင်းဟာ ကစားသမားဟောင်း ဆန်ချိုကို အပြီးသတ် ခေါ်ယူချင်ပေမယ့် ယူနိုက်တက်အသင်း သတ်မှတ်ထားတဲ့ ပြောင်းရွှေ့ကြေးကြောင့် အခက်တွေ့နေရတာပါ။
ဂရင်းဝုဒ်ကို ခေါ်ယူဖို့ ဒေါ့မွန်အသင်း အပါအဝင် အသင်းအချို့က စိတ်ဝင်စားနေပေမယ့် သူကတော့ ဂီတာဖေး အသင်းမှာ ဆက်ပြီး ရှိချင်သလို စပိန်ကလပ်ကလည်း သူ့ကို အသင်းမှာ ဆက်ပြီးရှိစေချင်တယ်လို့ ထုတ်ဖော် ပြောထားတာ ဖြစ်ပါတယ်။
Source: DailyMail
- By CNI
- Category: အားကစား
- Hits: 1424
CNI Sport News
၂၀၂၄ ခုနှစ်၊ မေလ ၂၉
စပါးအသင်းဟာ လိုက်ပ်ဇစ်အသင်းကနေ အငှားနဲ့ ခေါ်ယူထားတဲ့ တိုက်စစ်မှူး တီမိုဝါနာရဲ့ အငှားစာချုပ်ကို လာမယ့်ရာသီအကုန်ထိ သက်တမ်းတိုး လိုက်ပါတယ်။
တီမိုဝါနာဟာ ပြီးခဲ့တဲ့ ဇန်နဝါရီက လိုက်ပ်ဇစ်အသင်းကနေ အငှားနဲ့ ရောက်ရှိလာခဲ့ပြီး စပါးအသင်းအတွက် ၁၄ ပွဲ ကစားခဲ့တာမှာ ၂ ဂိုး သွင်းယူနိုင်ခဲ့ပြီး ၃ ဂိုး ဖန်တီးနိုင်ခဲ့ပါတယ်။
တီမိုဝါနာဟာ စပါးအသင်းမှာ ရာသီဝက် အငှားကစားချိန် ခြေစွမ်းပြသနိုင်ခဲ့တာကြောင့် နည်းပြ ပိုစတီကိုဂလူးက နောက်ထပ် တစ်ရာသီ ထပ်မံခေါ်ယူဖို့ ဆုံးဖြတ်ခဲ့ပါတယ်။
စပါးအသင်းဟာ တီမိုဝါနာနဲ့ ချုပ်ဆိုထားတဲ့ အငှားစာချုပ် ကုန်ဆုံးချိန်မှာ လိုက်ပ်ဇစ်အသင်းကနေ ယူရို ၁၀ သန်း နဲ့ အပြီးသတ် ဝယ်ယူခွင့် ရှိနေတာပါ။
ဂျာမနီကစားသမားဟာ အာဆင်နယ်အသင်းကို ၃ ဂိုး-၂ ဂိုးနဲ့ အရေးနိမ့်ခဲ့တဲ့ ပရီးမီးယားလိဂ်ပွဲစဉ်မှာ တံကောက်ကြောဒဏ်ရာ ရရှိသွားခဲ့တာကြောင့် စပါးအသင်းရဲ့ နောက်ဆုံး ၅ ပွဲစလုံးပါဝင်နိုင်ခဲ့ခြင်း မရှိတာ ဖြစ်ပါတယ်။
တီမိုဝါနာကို တွေ့ရစဉ်
စပါးအသင်းက အငှားစာချုပ် သက်တမ်းတိုးပြီးနောက်မှာ တီမိုဝါနာက အသင်းမှာ ဆက်ရှိရမှာဖြစ်လို့ ပျော်ရွှင်ပြီး မယုံနိုင်လောက်စရာ ရာသီတစ်ခုအတွက် အားကစားကွင်းမှာ အားလုံးကိုတွေ့ဖို့ စောင့်မျှော်နေတယ်လို့ သူ့ရဲ့ အင်စတာဂရမ်မှာ ရေးသားထားခဲ့တာပါ။
တီမိုဝါနာဟာ ၂၀၂၂ ခုနှစ်က လိုက်ပ်ဇစ်အသင်းထံ ပြန်လည်မပြောင်းရွှေ့ခင် ချယ်လ်ဆီးအသင်းမှာ ၂ ရာသီကြာ ကစားခဲ့ပြီး ချန်ပီယံလိဂ်၊ UEFA စူပါဖလားနဲ့ ကလပ်ကမ္ဘာ့ဖလားတို့ကို ရယူနိုင်ခဲ့ပါတယ်။
ဒါပေမယ့် တီမိုဝါနာဟာ အသင်းဟောင်း လိုက်ပ်ဇစ်အသင်းကို ပြန်ပြောင်းရွှေ့ခဲ့ချိန်မှာ ပွဲကစားခွင့် အကန့်အသတ် နဲ့သာ ရရှိတဲ့အတွက် စပါးအသင်းထံ အငှားနဲ့ ပြောင်းရွှေ့လာခဲ့တာပါ။
တီမိုဝါနာဟာ ဂျာမနီအသင်းအတွက် ၅၇ ပွဲ ကစားထားပြီး ၂၄ ဂိုး သွင်းယူထားပေမယ့် ၂၀၂၃ ခုနှစ်၊ မတ်လက ဘယ်လ်ဂျီယံအသင်းနဲ့ ခြေစမ်းပွဲမှာ နိုင်ငံအသင်းအတွက် နောက်ဆုံး ပါဝင်ကစားခဲ့ရပါတယ်။
တီမိုဝါနာဟာ ယူရို ၂၀၂၄ ပြိုင်ပွဲဝင်မယ့် ဂျာမနီအသင်း လူစာရင်းမှာလည်း ရွေးချယ်ခြင်း မခံခဲ့ရတာ ဖြစ်ပါတယ်။
Source: BBC
- By CNI
- Category: အားကစား
- Hits: 1191
CNI Sport News
၂၀၂၄ ခုနှစ်၊ မေလ ၂၉
ဒေါ့မွန်အသင်းနည်းပြ တာဇစ်က ချန်ပီယံလိဂ် ဗိုလ်လုပွဲတိုင်း နိုင်ပွဲရယူနိုင်တဲ့ ရီးရယ်လ်အသင်းရဲ့ မှတ်တမ်း ကောင်းကို သူတို့ချိုးဖျက်နိုင်တယ်လို့ ပြောလိုက်ပါတယ်။
တာဇစ်က “ကြီးမားတဲ့အရာတွေကို အောင်မြင်နိုင်တယ်ဆိုတဲ့ ယုံကြည်မှု ရှိရပါမယ်။ ဆုဖလားရယူပြီး ဒေါ့မွန်ကို ပြန်နိုင်ဖို့ ကျနော်တို့ အရာအားလုံးကို မြှုပ်နှံထားရပါမယ်။ အရေးကြီးဆုံးက ချန်ပီယံလိဂ်ဖလားကို ရယူချင်ရင် ချန်ပီယံတွေကို အနိုင်ယူဖို့ပါ။ ရီးရယ်လ်အသင်းဟာ ချန်ပီယံလိဂ် ဗိုလ်လုပွဲတက်တိုင်း အရေးမနိမ့်ခဲ့ပါဘူး။ အခု အချိန်မှာတော့ ဒီစံချိန်ကို ချိုးဖျက်ဖို့ အချိန်တန်ပါပြီ”လို့ ပွဲကြိုသတင်းစာ ရှင်းလင်းပွဲမှာ ပြောခဲ့ပါတယ်။
ရီးရယ်လ်အသင်းဟာ ဥရောပဖလားပြိုင်ပွဲကနေ ချန်ပီယံလိဂ်ဖလားပြိုင်ပွဲလို့ အမည်ပြောင်းလဲ ကျင်းပခဲ့တဲ့ ၁၉၉၂ ခုနှစ်ကတည်းက ဗိုလ်လုပွဲတက်ခဲ့တဲ့ ၈ ကြိမ်စလုံး ချန်ပီယံဆုကို ရယူနိုင်ခဲ့တာ ဖြစ်ပါတယ်။
ရီးရယ်လ်အသင်းဟာ ချန်ပီယံလိဂ်ပြိုင်ပွဲရဲ့ ပြီးခဲ့တဲ့ ၁၀ ရာသီအတွင်းမှာ ချန်ပီယံဆုကို ၅ ကြိမ်အထိ ရယူနိုင်ခဲ့ပြီး ဆုဖလားပေါင်း ၁၄ ကြိမ်အထိ စံချိန်တင်ရယူထားတာပါ။
ရီးရယ်လ်အသင်းကိုတွေ့ရစဉ်
ဒေါ့မွန်အသင်းဟာ ချန်ပီယံလိဂ်ပြိုင်ပွဲမှာ ၁၉၉၆-၉၇ ရာသီက ချန်ပီယံဆုကို ရယူနိုင်ခဲ့ပြီး ၂၀၁၂-၁၃ ရာသီက ဗိုလ်လုပွဲထပ်ပြီး ရောက်ရှိခဲ့တာ ဖြစ်ပါတယ်။
ဒါပေမယ့် ဘိုင်ယန်မြူးနစ်အသင်းကို အရေးနိမ့်ခဲ့ပြီး ဒုတိယနဲ့သာ ကျေနပ်ခဲ့ရကာ အခုရာသီမှာ နောက်ထပ် တစ်ကြိမ် ချန်ပီယံလိဂ် ဗိုလ်လုပွဲကို တက်နိုင်ခဲ့တာပါ။
အခုတစ်ကြိမ်မှာတော့ ဒေါ့မွန်အသင်းဟာ ချန်ပီယံဆုကို ရယူနိုင်ဖို့ စိတ်အားထက်သန်နေပြီး ရီးရယ်လ်အသင်းရဲ့ ချန်ပီယံလိဂ်ဗိုလ်လုပွဲ မှတ်တမ်းကောင်းကို ချိုးဖျက်သွားမယ်လို့ နည်းပြ တာဇစ်က ပြောခဲ့တာ ဖြစ်ပါတယ်။
ဒေါ့မွန်အသင်းဟာ ဒီရာသီ ဘွန်ဒက်လီဂါပြိုင်ပွဲမှာ အဆင့် ၅ နေရာ ရပ်တည်နိုင်ခဲ့တဲ့အတွက် လာမယ့်ရာသီ ချန်ပီယံလိဂ် ဝင်ခွင့်ကို ရယူနိုင်ခဲ့တာပါ။
ဒေါ့မွန်နဲ့ ရီးရယ်လ်အသင်းတို့ရဲ့ ချန်ပီယံလိဂ်ဗိုလ်လုပွဲကို ဇွန် ၂ ရက် ဝင်ဘာလေကွင်းမှာ ယှဉ်ပြိုင်သွားမှာ ဖြစ်ပါတယ်။
Source: CNA
- By CNI
- Category: အားကစား
- Hits: 927
CNI Sport News
၂၀၂၄ ခုနှစ်၊ မေလ ၂၈
လီဗာပူးလ်အသင်းခေါင်းဆေင် ဗန်ဒိုက်က သူဟာ လာမယ့်ရာသီ ဆက်ရှိမှာဖြစ်သလို နည်းပြသစ် အာနီဆလော့ ဟာ အသင်းမှာ ကြီးမားတဲ့ အောင်မြင်မှုရမယ်လို့ ပြောလိုက်ပါတယ်။
ဗန်ဒိုက်က “ကျနော့်ရဲ့ စာချုပ်က တစ်နှစ်ကျန်ရှိနေပါသေးတယ်။ ကျနော်ဟာ အသင်းခေါင်းဆောင်ဖြစ်ပြီး နည်းပြသစ်အတွက် ကျနော်ရှိနေတယ်ဆိုတာ ရှင်းရှင်းလင်းလင်း ပြောထားပါတယ်။ လာမယ့်ရာသီမှာ အပြောင်းအလဲတွေ အများကြီးရှိမှာဖြစ်ပေမယ့် ကျနော်တို့ကြီးမားတဲ့ အောင်မြင်မှုတွေ ရနိုင်မယ်ဆိုတာ ကျနော်ယုံကြည်မှုရှိပါတယ်။ အသင်းနဲ့ အနာဂတ်အကြောင်းကို ပြောနေပေမယ့် ကျနော့်ရဲ့ လက်ရှိ အာရုံစူးစိုက် မှုက နိုင်ငံအတွက် အပြည့်အဝပါ”လို့ ပြောခဲ့ပါတယ်။
ဖီယင်နုအသင်းနဲ့အတူ ဒတ်ချ်အမှတ်ပေးလိဂ်နဲ့ ဖလားတို့ကို ရယူနိုင်ခဲ့တဲ့ အာနီဆလော့ဟာ မကြာခင်မှာ လီဗာပူးလ်အသင်း နည်းပြတာဝန်ကို စပြီးယူတော့မှာ ဖြစ်ပါတယ်။
လီဗာပူးလ်အသင်း နည်းပြဖြစ်လာတဲ့ အာနီဆလော့ကို တွေ့ရစဉ်
လီဗာပူးလ်အသင်းခေါင်းဆောင် ဗန်ဒိုက်က နည်းပြသစ် အာနီဆလော့ကို ကြိုဆိုခဲ့ပြီး လာမယ့်ရာသီအတွက် နည်းပြနဲ့ ဆွေးနွေးမှုတွေ ပြုလုပ်နေခဲ့တာပါ။
ဗန်ဒိုက် ကိုယ်တိုင်ကလည်း လီဗာပူးလ်အသင်းမှာ အနည်းဆုံး ၁ နှစ်လောက် ဆက်ပြီးရှိနေနိုင်ဖို့ စီစဉ်ထား တယ်လို့ ဝန်ခံခဲ့ပါတယ်။
လီဗာပူးလ်အသင်းရဲ့ ဒတ်ချ်ကွင်းလယ်လူ ဂရာဗန်ဘာ့ချ်က နည်းပြ အာနီဆလော့ဟာ သူ့ရဲ့ကစားသမားဘဝကို ကောင်းနိုင်တယ်လို့ထင်ပြီး သူဟာ ဘောလုံးကို ကောင်းမွန်စွာကစားချင်တဲ့ နည်းပြတစ်ဦးလို့ မှတ်ချက်ပေးခဲ့ တာပါ။
အာနီဆလော့ဟာ ကလော့ပ်ထားခဲ့တဲ့ အသင်းကို အကောင်းဆုံးဖြစ်အောင် တည်ဆောက်ပြီး ဆုဖလားတွေ ရယူပေးနိုင်ဖို့ လုပ်ဆောင်ရမှာဖြစ်ပါတယ်။
အာနီဆလော့ဟာ လီဗာပူးလ်အသင်းကို စပြီးကိုင်တွယ်ချိန်မှာ နိုင်ငံအသင်းတွေအတွက် သွားရောက် ကစားပေးနေရတဲ့ ကစားသမားတွေ မပါဝင်ဘဲ စတင်ရမှာပါ။
လီဗာပူးလ်အသင်းဟာ ယူရို ၂၀၂၄ ပြိုင်ပွဲနဲ့ ကိုပါအမေရိကဖလား ပြိုင်ပွဲတွေအတွက် ကစားသမားအချို့ကို နိုင်ငံအသင်းတွေထံ စေလွှတ်ထားရတာ ဖြစ်ပါတယ်။
Source: Goal
Page 182 of 428
Connect with us
